NATHAN SEASON-2 (Episode-11) NATHAN'S NEW LOVER by:Aaron Malsawmdawngzuala

[Aaron Dustin]

NATHAN SEASON-2 (Episode-11)

NATHAN'S NEW LOVER?

Written by : Aaron Malsawmdawngzuala


ASP Lalrinawma chu DGP in hna dang a pek avangin a zin a, vanneihthlak takin a bialnu Tluangtei te khua ah a ni hlauh mai. A partner awmbo chhungin DCP Nathan Malsawmkima pawh amahin hna a thawh leh angai ta a, Rinawma a telloh hi chuan a ngui bur zel a ni awm e. Nikhat chu an Station chhungah chuan mipakhat hi hnar thi phung hian alo lut hlawl mai a, Nathana a hmuh veleh chuan a va pan phei a. Nathana chuan mak tih hmel tak hian chupa chu a lo en hu mai a, chupa chuan, "Ka pu, i puihna kan mamawh a ni.." a rawn ti hluam hluam a. Nathana chuan, "Engthil nge thleng a? I hnar te kha a thi a nia.." a ti a. Chupa chuan, "Ka hming chu Emanuela a ni a, MS Royal School (phuahchawp) ah principal ka ni a, nichin deuh khan kan school naupang te chu an insual luai luai mai a, a chhan awm ang ka hre lo a ni." a ti a. Nathana chuan mak ti tak hian, "An insual a? In control thei lo amaw?" vin lek lek hian a ti a. Emanuela chuan, "Kan control theilo ka pu....tumah an indim lo, an invaw pawp pawp mai. Dan kan tum pawhin min khawihlet a, eng tin tin emaw ka lo tlanchhe thei hram zawk a ni. Ka phone pawh ka thlauh bo daih a, khawnge a awm ka hrelo. Hmeichhe ho pawh an dimlo, a then chu thisen hial te a chhuak a." a ti a, a mangan hmel kher mai. Nathana chuan, "A va mak awm ve...in school ah chuan security guard te an awm lo em ni?" a ti leh a. Emanuela chuan, "Awm e, pahnih chiah an nia, an khawihrawn hrep a, tunah pawh anla insual mup mup mai...min pui hram rawh." a ti lawm lawm a. Nathana chuan SI Liantea bulah chuan, "Liante, i kal vat teh ang u." a ti a, SI Liantea leh police dang 10 vel hruaiin MS Royal School lam pan chuan an kal ta a. School an thleng chiah chu school gate bulah chuan a chhunga school naupang lo insual luai luai chu mipui tam tak hian an lo en thup mai a, Nathana chuan vin zet hian, "Awm sawn ru, enge inlo thlir thup a? Kal sawn ru." a ti vak vak a.School playground ah chuan thenkhat chu a let phung tawh a, rapthlak tak a ni. School naupang hmeichhe ho an au tuar tuar a, athen an tlanchhia a, athen an invaw bawk a. School naupang zinga pakhat chu gate bulah chuan thi hnuang hian a rawn tlan phei a, Nathana bulah chuan, "Ka pu...min chhan rawh, khawngain min chhan rawh." a rawn ti hluam hluam mai a. Gate lah chu ala inkalh tlat mai si, Nathana chuan a pistol a phawrh a, gate tala chu vawi hnih vel a kap a, tala pawh chu a chhe ta. Chu veleh police dang hote chu tlanlut nghalin naupang ho chu dim baksak lo hian an va vaw ta pawp pawp mai a, tear gas hman hial te a ngai a. Chu school naupang pakhat, thi phunga tanpuina rawn dil chu Nathana chuan a pawm kang lawp mai a, "Lungngai suh, i tha leh mai ang." a ti a. Rang takin Nathana leh SI Liantea chuan damdawiin an panpui nghal a, operation room ah luhpui nghal a ni a. Mnute 2 vel hnuah chuan doctor chu a rawn chhuak a, "A thisen a hloh nasa lutuk a, rang takin thisen pek vat a ngai a ni. A thisen hi B+ a ni a, kan stock sa zawng zawng a zo vek tawh a, engtin nge ni dawn?" a ti a. Nathana chuan, "Lawk aw ka pu." a ti a, pawnah a chhuak a. Damdawiin bul lawkah hian college pakhat a awm a, chuta zirlaite chuan an college bula canteen ah chuan thingpui an lo in mek a. Nathana chuan zirlaite hnenah chuan, "B+ in awm em, blood group B+ in awm em?" a ti vak vak a, mahse tuman an chhang lo, mak ti tak hian an en thup ringawt mai a. Nathana chu a mangang tawh bawk si a, college zirlai ho ID card awrh lai te chu a en kual a, an zinga hmeichhe pakhat, hmeltha zet mai leh changkang zet mai ID card ah chuan 'Blood Group:B+ positive' tih a hmu hlauh mai a. NAthana chuan, "Lo kal rawh nula...a rei dawn lo." tih pah chuan hospital lam pan chuan a kai phei dawr dawr a.

Chu nula hmeltha zet mai chuan Nathana bulah chuan, "Ka pu...hey..nilo, enge awmzia?" a ti chel chul mai a. Nathana chuan damdawiin chhungah chuan a luh pui a, "A rei dawn lo, thisen i pe dawn." a ti ringawt a. Chunu chuan, "Ngawi teh, thisen ka pe ngailo a, ka pe ngam lo hrim hrim." a ti a. Nathana chuan, "Ngaithla teh nula, mi nunna chhanhim i duh em?" a ti a. Chu nula chuan, "Umm, duh e." a ti a. Nathana chuan, "Anih chuan tun hi hun remchang a ni, school naupang pakhatin thisen a mamawh a, pek anih vat loh chuan a thi mai dawn si a, chuvang chuan i thisen hi kan mamawh a ni." a ti a. Chunu chuan, "Mahse, thisen ka la pe ngailo a.." a ti a. NAthana chuan, "I vawikhatna tur a nimai lawm, lo kal rawh le." a ti a. Chunu chuan a hreh bawk si, mahse police officer meuhvin a ngen si a, a hnial ngam silo a, phur tehchiam lo chuan a zui ta a. Doctor bulah chuan Nathana chuan, "Ka pu, hei..ka thiannu hi a blood group B+ a ni a, thisen pek a inhuam e." a ti a. Tichuan chu nula chuan thisen chu a pe ta a. Thisen a pek zawh meuh chuan khua a thim tep tawh hial a, chunu chu khum atang chuan zawi muang hian a rawn tho a, "Awii..ka lu a hai lutk, ava na em em ve." a ti nuah nuah a. Nathana chuan nui sang hian, "I ti lawmawm hle mai, mi pakhat nunna chu i chhan der a nia. I fel hle mai, ka lo thlah ang che, khawi vengah nge in awm?" a ti a. Chunu chuan Nathana chu a en vang vang a, a nui hmel mawlh mai chuan hmundang a hawi tir thei ngang lo a ni. A tir kha chuan thisen pek a hlauh em avang leh a hamhaih em avang khan NAthana kha alo en chianglo a, mahse tunah zet zawng, mitkhap miah lo hian a hmazawna thu Police inspector chu chilthli tla lo chauh chuan a en vung vung mai a. Nathana chuan, "Nula, khawi vengah nge in awm ka tih chu?" tiin a zawt leh a, chu nula chuan Nathana enreng chungin, "Chaltlang ah." a ti ringawt a. Nathana chuan, "Min va haw awm ve a? Tinge min en reng a?" a ti a. Chu nula chu a harh chhuak zawk mai, zak tak chung chuan, "Ahh..ih, nilove..ka haw lo che." a ti bah nuai mai a. Nathana chuan, "Lo kal rawh ka thlah ang che." a ti a, motor ah chuan an inzui lut ta a. An tlan pah chuan chu nula chuan Nathana chu a en char char a, Nathana chuan, "DCP Nathan Malsawmkima ka ni a, tunge i hming?" a ti a. Chu nu chuan, "Angeli ka nia.." a ti a. Nathana chuan, "I chungah ka lawm takzet e Angel...vawiin chu vantirhkoh ang mai i ni, mi pakhat nunna i chhan a, i chhuanawm hle mai." a ti a. Chutia a star em em leh a vei ngawih ngawih mai mipa in a han fak vel chu Angeli chuan nuam a ti hle mai. Angeli te in chu an thleng a, Angeli te inkawtah chuan Angeli nu chuan a fanu haw har ta lutuk chu a ngaihtuah deuh aniang, a lo vei kual sek tawh mai a. Chutia a fanu police motor atanga lo chhuk a hmu chu a hlauthawng kher mai, chubakah a fanu bulah chuan police officer a lo la awm tel ve kher bawk nen. Hmanhmawh tak chuan a va tlan phei a, Nathana te pawh chu motor atang chuan anlo chhuk a. Angeli nu chuan, "Bawihi..enge awmzia?" a ti hu a. Nathana chuan, "Ka pi, hei hi i fanu em ni?" tiin a zawt a. Angeli nu chuan, "Aw...thil a tisual em ni?" a ti a. Nathana chuan, "Tisual love, thil tha lutuk zawk a ti a ni. Vawiin khan school naupang pakhat chu a thi tep a, thisen a mamawh em em a, i fanu hian a thisen a pe a, a chhanchhuak a ni." a ti a. Chutia Nathana'n thu a sawi mawlh mawlh lai chuan Angeli chuan mit tla lek lo hian Nathana chu a en vung vung mai a, hmeltha a ti ngang mai. Nathana chuan, "Ka kal phawt ange, nidangah kan inhmu leh dawnnia." a ti a, a kal ta a.

Angeli nu chuan, "Bawihi, tak tak em ni?" a ti a, Angeli chuan nui sang hian, "Aw..ni e, ka rilru a hlim veng veng mai." a ti a. A nu chuan, "Lo kal rawh, lut ang." a ti a. Angeli chuan, "Awi...a number ka dil theihnghilh, ava pawi e." a ti vawng vawng mai a. A nu chuan, "Enga tan nge i tih a? Chubakah police officer number chu ngatan nge i tih?" a ti hu mai a. Angeli chuan, "Aww..ka nu, i makpa tur a ni maithei asin." a ti vel a. A nu chuan, "Nupui a nei tawh maithei asin, i lerh lutk, zak ve deuh teh." tih pah chuan a nui huah huah a. Angeli chuan, "A nei lo ang, a hmel en khan tlangval a la ni tih a chiang, awi ka duh reuh emai." a ti a, an nufa chuan an nui dun a, inah chuan an inzui lut ta a. Atukah chuan Nathana chuan Station a kal hma chuan school naupang damlo, a chhanchhuah tak kha kan turin hospital lam a pan a. Chu naupang chu a lo harh tawh a, mahse a la tawngchhuak hleithei lova. Nathana chuan, "Bawiha, i tha vat mai ang...lungngai reng reng suh aw.." a ti a. Chu naupang chuan, "Ka pu, kan school ah khan khatiang a thlen nachhan kha chu Minister pakhat vang a ni, law minister." a ti a. Nathana beng a verh zawk mai le, NAthana chuan, "Enge awmzia?" a ti a, mahse nurse alo lut a, "Damlo hi biak vak kanla phallo a, khawngaihin minlo chhuahsan hrih thei angem?" a rawn ti a, Nathana pawh chu a chhuak ve ta mai bawk a. Pawnah chuan naupang damlo nu chu alo awm a, doctor chuan chunu bulah chuan, "Ka pi, he police officer hi ania i fapa damdawiina lo hruai tu chu." a ti a. Chunu chuan, "Ka lawm e aw ka pu, ka lawm takzet." a ti a. NAthana chuan, "Ka tihtur ka ti mai chauh a ni e, in enkawl tha ang che u." a ti a, Station lam pan chuan a kalsan ta a. Station a thleng a, a office ah a lut a, "Rinawma pawh chu, a ngaihawm reuh mange." a ti nuah nuah a. Constable a lo lut a, file a rawn pe a. Constable chuan, "Kha aia kimchang deuh kha buaipui mek a ni a, insual a thlenna chhan ber chu Law Minister pakhat vang a ni awm e."a rawn ti lut a. Nathana chuan, "Law Minister chuan insual rawh u le, a ti a, an insual ta tihna em ni?" tiin a zawt a. Constable chuan, "Nilove Sir, Law Minister chu kar hmasa khan khami school ah khan a kal a, an school property lei a dil a, principal chuan a lo phallo a. Rei fe an inhnial hnuah Law Minister chuan a chhuahsan ta a, chuan nimin khan school naupangte insualna bulpui ber chu Law Minister nau Romawia t(r)an chhuah a ni." a ti a. Nathana chuan, "Law Minister nau chu chumi schoolah chuan a lut ve tihna em ni?" tiin a zawt leh a. Constable chuan, "Lut love, Romawia te chu kum 35 vela upa daih a ni tawh alawm." a ti a. Nathana chuan, "Anih chuan engtin nge a bul tumtu chu Romawia a nih theih?" a ti a. Constable chuan, "Sir, a chhan chu maw, nimin khan school naupang thenkhat insual kan man te zingah khan school naupang tak tak nilo, form ha ve tho 10 vel an tel a ni. Chuan chumite chu kan dawp a, Law Minister thil tih vek a nih thu an sawi a." a ti a. Chutia an titi lai chuan SI Liantea a lo lut a, "Sir, nimin khan Romawia chu man turin kan inhrilh vek tawh a, mahse nimina insual kan thelh zawh deuh lampang khan Romawia chu school campus hungna banga a lawnliam lai ka hmu a ni. Tunah Inspector Amandai kutah he case hi DGP in a dah a, an zawng mek. Chuan maw Sir, Romawia chuan a hmai a tuam a, banga a lawn liam lai khan a hmaituamna a tla a ni." a ti a. Nathana chuan, "Anih chuan a awmzia chu, insualna thlen tirtu ber chu chung Law Minister kid te chu tihna a nimaw?" a ti a. Liantea chuan, "Aw..property lei an phalsak loh avanga ti a ni, a naute zingami thenkhat te chu an tlanbo hman a, mahse kan man ho hi an inpuang leh vek si a." a ti a. Nathana chuan, "A tha e, Amandai pawh inlo back up hram hram dawn nia, tun tum case chu i han awl ve phawt teh ang. A nihleh Law Minister chu arrest warrant pek kan ni tawh em?" a ti a. Liantea chuan, "Aw...Amandai te pawh an kal tawh a, vawiinah man an ni ang." a ti a. NAthana pawh chu a case a nih loh avang chuan a thaw huai mai.

Chumi tlai a duty haw chu traffic a lo jam nasa kher mai a, kawng lai takah chuan mipui tam tak an dingkual thup chu a hmu thei a. Bike chu a side tha a, ava kal hnai ve a. A thil va hmuh chuan a barakhaih hle mai, ahma ni lawka a chhanhim school naupang kha, khum nawrlirh theihah chuan a lo mu a, a thi tih hriattak hian a lu chu anlo tuam bur mai a, a bulah a nu chu lo dingin tap chungin, "Ka fapa hian thudik a hria a, mahse a puanzar an hlauh avangin an tum reng vangin doctor te hian an tihlum a ni. Tukin zingah pawh khan a dam that em em tawh thu an sawi a, mahse tunah a thi leh mai si. Rorelna dik tak ka hmuh hma chu helai hmun atang hian ka kalsawn lovang." alo ti vak vak a. Nathana chuan a en reng a, a pawi a tih hmel hle mai. Taxi driver pakhat chuan, "Ka pi, chungte chu i mimal buaina a ni a, hei ka passenger te hi an hmanhmawh tawh ania, hun nei lo tak tak te kan ni a, khawngaihin min hrethiam la, kan kal duh ania." an ti a. Chutah Traffice police pahnih lo kalin, "Ka pi, dan bawhchhiatna a ni, hetia awm tur hian i fapa hi lo boral pawh nise, a chhan leh avang chu engpawh nise, hetia tih theihna dan hi engmah i neilo. Midang tan buaina i siam mai mai ani, tha taka kan hrilh lai che hian kalsawn vat rawh." an ti a, midang pawh chuan anlo hau luai luai bawk a. Chu nu chuan mipui te chu melhkual pahin, "Inlo hmu em, police te chuan an police pui te an t(r)an a, driver ten an driver pui te an t(r)an bawk a. Kei erawh tuman min thlawp velo, ka fapa hi a hliam tawrh avanga thi nilovin, a dam dawn chauh a, an that a ni." a ti vak vak a. Nathana chu ava kal hnai a, Traffic Police ten anlo hmuh chuan salute anlo pe a. Nathana chuan chunu bulah chuan, "Ka pi, keiman ka hriatthiampui che. Phuba chu ka laksak ang che, khawngaihin mipui ho hi kaltir hram rawh..ka tiam ache, rorelna dik chu i hmu ngei ang." a ti a, chunu chuan, "Ka fapa nunna chhan tu i ni a, tunah boral tawh mahse ka ring che a, min tih hlawhtlinsak ngei pawh ka beisei e." a ti a, a fapa ruang chu ambulance in an phur liam ta a. Zan a lo ni a, NAthana chu a mu thei thak lo. Tlai lama a thil tawn khan a ti muhil thei tlat lo mai a, a ngai serious angreng hle bawk. Kha pitar kha a tiam tawh a, Amandai kutah case chu awm mahse, a ruka engemaw tal tih ve ngei chu a tum ta a. A mu thei ngang lo chu pawnah a chhuak a, a tei kual reng mai a. Hemi zan hian Law Minister Pu Lalthianghlima chu Amandai'n a man tawh a, Nathana erawh an man lai vel hian ava lang ve lemlo thung. Nathana chu an inkawtah chuan meizial zu in a tei kual reng a, chuveleh chak tawkin bike a rawn tlan a, a su thawi fua lehnghal. Bike chu a ding a, a khalhtupa chu rawn hawiletin, "Sorry lutuk aw, thianpa." a ti a, a kal leh ta daih mai a. NAthana chuan bike khalhtupa chu a en zui vawng vawng a, a hriathnu ang a ti hle mai. A bike number chu a chhinchhiah nghal phawt a, tichuan phone a phawrh a, thlalak pakhat chu a hmet chhuak a. Thlalak chu a en vang vang a, chu thlalak chu Law Minister Lalthianghlima nau Romawia thlalak a ni. Tichuan Nathana chuan nichin lawka bike khalhtu kha Romawia, an mizawn lai ngei a ni tih chu a hre ta. Rang takin a motor a la chhuak a, a umzui nghal a. A lo tlan thui tawh angreng hle mai a, a zawng kual ta vak mai a. A tawpah chuan building hlui tawh tak, lian ve tak, tumah luah tawhloh leh a then phei chu mau tlawn ringawta insuih nuai tawh bula chuan Romawia bike chu a hmu ta a. Building chhungah chuan lutin Romawia chu a zawngkual ta chiam mai a, a chhawng chung berah chuan a chho a, roof top-a Romawia zu lo in lai chu a hmu ta a.

Nathana chuan a rawmawl a phawrh a, a hmai a tuam a, Romawia chu a va pan phei ta a. Hnung lam atang chuan Romawia chu a va rek thut mai a. Romawia phu nasa lutuk leh mangang bawk si chu a tal vak vak a, "Tunge i nih? Min thlah rawh..vatin..." a ti chel chul mai a. Nathana chuan a rek nghet tulh tulh a, Romawia chuan a kiu-in Nathana dulah tak chuan a nghawk pawp mai a, Nathana na ti lutuk chu a thal tawp mai a. Romawia chuan a hrawk a dawm vawng vawng a, Nathana chu a zu melh a. NAthana pawh chu a rawn tho chhuak a, an insual ta buan buan mai a. Romawia chuan a theih tawpin Nathana hmaituamna rawmawl chu pawhthlak a tum a, Nathana pawhin a theih ang tawkin a lo dang ve bawk a. Minute 10 dawn lai an in beih hnuah chuan Romawia chuan a hneh ta ngang lo a, thi phung chungin chhuatah chuan a let reng mai a, a tho thei ta lo. Nathana chuan a bula hrui chu la in Romawia chu a phuar a, a hmui a tuam sak bawk a, tichuan a pu nawlh a, chhawng 4na lam panin a chhukpui a. Room pakhatah chuan a dah a, lung lian tak tak a la khawm a, kawngkhar bulah chuan a remkhawm teuh mai a, a chhuak theih hauh lovang le. Nathana chuan a kalsan ta daih mai a, inlamah a hawsan ta a. Atukah chuan Nathana chu Stationah chuan duty turin hma takah a thleng a, Amandai'n alo hmuh chuan, "Sir, nizan kha tinge ilo kal ve loh?" a lo ti a. Nathana chuan, "Nia, Sanvi hi a rai lian ve tawh si a, ka case anilo bawka nizan kha chu ka awmpui ve anih kha. Mary a damlo bawk sia, min ngen reng bawk si a, tunlai chu kan buai ve khawp mai." a ti deuh luam a. Amandai chuan, "Minister a ni bawk si a, cell chhungah pawh kan dah lo. Court rorel a nih hma chu guest room ah kan kalhkhum hrih mai dawn a nih hi, i hmu ve reng reng duh em?" a ti a. Nathana chuan, "Khawi, chahbi minlo pe teh...keimahin ka va kal teh ang." a ti a, Nathana chu guest room lam pan chuan a kal ta a. A chhungah chuan a lut a, Minister chu tuverh bulah lo dingin a melh ngai a lo melh vung vung a. Nathana chuan char pahnih a la a, in hmatawnin a rem a. Chair pakhat zawkah chuan thut pahin, "Lo thu rawh ka pu." a ti a. Minister pawh chu thut pah chuan, "Eng thu nge ilo sawi ve leh dawn a? DCP Nathana i ni ang maw?" a lo ti a. Nathana chuan nui suk pah hian, "Aw...ka nih ve hi." a ti a. Minister chuan, "Enteh thianpa, kha principal Emanuela khan engmah a hrethiamlo a ni. A property zawng zawng lei sak ka tum pawh anilo a, a chhiat phah duai dawn lo. Inremsiamna neih pui ka duh vang mai chauh a ni, chubakah ka nau Romawia pawh kha khami ni khan school naupangte angin a inchei te anlo ti vel a, inah a awm reng alawm." a ti a. NAthana chuan, "Anih leh tinge a tlanchhiat si a?" a ti a. Minister chuan, "News kan lo hria a, minpuhna te pawh kha kan lo hre ve vek alawm. Chubakah ka nau hi chu a dawih ve em em a, a hlau a tlanchhia a niang chu." a ti a. Nathana chuan nui suk pah hian, "Khai, i nau pawh chu iva hre chiang lo ve...a hrim hrimin Pu Emanuela kha i vau tih pawh kan hre vek...chuan hospital-a doctorte kha pawisa pein kha school naupang ka chhanchhuah tak kha that turin i ti bawk a, achhan chu thudik tak a hriat vang a ni." a ti a. Minister chuan, "Dawt vek anih chu, Law Minister ka ni a,dan hi chu ka hre ve khawp ania aw. Saw Principal Emanuela sawn ala tuar ang, Law Minister ka nih ang ngeiin dan hmang bawkin helai hmun atang hian ka chhuak ngei bawk ang." a ti pang pang a. Nathana chuan, "MS Royal School Principal Emanuela sawn LAW hi chu kum 22 chhung teh meuh alo zir tawh, i hrilhfiah a ngailo ang, nang aiin a he zawk. Nangte chu i eiruk vang te, politician hmelhriat tha i neih vang te, dik lo taka sum i lak luh avangte leh i hausak a vang chauh a Law Minister ni thei mai mai i nih kha." a ti ta siah siah mai a. Minister chuan, "Naupang leh.. ve lutuk a..nang ang Police Officer te chu ka bum kual hnem tawh mai, ka lakah hian an thangtlawm zing tawh lutuk. Nang pawh hi engvak i ni dawn biklo tih chu a chiang reng..ila inchhir ang." a ti khur khur a. Nathana chuan, "Nang ang Minister te hi chu ka man hnem tawh mai, a then phei chu Encounter shoot hmangin ka that nual tawh bawk. Nang pawh hi engvak i ni dawn biklo tih chu ka chiang a ni....anih phawt le." tiin a chhuahsan ta daih a, Minister chuan a melhrum kher mai.

Romawia pawh chu a awmna room thim tak ah chuan a la awm reng a, a rawn harh chhuak ve ta a. A hmui, akut leh ke phuar beh a lo ni a, a tal vak vak a, mahse awmzia a nei tlem hle mai. Theihtawp a chhuah hnu chuan a ding thei ta harm a, a awmna room bang vel chu dim te hian a lu chuan a tauh kual chhin a, cement vek alo ni a. Kawngkhar erawh chu thing atanga siam a ni tih a hriat veleh chuan a dar hmang chuan sut chhiat a tum a, mahse kawngkhar chu Nathana'n lunga a dan tlat avang chuan chuti maia awlsam chuan a tichhe thei lo. Darkar chanve vel lai tichhiat tuma a beih hnuah chuan kawngkhar chu a su chhe thei ta a, lung te pawh chu a nawr sawn a. Cement ban zum laiah chuan a kut phuarna te chu a tal chat a, a thinrim kher mai. Chutih lai chuan chumi building bula watchman vai pakhat hian chu building hlui chhawng 4-na a mihring chetla lai ang tak a ahmuh avang chuan a han pan chho a. Romawia chuan tu emawni a lo chho a ni tih a hre ta, thawm chu a ngaithla zel a, bang phenah a biru a. Watchman lo thleng chiah chu amah kidnap tu a nih ringin en man hleilo hian alo hnek ringawt a, hmawlh zum tak mai hi a chhar a, watchman dulah tak chuan a vit ta pawp mai a, watchman pawh chu stepah a lum thla tawp tawp a, a thi chiang ngei mai. Romawia chuan a en vang vang a, "Hrep tak chuan...hepa hi chu a nilo, ft 6 vela sang a ni, palian ve tawk tak a ni..ka zawngchhuak khawp ang. T(r)hi (necklace) a awrh a, a locket kha Sakeibaknei lu lem a ni bawk, a chak dawnlo." a ti nuah nuah a. Chutih lai chuan Nathana chu building lam pan chuan Romawia enfiah tur in a lo kal ve mek bawk a. Romawia rawn chhukthla hlawk hlawk lai chu a hmu ta a, NAthana chuan ama hriattham lek hian, "Zawnga mai mai chuh...engtin nge maw a tlan chhuah theih le?" a ti nuah nuah a. Chuveleh nasa em em mai hian ruah a rawn sur ta chiam mai a, Romawia pawh a rawn thleng thla ta. Nathana hnunglam hawi zawnga lo ding reng chu a hmu a, "Hey, tunge i nih?" tiin a va au vak vak a. NAthana chu a thuhniam a, leia chirhdiak chu la in a hmaiah a tat pherh nuai mai a, ava hawilet leh a. Romawia chuan, "Aww...nang hi i ni maw? Min kidnap tu kha nang hi i ni chiang lutuk..nizan khan i hmai i tuam a, tunah chirh i tat leh vel a, ka hre dawn tho tho che." a ti pung pung a. Nathana chu va tlan pheiin Romawia chu a va tlawh thal tawp mai a, thinrim takin Romawia chu a rawn tho chhuak a, Nathana chu va hnek a tum a, mahse alo bum a, Nathana chuan a sawisa leh ta hrep mai a. Ruahsur chuan a hmai a nan fai dawn apiang chuan chirh chu a tah belh zel a, a hmel awmdan a hmu hman thlawt lo a ni ber mai. Tichuan nikhawhrelo khawp chuan Nathana chuan a sawisa leh a, Romawia chu inchung lamah a pu chho leh ta vu vu mai a. Chhawng 6na zawkah a kalpui a, room dangah a dah leh ta a, a hawsan leh ta daih mai a. Atuk ah chuan Nathana chu a off day ani bawk a, inhmuh a khat emai a ti deuh aniang, a thiannu Muanpuii Coffee dawrah chuan a kal a. (Muanpuii hi tunge a nih tih chu Season-1 lamah kan hriat tawh kha.) Nathana nen chuan dawhkan chu dunin Muanpuii nen chuan an titi a, an nui dun bawk bawk a. An thutna hnung deuh ah chuan thik hmel zet hian Angeli chuan NAthana leh Muanpuii chu a lo melh reng mai a, Angeli chuan zawite hian, "A bialnu amawni le? Awii..ka van ngei tak." a lo ti nuah nuah a. Muanpuii leh Nathana te chu coffee an inzawh chuan an inthlah a, Nathana a chhuak chiah chu Angeli chuan ava umchhuak nghal a. Nathana hnungah chuan ava beng thak thak a, "Thianpa, minla hria em?" a ti a. NAthana chuan a lo en hu a, "Tunge i nih a?" alo la ti zui. Angeli chuan lungawiloh hmel zet hian, "Min hre tawhlo maw? Ka duhlo chung thisen min pek luih tir kha..." a ti a. NAthana chuan, "E...hre leh si, ka hmu che chu ka lawm e, nih aw." tih pah chuan a kalsan leh ta daih mai a.

Angeli chuan ava umzui leh a, "Thianpa, inkawm lawk ila...coffe in dun lawk ang hmiang." beisei nei tak chuan a han ti a. Nathana chuan, "Ka in zo chiah...ka in peih tawh lo." a lo ti hmuk a. Angeli chuan, "Ihh..nihleh i phone number minlo pe teh." tih pah chuan Nathana phone ken lai chu a laksak daih a. Nathana chuan, "Hey, tinge i lak ngawt a.." a tih pawh chuan Angeli chuan NAthana contact list chu a en a, "My number..tih hi i number a ni ang maw?" tih pah chuan a number chu a phone ah chuan a type mawlh mawlh a. Angeli bawk chuan, "Ehe...MY LOVE tih hi tunge a? I bialnu nimaw?" a ti a. Nathana chuan Angeli phone zawk chu a laksak ve a, a number a save sa chu a delete a, phone chu a pe let leh a. Angeli chuan, "I delete a ni maw...pawilo, ka phone ami hi delete mah la ka thinlunga mi hi chu i delete thei chuang lovang, i number kha ka by-heart hman vek alawm." tih pah chuan a nui seih a, a hmel chu a tha chiang a ni. Nathana chuan, "Angeli tiraw i hming khah?" a ti a. Angeli chuan lawm tak hian, "Ka hming te ila hre ve alaw? Awii ka van lawm tak." a ti deuh chiam a. Nathana chuan, "Police Officer ka nih hi, min hlau lo em ni?" a ti a, Angeli chu a lai lek lek a, "Aihh, hlau lo, ka hlau phallo che. A hrim hrimin i van inla cool ve a, hmanni ah ka duhlo chung thisen min pek luih tir a, tha tak takin min mamawh hunlai kha chuan min bia a, tunah chuan min mamawh tawh lo aniang, i induh tawh emai." a ti a, Nathana chu a neuih sen sen reng a. Nathana chuan, "Enge i duh a?" a ti a, Angeli chuan, "NAngmah." tih ringawt hian alo chhang a. NAthana chuan, "Enteh nula, ka man mai tur che ania, police officer hna thawk tur i tibuai mek tih hi i hria em?" tiin a han tihthaih deuh a. Angeli lah chuan, "Yess..min man rawh, mahse Jail ah min dah lo la, in inah min man la, i bulah min awm tir char char la, a tha angem?" a han ti vel a, NAthana chuan a lu a dawm vawng vawng a, "Huiham." a ti ringawt a. Angeli chuan, "Nichina ilo thutpui nu kha i bialnu chu ami? MY LOVE tih a i save kha a ni tiraw?" a ti leh a. NAthana chuan, "Ni mai mai lo, ka kal phawt ange....kan inhmu leh dawnnia." a ti a, a kalsan a, Angeli chuan, "Zanah ka lo text dawn che, min reply ngei ngei rawh aw." tih pah chuan a au zui lawm lawm a. A awmzia ber chu Angeli hi mi zaktheilo, khawlo leh lerh tak ani tihna a nilo, Nathana zun hian a phuar nghet em em a, a chhiartu te zinga mi ang bawkin a tak taka awm mang silo hi a vei bur a ni mai. Nathana hi a duh mai nilovin, a hmangaih nghal a ni ber ang chu, a in control zo lo a ni, a awmdan tur chu hmeichhe ho chuan inhriatthiam mai ka ring. Chhun alo ni a, Nathana chu Romawia ngaihven tur leh va enfiah tur chuan a thuhrukna lam pan chuan a kal leh ta a. Romawia a dahna room chu a thleng chho a, room kawngka chu a hawng a, Romawia chu a lo la mu reng a. Kawngka chu a khar leh a, a chhuk leh tur chiah chu step-ah chuan Angeli a lo ding reng hi a hmu a. Nathana pawh a phu chiang ngei mai, Angeli lah chuan rum em em hian alo melh a. Nathana chuan, "Hetah enge i rawn tih?" a ti a, Angeli chuan, "Ka hre vek ania, khawnge a awm?" a ti ta mai a. Nathana chu a hlauthawng deuh t(r)an tih a hmelah chuan a lang chiang kher mai, Angeli bulah chuan, "Heta lo kal ve tur hi i nilo aisn?" a ti a. Angeli chuan, "Khawnge a awm? Ka hmu hman vek che ania, ka thiannu a nih kha.." a ti ta daih mai a. Nathana chuan hrethiamlo tak chuan, "Tu i thiannu maw?" a ti a. Angeli chuan, "Hrelo der suh..vawiin ka haw lampang khan ka thiannu Awmawmi nen college bulah khan in inbe lai ka hmu alawm...kha kha em ni MY LOVE-i chu?" a ti a. NAthana chu a thaw huai mai, a kal lam khan college zirlai naupang pakhatin Nathana hi ATM booth thleng chuan ve a dil a, chutia an inphur lai chu Angeli hian alo hmu ani ngei ang, chu hmeichhia pawh chu Angeli sawi Awmawmi chu a ni ngei ang. Nathana chu a nui suk a, "Kha nu kha i thiannu a lo nimaw? Ka phurh nachhan te chu ATM ah kal a duh a, minlo phur ve a ti a nih kha." a ti a.

Angeli chuan, "Awi...ka lo ringhlel hman che u alawm, ka thiannu hian ka star che tih pawh a hre ve reng a, minlo phatsan emaw ka tia ka lo thinrim hman lutuka." a ti a. Nathana chu a ner sawk a, "Angel, naupang mai ila ni a, engmah ila hrethiam velo ani." a ti a. Angeli chuan, "Ka naupang tawh bawk lo, kum 20 ka tling ve tawh dawn tunkum ah...a hrim hrimin hetah hian enge i tih reng reng a?" a ti a. Nathana chuan, "Aaa...englo, he building hi hmanah kan office ani thin a, thil ka enfiah vel lawk mawle, chubakah lung a leng em a, ka kal mai mai." a ti ta ringawt a. Angeli chuan, "Min phur haw rawh aw?" a la ti zui. Nathana chuan hnial eng ang mahse he tleirawl hmeltha zet hian a tawpsan leh mai dawn chuanglo tih a hriat lawk avang chuan Nathana chuan an in thleng a thlah ta a. Angeli chuan, "Nathan...Nathan tiin ko ve ta che ila a pawi angem?" a han ti vel a, Nathana chuan, "Pawilo, ka hming nilovin min ko tlat ta la pawi ka ti zawk daih ang." a ti deuh kher a. Angeli chuan, "Anih chuan Nathan, khawngaihin lo leng lut ta che." a ti a. Nathana chuan, "Enga? Engvangin?" a ti hu mai a. Angeli chuan, "Ka nu leh pate pawn an hmu ve duh che a." a ti a. Nathana chuan, "Engatan nge min tih anga?" a ti leh a. Angeli chuan, "Aww...makpa tur te chu an hmu ve duh ang chu.." tih pah chuan a nui sak a. Nathana chuan, "Hmmh....ngailo mai rawh se." tih pah chuan a haw san ta daih a. Zan alo ni leh ta, Nathana chuan Romawia a thuhrukna chu a him dawn lo riauvin a hre ta a, chubakah thah a tum lo hrim hrim bawk nen. A tum dan tak chu hrem ve hlak a, ahnua police hnena pek kha a ni. A zan a zanin Nathana chu Romawia a thuhrukna building lam pan chuan a inkhalh chhuak leh ta a, Romawia a dahna room ah chuan a lut a, eitur a kensak te chu a ei tir phawt a. Romawia pawh chuan ngawi rengin a ei a, a ril atam tawh bawk aniang, a hap hian a hap buan buan mai a. NAthana chuan pistolin a tin reng a, chuveleh Romawia chuan a thil eilai chuan NAthana hmaiah a vawm thut a, rang em em in a tlanchhuak ta nghal a. Nathana chuan a umzui nghal vat a, mahse a thim bawk si a, a lo che rang ve tho bawk ne, a hmu hman ta lo. Lu dawm vawng vawng chung chuan Nathana chu a haw ve leh ta a. Romawia chu thaw hlawp hlawpin a tlan a, khawi lam nge a pan tih pawh a hre tawh lo. Tichuan a chauh em avang leh a kalna tur kawng pawh a hmuh fiah theih mangloh avang chuan a thingthi hnawk a, a luhai lutuk chu a let tawp a, engmah a hre zui lo. A harh leh meuh chuan damdawiinah a lo awm a, a bulah chuan nurse te leh doctor te chu an vei suau suau. Harsa ti tak chung chuan a rawn in tho chhuak a, nurse pakhat chuan, "La tho suh, nachhawkna in kan chiuna che ala reilo ania, mut ila mamawh." a ti a. MAhse Romawia chuan nurse chu a lo nam sawn vat a, "Khawnge khapa kha? Khawnge min kidnap tupa kha?" a ti chel chul mai a. Chuveleh ward chhungah chuan Law Minister thawhpui Collector te, Lawyer te leh Politician dang te chu anlo lut a. Collector chuan, "Bawiha, insum rawh....che vak vak suh, i luak mai ang." a ti a. Romawia chu a tho chhuak a, drip an khaina te chu a pawt phawi vek a, "Khawnge ka u?" a ti a. Collector chuan, "Jail ah a awm tawh, Inspector hmeichhe pakhatin a man a ni." a ti a. Romawia chuan, "An man maw? Enge nangni hian inlo tih a? Chutah police hmeichhia lehnghalin, sawi te kha zak zawk ta che u. Engtin nge Law Minister chu an man theih reng reng a?" a ti pung pung mai a. Lawyer chuan, "Romawi, tawng vak vak suh, he hospital ah hian Police in an veng reng tho che a nia. He hospital ah hian awm mahla police custody ah hruai i ni vat dawn tho, chuvang chuan damlo angin awm char char la, tlanchhuah dan kan lo dap ang." a ti a.

Romawia chuan, "Engtin nge helai hmunah hian ka awm?" a ti a, Collector chuan, "Kawngsirah tukin zingah ilo let reng a, police ten an hmu che a, damdawiinah hian an dah che a ni." a ti a. Lawyer chuan, "Bawiha, khawnge i awm daih a Kan zawng nasa che asin." tiin a zawt a. Romawia chuan thinrim hmel tak hian, "Min kidnap a ni...kha mihring khan min kidnap a ni." a ti khur dur dur a. Collector chuan, "Tuin maw?" a lo ti a. Romawia chuan, "Ka hrelo, ft 6 vela sang a ni a, palian ve tak a ni. A hmai a tuam tlat a, chuan thi (necklace) a awrh a, a thi locket chu sakeibaknei lu lem a ni. Chubak engmah ka hre lo, a hmel diktak ka hmu thei lo, ka that khawp ang." a ti khur khur a. Nathana pawh chu Station lamah kalin Pu Lalthianghlima, LAw Minister an man mek bulah chuan a va kal a, "Pu Minister, i va la tlanchhuak silo ve. Enteh, i vanneih zia hi...Minister i ni hlauh a, guest room ah jail tang angin kan dah che a, mi naran chu ni la chuan jail bang i zut ve ngei awm si a, jail tang ro ro ah chuan i awm nuam bik ngawt mai." tih pah chuan ava nuih vel a. Minister chuan, "Dan hmangin ka chhuak ang, helai hmun atang hian ka chhuak anga, chuan i lakah hian phuba ka la bawk ang." ati khur khur a. Nathana chuan, "A fair lo emai, man tu che chu Inspector Amandai zawk alawm, keite chuan ka man hleinem che....ka lakah chuan phuba chu la lul suh." a han ti vel a. Minister chuan rum zet hian amelh a, "Ka duh aiin i tawng hnem ta khawp mai, min mantu ber nilo mah la, hetia hmusit taka min tawngkhum avang leh min deuhsawh vel avang hian i lakah phuba chu ka la dawn khawp alawm. Chumai bakah nang chauh nilovin Inspector hmeichhia pawh kha ka hre khawp ang." a ti khur khur a. Nathana nui hmel chu thinrim na in a rawn thlak nghal a, rum zet hian hnai takah minister chu a melh a, "I nau Romawia kha kan man tawh a ni, tunah damdawiinah a awm mek, a that chhuah veleh jail ah khung nghal a ni ang." a ti a. Minister chuan nuih pahin, "Haha, DCP...court ah kal te ala ngaia, ka lamtang an tam zia chu ka sawi peihlo zawk. Jail ka tang lovang, ka nau pawh a tang lovang." a ti ham ham a. NAthana chuan, "A that chu...kan la hria ang." tih pah chuan a chhuahsan ta a. Tlai alo ni a, Romawia ward chhungah chuan police pahnih an lo lut a, Romawia chu a khumah alo thu a. Police pakhat zawk chuan file thenkhat leh thlalak 5 vel chu Romawia khuma theh thlak pah chuan, "Finger print te leh thidang engkim a in mil vek a, RTF building hlui ah Bengoli watchmen pakhat i that bawk a, nangma tih ngei ani tih nemngheh a ni bawk." a rawn ti a. Romawia chuan, "Chuan...enge ni vak a?" a ti a. Police pakhat zawk chuan, "Tunah minlo zui rawh...i tha tawh bawk a, court rorelna an t(r)an hma chu police custody ah i awm ang." a ti a. Romawia chuan a khum bula dawhkana surgical knife chu a la thut a, Police pakhat zawk hrawkah chuan thisen per chhuai khawpin a vit ta thut mai a. Police pakhat zawk pawh chu a dulah a vit leh a, tichuan damdawiin atang chuan rang em em hian a tlanchhuak ta nghal a. Hnunglam atang chuan Police te chuan an um a, police pakhat zawk pistol chu a chhuhsak hman hram a. NAthana duty haw chu Romawia chuan a hmu fuh a, NAthana lah chuan form a lo ha bawk silo nen, Romawia chuan Nathana chu a pistola tin pah chuan, "Hey, ding rawh....ding rawh." a ti a. Nathana'n Romawia a hmu thut chu mak a ti ngei mai, a ding ve mai bawk a. Romawia chu NAthana bike hnungah chuan a lawn a, silaia tin reng chung chuan, "Kal rawh ka tihna apiangah kal ang che, saw police ho sawn min man tur a nilo. Ka thu i awihloh chuan i thluak hi a darh vek a ni mai, tlan rawh." a ti a, NAthana pawh chu chak tak chuan a tlan ta a.

Police ho chuan hnung lam atang chuan Romawia leh Nathana chu an lo um ve zel bawk a, NAthana chu chak takin a tlan a, tichuan Romawia chuan NAthana phone chu a la chhuak a, a thiante phone a tum a. Romawia chuan Nathana bulah chuan, "Sim 1 nge Sim 2 ah hian ka call dawn? Sawi vat teh." a ti vak vak a. Nathana lah chuan, "Sim 3" tih ringawt hian alo chhang a. Romawia thinrim chuan NAthana helmet a kuk fawk pah chuan, "Mawla, fiamthuna hun a nih loh hi, thih i duh em ni?" a ti vin hlur tawh mai a. Nathana chuan, "Awle...ka ti mai mai nih kha, Sim1 ah khan aw.." a ti a. Romawia chuan athiante chu a call ta a, "Aw...khawnge in awm? Ka lo kal, police in min um ania. Tunah aw...awle ka lo kal." a ti a, Nathana phone chu a la paih daih zui a. NAthana chu a thinrim kher mai, mahse tih theih vak aneih siloh avang chuan Romawia sawina ah zel chuan a kal a. A tlanchak bawk aniang, police siren ri pawh a hriat mang tawhloh hial a, Romawia chuan a thiante chu a hmu ta a. Bolero in an lo kal a, Romawia chu an lo hui vak vak a. Romawia chuan, "Ding rawh...tah hian.." a ti a, a chhuk a. Bolero ah chuan lutin chak takin an tlan ta a, NAthana erawh a ding reng ringawt a, umzui pawh a tum lemlo. A chhan chu Romawia khan a chhuk pah khan Romawia kha a bike kha a tlawh tluk sak hram a, a ke a puncture bawk a ni. Nathana te department ah hian Law Minister an man mek Pu Lalthianghlima hnuaia a ruka hnathawk hi a awm ve a, chu chu hmanni lawka lo join thar, ACP Duhzuala a ni. Romawia te leh Police te in um mek lai chuan Station lamah chuan ACP Duhzuala chuan a ruka Law Minister chu phone hmantir dan ringawt alo buaipui a. DGP a chhuah zawk hlan chuan ACP chu guest room ah chuan a lut a, Minister bulah chuan phone pek pah chuan, "Rei suh aw, DGP kha a chhuak reilo ang ka ring." a ti a. Law minister chuan a naute zinga mi number chu a hmet chhuak a, chu number neitu chu Romawia thiante zinga mi, Bolero khalh tu ber number a ni. A phone lo ri chu a la chhuak a, "Romawi, i u a nih hi...kha be vat rawh." a ti a. Romawia chuan phone chu la in, "Hello ka u, i tha maw?" a ti a. Minister chuan, "Ka tha e, nang i tha maw?" a ti a. Romawia chuan, "Ka tha e, ka u, mi tu emawni in min kidnap a, min sawisa a, chupa chu tunge anih ka hre duh a ni." a ti a. Minister chuan, "Ehe...tunge chupa chu..khawi hmunah nge a kidnap che?" a ti a. Romawia chuan, "RTF building hlui ah khan ka biru a, chupa chu lo kalin min rawn kidnap ringawt a ni." a ti a. Minister chuan, "Khawilai hmun nge chu chu?" a ti a. Romawia chuan, "Kha...hmana University ni thin kha..ih..buiding lai tak, mau inkhamphei ah khan scarecrow a awm bawk. Ka u..chutiang a pawimawh lo, kha mihring pa kha ka hre duh a ni." a ti khur khur a. (Scarecrow hi hre ngailo in lo awm takin...scare crow chu mihring pian ang deuh a banphara ding, milim ang deuh hi a ni a. A bikin vaimim hmunah te, buh hmunah te a awm thin. A taksa chu buhpawla hnawhpuar a ni a, thawmhnaw an haktir ve bawk thin a, sap thlahrang film velah a tam mai, ka sawifiah thiam chiahlo.) Chutia an inbiak lai chuan kawngka chu a rawn inhawng thut a, Minister leh ACP chu an phu chiang kher mai. DGP a lo ni a, Minister chuan rang takin phone chu a thutbet vat a. DGP chu lo lutin, "ACP enge i tih a?" a ti a. ACP chuan a tui bottle ken lai chu lek kang in, "Tui a in duh a...tui ka pe a." a ti ringawt a. DGP chu va kal hnaiin, "Pu Minister, i phone i thutbeh kha lo la rawh." a ti a. Minister leh ACP chu an in melh zeuh zeuh a, phone chu a pe a. DGP chuan, "ACP, hei hi i phone a ni tiraw?" a ti a. ACP chuan, "Aw ni e." ati a, hnuai lam a melh nghal a. DGP chuan, "Engzat nge a pek che? Thamna engzat nge i lak?" tiin a zawt leh a. ACP chuan, "Nuai khat." a ti tham tiak a. Chuveleh Minister chu a tho thut a, ACP pistol ah lai chu la in DGP chu kah a tum a, mahse DGP chuan a pistol chu phawrh vatin Minister luah tak chuan a kap a. Minister chu a thal tawp a, chhuata a tluk pah chuan a silai chu a hmet puak palh a, ACP banah chuan a kap hliam hram a.

DGP chuan, "Encounter shoot a ni, i ban a alo kap hman chu a tha hlauh e, self defence anga lan tir mai a ngai dawn a nih hi." a ti a. Romawia chuan, "Tinge maw ka u chu phone a dah daih le?" a ti nuah nuah a. Romawia chu a maimitchhing vang vang a, a mitthla ah chuan nichin lawka bike-a phur tu kha alo lang zawk mai a. An tlan lai khan a thi (necklace) khan Romawia hmaiah thli thawt nasat lutuk vang khan a vaw deuh chhen a. Kha thi khan locket nalh tak mai a nei a, a locket chu sakeibaknei lu lem a ni tih a hrechhuak thut mai a. Romawia chu a meng kawk a, ring zet hian, "Ding teh u.." a ti vin tuar a. Romawia chuan, "Hrep tak chuan....nichina bike-a min rawn phur tu kha min kidnap tu chu a ni." a ti a, a thiante chuan mak ti tak hian an lo en thap a. A thianpa pakhat chuan, "Thiana, mak ka ti reng a ni. Rawn phur tu che kha police a nih kha...ka lo hlau deuh hman khawp mai a." ati a. Romawia chuan, "Police a?" a ti a. A thianpa chuan, "Aw ni e, DCP Malsawmkima a nih kha." a ti a. Romawia chuan, "DCP in min kidnap amaw? Tinge min man mai loh le?" a ti nuah nuah a. Romawia bawk chuan, "Tlan leh zel phawt ang....police pawh ni se, min kidnap tupa ngei kha a ni a, ka that tho tho ang." a ti pang pang a. Tih ngaihna hrelo tak chuan a bike bulah chuan NAthana chu a ding reng a, a hnung atang chuan tu emawni hian a rawn vuan thut a, a phu nasa lutuk chu a t(r)e thawt hial a. Hnunglam a hawi chu Angeli alo ni a, "Awi...ka nuih a za lutuk, i van hlau em em." a ti a, a nui huah huah a. NAthana chu a thinrim kher mai, "Enge hetah i lo kal?" a ti vin hlur mai a. Angeli chuan, "Thil hrilh duh ceh ka nei a, tinge i bike chu?" a ti a. Nathana chuan, "I hriat ve zel angai lo, enge i sawi duh chu?" a ti a. Angeli chuan, "Englo ania, ihmaw...Nathan, ka hmangaih ceh tih hrilh tur che in ka lo kal a, ka zawng char char che a, hetah ka hmu thut che a, ka zep reng thei tawh lo, ka lo hrilh tawp che a ni." a ti a. Nathana chuan vin zet hian, "Hmangaihna a? Hmangaihna hrethiam rual pawh ila nilo...chubakah nanghian min hmangaih mahla keichuan ka hmangaih ve lo che. Ka buai, min tibuai tawh suh. Tinge ka kalna apiangah min zui? Hmangaihna hmangaihna tih vel sawi hun pawh anilo..kal rawh, kabo rawh...ninawm lutuk." a ti ta hrep mai a. Angeli rilru na lutuk chu a tap ta fap fap mai a, "Awle, ka kalbo ang...mahse, hei hi min chhang rawh...tinge min hmangaih ve loh? I duhzawng ka nilo em ni? Ka hmuhtirh atang che khan ka hmangaih che asin, police i ni tih pawh ka hria, mahse i hmel hmulo chuan ka awm theilo ani, ka mitthla ah ilo lang zel si a....tinge min duh ve loh?" a ti a. NAthana chuan vin tak hian, "Ava ninawm tak....Angel, naupang mai ila nih hi, ka hmangaih theilo che...nupui ka nei tawh....nupui ka nei tawh, i hrethiam em? Minlo zui tawh suh, haw tawh rawh." tih pah chuan a kalsan daih mai a. Angeli chu a tap nasa ngei mai, mite chuan an en thup a, a zak bawk si, a rilru na bawk si chu kun ngawih ngawih in a haw ve ta a. Zanah chuan Nathana chu a mu hleithei thak lo, Romawia vang chu ni tho mahse, tlai lama amah lo ngaizawng ve em em tu, amah lo atchilh em em tu, tleirawl innocent tak leh la naupang tak mai Angeli khatia khawlaia a vin hrep kha a inchhir a ni. A rilru a nuam thei thlawt lo chu a bula mu a nupui Sanvi chu a kaitho ta ringawt a, SAnvi bulah chuan Angeli a tawn dan leh Angeli'n a hmangaih em em thu te, a zar buai thin thute leh tlai a rawn haw hma a, khawlai a mipui ten an en thup laia a vin vak thu te chu a hrilh ta a. Sanvi lah mifel leh zaidam tih takah dam thlup hian, "Amak e duhtak, i thinchhe thei lutuk a...a tir atang khan nupui i neih tawh thu sawi mai la tha tur a nia." a ti a.

Chutia an inbiak lai chuan a phone a rawn ri a, Angeli message a lo ni. Message chu a chhiar a, "Nathan, min ngaidam rawh aw...nupui i nei tawh tih kha a hma daih khan lo sawi la chu khatiang khan ka awm miah lovang. Ka tihpalh ani Nathan, ka hmangaih em che a, awmngaihna pawh ka hrelo a ni. I nupui bulah pawh khan ngaihdam minlo dil sak dawnnia aw...ka hmangaih che, ka kalbo ang, min hmu leh tawh miahlo ang. Hlim reng ang che u...mangtha." tih hi alo ni a. Sanvi chuan, "A khawngaihthlak emai, Nathan...call la, ngaihdam dil rawh." a ti a. Nathana chu a ngawi vang vang a, "Zan a rei tawh emai, naktuk zingah an inah ka va kal zawk ange." a ti a, tichuan an mu ta a. Atukah chuan Angeli college kal tur bus lo chang mek chu Romawia te thianho chuan kil khat atang chuan anlo thlir reng a, an thian zinga pakhat chuan, "Romawi, sawnu saw hmanniah DCP Nathana nena an inbe lai ka hmu a ni." a ti a. Romawia chuan, "Enga? I chiang maw?" ati a. A thianpa chuan, "Aw..an inbia alawm, sawnu sawn a nel hmel em em lehnghal..a bialnu a niang." a ti a. An thian zinga pakhat leh chuan, "Mahse...Nathana te chuan nupui a neih kha...Tamil nula an ti lehnghalin ka hria, chhelo zet mai nupui a nei alawm." a lo ti ve bawk a. Romawia chuan, "Nupui a neih leh neihloh a pawimawh lo, NAthana nena an inbiak a an nui dun vel anih chuan an inhria tihna a nimai, man nghal ang u." a ti a. An motor chu Angeli awmna zawnah chuan an va khalh phei a, Angeli chu motor chhungah chuan an pawt lut a, an tlanpui ta daih mai a. Nathana chu ala mutui ngei mai, Sanvi chuan a rawn kai tho a, "Duhtak, tho tawh rawh..Angeli ngaihdam dil turin an inah i va kal dawn kha..." a ti a, peihlo tak chuan a tho chhuak a. Angeli te inlam a pan lai chuan a phoen a rawn ri a, "Hello?" a han ti chu phone ami chuan, "Minla hria em? Romawia ka nih hi...i kidnap kha." a rawn ti ta mai a. NAthana chuan motor chu tiding vatin, "Khawnge i awm?" a ti vin tuar a. Romawia chuan, "Angeli tih hmingpu i hre ngai em?" a ti a. Nathana chu a phu zuk a, a ngawi vang vang a. Romawia chuan, "I hriat hnu a ni ngei ang tiraw? Hei kan bulah a awm ania, i awmna kan zawt a, ka hmangaih a, a tan chuan thih pawh ka huam...te ti vel a, ka nuih aza lutuk. A hming pawh min hrilh duhlova, a ID card atangin kan hre ta a nih hi." a rawn ti ham ham a. Nathana chuan, "Khawnge in awm? Angeli kha lo khawihna suh u, kalo kal ang." a ti a. Romawia chuan, "Ka hrelo le, ka thinrimna hi a reh mai dawn lo bawk si a, ka that hman maithei a ni. Ummm...tihdan ka hria e, min kidnap-na hmun ah ngei khan ka thukru ve anga, lo zawng ta che." a ti a. Nathana chuan phone chu dah nghalin RTF building lam chu a pan nghal a. Angeli chu building lai tak, chhawng 5na-a mau inkham phei ah chuan scarecrow angin scarecrow thawmhnaw an hak tir a, a ka chhungah puan an hnawh a. a ke chuan mau inkham phei chu an rah tir a, a kut erawh scarecrow angin ban an phar tir a, mau ah chuan hruiin an phuar hnan a. Nathana chuan building chu a thleng a, Angeli chu a ko vak vak a. Angeli chuan NAthana chu a hmu reng a, a zawngkual lai pawh a hmu reng. Mahse an phuar nghet em a, a che theilo. A chau tawh hle a, a tui a hal a, nisa lutuk chu a rui deuh bawk nen, a lu a hai em em bawk a. Angeli chu a theihtawp chuan a tal vak vak a, mahse a chauh tawh em avang leh a awmna a san em avang chuan a tlak a hlau ve bawk si nen, a che hleithei lo. A tap zawih zawih a, a rilru cuan, "Ka hria a ni, ilo kal ngei dawn tih hi ka hria a ni. Nathan, ka hmangaih che, ka ta ni dawnlo mahla ka hmangaih che." a ti lawm lawm a. Nathana chuan Angeli chu a zawn hmuh tak siloh avang chuan Romawia'n a tihderh kual mai mai anih ringin a kal leh daih a, Angeli chuan a rilru chuan, "Nilo Nathan, heta hi ka awm alawm, min kalsan suh, ka thi mai ang...NAthan lo let rawh." a ti lawm lawm a.

NAthana chu motorah a lut a, chak takin a tlan a, a phone a rawn ri a, Romawia a lo ni a. Romawia chuan, "I hmu nange? I hmu lovang, min thukruk ang bawk khan hmun biru takah ka thukru ve alawm. Enteh, in DGP in ka u a kaphlum tih pawh ka hre vek tawh...chhungte an thih a a nat zia i hre ve dawn khawp mai." tih pah chuan phone chu a dah a. Nathana chuan, "A thil sawi awmzia kha.....eheeee....SANVI...a nitheilo." tih pah chuan rang takin an inlam a pan nghal vat a. Romawia te thianho chuan NAthana in lam an pan a, in an han lut chiah chu Nathana chu thutthlengah a lo thu leh vang tawh mai a. Romawia chuan, "Minlo thlen khalh a nimaw? I inchhungah ngei hian kan that teh ang che." a ti khur khur a. Nathana chu a ding a, "Tumah hi ka chhuah dawnlo che u." a ti a. Kawngka bul atang chuan Sanvi chuan, "Kei chu ka rai bawk si a, ka che tha theilo palh ang. Duhtak, nangmahin i hneh thei mai angem?" a rawn ti lauh lauh a. NAthana chuan alo nuih sak a, Sanvi chuan kawngka chu a khar a, a khalh hnan ta a. Romawia chuan zawite hian, "Mizo tawng avan thiam em em!" a ti sup a. Chuveleh NAthana chuan a rawn tlawh thal tawp mai a, a thiante dang pawh chu na tak tak chuan a sawisa hlawm a, Romawia tihloh chu an ke ruh leh kut ruh a tih tliah sak vek a. Romawia chuan thi hnuang chung chuan, "I la chak chuanglo ania, Angeli hi khawnge a awm i la hrelo...kha building ah kha chuan a awm ngei alawm, mahse khawi lai takah nge ka dah i hre lo." a ti ham ham a. Nathana chuan, "Chumi min hrilh tur chuan alawm kalo nghah che, lokal rawh le." tih pah chuan a tham tho lawp a, motor ah chuan a hnuk lut a. A kal hma chuan Sanvi bulah chuan, "Duhtak, SI Liantea alo thleng tep e, khang hmelchhe ho kha a rawn man vek dawn a, minlo nghak rawh aw...ka reilo ang." tih pah chuan chak tak chuan a tlan a. Building chu an thleng a, motor atang chuan NAthana chuan Romawia chu a hnuk chhuak a, a pet vak vak a. Nathana chuan, "Sawi rawh..khawnge a awm?" tih pah chuan dim lo tak hian Romawia chu a chhuih vak vak a. Romawia lah chu a nui vak vak a, "Min sawisa rawh, ka sawi dawn chuanglo." a ti a. An thawm chu hria in Angeli muhil pawh a lo harh leh a, Nathana aw a hria chu a lawm kher mai. Hnuailam a zu melh a, NAthana a hmuh chuan a dam sawng sawng thei hialin a inhria a, a theihtawp chuan a mau rah lai chu a ti che a. Nathana chuan ROmawia chu a hnek vak vak a, "Sawi rawh anih loh chuan ka that ang che." a ti vin vak vak a. Romawia chuan, "I duh tawkin min sawisa rawh, Angeli chu a thi tawh angah ngai mai rawh." a ti a. Nathana pawh a tap pur tawh mai a, Angeli a ngaihtuah bawk si. Angeli chuan thih leh thih tiin a rah lai mau inkhamphei chu theihtawp chuan a rap vak a, a rap tla ta. Nathana leh Romawia te inkarah tak chuan a rawn tla a, chuveleh rang takin an hawi chho dun a. Nathana chuan Angeli lo uai tang chu a hmu a, rang lutkin Romawia chu a hnek pawp a, a thal tawp a. Inchungah chho nghalin Angeli awmna floor ah chuan a han kal chho a, mau chu thiam takina zawh phei den den a, Angeli an phuarna chu a pehl a, amah chu mau ah chuan uaiin Angeli chu a pawm a. Tichuan Angeli bulah chuan, "Angel, ka pistol hi phawrh la, mau hmawrah sawn kap rawh le." a ti a. Angeli chuan, "Aih, ka hlau, ka thiamlo ang." a ti khur dar dar a. Nathana chuan, "I thiam ang, min hmangaih pawh i thiam kha...khawngain, han tum chhin tal teh." a ti a. Angeli chuan, "A in anglo e, thidun mai ang." a ti tham tiak a. NAthana chuan, "Angel, min hmangaih tak tak chuan ka thusaiw awih rawh, silai hi phawrh la, mau hmawr saw kap rawh le." a ti a. Angeli chuan huphurh tak chu chuan Nathana pistol chu harsa takin a phawi a, mau hmawr a hrui inthlungbey chu a tin vang vang a, tichuan a kap risk ta pawp mai a. An vannei hle mai, hruaiah tak chuan a kap fuh a. Mau int(r)awnna lai chu a kap chat ta a, mau chu a uai duai duai a, NAthana te pawh an awn ruai ruai a, mahse Nathana chuan Building pindan pakhatah chuan ANgeli chu nghet takin a pawm a, a zuan luhpui thei ta hram a.

Angeli scarecrow thawmhnaw chu phelhsakin buhpawl an lo hnawh te chu a tihfai sak a, Angeli chuan Nathana chu a kuah ngawih ngawih a. Tichuan Nathana chuan Angeli chu a pawm a, inhnuai lamah a chhuk pui ta a. Motor lam an pan dawn chiah chuan bang phen atang chuan thingtum nen Romawia a lo lang thut a, Nathana vuak a tum chiah chu silai a puak dur a, Romawia chu a thal tawp mai. Amandai leh SI Liantea leh Sanvi te anlo ni a, Liantea chuan, "Sir, kan lo buaipui tawh ange, Angeli kha damdawiinah va hruai vat ru." a ti a. Angeli chu a chhuk a, Sanvi chu a en vang vang a, "Ka lawm e aw, i pasal vang liau liau in ka him a ni a. Chuan i pasal ka lo ngaizawng a, ka tihpalh. I vannei hle mai, hei ai hian lo upa ve deuhhlek ila tha tur." a ti a, a nui suk a. Nathana chuan, "Angel...t(r)alh t(r)alh a che, khatiang sawi a hun tawh lo." a lo ti khur khur a. Sanvi chuan Angeli chu a kuah a, "Awii...bawihi, i lawmawm reuh emai, anih chuan kan int(r)awm mai dawn mi?" a han ti vel a, Amandai chu a lo nui suk a. Tichuan an vai chuan hlim takin an nui dar dar a, Angeli chu Hospital lam an pan pui ta a. Romawia ruang pawh chu SI Liantea leh constable te chuan an phur liam ta a.

THE END