James Bond - The Man With The Golden Gun- Bung - 14

[Ruata Ralte]

14. THE GREAT MORASS

James Bond chu hmalamah a zuangphei dawrh a, rel tihmuan na chu a kuaithla nghal a. Rel chu tlem chuan a han muang deuh va, mahse relkawnga an nula phuarbeh chu yard 100 vel leka hla a lo ni tawh a. Rel tihdinna brake tak lah chu Scaramanga kutah a awm daih bawk si.

Rel driver pawh chuan a ngunhnam alo hum fel reng tawh a. Rel meituahna engah chuan ngunhnam chu a lang tlevur mai lehnghal. Driver chu kilkhatah chuan ngunhnam keng chung chuan alo ding a, ganja a ruih avang chuan a meng phelh phung lehnghal a. Mahse Bond-a silai hum chu a hmuh ve tho avang chuan chuti mai chuan a rawn hnaih ngam biklo.

Bond chuan rel tlandan leh thil kalhmang chu a han ngaihtuah zung zung a, nula chu chhan ngaihna a awm tawhlo tih pawh a hrechiang. Scaramanga chuan rel dinglam sir ah hmuh a beisei ngei ang tih a rin avangin rel veilamah chuan a zuangphei ta a.

Hendriks pawh chuan silai hum chungin rel dinglam hlir chu alo chang a. Bond a rawn hmuh veleh chuan a silai chu leksawn a han tum a, mahse Bond-a Walther mu chuan a chaldar ah tak a rawn deng ta siah mai a. A dak awrh a, then thu chung leh lukhum per lawp chuan a tluzawi ta hnawk a.

Scaramanga silai chu vawihnih a han puak dur dur a, silaimu chuan rel lu chhunglam bang chu a rawn deng ri bawl bawl mai a. Rel driver chu a te thawt a, a hrawka silaimu luhna chu a dawm chawt a, mahse a kut lehlama rel tihkiuna ala pawh reng avang chuan rel chu a kiu ruai ruai a.


Nula an phuarbehna chu yard 50 vel chauh a ni ta. A hmel chu a sam, rangkachak rawng chuan a khuh vek a, a banrek leh a ke an phuarna hruizen pawh chu chiang takin a langthei ta. Bond chu a insehruh a, a rilru chuan thil lothleng mai tur chu ngaihtuahloh hraam a tumlui tlat a. Rellu veilam atang chuan vawi 3 ava kaplet a, engemaw chu kapfuhin a inhria a. Ani pawh chu a koki veilamah hian engemaw hian a rawn deng dawt a. A inher nawk a, rel lu sira bawkrawk khawp chuan a tlu ta a. Chumi rual deuhthaw chuan rel tlanlai kein nula lu a chilbung hmawk lai chu a hmu ta nghal a. Mahse rel thilchil chu thelret khauh chi a siam plastic satliah, ram deuh mai a ni tih pawh a hmu nghal a.

Bond chu a tho leh vat a, pai nawk nawkin rel tihchakna lever chu a nawrsang leh ta a. Rel tlanlaia an inbeih tak tak chuan a dinhmun a chauh zawk dawn tih pawh a hrechiang tlat a ni. A koki na pawh xchu hrechang meuhlo hian rel lu dinglam atang chuan ava hawilet a. A rualin silai pali a puak thawt a, Bond chu a zuang let dawrh a.

A hnunglam a mite chuan an rawn kapzui thuai thuai a, mahse anmahni daltu avang chuan duh ang takin silai an chelek hlei thei biklo a ni.

Mahse Bond chuan a zuansawn zawk pah chuan thil lawmawm tak mai a hmuhman tlat. Rel brake rahna bulah chuan Scaramanga chu a thingthi nuaih a, a lu a thing nawk nawk mai a. A landan berah chuan kahhliam ve tho ni hian a hriat a. Khawilaiah nge Bond chuan a kahfuh ve le? Scaramanga chu lo che theilo tak tak pawh nise, engtin nge midang pali te chu a buaipui zui tak ang le?

Rel hnunglam, Scaramanga chuanna niu ngei tur atang chuan Felix Leiter-a aw dik tak mai chuan, "Awle, nangni pali kha, in silai te kha rel sirah hian thehchhuak rawh u, rang lutukin," a rawn ti ta a, silai a puak nghal thuai a.

Felix chuan, "Rang takin ka tih kha. Thu awihloh man ah Mr. Gengerella chuan a siamtu a hmuak dawn ta anih kha. Awle, in kut kha in tukkhumah suih ula, aw, a tha e. Aw le, James, inbeihna chu a tawp ta. i tha anih chuan rawn inlan rawh le. Tihtur pawimawh ala awm avangin kan chet zung zung a ngai a nia," a ti ta lung lung a.

Bond pawh chu fimkhur tak hian a rawn dingchhuak a, a thil hmuh chu awih pawh harsa a ti zawk hle mai. Leiter chu rel brake na chung chhawng phenah chuan alo biru reng niawm tak a ni. A hma kha chuan Bond-a silaimu avang pawhin a rawn inlan ngam mai a rinawm lo va. Chelo va let reng Scaramanga chu a kapkalak a, pistol ngul sei zet mai hi a hum a.

Bond chuan a koki chu na ut ut hian a hre ta a, lawm leh thinur teuh chung si hian, "Hrep che hian, Leiter. Engati nge hma takah i rawn inlan zawk loh? Ka vanduai phah mai dawn a sin," a han ti a.

Nui chung hian Leiter chuan, "Chu zawng, thil thleng theilo anih chu. Aw le, rel atanga zuanchhuah inpeih rawh. I chhuah har leh i haw na tur a hla a ni mai. Heng ho hi ka Green Harbour-a dan kengkawhtu te hnena hlan ka tum a ni," a han ti a. Amah chuan dawt a sawi a ni tih hriattir nan a lu a han thing zui a. An hma lawka dum hmunah chuan dahthat vek a tum ni ngei tur a ni. Leiter chuan, "Awle, lo va haw mai rawh. I chenna hmun i thlen veleh an lo buaipui mai ang che," a han tihzawm leh a.

Rel chuan tuihawk luankawr chung hi a thleng ta a. Bond chuan hmalam a han thlir a, hla deuh hlek a Orange River Lei pawh chu a lo lang thei tawh a. A tlanchak lam sana ah chuan 19mph tih hi a inkawk va mai a. Chutah driver letreng chu a han en leh a, ani chu a ha zum, hriam zet mai lang thu chung chuan a lo thenthu mai a.

Bond chuan Hendriks-a ruang chu a han en leh a, a nghawng leh hmai vela thlan lo chhuakte pawh chu a ngai ngaiin a lo la awm vek a. A hnung lawkah chuan Gengerella ruang pawh a let ngut mai. Leiter-a silai mu khan a tukkhumah dengin a hmai pawh a thlawhdarh vek thelh a ni.

An hnungah chuan zam tih hriat deuh hian midang pathumte chuan Bond an thlir chho thap a. Chutiang thil chu an beisei loh lutuk mai a ni a, hnehtheihlohva an ngaih Mr. Scaramanga sawi ang reng rengin thil a kal ta lo chu a ni si a. Ni a sa vawl vawl a, dumhmun rim chu a rawn nam chum chum a, an dinhmun thatlohzia chu an hretlang vek a ni. An hnung lam leh hma lamah silai a ven tlat an ni bawk si. Louie Paradise chuan aw lawi leh zam tih hriat deuh mai hian, "Mister, min chhuah hlauh chuan dollar maktaduai khat ka pe ngei ngei ang che, chu chu ka nu hmingin ka tiam a che," a han ti a.

Sam Binion leh Hal Garfinkel te pawh chuan beiseina sang tak nei chung hian, "Keini pawhin dollar maktaduai khat kan pe ang che," an lo ti ve thuai a.

Felix chuan hmanhmawh zet hian, "James, zuangthla vat rawh," a rawn ti thawt thawt a.

Bond pawh chuan a hnuai mai a an nunna zuah diltu te lakah chuan a beng a chhu ngawng tlat a. Zahngaihna nei miah lovin thah an tum a, anmahni theuh pawh chuan mihring eng zat thihna ah nge mawh an phurh tawh ang? Bond chu rel lu sirah chuan a lawnchhuak a, chirh hmunah chuan a zuangthla ta a.

Chirh chu a delhper chuai a, a tlakna bul vel chu a phuan bawrh bawrh a. A ri sur sur mai a, a rim lah chu a chhe em em bawk a. Kawngsir ngawah chuan sava an lo chiar chul bawk a. Bond chu a tho va, hmun hul deuh zawkah chuan a penchhuak ta a. A dar chu a na ut ut a, chau deuh mai hian a thu hnawk a.

A rawn dahchhuah leh chuan rel atanga Leiter-a zuangthla lai chu ava hmu hman chiah a. Zeilo deuh hian a tla thlawrh a, a tho leh mai theilo leh nghal a. Rel chu thui vaklo a han tlan leh a, lui luanglai chung a thleng tep tihah chuan thinghmun deuh, dum lai si ah chuan mi pakhat hi a zuangthla ve bawk a. Chupa chu Scaramanga a ni tih Bond chuan ava hrethei nghal mai a. Bond chuan anchhia a phuhchhuak bawrh bawrh a. Leiter-a'n a chian nana a kap nawn duhlo chu pawi a ti hle a ni. Tunah chuan hnathawh zawhloh annei leh ta tihna a ni a. Lehkhaden an sam satliah mai mai a, a bul atangin inkhelh that leh a ngai dawn ta tihna a ni.

Khalhtu neilo rel chu a tlan ri tluk tluk zel a. Bond chuan a chhunga chuang mi pathumte chu engtin tak awm ang maw tih a ngaihtuah neuh neuh va. Rel chu Green Harbour-ah tlanlut in Thunderbird lawng hmangin Cuba lam an pan mai angem? Bond-a rilru a zawhna tam tak chu chutih rual chuan chhanin a awm ta nghal a.

Rel chuan lei chanve vel a zawh ta tihah chuan a lulam chu a ding ur ur a, a puak ta dur mai a. Lei chu a laiah a hnuailam hawizawngin a darh thla ta chuai mai a. Rel kawng chu a chim ta rum rum mai a. Kawng chim laiah chuan rel chu naupang infiamna ang mai hian a tla thla ta a, an hnuaia lui thuk takah chuan a zu insawh per ta chuai a.

Thawm chu a reh nghal vawng vawng mai. Bond-a hnunglamah chuan chungu hi inthlahrung hmel deuh mai hian a rawn hram dut dut a. Rel tlakna chungah chuan luipui sava, Egret pali hi an zu thlawkkual pap pap a. Ralkhatah chuan mulukawlh hi a rawn lang vau vau a. A thlawk hniam tial tial a, thilpuak chuan eitur a hnutchhiah a ring ve ni ngei tur a ni.

Ni a sa vawl vawl a, relkawng pawh chu a chhuntle sut mai bawk a. Bond-a piah mai daihlimah chuan phengphehlep rual hi an thlawk kual pap pap hlawm bawk a. Bond-a chu muangchangin a tho va, chumi lamah chuan a phei ta chhat chhat a. A hmasa berein Felix chu va ngaihven tulin a hria a ni.

Leiter chu chirh rimchhe zingah chuan a lo la let reng mai a. Han tho leh thei awzawng a lo ni lo. A ke chu a awmdanah pawh a tliak tih a hriat mai a. Bond chuan bengchheng lo tura zaizir pah chuan a pan phei a, a bulah chuan ava thingthi a. "Thianpa, tihtheih ka nei rih vak dawn lo va. Silaimu hi seh la, daihlimah ka hnuksawn dawn che nia. Bengchhenna chi a ni rih lo tlat mai. Midang pawh an rawn lang thuai anga, lo nghak tawp mai teh. Kan sawnchhepa kha ka umzui vat a ngai a ni. Lei bulhnai velah khian ala awm ka ring deuh. Engtia thi tawh a ring reng reng nge maw i nih le?" tiin a han chhuahchhal a.

Leiter chu a rum hawk a, a na tawrh vang ai mahin a thiur vang a ni mah zawk. Inseh ruh teuh chung hian, "A kawr pawh kha thisenin a bawhkhat vek a, a thidang anih chuan midang rualin leiah khan a tlakhlum ve tho ka ring alawm maw le," a lo ti ve a.

"Aw le, tunah hian awle ho chuan chawhlui an kil ve mekin a rinawm a. Mahse kawng laka milem kha nangma dah em ni? Min tiphu chiang teh a sin?"

"Ni e, keima dah a nih kha. Ka tan chuan relkawng khawih chingpenna tha tak a ni. Mahse I bialnu chu sam buang a ni tih ka hrelo reng reng a ni,"

"Nizan lamah a man anih hi ka lo ti hman deuh tawh mai asin. A engapawh nise, ka hnuksawn dawn che a nia. A na viau maithei a, lo inring rawh," tiin Bond chuan Leiter chu a zakhnuaiah a zu dawm a, a theih anga dim chuan a hnuksawn ta a. Leiter-a hmaiah chuan thlanfim a rawn bawlchhuak tak tak a. Dum chin piah lei khawro deuh si, daihlim hnuaiah chuan thingkung nghengin a thuttir ta a. Leiter-a chu a rum hawk hawk a, a thidang ta a.

Bond chuan Leiter-a silai chu a kut bul mai leiah chuan a dahsak a. A thiltih tura ava hlawhchham chuan Felix chu Scaramanga chuan a rawn zawng leh ngei dawn tih pawh a hria a ni.

Bond-a chu Lei lam panin thinghmun karah chuan fimkhur takin a vak phei ta a. Engemawchen chu hmun ualau lai deuhva kal a ngaih dawn avangin a fimkhur hle a, lui bulhnai lei chu a ro deuh hlek zawk a ring a ni.

Dar 1:30 a ni a, ni lah chu a sa chang vawl vawl hle mai a. Bond pawh chu a ril atamin a tui a hal nasa tawh mai a, a dar vel chuan a tur ut ut reng mai bawk si a. A hliam chuan a khua a tisik lek lek ta mai a, a khawhmuh te pawh chu phe deuh ruai hian a inhre nghe nghe a. Eitur tuihnai tak takin a ngaihtuahna chu a hruaikual nasa hle mai a. Chutiang lam hlir mai a ngaihtuah lai chuan thingzung a pal palh a, a tlu ta thuai mai a.

Chelo chang lovin a han mu vang vang a, a tluk zawnga a thawm siamte chu a nasa viau angem tihte a ngaihtuah a. Tuipui lam atanga thli rawn tleh chuan dum hmun chu a rawn tuam huk huk mai a. Yard 100 vela hlaah chuan lui tui nu deuh mai chu a luang nguai nguai mai a, perhpawng leh sava an hram nuaih nuaih mai bawk a. Bond chu a tho leh ta tham tham a, a han inthingharh a. Gunman hlauhawm tawpkhawk pelh laia eitur ringawt mai a ngaihtuah chu mak pawh a inti zawk hle. Thaw a han la hawk hawk a, a rilru tihharh a tul tih pawh a inhrechiang hle.

A awmna lai vel chu ngun deuh zawk hian a han thlir kual vel a.

Lei thleng tru chuan yard 100 vela hla kal ala hmabak a. Veilamah chuan thinghmun chu tlemin a thawl deuh zawk a. Niin lei a emro tawh te chu an dum huam mai bawk a. Mahse thim deuh laiah te chuan lei hnawnglai te chu a la awm thliah thluah tho bawk a. Bond chuan a kawrvar hak chu a thup deuhnan a kawrnghawng chu a pawt chho va, relkawng sirah chuan yard 20 vel a han kal leh a.

A kalna ah chuan thingtang ro leh hnimhnah rah palh tur avang hlauh va. Mahse hnim chhah tak takin kawng a lo dal thin avangin hel deuhte a han ngai leh thin bawk a.

A beng chu thawm riva awm hlek ngaichangin a chhi reng a, a hmalam hnimbuk vel chu ngun takin a thlirkual pah reng bawk a. Thosi leh tlip lamin an rawn bawr tan a, an sehna lai chu dimtein a han nuai a; han benrik ngam a ni ngang bawk si lo.

Bond chuan yard 200 vel kal tawhin a inhria a, chutah ro zet maia khuh ri a hre ta a.