NATHAN SEASON-2 (Episode-12) TIT FOR TAT (Part-1) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-2 (Episode-12) TIT FOR TAT (Part-1) by:Aaron Malsawmdawngzuala

Unread post by Aaron Dustin » April 10th, 2020, 10:14 pm

NATHAN SEASON-2 (Episode-12)

TIT FOR TAT (Part-1)

Written by : Aaron Malsawmdawngzuala


India rama DON lian ber pawl leh India ngaihven em em , INDIA'S BIGGEST CRIMINAL tih hiala an lo sawi thin Javed Ibrahim Khan hi kum 50 mi niin Muslim a ni a, fanu kum 24 mi Alia Khan a nei bawk a, fanu mal a ni. Alia Khan hi ft 5'9 laia sang niin hmeltha leh pian nalh zet mai, vun ngo tak leh mitmeng hring nghulh mai a ni a. Javed hian nupui 10 chuang a nei tawh a, Brazilian mi te, American te, Indian mi te leh South Korean mi te thlengin nupui hi a nei lawr teuh a ni. Alia hi Javed-a nupui hnuhnung ber Andriana Collins nena an fanu mal neihchhun a ni a, Andriana erawh cancer natna avangin a thi tawh a ni. Javed hian mak tak maiin fa hi Alia chiah a la nei a, a nupui hmasa te ho lakah khan fa a nei miahlo thung. Javed hi Indian police ten an zawng mek a, mahse awlsam taka an hmuh mai chu a rinawmloh thung. Achhan chu Javed hi Spain rama thliarkar pakhat Tinerife-ah a biru mek a, a nihna takah chuan biru pawh a ni lem lo, nuamsa takin a awm a ni ber mai. A tana thawk hi an tam em em a, Indian Politician tamtak te zingah pawh hian a rukin thawpui a nei nual a ni. Chung politician a thawhpui te zinga a rin ber leh a kawmngeih ber chu Telangana Home Minister Krishna Murali a ni. Murali hian Javed-a zawn leh man ngei a tum thu te, hma alak mek thute hi Media hmaah te, Press mite hmaah te a sawi cham chi thin a, mahse information zawng zawng te hi a rukin Javeda hi a hrilh leh vek zel a ni. Zan khat chu Javed-a te thianho leh a fanu Alia-i te thianho chuan Javed-a birthday an lawm a, an zai nasa mai a, nuam an ti hlawm hle mai. Javeda naute zinga pakhat chuan Javeda chu ko hrangin, "Boss, kan mi leh sate zingah hian cricketer pakhat a awm a, Spain tan hian a khel mek a ni. Kan mi leh sate zinga mi a ni tih hi Indian police ten an hre tawh a, news velah pawh a darh nasa khawp mai. An man a, an dawp a nih vaih chuan kan awmna hmun hi a hrilh anga, tunge i nih tih hi hailan a ni thuai ang." a ti a. Javeda chuan, "Khawiah nge amah chu a awm?" a ti a. Chupa chuan, "Hotel Marina-ah, Barcelona ah." a ti a. Javeda chuan, "Police te chuan an la man lo a, an la ringhlel chauh tihna a ni. Kan kawng dal tu leh tibuai thei tu a ni dawn tlat, that rawh u. Kan mi leh sate zinga mi pawh nise, kan sumdawnna kawng a tihbuai dawn ai chuan that mai ru. Barcelona-a kan mi leh sate kha phone ula, naktuk zingah a thih thu hi news ah ka ngaithla hman ngei tur a ni." a ti a. Javeda sawi ang ngei chuan a tuk zingah chuan chu cricketer chu a hotel thlenna roomah thi a hmuh a ni a, kah hluma ni tih pawh nemngheh a ni. Javeda hi misual tak chu ni mahse, a fanu hi a hmangaih a, a chhuang em em a. A duat em em bawk a, a duh apiang a tihsak thin. Tinerife Island-ah hian kum 10 chuang chu an awm tawh a, Spain ah pawh hian Javed hi a hausa ber pawl a ni a, amah hi Underworl DON ni mahse pa zahawm tak hmel hi a pu reuh lehnghal a, company pawh ram hrang hrang ah a nei ngah hle. Indian mipuite hian Javed-a hmel hi a tlangval lai, jail atanga a tlanchhuah lai tihloh kha chu an hmu leh tawh lo hrim hrim a, Spain ah erawh hi chuan misual a ni tih an hre miau lova, thawhpui pawh tamtak a nei a ni. Zankhat chu Javeda fanu Alia leh a thiannu Sofia te chuan Street Fight an en ve a, hmuhnawm pawh an ti dun hle mai. Chu Street Fight an en mek ah chuan a champion lai chu Peter a ni a, palian tak leh sek zet mai, a hmel en pawh a tharum ngah leh chak tih hriat em em mai hi a ni a. Hemi zan ringawt hian mi 5 lai chu a knockout tawh a, challenger thar a zawng mek zel a ni. Announcer chuan, "Petera cho ngam in awm chuan fighter te zingah khan in ke rawn pen chhuak ru le...kan awm em?" tiin a au a. Mipui te chuan Petera chu lawmin an au dur dur a, pawisa pawh an bet hnem hle.


Chutah challenger parukna ni turin mipakhat a lo penchhuak ta, jumper a rawn ha a, jumper lukhum chu a khum tlat bawk a. Ring chhungah chuan a rawn lut a, a jumper zipper chu phelhin a six pack mawi tak leh nalh em em mai chu a rawn lang ta. Mipui chu an au dur dur a, chuveleh a rawn hawi chhuak a, mipa hmeltha tak a ni. Ft 6'1 vela sang a ni a, a mitmeng te chu a pawl ra mai a, a nuih pah chuan a biangsum a lang leh deuh zeuh zel bawk a. Announcer chuan va pan hnaiin, "Tunge i hming le?" a ti a, chupa chuan, "Ram...Abhiram." tih ringawt hian alo chhang a. Announcer chuan, "Khawi ram atanga lo kal nge i nih?" a ti leh a. Ram chuan, "India..Hyderabad atanga lo kal ka ni." a ti leh a. Alia te thiandun chuan mak an ti em em a, Sofia-i chuan, "A van mak em em, Thai mi emaw, Japanese mi anih ka lo ring a, a hmel en reng reng sawn Indian mi a anglo e." a ti nuah nuah a. Alia chuan nui sak chung chuan, "Hmmh, North-East mi a ni maithei asin. Hyderabad ah a awm te pawh a ni thei a, mak ti duh suh." a lo ti a. Sofia chuan, "Bet ve ila, keichu Indian pa sawn ka tan e." a ti a. Alia chuan, "Keichu ka tan lo, ka eilo tawp. A confi sual dawn chiang alawm, Petera hi tuman an la hneh ngailo." a ti nuah nuah a. Chutah an insual ta a le...Abhiram chuan Peter-a chu nasa takin a sawisa a, Petera chuan hneh lo tak a ni. A ha a hnek bal sak nual tawh mai a, Petera pawh chu a chau tawh kher mai. Chiang em em hian vawikhat a'n hnek leh pawp a, Petera chu a thal tawp mai. Announcer chuan, "I tlawm em?" tiin Petera chu a zawt a, Ram-a chu intithei takin a hawi kual a, chutah Alia-i chu ava hmufuh ta. Ram chuan Alia-i chu a en a, ring tak hian, "Hey...khalaia Indian nula kha, tunge i hming?" tiin a au ta vak vak mai a. Chuveleh Petera a rawn tho thut a, Ram-a nakah chuan a rawn hnek pawp mai a, Ram chuan, "Khanglang chuan, nula ka bem mek a nih hi, lo nghak ve phawt la mawle." tih pah chuan a theh thal leh ta tawp mai a. Alia-i lam bawk chu ava en leh a, "Mawwhh, tunge i hming ka tih chu?" a rawn ti leh a, Alia-i chuan, "Engtin nge Telugu tawng a thiam a? A hmel en sawn South Indian chu a ni lo chiang a, mahse Telugu tawng a thiam tlat, avan mak em em." a ti nuah nuah a. Sofia chuan, "Aww...Hyderabad ah ka awm a tih kha...saw a zawh mawlh mawlh che saw, chhang ta che.." a ti a, a nuih tut tut a. Alia-i chuan, "A zaklo emai, kal teh ang." a ti a, an kal ta daih a. Abhiram chuan lungawilo leh thinrim zet hian, "Khai, an kal daih mawle....nangmah vang vek.." tih nuah nuah pah chuan Petera chu a tham tho a, a hnek hrep a, Petera chu a tlawm ta. Atuk zingah chuan Javed-a chu lui kamah thu in India-a a thianpa, a ruka amah pui thintu, Telangana Home Minister Krishna Murali chu a phone a.


"Hello, thianpa, enge chanchin?"

"Eee....Javed, lo lungngai suh, engkim ka buaipui vek mai ang."

"A tha e, min chhui tute chuan hma an sawn zel em?"

"Khai khai, ka bum kual hneh lutuk. Reporter thenkhat ho hian min ringhlel ve khanglang a, ka'n hauh hrep kha."

"A that nasat chu, taka thianpa, high school kan kal lai a kan zuk ruk thin kha ila hria em, Kareem Beedi (Vai meizial biri) kha?"

"Aw..hria e, tinge?"

"Tunlai chu ka zu chak riau mai, minlo thawn teh a."

"Enge maw i sawi le Javed, millionaire i ni a, cigar hlir i zu thin ang chu tih laiin beedi mai mai i zuk duh thu ilo sawi mai le?"

"Cigar hi chu a strong mah mah a ni, ka lu a hai vek zel. Beedi hi chu hausa viau mah ila, ka lung te pawh a tileng alawm. Ka zuklohna a rei tawh emai, lo thawn vat rawh aw, pack 20 vel?"

"Uang uang lo teh Javed, Beedi te chu Auto Driver te mai mai pawn an zu duh tawhlo ania, ka dah phawt ange, nih aw."

Javed-a chuan, "Ka fiamthulo asin mawle, beedi zuk lohna a rei tawh emai, kum 10 chuang a ni tawh, ka chak thar thut mai." a ti nuah nuah a. A fanu Alia-i alo kal a, "Pa, tawngtai a hun ania, kan kal dawn em ni?" a rawn ti a. Javed-a chuan, "Ani tak maw? Kal ila.." tiin an chhuak ta a. Javed-a te pafa hi zing tin lui ah kalin an tawngtai dun thin a, an tawngtai apiang hian Alia-i hian hijab (muslim hmeichhe ho lu tuamna) dum hi a lu a tuam thin a, Javed-a pawhin lukhum var (muslim mipa ho khum thin) chu a khum thin bawk a ni. An tawngtai zawh chuan lui kamah chuan an pafa chuan an thu dun a, an sirah chuan a kid-te chuan motor bulah an lo nghak thin a ni. Javed-a chuan a fanu bulah chuan, "Bawihi, i nula ve tawh a, bialpa te i nei ve lo em ni? I duhzawng te sawi la, i duh ber ka neih tir ang che." a ti a. Alia-i chuan, "Duhzawng ka la nei hrihlo ka pa, chubakah ka duh zawng ang hi chu an awm thei lovang." a ti a. Javeda chuan, "Engvangi maw?" a ti a. Alia-i chuan, "Achhan chu ka bialpa tur chu mi bawn tak leh rapthlak tak a ni tur a ni. Nangmah ang maia fing leh chak, nag tehmeuh pawhina i hlauh tur khawpa mi huaisen ka duh a ni." a ti a. Javeda chu a nui huah huah a, a kid-te bulah chuan a va phei a, "Ngaithla teh u, ka fanu hian min chhun takzet a ni. A bialpa tura a duh chu kei ai pawha sual, keimah pawhina ka hlauh tur a duh a nih chu." a ti a, an nui ho dar dar a. Chhunah chuan Alia-i chu a thiannu Sofia-i nen chuan car-in an leng chhuak a, khawlai a reh in boruak pawh a nuam hle a. Kawngsira lo insual an awm avang chuan car chu an tiding a, Spanish tlangval hovin tu emaw ni hi an sual rawn alo ni a. Alia-i te chuan an sual rawn bera chu tunge a nih tih hriat tuma an han en chian chuan a hma zana Street Fight-a champion thar, Abhiram-a ngei kha a lo ni. Ram chuan chung tlangval ho chu a sawisa let hrep hlawm mai a, a sawisak pah chuan Telugu tawng tho hian, "Min rawk te in tum vel amaw? Khanglang che u hian, khawnge ka han rawk zawk teh ang che u." tih pah chuan an wallet leh sana te, an zungbun te chu a laksak vek a. Motor lam a hawi phei a, Alia-i a hmu thut chu nui vur vurin, "Hey, ka zawng reng che asin, tunge i hming?" tih pah chuan ava pan hnai a. Alia-i chuan min khap miahlo hian alo en reng a, Ram chuan motor tukverh bulah chuan zu kunhniamin chiang tak hian Alia-i chu a en a, "Tunge i hming? Indian i ni tiraw?" a ti a. Alia-i chuan, "Alia Khan." tih ringawt hian a chhang a. Ram chuan, "Heibak chu inhmu tawh lovang, a nih loh chuan...ka hmuh leh che chuan ka kiss duh mai ang che." a ti a, a kalsan daih a. Alia-i chu a thinrim ngei mai, "Ve mai mai a, Javed Ibramhim-a fanu hi tikhan min chhai vel ngam maw? A la hre khawp ang, a hre khawp ang." a ti tun tun mai a. Chumi tlai chuan Javed-a pawh amah in a fanu nena an tawngtai thinna ah chuan thu in a lo inngaihtuah vauh vauh mai a. A bul deuh lawkah chuan Abhirama tlailam exer la pawh a hah deuh tawh vang chuan a lo thu thlan hluam mai a, a ipte atang chuan beedi aphawrh a, zuk khuk luih luih pah chuan, "Kan ram Indian beedi tluk hi chu a awm lo a ni." a ti nuah nuah a. A tawng ri chu Javed-a chuan a lo hria a, beedi rim zawng zawng nen chuan a lung a ti leng ta em em mai a. Ram-a bulah chuan va kal hnaiin, "Ehe, Indian mi ami i nih a? Kha..beedi em ni i zuk kha?" a han ti a. Ram-a chuan, "Um..Kareem beedi a nih hi. I zu ve duh em ni?" a ti a. Javed-a lawm lutuk chu a nui vur vur a, phur takin Ram-a bulah chuan a va thu a, Ram-a chuan tlawn khat alo pe ve a. Javed chuan a zu ve ta a, a maimitchhing vang vang a, "A va han tui hliah hliah tak em.." a ti vawng vawng a. Ram chuan, "Ka pu, enge i tih thin a?" a ti a. Javed-a chuan, "Helai ah hian lodge ka nei a, room 20 vel chu a awm ve a. Ka lung a leng deuh bawk nen, beedi ka zu chak bawk si, ka tei kual mai mai a, ilo kal hlauh chu ka va lawm tak em." a ti mawlh mawlh a.


Ram chuan, "I van hausa si ve, mahse beedi i chak em em chu ania." a ti a. Javed-a chuan, "Anih nang enge i tih thin a?" tiin a zawt a. Ram chuan, "Street Fight ah hian ka tel ve thin a, sum thawhchhuah hi a har khawp mai." a ti a. Javed chuan, "Ngaihzawng te i nei lo em ni?" a ti a. Ram chuan, "Nei ve thin a, mahse Spain-a ka lo kal hnu hi chuan ngaihzawng ka nei tawh lo. Duh deuh mai chu ka nei a, mahse min duh ve lo." a ti a. Javed chuan nuih huah huah pah chuan, "Sum neihdan tha deuh ka hria asin." a ti a. Ram chu phur takin a thu tha sauh sauh a, "Min hrilh teh ka pu.." a ti a. Javed chuan, "Mi hausa tam tak an awm a, fanu hmeltha tak tak an nei hlawm bawk a. I duh chuan ka hmelhriat te pawh ka lo sawi pui ang che, an fanu te chu han ngaizawng la, an then theih tawhloh nan che han rai keuh bawk la, hnathawh ngailovin i hausa der a nimai." a ti a. Ram chuan, "Mi hausa fanu a ni tih chu ka hria, tuna ka chhai mek pawh hi e, chhelo tak a ni." a ti a. Javed chuan, "I hmel en hian South Indian mi i nilo tih chu a chiang a, mahse engtin nge Telugu tawng i thiam em em a?" a ti a. Ram chuan, "Hyderabad ah ka seilian alawm, Tamil, Kannada, Malayalam leh Hindi thleng pawh ka thiam vek mawle." a ti a. Javed chuan, "I ropui hle mai....taka, beedi hi ila nei tam em, to deuhin ka lo leisak ang che." a ti a. Ram chuan, "Inah ka dah a, tlawn khat chiah hi ka ak tawh, khaa...nei rawh. Naktuk tlaiah tah hian inhmu leh ila, kan indawr dawnnia." a ti a, tichuan an inthlah liam ta a. Atukah chuan party naah Alia-i leh Sofia-i te chu an kal a, an lam nasa khawp mai. Chutia Alia-i a lam hawh hawh lai chuan hnunglam atangin tu emawni hian a biangah a rawn kiss thut mai a, a phu chiang kher mai. A han hawi chiah chu Ram-a bawk a lo ni a, thinrim tak hian, "Hmela, enge min zui reng a, engvanga min fawp ngam nge i nih?" a ti khur khur a. Ram chuan, "Ka sawi tawh kha, ka hmuh leh che chuan ka insum zo lo ka kiss palh ang che ka ti mawlh malwh a, tinge ka kalna ah zel ilo kal?" a la ti zawk zui a. Thinrim tak hian Alia-i chuan Ram-a chu pawn lamah a kai chhuak dawr dawr a, thinrim tak hian, "Ngaithla teh Hmela, min tibuai a, min chhaih mai mai tur i nilo asin. Ka pa in a hriat vaih chuan i thi ngei ang, a chhuah hauh lovang che." a ti a. Ram chuan, "Tunge i pa chu?" a ti a. Alia chuan, "Ka pa hi tunge a nih i hrelo a ni. Underworld DON Javed Ibrahim...Javed Ibrahima fanu ka nih hi." a ti vak vak a. Ram chuan, "Tunge chupa chu?" a ti hu a. Alia chuan mak ti tak hian, "Javed Ibrahim hi i hrelo amaw?" a ti a. Ram chuan, "Hre lo, enge a hlauhawm vak na?" alo la ti zui a. Alia-i chuan, "Ka lak atang hian i inthiarfihlim vatloh chuan ka pa ka phone anga, a rawn that khawp ang che." a ti a. Ram chuan, "Eheu, ava bawn awm ve. Phone ta che...ka lo nghak ang, enge a tih theih chu kan en ang chu." a ti ham ham a. Alia-i chuan a phone a phawrh a..

"Hello, ka pa?"

"Enge bawihi?"

"Ka pa, buaina ka tawk a ni."

"Enga? Miin an tibuai che em ni?"

"Aw...hei ka bulah hian a awm reng?"

"Anih chuan lo hrilh rawh, that turin i pa Javed Ibrahim ka lo kal mek a ni tih lo hrilh rawh."
Phone chu a dah a, Alia-i chuan, "Lo ngai reng rawh...i chak dawn lo khawp mai." a ti khur khur a. Javed-a lo nghah pah chuan Ram chuan uluk em em hian nui sang chung chuan Alia-i chu a en vung vung a, Alia-i lah chuan rum zet hian a melh reng bawk a. Alia-i phone alo ri a, "Hello? Ka pa, ilo kal em?" a ti a. Javed chuan, "Bawihi, tunah khan haw nghal rawh." a rawn ti ta daih mai a. Alia chuan, "Enge awmzia? Tunah pawh ka bulah a la ding reng a nia.." a ti a. Javeda chuan, "Nakinah ka buaipui mai ang...tunah chuan haw phawt rawh." a ti a. Alia-i chuan mak ti tak hian, "Tinge ka pa? I va hlauhthawn hmel ve?" a ti a. Javed-a chuan, "Ka sumdawnna a ka pawisa min chuhpui tum tuten min rawn attack thut a, ka let leh angai a ni." a ti a. Alia-i chu hmanhmawh tak chuan a tlan ta daih mai a, Ram chuan, "Hey, Alia...tinge i kal daih? Javed Ibrahim-a fanu chu i ni tak tak lo em ni?" tiin a au zui lawm lawm a. Alia-i chu hmanhmawh takin inah a haw a, apa bulah chuan, "Pa..i tha maw?" a ti a. Javed chuan, "Ka tha e...bawihte, chu mihring chu tunge a nih?" a ti a. Alia-i chuan, "Ihmaw pa, a zaktheilo lutuk. Ihh...a hmel chu a chhe lo, hmeltha tak a ni. Mahse a mizia hawr hawr kha ka eiloh mai bakah min zahlo lutuk kha ka hua a ni." a ti a. Javed-a chuan, "Ka fanu lo tibuai tu chu ka that khawp ang, tunge a hming?" a ti a. Alia-i chuan, "Ram tih a ni in ka hria, a hmingpum kha ka theihghilh tawh a. Chuan maw pa, vawiin ah party naah a lo kal ve a, ka biangah a rawn kiss mawle." a ti a, Javeda chu a thinrim kher mai. Dawhkan chum bur pah chuan, "I biangah a kiss ngam amaw, a hmui chu ka tan sak ngei ngei ang." a ti khur khur mai a. Tichuan choka lamah an phei a, Javed-a chuan, "Bawihi, naktuk hian Persian mi pakhat a lo kal dawn a, ka inhmelhriat tir ang che u. Tha taka biak tur a nia, i duhzawng a nih phei chuan an hausa bawk a, in inneih pawh ka phal nghal ang." a ti a. Alia-i chuan, "A hmel te hmu ve phawt ila, kan la hria ang chu." a ti a. Tlai alo ni a, Abhiram leh Javed te pawh chu lui bulah chuan an inhmu leh a, beedi te chu an zu dun leh ta a. Javed chuan, "Ka tawng hlauh che chu ka vannei mange aw, ka zuk chak em em beedi ilo nei hlauh lehnghal a. E taka, i nula chhai mek chu enge in an zel?" a ti a. Ram chuan, "Min duh ve thlawt lo a ni, a pa a chhuang em em lehnghal...ka pa in a that che a nimai, a ti vak vak a." a ti a. Javed chuan, "Ve mai mai a, tunge a pa chu? Keipawh hi ka duh chuan misual tak ka nih hi, a pa chu kan sawisa deuh dawn em ni? Tunge a hming?" a ti a. Ram chuan "Ka hre tawh lo, a ho emai. Pawisa a thlem dawn lahin pawisa ka nei ve der silo a, engtia han bemthluk tur nge ni ang pawh ka hrethiam biklo." a ti nuah nuah a. Javed chuan, "Pawisa hmanga bem a ngai lo, pawisa te chu an nei tam lutuk, an mamawh lo. Tawngkam a ngai, zei angai, i hrethiam em?" a ti a. Ram chuan, "Thu leh hla hi ka thiam ve vak lova, min lo zirtir teh." a ti a. Javed chuan, "Ka fanu hringtu nu, ka nupui hnuhnung ber Andriana-i ka bem thlukna thu ka'n hrilh ang che aw...Kan nun theih nan nunna kan mamawh a, kan nun kan hman chhoh theih nan suangtuahna kan mamawh bawk. I nui hmel mawi tak hi ka nunna leh ka suangtuahna a ni a, he i nui hmel mawi tak hi ka hmuh reng theihna tur a nih phawt chuan ka nunna hial pawn tuar dawn mahse pawi ka tilo. Ka ta ni la...ka ta chauh ni reng ang che." a han ti vel raih raih a. Ram chuan, "Ava mawiin ava nalh em...ka apply ve dawn chiang alawm." tih pah chuan Javed-a chu a chibai lawm lawm a. Abhiram chu a haw ta a, a haw kawngah chuan a chhailaidi Alia-i a hmu leh ta tlat mai, a zui leh ta a. Alia-i chuan Ram a hmu chiah chu chak takin a kal a, bank pakhat lian tak lam chu a pan a. Bank bulah chuan security guard ho chuan Ram chu anlo dang a, Ram chuan, "Tinge min lo dan ringawt a?" a ti a. Security pakhat chuan, "Saw nula saw i zui ru tih kan hria a ni." a ti a. Ram chuan, "Ka zui lo hrim hrim...hemi bank ah hian account ka nei ve alawm." a ti a.

Alia-i chu lo pheiin, "Hetah hian account i nei ve amaw? He bank hi enge a hming pawh i hria em ni?" a ti a. Ram chuan Bank chu a melh zeuh a, "Ih...aw..Bank Of Paradise." a ti a. Alia-i chuan, "He bank neitu hi tunge a nih i hria em?" a ti leh a, Ram chuan, "Hria e....ka thianpa a nia, min duhsak lutuk asin." a ti vel a. Alia-i chuan, "He bank hi ka ta ani, ka rochun tur a ni...security, hepa hi hnawtkiang teh u." a ti a, Ram chuan, "Min khawih angailo, ka kal dawn. A tihzia khawp mai, ka nupui hual chu a hausa hle mai." ala ti ham ham zui a. A tuk ah chuan Javed-a te inah chuan Persian tlangval chu alo leng ta nghe nghe a, tlangval hmeltha tak a ni reuh lehnghal a. Alia-i pawh chuan a lo ngaina nghal em em a, hlim tak chuan an inkawm a. Chutih lai chuan Abhiram chu Alia-i te inlam pan chuan a lo kal mek a, security te hmuh loh tur chuan a vawikhat tihna ani lo tih hriat tak hian bangah chuan a lawn kai zet zet mai a. Tichuan Alia-i room tukverh ah a lut ta a, security te chuan an hmuh hman lo hlauh a ni. Tichuan Alia-i chuan, "Ka lo let leh vat ang, room ah ka han kal lawk ange, ka phone ka charge daih a, ka lo let leh ang." tiin polite takin a han ti a, tichuan room lam pan chuan a kal ta a. A room kawngka a hawng chiah chu hnunglam atang chuan Ram chuan a man thut a, a hmui a hup a, khumah a bawhbet nghal a. Ram chuan, "Ka hmangaih che ka ti mawlh mawlh a, ka duh em em che a, Persian tlangval nen inneih thu inlo sawi vel amaw? Bumhmang nu, sual lutuk mai." a ti a. Alia-i chuan a kut a benthlak sak a, a tho a, "Helai hmun atang hian chhuak nghal rawh, ka pan ahmuh che chuan a that che a nimai." a ti a. Ram chuan, "Lo kal tir rawh, i room ah hian ka lo nghak ang." a ti a. Alia-i chu thinrim takin a chhuk a, Persian pa pawh chu a lo haw dawn chiah a. Alia-i chuan, "Ka tihpalh lutuk aw, ka lo inghah tir che a." a ti a. Persian pa chuan, "A pawilove, ka hmu che chu ka lawm hle mai, kan la lengdun thin dawn nia." a ti a. Alia-i chuan, "Tehreng mai, mangtha ule." a ti a, an inthlah liam ta a. An kal chiah chu Alia-i chuan, "Pa, ka room ah alo lut ru ania." a ti a. Javeda chuan, "Engmaw lo lut, sazu maw?" a ti hu mai a. Alia-i chuan, "Nilo, kha pa kha, min zui rengtu, min tibuai tu kha.." a ti chiah chu Javeda chu a thinrim hle mai. A ding hluai a, "Javed Ibrahim-a inchhungah a lut ru ngam amaw? Security...Alia-i room ah a awm e, chho ang u." tih leh kal a rual nghal a. Alia-i room chu an han en a, mahse tumah anlo awm lo. Pawn lamah an zawng leh a, mi pakhat lo tlanchhia chu an hmu a, security te chuan an kap hlum ta a. Alia-i chu rang takin alo tlan chhuak a, "Ka pa...in thah hmain vawikhat chiah a hmel hmuh ka duh a ni." a ti a, mahse Javed-a chuan, "Bawihi, inchhungah lut rawh..a thi tawh." a ti a. Alia-i chuan tap tuau chung chuan, "Ka pa, that ru ka ti kher hleinem, tinge in thah a?" a ti a, Javed-a chuan, "Security, ka fanu saw hruai lut ru." a ti a, Alia-i chu an hruai lut a. Javed-a chuan ruang chu a en a, "Hepa hian maw ka fanu lo chhaih kual vel a?" a ti a, chu ruang chu Abhiram awzawng a nilo, an mahni lo enthla ru thin tu spy pakhat ve mai chauh a ni. Alia-i chu a tap char char a, Ram-a an that ta mai chu a inthiamloh mai bakah a lo duh ve deuh reng a ni tih pawh a inhrechhuak ta hial a. Sofia-i a lo leng a, Alia-i room ah chuan a lut a. Alia-i lo tap hawm hawm a hmuh chuan ava pan hnai a, "Tinge i tah a?" a ti a. Alia-i chuan, "An that ani, keimah vangin....a pawi emai." a ti a, a tap hawm hawm a. Sofia-i chuan, "Tu chu maw?" a ti hu a. Alia-i chuan, "Ram...Abhiram an that, alo lut ru a, an man hman a, a pawi emai, ka khawngaih lutuk." a ti a. Sofia chuan, "Enga? Abhiram maw....a thilo nasa..tun lawk khan in inbul chiaha gym ah sawn a lut lai ka hmu a ni." a ti ta mai a. Alia-i chuan, "Ala dam maw?" tih leh tlanchhuah a rual nghal a.


Gym ah chuan an va thleng ta a, Abhiram-a'n punching bag a lo hnek vak vak lai chu a va hmu a. Ram chu a lo hawi a, a rawn nui a, "Awww...ka bawihte, ilo kal ta maw..ka lo duat teh ang che." tih pah chuan a ban a phar chhuak a. Alia-i chu va tlan pheiin Ram-a hmaiah chuan a va beng siah mai a, thinrim hmel tak hian, "I mawl ami? Min tih hlauhthawn zia kha i hria em?" tih pah chuan a awmah a chum vak vak a. Ram chuan a kuah thut a, bangah chuan a nem bet a, hnai set sawtah chuan a en a, "Sawi rawh le...min duh ve tiraw? Min hmangaih ve tiraw?" a ti a. Alia-i chuan, "Ka dinhmun hian a zir lo ani, keichu tuma duh ngam ka nilo. Underworld Don misual tak fanu ka ni a, chuti chung pawha min hmangaih thei dawn anih chuan, keichu ka inring e." ati a. Ram chuan inla zei tak chuan Javed-a hrilh ang ngei chuan, "Kan nun theih nan nunna kan mamawh a, kan nun kan hman chhoh theih nan suangtuahna kan mamawh bawk. I nui hmel mawi tak hi ka nunna leh ka suangtuahna a ni a, he i nui hmel mawi tak hi ka hmuh reng theihna tur a nih phawt chuan ka nunna hial pawn tuar dawn mahse pawi ka tilo. Ka ta ni la...ka ta chauh ni reng ang che." a han ti chuai raih mai chu Alia-i chu a hmin chiang kher mai. Alia-i chuan kiss a tum a, mahse Ram chuan lo dangin, "Aih, hei chu inneih hunah chauh, tunah rih chuan bianga inkiss chauh ti hrih ang." a ti a. Alia-i chuan, "Ka va han duh tak che em..." tih pah chuan a biangah chuan a fawp a. Tichuan Ram leh Alia-i te chu an inngaizawng ta der mai, nitin an inhmu a, an induh em em a. VAwikhat chu coffee shop-ah an chawl dun a..

"Ram, i hming hi South Indian hming ani si a, mahse i hmel en hian South Indian mi i anglo bawk si a, enge awmzia?"

"Fahrah ka ni a, tunge ka nu leh pate hi ka hre lo. Fahrah run atanga lo seilian ka ni a, nu leh pa neih ve ka chak thin khawp mai."

"Keipawh ka nu hi athi tawh a, ka pa hi ka engkim ani ber mai."

"I pa chuan kan inneih hi aphal takzet ang maw?"

"Ka mipa duhzawng hi ka sawi ngailo hrim hrim a, ka duh apiang min tihsak thin. KA hmangaih che a, ka dil a nih phawt chuan a pawm em em ang che."

"Chu chu ka beisei.."

"Anih chuan Ram, khawi state atanga lo kal nge i nih?"

"Ka sawi tawh kha...Hyderabad atangin,"

"Aih, North India lam chu i ni chiang alawm, Assamese i ni tiraw? Nge Thai, Chinese, Korean, Nepali? Indian mi inilo hrim hrim tiraw?"

"Ni e, ih..englo..North East atangin, Assamese ka nia, ka hming diktak ka hrelo, fahrah runa ka awmna ten ka hming hi an phuah a."

"Anih tak chu....Ram, ka haw tawh mai ang, ka pa hian minlo call reng mai."

"Awle, anih chuan kal ila."


Alia-i chuan chumi tlai chuan apa bulah chuan, "Ka pa, Persian tlangval kha, ka duh leh lo." a ti a. Javed chuan mak ti tak hian, "I duh thu i sawi vek tawh kha...mahse a pawilo, kan cancel lehthei tho. A hrim hrimin tinge i duh leh loh thut a?" a ti a. Alia-i chuan, "Duhdang ka nei a ni, ka hmangaih em em a, ani pawn min hmangaih bawk." a ti a. Javed chuan, "Tunge a hming? Enghna nge a thawh? Khawi lam mi nge?" a ti deuh duah a. Alia-i chuan, "North East India atanga lo kal a ni a, Assamese a nia. A hming chu Abhiram a nia, Ram tiin an ko thin. Thu leh hla athiam tawp...Street Fighter a nia, abak hna a nei lemlo." a ti a. Javed chuan, "Thu leh hla a thiam e a? Street Fighter a? Engtin nge chutiang i duh a?" a ti a. Alia-i chuan, "KA duh tawp animai, ihmaw pa...min tibuai reng tu ka tih kha ania, ka lo hmangaih reng alawm. Hmanni-a in thah pa kha a mah a nilo, Ram chu maw pa...mifel tak ani." a ti a. Javed-a chu a ngawi vang vang a, engemaw ngaihtuah chhuak thut niawm tak hian a phu zawk a, "Hey, Bawihi, thu leh hla a thiam i ti tiraw? ENg thu leh hla in nge a thlem thluk che?" a ti a. Alia-i chuan, "A sawi dan chuan maw...Kan nun theih nan nunna kan mamawh a, kan nun kan hman chhoh theih nan suangtuahna kan mamawh bawk. I nui hmel mawi tak hi ka nunna leh ka suangtuahna a ni a, he i nui hmel mawi tak hi ka hmuh reng theihna tur a nih phawt chuan ka nunna hial pawn tuar dawn mahse pawi ka tilo.." tia a sawi lai chuan a sawi zawh hma chuan Javed-a chuan, "Ka ta ni la...ka ta ni reng ang che..a dik em? Chutiang chuan a sawi em?" a ti vin khur khur mai a. Alia-i chuan mak tih hmel zet hian, "Aw ni e, engtin nge i hriat a?" a ti a. Javed chuan, "Keima hrilh alawm...kan inhmu thin alawm, i chanchin hlir animaw a lo sawi ni? Ka lo pui vel a, beedi te min theh vel a, khatiang tlangval ka duh reng reng lo." a ti ta khur khur a. Alia-i chuan, "Pa, tinge khatia i awm? Kan inhmangaih asin, ka then theilo." a ti a. Javed chuan, "Anih chuan ka be duh ani, inhmuh puiah sawm nghal rawh..tunah." a ti vin tuar a. Alia-i chuan Ram chu a phone a, inhmuhna hmun tur an saiw a, tichuan Javed leh Alia-i leh a kid mi 20 rual vel chu an inhmuhna hmun tur an saiwah chuan kan kal ta nghal a. A hmun an va thlen chuan tumah an lo awm lo a, an hawi kual ruk ruk lai chuan hnug lam atang chuan, "Hey, ka puzawn, ilo kal ve animaw." rawn ti ri hi an hria a. Hnunglam an en chuan Abhiram alo ni a, Alia-i chuan nui sang hian, "Saw...sawpa saw alawm Abhiram-a chu." a ti a. Javed chuan, "Man rawh u..." a ti vin tuar a, chuveleh Ram chu a bike ah a chuang a, chak takin a tlan a. Javed te chuan ahnungah motorin an um a. Silaiin an kap ta sup sup mai a, motora chuan pah chuan Alia-i chuan tap chungin, "Pa, kap tawh su...ka hmangaih a nia, that lul suh." a ti lawm lawm a, mahse Javed chuan a ngaithla duh lo. Tichuan an in um zel a, atawpah chuan Ram chu a tlan bo thei ta hlauh mai, Javed chu a thinrim kher mai. Ram leh Javed-a beedi an zukna thin lui kamah chuan Javed-a leh a hote chu an kal a. Javed chuan, "Tunge a nih kan hriat a ngai, a hming diktak pawh kha Abhiram a nilo." a ti nuah nuah a. A phone a rawn ri a, cyber crime expert pakhat, a hnuaia thawk thin a lo ni a. Javed chuan, "Hello, in zawngchhuak thei em? Tunge a nih in hre thei em?" a ti a. Cyber crime expert chuan, "Aw...a profile kimchang ka rawn thawn che a, a email lo check rawh." a ti a. Tichuan JAved chuan laptop a phawrh a, tichuan a profile chu a en a.


Thinrim tak hian a fanu Alia-i chu a kai chhuak a, "Mawli, kha mihring kha tunge a nih i hria em? Grand Leakage company te zinga mi a ni...min chhui mek tu pakhat zinga mi a ni." a ti a. Alia-i chuan tap chungin, "Chupawh nise, kan inhmangaihna kha chu a tak tak ania sin, ka pa." a la ti hram a. Javed chuan, "I la hrethiam nange, beedi ka zu chak thei lutuk a ni tih pawh a hre vek a, min lo zui ru reng zawk a ni. Nang nilovin keimah zawk hi min zui ru a, nang erawh hmanrua ah a hmang mai che a ni." a ti a. Chutih lai chuan a kidte zinga pakhat chuan paper hi a rawn keng a, "Boss, enteh...hei a hming diktak chu.." a rawn ti a. Javed chuan paper chu a en vang vang a, "A hming chu a va mak ve...lam ava har ve..Nae..Nae.." ati nuah nuah a. Chutah phawk hru hian a meng a, a hmelah chuan hlauhna leh thinrimna a inchawhpawlh ta nuai mai. Rum zet hian a fanu chu a melh a, "I hmangaih em em anga i sawi hi a hming diktak i hria em? Abhiram anilo...a hmangaih lo che, a bum che a ni. Ka lakah phuba a rawn la a ni, hepa hi ka hria, ka hre khawp mai." a ti vak vak a. Alia-i chuan, "Enge awmzia ka pa?" a lo ti hu a. Ring zet leh vin zet hian, "Ka laka phuba lak nan beedi te min zukkhum a, ka duh ve tih a hria a, thianah min siam a. Lehlamah nang alo bum kual bawk che a, he mihring hi ka her lutuk. Street Fighter a nilo, Indian Police a ni." a ti ta mai a. Alia-i chuan mak ti tak hian a pa thusawi chu a ngaithla reng a. Javed bawk chuan, "Indian Police Service...North East India a state te tak te Mizoram a mi...Assamese a nilo..Mizoram Police a ni, nupui pawh anei tawh lehnghal. A nupui tan phuba arawn la ani, DEPUTY COMMISSIONER OF POLICE...NATHAN MALSAWMKIMA A NI." a ti ta vak vak mai a.

To be continue.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)