James Bond - The Man With The Golden Gun- Bung - 15

[Ruata Ralte]

15. CRAB-MEAT

Khuhri a hriatna chu lui awmna lam yard 20 vela hlaah a ni a. Bond chu a thingthi vat a, a hriatna zawng zawng chu a harh nghal vek a. Minute 5 vel a han nghak leh hlek a, khuhri pawh chu a reh zui ve leh ta daih a. A silai a sehkawh a, hmalamah chuan fimkhur takin a vakphei ta a.


Hmunfai lai, chirh ro tawh zinga mi pakhat lo thu chu a hmunghal vat a. Bond-a vaklai chu che lovin a tawp chawt a, a thawkdan ah pawh a fimkhur ta hle mai.


Scaramanga chu thingzung ngheng hian alo mu a, a lukhum pawh kha a lo khum tawh lo. A taksa dinglam zawng zawng chu thikhar hian alo bawh vek a, rannung hian an lo bawr luai luai a, mahse chungte chu hre awm pawhin a awm lo. Amaherawhchu a mitmeng te erawh chu a fiahkak thung a, a bul vel chungun deuh mai hian a enkual pah reng zel bawk a. A bula thingzung chu a dawm a, silai hmel hmuhtur erawh a neilo.


Scaramanga chuan a enlai hmun pakhat chu ngun deuh mai hian a en ta reng mai a. Atir chuan Bond chuan chutia Scaramanga mit latu tak chu enge ni tih a hrethei mai lo va. Mahse reilote ah daihlim laia rul lian zet mai, hnungzang rang ruai mai chu a hmu ve ta a. Chu rul chuan Scaramanga chu panphei pah chuan a lei a chhuah zoh zoh lehnghal a.


Bond chuan tan tak leh hmuhnawm ti deuh mai hian a thlir ve ta zawk a. Ani damlo che hleitheilo chuan engtin tak ti ang maw tih a ngaihtuah neuh neuh va. Chu rul chu a lendanah chuan saphai chikhat, EPICRATES an tih chhungkaw zinga mi ni ngei hian a hriat a. Thisen rim chuan a hip ni ngei tur a ni. Mihring tan phei chuan an hlauhawm lem lo va, mahse chu chu Scaramanga chuan a hreve angem? Scaramanga chuan hmel danglam miahlo hian a kut dinglam chuan muangchang hian a kekawr tlang chu a hlim a, chemte hriam tawn, zum tha zet mai, Stiletto an tih chi chu a phawi ta zal zal a. Chemte chu inring tak chung hian a lek a, mitmeng fim tak chuan a lo nghak ta a.


Rul chu piah deuhvah chuan a ding ta a, alu kan meuhvin Scaramanga chu a han thlir leh a. A lei a chhuah zawk zawk a, lu kan ur chung chuan a hnaih phei ta a.


Scaramanga chuan che miahlo hian ngun takin rul chu a lo en reng a. Rul chuan a ke a rawn thleng phei a, a awm zawnah chuan a tawlhchho ta a. Scaramanga chente humlai chu a tle ta zawk mai a. Chemte chuan rul lu chu a vittlang zawk a, leiah a kilhbet ta nghal a. Rul chu a inlet but but a, thingzung bakah Scaramanga ban te chu a vet nawk nawk mai a, mahse reilo teah a zal ta raih raih a.


Scaramanga chuan a han nghak leh rih hlek a. Rul thi tur mei chu a han che leh dar dar a, a zalhlen ta a. Chutah chemte chu a phawi a, a lu chu tan hmawkin a paih ta daih a. A va paihna chu chakai kaw bul kher anih avangin chakai te chu an lo chhuah mai beiseiin Scaramanga chuan a han en vang vang a, mahse chakai hmel hmuh tur a awm ta mai lo va.


Bond chuan che miah lovin Scaramanga chetla vel chu a thlir reng a. A chetdanah chuan Scaramanga chu a rilru a fimin a hlauhawm dan pawh a la pangngai reng a ni tih a hrethei a. A rul thah danah chuan ala hlauhawmzia chu chiang takin a hriattheih a ni.


Scaramanga chuan a awmdan chu a han siamrem hlek a, chutah ngun lutuk mai hian a bul vel chu a han enkual leh ta a. Bond-a awmna pawh chu a rawn enthuak a, mahse a thawmhnaw inbel chu a dumlam a nih avang chauhva rawn hmulo ni hian a lang a.


A duhtawk a thlir hnu chuan Scaramanga chuan rul chu a pumah a nghat a, a dul lama zaithlerin a vun chu a lip ta a. Rulsa chu a zaithla a, a duhloh lai apiang chu chakai kaw bul lamah chuan a vawm phei zel a. Chakai rawn lang a awm mailoh avangin a lungawilo lek lek ni te hian a hriat a.


Scaramanga chu a han hawikual leh phawt a. Chutah a khuh khak a, a chil chu a kutah chhak in a han en vang vang a, chutah a thingfai leh ta a. A chil chu thi khar hian a bawh sen nguai mai a. Silaimu khan a awm veilam ah fuhin a chuap chu a khawih hlek ni hian a hriat a. A nihna takah chuan Scaramanga chu damdawi inah pawh rang taka enkawl ngai chi a ni ngei mai.


Scaramanga a han hawikual leh te te a, chutah rulsa chu a hel chuan a ei ta bawrh bawrh mai a. Reilo te ah ui sasahrang chhar fuh ang mai hian a lim ta nghek mai a.


Bond chu fimkhur leh muangchang tak hian a han dingchhuak a, a silai chu hmang mai theia inring hian a penchhuak ta a.


Scaramanga chuan a lo hmu vat mai. Rul sa la thial bawrh bawrh chung hian, "I lo lang har hle mai. Ka zanriah hi min rawn kilpui ve dawn lawm ni?" a lo ti sam mai.


"Ka rawn tel ve lo mai ange. Mahse i kut pahnih kha a pahniha hmuh ka duh avangin ei chhunzawm zel rawh khai,"


Scaramanga chuan ner nawng hian a kawra thisen kai vel chu a han kawk a. "I nep hle mai. Mi thi tur i hlau a maw?" a han ti ngat a.


"Mi thi tur siin rul i buaipui dan si khan ngaih i ti thalo deuh tlat alawm. Hriamhrei ila nei em?"


Scaramanga chuan a kawrchung chu phelh a han tum a, Bond chuan, "Fimkhur takin, muang te khan che rawh. I zakhnuai kha ka hmuduh mai a nia. I ke kha i kekawr chhanah khan han zut teh. Keiman rawn tihtur a ni a, mahse nichina i rul thah tak chan ang kha chu chan ka it vaklo a nia. I chemte kha thinghmunah sawn paihphei nghal rawh. Mahse fimkhur hle la, ka kutzungtang hi a za teh a nia. Nunna nei hran ve ang mai an ni. Aw, tikhan," a lo ti zung zung a.


Scaramanga chuan a chemte chu a rawn thehphei a, Bond chu a pensawn vat a. A dinna leiah tak chuan chemte chu a tla bur va mai a. Scaramanga chu a han nui hawk a, a khuhzui nghal bawrh bawrh mai a. A hmelah chuan na a ti tih a hriat hle mai a, mahse a tiluiin a uar lutuk em tih chu hriat a harsa hle thung. Damdawiina dah a nih chuan Scaramanga chu kar tam awm lovin a chhuah leh mai theih a rinawm. A rul sa eilai chu dahin Bond-a sawi ang chuan a ti ve zel a, chumi hnu chuan, "I lungawi tawh em?" a ti a, rulsa chu a ei chhunzawm leh hmiah hmiah a.


"Lungawi khat e.," tih pahin Bond chu a bul hnaiah chuan a han thuhniam a, a silai pawh chu inthlahdah takin a keng a. "Aw le, i titi dun teh ang. Hun i ngahloh hmel viau lehnghal. Scaramanga, tun hi i kawng zawh tawpna tur a ni ta. Ka thiante tam tak i that tawh a, phalna pek ka nih angin ka that dawn che a ni. Mahse Margesson-a ang ni lovin rang takin ka tirliam ang che. Ila hria ang chu maw? a khup ve ve bakah a ban i kap hmasa a, i pheiukhawk fawp turin ila vahtir zui a. Cuba-a i thiante bulah unathuan nan tak ila hmang zui leh zel nen. Mi engzat chiah nge maw i thah tawh reng le?" tiin a han zawt a.


Rulsa la ei mawlh mawlh chung hian Scaramanga chuan, "Nang nen chuan 50 vel an ni ang," a lo ti mai a, chumi poah chuan a eibang chu Bond-a lamah chuan a han thehphei a. "Ei ve tawh rawh le, mi tenawmpa. I hna pawh chu i duh leh thawk lehnghal ta che. Ka lak atang hi chuan eng thuruk mah hriat hi tum buai suh. Tin, mithiam tak tak te nena inbeihna atanga la damchhuak zel ka ni tih hi theihnghilh suh. British ho zingah mihlaim che theilo that duh khawp tumah ka la hre bawk lo; an huaisenna in a tlin ngangloh vang a ni. Helaiah hian min puitu tur an lo thlen hma chuan kan inkawm anga a ni mai alawm. Roreltu hmaa din chu ka hreh hauh hleinem. Enge min puhna tur hriat an nei dawn em ni?" a ti ta pung pung roh va.


"Aw le, pakhatna atan chuan Hotel hnung lui a in paih tak Mr. Rotkopf-a lu a i silver silaimu kha ni se la.."


"Mr. Hendriks-a lu a i kahna nen khan a inrul tawk vel anih chu. Tan te pawh kan tang dun thei maithei asin. Spanish ho jail hi a nuam an ti khawp asin. Ip thuntu pawlah te pawh an duh mai thei che asin. Rotkopf-a chungchang chu engtia hria nge maw inih le?"


"I ngaihthlak rukna kha thildang hmanga ngaihthlak ruk leh tho a nia lawm. Scaramanga, security i ruaisual a, tunlai chu i chesual thei riau anih hi. I manager te lah kha CIA mi leh sa ve ve an ni bawk nen. In thusawi zawng zawng kha tunah chuan Washington lamah thawn a ni vek tawh. Ross-a i thahdan i sawite pawh kha a tel vek a nia. I tan khua a var thlawtlo ka tih chu i hrethiam tawh mai em?"


"America court-ah chuan Tape hi evidence-ah an ngailo tlat a ni. Mahse chuti chung pawhin i thusawi awmzia chu ka hrethiam tho ve. Aw le, dollar maktaduai khat ka pe che anga, inrem mai ang hmiang,"


"Relah khan maktaduai thumin min thlem asin,"


"A thlep ka pe ang che,"

"A pawi ngawt mai,'" tih pahin Bond chu a dingchhuak ta a. A hmabak tihtur awm chu a hreh takzet mai. Mahse a rilruin Margesson-a te, an thihhma a an awmdan turte kha a ngaihtuah lui tlat a. Tunah hian Scaramanga hi a thahloh chuan midang tamtak a thatzui leh thuai dawn tih pawh a hria a ni. That tura thupek a ni a, engang dinhmunah pawh ding se mi hnawksak leh hlauhawm lutuk anih miau avangin a dahthat ngei ngei a ngai tlat a ni.


"Thuchah te i nei duh em,Scaramanga? Keimah ngeiin ka rawn buaipui ange. A tul anih chuan ka puangzar bawk lovang," a ti ta a.


Scaramanga chu a nui hawk a. Tun tyum chu khuh pawh a khuh ta lo.


"Gentlemen tihdan te chu i han hmang vel a ni maw?I silai leh a mu kha mahni inthah nan min hnutchhiah ta la, lehkhabu a an ziah anglo takin mahni inthat lovin ka rawn zui che anga, ka kaphlum ngei ang che," a han ti leh ngat a. A mitmengah chuan hlauhna chhete mah a awmlo. Tin, Bond-a chu a ngainepin a thamlo hle tih a hriattheih a. Chu tak chu khawvela gunman hlauhawm ber leh manto ber anih chhan tak pawh a ni reng a ni.


Bond chuan Scaramanga chu a han en vang vang a. Reilote a thgi mai tur ni siin engahmah a ngailo thei tlat mai chu mak a ti rilru hle a. Nge, finrawl thawhin thil engemaw hi a la khek ru zawk em ni zawk ang le? Mahse han en mai pawhin ralthuam engmah kenglo a ang viau bawk si.


Scaramanga chuan a kut a han pharchhuak a. "Aw le, Catholic ka ni a, ka han tawngtai lawk ange, a rei lovang. Chumi zawhah chuan i duh ang angin min ti dawn nia. Mi pangngai tak i niin ka hria a; kei chu ka vanduai ta deuh hlek mai a ni e. Ka silaimu khan dinglam hlek lo pan sela chuan kan dinhmun hi a inthlak thleng ngeiin ka ring. A dik em? Ka tawngtai thei dawn em, Mister?" a ti ve ta a.


Bond pawh chuan a silai a lekhniam ta a. Scaramanga chu hun tlemte tal pek ve chu tha a ti a. Mahse ni sa, riltam, tuihal leh hliam tuar chung chuan rei a veng thei lovang tih pawh a inring a. Hah leh chau tih hriat tak hian, "Aw le, Scaramanga, minute khat chu hun i nei thei ang," a ti ve ta a


"Ka lawm e," tih pahin Scaramanga chuan a hmai a hup a, Latin tawngin a tawngtai ta a. Bond chu nisa ah chuan a ding reng a. Scaramanga chu a en ve tak na a, a na tawrh leh chauhna avang chuan a mitmeng pawh a harh lo hle. Scaramanga chuan a tawngtaina chu a chhunzawm zel a, a thuchham chuan mut a tichhuak thei lejk lek mai a.


Scaramanga kut chuan a biang sirlam a paan hret hret a, a beng a thleng ta a. A tawngtaina erawh a la kaltluang hle zel a.


Chutah vawilehkhatah a tukkhum lam a dap ta thut a, a kutah chuan deringer rangkachak rawng hi a rawn chawrchhuak nawlh a, a puak nghal thuai a. Bond chu a vir nawk a, a tlu nghal thuai a.


Scaramanga chu hliam neilo ang mai leh keite sa hmu ang maia inzo hian a thochhuak a, a chemte thehthlak chu a chhar a.


Chutih lai tak chuan Walther PPK chu a indawt zatin vawi 5 a rawn puak thuai thuai ta mai a. A puak ri a rehfel meuh chuan Bond chuan a silai chu a thlauh a, a dul sira deringer mu luhna chu a dawm vawng vawng a.


Scaramanga chu a tlu mai lo. Vanlam hawiin a ding vang vang a, chutah a chemte leh silai hum chu thlauhvin, a lung, silai muin a verh taak chu a han phu leh dawt a, chezui thei anih tawhloh avangin hnungzawngin a awn riai riai a, a tlu thum ta dup a.


Nakin deuhvah chuan chakai kua atang chuan chakai an lo chhuak tan ta. Rul sa them chu an rawn bawr a, mihring ruang chu zanlama buaipui atan an khek rih ni te pawh hian a ngaih theih a.