NATHAN SEASON-2 (Episode-6) NATHAN VS POLITICIANS (By:Aaron Malsawmdawngzuala)

[Aaron Dustin]

NATHAN SEASON-2 (Episode-6)

NATHAN VS POLITICIANS

Written by : Aaron Malsawmdawngzuala


Nathana nena Station-a kan titi dun mawlh mawlh lai chuan nu pakhat hi alo lut a, kum upa lam deuh tawh a ni a, a fanu kum 8 mi vel lek niawm tak hi a rawn hruai bawk a. Nathana bulah chuan, "Ka pu, thil pawimawh tak hrilh tur che ka nei a." a rawn ti a, a mit nui luk mai leh a aw chhang tak atang chuan a tap zo hlim tih pawh chiang takin a hriat theih a. Nathana chuan, "Animaw...enge ni ta?" a ti a. Chu nu chuan, "Ka hming chu Vanlalruati a ni a, ka pasal hian nikum khan min thihsan a. Ka bula mi hi ka fanu a ni a, Miriami a nih hi. Kum 8 mi lek a ni a, kan pahnih chauh hian harsa takin kan khawsa ve tawk tawk a ni. Ka pu, kan pa khan harsa takin, kan nufa tan tiin huan a siam ve a, chuta tang chuan pawisa kan hmu ve tawk tawk a, mahse kan venga MLA candidate pakhat Pu Ramliana chuan kan pa huan chu cheng nuai 1 lekin lei a dil a, mahse kan pa chuan a phallo a. Pu Ramliana chuan kan pa chu a vau ta fo mai a, Police te hnena kan report lahin police te chuan engah mah min ngaihsak duh ngai silo. Atawpah chuan kan pa chu Pu Ramliana chuan a mi leh sate tirin a that ta a, mahse accident angin a lantir a, police te pawn engtin mah min buaipui duhlo." a ti a, a tap hawm hawm a. Nathana chuan, "Ka pi, khawi police station ah nge in report a?" tiin a zawt a. Pi Ruati chuan, "Hetah tho hian, hemi Stationah tho hian." a ti a, Nathana nen chuan kan in en hu mai a, mak kan ti dun kher mai. A chhan pawh he Stationah hian chutiang report kan hre ngai miau lova, Nathana chuan, "Tu hnenah nge in report a?" a ti a, Pi Ruati chuan, "DIG bulah hian kan report a, mahse thu belhchian dawllo tiin min hnar zel a ni. Tihtheih ka neih ve tak siloh avang chuan keipawh ngawih mai a tha in ka hre ta a, mahse chu MLA candidate Ramliana chuan hmanni khan kan in chhuahsan tur leh kan inhmun pawh a lei vek tawh thu min rawn hrilh a, ni 10 chhung hun min pe a, tihngaihna ka hrelo a, ka mangang lutuk ka lo kal tawp mai a ni." a ti a. Ka rindan vel chiah a ni, kan DIG hi chu ka ei thlawt lo, Pu Sangliana tluka rinawm kha chu an awm leh tawh dawnlo a nih hi. Tuna kan DIG ve hi chu pawisa ringawt hi a buaipui a, politician te hi angaipawimawh em em a, Nathana pawh hian a ngei thin ve khawp chuan ka hria. Nathana chuan, "Ka pi, complaint i thehlut tawh em?" a ti a, Pi Ruati chuan, "Aih..la thehlut lo." a ti a. Nathana chuan, "FIR thehlut ula, investigation ka lo nei nghal ange. Lungngai suh ka pi, in in atang chuan in chhuak hauh lovang." a ti a, FIR chu an ziak a, tichuan an chhuak ta a. Nathana chuan, "DIG..DIG..he mihring hi chu bang daih se ka ti ngawih ngawih." a ti bul bul a. Keichuan, "Engtia buaipui chhunzawm nge i tum?" tiin ka lo zawt a. Nathana chuan, "Ka buaipui ang, politician ho tenawm zia hi chu awwww...ka kham tawh hlawm a ni." a ti nuah nuah a. Chhun dar 2 ve a pelh hnu deuh, chhun thil kan eizawh deuh hnu chuan mipakhat hi alo lut a, "DCP Nathan, MLA Pu Ramliana personal assistant ka ni a, ka pu-in a hmu duh che. Khawngaihin minlo zui rawh, a reilo ang." a rawn ti a. Nathana chuan, "Min mamawh anih chuan lo kal mai rawh se, duty mek ka ni a, khawiah mah ka kalsawn lovang." tiin alo chhanglet a. Chupa chuan, "DCP, tu lakah nge FIR hi i thehluh i hria em? Tunge Pu Ramliana hi i hria em?" a ti deuh khur khur a. Nathana chuan rum takin chu pa chu a en a, "Chutiang mihring duham, diko taka sum la lut thin leh mi retheite chan ai eiru tu chanchin ka hre peihlo, a aia pawimawh tihtur ka ngah lutuk. Khawngaihin chhuak tawh rawh, chuan Ramliana chu lo hrilh la, min hmu duh anih chuan lo kal rawh se." a ti ta phiar phiar mai a, chupa chu a chhuak ta a.

Tlaiah chuan Nathana nena kan haw tur chu DIG chuan min rawn phone a, DIG hi vawiin hian alo kal lo a, in lamah a awm a ni. NAthana chuan phone chu a la a, DIG chuan, "DCP, message ka lo thawn che a, ka sawina hmunah tunah hian lo kal nghal ang che. I bulah khan ASP Rinawma a awm em?" a ti a. NAthana chuan, "Aw awm e." a ti a. DIG chuan, "Lo hruai tel ve ang che." a ti a, phone chu a dah a. Nathana nen chuan DIG sawina hmunah chuan kan va kal ta a, inchhung kan luh chuan DIG chu thutthlengah, a police uniform ha in a lo thu a, TV alo en a. DIG in min hmuh veleh chuan, "Lo thu ru." a ti a, TV chu en chhunzawm leh in min ngaihsak miah lo chuan meizial a zu khu hluah hluah a. Minute 5 vel lai chu min be chuang miahlo hian TV chu a en reng a, chubakah kan awmna in hi ka vawikhat hriatna a ni. Inchung atang chuan pa pakhat hi alo chhuk a, Nathana nena kan bulah chuan a rawn thu a. Nathana chu a en a, "DCP Nathan Malsawmkima maw?" a ti a, Nathana chuan, "Aw ni e." a ti a. Min rawn en veleh a, "ASP Rinawma i ni ang maw?" a rawn ti leh a, keichuan, "Aw ni e." tiin ka chhang a. DIG chu a ding hluai a, "Nathan, Rinawm...tikhan lo inkawm ru aw, Station ah ka va kal ange...ka lukhum ka theihnghilh daih mai." a ti a, a chhuak ta daih a. Chu pa chuan Nathana chu a en a, "FIR in thehlut tih ka lo hria a, kei hi MLA Ramliana chu ka ni." a ti ta mai a, phawk hraw hian Nathana nen chuan Pu Ramliana chu ka en a. Ramliana chuan, "Enteh DCP, in chanchin hi ka hria alawm, thil diklo in duh lo a, politician tam tak pawh in lo man tawh tih pawh ka hria. Mahse keichu ka danglam ania, in ngaih ang ngawt kha ka ni velo, Ramliana ka ni a, a tul chuan tual pawh ka that mai a ni. DIG kha ka thianpa a ni a, he case hi ti tawp turin a duh che u a ni. In senior te thu chu in zawm thin a ni lawm ni? He case hi ti tawp la, pawisa in duh zah zah ka pe ang che u." a ti a. Nathana chu a ding hluai a, "Tual i that thin tih min hrilh a, i inpuang hlauh chu a tihzia e. Kan hna i ti awlsam sawt dawn e, kan lawm e ka pu." a ti a, kan chhuahsan ta daih a. NAthana nen chuan motorah lutin chak takin kan tlan a. Nathana chuan, "Rina, DIG kha han text teh, khawnge a awm tih han zawt teh." a ti a. DIG chu ka tect a, Station lamah ala awm thu min hrilh a. Nathana bulah chuan, "Sir, Station ah ala awm a nih chu." ka ti a. Nathana chuan, "Station lamah let leh phawt teh ang, DIG hi ka be duh a ni." a ti a, Station lamah chuan kan let leh ta a. DIG office ah chuan kik pawh kik lovin Nathana chu a lut tlang pawp a, kei erawh kawngkhar bulah ka ding a. Nathana chuan thinrim zet hian, "Enge awmzia Sir? Kha MLA khan tual a that a, mi a vau bawk a, nangin case ti tawp turin min duh amaw?" a va ti chiam chiam mai a. DIG chuan, "DCP, mi thiltithei tak leh mi hausa tak a nih kha. Ka thianpa a ni bawk a, chubakah finfiahna engmah a awm lo, kan man ngawt theilo." a lo ti a. Nathana chuan, "Victim nupui ber alo kal a, FIR a rawn thehlut alawm." a ti a. DIG chuan, "Engmah sawi zawm angai lo, case chu ti tawp la animai. Ka thu i zawm lo anih chuan bang mai rawh." a ti ta hrep mai a. Nathana chu thinrim tak leh lungawi lo tak hian a chhuak a, ka zui ve nghal a. NAthana nen chuan inbe miah lo chuan kan haw ta a, a nuamlo duh ngei mai. A tukah chuan hma takah ka thleng ve khiah mai, Station ka thleng chiah chu Nathana chuan a office ah min ko lut a, "Rina,he case hi ka close dawn chuanglo, Pi Ruati kha ka tiam tawh a, chuti ngawt chuan ka ti tawp theilo a ni." a ti a. Keichuan, "Mahse Sir, DIG khan ti tawp turin a hrilh che sia, engtin nge niang?" ka lo ti a. Nathana chuan, "Ka hre biklo, mahse ka titawp thei lo a ni." a ti a. Chutia kan inbiak mawlh mawlh lai chuan Havildar pakhat a lo lut a, "Sir, tukin zing khan kan ASI pakhat Thantea chu Punjabi truck driver pakhatin a darah chempuiin a sat a, tunah damdawiin ah a awm mek. a rawn ti ta mai a. Nathana chuan, “Eng a? Khawi Hospital ah?” a lo ti vat a. Havildar chuan, “Greenwood Hospital ah.” a ti a, tichuan rang takin Damdawiin lam chu kan pan ve ta a.

Damdawiin kan thlen chuan ASI chu a dar tuam burin khumah a lo mu a, operation an nei zo tawh hi a lo ni a. Nathana chuan, “Thante, i tha maw?” a ti a, Thantea chuan, “Ka zia tawh lutuk e Sir...min sat thuk vak lo a, thisen a chhuah hnem em avang khan ka chau lutuk a.” a lo ti a. Nathana chuan, “Engthil chiah nge thleng?” tiin a han zawt a. Thantea chuan, “Nizan atang tawh khan kan duty a, kawnglaia vai bungraw phur motor lo tlan te chu kan check a, permit an nei nge neilo kan lo zawt a. Tlaivar thaka kan duty hnuah tu mah man tur kan neih lemloh avang chuan haw mai kan tum a, khawvar deuh tawh hnu ah chuan Truck 5 hi an arwn inzui a. Kan han check leh chu an motor number a lo in ang vek mai a, registration pawh an neilo a, permit pawh an neilo. Man ka tum a, mahse MLA candidate Ramliana driver te an nih thu an sawi a. Enga tan mah ka ngai lo, ka man tho tho dawn che u tiin ka hrilh a, pawisa min pek an tum pawn ka la duhlo. An zinga pakhat chuan a motor chhunga chempui chu la in ka dar ah hian min rawn sat ta a, thisen a chhuah hnem em avangin nikhawhrelovin ka awm ta ani.” a ti a. Nathana chuan, “Chung mite chu i duty puite chuan an man em?” a ti a. Thantea chuan, “Aw Sir, an vai chuan an man vek a, lock up ah an awm mek.” a ti a. Nathana chuan, “FIR ziak nghal rawh...police thah an tum avangin tiin i ziak dawn nia.” a ti a, damdawiin chu kan chhuahsan ta a. Station kan let leh chu DIG chuan a room ah Nathana nen chuan min ko lut a, thinrim tak hian, “DCP,ASP....in pahnih hian in che over mah mah a ni. Changtupa amaw in inti a mi? Politician te tana thawk zawk kan nih hi, an mahni do zawnga kan kal a nih chuan kan hna hi kan chan a nimai.” a ti hrep a. Nathana chuan, “Pu Ramliana hian thil a ti sual a, nikum khan Pi Vanlalruati pasal chu a huan leisak ah a vau a, a phallo hnuah a that a. Chumi hnuah Pi Vanlalruati te nufa chu an inchhuahsan turin a vau leh a, chuan tukin khan ASI Thantea chu Pu Ramliana driver pakhatin thah a tum a, a hnungah a sat a, damdawiin a awm phah hial a ni. Chuti chung chuan ka chhuah mai anga maw? Sir, mipui tana thawk kan ni, mipui himna hi kan mawhphurhna a ni.” a ti ve ta ngat a. DIG chuan, “Chutiang min hrilh ka ngai lo, i lo pian ve hma atang tawha police hna lo chelh tawh ka nih hi. Nathan, kha hmeithainu khan a pasal chu Pu Ramliana thah a nih thu a sawi a, awlsam takin i lo awih mai amaw? Tin Truck driver te khan Mizoram ngei ah Mizo Police te kut an rawn thlak ngam a...chu chu i awih em ni?” a ti leh a. Nathana chuan, “Ka awi nghal biklo, mahse Pi Ruati pasal a thah thu chu ka beng hriatah ngei Pu Ramliana hian min hrilh a ni. Tin kha truck driver te khan ASI Thantea, kan department a mi ngei chu an sawisa a, chu tluka proof a awm dawn em ni?” a ti a. DIG chuan, “Evidence evidence...khawnge evidence a awm? Pi Ruati pasal a that lai chu i hmu em ni? Nikuma thil thleng daih tawh a ni a, engmah thudik i hre lo. Chuan ASI pawh khan dawt a sawi pawh a ni thei, i bulah driver-in chempuiin min sat a ti a, mahse a duty pui te khan thudik a ni ngei e tiin an hrilh che em? Pu Ramliana khan Pi Ruati pasal a thah thu a sawi lo, a tul chuan tual ka that thin a ti mai chauh a nih kha. Case hi ti tawp mai rawh...anih loh chuan ka ban ang che.” a ti khur khur a. Nathana chuan, “Ka tihpalh ani Sir...FIR pawh thehluh a ni tawh a, truck driver te leh ASI Thantea te chu naktukah court a kan hruai a ngai dawn a, thulh theih a ni tawh lo. Thu neitute leh magistrate te nen pawh kan inbe fel vek tawh. Court thu chu ngaichang phawt ila, tichuan i duh leh min ban dawnnia.” a ti ve ta ngat a, DIG chuan rum em em hian min melh dun a, tichuan kan chhuak ta a. Nathana office ah chuan kan titi dun malh malh lai chuan putar pakhat hi alo lut a, an thenawmpa nena ram an inchuh vel chung chang a ni. NAthana chuan a titi pui bawrh bawrh a, kei erawh tukverh lam hawiin ka duatlai, ka bialnu ni tep tawh, alo zin leh huna ka bem hual, ka cousin Tuangtei chu ka lo ngaihtuah veng veng a.

Chutih lai chuan nu pakhat, kum 45 bawr vel, nu lian ve tak leh a hmel en pawha khawsa thei ve tawk tak ti hriat em em, hmelchhe lemlo tak mai hi alo lut a, a thinrim hmel em em lehnghal. Nathana chu rum tak hian arawn melh a, a tawng hma hma chuan Nathana chuan, “Lawk aw ka pi, pawnah minlo va nghak rawh. Hei...nang aiin ka pu hi alo lut hmasa a, a indawt zelin aw..” a lo ti a. Chunu chu a thinrim hmel hle mai, “Tunge ka nih i hria em?” a ti vin khur khur a. Nathana chuan, “Tu pawh chu lo ni la, hei hi ka office a ni. Pawnah lo nghak rawh...a reilo ang.” a ti a, chunu chu thinrim tak chung chuan pawnah a ding ta a. Minute 5 hnu velah chuan putar chu a chhuak a, NAthana chuan, “Ka pi, lo lut rawh le.” a ti a, alo lut a. Nathana hma takah chuan a thu a, “Inspector, tunge ka ni hi i hrelo a ni. Enquiry i neih mek, Pu Ramliana hi ka pasal a ni.” a ti a. Nathana chuan, “Ka hria alawm, a nupui pahnihna i ni tih pawh ka hria. I pasal hi eruk hmang, vote tam tak hmuh duh vanga mipuite sum hmanga tham thi a ni tih pawh ka hria.” a ti ta bian bian mai a. Chunu chuan, “DCP, he case hi ti tawp rawh, pawisa i duh ang zah zah ka pe ang che.” a ti a. Nathana chuan, “Case kan chhui apiangin criminal te hian tuna i sawi ang kha an sawi ziah alawm, ka hre hne hlei hlui tawh zawk. Pawisa neilo angah min ngai em ni? DCP ka ni a, hlawh pawh tam tak ka nei ve alawm. I duh chuan i chhuak thei e, chuan he case hi a tawp thleng ka kalpui dawn tih lo hria ang che.” a ti a. Chu nu chuan, “I la hre khawp ang.” tih pahin a chhuak a. A tukah chuan court ah chuan kan kal ta a, Pu Ramliana Punjabi truck driver-in ASI Thantea kut alo thlak vanga thubuai kal mek kha a ni. Thantea Lawyer chuan, “Your Honour, ASI Thantea hi police rinawm tak a ni a, nizan hmasa khan zan dar 8 atangin constable 10 vel te nen duty hna hi an bei tan a. Permit tellova hnamdang bungraw rawn phur lut te an awm leh awmloh an check a. Tlaivar thaka an duty hnuah zing khawvar tep vel khan heng MLA Ramliana driver te hi an lo kal a, permit an nei siloa, an motor number lah a in ang vek a. ASI Thantea hian man a tum a, an zinga pakhat hian a sat ta ani.” a ti a. Judge chuan, “ASI Thante, witness box ah hian lo kal la, i thil tawn te chu han sawi teh le.” a ti a. Thantea chu witness box ah chuan a han chho a, “Your Honour, heng driver te hi kan lo check khan min zah hlawl lo a ni. Number hi tinge a in an vek tia ka zawh in kan siam ni a in ang vang alawm tiin zahlo takin min chhang a. Pawisa pek te min tum a, mahse ka duh silo a, kut min thlak ta a ni. Chubakah permit an neilo a, registration an neilo bawk. Man ka tum a, kut min thlak ta a ni.” a ti a. Pu Ramliana lawyer alo ding chhuak a, “Ka hnial e, Your Honour. He ka file kenah hian engkim thudik chu a awm e, truck number plate zawng zawng hi a in anglo vek a ni, chuan permit an nei vek bawk a, i duh chuan file hi en rawh.” tih pahin file chu a pe a. Judge chuan a en vang vang a, “DCP Nathan Malsawmkim, enge awmzia? Truck Driver zawng zawng te hian permit an nei vek a, an motor pawh hi document leh registration zawng zawng a fel vek bawk. Tin, an motor number zawng zawng a in an vek mai bakah phalna nei thlapa bungrua lo phur te an ni.” a ti ta mai a, Ramliana chu ka va en a, a lo nui vur vur lehnghal. NAthana nen chuan DIG kan va en a, a lo nui vur vur bawk a. Judge bawk chuan, “ASP Thante...FIR hi tu thehluh ber nge?” a ti a, Thantea chuan, “KA senior Inspector SAngzuala a ni e.” a ti a. Judge chuan, “Inspector Sangzuala chu khawngaihin witness box a lo kal turin hriattir i ni e.” a ti a. SAngzuala chu witness box ah chuan a ding a, Judge chuan, “Enge awmzia? Hengmi te hian permit an nei vek a, an motor number pawh a in anglo vek. Chuti chung chuan tinge FIR hi i thehluh a?” tiin a zawt a. SAngzuala chuan, “Ka senior DCP Nathana hian thehlut turin min ti lui tlat a ni. Kan diklo zawk ti a sawifiah ka tum pawhin min tilui tlat sia, a thu ka hnial ngam silo a ni.” a ti ta mai a, ka va han beng chak tak. Pu Ramliana te leh DIG te chuan an lo thurualpui hman a ni tih chu a chiang kher mai. Judge chuan, “Heng Punjabi driver te hian permit an nei ngei a, an puhna hi adiklo a. Chuvang chuan chhuah an ni e, tin DCP Nathan Malsawmkima hian hetiang thu belhchian dawllo mai mai leh thil hrechianglo a enquiry a nei lui leh a nih chuan Police Department atanga ban a ni ang.” a ti a, Court chu kan chhuahsan ta a.

Nathana nen chuan lungawilo zet chuan court chu kan chhuahsan ta a, motor kan va pan a, kan motor bulah chuan Pu Ramliana te nupa hi anlo ding a. Pu Ramliana chuan Nathana bulah chuan, “DCP, ava pawi ve aw....tikhan ka thil tihtheih zia i hre tawh mai em? Min cho ve duh suh ka tih mawlh mawlh kha, keichu midanglam bik ka ni...min hneh chuanglo ang. Zahlo takin ka nupui ilo be vel a, kha kha i chantawk anih kha.” a ti a, a nui huah huah a. NAthana nen chuan ngawi rengin kan kalsan ta a. Station ah chuan kan let leh a, NAthana nen chuan kan lungawiloh thu te sawi in kan vui dun nasa khawp mai. DIG in intercom hmang chuan Nathana chu a rawn phone a, “Nathan, Rina nen khan ka office ah lo kal teh u.” a ti a, tichuan DIG office lam pan chuan kan kal ta a. DIG office chhungah chuan kan lut a, Pu Ramliana nupui alo awm a, an lo titi tui hmel kher mai. An nui dun bawk bawk a, Nathana chu va lut in, “Enge ni ta Sir?” ava ti a. Pu Ramliana nupui chuan, “DCP, pawnah minlo nghak lawk ta che u, nang aiin ka lut hmasa tlat.” a lo ti deuh kher a, DIG lah chuan, “Ni e Nathan, minute 5 hnuah ka lo ko leh ang che, pawnah sawn lo va ding hrih ru.” a la ti zui. Nathana nen chuan pawnah chuan kan nghak a, minute 5 hnu velah chuan Ramliana nupui chu a rawn chhuak a, hmuhsit hmel em em hian Nathana chu a en a, ticuan a chhuak ta a. Nathana chu ava lut a, DIG chuan, “I thiltih pawizia hi tikhan i hrethiam tawh em? Keipawh nang ang rual ka nih chuan ka inla changtupa ve em em thin alawm, thildik chauh tih ka tum thin, mahse awmzia a awmlo. Ka sawi mawlh mawlh a, i zawm duhlo anih kha.” a ti a. Nathana chuan zam hauh lo hian DIG chu a en a, “Chumi min hrilh tur chuan ami min koh a?” a ti ve deuh ngat a, ka va han t(r)an thei tak em, ka boss nge nge. DIG chu a ngawi vang vang a, “Umm...tu emaw ni in Pu Ramliana hi a vau thin a ni awm a, a sa himna turin i va ven angai a ni.” a ti a. NAthana chu a lungawilo kher mai, a hmelma va venhim chu a chak vak dawn lo tih chu ka hre sa. DIG bawk chuan, “Tunah an inah va kal la, Rina pawh kha va hruai ve rawh. Station lam hi chu ka kutah dah rawh, SI te pawh an awm a, tunah va kal vat rawh u. Tuin nge lo vau thin a, tuin nge thah tum tihte pawh va zawt rawh u.” a ti a, tichuan kan pu ber DIG thu chu a zawmloh theih siloh a, phur lemlo tak chuan kan va kal ta a. Pu Ramliana in kan va thleng a, security chuan, “Lo lut ru.” a ti a, a room lam chu kan va pan ta a. Room chhung kan lut chu kan thil hmuh chuan min ti hrilhhaiin min ti zak ngei mai. Pu Ramliana chuan nula, la tleirawl ve tak leh hmelchhe lemlo tak hi a lo tawmpui a, an lo in fawp nasa ngei mai. Pu Ramliana chuan min hmuh veleh chuan, “Ehe, inlo thleng maw?” a ti a, Nathana chuan en pawh a en peih lo, lehlam hawi pah chuan, “DIG in min rawn tir a, tuin nge lo vau thin che?” a ti a, Ramliana chuan, “Lawk aw, ka bawihtei nen hian nuam kan han chen phawt ange...kan nu a chhuak lawk a, min rawn hmu riau riau ange, pawnah khan minlo veng teh u.” ala ti zui. Pawnah chuan kan chhuak a, kan zak a, kan thinrim dun hle bawk. Minute 40 vel zet an tawmdun hnu chuan anlo chhuak dun a, nula chu a haw ta a. Ramliana chuan, “Englo ania, message in tu emaw ni hian thah ah min vau reng a, vote ka hmuh nasat vang nge ni, party dangin min thik a ni ngei ang. Ka sa himna hi chu in pahnih kutah a awm tih hi hria ang che u, tunah chuan haw phawt rawh u, KS dang pawh ka la mutpui dawn a, ka la buai hrih emai.” a ti ham ham a, tichuan kan haw ta a. NAthana nen chuan Stationah kan let leh a, thinrim tak chuan NAthana chuan DIG office room lam a pan a, an in hau ta vak vak mai a. Pawnah ka ding reng a, minute 5 hnu velah chuan a lo chhuak a, “Rina,haw ang.” a ti a, tichuan kan inzui chhuak ta a. Motor chhungah chuan NAthana chuan thinrim hmel tak hian a melh ngai a melh tlawk tlawk a, “Saw DIG saw....hremna ka pe khawp ang.” a ti nuah nuah a, tichuan kan haw ta a.

Kan haw kawngah chuan Nathana chuan, “Ka zak khawp mai Rina, kei DCP hian a vawikhatna atan KS ka venghim hi ani ringawt. Kha KS leh Ramliana sex hmang lai kha, kan venghim dun anih kha, chupawh a nupui in a man loh nan..ka zak ngawih ngawih.” a ti a, a hnuk a ulh hial a. Motor khalh pah chuan keichuan, “Sir, politician an ni a, keini police te chu an tan chuan chhiahhlawh ang mai kan ni. An mahni venhim an ngaih chuan ka venghim a, an thu thu in kan awm chu anih ber hi.” ka lo ti ve bawk a. Nathana chuan, “Rinawm, sawlai deuhah sawn ka thianpa te in a awm a, va kal la, zu a zuar thin a, Whiskey half va lei ta che. Zu in ka duh ani, ka thinrim hi a zia deuh mahna.” a ti a, pawisa min pe a, ka chhuk a, whiskey half chu ka va lei ta a. Motorah chuan ka let leh a, dispo ah chuan zu chu ka thli a, tui ka pawlh hma hma chuan dispo chu Nathana chuan a rawn la a, a in tlak nghal pup a. Dispo chu ka lamah chuan a rawn lek kang a, “Ka duh leh.” a ti a, zu chu ka thli leh a. Tui pawlh tura tui bottle ka lak lai chuan dispo chu a quit leh nghal pap mai a. Keichuan, “Sir, tui tal te chu pawlh ve ila, i pum tan a thalo ang.” ka ti a. Nathana chuan zu um chu a la lawk a, a in ta khawlh khawlh mai a, tichuan whiskey half chu amahin a inzo ta vek mai. Tichuan an in thleng ka thlah a, motor atanga a chhuk chu a a tlu thla rawp mai a. Rang takin ka kai tho a, a kai hle mai. An in kawngkhar thleng chu ka kuah phei a, door bell ka hmet a. Sanvi chuan alo hawng a, Nathana rui em em a lo meng sen rum chu a hmuh chuan mak a ti em em a. Keichuan, “Sanvi, khawngaihin Sir hi hau suh aw, a thil tawn hian a zir lo em ani.” ka ti a. SAnvi nen chuan Nathana chu kan kuah lut a, Nathana chu sofa ah chuan a thu a. Sanvi chu a bulaha va thu a, “Duhtak, enge awmzia? Tinge iva rui ve?” a ti a. NAthana chuan, “Sanvi, i pasal hian vawiin khan thil diklo tak ka ti a ni. KS pakhat leh MLA candidate pakhat chu sex an hmang a, a nupui in a hmuh loh nan tiin ka veng a, ka zak ngawih ngawih. DIG thupek ka zawm lo thei silo, ka zak ani. Miin Nathan Malsawmkima, mi huaisen, thildik chauh ti thin, mi rinawm tiin min fak a, mahse kei erawh chuan MLA eiru pakhat uire lai ka lo veng thung a, mipui te, min fak em em tute leh minlo ngaisang em em tu te hian hre ta se, engtin nge min ngaih tak ang?” a ti a, a rui bawk si nen chuan a tap titih deuh lehnghal. Sanvi chuan, “Duhtak, nangmah chauh nilovin Rinawma pawh saw a zak dawn lutuk asin, lungngai suh...inthiamlo duh suh, mu phawt rawh aw, lo kal rawh roomah lut ang.” a ti a. Sanvi nen chuan Nathana chu room ah kan kuah lut a, khumah chuan a mu a, a muhil nghal bawrh bawrh a. Sanvi chuan, “Rinawm, bike i keng lo mi?” a ti a, keichuan, “Um...Sir Nathana nen hian kanlo haw duna.” ka ti a. Sanvi chuan chahbi min pek pah chuan, “Naktuk hi Nathana day off a ni a, motor hi khalh haw mai rawh. Ka lo hrilh leh mai ang, chuan fimkhur ang che aw...” tiin min thlah a. Chumi zan chuan ka mu thei mawlh lo, keipawh zak em em tho mah ila, khati em em a NAthana zak leh tlawm hmel kha ka la hmu ngailo. Ka khawgaih em em a, DIG vak vek ani, Pu Sangliana a ngaihawm ngei mai. Zing dar 7 velah chuan Nathana chuan min rawn call a, “Rina, kan inah lo phei teh. Ka motor kha ilo khalh phei nghal rawh aw, hmanhmawh in.” a rawn ti a, tichuan ka tho a, Nathana te in chu reiloteah ka thleng thuai a. Nathana chuan a room ah min ko lut nghal a, room chhungah chuan SI Liantea pawh alo awm ve a. Nathana chuan, “Rina, kan pathu zingah hian saw kan DIG saw hawlo kan awmlo. Alakah sawn phuba kan la ve ngei tur a ni, hetiang ringawta kan Station thu neitu a nih reng chuan hna diktak kan thawk thei lovang. Ruahmanna ka siam fel vek tawh, SI Liantea pawh hi hman deuh khan thil dik a tih avangin a suspend kha ani a. Ti hian kan che ve dawn ani, lo ngaithla ru aw...ASI Thantea case kha chu a tawp tawh a, thiamloh kan chang a. Mahse Pi Ruati FIR thehluh kha ka la titawp lo a, mahse DIG khan ka khawih chhunzawm a phal tawh siloa, SI Liantea hian a buaipui dawn a ni. Liantea hian DIG bulah pawisa min pek loh chuan ka kalpui tlang ang a ti anga, DIG chuan pawisa chu pek che a intiam ang. Chu in inbiakna chu i record vek anga, abak chu kan ngaihtuah chawp leh mai dawnnia.” a ti a, tichuan SI Liantea nen chuan Nathana in chu kan chhuahsan ta a.

Atukah chuan DIG inah chuan SI Liantea chu ava kal ta ngei a, tichuan DIG te in bulah chuan Nathana nen chuan Liantea chu kan lo nghak a. Darkar chanve vel hnuah chuan Liantea chu alo chhuak a, motor chhungah chuan alo lut a. DIG nena an inbiakna, Liantea'n a lo record vek chu kan ngaithla ta a, DIG chuan Liantea bulah chuan, "Case i close a nih phawt chuan cheng nuai 10 ka pe ang che, i kaisang bawk ang. Tin, Nathan Malsawmkima leh Lalrinawma te hi ka ban thuai bawk ang." tia a thlemna te chu kan ngaithla a, Nathana chu a nui ta ver ver mai. Nathana chuan, "Liante, DIG chuan pawisa chu engtikah nge a pek dawn che?" tiin a zawt a. Liantea chuan, "Zaninah min pe dawn." a ti a. Nathana chuan, "Rinawm, press mite lo ko khawm la, Liantea hi pawisa la tur angin DIG inah chuan kal phawt se, kan zui anga, tichuan kan luhchilh nghal rup mai dawn nia." a ti a, tichuan Station lamah duty turin NAthana chuan min Liantea nen chuan min thlah a, ani erawh a day-off a ni bawk a, a haw ta thung a. Zan alo ni a, kan plan lawk ang ngei chuan SI Liantea chu DIG te inah chuan a kal a, keipawn press mite chu ka ko khawma, tichuan DIG te inkawtah chuan kan ding ta thap mai a, Liantea chu a lut ta a. Minute10 vel hnuah chuan Liantea chuan Nathana chu a rawn miss call zeuh a, tichuan kan lut tak huk mai a. DIG leh a nupui chuan dawhkanah pawisa tam em em mai hi an lo chhiar malh malh a, press mite nena kan han lut huk mai chu an phu chiang teh asin. DIG chuan, "Enge awmzia? Nathan,enge i rawn tih?" a ti chel chul mai a, a nupui lah chu a mangang em em a. Nathana chuan, "DIG Sir, SI Liantea i tham avang leh MLA Ramliana a ruka i thawhpui avangin man i ni e." tiin DIG chu an nupa nen, an pawisa zawng zawng nen chuan kan man ta a. NAthana chuan Liantea bulah chuan, "Liante, ka lawm lutuk ania, min puihna hi a thlawn lovang. Cheng nuai 10 em em chu ka pe thei kherlo ang che, mahse Inspector i ni har miah lovang." ati a. Liantea chuan, "Sir, engmah a ngailo, ka pui thei che hi ka inchhuang zawk asin. Sub Inspector atanga Inspector a han kaisan ve pawh chu chak viau mah ila, ka tih tur ka ti mai chauh a ni a, engmah a ngailove." a ti a, tichuan DIG te nupa chu kan phurliam ta a. A tuk zingah chuan news ah DIG kan man thute leh, an sum eiruk zawng zawng te chu puanzarin a awm ta a. An thawhpui MLA Pu Ramliana pawh chu man theihna (arrest warrant) chu home minister hnen atangin kan dawng a, tichuan Ramliana te inlam pan chuan kan kal ta a. Ramliana te in kawta security chuan, "In lut ngawt theilo ang, arrest warrant tello chuan ka pute nupa hi in man theilo." a lo ti ve khanglang a. Nathana chuan arrest warrant hmuh pah chuan, "Man ve i duh loh chuan awmsan rawh, ka beng thal tawp mai ang che." a ti a, a hlau kher mai. Inchhung kan lut a, Ramliana nupui chauh chu alo awm a. Nathana chuan, "Ka pi, arrest warrant kan nei vek a, in in pawh hi kan dap dawn. Nat i duh loh chuan thu awih takin minlo zui la, i him animai." a ti a. Ramliana nupui chuan a phone a phawrh a, "Hello, Ramlian, engvangin nge police ho hian min rawn man rikngawt a?" a ti a, phone atang chuan Ramliana chuan, "Court ah naktukah an hruai dawn che a, lungngai suh, ka rawn bail chhuak ang che, keipawh min rawn man alawm. A fel leh vek mai ang, lo lungngai suh. Zan khat bak lock up ah kan riak dawnlo" a ti a, tichuan Ramliana nupui chu kan man ta a.

Station-a kan let leh chuan Kulikawn Police Department Senior SP, Pu Joshua Lalchhandama hi alo awm a, NAthana chuan, "Ehe Sir, hetah daih daih enge i rawn tih dawn a?" a ti a. Joshua chuan, "Englo ania Nathan, vawiin hian Lammual ah Minister alo kal dawn a, duty turin min ti a, mahse ka hman silo a, ka aiawh tur ka lo tir ang ka ti ve ringawt a. Ka ngamtlak i ni bawk a, Rinawma nen hian tihtur inneih loh chuan ka ai va kal mai ta che u. Hetia thu rawn pe thei che u hi chu ka ni miahlo, mahse SI Liantea te pawh an awm a, in pu ber DIG lah chu nangmahni bawkin i man daih si a, khawngaihin min pui mai teh u. Kan nu hi aserious ang reng lutuk a, kan DGP pawh ka lo bia ang, damdawiina ka kal ngei angai ani." a ti a. Nathana chuan, "Ummm...inthlahrung mahta che, SI Liantea hi incharge ah kalo dah phawt ange, Lammual lam chu kan zu kal ange. I nupui chu han awmpui la, chanchin minlo hrilh ve dawnnia aw..." a ti a, tichuan Lammual lam chu kan pan ta a. Lammual ah chuan kan zu kal ve a, kan duty a. Minister Pu Lalthankhuma chuan thu a sawi a, programme a zawh chuan an in thleng chu kan va thlah a. Minister chuan, "Nathan, Rinawma nen khan lo leng lut ula, thingpui in lawk teh ang u." a ti a, tichuan an inah chuan lenglut in thingpui kan in ho ta a. Minister chuan, "Phone ka han hmang lawk ange, minlo hrethiam teh u." a ti a, tichuan phone chu a hmang a, kan hriat tur ngei chuan kan Department-a kan ADGP Pu Hmingmawia chu a call a. Pu Hmingmawia hi kan Additional Director General of Police (Junior DGP) a ni a, tunah hian damlohna avangin in lamah a in enkalw mek a ni. Minister chuan, "Hello, Pu Hmingmawia maw? Khaa...kan MLA candidate pakhat, Pu Ramliana kha, in department-a thawk, ASP leh DCP ten an lo man a niawm a, a zialo kher mai. Chhuah turin han ti teh, kan party mi leh sa te an ni a, a mualpho thlak emai." a ti a, tichuan phone chu a dah a. Nathana nen chuan Minister chet dan chu kan ngei hle mai, rum deuh hian kan melh tlawk tlawk ringawt a. Chuveleh Nathana phone a rawn ri ta chiah a, kan ADGP ngei alo ni. NAthana chuan a pick up a, "Hello Sir." a ti a, Pu Hmingmawia chuan, "Nathan, Ministerin min rawn phone a, chhuah vat rawh u...a zahthlak lutuk. Enge maw inlo inlak engemaw ciau thin le aww...chhuah vat ru." a ti a. Nathana chuan, "Ka theilo Sir, news ah pawn puanzar an ni vek tawh a, an thiltih man hi an hmu ngei tur a ni. Court rorelna kan nghah a ngai, thil thleng tur chu a thleng vek tawh." a ti a, phone chu a dah hmak mai a. Minister chuan nui sang hian Nathana chu a en a, "DCP, ka mi ngainat zawng tak i ni. Nang anga mi huaisen leh mi luhlul hi alawm ka duh chu...ka tan thawk ta che, pawisa tam tak ka pe ang che." a ti a. Nathana chu a ding hluai a, "Thingpui chu a tui hle mai ka pu, kan kal phawt ange. Rinawm, haw ang." a ti a, kan chhuak ta a. Atukah chuan Court ah chuan Pu Ramliana te nupa chu kan kalpui ta a, rorelna an zawh fel meuh chuan vanduai thlak takin kan chaklo leh ta. Ramliana chuan thiam takin vautu a neih thu te, thah tum tu a neih thu te chu a sawi a, chhuanlam siamin fing takin a insawi thiam leh ta der mai. Judge chuan, "Engpawh chu nise, bail chhuahna cheng nuai 4 i chawi angai dawn hrim hrim a, i inhuam a nih loh chuan thla 2 chhung i tan angai." ati a, Ramliana chuan, "Huam tehreng e." a ti ham ham a, Ramliana chu an chhuah zalen ta. Court rorelna a zawh hnu chuan Ramliana chu nui vur vur chungin kan lam a rawn phei a, a rawn thlen dawn tepah chuan silai a puak dur a, silaimu chuan RAmliana chu a fu teuh kher mai. Nathana nen chuan Ramliana chu kan cover nghal a, silaimu lo chhuahna lam chu kan va en a, lukawlh pakhat, lian lampang hi a ni a, motor chhunga a lut lai chu kan hmu hman, mahse ahmel erawh kan hmu chiang hman lo. SI Liantea chuan, "Keiman ka'n um ange, Sir...Ramliana hi lo buaipui ru." tiin a um nghal a. Ramliana chu an inah kan hruai haw a, inah chuan kan luhpui a. Nathana nen hian kan chak em em vanga Ramliana, kan hmelma ber hi venghim kan nilo a, sawi tak ang khan DIG thuchhuak a nih vang a venghim chauh kan ni. Nathana chuan, "Pu Ramlian, vau tu che chu an awm tak tak ami?" a ti a. Ramliana chuan vin zet hian, "Dawt ka sawi in ring ami? Min vautu an awm a, thah min tum thu hi a rawn sawi reng a, chuvang alawm in venhimna ka dil reng ni." a ti khur khur a. Nathana chuan, "Anih chu, constable ho hian anlo awmpui ang che." a ti a, tichuan kan hawsan ta a.

Chumi ni chuan zan thleng kan station ah chuan kan duty a, Nathana rilru pawh a insual nasa kher mai. Keipawh chuan thil thleng kha mak ka ti a, Ramliana thah tum tu kha tunge ni ang? Engvang nge? Khawia mi nge ni ang?" tiin ka ngaihtuah ve nasa hle a. Zan dar 9 velah chuan Pu Ramliana chu a rawn lut hlawl mai a, Nathana nen chuan phawk hrawh hian kan lo en a. Nathana chuan, "Ehe...Pu Ramlian, enge i rawn tih a?" a ti a. Ramliana chuan hlauhthawn hmel tak hian, "DCP, min thah tum tupa kha ka mumangah ka hmu nasa lutuk a, tunah chuan ka hrechhuak zawk mai. Kha lukawlh pa kha vawiin khan SI Liantea khan a man hman talo kha a ni a, mahse ka mithhla in ka hmu thei a ni. Kha lukawlh pa kha, min thah tum tu kha maw, kan minister Pu Lalthankhuma security guard te zinga mi ngei a ni." a ti ta mai a. Nathana nen chuan mak kan ti ngei mai. Keichuan, "Anih chuan Minister hian thah a tum che tihna em ni?" tiin ka han zawt a. Ramliana chuan, "Teuh lo, ka ringlo...ka thianpa a ni a, ahmaa ka truck driver ho te him theihna chhan pawh kha kan Minister hi a ni. Permit leh Registration te pawh in hriatloh hlanin a buaipui vek a, document zawng zawng pawh ka lawyer kha a pe a, hnehna ka chan theih phah a nih kha. DCP, kha security kha midangin pawisa pein min that turin a tir a ni ngei ang, mahse tunge ni ang?" a ti a, a thlan a tla zawih zawih a. Hetih lai hian Nathana leh kei leh zan duty tur pakhat Head Constable Pekhlua chiah kan awm tawh. Nathana chuan, "A tha e, Pekhlu....Pu Ramliana hi lo awmpui la, kei leh Rinawma hi Minister te inah kan va kal ange...thu va zawhfiah a ngai a nih chu." tiin kan kalsan ta a. Minister lah chuan chu a security lukawlh-a chu thla tamtak kal ta khan a ban daih tawh thu min lo hrilh a, Minister chu rinhlelhna tur engmah ka hriat loh avang chuan Station lamah ka let leh ta a. Station kan let chu Station kawtah chuan Ambulance hi alo awm a, Station chhung atang chuan constable ho chuan Pu Ramliana ruang chu an rawn zawnchhuak ta mai a. Nathana nen chuan kan va kal a, SI Liantea chuan Head Constable duty Pekhlua chu thu a lo zawtfiah mek a. Nathana chuan, "Enge zawmzia Pekhlu?" a ti a. Pekhlua chuan, "Ihh...palian pui pui sawm vel anlo kal a, tichuan Pu Ramliana hi an rawn kaphlum a, min sawisa vak a, tichuan an kal leh ta a ni. hei ka hmai hi en la, min hnekna te hi.." tih pahin a mit duk chur te chu min kawhhmuh a. Nathan chuan min rawn en a, kan awihlo dun kher mai. Nathana chuan, "Ka roomah lo kal rawh." a ti a, tichuan Nathana room ah chuan kan inzui chho ta hlawm a. Nathana chuan Pekhlua chu rum zet hian a melh a, "Pekhlu, engchiah nge thleng sawi rawh." a ti a. Pekhlua chuan zam hmel tak hian, "Ihh..ka sawi ang kha, mi 20 vel anlo kal a, min sawisa a, chuan min sawisak zawh hnuah Pu Ramliana hi an kaphlum a ni." a ti a. Nathana chuan, "Dawt sawi siuh...nichinah mi 10 i ti a, tunah mi 20 i ti leh a. Nichinah an kahhlum hnuah min sawisa i ti a, tunah min sawisak zawh hnuah an kaphlum i ti leh a. Engkim ka hria, pawisa an pe che a, tichuan i that ta ani. Pekhlu, i kaisang tep tawh a, rinawm takin i thawk thin amaw ka tia..engtik lai khan nge sum hian i mit a lo tih del ve a? I nu hi pawisa vangin thah ngai ta se, i that ve tho angem? I lo tenawm hle mai, rinawm taka i thawk theilo a nih chuan bang mai rawh..i hmel pawh hi ka hmu peihlo. Chhuak nghal rawh...i thiltih tenawm tak hi ka puanzar hma hian banna thehlut mai rawh." a ti ta hrep mai a, Pekhlua chu tap zawih zawihin a chhuak ta a. Nathana chuan a room ah police dang hi chu a ko khawm a, ro a rel ta a. Chutia Nathana'n kan awmdan tur min hrilh mawlh mawlh lai chuan room lehlama silai puak dur chu kan hre ta a, kan phu chiang hlawm kher mai.

Room chhung kan va lut chu Head Constable Pekhlua chu alo let reng mai a, silai a lo hum bawk a. A lan dan chuan amah leh amah a inkap hlum tih chu tumah inhrilh kan ngai lo, Nathana chuan a zu en chiang a, a luah a lo inkap hi a lo ni a. Pekhlua hma zawna dawhkanah chuan camera hi alo awm a, Nathana chuan, "Rina, camera kha lo la teh." a ti a. Camera chu Nathana ka pe a, alo in record mek a. Camera chu a ti tawp a, video chu a save a. Video chu a play ta a, camera hma zawn takah chuan Pekhlua chu dingin, "Sir Nathan, ka tihpalh a ni. Rinawm takin ka thawk thin a, min duhsakin ka nupui fanau te pawh i ngaihsak a, ka tan i hlu em em ani tih pawh ka hria. Zanin khan Pu Ramliana ka awmpui mek lai khan mi panga vel an lo lut a, Minister Lalthankhuma rawn tir te an ni. Sir, a tir chuan chhuak turin ka ti a, mahse pawisa tam tham tak min hmuh tir a, pawisa khan ka mit a ti del ani. Pawisa chu la in Pu Ramliana chu ka kap ta a, keimah thah a ni. Ka hlauthawng a, ka inchhir bawk. Sir, ka nu pawh kei hian pawisa vangin ka hralh duh mai angem tia min zawh khan, ka na em em a, ka thil tih kha adiklo a ni. Tual ka that a, chupawh pawisa vangin...ka duhlo, pawisa kha ka duhlo. Sir, pawna ka motor ah khan pawisa chu ka dah a, in kutah ka hlan ni rawh se. Kei chu dam tlak ka nilo, Sir...ka thi mai ang." tiin a tap zawih zawih a, a inkap hlum ta a. Nathana chuan SI Liantea bulah chuan, "Liante, he video hi copy la, CD-in siam la, ADGP hnenah pe ang che." a ti a, tichuan ruang chu kan la sawn a. A tukah chuan ka hlauh ruk ang ngeiin CD chu ADGP chuan news ah chhuah duh lovin a tichhe ta daih mai tih kan hre ta a, a va han pawi thin tak em. NAthana'n a vau vangin Pekhlua chu a inthat tiin news ah an puang ta chuai chuai mai a. Nathana chu a thinrim em em a, ka bulah chuan, "Rinawm, ADGP te inah kal ang." a ti a, tichuan kan kal ta a. ADGP chuan NAthana a hmuh veleh chuan, "Nang tak hi chu aw...Nathan, engmah i ti thei tawh dawnlo tih hria ang che. Ka suspend dawn che, tun atanga reilo te ah. Ahma pawh khan court chhungah Judge khan warning a pe tawh che a ni lawm ni? Thu hi i awihlo riau mai, chuan ASP Rinawm...nangpawh kha, i boss thu thu hian awm tawh suh. NAthan, engmah i ti thei dawn chuanglo tih hria ang che." a ti a. NAthana chuan rum zet hian ADGP chu a melh a, "Dik taka sawi chuan maw SIr, ka thei khawp mai...engpawh ka ti thei a ni. Ramliana kha Pekhlua'n a that ngei mai, mahse video a i hmuh ang khan a tih tir tu leh pawisa pe tu chu kan minister Pu Lalthankhuma a ni....CD kha a copy ka neiloh i ring ami? Ka nei asin, engkim ka puang vek dawn tho tho...mangtha le Sir." tiin kan kalsan a. Motor lam kan pan a, keichuan, "Sir, tinge dawt i sawi a? CD kha a copy i neih miah loh kha..." ka ti a, Nathana chuan, "Achang chuan dawt sawi te hi a ngai thin alawm." a ti a. Tichuan tlai alo ni a, Nathana nen chuan kan haw dun leh ta a. NAthana te in ai hian kan in hi Station atang in a hla zawk a, Nathana te in kawt kan thlen chuan bike 5 vel hi alo intlar duah mai a. Nathana nu leh pate hi an zin lai a ni a, Nathana te fanu thar, Mary pawh an hruai tel ve a ni. Inah hian SAnvi chauh a awm a, chutia bike 5 vel lo intlar duah mai chu mak kan ti hle a, Nathana te inah chuan kan lut ta a. Kan hlauh ang ngeiin mi 10 vel hian NAthana te bathroom kawnga hawn tumin an lo bei chiam mai a, NAthana nena min hmuh chuan min rawn beih an tum ta a. Theih tawp chhuahin kanlo bei let a, a tawpah chuan kan um hawta vek a. Bathroom lam pan chuan kan kal a, bathroom kan hawng chiah chu Sanvi a lo au tuar mai a, NAthana chu a kuah ngahl a, a tap zawih zawih a.

Sanvi chuan, "Nathan, khami te kha tute nge? Min thah an rawn tum ringawt a.." a ti a, NAthana chuan, "Minister rawn tirh te an ni ngei ang, lungngai suh, i him tawh e." a ti a. Nathana phone chu a rawn ri a, Minister Lalthankhuma a lo ni." NAthana chu a hmuh duh thu a rawn hrilh a, Nathana nen chuan Minister inah chuan kan va kal ta a. Minister chu NAthana hma ah tak chuan a ding a, Nathana nen chuan an in melh ran mai a, kei erawh an sir ah ka ding thung. Minister chuan, "Nathan, ka bulah lo thawk mai rawh. CD chu min pe la, enge i duh? Pawisa pawh ka pe ang che. Politician dang te angin, cheng nuai 5, nuai 10...tih vel lek lek ka pe dawnlo che, nuai 50 ka pe ang che...cheng nuai 50 chu engzata tam nge a nih i hria em? Maktaduai 5 lai anih chu...CD kha chhuah mahla e, min man anga, mahse reiloteah bail chhuah ka ni leh tho ang. Pawisa ka nei a, politician ka ni a, Minister ka ni. Media ho hi chuan e...an TRP tih san nan mai mai alawm hetia news an hriat chak em em nachhan hi chu....thla 2 thla 3 vel aliam anga, an theihnghilh leh mai ang. Mahse keichuan ka chunga i thil tih te hi ka theihnghilh leh tawh dawn silo, i dam chhunga ka hmelma nih chu i duh dawn bik em ni? Minister hmelma nih chu i duh lovang tiraw? Enteh DCP, Ramliana kha ka thianpa a ni a, ka tana mi tangkai tak ani. MAhse ka that ta mai anih kha, a chhan chu maw...kan tan buaina a ni thuai dawn. Vote a hmu hnem a, kan party in ang mahse, ka dinhmun hi a luah thuai ka hlau a ni. Chuvang chuan politics game hi chu i rin phak bak ani ang...min lo join mai rawh." a ti a. Nathana chu a ngawi vang vang a, "Ummm....hetiang khawpa sawmna ropui hi kala dawng ngailo, mahse..ka duhlo. Kan kal ange, Rinawm...kal ang." a ti a, kan chhuahsan ta daih a. Motora kan tlan pah chuan Nathana chuan a kawrkilh chu a kheuh mual mual a, a kawrkilh pakhat chu a pawt thla a. Ka hma zawnah chuan a rawn lek kang a, "Rina, hei hi enge a nih i hria em?" tiin min han zawt . Keichuan, "A ho e...kawrkilh a nih kha." tiin ka lo chhang a. Nathana chuan, "Kawrkilh satliah a ni lo, camera a nih hi." a ti ta mai a. Keichuan, "Ehe...a awmzia chu, i record vek tihna maw?" ka ti hu mai a. Nathana chuan, "Aw...ni e..tikha chuan hnehna kan chang tawh ngei ang. Media ho ko khawm rawh le, engkim i puangzar ang hmiang." a ti a. Tichuan Media ho chu kan ko khawm a, Pu Lalthankhuma, Minister zahawmloh tak leh politics a diklo zawnga kalpui thin, tual thah hmang chu a inpuanna video chu ON AIR in an chhuah ta mup mup mai le. An chhuah hnu reiloteah chuan CM hnen atangin arrest warrant kan hmu ta a, Minister chu kan man thei ta a ni.

THE END