NATHAN SEASON-2 (Episode-10) JAGUAR Pt-2 by:Aaron Malsawmdawngzuala

[Aaron Dustin]

NATHAN SEASON-2 (Episode-10)

JAGUAR Part-2

Written by : Aaron Malsawmdawngzuala


Zirlaite chu an lung a awi ta hauh lo mai a, an nuar tan ta. An SU Leader Faka leh an HOD te kut lo thlak tu, an Director Pu Sangtea nau Pu Zuala fapa chu an college atanga chhuak turin Director chu an vau reng a, class pawh kal duhlovin campus chhungah chuan kawng an zaawh ta mup mup mai a. Pu Sangtea pawh a mangang tan ta khawp mai, press mite lah chuan an lo kawm ve chhen bawk nen. Office chhungah chuan Pu Sangtea, Pu Zuala leh a fapa tlaktlailo zet Ruata te chu an vei kual an vei kual ringawt mai a. Pu Zuala chuan, "Ahrim hrimin Ruata, nangpawh hi tinge Bangalore-ah ka awm duh i tia, sum i zu chen ral a, hmeichhia i zu chet khawloh pui vel mai mai a, tinge i lo haw leh thut si a?" a ti a. Ruata chuan, "Ka ning alawm...chubakah kha SU Leader Faka khan dawt a sawi anih kha, a nau Rosy kha ka khawih lo hrim hrim." a ti pung pung a. Pu Sangtea chuan, "Engtin nge maw ni dawn ni? Zuala, police nunrawng deuh, pawisak nei vaklo hmelhriat i nei em?" a ti a. Pu Zuala chuan, "Neih te chu nei e, Inspector Joseph-a a nia, sual ve tak chu ania, mahse zirlaite hi a thinrim hian a kap duh mai ang tih ka hlau deuh alawm le." a ti a. Pu Sangtea chuan, "Umm...mahse DCP Nathan Malsawmkima te nen an department a in ang em?" tiin a zawt a, Pu Zuala chuan, "Teuh lo, veng dang ami daih alawm." a lo ti a. Pu Sangtea chuan, "Chupa chu ko la, pawisa pawh a duh zat sawi se...heng zirlai te hi han hnawtkiang teh se. Hetiang te chuan engtin nge hna kan thawh theih ang? Vau deuh hlek hlawm teh se, a tul chuan kut te pawh thlak mai tur." a ti a. Tichuan Pu Zuala chuan Inspector Joseph-a chu a phone ta a, an college zirlaite hnawt kiang tur leh pangngai taka class la leh tura hrilh turin Joseph-a pawh chu college ah chuan alo kal ta ngei a. Joseph-a chuan college campus chu a thleng a, gate bulah chuan zirlaite chu kawnglaiah an lo thu thup mai a. Jospeh-a chu inla pa tak chuan motor atang chuan a rawn chhuk a, silai a phawrh a, "Hey, zirlai zawng zawng te, na tuar kan awmloh nan thu awih takin mahni class ah theuh kal rawh u le." tih pah chuan silai chu van lam hawi zawng chuan a kap ta vak vak mai a. Zirlaite lah chuan anlo hlau lo nasa mai a, athen chuan anlo nuih liam vel mai mai a. Joseph-a chu a thinrim ngei mai, vin zet hian, "Tunge in SU Leader?" a ti khur khur a. Zam hauh lo hian Faka chu alo ding chhuak a, "Keimah hi ka ni e." tih pah chuan Joseph-a chu ava pan hnai a, zirlai dangte pawh chuan an lo zui a.

Joseph-a hian constable pathum vel chu a hruia ve a, zirlaite chuan a thu an awih mai a rin avangin police pawh a hruai hnem duhlo vel a ni. Jospeh-a chuan thinrim tak hian, "Tunge i hming?" a ti a. Faka chuan, "Ka hming i hriat a ngai lo, Police i ni a, i tih tur chu keini zirlaite lungawilohna hi min hriatthiam pui a, min pui tur a ni. Chutiang nilova kan Director te pafa i tanpui zawk anih chuan helai hmun atang hian kan duh kan hmuh hma chu kan kalsawn lovang." a ti ta phiar phiar mai a. Joseph-a chuan, "Helai hmun atang hian in kal dawn nge....ka kap dawn che u?" a ti vin khur khur a. Student te zinga mi pakhat chuan, "Ehee...min kap la, min kap ta che...tunge chak zawk chu kan hria ang chu." tih pah chuan zirlai dang te nen chuan Joseph-a chu hnek an rawn tum ta mai a. A theih ang tawkin Faka chuan a zirlai puite chu alo dang a, Joseph-a pawh chu a thinrim kher mai. Constable chuan a rawn hrilh ru a, "Sir, kal mai ang. Naktuk lamah police force te nen kal leh zawk mai teh ang...rin aiin an luhlul riau mai." a rawn ti a. Joseph-a chu a tlawmngai hle mai, rum taka Faka melh pah chuan, "Encounter-in ka kaphlum thei che tih i hria em?" a ti a, Faka chuan hlauh loh hmel tak hian, "Min kap rawh...a let leh chu i tuar ngam dawn em ni?" tiin alo chhang a. Joseph-a pawh chuan tih ngaihna ahre ta biklo, college chu a chhuahsan ta a. Pu Sangtea te bulah chuan, "Pu Sangte, min hrethiam teh u. Awlsam deuh turah ka ngai a, mahse an luhlul khawp mai. Naktuk lamah Police force te nen kan lo kal anga, a tul chuan LATHI pawh kan charge mai ang." a ti a, Station lamah a kalsan leh ta a. Chumi zan chuan Inspector Joseph-a chu haw tlang ta mai lo chuan zu ala a, chumi hnuah KS pakhat chu a dawr hram a. Chu KS chu nuam chen pui turin Hotel-ah a kalpui a, Hotel room chhugah chuan chu KS nen chuan zu an in a. An duhtawk ta maw tih ah chuan Joseph-a chuan chunu thawmhnaw vel chu phelhsak a tum a, tukverh atanga thil rawn ri ret ret chu a hre ta a. Tukverh lam a hawi chu drone camera hi an tukverh zawn takah chuan rawn thlawk a, Jospeh-a chuan a hrethiamlo kher mai. Hetih hunlai vel hian T&R channel chuan news an lo puang leh mek a, ahma ang bawk khan news an puan lai chu a rawn thim leh hmak mai a. Second 10 vel hnuah chuan alo eng leh ta a, big screen ah chuan, "A vawihnihna atan tualthahna LIVE-in tihchhuah a ni leh dawn ta. Minute khat hnuah pek chhuah a ni ang, T&R channel i lo thilr avangin lawmthu kan hrilh ache." tih hi alo inziak leh ta a.



Pu Sangtea chuan chu thil a hmuh veleh chuan control room ah a tlan phei nghal a, duty te bulah chuan, "Inring rawh u...audio pawh kha full quality in dah rawh u." a rawn ti a. Duty pakhat chuan, "Sir, ahma a min hack tawh avang khan main switch ah hian a off theih tawh dawn a, kan off hmak mai dawn mi?" a lo ti a. Pu Sangtea chuan, "A tullo, he kan channel hi North East ah chauh nilo, India ram pumah hian kan TRP a sang ber tur a ni." a la ti ta deuh deuh a. Tichuan tualthahna video en leh tur chuan screen lam chu an hawi leh ta thup mai a, T&R staff te erawh an mangang ru tawh hle a ni. Inspector Joseph-a pawh chuan chutia drone rawn thlawk vut vut mai chu mak ti tak hian a en reng ringawt a. A hlauthawng deuh chuan, "Min enthla tu an awm a ni chiang mai." tih pah chuan a inha fel sawk sawk a, Hotel chu chhuahsanin drone camera chu a um ta chiam mai a. Drone chuan vengmawng lamah a hruai thla zel a, Joseph-a lah a rui phur laklawh tawh chuan a um zel a, lungin a vawm a, a vawm fuh hleithei silo. A tawpah chuan tuikhur a hruai thleng ta a, a thim em avang chuan drone camera pawh chu a hmu tawh lo. Joseph-a chu a hawi kual a, thawm engmah a awm bawk silo, a reh tlawk tlawk a ni ber mai. Chutah vawi lehkhatah ahma zawnah tak chuan motor light hian a rawn chhun a, a phu zawk mai. A hnung lam atang te, a sir atang te leh a kil atang te chuan motor light chuan an rawn en ta sup sup mai a. A awmzia chu Jospeh-a awmna lai hi hmun zawl deuh, tui khur bul chiaha naupangte infiamna hmun a ni a, amah chu motor tam tak hian an lo hual reng tihna a nih chu. Chu veleh a bulah chuan kha tualthattu, coat dum fual ha, hmaikawr dum vuah, thawmhnaw dum veka inchei, Jaguar ngei mai chu a rawn kal ta a. T&R channel lam pawh an thil nghah mek chu a tawpah chuan a rawn chhuak leh ta, TV ah screen ah chuan Inspector Joseph-a leh Jaguar lo inhmachhawn mek chu a lang leh ta. Pu Sangtea pawh chuan mak a ti hle mai a, "Ehee....Inspector Joseph-a a nih hi.." a ti hu mai a. Joseph-a chuan Jaguar chu rum zet hian a en a, "Tunge i nih? Nangmah hi em ni drone camera a min la char char tu kha?" a ti vin khur khur a. Jaguar chuan, "Ni e, tunah hian i thi dawn...chuan ka that lai che hi mi zawng zawngin LIVE-in an en dawn bawk a ni." a ti a. Joseph-a chuan va hnek a tum a, mahse a lo bum kawi zawk zawk mai a. A khawih fu hleithei lo, Jaguar chuan kut a thlak ve hma hauh in Joseph-a chu a chau chhe der mai a. Jaguar chu ring tak hian a nui vak vak a, "Khawnge ka han che ve ange aw.." tih pah chuan Joseph-a chu a hnek ta siah siah mai a, tichuan tuikhur lamah chuan a hruai phei a. Tuiah chuan a lu a zu hnim a, thawchhamin Joseph-a chu a thi ta der mai. Jaguar chu a hawi kuala, chu veleh motor light te chu a mal te te in a thim a, video chu a tawp ta daih a.


...................

Kar chuang ngawt kan chhui hnuah pawh Jaguar thawm reng reng kan hriat tak loh avang chuan a che tawh dawnlo aniang tiin thla pawh a muang hman viau tawh a, mahse he kan Jaguar hian tawpsan alo la tum hauh lo mai. Zankhat chu night duty kan nei a, NAthana office ah chuan T&R channel-a news chu kan en mai mai a. Chutah screen a rawn thim ta mup mai a, NAthana chuan, "Ehee....Jaguar kha alo kal leh dawn a ni ngei ang." a ti nghal vat a. Kan rin ang chiahin TV screen ah chuan tun atanga minute khat hnuah tualthahna video dang a rawn chhuah tur thu a inziak leh ta. Nathana chuan SI Liantea a ko vat a, "Liante, T&R Office ah rang takin va kal ang che u...chuan keini pawh nakinah kan lo kal ang." a ti a.Keichuan, "Sir, engtin nge kan tih dawn?" ka ti a. Nathana chuan, "Video alo chhuah hun hi nghak leh phawt ang...khawi hmun nge kan la hre silo." a ti a. Tichuan minute khat a liam a, video ah chuan field tereuhte ah Jaguar leh mipakhat lo ding hi kan hmu leh ta. Jaguar bula ding chu kan enchiang a, police form ala ha zui. Rang zet hian constable Siama a lo lut a, "Sir, khilai hmun khi ka hria....kan veng tuikhur bul a nih khi." a rawn ti ta mai a. Rang zet hian kan chhuak a, Siama te veng tuikhur lam chu kan pan ta nghal a. Kan pan pah chuan Nathana chuan a phone a phawrh a, "Awww....A team ho kha T&R channel office lamah khan va kal tawp rawh u. Hun a tlem ania, B team khan Pu Sangtea te in lam zu pan bawk ula. A la bang ho zawng khan college zirlaite veng turin tunah kal rawh u....enge hrilh chawp reng in ngaih a? Zawhna zawh kher angai lo, kal vat ula nimai." a ti vin tuar tuar a, a mangan hmel khawp mai. Constable Siama te tuikhur chu kan thleng ta a, a thim khup mai a. Video-a lo lang hmasa ber, an awmna hmun field zim ve deuh mai chu kan hmu ngei a. Kan light ken te chu on engin kan han en fiah a, motor dang reng reng hmuh tur a awm lo. Kan en zel a,hnim thenkhata thisen kai chu kan hmu a. Thisen chu kan chhui zel a, tuikhur lam ah min hruai ta tlat mai. Tuikhur chu kan va pan a, mitthi ruang, a lu chin tuia lo inhnim, a taksa zawng leia lo thingthi chu kan hmu ta a. NAthana chuan ruang chu a pawt chhuak a, kan rin ang ngeiin police a lo ni a. Constable Siama chuan, "Ehee...hepa chu.." alo ti nuah nuah a. Nathana chuan, "I hria em ni?" a ti a, Siama chuan, "Hria e...DSP Joseph Lalnundika a nih hi." a ti a.


Nathana chuan, "Department dang ami a niang maw?" a ti a. Siama chuan, "Umm...miin an sawi duh lutuk he police hi chu. A corrupt em em a, nupui pawh vawi thum a nei tawh. KS a dawr hrat em em bawk a, chuan amah hi ania vawiina T&R college te va vau tum tu an sawi kha." a ti a. Keichuan, "Lalnundika ve si, a nun a va diklo ve awww...bialnu hmeltha tak a nei ve lo a ni ngei ang, hahthlak hlawm teh e." ka lo ti rilru nuah nuah a. Nathana chuan, "Siama, midang phone la, ruang hi post mortem turin la rawh se." a ti a. Tichuan reiloteah anlo thleng a, ruang chu an rawn la bo ta a. Nathana nena kal kan tum chiah chu Nathana chuan message a dawng a, message kan han en chiah chu mak kan ti dun ngei mai. Number hriatloh atang hian, "He tualthattu hi tunge a nih i hre duh em?" tih hi a lo ni a, Nathana chuan, "Ehee...tunge mawni le?" a ti hu mai a. Tichuan Nathana chuan, "Aw..hre duh e." tih hi a thawn let a. Mahse a reh leh ta vang vang mai si, Station kan thlen hnu pawh chuan message chu a rawn reply miah silo. Nathana chuan cyber crime department te bulah chuan, "He number hi lo trace ang che u." a ti a, tichuan chu number chu trace an tum ta a. Atukah chuan hma takah Station ka thleng a, mahse ka rinloh deuh deuh ka hmu ta. Tlangval la naupan ve hmel tak pahnih leh Pu Sangtea leh a nau Pu Zuala leh Pu Zuala fapa Ruata te chu an lo awm a. Nathana chuan min hmuh veleh chuan, "Rinawm, lo thu rawh...thil pawimawh deuh sawitur ka nei ania." a ti a. Tichuan ka thu a, NAthana chu a ding hluai a, "Nizanah khan in channel chuan tualthahna video in chhuah leh a, tualthahna pawh chu a thleng leh ta ngei a. A hma pawh khan investigation tih ka tum a, mahse Pu SAngtea hian min lo hnial a, chupawh an channel TRP a san zel theih nan tualthahna video an chhuah pawh hi hlawkpui nana hman a tum tihna a ni." a ti a. Pu Sangtea chuan thinrim zet hian, "He sumdawnna hi engmah i hrethiam velo, hmanhmawh takin heta min koh chhan hi sawi vat la a nimai." a ti vin khur khur a. Nathana chuan Pu Sangtea chu rum tak hian a melh a, "I aw key kha ti hniam rawh, helai hmun hi in Channel Office a nilo, ka Office a ni a, Police Station a nih hi. Helai hmuna aw key ti sang thei tu awmchhun chu kei hi ka ni, ngawi reng khan lo thu mai mai rawh." a ti a, Pu Sangtea chuan a melh rum kher mai.


Tlangval pakhat zawk chu ava melh a, "Tunge i hming?" a ti a, chu tlangval chuan, "Timothy-a ka ni e, ka pu." alo ti a. NAthana chuan pakhat zawk va melh leh pah chuan, "Nang tunge i hming?" a ti leh a. Chu tlangval chuan, "Faka ka nia, Lalfakawma. T&R college ah hian SU Leader ka nia." alo ti ve bawk a. Nathana chuan, "Nizan khan tualthahna hmunah khan kan kal a, mahse Inspector Joseph-a chu a lo that hman tawh a. Kan haw leh dawn khan message ka dawng a, tualthattu chu tunge i hre duh em tiin min rawn zawt a. Ka hriat duh thu ka hrilh chuan a reh ta vang vang mai a, mahse tukin zing khan min rawn reply leh a, thlalak pali min lo thawn a. He thalak pali minlo thawn te hi Jaguar thah leh turte an ni, tiin min rawn hrilh a...chu thalak chu maw...Pu Sangtea, Pu Zuala, Ruata leh Timothy-a te thlalak hi a ni." a ti ta mai a. An phu zawk hlawm a, an in melh ta hrek hrek hlawm mai a. Faka chuan, "Anih leh tinge min koh ve a?" tiin a zawt leh a, Nathana chuan, "Achhan chu kha number kha kan trace a, i phone number a ni." a ti ta mai a. Faka chuan, "Ehe...a va awihawmloh ve." a ti nuah nuah a. Ruata chuan thinrim zet hian, "Ka hria alawm...he mihring inla SU Leader vel lutuk hian min thah a tum tih chu ka chiang alawm." alo ti vei pung pung a. Keichuan vin zet hian, "Lo ngawi rawh...helai hi i in amaw i ti em ni?" ka lo ti hrepa, a ngawi chiang teh asin. Keima hriattham tur lek hian, "Bialnu nei ve awm tawp silo." kan ti zui hram a. Nathana chuan, "Anih chuan Faka, khawnge i phone chu a awm?" a ti a. Faka chuan, "Nimin khan Inspector Joseph-a nena kan intihbuai na lamah ka thlauh a, ka hmu leh tawh lo hrim hrim." a ti a. Timothy-a chu a ngawi reng a, Nathana chuan, "Timothy, engvangin nge Jaguar hian thah ve che a tum? A chhan awm ang i hre thei em?" a ti a. Timothy-a chuan, "Fahrah ka nia, tupawh mai hian min hmusit em em a, dam ve tlak ka nilo aniang." a lo ti mai a. Nathana chuan, "In vai hian fimkhur turin ka duh che u ani, police venhimna hnuaiah in awm ang. Chuan mahni in khawlaiah chhuak hnem lutuk lo bawk ula, anihloh chuan he Jaguar hi alo che leh mai ang." a ti a. Pu Sangtea chuan, "Jaguar ina a target te hi kei leh ka nau leh ka nau fapa te an ni a, keini chu kan him thei mai ang. Mahse he ka zirlai naupang Timothy-a hi a him nan chuan kan inah a awm ve angai a ni. Timothy, vawiin atangin kan inah i thawmhnaw te nen lo inpu lut ang che, i himna hi kan kutah a awm a, min hnial lovin lo kal ngei ang che." a ti a. Pu Sangtea leh Ruata te pafa chu an chhuak ta a, ahnu deuhah Faka pawh chu Nathana chuan a chhuah tir ve mai bawk a.

Timothy-a chhuah ve a tum chu Nathana chuan, "Lo ding teh." a ti a. Timothy-a pawh chu a ding ve mai bawk a, Nathana chuan, "Khawi atanga lo kal nge i nih?" a ti a. Timothy-a chuan, "Ihh...ka room atangin." a ti a. Nathana chuan, "I room atanga lo kal i ni tih chu ka hria alawm...khawi khua atangin nge?" a ti a. Timothy-a chuan, "Aizawl atangin.." tih ringawt hian a chhang leh a. Nathana chuan, "He Jaguar hian engvanga target ve tlat che nge anih ka hrethiam lo a ni, Pu Sangtea te chhungkua a target kha chu a chhan hre kherlo mah ila, an channel a hack a, an channel atang vekin video a pe chhuak thei bawk a, hriatthiam na chin chu ka nei mai a. Mahse nang hi, ka hmuh ngai i nilo a, engvangin nge thah ve che a tum?" a ti a. Timothy-a chuan Nathana chu a mitah tak a en a, "Chungte chu nangma chhui tur alawm." a ti a, a kal ta daih mai a. Nathana chuan Timothy-a chu a en zui vawng vawng a, "Hepa hi mi mak tak ani, engemaw a hriat chu ka ring a ni." a ti nuah nuah a. Tichuan rei fe kan titi hnuah chuan Nathana chuan, "Tihdan ka hria, Rinawm...minlo zui teh." Nathana chu constable Siama bulah chuan ava kal a, "Siama, thil pakhat min tihsak ta che." a ti a. Siama chuan, "Tehreng mai Sir...enge ni ta?" a ti a. Nathana chuan, "Kha naupang Timothy-a kha ka ringhlel riau mai...tihian ti teh, Jaguar hian nangmah pawh thah ah a vau ve che angin va insawi la, amah Jaguar ngei pawh i hmuh tawh thu va sawi ang che. An inah sawn an awm tir ve nghal ngei ang che, chuan Timothy-a kha enthla reng la...chanchin min lo hrilh zel dawnnia." a ti a, Siama pawh chuan, "Awle Sir." a ti a. Nathana nen chuan chhun thil ei turin dawrah kan chawl a, Nathana chuan, "Huiham...ti daih ila, Tluangtei chu i kiss ve tak tak amaw?" a han ti a. Intithei deuh, intithei lutuk nisi lo, in sawithei deuh ni si, mahse insawi theih em em vang pawh nisilo hian ka han hawi deuh vah a, "Aaa....sawi hi anuam vak lova.." te ka han ti kual vel phawt a. Nathana chuan, "Mawwhhh sawi teh...ka hre chak ania." a tih tlat si avang chuan ka hrilh ta alawm mawle. Ka thutna chu ka siam rem te te phawt a, "Sir, inkiss hi e, alo nuam ani. Duhtak te nena han inkiss phei hi chuan a thlum dep thei hialin ka hria, nangpawn ilo tawng ve tawh tho anga.." ka tih lai chuan a thingpui in phuh thawt khawp chuan a nui ta vak vak mai a. A hmui tuai fai pah chuan, "Hawh teh....Station lamah kal teh ang, ka hriat duh chu ka hre tawhin ka hria, a tawk e...ve lutuk che hian." tih pah chuan a tho vut a, min chhuahsan ta daih a.

.....................


Pu Sangtea, Pu Zuala leh Ruata te chu an mangang ta hle mai, an inah chuan an teikual reng ringawt mai a. Pu SAngtea te security pakhat hi alo lut a, mi pakhat hi alo hruai a. Pu Sangtea chuan, "Enge ni ta? Hepa hi tunge?" tiin alo zawt a. Security chuan, "Hepa hian Jaguar hi atakah a hmu tawh a ni...chuan Jaguar hian thah a tum ve mek bawk. Ama insawi dan a ni a, venhimna a rawn dil a nih hi." a ti a. Pu Sangtea chuan, "Tunge i nih a? Khawi vengah nge in awm a?" a ti a. Chupa chuan, "Siama ka ni a, Jaguar hian nizan vek khan min thah a tum a, mahse min thah hma in nangmah ni chhungkua hi a thah phawt tur thu asawi a, venhimna ka mamawh a ni ka pu." a ti a. Pu Zuala chu lo kal pheiin Pu Sangtea beng bulah chuan, "Kan inah hian awmtir ve rawh....Timothy-a nen room khatah awm mai rawh se. A thusawi hi thudik a nih chuan a tangkai dawn riauvin ka hria, Jaguar awmna chin pawh kan hre maithei asin." a ti a. Pu Sangtea chuan, "Enghna nge i thawh reng reng a?" a ti a. Siama chuan, "Ka pu, mi in luah mek ka ni a, mahse ka inluahna ah chuan zantin mai hi thawm ka hre ziah a, chuan nizan khan Jaguar an sawi thin ngei mai a ni tih ka mit ngei hian ka hmu a, min that hman teuh lutuk ringawt. Tichuan nangmahni hi thah phawt a tum thu te min hrilh a, chuvang chuan in puihna ka rawn dil a ni." a ti a. Pu Sangtea chuan, "Awle...atha e, he inah hian i awm ve ang." a ti a. Siama pawh chu Timothy-a nen chuan room khatah an awm ta a, an inkawmngeih angreng hle mai a. Zan alo ni a, Timothy-a chuan a zu pai chu a phawrh a, Siama nen chuan an han indun vela, an titi tui dun ta khawp mai. Chutih lai chuan Pu Sangtea, Pu Zuala leh a fapa Ruata te chu an sitting roomah chuan an lo titi a. Ruata chuan, "Ka pa, ka pate...he thil titu hi chu a chiang vek tawh alawm...kha SU Leader Faka vek kha ani. VAwiin pawh khan DCP khan a sawi vek tawh kha..a phone atangin kan thlalak a thawn a, min thah tur thu te a sawi vel a. Police hovin a phone an trace chhuak leh si a, a tihbo thu te a sawi leh vel mai mai a, thah ve nghal mai ania ka duh ni." a ti pung pung a. Pu Zuala chuan, "I sawi awmzia chu he Jaguar hi kha SU Leader Faka kha a ni i tihna a mi?" a ti a. Pu Sangtea chuan, "A nilovang...kha Jaguar kha a tlanchak em em a, a infit em em bawk. A pian te kha en reng reng pawn Lalfakawm chu a nilo chiang alawm." a ti a. Ruata chuan, "Faka a nih loh pawhin Faka thurualpui tal a ni ang." a lo ti ve bawk a.

Chutia an inbiak mawlh mawlh lai chuan Siama, an mikhual thar chu rawn kalin, "Ka pu, pawi intih loh chuan idea ka lo thawh ve thei angem?" a rawn ti a. Pu Sangtea chuan, "Enge han sawi ta che." a ti a. Siama chuan, "SU Leader Faka tih a ni nge nilo hriat nan SU Leader hi man ula, chuan kan zinga tu emaw ber hi Jaguar angin inchei se...LIVE-in camera te nen, Jaguar chuan midang a that leh dawn ta tiin chhuah ula. Chutah tak chuan Jaguar anih leh nihloh a hriat mai dawn alawm, Faka hi Jaguar a nih chuan thih a hlauh em avangin a inpuang anga, a nihloh leh Jaguar tak tak chu alo in lan ngei pawh ka ring a ni." a ti a. Ruata chuan, "A tha lutk, ngaihdan tha tak a ni....ava ropui em." a lo ti chiam mai a. Hnunglam atang chuan Timothy-a alo lang thut a, "Ngaihdan mawlmang tak ani." a rawn ti phei nuah nuah mai a. Pu Sangtea chuan, "Engmaw ilo sawi a? Ngaihdan dang i nei em ni?" a ti a. Timothy-a chuan, "Jaguar hi Faka lo ni pawh ni se, khawiah hian a inpuang lovang. Tin, SU Leader Faka hi keimahni vekina thah kan tum hi a diklo bawk." a ti a. Pu Zuala chuan, "Kan that tak tak dawn hleinem, ka dawp ringawt dawn alawm." alo ti a. Timothy-a chuan, "Anih leh Faka chu lo nilo ta se, inthil tih vek anih thu hi a hre leh ngei ang. Chutih hunah chuan engtin nge in insawi fiah tak anga?" a ti a. Ruata chuan thinrim tak hian, "Hey, kan thil tihtur ah ilo buai ve angai lo...kan duh leh kan that tak tak ang. Kan inah i awm mek tih hi hria ang che." a lo ti pung pung a. Timothy-a chuan a lu dawm vung vung pah chuan, "Heiha....anih leh ka lo tawngtai pui ang che u." a ti sup a, room ah a lut ta daih a. Pu Sangtea chuan, "Anih leh tu ber chu nge Jaguar ang chuan inchei dawn? Tunge Jaguar lem chu ni ta ang?" a ti a. Ruata chuan, "Ele keimah mawle...keimah lo tunge ni chuang ang?" a lo ti ham ham a. Pu Sangtea chuan, "Awle a tha e, mahse fimkhur ang che."a ti a. Tichuan chumi zan la la chuan Jaguar inchei dan ang chiah chuan Ruata chu a inchei a, chumi hlan chuan campus pawnlama thlam pakhatah chuan T&R channel crew pahnih te chuan camera an lo fit mek bawk a. An plan chu a fuh dawn niin a lang, an channel ah chuan LIVE-in tualthahna a thlen leh tur thu an chhuah leh ta a. Faka pawh chu a room pawnah meilum aiin lehkha a lo zir mial mial mai a. Chutih lai chuan hnunglam atangin Ruata chuan a man thut a, a hmai a tuam sak a. Buara ah khungin a pu nawlh a, tichuan campus pawna thlam pakhat, ahma a T&R crew pahnih tena camera an lo fit fel sa vek na hmunah chuan a luhpui a. Hetih lai hian Siama leh Timothy-a te thiandun chu an roomah zu anlo in dun tiah tiah a, an zu in chu Timothy-a'n Pu Sangtea te choka a ava lakruk a ni. Timothy-a chuan, "Ka khamlo e, ka va ruk belh ang aw?" a ti a. Siama chuan, "Chi tawh dawn mi? Zanin phei chu kha...Jaguar man ngei an tum si a, kan tan pawh a hlauhawm thei ania. Chubakah an man palh ang che, security te hi an mengrei thei teh mai ania." a ti bul bul a. Timothy-a chuan spy camera pathum vel hi a phawrh a, "Hei hi Pu Sangtea te ta tho ka ruk a ni a, an choka bawr velah sawn ka vuah anga, ka laptop nen ka connect anga, roomah hian laptop hi lo en reng la, min veng la, mi anlo kal thut chuan min rawn miss call zeuh dawnnia." a ti a. Siama lah zu duh ve tak alo ni bawk nen, a remti ta hram a. Tichuan choka lamah chuan Timothy-a chu ava phei leh a, camera chu hmun thumah a vuah a, an room atang chuan Siama chuan a lo en ve reng bawk a. Tichuan Timothy-a chuan camera chu a bye bye vel a, Siama zu chak tawh lutuk chuan, "Lo bye bye vel kha angai lo...rawn la vat teh." tiin a lo phun nuah nuah a.


Dawhkanah chuan a mut tir a, tichuan an pahnih chauh chuan thlam chhungah chuan an awm a. Ruata chu Jaguar ang chiahin a inchei a, hmaikawr dum vek a vuah avang chuan Faka chuan a hmel a hmu thei lo. Faka chu dawhkana chuan Ruata chuan a phuar bet a, Faka chu a tal vak vak a, "Hey, tunge i nih?" a ti vak vak a. Ruata chuan, "Jaguar, Jaguar ka nih hi..." a ti a, a nui vel a. Tichuan channel ah chuan Ruata leh Faka chu an rawn lang ta, Mizoram mipui zawng zawng chuan an en leh ta thup mai. Ruata chuan chemte a phawrh a, Faka hrawkah a tin a, "Faka, min hrilh rawh le...Jaguar hi tunge? Nangmah a ni tiraw? Nge ni a i thurual pui zawk? I sawilo a nih chuan ka that ang che." a ti khur khur a. Faka chuan, "Ruata, i thil plan chu a th(r)ing uih hle mai, Jaguar ang ten i inchei vel a, nangmah i nih hi ka ring reng ani hmelchhepa...i duh phawt chuan min that ta che.." a ti a. Ruata chu a insum zo talo, a lo rui sa deuh bawk nen, chemte chu a hum nghet sauh sauh a, Faka chu vih tak tak a tum ta mai a. Chu veleh thlam kawngka chu a rawn inhawng thuai mai a, Jaguar tak tak chu alo lut ta. Ruata chuan a va pan hnai a, "Eheu...nang hi a nimaw Jaguar an tih chu...i thianpa hi i rawn chhan dawn em ni? Ka hlau hlawl lo che...lo kal rawh, insual ila." a ti vei pang pang a. Jaguar chuan Ruata chu a va zuan thut a, a bawh tlu a. Ruata chuan chemte chu a thlauh a, Jaguar chuan Ruata chu thutbetin a hnek ta siah siah mai a, minute 2 dawn vel chu a hnek a, tichuan a hnek hlum ta der mai. Faka awmna lam chu ava pan a, Ruata'n Faka a phuarna chu a phelh sak a, chuveleh kawngka atang chuan, "Che tawh suh...Police kan nih hi.." an rawn ti a, Jaguar chu ava hawi phei a, Police an lo ding thup mai a, silaiin anlo tin bawk a. Chuveleh JAguar chuan Faka chu a man thut a, chemte chuan a hrawkah a tin a, "Inlo kal hnaih vaih chuan a hrawk hi ka zai ngei ngei ang." a ti khur khur mai a. Tichuan a tawlh hnung zel a, Faka chu hmazawngin a nam thut a, tichuan thlam hnunglam tukverh ah chuan a zuang chhuak ta daih mai a. Ruata chu a thi leh ta phawt mai, Jaguar pawh man hman a ni leh ta lo. Timothy-a chu zu la tura a kal hnu atanga darkar 1 velhnu ah chuan zu um 3 vel nen hian a rawn lut a, Siama chu a lo muthlu der tawh a. Timothy-a chuan a sawi vak vak a, "Hey, U Siam, harh teh." a ti a. Siama chu a harh thut a, "Eheu...whiskey hlir, a va tui dawn em. Hrim hrimin iva rei em em ve a?" a lo ti nuah nuah a. Timothy-a chuan, "Nia, an dahna ka hmu mai lova, chuan maw...i plan kha afulo khawp mai." a ti a. Siama chuan, "Eng plan maw?" a ti hu a. Timothy-a chuan, "Ruata zawk a thi daih ania, Jaguar tak tak alo kal a, a that an ti." a ti ta mai a.

..................

Jaguar chu kan man leh hman ta lo, constable Siama lah khan, "Timothy-a chu a ni thei lovang, ka bulaha awm reng alawm." a ti bawk si. Kan lu ahai ta hle mai, he mihring hi tu tak chu nimaw tiin kan inzawt reng mai zawng anih tak ber hi. Kan constable Siama pawh chu a idea vanga an fapa Ruata a thi ta mai chu an thinrim em em a, Pu Sangtea chuan a hnawtchhuak nghal a, kut an thlak hrep talo kha chu a vannei kher mai. A tukah chuan Nathana nen chuan office ah kan titi a, chutia kan titi mawlh mawlh lai chuan NAthana phone a rawn ri a, "Ehe...hepa chuh." tih pah chuan phone chu a pick up a, pawnah ava bia a. Minute 5 hnu velah chuan a rawn lut leh a, "Rinawm, ka chhuak lawk dawn aw...Station hi lo veng ang che." a ti a, a chhuak nghal ringawt a. Engmah pawh zawh chian hma a achhuak daih zel hi chu sim tawh se ka va ti tak em, he DCP tak hi chu...a hahthlak a ni. Chhun dar 1 vel a ri tawh a, ka phone chu arawn ri a, rinloh tak maiin Pu Sangtea a ni tlat mai. Phone chu ka la a, "Hello." ka han ti a. Pu Sangtea chuan, "ASP Rinawma maw.." a rawn ti a. Keichuan, "Aw..ni e." tiin ka lo chhang a. Pu Sangtea chuan, "DCP Nathana hi ka phone a, ala theilo a, ka be duh asin." a rawn ti a. Keichuan, "Mi hmuh tur a nei a, a chhuak lawk a, enge ni ta?" ka ti a. Pu Sangtea chuan, "Aaaa...englo ania, ka hmu duh a. A pawilo, khawngaihin nangmah zawk ilo kal thei angem?" a ti a. Keichuan, "Awle...ka lo kal ange." ka ti a, tichuan office chhuahsan pah chuan SI Liantea bulah chuan, "Liante, ka chhuak lawk dawn a, DGP a awm silo a, i kutah ka dah hrih aw, ka reilo ang." tih pah chuan Pu Sangtea te inlam pan chuan ka inkhalh phei ta nghal a. Pu Sangtea te in ka thlen chuan Pu Sangtea chuan min rawn pan nghal a, "Enteh ASP, he Jaguar hian kan fapa min laksak a, nizan khan a that a ni." a ti a. Keichuan, "Nia, ka hria alawm, a ruang pawh ka hmu ve alawm." ka lo ti a, an security guard pakhat chu a nui huk nghe nghe. Pu SAngtea chuan, "ASP, mak deuh mai chu maw...Faka tih anih kha kan ring vek a. Achhan pawh Faka phone atanga kan thalak kha dawng in ni miau a, mahse Faka a ni bawk silo. Tichuan nizan khan thil hriat chhuah ka nei a, Kum 15 vel kal ta khan kan unau zinga upa ber hian he kan T&R college hi a enkawl thin a. A taima a, a fel em em a, mi rethei te a tanpui thin a. Tin, he kan college pawh hi tun thlenga a hlawhtlin em em nachhan pawh hi ka u vang kha ani." a ti a.


Keichuan, "Tunge i u chu a hming? Chuan eng ber nge sawi i tum a?" ka ti a, Pu Sangtea chuan, "Hun kaltawh chu a ni tho a, kan sawi tlang pawp mai ange. Ka u kha a hming chu Zodinpuia a ni a, kan ram te, kan inhmun te leh kan neih zawng zawng hi ama ta vek ni turin ka pa khan a ti a, ka pa boral hnu phei kha chuan ka u hian kan inchhung hi a enkawl ta ber a. Zep thu awmlo, ka'n sawi pawp pawp ange. Ka u kha kan thik a, a dinhmuna awm ve kha kan duh thin a ni. Min ring em em a, mahse pawisa erawh kan kutah a dah ngailo. Thildangah chuan min ring viau mahse pawisa hi kan kutah a dah ve duh ngailo leh a ro zawng zawng pawh a fapa kuta dah a tum thu, kan college function naa a sawi te khan kan thin a rim em em a. Tichuan zirtirna pek ve hlak kan duh ta a, kan in bul lawka mi Pu Hmaa fanu chu a damlo a, tichuan ka u Dinpuia bulah chuan an rawn hruai a. Ka u Dinpuia hi Doctor a ni bawk a, "Nachhawkna kan pe anga, a tha leh mai ang." tiin nachhawkna chu ala a, naupang chu a chiu ta a. Mahse a nihna takah chuan kha nachhawkna kha a hriatloh hlanin tur (Poison) nen kan thlak thleng a ni. Tichuan chu tur chuan ka u chuan naupang chu a chiu ta a, reilote hnuah a chilphuan te a rawn tla a, a thi ta der mai a. Ka u chu mipui zawng zawng chuan tualthattu ah an puh a, Police te kan phone a, an rawn man ta a. Ka u an hruai phei lai khan ka u kha a tawng miah lova, a mittui a tla zung zung ringawt mai a. Chutia police ten an motor lam pana an hruai phei mek lai chuan a tlan thut a, kan inbul bawlhhlawh paihna kham sang takah chuan zuangthla in a inthat ta a ni. Chumi hnuah ka u nupui Cindy pawh chu a fapa nen kan veng atang hian kan hnawtchhuak nghal bawk a, mahse kan hnawhchhuah hma khan a fapa Lalchhanhima chu a tlanbo a ni." a ti a. Mak ka ti em em a, ka thinrim bawk si, chutia kei Police Officer hmaa a thil tih sual zam miahlova a puang zawt zawt mai chu han ben hrep mai chu ka chak em em a, "Anih chuan chu chu Jaguar nen inzawmna a nei em ni?" ka ti a. Pu Sangtea chuan, "Nei tlatin ka hria, Ka u Cindy kha a chanchin ka hre leh tawh miah lova, a phuba lakna a ni thei mai angem awww tiin ka ngaihtuah a ni." a ti a. Keichuan, "Anih leh Inspector Joseph-a a that a, LAwyer Muantea a that bawk a, khami te kha enge a thah nachhan tur?" tiin ka zawt leh a. Pu Sangtea chuan, "Lawyer Muantea kha khatih hunlai khan ka u ro zawng zawng te kan ta a nih theihna tura min puitu a ni a, chuan Inspector Joseph-a hi ka u mantu ber a ni. Hmanni khan ka student te hi an nuar a, an nawrhna ti bo tur leh vau turin Joseph-a chu kan ko leh a, alo tar ve tawh em avangin kalo hre tawh lo a, ka nau Zuala hian alo hria a." a ti a. Pu Zuala chu lo tawngchhuak ve in, "A hrim hrimin khawnge ka u CIndy kha a awm tak angle?" a ti nuah nuah a.


Hnunglam atang chuan NAthana aw ngei mai chuan, "Amah hi zawt la.." a rawn ti a. Kawngka bulah chuan NAthana leh Timothy-a leh nu pakhat hi anlo ding a, Pu Sangtea leh Pu Zuala chuan mak ti em em hian an lo thlir a. An rawn kal phei a, Pu Sangtea chuan chu nu chu a en vung vung a, "Ka u Cindy.." a ti a. Chunu chuan, "Ka u te min la ti ngam amaw?" a ti a. Nathana chuan, "Hei le Pu SAngte, i u Cindy chu kalo hruai e...Jaguar chu tunge a nih zawt ta che.." a ti a, kei chu ka bo map mai. Timothy-a chuan, "Kum 15 chhung teh meuh kha hrehawm tak leh mi hmuhsit tuar reng reng in ka khawsa a, mahse ka beih tang tang hnuah helai hmun, ka in ngeiah hian mikhual anga ka awm angai ta." a ti a. Pu SAngtea chuan, "Enga? Tunge i nih a?" a ti a. Timothy-a chuan, "I la dam hi ka lawm khawp mai ka pate." a ti ta mai a. Pu Sangtea leh Pu Zuala mak ti lutuk chu an ang phuau ringawt mai a, Pi Cindy chuan, "Ni e, hei hi ka fapa a ni...ka pasal Zodinpuia, in unaupa in phatsan tak Zodinpuia, in thah tak Zodinpuia fapa ngei, Timothy Lalchhanhima ngei kha a ni e." a ti ta vak vak mai a. Nathana chuan, "Vawiin khan Timothy-a hian min rawn call a, min hmuh a duh thu a sawi a. Tichuan ka va hmu a, engkim min hrilh ta vek a ni. Chuan maw Pu SAngte, ka thianpa Rinawma bulah i thil tihsual i lo puang vel zawt zawt a, he inchhungah hian Timothy-a hian camera hmun hrang hrang ah a fit vek a, tunah hian nangmahni channel ah ngei LIVE-in pekchhuah mek a ni. A awmzia chu in inpuanna zawng zawng kha tunah hian Mizoram mipuiin an thlir thup a ni. Tunah pawh hian an la LIVE mek ania.." tih pah chuan camera te chu a melh kual a, a han bye bye kual vel kher lehnghal a. Pu Sangtea chu a hlauthawng kher mai, phone a phawrh a, "Hey...control room a ni em...off vat rawh u." a ti tuar tuar mai a. Control room duty pakhat chuan, "Sorry Sir, tun hun hi kan TRP san lai ber ani a, kan hlawk dawn lutuk...nih phawt aw." tiin phone ala dah daih zui. Tichuan Nathana chuan, "Timothy, camera ho off tawh rawh le." a ti a, a off ta vek a. Timothy-a chuan Pu SAngtea leh Pu Zuala chu rum zet hian a melh a, "Nangmahni vangin ka pa ka chan a, nangmah ni vangin ka nu nen rethei takin kan awm angai a, nangmahni vangin ka unaupa ngei Ruata pawh ka thah a ngai ta nih hi." a ti ta mai a. Pu Zuala chuan, "Nang hi...Jaguar maw?" a ti bah buai mai a. Timothy-a chuan ring zet hian, "Aw ni e, kei hi JAGUAR chu ka ni." a ti a. Mak an ti lutuk chu an ka hau mai a.

Timothy-a chuan Nathana chu a en a, "Sir, heng misual te hi in man hma in thil pakhat chiah tih min phalsak rawh." a ti a. Nathana chuan, "Ummm sawi ta che.." a ti a. Timothy-a chuan, "Ka patea te pahnih hi ka duhtawka sawisak phawt ka duh a ni." a ti a. Nathana chuan, "Tehreng e..minute 10 vel a tawk em?" a ti a, Timothy-a chu a nui suk a, tichuan Pu Sangtea leh Pu Zuala te chu a khawih ta hrep a. Tichuan a khawih hrep zawh hnuah chuan Pu Sangtea leh Pu Zuala te chu jail lam panin kan phur phei ta a, Pi Cindy leh afapa Timothy-a te pawhin an in chu an nei let leh thei ta a ni. Chuan thil pakhat....Timothy-a inthuamna Jaguar thawmhnaw kha, ka dil ngawih ngawih avangin min pe a, ka lawm hle mai. Zanin chu ka case a zo fel tawh bawk a, Nathana pawhin a twitter ah, "JUSTICE IS SERVED." tiin a post nghe nghe kha. Awle, bialnu neiin kan bialnu te kan bia anga, a nei velo kha chu tikhan awm mai mai teh u, in inhmeh tawk chauh. KA va leng nghal law law teh ang, mangtha vek u.

THE END