ZU ZUAR FANU BY Jona Fanai Jr.

Ngaia
Site Admin
Posts: 25813
Joined: April 30th, 2016, 4:07 pm

ZU ZUAR FANU BY Jona Fanai Jr.

Unread post by Ngaia » June 3rd, 2016, 12:42 am

ZU ZUAR FANU
(true story)

Ka nu hnungzâng chu a ri zawt zawt a,'Mami pa zahngai rawh ana lutuk' tiin a rak tuarh tuarh a, invên ngaihna a hre si loa a hmai a hup tlawk tlawk a. Tlan chhiat atum lahin ka pa chuan a samah thamin a hnuk tlu leh thuai thin a. Ka khawngaih lutuk chuan ka theih ang tawkin ka nu chu chhan ve ka tuma, chutah ka pa thinrim chuam dimna tel miah lovin ka hmaiah chuan min bêng thuai a. Ka tlukna lamah chuan ka hnar ka sawh avangin a thi nghal zawih zawih a, ka hmai te chu a thip nghal vawng vawng bawk a. Ka nu min khawngaih lutuk chuan thei leh thei lovin min ban tawk tawk a, khatih huna ka nu ka khawngaih zia kha engtinnge ka sawi fiah thiam ang le!

Hetianga ka nu a sawisa thin hi a vawikhat tihna chauh a ni lo a, a ruih sual chang leh midang chungah thinrimna a neih apiangin ka nu chungah hian a tuan thin a, thisen chhuah leh duk chur khawpin ka nu chu a sawisa thin. Ka pa chu zu ngawlvei a ni tawh a, hna pawh a thawh theih tawh loh avangin kan chhungkua pawh kan harsa telh telh a. Ka nu chuan chhuahsan a tum ve fo a mahse, ka nu ruala ka chhuah ve chu ka pain a phal tlat loh avangin ka rethei lutuk ang tih a hlauh avang leh fahrah mai ka nih dawn avangin a chhuah loh phah leh thin a. Ka nu khân min lo hmangaihin ka tân khan a lo va inpe zo tak em tih hi tun hnuah hian ka hrethiam chho telh telh a ni.

Ka pain ka nu a sawisakna avang chuan ka nu chuan hna hahthlak deuh a thawk thei tawh lova, kei lah naupang kum 13 mi lek ka la ni si a, engmah thawk rual ka la ni si lo. Harsa tak chungin kan vêng middle skulah chuan ka kal ve hram hram a, ka nu chuan thei leh thei lovin ka pa nên chuan min chawm ringawt tawh a, ka nu tuarchhel zia tak kha aw, khawvela nu chhuanawm ber ka tan chuan a ni chiang a lawm.

Ka nu thawh chhuah ringawt ei kan nih avangin kan harsatna a zual telh telh a, ka pa lahin zu inna tur a neih loh apiangin ka nu dawrawm tawh tak chu a vaw leh vak mai thin a, chutianga rilru leh taksa hah rêng rênga awm chu ka nu hriselna chuan a tuar zo reng ta bik lo a, a taksa chu a chhe tial tial a, natna hrang hrangin a tlakbuak ta bawk si nen Kum 1998, October 24 khân he khawvêl a hrehawm tuar tawh lo turin leh mi zalén ni tawh turin min kal san ta a ni. Ka nu boral lai khan kum 13 ka ni a, nikhua ka hriat ve tawh avangin ka tuar na êm êm a, ka nu ruala thih ve daih chu ka chak ngawih ngawih thin.

Khawvêla min hmangaih bertu awmchhun ka nuin min boral san atang chuan ka khua ahar em em a, ka mal ngawih ngawih a, skul kal chakna pakhatmah ka nei tawh hek lo. Ka nu chu ka ngai thei em em a, chhûn lamah chuan ka nu thlânah chuan ka kal ziah thin a, ka nu thlan chu ka be mawlh mawlh a, ka thusawi te chu a lo hre ve ngei a ka hriat tlat avang chuan ka khawharna pawh a zia deuh thin. Ka pa chuan nun siam that a tum miau loh avangin zu bawk chu a thupui ber a lo ni leh ta a, zânah te hian rei tak tak zu zawrhna In, pasal sûn tawh pi Pâri, Pâr-zuzuari an tih thin te inah chuan a leng fo a, keimahin khawhar takin inah chuan ka lo awm a, current a thim chang phei chuan ka hlau thei hle thin a. Mahse, tih theih dang ka neih miau loh avangin ka tawngtaia tlêm chuan ka khawhar a zia deuh thin.

Ka pa chu inchhungah pawh awm hman mang lovin Pârzuzuari te inah chuan a awm deuh chawt a, kei aia zu a ngaihtuah zawk avang chuan ka rilru a na ngawih ngawih thin. Hetih hunlai vêl hian tlangval c'nior leh hmelchhe zet mai Ropianga chu a lo lêng fo a. A tirah chuan keimah chauha ka awm thin avangin ka hlau thei em em a, mut san ka tum lahin khumah chuan a lo kal ve ang tih ka hlau si a, hrehawm ka tih thin zia kha aw. Ka pa hnêna ka sawi lahin, 'i nula ve dawn tawha an lo rim ve che a ni mai a lawm' a ti liam mai mai si a.

Zan khat chu khuma ka mu zâl mai mai chu ka lo muhil a, ka pa a lo hawn har thin avangin kawngka lah ka kalh ngam bawk si lova. Ka mutthilh hlân chuan Ropianga chu a lo lût chu niin ka hnute vêl a khawih lai chuan ka harh zawk a, au chhuah ka tum lai tak chuan ka hmuiah a kut lehlam chuan a hup chawt a, min bawh a, a tharum tak tak chuan min sual ta a. Ka kekawr hak lai chu a pawt thla tawh a underwear nen chauh ka awm tawh a. Ka theih tawpin tan ka khawha atawpah chuan min hupna chu ka tal pit a, ka seh vak a, ka tâl chhuak thei ta hrâm a underwear nen chuan pawnah ka tlân chhuak a. 'zu ngawlvei fa te te si, ka la ti dawn khawp mai che' thinrim tak chunga a ti ri chu ka hria a, pai tuang tuang chungin a haw ve ta a. Zu ngawlvei fâ ka nih avanga min hmusittu leh min khawih tum tu ka tawn hmasak berna a ni a, ka theihnghilh tawh ngai lovang.

December 10,1998 ah chuan ka nu thlanlung pawh kan la phun hma, upain, 'a mitmu pawh a la keh hma' an tihah chuan ka pa leh Pâr-zuzuari chu an innei ve leh ta a. Hemi tum tluka hrehawm tih hi ka hringnunah hian a awm thei tawh lovang. Ka nu thlanah ka kal a, 'ka nu i hnenah min hruai ve tawh mai rawh, ka tuar thei tawh lo a ni. Ka nu ka pain nupui dang a nei tih hi i hre ve tawh em? Nu, nang lo nu dang neih ka duh lo a sin' tiin ka tap hawm hawm a.

Ka pa berin Pâr-zuzuari a neih tak si ah chuan ka pa chu ka zui lo thei si lo a. A tirah chuan Pârzuzuari chu kan inah chuan a lo awm ve phawt a, rei vak loah a in lamah chuan kan insawn thla ta a. Ka nu thar a nih tawh miau avangin kei pawh chu zu zuar fanu ka lo ni ve ta a nih chu! Hrehawm ka ti em em a, ka nu chu ka ngai ngawih ngawih thin.

Kum a liam ve leh zêl a, ka nunah pawh thil hrehawm ka paltlang chho nasa tial tial a, chu pawh chu a bul tanna chauh a la ni. Nâ ka tih em em thin chu ka hming pawha min ko lova deusawh tak chunga 'zu zuar fanu' ti a min ko thin chu a ni. Ka nu damlai kha chuan rethei tê mah ni ila ka hming diktak khân min ko ve thin a sin le!

Kum 17 ka ni ve tawh a, kum 1 ka lo chawlh tawh avangin claz 10 ka zir ve chauh a. Ka pumrua chu a lianin nula pangngai tak hmêl ka pu tawh a, ka hmêl pawh vantlâng pawl tak chu a ni ve a. Kan skol-ah chuan hmêl duh ve deuh ka tawng a, a hming chu Rempuia a ni a. A pa hi P.W.D ah J.E a ni a, a tirah tak chuan engah vak ka ngai lova mahse amah zawk chuan min tih nasat êm avângin kan inngaizawng chho ve ta a.

Rempuia hi hmêltha tak a nih avangin kan skol a hmeichhe tam zawk chuan an star deuh vek hlawm a, chulai kâra kei zu zuar fanu mai mai min duh tlat mai chu mak ka ti a, ka phu lo hle tih pawh ka hria. Kan inngaizawng tih an hriat atang chuan hmeichhe ho zawng zawng chuan min huat rawn a, tawngkam chhe tak taka min tawng khum bakah min chhaih nawmnah thei em em a, athen chuan Rempuia chu ka ngaihzawn tlat avang leh keiman pâk huam huam avanga duh vak lo chunga min ngaihzawng ang ten min sawi bawk a. Eng pawh nise chûng zawng zawng ka tawrh chhan chu zu zuar fanu ka nih miau vâng a ni. Tin, a nu leh pa ten an hriat chuan min duh lo hle a, then nghal turin min ti tih pawh ka hre ve vek a, mahse, amah zawk chuan min then thei bik si lo a.

Hmêlma ka ngah tial tial a, khawvel hian hlimna ka chan ve hi min khap sak ni mai hian ka hria. Vawi khat chu Mathematics ah thiam loh ka neih avangin kan teacher amaha inluah hnenah chuan ka va zawt a, chuta ka haw tùr a in atanga ka chhuak chu ka student pui te chuan min lo hmu a. Chuta an thil sawi chuan min dêng na kher mai. Zu zuar fanu chu 'mi hur nu' tih a sawi ka lo kai leh ta, a then phei chuan 'call girl' ang hialah min chhuah bawk a, ka tân chuan he khawvêlah hian men ngaihna a awm hlawl lo a ni.

Dik taka sawi chuan kum 13 ka nih laia Ropiangan min sual a tum bak kha chu tuman ka kut hmawr pawh an la khawih lo a, chuti chung chuan mi hur tiin ka thang leh ta si. Rempuia pawh chuan ka chanchin an sawi chu a lo hre rang hle a, min then phah ta nghâl a, ka rilru a va na tak em! In tih hlum hial ka duh rum rum a. Ni e, kei fahrah ve mai hian he khawvelah hian tahna bak ka hmu ve si lo. Zu zuar fanu hian ngaihzawng leh hmangaih a nei ve thiang lo a mi le? Ka tân chuan hlimna hi a awm ve tak tak lo a ni ber e.

Miin min sawi duh êm avang chuan skol pawh ka kal duh tawh lova, chutah ka nu hrawn chuan ka chanchin mi sawi chu a lo hre ve leh bawk si a, min hmusit tawh nâk laiin ka chan chu a chhe leh zual ta sawt a, tawngkam bawlhhlawh tak takin min ânkhum ta fo mai.

Zan khat chu zan rei tawh lamah an zu chhuan sa chu an lo hawn teuh a, a peg na tûr sarâng a lo zawh tawh avangin lei tûrin min tir a. Zân a rei tawh bâkah khua a chhiat bawk si avangin ka hreh em em a, ka kal lo ngam bawk si lo. Hreh tak chungin Nihliap khumin ka chhuak ve ta tawp a. Zân a rei tawh avangin dawr lah chu a inkhar vek tawh hlawm si a, dawr inhawng zawngin ka kal kual nasa hle a, a tawpah chuan Dawr pakhat inkhàr tawh tur chu ka va nang ta hlauh a, ka lei fel chu ka thaw a veng huai mai. Mahse, he zân hi ka tâna zân anchhedawng a ni dawn tih rêng ka hre bik si lo.

Ka thil lei kenga hmanhmawh taka ka kal lai chuan hmun fâl deuh lai kawngpui bulah chuan mipa pathum hi an lo awm a, an zawn ka thlen chuan min man thut a, ka hmui an hup a kawng pêngah (thlanmual peng)chuan min zawn thla a. Ka theih tawpin tâl chhuah tumin ka tal vak vak a, mipa pathum ngawt chu ka hneh bawk si lo. Thlânmual awmna hi a fâl deuh bawk a chutiang zan rei leh khawchhe hnuaiah chuan tumah an kal a rinawm si loh. Min tanpui tu tûr an awm abeisei awm loh avang chuan ka tha neih zawng zawng nen ka tal chiam a, awmzia a nei si lo a, ka talna lamah chuan ka chau zo ta.

Thlanmualah chuan ka hmui leh ka bân chu an phuar tlat a, ka kekawr hâk lai leh underwear te chu pawt phelhin a mal te tein min sual ta a. Aw. . Ka rilru ava na tak ém. Ka rilruin ka nu chu ka ko mawlh mawlh a, a thlân atanga lo thovin min lo chhan thei ni sela chu chung misual ho lak atang chuan ka him tûr a. Ka sawi hmaih loh tur chu hêng misual ho hian hmai an tuam vek avangin tu te nge an nih ka hre thei lo a ni. An duhtawk an ngah hnu chuan min phelh a, an tlan chhe nghâl vek a. Ka rilru na lutuk chu ka tap hlawp hlawp a.

Rilru na avânga insût hlawp hlawp chungin ka mutna atang chuan thawh ka tuma ka taksa leh ka kap vêl chu a na lutuka ka bawk leh thlawp a. Thei leh thei lovin ka inbeng kâng a ka thuamhnaw darh nuai chu ka chhar khawma a berh nuai hlawm a. Tunah chuan zu zuar fanu ni chung pawha ka inchhuan ve na ka thianghlimna chu tih chhiatin a awm zo ta. Ka rilru na chu ka tap hlawp hlawp reng a thlanmual hlauhna pawh pakhat mah ka nei tawh lo. Ka inhak fel hnu chuan ka nu thlanah chuan ka tap vak vak a, ka thil tawn rapthlak zia chu ka hrilh mawlh mawlh a.

Kal pawh kal tha hlei thei lo chung chuan kan haw a, zu peg na chu ka dah tau deuh sawk a ka room lam chu ka pan nghal a. Ka nu lah chuan thinrim zetin, 'i va rei ve, i kawr te chu ava berh ve tlangval i va tawmpui a nimaw mihurnu' tiin a âng tawn tawn a. Chhân ngaihna pawh ka hre lo ka thuamhnaw ka hlip a ka inbual sawk sawk a ka mu ta a. Ka thil tawn lah tumah hrilh ngamna ka nei bawk si lo, kha tih laia ka rilru na lutuk kha ka thi thei hial dawnin ka hria.

Ka hringnunah chuan engemaw chànga nuihna hun te awm ve bawk thin mahse ka hun tam zawk chu khawharna leh lungngaihnain ka hmang a. Ka thil tawn te pawh chu rei ve leh deuh tawh mahse ka theihnghilh thei tak tak tawh lova, theihnghilh ka tum nasat poh leh ka rilruah a lo thar nasa ting mai si a. Ka sawi chhtah ngam miau loh avangin tuman an hre lo a, mahse, an hriat loh avangin ka hlim phah chuang si lo.

Zu hi chu a lova tha lo tak èm. Zu avàngin ka nu ka chàn a, rethei takin ka awm phah a. Nu hrawn sual tak ka hrawn phah a, ka pain min ngaihsak loh phah a, mi hmusit leh endawng ka tawrh phah a, pawngsual ka tawh phah bawk a, ka tan chuan zu tluka thil huatthlala a awm lo a ni tawp mai. Ka nuin ka pa duh leh hmangaih ber a zawrh miau avangin ka pa chuan harhfim hun a nei mang ngai lova, a zuin chuan a hneh tial tial a, zu chuan a in let ve thunga, a pum lam chu a sawisêl nasa telh telh a, kum 2004, Dec. 14, zing dar 6:25 ah he khawvel a mal ngawih ngawih turin min kal san ve leh ta a ni.

Kapa boral chu ka tuar takzet a, diktak chuan ka pa chu haw ngawih ngawih tur ka ni a. Min ngaihsak lova, amah vangin nuhrawn ka hrawn phah bawk a, ka nun tih chhiatin a awm phah bawk a. Mahse, ka pa chu eng ang paw'n awm se khawvêla ka thisen zawm pui awm chhun a ni miauva a la dam ve tek tek chhung kha chuan ka thla a muan ve phah a, engemaw changa ka thlavang hauh tu a lo awm ve pawh khan min tihlim ve thin a sin. Mahse, tunah chuan ka pa leh zêl pawh a awm ta si lo. Tin, ka la sawi lan loh pakhat chu ka pa leh pârzuzuari inneih hnu khan kan chen ve na thin kan in chu an hralh a, tunah chuan ka nu hrawn bula awm mai loh chu awmna tur dang ka nei tawh lo a ni.

Ka pa boral hnu chuan ka nuhrawn pârzuzuari chu ka bel lo thei ta si lova ka bél ta tawp a. Ka hun tawna a thim lai ber chu ka hmang chho a, ani chuan chhiahhlawh leh bungraw kal thei ang lekah min ngaiin a duhna naah min tir kualhin ka taksa pawh chu a hralh lo chauh a ni ber a, tin, tawngkam chhe tinrengin min ân khum reng bawk nên nun hi a va hrehawm thin tak em.

Zu zuar fanu mah ni ila ka theih ang tawkin kohhran belh ve ka duh a, inthlahrung leh zak chung chungin ka tel ve hrâm hrâm a, thenkhat chuan min nuihin min sawi sep sep zél tih chu ka hre ve reng a, mahse, zu zuar fanu pawh Pathianin a hmangaih tih hi ka ring ve tlat thin. Tin, zep loah chuan kohhrana inhmang tak tak arùka kan in a zu in leh tho si te hi ka hre nual mai, min nuih tu hmeichhe ho zingah pawh K.T.P a active tak a ruka damdawi(liquid) ti leh sex hmang hreh miah lo ka hre ve nual, mahse, kei zu zuar fanu tan hian nuih ve phâk an ni lo.

Mihring ve bawk ka nih miau avangin hmêl duh chu ka nei lo thei bik lova, phu tawk nei ve lo mah ila ka duh ber chu zu in a tih buai ve loh mihring an ni. Chutiang mi chu an hausa emaw, rethei emaw, min duh ve tu an awm chuan ka hnial lo a, ka nu chhuahsan theihna a nih dawn phawt chuan ka pawm thei vek. Chutiang mi chu ka tawng ve ta hlauh a, amah pawh hmeithai fapa rethei ve tak an ni a, mahse, a nun a ngilin a hausa a, thawh hreh a nei lova, zu a in lo bawk a. Tin, ka thil tawn zawng zawng pawh ka hrilh tlang vek a mahse, a ni chuan min pawm vek a nih chu! Ka va lawm tak em.

He ka ngaihzawng hi Lawmsanga a ni a, M.A a pass hnuin hna a hmuh rih loh avangin a rem remah a inhlawh ve nawk nawk a ni. Lawma nen chuan kan inhmangaih ve ta hle a, kan inhmu zeuh zeuh thei reng bawk a, ka dinhmun angah chuan min hmangaih tak tu ka tawng hi ka vannei takzet a ni. Inneih hial te kan sawi thleng a, ka nu ka chhuahsan tur ringawt pawh chu ka va hlim tak em. Ka nun hrehawm lutuk pawh ka tawrh zia phah a, rilruna sawi chhuah ngamna ka neih mai bakah thinlung taka min tawrh pui thei tu ka nei ve ta chuan min tihlim hle a ni.

Chutianga nun hlim taka ka awm mek lai chuan ka mang lamah pawh a thleng ang tih ka rin phak loh chu ka chungah a lo thleng leh ta a ni.

Tamtak chuan ka chanchin ka sawi hi a ni em em lo ang pawh inti a ni maithei, ni e, ka chanchin hi awih harsa khawpin a bumboh a, ka tuar nasa ve a sin aw. Ka tawrh ang em hi chu tu chungah mah thleng ve lo se ka ti ngawt mai.



A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 3rd, 2016, 12:42 am

Lawma nen chuan kan inneih hun tur te kan sawi thin a kan hlim ve thei a sin aw. Zak thei lo pawh min ti maithei a mahse khatihlai khan hmun dang inhmuhna hmun a awm miau loh avangin Lawma te inah chuan kan inhmu lo thei lova, kan in lah inlêng neihna chi a ni bawk si lo. Lawma nu hian min ngaina der thiam ve em em a, zu zuar fanu hmusit miah lova a fanu ang maia min en te kha a va nuam thin tak em! Ka chhungkua dik tak angah ka ngai hmiah tawh a ni.

Chutiang khawpa kan inkawp lai chuan zan khat chu ka mu lai ka nuin min lo kai thova, ni danga min be tha vak ngai hlei lo kha, 'Mami, lo tho teh hei inlêng i nei a nia' a ti luam a, phur lo zetin ka tho a. Sitting room-ah chuan Nunfela, kan vêng high school head fapa sual zet mai, a chhung te pawhin an enkawl theih loh avanga Jail leh Home vêla an dah thin chu rui tawkin a lo thu kawisawi nuai a, ruih avanga tawng bah deuh nawk chung chuan min lo be vei luam a, ka ngei ru kher mai. Chhe lo min tih thu te, nupui atana min duh thu te chu a la sawi tak deuh deuh a, ka haw lutuk chuan ka tûm khum deuh bâr a, ka nu ka hlauh avangin ka be chhe ngam dêr bawk si lo.

A tûk zanah chuan ka mu chu ka thangharh hlawl a, ka nûin, 'keini fâ akâr nangni'n inneih duh te chuan chu ai a hlu a awm hlei nêm, keini nufa hian kan phu loh tehrêng che u nen' a tih ri chu ka hria a, room kawngka atang chuan ka bih dêk dêk a patling pali leh ka nu chu an lo thu ho a. Zing chaw ei laia ka nu thusawi, "Lawmsanga hmeithai fâ saw engatan mah ka ti lo. Nunfela hian a duh che a a tha zawk daih, a chhungte paw'n nupui nei se a zia deuh ang, a duh phawt chuan kan neih sak ang an tih kha, duh lo mahla i nei tho tho ang' a tih chu ka hrechhuak zawk a. Nunfela nên innei turin engkim an sawi fel tawh tih ka nu tawng ka hriat atang chuan ka hrethiam nghal vek bawk.

Ka rilru na lutuk chu khumah chuan ka bawk thlawp a, ka duh lo, Nunfela ka nei duh lo tiin ka phun mawlh mawlh a, tih theih dang ka nei chuang si lo. Nunfela ka neihna tur chungchanga vawikhat pawh min rawn lo chu mak ka ti a, ka nuhrawn sual zia leh min hmusit zia pawh ka hriat chian phah chiang hle mai. Ka nu leh pa kha la boral lo se chu hetiang em em hi chuan ka rethei bik lo tur hi a nia, an ni lah koh eih zawh rual an ni tawh si lo. Keimah avanga engkim tuar ngam ka nu kha lo tho lehin ka manganna te hi hre ta se min va'n khawngaih dawn tak em. Nu, ka ngai lutuk che ka ti mawlh mawlh a, chumi zan chuan ka tap tlaivar thak a, ka rilru natna chuan a vawrtawp a thleng takmeuh a ni.

A tûk zing chaw ei lai chuan ka nuhrawn chuan Nunfela nên a inneih tur thu an rem tawh thu te, chhun lamah amah pawh a lo lên tur thu leh a hma thei ang bera inneih hun an ruat tur thu te chu min hrilh a, engmah ka sawi ve lo. Sawi pawh ni ila awmzia a awm dawn lo tih ka hrechiang a ni. Chaw ei kham chuan chaw eina vêl ka ti fel sawk sawk a, ka thian kawm ve thin Sawmi te in a kal chhuanlamin ka chhuak ta nghal a, Nunfela lo lan hmaa lo chhuah ka duh a, tin, Sawmi te in a kal lova Lawma te in a kal a, ka chanchin zawng zawng leh kan awm dan tur sawi pui ka duh a, inneih hun a thlenhma ngeia Lawma chu eng emaw tal ti tura nawr ka tum a, tlân dun mai pawh ka duh hial a ni.

Lawma te in lam chu ka pan nghal vang vang a, an in ka thlen chuan amah a lo awm lova, inhlawhin a lo chhuak tawh a, a nu chu ka pawm thlawp a, ka rilru tawt lutuk chu ka tap nghâl hawm hawm a, thei leh thei lovin insût hlawp hlawp chungin ka chanchin chu ka hrilh ta vek a, Lawma lo chu ka neih duh loh thu leh tlân dun mai ka duh thu pawh ka sawi tlang vek a, a ni pawh chuan min khawngaih hle mai. Mahse, tih vak ngaihna a hriat loh avangin Lawma lo haw hunah ama ngaihdan a la ni ang chu a ti a, remruat dan pawh a thiam mai bik lo a ni.

Ka nu chuan ka thil tum chu a lo hre ru sâ nge midangin an lo hrilh pawh ka hre bik lo ka awm atanga rei vak loah chuan a lo kal a, thinrim zetin, "mihurnu, tlangvâl inah ka lêng e te i ti elaw, i va zak lo ve, pasal nei tur ini tih i hria em' tiin ka samah a kêk a, a hnuhin min hnuk chhuak a nih chu! Lawma nu mangang leh hrilhhai hmel chu ka sam kar atang chuan ka en tawk tawk a, ka nuhrawn chu rapthlak a ti hle tih ka hrethiam mai. Ka zak bawk si thinrim bawk si chu ka tawt up up a ni ber e.

Kan in hi zu zuar in tih takah a fàl deuh hlek a. Khawlaiah te chuan ka nu chuan min kêk kal dawr dawr a, hawi pawh ka hawi chhuak ngam tawh lo. Tawngkam bawlhhlawh tak takin min ân khum reng bawk a. Kan inah chuan Nunfela chu amah chiahin a lo awm a, ka nuhrawn chuan 'tikhan lo inkawm rawh u' tiin pawn lamah kawngka min kalh hnan a a lêng chhuak nghâl a. Ka nu rapthlak zia leh min hmangaih loh zia chu inhrethiam ve ang chu

Ka nuin Nunfela nen kawngka min kalh hnan tlat avang chuan ka tân chuan tihngaihna avang hle mai a, Nunfela lah hi misual tak a ni tih ka sawi tawh kha. Ka pasal ni mai tur mah nise ka nel hlawl lova, a bula awm takngial pawh ka hlau a ni. Tlân chhiatna tur kawng dang a awm miau si lova amah hlat thei ang ber turin ka inthiar fihlin char char a, a ni lahin min hnaih a tum char char thung a, kan inûm kual hi a ni ber mai. Min khawih a tum tawh lo emaw ka tih hnu chuan min man bet thut a, thutthlengseiah chuan min bawh thlu a, min fawh a tum a, ka lo indang char char a, a thaw huam huam a. Chutah ka hnute khawih luiin ka kekawr phelh tumin dimna tel miah lovin min sual a, mipa tha chu a lo chakin ka hneh lo bawk si.

Ka theihtawpin ka invêng char char a, atawpah chuan ka tâl chhuak thei ta hlauh a, bathroom ah ka tlân lût a, ka inkalh hnan ta tlat a. A thinrim lutuk chuan kawngka chu a sawi vak vak a, a chhir ri bur bur bawk a. Tawngkam chhe tak takin min ân khum char char bawk a. Darkar tam fê ka inkalh khum hnu chuan ka nu pawh chu a lo haw ve leh ta a. Nunfela chét dan rapthlak zia leh min tih dân zawng zawng te, ka duh loh thu thlengin ka nu hnenah chuan mittui tla zawih zawih chungin ka sawi a, ka nu erawhin tawngkam khat té pawhin Nunfela a dem thu emaw, ka thlavang a hauhna thu emaw, engmah a sawi lo.
Tlaiah chuan ka rilruna lutuk chu ka chhuak ta a, Lawma chu ka pan mai dawn nge ka nu hnena kal ve turin he ka hrehawmna khawvêl hi ka chhuahsan ang? tih ngaihtuah chuan ka inngaihtuah buai kher mai. Duhthlanna pawh siam thei lova rilru mumal pawh pu lova ka kal mêk lai chuan Lawma chu ka tawk ta nawlh a. Ka chunga thil thleng zawng zawng chu ka hrilh a, ka sawi lai te chuan ka rilru na lutuk avang chuan ka insût hlawp hlawp reng a. Lawma chuan min khawngaih em em a, min hném mawlh mawlh a, ka thla a muang nghâl huai huai mai.

Kawng dang kan neih tawh miau si loh avangin Lawma nen chuan tlân dun mai kan rawt ta a. Mahse, thil buaithlak tak a la awm tlat mai! Keini pahnih chu khawi hmunah pawh lo tlân dun ta pawh ni ila Lawma nû zawk chu engtinnge ni ta ang? Nunfela thinrim hian pawisawi lo ka nu (Lawma nu) thleng thleng hian a lo vai hma vek ang tih kan hlau a ni. Pawisak eng vak a nei dawn bawk si lova. Keini lahin hun kan ngah lo hle mai bawk si a, chutia rilru buai taka kan awm lai chuan Lawma putea a lo kal hlauh a, a ni chu kan vêng Y.M.A a secretary a ni a, kan manganna te a hriat chuan rem a ruat zung zung a, Ka nu pawh chu boruak a daih deuh hma chu a in lamah awm mai turin a ti a, ngaihngam takin kan chhuak thei ta a ni.

Awle, kha hun, ka hringnuna hun thim lai zawng zawng chu ka paltlang tawh a, ka sawi tawh ang khian hlimna hun aiin tahna hun ka hmang nasa zawk a ni. Tunah chuan ka hlim a, ka hmangaih ka pasal leh fate nen hun hlimawm tak kan hmang tawh a, kan pa pawh Higher skol ah thawkin rual awt lutuk lovin kan awm ve thei tawh a ni.

Hringnun hian hlimna atawn sân poh leh kan retheih hun lai kha hriatchhuahna min pe tam a, theihnghilh daih pawh duh mah ila khâng hun kha engtikah mah ka theihnghilh thei tawh dawn si lo. Kan pâ phalna ngeiin he ka chanchin lungchhiatthlak tak hi ka ziah tir ta a ni. Tunah chuan zu zuar fanu khâ zu zuar fanu ka ni tawh lova, zu tel lohna kristian chhungkua kan din tawh a, a ni telin ka hlimna hriak hi a luang reng tawh a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)