James Bond - Thunderball Bung - 4

Hnuchhuina lampang chi ho
Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

James Bond - Thunderball Bung - 4

Unread post by Ruata Ralte » November 22nd, 2019, 10:21 pm

JAMES BOND
THUNDERBOLT-4

Retyped : Ruata Ralte

TEA AND ANIMOSITY

Taksa hian thluak anga a thiltawn a hrereng lo chu thil vamneihthlak tak a ni. Bond pawh chuan a taksa chu dimdawi deuh hian a han dap a, a taksa nâ tam tak a lo reh tawh pawh chu mak a ti rilru hle mai. Mahse a hnungzang ruh erawh chu tuboh va chhut hrep ang mai hian a na ngut ngut mai thung.

A bul mai a mi pahnihte chu zawite te hian an inbia a, mipa aw chuan, "Engtinnge thil diklo a awm ni a I hriattheih reng reng le, Miss Fearing?" a han ti a.

"Khawl ri kha a ni ber mai. Mi pakhat ka buaipui zo chiah a, a hnu deuh mai ah khawl ri chu ka hre ta a. Chutiang anga ringin ka la hre ngailo reng reng. Kawngkhar inhawngin ka hnutchhiah emaw ka ti a, ngaihthatlohna em em pawh nei lovin ka va phei a. Mahse rinloh takin khawl sana khan 200 alo kâwk daih mai a. Ka tihniam vat a, a hrenbehna ka phelh a. Inzaina atangin CORAMINE ka va la vat a, One CC a thisen zamah ka chiulut nghal a. A marphu pawh a lo muang hman hle a, tichuan ka rawn phone ta vat che a no e,"

"Thil tihtheih chin zawng zawng chu I ti vek anih chu, Miss Fearing. He thil thleng rapthlak takah hian mawh I phur miah lovang tih ka ring back,"

Mr. Wain-a aw chuan, "A vanduaithlak khawp mai. Khawl thununna kha amah hian a vaipalh anih ka ring. A awmdan finfiah a tum ang a, a chesual a ni ngei ang. Mahni a intihlum thelh alawm mawle. Khawl siamtu company hriattir la, invenna tha deuh zawk siam vat sela a tha ang," a han tihzawm leh a.

An thusawi ngaithla reng chung chuan Bond chu a muhil leh ta a.

A rawn harhchhuah chuan bawkkhup zawng hian a lo awm a. Electric blanket a bawh a, a hnungah chuan electric khawnvar lum chi pahnih hian an lo hem lum a lo ni a. Kut pahnih hian hnehsawh deuh mai hian a kaiza atanga a nghawng thleng hian a lo hrawm kual vel nawk nawk mai bawk a.

Amah khawihtu nula chuan, "I vun awmdanah I rawn harh tawh niin ka hria a, enge I an le?" a rawn ti ta a.

"A nuam khawp mai. Whisky dawm tur awm phei se chuan duhthusam a ni ang,"

Nula chu a nui hawk a, "Mr. Wain chuan dandelion thingpui in la thain a hria a; mahse I taksa tiharhtu tur chu I mamawh a ni. Mahse tun tum bak hi ka pe lovang che. Brandy pawh ka rawn keng sa vek alawm. Lo nghak lawk rawh. I mutkawr hian ka rawn khuh che anga, i zangthal dawn nia. Chutilo chu I zak palh ange," a ti a.

Bond pawh chu muangchangin a han inher a, a hnung nâ pawh chu ziaawm viau tawhin a inhria a. Tur deuh ur ut tu chu ala awm nâ a, khumtlangah chuan a thuchhuak ta tho va.

Khum bulah chuan kawrfual var hain Patricia Fearing-i chu alo ding a. A kut lehlamin kutkawr a bun a, a kut lehlam no a a zu thlitsa chu Bond chu a lo pe vat a. Bond chuan tui ti deuh mai hian a lemzo nghal duak mai a. No ruak lekchhuah leh pah chuan a dang a han lam leh nghal zat a.

Nula chu a nui tlawrh tlawrh a. Bond-a no chu ala a, "Awle, no khat chiah chu ka pe leh ang che. Mahse a bak chu beisei duh tawh suh. I pum a ruak si a, I zo lovang," a ti bawrh bawrh a. A hma aia titak mitmeng leh thupui fun zawk hian, "Awle, tunah chuan thil awmdan min hrilh tawh teh. Khawl thununna kha I khawihpalh em ni? Min timangang teh a nia. Khatiang thil kha ala thleng ngai lo. Traction table kha a him hle nia," a ti ta a.

"Ni e, nuam deuh zawkin awm ka tum a, ka han inherna velah khan thil engemaw chu ka knawihfuh ngei chuan ka hria. A hnu kha chuan engmah ka hrezui miah lo. I lo thleng vat kha ka vannei ngawt chuan ka hria,"

Nula chuan, "Tunah chuan engkim a fel tawh e. Engmah sil-awn hlen phahna tur a awmlo hlauh va, I vannei khawp mai. Ni hnih khat kan inenkawl leh chuan I tha vang mai ang," a lo ti a. No chu a thli leh a, Bond chu ava pe leh a. Amah vék chuan, "Ohh, he thil hi Mr. Wain chuan midang hriatah a duhlo khawp mai. Midang rilru nuam lova siam a hlau khawp mai," a han tihzawm leh a.

Bond chuan, "Ni tehreng mai, engmah ka sawi lovang. Keima thiamloh anih hmel viau lehnghal a," a lo ti a. No chu a pe let a, mut that pah chuan, "A tui kher mai. Min zut leh tawh ta che. Taka, min nei mai ta che. Ka hmeichhe tawnah chuan nang chauh hi mipa enkawl dan hre tak I ni e," a han tihzawm leh a.

Nula chu a nui hawk a, "Â lutuk teh suh. Bawkkhup rawh le, I hnunglam kha enkawl a ngai a nia," a ti a.

"Engtinnge I hriat a?"

*************

Ni hnih a han ral leh chuan chulai hmuna inenkawlna bakah ei leh in chu Bond chuan a kham khat hle tawh a. Tunhma a alo in peih ngailoh leh ngaihsan miahloh thingpui thlum takngial pawhin a tiharh sawng sawng hian a hre thin a. No thum zet a zawna a han in phei chuan zu awmnem in nen a danglam lutuk lovin a hre hial a ni. An inenkawlna bulhnai a dawr leh hmun te pawh chu a hrebel viau tawh bawk.

Mahse mak deuh maiin chutiang anga taksa zangkhai leh hawi harh taka a awm chu ala hre ngailo reng reng a. A hma aia chak thúrin in hrelo mah se zang vah hian a inhria a. A mithmuh leh beng hriatna bakah a hnar pawh chu a hma ai daiha fing tawh zawkin a inhria a ni.

Mahse thil pathum, a rilru kaptu leh châk em em a la nei cheu mai. Chungte chu Balognese chaw, purunvar tam tawk nena pawlh leh Chianti zu, man tlawm ru tak mai bakah Patricia-i taksa mam leh nalh tak mai te chuan a rilru an kal hlatsan thei dér lo. Hei mai bakah hian engtin nge Count Lippe chungah chuan phuba a lak ang tih chu a ngaihtuah nasa hle bawk a ni.

Bond chuan fing takin Patricia chu a kawmchho tan ta a. SHRUBLAND a an khawsak dan bakah ama chanchinte a zawt a. Chumi karah chuan Count Lippe-a chanchin chu dilchhut ru takin a zawt pah ta a. Chutiang chuan a ruk tein a chetdan tur kawng chu a ruahman chho ta a.

Shrubland-ah ngei hianCount Lippe-a chunga a chet veloh chuan chetna tur hun leh hmun remchang a awm tawh dawnlo tih pawh a hria a ni. Helai hmunah pawh hian Count Lippe-a chu an enkawl hma chuan ama pindanah an khung râwt a. Chawhnu lamah lah a Bentley car chuan Beaumemoth ah tihtur neia insawiin a tlanchhuak daih zel bawk si a. Zan dar 11:00pm velah a lo haw chauh zel a.

Tlaikhat chu Count vahchhuah hlanin Bond chuan a kawngkhar chu hawngin a lut ru ta a.

Pindan chhung chu uluk takin a enkual a, mahse rinhlelh tur leh thil danglam engmah hmuh a nei lo. Mahse count thawmhnaw, ram hrang hranga a lei atang chuan a vakzau hle tih erawh a hriattheih a. Bond chuan chung thawmhnaw manto tak tak chu zaithler vek mai tur em ni ang a ti rilru rauh rauh va. Mahse kawng danga phuba lak zawk tha in a hre ta a.

Chumi ni chawhnu chuan Count Lippe-a chanchin a hriat ang ang chu uluk takin a ngaihtuah a. A khawsak danah a harsa tehchiamlo nia a lan avangin eng nge a tih thin le? Count khan Bond-in a chanchin hi a zawtkual tih a hriat ringawt pawhin khatiang khan rothap takin a che duh kha a ni a. Kha kha enge a chhan ni ang. Bond kha tihhlum pawh a hreh hauhlo tihna a ni a. Enge thup tur a neih le? Eng thuruk nge awm? Khatiang taka a che duh kha chu thuruk a lo awm anih hlauh chuan a pawimawhin a liantham hle ang tih chu a chiang hle a ni.

Bond chuan Count nena an inkar thubuai chu HQ lam hrilh a tum hran lo. Shrubland boruak nen chuan engemaw chenah thil awm ang lo lutuk mai a ni a. An thil ei leh in chuan tunhma ai zawngin taksa a tizawi lehnghal a. Count Lippe-in a rawn sawisak dan ngaihtuah chuan a zahthlak deuh hlek bawk nen, amah ngeiin thungrulh a tum ve tlat mai a ni. Chumi hnuah chuan a phurdan a zirin Count chanchin chu SIS emaw CIN emaw la chhuizui tir leh a tum ta zawk a. Tunah hi chuan ngawi renga phuba lakdan tur kawng dap chu tha berin a hria a ni.

Chulai hmuna a awm hun tur ni 14-na a thlen chuan chet ve dan tur mumal takin a duangfel diam tawh a ni.

Zing dar 10-ah a tawpna atana Bond-a chu endik leh turin Joshua Wain chuan a lo dawngsawng a. A BP chu 132/84 ah a tlahniam a, a rihna pawh pound 10-in a hniam bawk a. A mit pawh a fiahtha tawk tawh hle a ni. An incheck fel a tihtur dangte an zawh hnu chuan Bond chu a tawp berna atana in enkawl leh turin a chhukthla leh ta a.

Inhnuai chu nidang ang bawka rehin, a rim pawh a thâng deuh nghual hian a hriat a. Pindan peng hrang hrangah chuan chulai hmuna an enkawlte leh a buaipuitute thawm chu a hriat theih a. Bang sang laiah chuan ventilation khawl hi a rúm vut vut bawk a.

Dar 12 a ri dawn ta. Bond chu in-malis na dawhkanah chuan a bawk a, reilo te ah chuan a mihring chân lokal thawm chu a hre ta a. Corridor tawp ber a kawngkhar chu a inhawng a, Count chuan, "Chibai, Beresford. I inpeih tawh maw? Sa deuh takin aw. A hnuhnung ber tur a ni tawh a, Ounces 3 vel tala ka zân belh a ngai a nia," a ti a.

"Ni e, ka Pu,"

An pahnih chuan an rawn phei a, Bond a mutna bul mai Turkish Bath pindanah chuan an inzui lutin an in-malis leh ta a.

Reilote hnu ah chuan a buaipuitupa chu alo chhuak leh thuai a. Chumi hnu ah chuan Bond pawh chu a tho va, amah buaipuitu chu lawmthu hrilhin inhrukpuan a veng a, corridor ah chuan a chhuak phei ta a. Chumi hun lai tak chu chulai hmuna thawkte chawei a an chawlhlai a ni a, an mi buaipuite chu an lo chhuahsan ve mek hlawm a.

An chhuakfel ta maw tihah chuan Turkish Bath pindan kawngkhar chu Bond chuan a han hawng de de a. A lo awm ve tawhna anih avangin a pindan awmdan chu chiang takin a hresa vek tho a ni.

Pindan dang ang tho va siam niin, kil khatah chuan inbualna 5fts. laia sang, thir leh thelreta siam feet 4 a hlai chu a inhung a. A chunglam tihloh chu hawntheih lohva siam a ni a, chu bawm chu a hma lama mihring luhna leh thutna neia siam niin, a chunglamah chuan a chhinna, lu chauh lang tura verhkuak hi a ni. A chhunga thu chu bawm chhunga electric bulb engemawzat awm chuan thlan tla bawrh bawrhin a tilum thin a, a lumdan pawh a bawm pawnlam hnung lamah chuan duh ang anga lo adjust-na hi a awm vek a. He inbualna bawm hi MEDIKALISCHER MASCHINEGAU GM-b.H.44 FRANZISKANERSTRASSE, ULM, BAVARIA a siam a ni nghe nghe.

Bawm chu bang lam hawia hun a ni a, kawngkhar han inhawng ri-ah chuan lehlam hawia thu Count chuan, "Berresford, hawng vat teh. Chhuah ka duh a nia. Vawk ang maiin ka thlan nasa tawh a nia," a lo ti a.

Bond chuan Berresford-a aw ang thei ber turin, "Awle, ka pu. Sa deuhva I tih vang a nia," a lo ti a.

"Min hnialbuai khanglang teh suh. Min chhuah vat la a ni mai,"

Bond chuan, "H- Cure lumna hi taksa tana a pawimawhzia I hrelo anih kha. Ka pu, sâ hian thisen zama tur tam tak a tiral a, tihrawla túr leh hri pawh a tiral thei hial asin. Sa deuhva tih hi a tha ber a nia," a han ti leh a.

"Chutiang sawi duah suh. Min chhuah vat mai teh ka tih chu,"

Bond chuan bawm hnunga sana chu ngun deuh hian a han en a, sana ban chuan 120 a kawk mek a. Sana ah chuan degree 200 thleng a inziak a. Chutiang thleng thlenga a herh chuan a thihphah mai ang tihte pawh a hlauhawm a; inhrem tur chauh an ni si. Degree 180 chu a chunga a thiltih thungrulhna tawk vel niin Bond chuan a hria a. Sana chu 180 kawk tur tawk chuan a herh ta a.

"Ka pu, darkar chanve vel sa deuh taka inhem chu I hlawkpui ngei ka ring a ni," a han ti leh a. Ama aw pangngaiin a tawng tawh a, fiak deuh thak hian, "I kang palh ta anih leh min khing mai dawn nia," a han tizui a.

Count Lippe chu chal a thlan far zawih zawih hian inher a han tum a, inher ngaihna a awm hlawl si lo. Mangang deuh hian, "Pound 1000 ka pe ang chia, inhrethiam tawn ang hmiang," a han ti a. A aw-ah chuan huatna leh thinurna chu thup tum hle mah se a hriatthiam theih tho mai. Kawngkhar inhawng ri hriat chuan, "Anih pound 10000? Pound 50000 lai pawh," hmanhmawh deuh hian a han tizui leh a.

Bond chu corridor ah a chhuak a, kawngkhar chu a khar zui ta nghal a. Ama thiamhnaw a inbel lai chuan Count Lippe-a tanpuitu au thawm vel chu ring vaklo hian a hrethei a. Count chuan kâng tenau deuh pawh lo tuar mah se damdawi inah kar 2/1 bak a awm a ngai chuangin a ringlo a ni. Na tuar hreh vanga Pound 50000 lai pawh chawi hrehlo chuan hun thawl leh zalen a mamawh hle ang tih pawh a hrethiam nghal vek a ni.

*****************

James Bond-a ngaihtuahna leh thil chhut chuan dikna thui tak a nei ta reng a ni. Hetianga mi nasa tak ve ve, Sussex-a Nature Clinic a an inbeihna hian khawthlang ram khawvel sawinghing hial thei thil thleng tur chu thui tak a tidanglam ve hial a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)