THE MEMOIRS OF SHERLOCK HOLMES -II (COMPLETED)

Hnuchhuina lampang chi ho
Rozami pachuau
Posts: 362
Joined: March 17th, 2018, 7:40 pm

Re: THE MEMOIRS OF SHERLOCK HOLMES -II : THE GREEK ENTERPRETER chapter 2

Unread post by Rozami pachuau » July 27th, 2018, 4:16 pm

SHERLOCK HOLMES
THE NAVAL TREATY
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Ka nupui neih zawh hlima July thla lo thleng chu July thla azawngah chhinchhiah tlak ber a ni hial àwm e, a chhan pawh thubuai mak tak tak mai pathum ngawt mai chhuiin Sherlock Holmes-a hniakhnung ka zui a, a chet dan ka hmuhpui ve tlat a ni. Chung thubuai hrang hrang chu ka lehkhabu-ah ka vawng ṭha thlap a, a thupuiah pawh, ‘The Adventure of the Second Stain’ tih te, ‘The Adventure of the Naval Treaty’ tih te leh ‘The Adventure of the Tired Captain’ tih te ka hmang a.

Heng thupui ka han tarlan thliah thliah zinga a hmasa ber khi chu a pawimawh êm mai a, England ram lal ber chhungkaw thil thleng a kaihhnawih a, hun eng emaw chen chu vantlang hriata puanzar ngam a ni dawn lo tlat mai. Chu thil pawimawh tak mai chuan Holmes-a thil chhut peihna leh thil hrang hrang a thlei hran thiamzia a tar lang chiangin a hnathawh dan lo chhuipui ve tum pawhin an tuipui ber pawl a tling phak a. Thil awm dan dik tak a hai lanna, Holmes-a ṭawngkauchheh ang chiah chiah deuhthawa ka ziah fel thlap pawh ka la kawl reng a.

Paris Police hotu pakhat, Monsieur Dubugue-a leh Danzig-a mi, mi sual hnu chhui thiam lutuk mai, Fritz von Walbdaum-ate pawhin Holmes-a thil hai lan tak chu an chhui ve a; mahse, an hlawhchham a, thil awm dan man fuh lovin thil awm dan ni thei ve mai àwm lamah an tha leh tui an seng thlawn ta a ni. Chu mite pahnih hnena thil awm dan a sawina chu a nia, ka la dah ṭhat khiau mai chu; mahsela, he thil han tlangzarh ngam tur hi chuan kum zabi khat dang emaw a ral leh a ngai hial ang.

Thubuai pahnihna ve khi chu a hun lai rau rau chuan ram pum huapa thil pawimawh tling vel phak a ni tho va, thil danglam tak tak eng emaw a thlen ṭeuh avangin thupui pahnihna hminga kan thubuai chai pawh ngaihnawm tak zawng a ni.

Sikula ka kal ve lai chuan tleirawl pakhat, Percy Phelps nen kan inkawmngeih hle mai a, Phelps chu ka rualpui tawk chiah a ni nain kei aiin pawl hnihin a pawl sang zawk a. Phelps chu lehkha thiam thei leh thluak ṭha zet mai a ni a, sikul hminga lawmman an siam hi chu a hui zat zat zel ringawt mai a. Sikul a chhuahsan hnu pawhin scholarship a chhuahpui a, Cambridge lama zir zawm zel turin a kal ta a.

Ka hriat rengna hi a dik phawt chuan, laina ṭha tak tak leh belhfakawm tak tak a nei ṭeuh a, keini naupang takngial pawhin a nu nuṭapa chu politics lama mi hmingthang, Lord Holdhurst-a a ni tih kan hre ve hial a ni. Nimahsela, chhungte neih ṭhat ngawt chu sikula kan kal lai chuan naupang tih dan takah zawng a sawtpui lo kher mai. Kan han infiam nikhua chang pawhin a ngal leh a khup vela kan vuak palh-luihsakna a dal ther tê lo va; kan kut thak hnawih nan kan hmang châk zawk mah emaw tih mai tur a ni.

Mahse, khawvel eng hmu pha ve china kan han inngaiha kan Io ṭhan len hnu chuan infiamna tualzawla kan khawsakho lai ang ngawt kha a lo ni tawh lo tawp mai a. A thiamna avang leh laina a neih ṭhat avangin ani ang mi thil ti thei chuan Foreign Office-ah hna duhawm tak mai a vuan ta thuai mai a. Chuta chin chu ka ngaihtuah zui ngai ta reng reng lo va, he khawvelah hian Phelps-a a la dam ve a ni tih pawh ka hre ta lo. Chutah heta ka rawn tar lan, lehkhathawn hi ka’n hmu a, Percy Phelps chu a lo la dam ve tih chu ka hre leh ta chauh a ni. Chu lehkha chu hetiang hi a ni:

"Briarbrea, Woking

MY DEAR WATSON,

Sikula kan kalho laia pawl thum i nih laia pawl nga naupang pakhat, Phelps 'Ulawnga' kha i la hre reng ang tih ka ring. Chu bakah, ka patea thil tih theihna zar zovin Foreign Office-ah dinhmun ṭha tawk tak luahin mi rin leh mi zah ka hlawh hle tih pawh i hre hial maithei a ni. Nimahsela, chung thil zawng zawng tisukuk zo vektu chu a lo thleng ta tlat mai.

Thil rapthlak tak mai lo thleng chanchin chu a kim a changa ziak vek kher pawh a ṭulin ka hre lo. Ka ngenna che hi min tihhlawhtlinsak theih chuan thil awm dan chu i hmaah ka sawi vek a ṭul thovin ka ring tlat a ni. Tunah hian thla kaw chhung thluaka khawsik lut ka tuar hnuin ka lo harh chhuak leh a, ka la chak lo nasa mai.

I ṭhianpa, Mr Holmes-a kha min hmu turin i rawn hruai theih i ring em? Dan keng kawhtu lam chuan thil dang eng mah tih theih awm tawh lovah min ngaihsak mah se he thil chungchanga a ngaih dan hi ka hre chak hle a ni. A rang thei ang berin rawn hruai tum ta che, hetianga nun ringawt mai hi chuan minute tin mai hi ka tan chuan darkar tluk zetin a rei zel mai.

Tun aia hma zawka a ngaih dan ka zawh lohna chhan chu he thilin min denna avang hian ka buai chi-ai zo vek a, tun hi ka harh chhuah lehna hmasa ber a ni tih han hrilh hram ang che. Mahse, tluk chhiat leh mai ka hlauh avangin thil awm dan hi ka ngaihtuah chiang ngam rih lo. I hriat angin lehkha han ziak tur pawhin ka chau lutuk a, chuvangin, ka duh angin mi dang ka ziahtir ta mai a ni. Khawngaihin i ṭhianpa chu hruai han tum la, han hruai ngei bawk teh ang che.

I sikul ṭhian hlui,

PERCY PHELPS”

Chu lehkha kan chhiar chuan min dek hle mai a. Holmes-a hruai tura min ngennaah pawh chuan lungchhiatthlak tham zetin ṭawngkam a chhep khawngaihthlakin ka hre bawk a. Chuvangin, thil harsa tak pawh ni mah sela, Percy Phelps-a min ngenna chu tihhlawhtlin ngei ka tum a.

A dik chauh zawngin Holmes-a zawngin a thil thiam ve hi a tuipui hneh em mai a, amah mamawhtute ai mah mah hian a hnaah hian a phur tlat ṭhin a, thil harsa pawh a ni ngût lo vang tih chu ka rin hriat sa a. Ka nupui meuh pawhin hmanhmawh a ngaih thu a sawi chhuak ve hial a, chuvangin, Holmes-a hnena thil awmzia hrilh fiah tur chuan lehkha ka hmuh aṭanga darkar khat ral hmain Baker Street-a Holmes-a nena kan chenna pindan hluiah chuan ka thleng phei hman der a.

Holmes-a chu inchei sa diam hian a dawhkan tesep bulah hian a lo ṭhu a, dawhkan chungah chuan damdawi bawlhlo khawihna hmanrua a awm ṭeuh a. Damdawi bawlhlo hmangin thil a en chhin dawn tih chu hrilh loh pawhin ka hre ve mai. Bati chi khat hian darthlalang thlèng, sei it êt chhungah tui a lo hliau so bawrh bawrh a, a lehlamah chuan tui thlit fim sa emaw ni tur chu bur pakhat, litre hnih dawngah hian a far thla keuh keuh a, a khal nghal titih zel mai hian ka hre nghe nghe a.

In chhunga ka lut lai pawh chu Holmes chuan min hmu meuh pawhin ka hre lo, a thil tih lai chu thil pawimawh tak a nih ka rin avangin ṭhutthleng vawnban nei pakhatah chuan ka ṭhu a, ka lo nghak ve ta ngawt ngawt mai a. Saidawiûm hrang hrang aṭang chuan darthlalang dáwt hmangin thil tuiril hi tlem tê têin a hip lawr diat diat a. Chutah, a tawpah chuan darthlalang bur pakhat chhungah chuan a thil tih vel zawng zawng khaikhawmna chu a hung chhuak ta a.

A kut ding lam chuan lehkha pakhat, damdawi bawlhlo hmanga thil en chhin mite'n en chhinna atana an hman lar êm êm ṭhin chu a keng a, “Watson, a hun takah i lo thleng a ni. He lehkha them hi rawng dumpawla a chan chuan thil engkim a ṭha vek tihna a ni a; a sena a chan vaih thung erawh chuan mi pakhatin nunna a chan tihna a ni thung a ni,” tih pahin lehkha them chu darthlalang bur chhunga damdawi bawlhlo nena chawh pawlh tuiah chuan a zuk chiah a, zawi zawiin chu lehkha them chu a rawng a inthlak a, a tawpah chuan a lo sen lar ta hlar mai a.

Holmes chuan, “Hum! Ka ring reng a ni. Ngawi rawh, Watson, rei lo têah ka hman mai ang. Persian slipper chungah khan vaihlo pawh a awm kha,” a han ti a. A dawhkan lam chu a pan a, thirhrui lehkha tawi tê a va ziak a, chu lehkha chu chhiahhlawh hnenah a pe a. Chutah ka ṭhutna epah chuan ṭhutna a’n rem a, a khup chu a tawm chho va, a ngal zawnah chuan a kut chu a suih tat a.

Ka hnenah chuan, “Tual thahna naran mai mai maw le. Thil buaipui tham deuh zawk i rawn ken ka ring. Watson nang zawng, tirhchhiah vanduai ang maia lungngaihna thu thlen ching i ni tlat. Eng maw?” a han ti nghal ngawt a. Ka Iehkha hmuh chu ka’n pe a, inngaihtuah ngun êm êm chung hian chu lehkha chu a chhiar ta a.

Chu Iehkha chu min pek leh pahin, “A lehkha aṭang chuan hriat theih a tam lo hle mai maw?” a’n ti a. Kei chuan, “Eng mah a hriat theih loh tluk a ni,” ka ti a. Ani chuan, “Mahse, lehkha ziak hrim hrim kha chu a phurpui tlak ve tlat a ni,” a ti a. Kei chuan, “Ama ziah a ni hlei nem,” ka lo ti a. Ani chuan, “Ni lo ve, hmeichhe ziah a nih kha,” a ti ta mai a. Kei chuan, “Mipa ziah a ni chiang lutuk!” ka’n ti vak a.

Holmes chuan, “Teuh lo mai, hmeichhe ziah a ni a, hmeichhiaah mah chuan nungchang danglam tak pu, pianze danglam tak a ni. Thil chhui bul ṭannaah reng reng, a ruaitu che chuan tu nge a kawp deuh a, thil ṭha leh chhe lamah eng thil danglam nge chumi aṭang chuan lo thleng thei tih hi hriat a tha ngai. I inpeih tawh chuan Woking lamah chuan kal ila, he pa leh a Iehkha ziah saktu hmeichhia hi i va hmu teh ang,” a ti ta a.

Waterloo rel station-ah rel chhuak tur kan va nang hman hlauh mai a, darkar khat pawh a nih hmain Woking biala far thing ding leh phaitual hnim rim hnim phakin kan va thleng phei ta mai a. Rel chawlhhmun aṭang chuan Briarbae chu a hla lo hle mai nghe nghe a, rei lo têah kan thleng phei ta mai a.

Kan kal tumna in kan va thlen chuan in lian tak mai, a vel pawh zau nuam tak mai kan va hmu a. In chhungah chuan pa tawi deuh, khual chhawn thiam tak mai nen hian kan inchibai a. Chu pa chu kum sawmli hnaih lam tawh, biang sen ṭha tak mai leh mitmeng hlim tak mai a ni a; mahse, a mitmengah chuan naupang chum tak leh pawi khawih hmang tak anna riau a awm tlat mai.

Hlim taka min chibai pah chuan chu pa chuan, “In lo kal thei chu ka lawm hle mai. Tukin tuk pum mai khan Percy chuan a lam che u a, a khawngaihthlak hle mai. He thil hi a sawi ringawt pawh a hrehawm em avangin Percy-a nu leh pa chuan lo hmu tur che uin min tir a ni,” a ti a. Holmes chuan, “Thil awm dan kimchang kan la hre lo va. Nang pawh hi an chhungkaw zinga mi chu i ni lo tih ka hre mai,” a han ti khauh a. Kan ṭhianpa chu mak tiin a meng awn awn a. Chutah hnuai lam a’n bih a, a nui ta hawk hawk a.

Holmes-a hnenah chuan, “Ka tlereuh awrh a, 'J.H' tih inker hi i hmu a ni ngat mai. Thil mak tak i han ti ṭan ta maiah ka ngai hman tawh asin. Ka hming chu Joseph Harrison a ni a, ka farnu chu Annie a ni a, ka farnu leh Percy-a chu an inneih dawn avangin chhungkhat ang chu kan la ni ve mai ang chu. Percy-a pindanah chuan ka farnu pawh in va hmu ang a, thla hnih chhung chu theih tawp chhuahin a lo enkawl tawh a ni. Percy-a nghahhlelh theihzia ka hriat avangin lut nghal mai ula a ṭhain ka ring,” a han ti a.

Pindan chhungah chuan kan va lut a. Chu pindan chu mutna pindan atan cheibawl ṭhutna pindan atana cheibawl a ni kawp ve ve hian a lang a. Kil tinah chuan pangpar nalh zet zet hi uluk tak maiin an khawi a. Tukverh bula ṭhutthleng dupah chuan tlangval la upa vak lo hi a lo mu a, chu pa chu a cherin a dang kher mai; mahse, tukverh lam aṭanga ni zung lo lut leh huana pangpar rim chuan a thawi deuh mahna le.

Kan va luh mai rual chuan a bula hmeichhe ṭhu chu a lo ding chhuak a, “Percy, ka chhuak ang em?” a han ti a. Chhuak lo vang tih nan Percy-a chuan hmeichhe kutah chuan a’n dawm a. Damlo chuan tlangnel aw tak mai hian “Watson, i dam maw? I hmuihmul i zuah a, a hriat pawh ka hre ngam ta mang hlei nem che; kei pawh hi min hriat mai chu ka ring bik lo. Hei hi i ṭhianpa hmingthang tak mai, Mr Sherlock Holmes chu a ni ang maw?” a han ti sawt sawt a.

Tawi têin kan nih thu chu ka’n sawi a, Holmes nen chuan kan ṭhu ta a. Chutih lai chuan pa tawi tê kha chu a chhuak tawh a; a farnu erawh chu damlo bulah chuan a la ṭhu ta reng a. Chu hmeichhia chu hmel zahawm tak mai, nu tawi deuh leh thau lam lek lek, vun rawng nalh tak mai, mitmu dum lian tak pu, Italian mitmeng ang maia melh na, sam dum ṭha tak mai pu a ni a. Chu hmeichhe vun rawng sen no chak mai chuan a bula damlo vun dang tak mai chu a hék chhe lehzual niin a lang.

Ṭhutthleng dupa ṭhut tun pah chuan, “In hun hlu tak mai hi khawhral lo ila a ṭha ang. Thu hmahruai sawi kher lovin thupuiah lut nghal mai ila a ṭha àwm e. Mr Holmes, tun hma chuan mi hlim tak mai leh mi hlawhtling tak ka ni a, kan inneih dawn ṭepah ka nunkhaw nawmna zawng zawng bawh buai vek thei thil a lo thleng ta a ni. Watson-a hian a hrilh tawh maithei che a, Foreign Office-a thawk ka ni a, ka patea, Lord Holdhurst-a thil tih theihna azarah dinhmun ṭha tak maiah ka chuang kai ta thuai mai nghe nghe a ni.

"Ka patea chu Foreign Minister-a a lo ṭan tak a, thil pawimawh tak tak mai ti tura min tirh avang leh chung thilte chu hlawhtling taka ka hlen chhuah theih tak zel avangin ka theih tawk àwm chinah chuan rin namén lohvin min ring ta bawk a ni. Chawlkar sawm dawn lai - May ni 23 ni khan a ṭhutna pindanah min ko lut a, ka hnathawh tawh chungchanga min fak der pah chuan thil pawimawh tak mai ka tih atana a duh thu min hrilh ta a.

"Ka hnenah chuan, ‘Hei hi a ruka England leh Italy-in inremna an siam, an thuthlung ziahna lehkha dik tak a ni a; mahse, he thil hi chanchinbu lamah an lo tlangzarh hman tlat mai a, a pawi hle a ni tih thu hi ka’n sawi lang hram teh ang. He thil chungchang hi engti kawng mahin miin hriat belh tawh lo hram se tih hi thil pawimawh tak mai a ni a. He lehkhaa thu inziak lei nan hian Russia emaw, French emaw chuan sum tam tham tak an phal ngei bawk ang. A ṭul tawpah Io chuan he lehkha hian ka dawhkan pawhdawh hi a chhuahsan tur a ni lo; Pisa-ah dawhkan i nei em kha?’ a han ti a.

“Kei chuan, ‘Nei e, ka pu,' tiin ka lo chhang a. Ani chuan, ‘Chuti a nih chuan he inremna thuthlung hi la la, kalh hnan hmiah ang che. Mi dang haw hnua i àwm khawtlai theihna turin thu ka lo pe hlawm ang a, tichuan tuma hriat lohvin i ziak chhawng thei ang. I zawh hunah chuan, i ziah chhawnna lehkha leh a lehkha awm saa hi i kalh hnan hmiah ang a, naktuk zingah nangmah ngeiin min pe ang che,’ a ti ta a. Tichuan, lehkha chu ka la...," a tih lai chuan Holmes chuan, “Min lo ngaidam lawk teh. In inbiak chhung chuan in pahnih chuahvin em ni in awm?” tiin a lo zawt buai laklawh a.

Percy-a chuan, “Ni chiang e,” tiin a lo chhang a. Holmes chuan, “Pindan lian takah a ni maw in awm?” a han ti leh a. Percy-a chuan, “A khawi zawng pawhin feet sawmthum chu a ni ang,” a ti a. Holmes chuan, “Chu pindan laiah chuan a ni ang maw in inbiak ang?” a ti ta zel a. Percy-a chuan, “Ni e, a lai velah a ni hial ang,” tiin a chhang ve zel a. Holmes chuan, “In ṭawng zàwi hle a?” a han ti leh hram a. Percy-a chuan, “Ka patea chu a ṭawng zàwi ve hranpa reng reng a, kei phei chu a ṭawng pawh ka ṭawng ve meuh lo,” a ti a.

Holmes chuan maimitchhin pahin, “Ka lawm e, khawngaih takin han sawi zawm zel teh aw,” a ti ta a. Percy-a chuan, “Min hrilh ang chiah chuan ka ti a, hnathawktu dangte haw rêm hun ka nghak a; ka pindana awm ve pakhat, Charles Gorot-a erawh chuan hna thawh tur a neih avangin a awm fual deuh hlek a. Chaw ei turin ka chhuahsan ta a, ka kir leh chuan a lo kal bo daih tawh a. Ka hna chu thawh zawh thuai thuai ka chak hle mai, a chhan pawn nichin lawka in biak Joseph-a, Mr Harrison-a kha zan dar sawm pakhat rela chhuak tur a ni a, nan hman hram ka duh tlat a ni.

"Inremna thuthlung chu ka’n en a, ka patea'n a lo fimkhurpui êm êm mai pawh chu a lo ti lutuk hauh lo mai tih ka hre thiam ve mai. A awm dan chipchiar chu sawi lo ila, chutah chuan France ram do tura England leh Sweden leh Netherland ramte’na inremna, 'Triple Alliance’ an siam chungchanga England ram dinhmun chu a inziak kim biai a. Chu bakah, Mediterranean tuipuia ṭanhmun an siam dan tur pawh an ziak vek bawk a ni mai e.

"Chu lehkhaah chuan lawng lampang leh tuipui lam chungthu (Naval) lam hlir a inziak a. Inremna thuthlung tawpah chuan mi lian tak takin an hming an ziak bawk a, ka melh thuak thuak hnu chuan la chhawng tur chuan ka hnaah chuan ka bur ta a. A lehkha chu a lo sei hrep mai a, French ṭawnga ziah a ni nghe nghe a, thu hlawm hrang hrang, sawmhnih leh paruk a awm a ni. Theih tawpa ka bei chung pawh chuan zan dar kua a’n rik chuan thu hlawm hrang sawmhnih leh paruk zinga pakua chauh ka la la chhawng hman a, chuvangin, rel nan hman chu a inbeiseiawm lo ta hle mai.

"Ka thawh hah deuh avang leh ka chaw va ei avang chuan ka lo nguai a, ka mut a lo chhuak ta chiai chiai bawk a. Coffee no khat lek chu han dawm ila ka thluak a fim leh thei chauhvin ka ring a. Ka pisa-ah chuan chhiahhlawh a awm a, chu chuan hnathawka awm khawtlaite tan chuan coffee a lumsak thei reng bawk a. Chuvangin, chu pa koh nan chuan chhiahhlawh kohna dar chu ka hmet ri ta a. Chutah ka pindan chhungah chuan hmeichhe hmel no lo zet mai, upa tawh tak mai hi a lo lut a. Chhiahhlawhpa nupui a nih thu a rawn sawi a, coffee lum tur chuan thu ka pe ve ta nghal mai bawk a. .

“Chutia ka tih zawh chuan thu hlawm hnih chu ka’n la chhawng leh mai a; mahse, ka mut a lo chhuak zual sauh a, ka ke kham tihreh nan pindan chhungah chuan ka’n vei vel a. Ka coffee chah lah chu a lo la thleng bawk si lo va, rei hi ka ti tawh khawp mai. Ka pindan kawngkhar chu ka hawng a, pindan inkal pawhna lamah chuan ka chhuak phei a. Ka pindan zawn chiahah chuan pindan inkal pawhna a awm a, chu chu ngil ṭha tak mai a ni a, a eng deuh riai ruai chauh bawk a.

"Chu pindan inkal pawhna chu a kal zel a, chutah kailawn inherhah a va chhuak phei a, chu kailawna kal chhuk chuan chhiahhlawh awmna hmunah chiah chuan kan zuk chhuak thla a ni. Chu kailawn inherh chanve-ah chuan pindan danga kalna a peng a, chu kawng chu zawhin Charles Street-ah a chhuah thlak theih a, pumpelh atan pawh kan hmang fo ṭhin a. Tin, chu kailawn tepen lo awm hran leh chu chhiahhlawhte’n an hmang rim deuh bik bawk. Hetiang deuh hian,” tih pahin chu lai hmun awm dan chu a’n ziak chawp nawk nawk a.

Sherlock Holmes chuan, “A awm e, i sawi dan chu ka hre thiam e,” a lo ti a. Percy-a chuan, “Hei hi a pawimawh avangin hre thiam hle turin ka duh che a ni. Tichuan, kailawnah chuan ka chhuk a, pindan zau ka zuk thlen thlak nâk chuan chhiahhlawhpa chu a ṭhuthmunah chuan tui deuh maiin a lo muhil bawrh bawrh mai a, a bulah chuan ketli chhunga a tui chhuan chu a so hlawk hlawk a, chhuatah te pawh a baw hial a. Chu pa chu han sawi harh ka tum lai tak chuan a Iu chung lawka dar chu a lo ri a, mak ti zetin a lo harh ta hlawl mai a.

“A lo harh veleh chuan mi han en ang he haw a, ‘Ka pu, Mr Phelps!’ a han ti chiam a. Kei chuan, ‘Ka coffee tur chu i lum peih tawh leh lum peih loh ka rawn en mai a ni,’ ka lo ti a. Ani chuan, ‘Tui so hun ka nghahnaah ka lo muhil alawm maw le,’ a ti a. Mak ti zetin mi en a, dár la inthên nawlh nawlh chu a thlir reng bawk a. Ka hnenah chuan, ‘Ka pu, nang hetah i awm si chuan tu nge dar kha ti ri ta?’ a han ti a. Kei chuan, ‘Dar a? Eng dar nge a nih?’ ka han ti a. Ani chuan, ‘I hnathawhna pindan aṭanga rawn ri alawm,’ a ti ta mai a.

"Chu thu ka’n hriat chuan ka thinlungah zamna a lo lut nghal a. Inremna thuthlung ka dahna pindanah chuan tu emaw chu a lut a ni ta phawt mai a. Chuvangin, rang deuhvin kailawnah chuan ka tlan chho va, pindan inkal pawhnaah chuan tu mah ka hmu miah lo. Ka pindan chhungah pawh chuan tu mah ka hmu ta lo va. Thil dang chu ka hnutchhiah ang ang chuan a lo la awm vek a; mahse, ka dawhkana lehkha pawimawh ber mai chu a bo ta tlat a ni. Ka lak chhawnna lehkha chu a awm a; mahse, a copy dik tak zawka chu a bo tlat a ni,” a han ti a.

Holmes chu a lo ṭhu ngil a, kut nuai nawk nawk chungin a han inseh ruh a. Chu thil chuan a thluak a fan hneh hle tih ka hre mai. Chutah, “Tichuan, eng nge i tih tak le?” tiin a zawt leh ta a. Percy-a chuan, “Lehkha rutu chu kailawn tepen aṭanga lo kal a ni ngei ngei ang tih ka hre nghal a. A chhan chu chumi aṭanga lo kal a nih loh chuan kan intâwk ngei ngei dawn tlat a ni,” a han ti a.

Holmes chuan, “Pindan inkal pawhna, thim deuh riai ruai ni àwma i han sawiah emaw, pindan chhungah emaw khan a lo biru a ni thei mai lo’ng maw?” a han ti leh hram a. Percy-a chuan, “Chu zawng thil theih loh tawp a ni. Pindan inkal pawhna velah emaw, pindan chhungah emaw chuan sazu notê tak ngial pawh biru se hmuh hmaih tur chi a ni lo,” a ti ve tlat a. Holmes chuan, “Ka lawm e, han sawi zawm zel teh," a lo ti leh a.

Percy-a chuan, “Ka tlan chhoh dawna ka hmel danglam dan a hmuhin chhiahhlawhpa chuan thil hlauhawm eng emaw tak a awm a ni ang tih a ring a, min zui chho ve a. Kan pahnih chuan Charles Street lama chhuah thlakna kailawn awih zet maiah chuan kan tlan thla a, kailawn tawpa kawngkhar chu a lo inkhar a; mahse, a lo inkalh lo va. Chu kawngkhar chu ka’n theh hawng ṭhuai a, ka tlan chhuak a. Chutih lai chuan kan bul lawka Biak In aṭang chuan dar vawi thum a han ri a. Dar sawm rikna tur minute sawm panga chiah a la awm a ni,” a han ti a.

Holmes chuan, “Chu thil chu a pawimawh khawp mai,” tih pahin a kawr ban ngun kualah chuan a han thai zauh a. Percy-a chuan, “Chumi zan chuan khua a thim hle mai a, ruah phingphisiau a sur seng seng bawk a. Charles Street-ah chuan mi sual tangrang hmel tak ngial pawh hmuh tur a awm lo; mahse, lirthei vak vel chu a tam hle thung mai. Lukhum pawh khum lo chuan kawng sira kalna tura an lung remah chuan kan tlan thla a, hla deuh takah chuan police pakhat lo ding hi ka va hmu a.

"A hnenah chuan thaw hlawp hlawp chung hian, ‘Miin thil an ru a, Foreign Office aṭangin lehkha pawimawh lutuk mai an la bo a ni. He laiah hian mi an lo kal em?' tiin ka’n zawt a. Ani chuan, ‘Ka pu, he lai hmunah hian minute sawm panga vel ka ding tawh a, chumi chhung chuan mi pakhat chiah a lo la kal. Chu chu nu sang deuh, upat hmel tak, Naga shawl bat a ni,’ a lo ti a. Chhiahhlawhpa chuan, ‘Chu zawng, ka nupui lekfang a nih chu. Mi dang an lo kal em?' a han ti a. Police chuan, ‘Tu mah an lo kal lo,’ tiin a lo chhang a.

"Chhiahhlawhpa chuan ka kawr bana min pawh pahin, ‘Chuti a nih chuan rukrupa chu kawng dangah a kal a nih dawn chu,’ a han ti a. Mahse, kei chu ka lung a awi ve mai lo va, chhiahhlawhpain min kaih pèn a châk dan êm êm chuan ka ngaih a ti ṭha tlat lo. Police hnenah chuan, ‘Hmeichhia chu khawi lamah nge a kal?' tiin ka’n zawt a. Ani chuan, ‘Ka pu, ka hre hauh lo mai. Min kal pel lai kha ka hmu a, en zui nachang ka lo hre hauh lo a ni. A hmanhmawh hlein a lang lehnghal,' a ti a. Kei chuan, ‘Eng tik hun velin nge a rawn kal pelh che?’ tiin ka’n zawt leh a.

"Ani chuan, ‘Minute tam a la ral lo,’ tiin min chhang a. Kei chuan, ‘Minute nga kal ta vel chhung kha em ni ang?’ ka’n ti leh hram a. Ani chuan, ‘Minute nga ai chuan a rei lo tawp ang,‘ tiin mi chhang a. Chutih lai chuan ka kalpui-pa bawk chuan, ‘Ka pu, minute tin hi a hlu tawh a, i hun i khawh ral thlawn mai mai a ni. Kan pitari chuan eng mah a ti ve lo vang tih hi ring mai rawh, kawtthler dangah i kal zawk ang. I duh loh pawhin keimahin ka kal mai ang,’ a ti ta a. Chhiahhlawhpa chu ka va um a, ka um phak velah chuan ka pawt ding a, ‘Khawiah nge i chen?’ tiin ka zawt ta a.

"Ani chuan, ‘No.16, Ivy Lane, Brixton; mahse, Mr Phelps, hnu dik lo chhui nan i hun khawhral mai mai suh. Kawtthler lehlam hi han en leh ila thil eng nge kan hriat theih teh reng i han en teh ang,’ a ti ta a. A thu rawn zawma hekna tur awma ka hriat loh avangin police-pa nen chuan kan zui ve ta a; mahse, lirthei tlan nuai nuai leh a kawi zawng zawng pawha mihring vei mur mur mai lo chu eng mah kan va hmu ta chuang lo va. Mi kal vel an awm leh awm loh min han hrilh thei tur mihring, ṭhuthmun han rem bulfuk deuh reng reng kan hmu lo. Mi tin mai chu ruah do hlauvin an phe sung sung ni berin a lang mai.

“Pisa lamah chuan kan kir leh a, kailawn te leh pindan inkal pawhna te chu ngun êm êmin kan zawng vel a; mahse, eng mah kan an phah ta chuang lo. Pindan inkal pawhnaah chuan puan chi khat an phah a, chu puanah chuan hniak pawh a lang duh hle nghe nghe a. Ngun takin chu pindan chhuatphah chu ka’n thlék a; chutah pawh chuan mihring hniak reng reng ka hmu lo," a han ti a.

Holmes chuan, “Tlaiah chuan ruah a sur reng em ni?” tiin a lo zawt leh a. Percy-a chuan, “Tlai dar sarih hnu aṭang chuan a sur reng a ni ber e,” a lo ti a. Holmes chuan, “Chuti a nih chuan engtin nge hmeichhia, zan dar kaw rik lai vela pindan chhunga lo lut chuan hniak hnu a hnutchhiah hauh loh chu le? A pheikhawk a berh àwm teh reng nen,” a lo ti leh a.

Percy-a chuan, “Chu lai chu i’n sawi chhuak a, ka lawm hle mai. Chutih hun lai chuan chu thil chu ka rilru-ah a lo lut ve reng bawk a ni. Pisa-a hmeichhe thawk, hmun phiatte leh ṭul dang apiang ti ṭhinte chuan an pheikhawk chu chhiahhlawhpa awmna pindanah chuan an hlip a, vawthIep zangkhai deuh an bun ṭhin a ni,” a ti a. Holmes chuan, “Chu zawng a chiang. Chuti ni mah se chumi zan chuan lei a diak hle a, hniak-hnu hmuh tur a awm ta tlat lo a nih chu. Tichuan, engtin nge i tih tak zel?” a han ti a.

Percy-a chuan, “Pindan chu ngun takin kan en a. Kawngkhar ruk a awm miah lo va, tukverh lah chu lei aṭanga feet sawmthum laia sang a nih bakah a chhung lamah a inkalh vek a. Pindan chhuata tawmrukna han siam theihna tur awm miah lo turin chhuatphah a awm tlat bawk, pindan chungzar (ceiling) lah chu var ṭha taka hnawih ve satliah ringawt mai, mihring han tawm theihna àwm chi awm miah lo a ni bawk a. Chuvangin, ka lehkha pawimawh min ruksaktu chu kawngkhar aṭanga lo lut a ni ngei ngei ang ka ti ngam sak a ni,” a ti a.

Holmes chuan, “Thuk, mei chhemna atana hman ṭhin lam te?” a lo ti leh zauh a. Percy-a chuan, “Chutiang eng mah a awm lo. An hmang ve ngai lo. Chawi sawn theih ang chi thuk a awm mai a ni. Dar pawh rikna hrui chu ka dawhkan ding lamah chiah a awm a, chumi pawt ritu chu ka dawhkanah chuan a lo kal ngei ngei tur a ni ringawt mai. Mahse, eng vangin nge mi sual chuan dar a pawh rik duh ang? Thil mak ber mai leh hriat thiam har ber a ni,” a ti a.

Holmes chuan, “A ni ngawt mai. He thil hi thil namai lo deuh mai a ni. Eng nge i tih leh tak chu le? Ka hriat danin a rawn tibuaitu che chuan hniak hnu a hnutchhiah dah law maw tiin pindan chhung chu ngun takin ka en a - cigar meizial bung emaw, kut kawr emaw, sam kilh behna pin emaw leh thil dang, thil tenau tham hnutchhiah a nei reng reng em?” a ti ta zel a. Percy-a chuan, “Chutiang thil eng mah a hnutchhiah lo,” a lo ti a. Holmes chuan, “Rim danglam bik a awm em?” a ti ta zel a.

Percy-a chuan, “Chu lam chu kan lo ngaihtuah hlek lo mai,” ti ngawtin a chhang a. Holmes chuan, “Meizial rim te chu lo hria ni ula chuan kan thil chhuinaah hian min ṭanpuitu ṭha tak a ni thei ngei ang le,” a han ti leh a. Percy-a chuan, “Meizial ka zuk ve ngai loh avangin chutiang rim chu awm ni sela chuan ka hre ngeiin ka ring. Chutiang thila han chhuidawn theihna tur thil chu eng mah kan nei lo reng reng a ni ber mai.

"Chhiahhlawhpa nupui, Mrs Tangey-i khan hmanhmawh takin pisa a kalsan tih chauh kha kan chhui zui theih a ni a. A pasal pawhin eng vanga an nu chu hmanhmawh taka haw mai nge a nih a sawi fiah thei bik lo va. Chutiang hunah chuan an nu chu a lo haw ṭhin reng a ni tih chauh sawi tur a hria a. Police-pa nen chuan chhiahhlawhpa nupui man chu thil dik ber niin kan ring a, lehkha pawimawh chu a thehthang bo hmaa man hman leh tumin kan phe ta vat mai a ni.

“Kan buaina chuan Scotland Yard a lo va thleng hman tawh a. Kan buaina min enpui tur chuan mi sual hnu chhui mi, Mr Forbes an rawn tir a. Tawlailir tê chi kan hawh a, darkar chanve hnu lekah chuan kan chhiahhlawhpa nupui awmna hmun chu kan va thleng ta mai a. Kawngkhar kan han kik a, hmeichhe naupang lam deuh hian kawngkhar a rawn hawng a, Mrs Tangey-i fanu a lo ni nghe nghe a. A nu a lo la haw loh thu pawh chu nu chuan a sawi nghe nghe a. Pindan hmatawngah chuan lo nghak turin min ti a, kan ṭhu ta a.

“Minute sawm vel kan ṭhut hnu chuan kawngkhar chu an rawn kik a, chutah chuan alawm, thil pakhat kan tihsual chian em em mai chu a awm a, tun thlenga ka indem reh theih Ioh chu a awm. Kawngkhar chu keimahin va hawng lovin an fanu hmeichhia chu ka hawntir a. An fanu nula chuan, “Ka nu, kan inah hian mi pahnihin hmuh tumin an nghak che,’ a tih ka’n hria a. Chu veleh chuan tlan ri thlawk thlawk hi kan hria a.

"Mr Forbes chuan, kawngkhar chu a theh hawng vat a, pindan hnung lam emaw ni choka emaw ni lam pan chuan kan tlan vat a; mahse, kan thlen hma chuan chu nu chuan min lo thlen khalh hman a. Mitmeng diau lo zet mai hian min han melh a, chutah min han hre chhuak a, mak ti hmel zet mai hian, ‘Uai, pisa-a mi, Mr Phelps kha a ni reng mai,’ a ti ta a. Mr Forbes chuan, ‘Khai le, ngawi rawh, tu nge i hlauha i tlanchhiatsan chu le?’ a’n ti a.

"Chu nu chuan, ‘Mi ina luh ruk ching kha in ni emaw ka ti asin. Mi pakhat nen kan intibuai ṭhin a,’ a han ti ngawt a. Mr Forbes chuan, ‘Chu zawng a la nalh tawk lo deuh. Foreign Office aṭanga lehkha pawimawh tak la chhuak anga puh theihna tur che chhan ṭha tawk kan nei a, chu lehkha chu tham bo tumin hetah hian i tlan lut niin kan ring bawk a ni. Scotland Yard lamah lo kal la kan han dap teh ang che,’ a ti ta a.

“Chu nu chu a ṭang nasa ngang mai a, eng mah phei chu a sawt chuang hlei lo. Chu in kan chhuahsan hma chuan amaha a awm fal zawk chhung khan lehkha chu a lo tiriral nge nia a lo thukru tih hriat tumin pindan chhung chu ngun takin kan dap a; mahse, eng mah kan hmu lo. Thuk mei chhemna leh chawmpang kar zawng zawng chu kan en kim vek.

"Chutah tawlailir ke pali nei chiin Scotland Yard lamah kan inkhalh phei a. Kan thlen veleh chuan hmeichhe daptu bik hmeichhiate hnenah kan tlan nghal a. An dap chhung zawng chuan an hmuh loh palha ka dinhmun tur ka lo ngaihtuah a, ka zam ru ta zek zek mai a. Ka hlauh ang ngeiin eng mah an hmu chhuak ta tlat lo va. A hma kha chuan hrehawm ti hle mah ila ka phe buai lutuk a, ka inngaihtuah fim hman lo kha a ni a; mahse, tunah chuan ka dinhmun rapthlakzia chu ka hre chiang ta.

“A hma zawng kha chuan lehkha chu kan hmuh chhuah leh ngei ka rin ngheh tlat avangin hlauh nachang pawh ka hre zawk lo hial a. Mahse, chu inremna thuthlung chu a bo hlen vaih chuan ka patea te, keimah te leh ka laina hnai deuh tawh phawt mai tana zahna leh mualphona ka thlensak nasat dan tur chu ka hre phak ṭan ta a ni. Sikula ka kal lai pawhin naupang zam hma leh lawm hma tak mai ka ni ṭhin tih chu Watson-a hian a hrilh thei ang che. Hetiang thil, ram leh ram indawrna thilah reng reng hi chuan ‘tih palh’ hi awm thei turah an ngai lo reng reng a, an awih zawng pawh a ni hek lo. Chuvangin, ka tla chhe ta der a ni.

“Scotland Yard hmunah la la chuan ka buai chi-âi a, ka tlu mualpho dawn ta mai a. Min dawm laih laih te hi chu ka’n hre riai ruai a. Chutah Waterloo rel chawlhhmunah min hruai chhuk a, Woking pan tur relah min hlang lut a. Chutah chuan Dr Ferrier a lo awm hlauh mai a, ani chuan ngilneih patawp a chhuah a, duat deuh maiin min enkawl a. Kan chenna in ka thlen leh hmain mi â dik tak ka ni hman titih tho tho mai.

"Han ngaihtuah teh, in kan thleng a, Dr Ferrier-a'n kawngkhar hmeh rik dar a han hmeha ka nu leh Annie-i manganzia chu i hre thiam ve mai ang. Pawi an ti êm êm a; mahse, an pawi tihna chuan thil eng mah a siam ṭha chuang si lo. Tichuan, Joseph-a, nichina in hmuh kha a pindan ka luahsak a, heti hian ka awm ta a. Dr Ferrier leh Miss Harrison hian theih tawp chhuahin min enkawl lo sela chuan tunah hian in hnena thu sawi tur pawh ka awm tawh hauh lo vang tih ka hre chiang.

"Thla kaw chhung chu mi â hlawm tawp angin ka awm a, ka thluaka khawsik lutin thih leh dam karah min lentir reng bawk a. Ka buai zual chang phei chuan thil eng pawh mai hi ka ti duh mai ta àwm e. A chang phei chuan ka âtna leh ka thluaka khawsik lut aṭang khan harh chhuak leh tawh chuang lovin awm ila ka ti rum rum ṭhin.

"Ka harh chhuah leh deuh hnu chu tun ni thum kal ta chhung mai kha a ni a. Mr Forbes chu thirhruiin thil awmzia ka va zawt a. Ani chuan thil tih theih awm zawng zawng chu tih a nih tawh thu leh eng mah an ân chuan loh thu min lo hrilh a. Chhiahhlawhpa leh a nupui chu an man a, theih patawpin an ching let a; mahse, eng mah a sawt chuang lo.

"Pisa hna thawka bang tlai, Gorot-a lah kha an man a; mahse, ani lah chu sap hnam ngainatu, Huguenot chhuak a lo ni ve hlauh si a. Ani han rinhlelh ngawt pawh chuan awmzia a nei lo, chu bakah, a haw hnuah hna ka tan chauh a ni bawk si. He thila tel ve thei àwm chi reng reng chuan awmzia a nei thei lo zo vek tawh mai a. Chuvangin, nang hi ka beiseina neih theih hnuhnung ber i ni ta a, nang hi i hlawhchham leh chuan ka nihna chu ka tan chuan kumtluanga mangṭha mai chi a ni,” a ti ta a.



Link:
BBcode:
HTML:
Hide post links
Show post links

Rozami pachuau
Posts: 362
Joined: March 17th, 2018, 7:40 pm

Unread post by Rozami pachuau » July 28th, 2018, 11:54 am

SHERLOCK HOLMES
THE NAVAL TREATY
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2
(Rozami Pachuau)

Damlo chu chau zet maiin a khumah chuan a’n tlu zal leh a. A enkawltunu chuan damdawi hi no-ah a’n chhung chhuak a, a’n tulh a. Holmes chu a mit a ṭha ta lo emaw tih mai tur hian a meng ṭha duh lo hle a, mi dang tan phei chuan a mut a chhuak hle emaw tih mai tur chi niin ka hria. Mahse, a awmzia ka hriat chian em avangin a inngaihtuah ngun nasa a ni tih ka hre tho mai. Rei tawk tak hnuah chuan, “I thil sawi kha a bùl angreng khawp mai. Chuvangin, zawhna pahnih khat bak chu zawh tur che pawh ka hre lo vang. Thil pawimawh tak mai pakhat a awm a, chu chu - I hnathawh tur neih chungchang chu mi dang i hrilh em tih a ni,” a han ti a.

Percy-a chuan, “Hrilh miah lo,” a lo ti a. Holmes chuan, “Entir nan, hei Miss Harrison te ang te pawh hi i hrilh lo a maw?” a han ti a. Percy-a chuan, “Aih, hrilh lo. Hnathawh tur min pek hnuah in lamah ka haw ta lo reng reng a ni,” a ti a. Holmes chuan, “I chhungte leh i lainate zinga mi tu mah nangmah hmu tur chein an lo kal miah lo maw?” a ti leh a. Percy-a chuan, “Kal miah lo,” a ti ve zel a.

Holmes chuan, “In pisa awmna leh a hmunhma chu an hre vek em aw?” a ti ta zel a. Percy-a chuan, “Hre vek e. An vaiin kan pisa-ah chuan eng emaw hun lai chuan an lo leng tawh vek a ni,” a ti a. Chutah Holmes chuan, “Inremna thuthlung chungchang chu tu hnen maha i sawi loh si chuan hetiang zawhna hi chu a hmanna teh chiam a awm lo ve,” a ti leh ta a.

Percy-a chuan, “Eng mah ka sawi lo,” a lo ti a. Holmes chuan, “Chhiahhlawhpa chu i hre chiang em?” a ti a. Percy-a chuan, "Sipai bang a nih thu chauh lo chu eng mah ka hre lo,” tiin a chhang a. Holmes chuan, “Eng pawlah nge a awm? Eng regiment-ah nge ka tihna a nih chu,” a ti a. Percy-a chuan, Coldstream Guards-ah ni tlatin ka hria,” a lo ti leh a.

Holmes chuan, “A lawmawm e. Thil awm dan chipchiar zawk chu Forbes-a hnen aṭangin ka dawng thei tawh ang. Sawrkar lam hotute hian thil awm dan dik tak hi chu an hre thei hle asin; mahse, an hmang ṭangkai thiam lo mai pawh a ni,” a han ti a. Chutah, “Rose pangpar hi chu a va’n duhawm tak em aw!” a ti ta thut a. Damlo mutna ṭhutthleng dûp chu kal pelin tukverh inhawng lamah chuan a phei a, tukverha rose pangpar zam chu a'n dawm kang a, a par sen no chek mai leh a hring deuh inpawlh chu a thlir vawng vawng a.

Leilung thil hi Holmes hian a tuipui ngai loh em avangin chu zet chu ka tan pawh thil thar a ni ngat mai. Amah vek chuan tukverh ngheng chung hian, “Sakhua anga chhut ngun ngai hi a awm kher lo vang. A chhut ngun peih tak tak tan chuan thii khirhkhan ber mai, science ang mai a ni asin. Van lam thil pek ropui ber nia ka hriat chu pangpar hi a ni.

"Thil dang, kan thil tih theihna te, kan tisa nawmsip bawl châkna te, chaw ei tur te hi chu thil pawimawh hmasa chu a ni ngei mai; mahse, rose pangpar hi chu thil chuangtlai a ni. Kan nunna atan thil ṭul ni kher lo mah se a rim leh a rawng reng reng mai pawh hi nun chawk harhtu a ni. Thil ṭha chu thil chuangtlai hi a ni ngai, chuvangin, pangpar aṭang hian thil beisei tur tam tak kan nei theiin ka hria,” a ti ta mai mai a.

Percy Phelps-a leh amah enkawltunu chuan Holmes chu mak ti zet maiin an en a, chutiang thil mai mai a phulpui tak hlut mai avang chuan an lawm lo hle a ni tih chu an hmel aṭang chuan a lang reng mai. Rose pangpar chu keng reng chungin zèl angrengin a awm ni berin a lang a, kan nula-i pek chuan a tuar zo ta ngang lo a ni teh chek ang chu, “Mr Holmes, he thil hi chin fel theih i inring em?” a rawn ti thap ta hraih mai a.

Holmes chuan, “A ni tak, kan buaina kha maw! Thil buaithlak tak mai a nih thu hi ka zêp hlauh chuan a dik hauh pek lo vang; mahse, ka han chhui zui ang a, thil thar ka hriat apiang chu ka rawn hrilh ve zel ang che u,” a han ti a. Hmeichhia bawk chuan, “Hnu han chhui theihna tur thil han bawhzui àwm chi i hmu em?” tiin a zawt a. Holmes chuan, “Pasarih min pe; mahse, eng ang chauhva hman tlak nge an nih ka hriat phawt loh chuan ka tlangzarh mai mai duh lo,” a ti a.

Nula chuan, “Tu emaw chu i ringhlel a ni maw?” a han ti a. Holmes chuan, “Keimah leh keimah hi ka inringhlel a...,” a tih lai chuan, “Eng maw?” a lo ti leh ta vat mai a. Holmes chuan, “Ngaih dan sìam fel hma lutuk,” ti chauhvin a chhang a. Nula chuan, “Chuti a nih chuan London lamah kir leh ta la, i ngaih dan chu a dik leh dik loh va en chhin nang che,” a ti ta a.

Holmes chuan thawh pahin, “Miss Harrison, i thurawn chu a fing hle mai. Watson, tih theih vak kan nei pawhin ka hre ta lo ve. Mr Phelps, thil awm thei lo beisei nan i beiseina neih chhun kha lo hmang ral mai suh ang che. He thil hi a khirhkhan hle a ni,” a han ti a. Damlo chuan, “Ka hmuh leh hma che chuan ka khawsik hian min thlah dawn lo reng reng,” a lo ti a.

Holmes chuan, “Thu lawmawm rawn hawn tur neiin inring lo mah ila naktuk lamah tuna kan rawn kal hun ang vel bawkah hian ka lo kal leh ang,” a han ti a. Damlo chuan, “Lo kal leh i tum avang ngawt pawhin Pathianin malsawm che rawh se. Eng emaw ti talin kan la tal ve ṭêk ṭêk tih ka’n hriat hi chuan ka harh sawng sawng mai. Thu dang alai chuan Lord Holdhurst-a hnen aṭangin lehkha ka hmu asin,” a ti a. Holmes chuan, “Eng nge a sawi?” tiin a zawt a.

Percy-a chuan, “A ṭawngkam a nem lo hle nain a delh a na vak lo ve. Ka dam chhuah leh hma chuan ka bànna lam chungchang chu an khawih rih dawn lo va, ka vanduaina khuh theihna hun remchang min siamsak lo chuan thil eng mah tih an tum lo bawk,” a ti a. Holmes chuan, “Chu zawng a lungawithlakin an ngaihtuah ve hle che tihna a nih chu. Watson, lo kal rawh le, nilenga buaina tham hna kan nei e,” a ti a.

Mr Joseph Harrison-a chuan rél chawlhhmun thlengin min va thlah a, chutah Portsmouth pan tur rélah chuan kan chuang a. Clapham Junction kan thlen hma chuan Holmes chu a ṭawng lo mai ni lovin a ka a áng zen zen lo. Clapham Junction kan pelh hnu lawk chuan, “Heti lam kawng aṭanga London khawpuia han luh hi chu a hlimawm ṭhin ngawt mai. Kan kalna hi a hmun a sang a, chuvangin, in chung hi kan chhuk melh tlat alawm,” a han ti a.

Kan thil hmuh theih leh hmuh phaka thil awmte chu a mawi lem loh hlawm em avangin a fiamthu ni hialin ka ring a; mahse, a thusawi awmzia chu a hrilh fiah leh ta thuai a. “Han en ta che, sawng in sang pui pui, mi dang in chung zawl chung lama lawr vuah hlawm mai saw, tuipui cham put mai chunga thliarkar, lei rawng mawi tak ang mai a nih saw,” a han ti a. Kei chuan, “Inthununna sikul hlawm khawm saw maw?” ka lo ti mai a.

Ani chuan, “Ka nau, mi dang hmuh theih tura êng tar lanna in a nih saw. Kan tun hnu hun tur tilunglenthlaktu! Sawng saw thlai chi, a chhunga thlai duhawm tak tak awmna ang mai a ni a. Nakinah chuan mi fing zawk lo chhuakin England ram ṭha zawk a lo la inher chhuak ang tih beiseina min siamsaktute an nih saw. Kha pa, Phelps-a khan zu a in ngai em?” a han ti thut a.

Kei chuan, “A in ngai pawh ka ring lo,” ka lo ti a. Holmes chuan, “Kei pawhin ka ring bik lo; mahse, thil zawng zawng kan hmu kim vek tur a ni a, ngaihthah sa ringawt kan nei tur a ni lo. Kan nauva kha tui thuk tak maiah a zuang lut a, vaukamah kan kài chhuak thei ang em tih hi kan thu khel lai chu a ni. Miss Harrison-i kha eng angin nge i ngaih?” tiin mi’n zawt a. Kei chuan, “Nula ti mai mai lo tak niin ka hria,” ka lo ti a.

Holmes chuan, “Nula ti mai mai lo tak mai leh hmeichhe rilru ṭha tak a nih loh chuan ka tisual hle a ni mai. A unaupa nen khan kahpathir rorelna hnuaia sei lian ni àwm hial an ni. Nikum thlasik laia an zin dun ṭumin Phelps-a nen chuan an inhual tawh a, Phelps-a nu leh pate hmelhriat turin Briarbrae-ah a kal ve a, chutih lai chuan chutiang khatiang chuan thil a lo thleng ta a ni. Tichuan, nula chuan tlangval damlo chu a enkawi zui ta a. Chutih lai chuan a unaupa pawh chu a kiangah chuan a awm ve reng ta nghe nghe a nih chu.

"I hriat lohvin thil eng eng emaw ka lo zawt thlithlai tih chu i hre ve mai ang; mahse, vawiin zawng eng ilo inzawh thlithlai ni a ang dawn hle mai,” a ti ta a. Kei chuan, “Ka hna...,” ka’n ti ṭan dêk dêk a, Holmes chuan, “He thil aia i hna chu a tuipuiawm zawka i hriat phawt chuan...,” a lo ti hmanhmawh a. A thusawi lai chu pawt chatin, "A chawlh theih ang tih sawi ka tum a nia. Kum khat chhungin tun ang hun vel hi a dawngdah theih hun ber a ni,” ka ti a.

Holmes chuan, “Chuti a nih chuan a ṭhat nasat chu. He thil hi kan han bih hnai dun dawn a ni àwm phawt a. Forbes-a aṭangin i han ṭan phawt teh ang. Ani hian thil awm dan chu min hrilh thei vekin ka ring a, a khawi lam nge ngaih pawimawh tur tih kan hriat hma chuan chanchin kimchang chu i dawngsawng phawt ang,” a ti a. Kei chuan, “Han bawhzui theih tur awm kha hria ni àwm tak khan i insawi si a,” ka lo ti a.

Holmes chuan, “Eng emaw zat chu ka hria alawm; mahse, chung thil chu eng ang chauhva bawhzui tlak nge tih chu thil awm dan kan zawh chianna aṭang chauhvin kan hre thei a ni. Sualna reng reng, tum bulbal leh tih chhan nei miah lo hi chu a chhui chhuah a har ber fo ṭhin. He thil hi chu awmze nei leh tu hlawkna tur emaw a ni. Hemi avang hian tu nge hlawkpui ang? French-ho te leh Russian-ho te an awm sa a, chu bakah, he mite pahnih hnena hralh theitu hian a hlawkpui thei ang a, chu bakah pawh Lord Holdhurst a la awm bawk,” a ti ta a.

Kei chuan, “Lord Holdhurst a!” ka lo ti ringawt a. Holmes chuan, “Khatiang lehkha pawimawh kha lo chhe palh ta sela chuan Lordhurst chu a lungngai lutuk hauh lo vang tih a rin ve theih tih mai mai a nia,” a ti a. Kei chuan, “Lord Holdhurst-a te ang mi hmingṭha leh hminghliauna nei lo hi chuan pawi an ti hauh lo vang le,” ka lo ti a.

Holmes chuan “Thil awm thei ve mai chauh a ni a, ngaihthah mai chi a ni lo tih thil mai a ni. Vawiin hian kan Lord zahawm tak chu kan va hmu dawn alawm, eng nge min hrilh theih a neih chu kan hre mai ang. Taka, eng ilo zawh fiahna hna chu ka ṭan der tawh asin,” a ti ta a.

Kei chuan, “I ṭan der tawh maw?” tiin ka'n zawt a. Holmes chuan, “Ṭan tawh e. Woking Station aṭang khan London khawpuia tlai lam chanchinbu zawng zawng hnenah thu pakhat ka thawn a. Chu chu a lo lang vek dawn a ni,” tih pahin a thil chhinchhiahna lehkhabu tê aṭang chuan lehkha phek pawh thlak tawh hnu pakhat hi a rawn phawrh a. Chu lehkha phekah chuan pencil hian hetiang hian a lo inziak a :

“May ni 23 zan dar sawm rik hma minute sawm leh panga vela Foreign Office, Charles Street kiang vela tu emaw dahtu tawlailir number hria chu lawmmanah pound sawm pek an ni ang a. Tawlailir number chu 211B, Baker Street-ah hrilh tur a ni ang a, chutah chuan lawmman pawh a lam nghal theih ang,”

Kei chuan, “Mi sualpa chu tawlailirin a kal ngei niin i ring a ni maw?” tiin ka’n zawt a. Holmes chuan, “A lo kal lo a nih tâk leh a pawi chuang hlei nem. In chhunga bihrukna awm miah lo anga Mr Phelps-a sawi kha a dik phawt chuan rukru chu pawn lam aṭanga lo lût a ni tihna a ni a. Chuti a nih chuan khatiang khaw chhe hnuaiah pawh hniak-hnu pakhat mah in chhungah a hnutchhiah si loh chuan tawlailir a hmang ni ngei tur a ni," a ti ta a. Kei chuan, “Thil àwm ang tak zawng a ni e,” ka lo ti a.

Holmes chuan, “Kha thil kha chhui zui theih tut àwm thil awm anga ka han sawi zinga pakhat chu a ni a. Chu bakah chuan dar pawh rik chungchang kha - kha kha he thilah hi chuan thil mak danglam ber pawl zinga mi a ni ngei ang. Rukru-pa khan a huaisar a thawh a, dár kha a pawt ri ta mai em ni? Nge nia rukru-pa ruala mi dang kal ve chuan khatiang thil ṭha lo kha a thlen loh a duh avangin hmanruaah hmangin dár kha a pawt ri ta? Nge tih palh thu-hla zawk? Nge ni a...," tih pahin inngaihtuah mûk tih hriat tak mai hian a indawm kun leh ta veng veng a. Eng thil emaw tak zawng a hre thar leh ta a ni ber hian ka hre mai a.

Kan kalna tur kan thlen chuan minute sawmhnihin dar thum a pel tawh a. Hmanhmawh taka chaw chhun kan bar zawh chuan Scotland Yard lamah kan tlan phei leh a. Forbes-a chu Holmes-a'n thirhruia a lo va ṭhàwn lawk tawh avangin Forbes-a chuan min lo nghak reng a. Amah chu pa tê tak tê, sihal hmel pu lek lek, pa ti kher kher hmel tak mai leh flamthu duh loh hmel zet mai a ni a. Kan kal chhan a han hriat phei chuan a biak a hrehawm lehzual em ni chu aw tih tur a ni. Bung angreng tak mai hian, “Mr Holmes, i hnathawh dan hi ka hre tawh ṭhin alawm. Police-ho thil hriat hmangin hna i thawk a, chutah Police lam chu tihmualphona i ngaihtuah zui ta ṭhin a ni,” a ti a.

Holmes chuan, “Ngawi teh, a let a linga vuttui thlawr bél an tih ang hi a va nih mai àwm êm! Thubuai sawmnga leh pathum ka beih tawh zingah ka hming chu vawi li chiah a la ri ve a; hmingṭhatna chu police lamin an tel zar zar zel a ni. Thubuai sawmli leh pakua-ah police-hovin hmingṭhat in hlawh tawh a nih chu. Chutiang chu thil awm dan a ni tih i hriat ve kher loh avangin ka dem lo che. I la naupangin thil i la tawng tlem êm a nih hi; mahse, hna thar vawn i duh chuan mi do zawng ni lo, mi thawhpui zawngin tha i thawh ngei ang,” a ti ta a.

Chutia a han tih takah chuan kan sawrkar uisathiam hmel chu a lo danglam daih a, “Thil pahnih khat lek min han sihhmuh tur i neih chuan ka lawm ngawt ang. He thil hi eng chen mah ka la buaipui lo ve,” a ti ta a. Holmes chuan, “Engtiangin nge tha i lo thawh tawh chu le?” tiin a’n zawt a.

Forbes-a chuan, “Chhiahhlawhpa, Tangey-a kha kan enthla a, kan chhui zui bawk a. A hnathawhna hmasa, Guards Regiment chu ṭha takin a chhuahsan a, a nungchangah thil dik lo eng mah kan hmu lo. Mahse, a nupui chu ṭhatna lamah chuan ti lo ve tak a ni. He thilah pawh hian a lan dan aiin a hre ril zawkin ka ring,” a han ti a.

Holmes chuan, “In chhui zui ve em?” a han ti a. Forbes chuan, “Kan hmeichhe zinga pakhat chuan a enthla a. Mrs Tangey hian mipa in ang hi chu tuiril lam pawh hi in ve zel a tum a. Ṭum hnih chu kan nauvi nen chuan an han dawm dun tawh a, a thluak lamah tihdanglamna nasa tak tawk mah sela han ṭangkaipui theih tur chi phuh chhuak zawngin a ṭawng duh rih tlat lo mai,” a ti a. Holmes chuan, “Mi thar an chhawr a ni lo’m ni kha?” a han ti a.

Forbes-a chuan, “Chhawr e; mahse, hlawh chu an pe fel thlap,” a lo ti a. Holmes chuan, “Khawi aṭangin nge pawisa a neih chu le?” tiin a’n zawt leh a. Forbes-a chuan, "Pawisa lamah chuan an harsa vak lo a ang rih. An pa hlawh an la a,” a ti a. Chutah Holmes chuan, “Phelps-a'n chhiahhlawh kohna dar a han hmeh rik a, an pa kal ta lova a nupui a kal tak zawk tlat thu kha engtin nge a phat mar chu le?” a ti leh ta a. Forbes-a chuan, “A pasal a chauh em avangin a lo chhawk ve zawk mai a ni tiin a sawi,” a ti a.

Holmes chuan, “Chuti a nih chuan a hnu lawkah a pasal muthlu lai kha Phelps khan a phawk a, a thusawi a dik hmel viau chu maw le. A nih leh chhiahhlawhpa nupui chu a nungchang lam in en zui em? Eng vangin nge khami zan khan hmanhmawh phe lenga a tlanchhiat tak? A hmanhmawh avang khan kawng dunga police lo awm pawh khan a lo hmu chiang ta deuh bik a nih kha,” a ti a.

Forbes chuan, “Zan dang aia a tlai deuh avangin haw thuai a duh a ni àwm e,” a lo ti leh a. Holmes chuan, “A nih leh a kal chhuah hnu, minute sawmhnih vela amah ûm tura thawk chhuak, nang leh Mr Phelps chuan in in thlen khalh tlat thu i sawi lang em?” a ti a. Forbes chuan, “Bus ai chuan tawlailir chu a tlan chak zawk a ni tih thuin a pha a ni,” a ti ta zel a.

Holmes chuan, “A nih leh in a thlen hnu chuan eng vangin nge choka lamah a tlan leh tak kher? A chhan a sawi em?” a ti a. Forbes chuan, “An mi chhawrte hnenah pawisa pek tur a kawl vang niin a sawi,” a ti ta zel a. Holmes chuan, “Phat marna tur chhuanlam chu a nei vek mai niin a lang. Phelps-ate pisa a chhuahsan lai chuan Charles Street velah mi teihawi a hmuh leh hmuh loh i zawt em?” a ti a.

Forbes chuan, “Police-pa chauh lo kha chu tu mah a hmu lo,” tiin a chhang ve zel a. Holmes chuan, “Thu i lo zawt chipchiar hneh tawh àwm kher mai. Thil dang eng nge i lo tih tawh chu le?” tiin a zawt ta a. Forbes chuan, “Clerk pakhat, Gorot-a kha chawlhkar khat chhung zet chu kan enthla tawh a; mahse, rinhlelh theih tur thil eng mah kan hmu hauh lo mai,” a ti a. Holmes chuan, “Thil dang?” tiin a la zawt ta cheu a.

Forbes-a chuan, “Han chhui zui theih tur thil eng mah kan hmu lo a ni, bawhzui tur kan hre lo tak zet a ni,” a ti ta hlawl mai a. Holmes chuan, “Dawhkan bula dár pawh rikna aṭanga dar a inpawh rik mai thu-hlaah khan ngaih dan i nei em?” tiin a la zawt ta cheu a. Forbes-a chuan, “Kha zawng, a ngaihna ka hre lo khawp mai. Khatianga dár han ti ri tur kha chuan mi sualpa chu thluak dai tak a ni ngei ang,” a ti ringawt a.

Holmes chuan, “Kha thil a han ti kher kher kha chu a ti mak ngawt mai. I thil min hrilh avang khan i chungah ka lawm hle a ni. Mi sualpa chu i kutah ka rawn pe thei dawn che a nih chuan ka la rawn hriattir leh ang che. Watson, lo kal rawh le!” a ti a. Forbes-a chuan, “Khawiah nge in kal dawn?” tiin a lo zawt a. Holmes chuan, “Cabinet Minister, Lord Holdhurst, nakin lawka England Premier la ni tur kan va kawm teh ang,” a ti ta a.

Lord Holdhurst-a chu Downing Street-a a pisa pindanah kan va nang hman hlauh a. Holmes-a'n a card a han pek luh chuan rang takin Lord Holdhurst-a pindanah chuan min luhtir a.

Chu pa chu an sawi ang ngeiin a lo hawihhawmin mi biangbiak a lo thiam ngang mai a, a chet dan reng reng chu a zahawm thlurh thlurh hle mai. Nui chung hian, “Mr Holmes, i hming hi chu ka lo hre fo tawh asin. I lo kal chhan pawh hi haider a ṭulin ka hre lo. Heng lai pisa vela i han tei ve theihna tur chhan chu thil pakhat chauh a awmin ka hria. Tunah hian tu tan nge i thawh chu le?” tiin a’n zawt ṭan a. Holmes chuan, “Mr Percy Phelps-a tan,” tiin a lo chhang a.

Lord Holdhurst-a chuan, “Ka tupa vanduai tak kha maw! Chhungkhat hnai kan nih avangin amah hliahkhuh zawnga chet hi ka tan a rem lo tawp a ni tih chu i hre thiam ve ngei ang. He thil thleng avang hian a hnathawh chungchangah a chhe zawngin a hming a Iang hma hle dawn a ni tih a hlauhthawnawm hlein ka hria,” a ti ta a. Holmes chuan, “Lehkha chu hmuh chhuah leh ni ta sela?” a lo ti a. Lord Holdhurst-a chuan, “Chuti a nih chuan thil awm dan chu a dang ang chu,” a ti a.

Holmes chuan, “Lord Holdhurst, zawhna pahnih khat han zawh che ka duh a,” a ti a. Ani chuan, "Ka theih phawt chuan i tana bengvarthlak tur chu ka hrilh chak hle che a nia," a ti mai a. Holmes chuan, “He pindanah hian em ni lehkhaa thu awm ziak chhawng tura in inhrilh?’ a han ti a. Holdhurst chuan, “Ni e,” tiin a lo chhang a. Holmes chuan, “Chuti a nih chuan, in thu sawi chu tu dang mahin an lo ngaithla ru thei lo vang,” a ti a.

Holdhurst chuan, “Chu zawng thil theih loh tawp a ni,” a ti ve mai a. Holmes chuan, “Inremna thuthlung chu ziah chhawn tur a nih thu mi dang hnenah i sawi reng reng em?” a ti leh ta a. Ani chuan, “Teuh lo mai,” tiin a lo chhang a. Holmes chuan, “l hre chiang maw?” a’n ti leh hram a. Lord Holdhurst chuan, “Hre chiang teh reng mai,” tiin a lo chhang leh a.

Holmes chuan, “Chuti a nih chuan Mr Phelps lahin eng mah a sawi si lo va, rukrupa chu in chhungah chuan tih palh thil thu liau liauvin a lo Iut tihna a ni ta a. A lo remchan em avangin pindan chhung aṭang chuan inremna thuthlung chu a la ta a ni,” a ti a. Lord Holdhurst chuan, “Chu zawng ka hriat thiam ve phak a ni ta lo,” a ti a. Holmes chuan, “Thil pawimawh tak mai a la awm. Chu thuthlung chu mi dangin an hriat vaih chuan thil ṭha lo takin a zui ngei dawn tih i hriaa ti raw?” a han ti leh a.

Lord Holdhurst chuan, “A zuitu chu thil ṭha lo zawng a tling mawlh ang,” a lo tihpui a. Holmes chuan, “A nih leh chûng thil ṭha lo chu a lo thleng tawh em?” tiin a zawt ta a. Ani chuan, “La thleng êm lo ve,” a ti a. Holmes chuan, “Chuti a nih chuan Russian Foreign Office emaw, French Foreign Office emaw thleng tawh chu ni sela chuan in hre ngei ang maw?” a ti ta zel a. Lord Holdhurst chuan, “Ka hre ngei ang,” a ti ve zel a.

Holmes chuan, “Chuti a nih chuan hei, chawlhkar sawm dawn lai a ni ta a; eng mah in la hre si lo va, inremna thuthlung chuan chûng pisa pahnih chu a la thleng lo phawt angah ngai ta ila kan tisual hran lovin a rinawm thei ang em?” a ti leh ta a. Lord Holdhurst chuan, "Mr Holmes, a rutu chuan inremna thuthlung chu banga tar mawiah chuan a lak a rinawm loh hle a ni,” a ti mai a. Holmes chuan, “Man to deuh zawka hralh theih hun a nghak lekfang pawh chu a lo ni mahna le,” a ti a.

Lord Holdhurst chuan, “A nghah rei luat chuan pawisaa hralh theih a ni miah lo vang. Nakin lawkah chuan he thuruk hi thuruk a nihna a bo dawn tlat a ni,” a ti a. Holmes chuan, “Chu chu thil pawimawh tak a ni. Rukrupa chuan natna eng emaw tak a nei ta thut angah ngai ta ila...,” a han tih chuan Lord Holdhurst chuan, “Entir nan, thluaka khawsik lut te maw?” a lo ti vat a.

Holmes chuan, “Chutiangin ka sawi lo. Khai le, Lord Holdhurst, i hun hlu tak kan khawhralsak tam ta hle mai che, hnathawh nuam kan ti mai ang che,” a ti ta a. Lord Holdhurst chuan, “Thil sual titu chu tu pawh lo ni se, hlawhtling takin i thil chhuina hi hlen chhuak la ka duh a ni,” a ti ve ta a.

Whitehall Street kan han chuan chhuah chuan Holmes chuan, “Pa ṭha tak zawng a nih kha; mahse, a hna chelh reng tur kha chuan a bei ve ngial bawk. A hausa lo hle a, tih tur hrang hrang a ngah hle bawk a. A pheikhawk hnuai kha a thlak tih i hria em? Watson, i hna ka tikhaihlak rei ta em mai, ka hreng zui tawh lo mai ang che. Tawlailir number chungchanga ka thu chhuah kha a chhanna ka hmuh loh chuan vawiin chuan eng mah ka ti tawh lo vang. Mahse, naktuk lama Woking lama i lo chhuk ve duh chuan ka lawm êm êm ang. Vawiina kan chuanna rélah khan chuang leh dawn nia,” a ti ta a.

A tukah chuan a hma nia kan chhuah hun pangngaiah ka inpeih leh a, Woking lam chu kan pan dun ta a. Tawlailir number chungchanga a thu chhuah chu tu ma’n an la rawn chhan loh thu leh hriat thar eng mah a neih loh thu a sawi a. A bak chu Red Indian, pa ṭawng mawh hnen aṭanga thawnthu ngaihnawm tak dawn tum ang maiin a hriat a harsa tawh a, a hmel ka han en mai pawh chuan thil awm danah chuan a lungawi nge a lungngai pawh ka hre bik lo. A mi ngaih san zawng chanchin leh a teha mi sual teh chhuah theih dan a sawite chu a hnen aṭanga ka thil hriat theih chhunte an ni ta mai mai a ni.

Min ruaitupa awmna kan va thlen leh chuan a enkawltu taima tak mai khan a lo la enkawl heuh heuh a, a hma ai chuan a hmel pawh a ṭha sawt hlein ka hria. In chhunga kan va luh chuan ṭhutthleng dûp aṭangin a lo tho va, chibai min lo bûk a, nghakhlel tih hriat tak mai hian, “Chanchin thar a awm em?” a han ti a.

Holmes chuan, “Ka hlauhthawn rûk ang ngeiin eng mah a awm loh thu mai lo chu hrilh tur che ka nei lo,” a lo ti a. Chutah, “Forbes-a pawh ka va kawm a, i patea pawh ka va kawm bawk a, chu bakah, thil eng eng emaw, pahnih khat chu ka’n zawt thlithlai bawk a, chu chuan eng emaw a la rawn hring chhuak mahna le,” a ti mai a. Percy Phelps chuan, “Chu, i bei a la dawng êm lo a maw?” a’n ti a.

Holmes chuan, “Dawng awzawng lo mai,” a lo ti a. Percy-a chuan, “Pathianin malsawm che rawh se. Dawhthei tak leh huaisen taka kan beih zel chuan thu dik chuan irh chhuah hun a la nei ngei ang,” a ti a. Chutah, “Nangin min hrilh tur i neih aiin ka hrilh tur neih che u hi a tam zawk ang,” a han ti a, ṭhutthleng dûpah chuan a ṭhu a. Holmes chuan, “Eng emaw in nei ang tih ka ring reng a ni,” a lo ti mai a.

Phelps chuan, “Nizan lamah khan thil eng emaw kan tawng alawm maw le. Thil eng emaw tak zawng a ni ngeiin a lang. Ka hmingṭhatna leh ka nunna hi tu’n emaw tih chhiat tumin a phiar mék a ni tih i hria em?” a han ti a. A mitmengah chuan hlau hmel a lang lek lek mai.

Holmes chuan, “Ah!” a lo ti ngawt a. Phelps chuan, "Ka hriat theih chinah reng reng, he khawvel ram zauvah hian hmelma ka nei si lo va, chuvangin, awih harsa pawh ka ti hle mai. Mahse, nizana thil lo thleng kha ka han ngaihtuahin thil dang ni theiin ka hre tlat lo a ni,” a ti a. Holmes chuan, "Khawngaih takin thil awm dan min han hrilh ve teh,” a lo ti a.

Phelps chuan, “Nizan kha min riahpuitu awm lova ka riah hmasak ber zan a ni tih lo hre phawt ula a ṭha ang. Ka mut tui theih em avangin min awmtu tel lo pawhin ka riak ve thei maiin ka inring a; mahse, zankhuain khawnvar ka chhi reng tho a ni. Zing dar hnih velah chuan ka mu nghet lo hle a, thil eng emaw ri rek hian min tiharh ta a. Chu ri chu eng emaw chen ka ngaihthlak hnu chuan sazuin eng emaw a tih rik niin ka ring ta ber a ni. Chutah thil ri chu a ring ta tial tial a, a tawpah phei chuan tukverh lam aṭang chuan thir han ri rak (ri) a lo awm ta tlat mai a.

"Mak ti zet chuan ka ṭhu chhuak nghal hlawl mai a. A hmaa thil ri kha, tukverh kawngkhar invuak thuahna kara thir hawlh luh ri a ni a, tuna lo ri ta chu tukverh kalhna thai tawlh ri a ni lo thei lo a ni. Chutah, pawn lama mi chuan ka harh leh harh loh a ngaithla ni ngei tur a ni, eng emaw chen chu a han reh a, zawi zawiin tukverh chu a inhawng ta riai riai a. Tun hmaa ka huaisenna ang kha pu tawh hek lo i, ka tuar zo ta lo va; ka mutna aṭang chuan ka zuang tho va, tukverh puanzar chu ka theh hlim ta vâwk mai a.

“Tukverh hnuaiah chuan mi pakhat hi a lo vâk zai zai a; mahse, ka hmu chiang hman lo, a che rang em mai a, a hmai hnuai lam chu puana a khuh bawk avangin a hmel pawh ka hmu mumal ta lo a ni. Mahse, thil pakhat chu ka hre chiang, a kutah chuan hriamhrei a keng ni ngeiin a lang. Ka han hmuh dan mai chuan a thil ken chu chemtê sei tak mai niin ka hria, a tlan zawngin a de zak zak tlat a ni,” a han ti a.

Holmes chuan “A ngaihnawm kher mai. Eng nge i tih tak han sawi zel teh," a ti a. Phelps chuan, “Lo chak deuh hlek ila chuan tukverhah chuan zuang chhuakin ka han um zui sa teh tur hi a ni a. Ka theih tlat loh avangin dar ka pawt ri a, ina mi dang awm ve chu ka sâwi harh ta a. Dar rik chhung leh mi dangin an hriat chhung chuan eng emaw chen a ral hman a, a chhan pawh dar chu chokaa a rik avang leh chhiahhlawhho chu in chung lama an mut vang a ni.

"Ka àu zui tak zel avangin Joseph-a chu a lo harh a, mi dang pawh a rawn kaitho ve nghal a. An han en vel a, pangpar chinna hmunah chuan hniak hnu an hmu nain ruah a sur loh rei deuh avangin chhui zui chi-ah a ruat ta lo a ni. Mahse, kawng lam hnaiah chuan in hungna pal a awm a, chutah chuan a lawn liam ni ngei tur a ni, pal kham chungnung ber chu a titliak. Tunah chuan police lam chu thil eng mah ka la hrilh lo, i ngaih dan hriat hmasak phawt hi a ṭha berin ka ring a ni,” a ti a.

Chu thu chuan Sherlock Holmes chu a dek hneh hle ni tur a ni, ṭhu hle hle thei lovin pindan chhuatah chuan savawm zu rui ang maiin a vei tuak nghut nghut mai a. Nui chung hian Phelps chuan, “Vanduaina chu a maltlat ngai lo hle a ni,” a han ti a, a hmelah chuan a thil tawn chuan a sâwi hneh ve hle tho tih chu a lang reng mai. Holmes chuan, "Ka rualin in hi i kal hual theiin i ring em?" a ti ta a.

Percy chuan, “Teh reng mai, niluma han vah chhuah pawh ka châk alawm. Joseph-a lo kal bawk sela,” a ti a. Miss Harrisson chuan, “Kei pawh,” a lo ti vat a. Holmes chuan lu thing chungin, “A rem lo vang tih ka hlau ngawt mai. Nang chu kha laiah khan i ṭhutna ngaiah khan lo ṭhu reng turin ka duh che a ni,” a ti a. Lawm lo tih hriat deuh mai hian nula chu a ṭhutnaah chuan a ṭhu a; a unaupa erawh chu kan rualin a lo kal a, kan pali chuan kan tei chhuak ta a.

Tukverh bulah chuan kan va kal a, pangpar chinna hmunah chuan mihring hniak chiangkuang lo zet chu kan va hmu a. Holmes chu bih chiang turin a’n kun zawk a; mahse, a tho chhuak leh thuai a, “Hetiang hi zawng, tu pa mahin an chhui zui thei bikin ka ring lo. Ti rawh u, kal kual ila, he pindan kher kher hi eng vangin nge mi sualpa chuan a lo thlan i en teh ang. Saw laia lem ziahna pindan tukverh leh chaw eina pindan tukverh te pawh saw a lian zawkin a beih atan a itawm zawk si a, eng vangin nge a belhbul zawk loh tih ka ngaihtuah a ni,” a ti a.

Joseph Harrison chuan, “Kawng aṭang pawhin an lang chiang zawk si a,” a lo ti a. Holmes chuan, “A ni ngawt mai. He laia kawngkhar pawh hi hawn zawk àwm tak a ni si a. He kawngkhar hi eng atana hman nge ni chu le?” a’n ti a. Joseph chuan, “Mi veivak leh sumdawng ilo kan dawr duh changa kan kawngkhar hman ṭhin a nih kha. Zanah chuan a inkalh ve chiah tho,” a ti a. Holmes chuan, “Hetianga ralkhelna tur thil hi ni dangah in nei ngai em?" a han ti a.

Percy chuan, “Ngai miah lo,” a lo ti a. Holmes chuan, “Rukru tana thil itawm thei tur, thlèng mak danglam bik te in kawl lo maw?” a han ti leh a. Percy chuan, “Chutiang thil hlu eng mah ka kawl lo,” a lo ti a. Holmes chuan a kekawr ipte a zen a, ani leh ni lo ang takin engthawl àwm fe hian a hawi valh valh a. Chutah Joseph-a hnenah chuan, “Kan mihringa'n pal a lawn liamna lai chu in hmu a ni àwm a, i va en teh ang u,” a han ti a.

Chumi hmuna kan va kal chuan thing bung pakhat hi a lo uai dàr dàr a, Holmes chuan ngun tak mai hian a’n thlêk a, “He thil hi nizana a tih niin in ring maw? A hnu-hma hi a hlui hmel tawh hmel hle a ni,” a han ti a. “A hlui tawh pawh a mi maithei,” tiin an lo chhang a. Holmes chuan, “A lehlamah hian a zuan thlakna hnu-hma a lang lo em mai ka ti. A ni lo, hetah chuan eng mah kan hriat belh lo vang. Mutna pindan lamah khan kal ila, thil awm dan hi i sawiho teh ang u,” a ti ta a.

Percy Phelps chu a kal muang hle mai a, a puzawn tur ban tha chakna rinchhan chuan a kal saih saih a. Holmes chu chak fein hma lamah a kal a, Percy-ate putu an lo Ian ve hma chuan mutna pindan tukverh inhawng zawnah chuan kan lo va awm hman a. Thutak hmel em em mai hian Holmes chuan, “Miss Harrison, i ṭhutna ngaiah khan nilengin i ṭhu tlat tur a ni. Eng vang mahin i thawhsan tur a ni lo. Chu Chu thil pawimawh tawpkhawk a ni,” a ti ta a.

Miss Harrison chuan mak ti zet mai hian, “Mr Holmes, i duh phawt chuan ni teh reng e,” a lo ti a. Holmes chuan, “Zana i mut dawn hunah chuan he pindan hi pawn lam aṭangin kalh tlat la, a chabi chu vawng tlat ang che. Chu chu i ti ang tih min tiam rawh,” a han ti a. Miss Harrison chuan, “Percy-a hi?” a lo ti a.

Holmes chuan, “Kan rualin London-ah a lo kal ve dawn alawm,” a ti mai a. Nula chuan, “Tichuan kei chu hetah hian ka awm ta reng ang a maw?” a ti a. Holmes chuan, “Percy-a tana ṭhatna tur a ni. Percy-a tana thil ṭha i tihsak theih hun lai a ni. Mawh! Rang takin min tiam rawh!” a ti ta tlut tlut a.

Nula chuan a rem ti tih nan a lu a bu fel hman awrh a, mi dang pawh chu an lo thleng ve chawpchilh ta mai a. Joseph-a chuan, “Annie, khatah khan engati nge i thut reng? Nilumah hian lo chhuak ve ta che,” a han ti a. A farnu chuan, “Aih; Joseph, i ti lawmawm. Ka lu a nuam lo deuh va, he pindan vawt deuh hi ka duh zawk, a nuam riau mai,” a lo ti a.

Percy-a chuan, “Mr Holmes, engtianga tih nge ṭhaa i rin tak le?” a han ti ve thung a. Holmes chuan, “Hetiang thil tenau buaipuinaah hi chuan kan buaina bur kalsan hlat hi a fel ṭhin lo. London lama i lo kal ve theih chuan kan tan i ṭangkai ngawt ang,” a ti ta a. Percy chuan, “Tunah hian?” tiin a’n zawt a.

Holmes chuan, “I theih anga hmain. Darkar khat hnu velah te pawh,” a ti ta a. Percy chuan, “Ṭangkaina ka neih theih dawn phawt chuan le; ka ṭha khawpin ka hre mai,” a ti a. Holmes chuan, “l neih ngei a rinawm hle a ni,” a lo ti a. Percy chuan, “Zana riak nghal turin min duh ang maw?” a han ti leh a. Holmes chuan, “Ka lo sawi chhuak dawn chiah a,” a ti ringawt a.

Percy chuan, “Chuti a nih chuan kan zan lam ṭhianpa chuan min rawn tlawh leh ngai te a nih chuan sava bu ruak hup tuma thawh chhuah ang chauh a ni tih a hre mai ang. Mr Holmes, i duh duhin min hmang la, kan tih tur chin chu min hrilh zel ang che. Joseph-a pawh hi min enkawl turin i duh ang a?” a han ti a.

Holmes chuan, “Ni lul lo ve; ka ṭhianpa Watson-a hi damdawi lam khawih ve mi tho a ni a, a enkawl thei ang che. Rem in tih chuan hetah hian chaw fak tê tê ila, London khawpui lam pan chuan kan inchhep chhuak dawn nia,” a ti ta a.

Link:
BBcode:
HTML:
Hide post links
Show post links

Rozami pachuau
Posts: 362
Joined: March 17th, 2018, 7:40 pm

Unread post by Rozami pachuau » July 28th, 2018, 6:51 pm

SHERLOCK HOLMES
THE NAVAL TREATY
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 3 (Last)
(Rozami Pachuau)

Holmes-a duh ang chuan chaw chu kan fak ta ngei a; mahse, Holmes-a duh ang vekin Miss Harrison chu pindan aṭang chuan a che sawn duh rêng rêng lo. Ka ṭhianpa rilru sukthlekna lam chu ka chhuipui ve pha lo tawp mai, nula leh Phelps chu awm hrantir a duh ve hrim hrim ni maiin ka ngai a. Phelps lah chu mu hlawm rei tawh a nih avangin tha thawhna tur a neih thar tak avangin a hlim hle a.

Rel chawlhhmuna kan chhuk thlak a, rela kan chuan fel vek tawh hnu chuan Holmes chuan Woking bial chu chhuahsan a tum loh thu leh kan ruala kal ve a tum reng reng loh thu a sawi leh ta tlat mai a, chu zet chuan min tihrilhhai hneh hle mai. Kan hnenah chuan, “Thil tê tham tê tê pahnih khat han en fel lawk duh ka la nei a, chu mai chu a ni. Mr Phelps, i awm dawn loh avangin ka chêt a sam sawt ang tih ka beisei.

"Watson, London in thlen veleh kan pindan panin tawlailirin in tlan ang a, kan inhmuh leh hma loh chuan in lo awm reng dawn nia. Sikula lut dun ṭhin in lo ni hlauha a tihzia hle mai. Zaninah chuan khum chuangah khan Mr Phelps chu a lo riak ang a, naktuk tukṭhuan eipui hman tur che uin ka lo kir leh ang. A chhan chu Waterloo pan tur rel chu dar riatah a kal dawn tlat,” a ti a.

Phelps chuan, “A nih leh London-a kan thil en fiah tur lam ve thung kha engtin nge ni dawn?” a han ti a. Holmes chuan, “Chu zawng naktukah kan ti thei ang chu. Tunah rih chuan he lai hmunah hian awm ila ka ṭangkai thei berin ka ring,” a ti a. Phelps chuan, “Naktuk zan lam chu Briarbrae-ah ka hmang leh hman ang tih ka beisei thu hi i han hrilh dawn nia,” a ti a. Holmes chuan, “Briarbrae lama kir leh pawh hi ka lo tum mang hlei nem,” a lo ti mai a, kan inṭhen ta a.

Kan kalkawngah chuan thil awm dan chu Phelps-a nen chuan kan han sawi dun ṭhin a, a awmzia kan hre hlei thei meuh lo va. Phelps chuan, “Nizana thil awm dan kha en chian a duh a ni ang, mi sual, min rawk tum a ni nge ni lo te pawh han chhui chian a duh a ni ang e. Keia ngaih ve dan chuan min rawk tum naran ngawt chu a nih ka ring hauh lo va,” a ti a. Kei chuan, “Chu, eng nge i ngaih dan?” tiin ka lo zawt a.

Phelps chuan, “Ka hlauhthawn hma luat vang emaw i ti maithei a; mahse, he thilah hian ka chhiatna duh hIim hrim an inrawlh a ang ka ti tlat a ni. Min phiartute’n ka nunna hi min tihtawpsak an duh ni hialin ka ring. Ka ṭawng a uak deuh emaw i ti mai thei a, thil ni thei dang han sawi tur ka hre tlat lo a ni. Eng vangin nge rukruin mutna pindan tukverh hawn a tum ngawt ang ni? Eng vangin nge chemtê sei tak a ken ang?” a ti a.

Kei chuan, “Mi ina luh ruk chingte’n kawngkhar kalhna ilo hawlh hawn nana an hman thin, thir phek sci zil 261 hi a mi lo tih i hrechian g maw?” ka han ti leh a. Ani chuan, “Teuh lo mai, ka hre chiang lutuk, a phe zawk pawh ka hmu alawm,” a ti tlat a. Kei chuan, “A nih leh eng vangin nge chutianga nangmah chu ralpui phiar taka an phiar duhna chhan tur che?” ka lo ti a. Ani chuan, “Chu tak chu a buaithlakna lai chu a ni ta reng a ni,” a ti ve mai a.

Kei chuan, “I ngaih dan ang chuan Holmes chuan ngai ve sela chuan a chet dan nen hian a inrem thlap tur a ni. I ngaih dan chu thil awm dan dik angah lo ngai ta ila, nizana thah tumtu che chu Holmes chuan a man theih chuan inremna thuthlung latu pawh chu a hmu teuh hle tihna a ni mai. Chuti a nih chuan hmelma pahnih, nangmah thah tumtu che leh inremna thuthlung laksaktu che an awm tihna a ni dawn a, chu lah chu thil ang lo deuh mai a ni si a ni,” ka ti ta a.

Phelps chuan, “Mahse, Mr Holmes chuan Briarbrae a a kal dawn loh thu kha a sawi si a,” a han ti leh a. Kei chuan, “Holmes nen hian kum tam kan lo inkawp ve tawh a, chhan ṭha tawk tak nei lo chuan thil eng mah a ti ngai lo,” ka lo ti a. Chutah chuan sawi zui lovin thu dangah kan pakaisan ta a.

Chumi ni chu ka tan chuan a hrehawm chiang kher mai. Phelps-a rilru lâk pen tum chuan India rama kan awm lai te, Afghanistan-a kan awm lai te leh thil dang chanchin ka’n sawi kur luai tak nain a tawpah chuan a lehkha tihbo chungchang bawk chu Phelps chuan a sawi chhuak leh ṭhin a. Holmes chuan eng tak ti ang maw? Lord Holdhurst chuan engtin nge a bawhzui ang tih vel chu a sawi leh ṭhin a. Khua a lo tlailam a, a khawngaihthlak tawlh tawlhin ka hre mai. Ka hnenah chuan, “Holmes hi i ring tlur mai a ni maw?” a han ti chawt a.

Kei chuan, “Thil mak tak tak a ti ka hmu fo tawh alawm,” ka ti mai a. Phelps chuan, “Mahse, ka chungthu anga khirh hi chu a la ching fel ngai em lo vang a," a ti leh hram a. Kei chuan, “1 buaina aia khirhkhan zawk leh eng ilo chhuidawn theihna tur tlem zawk pawh hi a ching fel fo mai,” ka lo ti a. Ani chuan, “Mahse, hetiang ema thil lian tham hi chu a la buaipui lo vang maw?” a ti ta zel a. Kei chuan, “Ka hre ngam tawh lo le. Ka hriat phakah chuan Europe ram awptu chhungkaw thum ai awhin hetiang hna hi chu a thawk tawh ngei mai a, chung thilte chu thil pawimawh tawpkhawk a ni,” ka ti a.

Phelps chuan, “Watson, nang zawngin i hre chiang a, amah hi ngaihruat dan pawh ka hre thiam ve ṭhin lo. Beisei tur chi em ni ang? He thilah hian a hlawhtling thei ang em?” a ti a. Kei chuan, “Eng mah min hrilh lo,” ka ti ringawt a. Ani chuan, “Thil ṭha lo tak a ni,” a han ti ngawt a. Kei chuan, “A lehlam zawnga ngaihtuah chuan hnu chhui tur a hmuh a, a dik nge dik lo tih a hriat loh hian a ṭawng mawh zual ṭhin. Ka ṭhian, i lo mangan ve avangin eng mah i anpui lo vang, mu ila naktuk khaw lo var hian eng nge a rawn her chhuahpui dawn i lo en mai mai teh ang,” ka ti ta ringawt a.

Rei tawk tak ka thlem hnu chuan Phelps chuan mutna khum lam a pan ve ta a; mahse, a muthilh chu ka ring chuang lo kher mai. Keimah ngei pawh chu ka mu hlei thei bik lo. Eng vangin nge Holmes chu Woking-ah a awm tlat? Engati nge Miss Harrison kha damlo awmna pindanah khan nilenga awm tlat tura a tih? Engati nge Briarbrae-a awmte hnenah khan Briarbrae aṭanga hla lo teah a awm ve dawn tih a zep? Ngaih dan tam tak chu ka siam chhuak a; mahse, a dik lo tih chu ka hre chhuak nghal zel a, inngaihtuah buai tak chungin ka muhil ve ta hram a.

Zinga ka han ṭhanharh chuan dar sarih a lo ri tawh a, Phelps-a pindan lam pan chuan ka kal thuai a, a mu mumal lo tih chu ka hre chiang ve hle mai. Holmes-a lo thlen tawh leh tawh loh min lo zawt nghal chawt a. Kei chuan, “A hun tiamah chuan a lo thleng mai ang. A aia hmain a lo thleng lo ang a; a tlai hek lo vang,” tiin ka chhang a.

Ka sawi ang chiah chuan dar riat pelh hnu lawk chuan kan kawtah chuan tawlailir a rawn ding a, tukverh aṭanga kan han thlir thlak chuan Holmes-a chu kan hmu thei a. Holmes-a kut vei lam chu hliam tuamna puanin a intuam a, a hmel pawh a dángin a rum hmel hle mai. In chhungah chuan a lo lut thuai a; mahse, kailawnah chuan a rawn chho ta mai lo deuh a. Phelps chuan, “A hlawhchham a ang kher mai,” a lo ti a.

Kei chuan, “Kan buaina hi he khawpui aṭanga chin fel chi pawh hi a la ni mial maithei asin,” ka lo ti ve ngat a. Phelps chu a’n rum hawk a, “Engtin tak chuan han ti zui ta ni maw! A lo haw hlan ka lo nghakhlel teh asin. Niminah kha chuan a kut kha a intuam lo ti raw? Engti zia nge ni ta ang le?” a lo ti hmanhmawh a. Chutih lai chuan Holmes chu pindan chhungah a rawn lut a, “Holmes, i inhliam elo?” ka lo ti vat a.

Ani chuan, “Mai mai a, ka tlâw luat avangin ka’n intipem hlek chauh a ni. Mr Phelps, i chungchang thu hi ka thubuai beih tawhah chuan a la manganthlak ber àwm e,” a han ti nghal a. Phelps chuan, “I chin fel phak loh a ni ang tih ka hlau reng a ni,” a lo ti zauh a. Holmes chuan, “Ka thil tawn takte kha thil danglam ber ber zawng a ni,” a han ti ve leh thla tawp a.

Phelps-an eng mah a sawi leh hma chuan kei chuan, “l kut tuam aṭang khan eng emaw chu a awm tih a hriat mai. Thil awm dan chu min hrilh ve duh lo’m ni?” ka lo ti a. Holmes chuan, “Tukṭhuan ei kham lamah le Watson. Tukinah ngawt pawh mel sawmthum zet chu thlifim dawngin lirtheiah ka chuang tawh tih hre ta che. Tawlailir khalhtu chungchanga ka thu chhuah chhanna kha a la awm pek lo vang maw? A ṭha e, a ṭha e, inkhelh apianga goal vuak zat zat zawng thil harsa tak a ni ve bawk a ni,” a han ti a.

Tukṭhuan kil nana dawhkan vel kan hung rem vek hnu chuan chhiahhlawh kohna dar han hmeh rik mai ka tum a, chutih lai tak chuan Pi Hudson-i chu thingpui leh coffee no chawiin a lo lut a. Rei lo têah chuan ei tur lam chi pawh chu Pi Hudson-i chuan a rawn chawi lut a, ei tur chu thleng chhungah, puanin a inkhuh diam hlawm a. Dawhkan chu kan han kil hnai a, Holmes chu rilṭam awm tak mai hian a lang a; kei lah chuan mak ka ti hle mai a, Phelps-a lah chu a lungngaih hmel êm êm bawk a.

Holmes chuan, “Pi Hudson-i hian chawhmeh tui siam hun chu hre tak a ni,” a han ti a. Chutah, ar sa kàn awmna thlèng chu a’n hnuk hnai a, “A inren deuh ṭhina tih mai a ni. Watson, kha i thlèngah khan eng nge awm ve le?” a’n ti zung zung a. Kei chuan, “Bawng sa kan leh ar tui kan," ka lo ti a. Holmes chuan, “A va tui àwm ve! Mr Phelps, eng nge i hmeh ve dawn? Ar sa nge, ar tui nge, i insuah chawp ve mai zawk dawn em ni?” a ti chung chung a.

Thu danga chhang ta lo chuan Phelps chuan, “Ka lawm e, eng mah ka ei thei lo,” a ti bung hmak a. Holmes chuan, “Leh ta mai mai ṭhin a! I chan pual hi han hui hrang ve reng reng teh, hei hi i thlèng a nih hi,” a ti lui tlat a. Phelps lah chuan “Ka lawm e; ka ei lo vang, ka ti tak zet a ni,” a ti fithla ve ṭhuai mai bawk a. Holmes chuan mit siai sak chung hian, "Chuti a nih chuan ka ei tur mi’n buatsaihpui chu i hreh lo vang tih ka beisei,” a han ti a. Chutah zawng Phelps chuan ei tur thleng pakhat khuhna puan chu a'n hawng a, mak tiin a ṭe ta ṭhawt mai a.

Thleng chhungah chuan lehkha inzial, rawng dumpawl lek lek hi a lo awm a. A rawng chu a dumpawl ka’n ti ngawt tak na a, a buang nge ni pawh ka hre chiah lo. Chu lehkha zial chu Phelps chuan a’n la kang a, hnai deuhah a’n bih vel a, chhuat dungah chuan a lam kualpui ta chai chai a. A lawm lutuk chu a au vel chel chul bawk a. A hah tawk a lam hnu chuan ṭhutthlengah a ṭhu hnawk a, chaw ei dawhkan chunga zufang inchhawp chu a’n khiat khawlh a.

Holmes chuan Phelps-a darah chuan a lo chul a, “Aw! Aw! Hetiang zawng khera han bawlzan che hi thil tuihnai vak zawng a ni lo; mahse, thil hmuhnawm lam hi ka lawm ve êm êm a ni tih Watson-a hian a hrilh thei ang che,” a ti ta a.

Phelps chuan chu lehkha zial chu a han fawp a, “Ka hming chhiatna tur ata min chhanhim ta, Pathianin malsawm che rawh se,” a han ti a. Holmes chuan, “Ngawi teh, ka hming ṭhat leh hming chhiatna a ni ve tho alawm. I puala tih tur lum ti thei lova awm i hreh tluk zet ang khan thubuai chin felna chungchangah hian hlawhchham ka hreh ve asin,” a lo ti a.

Phelps chuan chu lehkha hlu tak mai chu a kawr iptê chhungril berah a’n khung a, “In tukṭhuan ei tur chu ka tibuai zui tawh lovang che u. Mahse, he lehkha hi khawiah nge a lo awm a, engtin nge i hmuh chhuah tih erawh chu ka hre chak zek zek a ni,” a ti ta a. Sherlock Holmes chuan coffee chu a’n tlak puat a, bawng sa kan leh artui chu a’n hmawm mawlh mawlh a. Chutah a tho va, a kuaitê a ṭan a, ṭhutthleng ban neiah chuan a’n ṭhu a.

“Ka thil tih dan chu ka’n hrilh ang che u. Rel chawlhhmuna ka kalsan tak hnu che u khan Surrey bial vela tlai ni tla tur mawi tak tak mai chu ka thlir vel a, khaw tê tak tê, Riplay lamah ka kal ta nghal a. Chutah chuan thingpui ka in a, thingpui pai lumna bawmah thingpui ka pai a, chhang tlem ka ak chhuak nghal bawk a. Tlai thlengin chutah chuan ka awm ta a. Tichuan, Woking lam panin ka kal leh a, Briarbrae bul chu ni tlak dawnah ka va thleng ta a ni.

“Briarbrae bulah chuan, kawngpuiah mi tlem hun nghakin ka thep khawtlai a, mi an tlem ta deuh tihah chuanin In hungna pal chu ka pel phei a, thingbuk zinga biru chung zelin bawkvakin tukverh hnaih theihna lai tur ka pan phei a. Ka kekawr khup pawh a nalh lo duh kher asin. Chutah i mutna pindan epa thingbukah chuan ka tawm a, thil awm dan chu ka en zui ta a ni.

"I pindan puanzar chu a inzar phui lo va, chuvangin dawhkan bula Miss Harrison-i lehkha chhiar pawh chu ka va hmu thei a. Dar sawm miniute sawma a pelh hnu chuan Miss Harrison chu mutna lam panin a kal a. Kawngkhar a kalh ri pawh ka hre nghe nghe a ni,” a ti a. Chutih lai chuan Phelps chuan, “A kalh a?” a lo ti a. Holmes chuan, “Aw, kalh e. A chhan pawh a mut dawn chuan pawn lam aṭanga kawngkhar chu kalh tura ka tih vang a ni.

"Tih tur ka tih ang thlapin thil engkim a ti zel a; chuti ni lo se chuan i lehkha roh tak mai pawh kha tunah khan i nei thei kher lo vang. Tichuan, Miss Harrison-i chu a mu ta a, i pindana eng pawh chu a thim ta a. Chumi zan chu a thiang ṭha hle mai a, a ninawm ve lek lek mai. Sa peltuin kawrtê ruam kama sapui a chang ang deuh ni berin ka hre mai. Watson, “Speckled Band” tih kan buaipui laia zana pindan chhunga kan awm ṭum ang deuh kha niin ka hria.

"Chutih lai chuan Woking Biak In chuan dar a’n khawng ri a, dar laklawh a khawng ri tlat mai. Mahse, zan dar hnih velah chuan ka lo mu a ni teh chek ang chu kawngkhar kalhna han ri rak thawm hian min tiharh ta zawk mai a. Thla engah chuan ka va hawi phei a, Mr Joseph Harrison-a, in chhung aṭanga a lo chhuak lai chu ka va hmu a,” a tih lai tak chuan Phelps chuan, “Joseph-a maw!” a lo ti hak a.

Holmes chuan, “Lukhum pawh a khum lo va; mahse kawrfual lianpui mai, dum deuh a ha a, eng emaw hlekah chuan a kawr hak chu a hmai khuh thut nan pawh a remchang hle ang. Bang hrulah chuan a kal phei zai zai a, tukverh zawn a thlen chuan a chemtê sei tak mai chuan a kalhna chu a hawlh tawlh a, tukverh chu a hawng ta a. Ka awmna aṭang chuan in chhung chu chiang takin a lang thei a, a chet dan zawng zawng pawh ka hmu thei vek a ni.

“Chhuara khawnvar chu a la a, a pahnihin a chhi a, chutah kawngkhar bula chhuatphah chu a pan ta a. Kawngkhar bula chhuatphah chu a kai phawk a, chhuatlaia kawngkhar angreng, in hnuaia thir dawt inphum inzawmna lai siam rem nana chhuat reh kuak kawngkhar chu a kai phawk a. Chuti lai zawnah chiah chuan thir dawt chu 'T' ang hian a peng darh sang a. Chu thir dawt chhung aṭang chuan Iehkha inzial kha a phawrh chhuak a, chhuat thawmna pawh chu a awmna pangngaiah a dah leh a, chhuatphah pawh a phah ṭha leh chiah bawk a.

"Tukverh bul lawkah kei chuan ka lo nghak reng a, ka kutah a rawn intulut ta ringawt mai a ni. Mahse ka rin ai daih maiin kan Pu Joseph-a chu a lo rum ve mai a, ṭum hnih ngawt mai a chemtê nen chuan mi’n bawh a, ka tawlh zak zak nghe nghe a, ka duh anga a awm hman hmain ka kutchangah min hliam hman ta nghe nghe a. Kan han intukzal zawh a, a mit lehlam chauh a men theih tawh hnu pawh chuan a meng thei lam chuan, “Ka that te’ng che,” tih melh hian min la melh ram ram a; mahse, lehkha min pe tur chuan ka thlem thlu thei ta hram a ni.

"Lehkha ka lak hnu chuan ka se zawl chhuah ve ta mai a; mahse, thil awm dan chu tukin zing khan Forbes-a hnenah ka hrilh vek a, a ṭuan a ṭhat a, a man hman leh a vannei deuh a ni mai a. A man hman loh leh sawrkar lamin an lawm phah ve deuh ang chu. Mi pahnih, Lord Holdhurst leh Mr Percy Phelps-te chuan he thil hi tlangzarh an duh hauhvin ka ring si lo va,” a ti ta a.

Phelps chuan, “Karei, hrehawm ti êm êma chawlhkar sawm dawn lai ka leh vel chhung khan chu lehkha chu ka awmna pindanah a lo awm reng a ni maw?” a ti a. Holmes chuan “Nih awm kha,” a ti duh lek chauh a. Phelps chuan, “Joseph-a chu mi sual rukruk hmang a nih chu!” a han ti leh a.

Holmes chuan, “Hum, kan Joseph-a kha a hmel en aia pai ril chi a ni. Ka hriat dan mai mai chuan a sumdawnna lamah a che sual deuh hlek a, ngai awh leh theihna a nih dawn chuan a farnu hlimna tur emaw, i hming ṭhatna tur emaw chu a ngaihtuah buai si se lo a ang hle mai,” a ti a. Percy Phelps chuan thaw hak hak chung hian, “Ka thluak a buai mum mum mai. I thu sawi hi a mak ka ti em a ni," a han ti a.

Holmes chuan, “l chungchang thu a buaithlakna lai ber chu eng ilo ngaihtuah tel tur tam lutuk hi a ni. Thil ni ve thei mai awm kha a tam riau mai a, a eng nge pawimawh a, a eng nge pawimawh lo tih kha thliar fel a, thil awm dan kha a indawt thliaha rem a ngai tlat a ni.

"Joseph-a nena haw dun in tum thu ka’n hriat kha chuan Joseph-a kha ka ringhlel nghal deuh hlek a. A chhan pawh in pisa chu a hriat chian hle si chuan hawpuiah a rawn sawm mai che a rin ve theih vang a ni. Pindan chhungah chuan mi dang tan thil thuhruk chu a theih miah lo va; Joseph-a tan chauh lo chuan eng ilo thuhruk a rem tlat lo. Chu pindan ngei chu luah thei lovin Joseph-a chu i siam tih min hrilh a; mahse, chu pindan chhungah chuan tu emaw chu a lut chak zek zek tih kan hre tlat a nih kha.

"Thil awm dan ka’n hriat chian chuan ka rin thu chu hriat chiannaah a lo chang a, chu pawh chu nangmah enkawltu che awm loh zan chiahin i pindana luh tumtu chuan a rawn bei a, in khawsak phung chu a hre chiang êm êm tih ka hriatnain a hrin chhuah a ni bawk,” a ti ta zel a. Phelps chuan, “Ka mit a lo va’n del nasa em!” a han ti ringawt a. Holmes chuan, “Ka hriat theih chinah chuan hetiang hi thil awm dan chu a ni :

"Joseph Harrison-a chu i pisa pindanah chuan Charles Street lam aṭangin a lo Iut a. Chutih lai tak chu i kal bo zawk hlan kha a ni a. Tu mah an awm loh avangin dar pawhrik chu a’n pawt ri a, chumi rual rual chuan dawhkan chunga lehkha chuan a mit a la a, a han melh zawk chuan sawrkar-pui tan pawha lehkha pawimawh tling khawp a ni tih a hre chhuak nghal a. Chhiahhlawh-pain dar pawhrik a rik thu a hrilh vel chhung che khan a lo relh bo leh hman ta a ni. Tichuan, Woking lam pan tur rel chhuak hmasa berah chuan a kai ta vat a.

"A lehkha chu a’n en chiang leh a, thil hlu tham ngei a ni tih a hriat hnu chuan hmun him tawk tak maiah ni hnih khat hnu leka lak chhuah leh turin a thukru a; mahse, nang kha i haw leh ta phut a, loh theih lovin Joseph-a chu a pindan Iuah lai i chhuhsak ta bawk a. Chuta ṭang chuan pindan chhungah chuan mi pahnih vel chu in tap ta chawt mai si a, a buai hle ta ve ang. Mahse, hun remchang awm ta nia a hriat veleh pindanah chuan luh ruk a tum a, chu pawh chu i lo ti sukuk leh ta zel a nih kha,” a ti a.

Phelps chuan, “Ka hria,” a lo ti bauh a. Holmes chuan, “Hun remchang dang a neih leh phawt chuan pindan chhunga luh chu a tum leh ngei ngei dawn tih ka hre sa a. Chuvangin, i pindan aṭang khan ka hruai chhuak ta che a, min rinhlelh loh nan Miss Harrison kha pindanah nilengin ka awmtir a. Tichuan, lehkha chu kan kutah a rawn hlan ta mai a ni. Pindan chhungah khan lehkha chu a awm ngei ang tih zawng ka hria; mahse, a buaithlak dawn avangin amah zawntir mai kha a ṭha berin ka hria a ni,” a ti a.

Chutah, “Hriat thiam loh lai in la nei em?” a han ti zui nghal a. Kei chuan, “Engati nge kawngkharpui lam aṭanga kal lo va, tukverh lam aṭang khera luh a tum a,” ka lo ti a. Holmes chuan, “A chhan chu kawngkharpui lam aṭanga a luh chuan pindan kawngkhar pasarih a kal tlang a ngai dawn tlat a ni. Tukverh lam a hawn chuan in hnung lamah awlsam takin a chhuak thei dawn a,” a ti leh ta a.

Phelps chuan, “Chemtê kha chu hman tak tak a tum lo vang ti raw? Tukverh hawn nan bak chuan a ti lo vang ti raw?” a han ti ṭawk ṭawk a. Holmes chuan, “Ka hre lo le; mahse, mi khawngaihna ka dil a ṭul hlauh chuan Joseph Harrison-a hnen aṭang khera ka dil chu ṭul lo se ka lawm em em ang,” a ti ta a.

A TAWP TA.

Link:
BBcode:
HTML:
Hide post links
Show post links

Rozami pachuau
Posts: 362
Joined: March 17th, 2018, 7:40 pm

Unread post by Rozami pachuau » July 30th, 2018, 3:12 pm

SHERLOCK HOLMES
THE FINAL PROBLEM
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 1
(Rozami Pachuau)

Ka ṭhianpa, mak danglam leh mahni thawh thiam ve kawng zawnga danglam chungchuang, Sherlock Holmes-a thil tih leh chet dan chanchin ka ziah hnuhnunna ber a nih dawn avangin tuna ka thil ziah lai hi chuan ka rilru a ngui tak zet mai. ‘Study in Scarlet’ aṭanga ṭanin, ‘Naval 'Treaty’ thlengin thiam lo leh tling lo tak chungin ka ṭhianpa chêt dan hi ka lo tar langin tar lan ka lo tum ṭhin a. Ka tum dan phei chuan ‘Naval Treaty’ thleng chauhva tarlan hi a ni a, a chhan pawh tuna ka thil sawi tur hian ka nun a ti hrehawm lutuk a, 'hunin mi a hnem ngai e’ an tih pawh hi ka âwih lo lek lek mai; kum hnih a ral hnuah pawh hei ka Ia tuar na êm mai.

Nimahsela, tunah chuan tar lang lo thei lovin thil inher danin min nawr ta a. Colonel James Moriarty-a'n a unaupa (Professor Moriarty) ṭan zawngin thu a chhuah tlat a, chuti a nih chuan vantlang hmaah thil lan dan dik tak tarlan chu ka tih tur liau liau a ni, thil awm dan dik hretu awm chhun ka ni tlat bawk. He thil awm dan hi ka ngawih bopui avanga thil ṭha zawk eng mah a awm loh avanga tar lang ta mai ka ni bawk.

Chanchinbu pahnih, ‘Joumal de Geneva' leh ‘Reuter’-in hemi chungchang hi an chhuah a, chu bakah, ka han sawi mek, Colonel James Moriarty khian a tar lang ve bawk a. Chanchinbu-ah khi chuan thil awm dan tawi tê an thai lang viai viai lek a; a pathumna erawh khi chu thil awm dan dik letling hlauh a ni.

Nupui ka’n neih a, mahnia damdawi lama ei zawnna lama ka’n inbawl hran tak khan Holmes-a nena kan inzui ngun dan pawh tlemin a nêp ta deuh a. Chuti chung chuan eng ilo chhui tur a neih a, ka tel ve a duh ṭum hi chuan kan inah a lo kal a, min rawn sawm chhuak ṭhin a. Chu pawh chu zawi zawiin a khât ta tial tial a, kum 1890 chhung phei chuan hna pathum a thawhna chanchin ka ziak thei tâwk a ni ta mai.

Chumi kum thlasik, ti ila, 1891 nipui pawh a tih theih ang chu, chuan chanchinbu lamah Holmes chu sawrkarin an rawih thu ka lo hmu a. A hnen aṭang pawhin lehkha pahnih ka dawng a, pakhat chu Narbonne aṭanga a ziah a ni a; pakhat chu Nimes aṭanga a ziah a ni a. France ram Nimes-ah te daih daih a awm ta mai a, a cham rei viau dawnin ka hre lehnghal.

Chutia France rama rei tak awm tura ka beisei avang chuan April ni 24 ni zana damlo ka enna pindana a lo lut ka’n hmuh chuan mak ka ti hle mai. Tun hma zawng aiin a hmel chu a dángin a cher zawk a. Ka hmel a'n hmuh chuan, "Nia, ka inhmang nasa deuh alawm maw le. Hna a tam riau mai a, i tukverh puanzar hi zar phui ila pawi i ti em?” a'n ti nghal ngawt a.

Pindan chhungah chuan ka lehkha chhiarna dawhkana khawnvar inchhi eng mai lo chu eng dang a awm hauh lo va. Holmes chuan tukverh puanzar chu a va zar phui a, tukverh pawh chu nghet tha tak maiin a kalh nghal bawk a. Kei chuan, “Hlauh deuh i nei elo?” tiin ka’n zawt a. Ani chuan, “Aw, nei e,“ a lo ti a. Kei chuan, “Eng nge i hlauh?" ka’n ti leh a. Ani chuan ka zawhna chhang zo tawk turin, “Silaimu lenglak ka hlau,” a han ti tawl mai a.

Mak ka tih êm avangin, “My dear Holmes, eng nge i sawi awmzia chu?” ka’n ti a. Ani chuan “Watson, pa zam mai mai chi ka ni lo tih hre tur tawk chuan min hre chiang ve khatin ka hria a; mahse, a hlauhawm tih hre reng chung pawha hlauh loh ngawt hi chu a atthlak chang a awm thin. Nawalh i nei khiat lo maw?” a’n ti zui a. A kuaitê zu lovin meizial a zu a, nuam ti awm deuh maiin a hip veng veng mai a.

Chutah, “Hetia zan rei tawk tak maia ka rawn len chilh che avang hian min ngaithiam turin ka duh che a. Chu mai pawh ni lovin hawihawmna dan zawng zawng bawhchhiain i hnung lamah khan lawn liamin i In hi chhuahsan turin ka ngen duh che a ni,” a han ti zui a. Kei chuan, “A engti zia nge ni ta ngai le?” tiin ka’n zawt a. Ani chuan eng mah sawi lovin a kut chu khawnvar engah a rawn lek chhuak a; a kutchang chu hmun hnihah a lo pem a, a thi duh hle tih ka va hmu ta a.

Ani chuan nui chung hian, “Thil holam tak zawng a ni lo tih chu i hre thiam ang chu, ka kut te hialin a pem phah hi. I nupui a awm em?" a’n ti zui zat a. Kei chuan, “Laina tlawhin a thang bo,” ka lo ti a. Ani chuan, “Maw? Nangmah chauhvin maw i awm?" a han ti a. "Teh reng mai,” ti chauhvin ka lo chhang a. Ani chuan, “Chuti a nih chuan vak chhuak tura sawm che a remchang sauh a nih chu," a han ti leh a. Kei chuan, “Khawiah maw?” ka han ti a. Ani chuan, “Khawiah pawh, khawi hmun pawh a ṭha vek mai,” a ti ringawt a.

A mak deuh riau mai. Awmze nei lova vah khawthawn mai mai hi Holmes-a mizia nen a inhmeh lo va. A hmel dáng tak mai leh a taksa hah hmel tak mai chuan a thluak a hmang rim hle tih a ti lang a. Chutia amah ka en vawng vawng lai chuan ka rilrua thil awm chu a chhuidawn thiam ni ngei tur a ni, thil awm dan chu min hrilhfiah ve ta a. “Professor Moriarty an tih hi i hre ve tawh ang maw?” a han ti a. Kei chuan, “Hre ngai lo tawp mai,” tiin ka lo chhang a.

Ani chuan, “Chu zawng, he khawvel thil siam zingah hian a mak danglam leh ropui chungchuan vang chauh a ni ta ve ang. He mihring hian London khawpui hi eng emaw ti takin a al hneh êm êm a; mahse, tu ma’n a hming an hre ngai si lo. Chu tak chu a ni, suahsual bawlna kawnga lal lukhum khumtirtu chu. Watson, tih tak meuhvin ka hrilh a che, he mihring hi tukzal thei dawn ngat ila chuan ka vanglai ka tawng ka tiin ka ei zawn ve-na hi khaw dang hawi zawngin ka her duh ngei ang.

“Kan pahniha karah chuan han sawi ta mai ila, tun hnaia Royal Family of Scandinavia ka puih ve-na leh French Republic tana ka thawhna avanga ka hlawh chhuahte kha lungmuanga ei char char tham a ni a. ka duh leh ei leh bar ngaihtuah hauh lovin damdawi lama ka tuina hi ka bawhzui thei ang. Mahsela, Watson, mahni ṭhuthmuna ṭhut ngawih veng veng ringawt mai hi ka thei lo. Professor Moriarty-a te angin lungmuangin London khawpui kawtthler hi an pal tlang ṭhin tih ka’n ngaihtuah hian thil dang ngaihtuah thei niin ka inhre lo,” a han ti a.

Kei chuan, “Eng nge a tih chu le?” tiin ka’n zawt a. Holmes chuan, “Pa mak danglam a ni. A pian leh murna pawh a zahawm tham a, a inzirna pawh a zahawm tham bawk. Chu bakah, chhiarkawp lam thiamna hi a pianpui bawk a. Kum sawmhnih leh pakhat a tlinin Europe khawmualpuia lehkhabu ropui pawl leh tu ma han el phak loh tur, chhiarkawp lam chhui zauna kan ti dawn emaw ni, Binomial Theorem a ziak a. Chu vang chuan England-ah hian University pakhatah chhiarkawp inzirtirna hmunah hotu nihna a chan phah a, pa che fuh tak niin a lang.

"Mahse, he mihring hian thlahtu lam aṭanga rochun, suahsual bawl châkna chu hup beh tâk aruangin a thiamna zawng zawng hmangin a chhem alh ta a ni. A thawhna University velah chuan a chungchangah titi ngaihnawm lo pui pui a léng ta fo mai a, a tawpah phei chuan an ban tir a; London-ah a lo chhuk a, sipaiho zirtirtu-ah a rawn ṭang a. Chu chu khawvelin a la hre pha a.

"Mahse, tuna ka sawi tur hi chu keimahin ka hmuh chhuah a ni tawh hlawm. Watson, London khawpuia suahsualna a sosanzia hi chu ka hriat tluk thawthangah i hriat ve hi. Kum tam chhungin heng mi sualho thununtu leh fuihpawrhtu hi awmin ka ring tlat a. Chu thil chuan thil sual titute hi a humin dan hmanga hnathawhna hi a kalh tlat a, a phenah pawl inzawm fel tak awmin ka ring tlat bawk a ni.

“Suahsualna chi hrang hrang, pawisa chher chawpna thilah te, rukruk thil leh inthah thilah te hian he pawl hian inhnamhnawihna neiin ka ring nghet tial tial a. Ka tel ve lohna thilah pawh he pawl sulhnu hi ka mimal thil chhutna aṭangin ka lo chhut chhuak ve ṭhin a. Kum tam tak chhung chuan he pawl inphan ruk dan hre turin thil ka lo chhui tawh a, a tawpah chuan ka la zai chhui chuan Professor Moriarty kawtkaiah min hruai thleng ta a ni.

"Watson, ani chu indonaa Napoleon-a a duhawm tluk hian suahsual bawltu atan chuan a duhawm asin. He khawpuia suahsual chhui chhuah theih tâk loh zawng zawng deuhthaw hi he pa thluak hmanga hlen chhuah hi a ni a. Pa thei chungchuang, thluak ṭha danglam, thil ngaihtuahtu ropui a nih hi. Maimawm ril inphan lai takah maimawm a awm a, a ril zai khat lek pawh chet pawh a awmhmun aṭanga a hre zel ang hian thil chi sang tam hi a hre zel a ni.

“Amah tak chuan chêt a thawh tlem khawp mai, a ruahman vel chauh a tum a; a mi hmante hi an ṭhahnem thamin a kilkawi dan a fel riau a ni. Entir nan, tu In emaw rawk ṭul sela, emaw, Iehkha eng emaw lak chhuah tur awm sela, a nih loh Ieh mi dah ṭhat tur awm ta sela, chu thu chu Professor hnenah an thlen ang a, a tih dan tur chu ani’n a rélbawl vek ang a, mi dangin an buaipui tawh mai ang.

"A titu chu lo man ta pawh ni ta teh reng sela, a tlan chhuah lehna tur pawisa an chham lo va, ukil rawihna tur an chham hek lo. A engti zawng pawhin a ruahmantu leh a hnukpui dik tak zawk chu thu neitute’n an man ngai miah lo mai ni lovin a rinhlelh pawh an ringhlel ngai eih lo. Watson, chutiang chu thil awm dan ni àwm anga ka chhut chhuah chu a ni a, a hawlh darh nan ka tha leh tui zawng zawng ka seng a ni.

“Nimahsela, Professor chu a invéng thiam Iutuk a, ka theih tawp ka chhuah hnu pawhin rorelna hmuna thiam loh chantirna tur thil finfiah theih tur eng mah ka nei thei lo a ni. My dear Watson, ka thil tih theih dan chu i hria alawm; mahse, thla thum chhung ka beih ṭang ṭang hnuah finna lama ka buan tawk ka tawng remchang thei ta tih hi phat ka tum lo.

"A suahsual avanga amah ka râpna chu a fin verther thiamzia ka ngaih sanna chuan a luahlan hial a. A tawpah phei chuan a zin chhuah phah ta nghe nghe a; mahse, ka ûm chêp tawh lutuk a, a tan a sawngsawhlawt ta vak àwm lo ve. Hun remchang ka hmu fuh hlauh mai a, chu hun remchang chu chuhin ka Ièn zar chu ka pawt tawm ve tial tiaI a, tunah chuan ka lèn chu ka ṭham khawm thei ṭep tawh a ni.

“Ni thum chhung; chu chu Thawhṭan Io thleng tur hi a ni a, hian thil zawng zawng chu a fel vek tawh ang a, kan Professor leh a pawl hruaitu lawk zuai zual chu Police kutah an awm tawh ang. Chutih hunah chuan mi sual thiam loh chantirna azawnga a ropui ber mai chu a lo thleng ang a, thil hriat thiam loh chi hrang hrang sawmli chuang zet hrilh fiah thei dinhmunah kan ding ang a, a titute chuan hruizen an awrh vek bawk ang. Mahse, a hun hmaa kan virpilh vaih chuan an tan phengphehlepa khua a tlai zo ta emaw kan tih hnuah pawh an la put bo thei mai ang.

“He thil hi Professor Moriarty-a hriat hlek lova ti thei chu ni ila chuan a fel thliam mai tur hi a ni na a le; mahse, ani zawng chutia hlin mai chi a ni lo. Amah phih awh nana ka hrui valh chu tlema ka pawh zih (zip) hret pawhin a lo hre ve zel a, chhuah tumin vawi duai lo a tal a; mahse, ka Ia hnawt tawm zui thei ta zel a ni. Ka ṭhian, chutianga ngawi renga kan inbeih ruk dan chanchin chu a kip a kawiin ziak thei ta ila chuan sualna leh a chhui chhuah dan chanchin azawngah hian a ropui ber ang.

“He pa nena kan inbeih laia ka ṭhan sàn ang hian ka la ṭhang ngai lo va, heti khawpin ka khingpuite’n min la khing buai ngai hek lo. A fei chu leiah a khawh bur a, keiin ka khawh kar ve zat zat zel a ni ber e. Tukin zing khan a tawpna atan chêt kan la ve ve a, ni thum chhungin engkim peih fel tur a ni tawh mai.

"Thil awm dan ngaihtuaha ka pindana ka ṭhut laiin ka pindan kawngkhar chu amah, Professor Moriarty-a ngei mai chuan a rawn hawng ta mai a Watson, pa thin phu thut ka ni hauh lo tih chu i hre chawk ang a; mahse, ka ngaihtuahna ka senna bur ber ka hmaa a lo din meuh chuan ka phu nasa ve hle tih chu phat ka tum hauh lo mai

“A hmel chu ka tan thil thar a ni hauh lo mai. A sang êm êm a, a cher hle bawk a, a chal pawh a kual ruih a, a mit khur pawh a thuk hle mai. A inmêt fai hle a, a dáng hle bawk a, a hmel han en mai pawhin Aesopa thawnthua mi fir kha ni mai àwm a ni. A lehkha chhiar nasat luatna lamah a dàr te pawh a kum deuh hlo a, a hma lamah hian a hmai chu a dâk hru a, laiking kalna tur hre lo ang mai hian a lu chu vei lam leh ding lamah a thle deuh zek zek reng a. Mak ti àwm deuh mai hian mi melh vawng vawng a.

“Rei tawk tak mi thlêk hnu chuan, ‘Hmel mawina Iamah chuan i ṭhang mawh ve ngawt mai. Mut kawr iptea mei ling ṭha lai ah hi chu a hrisel lo teh asin,’ a han ti a. A dik chiah chuan a lo luh phat aṭangin ka dinhmun hlauhawmzia ka hre nghal a. A tana hremna pumpelh theihna awlsam ber chu ka ka hup a ni mai. Chuvangin, a lo luh veleh dawhkan pawhdawha puakruk chu ka iptêah ka zen hnan vat a, chu chuan ka tin ru ta reng a.

Chutia a han sawi chhuah takah chuan puakruk chu kau sa-in dawhkan chungah ka va dah ve ta a. Chutia ka dah hnu pawh chuan a la nui reng tho va; mahse, chutia puakruk ka’n dah chhuak chu ka lawm ve tho tho mai. Ka hnenah chuan, ‘Mi la hre lo tih a chiang hle mai,’ a han ti ngawt a. Kei chuan, ‘Chuti maw ni dawn? Ka hria che tih a lang chiang hlein ka hria asin. Ṭhu rawh khai. Tuibur hmuam da i ṭhu thei ang a, chumi chhung chuan i sawi tur neih chu i sawi zo hman ngei tur a ni,’ ka han ti a.

Ani chuan, ‘Ka sawi tur neih chu i suangtuahnain a ban phak vek tawh,’ a ti ringawt a. Kei chuan, ‘Chuti a nih chuan ka chhanna chuan i ngaihtuahna a va fan ve hman tawh mai àwm em?’ ka ti ve thung a. Ani chuan, ‘I ti tlat a maw?’ a han ti ringawt a. Kei chuan, ‘Teh reng mai,’ tiin ka lo chhang ve mai a. Chutah a kut chuan a iptê a’n zen a, chu veleh ka puakruk chu dawhkan aṭang chuan ka la ve nghal vat a, mahse, thil dang phawrh lovin eng ilo chhinchhiahna lehkhabu hi a rawn phawrh a.

"Chu a lehkhabu-ah chuan ni zah hi a chuang nuai a. Ka hnenah chuan, ‘January ni li khan min ti buai a, ni sawmhnih pathum khan khawlhkham i siam bawk a; February thla laihawl khan min ti buai hle bawk a; March thla tawp lam khan ka thil ruahman sa a khawlo vek a. Hei, tunah Aprii thla tawp a ni a, theih tawp i chhuah avangin ka zalenna ka hlauh ngei dawnin a lang ta bawk a. Thil awm dan hi a hahthlak ta lutuk a ni,’ a han ti a.

“Kei chuan, ‘Rawtna siamte i duh deuh em ni?’ ka ti a. Ani chuan vei lam leh ding lama a hmai thle tawn chhen chung chuan, ‘Mr Holmes, i bansan tur a ni. I bansan ngei tur a ni. l hre thiam khawp mai,’ a han ti a. Kei chuan, ‘Thawhṭan lo thleng leh tur piah lam aṭang khian ka bansan tak zet ang,’ ka han ti ve ngat a.

"Ani chuan, ‘Mai mai. Nang anga mi fing hi chuan he thil hian hrin chhuah chi khat chauh a nei thei tih in hria tih hi ka hre chiang lutuk tlat a ni. I inhnuh hniam a ṭul tak meuh a ni. I thil tih avang hian kan neih thinglungkhawnga kan chêt a ṭul ve ve tawh tlat a. He thil i han chawh leh vel dan hi keia tan chuan thluak sawizawina atana duhthusam ni mah sela, loh theih loh thila hman chi thahrui hman em chu ka hreh hle ang. Ka pu, i nui rawk na a, mawngkaw tha ka thawh tel duh ngei ang,’ a ti a.

“Kei chuan, 'Hlauhawm han tawn vel hi ka ei zawnna ve pakhat a nia,’ ka lo tihsan a. Ani chuan, ‘He thil hi chu ‘hlauhawm’ a ni mai lo. Loh theih lohva chhiatna tur thil a ni zawk. Mimal i khing lo va, pawl chak tak i khing tlat a; chu zawng, i fin khekrek zawng zawng pawh thawh mah la i hneh chuang lo vang. Ka kalna kawng min ken loh chuan ka rap hrual ngei ang che,’ a ti ta a. Kei chuan thawh kan pahin, ‘Ngawi teh, kan titi tui ta em mai a, tih tur dang ka neihte pawh ka lo theihnghilh hman nualin ka hre mai,’ ka han ti a.

"Ani pawh chu a tho ve nghal a, lawm lo hmel takin a lu a thing a. Ka hnenah chuan, ‘A nih leh, a nih Ieh le, a pawi teh ṭhin e. Mahse, ka theih tawk chu ka chhuah tawh alawm. I chet dan hi a kip a kawiin ka hre vek a, thawhṭan lo thlen hma hi chuan eng mah i ti thei lo. Nang leh kei hi kan inmal beih a ni ber a. Rorelna hmuna min dintir i inbeisei a; mahse, rorelna hmaah ka ding ngai dawn lo tih hi lo hria ang che. Min hneh i inring a; min hneh ngai dawn lo tih ka hrilh a che. Ka chhiatna thlen thei tur khawpa i fing tawk a nih chuan i chhiatna thlen tur khawpin ka fing tawk ve tho tih hi hre chiang ang che,’ a ti ta a.

“Kei chuan, ‘Mr Moriarty, min fak nasa mawlh mawlh hle mai. I chhiatna thlen thei ka nih ngat chuan, vantlang làwmah reng reng pawh i chhiatna tur chu ka zawng ngar ngar ang; keia chunga thil lo thleng ve tur chu eng anga chhiatna tur pawh ni sela lawm takin ka pawm nang e,’ ka han ti ve sak a. Ani chuan, ‘I chhiat phah ngei ang tih chu ka sawi ngam a, ka chhiat ve tur leh tur loh chu ka sawi pha tawh lo,’ tih pahin pindan aṭang chuan a chhuak ta a.

“Chu chu a nia, Professor Moriarty-a nena kan inkawm dan chu. Min rawn len chilh avang chuan ka rilru a nawm loh phah hle nghe nghe a. Nang chuan, ‘Engati nge Police lam ṭanpuina i zawn mai loh?’ tih zawhna hi i lo pai leh hman reng tawhin ka ring; mahse amah, Professor Moriarty-a tak ai chuan a hote kut a nia ka tawrh ang ni. Chu chu ka hre chiang tlat,” a ti ta a. Kei chuan, “Tih nat tumin an bei tawh che a ni maw?” tiin ka’n zawt leh ta a.

Holmes-a chuan “My dear Watson, Professor Moriarty-a hi mahni thlam hnuaia hnim hling nei awmtir duh mi a ni awzawng lo mai. Chumi ni chhun lai velah chuan eng emaw ti turin Oxford Street-ah ka va kal a, hmun pakhata ka kal lai chuan sakawr tawlailir hi chak mangkhen maiin a lo tlan a, kawng sira mihring kalna tura an siam ka chuh vat a, tlema tlemah ka thi lo chauh alawm. Tawlailir Iah chu a tIan tlang leh nghal daih si nen.

“Chutah zawng kawng laiah pawh ka kal ngam ta Io va; mahse, hmun pakhat ka thlen lai chuan in chhawng pakhat aṭang chuan leirawhchan a lo tla nawlh a, ka ke bulah a insawh darh vek a. Police-ho ka ruai a, kan han en vel chu leirawhchan chu in pakhat, an siam lai mek aṭanga lo tla hi a ni a. Leirawhchan tian khawm vel chu thliin a chhem thla a ni ang tiin Police-ho chuan ngaih dan an siam nghet ta mai a. A titu hmuh tur awm tawh bawk si lo, thli chhem thlak a ni lo tih chu ka pu hming aiin hre chiang mah ila ka finfiah thei tawh si lo. Chumi hnuah chuan tawlailirin ka unaupa awmna hmun, Pall Mall ka inkhalh thleng a, nilengin ka va awm ta a ni.

“Chuta ṭang chuan i hnen lam hi hei ka rawn pan ta a. Ka rawn kalkawngah mi pakhatin chemtê lu zum nen min lo bei a, ka lawk thlu thei hram a, Police-ho kutah ka pe lut a. Mahse chu pa, a ha hmai ka hnek balsak leh Professor Moriarty-a inkungkaihna chu tu ma'n an chhui chhuak thiam lo vang tih ka hre ngam. Chu vang chuan alawm Watson, i pindana ka lo luh veleh i tukverh puanzar ka zar phuina chhan. Chu vang bawk chuan alawm a langsar lo thei ang bera he pindan hi i chhuahsan theih nan hnung lam aṭanga chhuak tura ka ngen che,” a ti ta a.

Ka ṭhianpa huaisenna hi a ropui ka lo ti tawh ṭhin a; mahse, tun ṭumah hian a huaisenzia chu a ngaihsanawm lehzualin ka hre ta a ni. A hnenah chuan, “Zanin chu hetah i awm ang chu maw?” ka’n ti a.

Ani chuan, “Awm Io vang. I tan, khual hnawksak tak, thil hlauhawm thlentu ka ni tih i hre palh reu reu ang. Thil ka ruahman vek tawh a, a fel vek mai ang. Ka tel lo pawhin an man thei hlawm mai ang a; mahse, a hnu lamah chuan ka tel ve leh chu a ngai teh meuh ang. Chuvangin, police lamin an duh ang an tih theih hun hma, ni rei lo tê chhung hi chuan awm bo a ṭha ber zawk ang. Ka tei bona lama i lo kal ve theih chuan ka tan thil lawmawm tak a ni dawn a nih chu,” a ti ta a.

Kei chuan, “Ka hna lamin min tibuai vak lo va, chu bakah, ka ṭhenawmpa hian min hmui let ve a ba nual tawh bawk a, ka tan lo kal a harsa lo vang,” tiin ka chhang a. Ani chuan, “Naktuk zinga thawk chhuak tur pawhin a harsa lo vang maw?” a han ti a. Kei chuan, “A ṭul a thu le,” tiin ka lo chhang a. Holmes chuan, “Ṭul thu-hlaah chuan a ni teh meuh mai. Watson, Europe rama mi sual pawl chak ber mai leh fing verther ber mai min sutpui dawn avangin ti tura ka tih che hi a bu ang thlapa i zawm a ṭul ang.

“Bungraw ken tur i neih reng reng chu mi rinawm tak i kentir ang a, Victoria rel chawlhhmunah a dahna tur hrilh hlek lovin i khai pheitir ringawt ang a, chu chu zanina tih chi a ni ang. Naktuk zingah tawlailir i ko ang a; mahse, tawlailir i koh chuan i mi tirhpa chu tih dan tur i hrilh chiang tur a ni. Tawlailir lo kal hmasa ber emaw, a pahnihna emaw, a koh lohva lo kal ringawt chu hmang suh se. Chutah i mi tirhpain tawlailir a rawn lak thlen veleh chuan i zuang lut vat ang a, Lowther Arcade lamah i tlan ta vang vang ang a.

"I kalna tur chu tawlailir khalhtu hnenah lehkha themah i pe ang a, lehkha them chu paih bo mai lo turin hrilh ang che. I chuan man tur i phawrh lawk sa ang a, tawlailir din rual rualin i zuang thla ang a, Arcade-ah chuan i tlan tlang ang a. Dar kua minute sawm pangaa a pelh chiaha Arcade lehlam thleng turin i hun i chhut lawk ang. Chutah Arcade bula kawng sirah chuan tawlailir tê chi, pa pakhat, kawrfual dum lianpui, kawr nghawng sen hain a khalhah chuan i lut ang a, Victoria-ah chuan Continental Express chhuak tur nang hman chiah turin i thleng phei dawn nia,” a ti ta a.

Kei chuan, “Khawiah nge nang nen kan inhmuh ang?" ka’n ti a. Ani chuan, “Rél chawlhhmunah chuan First Class pindan pahnihna chu kan chuanna tur a ni ang. Pindan pahnihna ka tih chuan a lu lam aṭanga chhiara pindan pahnihna ka tihna a nia,” a ti a. Kei chuan, “Rel pindan chu kan inhmuhna tur hmun ruat lawk chu a ni maw?" ka ti a. Ani chuan, “Ni e,” ti chauhvin min lo chhang a.

Riak ve nghal mai turin Holmes chu ka’n thlem teh ṭhin a; mahse, a sawt lo. Ka Ina a awm laiin thil ṭha lo takin a rawn thlen chilh ang tih a hlauh vang tih chu a chiang. A tuk leh lama kan thil tih dan tur duan sa chu a’n sawi leh puat puat a; In hnung lamah kan chhuak a; Mortimer Street-ah kan va chhuak phei a; rei lo teah tawlailir a phar ding a, a inkhalh liam ta a.

Link:
BBcode:
HTML:
Hide post links
Show post links

Rozami pachuau
Posts: 362
Joined: March 17th, 2018, 7:40 pm

Unread post by Rozami pachuau » July 31st, 2018, 9:20 pm

SHERLOCK HOLMES
THE FINAL PROBLEM
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 2 (Last)
(Rozami Pachuau)

Zing khua a lo var chuan Holmes-a thu min chah chu a bu ang thlapin ka zawm ta a. Rel chawlhhmun panna tura tawlailir ka chuanna tur thlan thu-hlaah pawh kan fimkhur em em a. Arcade ka va thlen chuan theih tawpa chakin ka tlan tlang puat a, pa lianpui maiin tawlailir chu a hlap tlan nghal a. Ka chhuk veleh tawlailir chu a khalhtupa chuan a khalh liam leh nghal daih a, ka lam pawh a lo hawi eih lo.

Thil awm dan chu a kal tluang hle zel hian ka hria a, ka bungraw thawn phei sa pawh harsa lo takin ka hmu a, Holmes-a min hrilh, rel pindan pawh ka va hmu mai a, kan chuanna tur chu hmuh a harsa lo, ‘Hauh lawk‘ tih a lo intar tlat avangin. Ka ngaihtuah buai tak ber zawk chu Holmes-a hmel lo lang ve ta reng reng lo chu a ni. Rel chhuahna tur chuan minute sarih chauh a awm tawh a. Mipui zi mur mur zingah chuan ka ṭhianpa sakruang leh hmaifang ka'n melh sa teh a; mahse, hmuh tur reng rang a awm lo.

Chutia ka zawn buai vel chhung chuan Italian puithiam pakhat hian sap ṭawng buh zet mai hian a bungrua chu Paris lama thleng tura thawn tur a nih thu kuli hrilh a tum a. Italian-ho ṭawng thiam Io chung chungin theih ang angin ka'n pui ve ngial a. Holmes-a zawnga ka’n hawi kual leh deuh hnu chuan kan puithiam chu ka ṭhutna bula ṭhu turin kuli chuan a lo ti ve ngawt mai a.

A sap ṭawng lam thiam ngawt mah ila ltalian-ho ṭawng ka thiam loh avang leh ani‘n sap ṭawng a thiam bawk si loh avangin zin dun chu a huphurhawm thu ka’n hrilh sa teh a; mahse, a sawt si lo. Tih ngaihna dang awm hek lo, chu lam chu buaipui lovin Holmes-a hmel zawngin ka dak fan leh ta a. Rel kal hun a hnaih tawh avangin ka ṭim ru ur ur tawh mai. Holmes-a chu a lo Ian loh chuan zan lamah eng thil emaw-in a tlak buak ta a ni ang tih rinhlelh rual a awm si lo.

Rél kawngkhar an khar a, kal mai turin rel pawh a kiu ruai ruai tawh a. Chutah aw hian, “My dear Watson, ‘Good moming’ pawh i ti lo va,” a rawn ti ta mai a. Mak ti em em hian ka‘n inher a, puithiam chuan ka lam a lo hawi a, rei lo te chhung chu chu puithiam hmai chuar chu a reh zawk a, a khabe chunga a hnar to luah pawh chu a bo a, a hmui hnuai lam rawn poh chhuak pawh chu a reh daih a, a mitmeng dul tak mai pawh chu a lo nung thar leh a, a sakruang inkhawr hleu hlo pawh a lo ṭhang sawt hian a hriat a.

Chutia a awm chhung chu a rei lo kher mai. Holmes-a hmelhmang chu a lo lang zawk a, a bo leh ni berin ka hria. Italian puithiam bulah bawk ka ding leh ta reng mai a. “Min va han ti phu nasa em em ngai ve le!” ka’n ti a. Ani chuan zawi tê hian, “Fimkhur dan chikima fimkhur a ngai tlat. Min rawn ûm ngawrh hle a ni ang tih rinna tur chhan ṭha tawk tak ka nei a ni. Saw le, amah Moriarty-a ngei a awm alawm,” a han ti a.

Chutih lai chuan rel chu a kal ṭan tawh a. Ka’n hawi kir a, mipui karah chuan pa sang zet mai hi dim lo zetin a rawn tlan phei bawrh bawrh a, rel phar din tum ni àwm tak hian a kut a vai zauh zauh a; mahse, eng mah a ti thei ta lo. Rei lo teah rel chu chak takin a tlan a, kar lovah rel chawlhhmun chu kan chhuahsan fel ta a.

Nui chung hian Holmes chuan, “Kan fimkhurna a thlawn lo ve,” a han ti a. A inchei danglamna bungrua, lukhum leh puan dum ilo vel chu a phelh a, a ipkhaiah chuan a hnawh lut ta a. Ka hnenah chuan, Watson, zing lam chanchinbu i bih tawh em?” a han ti a. Kei chuan, “Bih lo,” tiin ka chhang a. Holmes chuan, “Chuti Baker Street chanchin i hre lo a ni maw?” a ti ta zel a. Chutah, “Nizan khan kan pindan an hal alawm; mahse, pawi a khawih tampui lo ve,” a ti ta a.

Ka tih ngaihna hre lo chuan, “Khai, Holmes! Hei zawng an ti lutuk ta,” ka’n ti ngawt a. Holmes chuan, “An zinga pakhat ha ka hnek balsak tak avang leh police kuta ka pek tak daih avangin ka hnu an hloh hmin ta der ni tur a ni. Chuti ni lo sela chuan ka pindanah ka awm leh awm loh an hre thei tur. Nangmah lam enthlak nachang che an hria tih zawng a chiang, chuti ni lo sela Moriarty-a khan Victoria a lo thleng hauh lo vang. I lo kalna lamah ka hrilh ang thlap che khan thil i ti em?” a han ti a. Kei chuan, "Ti e,” ka ti mai a.

Ani chuan, “Arcade bulah tawlailir i va hmu maw?” a ti ta zel a. Kei chuan, “Hmu e, min lo nghak reng a,” ka ti a. Ani chuan, “A khalhtupa kha i hre hman em?” a ti a. Kei chuan, “Aih,” ti ngawtin ka chhang a. Holmes chuan, “Ka unaupa Mycroft-a a nih kha. Khai le, Moriarty-a hi engtin nge kan tih dawn tih lam i ngaihtuah teh ang,” a ti ta a. Kei chuan, “Hei hi rel chak chi, ‘express’ a ni a, a chhuah rual hian lawng pawh a chhuak ve nghal a, chuvangin, kan thing thla fel law maw ka ti mai,” ka ti sam mai a.

Holmes chuan, “My dear Watson, he pa hi keimah tluk bawka fing a ni ka tih khan ka thu sawi awmzia i hre fuh lo a ang hle mai. Kei zawk hi a dinhmunah chuan ding ta zawk ila, khatiang thil tenau mai mai kha ka hlawhchhamna thlentuah ka phal lo vang. Chuti a nih chuan Professor Moriarty-a lakah i ngaih dan i siamnaah hian zahngaihna lantirin fing lutuk angin ngai ta ṭhin che,” a ti a. Kei chuan, “Eng nge a tih ang?” ka han ti a.

Holmes chuan, “Ka tih tur chiah a ti ang,” a ti mai a. Kei chuan, “Eng nge i tih ang?” ka ti ta zel a. Holmes chuan, “Special train-ah ka chuang mai ang,” a ti a. Kei chuan, “Mahse, chu chuan hei hi a um phak nang,” ka ti ve zel a. Holmes chuan, “Um phak teh meuh ang. He rel hi Canterbury-ah a ding dawn a, lawngah zawk pawh lo chuang ta teh reng ila, darkar khat zet a ding muang dawn bawk. Min nang hman reng reng mai,” a ti a.

Chutah zawng, “Chuti a nih leh a lo thlen veleh mantir nghal ila a ni mai. A pawi khawihtu zawk ang ziazanga tlan tlan mai,” ka ti ta ngawt a. Holmes chuan, "Thla thum tha a thlawna luan raltirna remchang tak a ni ngawt mai. Arpui man a, a note chhuah darh ngawt zawng a fel lo ve, a vaiin kan rut kim thei mai ang. Mantir zawng a fel lo ve,” a ti mai a. Kei chuan, “A nih leh engtin nge ni dawn?” tiin ka’n zawt a. Sherlock Holmes chuan, “Canterbury-ah kan chhuk ang,” a ti ringawt a. “Tichuan?” tiin ka’n zawt leh a.

Holmes chuan, “New Haven lam panin kan kal daih ang a, Dieppe lam kan pan zel ang. Moriarty-a chuan ka tih tur chiah tiin Paris a thleng ang a, kan bungrua a chhinchhiah te te ang a, kan bungraw dahna hmunah chuan ni hnih chhung min lo nghak mai dawn a ni. Chutih chhung chuan keini chuan second-hand kan lo thing vel ang a, kan zinvahna rama second-hand zuartute chu an second-hand kan fak vel ang. Chutah Luxemburg leh Basie kal tlangin Switzerland lamah kan kal daih dawn nia,” a ti a.

Ka lo upat ve deuh tawh avangin bungraw tel khat han hloh mai mai chu ka engto vak lo; mahse, mi sual tawngtawraw lutuk vang mai maia sazu dan chep anga phi kual ruai chu tlàwmah ka la deuh tlat a ni. Mahse, Holmes-a chuan, thil awm dan chu kei aiin a hre chiang zawk daih tih a hriat tlat si. Canterbury-ah kan chhuk a; mahse, New Haven lam kan pan theih hmain darkar khat zet rel kan nghah a ṭul tih kan hre ta a.

Bungraw phur relin ka thawmhnaw a phur liam vung vung lai chu ka thlir reng a. chutih lai chuan Holmes-a chuan ka kawr banah a rawn pawt a, “Han en ta che,” a ti a. Hla tak maiah chuan ngaw karah hian mei khu hi a lo chhuak ngiai ngiai a. Rei lo teah chuan rel lu a lo lang a, a takin a rawn zui a. Hnimbuk karah kan biru fel hman ṭawk tih chuan rel chuan min rawn tlan pel a, a rawn ur lum pha vuai nghe nghe a.

Rel tlan liam lai chu thlir pahin Holmes chuan, “Kan ṭhianpa chu sawtah sawn a tel ve ngei ang. A finnain tlin loh chin a nei ve tlat. Ka thluak hmang chu ni ta sela chuan ‘pa leh pa, ngam leh ngam’ tih mai a ṭul ang,” a ti a. Kei chuan, “Min nangching ta sela, eng nge a tih ang le?” ka han ti a.

Holmes chuan, “Thah tumin min bei ang tih chu rinhlelh rual a awmin ka hre lo. Tunah chuan kan ngaihtuah tur awm chhun chu tunah hian a. la hma deuh nain chawchhun kan ei nghal mai ang nge ṭamchhawl huamin New Haven lam pan zai kan rel ang tih a ni ta,” a han ti a.

Chumi zan chuan Brussels lam kan pan a, chutah chuan Strasbourg lamah kan kal ta a. Thawhṭan tuk chuan Holmes chuan London police hnenah thirhrui a va vua a. Tlai lamah chuan thirhrui chhanna chu a lo thleng a, Holmes chuan a’n hawng a, thinrim zetin thuk meiah a vawm lut ta a. Hah hmel zet hian, “Lo hre sa daih tawh àwm hi ka ni a. A put bo leh ta a nih chu,” a han ti a.

Kei chuan, ’“Moriarty!" ka"n ti ringawt a. Holmes chuan, “Amah tiam lovin a hote chu an rut fai vek a nlh chu. Ani zawng a put bo thei ta. Nia, keiin England ka‘n chhuahsan kha chuan a han khing zo tur an awm ta lo a ni. Mahse, a nawm hmawr bawkna kha an lam chanah ka’n dah atin ni. Watson, England lamah kir leh ta la a ṭhain ka ring,” a ti a. Kei chuan, “Eng vangin maw?” tiin ka zawt a.

Holmes chuan, “Tunah chuan ṭhian ṭihbaiawm tak ka ni tawh dawn tlat. He mihring nihna hi a ropuina zawng zawng nen a tla ta a. London-a kir leh chu a tan tih chi a ni lo. A nungchang awm dan hi ka thlir dik chuan a tha leh tui zawng zawng chu ka chunga phuba lak nan a hmang ral raih duh ang. Kan inkawm hun chhung rei lo teah pawh khan chutiang chuan a sawi a, a ti tak tak ngeiin ka ring bawk. Nang chu i ei zawnna pangngai lamah kir leh turin ka ti tak meuh che a ni,” a ti a.

Chutiang ngenna chu a hlawhtling mawh khawp ang; kei, a ṭhian hlun leh a dai vahpui hlun tan pawm a har tlat a ni. Strasbourg-a kan awm lai chuan chumi thu-ah chuan kan inhnial fe a; mahse, chumi zan la la chuan Geneva lam panin kan kal leh ta sauh sauh a. Chawlhkar khat chhung zet chu Rhone lui ruamah kan thep dun a, Leuk lamah kan per kai zawk a, Gemmi pass-ah kal kaiin vur zingah Interlaken kan pan a, Meiringen-ah kan kal ta zel a.

Chutih lai huna chuti lai hmuna han vah vel chu thil nuam tak ni àwm tak a ni; mahse, kan chunga thihna thla inzar chu Holmes chuan eng lai mahin a theihnghilh lo reng reng a. Thingtlang khawtê tham, Alpine angah te leh tlang kar kawng rehah te pawh mi kan tawk khat emaw kan tawk zing emaw kan tawh apiang mai chu Holmes chuan ngun em emin a thlek zui zel a. Khawi hmunah pawh awm ila kan tana thil hlauhawm lo thleng thei chuan min zui zel a ni ang tih Holmes chuan a ring nghet tlat a ni.

Ka la hre reng mai, Gemmi thliarkar vela kan kal laiin hmun pakhat kan thlen lai hian kan chhak ding lama lungpui pakhat chu a awmhmun aṭangin a rawn lum ringawt a, kan hnunga dilah a lum lut a. Chu veleh Holmes chu tlangah chuan a lawn chho vat a, hmuh tur thil a awm dah law maw tiin hmun tin kil tin hawiin a mit a Ien a. Min kaihruaitu tura kan mi rawih chuan chutianga lung lum palh ringawt chu thil thleng pangngai ve mai a nih thu a’n sawi sateh a; mahse, Holmes chuan a awih lo tih ka hre mai. 'Kha maw, ka tih reng kha,’ tih melhin min melh tlat.

Holmes chu chuti takin fimkhur mah se a rilru a dawl chuang lo va. A rilru chu a harhfim lai ber a ni zawkin a tha pawh a phur lai ber a ni zawk hial law maw te ka ti rum rum a. Professor Moriarty chu mipui sahim nana a dah ṭha thei a nih chuan ama chunga thil thleng tur thu-hlaah pawisak eng mah a neih loh thu vawi tam a sawi chhuak a, “Watson, ka dam chhung hun hi a thlawn ngawt chuan ka khawh ral lo niin ka hria ka'n ti ve hial teh ang.

"Ka thil tih leh ka chanchin ziah tur zawng zawng hi zaninah hian tawp ta hmiah pawh ni se, lungawi takin ka nun hlui kha ka thlir kir leh thei ang. Tunah chuan London khawpui boruak pawh chen nan a duhawm deuh hlek zawk tawhin ka hria a. Thubuai-hlabuai sang tam ka chai chhung khan mi sual ṭanin ka kut ka lek ngai ka hre lo.

"Tun hnu deuh hian hei leilungin thil hriat thiam harsa eng eng emaw a rawn her chhuahpui ka chai ta zeuh zeuh a, hei pawh hi kan mihring mihringnain finna a tlakchham vang chauh a ni ang. Watson, Europe rama mi sual hlauhawm ber mai leh mi sual, suaksual thiam ber mai ka man huna hnehna lallukhum ka khum hunah chuan i thil chhinchhiahna bu chu a phek keu belh tur a awm tawh lo vang,” ti tein a sawi a.

A tawi zawngin han sawi ta mai ila, a tawi zawng han tih hian hmaih nei turah leh thil awm dan ang Io deuh hlek sawi turah chuan min lo ngai suh u, sawi tur pawh a tlem ta khawp mai. He thil hi ka tan sawi a nuam vak lo va; mahse, sawi hmaih neih chu keia tan a thiang lo vang.

May ni 3 kha a ni, Meiringen khua kan thlen a, Englishcher Hof Hotel-a kan thlen kha. A hotel neitu pawh Peter Stailer a ni nghe nghe a, London-a Grosvenor Hotel khualbuk nghaktu hna, kum thum ngawt a lo thawh tawh avangin sap ṭawng pawh a thiamin a fingvar hle a.

A mi rawn angin may ni 4 chuan Holmes-a nen chuan tlangram vel fang kual a, khawtê pakhat, Rosenlaui-a zan riak nghal turin kan chhuak ta a. Mahse, kan thlenna-pa chuan kan tlangram fan tur kawng chanve vela tuikhawhthla awm, Reichenbach chu hel kual hmasa zet lo chuan kal kan mai lo turin min hrilh ngun hle a.

Chu tuikhawhthla chu a hlauhawm ngiang rang a, a tui awm sa chu vur zawpin a belhchhah a, a hnuai kurungah chuan a inkhawh thla thum dur dur a, kurung aṭang chuan In kang khu tluk laia nasain tui hu a lo chhuak mup mup mai a. Chu kurung chu a’n rapthlak khawp a, a thim thla mup mai a.

Kurung ko tlang ti ila a sir tawn tawn chu lung chang chi, dum tle hluau mai hian a khuap a, chutah a hnuai lam; a mawng lam chu a zim leh deuh a, eng ang chauha thuk nge tih pawh hriat a harsa tham fe ta ve ang. Chutah chuan tui chu a inkhawh thla a, lui tui chu hma lam panin hmanhmawh takin a tei nawk nawk a ni ber mai. Chu tui khawh thla, tui tam tawk inbin let thla tup tup reng mai leh a hu lo inherh chho ngut ngut mai han hmuh chuan lu hi a hai ka ti dawn emaw ni, a dik Io ringawt mai a ni.

Chu tuikhawhthla ko tlangah chuan kan ding dun a, kurung thim lak maia tui inkhawh thla chu kan thlir vawng vawng a Tuikhawhthla enna kawng chu kawng mawng ping a nih avangin kan kalna bawka haw leh a ngai a. Kawng lam chu ka va thlir a, chutih lai chuan Swiss tlangval pakhat hi lehkha keng chungin a lo tlan lauh lauh a. Chu lehkha chu ka lehkha tur a ni nghe nghe a.

Chu lehkhain a sawi dan chuan kan chhuah hnu lawk khan sap nu pakhat (English) a lo thleng a, a chau hle nghe nghein a lang a. Chu nu chu Davis Platz-ah thlasik chhung a awm a, tunah tak chuan a ṭhiante hnen lam panin Lucern lamah a kal dawn mek a; chutah thiin a hawrh ta thut a ni. A dam rei tawh kher lo maithei a; mahse, a thih hmaa English Doctor han hmuh hram chu a tan thil thlakhlelhawm tak a ni ngei ang.

Kei, Dr Watson-a hi kan len vahna ram aṭanga kan Hotel thlenna lama ka kir duh chuan, chuti khati... Kan thlenna-pa chuan a thu belh ziahnaah chuan chu nu chuan Swiss doctor enkawl a duh tlat lo va, chuvangin ka kal theih chuan thil lawmawm tak anga a ngaih tur thu a sawi hranpa bawk a.

Chu ngenna chu keia tan han hnar rual a ni lo. Khual khuaa kan chi leh kuang thi turina min ngenna, keiin lo hnial fithlak chu thil awm lo ber pawl a ni; mahse, Holmes-a han kalsan chu ka hreh kher mai. Chutah Meiringen lam pan chuan ka kir leh ta a. Lehkha rawn kengtu tlangval erawh chu Holmes-a nena lo awm dun turin ka hnutchhiah a. Holmes-a pawh chuan chu tuikhawhthla bulah chuan rei vak lo a awm ang a, muangchangin Rosenlaui lamah a kir leh ang a, chutah chuan keimah nen kan inhmu ang tiin a sawi a.

Ka kal liam dawn chuan lungpui ngheng a, kut kuangkuaha Holmes-a ṭhu chu ka va hmu a, chutia a ṭhu lai chu he khawvela Sherlock Holmes ka hmuh hnuhnun ber ṭum a ni ang tih ngaihna reng reng ka hre lo. Tlang bulṭhut ka thlen chuan ka’n hawi kir leh hram a, chutah chuan alawm, mi pakhat, tlang kar kawnga a kal lai ka han hmuh tak. Chu pa chu a kal chak hle a, a kal lai hmel ka‘n hmuh ngawt pawh chuan pa thahrui nei tawk tak a ni ang tih chu ka hre mai; mahse, ngaihtuah zui lovin ka kalna tur lam ka pan ta zel a.

Darkar khat hnu velah Meiringen ka va thleng a, Steiler-a chu a hotel bathlarah a lo ding vung vung a. Hmanhmawh zetin a hnen ka’n thleng chho va, “Hm, zual lam chu a pan em lo’ng chu maw?” ka’n ti chawt a. Chu zawhna a’n dawng nawlh mai chu mak a ti kher mai. A mitmeng han insiksawi vel danah chuan ka ngaih a ṭha lo va, ka thin chu nu zing buh deng thawm ang tlut tlutin a phu ring tawhin ka hre mai.

Ka iptê aṭang chuan lehkhathawn ka’n phawrh chhuak a, “Hei hi i ziah a ni lo maw?” tiin ka’n zawt a. Chutah, “Hetah hian English-nu damlo a awm lo maw?” tiin ka’n zawt nawn leh ngat a. Ani chuan, “Teuh lo mai; mahse, kan hotel lehkha phek hman ṭhin chu a nih si kha! Ha! Nichina English pa sang tak ziah kha a nih dawn kha. A sawi dan chuan...” a han ti a.

A thu sawi chu ka ngaithla tawh awzawng lo. Hlauhthawnnaa khat chungin kawngah chuan ka tlan thla a, ka lo tlan chhukna kawngah khan ka tlan chho ta chiam a. Reichenbach tuikhawhthla bul ka han thlen chuan Holmes-a tlang lawn tiang, lungpui bula mi chu ka han hmu a; Holmes-a hmel reng reng ka hmu lo. Ka'n au vak vak a; mahse, ka aw thangkhawk mai lo chu min chhangtu a awm si lo.

Holmes-a tlang lawn tiang chu min tilungngaitu pakhat a ni. A tlang lawn tiang a hnutchhiah chuan Rosenlaui lamah a kal lo tih a chiang a. Chuti a nih chuan tlang kar kawng, hniak thum leka zau, lehlam kopang, lehlam chu tlak hlum nghal hmiahna turah chuan a hmelmapa nen chuan engtin nge an khawsak zui tak? Swiss tlangval lah chu a bo daih tawh si; Moriarty-a mi chhawr te pawh a lo ni mahna! A nih loh leh an pahniha sawi fel turin an innghirghona thubuai chu an kutah a dah a, a kalsan ta mai te pawh a ni mahna! Tichuan eng nge lo thleng ta? Tu nge sawi fiah tawh ang le?

Inngaihtuah fim tumin eng emaw chen ka’n ding a, Holmes-a ni ta ila engtin nge ka tih ang tiin Holmes-a tih dan ṭhin chu zawm ka’n tum a. A harsa lo kher mai! Holmes-a tiang hnutchhiahna aṭang chuan kan din dunna hmun kha ka'n chhut chhuak a, a bul maia tlak lei dum angreng awm chu ka’n hmu a. chu lai lei nemah chuan daikat sava pawh fu sela hniak-hnu hnutchhiah lo chuan a thlawk leh kher lo vang. Chu lai lei nem chu ka’n bih chiang a, mihring hniak pahnih ka’n hmu a, chu hniak-hnu chu ka awmna lo lam panin a kal ve ve a, an lo kir leh hniak-hnu hmuh tur a awm reng reng lo.

Kham ko aṭanga hla lo teah chuan katchat leh hnim dang a awm a, chu lai chu a dum deuh hlek nghe nghe a, chu hmun chu a pherh hneh kher mai. Kurung kovah chuan ka zuk dak a, chutia ka zu dah chuan tui hu chuan min rawn bawh chuai chuai a, nichina Holmes-a nena kan awm dun lai ai khan a thim tawh zawk bawk a. A kova dak chung chuan ka’n au leh a; mahse, ka aw thangkhawk ṭial ruai ruai chauh lo chu min chhawntu eng mah ka hre lo.

Mahse ka ṭhian, ka thawhpui hnen aṭanga inthlahna thu chah dawng miah lova kan inṭhen chu thil thiang a ni lo tlat. Holmes-a tlang lawn tiang kha kawng sira lungpui tohlawtah a intung a, chu lungpui tohlawt chungah chuan thil tle eng emaw hi ka’n hmu a. Chu chu meizial bawm, tangkaruaa siam, Holmes-a ken fo ṭhin kha a ni tih ka hre nghal a.

Chu meizial bawm chu ka’n la a, chutia ka lak zawng chuan a hnuaia lehkha them inthlep chu a tla nalh a. Ka’n chhar a, ka’n kai pharh a, Holmes-a’n thil chhinchhiahna bu atanga a pawh thlak, a thu chah ziah a lo ni a. Ka ta tur ngei a ni. A kut ziak chu a ngai rengin a la nalh a, ama dawhkan pual bika a ziah ni àwma mawi a ni. A lehkhaah chuan :

"MY DEAR WATSON,

He lehkha tawi tê hi Mr Moriarty-a hawihhawmna azara ka ziah a ni a, kan inkar thubuai chin felpui atan tunah hian min nghak reng a ni. English police-ho a pumpelh dan leh kan chet dan a chhui dan min hrilh a. A thluak ṭhatzia ka sawi fo ṭhin kha a thu sawi chuan a nem nghet e. Mipui mimirin zalenna zau zawk an neih theih nan amah ka phiah bo theih dawn avangin lawmawm ka ti a; mahse, ka thiante, a bik takin nang, Watson duh tak chungah rilru natna tur thil ka thlen dawn avangin pawi ka ti em em a ni.

Eng pawh ni se, ka vanglai ka tawng tawh ka tih kha, a tlang kawm nan hei aia thlan leh chuan tur ka hre lo. A dik takin han sawi ta dawt mai ila, Meiringen aṭanga lehkha lo kal kha phuah chawp thil a ni tih ka hria a; mahse, hetiang thil hian min tlakbuak dah law maw tiin i kal bo kha ka rem ti ta a ni.

Inspector Patterson-a hnenah khan, Moriarty-a hote khinna atana lehkha pawimawh chu lehkha thliar hranna bawm, M tih chuang chhunga lehkhaip dumpawl, ‘Moriarty’ tih inziahnaah khan a awm vek ang tih i lo hrilh dawn nia. England ka chhuahsan hmain ka bungrua zawng zawng ka sem fel vek a, ka unaupa Mycroff-a kutah ka hnutchhiah e. Ṭhian duh tak, Mrs Watson kha khawngaihin chibai min buk la, min ringhlel ngai suh ang che.

I ṭhian ngawih ngawih
Sherlock Holmes,"

Sawi zui tur a awm tawh teh chiam lo. Mi thiamte’n an han belh chian velin anni pahnih chu an inbei a, inkuah bet tlat chungin kurungah chuan an tla dun ta ni berin a Iang mai. Tui khawh thla so but but aṭanga an ruang han chhar chhuah leh chu beisei chi a ni tawh Io va; chu kurung mawngah chuan mi sual azawnga hlauhawm ber mai leh dan ṭanpuitu atana mi chhenfakawm ber mai chu an zal chatuan tawh dawn a ang hle mai. Swiss tlangval lah chu hmuh tur reng reng a awm tawh lo va, Moriarty-a mi rawih zinga mi a ni ang tih rinhlelh hleih theih pawh a ni lo.

Moriarty-a pawlte chungchangah chuan an thil sual lo tih tawhte chu Holmes chuan a ching chhuak hneh hle ni tur a ni, an chan tur dik tak an chang pha vek a. An hotupa kaihhruaina azarah thil sual ṭhahnem tawk tak an lo ti hman tih pawh a chiang hle mai. Moriarty-a khawsak dan leh ama chanchin hrim hrim pawh a sualzia ngaihtuah chuan thubuai sawina hmunah an tar lang tlem kher mai.

Kei pek hi pa ṭawng duh tih takah mitthi hnu, Moriarty-a chanchin ka sawina kawngah ka lo duh chipchiar ta deuh emaw a nih pawhin eng dang vang a ni lo vang, khawvela mi duhawm ber mai leh fing ber mai nia ka Io ngaih ṭhin hriat rengna lung phun teh chawk ka inchan a. Chu mai ni lovin a thlan lung chei mawi ka tumna avang te leh a hming hliau theihna tur zawnga an beihna ka chhan let ve-na hmanrua mai nia ka hriat tlat vang a ni.

A TAWP TA.

Link:
BBcode:
HTML:
Hide post links
Show post links

Madina Pachuau
Posts: 1
Joined: December 12th, 2020, 10:02 am

Unread post by Madina Pachuau » June 24th, 2021, 9:15 am

THE MEMOIRS OF SHERLOCK HOLMES chhung ah hian "The Adventure of the Resident Patient" a awm ve lo a ni maw, ka hmu zo tlat lo.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)