Forensic files (23): Photo Finish

Hnuchhuina lampang chi ho
HLalthazuala
Posts: 95
Joined: March 19th, 2018, 6:51 pm

Forensic files (23): Photo Finish

Unread post by HLalthazuala » May 15th, 2018, 6:31 pm

Tuipui kam mak dangdai tak leh nula pian nalh tak tak te vangin Southern California chu motion picture siamtute leh thlalatu ten hmun an thlan hmasak ber a nih fo thinna chhan chu a sawifiah viau awm e. Kum 1995 khan Linda Sobek-i model hmanhlel tak leh hming thang tan mek chu thla la tura a kal kawngah chuan chin hriat lovin a bo ta daih mai a. Linda-i thlalak te chuan a eizawnna kawngah nasa taka an puih mai bakah mak sak taka a bona chhan pawh an rawn hrilhfiah ta a ni.
Hermosa Beach, California a mi hi Down Town, Los Angeles atanga mel 15 leka hla a awm a ni a. Ni sa, tuifawn leh tiauvut te chuan tleirawl leh hmeltha te a hip khawp hneh hle a. Kum 27 a upa Linda Sobeki, sam buang thang mai, model leh lemchanthiam chu tuipuikam hrul a ke a veivak te kalna tura thing a siam indawh zuih mai hnung maiah chuan a cheng a. Los Angeles Raiders football team tan Cheer leader a lo ni tawh thin a ni. Bikini, lingerie leh calender fakna vela hman model lar tak a ni a. Actress nih tum a beih mek a ni bawk. Feet 5 leh inches 3 a sang, pound 103 a rit leh a kawng len lam pawh inches 24 a ni a. Fashion hna hautak tak a tan chuan hniam lam deuh leh a in sawizawi lua hret a ni mahna. Mahse a hmelthatna leh taksa inkhaithli tak chuan hnathawh tur tam tak a siam sak thung a. Ningani November ni 16 kum 1995 khan Linda Sobek chu hun tepter tawh takah thla lakna hun nei turin pager hmanga hrilhhriat a ni a. Lindai chuan a thawmhnaw a lakhawm a, a nu chu a lo biak leh tur thu hrilhin lehkha a hnutchhiah a, thlalakna hmun tur lam panin chuan a chhuak ta nghal a. Chumi hnu chuam hmuh nawn emaw a hnen atanga chanchin emaw hriat an nei leh ta ngai lo a ni.
Linda unaupa Steve Sobek chuan a nu hnenah chuan, " Lungngai duh suh. Linda chuan tih tur tur a nei a. Hnathawk turin a chhuak mai chauh a lawm" tiin a farnu haw tlai vanga a nu chu rilru intihah lo turin a hrilh a. Mahse a nu chuan," Ni lo ve. A ni thei ngawt lo."tiin a sawi mawlh mawlh a. "Thil eng emaw dik lo a awm a ni."tiin a fapa chu a chhang a ni. Chu mi ni tlai lamah chuan "Married With Children" TV Series atan Audition nei tur a ni a. Mahse a inlan hun turah chuan a lo lang ta tlat lo mai. Mary Jean Bowman, Asst. District Autorney chuan, "Linda hrechiangtute chuan kha Audition kha Linda-in a hmaihna chhan tur a awm lo tih an hre chiang a ni." tiin a sawi a. Chuvang tak tak chuan Linda chhungte chuan khawiah nge a awm ang tiin an ngaihven ta reng bawk a. A chhungte chuan bozawnna lehkha 53000 a tam zet siamin Linda awmna chin hria te hnenah chuan lawmanah $20000 lai pek an tiam a. Linda nu Elaine Sobek chuan address bu a phone number a neih apiang mai chu call-in a fanu awmna chin an lo hre mial lo maw tiin a zawt a. Mahse an hre lo tih chu a chhanna dawn awm chhun a ni si. A lan danin Linda chuan chu model hna ah chuan amah dan zam ngei a bawhchhia niin a lang a. Lindai chu khawia awm nge a ni a tu nge thlalatu hming chu tih pawh chu tu hriat lah a ni si lo. Tun tuma a model hna hi Agency kal tlang lo va tih a nih avangin Agency lam pawn chanchin engmah hriat an lo nei bik hauh lo a ni a.
Ni hnih liam hnu chuan Angela National Forest-a hnathawk pakhat hian bawlhhlawh bawma nula hmeltha tak thlalak eng emaw zat a chhar a. In lamah a hawn ta a, a chhan chu chung thlalak te chu duhthusama tha a lak leh siam te an nih vang a ni. Chung thlalak te chu a bag ah khungin a ak mai a. Thawhtan zan a ni hma zawng chuan a hre zui ta lem hlei lo va. Thawhtan zan chuan TV a en a. Tah chuan Sobek bo chungchang hnuchhuina an rawn ti chhuak a. Chu pa chuan a thlalak chhar te kha nula bo chungchang an sawi lai mek ngei a ni tih a hriatchhuah chuan police-te a call ta nghal a.
Kum hnih hma lam khan chulai atanga hla lo te ah chuan model dang pakhat, kum 20 a upa Kimberly Pandelios, sambuang ve bawk luruh chhar a ni a. Linda ang thoin Kim-i pawh thlalatu hriat lo nen hun tep ter tawh takah model hna a tana koh a ni a. A tualthihna chu chhuihchhuah lovin a awm ta reng a ni. Linda chu Angela National Forest khawilai ah emaw a awm a ni ang tih ngaihtuahna ringawt pawh chu tim uai uaina tham a ni a. Angela National Forest hi mel sang khat bial vel zet tura zau, Rhode Island tiat vel zet tura lian hi a ni a. Ni tam a liam leh meuh chuan investigator-te chuan Linda bo chungchangah chuan thil felhlel leh tualthahna awm ngei niin an ring ta a ni.
Linda Sobek bo atanga ni rei lo te hnu chuan mi hnuaia thawk lova mahni puala sumdawnna lam bik a thlalatu (freelance commercial photographer) Charles Rathbun chuan police te call-in thu hriat eng emaw a neih thu a hrilh a. A sawi dan hmangah chuan Linda bo tuk khan Denny's restaurant ah Linda bula a awm a. Lindai thlalak leh lehkha pawimawh vel an sawi dun a. Chutia an inhmu zawh chuan mahni kawng lam lam zawhin an kal sawn ta a ni. Linda car chu restaurant motor dahna hmun ah hmuh a ni a. A car chu ngunthluk taka an han enfiah ngial hnu pawhin thil felhlel leh tualthahna hnuhma awm ang engmah hmuh an nei lova. Mahse police-te rinhlelhna erawh a zual tulh tulh thung a ni.
Angela National Forest a bawlhhlawhbawm chhunga thil chhar zingah khan Linda thlalak leh ni zat chhinchiahna mai bakah Lexus Sports Utility Vehicle te motor khalh hawh tura inremsiamna (rental agreement) a lo tel a. Chu document-a hming lo chuang chu tu dang ni lovin Charles Rathbuna hming ngei a ni. Rathbun-a chu thu an han zawtfiah ta a. Ani chuan Lindai nen an inhmu khan Rental Agreement leh Lindai lehkha pawimawh leh thlalak te kha an infin palh te a ni mahna tiin a sawi a. Khami ni tlai lamah khan Rathbuna chuan Autoweek Magazine a chhuah turin Lexus thla a la a. Tichuan Car chu a tuk ah a pe kir leh chauh thu a sawi a. Police te chuan chu Lexus car chu uluk takin an han enfiah ta a. Lexus car chhung leh pawn lam uluk taka silfai a nih hnu pawhin Police te chuan hnuchhuih dawn theihna tur hnuhma tam tak an la hmu ta cheu mai. Lexus car hnung lam thutna ah chuan thil sen ni nei tur rawng kai an hmu a. Phenolphthalein test an han ti ta a. Chu test hmang chuan rawng sen kai chu thisen ngei a ni tih an finfiah ta a. Test dang an han tih leh chuan mihring thisen ngei a ni tih a chiang ta bawk. Bungrua dahna ah chuan car khuhna (car cover) a awm a. Chu car khuhna ah chuan test dang an han ti leh ta a. Thisen mai bakah mihring chil sulhnu an hmu tel bawk a ni. Hnuhma dang a awm tawh lo bawk a Investigatorte chuan chu Lexus car chu Linda thlalak chhar a nihna hmun Angela Nation Forest ah khan a kal tawh reng em tih hriat an duh ta a. Lexus car ke lei dep lamah chuan vaseline (thil hnang ban) chu an han tat ta a, Motor ke hniak lan chiang zawk nan motor tyre ah chuan magnetic finger print powder an chulh leh ta vek a. Lehkha phek hlai pui mai chungah chuan motor chu an han lir tir ta a. Lehkha phek ah chuan Motor ke thla/hniak chu chiang takin a lo lang ta a ni. Chu motor ke hniak thla chu nakinah rinhlelh motor ke hniak nen la khaikhin leh tur a ni.
Ram hnuai mel 1000 bial laia zau a chu Lexus Motor Tyre hniak han zawn hmuh chu thil awlai a ni hauh lovang. Investigator-ten Charles Rathbun-a thu an zawhfiah nawn leh pawh chu thil mak a ni hauh lo. Chu tia thu an han zawh nawn chuan a thawnthu sawi a thlak danglam ta tlat mai. Rathbun chuan Lexus Sports Utility Vehicle thla a lak turah model a tang turin Lindai kha a ruai a. Tichuan Rathbun-a leh Sobek-i te chu Hermosa Beach atanga hmar lam dar kar hnih vel tlan vel hla a awm El Mirage lamah an inkhalh chhuak ta a. Linda-i hna tur chu Lexus car chu a zim thei ang bera khalh kual tur a ni a; chuti lai chuan Rathbun-an thla a lo la char char dawn a ni. A hmun an han thlen chuan Rathbun-a chuan a tih dan tur hrilhin car chu a han khalh kual chhin a, Linda chu a bul hnai lawka dingin Rathbun-a car khalh chu a lo thlir thung a. Rathbun sawi dan chuan thawk leh khat a car khalh lai chu thunun zo lovin Lindai chu a suthlu a, a thi zui ta nghal mai a ni. Rathbuna sawi hmangin a ni chu a chi-ai ta a, Lindai ruang chu car chhungah a hlang a, Angela National Forest-a hmun fianrial lam panin car chu a khalh ta a. Chulai hmun khawi maw laiah chuan Lindai ruang chu a phum ta a ni. Thu an han zawtfiah a awmze nei a xawhna an han zawh chuan Rathbun-a thu sawi chu a chiang lo hle tawh a. A hriat chian tawh loh thu a sawi cham chi a. A chang leh tap pur chungin a hre chiang tawh lo niin a insawi a. A phumna hmun hre chiang chiah tawh lo mahse chumi hmunah chuan a hruai thei ang tiin police-te chu a hrilh a ni.
Accident-na a thleng ngei a ni tih finfiah turin Lexus car chu an han enfiah a. Car pawn lamah chuan a chhe lai hmuh tur a awm hauh lo va. Investigator-te chuan Linda-i chu a la dam mai thei a ni tih an ngaihtuah a. Chuvang chuan phum a nihna hmun lama hruai vat turin Rathbun-a chu an tur hmanhmawh ta a ni. Mahse an va zawng hmu ta chuang lo. Ram vatawk um ang maiin an thil zawn ah chuan an va hlawhchham a. Dik tak chuan Rathbun-a chuan Linda-i kha khawilai ah tak nge a phum tih a hre chiang. Police-te ngaihdan chuan hun a khawh ral kual vel mai mai niin an hria a. An thil chhuih lai chu chawlhsan se, hun a pawh sei theih phawt chuan Police-ten Lindai ruang an hmuh hun meuh chuan a tawih chhe tawh dawn a. Chutiang a ni phawt chuan Evidence tam tak a bo tawh dawn tihna a ni. Investigatorte chuan Rathbuna chu Lindai ruang awmna hmun sawi tur chuan an han nawr leh ta a. Tun tum hi chuan chu ramhnuai chu thlawhna hmangin an fang ta thung a ni.
Vawi eng emaw zah an beih hlawchham hnuin a tawp a tawpah chuan Rathbun chuan Policete chu Lindai ruang awmna hmunah chuan a hruai ta a. Thingkung bul mai feet hnih lek a thuk pawnlawi takah hian Lindai chu phum a lo ni a. Lexus tyre vei lam hniak/hnu chu a bul maia lei nem ah chuan hmuh a ni bawl. Mak tak maiin Lidai ruang chu ni 9 lai phum a nih hnu pawhin him piala vawn that hian a lo la awm a. Policete chuan tisa tawih leh nem niak tak mai enfiah tur angin an lo inring a. Mahse chutiang a lo ni si lo va. Mak tihna in an khat a ni ber. Thil eng pawh finfiahna a tana tangkai tur an lak hran theih nan enfiah turin Forensic Archaeologist chu an ko ta a. Linda ruang chu an phurh ta. Intihpalh (accident) vang a thi nge ni a tualthihna (Homicide) zawk; a thihna chhan dik tak chu Autopsy-in a rawn pho lang tawh mai dawn a ni.
Linda Sobek Autopsy chuan a thihna chungchang tam tak a rawn pholang ta reng a. A beng dinglam chunga thisen awm tih bak a taksa pawn lamah chuan motor sutna vanga hliam hnuhma a awm lo va. A thisen a zu tam lam chu 0.13 a ni a, chu chu phalh chin bituk aia sang daih a ni. Charles Rathban sawi ang a Motor accident vanga thi ni lovin thawchham (asphyxiation) vanga thi a ni tih pawh chiang takin an hre thei ta a ni.
Marianne Gausche Hill, MD. Emergency Medicine Physician sawi dan chuan Lindai khan theihtawp chhuahin a beih ve a ni ngei tur a ni a chuap, nghawng leh mit ah thisen a tling a. Chutiang chu tu emaw a duh lo chunga rehhlum emaw thawchhama siam ang chi a a lan dan tlanglawn a ni. Chuvang chuan Lindai kha harhfimin nikhua a hria a, khati lai khan dam khawchhuah tumin nasa takin a tal a ni nei ang. Inrehhlum emaw thaw thei lo va insiam hi pawngsual emaw tualthah dawn a tih dan hman ber pakhat chu a ni reng a ni.Hliam hnuhma dang pawh an hmuh belh a. Pilh, ban rek inherh te leh ngalrek a inphuarna vanga valh awm te an ni. A ngalrek a phuarna vanga valh awm chuan a ke te chu kar luih tir a ni tih a lantir a. A ke te chu che thei lo tura phuar an ni tihna a ni. Chu phuar behna atang chuan tal chhuah tumin nasa takin a beih a ni tih a chiang a. A ke tluan chuan pilh khem ni niai a awm a. Chu chuan a tal nasa hle tih a entir bawk. Linda taksa chu silfai ni ngei hian a lang a. Make up a inhnawih lo va, phum a nih hmain a thawmhnaw pawh thlak ni ngeiin a lang a ni. Heidi Robins, Forensic Analyst chuan," He tiang hi chu hmeichhe pual bik a ni a. Mahse, a thawmhnaw hawi zawng leh awm dan chuan min tibuai a ni. Zipper chu a nghawng bul thleng rawtin pawhzih a ni a. Chu tiang thleng han zip chho mai chu hmeichhe tih dan phung pangai ni thei hian ka ring lo. Hmeichhe tam zawk chuan thawmhnaw an hakin awm zawn vel thleng bak a zip ngai lo a ni."tiin Linda thawmhnaw hak dan mumal lo tak chu mahni hak ni lovin midangin an haktir zawk a ni tih a hrilhfiah a. Tin, dan pangai ang ni lova tihluihna hmanga mipat hmeichhiatna (uchuak taka hurherhna) hmanpuina hnuhma an hmu bawk.
Charles Rathbun nunhlui an han chhui ta a. A nunhlui atang chuan mize inthlak sam tak leh sawilawk theih loh, zuanzang leh fing tak si a ni tih an hre thei a. Chu vang chuan hnathawh tur tam tak pawh a chan phah a. Mahni ta ang maiin leh duhawm tak angin a lang thiam a. Thinrim thut thei mi leh thlalak lai pawha thil han thlawh darh mai sam tak mi a ni a. Model te biangbiak thiam leh an chunga hawihhawm tak ang a lang thiam si, thla la tura camera hnung lam a kal ve leh an chhiatna lai sawi a rel leh zawt zawt thei mi a ni bawk.
A hma kum eng emaw zah liam ta khan Columbus, Ohio ah Charlesa chu a thawpui pawmlai nei pawngsuala puh a nih vangin man a ni a. Charlesa thung chuan an pahnih duh thu ngei a sex hmang dun an ni tiin a sawi thung a. Tichuan chu puhna lak atang chuan thiam chantir a ni. Policete chuan Rathbuna In chu an han dap ta a. Silai 200 aia tam a lakkhawm an va hmu a. Chung zinga silai pakhat .45 calibre semi automatic pistol chuan Policete mit a la zual ta bik a. Pistol-ah chuan thisen a kai em tih hriat tumin an han enfiah a. A chhan chu Sobeki chungah khan mipat hmeichhiatna hmanpui ngei ni a ngaihna leh silai chu eng ti kawng emaw tala hman ni ngeia ngaihna awm vang a ni. Tih dan phung pangai hmangin an han enfiah ta a. Thisen hnuhma hmuh tur a awm lo. Mahse damdawi hmanga Presumptive Test an han tih chuan Silai hnung la deuh a mu thunna lai vel (Breech) ah chuan thisen a kai ngei tih an hmuchhuak ta a ni.
Rathbun a in atang chuan finfiahna dang tam tham zet an hmuh belh bawk a. A thiante hnen atang chuan hmeichhe sambuang hrim hrim a ngaina lo tih pawh an hriat belh bawk. Bakah Lindai chu mi lak tlak lo leh hnathawnpui khirh tak a ni tia a sawi pawh an hre leh ta zel a ni. Charles Rathbuna chu man a ni ta. First Degree murder leh Linda chunga hmanrua hmanga uchuak taka hurherhna (sadomy) hmangah puh a ni.
Rathbuna chuan Lindai thihna kha tihpalh thil vang a ni tiin tan a khawh tlat a. A sawi dan chuan kha mi ni khan Lindai chuan zu a in a. Kha tia Lexus car a a sut palh khan Lindai chu ring tak taka te in Rathbuna chu a tlawh chawrh chawrh bawk a. Han thunun a inbengdai tir a tumna lamah tihpalh thil thuin thawchhamin a siam palh ta niin a insawi a ni.
Sobek family Autorney Wayne Willette a chuan thla lak laia zu lo in chu thil awm ang lo tak niin a ngai a. A bik takin khami ni tlai lamah khan TV lamah a inlan leh dawn kha a ni a. Dinhmun derthawnga han indah mai chu awm ang lo leh thil kal hmang ni lo hlein a hria a ni. Rathbuna chuan thu barakhaih tak mai a sawi chhuak leh ta. Kha mi ni a Lindai nen mipat hmeichhiatna an hman kha intihluihna hmanga hmang ni lovin an pahnih remtihna ngei a hmang an ni tiin a sawi a. A thusawi finfiah nan Lindai saruak thlalak pawh a kawl thu a la sawi ta cheu mai. A sawi dan chuan car accident thlen hma khan Lindai duh thu ngeiin mipat hmeichhiatna an hmang a. Chumi zawh a Lindai thla a lak sak te chuan a thusawi chu an nemnghet a ni a ti bawk. Rathbuna chuan a unaupa hnenah chuan a fihlim a ni tih leh Lindai khan a duh thu ngeiin mipat hmeichhiatna an hmang a ni tih finfiah nan thla an lakna hmun ram palailengah khan thlalak eng emaw zat a awm thu a hrilh a. Chung thlalak Roll film awmna a hriat theih nan map a ziah sak bawk. Charles Rathbuna unaupa Robert Rathbun leh a bialnu te chu inkhalh chhuakin thlalak awmna nia a sawi Roll film panga lai mai chu ram palailengah chuan an va hmu ta a ni.
Robert Rathbuna chuan Roll film panga chu a hmu a. Chungte chu Policete hnenah hlan mai lovin a mah ngeiin a sil (develop) a. Roll Film pali ah chuan El Marage-a thawmhnaw chi hrang pahnih hakna Lindai thlalak, tu tan pawh a en thiang (G-Rated) ang chi a awm a. Thlalak then khatah chuan Lindai thawmhnaw hak chu pangai lo takin a awm a. Mal thleng a sei mawza tluan (Stocking)a bun ah chuan pawp a awm a. Chu chuan Lindai khan duh thu rengin a ding kawisawi (pose) em tih zawhna a siam a ni. Roll Film pangana chu tuiin a tichhe nual a. Thlalak pawh lakthuah (Double expose) ang mai hian a lang a. Tin zahmawh lam hawi (pornographic) thlalak te an ni hlawm. Chung thlalak zinga 12 ah chuan lirthei dash board a lang a. Chuan thlalak dang 11 te chu zahmawh ngialngan leh puitling chauh en tur chi (x-rated) hmeichhe serh thlalak te an ni. Hmel emaw lu emaw a lang lo va, taksa pawh a lang hek lo. Kut tlem leh hmeichhe serh hnai set sawt atanga lak thlalak bak a awm lo a ni.
Defense lam sawi dan chuan chung thlalak te chuan Rathbun a nen motor chhunga thla an lak ni leh a bo ni khan Lindai duh thu ngeiin mipat hmeichhiatna kha an hmang a ni tih a a lan tir a. Zawhna awm ta chu "Chung thlalak te chu Linda Sobeki thlalak a ni chiah reng em?" tih hi a ni. Sheriff Photo Lab leh Aeriel Space Company te tanpuinain chung thlalak te chu an han tilian ta a. Aeriel Space Coy te chuan thlalak chu an han scan-in ithum lai an buaipui a. Thlalak pakhat a lem hrang hrang awm te chu pakhat te tein an han tilian ta a. Thlalak background ah chuan dash board a lang thei a. Mahse steering wheel a motor company logo chu Lexus company a ni lo tlat. Motor kan sawi lai mek Steering wheel a logo thlalak lo lang chu Lexus logo nen chuan danglam tak a ni.
Saruak thlalak te chu Lindai thlalak a ni chiah reng em?. Investigatorte chuan thlalak a hmeichhe ruangam leh autopsy an tih laia Lindai thla an lak te chu an han khaikhin ta a. Chiang takin Linda Sobeki thlalak a ni lo tih a lo lang ta a. Chu chuan duhthuin sex kha an hmang lo tih a rin theih bawk a ni. A chhan chu thlalak a thawmhnaw hak dan hmang chu a dik lo va, motor seat pawh a dik lo bawk. Thlalak a kut lo lang chu Lindai kut nen an han khaikhinin a lang pa bik a, mitthi ta Linda ban nen an in ang lo a ni. Chumai bakah Prosecutorte chuan Rathbun-an accident a sawi kha an pawm theih zawng a ni lo va. An ngaihdan chuan Rathbun-an khami ni a Lindai thla a lak khan Linda tan chuan sum hmuh nan chauh a tih a ni a; Rathbun tan chuan hun remchang a ni thung. Forensic Evidence atanga a lan dan chuan Rathbuna khan Lindai bek ding lamah pistol hmangin a chhu a. Hnung lamah a kut khirh sakin a ke chu motor kawngkhar vawnnaah a phuar bet a. Tichuan mipat hmeichhiatna a hmanpui ta a. Chu mi a tan chuan a pistol a hmang ngei an ring bawk. Zu pawh a in luih tir ngei ang tih an ring a. Lindai ngalrek a phuarna vanga pilh thuk tak awm chuan Lindai kha beidawng tak chungin theih tawpin tal chhuah tumin a beih nasa hle a ni tih a lantir a. Chutia Rathbunan a khawih bawrhban hnu chuan Lindai chu thawchhama siamin a tihlum ta a ni. Lindai chil leh thisen te chu bungraw dahna a car khuhna lo awm ah chuan hmuh a ni a. Evidence atanga a lan dan chuan Rathbuna khan Lindai hmai kha tifaiin eng thil chiah nge thleng tih thup bo tumin thawmhnaw dang a hak tir a ni tih a lang bawk. A hnuin Lindai mimal bungrua te chu bawlhhlawh bawmah a paih ta a. Mahse, tihpalh thil thuin Lexus Rental Agreement a hming in ziakna chuang ngei mai pawh chu chung zingah chuan a paih tel ta a ni.
Charles Rathbun a chu First Degree Murder leh Sadomy thubuaiah thiam loh chan tir a ni ta. Parole awm lova dam chhung tang tura hremna pek a ni.
Charles Rathbun a kha a rilru a la puitling tawk lo niin a lang. Kum 18/19 pelh hlawl ang maiin a khawsa a. Hmeichhiaten an hnarna a lo dawng sawng thei lo a ni ber. A rilru kawi tak atanga thil a tih khan awmze mumal awm lovin a che ta mai a ni. Thu awmze mumal awm lo va ngaihdan sawi te, hurna lam hawia hma lak te, kut a han tawk leh pawngsual te chuan a tawpah Linda thahna a thlen ta hial a ni.
He case bik ah hian Forensic Evidence te kha an pawimawh hle a. Rathbunan a him theih nan leh tan chhan a tana thlalak a phawrh chhuah te kha dik tak chuan amah khengbettu leh thiam loh chantirtu an ni ta zawk a ni. Linda Sobeki chhungte chuan Robert Rathbun a pawh kha roll film hmuhchhuahna a nih khan evidence tibawrhban vangin thubuai siam sak ngei tur niin an ngai a. Robert Rathbuna khan Court chhung a dawhsana a din lai khan Roll Film a va hmuhchhuah theih nana a unaupan map a ziah kha a tihchhiat thu a sawi a. A duh thu ngeiin a tihsual a pawm thu a sawi a ni. Prosecutorte rin dan chuan Kimberly Padeloisis thihna ah khan inhnamhnawihna a nei ngei niin an hria a. Kim khan a khuangcherbo ni in tu nge tih hriat loh photographer pakhat chu Denny's restaurantah a hmu a. A ruang chu Linda Sobeki ruang hmuhna atanga mel tlemte a hlaah chhar a ni. Vawiin thleng hian Kimberly Pandelios thihna chungchangah chuan tumah thubuai siam sak awm lovi a la awm ta reng a ni.

********THE END******



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 2 guests