NATHAN SEASON-2 (Episode-18) MISS TERESA MURDER CASE by:Aaron Malsawmdawngzuala

[Aaron Dustin]

NATHAN SEASON-2 (Episode-18)

MISS TERESA MURDER CASE

Written by : Aaron Malsawmdawngzuala

Based on : The Story of Philip Chism (He killed his famale teacher for a stupid reason - True Story)

DCP Nathan Malsawmkima hian ka nun hi chu a chawkbuai hneh teh e, Tluangtei nena kan Love Story pawh ka share ve hmanlo che u a nih hi maw...hun awl ka nei thei lo reng reng. Kan chanchin han ziah chhuah ve dawn pawh hian tualthah case, rukruk case, suicide case leh thil dang dang, case ho deuh deuh pawh nise min tel ve kher zel a, hun awl neih a har a ni. Mahse lo nghak hram hram ula, vainu pasal nena kan hnuchhuina ringawt lo deuh, ka hmangaih Tluangtei nena kan hringnun zinkawng chhukchho chingchivet kual vel hi nidangah ka la rawn ziak chhuak ve dawn nia. Tunah rih chuan he vainu pasal inla hmeltha zet nen hian kan la inzui reng angai a, hne viau thin mah ila changtupa ber te ka lo ni ve laklawh tawh sia, thildang ka ti hman thlawt lo a ni. Kan thawhdun tirh atanga han chhut chuan kum tam a lo liam ve ta reng mai, Nathan Malsawmkima nena kan intawn hmasak ber kha ka la hre reng, khami hun atanga tun thleng hian he mihring pa hi ka la hrethiam theilo chu a ni ber e. Hnuchhui thiam tak, Police Officer, kum la naupang tak leh fing tak a ni. Police hna ai hi chuan Detective te hi han ni zawk se a inhmeh zawk daih ang, mahse amah avang hian thil tam tak ka zir chhuak a, a fin pawh ka fin ve phah sawt chuan ka hria. Hmanni deuha kan DGP in min hauh ang deuh khan Nathana hi chu engkimah ka ring bur a, a tello hi chuan ka buai nghal vek zel. Kei hi inhriat tawh angin mi eiloh ka ngah a, mize mak deuh, thawveng deuh leh ri phawr phawr ho hi ka huat zawng tak an ni. Chu chiah chu Nathan Malsawmkima nihna a ni a, kan in tawn tirh pawh khan ka ei hlawl lo a ni. Mak deuh mai bawk chu maw...Nathana hi puitling ve uai tawh si hi, ala th(r)ang lian zel amaw tih mai tur a ni. A tir atang khan keimah ai hian a sang hrim hrim a, mahse chhete bak a nilo. Ft 5'9 inches vela sang ka ni a, mizo ah chuan palian leh sang ve pawl tak ka ni ngei ang. Nathana ka hmuh tirh khan ft 5'10 vel a ni a, kan inchen deuh reng a, chhete in a arte lupawn ve deuh chauh kha a ni a. Mahse tunah erawh chuan ft6'1 a ni der tawh, hei tak hi amak ka ti a, a kum ngaihtuahin han th(r)ang lian zel chi a ni tawh lo. Chuan mak deuh maiin meizial a heh angreng hle a, mahse a infit phian lawi si. Kuhva ei ve zeuh a ching bawk a, mahse kei val senior nena tehkhin chuan a eilo tluk a ni. Kei hi zawng kuhva heh ve tak ka ni a, mahse ka ha erawh a la var nalh that that khawp mai. Achhan chu ka in uluk a, kei anga kuhva heh ha sen deuh deuh te hi t(r)awp ka ti leh tlat thung. Kan hnuchhuina reng reng ah hian kuhva pai loh lai ka neilo, ka ei lai ka tarlang tello mai mai a, inhrelo mai mai a nih kha. Nathana pawh hian, "Khawimaw, ka lo th(r)ial ve lawk teh ang." han tih hi a ching reuhva, mahse thla khatah vawi khat bak a ni lo ang ka ring. Sum lamah nise min pui nasa a, harsatna ka neih ve pawhin aman min chinfel sak zel thin. Han hne thin viau mah ila a awmloh hi chuan ka ngui bur zel a, ka awm a nuam thei thak lo. A nupui Sanvi lah hi vai e tilo chuan a chhelo em em lehnghal a, zeplo chuan ka bialnu Tluangtei ai hi chuan hmeltha tak a ni. Mahse hmangaihna hi hmelah nilovin, thinlung hi a ni zawk te han ti ve khanglang ila. Tin Nathana nen hian police dang anga serious run emaw, inla strict taka han inhmuam up reng kan ni lemlo. A bikin Nathana hian ka mizia hi a thlak hlawk ka tilo theilo, fiamthu a duh em em a, a thawveng phawr phawr bawk si a, atir phei chuan ka ngei lek lek kha. Kan thawhdun ni khatna atang khan ka phurlo nghal a, tuai a ang te ka ti zawk thin. Hnuchhui lam a thiamloh hmel sia, a lerh hmel ka ti takzet. Mahse ka rinloh takin mi special lutuk a lo ni leh si a, kei mi thinchhia leh inla rorum zet pawh hi mi fiamthu duh tak leh nelawm takah min chhuah ta daih chu a nih hi.

Tin, Nathana hi kan thawhdun tirh khan ACP a ni a, kei erawh Inspector 3 star ka ni thung. Amah vang liau liau hian ASP ah ka kaisang a, keimah vang liau liau in DCP ah a kaisang ve bawk. In awihlo ani maithei, mahse han ngaihtuah let ta ula, Nathana an kidnap tum kha inla hre vek anga, khatah khan a chhanchhuak tu chu kei Lalrinawma ngei hi ka nih kha. Khavang khan DCP ah a kaisang a, keipawh ASP ka nih ve phah hial kha, mahse amah kher hi chhanchhuak lo ta ila, entirnan constable mai mai te hi han chhanchhuak zawk ta ila chu kan DGP boral ta Pu Sangliana khan promotion hi min pek duh ka ringlo. Mahse ka chhanchhuah kha Mizoram Police Officer lar tak leh huhang ngah tak Nathan Malsawmkima a ni tlat, chuvang te pawh chu a ni mahna. Private Detective tamtak te ai hian a thluak hi a chak zawk a, a fing ber e chu ka ti ngam chiah biklo, mahse a theu neu lo a ni. Thiam lah hi a ngah khawp a, sawi ngai lovin hnuchhui a thiam tih chu chiangsa a nia, mahse zai a thiam a, music a thiam a, motor engchi pawh nise a khalh thiam kual vek bawk a, motor han chhia se a khawih thiam ve nual bawk a, sumdawnna pawh nise a tih chi tak tho a ni. Tin hmeichhe han bem der lah a thiam em em a, bem tak tak pawh a thiam. Tawng chi hrang hrang lah a thiam chikim angreng hle a, Sanvi ai hian Hindi hi a thiam nia mawle. Mahse Sanvi hian Hindi a thiam tha thum lo hi chu mak ti vak duh suh u, South Indian mi a ni a, South India actor leh actress tamtak te khuan Hindi hi an thiam mumal vak biklo ania. Mizo pa ngei maiin vainu Hindi a zirtir lai chu hmu vel ula, in nuih azat loh pawhin Nathana hi in ngei zawk hial ang. A nupui Sanvi a neih tirh khan chanchin bu ah te, Facebook ah te leh Instagram ah te Nathana hi an sel luai luai a, "Kan police chhuanvawr Nathana chuan hnadang nupuiah a nei e." tih te, "Mizorama Police huaisen ber anga kan ngaih Nathan Malsawmkima chuan kan mizo nula te thlang lovin thlangkawr vai lanu zawk a thlang tlat mai." tih ten an sel nasa em em a, an troll nasa hle bawk. Mahse Nathana te nupa erawh chuan engah vak mah an ngailo hle mai, an awm awmin an awm miah miah mai a ni. A thawhpui ka nih vang ni hauh lovin, keichu an lamah ka tang tlat a, an inhmangaih miau chuan an sawitheih a awmlo emai ka ti ve tlat. Chubakah Nathana leh Sanvi intawn dan hi an hriatpui lova, engmah hre ve hlei lo hian an lo tawng ve mai mai ani. Keichuan ti hian kan sawi deuh kher teh ang, anni nupa bak bak a nupa inhmeh hi he khawvelah hian an piang leh tawh lawng e. Kan lo theihnghilh tawh takin Nathana hi fahrah a ni a, nu leh pa a nei tawh lo. Tuna anu leh pa anga ka sawi thinte hi a patea te nupa an ni a, Nathana hian nu leh pa angin a en mai chauh a ni. Anu leh pa ang chiahin a hmangaih bawk a, Vizag-a hna ropui tak a zu thawh zawh hnu khan Hyderabad ah let lehin Police hna chu rinawm takin a thawh chhunzawm leh bawk a. ACP-a a kaisang zo chiah khan Mizoram Police Department a rawn join ve ta chauh a, chu a department join thar chu tuna ka thawhna mek, kan department hi a ni. Chuan hei tunah chuan, tihian kan lo thawkdun ta a nih hi. Mak ka tih leh deuh mai chu Nathana nen hian nikhat chiah thawkdun tur kan ni a, mahse kei, a mize milpui lo ber hi min kawmngeih zui ta daih hi a ni. Midang tamtak an awm a, kei kher hi min thlang a, hnuchhuina apiangah ka case nilo mahse min tel ve ziah a, mahse ka hlawkpui ta phian chu a nih hi. Ehee...ka lo va titi thui hman em em vele, min hrethiam hram teh u, Nathana chanchin a nih tawh hi chuan duhtawk nachang kalo hre thinlo a ni. Awle, hnuchhui lamah i lut leh dawn teh ang aw....

Ka day off ni a ni bawk a, ka nu chuan kan vawkin min sak that tir a, keimah chauh lehnghalin. Ka pa lah hi Champhaiah a hna vangin a zin reng mai bawk si, fapa neihchhun ka ni tawh bawk si nen chuan zei lo viau mah ila vawkin chu ka han sa zo ve thei hram a ni. Ka vawk in sak hi han hmu ve ula chuan in nui ve thovang, mahse ka sawi tawh ang khan hetiang lam hi chu ka zeilo ve lutuk. Kan vawk te pawh hian an zuan kân thauh anga, an tlanbo daih mai ang tih hlauhawm khawpa vawk in tlaktlai lo chu a ni ta ve ang. Ka nu pawhin a han en vang vang a, "Kan vawk te pawh hi an awm peih dawn mawni?" a han tih deuh kher kha. Harsa taka thei leh thei lova ka sak ve a ni a, kei erawh chuan ka chhuang ve lutuk ringawt. Zanah chuan ka chau deuh a, dar 9 vel rik hma chuan ka mu nghal daih a. Ka muhil dawn chauh a, phone a lo ri a, ka rin ang chiahin Nathana bawk a lo ni leh ta. Tum bur chung chuan ka pick up a, "Hello, Lalrinawm...whatsapp te hi enga tan nge i hman a, Tluangtei biak nan chauh a mi?" min rawn ti nghal hrep mai a. Meng mang hleilo chuan ka thuchhuak a, "Enge ni ta, ka pu zahawm?" tiin ka han chhang ve deuh kher a, ka hmingpum hian kei aia naupang zawk hian min ko ziah hi chu ka ngei vek lek lek thin. Nathana chuan vin zet hian, "Kan group ah pawh kan rawn post tawh kha...GFX Hostel (phuahchawp) bula mau hmunah khan ruang chhar a ni a, lo kal vat rawh." a rawn ti khur khur a. Ninawm thin mange, "Ka day off ve em em a, enge ka rawn tih ve anga? Ka awl ve zan alawm, Amandai te an awmlo mi? Ka chau emai min hrethiam teh, Sir." ka ti a. Nathana chuan, "I hnathawk peihlo chhuanlamah hian Amandai hming leh Liantea te hming hi lam ri chhen suh, i senior thupek hi zawm la, lo kal mai mai rawh." a ti a, phone chu a dah nghal daih a. Peihlo hle mah ila, ka kal ngei angai si. Ka insiam a, ka nu bulah chuan ka chhuah tur thu ka sawi a, tichuan GFX Hostel lam pan chuan ka chhuak ve ta nghal a. A hmun ka thlen chuan Nathana chuan rum zet hian minlo melh a, "Mut duhpa, group message te hi en ve thin teh, ka remove daih mai ang che." minla ti zui. A hrim hrimin admin ka ni ve tho a, ka remove daih zawk nghal loh, chimawm lutuk mai. Nathana bawk chuan, "Ruang hi an hmuhna ala rei lova, dar 8 khan an hmu a, hemi GFX school zirtirtu hi a ni awm e." a ti a. Ruang chu ka en a, a lu ah hliam a awm a, a hmai pawh kutthlakna tih hriat tak hian a duk thluah mai. Hmeichhia a ni a, a hmechhe lemlo lenghal a, a dulah vihna hnuhma a awm bawk. Ruang awmna atanga pen sawm velah hian silpaulin pawl a awm a, chu silpaulin ah chuan thisen a kai nual bawk a ni. Nathana chuan, "Henu hi a hming chu Teresa Lalrindiki a ni a, hemi Hostel ah hian zirlaite tuition a pe thin a. A school ber zawk chu hemi Hostel building hnung lamah daih a awm thung. Ka rindan chuan tualtthattu hian he hmeichhia hi a hrechiang hle aniang, thah a tum hrim hrim pawh a ni thei." a ti a. Amandai chuan, "Sir, Teresa-i hi kum 28 chauh ala ni a, hemi school ah hian a nghet pawhin a thawk lo, aikal mai chauh a nih hmel." a lo ti ve bawk a. Keichuan, "Anih chuan Sir, silapulin pawl(blue) saw?" ka lo ti a. Nathana chuan, "Tualthhattu hian silapaulin sawn ruang hi a tuam phawt ani ngei ang, helai mau hmunah hian thuhruk chu a tum ve a ni ngei anga, ruang hi a hnuk anga, a hnuhna lamah silpaulin hi a inphelh a niang." a ti a. Tichuan keichuan, "Nih chuan Hostel chhungah a that phawt tihna aniang maw?" ka lo ti a, Nathana chuan, "A ni maithei ani, Hostel chhungah chuan SI Liantea leh midang thenkhat ho ka tir lut tawh a, ilo kal har em a, lo kal hma deuh la chu nangmah zawk ka tir ang che mawle." a han ti kher a, ngeiawm thei ania.

Forensic doctor te pawh helai hmunah hian an awm ve a, hetia kan titi lai hian ruang hi an enfiah mek a ni. Tin he forensic doctor te hi kan department ami te an ni a, kan department hi in rin aiin kan hausa ania. Doctor Samuela chu a rawn phei a, Nathana bulah chuan, "Sir, he nula hi a thih hma hian pawngsual phawt a ni a, a serh chhungah hian mipa chi kan hmu a ni." a rawn ti a, Nathana chuan, "Anih chu...enge hmuhbleh dang in nei em?" a ti leh a. Doctor Samuela chuan, "Aih, finger print chu ka han zawng ngial nanga, tualthattu hian kutkawr a bun animaithei, ka hmu miahlo mai." a ti a. Nathana chuan, "A tha e, post mortem turin phur phei ula, result pawh a rang thei ang berin lo tihchhuah vat tum ang che u." a ti a, tichuan Teresa-i ruang chu an phur phei ta a. Ruang awmna lai vel chu kan han enkual leh a, thisen farna hnuhma a tam hle a, a hmun hrim hrim pawh hi a rapawm riau hian ka hria. Nathana chuan, "Tualthattu hi Hostel naupang zinga mi nge ni anga, pawnlam atanga lo lut ni ang aw?" a ti nuah nuah a, keichuan, "Aww...pawnlam mi an ni thei dawn em ni? Security guard pawh an awm ve ngei anga, chutin pawnlam mi an lut thei dawn em ni?" ka lo ti hu mai a. Nathana chuan, "A ni viau mai, mahse Hostel bang hi awlsam taka lawnliam mai theih a ni a, chubakah bang hnunglam atang hian awlsam takin inthazo deuh tan chuan a luhruk mai theih bawk. Mahse ruang hi a pu chhuak emaw chu a ni ngei anga, ruang nena han chhuah leh chu a hautak khawp ang." a ti a. Keichuan, "Teresai hi Hostel pawn lama thah pawh a ni thei tho a, enge security chuan a sawi, thu in zawtfiah tawh em?" ka ti a. Amandai chuan, "Aw...a sawi dan chuan Teresai hi alo chhuak lo hrim hrim a ni awm e." a ti a. Nathana chuan, "Rinawm, ka thlen hma hian Amandai hi a thleng hmasa a, Security guard te pawh thu a lo zawt fiah hman vek tawh a. Nachang a hria asin, nang ang anilo." tih pah chuan Amandai chu a melh zeuh a, an han in nuih seih vel a. Ka ten lutuk, "Niru niru." ka ti a, kan han nui leh rih a, a hunlo thei ania. Keini hnuchhui ve hi zawng..fiamthu hi zeh tel zeuh zeuh angai amaw kan ti tawh ani ber mai. Nathana bawk chuan, "Amanda, security bulah chuan Teresai hnathawh dan te, engtin nge tuition a pek thin tihte i zawt em?" a ti a. Amandai chuan, "Zawt e Sir, a sawi dan chuan Teresai hi maths teacher a ni a, maths lama chaklo fal deuh te hi tuition a pe thin a. School banah a pe ziah a, tichuan a thiam hmasa sa te a ban hma tir thin a ni awm e." a ti a. Nathana chuan, "Security chu va biak ve ka duh a ni, chubakah Liantea te pawh chu ka rin aiin an rei..va lut ve hrim hrim teh ang u." a ti a. Hostel lam pan chuan kan kal ve ta a, Hostel leh ruang awmna hi a inhnaih viau nachungin kea kal ve deuh fe angai a ni. Hostel gate bulah chuan constable thenkhat te pawh anlo la awm a, security guard bulah chuan Nathana chuan, "Ka pu, Teresai hi i hrechiang em? Nangmah nen hrim hrim pawh hian in inhre tha em?" tiin a zawt a. Security chuan, "Hre tha han tih ah, chutia innel taka han inkawm bawrh bawrh chu kan nei ngai lemlo. Hmeichhe fel tak leh polite tak a ni a, MZU ah faculty hna dila exam nei zo chiah a ni tih pawh ka hria. Result nghah chhunga awm mai mai aiin hemi school ah hian pawisa khawl nan ai kalin a thawk ve zuai a ni tih chiah ka hria." a ti a. Nathana chuan, "Anih leh Teresai chu alo chhuak miahlo amaw?" a ti leh a. Security chuan, "Aw....englo ania ka pu, nitin tuition a pe thin a, school banah hlir a ni. Nidangah pawh a thiam hmasa sa leh a chawkzo hmasa sa hi a mal te te in an lo chhuak thin a, tuition a pek te hi zirlai naupang 20-30 vel lai an ni. Tutu te nge an nih tih hi ka lo chhinchhiah ngai lo hrim hrim a, an ban vek hnuah amah Teresai hi a hnuhnung berah lo chhuakin kan in mangtha thlap zel a." a ti a.

Nathana chuan, "Anih chuan nangmah chiah hi em ni security?" tiin a zawt leh a. Security chuan, "Nilove, vawiin bik hi chu keimah a duty angai a, ka duty pui tur hi a dam lo alawm le." a ti a. Nathana chuan, "Hostel naupangte zingah hian han rinhlelh tur te an awm angem? Ka sawi awmzia chu han sual fal bik emaw, han ngeng deuh bik te...anih loh pawhin lo chhuak ru fo tawh te?" tiin a zawt leh a. Security chuan, "Ka hrelo le, naupang fel tak tak an ni hlawm a, chubakah High School zirlai te mai chauh an ni a, Pawl 9 leh pawl 10 zirlai chauh te annia, chutianga tual han that duh an awm ka ringlo. Chubakah Hostel naupang te hi 20 vel bak an nilo hrim hrim a, chhuak ru an awm ngai pawh ka hrelo." a ti a. Nathana chuan, "Anih chu...nihleh tuition la ho te zingah chuan lo chhuak ve ta miahlo te an awm em?" a ti leh a, Security chuan, "Chutin ka lo chhinchhiah thlap thlap biklo, an lo chhuak kim tawh ah ka ngai a, Teresai erawh a lo chhuak ta miahlo tih chu ka hria. Warden hian chaw ei ve nghal turin a sawm a nih ringin engah vak kalo ngailo a, ngaihthat lohna em em pawh ka lo neilo a." a ti a. Ka lo inrawlh ve a, "Sir, engtin nge ruang hi an hmuh hrim hrim? Chuan nangmah nin engtin nge in hriat?" ka lo ti a. Nathana lah chuan rum zet hian min melh a, "Hei vang hi alawm whatsapp te hi message zawng zawng en ve thin rawh ka tih reng ni, hmeichhe biak nan chauh hian i hmang a." min lo ti let hrep zui. Amandai chuan, "Englo ania Sir, vawiin hi night duty tur ka ni a, phone call ka dawng a. Zan dar 7 rik hma hret khan Teresai nu te hian min rawn call a, an fanu lo haw har bawk si, phone switch off tlat bawk si chu an mangang a. Warden an call lahin a lo haw tawh thu an sawi bawk si a, an mangangin police hnenah an rawn report tawp thu an sawi a ni." alo ti a. Keichuan, "Nihleh ruang an hmuh dan tak hi?" tiin ka han zawt leh hram a, Amandai chuan, "SI Liantea te ka tir nghal a, tichuan Warden pawh an kawm nghal a, Warden chuan a awmna a hriatloh thu leh amaha a haw ve mai a rin thu a lo sawi a, tichuan a bul vel an zawng kual a, dar 8 vel khan ruang chu an hmu ta a, min rawn call a, ka kal ta nghal a ni." a ti a. Nathana lah chuan, "Amandai hian whatsapp group ah pawh a rawn sawi mawlh mawlh a, nang lah ilo mu thlurh thlurh a, hahthlak lutuk." a lo ti ve chhen a. Vin zet hian, "Ka day-off a ni ve em em a, min hau reng suh." ka ti vak a, Amandai pawh a lo nuih leh suk tawh kha. Nathana chuan Amandai bulah chuan, "Amanda, hostel naupangte hi thu lo zawt fiah la, an warden pawh nakinah ka la kawm ve duh dawn ania." a ti a, Amandai chuan thuawih tak hian, "Awle Sir." a lo ti a. Chutih lai chuan Nathana phone a rawn ri a, SI Liantea a lo ni a, "Sir, CCTV room ah lo kal teh..i hmuh ve duh ngei ka ring." a rawn ti a. Nathana chuan phone chu a dah a, security chu a en a, "CCTV room te inlo nei animaw?" a han ti hu a. Security chuan, "Nei ve e.." tih ringawt hian alo chhang a. Nathana chuan, "Amanda, Warden leh Hostel naupangte chu lo bia la, chanchin kan inhrilh leh dawnnia." a ti a. Amandai chu a kal ta nghal a, kei leh Nathana erawh CCTV room ah chuan kan inzui lut ta nghal a. SI Liantea chuan min hmuh veleh chuan, "Sir, hei hi lo en ve teh u." a ti a, CCTV foootage chu kan han en ta a. Footage ah chuan Teresa-i chu corridor lam pana alo kal phei hi alang a. CCTV room a duty chuan, "Ka pu, helai hi Student toilet lam panna corridor a ni a, staff toilet chu a hranin lehlamah sawn a awm." a ti a. Footage chu kan en zel a, Teresai chu bathroom ah a lut ni ngei tur a ni, CCTV in a cover phak lohna chinah chuan a kal ta daih a. Tichuan second 20 vel hnuah mipa naupang pakhat, jumper dum ha, lukhum khum, rawlmawla hmai tuam niawm tak, hnuai lam bih tlat hi a rawn lang ta a.

Corridor ah chuan a lo kal phei a, a kun tlat a, a hmel alang thei lo. Tichuan Teresai awmna lam chu a pan a, ani pawh chu CCTV cover phak loh naah chuan a kal liam ve ta daih mai. SI Liantea chuan, "Forward hret teh.." a ti a, tichuan a forward a. A play leh chiah chu chu naupang chuan trolley-ah chuan garbage bag niawm tak hi a rawn nawr a, chu garbage bag chhungah chuan engemaw tak hi a awm tih a chiang. A an ber chu mihring pianzia a ni, achhan chu kha garbage bag kha a tawt em em a, hnawhluih a nih duhhmel ber. Duty chuan, "Ka pu, Teresai leh he mipa naupang te hi CCTV in a cover phakloh china an kal khan minute 20 vel hnuah he naupang hi a rawn lang leh chiah a ni." a ti a. Tichuan rang takin student bathroom chu kan va pan ta nghal a, an bathroom hi inhnuai bera mi a ni a, Hosteller te hian an hmang ngai meuh lo. Achhan chu Hosteller te room hi inchung lamah a awm vek a, inhnuai erawh hi chu an lehkha zirna hmun ber a ni. Bathroom chu tuman an lo la check miah lo chu niin, bathroom kan lut chu ka han tawlhthlu nghal a. Bathroom kawngkhar bul chiah ah chuan thisen a lo kawi nuai mai a, chu mi chu ka rap a, ka tlu a ni, a chet khir theih bik mange. Bathroom chhuatah chuan thisen a a tam em em a, tu thisen nge han inzawh kual vel angai lo, CCTV footage kan en atang pawh khan a chiang reng, Teresai thisen ngei a ni. Nathana chuan, "Hemi chhungah ngei hian a that a ni, a va rapthlak ve aw.." a ti vawng vawng a. Tichuan bathroom chu kan chhuahsan lehnghal a, Nathana nen chuan warden chu kan han hmu ve ta a. Amandai chuan zawhna a lo zawt mek a, kan va thlen chuan Amandai chu lo kalin, "Sir, engmah thu tharlam a awm lemlo. Han zawt ve chhin la.." a lo ti a. Nathana chuan Warden chu a han thutchilh ve a, "Ka pu, Teresai thihna chungchang ah hian han rinhlelh deuh te i nei mial em?" tiin a han zawt a. Warden chuan, "Nei lemlo khawp mai, ka student te hi chu ka t(r)an vang nilovin anni thil tih i hi a nih ka ringlo. Han en mai pawh hian naupang tak tak vek an la ni a, kan school hi school lian a nilova, class 9 leh 10 chiah an awm a. Tin an la naupangin an nungchang a tha a, chubakah chhuah ruk tum emaw, han hrem nat deuh ngai bik pawh an awm ngai lemlo." a ti a. Nathana chu a tho a, "Rinawm, han in zawh vak pawhin awmzia a nei dawn lemlo tlat, thuthar a awm dawn chuangin ka hrelo a ni." a ti a. Keichuan, "Enge kan tih ang?" ka ti a.Nathana chuan, "Tualthattu chhuah rukna tur awm ang hi kan zawn angai a ni, building hnunglam vel saw iva check ang hmiang." a ti a. Zan a ni bawk nen, a thim em em a, an street light lah a dîm angreng phian bawk si a. A peihawmloh kher mai, chu mai nilovin an school awmna hi a fâl angreng a, mau hmun a tam bawk si, kawnghnuai a ni bawk si nen, nelawmloh tak a ni. Nathana chuan Amandai bulah chuan, "Mitthi chhungte hi enge an chanchin? Thu va zawhfiah ve an ngai awm si a?" a ti a, Amandai chuan, "Sir, ASI Lawmsanga te chu ka tir nghal a, engmah chanchin an la rawn sawi lo." a ti a. Nathana chuan, "Va kal ve la, chuan Liantea bulah khan lo hrilh la, Station lamah lo va let rawh se..file vel lo buaipui se a tha ang." a ti a, Amandai chu a kal ta a. Tichuan Nathana nen chuan building hnunglam chu kan han enfiah ta a, bang chu a sang angreng hlawm hle a, han lawnliam mai chu a huphurh awm khawp ang. Chu bakah bang tawpah hian thirlen zum tak tak an vet kual fur hlawm a, han lawnliam mai chu chakawmloh tak a ni. Nathana chuan, "A hrim hrimin tualthattu khan trolley a hmang a, trolley pawh chu khawiah tak awm ang maw?" a ti a, keichuan, "Ka va zawng dawn mi? Nangmahin lo en mai la.." ka ti a. Nathana chuan vin zet hian, "I mawl ami? A thim em hi...thlahrang an awm anga sin, mawl lutuk." min lo tih khum hrep a. Nuih suk pah chuan, "Thlahrang i hlau em ni?" ka ti a, Nathana chuan, "A takah i la hmu velo a nih kha...sawi tawh lovang, a nuamlo emai." ala ti zui, dawih lutuk mai.

Tichuan light chuan kan en kual a, mahse han chhuah rukna mai tur awm ang chu a vang em em a. Minute sawm vel dawn lai kan enkual hnu chuan Nathana chuan, "Rina, hetah lo kal teh." a ti a. Nathana bulah chuan ka va phei a, "Helai hi han en teh." tih pah chuan a bul lawka bang leh bang inkar kaw zimte, cher deuhhlek tan lo phei chuan a luhtlang theih loh ang tih khawpa zim chu a kawk a. Nathana bawk chuan, "Hetah hian a lut tlang a ni ngei ang, hei bak chu kalkawng dang a awm lo." a ti a. Mahse keichuan, "Ani dawn mi? A zim em hi, ruang a pu tel ngei awm si a." ka lo ti a. Nathana chuan, "Teresai kha a thau lemlo, cher tia sawi theih a ni hial zawk. Tin, CCTV a naupang kha cher lampang a ni bawk. Chuvang chuan an lut leng em em ang, mahse keini pahnih erawh kan lut leng ve kher lovang." a ti a. Bang leh bang inkar chu a han enchiang a, "Rina, thisen a awm." a ti ta mai a. Ka han en ve chiang a, Nathana sawi ang ngei chuan bang sirah chuan thisen a lo awm tak tak a. Keichuan, "Anih chuan i sawi dik a ni ngei ang, hetah hian ruang chu a hnawh lut lui anga, tichuan amah chu a chhuak leh aniang." ka ti a. Nathana chuan, "I sawi dik chiah, a hrim hrimin helai hmunah hian tinge security te pawh an dah loh le? Hosteller dang te pawh hi a ruka an chhuah ruk fo ania ka rin ni...chhuah rukna remchang tak anih hi." a ti nuah nuah a. Tichuan gate pawnah chuan kan chhuak leh a, warden bulah chuan Nathana chuan, "Teresai'n maths tuition a pek thin ho te hi tute nge an nih, amal te te in ka hre vek duh a ni." a ti a. Tichuan warden chuan an nu leh pate phone number nen, an address nen lam chuan paper ah a ziak thla a, tichuan min pe ta a. Nathana chuan, "Rina, hei dar 11 a ri dawn tawh a, haw tawh rawh. Keipawh ka haw dawn, a tlai tawh emai. Naktukah hma deuh ah lo thleng rawh aw...kan pahnih bawkin i han ti leh teh ang." a ti a, keichuan, "Sir, Amandai te, Liantea te...enge chanchin te kan zawt ve phawt dawn lo em ni?" ka lo ti a. Nathana chuan, "Aho lutuk, inspector lai te an ni ve tawh a, an mahni in an buaipui ve tawh mai ang chu. Whatsapp group ah ka lo sawi hrim hrim ang, lo va haw hmasa rawh, ka lo zui ang che." a ti a, tichuan ka haw san ta a. A tuk atang chuan Nathana nen chuan a mal tete in Miss Teresai'n tution a pek thinte, naupang te chu an inah theuh kalin thu kan zawt fiah ta hlawm a. Mahse thu lawmawm emaw, kan hnuchhuina a min pui tur thil thar kan hmu lemlo. A haw hnuhnung ber erawh kan hria a, chu chu kum 16 mi, pawl 10 zirlai, Lalrinpuia a ni. A sawi dan chuan, "Keimah ka bang hnuhnung ber a, ka ban chuan dar 5 a pel tawh. Miss erawh ala awm a, ka haw san a, abak engmah ka hrelo." a ti bawk si, tichuan tlai dar 3 vel a ni ta der mai, station lamah kan let leh ta a. Sation kan thleng chiah chu Amandai chuan, "Sir, hei post mortem result." tiin result chu NAthana a pe a, a bulah chuan Doctor Samuela a lo awm ve bawk a.

Doctor Samuela chuan, "Sir, Teresai dulah khan tualthattu khan a vit ringawt lova, a zai tel deuh a ni. Chuan Teresai dul thler kha ka en chiang a, ziarang a nei deuh a ni. Ka rin dan chuan tualthattu chem hman hi box-cutter a nih ka ring. Achhan chu a hliam ah khan ziarang kir deuh a awm a ni. Box cutter ah pawh a hmawr kir deuh a awm a, a hriam em em a, chutiang box-cutter ngei chu a hmang niin a lang." a ti a. Nathana chuan, "Alawmawm e, chuan a dang zel?" a ti leh a. Doctor chuan, "A thih hun kha tlai dar 5 leh a chanve vel a ni a, a lu ah khan thil rit taka vuak a ni bawk. Chuan a hmaiah khan vawi 15 vel lai chu na tak taka hnek a ni a, tualthattu hian finger print engmah a hnutchhiah lo a ni." a ti a. Nathana chuan, "Kan lawm e, i kal thei e." a ti a, doctor chu a kal ta a. Nathana chuan, "Amanda, Teresai chhungte chu i va hmu ta em nizan khan?" a ti a, Amandai chuan, "Va hmu e, mahse engmah han hriat thar em em ka neilo. Hmelma a neih awm an hrelova, mi fel tak leh zaidam tak a ni an ti bawk a, rinhlelh pawh an nei lemlo." a ti a. Nathana chuan, "Thil chiang tak chu Teresai thattu hi school naupang zinga mi a ni, tuition la tute an nih loh chuan hosteller zinga mi te an ni ngei ang. Chuan CCTV a naupangin ruang a rawn nawr hun lai kha tlai dar 5:30 vel chiah chiah a ni a, bathroom bulah chauh khan CCTV an dah bawk si. Tualthattu kawr hak rawng lah kha hre turin an CCTV hman kha black and white a ni bawk si a, mahse a inchei dan kha chu kan hre tawh tho a." a ti nuah nuah a. Ka lo inrawlh vat a, "Sir, anih te chuan hostel a security kha zawt ila, jumper ha, lukhum khum leh kutkawr bun, cher lampang ilo hmu em kan ti mai dawn lawm." ka lo ti ve ngawt a. Nathana chuan, "Nizana i haw hnu khan ka zawt daih tawh alawm, chutiang a chhinchhiah loh thu leh khawvawh lai a ni deuh bawk nen, kawrlum leh jumper an ha fur hlawm a, kutkawr an bun fur hlawm a ti a, a buaithlak khawp mai." a ti a. Amandai chuan, "Sir, aikal a ni a, tu aiin nge a kal tihte kan hriat a tha lo maw? Thu zawhfiah ve te pawh a tha lo maw?" a lo ti a. Nathana chuan, "Aih, a tulna a awm lo. Tualthattu chu naupang a ni tih kan hria a, GFX student a ni tih kan hre bawk a, tu aiin nge akala, tunge chu chu tih va zawnin awmzia a awm lo." a ti a. Chutih lai chuan SI Liantea lo kalin security guard pakhat hi a rawn hruai a, mak ti tak hian kan lo en hu hlawm a. Liantea chuan, "Sir, he security guard hian hrilh duh che a nei a." a rawn ti a. Security chuan Nathana bulah chuan, "Sir, hei SI leh constable thenkhat te lo kalin tualthahna a thlen thu velte leh mitthi chu GFX school a teacher a nih thu te kha an sawi a. Engmah chu ka hre chuanglo nangin ka ngaih tithalo deuh a awm a, chu chu rawn hrilh ve hrim hrim che ka duh a, in tan a pawimawh angem tih chu ka hre lo." a rawn ti a. Nathana chuan, "Umm han sawi ta che." a ti a. Security chuan, "Ka pu, kei hi GFX school opposite chiah a college ah sawn security ka ni ve a. Nimin tlai dar 6 vel khan naupang pakhat hi kan college zawn mau hmun atangin a rawn chhuak hlawl mai a, a hmai chu rawmawl dumin a tuam a, a hawi zeuh zeuh a, mahse thli a thaw nasa bawk si a, engvak a nilovang tiin va biak pawh ka tum lemlo a. Mahse ahnua ka ngaihtuah let leh khan khatia naupang, mau hmun atanga lo chhuak ringawt kha amak ka ti deuh a, chuan tukin khan GFX School teacher pakhat a thih thu leh mau hmunah ngei a ruang an hmuh thu an sawi ka hriat khan ka ngaih a tha talo a ni. Chuan kan college bul velah tun lawk khan SI hi ka hmu a, tichuan hrilh che hi ka duh ta a ni." a ti a. Nathana chuan, "Eng kawr rawng nge a hak?" alo ti vat a, security chuan, "Jumper a ha a, a sen ania, chuan.." a tih lai chuan Nathana chuan, "A kawr ban zawng a sen duk bik a ni em?" a lo ti vat a. Security chuan mak tih hmel deuh chuan Nathana chu a en hu mai a, "Aw...dik e, mahse engtin nge i hriat a?" a ti a, Nathana chu a nui ta var var mai. Security chu cheng 100 tlang a pe a, "Kan lawm e, kal tawh rawh." a ti a, a ngaihna hrelo tak chuan security chu a kal ta a.

Keipawh chuan mak ti takin, "Sir, enge awmzia?" tiin ka zawt a. Nathana chuan, "Tualthattu chu tunge a nih ka chiang ta e, maths tuition la tute zinga mi a ni." a ti ta mai a. Amandai chuan, "Sir, engtin nge i hriat?" alo ti a. NAthana chuan, "Tuition la te kha amal te te in thu kan zawt vek a, mahse kha naupang Lalrinpuia erawh kha chu thu kan zawh chhung zawng khan a kun reng a, a hawichhuak miah lo. Chuan kan biak lai khan a nu in pawn lamah puan a lo zar a, chuta a puanzar zingah chuan Jumper sen, lukhum nei, a kawr ban tlema sen duk bik chu ka hmu tlat a ni. Security khan a sawi ta chiah a, Lalrinpuia hi a ni tih ka chiang a ni." a ti ta a, awww...ava han lawmawm tak em. Lalrinpuia te in ah chuan va kalin chawp leh chilhin kan man nghal a, Stationah kan hruai phei ta nghal a ni. Lalrinpuia chu a inpuang ta a, "Maths subject hi ka haw em em a, ka thiam thei thlawt lo a ni. Ka chhungte pawh an mangang a, tichuan Miss Teresai hian tution a pe thin tih an hria a, tichuan ka nu hian tuition la ve tur chuan min ti ve ta a. Nimin tlai khan midang zawng zawng an bang vek tawh a, keimah chiah ka awm tawh a. Ka chawk dik thei silo chu Miss chuan, 'I nu leh pate ka phone anga, dar 7 thleng i awm ang.' tiin min vin hrep a. Ka ning tawh bawk si, ka thinrim lutuk chu a zung tur chu ka zui ru ta a, tichuan ka box cutter chemte chu la in bathroom a luh veleh chuan a lu ah tak mai chuan mipa zunin lam zawka kawngka danna lungtum chu la in ka chhu pawp a, a tlu ta a. Tichuan a hmaiah chuan ka thinrim insum zo tawh silo chuan vawi 20 vel lai chu ka hnek siah siah a. Khatih lai khan enge pawh ka hrelo, a kawr kha alo inhlim chho a, a hnute a lang vek a, ka it ta em em a. Bathroom chu kalhin ka pawngsual ta phawt a, ka zawh veleh chuan ala thilo tih ka hria a. Ka box cutter knife chuan a dulah ka vit ta a ni." a ti a. NAthana chuan, "Anih leh a ruang kha engtia mau hmuna dah thei nge i nih?" a ti leh a. Rinpuia chuan, "A ruang kha bathroom a silpaulin lo awm khan ka tuam a, tichuan bathroom atang chuan ka pu chhuak ta a. PAwna ka chhuahpui chuan security in min hmu dawn si a, ruang lah chu a rit ve reuh em avang chuan ban sira trolley cu ka la a, garbage bag 5 vel, banga bawlhhlawh bawm atana an tar ho chu ka la khawm a, tichuan Miss Teresai ruang, silpaulina ka tuam tawh chu ka tuam hnan leh ta a, trolley ah chuan nawrin building hnunglam atangin ka chhuah pui ta a ni. Tichuan building hnunga ban leh ban inkar zimte awmah chuan ruang chu ka hnawh lut a, chuan keipawh ka lut ve ta a. Mau hmunah chuan ruang chu a hla thei ang berah ka hnuk a, ka hnuh pah chuan silpaulin leh garbage bag te chu a inphelh vek a ni. Ka hnuk thui ngam vak tawh loa, a thim em a, tichuan ka kalsan ta mai a ni." a ti ta a.

Nathana chuan Rinpuia chu na em em hian a beng hawi sawk mai a, "I va han zak lo tak, naupang te te si. Thi tlak i ni, mihring pawh i nilo, ramhuai i nih kha. I tan a hun senga, thahnem ngai taka zirtir tu che chu, a hrem vang che in i that amaw? Lehkha a zirtir che a, a peih vang a ni bik lo asin. Thi tlak i ni, tenawm lutuk." tih pah chuan a beng leh siah mai a. Rinpuia chu kum ala tlin loh avangin Remand Home lamah kan phur phei ta a, kum 18 a tlin veleh central jail lamah thawn a ni ang. He tualthahna hi a rapthlak hle a, naupang mai mai te anga kan lo ngaih te pawh hi tualthattu rapthlak tak an lo ni thei reng mai. Rinpuia hi damchhung lungin tang tur a ni a, a chungthu vawi 2 lai an rel that hnu pawhin thiam achang thei ngang lo, kum 40 a tlin hma chu parole pawha chhuah phal a ni dawn lo a ni. Mahse hetih lai hian thil ropui deuh mai a thleng a, Rinpuia nu Pi Sangzuali hian court chhungah, mipui hriat lai ngeiin Teresai nu leh pate hi ngaihdam a dil a, an in ngaidam tawn a ni. MAhse Teresai nu leh pate hian Rinpuia an ngaidam tihna a nilova, a nu Pi Sangzuali zawk an ngaidam tihna a ni.

The End