James Bond - Thunderball Bung - 21

[Ruata Ralte]

21. VERY SOFTLY, VERY SLOWLY

Disco lawng chu torpedo ang maia chak leh ding hian tuipui mam tha tak chungah chuan a tlan pur pur mai a. Pindan lunber chhungah chuan lawng khawlri bak chu hriat tur a awm lo. Tukverh zawng zawng chu kharphui vek a ni a, pindan chhunga eng awmchhun chu navigation light pakhat inkhai chu a ni mai awm e.

Chu eng sen deuh rem rum chuan dawhkan sei tak kiltu mi 20 zette hmel chu a fihalo ruai hian a en phut hlawm a. Lawng kal chuan tlema a nghawng deuh avangin an sawi deuh hluau hluau hlawm a. An awmdan leh eng awmchhun bakah chuan an boruak atang chuan thil tha tak rel tum hi chu an ang mawlhlo a ni.

Dawhkan hmawr tawpa thu Largo chu pnidan air-condition a awm ni mahse a thlan zawih zawih mai a. A chhan leh vang chu aw tham leh chhang deuh mai hian tihian a sawichhuak ta a.

"Kan dinhmun hi a thalo hle tih ka sawiduh a ni. Darkar chanve vel kalta khan no 17 hian lawng bathlarah Miss Vitalli ava tawng nawlh mai a. Vitali chuan camera alo buaipui mek a, a bula no 17 ava thlen chuan a hmai pawh hawng lovin PAlmyra lam thla chu la niawm takin a han hmetchhin a. Hei hian No17 rinhlehna a kaiharh ta tlat mai a. Min rawn hrilh vat a, kei chuan a pindanah ka hruaithla a. Tan a khawh viau mai a, a awmdan hrim hrim pawh chuan ka ngaih a titha ta lo va, dimlo deuh taka ka chinzui a ngaihphah ta nghe nghe a. A camera chu chhuhsakin ka han endik a, a lem alo ni reng mai a. A chhungah chuan Geiger Counter a lo awm a, a sana ah chuan 500 milliroentgents aia sang mah alo inkawk va mai a. Vitali chu ka tiharh a, ka han dawp a. Mahse engmah a sawi duhlo. Nakinah tawng ngei turin ka la dawp leh anga, chu chu a thihna tur a ni ang. Chhuah a hun tak avangin a khumah ka phuarhlawm a, chu thil sawikhawm tur chuan meeting hi ka rawn ko ta a ni. Tin, No2 pawh he thil hi ka hrilh vek tawh a ni,"

An ngawi thap a, thenkhat chu thinur deuh hian an han rum ngal ngal bawk a. German mi N014 chuan thinur inseh ruh teuh hian, "Tichuan engtin nge No2 chuan alo chhan che, Mister?" a han ti a.

"Kan hmachhawp ang zela kal turin min ti a ni. Khawvel pumah hian Geiger Counter nen min zawng tih kan hre tur a ni. Secret Service ten min veh mek a, Nassau-a mi thenkhat, Police ho an ni mahna, chungho chuan lawng zawng zawng ah radiation awm leh awmloh en turin mi an pun a ni pek ang. Anih loh pawhin Miss Vitali hi sumin an thlem lungawi a ni ang. No2 chuan ralthuam chu a awmna tura kan dah hnuah chuan hlauhawm a awm tawhloh tur thu min rawn hrilh a ni. Kan Radio Operator chuan Nassau leh hmun danga inbiakna danglam deuh man tumin a bei mek a ni. Tunah hi chuan inbiakna ala pangngai reng a. Min ringhlel chu ni se Nassau-a inbiakna chu London leh Washington vel atangin min rawn chimbuai hle tawhin a rinawm a ni. Mahse tunah chuan radio-a thuthawn chu ala pangngai rih a, chuvangin kan thiltum chu ruahmanlawk ang zela kalpui a la ni ang. Tuipui thuk kan thlen hunah bomb tuamna suan chu kan paih anga, chu chu Miss Vitali kuang tur a ni nghal ang," a ti ta a.

Luhlul deuh hian No14 chuan, "Mahse i thah hmain he nu hnen atang hian thudik i hrechhuak thei tho ang chu maw? Amah avangin rinhleh kaiin kan awm ang tih a hlauhawm a ni," a lo ti leh hram a.

Zoram Online Store ah hian lo bazar ve ta che.
https://www.myshopprime.com/ruata.ralte

"He meeting hi zawh anih veleh indawpna chu tan lehnghal a ni ang. Ka ngaihdan chuan nimin lama rawn leng Bond leh Larkin kha an inhnamhnawih ve ka ring tlat mai. Secret Agent an ni lovang tih pawh a sawi theihloh. Larkin tia kan hriat zzawk khan camera a keng a, ka lo enchiang vak lo va. Mahse Miss Vitali ken nen hian a inang riauvin ka hre hnuhnawh leh a ni. Kha mite pahnih laka ka lo fimkhur tawklo kha keima thiamloh liau liau a ni. Mahse an thusawi kha a awihawm ve riau mai a, naktuka Nassau-a kan kirleh hunah chuan thusawiah kan fimkhur viau a ngai dawn a ni. Miss Vitali chu zanah tuia tla anga kan sawi a ngai ang. Ani chungchang chu nakinah kan la sawi tha leh dawn nia. An chhuizui ngei dawn a, mahse engmah an hrechhuak chuang lovang. Zanina kan kalna hi an awihtheih nan pawisa nawi kan chhar kha hman a tha mai ang chu. No5, pawisa nawi tuiek dan leh ral tawh dan kha a lungawithlak em?"

No5 chu an Physicist, Kotze kha a ni a. "Duhthusam a ni, enchian a dawl viau ang. Kum zabi 17-na hunlaia Doubloon leh Real diktak kha a ni. Silver leh rangkachak hi tuifinriat tui hian a khawih pawi thei vaklo. A tih ran nan acid tlem ka hmang a, mahse insawi fihlimnan a kan hman dawn chuan Coroner hnena pek a rohlu anga kan puan a ngai dawn a ni. Mahse rohlu awmna erawh chu kan thup thei mai ang chu. Mahse insawifelnan kan chharna tui thukdan pawh fathom 10 vel angtein sawi ta ila, an tan kan thusawi lo pheh ngaihna reng a awm lovang. Miss Vitali chu oxygen cylinder buai avangin fathom 100 vela thuka tla anhgin kan sawi mai dawn nia. Hetianga chetsualna hi a thleng fo tho va, kumtin mi tam takin an thihphah reng a. Uluk taka zawng, mahse shark an tam avanga che hlei theilo angin kan insawi mai dawn a ni. Hei vanga kan rohlu zawn pawh bansan a kir lehnghal kan ni, a chiang em? Mahse a hmasa in uluk lehzualin kan dawp phawt tur a ni. Electric hmandan hi ka thiam zawng tak a ni a, mihring tan tawrhtheih chi a ni lo. Puihtheihna che ka nei anih chuan ka...."

Awki hawihhawm deuh hian Largo chuan, "A ngai lovang. Keipawhin tunhma a mi dawpdan, la hlawhchham ngailo chi ka hre ve nual e. Mahse mi luhlul deuhvah chuan ka la pun dawn che nia," tiin alo pawtchat ta a.

Midangte pawh chu Largo chuan a han enkual a, "Tunah kan chetdan chu vawikhat chiah ka sawinawn leh ang. Tunah hian zanlai a ni a, zing dar 3 atanga intanin darkar hnih chhung thlaeng a awm dawn a, zing dar 5 hnu hretah khua a eng tan ang. Chetna hun chu darkar 2 kan nei tihna anih chu. Tunah hian West End chu chhimlam atangin kan lut dawn a, hei hi thliarkar vel panna a ni. Kan target bial kan panlai hi missile station atangin lo hmu mah se Yatch, kalkawng zawh diklo deuh angah min ngai mai ang. Dar 3:00 ah chiah thirchakai kan thlak ang a, tichuan tuichhunga che turte chuan mel chanve an paltlang tur chu an pan nghal mai dawn a ni."

"Mi 15, heta tel turte hi fei ang deuhva intlarin tui inhleuh ang a, mahni hleuhna lai theuh hriain tumah kan vaksawn tur a ni lovang. Ka hnunga eng pawl ka dah chu en chungin min zui ang a, chuti chunga bo palh in awm anih chuan lawnga kir leh nghal tur a ni. In hrethiam vek em? Vengtu ho hna ber tur chu Shark leh Barracuda laka min ven a ni. In silaite khan feet 20 aia thui a kah theihloh avangin sangha te chu an lu velah kah a ngai tih kha in hrereng dawn nia. Silai kaptur chuan a bula mi a hriattir hmasa tur a ni a, ani chuan a tul angin a tanpui nghal tur a ni bawk. Mahse in silai mu, thalfanga CURARE tur kha tuiin a tidal hman anih loh chuan vawikhat kah kha a tawk khawp ang. Mahse inkah hmain a hmawr tuamna kha phelh theihnghilh hauh suh u. Vawi tam kan tihchhin tawh avangin in hmabak chu inhriat theuh ka ring. Mahse tuichhung leilung awmdan hi a danglam thut thut thin a, in chhuah hmaa dexedrine in eitur chuan chakna leh huaisenna a pek dawn cheu bakah in hriatna thazam a tiharh bawk dawn a ni. A tawi zawngin, thil beisei awmloh tak pawh ni se, tawk turin kan inpeih vek a ngai a ni. Zawhna a awm em?"

He thil hi thla tam fe kalta a Paris a an ruahman tan laiin Blofeld chuan an pawl a buaina leh harsatna siam an awm anih chuan a sawitu turber chu No 10 leh 11, Russian mi SMERSH mi leh sa hluite an ni tih a lo sawilawk tawh bawk a ni.

Blofeld chuan, "Inphiarrukna hi kan thanhnan tlat tawh a. Phiarrukna leh rinhlelhna chu inkawp tlat an ni a, heng mite pahnih hi chuan englai pawhin midang aia hna hlauhawm bik thawk leh midangte phiarruk berah an inngai reng ang. Anmahni police mantir a an chanai chhuhsak vek pawh duh turin midang an ngai vek ang. An thawhpuite hek an hrehlo anga, thil ruahman sa pawh an ringhlel fovang. Thil relfel vek tawh pawh anmahni thlima rel ruk nawn angah an ngai fo. Engkim hrilh vek an ni tih hrilh a, englai pawh a hnem fo an tul anga, mahse hminfel an nih tawh chuan an hna chu rintlak leh fel takin an thawk ang. Chutiang mi chu chhawr manhla tak an ni a, mahse ka sawi ang khan midangte zinga rinhlelhna chi tuh an tum vaih chuan dimna tel hauh lovin chawp leh chilhin i che nghal tur a ni. I hote zingah rinhlelhna in bu a khuar tur a ni lo. Anni chu thil ruamhmanna fel ber pawh tichhe vek thei, chhunglama hmelma lianber an ni" tiin alo hrilh tawh a ni.

No 10 hi SMERSH terrorist lar thin tak, Strelik a ni a, thupui fun deuh hian a ngaihdan a sawi ve ta a. Largo veilam chair pahnih dana thu a ni a, Largo pawh be lovin midang a be ber zawk a.

"Comrades, No1 thusawi kha ngun takin ka ngaihtuah a, thil pawh kan ruahman fel hlein ka hria. He operation hi a tluangin Atom bomb pahnihna chu target no-2 ah tihpuah a ngaih pawh ka ring lo. Henglai thliarkar chanchin hi ka hriat nual bakah YATCHMAN GUIDE TO BAHAMAS chuan tam tak min hriatbelhtir bawk a. Kan target atanga mel tlemte ah hotel lian tak a awm tih leh khaw tenau deuh a awm tih ka hre bawk a. Tichuan ka han chhut mai danah chuan bomb pakhat hian mi 2000 vel zet chu a tihhlum ka ring a. Kan ramah chuan mi 2000 hi an tamlo hle mai a, an thihna chu he missile station chhiatna nena tehkhin phei chuan eng thamah mah Soviet Union ah chuan ngaih a ni lovang. Mahse hei hi khawthlang lam ho ngaihdan chu a ni ve hauh lovang. Hengho thihna leh hliam buaipuina chu an la thutakin kan target No2 a bomb tihpuah ngailo hian thutlukna an siamphah thuaiin ka ring a ni. Chu chu thil awmdan alo nih chuan Comrades, kan hna chu darkar 24 ah kan zo tihna a ni ang a, kan lawmman ropui tak mai pawh chu kan dawng thei tep tawh tihna niin ka hria. Tichuan comrades, chuti zozai pawisa hnaivai taka alo awm takah chuan ka rilru ah ngaihtuahna thalo tak a lolut ta tlat pek a,"

Largo chuan a ipte a .25 pistol chu a phawi a, hman mai theih turin a hum nghal chat a.

No10 chuan a han sawizawm leh a. "Ka rilru a rinhlehna leh ngaihtuahna deuh reuh hi ka sawiloh chuan Russian Comrades no11 leh helaia ka thawhpui dangte lakah hian ka tihtur tul makmawh chu ka ti lo tihna a ni dawn a ni,"

Meeting-a kalkhawm ho chu an ngawi thap mai a, an vai hian secret agent leh inphiarrukna lama lo intathriam tawh vek an ni bawk a, rinawmlohna boruak thar rim an hre tlat a ni. No10 chuan enge maw a hriat reng reng le? An vai chuan thil awmdan a zira rilru thlak nghal mai thei turin an inkau sa vek a. Largo erawh chuan a silai chu hman mai theih turin a malchungah chuan a hum ran thung a.

No10 chuan ngun taka midangte hmel enkual chung chuan heti hian a sawizawm leh ta a.

"Tun atanga reilo teah hian member 5 leh sub-agent 6 tihloh, midang 15 te chu tuipuiah kan hleuhchhuak dawn a, a tlem berah he lawng awmna atanga darkar chanve zeta thui kan hleuh bo dawn a. Chutihlai chuan keini ho chu min hrechang miah lovin lawng chuan min kalsan palh ta mai se la, ava pawi dawn em!!"

Dawhkana awmho chu an phun ta bal bal hlawm a. No10 chuan a ban pharchhuah pah chuan, "Thil awmlo deuh mai niin ka hria. Nangni ngaihdan pawh anih ve ka ring, Comrades. Mahse mi inang, sa inang kan ni a, kan hmaa hausak lawihna tham sum a han awm tawh hi chuan mifel leh thian karah pawh ngaihtuahna thalo tak tak chu a lolut thei tih kan hretlang alawm. Tichuan Comrades, mi 15 kan bo tawh chuan sum leh pai la bang chu a ladam te tan chuan insem tur a tam viau lovang maw? No2 lahin shark ho nena kan inbeihna a thi vek angin min lo sawi ta bawk si se la...?

Largo chuan, "Tichuan enge i rawt deuh a, No 10?" a ti sap a.

No10 chuan dinglam a rawn hawi phei a, luhlul zet hian, "Ramkhat a mi pakhat zawk zel kha midang venthawn thil thu-ah lawngah awm se ka ti a ni. Tichuan va chhuakte chu mi 10 an ni anga, pawnlama hna hlawuhawm tak va thawkte pawh chuan ka sawi tawh ang thilthleng thei kha a thleng dawnlo a ni tih hriain phur takin hna an thawk thei dawn a ni," a ti ta a.

Largo chuan a aw atanga a nghaihdan hriat har zet mai leh hawihhawm zet mai hian, I rawtna chu chhandan tur pakhat chiah ka nei, No10" a ti a, a pistol chu a zawn zatin vawithum a han hmetpuak a. No10 chuan a ban a phar a, dawhkan bawh rawkin chhuatah chuan a tlathla ta a.

Largo chuan a silai hnmawr chu a hnim a, a han chhemzui a. Midang thukual thapte chu enkualin, "Tunah chuan meeting a tawp ta. In vaiin khawngaihin in pindanah kir leh ula, in hmanrua va endik rawh u. Tunah hian eitur pawh an peih tawh ang. A duh tan zu no1 a awm bawk ang. No10 hi lo enkawl chhunzawmtu tur chu keiman ka lo ruahman mai dawn nia, ka lawm e," a han tizui a.

An chhuahvek hnu chuan Largo chu a dingchhuak a, zimar hmasa te tein a pawhdawh atang chuan Corona Cigar a phawrh a, tui ti hranlo hmel zet chung chuan a tankai ta a. Thelret bawm vurtlang dahna chu khaiin Vitali a dahna pindan chu a pan ta nghal a.

Pindan kawngkhar chu a luh veleh a kalh nghal a, hetah pawh hian electrict bulb sen chi hi an lo hmang a. Khumah chuan a kut leh kea phuar kak tlat hian ani chu a lo mudawrh huang a. Largo chuan vurbawm chu dawhkanah a dah a, Cigar chu fawp lingin vurbawm bulah chuan a dah ta a.

Nula chuan ngawi rengin a lo en kar a.

Largo chuan awki, ngainatawmlo zet mai hian, "My dear, i taksa hi nuam chennan ka lo hmang nasa tawh hle a, a thungrulh nan tunge khawl kha rawn keng tura ti che tih min hrilhloh chuan na ka tawrhtir che a ngai dawn a ni," a han ti a. Cigar chu a fawpling leh a, "Hei hi intih satna tur a ni a, vur hi intih vawhna tur a ni thung. Scientifically a ka hman hunah chuan i natuar tawp hunah thudik i sawi tho dawn a ni. Enge i duhthlanna ni ang le?" a han tihzawm leh a.

Nula chuan a tawngkam chhuak huatna hlira khat hian, "Ka nutapa i that a, kei min thah leh i tum a. I duh ang chuan han che ta che. Nangpawh mi thisa ini tih hre rawh. i thih huna kan unau tawrhna aia a leta tam na i tawrh theihnan ka tawngtai mawlh mawlh a sin," a ti ta phiar phiar mai a.

Largo chu zalo deuh hian a nui hawk a, khum chu a panphei ta chher chher mai a. "Awle, my dear. Muang, zawi leh dimtein ka han busipui poh che a ni ang chu," a ti ta a.

Nula kawrnghawngah chuan a tham a, a phihthler ta vek mai a. nula taksa chu ngun tak mai hian a han thlir a, cigar leh vur dahna bawm chu pawthnaiin, khum bulah chuan rem tak mai hian thuthmun a han rem te te a..

Cigar chu a han fawpling leh a, a vap chhem faiin nula chu a hnaihphei ta a.

Disco lawng chu thimtham hnuaiah chuan chak takin a kalna lam pan chuan a tawlhliam pur pur zel a.