Mizo Police Detective _Case:07

Hnuchhuina lampang chi ho
April Hmar Liverpool
Posts: 36
Joined: January 14th, 2024, 5:03 pm

Mizo Police Detective _Case:07

Unread post by April Hmar Liverpool » July 9th, 2024, 2:28 pm

CASE:O7 (Completed)



By, Laltanpuia



Chapter-1



Kum 2017 March 12 a ni a, saitual police station-ah chuan information dawn a ni a, an thu dawn danah chuan hemi ni March 12 tlai lam dar nga leh a chanve ah hian New khawlék khuaah tualthahna nia rinhlelh a thlen thu report a ni a.



He tualthahna nia rinhlelha thil thlen dan tak hi a chipchiara report pe tu ten an hriat bik loh thu leh pc sangliana kum 35 chu tualthattu nia rinhlelh anih thu dawn niin kuttuar a boral ta hi ruatsanga kum 38 mi a ni a.



Pc sangliana leh ruatsanga te hian tlai lam dar thum bawr velah zu an indun thu leh hemi hnu Darkar hnih a liam hnua ruatsanga chu a zu inna In thlanga awm thlam pakhatah chuan thi a chhar anih tak thu te, pc sangliana chu chumi thlam awmna panna kawnga In lam pana a rawn chho lai mi thenkhatin an lo hmuh thu te niin he thil thlen hma, an zu in ho naah pawh PC sangliana leh ruatsanga te chu an inhnial thinrim thu leh kut hial inthlak an tum thu te chu thu hretu te sawi dan a ni a.



Inspector Remruata chuan Rinpuia hnenah chuan, "kha Rina, tualthahna nia rinhlelh case dang leh bawk anih leh tawh kha. misual nia rinhlelh ber hi kan police te chuan kalkawngah an tawk ni awm tak a ni. Ramhnuai lam panin bag nen a in-ak puar luah mai a ni awm a, rinhlelhna chang an lo hre lo pek a ni awm a. Nimahsela, khaw miten an han sawi tak dan atangin tualthattu nia an rinhlelh ber chu a ni ngei a ni tih an han hrechhuak leh hnuhnawh a ni awm e.



"Kan ASI Rimawia hian nangmah ngeiin han enfiah la' mi tih deuh tlat avangin khaw nge keini lam pawh New khawlék khuaah chuan i va tleh phei ve poh teh ang hmiang, hei kan tih nek nek chhungin darkar a liam mai dawn" tiin inspector Remruata chuan Rinpuia phone lo hmang mek chu a han tur nghal vut vut a. Rinpuia pawh chuan, "ni e sir, i tih te chuan le kal rawh, ka hman a ni nghal mai" tiin inspector nen chuan tualthahna thlenna hmun New khawlék khua pan tur chuan an inbuatsaih ta nghal a.



Khua an thlen chuan zan dar ruk a pel thuak tawh a, khawtlang hruaitu te chuan an lo hmuak a. thil thlen dan leh thil awmzia te an han inhrilhfiah hnu chuan inspector leh khawtlang hruaitu VC secretary te chu an han inkawm leh a.



VC secretary sawi dan chuan tlai lam dar thum vel bawrah zu zuar thin veng mawng a mi chali an tih te In-ah mi thenkhat chuan zu an in ho a, an zingah chuan pc sangliana leh mitthi ta ruatsanga te pawh an tel ve ni ngei tur a ni. A hmuna zu ina awm ve mi dang te mai bakah a In neitu chali ngei pawhin a sawi dan a ni a.



Tichuan, an rui phur chho tan ta a, pc sangliana leh ruatsanga te chu ram chungchangah an inhnial chho ta a, midang lo awm ve te pawh chuan lo khap vein mahse an ni pahnih chu ngawih a hnekin an inhnial chho zel a, an thinrim chu an intawng baw ve ve ta hial mai a. Tichuan, Ruatsanga zawk chuan a thinrim em avang leh pc sangliana tih danah chuan a lungawi loh em avang chuan tawngkam tha lo tak thleng chuan a cheh phah ta hial a ni awm a. Ruatsanga chuan pc sangliana chu engtikah emaw chuan i nunna hian a la tuar dawn khawp' tiin a tawngkam a thlah khum nghe nghe a ni.



Chutia tawngka mai ni lo, kutthawh tum meuha an han inrikrap tak hnuah chuan pc sangliana thinrim chu zu inna hmun atang chuan a chhuak ta a, chutia pc sangliana chhuak ta chu ruatsanga chuan tawngkam elsen zet zet leh hmuhsitna tawngkam dengkhawng tak tak hmang chuan a an khum zui bawrh bawrh reng mai a ni.



Tichuan, boruak te a han daih tak deuh hnu leh zu in ve midang ho an han tin zawh takah chuan Ruatsanga pawh chu a tin ve ta a. Nimahsela, tlai lam dar nga anih chhoh takah chuan ram vak tura ramhnuai lam pan mek lianzuala chuan ruatsanga ni ngei tura ngaih mi pakhat hi veng mawng lam, In awmna thlang ber atanga ft 300 vela hlaa awm thlam pakhata a lut lai hi a hmu a, a thawmhnaw hak atangin ram vak tura intintuah niin a lang silo. Eng ti tura chu lai daih daiha tlai lam tawhah lehnghal chutia thangchhuak chu ni maw' tiin a thlir liam mai a ni awm e.



Ruatsanga chhung te chuan chaw ei tura an han inbuatsaih lai chuan an tlangval chu a la rawn haw lo a ni tih an hre ta a. Tichuan, Ruatsanga lenna nia an ngaih te In lamah chuan naupang ho an tir a, mahse an va hmu ta mai lo a. Tichuan le, dar nga leh a chanve a ni chho tan tihah chuan veng mawng lama darzika thlama Ruatsanga rûang thisen nena lo inchiah piah nuai mai chu an thil hmuh a ni ta a ni.



Ruatsanga thlamah a awm a ni tih an hriat theihna chhan pawh hi ram vak tura chhuak ta lianzuala khan a ngaih tih that nan khaw chhunga a thian te chu Ruatsanga ni ngeia lang veng mawng lama darzika thlamah a hmuh thu a lo hrilh chhawn leh vang a lo ni a. Tichuan, rang takin Ruatsanga rûang hmu tute chuan khawtlang hruaitu te an pun nghal thuai a, tichuan VC secretary-in saitual police station-ah Ruatsanga rûang an chhar thu chu a thlen ta a ni.



ASI Rimawia chu a duty lai niin hmanhmawh takin New khawlék khuaah chuan thil thlen dan enfiah turin a kal nghal thuai a. New khawlék khua an luh dawnah chuan mi pakhat hi an tawk a, a landanah chuan ram riak lut tur ni ngeiin a lang. Tichuan ASI Rimawia leh a nau te chuan Ruatsanga awmna thlam chu zu thleng thla nghal thuaiin mitthi chu an han en fiah nghal a.



Mitthi nak vei lamah chuan chemte a vihna hnuhma ni ngeia lang inchi hnih vela kak hi an hmu a, a hnung zangah chuan vih tlangna hnu hma inchi khat vel hliam an hmu bawk. New khawlék khaw bul maiah hian chalfilh a awm a, damdawi In awmna a ni. Mahsela, hetih lai hi doctor awm rem chan loh lai a nih avangin rûang chu saitualah phurh phei nghal a ni a, rûang chu postmortem a ni dawn a ni. ASI Rimawia chuan evidence atan mitthi kawr hak thisen kai nuai chu lain mitthi bul maia chemte feet 2 dawna sei lo awm chu a la tel bawk a, tichuan ASI Rimawia hian saitual police station-ah FIR thehlutin case chu OC hnenah a hlan ta a ni.



Inspector Remruata chuan tlai lam dar thum bawr vela chali ina zu in ho chu a mal te tein thu a zawtfiah vek a, an thusawi dan pawh a in ang tlang hle. Ruatsanga thih dana an mi rinhlelh ber pc sangliana chu Ruatsanga nena an inhnial thinrim chiam hnua kut thawh mai pawh hreh loa an inrikrap chiam thu te, chumi hnua pc sangliana chu thinrim avanga In atanga chhuak ta anih thu te, Ruatsanga erawh midang zawng an tin zawh tawh hnua la hnufual anih avanga a chin an hriat zui bik loh thu te leh chumi thu hlaah chuan In nei tu chali chu thil thlen zel dan hre tu nia an ngaih thu te an sawi hlawm a.



Inspector pawh chuan chali chu thu zawtfiah ve lehin chali pawh chuan Ruatsanga chu a hnufuala a tan ngei thu leh, nimahsela a hnufual rei loh thu sawiin chumi hnua thil thlen zel dan chu engmah a hriat zui bik loh thu a sawi ve leh bawk a. Ram vak tura chhuak ta lianzuala ngei pawh kha In a lo thleng ve tawh bawk a. A ni pawh chu inspector chuan thu a zawt fiah ve leh a. lianzuala pawh chuan ASI Rimawia report pek ang thovin thil thlen dan leh Ruatsanga awmdanin a ngaih a tih that loh avanga In lama a thian te hnena Ruatsanga chungchang a hrilh thu te, chumi hnua an thil hmuh chu rapthlak taka Ruatsanga rûang an hmuh chhuah tak mai thu te a ni a.



Inspector Remruata chuan Rinpuia hnenah chuan, "Rinpui, kan mitthi chhung te leh mi rinhlelh PC sangliana chhung te chu thu lo zawtfiah ang che u. Tun hmain an pahnih inkarah inhmuh thiam lohna a awm em? Tin, PC sangliana hian hetiang thil hi Ruatsanga chungah hian ti mai duh awm angin a lo awm tawh ngai em? Ram chungchanga an inhmuh thiam lohna te pawh chu lo zawt chiang ang che u" a han ti a. Rinpuia chuan, "sir, he pa, kan mi rinhlelh PC sangliana hi khawiah nge tunah a awm ang ni? Amah hi man vat chi a nilo maw? A lo ti a. Inspector chuan, "imm, chu chu a pawimawh hle bawk, pc sangliana awmna chin kan hriat a tul a, a chhung ten chu chu an hria ang" a lo ti a.



Rinpuia leh constable dang te pawh chu PC sangliana chin hriat tum chuan pc sangliana leh Ruatsanga, an ni pahnih an chhung te an chinchang zawtfiah tur chuan chet an la nghal thuai a, inspector erawh ASI Rimawia hrilh angin Ruatsanga rûang an chharna hmun hma te chu en thlithlai tur chuan chet a la ve ta thung a.



Thlam an zu thlen chuan thawm a reh viau mai. Inspector chuan amah hruaitu te hnenah chuan, "Imm, pu lianzual, tlai lam dar thum leh a chanvea i ram vak turin he laiah Ruatsanga ang tak chu i han hmu a, i ko lem lo tihna a niang maw? Tin, tlai lam dar nga leh a chanveah he laiah Ruatsanga rûang in han hmuchhuak zui leh zel a, i ngaih that loh rukna chuan awmzia a nei ngei dawn anih chu a" a han ti a.



lianzuala pawh chuan, "ni e inspector, Khatiang ang hunah kha chuan ram riak tur emaw ram vak tur anih loh vek pawhin zu chhuang tur emaw anih kha ka ringhlel ru ve alawm. Ruatsanga te hi chu zu in mi an lo ni a, chumi bakah mi thlama khatia a han petek lut lai ka lo hmuh atang ringawt pawh khan a hun ngaihtuah nen thil danglam tak a ni hrim hrim"



"ka ngaih kha a tha chiah lo deuh a ni. Hetiang anga tawh sual tawk ang zawngin thil a thleng em lo anih pawhin mi thlama a neitu te hriat loha kal hrim hrim pawh kha thil tha a nilo a ni" Inspector chuan, "i sawi dik rêng a ni. Mi phalna anih loh chuan hnathawh thawmhnaw ni hauh lo nena mi thlama petek lut ta mai chuan zu chhuan ruk an tum anih loh vek pawhin ruk ru tur te pawh awm ang dawn dawnin a lan tir ve thei tlat a ni" tiin thlam kawngkhar chu a han nam hawng a.



Chuveleh, thisen thang rim chu a rawn nam nghal huk huk a, tho tle an lo tam na ngiang mai. Thlam chhung chu an hmeh en ken hmang chuan an han en kual a, tui dahna bride bulah chuan sazu thi hi a lo awm a, a lo tit ek lek lek tawh a, a rim chu a na ngang a niang inspector leh midang te pawh chu boruak thianghlim dawn tumin an ring chu an fan nghal ak ak thei hial a.



Chutah, inspector chuan rap chunga thing chu a hmeh en ken hmanga han en kual dan danin a en uluk kher mai. Chutah, hmun hran hran chu a han en kual zel a, thlam nam thlak chu a in hawng huau a, mutna zawna bang chu feet khat bial zet hian a pawp huau mai bawk. Tui dehna lai chu thisen hian a bual zuih mai a, thawmhnaw banna hrui ni awm tak chu a nih dan tur pangngai lo tih hriat tak hian a uai fual hnuang mai bawk. Thawmhnawah te chuan thisen a Kai nen nuan mai a, banga thleng leh plate indahna chhuar te chu a sawi bui hlawm a, thleng leh fian te chu chhuatah chuan a tla darh nual bawk. A duhtawk a ngah hnu chuan inspector chuan tin a rawt ta a.



Rinpuia'n inspector a lo hmuh ve leh chuan a lo tibuai nghal thuai a, "sir, hei hi PC sangliana pa anih hi, chuan hei hi Ruatsanga nu" tiin pa pakhat, sam thur deuh chhap mai leh hmel chang far mai, mitmeng buai deuh nuai chu a han kawhhmuh a. Tin, Ruatsanga nu a tih pawh chu a mit meng a phelh phang mai a, a hmel leh awmdanah chuan a hrilhhaiin a mangang takzet a ni tih a hriat bawk.



"Aw ka pu, kei hi Ruatsanga nu ka ni e, ka hming chu khawngaihi a ni" a hmela lungngaihna leh lusun hlim tih hriat tak leh a heh pan thler mai intih pachan tum tih hriat taka pet fan fan chung chuan chu nu chuan a han ti a. inspector chuan, "ka pi, hahdam tum hram hram la, i fapa hi a ruang postmortem result te a rawn chhuak ang a, chanchin kan hre zel ang. Tin, i fapa leh pc sangliana te hi tun hmain an inkawm ngai em? An inzui ve thin em? Nang pawh ka pu, in fate tun hma hun hman dan han sawi teh u. Hei, i fapa hi pawikhawihnaa inhnamhnawih anga rinhlelh hi a ni mek a, thian an ni nge an inzui ngai lem lo?"



Pitar chuan a mittui chu han hruk mawlh mawlh pah chuan, "ka pu, a mak hi ka ti em a ni kei zawng, ka hrethiam teh nuai lo. mama hetia mi kut tuara a han boral ngawt mai hi min thawngin ka tuar takzet a ni" Putar zawk chuan, "ee pu inspector, kan fa te hi tun hma pawha inkawm ve fo thin an ni alawm, hetiang thil hi chu an ni thian dun inkara hem han thlak mai duhna atan chuan thil theih a niin ka hre ve lo. Sangliana hi Ruatsanga ai hian kum hnih velin a nau zawk nghe nghe ang chu maw le. chutia aia u te chunga kut han thla duh tur ni niin ka hre lo a ni"



Inspector chuan pitar chu en in, "anih ka pi nang ve thung le, kan pu ngaihdan chu i tawmpui ve chiah reng em?" A han ti a. Pitar chuan la insut hlap hlap chung chuan, "ka pu, an ni pahnih inkarah hian eng thil chiah nge awm tih ka hrethiam ve hauh lo mai. ram chungchang pawh chu lo ni teh reng se, huan thlai ilo ram ri thu hla vela han inkhak leh zauh zauh chang hi chu kan inkarah hi chuan a thleng fo alawm. mahse, chutianga hmelma kuta sahrang han hmuh len thu hla lam a ni lo, chhungkhat han inngamtlak ang hi kan ang zawk mah awm e. Hetiang thil rapthlak hi a tu a mah hian an ti duh lul lovang"



"Imm, chuti anih chuan nang ni lam ngaihdanah chuan in fa te chungah inhuatna emaw han innghirnghona tur thil awmin inring lo tihna a niang maw? Putar chuan, "aw ni e inspector, chu chiah chu maw le. Ruatsanga thihna ah hian kan fapa hi rinhlelh a kai laklawh mai mai niin ka hria. Sangliana hi chu mi pawi sawi hlau ngang hi a ni a, mi inkiltawih hma leh mi inthlahrung mi a ni a. midang tana hnawksaka han awm te hi a thil hlauh zawng tak a ni asin"



Inspector chuan ngun tak in a han ngaihtuah a, chutah, "chuti anih chuan tlai lam dar thuma chali Ina zu an inkhawmna ah khan in fa te pahnih chu ram chungchangah an inbakkaih chiam mai a ni awm a, chung te chu inla hre ve lo tihna a niang maw?" Chuveleh putar zawk chuan, "ee ka pu, chutiang thil chu sawi tak angin tun hma pawhin a thleng fo alawm, mahse hetiang thil han tih zui duhna tur khawpa thil pawi a niin ka ring thei lo a ni" Chutah inspector chuan putar hnenah chuan, "imm anih chuan ka pu, in fapa sangliana chu khawiah nge tunah a awm? Ram chu a riak tihna em ni? Putar chuan, "aw ka pu, ram riak tur khan tlai lam dar ruk hma deuh khan a inpu chhuak ta anih kha"



"Anih chuan ka pu, in fapa chuan a thianpa Ruatsanga bo thu emaw a ruang an chhar thu engmah hre loin ram riak tur chuan a inpu chhuak tihna a niang maw?"



"Aa ka pu, sangliana khan engmah a hre hman lo. Keini ngei pawh khan Ruatsanga chanchin engmah kan la hre bik lo. Khatia a inpu chhuak ta tihah khan Ruatsanga rûang darzika thlama an chhar thu hre zui ta mai kha kan ni a"



Inspector chuan, "chu, Ruatsanga, a thianpa chu thiin an chhar a, chumi thu chu inhrilh lo em ni phone hmang pawh in" putar chuan, "aa, kan hrilh nghal kha chuan ka hria, khatia Ruatsanga a thih thu kan han hriat rual rual khan kan chi aiin kan phawklêk ve a, kan lo hrilh ve ta lo pawh a ni maithei bawk"



inspector chuan, "mahse tunah chuan in fapa pawh chuan a hre tawh tur chu a ni si a"



"Ni e ka pu, hei kan nau te hian an la buaipui zel chu anih hi maw? Inspector chuan, "anih chuan khami lai, tlai lam dar thum atanga ram riak tura a input chhuah hun inkarah khan in fapa chu khawiah nge a awm? Enge a tih?" Putar chuan phawk fe a inspector chu en in, "ka pu, chutiang leh zel chu kan hriatpui hauh bik lo a ni. In ah chuan a awm lo ngei mai. Mahse a thian te sawi dan kha chuan zu te pawh chu an in ho ni ngei tur a ni"



Inspector chuan, "imm, ka pu, i fapa hi rinhlelh kai a ni tlat si a ni. zu an in lai pawh hian Ram chungchangah Ruatsanga nen hian an inhnial chiam a, kut thawh hreh lo hiala an inbakkaih zui hnua thil thleng a ni a. Tin, Ruatsanga zawk hian a tawngkam pawh a cheh uluk tehchiam lo niin a lang a, chuti anih chuan an ni pahnih innghirnghona hi thil ho mai mai emaw zu ruih vang satliah mai mai chu a ni hauh lo thei tlat a ni. Tin, hetih laia in fapa sangliana hun hman dan kimchang hi engmah in hriat bik siloh avangin Ruatsanga thattu nia rinhlelh hi a ni lo thei lo a ni. Tin, an zu in pui te sawi dan hmangah pawh in fapa ngei hi pawikhawihtu nia lang chu a ni. A pawimawh ber chu amah hi thu zawhfiah turin awm vat se a tha a ni mai"



Inspector chuan nin hmel fe hian Rinpuia hnenah chuan, "Rina, he pa sangliana pa an tih hi a kum a tam viau tawh nain ka mi rin zawng a ni hauh lo mai. A thusawi duhdan leh a tawngkam hman dan te reng mai hi a fapa hi mi thianghlim leh sualna nei lo beram no ang maia chhuah a tum tang tang ni berin a lang"



Rinpuia chuan, "chu sir, i beisei loh deuhin i zawhna an chhang che a niang maw? A lo ti a. inspector chuan, "ni ang chu maw le, an inkarah eng inhuatna mah a awm an ring lo tlat a. Ram chungchanga an han innghirnghona ve te pawh chhungkhat ngamtlak tia an inzilhhauna ang lekah an chhuah tlat mai si a ni"



"Ruatsanga nu ngei pawh hi a ni chiah tho. An chhungkaw hnih inkar boruak dik tak hi an sawi that duh loh vang anih ngat zawngin nuam zawng an sa bik hauh lo ang. Thu dik nilo hmanga mi chhaih buai an tum anih na zawngin an ni ngei pawh hi rinhlelh an thiang vekah ka ngai hmiah ang" Tiin inspector chu a han inseh ruh ul ul mai a. Rinpuia chuan, "imm sir, an ni mi pangngai ngaihdanah te chuan thil âwm lo pawh a ni hleinem. Amaherawhchu, i han sawi dan hmangin he thihna hi tualthahna nilo, thih dan dang anga han ngaihbel mai theih tura thu an han kuai he tlat duh mai chu thil mak tak a niin ka hria. Mitthi postmortem result a chhuak ang a, thah ngei anih zia chu a Chiang Mai ang. Phat rual lohin a that tu hian thlama chemte lo awm hmang khan a vit hlum tih a Chiang reng si a" a han ti ve luam bawk a.



Nakin deuhah chuan mitthi chhung te leh pc sangliana chhung te hnen atang chuan thu thar an dawng ta a. sangliana chu a awmna chin an la hriat loh thu leh a mobile phone pawh chu a ram riahnaah a keng lo anih an han ring ta a. An call a piang mai chuan a in ring ral zel mai si a, In ah an han zawn lahin an hmu zo silo. Tichuan le, a ram riahna hmun sangliana te loa an thlamah chuan sangliana hruai haw tur chuan tlangval tlawmngai te chu an tir ta ngawt mai a, inspector leh a nau te pawh chuan sangliana an hmuh hma chu an la tinsan mai thei rih tlat lo bawk a ni.



Rinpuia pawh chuan a pu lakah chuan beiseina sang tak neiin thlam leh a vel an thlithlaina ah thil hmuhchhuah emaw hnuchhuina han puibawm thei thil han chhui dawn tur a hriat leh hriat loh chu a zawt ta phawng mai a. Rinpuia ngaihdanah chuan chu thihna, tualthahna ni ngeia langah chuan enge a chhan leh vang tih leh misual chhui zui dan tur te chu inspector chuan a hre ngeiin a ring a ni. Inspector Ruata pawh chuan Rinpuia hnenah chuan a thil hmuh leh hriat ang ang, a ngaihdan te, a thil chhui dawn dan te chu a hrilh ve malh malh reng a,



"Rinpui, he case hi a tira kan lo hriat ruala tualthattu pawh sangliana ngei a ni tih a lan chian ang tluk zet hian he thihna hian kan beisei loh lam leh kan lo rin lawk loh lam daihah hian min hruai kawi ve thei tlat a ni. Chumi anih rual chuan thu hretu te leh mita hmu tu te ngeiin tlai lam dar thum atanga intana thil thlen chhoh dan an sawi han hriat hi chuan phat rual lohin misual chu sangliana ngei hi a ni tih Chiang takin a inkah pup chaw chho zut ni chuan a lang bawk a"



"Tunah rih chuan he pa, sangliana ber hi kan mamawh a ni. Thu kan zawtfiah a nga, chumi a zir chuan chet kan lak leh dan tur chu a hril chho mai ang" Rinpuia chuan, "sir, he pa sangliana hian a mobile phone pawh chu lo keng lo pawh ni tehreng se, kei zawng he pa baka han rinhlelh awm hi midang an awm Chuang lo ka ti. Amah ngei hi tualthattu anih hi ka ring bur mai a ni" a han ti ve a. Inspector chuan sangliana chu chuti maia a rawn inlan a beisei lo nge ni, "ni e rinpui, tuna ka ngaihtuahna luah khat mek tu zawk chu engtin nge sangliana hi kan man tak ang tih hi a ni zawk ta mah mai" a lo ti ve bawk a.













CASE:07



By, Laltanpuia



Bung Hnihna



Pc sangliana chin ngaihvena thang chhuak ta tlangval tlawmngai te chuan police te hnenah chuan heti hian thu an rawn thlen ta tlat mai. pc sangliana riahna hmun nia an ngaih an thlam awmna an va thlen chuan thawm a lo reh thiap mai a, chutah thlam chhung an han lut chu mut bu tharlam tak hi chhuat laiah chuan a lo awm ngei a, a la intel thlap nghe nghe. Tin, kawngkhar a lo inkhar loh danah pc sangliana chu ram riak turin chu lai thlamah chuan a kal ngei anih chu a rinawm a. Nimahsela, amah ber hmuh tur a lo awm lo va, a thawm ngaichanga hun engemaw ti chhung an han tâp khaw muan hnuah pawh chuan pc sangliana hmel reng reng hmuh tur a awm hauh lo a ni. Tichuan, hun a liam zel si a, tlangval ho chu In lamah an rawn let leh ta ngawt mai a ni.





Police ten tualthattu nia rinhlelh PC sangliana chin engmah an hriat tak lohah chuan ngaihdan hrang hrang a piang nasa hle mai a. khawlék Vcp chuan inspector Remruata hnenah chuan PC sangliana chu ram riak turin a inpu lut ngei a ni tih chu a Chiang viau nia a hriat thu leh, chutia thlama a hmel hmuh tur a lo awm loh chhanah chuan ram vaka hmun danga a lo thang bo lai tak an va nang niin a ngai a. Tin, a mut bu Ken luh pawh chhuata dah fel loha a lo awm danah a thlen hlim hlawtah ram vak turin a petek bo leh nghal anih a rin thu te chu a hrilh ve luam a. Inspector chuan, "imm, he pa hi a chet dan leh a khawsak danah hian kei chuan mi â tak chu a niin ka hre lo. Engemaw ruahmanna chu a nei niin a lang. Tin, thlama a lo awm loh danah chuan in thawm a lo hriat vang pawh a ni thei a, in thawm hriain a lo bi bo mai mai pawh a ni ang.





"Chhan tha tak neiin PC sangliana hian Ruatsanga hi phone call hmangin a ko chhuak tih a lang reng a. Tin, a cellphone chu tunah khawiah nge a awm tih tuman kan hre lo bawk. A cellphone chu amah ngeiin a kawl a ni ngei ang. Mahse phone call a la duh lo a, he laia call a ring ral tir kherna chhan hi chu keini lam hian tualthattu ngei a ni tih kan la finfiah lo a ni tih hi a hrethiam tih a lang reng a, a tir atangin PC sangliana hian thil awmzia chu a man thiam vek a ni. Amah hi rinhlelh a ni ngei ngei dawn tih a hre vek bawk ang a"





Rinpuia chuan lo pawtchat in, "mahse sir, he pa hi a thil tih sual inpawm a police kuta inpek mai awm tak a ni a, chumi a ngam lo anih pawhin tlan bo dan a dap mai tur ni awm tak a ni a. Mahse, a hnu chhui zui theih turin a khawsa lawi a, tin phone call han lak duh loh te, a ram riah tur thu a chhung te hnena han hrilh te, a chet dan zawng zawng hi a bul atanga han chhui dawn chuan i sawi tak angin engemaw tak ruahmanna hi chu a nei ni ngeiin a lang. mahse, a khawsak dan mawlh hi Ruatsanga a that a, In lamah hawin a chhungte hnenah a riah tur thu a hrilh a, a inpu chhuak nghal a. Tichuan, police te chuan a hnu an chhui zui ngei a ring ang a, tlangval ho thawm a lo hriat khan a lo bi bo ta a, emaw ram vak turin a lo thang bo pawh a ni a nga. ka ngaihdan chuan keini lam hian chet kan la fuh lo deuh niin ka hria. PC sangliana hi man thei ila chu thil engkim hi a fel nghal maiin ka ring a ni"





Inspector chuan, "Rina, ka rilruah tak pawh hian thil lo lang chu, he pa awmna hi kan hre fuh thei meuh a ngem tih lai zawk hi a ni. Ram a riak lut a, a ram riahna hmun pawh kan hre ngei ni chuan a lang. Amah ber lo châna lo hnungkhirh nghal mai pawh chu thil awlsam tak ni pawhin a lang. mahse, amah ber hian keini lam hi min bik bo san dan tur ngawt a dap a nih erawh chuan kan beisei lo takin hna hau tak tak pawh min siam ve thei tlat a ni"





Vcp chu a lo inrawlh ve vat a, "ee pu te u, kan khaw tualah ngei thihna rapthlak tak a thleng a, hei tualthattu nia rinhlelh an awm a, man chhuah vat a tul anih chuan keini khawtlang pawh hian theihtawp kan chhuah ang. Amaherawhchu, in han sawi tak danah ruahmanna engemaw tak te hi a lo nei ve thei a, chetsual palh leh vanduai palh thil thleng thei erawh a ni.





"Chumi ah chuan nang ni lamin ruahmanna leh remruatna tha zawk te han nei thei ula duhthusam chu a ni" a lo ti ve bawk a. Inspector chuan, "imm ka pu, lungngai lo phawt ang, zanin lam hian a chin te han ngaichang leh phawt mai ila, Chuta a la rawn inlan lo fo anih chuan keini lamin kan bawhzui tawh mai dawn nia" a han ti a. Vcp pawh chuan, "ni e, in tih dan dan ni rawh se. misual man ngai an awm a, khawtlang mipui te chi aiin an awm a man vat ni teh se khai. Mitthi ta chhung te pawh an tawrhna leh lusunna te pawh a zia deuh mahna" tiin pc sangliana chin ngaichang chuan chumi zan chu hun an hmang tlang ta a. police lam erawh station lam panin chet an la ta thung a ni.





Zan khua in pc sangliana chin engmah hriat tur a awm lova, khua a var chawp ve mai bawk nen khawlék khua hruaitu te tan tak pawh chuan chet han lak mai ngaihna a vang ru ve viau mai. Chumi tuk chuan pc sangliana pa chuan thil Chiang zawk a hriat inbeiseiin an fapa chu thil tisual tu nia la beisei lo fo chung chuan an thlam awmna hmun, an fapa in ram riah a tumna hmun lam pana chet la tur chuan a inruahman ta ngawt mai a. Phone call lah chu a ngai te bawkin an fapa chuan a la chhang thei si lo nen.





Mitthi postmortem result pawh chu a chhuak ta bawk a. Postmortem buaipui tu medical examiner te pawh chuan Ruatsanga chu chemte hmanga vih hlum ngei a ni tih an rawn confirm ta a. A vihna chem chuan a chuap a ti chhia a, a chuapa thisen tling leh boruak tlachham avanga thi anih thu chu police te hnenah chuan an hrilh ta a ni.





Chawhnu her anih chuan inspector Ruata chuan chanchin duhawm lo tak mai a hre leh ta bawk. Khawlék khua atangin VC secretary hnen atangin a ni a. PC sangliana ngaihven tura thangchhuak ta PC sangliana pa pu Pasena chu chin hriat a ni ta tlat lo a ni awm a. A case buaipui lai a lo ni nen chumi ngaihven tur chuan a rang a rangin New khawlék khaw lam pan chuan a nau te nen chuan an tleh chhuak ve leh ta nghal a.





Inspector a lo hmuh rual rual chuan Vcp chuan, "pu inspector, hei pu Pasena pawh a reh zui ta vang vang mai. zing lam dar ruka a fapa ram riak ngaihven tura thangchhuak ta kha a ni a. Nizan lamah sangliana chin engmah kan hre ta si lo nen, khaw lamah a rawn haw âwm engmah kan hre ta si lo a, ama pa ngeiin ngaihven turin a thangchhuak ta kha a ni a"





Inspector chuan, "chu, midang tumahin an kalpui lo a ni maw?" A lo ti thuai a. Vcp chuan, "aw, kal pui hran lo, keini lam tak phei hi chuan a kalchhuak dawn tih reng kan lo hre miah lova, a chhung te a hrilh anga a duhtawk mai anih ka ring. Tin, pu Pasena hian a fapa hi thil tisual thei hian a ring tlat lo mai a, Ruatsanga thihna pawh hi a fapa thil tih anih hi a ring thei lo a ni. midang pawh hrilh hre hran lovin ngaih tha takin ram chhuak dan pangngai angin a thangchhuak ta mai anih hi ka ring a ni"





Inspector chuan, "chu, amah biak pawh theihin a awm hrim hrim em? a lo ti a. Vcp chuan, "aa, hei kan han tum ngial chu a ni a, dar kaw bawr chhoah kha chuan amah ngei pawh kan be tlang thei reng mai"





Inspector chuan, "chu, in inbiak dan chu han sawi teh" Vcp chuan, "inspector a hmasain a fapa sangliana ram riah tumna hi khua atanga km 6 dawn kea kal ngai a ni a, amah nena kan inbiak lai kha chuan a hmun a la thlen loh thu min hrilh a. mahse, khami hnua biak kan han tum leh kha kan be tlang thei ta lo a ni. Hei nang ni lam rawn lan hun kan lo ngaichang hmasa ta phawt mai a, hetiang ang thil, tualthahna lam leh hnuchhui ngai ang chi thil hi chu mahni thua lo bawhzui ve ngawt kan duh rih lo a ni"





Inspector chuan, "chu, in han call leh pawhin a ring ral zel tihna nge a call tlang theih loh tawp?" A han ti leh a. Vcp chuan, "call chu a tlang thei ngei mai, kha tunah pawh hian nangmah ngeiin han call ve leh chhin mah teh, a la thei ta tlat lo alawm maw le" tiin inspector pawh chuan Pasena chu a han call ve ta a. call chu a ring thei a, nimahsela Vcp hrilh angin phone call a la thei tlat lo. Tum hnih tum thum lai a han call nawn leh hnu pawh chuan Pasena chuan phone call chu a la thei chuang hauh lo mai a.





"Pc sangliana zawk kha in han call nawn leh chhin tawh em?" Inspector chuan a han ti a. Vcp pawh chuan, "aa, nizan lama biak pawh kan han tum bak kha chu vawiin lamah chuan kan la phone leh chhin hauh lo mai" a lo ti thuai a. Inspector chuan, "amah PC sangliana kha han call leh chhin teh" a han ti leh a. Vcp pawh chuan phone chu a han lek kang a, PC sangliana chu a han call leh ta a. mahse, PC sangliana pawh chuan phone call chu a la thei chuang tlat lo.





Inspector chuan thawk chu han la in, "imm, pu siamlian, ram chin hre deuh mi thenkhat nen chu lai ram chu kan pan ang, kea kal ngai kha i ti em ni kha? Vcp chuan, "aa, kea kal ngai han tihah khan khaw chhung atang hi chuan motor kawng chu thui vak lo chu a tlang ve e" a lo ti a. Inspector chuan Rinpuia hnenah chuan, "motor kha lo buatsaih rawh Rina, mi thenkhatin min zui bawk se, fimkhur thu hlaah silai nei chuan keng bawk ula" a han ti a, chet la tur chuan an inpuahchah ta nghal a.





New khawlék khua chu a buai ngei mai. Police lamin PC sangliana hnu an chhui zui dawn takah leh Pasena chin ngaihven tura an han inpuahchah tak rum rumah chuan mipui lam pawh an chi aiin an phawklêk ve hle mai a. Tualthihna rapthlak tak leh thil thleng khat tak kara boruak inlum let vel mek hnuaiah chuan Police te leh khawtual mi tlangval thenkhat te chuan nghalchang ram an tih lam pan chuan chet an la ta a ni.





Ni sen sa hnuaiah Kawng thui zawk kea an kal avangin an chau tlang ve hle a. chhun pa changah nghalchang ram an tih hmun chu thlengin PC sangliana te thlam awmna hmun chu kar lovah an thleng thuai a. Thlam chu thingtlang pa thlam tih takah a chung rangva niin a bang chu thingzai phela bel a ni a. A kiangah chuan pangpar buk tha deuh deuh hi an ding khup mai bawk a. Thlam luh ka chu an han lawn kai a, thlam chu a lo inkalh hauh lo mai. Chutah, inspector chuan ngaih that lohna nei hauh lo chung chuan thlam chu a han nam hawng a, chuveleh thlam chhungah chuan a lut nghal a.





mutna ni awm takah chuan pawnthuah hi hruiah hian a lo in bang hnup hlawm a, thawmhnaw tlem a zawng a awm tel bawk. Tapchhaka mei chu an chhemna a la rei lo a ni tih hriat tak hian a lo la lum thar thar mai bawk. Chhuara chini bawm chu chhuatah chuan a lo tla darh nuaih mai a, thingpui bel bula thingpui no lo awm chu hmuin inspector chuan a han en chiang a, thingpui la lum vat vat hi no chan ve vel lai hi a lo la awm a.





Chutah, thlam nam thlak lam chu han enin namthlakah chuan vaihlo bawm ni ngeia lang Sarang lian tha tak mai hi a lo inthet darh mek bawk a. Chuveleh, Inspector chu a ngaihtuahna atanga harh thutin thlam namthlak lamah chuan a phe thla nghal vut mai a. Mak ti tak leh a ngaihna hriat loh hmel taka amah lo en reng tu Rinpuia leh midang te hnenah chuan, "Rina, a then khan thlam chhung hi uluk takin lo en ang che u. Mobile phone a ni emaw, thil dang eng pawh hmuh leh hriat tur inlo dap dawn nia. Chuan a thenin min lo zui ula" a han ti a. chumi pah chuan thlam namthlaka Saranga vaihlo awm chu a han en a.





chumi pah chuan, "imm, kan thawm hriain an lo insa seng leh hman pek anih dawn hi" tiin tapchhak lam chu a han thlek ha a. Rinpuia hnenah chuan, "kan misuala te pafa hian eng thil chiah nge maw an ruahman ni dawn ni, hei kan thawm hriain an lo bibo hman anih dawn hi. kha laia chini bawm let reng leh thingpui no in zawh hman loh tih hriat tak la lum vat vat te, tapchhaka mei lo la lum vat vat te, he laia vaihlo sâwng bawl lai mek tih hriat taka lo awm te atang hian kan pua te pafa chu an lo lak lawh lai tak kan va nang ching anih dawn hi" A han ti a.





Rinpuia chuan mak ti zet chung hian, "sir, he thilah hian PC sangliana chauh hi a inrawlh lo i tihna em ni? A lo ti nghal vat a. Inspector chuan, "imm, chu chu a dik ngei niin a lang, kha laiah khan pakhat zawk chuan thingpui a in mek a ni tih thingpui no a chhunga thingpui lo la awm atang khan a chiang reng a. Tin, he laiah namthlakah hian pakhat zawk chuan vaihlo hi pho turin emaw zuk turin emaw a sâwngbâwl mek a ni tih he vaihlo awmdan atang hian a hriat bawk a ni.





"Kawngkhar kha chu an khar sa hrim hrim tihna te pawh a ni ang. Tichuan, kan thawm hriain thingpui in tu zawk chuan bikbo tumin a rang a rangin chet a la nghal a ni tih a thingpui in zawh hman tak loh danah khan a hriat mai a, a hmanhmawh hle a ni tih chini bawm a tih tlak danah khan a chiang mai bawk awm e. Tichuan, hmanhmawh takin he lai namthlakah hian an zuang thla nghal a, khawiah nge an kal tih chu an hnu atangin kan zui dawn a ni. Tin, a then khan Uluk takin thlam chhung hi lo dap ang che u" tih leh namthlaka zuan thlak a rual a.





Inspector chuan uisathiam tha mi ang mai hian lei chu uluk fe hian hmai si dawn dawnin a bih ta nget nget mai a. Chuveleh, phur tih hriat zeta rawn hawi chhuakin, "khuanu kan lamah a tang a ni ngat mai" tiin a nau te zinga pakhat hnenah chuan, "khaw maw tlangval, i phone camera kha han hmet chhuak vat teh, hei en rawh, ngun deuhin" tiin leia ke hniak lo awm chu a han kawk a.





chutah rang zet hian, "a thla kha la rawh le" tiin ke hniak dang lo awm te chu uisathiam ang mai chuan bawkkhup dawn dawn hian a bih phei leh ta nget nget mai a. chumi pah chuan hriatthiam loh hmel erawh pu chungin an awmna vel chu a han thlek kual leh ang ha thin bawk a. lei chu inspector sawi angin khuanu an lamah a tang ni maia han ngaihbel theih tur chuan ke hniak hmuh awlsam turin a phut deuh surh lah tak a, chumi avanga ke hniak pawh chu fiah taka lang a ni si a.





Inspector chu a awm hmunah chuan han ding khawmuang detin hriatthiam loh hmel tak chuan a lu chu a hiat nauh nauh a. Chuveleh, hmanhmawh fe hian thlam chu a kal hual leh ta vut vut mai a. Thlam chhung lam atang chuan Rinpuia chuan, "sir, cellphone chu kan hmu e" a rawn ti a. chuveleh inspector chu a ding chawt a, phur hmel taka namthlak awmna lam pan chung chuan, "engzat nge? a han ti a. Rinpuia chuan, "sir, Torchlight pakhat, Sangha manna ni awm tak Dianamo battery leh speaker pakhat, sakawrbakcheh leh chemtê. Tin, cellphone pakhat nen chung chu kan thil hmuh te chu an ni e" inspector chuan, "cellphone pakhat chauh maw?" a han ti a. "aw sir, kan han check Chiang chhin a nge"





Inspector chuan a lu han hiat nauh nauh chung chuan, "imm, ke hniak leh hnu hma atang hi chuan thlamah hian mi pakhat chauh a awm tlat mai" A han ti a. Chuveleh, an zinga pakhat chuan, "ni e sir, hei ke hniak atanga a landanah hi chuan mi pakhat ke hniak niin a lang a ni. Pheikhawk inkhing hniak khat chauh a awm si a, thlam atang hian mi pakhat chu hmanhmawh takin namthlakah hian a zuangthla a ni tih erawh a chiang viau" A lo ti ve bawk a.





Chutah inspector chuan, "mahse engtin nge anih theih? Thlam chhung lam atanga a landanah kha chuan mi pahnih chetna hnu hma ni ngei khan a lang si a" a han ti a. An zinga pakhat chuan, "sir, kha zawng mi pahnih chet tlatna ni lovin mi pakhat sulhnu, a hmanhmawh em avanga mi pahnih sulhnu nia lang ta niin ka hria" a lo ti vat a. Inspector pawh chuan, "im, chu chu thil ni thei a ni. Tin, vaihlo kha chu ni saa pho tura ruahman lawk sa pawh a lo ni thei a. He laiah Pasena te pafa biak pawh theih loha thang bo mek te vang te pawh a ni ang, mi pahnih sulhnu kha rilru chuan a chhui dawn lo thei lo ve pakhat bawk a ni" a han ti a, a nui deuh hak nghe nghe a.





Chutah Rinpuia pawh chuan, "sir, cellphone hi a battery a low a ni ngei ang a on theih loh" a lo ti ve mek bawk a. Chuveleh, inspector chuan, "imm chu zawng thil hriat harsa a ni tawp nang. cellphone thla kha la la ke hniak thla nen khan In lama Pasena leh PC sangliana te, an chhung te thawn rawh u. An ni chuan an fapa pheikhawk bun len zawng chu an hre ngei ang a, an pa pheikhawk bun len zawng pawh an hre ngei ang. chumi a zir chuan he laia ke hniak kan hmuh hi a tu zawk ke hniak nge anih tih chu kan hre mai ang. cellphone pawh kha a tu zawk ta nge tih chu kan hre mai ang" a han ti leh a.





Rinpuia pawh chuan a pu sawi ang tak chuan In lama mi te hnenah chuan pheikhawk thla leh cellphone thlalak chu thawnin tu ta zawk nge anih? Tu pheikhawk hniak zawk nge anih chu a han zawt nghal thuai a.





Chutih lai chuan inspector leh midang te pawh chuan ke hniak chu an lo chhui ve zel a. Nimahsela, chutia ke hniak an chhui lai mek chu chhui zui harsa takin ngaw chhung chinah chiah chuan a tawp ta tlat mai. Chutah, inspector chuan a vel chu a han thlek kual thuak thuak a. Chutah, hmanhmawh fe hian chhak deuha hnim kara Hunter pheikhawk lo awm chu han hmu fuhin a phur lutuk chuan a bawh hian a han bawh nghal ruak ruak a ni ber awm e.





Pheikhawk chang a lo ni lo, thawmhnaw zai thler ni awm tak, thisen kharin a bawh luk mai hi pheikhawk bul maiah chuan a lo awm tel bawk a. Chuveleh, puan leh pheikhawk chu an thla lain Sarang chuan uluk takin a han tuam ta a, a naute zinga pakhat chu pein bag-ah chuan an dah ta a.





Chutah, Inspector vek chuan thaw han lak halh pah chuan, "imm, ke hniak kan chhui tawpna atang khuan kan tan tha leh ang" tiin chumi lam pan chuan an chhuk leh a. Inspector leh a nau te chuan ke hniak tawpna atang chuan misual chu khawiah ber nge a kal tak ang tia an mit an len ruai lai chuan Rinpuia chuan thlam atang bawk chuan a rawn au leh a.





"sir, ke hniak kha a lan dan atangin PC sangliana zawk a nih hmel. A pheikhawk bun size hi ke hniak a mi nen khan a in ang chiah chiah e. Tin, cellphone pawh hi PC sangliana cellphone a ni bawk e" a rawn ti a. chuveleh, Inspector chuan a pheikhawk chhar chu a number a han en a, ke hniaka number nen khan a lo in ang hauh lo mai a, a rilru chu a buai ru takzet.





"Heti anih si chuan PC sangliana hian a tlanchhiatna lamah a pheikhawk phelhin he laiah hian a thukru a ni thei ta hauh lo mai. Heng pheikhawk leh puana thisen kai te hi chu PC sangliana an nilo, pu Pasena zawk an ni" A ti ta a. Chuveleh, Rinpuia hnenah chuan, "Rinpui, In lama mi te kha han zawt leh la, chhungkaw pa ber Pasena pheikhawk bun number min han hrilh leh vat teh se khai" a han ti leh a. Rinpuia pawh chuan a pu sawi ang chuan In lama mi te chu a han zawt ve leh ta a.





Rinpuia chuan, "sir, pu Pasena chuan pheikhawk number 39 a bun a nih chu" a rawn ti a. Chuveleh, Inspector chu a thaw huai a. "imm, he pheikhawk hi pu Pasena pheikhawk zawk anih hi. Thisen leh puan te pawh kha pu Pasena thisen vek an ni tihna a ni" A han ti a. Chutah, Chiang zawka hnahthel ro leh vaivut inpawlh chu han bih leh in, chutah rang fe hian a tho chhuak vut a, ram ngaw lam pan chuan a bur phei leh ta nget nget mai a.





A hnung lamah chuan a nau te pawh chuan hmanhmawh tak chuan an rawn zui ve dat dat reng bawk a. Chutah, Inspector chu a ding thut a, a inher leh vut a, an kalna ngaiah chuan let lehin thlam awmna lam bawk chu an pan leh ta.





Eng khaw sawi set set lovin Inspector chuan thlam hnuai lam chu bihin chutah rang zet hian thlam ban bula hnim chu a pawng tawng hai ta chiam chiam mai a. Chuveleh, a naute pawh chuan hnim chu an lo hai pui ve nghal vat a. Chutah le, an zinga pakhat chuan hnim karah chuan suardur leh thirtiang hi a hai chhuak ta nawlh mai a. Chuveleh, Inspector chu a hrilh nghal vat a. Inspector chuan thlam hnuaia thing tlawm sei tak tak awm te chu pawn lamah chuan a han thehchhuak nghal zung zung a. chutia thing tlawm sei tak tak a han dah sawn takah chuan lei chu a lo phut deuh dup mai chu lo niin.





Chutah le, lei chu suahdur chuan a han hai nghal buan buan a. Chuveleh, thil thâng rim na tak avang chuan Inspector chu hrawk dawm vawng vawng chung hian a khuh nghal bawrh bawrh mai a. Mahse, a hmai chu a rumol chuan a han tuam vat a, Chutah lei chu a hai chhunzawm leh nghal mawlh mawlh mai. Chutah le, chutia lei suahdura a hai mawlh mawlh lai chuan mihring ban hi a hai fuh ta nawlh mai a, inspector leh a nau te chu an te ring teh asin le!















CASE:07



By, Laltanpuia



Last Chapter



Thlam hnuaia mitthi ruang an hmuhchhuah tak chu hai rual lohin Pasena a lo ni reng mai a. Inspector chuan ruang chu han en fiahin Pasena thin zawnah chuan silai muin a verhna hnu tih hriat tak hian a pawrh suam mai a, a hnung lamah chuan a tlang a ni tih hriat tak hian hnu hma a hnutchhiah bawk.





Inspector chuan a ngaihtuahna atanga harhchhuak in, "Rinpui, thlam chhungah khan silai in hmu em? a han ti leh a. Rinpuia chuan, "aih sir, silai kan hmu lo tlat mai" a lo ti thuai a. Inspector chuan, "a ni maw, chuti a nih chuan PC sangliana hian silai a kawl tihna ani a, a hnu chhui zui zel pawh hi thil hlauhawm tak a ni ve thei tlat mai. Tunah chuan PC sangliana hi mi hlauhawm tak a ni" a ti ta a.





Rinpuia chuan, "sir, PC sangliana hian a pa hi a that i tihna em ni? A lo ti a. Inspector chuan, "chu chu thil ni thei a ni tlat a ni. Thlamah hian midang awm an awm lo, amah PC sangliana ngei a ni tih chu khang hmarua kan han hmuhchhuah tak te leh a ke hniak atang tein kan chiang tawh a, he thil ti tu hi tu dang mah an ni thei lo hrim hrim, amah sangliana ngei a ni" A ti ta a.





Ruang buaipui turin ambulance an ko nghal thuai a, khaw chhung a mi te pawh thil thlen dan hrilhin Pasena chu a thih tawh thu te chu an han hrilh ve nghal thuai a. Inspector erawh PC sangliana hnu chhui tur chuan a nau te nen an inruahman mek thung.





Ram ngaw huam chhung china ke hniak tawpna atang bawk khan sangliana hnu chu an chhui leh tan ta. Hnim lo pe deuh han thin te, a khat tawka ke hniak ang tak lo bel leh deuh han thin te chu chhui zelin a tawpa tawpah chuan kham ko sang tak mai hi an va pawh ta a. khamah chuan an han dak thla vang vang a, a ko a san em avang chuan a mawng pawh chu zu hmuh chian hleih theih pawh chu a ni meuh lo.





An hrilh a hai tlang deuh nge ni, an zinga pakhat chuan, "sir, a hnu a tawpna hi enge a awmzia ni ta ang le?" a han ti a. Rinpuia pawh chuan, "ni e sir, he khamah hian a uai thla te anih ngawt loh chuan a hnu a tawpna chu a ni si a" tiin an hrilh a hai tlang hle mai a. Inspector pawh chu ngun taka inngaihtuah in thawk te chu a han la vang vang phawt a, chutah a nau te hnenah chuan, "ngawi ru, heti hian i ti ang. He ramhnuaiah hian insem darh ila, pahnih te tein kan kal hrang ang" a han ti a.





Rinpuia chuan, "mahse sir, he lai hi a hnu tawpna a ni si a" inspector chuan an vela hmun hma te chu han thlek kual thuak thuak in, "sangliana hian kan chhui zui dawn tih a hria anih hi. misual a ni tih kan hrethiam tawh tih a hria a, kan lo rin ang ngeiin tlanbo dan dap mai chu thain a hre ta a ni berin ka hria" a han ti a.





Chutah, Inspector vek chuan, "heti zawng hian min tihbuai a tum a ni ang. He lai hmun hma vel hi a vawikhat kalna a nilo tih a hriat a, an lo awmna a ni a, ramvak pawhin an kal fona a ni ngei ang. Tichuan, a hnu hma kan chhui zui theih loh nan he khamah hian a hnu hma hi a ti tawp a ni ngei ang. Tin, rin mai harsa viau mahse he mi khamah hian engtin tin emaw hrui hmangin emaw a chhukthla te pawh a ni ve thei tho bawk" A han ti a.





Rinpuia chuan, "kal ru, he lai hmun hma vel hi i han thlithlai uluk leh deuh teh ang u, khawi laiah emaw tak hi chuan hnu hma chu a hnutchhiah ngei ngei ang" a lo ti a. Inspector pawh chuan, "ni e, Rinpui, ka sawi tak ang khan pahnih theuhin kal hrang ila, hnu hma hi kan chhui zel ang. misual hnu hma nia kan ngaih kha a tawp thleng ratin kan um zui ang. Tichuan, chanchin pawh kan inhrilh pah zel bawk a nga. Chuti anih rual chuan kan fimkhur tel dawn nia, sangliana hi silai nen a ni si a"



"Awle sir" tiin hnu hma zawng chuan pahnih theuha insem darhin an kal hrang ta hlawm a.





Rinpuia leh Rammuana te chuan hnu hma thar lam tak mai hi an hmu fuh ta hlauh mai a. Inspector chu hrilh nghal thuaiin chumi hnu hma chu an um zui ta nghal a. Mi dang te pawh chuan hnu hma nia ngaih theih tur an hmuh ang ang chu bawh zuiin chet an la ve zel bawk a.





Nakin deuhah chuan Rinpuia leh Rammuana te chuan hnu an chhui zelna atang chuan puk pakhat hi an va chuangkai ta hlawl mai a. Puk chhung atang chuan meikhu hi a rawn zam chhuak chiai chiai reng a. Chuveleh, Rinpuia chuan thawm dim thei ang ber chuan hma chu a han hruai a. Rammuana hnenah chuan fimkhur tur leh misual chuan ralthuam a nei tih kha theihnghilh lo tur chuan a han chah mawlh mawlh bawk a. Chu puk chu a lo zau hle mai a, a kopang ah te chuan sava bu chu a awm fur hlawm a, vamur hi an thlawk nak nak reng hlawm a. Puk chhung lam chu an lut zel a, kopang rinchhan chuan thawm chu an dim ve viau mai.





Chutia thawm dim taka puk chhung lam an luh mek zel lai chuan a hnung lam atang chuan Muana chuan Rinpuia chu a rawn pawt chawt mai a. Rinpuia chu rang fe hian a lehhawi nghal thuai a. Chutah, muana chuan phawk fea lo melh chung chuan an ep lama lungpui phena mihring ke lo lang tat chu kawk in, "saw, saw ta saw" a han ti sa sa a. Chuveleh, Rinpuia chuan thawm dim zet chung chuan chu mihring ke lo lang awmna lam lungpui awmna chu a veh phei ta dan dan mai.





Lungpui awmna atanga puk chhung lamah chuan meikhu chu a la rawn khu chhuak chiai chiai reng a. Rinpuia chuan chu pukah chuan mi pakhat mai nilo, mi pakhat aia tam daih pawh an awm thei a ni tih hriain muana hnenah chuan zawi sap hian, "muana, puk chhung meikhu lo chhuahna lam saw lo thlithlai pah deuh ang che, mi pakhat aia tam daih pawh awm an lo awm reng thei" tiin lungpui awmna lam bawk chu a veh leh ta dan dan a.





Chutah le, lungpui awmna a va thlen phei takah chuan chu pa, lungpui nghenga tui em ema lo muhil bawrh bawrh mai chu ngun zeta han enin PC sangliana ngei anih chu a han ring thla rawk a. chutah le, a revolver-a chu pa chu tin chung chuan, "khai le, pu a, tho rawh le" a han ti a. Chuveleh, a aw hriaa rawn mengin amah silaia lo tin reng tu a han hmuh takah chuan phawk fea han thochhuak chung chuan chu pa chuan, "e khai a, ka pu tunge i nih a? A han ti a. A hrilhhhai hmelin a ngaihna a hriat loh hmel kher mai.





chutah Rinpuia chuan, "e khai, PC sangliana i ni ang maw? Hei, i hnu chhui hian kan rawn thang vang vang anih hi. I thil tih sual te avanga rawn bawh zui che hi kan ni e" tiin a thianpa chu a han au a. Rammuana pawh chu an awmna lamah chuan a rawn thleng phei thuai a, "sir, meikhu kha chu meikhu satliah mai mai a ni e, mi dang tumah an awm lo" a rawn ti nghal vat a. Rinpuia chuan silaia la tin ran reng chung chuan Muana hnenah chuan, "he pa hi PC sangliana chu a ni em? A han ti leh a. Muana chuan, "aih ni lo sir" chu pa chuan a ngaihna hriat loh hmel fe hian, "ka pu, in mi zawn a chu ka ni lo tlat mai. ka hming chu lalhruaia a ni a, he laiah lui kal paha ram vah tum ka ni a, zan riaka hun hman tum ka ni nghe nghe asin" a han ti a.





Rinpuia chuan, "chu, tunah misual police ten an zawng mek tih hi i hre lo tawp tihna a niang maw?" A han ti a. chu pa chuan, "ka pu, misual iti e law? A han ti deuh ha a. Chuveleh, Rinpuia chuan, "aw misual, tualthah hmang kan zawng mek alawm" a han ti a. chuveleh, chu pa pawh chuan, "e khai ni dawn tak, khaw thenawm lawk a mi hman ni maia thlama ruang an chhar chungchang kha a ni ang maw? A han ti a.





chutah Rinpuia pawh chuan chu pa lalhruaia inti chu khawlék khua a nilo tih a han hriat takah chuan, "imm, chu New khawlék khua i nilo a niang maw? A han ti a. chu pa pawh chuan, "aw ka nilo, lung no khua ka ni e. New khawlék khua hi khaw thenawm ni chiah lo mah se kan inhlat tam lo, kan inhre tawn ve lutuk tho a lawm" a han ti a.





Chuveleh, Rinpuia chuan, "chuti si, he lai daih daihah engvanga chutia zan riak meuha rawn thawk chhuak chu nge maw i nih reng reng le?" a han ti a. chu pa chuan, "imm ni e, ka pu he lai ram New khawlék leh an khaw thenawm inri na laiah hian lui tha deuh mai hi a awm a, tun hma pawhin riakin kan lo thang ve zauh zauh tawh thin alawm. Tun tumah mahniin ka han thangchhuak a ni a, lui sangha leh chengkawl te hi an tha a, tin ramsa te pawh hi an tam a, zan riaka han chhuah vah mai hi a remchang em a ni" a han ti leh a.





Chutia chu pa lalhruaia inti nena chu lai hmuna hun an hman dan leh hun an hman chhan te an han inhrilh fiah tak hnu chuan Rinpuia leh muana te pawh chuan lalhruaia chu an kal san ve leh mai a. lalhruaia tak pawh chuan police te kalliam tur chu a en zui duh viau ta nghe nghe a. misual zawnga chu lai ram palai lenga police te meuh chutia an han thangchhuak ta rum rum mai chu mak a tiin a thawng ve hle a ni. Lalhruaia ngei pawh chuan misual chinchang a lo hria anih hlauh chuan police te hnena thlen vat tur chuan Rinpuia te pawh chuan an chah ta nghe nghe a.





Zan hun a ni mai tawh dawn a, PC sangliana chin engmah an hriat theih tak lohah chuan police te pawh chuan an hmun lam chu an pan leh ta ngawt mai a. A fapa chinchang ngaihven tura thangchhuak ta amah an va hmuha rapthlak taka thlam hnuaia a ruang an lo phum sak tak Pasena pawh chu a ruang postmortem a ni a. chutia an pa ber pawh thia an han hmuh leh tak maiah chuan ngaihdan hrang hrang a piangchhuak tam leh na ngiang mai reng a ni.





Tichuan le, inspector Remruata chuan hmun hrang hrangah PC sangliana chu a thlalak leh a hming, tualthattu nia rinhlelh anih chungchang te, amah lo hmu emaw a chin hria chuan police lamah thlen nghal vat tur chuan thu chhuah a siam tir leh ta a. Thingtlang khaw thenawm dang te pawh chuan an thlamah a ni emaw, an khaw chhungah pawh ni se, thil bo emaw, sulhnu leh hnu hma thar lam, tu tih nge anih an hriat si loh thil thleng a awm anih chuan a ranga ranga police lam hriattir vat tur leh PC sangliana ngei pawh chu silai nen anih avanga fimkhur thu hlaa mahni emaw a ramhnuaiah pawh kal mai mai lo tur chuan thuchhuah a siam tir a.





Inspector ngaihdanah chuan ni hnih khat vel emaw chu han inrial leh deuh se misual chu ril tam avang leh engemaw tak a mamawh avanga khaw chhung emaw ram a mi thlamah emaw chet a lak ngei chu a ring tlat a ni. Chutia ramhnuai hmun pa lai lenga biru bo reng thei tur chuan a ring lo a ni. Chuti anih rual chuan New khawlék khuaah chuan police duty an awm ta réng bawk a, khaw dai leh a chhehvel chu police te chuan an dap reng bawk a ni. Misual ber a chu han reh vang vang mahse a rawn inlan hun a awm ngei dawnin an hre tlat a.





Chawlh kar khat dawn mai chutia PC sangliana a han reh tak vang vang hnu chuan New khawlék khaw thenawm chalfilh atang chuan police te chuan thu thar an hre thei ta hlauh mai a, PC sangliana ni ngei tur chu an khuaah a ruk a rala lo lutin veng sira pu lalduhzuala te In-ah chuan a neitu te awm bo hlanin a lo lut ni awm tak a ni. An tukverh kawngka chu ti chhiain an pawisa dahna bawm pawh a lo ti chhia a, pawisa fai cheng sing sarih chu lain buhfai a la bawk a, tin an bungbel chu chaw eina hnu tih hriat tak hian a lo hnawk viau mai bawk.





Chuti anih rual chuan amah PC sangliana ber chu a lo bi bo leh hman tawh a, an theih ang tawka khaw mipui ten an chhui zui hnu chuan thlam pakhatah hian amah PC sangliana chu a lo muhil lai an va man ta a lo ni a. Mahsela, mipui thinurin kutthlak zui mai an tumna lamah chuan engtin tin emaw a talchhuak thei hlauh mai a, an um zui chiam hnu chuan a hnu chu an hlauh palh hlauh mai a, mipui te rindanin an mahni khua New khawlék khaw lam panin a tlanchhia anih chu a hnu hma atanga a landanah an ring a ni.





Tichuan le, police lam pawh chuan chu chu bawhzui nghal vatin Inspector Remruata leh a nau te chuan new khawlék khua chu an pan leh ta a. vanneihthlak takin kalkawngah chuan PC sangliana ni ngei tur chu an tawk ta hlawl mai a. A ni chu a hmaa khaw mawng lama huan pakhata thlam awmna hmuna Ruatsanga a thahna hmun panna kawngah bawk khan a lo awm a. A hmel a bawr chhawrin a hmui hmul a buk hle a, a thawmhnaw hak te chu a pawr em em mai a, amah lah chu a balin a lu chu a hnim hle bawk.





Police motor a lo hmuh ve leh chuan a lo phar ding a, a awmdan leh a hmelah a hlauthawng a ni tih hai rual loh chuan thil tisual tu anih thu leh Ruatsanga leh a pa Pasena te chu a thah thu police te chu a lo hrilh ta a, amah leh amah chu a lo inpe ta a ni. Mipui thinurin an chil hlum mai loh nan a sahimna zawngin police kuta inpe anih thu te chu a lo hrilh ta a.





Police te pawh chuan PC sangliana an man tawh thu leh tan In lam pana an hruai nghal thu chu New khawlék khua mi te hnenah chuan an hrilh ve nghal thuai a.





Inspector chuan PC sangliana chu heti hian thu a han zawtfiah a, "Ruatsanga i thah dan kha han Sawi teh" PC sangliana chuan, "ka pu, Ruatsanga khan ka hun kal zel tura ka tana thil pawi tak a tih hreh loh thu min hrilh avanga ka invenna a ni. A ni chuan kei kha ka chungah a chhe ber pawh a ti duh dawn a ni tih min hrilh a, chuvanga khatia chet la hmasa ta kha ka ni.





"Khatia zu inna hmun atanga ka chhuahsan tak hnu khan amah ka thah dan tur chu ka ruahman ta nghal a. ka phone hmangin ka ko chhuak a, tichuan thlamah khan zu ka neih thu leh ka zu chu a duh anih chuan ka pek tur thu ka hrilh a. kan inhmuh thiam lohna te chu theihnghilha inremsiampui ka tum thu te, a lakah chuan ngaihdam dil tur ka nih thu te leh ka ngaihdam dilna chu min pawm sak tura ka ngen thu te ka hrilh a ni. Mahse, Ruatsanga khan ka thusawi leh ka sawmna te kha a lo ngaipawimawh tha duh hauh lo mai a, mahse kei chuan tum hnih tum thum lai mai khatia ngaihdam ka dil tak tlut tlut rengah kha chuan a ni pawh chuan 'a tha alawm' tiin zu min inpui tur chuan thlamah khan a lo kal ta a ni.





"Tichuan, kei min rawn hmuh khan kei khan hmel zangkhai thei ang ber leh nelawm thei ang berin ka lo dawngsawng nghal thuai a, tichuan zu chu ka pe a, zu hi a duh ve hle a, zu a in theihna tur anih phawt chuan tih hreh kha a nei tam lo khawp reng a, kha kha remchanga hmang ta pawh ka ni a. Tichuan, kei chuan kan rui deuh ta maw tihah khan ka chem sei ken hmang khan Ruatsanga kha a dulah ka vit ta siah mai a ni.





"Rei vak lo a chalchang a, a hnuk a chah fel thlengin ka awm ve a. Tichuan, kei chu ka hamhaih luatah leh ka hlauhthawn ve deuh avangin ka chem pawh chu ka lo theihnghilh daih mai a, tichuan hmanhmawh takin ramhnuai lam ka pan ta ngawt mai a, engemaw chen chu ramhnuaiah khan inngaihtuah nan leh ruahmanna siam nan hun ka hmang a ni.





"Tlai lam chaw ei hun te anih tawh avang leh zan anih chhoh tawh mai dawn avang khan kei pawh chuan In lam ka pan ta a. mahse, ka lo rin lawk loh leh ka lo beisei aia hmain Ruatsanga chhung te khan an fapa thih thu leh thlama a awmna kha an lo hrechhuak hma ta tlat mai a, kei chu ka mangang ta deuh a, ka ruahmanna ang tak pawh chuan chet ka la thei ta lo a ni.





"Tichuan, a tlachawp tak meuh meuh min In ah chuan ka haw vat a, Tichuan, ka insiam sawk sawk a, ka chhungte hnenah chuan ram ka riah tur thu ka hrilh a ka inpu chhuak ta a. Kalkawngah khan police ho pawh kha ka tawk che u a ni. Tichuan, ramah chuan ka hun tam zawk chu hman a tul dawn a ni tih a hnu maia phone call tam tak avang khan ka hrethiam ta a, kei kha min ringhlel a ni tih ka hai hauh lo. Chuti maia police kuta inpek kha ka duh silo a.





Inspector chuan, "anih leh, i pa Pasena i thah dan ve thung kha le?" a lo ti a. Sangliana chuan, "ka pu, a ni kha zawng tihpalh thil liau liau a ni e. khatia ka tlanbo tak hnu khan ka chhung te hnena ka riah tur thu ka lo hrilh kher kher kha ka inchhir leh hnuhnawh hle mai a. zanah khan mi engemaw zat chuan ka riahna hmunah chuan kei kha ka chin ngaihven khan an rawn kal anih kha. kha pawh kha ka hrereng, mahse ka biru tlat a, an ni chu tihngaihna an hriat tak lohah chuan an haw leh mai a.





"Tichuan, a tukah khan ka pa a ni tih ka hre hauh lo. ka chauh ve em avangin ka lo muhil tui hle mai a, ka thawm hriat avang chuan ka harh zawk a, pawn lama luh ka ri thet thet ka han hriat khan ka rilruah min man tur an ni ang tiin ka silai chu inven nan ka chuh nghal thuai a, tichuan bang phenah ka lo chang ta a ni.







"Mahse, a chet danah mi pakhat chiah anih ka ring ta a, chuti anih chuan thah ve leh mai kha ka duh ta a ni. Tichuan le, ka pa chu thlam chhungah chuan luh tumin kawngkhar chu a rawn pawt ta a, a chhung lamah ka kalh tlat si a, a hawng mai thei lo. kei chuan tunge anih tih leh kal bo mai turin ka lo hrilh a, a rawn lut lui anih chuan thah pawh ka hreh loh thu ka lo hrilh a ni.





"Mahse ka pa khan ka thusawi ngaipawimawh duh loin kawngkhar chu a rawn pawt hawng ta nge nge a, chuveleh kei chuan ka tum reng vang ni lovin ka mangan em avang leh ka hlauhthawn em avang chuan ka silai chu ka lo hmet per palh ta mai a ni. Ka han belchiang a, ka pa a lo ni reng mai a. ka pu, ka pa ka that tih ka hriat khan ka rilru leh ka chhungril zawng zawng kha natna leh inthiamlohna, lungchhiatna in a khat tak meuh meuh asin. Tichuan, ka pa chu thlam hnuaiah khan ka phum ta a ni"





Inspector chuan, "tichuan, keini lam kan rawn lang ve leh ta a, khami tum khan nangmah kha ilo la awm a ni ti raw? Engvanga i pa ber pawh chu i thah leh takah chuan tlan bo ta mai lo nge i nih? Kha laiah khan engvanga la tangkhang reng nge i nih?





"Ka pu, ka rilru kha a insual nasa hle asin. ka awm zel dan turah thutlukna ka siam thiam mai bik lo a ni. Tlanbona tur dap mah ila ramhnuai lo chu ka tan hmun him a awm chuangin ka ring lo a ni. Khatia nangni inrawn lan leh takah kha chuan khami tum kha chu ka lo inring lawk ve viau tawh a, mahse ka thingpui in lai khera inlo thlen avang khan ka hmanhmawh luatah ka che buai viau tho mai.





"Thlam namthlakah khan ka zuang thla a, ka silai ka keng a, a bak chu engmah ka chuh hman lo. Tichuan, ramhnuai lam bawk pan chuan ka kal zel a, ngaw chhung chinah kha chuan min rawn hmuh mai kha ka ring tawh bik lo a ni"





"Imm, i thianpa leh i pa i that a, i chung thu hi court-ah thlen a ni ang a, i chungthu chu court thutlukna a zirin kan la hria ang" tiin Inspector chuan PC sangliana chu a chhuahsan ta a.





Tualthattu PC sangliana chu court hmaa hruai a ni ta a. Judge chuan thu lo zawt in, PC sangliana chu tualthattu a ni ngei em tih a lo zawt a. PC sangliana chuan Ruatsanga chu a vih chu a vih ngei thu sawiin Ruatsanga chuan amah chu bei hmasain thutthlenga a dara a vuak thu leh amah inven nana a lo vih thu a sawi thung a. Tichuan, court chuan PC sangliana chu tualthattu a ni ngei em tih hre turin thu hretu koh a remti ta a. Police lam atang chuan thu hretu pakhatna lo dingin ASI Rimawia a ni a.





ASI Rimawia chuan a duty laia New khawlék khua vc secretary hnen atanga information a dawn thu leh New khawlék khua an pan nghal thu sawiin kawng lakah chuan PC sangliana ni ngei tur chu an tawh thu te a sawi a. Tichuan, mitthi ruang te en dikin mitthi nak vei lamah hliam a awm thu te, thawmhnaw a thisen kai leh chemtê te chu an lak tel thu sawiin tichuan ASi Rimawia hian FIR siamin saitual police station-ah OC hnenah case hi a hlan ta a ni.





Thu hretu pahnihna PC sangliana ten zu an inna In neitu chalziki a ni a. PC sangliana leh Ruatsanga te pawhin zu an in thu leh an inhnial thinrim chiam thu te, an tawngkam atang pawh chuan tih hreh an neih loh dun thu te chu a sawi ve leh bawk a.





Thu hretu pathumna chu forensic science laboratory lam mi a ni a. A ni pawh chuan mitthi thawhnaw a thisen kai leh chemtê an en fiah chungchang chu a sawi ve leh bawk a.





Thu hretu pa lina chu Doctor Hmingmawii niin saitual damdawi Ina thawk mek a ni a. A ni hi postmortem examination ti tu a ni a, a sawi danin mitthi hi a nak vei lama vih niin hnu hma inchi hnih vela lian a awm a, a hnungah tlangin inchi khat vela lian hnuhma a awm bawk a, a chuap hi a chhia a, chumi avanga thi niin a sawi ve leh bawk a.





Thu hretu hnuhnung ber koh a ni ve leh a. Inspector Remruata niin a ni chuan investigation an tih dan zawng zawng te, PC sangliana ngei pawhin tualthahtua a inpawm thu te, ama tih ngei anih thu te a rawn sawi ve leh ta bawk a.





Tichuan, police lam thu hretu te chu koh zawh an ni ta a, court chuan pawikhawitu lama puh PC sangliana te lam atang chuan thu hretu koh a remti ve leh ta a.





Thu hretu pakhatna lo dingin Liandinga a ni a, a ni hian pawikhawih tua puh PC sangliana hi a mi hriatchian tak niin tun hma pawha Ruatsanga te nen zu pawh an in ho thin thu te sawiin amaherawhchu a ni hi chuan thil thlen dan tak chu engmah a hriatchian loh thu leh ngaihruatna leh zeldin baka han tin zawn dan tur pawh a hriat loh thu te a sawi bawk a.





Thu hretu pahnihna koh a ni ve leh a, a ni pawh chuan Liandinga sawi ang deuhin he thil thlen dan tak hi han ngaihruata han zeldin viau dan tur pawh a hriatthiam loh thu a sawi ve leh bawk a. Amaherawhchu, tun hma pawha PC sangliana leh Ruatsanga te chu an lo intihbuai thin thu te, tumkhat phei chu an intibuai thelhtu a a tan thu te a sawi ve bawk.





Thu hretu dang koh leh niin an ni erawh hi chuan thil pawimawh han sawi em em tur an nei lo thung a, court chuan an thu sawi te chu han rintlak em em a hmu lo a ni.





Tichuan thu hretu awm ang ang koh zawh an ni ta a, court chuan PC sangliana chu a thiam thu sawina hun a han pe ve leh a. PC sangliana pawh chuan Ruatsanga nen an inkar te chu sawiin Ruatsanga chuan a beih hmasak thu leh thutthlenga a dara a vuak hmasak thu te chu a han sawi ve leh bawk a.





Tichuan, court chuan leh lam leh lam ukil te chu an thu theh luh duh te theh lut tur chuan a han sawm a. sawrkar ukil chuan thu hretu te sawi tak dan ang leh amah ngeiin a sawi tak dan ang khan tualthattu PC sangliana chu a na thei ang berin a chung thu rel turin a ngen a. leh lam ukil ve thung chuan PC sangliana chuan a tum lawk reng ni lova a mah a invenna avanga tualthat anih avangin court chuan 302 ipc ni lova 304 ipc zawka hrem turin a ngen ve thung a.





Tichuan, Case chu a hmawr bawk a ni dawn ta. Court chuan thu hretu leh lam leh lam thusawi dan te, sawrkar ukil thu theh luh te, PC sangliana ukil thu theh luh te chu uluk tak chuan a han ngaihtuah a. Dan bu te keu in, tin supreme court leh high court-ah hetiang thil hi engtin nge an lo ngaihtuah thin tih te uluk takin a han zir kual ta a, tichuan thutlukna chu a siam ta a ni.





Pc sangliana chuan tual a thah avang chuan 302 ipc hmanga dam chhung lung In tang turin a chung thu chu rel a ni ta a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)