James Bond - Thunderball Bung - 23

[Ruata Ralte]

23. THE NAKED WARFARE

Boruak chuan Escape Hatch dawtah chuan Bond chu a chhem dawkchho zawk a, a chung sang takah chuan tuipui chung thla eng avang chuan alang thei deuh ruau ruau a. Tlema thli thawin tui alo chhem fawn deuh avang chuan tihzia a ti hle a, amah suchhuaktu boruak chuan tuichung chu a han suphuan deuh phulh nghe nghe a. Tui chu fawn deuh lo phei sela chuan hnai dawh atang phei chuan hmuh harsa lo tak tur hi a ni a.

Bond chu tuichunga langchhuaklo turin a ke a pheikhawk hmawrparh a bun chuan a invai muang vat a, tuichung atanga feet10 velah chuan a ding ta a. A hnuaiah chuan Manta chu a bawk thim muk mai a, a nelawm lovin engmaw ti zawng tak chuan alang rapthlak hle mai a.

Escape Hatch atang chuan Leiter pawh chu a rawn dawkchhuak veleh nawlh mai a. Bond pawh chuan tui chunglam chu a pan chhova, fimkhur deuh hian tuichung chu atang chuan a han hawi a, Disco chu eng tichhuak miahlo hian a veilam melkhat pawh tling lovah chuan a lo awm a.

Chu lawng chu michuang awmlo ang mai hian a reh thuap mai a. Hmarlam melkhat vela awm Grand Bahamas chu a lang thim mik mai bawk a. Vaukam vela tui inchhawk vel chu a var suau suau thung. Thliarkar chungah chuan rocket kah chhuahna thir dawh leh chutiang ang hmanraw dangte chu a lang thei deuh ruau ruau bawk a. Chumi chungah chuan aircraft warning chu a de zawr zawr mai bawk a. A duhtawka rei a thlirhnu chuan Bond chu tuiah chuan a lut leh ta a, feet10 vela thuk a luh hnuah an pan tur lam hawi chuan a taksa a siksawi kual a, a thiante lo thlenkim chu a nghak ta a.

**************************************************************

Minute 10 vel kalta ah khan kir lehlawk ta ila....
Attack Centre a Bond-a a valuh khan zauthau deuh tak hian Captain chuan, "I sawi ang chiah khan thil a awm tlat mai. Minute 10 vel kalta khan an ding a, chuta tang chuan Sonar hian tuichhunga chevel thawm danglam tak tak a man zui ta char char mai a. An lawng hnuaia pindan i sawi atanga chechhuak tur an nih duh hmel khawp mai. A tawk fuin ka hria, nangni ho pawh hi chechhuak nghal ula a thain ka hria. In thlenhlat deuh veleh tuichhungah kan invawrh cho anga, Navy Department ah thu ka thawn ang. Missile Station pawh hi a tul anga inthiarchhuak nghal thei tura hriattir an ngai bawk ang. A tul anga han atan torpedo pahnih pawh buatsaih fel an ni tawh e. Petty Officer Fallon hnenah chuan kan dinhmun a chhe ta viau anih chuan Flare pahnihna kap turin ka hrilh bawk ang e. Chu flare pahnihna a hmang anih chuan Disco saw ka hnaih phei anga, kan 9-inch silai hian ka kap hmasa hlek anga, kan lawnchilh nghal ang. Bomb chu him taka kan hmuh leh hma chuan tumah ka dim dawn lo," a ti zung zung a, chutah lu thing chungin, "Kan dinhmun a harsa hle mai, Commander. A tlachawpa chet a ngai anih hi. Aw le, ka duhsakna ka hlan a che u. Ka naute hian kan lawng hi an chawimawi hram ka beisei," tiin a lo thlah diam tawh a ni.

**************************************************************

A koki a rawn khawihtu avang chuan Bond chu a han hawi vat a, Leiter a lo ni a. Ani chuan a darthlalang hmaikawr phena nui tha chung hian a kutzungpui chu a han tipir a. Bond chu a han hawilet a, a hote chu a sawi ang deuh khan an lo awmdarh sang sang hlawm a. Bond chuan a lu a bu a, hmalam panin tui chu a hleuh ta a. A kut lehlamin a fei chu a awmah a pawmbet a, a hnungah chuan tuilutmi a duma inthuamte chu ramsa lian tak ang mai hian an rawn inzui hal hal hlawm a.

Thelret kawr chhung chu a lumin a uap churh mai a, an boruak hip chuan thelret rim a nam deuh vung vung mai bawk a. Mahse Bond chuan chutiang pawh chu hrechang lovin an kaltumna lam chu ding takin a pan ta zel a.

An hnuai tuipuia phul chamduai chu tui an tihchet zawng chuan a che sung sung a, hawina lam apiang mai chu a paw thim kulh mai a. Tuipui mawng chu a awih chho tial tial a, feet 50 atang chuan feet 30 vel chauhva thuk a ni ta.

Ngaihthat nan Bond chu a han hawilet zawk a, a duh ang thlapin a thian sawmpakhat laite chuan fei hum chungin leh an mask darthlalang de zawk zawk chungin an lo la zui zel a. Bond chuan an va barakhaih a, hmelma inringlo lai an va nanfuh theih hlauh chuan an pawl mi sawmpakhat lai tuipui chhung atanga rawn lang that that mai an hmuh chuan a thawng buai ve hlein a ring a ni. A rilru a phurtharna chu nula ngaihtuahna chuan a rawnlan leh ta a. Domino chu hmelma zinga tel lo nita se? Inhmachhawn thut ta mai sea fei chuan a bei thei angem? Chutia a ngaihtuahna chu a hnawl leh thuai a, nula chu him taka lawnga a la awm a beisei ta zawk a.

A hmalam, hnuailam deuhvah chuan Coral (Hei hi thliarkar siamtu rannung tereuh te te an ni) hlawm lian deuh tak hi an rawn lang a. Ngun lehzualin hmalam chu a en ngar ngar a, chutiang coral chu a tam tan ta hle mai a, Sea Eggs pawh hmuh tur a awm ta zauh zauh va. Sangha tenau dangte pawh patek sei tak tak karah chuan an kawi zawr zawr bawk a. Bond chu a han muang deuh va, Leiter chuan a rawn su palh ta a. A kut chuan muang turin a han zaizir a, fimkhur takin hmalam chu a pan leh ta a.

Ngun deuhvin, helam an pantirh a a thil chhinchhiahna lam chu a han thlir a, veilam deuh hlekah chuan ava hmu leh ta mai reng a. Tawite a hleuhphei a, a hote chu lo ding turin a han zaizir leh hlawm a. A hmun chhinchhiah, coral chu a panphei a, a bul atang chuan tuichung chu a panchho va, fimkhur takin a dakchhuak ta a. Disco lam chu a han thlir a, lawng chu thla engah chuan chiang takin alang thei a. Mahse a reh ruih mai. Bond chuan tuipui chu a han thlirkual a, thliin tui a chhemchet tih mailoh chu thil che dang engmah hmuh tur a awm lo. Chutia a hawikual lai chuan Yard100 vela hla litengsawl ang deuh tui kam thatna lai takah chuan mi pakhat, hmaikawr darthlalang vuah hi a rawn dakchhuak hlawl mai a. A hawi vat vat a, a liluh leh ta a.

Bond chuan a marphu chu inrawn tlut tlut hian a hria a. A thawkna chu a phawi a, thaw a han la leh te te a. A mihring hmuhna lam chu ngun taka enin a pipe chu a hmuam leh a, tuiah chuan a lut leh ta a.

Bond chuan coral zing atang chuan Largo chu a vehphei ta a, a khat tawkin a mala inbei a hmu leh zauh thin a. Tumkhat phei chu a naute zinga pakhat, tuia bawkkhupa lang reng a hmuh avangin a thinur teuh mai nghe nghe a.

Coral kar velah chuan oxygen cylinder, thelret them leh speargun mu te chu an thal ve phung mai a. Bond chuan pahnih chu a chhar a, inbeihna hmunpui chu a sir lam atangin a thlengthla leh ta a. Sled chu a thilphurh nen chuan Largo

A thiante chuan a thu ngaichangin an lo en thap mai a. Bond chuan a kutzungpui chu vawi tam fe a han tipir a, a thiante chu an lo then tha mai a. Bond chuan a fei chu hmang mai thei turin a han humtha a, coral paltlang chuan a hleuh ta a.

Mahse coral hmun ngang anih avangin fimkhur taka chet erawh a ngai. Sangha te chu an kawi zawr zawr a, Yard 50 vel hnuah chuan a thiante chu inring turin a han vai a. Coral tenau deuh kar a tui paw chiai mai ah chuan mihring che chu a hmufuh ta le...

Bond chuan a hote chu a han vai leh a, a fei lek chungin hmalam panin chaktakin a hleuh phei ta thut mai a.

Bond-a pawlte chuan an hmelma te chu an hnunglam atang chuan an va thawng hlawhtling hle na a, an chesual titih chu a ni ta ber mai. An hmelmate chuan an Oxygen bawmphir inkarah chuan Compressed Air Speed Pack an tih chu an lo pai fur hlawm si. Chu thil chuan chak takin a hleuhtir thei tlat a ni. Mahse coral zinga che an nih bakah an bomb phurhna nawrkal thei, Sled kha an buaipui tel tlat avangin chuti tehlua chuan an cherang thei biklo a ni.

An hmelma telah chu rinai daihin an lo tam bawk si. Bond chuan mi 12 lai emaw chu a chhiar hman a. An vaiin CO2 an pai vek bakah a mu spare an la thiat tel fur lehnghal. Bond-a te ho dinhmun chu duhawmlo tak a ni. Annin an rawn hmuh hmaa feia beihphak chin thleng hman hram se la chuan!!!!

An inkar chu a hnai tial tial a, Yard 20 chauvin a dang ta. Bond chu a hawilet zawk a, a hote 6 vel chuan a bulhnai rawn thleng tawhin midang erawh chu an la hla deuh va. Largo leh a hote chuan anmahni la hmu lovin an hmalam hlir an la hawi hlawm a.

Bond chuan hmelma pawl hnuhnung ber chu a umpha a ni ta mai. Nimahse thla engin a hlimthla a rawn tihlan avangin Largo hote chu an rawn hawilet tan ta tlat mai. Bond chuan coral remchang behchhanin hmalamah a inperh phei ta a. Amah hnaih bertu chuan invenna hun pawh a nei hmanlo reng reng mai. Bond chuan a nakah a vittlum thawih a, chupa chuan an pawla mi vek, amah hnaih bertu chu ava deng dawt a. Bond chuan fei chu a han herh vak a, a phihsawk bawk a. Ava vihpa chuan a CO2 silai pai chu a thlauh va, a nak dawmin a vial ngawlh ngawlh a. Bond chuan hmelma tuichhung lutmi hovin an hleuhdarh tan chiah tih chuan ava bawhzui a, pakhat chu a hmai dap ruaiin a talbuai leh ta a. Bond chaun a hmaikawr a hawlhkehsak hman hlauh a ni. Chupa chu tuichung lamah a inperh chho vat a, a inleng pah chuan Bond a hmai chu a la lengfuh leh ta nghal a. Chupa kah tum ber chu Leiter-a a ni tih pawh a hmu nghal.

Leiterte pahnih inbei chu midang pawh hre changlo lekin an innuai a. Leiter-a beihpuipa chuan a nghawngah a rek a, ani chuan a kut thirlam chuan a hnungah a ham ve thung a.

Bond chuan hmalama inperh kal pahin a fei chu feet 6nvela hla atang chuan a han khawh a, mahse fei mawnglam thing chu a zan em avangin duh anga na pawhin a fei chu a thlawk thei tlatlo. Mahse fei hmawr chuan chupa ban chu ava tawk thi hman hram a. Chupa silai chu a dawkchhuak zawk a, mahse feiin a ban a khawihhman avangin a tum a fulo chiang hle.

Chupa chu a inher vat a, Bond chu a hmu ta thut mai a. Bond chuan a kehmawr lamah a kuah ta thut mai a, chupa tlu tur chuan a silai hmawr chuan Bond a lu ah chuan a rawn hawlh a. Bond chuan hmanhmawh zet hian a hmaikawr chu a hlihsak ta thut mai a.

Chupa chu tuipui tui al avang chuan a meng tha hleithei ta lo va, maimitchhing chungin chunglamah a hleuh chho ta nghal a. Bond chuan a bana rawn khawihtu lam chu a han hawi vat a, Leiter chu a oxygen dawt bung tawh keng chungin thawchham lek lekin a bulah chuan alo awm a. Boruak a hip thei tawhlo tih pawh a hrethiam nghal mai. Leiter a kawngah chuan a kuah a, boruak thiang awmna, feet 15 chunglamah chuan a hleuh chhohpui ta a.

Tuichung an thlen rualin Leiter chuan a thawkna dawt hmuam chu a chhakchhuak nghal a, thawpui a la nghal hawk hawk a. Bond chuan coral awmna tuipui pawnlang deuhvah a hleuhphei pui ta a. Leiter chuan thinur deuh hian amah ngaihsak lova lut lehnghal vat turin a hrilh a, Bond pawh chuan a kutzungpui tipirin tuichhungah chuan a lut leh ta a.

Bond chuan coral hmun atang chuan Largo chu a vehphei ta a. A khat tawkin a mala inbei a hmu leh zauh thin bawk a. Vawikhat phei chu a hote zinga pakhat, tuia bawkkhupa lang reng tawh chu a kalpel nghe nghe a.

Coral kar velah chuan oxygen cylinder, thelret them, speargun mute chu a thal phung mai a. Bond chuan pahnih chu a chhar a, an inbeihna hmunpui sir chu a thleng thla ta a. Sled chu a thilphurh nen chuan Largo naute pahnih chuan an lo veng ran a.

Mahse Largo hmel chu a vang hle mai. Bond chu a han hawikual a, tui a fim lutuk loh bakah an inbeihna a an tiauvut pal vel avang chuan hmuhthui a harsa hle mai. Inbeihna chu engti hawizawngin nge a kal tak tih pawh hriat a harsa rih hle mai.

Chunglamah chuan enge thil awmdan ni ang le? Leiter a chhuahpui hlim khan Flare kah en sen eng pup mai kha a hmu ngei mai a, MANTA atanga tanpuitu lawng chu engtikah nge a lo thlen ang? Chulaiah chuan Bomb dinhmun thlithlai chuan a awm rih mai dawn em ni ang?

A ngaihdan siam tura thutlukna chu a tumloh takin vawilehkhatah a rawn thleng ta phut mai. A dinglam tui paw ram mai atang chuan chariot chu a rawn dawkchhuak zawk a, a chungah chuan Largo chu chuangin, chariot darthlalang phenah chuan kun deuhva thuin a kut dinglam chuan a khalh a, veilamin fei pahnih a keng a. Sled vengtu pahnihte chuan an silai dahin chariot leh sled chu an vuahzawm nghal zung zung a.

An chetdan atangin Largo chuan Bomb chu tuifinriat thuk laia thlakbo daih a tum ni hian a lang. Disco a bomb pakhat zawk pawh chu inthup nan a paihbo zui ngeiin a rinawm bawk a ni. Evidence ber a awm tawhloh chuan ro zawng ve tho pawl dangin an rawn beithut angin a insawi tawh mai dawn a ni. Engtin nge submarine atanga lokal an ni tih a hriat tehlul ang! A hote chuan an rawn beihthut avanga lo inveng ve mai angin a sawi thei tlat a ni. An rohlu zawn chu inthup nan an hmang fel leh thei dawn niin a lang ta tlat mai.


Bond chuan an inkar hlat lam chu a han chhut a, chak theihtawpin a panphei ta a.

Bond-a'n va vih a tumna chu Largo chuan a lo hmuhhman avangin a ban dinglam chuan alo la leu a, fei chuan Largo oxygen bur chu a va fuh tleu a. Largo boruak hipna dawt chu pawhthlak ngei tumin a han bei zui ta a. Largo chuan a veilama a feiken chu a thlauh va, lo inven pahin chariot thununna chu a kuai nghal a, chariot chu hmalam panin a tleng ta zel a. Chunglam panin an dawkchho leh a, a chungah chuan Largo leh Bond te chu an inbei chho zel bawk a.

An boruak hipna nghet taka vuan chung chuan an theih ang angin an inkhawih tawn zel a. Largo chuan chariot chu nghet takin a chepbet a. Tlalo tura Bond a inham tang hram hram chu a kiu chuan a hmaiah a han nghawk sawk a, ani chuan alo bum hman hram bawk a. Ani chuan a khawihtheih chhun, Largo nakthawlah chuan a hnek mawlh mawlh bawk a.

Chariot chu tuichungah chuan he deuh hian a dawkchhuak zawk a, a sira Bond-a a uai tan tlat avangin ngil taka kal thei pawh a ni lo reng a ni.

Largo chuan a awmdan a siamrem veleh a khinghnihin a rawn khawihthei dawn tih Bond chuan a hriat avangin a thil vawn chu a thlah a, chariot chu kapzutin a mawng lamah chuan a tawlhthla ta a. A mawng lama chariot herhkawina Rudder chu a vuan a, a hmai bul lawka propeller vir chur chur mai pawh chu hrelo niawm takin a herh ta vak mai a. Rudder a herhkawi rual chuan amah pawh chu a persawn a, chariot pawh chu mumal nei thei lovin ding zawng leh vei zawngin a inthing ta nawk nawk mai a. Largo pawh chuan awm zelna chi nia a hriatloh avangin chariot atangin a insaseng thuai a, tuichhungah chuan Bond chu a zawng nghal ruai mai a.

Bond chu a tang nasa bawk a, a chau thawkhat hle mai. Him taka tlanchhuah chu atan a pawimawh hmasa ta ber a ni. Chariot a chhe tawh a, bomb lah chu an kam thei bawk si lo. A thapui sawmkhawmin a tana himna awmchhun coral lam chu a pan leh ta a.

A hah ve miahlo tih hriat deuh hian Largo chuan a rawn um a. Bond chuan coral kara kawngpeng lo awmna chu a thleng thuai a, a zim zawkah chuan a inhnawhphei ta a. Mahse a luhna lut ve lovin Largo chuan hlimthla lang duai duai hian a chung lam atang chuan a rawn zui zel a. Bond chu a han hawichho va, a hmai darthlalang phena Largo nui thu chu a han hmu a, a hmelah chuan a ngaih a tha thawkhat tih a hriat hle mai. Belchhunga sa ah riak a ngai tawh a nih hmel hle lehnghal a. Bond chuan a kut chu a han humchhin vel a, Largo kut, khawl tluk zeta hrawmna leh hrawl chu engtin nge a hneh tak ang le?

Bond-a kalna chu a lo zau sawt ta hle mai a. Hmalamah chuan tiauhmun deuh hi a lo awm a, Bond-a tan chuan han chetngaihna a vang ta hle mai.

A tuihleuh chu a tawp a, a ding ta a. Largo chuan sazu, a thanga tang tawh ang maiin dangchep tawh mah se a rawn luhkhung erawh a ngai ve thung ta a nki.

Largo chuan hmanhmawhlo takin a rawn panthla ta a. Bond-a hmalam tiauvut hmunah chuan a ding ta a. Hmalama kut leh deuh du hian coral inkarah chuan Bond chu a rawn panphei ta a. Pensawm vela a hnaihphei hnu chuan a ding ta a. Veilam leh dinglam melhkual in a han ban zawk a, a phihlet lehnghal thuai a, Octopus note a ni reng mai!! Largo chuan a hmalamah chuan a han lek a, awmze nei deuh hian a hmaikawr chu a han khawih a.

Bond chuan lung pakhat, patek in a bawh tlat tawh hi a chhar thuai a, hmaikawra octopus nembei ai chuan chhutkehin nghawng a nei zawk tih a hrechiang a. Octopus chu engah mah a ngai lo va, a hma ni lawkin thlawhna tlaah khan za tam a hmu tawh a. Largo kuttum leh ban sei tak chu a lungkham ber zawk a ni.

Largo chuan a rawn pan leh ta chher chher mai le. Bond chu kun deuh hian a ding a, coral kar zim takah chuan a thelret kawr chu taithlerloh hram tumin a tawlhlet a, Largo chuan a rawn hnaih phei hret hret zel a.

Bond chuan Largo hnunglama thil che zauh chu a han hmu a, amah tanpuitu tur em ni ang? Mahse a thilhmuh chu a dum nilovin a var lam anih avangin Largo mi leh sa anih a rinawm zawk tlat mai.

Largo chuan a rawn zuan ta. Bond chuan a lungken a a kap vela lo do tumin a ke lamah alo bawh a, mahse Largo chuan a khupin alu ah tak a lo tauhsak ta zawk a. Bond-a hmaikawrah chuan Octopus chu a nembet thlawp a, a nghawngah chuan rekzuiin, zo deuh mai hian a chawikang a, a rek zui ta ngat ngat mai a.

A hmaibul vela octopus ban chevel chu Bond chuan a hrethei riai ruai a. Rei a daih dawnlo tih pawh a inhre nghal a, chutah muangchangin a thingthi ta a.

A nghawnga rektu kut pawh chu a kiangzui ta nghal bawk a. Engtizia mai nge ni le? Harsa titak chung hian a han meng a, a hmaia octopus chu a awmah a lo insawn tawh a, a vaksawn ta vat nghe nghe a. A hmaah chuan Largo chu a nghawnga fei inthil tlang pulh chung hian alo vial ngawlh ngawlh a. A hnunglamah chuan mi pakhat, pumraw lianlo tak hian LArgo chu enchung chuan a silaimu chu a lo thun leh mawlh mawlh a, a sam sei tak chu tuifawnah chuan a leng phe siau siau va.

Bond chu muangchangin a dingchhuak a, pen a han tum a. Mahse a ke chuan alo zo ta tlatlo. A khawhmuh lah a thim ta mup mai lehnghal. Coral ngheng chuan a thingthi a, a oxygen pipe hmuamlai sir atang chuan tui pawh tlem tlemin a rawn lut ta. Amah leh amah chu 'Harh rawh, Harh rawh' a inti mawlh mawlh a.

A kut chu tuemaw hian a rawn chelh a, Bond chu a han men chuan darthlalang hmaikawr phena Domino mitmeng chuan amah chu hmu awm ang pawhin alang lo va, a chiangkuanglo tih a hriat reng mai. Bond chu a harh nghal kawk kawk mai a. Nula tuichen kawr, hmun thenkhat laia thisen kai pawh chu a hmuthei ta nghal a. A kekawrte bul velah te pawh chuan thisen khar senduk a awm thluah mai bawk a. Hetia an din dun reng chuan an thi thuai dawn tih a hmutlang ta vek mai. A intiharh a, chunglam pan chuan chautak chungin an hleuhchho dun ta a.

An pahniha tuichung an thlen pawh chuan chezui tur awmlovin an chau chhe nghal der mai a.

Khua pawh a engfel chu a ni ta mai a.