NATHAN SEASON 2 Episode-2 (UNLEASH THE BEAST PT-2)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON 2 Episode-2 (UNLEASH THE BEAST PT-2)

Unread post by Aaron Dustin » February 29th, 2020, 11:05 pm

NATHAN SEASON-2 Episode-2
UNLEASH THE BEAST (Part-2)
(by : Aaron Malsawmdawngzuala)

Jerry-a pa, Pa Muana te thian ho pali chu zu in pah chuan an titi a, an rilru a hah tlang hle mai a. Mike-a pa chuan, "U Muan, DGP hi kan ringzo tak tak ang maw? An department pumpuiin mi pakhat lek pawh an zawng hmu zo lo chu ania." a ti nuah nuah a. Kima pa chuan, "Ni e, professional te ruai zawk mai ila, a chi zawk lo maw?" a lo ti ve bawk a. Siamtea pa chuan, "Ka fapa min thahsak tu hi a him bik tur a nilo, detective hmelhriat ka nei alawm, chu chuan that rawh se." a lo ti pung pung a. Jerry-a pa, Pa Muana chuan a zu no ken lai chu a tlak pap a, muangchang chuan, "Lungngai suh u, DGP hi ring tawp rawh u, ka thu a hnial ngam lo ang." a ti a. Chutih lai chuan Mahriati thattu te zinga la dam ho, Mike-a, Jerry-a leh Kima te chu party naah kalin an lo rui lehpek kher mai. Mike-a chuan, "Bathroom ah ka va inphih harh lawk ange, ka kai emai." a ti a, Jerry-a chuan, "Reilo la aw....kan haw tep tawh ania." a lo ti ve bawk a. Mike-a chu bathroom lam pan chuan a phei a, a kal ngil hletheilo, a rui em bawk a ni. Bathroom ah chuan a lut a, tui a herh haw a, a hmai chu a phih mawlh mawlh a. Chutia a hmai a phih mawlh mawlh lai chuan tu emaw ni hian tui chu a rawn herh tawp ta daih mai a, muangchangin Mike-a chu a hawi chho a, Nathana lo nui sang chu a hmu a. A phu zawk a, "Nang hi.." tih chauh a sawi hman, Nathana chuan na em em hian a hnek siah mai a, nikhaw hrelo chuan a let nghal der a. Mike-a a harh leh chuan hmun thim deuh ah hian alo awm a, bangah phuarbeh alo ni a. A hma zawnah tak chuan motor hi a ding a, motor light chuan a rawn chhun a. Motor atang chuan Nathana a lo chhuak a, Mike-a chu a va pan hnai a. Nathana chuan chiang takin Mike-a chu a en a, "I thianpa Kima kha, call la, hetah kan awmna ah hian rawn phei tir ang che." a ti a, Mike-a chuan, "A teuhlo mai, eng ang pawn min sawisa mah la, ka phone chuang lo ang." a lo ti pang pang a. Nathana chuan nui suk pah hian, "Umm..animaw..anih chuan tangkaina i neilo a nih chu." a ti a, motorah chuan lutin motor chu a start a, Mike-a zawnah chuan ava tlan ta a. Mike-a hlau lutuk chuan, "Nilo...min chhuah rawh...khawngaihin, ka phone ang, Kima chu ka bia ang." a ti vak vak a. Nathana chuan motor chu a tiding a, Mike-a phone chu a phawrh a, Mike-a chuan hreh tak chung chuan Kima chu ava phone ta a. Kima chuan, "Hello, Mike..khawnge i awm daih a?" a rawn ti a, Mike-a chuan, "Khawnge i awm Kima?" a ti a. Kima chuan, "Kan haw daih tawh, khawnge i kal kan hre silo a." a rawn ti a. Mike-a chuan, "Kima, ka phone location kha rawn chhui zel a, tunah lo kal vat rawh. Police te hrilh lo la, tunah lo kal vat rawh." a ti a, Kima chuan hlauhthawn hmel tak hian, "Enge i chungah thleng a?" a ti a, Mike-a chuan, "Lo kal la a nimai." a ti a, Nathana chuan Mike-a phone chu a hmeh tawp sak ta daih mai a. Kima chu a ngaih a thalo hle mai a, a thil hriat te chu a pa a hrilh ta tawp a. Kima pa chuan, "Bawiha, lungngai suh, inah hian lo awm la, keimahni kan va kal ange." a ti a, Kima pa chu security guard 10 rual vel te nen chuan Mike-a phone location chhui chung zel chuan an chhuak ta a.


Building hlui deuh pakhat hi an va thleng a, building chhungah chuan Mike-a phone pawh chu a awm ngei a ni tih location atang chuan Kima pa chuan a hre thei a. Building chhungah chuan an lut a, location chu inchung lamah a chho tih an hmu a, an chho ve zel a. Atawpah library room chhungah chuan location chu a tawp ta chat a, library chhungah chuan an lut a, lehkhbu chhia tam tak hi a lo inrem teuh mai a. Mike-a phone location chu lehkhabu dahna hnungah a tawp leh ta daih mai le. Chumi phenah chuan Nathana chu a biru turah ngaiin Kima pa te chuan chumi lehkhabu dahna chu an silai ken chuan an kap ta vak vak mai a, lehkha them a leng chuai chuai a, mahse tumah anlo awm lo. Kima pa chu a va kal hnai a, chhuata Mike-a phone lo let reng chu a hmu a. A chhar pah chuan, "Zawnga mai mai chuh." a ti ringawt a. Chu veleh an hnung atang chuan silai a rawn puak ta dur dur mai a, security guard pathum chu an let der mai. Kima pa chu rang takin a hawi let a, Nathana'n rum em em a alo melh khur mai chu a va hmu a, midang chuan an silai chuan Nathana awmna lam chu an va kap a, mahse a tlanchhe hman. An bul vel chu an kap kual vak vak a, atawpah an silai mu a zo ta hial a. Kima pa chuan, "Zawng rawh u, that ngei ang che u." a ti a, tichuan guard te chuan an zawng ta a. Thil ri bur bur ri te, in vaw ri chawrh ri te, in hnek ri siah siah thawm te chu kil tin atang chuan a a rawn ri chhuak a, Kima pa chu a mangang hle a. Bang sir atang chuan a mal te te in guard te chu an rawn let chhuak tawp tawp a, atawpah Nathana alo chhuak ta. Kima pa chu ava pan a, na em em hian a hnarah a hnek siah mai a, Kima pa chu a thal tawp a. Thutthlengah thuttirin a phuar bet a, security guard te chu hmun khatah a phuar hlawm bawk a. Nathana chuan Kima pa bulah chuan, "I fapa Kima khawnge? Helai hmunah hian rawn kal tir rawh." a ti a. Kima pa chuan, "A teuhlo mai, min that pawh nila alo kal lo ang." a lo tih khum a. Nathana chuan voice recorder a la chhuak a, a on a, Kima pa hmai zawnah chuan ava dah a. Kima pa chuan, "Ka tawng hi record i duh amaw? Khanglang che chuan, ka fapa hi chu i that ve chuanglo ang, ka dam chhung hi chuan i that lovang. Enteh NAthan, pawisa i duh em ni? Engzat pawh sawi la ka pe ang che." a ti a. Nathana chu a ngawi vang vang a, "Engzah nge min pek ang?" a ti a, Kimpa pa chuan, "Cheng nuai hnih ka pe ang che." tiin alo chhang a. Nathana chuan, "Nuai 2 chauh maw?" a lo ti a. Kima pa chuan, "Awle...nuai 5 ka pe ang che." a ti leh a, Nathana chuan, "Animaw...mihring nunna hi cheng nuai 5 man maw a nih a?" a ti a, a laptop a phawrhchhuak a, a voice recorder nen chuan connect in eng eng emaw hi a type zuah zuah a. Security guard zinga pakhat chuan hlauh hmel tak hian, "An thusawi ang zelin kan awm a, kan duh vanga ti kan ni biklo." a rawn ti hluam hluam a. Nathana chuan rum deuha melh pah chuan, "Cheng nuai 5 i nei ami?" ati a, chupa chuan, "Aih neilo." alo ti a. Nathana chuan, "Anih chuan lo ngawi hmak rawh." a ti a, laptop chu a khawih chhunzawm mial mial a. A zawh fel hnu chuan Kima pa phone chu a va laksak a, bang lehlamah pheiin voice recorder nen, earphone leh microphone tereuhte nen chuan bang phenah chuan a kal a, Kima pa phone atang chuan Kima ava phone ta a. Kima chuan, "Hello ka pa?" a lo ti a, Nathana chuan, "Location hi chhui la, cheng nuai 5 nen lo kal ang che, a cashin lo keng ang che." a ti a, Kima chuan, "Tunah maw, ngati teh thut nge ka pa?" a rawn ti leh a, Nathana chuan, "Lo kal vat la nimai." a ti a, phone a dah a. Kima pa chuan hmuhsit hmel tak hian, "Ka phone atangin ka fapa i phone a, keimah angin..haha. Ka fapa hi mi mawl anilo, alo kal chuanglo ang, a pa aw leh midang aw te chu a hrehrang ve lutuk alawm." tiin alo nuihzat vel a.

Nathana chuan, "I fapa Kima saw maw, keiman lo kal turin ka ti lo, nangmah zawkin lo kal turin i hrilh a ni." a ti a, Kima pa chuan ahrethiam lo hle mai. Nathana chuan, "I hrethiamlo animaw?" tih pah chuan laptop chu a khawih leh mawlh mawlh a, audio pakhat a play a. Chu audio chu nichin lawka Nathana leh Kima inbiakna kha ani. Mahse Nathana aw chu Nathana aw tak tak anilo, Kima pa aw zawk a ni ta daih mai." Kima pa chuan, "Ehe...enge awmzia? Zawnga, i chak lo ang." tiin a tal vak vak a. Nathana chuan, "DCP Nathan Malsawmkima hi tunge a nih i la hre chiang chiah lo ani, nichina i tawng ka record nachhan chu i voice hi ka mamawh vang a ni. I fapa chuan a thihna tur a rawn pan mek ania, a lo thleng tep ang." a ti a, Kima pa mangang taka a tal vak vak lai chu Kima pa phone vek chuan video in ala a, DGP ava thawn a, tichuan a kal ta daih mai a. DGP chuan a thil dawn a hmu chu a mangang hle mai, Kima pa chu rang takin a call nghal a, mahse a chhang thei silo. DIG a call leh vat a, "DIG, rang takin Kima pa Pu Tluanga phone location ka rawn thawn che anga, va kal vat ang che, chanchin min lo hrilh leh dawnnia." a ti a, DIG pawh chu rang takin a inkhalh chhuak nghal a. Chutih lai chuan Kima pawh chu suitcase, a chhunga cheng nuai 5 lai mai awm khai chung chuan apa phone location chhui zui zel chuan a rawn thleng ve ta. Inchung berah a han chho a, an building awmna inchung hi inhnuai ber atang pawhin motorin a kal theih a, motor tlanna tur bik kawng a sirah a kualin zimtea siam a ni. Kima chu a han thleng a, apa thutthlenga phuar beh a lo awm chu a va hmu a, hlauthawng takin a pa chu ava pan a, "Ka pa..tinge hetia i awm?" a ti a, Kima pa chuan, "Helai hmun atang hian chhuak rawh, chhuak vat rawh, i tan a himlo ania." a tih lai chuan hnunglam atang chuan Nathana chuan Kima samah chuan a tham a, na em em in bangah a lu a tauh tir chawrh a, nikhaw hrelovin Kima chu a let der mai a. Kima chu hnuk pheiin a motor awmna lamah a kalpui a, motor hnung chu a hawng a, Mike-a lo let reng chu Kimpa pa chuan a hmu a, "Mike, Mike...Kima...ani theilo, Nathan, chhuah hram teh." a lo ti lawm lawm a. Nathana chuan suitcase chu Kima pa hmaah tak chuan ava dah a, "Hei le, cheng nuai 5 chu le, nunna pakhat man chu cheng nuai 5 i ti anilawm ni, pawisa hi la la, keichuan i fapa nunna hi ka duh a ni." a ti a, motor hnungah chuan Kima pawh chu a dah lut ve a, a khar a, a tlan ta daih mai a. Minute reilote hnuah chuan DIG pawh a rawn thleng ve ta a, Kima pa chu a va hmu a, "Ehe Pu Tluang, enge awmzia." tih pahin ava pan phei a, hrui tereuhte lo inthlung chu a rap phelh a, thil engemawni hi a t(r)ek zeuh a, a kang ta. Hrui chu a kang phei zel a, Kima pa chuan, "Hey...enge awmzia?" tiin a au vak vak a, DIG lah tihngaihna ahre biklo, a au ve vak vak ringawt mai a. Hrui chu a kang chak tawlh tawlh a, chutah security guard ho bulah a va kang phei ta a, an zawn ava thlen chuan a alh pup a, guard ho chu nasa takin an kang ta vak mai a, chu mei alh hluah hluah mai chu building hnuai ber atang chuan Nathana chuan hawichhovin alo thlir renga.


Kima pa leh DIG chu an him ta hram a, a tukah chuan DIG leh Kima pa chuan DGP hnenah engkim an hrilh ta vek a. Chutih lai chuan DGP phone chu alo ri a, phone ami chu Nathana chhui tura an tih police force te zinga mi a ni. Chu police chuan Nathana chu Hotel *** ah ni 2 liam ta khan a checked out thu leh receptionist te bulah ni 2 hnu-a Lengpui Airport a kal a tum thu a sawi tih an hriat thu a rawn sawi a, DGP chuan DIG bulah chuan, "DIG, Lengpui Airport ah tunah lo va thlen khalh ang che. Fimkhur takin a ruk thei ang berin man ang che, mipui te ti chi ai reng reng suh ang che." a ti a, DIG chu a kal ta a. Dar 1 a ri a, Nathana chu Lengpui Airport ah chuan DIG chuan a hmu ta ngei a. Ticket counter atanga a ticket nena alo chhuak lai chu DIG chuan a hnungah pistol-a tinin a beng bulah, "DCP Nathan, ngawi rengin min rawn zui ang che." a ti a, Nathana pawh chu a kal ve mai a. CCTV zawn an thlen dawn chiah chuan Nathana chuan a bag ah lai chu a phelh a, a sirah chuan a theh phei a. DIG chuan bag a thehna lam chu a va hawi phei a, chumi hlan chuan Nathana chuan DIG kut chu a vuan thut a, chuuatah chuan silai chu a hmet puak a. Mipui an mangang a, an tlan darh hum hum a, Nathana chu a ban pharin zawi muang in a tawlh hnung a. Airport Security guard ho chuan DIG chu an tlan hual a, silaiin an tin ta thup mai a. DIG chuan, "Min kap suh u, Police ka nih hi, hepa hi misual ania ka man mek a ni." a ti chul mai a. Nathana chuan a lo nuih sang a, DIG chuan thinrim tak hian a motorah a hruai phei ta a. Station lam an rawn pan leh vang vang a, an thlen meuh chuan khua a thim lek lek tawh. DGP chuan a room ah news alo en a, news ah chuan, "Vawiin dar 1 leh a chanve bawr vel khan DCP Nathan Malsawmkima chu DIG Liansanga'n Lengpui Airport ah mipui te hmuh lai ngeiin a man a. DIG Liansanga hian a silai hmet puakin mipui te a ti chi ai hman hle a ni." tiin an lo puang a. DIG te an lo thleng a, Nathana chu an lo hruai bawk a. DGP chuan DIG bulah chuan thinrim tak hian, "Thil ho te pawh pangngai takin i ti theilo a nih hi, laktlak loh lutuk." tiin a lo vin hrep a. DIG chuan, "Ka tihpalh a ni Sir." a ti a. DGP chuan, "Ka la sawipui leh ang che. Tunah chuan Nathana kan buaipui angai, khawnge a awm??" a ti a. DIG chuan, "Dark roomah kan dah." a ti a, DGP leh DIG chu an va kal ta a. DGP chuan, "Nathan, heta i awmna chhan hi i hria em?" a ti a. Nathana chuan, "Enge ka awmna chhan ka hrelo, he DIG mawl deuh hian Airport ah ka zin tur minlo chang a, min man ringawt alawm." a ti a. DIG chuan, "Nathan, khawnge Kima leh Mike-a?" a ti a. Nathana chuan nuih pah hian, "Awhawww...chu chu animaw min lo man chhan?" a ti a. DIG chuan, "Sawi vat rawh, anihloh chuan i chak lo ang." a ti a. Nathana chuan, "Khawnge an awm ka hrelo. Ka hriat zawng chu Siamtea car ah a kanghlum palh a, tichuan Kima leh Mike-a an bo a, kei erawh ka zin dawn a, DIG hian minlo man ringawt a, abak engmah ka hrelo." a ti a. DGP chuan, "Enteh DCP, i awmna hi ka custody a nih hi...diktaka min chhan loh chuan helai hmunah hian ka that thei che a nia." a ti khur khur a. Nathana chuan, "Thil tisual angin tinge min ngaih tlat a? Sir, helai hmunah hian keimahin ka lo kal, tumah tanpuitu ka nei lo. Ka chhungte kha i sawi angin fire accident in an thi a, kei erawh ka him thung. Kima leh Mike-a an bo a, tinge keima kidnap angah in ngaih leh daih si a?" tiin a zawt let a. DIG chuan, "I thil tih vek ani tih kan chiang, Siamtea kha i hal hlum a, Kima pa i phuar a, security guard panga lai i hal hlum bawk a. Tin, Kima leh Mike-a i kidnap mek bawk, inzep duh suh, kan hre vek." a lo ti ve bawk a. Nathana chuan rum zet hian DIG chu a melh a, "Khawnge evidence?" a ti a. DGP chuan, "Nathan.." a tih lai chuan Nathana bawk chuan, "Khawnge evidence ka tih chu DGP? Thil tisualtu te chuan evidence an hnutchhiah i ring a mi?" a ti a. DGP thinrim lutuk chu pawnah a chhuak a. Pawnah chuan Kima pa leh Mike-a pa anlo awm a. Mike-a pa chuan, "Saw mihring thiltih vek saw a ni tih kan hre vek a, engvangin nge thu in la zawh vakvak a? Hlap ula, dawp ta che u." tiin a lo vin khur khur a. DGP chuan, "Evidence tha tak a ngai si a, lo nghak hram hram rawh u." a ti a.

Kima pa chuan, "Ka awm lai rengin ka fapa leh Mike-a a man a, min sawisa a min phuar bawk a, hrep tak chuan." tiin a lo tap pur bawk a. DGP chuan inchhungah lut leh in Nathna bulah chuan, "Khawnge Kima leh Mike-a?" a ti leh a. Nathana chuan, "I chhung leh khat te an bo a, i ngaihtuah em em a, ka chhungte an thi vek a, ngatan mah i ngai lo a, enge awmzia?" a lo ti let a. DIG chuan, "Nathan, i tawng hnem mah mah aw, ka khawih duh tak tak mai ang che.." tiin a lo vau ve bawk a. Nathana chuan, "Nang kha lo ngawi mai mai teh, a ruka mi man dan pawh hrelo, Airport ah lo kalin min rawn man ve ringawt a. Police hi i zir chhuak nge i ni ve tawp zawk?" a lo ti let hrep a. DGP chuan, "Nathan, Mike-a leh Kima te chu khawnge an awm? Anla dam nge an thi tawh?" tiin a zawt leh a. Nathana chuan, "Ka sawi tawh kha, tumah ka that dawn lo, an pate theuh hian an that dawn ka tih kha." a ti a. DGP chuan, "Anih chuan Kima leh Mike-a chu an la dam tihna animaw?" a ti leh a. Nathana chuan, "Ka hre bik nang, engtin nge ka hriat bik ang?" tiin a zawt let leh a. DGP thinrim lutuk chuan, "Nathan, hei hi ka station a nih hi, ka duh chuan ka that thei che ania, i ruang te chu tumah hriat lohvin ka phum bo vek ang. Thudik sawi rawh, anih loh chuan ka that duh tak tak ang che." a ti a. Nathana chuan, "Police tam tak in awm a, kei chu keimahin ka awm. I duh chuan min that ta che, mipui zinga mipakhat pawisawilo i that tihna a ni dawn asin. Ngaithla rawh, puitu tur ka nei ve lo, nang chuan mi tam tak i nei, police force te hial pawh i rawn tir a nilawm ni?" a ti a, DGP chuan ben a tum lai tak chuan SSP alo lut a, "Sir, Kima pa leh Mike-a pa te hian Nathana an be duh a ni." a rawn ti a. Kima pa leh Mike-a pa te chu anlo lut a, Kima pa chuan, "Khawnge ka fapa i dah, Mike-a leh ka fapa hi i kidnap tih ka hria, khawnge an awm?" a rawn ti khur khur a. Nathana chuan, "DGP Sir, pawnah sawn ticket counter in siam a mi? A duh duh hi lo lutin zawhna ngai hlir min rawn zawt a, ka ning deuh tawh a ni." a ti a, DGP chuan thinrim tak chuan a lo melh a. Nathana chuan Kima pa en pah chuan fiah felfai tak hian, "CCTV off tir vek phawt rawh." a ti a. Kima pa chuan DGP bulah chuan, "CCTV hi off vek ru." a ti a, an off ta a. Nathana chuan, "Good...in ti tha e." a ti ham ham a. Mike-a pa chuan, "Sawi rawh le, khawnge kan fate chu?" a ti a. Nathana chuan, "In fate hi nungdama in hmu duh a nih chuan ka thusawi ang apiangin in ti tur a ni. In fate in hmangaih takzet anih chuan min hnial ka ringlo, ka sawi apiang min tih hlawhtlin sak ang che u." a ti a. DGP chuan Nathana hmaiah a va beng a, "I zak em? I duh duh kan ti ang maw? Anni hi tinge i biak, DGP ka awm alawm, he Station nei tu hi ka awm alawm." a ti vin khur khur a. Nathana chuan, "Pu Tluangte, he DGP hi chuan thil a hrethiam lo ani. Mahse nangni chuan in fa te in hmangaih ani tiraw? Ka thusawi hi in hrethiam ang tiraw?" a ti a. Mike-a pa chuan, "Asawi ang hian ti phawt ang u..." a ti a, Kima pa chuan Nathana chu a en a, "Enge i duh a?" a ti a. Nathana chuan phur zet hian, "Ahmasa berah chuan Fried Rice plate 2 ka duh, ka ril a tam tawh lutuk." a ti ta daih mai a. A ngaihna hriatloh hmel zet chuan Kima pa leh Mike-a pa te chu an in en hu mai a. Nathana bawk chuan DIG chu ava en a, "Hey Liansang.." a va ti a, DIG chuan, "Keimah maw? Ka hmingin min ko amaw?" a ti a, a thinrim hmel kher mai. Nathana chuan, "Nangmah lo midang Liansanga tih hmingpu kan awm lo, i hminga ka koh loh che in engtin nge ka koh ang che, Mawla? Hmanhmawhin Rice plate hnih va la teh." a ti a, DIG chuan rum tak hian a melh a. Nathana bawk chuan, "Pu Tluang, i fapa te chu he DIG pawh hian a ngaihsak lo riau mai.." a ti leh a. Kima pa chuan, "DGP, khawngaih takin....a sawi ang chu pe rawh u." a ti a, DGP chuan, "DIG, Fried rice plate 2 leh thingpui va la rawh u." a ti a, DIG chu a kal ta a.

Nathana chuan Fried Rice te chu a ei puar te te a, tichuan Kima pa leh Mike-a pa chuan Nathana chu an thutchilh a. Kima pa chuan, "Sawi rawh le? Khawnge kan fate chu an awm?" a ti a. Nathana chuan, "Tu fa zawk nge kan sawi hmasak ang?" a ti , Kima pa chuan, "Keimah...khawnge Kima a awm?" a ti a, Nathana chuan phone number pakhat a hrilh a, Kima pa chuan a phone ta a. Kima chuan, "Hello...pa khawnge i awm?" a ti a. Kima pa chuan, "Bawiha, khawnge i awm? Khawi hmunah nge i awm?" a ti a. Kima chuan, "Ka hrelo, a thim lutuk, ka awmna hi khawilai nge ka hrelo." a ti a. Nathana chuan, "A kut kha vawi hnih ben tir rawh." a ti a, Kima pa chuan, "Bawiha, i kut kha vawi hnih beng rawh." a ti a. Kima chuan a kut chu a beng a, "Light a rawn eng...motor chhungah ka awm ka pa." a rawn ti leh a. Mike-a pa chuan, "Khawnge Mike-a a awm lo zawt teh." alo ti chul mai a. Nathana chuan, "Hey, lo nghak mai mai rawh." tiin alo hau a. Chutah DGP a lo lut ,a phone chu rawn chuh vatin, "Kima...Kima khawnge i awm?" a ti vak vak a. Kima chuan, "DGP Sir, min chhan rawh...motor chhungah ka awm." a ti a, a tap pur mai a. Nathana chuan, "DGP...phone kha Kima pa kha pe rawh." a ti a, DGP chuan Nathana chu rum taka melh pah chuan Kima pa chu phone a pe leh a. Nathana chuan, "A bulah khan air bag sen a awm anga, chu chu la se, motor atang khan chhuak rawh se." a ti leh a. Kima pa chuan, "Bawiha i bulah khan airbag sen a awm em?" a ti a, Kima chuan, "Aw ka hmu e," a rawn ti leh a. Kima pa chuan, "Kha bag kha la vat la, pawnah chhuak nghal rawh." a ti a. Second 10 vel hnuah chuan Kima chuan, "Ka chhuak ta e." a rawn ti a. Nathana chuan, "Airport ah rang takin kal se, passport te, green card, visa, credit card te leh document zawng zawng te chu bag chhungah khan engkim a awm vek a, Airport ah ka thianpa Rinawma'n a lo nghak ang." a ti a, Kima pa chuan Nathana sawi ang chuan afapa chu tih tur a hrilh ve zel bawk a. DGP chu pawnah a chhuak nghal a, police dang te bulah chuan, Lengpui Airport ah Rinawma tih hmingpu lo zawng rawh u, Kima'n ava hmu dawn a nih chu..Vatin.." a ti a, an che chhuak ta nghal a. Minute 10 vel a ral meuh chuan Kima chuan, "Airport chu ka thleng tawh e." a ti a. Nathana chuan, "Gate number 3 ah kal se, counter ah ticket va la rawh se." a ti leh a, Nathana sawi ang chuan Kima chu gate number 3 ah a va kal a, counter ah chuan ava intlar ve ta a. Kima chuan, "Ka thleng tawh e ka pa...enge ka tih leh dawn?" a ti a. Kima pa chuan, "Han hawi kual la, zuiru tu che an awm em?" a ti a, Nathana chuan mak tih hmei deuh hian Kima pa chu a en hu a, Kima chuan, "Aih awmlo ka pa." a ti a. Kima pa chuan, "Police an awm em?" a ti leh a, Kima chuan, "Awmlo ka pa." a ti leh a. Kima pa chu a nui suk a, "Tikha chuan i him ta ka fapa...Airport ah khan lo awm la, ka nauten an rawn lam vat ang che." a ti a. Kima chuan, "Ka pa...kha zawng hmelchhe Nathana kha, keimah ngei hian ka that duh ania." a rawn ti pung pung a. Kima pa chuan, "Lungngai suh, kan man tawh alawm." tiin a nui vur vur a.

Nathana chuan Kima pa chu rum takina en a, "Ka thusawi ngaithla rawh." zawi sap chuan a ti a. Kima pa chuan, "Ve lutuk ache...min vau vel amaw...i thusawi apiang ka zawm ang maw? A teuhlo mai, ka fapa chu a him tawh a, i bum kualmai mai theih kan nilo." a ti vel ham ham a. Nathana chuan zawite leh fiah tak si chuan, "Ka thusawi ang chuan ti mai rawh u.." a ti leh a. Kima pa chuan, "Enge thleng anga? Ka hlau lo che...thil thleng tur chu maw....ka sawisa nasa dawn che, i ke pawh hian i kal leh tawh ngailo ang, nasa takin ka sawisa ang che." a ti a, a nuih vak vak a.

Airport-a awm mek Kima bag atang chuan bomb alarm ang deuh mai hi a ri ta tut tut mai a, mipui te chuan an en hra hlawm a. Nathana chuan rum tak hian Kima pa chu a melh a, Kima pa chuan, "Bawiha, Hello....enge chumi ri chu, enge awmzia?" a ti vak vak a. Kima chuan air bag chhung chu a en a, pistol hi alo awm a, pistol chu bomb alarm ang taka ri tut tut chu a lo ni a. Pistol chu ala chhuak a, chuveleh Airport security guard leh sipai duty te chu an rawn tlan khawm a, Kima chu silai in an tin ta thup mai a. Kima pa chuan, "Hello, bawiha...enge awmzia?" a ti vak vak a, Nathana chu a ngawi reng thung a. Kima pistol ken lai chu a ri rang tulh tulh a, chutah a mahin pistol chu a inkap ta a. Sipai leh guard te chuan Kima chu terrorist a nih ringin silai a hmeh puah avang chuan an kah rawn ta chiam maia, a thi chiang hle. Kima pa chuan, "Enge awmzia, Bawiha min chhang rawh.." tiin a tap vak vak a. DGP phone alo ri a, a la a, "Hello...Engtinmaw??" tiin mak a tih hmel em em a. Phone chu dah in dark room TV chu a on a, news a hmet chhuak nghal a. News ah chuan, "Tun mai khan Lengpui Airport ah inkahna a thleng a, mi tu tih hriat loh pakhat, terrorist ni ngeia an rin chuan Airport chhungah silai hmet puakin duty te a bei thut mai a, a hmunah sipai duty te hian an kap hlum nghal a ni." a rawn ti ta mai a. Kima pa chu a t(r)e ta vak vak mai a, nikhaw hre lovin a tlu ta der mai a. DGP chuan, "DIG dawhkana tui kha rawn la vat teh." a ti a, DIG chuan tui a la tur chiah chu alo lak khalh a, a in ta daih a. DGP chuan, "Nathan, i chak lo ang." a ti vak vak a. Nathana chuan, "Ava han hahthlak tak..ka hrilh mawlh mawlh a, min ngaithla duhlo a. Ama fapa ngei athat ta anih kha, collector lahin a fapa a hal hlum tawh bawk, in fate hi in uilo emai." tiin a nui huah huah a. Kima pa chu an zawn chhuak a, DGP chuan Nathana bulah chuan, "Ka that dawn che, ka that khawp ang che. Mahse ka thah hma che in Mike-a awmna min hrilh phawt angai ang...nang ang a mi luhlul te hi chu enkawldan ka thiam alawm." a ti a. Nathana chuan, "Atha e...darkar khat ka pe ang che, i theih chuan va chhan ta che." a ti a. Chutah DGP phone ah chuan message a lo thleng a, DIG phone ah a thleng bawk a, Mike-a pa phone ah alo thleng bawk, a rualin a thleng vek a ni ber mai. DGP chuan a message chu a en a, application link a lo ni a. Link ah chuan a lut a, game pakhat hi a lo awm a, chumi game chu a lut chhin leh a, video pakhat alo awm leh a. Video chu a en a, Mike-a kekawrte nen chiah a thutthlenga phuar beh a lo awm chu lo lang a. Mike-a chu glass kil li (4) nei chhungah hian a lo awm a. Glass bangah chuan pipe tam deuh hi lehlam lehlam ah alo in vuah teuh bawk a. Abulah chuan ethyl gas pa 7 vel a bur chawpin a lo awm bawk a, gas leh pipe te chu a in connect vek bawk a ni. Chu link lo siamchhuak tu pa chu ahmaa kan sawi, Nathana thianpa, cyber crime expert Tetea siam a ni. Tetea chuan link chu a thawndarh ta chiam mai a, mi tam takin message chu an dawng ta sup sup hlawm a.

Chu game chu an download a, a screen cover ah chuan Mike-a chu alo lang a, mike a hmaah chuan silai lem hi alo lang bawka, game instruction ah chuan ti hian alo inziak a, "Kan ram chhungah ah pawngsualna hi a thleng hnem em em a, miin pawngsual lo tawk ta se, mipui tam takin an status ah nen, social media ah nen an thehdarh vak vak a. Pawngsual tu te an dem thu leh khai hlum tlak anih thu te, sawisak hlum an chak thu te an sawi fo a ni. Chumi te tan chuan tunah hian hun tha tak mai siam a ni a, he game screen a mi pakhat lo lang hi tualthah hmang, pawngsualtu a ni. He pa hmaa silai hmang hian hepa hi in kaphlum dawn a ni." tih hi a ni a, a game chu a dangdai an ti hlawm ngang aniang, an download ta sup sup hlawm a. Rang takin DGP chu a chhuak a, cyber crime expert te hnenah chuan chhui chiang turin a hrilh ta a. Mahse engmah tihtheih an nei lo, DGP chuan vin tak hian, "Engemaw tal ti ta che u? Cyber crime expert in ni ani lawmni?" tiin a vin vak vak a. An zinga pakhat chuan, "Sir, a game hi a hack theihloh, a in block tlat a ni." a ti a.

DIG alo lut a, Thailand tleirawl pahnih an lo lut a, "Sir, Hackers te anlo thleng e." a ti a, DGP chuan, "Lo thu ula, thawk nghal char char rawh u." a ti a. Chung thai mite 2 chuan chu game chu hack an tum a, mahse IP Address chu second 1 danah a inthlak zel mai a, an chhui dik hleitheilo a ni. Game chu an khelh tan ta, silai chuan Mike-a awmna lam chu game kheltute cuan an kap ta vak vak mai a. Anihna takah chuan silai lem hi chu Tetea'n game pangngai ang taka a lan theih nan a siam chawp mai mai a ni a, silai a awm tak tak lo. Silai a an kah apiang chuan, ethyl gas kha Mike-a awmna box chhungah chuan a inkap lut zel a ni. Mike-a pawh chuan gas chu a hip hnem ve telh telh a, amah pawh a chau telh telh a. Thai pa pakhatzawk chuan, "Sir, link hi a in disconnect zel a ni, engah mah hian ka lut theilo." a ti a, (English in an inbia, hriatthiam tlan theihnan mizo tawngin ka ziak ta zawk a ni.). Mike-a pa mangang lutuk chu a tap pur mai a, Thai tleirawl 2 te bulah chuan, "Enteh u, pawisa lam kha chu lungngai suh u, ka thianpa ramdang ami mi thiam tak pawh ka hria alawm, chu pa chuan a thiam zawk anga, in thawh ho phei chuan in thawk chak zawk ang." a ti a. Thai pa pakhat zawk chuan, "I mawl ami ka pu...i fapa awmna bula gas awm teuh saw eng gas nge a nih i hria em? Ethyl gas hlauhawm tak ani a, hydrofluoric acid leh pottasium light chawhpawlh ani. Hackers dang i chah chhungin i fapa chu a thi hman daih tawh ang." a ti a. Mipui chuan chu games chu an khel zel a, khel an pung tulh tulh a, hackers pakhat zawk chuan, "A ngaihna a awmlo a ni ber e, gas hi a leak tan mek ani, mipui khel lah second tinin an pung tulh tulh mai si." a ti a. Pakhat zawk chuan, "Sir, amah chauh chuan a ti thei lo, IP address hi second 1 danah a inthlak zel si a, puitu an awm a nimai. He game hi lo vil reng tu an awm ani, kan zawng mek e." a ti a. DGP chuan, "Tawng tir dan tur ka hria a lawm, a inpuang khawp ang." a ti a. Nathana chu dark room ah chuan a la awm reng a, chutah DGP leh DIG chuan Sanvi an rawn hruai lut ta thut mai a. Sanvi a hmu chiah chu Nathana chu a meng phawk hru mai a, DGP chuan, "I pasal mawl lutuk vanga heta ko ta che hi kan ni, he game tih tawp dan hi i hria tih kan hria, tihtawp dan min hrilh vat rawh." a ti a, Sanvi chuan Nathana ava en a, Nathana chuan a lu a lo thing a. Sanvi chuan, "Ka hrelo." tih ringawtin a chhang a. DGP chuan, "Aww...animaw." a ti a, DIG chuan Nathana chu a man bet a, DGP chuan Nathana chu a hnek ta siah siah mai a.

Sanvi chuan tap chungin, "Khawngaihin sawisa tawh suh, ka hrilh ang che." a ti a. Nathana chuan, "Nilo, Sanvi, engmah hrilh suh." a lo ti lawm lawm a. Sanvi chuan, "I nunna hi ka tan a hlu ber a, ka chan phallo che a ni." a ti a, DGP chuan, "Sawi rawh le." a ti a. Sanvi chuan, "Min zui ula, hmun pakhatah chauh a tihtawpna a awm." a ti a, DIG chuan a zui ta a. Building hlui deuh pakhatah chuan Sanvi chuan DIG chu a kal puia, a chhawng chung ber ah a kal pui a. Room apakhatah a luh pui a, DIG chuan room chhunga dawhkan chunga laptop screen-a Mike-a gas boruak rui a lo tal vakvak lai video lo in play chu ava hmu a, a va kal hnai a. Chuveleh Sanvi chu a tlan thut a, a chhuak a, DIG chu kawngkhar a kalh hnan ta daih a. DIG chuan, "Hey...lo hawng rawh." a ti vak vak a, mahse Sanvi chuan a kalsan ta daih mai a. DIG mangang chuan a phone a phawrh a, signal a awm silo, a mangang hle mai a. DGP chu thinrim takin Nathana awmna dark room ah chuan a va lut leh a, "DCP Nathan, eng ang pawn lo che thei viau mahla, ka custody ah i awm tih hria ang che." a ti a, Nathana chuan, "Ni e, i custody ah chuan ka awm alawm. Mahse helai hmunah hian ka him a, ka nupui pawh a him." a ti a, chutih lai chuan SSP chuan DGP chu a rawn ko a. Thlai hacker te chuan, "Sir, a address kan hmu ta e." a ti a, address awmna lam pan chuan DGP te leh Mike-a pate chu an kal ta a. Chu address chu nichin lawka Sanvi leh DIG kalna kha a ni, location chu a chhawng chung ber ani.

Dark room ah chuan thai hacker te chu an va lut a, Nathana bulah chuan intithei tak hian pakhat zawk chuan, "Mawla leh....fing viau amaw ilo inti a nimaw, i address second tina i thlak avang khan kan chhuichhuah loh che i ring ami? Minute 10 lek chhungin kan zawng chhuak asin, hacker pui ber kan nih hi." a rawn ti vei pang pang a. Nathana chuan nui sang hian, "Animaw...good job. Operation chu hlawhtling taka zawh fel a ni ta, mahse vanduai thlak takin damlo chu a thi hman hlauh mai." a ti a, hackers te chuan rang takin an laptop awmna lam an pan a, address a lo insawn leh ta daih mai. Hacker pakhat zawk chuan, "Hrep tak chuan, he system pawh hi alo in hack leh hman anih hi." a ti vawng vawng a. Chutih lai chuan mipui te chuan game chu an khel zo dawn ta, game satlaih mai mai amaw an tih laiin chu game chu mi thahna game a ni tih an hre der silo. Builiding chung ber a Mike-a glass box chhunga vun kang vek a lo thu khu rum rum chu Mike-a pa te leh police te chuan an va hmu a. Mike-a pa mangang lutuk chuan chhuat a thirtiang lo awm chu a la a, glass chu a va vaw tak vak vak mai a. Chuveleh chu ethyl gas chu glass box chhungah chuan tam tak chu a in kap lut vak mai a, Mike-a chuan a gas rim chu tuar lovin taksa kang vek chung chuan a thi ta a. Games khel mek tute zawng zawng screen ah chuan, SUCCESS tih alo in ziak a. Mike-a thih thu chu Jerry-a leh a pa Pu Muana te chuan anlo hria a. Jerry-a chuan thinrim tak hian, "A that leh tawh, ka thiante pathum chu a sawi ang ngeiin a that vek a ni, chupawh Police Custody-a awm reng chungin. Enge maw police te hian an tih le? Keimah chiah ka bang ta." tiin a phun nuah nuah a. Pu Muana chuan DGP a phone a, "DGP, enga tan mah in hman tlak loh a nih hi, chhuah rawh u, kha mihring kha,keimah ngei hian ka hmachhawn duh a ni." a ti a. Pu Muana sawi ang chuan Nathana chu evidence awm silo a an kawl reng arem silo a, an chhuah ta a. Police Station kawtah chuan Jerry-a pa Pu Muana te, Kima pa Pu Tluanga leh Siamtea pa collector te chu an lo ding thap mai a. Nathana chu SSP chuan pawnah a rawn chhuah pui a, an bulah chuan Nathana chu ava kal hnai a. Siamtea pa chuan, "Tunah chuan khawiah mah tlanchhiatna tur i nei tawh lo, helai hmunah hian kan that dawn che." alo ti pung pung a. Nathana chuan, "Ahmasa in, Jerry-a chungah hian ka lawm khawp mai. Mahriati an pawngsual lai video kha alo la save hlauh a. Mike-a phone atang khan video kha ka la a, ka duh duh hunah ka ti leak out thei a ni." a ti ta mai a. Jerry-a chuan, "Ka pa, dawt vek a nih hi." alo ti pung pung a. Nathana chuan, "Hey Jerry, puitling kan titi lai chuan lo tawng thin lo teh." a ti a, Jerry-a chu a thinrim hle. Pu Muana chuan, "Khawiah mah hian min tichhe thei chuang lo ang, kum 30 chuang ka thawh rim hnuah business lian tak ka din a, kei tluka sum nei tam hi Mizoramah hian i tawng leh tawh lo ang. Chuti khawpa mi thiltithei chu i cho ngam a nimaw? Ka fapa te video pawh chu i nei tak tak lo, min vau mai mai a ni." a ti a. Nathana chuan, "Anih chuan i phone minlo pe la, awlsam takin a link hmangin video chu ka download nghal thei a ni." a ti a, Pu Muana chuan a phone pawh chu a pe ve mai bawk a. Pu Muana phone chu Nathana chuan akhawih mial mial a, tichuan Jerry-a ten Mahriati an pawngsual lai video chu Pa Muana te hmuh tur chuan a ti lang a. Pu Muana chuan, "Kha video i neih avang khan min tihchhiat theih i ring a mi? Tunah hian kan kaphlum nghal thei che a sin." a ti a. Nathana chu a nui suk a, "Ring tehreng mai, i phone min khawih tira, i phone atang hian time ka set a ni, darkar khat ala awm e, he time hi a zawh vaih chuan i fapa ten nula an pawngsual lai video hi a leak out anga, i sumdawnna pawh a tlakchhiat phah ngei ang tiraw?" a ti a.


Kima pa Pu Tluanga chuan, "I duh leh ti leak out la, ka fapa ka chan tawh a, midang pawn an chan tawh a. Engpawh tawk ila pawi kan tilo, kan that dawn che." tih pah chuan chemte a phawrh a, chuveleh Pu Muana chuan Kima pa chu silai in atin a, "He minute 5 video lek vang hian ka sumdawnna hi atlakchhiat ka phallo." a ti ta mai a. Nathana chu hruaiin Jerry-a nen chuan Nathana chu carah phurin an tlan ta daih mai a, Kima pa te chu an thinrim hle. Nathana chuan building pakhatah Jerry-a te pafa chu a hruai ta a, room pakhatah a luh pui a. Room chhungah chuan Nathana chuan laptop chu a hawng a, a khawih mial mial pah chuan, "Heta tang hian ka'n off ange.." a ti a. Pu Muana chuan silaia tin reng pah chuan, "Ti vat rawh." tiin a lo tur sek a. Nathana chuan Pu Muana silai ken chu ben thlaksak thutin na em em hian a bekah a hnek chawrh mai a, nikhaw hrelovin a tlu nghal. Pu Muana a harh leh chiah chu a awmna ngaiah alo la awm a, room atang chuan chhuak a. Chu building chhawng chung ber 3 na ah a awm a, a fapa Jerry-a chu auvin a zawng ruai mai a. In chung ber atanga Nathana rawn dak thla chu a hmu a, "Hey, Nathan, Khawnge ka fapa i dah?" tiin a au vak vak a. Nathana chuan engmah sawi lo chuan hrui sei tak a zu thlak tla ringawt a. Building lai taka ban inkham phei ah chuan hrui chu a bang liam a. Hrui lehlam hmawr chu la in bang phenah chuan a bo leh daih a. Chutah Jerry-a chu au ruai ruai in building chung ber atang chuan a rawn tla thla ta mai a. A ke ah chuan hrui lehlam chu alo in suih a, lei a thlen vaih chuan a thi chiang khawp ang le. Rang takin Pu Muana chuan hrui chu a vuan vat a, a fapa Jerry-a chu a pawt tang hman hlauh a. Nathana chu a zu chhuk a, laptop hi a keng a. Pu Muana bulah chuan dawhkan a rem tha te te a, laptop chu a dah a. Nathana chuan, "I sumdawnna hi kum 30 chhung i hlawhtlin nan i bei tih thu i sawi tiraw? Mahse kum 30 chhung ilo thawhrimna chu a chhiat vek loh nan minute 2 chiah i nei tawh. Mahse a time hi tih tawp dan a awm, ENTER hi hmet la a tawp mai ang. Mahse i fapa inchung sang tak atanga tla mai tur chu i chhan angai si, tunge i ngaihpawimah zawk, i fapa nge i sumdawnna?" tiin laptop chu Pu Muana bul lawkah chuan adah a. Pu Muana chuan a duh chuan laptop chu a va hmet tawp thei, mahse afapa nunna chu a chhan angai si. A tawpah chuan Pu Muana chuan tap zawih zawihin a fapa in khai tanna hrui chu a thlah a, a fapa aiin a sumdawnna tlachhe tur chu a ngaipawimawh zawk tlat mai. Laptop chu a va hmet tawp a, a fapa Jerry-a erawh a tla hlum chiang hle. Nathana chuan Pu Muana bulah chuan, "I fapa te thianho pali khan nula pawisawi lo chu pawngsualin an that a. An phutawk hremna an dawng theuh ani, mahse keiman ka that lo, nangmahni....anmahni hringtu pa te theuh hian in fapa te chu inthat a ni." tiin a kalsan ta a. Nathana leh Sanvi chu Aizawl lamah an haw leh ta a, Nathana pawh cu a hna thar chu thawh chhunzawm duh tawh lovin Aizawl lamah a thiantha ber ASP Rinawma nena thawh dun leh chu a thlang ta zawk a, chu khua chu a nupui Sanvi leh an fanu thar kum 8 mi Mary te nen chuan an chhuahsan ta a ni.

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)