NATHAN SEASON-2 (Episode-8) HE KNOWS EVERYTHING by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-2 (Episode-8) HE KNOWS EVERYTHING by:Aaron Malsawmdawngzuala

Unread post by Aaron Dustin » April 1st, 2020, 10:23 pm

NATHAN SEASON-2 (Episode-8)

HE KNOWS EVERYTHING

Written by : Aaron Malsawmdawngzuala

Nathana te Station ah chuan constable thar pakhat hi a rawn thawk thar dawn a, chupa chu Nathana thian hlui Francis-a a ni. Francis-a leh Nathana hi thian tha tak an lo ni tawh thin a, Nathana ACP a nih laia Nathana te in bul chiah a in luah a, mahni a khawsa thin a ni. Mahse kum 5 vel an awm hnuah a hna avangin a insawn ta daih a ni. Nathana nena an inhmu pawh chu an hlimdun ngei mai, Nathana pawhin a lo welcome tha in a duhsak nghal khawp mai a. Hetih hunlai hi MLA inthlan hnaih hunlai vel a ni a, party tin te pawh an tang tlang kher mai. A ngaite ang bawkin a thenin vote an lei a, athenin an hralh a, politics game tenawm tak chu an khel leh tan ta huai huai mai. MLA candidate pakhat Pu Saia pawh tlin ngei tum leh an party chak ngei theih nan a bei nasa hle mai a, mahse amah el tu ber leh a hmelma ber erawh chu an khaw Minister Pu Duhzuala ani tlat mai. Chutih rual chuan candidate ve tho pakhat, fel hmel leh zaidam hmel em em, mi nunnem tak leh zezawi em em Pu Buanga a awm ve bawk a. Minister Pu Duhzuala chuan Pu Buanga zawk hi a duhsak em em mai a, chutak chu Pu Saia hian a thik a, Pu Duhzuala pawh a huat zual phah thin hle a ni. Minister chuan Pu Buanga hi amah ai awh tu atan hle amah anga Minister a nih ngei theihna turin a tanpui nasa in a support em em a, Pu Duhzuala hi a upat ve tawh em avangin a aiawh tu tur atan Pu Buanga hi a duh ber a ni. Pu Buanga hi ala upa lemlo a, kum 46 vel bak ala nilo, Pu Saia erawh kum 50 a pel duai tawh thung. Assembly house ah te meeting te, committe te an neih te hian Pu Duhzuala hian Pu Saia hi a tawng el khum deuh kher thin a, Pu Buanga thusawi te chu a support em em thin a. Mahse Pu Duhzuala hian Pu Saia hi haw hle mahse, Pu Buanga erawh pa zaidam tak a ni kan tih tawh kha, Pu Saia hi a zah thiam em em a, a haw ve hran lemlo.

DGP chuan Nathana chu a office ah a ko lut a, DGP chuan, “Nathan, hei MLA candidate pakhat Pu Buanga hian an veng ah khawlaiah programme a nei dawn a, duty turin va kal ta che, helamah chuan tihtur engmah a awm hrihlo, kan lo buaipui thei tho ang. I assistant Rinawma lahin a zinbo san daih si che a, i duh leh i thianpa Francisa kha hruai ve la.” a ti a, Nathana chuan thuawih takin, “Awle Sir..” a ti a, akal ta nghal a. Francisa nen chuan bike ah inphurin Pu Buanga te inlam chu an va pan ta a, Pu Buanga chuan an inkawta stage zimte an siam ah chuan thu alo sawi a, mipui tlem azawng an awm ve bawk a. Nathana te pawh chu an duty dan pawh a serious lemlo khawp mai, constable panga vel chu an vei kual ve a, amah leh Francisa erawh mipui hnungah nihawichi chipin an lo titi mai mai a. Nathana chuan, “Francis, kan DGP hi ka nuih a ti za tlat.” a han ti ringawt a. Francisa chuan, “Engati ngawt maw?” alo ti hu mai a. Nathana chuan nui huah huah chung chuan, “Kan duty-na hmun hi enta che, programme pui em em pawh a nilo a, veng mawng ber ala ni zui. DCP ka ni ve a, mi bulah inla pawimawh tak takin Crime Branch ami ka ni e... te ka han ti vel thin a, tunah Minister thusawi pawh nilo, function ropui tak pawh ni lemlo ah min han duty tir chu ania, ka hniam hmel e.” tiin nihawichi chip mual mual pah chuan a nui huah huah a. Francisa chuan, “Haha...hna hahdam tak a pe zawk che a nih hi, lawm hle rawh.” a ti a. Nathana chu a indap a, “Ehe...ka meizial a zo daih mai, ka va lei ange aw..lo awm rawh aw.” a ti a, tichuan meizial lei tur chuan a kalsan ta a. Chutia NAthana a kalsawn hlan chuan Pu Buanga thusawi mek lai chu a dinna stage chu a chim ta rum rum mai a, stage-a thu ve dang YMA hruaitute leh duty ho te pawh chu stage atang chuan an tla thla a. Chuveleh engemaw hi a puak dur mai a, a khu ta rum rum mai a. Nathana pawh a phu chiang hle mai, rang takin a tlan let leh a, Pu Buanga dinna stage lo chim rum mai chu a hmu a, mipui chu an au a, an tlanchhe nasa hlawm kher mai. Nathana chu meikhu rum rum karah chuan va kalin, “Francis..Francis.” tiin a thianpa constable Francisa chu a au vak vak a. Chuveleh mei khu kar atang chuan hmaituam 10 vel hi an rawn lang thut mai a, NAthana ban chu pakhat chuan a rawn vit thawi fua mai a, Nathana pawh a au thawt a. Mahse NAthana chu a insiam rem leh chhungin chung hmaituam te chu an vai mai chuan an bo ta diak hlawm mai a. Engemaw hi a puak leh dur thin a, meikhu chu a nasa tual tual mai a. Nathana chuan a rawmawl a phawrh a, a hmui a hup a, a khuh vak vak a. Police duty dangte chu a hmu leh zeuh zeuh zel a, mahse meikhu karah chuan an bo leh daih zel. Tumah mai chu an inhmu fiah thei hlawm lo a ni ber, Pu Buanga’n, “Min chhan teh u, enge awmzia?” tia mangang taka a au ri chu a hre thei bawk. NAthana chuan a theih ang tawkin meikhu chu a vei kiang a, chutah a thianpa constable Francisa’n Pu Buanga a theihtawpa a lo venghim lai chu ava hmu a, va pan a tum chu hmaituam te bawk kha anlo lang leh a, Nathana chu an beihrawn ta chiam mai a. Nathana chuan chung hmaituam te chu theih patawpin a lo bei let ve a, mahse a banah hliam a atawrh avang chuan a che hleithei biklo. Chu mai bakah meikhu lah chu a khu nasa tulh tulh mai si a, mahse a sahimna khawp chuan ala inveng thei tho a. Harsa takin chung hmaituam te chu a hnawtkiang thei a, a pistol lah a thlauh daih bawk si. Francisa’n, “Sir, Sir NAthan.” tia a rawn au ri chu a hria a, thawm a hriatna lampang chu a va en a, Francisa chu hmaituam zinga pakhat chuan a dulah tak a vit ta pawp mai a, Pu Buanga hlau lutuk chu a au chel chul mai a. NAthana chuan ring tak hian, “Francis, nilo..” a ti vak a, ava tlan phei a. Police dang ho pawh chu meikhu kar atang chuan an rawn thal chhuak leh tawp tawp zel a, NAthana chu a mangang takzet. Hmaituam chuan Pu Buanga chu a lo man bet a, Pu Buanga pawh chu a lo tal nasa ngei mai. NAthana chuan va chhan a tum a, mahse chu hmaituampa chuan Pu Buanga chu a pu nawlh a, a tlan pui ta daih mai a. Nathana chuan FRancisa chu a va pan hnai a, Francisa chu a ka atangin thisen a lo chhuak zawih zawih a. NAthana chuan mittui tla teuh chung chuan, “Francis, francis...lungngai suh awm i tha leh mai ang.” tiin a dula misualten an vihna chu a va dawm beh sak a, Francisa chu tawng tumin a ang zuau zuau a, mahse a tawng thei lo. A khur dur dur a, a thi ta der mai. NAthana chuan tap chungin, “Francis, ani theilo.” tiin a lu a dawm vawng vawng a. Chuveleh NAthana tukhum chu a ri chawrh a, Nathana chu a hai nghal muai muai a, nikhawhrelovin a awm ta der mai.

Hmaituam te chu building hlui, luah tawh loh tih hriat tak leh bal ve tak hmunah chuan an inhmu khawm hlawm a. Chhawng hnuai ber garage ah chuan an chhuk a, an zinga pakhat chuan phone a phawrh a, “Hello boss, hna kan zo ta bawk a, khawnge kan pawisa tur chu?” a ti a, phone ami chuan, “Ka lo kal e...ka inbual lawk alawm le...ka lo thleng animai.” arawn ti a. Minute 10 vel hnuah chuan motor var nalh em em mai hi a rawn tlan a, chung mite bulah chuan a rawn ding a. A chhung atang chuan patling ve tawh tak pakhat hi a rawn chhuak a, a suitcase ken lai chu rawn lek kang in, “Hei le, a cash ngatin...inhlawh anih hi..cheng nuai 5..” a ti a. Hmaituam zinga an boss ber chuan suicase chu a la a, “A hrim hrimin i plan chu a bawn rem rem hle mai, kan ngaisang khawp mai che. Chubakah i nihna tak tak i thup thiam a, han mangan der pawh i thiam kher mai, Pu Buang..” a ti a. Chupa chu tu dang nilovin MLA Candidate, mipui support ber leh mipuiin an t(r)an ber, Minister meuh pawhina a duhsak em em, Pu Buanga ngei kha a ni. Pu Buanga chu a nui ta huah huah mai a, “Kha kha a nimai lawm ka naute u, politics te hi chu e, a phakar thiam thiam an dinhmun a tha a nimai. Pu Saia ve lah hian min hnuai en ve khanglang a, an mahni party saw ania ka tichhiat dawn ni...mi zingah zah ang em em in ka lang a, mahse ka nihna diktak a hre der silo. A tul chuan hetiang hian tual pawh thah siah siah mai tur, a pawilo reng reng.” a ti a, an nui dar dar hlawm a. Chutia hlim tlang taka an inkawm ho lai chuan bang phena mipa na tuara rum ri tuah tuah ri hi an hre ta a. Pu Buanga chuan, “Eheu, chu...tunge?” a ti a, bang lam pan chuan an va kal a. Bang phena NAthana nikhawhrelova alo let reng chu an hmu a, a rum ri tuah tuah bawk a. Pu Buanga chuan thinrim zet hian, “Hepa hi..tunge hepa hi? Police form ala ha zui, ala thi bawk silo, enge awmzia? Police zawng zawng that vek rawh u ka ti anilawm ni?” a ti khur khur mai a. Hmaituampa chuan, “Ka pu, vawiina Police duty te zinga mi kha ania, DCP a ni a, i mamawh takin kan tia, a nunna kan zuah a ni.” a ti a. Pu Buanga chuan, “In mawl ami? Enga tan nge ka tih anga? Ka thilsawi te kha a hre vek ange aw?” a ti chel chul mai a. Hmaituampa chuan, “Tunah ka that thei tho alawm boss...lungngai suh.” a ti a. Pu Buanga chuan, “That rawh...tunah that nghal rawh.” a ti vin tuar a. Hmaituampa chuan pistol a phawrh a, NAthana chu a tin a. NAthana chu a rawn meng thut a, rang takin a rawn inperh tho at mai a. Hmaituampa silai ken lai chu a pet thlak sak a, a hnek thal tawp mai a. Midang chu anlo tlan a, NAthana chuan silai chu chhar in Pu Buanga banah chuan a vuan a, a tlanpui ta chiam mai a. Midang ho chuan an lo um a, NAthana chuan Pu Buanga chu motor awmna thleng ava tlan phei pui a, Nathana chuan, “Ka pu, motor chhungah hian lut vat rawh..” a ti a, a nam lut rawk rawk a. Hmaituam dang ho chu an lo tlan a, mahse Nathana chuan amal te te in an ke ah te, an kutah te, an darah te chuan a lo kap thal pawp pawp hlawm a.

A kah tluk vek hnu chuan Nathana chuan Pu Buanga chu a en a, Pu Buanga lah chuan mangang takin, “Nilo, ka pu, ka tel ve lo, min that suh.” a ti chel chul mai a. Nathana chuan, “I tha maw ka pu? An man ve tho che a nimaw?” a ti ta daih mai a. Pu Buanga chuan, “Enga? Min hria ami?” a ti a. NAthana chuan, “Pu Buanga i ni em? MLA Candidate?” a ti a. Pu Buanga chuan, “Aw ni e, ka nia lawm.” tiin alo chhang a. Nathana chuan, “Am kidnap lai che kha ka hmu alawm...keipawh min man a, mahse a un takah ka chhanchhuak che a nih hi..an khawih na lo che tiraw?” a han ti leh a. Pu Buanga chuan, “Engmah i hre lo tihna a mi?” a ti hu mai a. Nathana lah chuan, “Engmaw? Eng thil maw?” tiin a lo zawt let a. Pu Buanga chuan Nathana khan a thusawi zawng zawngte kha a hre hman miahlo ani tih a hriat chian hnu chuan a thaw huai mai a, “Aaa...eng nilove, min that hman tep a, ka lawm e aw DCP.” a ti a, Nathana chuan motorah chuan a luh pui a, Station lamah ava hruai ta a. Nathana chuan Pu Buanga chu DGP bulah chuan va hruai pheiin engkim an thil tawn vel chu a hrilh ta vek a, DGP chuan, “I ti tha e NAthan, i ti tha e.” a ti a. DGP chuan Pu Buanga chu a en a, “MLA inthlan a hun leh tep tawh a, nang hi ka support ber che ania aw..nihleh he thilah hian tunge i rinhlelh ber? Tu hian nge thah tum che?” tiin a zawt a. Pu Buanga chuan ti der tih hriat tak hian a han tap der vel phawt a, “Ka hre biklo, keini ram, Mizoram zimteah pawh hian party dang chuan ka tlin hlauvin tikhan min that hman tep ania, mahse hei..DCP Nathana pawh hi anlo man ve tho hi alo ni a, a hun takah a che a, ka lawm tak tak a ni.” a ti vei deuh luam a. Nathana chuan, “Ka pu, ka tihtur alawm.” a lo ti ve bawk a. Pu Buanga chuan, “Ka rin dan chuan he min tihchhiat tum tu hi opposition party lam an ni chiang a, Pu Saia a nih ka ring ber. Ani hian min er em em a, Minister nena kan inkawm min hmuh phei kha chuan thah min tum amaw tih mai tur hian min melh run mai a, amah anih ka ring ber.” a ti a. DGP chuan, “Umm...ani pawh chu kan lo enthla deuh ange, ka pu...haw tawh rawh, i him tawh e. Nathan, va thlah nghal law law ta che.” a ti a, Nathana chuan a thlah ta a. Pu Buanga chuan Nathana chu a inchhunga leng lut tura a sawm tlat avang chuan Nathana pawh chuan a zui lut ta a, Pu Buanga chuan a nupui bulah chuan, “Duhtak lo kal teh, hei hi DCP Nathan a nih hi...Nathan, tunge i hmingpum khah?” a han ti a. NAthana chuan, “Malsawmkima..” alo ti vat a. Pu Buanga chuamn, “Awww...ni tak e, Nathan Malsawmkima a nih hi, vawiinah ka nunna min chhanhim sak a, ka lawm teh asin.” a ti vei luam a. Pu Buanga nupui chuan, “Nathan, lo thu rawh, thingpui te in ila, la haw mai bik suh aw..” a ti a, Nathana pawh chu a thu a, tichuan an titi ho ta a. Pu Buanga chuan, “Nathan, ka va inthlak ange aw, tikhan kannu nen khan lo inkawm rawh u.” a ti a, roomah a luhsan ta a. Pu Buanga chuan rang takin a naute a ko khawm a, room ah chuan an lut khawm a. Pu Buanga chuan, “Ngaithla rawh u, saw DCP sawn vawiin khan min manchhuak teuh em em a, mahse ka thusawi te engmah a hre hmanlo hlau a, ka him phah ta a ni. An DGP lo bia ula, Pu Saia kha thil tisual tuah keimah ka himnan leh min hriatchhuah lohnan ka puh vek a, phuba a rawn la ngei dawn a, ka dinhmun hi a himlo ani. Chuvang chuan saw DCP saw ka personal security atan ka duh a ni, min veng tu turin.” a ti a. A naute zinga pakhat chuan, “Mahse boss, pawisa tamtak a lo phut ve thei asin, chubakah min manchhuah phah ange...DCP Nathan Malsawmkima saw a chanchin ka hre nual a, mi namai lo tak a ni. Detective tam tak ai pawhin a fing zawk a, hnuchhui a thiam em em bawk ania.” a lo ti a. Pu Buanga chuan, “Saw security ka neih mekte nen sawn min veng turin ka duh a ni, engtikah mah min hrechhuak lo ang. Pu Saia hian min rawn tihchhiat a tum dawn chiang sa a, saw mihringpa pawh saw a che huai ve thei si a, kan nunna atan a hlauhawm thei tlat. DCP Nathana saw a silai kah dan te, a che zia hrim hrim ka en khan professional diktak a ni, ka duh a ni, min vengtu atan ka duh a ni.” a ti tlat mai a.

Pu Buanga security dangte hi vai vek an ni a, mizo tawng erawh an thiam thung. Pu Buanga naute chuan DGP chu an phone a, tichuan Pu Buanga chuan DGP bulah chuan inthlan a zawh hma chu NAthana chu a personal bodyguard a hman a duh thu hrilhin a dil a, DGP chuan buaina an tawk lemlo nen, Nathana ai awh turin SI Liantea te an lo awm ve tho bawk nen, chutia MLA candidate meuhvin a rawn dil takah chuan a thianpa alo ni ve tho bawk nen, a phal ta a. Pu Buanga chu a lawm hle mai, Nathana bulah ava kal a, “DCP, in DGP ka phone zo chiah a, inthlan a zawh hma chu ka personal security ah tang la ka duh a, min venghim turin ka duh che a ni. I duh leh kan inhnuai khu a ruak a, tah khuan i cheng hrih anga, pawisa pawh i duh duh zat min dil rawh, i mamawh hun hunah min dil la, ka pe zel ang che.” a ti a, Nathana chuan, “Ka lawm e, DGP berin a phal te chuan keia lo hnial theih a ni hleinem...nang venhim hi ka hna a ni e.” tiin a lo chhang a. Pu Buanga chuan, “Security dang an awm nual a, ka ring hlawm vaklo a. Vai an nih mai bakah mi bum ching an tam si, an mahni saw i thuhnuaiah dah vek bawk ang che.” a ti a, Nathana chuan, “Awle, mahse ka pu, ka va haw ve phawt anga, ka nupui leh ka fanu te pawh ka va hrilh ve phawt ange.” a ti a, tichuan Nathana chu a haw ta a. Atukah chuan Nathana chu hma takah Station ava thleng a, DGP chuan, “Nathan, vawiin atangin Pu Buanga te inah chuan i duty angai dawn ania, chutia hahthlak anilo ang.” a ti a, Nathana chuan, “Ka hria e...mahse Sir, Francisa chhungte khan Francisa an vui ni khan min hmu ve ta siloa, Pu Buanga te in ka thlen hma in a chhungte va tlawh ka duh a, a thlanah pawh va kal ve ka duh a ni. Ka thianpa a ni a, ka chhan hman ta silo a, apawi ka ti takzet a ni.” a ti a. DGP chuan, “Nathan, i theih tawp i chhuah alawm. Francisa chu chhan hmanlo mahla, Pu Buanga nunna i chhan a, ka chhuang takzet che a ni. Inthiamlo reng reng suh aw, va kal rawh...Pu Buanga pawh ka lo phone ange.” a ti a, tichuan Nathana chu a kal ta a. Chumi tlai chuan Pu Buanga pawh meeting an zo chu inlam panin a haw a, an inkawta a security vai hovin push up lo bei ngat ngat chu ava hmu a, an bulah chuan NAthana chu a thu a, tiang alo keng a. Pu Buanga chu hrilhhai takin ava phei a, NAthana lah chuan security te push up tilai chu lo hauvin, “Come on come on, faster...inva nep ve, mipa in nih kha....tang ru.” a lo ti vak vak a. Pu Buanga chuan, “Nathan....enge awmzia?” a ti a, NAthana chu a ding a, “Eee ka pu, ilo haw a nimaw?” a ti a. Pu Buanga chuan, “Nathan, tinge hemite hi, tinge push up an tih sup sup a, gym i hawng thar dawn em ni?” a ti hu a. Nathana chuan, “Nilove Sir, ka hrem ve deuh hlawm a nih hi...i compound chhungah zu anlo in a, ka hrem hlawm anih hi, zaklo hlawm lutuk.” a ti khur khur a. Pu Buanga chuan, “Awww...aho emai. Zanah an duty thei nang, an hah lutuk anga sin, tawp tir vat rawh.” a ti a. NAthana chuan, “Awle....duhtawk rawh u, in vannei hle mai...ka pu hian han khawngaih lo che u sela chuan vawi 100 dang ka tih tir leh ang che u mawle.” ala ti nuah nuah zui a. Pu Buanga chuan NAthana chu a en ngawih ngawih a, NAthana chuan, “Sir, ka zu inbual lawk ange aw...chaw kan ei tep ania, lo va inthlak la, kalo chho vat ang.” tih pah chuan Pu Buanga te inhnuai lam chu a pan a. Pu Buanga chuan a en zui vawng vawng a, “He mihringpa hi...mi mak tak ani. Police rorum tak leh nelawmloh tak a ni ang chu ka tia, a chetdan hi a va naupangchhia si ve.” a ti nuah nuah a. Vai security pakhat chuan, “Ka pu, keimah ni khan zu kha security roomah keimah thianho te nen lo in mai mai a, ahma pawn nangmah pawn phal tho a, nangma keimahni hau ngai chuang silo a, kha DCP khan keimahni min hmu a, min hau vak vak a, keimahni kha sawisa hrep lawm.” a ti a, Pu Buanga pawh chu a nuih a za lek lek a.

Atukah chuan Pu Buanga pawh angaite ang bawkin, inthlan ahnai tawh si nen, meeting nei tur chuan a chhuak leh ta a. Meeting an zawh hnu chuan Pu Saia chuan Pu Buanga chu a ko hrang a, rum tak hian a melh a, “Enteh Buanga, Minister nen inlo inkawmngeih viau pawh a ni thei e, mahse min beihlet nan a ka thiamloh ni miah lo a min puh kha chu, chhete pawn ka inrawlh lo tih i hria, min tihchhiat duhvang mai mai a ni tiraw?” a ti khur khur a. Pu Buanga chuan zaidam tak hian, “Chutin ngai mah ta che, engti kawng mahin nang hian min that lovang tih chu ka hria alawm. I hresual palh aniang, ka puhlo hrim hrim che.” a ti a. Pu Saia chuan thinrim tak hian, “Lemchang duh suh, police te pawh lo kalin thu min rawn zawtfiah a, nang hian min ringhlel a ni tih pawh ka hre vek, mahse min itsik vang mai mai a ni. Lo fimkhur tawh ang che, anihloh chuan i tan a pawi zawk ang.” a ti a, a kalsan ta a. Pu Saia a kalsawn chiah chu Pu Buanga chu a nui vur vur a, ama hriat tham lek hian, “A bul tanna chauh ala ni e Pu Sai, he inthlanah hian ka tling dawn, nang erawh i tlinglo chiang khawp ang. I ngam chuan min rawn bei mawlh ta che, min veng tu turin DCP Nathan Malsawmkima a awm tih hria ang che.” a ti a, a nui huah huah a. Tlai alo ni a, inlama a haw chu security te chu an lo bo diak mai a, gate bulah chuan a fapa naupang kum 9 mi leh NAthana chu anlo infiam a. Pu Buanga chuan, “NAthan..khawnge security dang ho hi an awm a?” a ti a, Nathana chuan, “Aaa...ka awm alawm Sir, anni kha chu an laktlak loh emai, titur dang ka pe ta a nih kha.” alo ti sam et mai a. Pu Buanga chu inchhungah a lut a, security te chu a zawngkual a, a hmu der silo. A zawn kual hrep hnu chuan a inhnuai, NAthana riahna atang chuan security te chu an lo chhuak sap sap hlawm a. Pu Buanga chuan, “Hey, nangni kha...khawnge in awm a?” a ti a. Security zinga pakhat chuan, “Ka pu, keimahni Bible chhiar a, DCP Nathana khan keimahni Bible chhiar turin sawi lawm.” a lo ti a. Pu Buanga chuan mak a ti kher mai, “Bible kan chhiar e i tia law? Enge awmzia? Bible in chhiar amaw?” a ti hu mai a. Security chuan, “Aw...ka pu, DCP Nathana’n chhiar tur sawi tlat lawm.” ati a. Pu Buanga chuan NAthana chu a ko a, “Nathan, enge awmzia? Bible i chhiar tir em ni? Engati nge i chhiar tir kher a?” a ti a. NAthana chuan, “Ka pu, heng mite hian zu chiah an ngaihtuah a, duty an ngaihsaklo em ani. Keimah hian duty reng zawk ila, a sawt zawk ang. Tihtur dang an nei chuang lo a, Hindi Bible ka leisak vek a, vawiin nilenga chhiar turin ka ti ta anih kha.” a ti a. Pu Buanga pawh sawi tur a hrelo, NAthana chetdan chuan a ti hrilhhai hle mai. NAthana chuan security te ho lam chu a melh a, “Inchhiar hnem tawh em?” tiin a han zawt a, an lu an lo bu sap sap hlawm a. Pu Buanga chuan, “Nathan, duhtawk teh...hetia tih kher a tul hleinem...nangmah chauh a duty i duh chuan duty la, hengho hi chu awm tir mai mai teh.” a ti a. NAthana chuan, “Awle Sir.” a ti ve mai bawk a. Zan alo thleng a, Pu Buanga chu a mu hle hle thei tlat lo mai a, "Nathana hian hmanni khan engkim ka sawi kha alo hre ru vek anga, phuba lak tumin ti hian min bum kual mai mai em mawni le?" tiin a inngaihtuah a, a chang leh, "Anilo ang, hre tak tak se chu khami ni pawh khan min that ve nghal daih ang, amah hi a naupang chhia ve hrim hgrim a niang." tiin a han inhnem chawp leh thin, Nathana khawsa zia chuan a rilru a tibuai hneh hle mai.

Atuk chhunah chuan Pu Buanga chuan phone call a dawng a, a naute zinga mi alo ni a. Pu Buanga chuan phone chu a pick up a, "Hello?" ahan ti a. Phone ami chuan mangan hmel zet hian, "Boss, i liquor factory an rawn hal chhe vek ania..." a rawn ti mai chu Pu Buanga a phu zuk mai. Vin zet hian, "In veng tha lo em ni? Tuten nge rawn hal?" a ti khur khur mai a, phone ami chuan, "Tunge an nih ka hrelo, hmai an tuam a, an hmel a hmuh theih loh. Kan inrin loh laiin an lo kal thut a, tichuan min rawn sawisa chiam chiam hlawm a, ka thiante phei chu an man vek a, keichu ka rawn tlanchhe thei hram a ni." a ti a. Thinrim tak chuan Pu Buanga chuan phone chu a dah a, a naute a ko khawm a. Pu Buanga hian liquor factory a nei a, chupawh a rukin ani. A sum eiruk te leh diklo taka sum a lakluh hmangin a din a ni a, a hausak phah hle bawk. Hei chauh hi secret factory a neilo a, factory tam tak, pui em em nisi lo, mahse sum hmuhna tha tak tak chu a nei nual bawk a ni. Pu Buanga chuan a naute bulah chuan engkim chu a hrilh ta vek a, "A titu tur chu mipakhat chauh a ni, Saia bak va ni suh...an party chetdan chuan ka thin a dek zar mai. Naute u, minlo zui rawh u." a ti a. Pawnah an chhuak a, Nathana leh Pu Buanga fapa chu kawtzawlah anlo infiam a, Pu Buanga chuan, "Nathan, ka secret factory pakhat hal a ni a, a location chu SMS in ka rawn thawn che anga, chumi lam pan chuan va kal la, a titu te awm ang i hmuh chuan that vek ang che." a ti a. Nathana chuan, "Awle Sir, Mahse...nang khawnge i kal dawn?" a ti a. Pu Buanga chuan, "Kalna tur kan nei, ka hrilh ang che chuan va kal la a nimai." a ti a. NAthana chuan, "Ka pu, nang venhim hi ka hna a ni a, ka lo kal ve ngei angai ang." a tih pawh chuan Pu Buanga chuan, "Ka naute nen hian kan kal dawn alawm, va kal phawt teh Nathan, chanchin min rawn hrilh leh dawnnia." a ti a, NAthana pawh chu a va kal ta a. Factory chu NAthana chuan a thleng a, a lo kal ral tep tawh hial a. Chutih lai chuan Pu Buanga chu thinrim takin Pu Saia te inah chuan ava kal a, Pu Saia chuan phawk hru hian alo en a. Eng sawi set sawt lo chuan Pu Buanga chuan Pu Saia chu a hnek thal tawp mai a, silai in a chal ah a tin a, "I chetdan hi ka kham ta khawp mai aww...a tawk e, enge i duh sawi rawh. Hetia kan personal thil in tihchhiat sak lo hian i duh chu sawi rawh...minister nih ve ngei i duh ani tiraw?" a ti vin khur khur a. Pu Saia chuan thinrim tak hian, "Min kap rawh...min kap mawlh rawh Buanga, thil tisualtu ah ahmain min puh a, chumi hnuah tihian ka inah rawn kalin min rawn vau leh amaw? Ka hrilh ang che, i hmel pawh hmuh peihlo nak alaia i bungrua ka khawichhiat sak peih che i ring em ni? Engthil mah ka tilo, mahse hetia i duh ang ang a i che a nih chuan ka tichhe khawp ang che." alo ti ve pang pang a. Pu Buanga chu a ding hluai a, "Nanglo ti tu tur an awm lo, ka kal phawt ange. A lehpek ang chuan ka silai mu hi i thluakah khan ka phum ang." tih pahin an chhuahsan ta a.

Motor lam an pan pah chuan Pu Buanga naute zinga pakhat chuan, "Ka pu, pu Saia tih ani kher dawn mi? A thil tih chu nise khatin inah khan thlamuang takin a awm mai mai ngam lo ang, a biru ngei ang." alo ti a. Pu Buanga chuan, "Ka hria alawm, a mitmeng atang khan a tih anilo tih chu ka hre nghal alawm. Min beitu dang an awm ani, party dang pawh an ni maithei." a ti nuah nuah a. Chutih lai chuan Nathana'n a rawn phone a. Pu Buanga chuan phone chu a pick up a, "Hello?" a han ti a. Nathana chuan, "Ka pu, a kang fai vek tawh. Jack Daniels um 2 a kang ve miahlo a, a la intlak ang ka ring...ka lo hawn dawn mi?" a rawn ti zuah zuah a. Pu Buanga chuan, "I duh leh lo hawn la.." a ti a, phone chu a dah hmak a. Thinrim tak hian zawite chuan, "Kan DCP ve lah hi a...security te zu in a hau vel vak vak a, a duh ve tho si. Huiham, rilru ava buai veleh.." a ti nuah nuah a. Nathana chu a rawn haw pah chuan Francisa thlanah chuan azu kal a, a tap zawih zawih a. A ding hluai a, "Francis, phuba chu ka la ngei ang...lungngai suh." a ti a, tichuan a kalsan ta a. Atuk ah chuan ahma ni a Pu Buanga factory duty pakhatin a rawn phone hun ang velah tho chuan Pu Buanga chu a medical factory-a doctor pakhat chuan a rawn phone a, "Sir, hmaituam 10 rual vel damdawi kan thliar hran laiin an rawn lut a, min sawisa hrep a, damdawii zawng zawng min laksak vek a, kudam pawh an hal chhe vek." a tawn ti leh ta mai a. Pu Buanga chu a ding lawk a, vin zet hian, "Enge maw in sawi le?Tu phiangsenin nge min tibuai reng hi le?" a ti khur khur a. A mangang lutuk chu a veikual reng mai a, Nathana a ko chho a, NAthana chu Pu Buanga roomah chuan a lut a. Pu Buanga chuan, "Nathan, kan inah nilo, ka factory ah i duty tawh zawk ang. Mi tuin emaw ka factory te hi amal te te in a tichhia a ni, he mihring hi min mansak la, i duh zah zah ka pe ang che." a ti a. Nathana chuan, "Awle ka pu." ati a. Pu Buanga chuan, "Hetiang zel anih chuan a hal zo vek mai dawn, naktukah ka chemical factory ah ache leh ngei ang. Chutah chuan duty turin ka duh che a ni, Nathan." a ti a. Nathana chuan, "Awle ka pu....Police Force te ka ko anga, tichuan kan duty dawnnia." a ti a. Zanah chuan Pu Buanga chu thinthi pawh a mu thei tawh lo, a mutthilh lahin a mumangah hmaituam hlir 10 vel hian thah tumin anlo um thin zel bawk si, a mangang takzet a ni.

Atukah chuan Nathana chuan Police Force a ko khawm a, tichuan Pu Buanga chemical factory chu an veng ta a. Ahma a Pu Buanga factory dang ho an hal thin hun awm ang velah chuan ama factory ah chuan Pu Buanga ngei chu a rawn kal a, Nathana te leh Police dangte chu card anlo deng vel mai mai a. Nathana lah chuan ring zet hian a card denpui te bulah chuan, "Chawh e, chawh e...chawhtawlh ah thu rawh. Ka man chiang lutuk, i kawt i kawt." tiin alo nui thler duai duai lehnghal a. Athenein kil khatah meizial zu in anlo titi nasa ngei mai. Pu Buanga chu a lungawi lo hle mai, NAthana bualh chuan ava kal a, Nathana'n alo hmu chiah chu a ding a, "Ehe ka pu, ilo kal animaw...i tel ve duh em? Ka man hnem tawh ania, pawisa in bet ang an ti ve khanglang a, hei...chen 500 lai ka man tawh ania." a lo ti zuah zuah a. Pu Buanga chuan vin deuh tak hian, "DCP, helai hmunah hian nangni police hi hi picnic turin ka tilo che u...inva veng uluk lo ve.." a ti khur khur a. Nathana chuanm, "Ka pu, tumah anlo kal lo....hei kan veng char char a, a boring lutuk a, tihian kanlo intihlim ve a nih hi." a ti a. Pu Buanga chuan a sana a en a, "Hetiang hunah khan a ni si a, tinge tumah anlo kal silo le?" a ti nuah nuah a. Nathana chuan, "Ka pu, haw tawh ila, anlo kal peihlo aniang vawiin chu." a ti a, Pu Buanga chuan a melhrum kher mai. Nathana bulah chuan, "Anlo kal ang, haw hrih lovang." a ti a. NAthana chuan, "Huiham....an lo kal kher i duh te chuan ka'n ko hlawm ange aw.." a ti ta mai a. Pu Buanga chuan phawk hru hian Nathana chu a en a, "Enga? Enge awmzia?" a ti hu mai a. NAthana chuan, "Haw ang ka ti mawlh mawlh a, an lo kal ang i ti zel a, ka'n ko mai ange. Police....insiam ahun e." a ti vak a. Chu veleh Police force ho te chuan an kawr an phelh a, tawnzau nen vek an awm a. An hmai an tuam ta vek a, khawnvar tui an phawrh a, chu chemical factory chu khawnvar tui chuan an leih ta mai a. Pu Buanga chuan, "Nathan, enge awmzia?" a ti vak vak a. Nathana chuan, "Ila man thiam nange? Pu Buang...keimah hi alawm i factory hal tir thin chu." a ti ta mai a.

Pu Buanga chuan mitmu chhuak tep khawp hian Nathana chu a en a, "Engmaw? Nangmah maw?" a ti a, a meng bial vek thei hial a. Nathana chuan, "Aw...keimah ni e. Khami ni khan mipui hmaah thu i sawi a, nangma ruahmanna vek ani tih ka hria. Khang hmaituam te khan min man a, mahse vanneihthlak takin min that lo. Nikhawhrelo anga bang phena ka awm lai khan i thusawi zawng zawng kha ka hre vek a, nangma plan ani tih pawh ka hre ta vek ani." a ti ta phiar phiar mai a. Pu Buanga chuan, "Nang hi...nang hi...hmela leh.." a ti bah nuai mai a. Nathana chuan, "Enge? I thinrim a ni tiraw? Mak i ti tiraw? Hei aia mak ka hrilh leh ang che aw....khatih lai khan ka that ve nghal thei reng che a, ka thianpa Francisa i thah tel avang pawh khan khatih lai khan kah hlum nghal che pawh ka chak lutuk. Mahse chuti maia awlsam chuan he khawvel hi i chhuahsan mai ka duhlo a ni. Police ka ni a, tualthat mi ka nilo. Chuvang chuan i nun tihchhiat a, i neih zawng zawng tih bo sak vek che hi ka thlang ta zawk ani. Tichuan engmah hrelo angin ka awm a, ka chhan him ang che in ka che ta a. Ka duh ang ngeiin i personal security guard ah chuan ka tang ta a, in inchhung zawng zawng en kual a, belhchian vek ka duh a. Mahse chutia in invel ka enfiah vak vak anih chuan min rinhlelh ka hlau a, khavang kha ani i fapa ka infiam pui thin. Inchhungah kan in umkual a, tichuan i roomah te kan in um a, chutah chuan i file zawng zawng leh i factory location te chu ka hailan theih phah ta a ni." a ti a. Pu Buanga chuan, "Ka that dawn che.." tih pah chuan hnek a tum a, mahse NAthana chuan a kut a lo man sak a, hnung lamah a elh sak vak a, a ri tuar mai. Pu Buanga na ti lutuk chu a au vak vak a, a mithmuh ah ngei chuan Police dangte chuan a Chemical factory chu an hal ta hluah hluah mai a. Nathana chuan Pu Buanga chu a nam tlu tawp a, "Naktuk zing dar 8 ah kan inbulah nangmahin lo kal la, rawn inpe rawh. SI Liantea nen kanlo nghak ang che, Pu Buang, buaina dang siam tum suh, i naute i rawn hruai anih pawhin kan kap hreh miahlo tih lo hria ang che. Thu awih la, rawn inpe mai rawh...tichuan Francisa i that pawh hi ka ngaidam ang che. Zanin chiah chance ka pe ang che, anih loh chuan SI Liantea ka phone zeuh anga, i information zawng zawng awmna file ka xerox ho kha ka pholang ang..thuthlukna fing tak i siam ngei ka beisei." a ti a, a kalsan ta a.

Atuk zing dar 8 ah chuan Nathana chuan an in bulah SI Liantea nen Pu Buanga chu an lo nghak a, dar 8 leh achanve ah pawh alo la thleng ta miahlo mai a. Nathana chuan, "Umm...Liante, man a duh zawk anih hi.." tia kal an tum chiah chu Pu Buanga te leh a nau te chu an rawn kal ta a. Pu Buanga chuan NAthana chu a nuih vur vur a, "Ehe...Good Morning DCP, nizan lam i mu tha em?" tih ham ham pah chuan NAthana chu ava pan a. Pu Buanga chuan a ipte a lehkha chu Nathana pek pah in, "Kha....nimina i zawhna min zawh kha..ka chhanletna a nih kha." a ti a. Nathana chuan paper chu a han en a, Transfer order alo ni a. Pu Buanga chuan, "Kha kha i transfer order a nih kha...thingtlangah post i ni e, Pu Nathan, kal mai teh..minti buaithei tawh lo ang." a ti pang pang a. Nathana chuan mak ti tak hian Pu Buanga chu a en reng ringawt a. Pu Buanga bawk chuan, "Khatia i mangang hmel kha alawm ka hmuh duh chu...kha kha animai DCP...Politician ka nih hi, ka hnuaia awm in ni tih i theihnghilh ta em ni? In DGP saw maw....ka thianpa alawm. I va han tisual chiang em tiraw Pu Nathan...i choloh i tawng ta a nih hi." tiin a nui huah huah a, tichuan a kalsan ta a. Nathana chu lungawilo tak chuan Station ah ava let a, police dangte chuan an lo en thup mai a. DGP chuan ava pan hnai a, "Nathan, a pawi ka ti khawp mai. Thingtlang lamah inthlan a zawh hma chu i awm angai dawn a ni." a ti a. Nathana chuan DGP chu a mitah tak a en a, "Sir, MLA Candidate pakhat in kei Deputy Commissioner of Police hi transfer order min rawn pe a. Sir, kha MLA candidate kha CM a ni lo, Home Minister pawh anilo...veng pakhata MLA Candidate ve mai ani. Police a nilo a, DIG pawh a nilo, DGP pawh anilo, candidate pakhatin transfer order lehkha min rawn pe hi ka hrethiamlo ani Sir." a ti a. DGP chuan, "Nathan, politician an ni a, tin ka thianpa ve liau liau a ni bawk a. Tih theih kan neilo a ni, ka duhsak ve angai alawm. Chubakah Francisa thattu ani tih evidence a awmlo a, atirah i sawi silo a. Nathan, apawi khawp mai, Politician te thu a kan awm angai a ni. Minister hian a ring sual phal dawn chuanglo, tih theih kan neilo a ni." a ti a. Nathana chuan, "Ummm...anih tak chu..i thianpa a nih avangin eiru mahse, secret factory tam tak nei mahse, ka thianpa Francisa pawh that mahse...i thianpa a ni miau a, kan man theilo ta ani tiraw? A tha e...nihleh hei hi ka zawt ang che aw...keipawh i thianpa, i fapa ang chiaha i en, i thawhpui, i rin em em leh i chhuan ve em em ka ni a, min ring em em a. Mahse ka sum duh vangin i nupui fanau te hi that vek ta ila, min man lo bik dawn em ni?" a ti a, DGP chu a ngawi reng a. NAthana chuan, "A pawilo Sir, min chhang suh. Tlaiah banna lehkha ka rawn theh lut anga, keimah ngei hian, police rules tellovin he MLA candidate satliah ve mai hi ka bei dawn ani." a ti a, kal a tum chiah chu DGP chuan, "Nathan, lo ding teh." ati a. Nathana transfer order lehkha chu ava laksak a, a pawtthler a, "Nathan, i duh ang chuan va che ta che." ati a.

Nathana chuan lawm takin DGP chu salute a pe a, "Ka lawm e Sir, ka lawm e." a ti a, akal liam ta a. Chutih lai chuan Pu Buanga pawh hlim takin inah a thu a, a faifuk hlar hlar a. Chuveleh kawngka a rawn inchhui hawng thuai a, Nathana leh police force te an lo ni. Nathana chuan, "Police....man vek raw u." a ti a, an man ta vek a. Pu Buanga chuan, "Hey, min thlah rawh u, enge ka tihsual?" a ti chiam chiam a. NAthana chuan, "Pu Buang, inthlanna ah chuan tello phawt mai rawh aw...jail ah kan inthlang dawnnia, kan thlang tling ngei ngei ang che." a ti a. Pu Buanga chuan, "Hmun danga duty turin lehkha pawh i dawng tawh a, hetia min rawn man thei hi i ni lo." a ti vei pang pang a. Nathana chuan, "Animaw? Kha ka transfer order kha i thianpa...kan DGP chuan amah ngeiin a pawtthler vek ani. Thingtlangah chuan zin duh viau mah ila, ka zin theina ber ka boss in a pawtthler vek alawm. Ngawi hmak la, thuawih tak khan lo chhuak rawh le." a ti a, an hruai chhuak ta a. Pawnah chuan press mite an lo phu nuai nuai a, zawhna an zawt sup sup a. A thenin, "Tinge Pu Buanga hi in man?" an ti a,a thenin, "Pu Buang, arukin factory i nei an ti a, tak tak a ni em?" te an ti bawk. Nathana chuan, "Pu Buanga hian a eirukna sum hmangin factory pathum lai a nei a, chu chu police ten manchhuakin an tihchhiat sak tawh a. Tin, mi tamtak bumin vote a hmuhtam theih nan mi vau a ching hle bawk. Kan department ami constable Francisa chu a that bawk a, khami ni a buaina siam tu pawh Pu Buanga hi a ni a, a ruahmanna vek ani." a ti a, tichuan Pu Buanga chu jail lamah an phur phei ta a. Tlai alo ni a, Nathana pawh inlam panin a haw a. Inchhung a lut chiah chu Sanvi chuan a rawn kuah nghal a, "Awi, duhtak..thu lawmawm bawk si, nuihzatthlak bawk si ka hria a nia aw.." alo ti chiam chiam a. Nathana chuan, "Eng thu lawmawm maw? Doctorin phir i pai a ti ami?" alo ti hu a. Sanvi chuan, "Awi, Mawla....chutiang lam anilo." tih pah chuan hnai taka Nathana beng bulah chuan engemaw hi a sawi a. Nathana chuan phawk hru hian, "Engmaw? Rinawma'n maw? Lalrinawma hi maw? Lalrinawma'n Tluangtei a kiss maw???????"

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)