James Bond - Thunderball Bung - 22

Hnuchhuina lampang chi ho
Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

James Bond - Thunderball Bung - 22

Unread post by Ruata Ralte » December 25th, 2019, 8:11 am

22. THE SHADOWER

Manta tuihnuailawng attack centre chhung chu a reh ruih mai a. Commnader Pederson chu Echo Sounder hnungah chuan a ding a, a khat tawkin a hnunga thu Bond leh Leiter chu chinchang a hrilh leh zauh thin a.

Navigational Team ho chuan Depth ang Speed Gauge intuam hlun mai chu ngun takin a thutchilh a, chumi te pathum chu savun sena siam chair ah chuan an thu tlar a, an hmanraw chelh leh buaipui chuan thlawhna khalhna a ang hle lehnghal a.

Captain chuan Bond leh Leiter chu a rawn panphei a, nuichung hian, "Tunah hian kan awmna hi fathom 30-a thuk a ni. Tunah chuan Grand Bahamas thlengin ngil takin kan kal thei tawh ang. Tunah hian kan kalchak thawkhat viau mai bawk. Tuna kan kaldan hi chuan darkar4 vel kan la nei ang. Khawvar hma deuh hlekin Grand Bahamas chu kan thleng ang. Chaw ei ila, mu angu hmiang. Darkar tam tak chu radar a hmuh tur engmah a awm lovang. Berry Island te hian kan kalpelh hma chuan radar hmai hi ala luahlan fai vek rih ang. Hemi kan kalpelh hnu pawh hian Hemi kan kalpelh hnu pawh hian harsatna chu kan la nei thei tho mai a. Tin, Disco Disco pawh kan hmuthei tawh maithei a ni. Kan va hmufuh nghal anih chuan tuichhung atanga kan umzui a ngai dawn a ni. Chutianga a awm anih chuan kan rawn hriattir nghal ang che u. Tunah hian tui takin va mu ula a that ka ring. Kan umzui ber kan hmuh hma chuan engmah tihtheih a nirih tlatlo," a rawn ti bawrh bawrh mai a, amah vek chuan, "Min rawn zui rawh u, hma kan hruai ange. Kailawnah hian in in intauh palh hlauh ange," a tileh a.

Choka leh chaweina pindan lamah chuan an inzui ta a, an chaweina pindan chu eng tha tak, cream rawng hnawih a ni a, a sendang leh hring a hnawih te pawh a awm bawk a. Dawhkan pakhat chu an kil a, Officer leh lawng sipai dang, chawei ve te chuan an rawn melh leh zauh zauh thin a.

Captain chuan a ban vai pah chuan, "He lawng design-na a mihring inrawlh tamzia chu hria ula mak in ti zawk hial ang. Lawng hnathawkte thlahnih thlathum lai hlim taka an awmtheihna tur chuan chu chu a tul tlat si a ni. Mitin a hmuh ngaireng a hmuh hian kan nun hi a tinguai ve vek thei niin an sawi a. He pindan hi Cinema, TV leh infiamna chi hrang hrang neihnan an hmang thin a, eitur siam rim leh engine rimnam engmah a awmloh chhan pawh lawng pumpuiah hian electrostatic an dah vang a ni a, chu chuan a thlifim vek mai a ni," tiin a hrilhfiah zung zung a.

Steward pakhat chuan menu kengin a rawnhnaih phei a, Captain chuan, "Virginia vawksa hem hmin, Apple-Pie leh Ice-cream ka duh ang, coffee vawt nen," a han ti a, Bond-a lam chu hawiin, "Lawng chawlhhmun chhuahsan hian ka ril a tam huam zel a. Lawng captain ten kan huat ber chu tuipui ni lovin khawmual a ni," a han tih zawm leh a.

Bond chuan a duhzawng a han lam ve a, riltamna leh chawei chakna engmah a neihloh avangin Captain a tawng duh viau mai pawh chu tihzia a ti angreng hle zawk a. A rilru a hahin, amah kaptu ber chu Disco lawng an hmuh huna nula dinhmun a hriatchian hma chuan a veng thei dawn chuang lovin a hria a ni.

Nula alo rindan kha a lutuk deuh em ni ang le? A phatsan ta mai nge, an manchhuak ta zawk em ni? A la dam angem? A rilru chu zawhna hlirin a khat a, chhanna lah engmah a awm thei si lo. A hmaa thingpui dahvawh chu a in a, Captain chuan tuifinriat tui atanga tui an thlitfim dan chu a hrilh mawlh mawlh a.

Captain titi bawrh bawrh chu a ngaithla ning ta deuh thut a, "Captain, i thusawi chu ka'n pawtchat lawk ange, min lo hrethiam teh. Disco chu Grand Bahamas bulah chuan va nang ta ila engtin nge kan tih ang? Kan chetdan tur ka hisap thiam lutuk lo tlat. I kapdarh mai dawn nge, lawnkai kan tum zawk dawn?" a han ti a.

Muangcharh hian Captain chuan, "A, chulam chu i kutah ka lo dah deuh mai asin. Navy Department lah chuan in thuhnuaia awm angah min sawi si a, kei chu in lawngpu chauh mai alawm ka nih le. I ngaihdan min hrilh la, kan lawng dinhmun a derthawn lutukloh chuan ka zawmpui zel ang che u. Mahse Navy ho thupek leh in sawidan atang chuan lohtheihloh ah chuan lawng himna hi a pawimawh ber lo maithei a sin. Attack Centre-a ka hrilh che u ang khan kan chetdan hi hmunpui lam atanga thlawp vek kan ni a, chu chu ka tan chuan a tawk a ni. Tunah i ngaihdan chu han sawi ve zawk teh," alo ti ve thung a.

Bond-a eitur chah chu a lo thleng a, mahse eichakna engmah a neihloh avangin a nawrsawn a. Cigarette a tan a, Leiter-a thlek pah chuan tihian a ngaihdan chu a sawi ve ta a.

"Felix hian eng remruatna nge a neih ka hre lem lova. Disco hian Grand Bahamas lam pana hmarlam hawua Berry Island inhliahkhuh nan a hmang anih chuan naktuk zing dar 4-ah chuan kan dinhmun a danglam vek dawn a. Chu ngaihdan chu a dik anih chuan chart kha ngun takin ka lo en tawh a, bomb chu target hnaih thei ang bera dah an duh dawn a. Tui, Fathom 10 vela thuk vaukam mel chanve velah thirchakai an thlak ka ring a. Bomb chu tui feet 10 bawrah, target hnaih thei ang berah an dah anga, an inthiar fihlim vatin ka ring a, khawvar chian hma a inthiar fihlim an tum ngeiin ka ring. Kei ni ta ila, ka tih dan tur chiah a ni ang. Anmahni hliahkhuh turin lawng veivak a tam bawk si a, Radar-ah pawh man mah ila kan lawng um ber anih leh nihloh kan hrethei dawn chuanglo. Bomb chu darkar 12 hnua puak tura an kam anih chuan Nassau an thleng hman mai ni lovin a leta hla an thleng hman daih dawn a ni. Ka rindan chuan Nassau ah an dawt pangngai thehdarh turin an kir lehin ka ring. SPECTRE hnen atanga thupek a dawn hun tur a nghak veng veng mai dawn a ni. CHu chu nula hnen atanga thu engemaw a hrethei te anih loh chuan ka tihna a ni,"

Leiter chuan, "Hell, kha nula lak atang khan engmah a hriat ka ring lo, hmeichhe neplo tak anih kha. Lo sawipalh ta pawh ni se suantlang awrh tirin tuiah a paih anga, an chetna a chesualpalh angin a sawimam leh vek ang. Nassau ah an kir leh ngei ang; a (Largo) dinhmun saw phehsak mai mai harsa deuh tur a nia," a lo ti ve bawk a.

Captain chuan, "Chuti lam chu dahtha ta ila. Commander Bond, bomb chu engtinnge lawng atanga lachhuak a target ah chuan an dah ang le? Chart han thlirin vaukam chu Yatch chuan a hneihthei vak lovang tih chu ka pawm a. Va hnaihthei pawh ni se Missile Station vengtute nen an insu buai ngei dawn si. Helai ah hian missile an kahchhuah dawn phei chuan sangha man lawng leh lawngdang pawh hnawhbo an ching khawp mai lehnghal," a lo ti ve a.

Titak deuh hian Bond chuan, "Chu thil chu alawm.... Disco lawng hnuailam a pindan ruk an neih chhan chu. A chhungah sawn tawlailir ang deuh leh a hnuktu an dah ngei ka ring bawk. Chumi chungah chuan bomb chu an dah anga, tuichhung lutmi nen chuan harsa lo takin an va kam fel mai thei ngei ang. Chuti nilo se, engati nge chuti zozai tuichhunglam hmanrua an inchhawp ang le!?" a ti ta a.

Muang ban charh hian Captain chuan, "I sawidik mai awm mang e, Captain. I thusawi chu awmze nei tak a ni. Mahse engtin nge ti se min tih?" alo ti ve leh a.

"Heng mi te hi mantheih hun, hun remchang vawikhat chiah a awm theiin ka ring. Kan chethma lutuk chuan Disco hian tlanchhiat pahin bomb chu tuiah an thlak daih thei a. Kan tana mantheih hun awmchhun chu bomb kam tura an chetchhuah lai tak nanchin a ni tawp mai. Tuihnuai lutmi ho chu kan pawl tuilutmi ho bawkin an hup barh a ngai dawn a ni. Bomb pahnihna chu lawngah ala awm anih pawhin harsa lo takin kan kap pil mai dawn a ni,"

Captain chuan a chawei thleng chu a bih vang vang a, a coffee chu lem zovin a rawn dakchhuak leh ta a. Leiter chu enin Bond chu a han en leh a, inngaihtuah muk tih hriat deuh hian, "I ngaihdan chu a dik hlein ka hria. Commander, oxygen kan ngah a, Nuclear Flotilla a tuithiam ber ber mi sawm zet kan nei bawk. Mahse hmelma beihna tur chuan chemte chauh an nei dawn a. In-Volunteer tura ka koh an ngai bawk ang," a ti ta a.

Bond chuan, "Keiman ka hruai ang. Tuichhung luh hi ka tui vena pakhat a ni a, a tul tul chu i hote ka lo hrilh mai ang," a lo ti thuai a.

Rang deuh hian Leiter pawh chuan, "Tun tum chu Virginia vawksa lo khel mai mai tura min hnutchhiah tum hlek suh u. Ka kutah hian engemaw ka vuah ang a, ka tuihleuh theihzia pawh inhre mai ang. Ban han hloh hi chuan rem kan hriatzui theihdan hi mak deuh a ni. Doctorte chuan hei hi 'compensation an ti alawm," a lo ti vat a.

Captain chu a kiasak a, dinchhuah pahin, "Aw le, nangni mi huaisen pahnih chu induh leh lo inhnial ula, ka hote chu thil awmdan ka han hriattir ange. Chart kan en ho leh anga, hmanraw awmthei ang ang kan dapzui dawn nia. Ka rin ang khan in mu leh hman tak tak dawnlo chu anih ber hi. Battle pills kan tih mai kha pek in ngai dawn a ni, ka rawn thawn ange," a ti a, banpharin a kalsawn ta nghal a.

Leiter chuan Bond lam chu hawiin, "Hrep che hian!! Min hnutchhiah leh i tum a ni maw? Lemis ho chimawmzia hi chu(h)," a han ti ngal ngal a.

"Engtin nge maw nagmah enkawl damtu thusawi ka hriat ve ang le? I thirkuta dim te a mi han khawihvel dan pawh i thiam hialin ka ring a ni,"

"Ka kut hmanthiamzia chu hria la mak iti hial zawk ang. He kut ngeia nula han kuah ngat hi chuan an rilru tha leh tluang zawng zwng hi a bo vek thei asin. Aw le, kan chetdan tur chu i han sawi teh ang. Engti nge kan inzui anga, chemte chu fei angin kan siam thei angem? Tuichhung thimthamah an pawl nen engtin nge kan inhriathran theih ang?Pederson hi pa tha tak a ni a, kan fimkhurloh vanga a hote thenkhat an thih hlauh chuan a fello hle ang,"

Lawng chhunga inbiakna atang chuan fiah deuh hian Captain chuan tihian a rawn ti ta a. "Lo ngaithla ru, hei hi in captain a ni a, kan hmalamah hian hlauhawm kan tawk mai thei. Thil awmdan chu hrilh in ni dawn a. Kan lawng hi Navy Department chuan indo lai ang deuhthaw a thil pawimawh a hman atan a thlang a. Ka thil hrilh tur cheu hi thu leh awm hma chuan top secret a ni e. Thil awmdan chu hei hi a ni..."

Captain thusawi ngaithla chuan lawng sipai ho leh thawktu ho chu an ngawi thuap a.

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@

Duty Officer khum pakhat a Bond-a muhil lai chu Alarm system leh PA system-a 'Diving Station, Diving Station' tia thupuan ri chuan a kaiharh zawk a. A mutna chu a lei nghal bur bur a, hla taka engine ri pawh chu a rikdan a danglam nghal a.

Bond chu tho vatin, submarine attack centre chu a panphei nghal a. Leitefr pawh chu a lo awm reng tawh a. Captain chuan dawhkana a chart bihlai chu a hawisan a, a hmelah chuan a ngaihtuahna a vak zau hle tih a hriat a. "In rindan kha a dik a ni, gentlemen. Kan hma, dinglam point2 vel, mel5-a hlaah kan lawng duh chu knot30-a chakin a kal mek e. Lawngdang, sawtianga chak saw helai hnaivaiah a awm lo va, eng engmah a chhuahlo bawk. Scope atang hian in en duh em? Tui a suphuan ve deuh va. Thla a chhuaklo na a, in en deuh vang vang chuan a tui sut phuan saw in hmuthei ang," a ti a.

Bond chuan tuichhunglam thlirkualna periscope ah chuan a han bih ve a, minute khat vel a en hnu chuan thimtham deuhva thil var zei zei chu a hmu ve ta a. Chutah tawlhkirin, "Khawilam nge a pan?" a han ti a.

"Keimahni ang bawk hian Grand Bahamas thglanglam tho a ni an pan. Kan lutthuk deuh anga, tun aia chakdeuh hian kan kal dawn nia. Sonar-a kan chhui reng avangin kan hloh tawh lovang. An sirah kan kal anga, a tul hunah kan hnaih mai dawn a ni. Khaw awmdan report ah chuan khawvar dawn hnaihah khawthlanglam thli a rawn tleh hlek dawn a, duhthusam tak pawh a ni. Kan naute chhuah hunah tui hi mam lutuklo se duhthusam a ni, a chhan pawh kan inkah chhuah hian tui hi a phul deuh bulh bulh thin vang a ni," tiin Captain chuan an bula lawng sipai, a vara inthuam satha zet mai lam chu hawiin, Heihi Petty Officer Fallon a nih hi. Kan naute kaihruaitu tur a ni a, Mahse in thuhnuaia awm tur tho a ni e. Kan tuithiam ho chu an vaiin an rawn in-volunteer vek a, Fallon hian an zinga pakua a thlangchhuak leh a ni. Tunah hian an hna atanga awl an ni a, hmuhte pawh in duh mai thei e. Gentlemen, in chetdan turte pawh sawiho a ngai maithei asin. Discipline pawh a khauh hle a ngai ang. Chubakah recognition signal pawh in ruatfdel sa a ngaiin ka ring. In hriamhrei tur chu ergeant at Arms-in a endik vel mek e," a han tihzawm a, a nuisuk a.

Amah vek chuan, "Chemte 12 vel chu a dapkhawm thei a, thenkhat phei chuan an chemte duhlai anih avangin an ui viau hlawm nghe nghe a nih kha. A duh ang tawka zum leh hriamin atat a, hmunphiah fawngah a vuah leh a, a hmantheih sawih sawih ang. Aw le, kan inhmu leh dawn nia," tiin lawng thununtu te lamah a pheisan ta a.

Bond leh LLeiter chuan Fallon chu lawng hnuailam a engine pindan lamah an zuithla a, repair shop ah an lut ta dial a. An kalkawnga Reactor Room an kalpelh tak chu lawng thahrui petu ber a ni tih Bond a te pahnih chuan an hre kiau mai. Reactor chu atom bomb thunun beh tlat ang a ni a. Hmanthiam chuan thil tangkai lutuk mai; hmanthiamloh erawh chuan hlauhawm lutuk a ni thung si a ni.

Repair Shop chu sei deuh tak, khawl hrang hranga khathi a ni ber mai. Pindan tawp lamah chuan lawng sipai pakua lai hi kekawrbul chauh ha hian an lo ding far mai a. A kil lehlamah chuan mi pahnih hian khawl hmang hian thir an lo tat tek chuai chuai mai bawk a. Lawng sipai, tuichhung lut turte chuan fei siam zawh tawhte chu an lo lekchhin vat vat hlawm bawk a.

Bond te nena an inhriattir fel hnu chuan fei pakhat chu Bond chuan a laksak a, a han enchhin a. Bakmeh nan pawh hmang se a hmantheih viauin a ring nghe nghe a. Shark vun chhah leh fei tak vihnan pawha duhthusam niin a hria. Mahse hmelma lam te chuan CO2 silai an neih ngei a rinawm si.

Bond chuan lawng sipai phur hmel tak takte chu a han enkual a, an zinga engemaw zat chu an thi ngeiin a ring a. Chuvangin hmelma te chu barakhaih ngei an tulin a hria a ni. Mahse an vun var tak mai chu thlaeng hnuaiah chuan feet20 dan velah pawh a langsar hle dawn a. An feite chu zumin hriam hle mah se hmang hman lovin hmelma silai mu chu an tuar thei tlat. Petty Officer lam chu hawiin, "Thelret kawr in nei em?" a han ti a.

Fallon chuan, "Tehreng mai, Commander. Tuivawt awmna a tlanchhuah a ngaih tak thutin tih thu-ah kan paitel reng mai. Hetiang bruak leh tui pangngai awmna ah hlir kan kal biklo alawm," a lo ti a, a nuisak a.

"Kan vaiin kan mamawh ang. An hnungah number a var emaw, a eng emawin i ziahtir nghal thei ang chu maw? Tichuan kan inhrehrang zung zung thei dawn nia,"

"Tehreng mai," tiin Fallon chuan, "Hey Fonda, nang leh Johnson khan Quartermaster hnenah kan zavaia hmantur thelret kawr kha va lam teh u. Brocken, nangin dawr atangin rubber solution va la la, thelret kawr hnungah chuan number 1 atanga 12 thleng va ziak ta che. Feet khat laia liana ziah a tha ang. I che vat vat teh ang u," a tita zung zung a.

Reilote ah thelret kawr pawh chu an peihfel ta thuai a, bangah chuan an khai tlar a. Bond chuan kokhawmin, "Awle, tunah pehhel awm miah lovin thil ka han hrilhtlang vek ang che u. Tuihnuaiah hian kan innuai fe dawn a, thi leh hliam pawh kan awm ngei ang tih a chiang a, rilru thlak duh in awm em?" tiin a han tan a.

Lawng sipaiho chuan rilru thlak tumlo tih hriat deuh hian an lo nuihlet tha hlawm a.

"Chuti anih chuan thil awmdan chu hetiang hi a ni......... Zawhna a awm em?" a ti ta a.

"Tuihnuailawng kan chhuahsan veleh engtia kal tur nge, Sir?"

"Rang takin feet 10 a thukah liluh nghal tur a ni a, a tlem thei ang ber tui tihchet tur a ni,"

"Tuichhungah kan hmaikawr leh engemaw buai a awm thei a, engtia tihtur nge?"

Emergency-ah chuan kutzungpui kha hnuailam hawiin lek ula, sangha lian a lolang anih chuan ban hmalama lek tur. Chung zawnga kutzungpui lek chu, 'Ka hrethiam e' tihna; 'Ka rawn pui ang che' tihna a ni thei bawk. Tin, in ke chunglam hawia a awm chuan buaipui in ngai tawhlo tihna a ni ang,"

Lawng sipai ho chu an nui ham ham a, mahse an nuihdan erawh a inang vek lem awm lo ve.

Chutih lai tak chuan PA System ah hian, "Swimming Party in Escape Hatch pan tur, Swimming Party in Escape Hatch pan tur. Thuam inbel rawh u. Commander Bond hi Attack Centre-ah kan hmu duh e" a rawn ti ta lauh lauh a.

Submarine khawlpui chu a thi ruai ruai a, a reh ta hmiah mai a. Tuifinriat mawnga a innghah zawng chuan a ri deuh dut a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)