NATHAN SEASON-2 (Episode-19) THE ELDEST SON by:Aaron Malsawmdawngzuala

[Aaron Dustin]

NATHAN SEASON-2 (Episode-19)

THE ELDEST SON

Written by : Aaron Malsawmdawngzuala

Tun tum kan episode-a a thupui hi, "Fapa upa ber." tih-na a nih hi. Saptawng te a ni si a, bialnu nei lo ho bawk khan in hrethiam lehpek lovang tih hi ka hlau thin a ni. Thuhma nei duah tawhlo mai teh ang, Nathana chanchin a ni thin bawk si a, ka sawi thui leh dawn tlat. Mahse ka sawi tan tak tak hma in thu tlem ka'n sawi ve leh lawk anga, Nathana hi chhiartu te leh ngaithla tuten eng ang hmel nge a put a, a ngo nge a hang tihte, a sam a buk nge a buklo, a sei nge a tawi, tattoo a nei em, a palian em tih vel te hi in rawn zawt nasa thei khawp mai. Tihian ka han chhang teh ang che u, mipa leh mipa hi han infak a har ve a, chubakah ngaih loh lamah te in lo ngai ang tih ka hlau bawk nen. Kei chuan a pangngai tih ringawtin ka chhang ang che u, in mipa duhzawng, in dream-boy angah khan han suangtuah tawp teh u. A hang anga inlo ngai anih chuan a hang anga ngaitu tan khan a hang a ni mai, chutiang bawkin ngo deuh anga in ngai anih pawhin a ngo a ni mai. A hmel awmdan tur ni-a inhriat, inrin leh in lo suangtuah dan kha nangmahni mimal tin dream ah khan a dik vek, a awmzia chu Nathana lo star tu zawng zawng te khan Nathana hrang th(r)euh in nei vek tihna a nih chu. Ka chungchang sawi ve ngai hlawm der silo, kan hnuchhuina han sawi reng pawh hi ka phur tawh lo. Comment naah nise, "Nathana ka star, Nathana chu ava fing ve, ava bawn ve..Nathana Nathana Nathana." tih ringawt hi in sawi a, a thianpa, a hnuchhuina sawi chhuah sak tu ber, amah in hmelhriatna chhanber kei, Lalrinawma hi eng atan mah min ti velo a nih hi. Mahse a tir ber atangin sawi tâk ang khan changtupa te kan lo ni ve laklawh tawh si a, ka sawi zel loh chuan Nathana pui hian a hrilh ve peih dawn der silo che u a, ka sawi leh ta poh aniang chu. Tin he kan thawnthu lo ziaktu bulah hian Nathana fans thenkhat ten damna an chan thu te anlo hrilh a, an thil sual tih an sim phah thute an lo hrilh ani awm a, ka awihlo viau nanga, kan lawm takzet e. Thil ni awm anglo lutuk chu ni tho mahse, sim phah nana hmang anlo awm a nih chuan chu tluka lawmawm a awm chuanglo. Mahse mak ka tih leh ka awihloh ber chu, damna chang kher kha chu awih a har ve det a ni. Fel deuha in awm anih chuan nakinah Tluangtei nena kan story bik han tih ah, keimah ASP Lalrinawma thawnthu bik hi rawn tihchhuah kan tum anga, lungngai suh u, Nathana pawh a lang ve dawn tho. Mahse chumi hma chuan kan thawhpui nula hmeltha Amanda Lalrempuii thawnthu bik tihchhuah hmasak kan lo tum dawn ani, lo mangang hman thawt thawt thin teh suh u, NAthana a lang ve dawn tho ania. Mahse in duh leh duhloh te kha rawn sawi phawt ta ula, in duhlo chung kha chu ka sawi hah peih miah lo ania, ka ti tak tak. Tin, kan lo theihnghilh tawh palh tak thutin, Nathana nupui vainu Sanvi kha, a rai mek kan tih kha. A rai lian ve tawh khawp mai, Nathana lah chuan a hming phuah ang che ala ti ta deuh deuh a, ka phuah peih teuhlo mai. Chubakah phuah dawn pawh ni ila, enge a hming ni ta ang tih hi ka buaina a ni. A nupui hi vai a ni sia, amah mizo a ni sia, mizo hming put tir ringawt kha midangin min dem ang tih ka hlau bawk si. Nathana'n phuah dawn se mizo hming a put tir ve leh tawp anga, a dik thei ngangin ka hre silo. Sanvi hian phuah dawn ta se, vai hming lutukin a phuah ka hlau bawk si. Sap hming neih tir ve t(r)alh te hi an tum ang tih ania ka hlauh ni...Sanvi nu leh paten an phuah phei chuan vai tih takah tute emaw angin, Corona Lalchhandama, Sanitizer Lalbiakzuali, Covid Lalnundika emaw Virus Zohlupuii te an lo tih ka hlau ve tho bawk si. Engpawh chu nise, vai hming chu neilo hram se, Nathana mizo a ni bawk a, mizo hming a pu ve ngei turah i ngai phawt ang. A hming phuah hual tu lah an tam, Nathana lahin kei kher min ti bawk si, mahse Amandai hnenah ka hlan chhawng ta a nih kha.

Kanan Veng lam pan chuan Nathana nen chuan kan inkhalh phei a, chhungkaw pakhat, Pu Lalsiamliana te chhungkua chu an chhungkua zawng zawng thah vek an ni. Thah an nih mai bakah an in chu rawk a ni bawk. Kan thleng thuai a, in bul velah chuan mipui anlo zi hut hut mai a. Inchhung chu kan lut a, chhuatah chuan Pu Siamliana te chhungkaw ruang chu alo let pheng phung hlawm mai a, thisen lah a kawi nuai mai bawk a. Crime-scene ah hian kan SI chhuanvawr Liantea pawh a lo awm leh der tawh a, he mihringpa hi chu Inspector ah a kai sang vat ang mawle. Nathana chuan a han enchiang a, "Nunrawn thlak mange tiraw Rinawm, thah vek kher a t(r)ul amawni le?" a ti nuah nuah mai a. Kei lah chuan, "Awww...tuathattu hian alo râwn hmasa lo che nimaw?" ka ti ve deuh ngat a, a khi suk ringawt. SI Liantea chu a lo kal a, "Sir, an chhungkua hi pali an ni a, Pu Siamliana te nupa leh an fate pahnih hi an ni." ati a. Nathana chuan, "Pu Siamliana hian eng hna nge a thawh a?" a ti a, Liantea chuan, "Contractor ania, an thenawmte sawi dan chuan hau sa ve pangngai tak an ni a, an khawsa thei hle a ni awm e." a lo ti a. Nathana chuan, "An chhungkaw hming te, an kumzat te ilo hrechiang hman tawh em?" tiin a han zawt leh a, Liantea chuan, "Aw..Pu Siamliana nupui hi Pi Vanlalthangi a ni a, an fate hi hmeichhia leh mipa niin a upa zawk hi Lalnunthari a ni a, kum 19 a ni a, a nau hi Ramdinthara, kum 17 a ni e." a ti a. Nathana chuan, "I ti tha e, nang nge nge nachang hi i hria a..tu emaw anglo takin." tih pah chuan mi rawn melh deuh kher lehnghal a, a va t(r)ullo thin tak. Liantea chuan, "Finger prints vel chu kan hmu nual bawk a, a dang an zawn belh mek e." a lo ti leh thuai a, inla mark that tum vel lutuk. Nathana chu a hawi kual a, "Anih chuan Liante, inchhung hi in dap kim meuh maw?" a ti leh a, Liantea chuan, "Kan dap kim thawkhat chuan ka hria, i duh chuan kan dap nawn leh thei tho." a ti a. Nathana chuan, "Thildang engemaw rinhlelhawm deuh in hmuh belh miahlo tihna em ni?" a ti leh a, Liantea chuan, "Tualthattu hian an chhungkaw thah nan hian choka a chemte hi a hmang a ni ngei ang, achhan chu an chawhmeh chan chemah sawn finger prints kan hmu a ni." a ti a. Nathana chuan, "Anih chuan tualthattu hi serial killer pangngai ani lo tihna em mawni aw.." a ti nuah nuah a. Keichuan, "Enga ti maw?" ka lo ti hu mai a. Nathana chuan, "Thah a tum lawk lo a nih duh hmel zawk, achhan chu an choka chemte a hmang a, chemte a pai lut lawk lo tihna ani phawt anga. Ka rin dan chuan an mahni in rawk tuma lut ru emaw, thah a tum hrim hrim pawh anilovang." a ti a. Kei lah chuan, "Hmmh, i t(r)an deuh ami tualthattu hi?" tiin ka lo fiam zeuh pek a. Nathana chuan ka fiamna chu engah mah a ngailo, "Tumloh deuhin buaina a thleng thut anga, an chhungkua zawng zawng hi a that ta mai tihna pawh a ni thei tho." a ti leh nghal zung zung a. Liantea chuan, "Tualthattu hian inchhung bungrua vel hi a hai nasa hle a, ruk tur a zawng nasa anih ka ring. An inchhung hi kan dap kim deuhthaw a, pawisa chneg 1 pawh kan hmu lova, mitthi ruang te pawh hi kan check vek a, pawisa engmah an ak lo. Chumai bakah Pu Siamliana te inneih zungbu pawh hi a ru tel ani ngei ang, an kut en pawh hian zungbun bunna thla a awm kulh a ni." a ti a. Nathana chuan, "A tha e, anih chuan tualthattu hian hemite chhungkua hi a hrechiang thawkhat tho pawh a ni thei. Engemaw thil hlu tak an nei emaw, pawisa tam tham tak an nei ani ngei ang." a ti a. Keipawh chu lo inrawlh in, "Sir, nichin lawk khan thah a tum lawk lo hrim hrim pawh a ni thei i ti a. Anih chuan misual hi an thenawm hnai emaw, an chhungkua ina an hriat chian a ni thei tho ang tiraw?" ka lo ti a. Nathana chuan, "A ni thei tho, mahse tuatthatu hi serial killer pangngai a nih theihna pawh a awm tho mai." a ti leh ta daih mai a.

Mak ti tak chuan, "Engati maw?" ka lo ti leh hu mai a. Nathana chuan, "Misual hian thah a tum hrim hrim pawh a ni thei tho a, engmah chiang a awm hrih lo a ni ber e. Pu Siamliana te chhung zinga pakhat hian tualthattu chu beihlet nan choka-a chawhmeh channa chem hi a hmang te pawh a ni ve thei tho bawk." a ti a. Liantea chuan, "Sir, anih chuan ruang hi kan phurh phei tir tawh mai dawn em ni?" a ti a. Nathana chuan, "Umm...mahse chumi hma in, ruang ho hi an finger print la vek la, choka chemte a finger print awm nen hian a in mil em tih lo zawng chhuak ang che u." a ti a. Constable te leh doctor te ho chuan ruang chu an phur phei ta hlawm a, Liantea erawh kan bulah a la awm thung. Nathana chuan inchhung chu a en kual a, "Rina room zawng zawng hi lo check chhuak vek teh, min zui dudu reng suh." a ti deuh kher a, thu belh hi anei ve ziah, hepa hi chu. Room te chu ka enkual a, alan dan chuan tualthahna kha an choka ah chauh khan a thleng a nih ka ring. Achhan chu room zawng zawng ka enkual a, engmah hnawk a awmlo a, a fel thlap vek a. Room ka han dapkual vel pawh chuan han rinhlelh awm em em chu a awm lem lo. Mahse Pu Siamliana te nupa room chu ka lut nawn leh ngat a, Pu Siamliana te room ah bik hian tualthattu hi a lut ngei a ni tih chu a chiang. Khum te chu lo fel thlap mahse wardrope chu a ding sawi deuh a, achhung ka en a, thawmhnaw vel chu a lo hnawk nuai mai. Tualthattu hian pawisa emaw, thildang ruk tur a zawng nasa hle a, mahse khum vel leh room chhung hrim hrim hi a chinglet vak kher lo a nih hmel. Ka chhuak a, NAthana bulah chuan engmah han rinhlelh tur ka hmuhloh thu te chu ka sawi a. NAthana chuan, "Pakhat tal dam han awm se chu kan hna pawh hi a awmsan deuh sawt nimai tur, an vaiin a that vek mai bawk si a." a ti nuah nuah a. Banga an thlalak tar te chu ka en kual a, a nalh hlawm angreng kher mai. Nathana chuan min rawn en in, "Enge i hawi kual vak vak a?" a ti a, keichuan, "Thlalak ho hi ka en mai mai mawle, a nalh hlawm em a." ka ti a. Nathana pawh chuan a han enkual ve a, thlalak pakhat, frame nalh zet mai chu a en ngun deuh bik a, kawk meuhvin, "Rina, saw saw en teh." a ti a. Keichuan, "Umm..ka hmu alawm, sava lem nalh tak a ni." tiin ka lo chhang a. Nathana chuan, "Sava lem lam ka sawi lo, saw thlalak intar dan saw a diklo. A sawi deuh a ni, thlalak an tar dang hi enkual la, a ngil thlap a, a in ang vek, mahse saw thlalak saw chu a sawi deuh tlat." a ti a. Tichuan chu thlalak chu kan va pan a, NAthana chuan, "Liante, thlalak hi han la thla teh.." a ti a. Liantea chuan thlalak chu a la thla a, a hnungah chuan engmah chu a awm chuang lo. Keichuan, "Engmah a awmloh hi, an lo tar sawi vel mai mai pawh a ni thei a." ka ti a. Mahse NAthana chuan ngun deuh hian a en a, bang chu thing atanga siam a ni a, rawng var hnawih a ni bawk. Nathana chuan, "Rinawm, helai rawngvar tharlam deuh bik hi en teh, a ziarang hi box-shape a ni lehnghal. Ka rindan chuan helai hi rawng thar hnawih deuh bik ani, engemaw tak chu ani ngei ang. Rawng hi a in dal hleih tlat, rawnghnawihna brush lian pangngai nilovin, pencil brush te tak te hmanga hnawih that bik a ang." a ti leh a. Liantea nen chuan kan han en chiang ve a, a sawi ang ngei chuan rawng chu a lo in dal hleih tak tak a, rawng tak bik chu sinte hian box shape in a awm a ni. Nathana chuan, "Hemi bang chhungah hian engemaw tak a awm a ni ngei ang, bang hi plywood a ni a, tichhiat a har lovang." a ti a. NAthana chu pawnah a chhuak a, hmawlhte hmawr zum hi ava la a. Chu hmawlhte hmang chuan rawn tak deuh lai bik chu a ziat khawk a, kan rin ang ngeiin box-shape hian bang chu tetakte hian alo kaw bik a. Keichuan, "Sir, tuboh kava zawng ange, kan chhuchhia anga, achhungah enge awm kan hre mai ang." tia tuboh zawng tura ka kal dawn chiah chu NAthana chuan bang chu a hnek ri bur mai a.

Plywood bang chu a keh rup mai a, kil li(4) nei hian a kaw ta huau mai. Bang chhung chu kan han bih a, a thim em em lehnghal. Nathana chuan a kut a rawlh a, box pakhat, lian ve tak mai chu a rawn la chhuak a. Nathana chuan, "Enteh Rinawm, ka sawi reng kha...engemaw tak a awm ang ka tih kha." a ti a, a intihtheih hmel em em lehnghal. Box ah chuan tala a lo awm a, mahse tala ah chuan chahbi tetakte alo invuah a. Tala pawh chu hawnsa hrin hrim hian a lo awm a, box chu Nathana chuan a hawng a, rubber band 10 vel chiah hi alo awm a. NAthana chuan, "He box chhungah hian pawisa an dah anga, tualthattu hian pawisa zawng zawng hi ala vek anga, pawisa t(r)awnna rubber chauh hi a hnutchhiah a nih dawn hi." a ti a. Liantea chuan, "Tualthattu hian hemi te chhungkaw pawisa thuhrukna hi a hre chiang hle tihna ani a, anih chuan an chhungte hnaivai a ni mai lo maw?" a ti a. Nathana chuan, "Chutak chu ania, an thi vek bawk si a, tu emaw tal zawh tur an awm lo hi alawm buaithlak. A hrim hrimin, an chhungkaw mizia hi a mak ve hrim hrim, an pawisa thuhrukna te hi." a ti nuah nuah a. Liantea bulah chuan, "Liante, engtik hunlai velin nge ruang hi an hmuh? Tu hmuh nge?" tiin ka lo zawt a. Liantea chuan, "Tukin dar 9 vel khan mi pakhatin Station a rawn phone a, ruang a hmuh thu a rawn sawi a. Englo ania Sir, ruang hmutu hi an thenawm ami saw a ni a, zingtin bawnghnute an leisak thin a. BAwnghnute pe tura a kawngka a kik kha an hawng miah lova, chumi hunlai chuan dar 7 vel a ni. An la tholo anih ringin a semkual leh phawt a, dar 9 velah let lehin ava kik leh a, anla chhang thei chuang silova. Mahse kawngka chu alo inkalh miahlo tih a hmu a, tichuan alut a, ruang te chu a hmu a, tichuan Station lam a rawn phone ta a ni." a ti a. Nathana nena kan hriat veloh chhan chu kan day off ni ve ve a ni a, episode hmasa lamah ka day-off zo chiah sia mak inlo ti leh ngawt ange. NAthana nena kan hnuchhuina hi nitina kan hnuchhuina kher a nilova, kan hnuchhuina zinga ka chhinchhiah ho chiah ka rawn sawi thin tih inlo hre dawnnia, a bikin bialnu neilo ho khan lo ngaithla uluk thin ang che u. Tualthahna emaw, case hautak leh thil thleng rapthlak deuh a awm hi chuan kan day-off lai pawh nise Nathana hi chu an ko zel tho a, ani lah hian min tel ve phet zel bawk si, ka ning ania. Nathana chuan, "Tualthahna thlen lai vel hi nizan zanrei lam a nih ka ring a, achhan chu thenawmten thawm an hrelo tlat. Chuan muangchangin a che a ni, he tualthattu hi. Achhan chu banga an pawisa thuhrukna pawh hi a siamtha leh thlap a, engemaw a hriat ni...pawisa bawm ruak dah let leh in a char tha leh thlap a, a hnu thup leh chuan a ngailo hrim hrim. Tual a that a, ruang pawh chhuatah thisen nen a kawi nei nuai a. Thil engemaw tak chu a awm a ni hrim hrim, thil thleng hi a dangdai riau mai." a ti a. Liantea chuan, "Bang chhunga pawisa bawm ruak a dah leh kher nachhan hi a awm hrim hrim ang, bang chhungah hian a awm tih a hre lawk bawk ngei anga." a lo tive bawk a. Nathana chuan, "Ni e, chuan thil chiang tak pakhat bawk chu, tualthattu hi Pu Siamliana te chhungkua hre chiang em em tu leh an hausa a ni tih hre chiang tu a ni." a ti a, kei erawh an thusawi chu ngaihnawm ti takin ka lo ngaithla dauh dauh thung a. Inchhung chu kan chhuahsan a, Station lamah kan in khalh phei ta hlawm a. Station kan thlen chuan DGP chuan Nathana a hmuh veleh chuan, "DCP, enge chanchin?" alo ti vat a, zawhna hlirin a khat leh dawn e. Nathana chuan, "Sir, ka rindan chuan tualthattu hi Pu Siamliana te chhungkua hrechiang em em tu a ni. An pawisa thuhrukna a hria a, bang chhungah an dah a, pawisa chu ala a, bang a th(r)iah pawh chu a char tha leh vek a." a ti a. DGP chuan, "Bang chhungah a?" a lo ti hu a. Nathana chuan, "Umm..bang chhungah an dah, chuan thalak an tar hnan a." a lo ti a.

DGP chuan, "Tual a that a, ruang zawng zawng dahtha chuang silovin tinge bang chu a char that leh kher ang le?" a ti a. Nathana chuan, "Chu chu keini pawhin mak kan lo ti a, hnuthup lehchuan a ngai lo em a, ruang leh thisen vel thian fai chuang silovin pawisa bawm ruak chu bang chhungah a dah let leh a, a char tha leh thlap bawk. PAwisa zawng zawng pawh a la fai vek a, keini phei chuan a t(r)awnna rubber chiah ani kan chan ni." a han ti deuh kher a, Amandai pawh kil khat atangin a lo khi leh suk tawh mai, duhawm thei ania. DGP chuan, "Engtin nge bang chhungah chuan pawisa a awm tih i hriat theih a?" tiin a zawt leh a, zawhna ava han ngah tak em. Police a ni a, a finna hmangin a hria a nive mai a, engkim hi hriat ve vek hi a tum a, hahthlak lutuk mai. Nathana chuan, "Thlalak an tar pakhat kha a lo sawi deuh a, thlalak chu kan la thla a, a hnung kan hawng kha kan hmu ta mai mawle." tiin a lo chhang a, Nathana pawhin a short-cut ta tawp a, sawi vek sen hi a ni thinlo, kan DGP thin hi chu sawi tawh ang khan amah tawp hi QUESTION MARK kha a ni tlat. DGP chuan, "A tha e, Nathan...he case hi i kutah awm rawh se aw...i day-off chu ni mahse, nanglo hi chu tumah hi ka ring zo tak tak lo a ni." a ti a, Nathana chuan, "Apawilo Sir, ka hna ania, ka chhuichhuak em em ang. Mahseeee..." tih pah chuan min rawn melh leh ta. A sawi ka hlauh em em, ka thil nin em em chu a sawi leh ta.."ASP Rinawma hian min puih theih chuan a alawmawm ngawt ang." a ti leh ta nge nge a. DGP tawng hma chuan, "Sir, puih kalo tum sa hrim hrim a." ka ti ta ringawt a, DGP pawh a lo kiai suk mai. Investigation nei tan leh turin Nathana nen chuan kan day-off ni ah chuan hna kan han thawk leh dawn chu a nia, ASP thar hi rawn thawk se..kei erawh hi chu bang daih ila, hna thar te hi han thawk tawh mai ila, te ka ti rum rum thin. Enpawh chu nise, i han inzui leh ngat ngat mai teh ang, keini changtupa pahnih nge nge. Nathana chuan a office ah min ko lut a, "Ninawm...day-off ah pawh hnathawh reng ngai mai." a ti bul bul a. Rum zeta melh pah chuan, "Ka ning fe, enge min tel ve ziah a?"ka lo ti vin hlur a. Nathana chuan nui sang hian, "Bawihpui, thinrim mai thin lo la...hna ka thawk anih chuan i awl tawh dawn biklo hrim hrim. Nangma tellovin ka thawk hnem tawh lutuk, ka bula i awm loh chuan a nuamlo alawm." a la ti zui. Chair ah chuan ka thu a, "Javed-a fanu kha tunge a hming khah?" ka ti a, ka theihnghilh daih a, ka hre chak leh tlat a ni, a chhelo reuh sia, minlo dem su. Nathana chuan, "Huiham, engatan nge i tih? Khatiang mi hlauhawm lutuk, Mizoram mai nilo, India rama misual turu ber fanu a nih kha...sawi sawi tawh teh suh." tih pah chuan rum zet hian min melh a. Kei lah chuan, "Awww....Javeda a sual a ni mai a, afanu te chu a sual ve hleinem. Tunge a hming khah, sawi mai mai teh." ka han ti leh a. Nathana chuan, "Alia Khan, hei bak hi ka hrilh tawh dawn lo che. Chuan a chanchin ka sawi peihlo ania, tihtur kan ngah, titi mai mai a hunlo." a ti zung zung a. Keichuan, "A hming chiah kha ania ka hriat duh...tunah khawnge an awm angle?" ka han ti leh hram a. Nathana chuan vin tak hian, "Ninawm...sawi tawh suh. Post mortem result hi engtik velah nge alo chhuah dawn?" a ti khur khur a. Nuih suk pah chuan, "Tlai velah bak alo chhuak lovang, naktuk zing daih pawh ani maithei, Thnchhepa." ka ti ve deuh ngat a. NAthana chu a tho vut a, "Titeh...i che chhuak vat zawk teh ang. Awm mai mai thei kan nilo, motor la chhuak rawh." a ti a. Keichuan, "Khawnge kan kal dawn?" ka lo tu hu a. Nathana chuan, "Pu Siamliana te thenawmpa bawnghnute sem thin kha, iva hmu ve teh ang. Pu Siamliana te inah hian tute nge lenglut thin a, a fa ten tute nge an kawm thin tihte pawh hriat angai alawm." a ti a, tichuan kan chhuak ta a.

Motora kan tlan lai chuan SI Liantea'n min rawn phone a, "Hello Sir, thil ka hrilh theihnghilh daih che u a, Pu Siamliana fate pahnih kha St.Joseph school ah an lut ve ve a, afanu Lalnuthari kha pawl 12 a ni a, a nau Ramdinthara kha pawl 11 a ni." a rawn ti a, keichuan, "Awle, i ti tha e." tiin phone chu ka dah ta a. Nathana chuan, "Bawnghnute sem thinpa chu va be phawt ila, chumi hnuah St. Joseph school ah chuan kan va kal dawnnia." a ti a. Bawnghnute sem thinpa hi a hming chu Pu Zairemmawia a ni. Pu Zaia te in ka thleng a, Pu Zaia pawh chuan tha takin min lo dawngsawng a. Thingpui in pah chuan Nathana chuan, "Pu Zai, Pu Siamliana te chhungkaw chanchin i hriat ang ang min han hrilh teh." a ti a. Pu Zaia chuan, "Chhungkaw pangangai tak chu an ni chuan ka hria, mahse chhungkaw inthup tak chu an ni. Bawnghnute hi nitin ka sem a, dar 7 velah an inah hian ka sem hmasa ziah thin. Amah Pu Siamliana hi a tho hma thei em em a, zinga bawnghnute ka va dah dawn hi chuan an in kawtah hian thu in thingpui a lo in ziah tawh thin a. Mahse tukin kha chuan alo awm ta miah silo a, mak ka ti angreng viau nangin ngaihthatlohna em em pawh ka nei chuang lo. Ka kik vak vak hnu pawh khan an hawng mai silova, an la tholo a nih ringin midang inah ka sem kual leh ta phawt a. Ka haw khan dar 9 a ri dawn tawh a, an in chu a lo la inkhar thiap mai bawk si a. Ka kik leh vak vak a, ka au nghe nghe bawk. Mahse min chhng silova, let leh mai ka tum chu an in kawngkhar chu tlem ka han nam chhin a, alo inhawng ta mai si a. Kawngka ain hawn rual rual khan an ruang te chu ka hmu nghal a, ka hlauthawngin police ka phone ta mai a ni." a ti a. Nathana chuan, "Anih tak chu, nih leh chhungkaw pa ber Pu Siamliana nen hian in innel em? Han inkawm changte chu innei ve thin ang tiraw?" tiin a zawt leh a. Pu Zaia chuan, "Nei lutuk lemlo, fel chu a fel viau chuan ka hria a, mahse mi tawng tlem tak a ni. An inah pawh hian bawnghnute sem tihloh hi chu ka leng lut zen zen lemlo khawp mai, anni pawh an rawn leng ngai lemlo. Thenawm lawka awm ni mahse chutin kan inpawh em em lova, mahse inleng hi chu a nei ve zeuh zeuh thin." a ti a. NAthana chuan, "Anih leh a inleng te zingah chuan han hmuh ngun deuh bik i nei em? Entir nan, car var nei pakhat lo leng ta se, chumi car var chu i hmu zing deuh bik thin em ka tihna anih chu, i hrethiam em?" a han ti leh a. Pu Zaia chuan, "Chutiang an awm pawh ka hre lo, ka lo chhinchhiah thlap thlap loh vang te pawh a ni mahna." a ti a. Nathana nen chuan Pu Zaia te in chu kan chhuahsan leh ta a, Pu Siamliana fate school luhna, St. Joseph lam chu kan pan leh ta a. School chu alo reh diak mai a, achhan pawh an zirlai naupangte pahnih an boral avangin ral turin naupang zawng zawng leh zirtirtu thenkhat te chu an lo chhuah vek vang a ni. An Principal chu kan va hmu a, zawhna kan zawt leh ta a. Nathana chuan, "Ka pu, in school naupangte thi ta chungchang chhuizui tura lo kal kan ni a, thil zawhduh che kan nei a." a ti a. Principal chuan, "Animaw....keipawh hei kal ve chu ka duh a, mahse police in lo kal hi ka ring sa hrim hrim a, ka lo awm ta tawp a nih hi. Enge ni in hriat duh a..han sawi ula." a ti a. Nathana chuan, "Pu Siamliana fapa Ramdinthara chungchang zawk hi han sawi hmasa ta ila, eng ang mizia nge a nih?" tiin a zawt a. Principal chuan, "Aaa....ka hre ve lutuk lova, amah bik phei hi chu ka hre vak lo. Zirlai hi kan ngah ve a, keiphei chu class 11 ah phei hi chuan eng class mah ka la ve lova, class hi ka la ve vak ngai lo hrim hrim bawk nen. Mahse Ramdinthara hi chu amah tak hi chu ka hria a, mahse ka hrechiang lo, naupang fel pangngai tak a ni chuan ka hria." a ti a. Nathana chuan, "A thian kawm thin tal te i hre lo maw?" a ti leh a. Principal chuan, "Ka hre mai lo, sawi tak ang khan naupang hi kan ngah ve a, an mizia te han hriat hran thlap thlap hi chu a har ve lutuk a." a ti a.

Nathana chuan, "Anih tak chu...anih leh a u Lalnunthari zawk hi?" a ti leh a. Principal chuan, "Nunthari hi chu a thiamthei bawk a, a nau Ramdinthara ai hi chuan ka hrechiang ve deuh. Sport te lah hi a ti thei phian a, hmanni lawk khan school sport kan nei a, chuta a lansarh vang em chuan ania ka hriat deuh ber ni. Chumi hnuah a thiam thei em em tih ka hre leh bawk a, 1st term ah pawh khan pakhatna a ni asin, ka ui takzet a ni." a ti a. Nathana chuan, "School naupang zingah hian Nunthari han el deuh ran tu emaw, amah ngeitu awm ang i hria em?" tiin a zawt leh a. Principal chuan, "Ka va hre lo ve awww...enteh ka pu, an class teacher ten kei aiin an hriatchian ka ring. Mahse mitthi vuina ah an kal vek bawk si a, hei keipawh ka kal dawn a, kan inzui phei nghal zawk dawn em ni?" a ti a. Nathana chuan, "Awle...a pawi hleinem, kal ila." a ti a, tichuan kan inzui chhuak ta hlawm a. Pu Siamliana te inah chuan YMA hruaitute chuan Pu Siamliana te chhungkua, an vaia boral tate chu an lo sun a, ruang pawh alo thleng tawh a ni awm e, Amandai leh constable thenkhatte pawh an lo awm a. Nathana chuan, "Rinawm, Amandai te hi lo bia la, keiin St. Joseph teacher te chu ka lo zawng ange. Post mortem result a chhuak tawh em tih te lo zawt la, thil hrilh ngai reng hian awm teh suh." tih pah chuan a kal nghal a, a tawpa a thu sawi hi a t(r)ul kher lo thin mange. Amandai'n min hmuh veleh chuan, "Sir, lo hrilh che ka tum a, mahse i phone i silent ami? I la thei miahlo a..." a ti a, ka phone ka han en a, Liantea'n min rawn call zawh chiah khan ngaihtuah miah lovin ka lo silent ringawt tih ka hrechhuak leh chiah, ka tar tawh anih hi, engmah hi ka hrechiang thei tawh lo. Inthlanhrung tak chuan, "Aww...anih hi, apawi love, ruang lo thlenna a rei tawh em?" tiin ka zawt a. Amandai chuan, "Aih, dar 12 vel kha niin ka hria...YMA hruaitute hian an chhungkua hi veng mipuite nena vui ve ngei nise an ti a, ka lo phal tawp mai asin." a ti a. Keichuan, "Aww...apawi love, nihleh post-mortem result hi?" ka ti leh a. Amandai chuan, "Tlai dar 4 velah alo chhuak dawn a ni awm e." a ti a. Nathana chu a la bo vang vang mai a, inchhung a va luh ve kher chu ka tumlo bur, pawnah chuan Nathana lo nghah pah chuan meizial ka lo zu a. Minute 10 vel hnuah chuan Nathana chu a lo kal a, "Tuthar te a awm em?" ka lo ti a. Nathana chuan ner nung chung chuan, "Engmah thuthar vak a awm lo." a rawn ti phei nuah nuah a. Tichuan sikret chu phawrh ve nghalin a zu ve nghal a, eng enge maw sawiin kan titi dun ta vel mai mai a. Kan zuk zawh chuan Nathana chuan, "Vuina programme saw a zo tep tawh a, va awmhnai ve ila." a ti a, kan va kal hnai ve deuh a. An veng YMA Leader chuan, "Awle, thusawi tura han sawm ve hrim hrim ka duh a. Hei...vanduaithlak tak maii, a chhungten vanduaina an tawk a, a hrehawmin a rapthlak em em mai a. Amah lo ding chhuak se, Tlangval Lalrinfela, Pu Siamliana fapa upa ber a niin kan hria a. Mahse, sawi chu a ni angem chu ka hrelova, amah pawhin minlo hrethiam a niang chu. Lalrinfela hi Pu Siamliana fa hmasa a ni a, vengdangah a nu nen an awm mek a. A nu erawh a damloh avangin alo kal theilova, keini pawhin kanlo hre miah lo a, mahse hei vawiinah kan bulah a rawn insawi a, thu han sawi ve se, amah pawhin an chhungkaw chanchin hi sawi chiang se a tha ange." a ti a, mak ti tak chuan Nathana nen kan in en hau mai a. NAthana chuan, "A fa hmasa a? Ngatinge kan hriat ve siloh?" a ti hu mai a, keipawh chuan, "Enge maw awmzia le?" tih bak sawi tur ka hre lo. Lalrinfela chu alo ding a, "Kei hi tuna thi ta Pu Siamliana fapa ka ni a, han inzep kual vel ta lo mai ila. Kum 27 na ka hmang mek a, kum 6 ka nih lai khan ka nu leh pa te hi an inthen a, ka pa hian nupui dang a neih san a ni." a ti ta mai a, Nathana nen chuan kan bo tulh tulh mai.

Lalrinfela chuan sawi zelin, "Ka nu hian min enkawl seilian zel a, ka nu hming hi Chanchinmawii a ni a, pasal dang pawh a nei ta lo thak a. Ka pa hian a chang chang chuan min rawn tlawh ve thin a, pawisa te pawh min rawn pe ve thin a. Han inpuan chu a zahthlak khawp mai, mahse min hringtu pa ngei mai a han boral ta chu ka tuar ve khawp mai a, min duhlo tu leh min hnawl tu ni mahse ka pa a nihna a la bo chuang lova, chuvang chuan keipawh YMA hruaitute bulah vawiin hian ka pa te chhungkua an boral tih ka hriat veleh ka rawn insawi ta tawp mai a ni. Ka pa hi in hriat theuh angin hemi venga an rawn awmna ala rei lo anga, keipawh hemi veng ka nilo bawk a. Ka pa hian ka nu nen min hnawtchhuak a, tichuan nupui dang a nei ta a ni. Ka lo puitlin deuh hnu hian ka pa te in, he in, tuna kan awmna mek ah hian ka leng lut ve fova, a fate han ti ila, ka unau te pawh an ni ve tho ang chu. An ni te nen pawh hian kan inhaw lemlova, kan innel bawrh bawrh thova, mahse ka pa nen hian kan inkarah khi alo awm tawh miau avagin han inpawh em em theih a ni tawh lova. Tukina an thi tih ka hriat khan min th(r)awng em em a, ka nu phei chu nikhaw hrelovin a awm hial a ni." a la ti ta deuh deuh a, ava mak leh zel ve mawle. Nathana chuan, "Motor bulah lova awm la, an YMA Leader saw ka rawn hruai ange, thil zawhfiah angai tlat." a ti a, motor bulah chuan ka lo nghak ta a. Nathana chuan an YMA Leader chu a rawn hruai a, a hriatthiamloh hmel em em lehnghal, a hawi hu hu mai. Nathana chuan, "Ka pu, Lalrinfela saw tunge a? Kan lo hriat dan chuan Pu Siamliana hian fa pahnih chauh a nei khan kan hre si a, engemaw awmzia le?" a ti a. YMA Leader chuan, "Nia, Pu Siamliana te hi kan vengah hian an rawn awmna a la rei lova, an rawn awm hma hian an in te pawh hi a sakchawp tir a ni. Vawiin chawhma khan police te bulah khan kan veng mi an nih angin, ruanghlawm tu tur an awm dawn silova, tute nge an chhungte kan hre silova, an chhungkuain an thi vek mai bawk si a. Keimahni hian vui ve ta mai ila tiin dil a, inspector hmeichhia khan a phal bawk a, kan lo vui ve ta mai a nih hi. Kan inpuah chah vel lai khan Lalrinfela hi alo kal a, a chanchin te a rawn sawi a, tichuan vuina programme ah pawh thusawi turin ka sawm ta a nih kha." a ti a. Keichuan lo pawtc hatin, "Mahse ka pu, an thenawm chiah Pu Zairemmawia sawn lo awmthar a nih thu a sawi miahlo kan bulah chuan, enge awmzia?" ka lo ti a. YMA Leader chuan, "E..saw mi te pawh saw lo awm thar an ni a, an lo awmna ala rei lo." a ti a. NAthana chuan, "Kan lawm e, i kal thei e." a ti a, tichuan YMA Leader chu a kal ta a. Nathana nen chuan Kanan Veng chu kan chhuahsan leh ta a, Station lamah kan let leh ta a. Station kan thleng chiah chu Doctor Samuela'n minlo nghak leh der tawh mai a, doctor chuan, "Result a chhuak e." a lo ti a. Nathana chuan, "A lawmawm e." tih pah chuan result chu a en a, doctor chuan, "Sir, Pu Siamliana khan a dulah vawi thum vih a ni a, a nupui kha chu vawikhat chiah vih a ni. Anfa te pahnih Ramdinthara leh Lalnunthari te kha vawi 2 ve ve vih an ni a, chuan an fapa Ramdinthara banah khan inchiu na hnuhma hmuh a ni a. Chumai bakah a taksa chhungah khan damdawi ruih theih chi hmuh a ni bawk a, alan dan chuan an fapa Ramdinthara kha damdawi ti thin a nih hmel." a ti a. Nathana chuan, "A lawmawm e.." tih pah chuan a keu zel a, thlalak a hmu a, thlalak chu kawr, thisen a kai nuai bawk a. Nathana chuan, "Hei hi enge awmzia?" a ti a. Doctor chuan, "Ngun takin thlalak kha en la, kha kawr kha Pu Siamliana kawr anih kha. Kawra thisen kai kha han en chiang la, engemaw zia rang a neiin i hria em?" a ti a. Nathana chuan a han en chiang a, "Umm...pheikhawk hnuai ziarang a ang ka ti. Anih chuan tualthattu hi a pheikhawk ah thisen a kai anga, tichuan Pu Siamliana hi a rap leh tihna a nimaw?" a ti a.

Doctor chuan, "Aw...a niin ka ring. A vih zawh hnuah a dulah a rap leh vak vak a ni ngei ang, thlalak kha en la, pheikhawk hnuai ziarang kha a darh nuai kha. Chuan kha pheikhawk hnuaiah khan chiang takin CONVERSE tih a inziak bawk." a ti a. Nathana chuan, "Ava ropui ve doctor, kan hnuchhui a awlsam sawt dawn e." a ti a, doctor chu a kal ta a. Nathana chuan, "Rina, hei dar 3 ri dawn, haw tawh ila." a ti a, keichuan, "Nia..mahse Tluangtei te ina len kawi ka tum asin." ka lo ti vat a. Min eiloh hmel deuh chuan a han der nung a, "Awle, kal rawh...min kawm peih ve tak tak lo a nih hi." ala ti zui. Chumi tlai chuan Tluangtei te inah chuan ka leng a, hmangaih biahthu di, thlum tak tak kan han in fah dun leh ta mawlh mawlh a, ava han nuam thei tak em. Hemi tlai zet hi zawng, inneih hial te kan han sawi thleng ta mai a nih kha. Mahni cousin te mah nise, chutia han inchhung hnai em em kan ni hran lo bawk nen, a pawi tihna ka nei vak lo. Zan alo ni a, Nathana'n engmah a rawn sawi leh tak silovah chuan Tluangtei te ina len leh chu ka tum a. Mahse min hauh leh takin tiin Group message ka check leh a, mahse engthu pawimawh mah a awmlo hlauh. TIKTOK lam videos tih vel mai mai chu kan DGP ber chuan a rawn post zut zut mai anih kha, Amandai lahin sticker mak deuh deuh a rawn thawn vak vak bawk a, SI Liantea lah hian a boss Amandai hi a beisei tih hriat takin a sticker apiang chu kutzungpui lem pek pah chuan, "Nei tha hle mai...ka duh ve boss." tih vel mai mai chuan alo reply ve chhen lehnghal. An inhmeh tawk chauh e, a len theih ta e ti rilru chung chuan ka insiam mawlh mawlh a. Ka room atanga ka chhuak chiah chu Nathana a rawn lut hlawl mai, "Rina, i hrelawk ami, kha...ilo insiam thlap animaw?" ala rawn ti lut zui a, engtak chu ni leh ta maw? Ka ngei lutuk chu, "Enge ni leh ta?" ka lo ti vin hlur a. Nathana chuan, "Kan chhuah angai, engkim ka hre tawh." a tih takah chuan ka phur ngei mai, rang tak chuan kan inzui chhuak a. Nathana chuan Mission Venglam min panpui a, hrethiamlo tak chuan, "Khawnge kan kal dawn?" ka ti a. Nathana chuan motor khalh pah chuan, "Pu Siamliana nupui hlui te inah...Mission vengah hian an awm alawm." a ti a. Ka la hrethiam chuanglo, "Enge kan tih dawn?" ka ti leh hu mai a. Nathana chuan, "A fapa upa ber kha...Lalrinfela kha, khapa kha kan man dawn." a ti ta mai a. Mak ka ti hle mai, "Engati maw?" ka ti leh hram a. Nathana chuan, "KAn thleng anga i hre mai ang." tih pah chuan a phone a, Amandai a call a. Amandai chuan phone chu lo pick-up in, "Hello Sir?" a rawn ti a. Nathana chuan, "Amanda, DGP leh Liantea te nen Mission Vengah lo kal rawh u, engkim ka hre tawh e. Tunah Rinawma nen kan kal mek a, location ka on anga, min,lo chhui zui zel mai ru." tiin phone chu a dah a. In pakhat kan thleng a, Nathana chuan a kik karh karh a. Hmeichhe aw hian, "Lo lut rawh." a lo ti a. Nathana nen chuan kan lut a, Nathana chuan, "Ka pi, Chanchinmawii i ni em?" a ti a. Chunu chuan, "Aw ni e.." tiin alo chhang a. Nathana chuan, "Khawnge i fapa Lalrinfela hi a awm?" tiin a zawt leh a. Chunu chuan, "A chhuak a, alo haw tep tawh ang. Enge ni ta, enge in duh a? Tute nge in nih?" a ti a, chutih lai chuan kan hnung atang chuan Lalrinfela aw ngei mai chuan, "Nu, kan in bula motor hi tute ta nge a? Kalkawng a dal vek alawm.." a rawn ti lut nuah nuah a. Rinfela lam chu kan va hawi phei a, min hmu chu a ding chat mai. Second 5 vel chu kan ngawi thap hlawm a, chutah Rinfela chu a tlan thut mai a. Nathana chuan, "Rinawm, um nghal ang." tih pah chuan kan um nghal a. Rinfela nu chuan, "Enge awmzia...tute nge in nih?" tiin a rak chul mai a, mahse chhang hman kan ni lo, Rinfela chu kan um nghal a. A tlan thuilo kher mai, Nathana lah sakei ang mai, a tlanchak em em bawk si a, reilo teah chuan a va man thuai a. A man hnu second 20 velah ka va thleng ve chiah a, ka la hah em em zui.

Nathana chuan a han beng thuai a, "Engvangin nge i tlan chhiat?"a ti a. Rinfela chuan thinrim tak hian Nathana chu a melh a, "Engmah pehhel kual angailo, DCP...ka hria alawm, min man rawh. Engkim i hre tawh ani tih ka lo ring thiam nghal vek alawm." a ti a. Nathana chuan, "Enga? Engvangin maw?" a ti a. Rinfela chu a nui suk a, "Tualthattu chu kei hi ka ni, i hriat kha...inzep kual leh dawtsawi ka peih vel lo. Ka thah an ni tih hre reng chunga lo kal i ni anilawm ni? Ni e...ka thah an ni, an vai khan ka thah an ni." a ti nghal zung zung mai a. Chutih lai chuan Amandai, Liantea leh DGP te pawh an lo thleng ve ta nghal a. Rinfela chu kan en thap a, DGP chuan, "Nathan, Rinfela tih a ni ngei amaw?" ala rawn ti hram a, Pu Question Mark-a tak hi chuh, a inpuan thu kan lo ngaithla zo chauh a, hahthlak emai. Nathana chuan, "Vawiin tlai kan haw khan Rinawma erawh a leng kawi a, keichu Pu Siamliana te in lamah ka phei leh a ni. A chhan chu vawiin tlai khan doctor khan Pu Siamliana kawrah khan pheikhawk hnuai thla a lang a ti a, chu pheikhawk hnuaiah chuan CONVERSE tih chiang takin alang a ni. Vawiina vuina programme an hman lai khan Pu Siamliana fa hmasa Lalrinfela hian thu a sawi a, a pheikhawk bun converse sen kha a nalh ka tih em avangin ka mit ala em em a. Ahnuah doctorin tualthattu pheikhawk chu converse a nih thu min hrilh a, mahse ka la ringhlel chuang lo. Mahse tlaia ka rawn phei leh khan Lalrinfela finger print hi lak hrum hrim ka duh a, a bulah va kalin ka va bia a. Tichuan ka card phawrhin mamawh a nei huna minlo call turin tiin card chu ka pe a. A lak chiah khan ka card dang zawk chu phawrin, 'Hei zawk hi..' tiin ka card dang zawk chu ka pe ta daih a. Tichuan fimkhur takin card pakhat zawk, min rawn pek let leh zawk chu a sir kilah vuanin sarangah ka khung ta a. Ka rinhlelh em em vang pawh anilo, mahse ani lo kha chu han rinhlelh tur an awm silova, kan finger print neih ho te nen a in mil em tih enchhin ka tum a ni. Doctor Samuela bulah ka let leh a, doctor chuan ahmaa, tualthahna thlenna hmuna choka chem te-a finger prints te chu Pu Siamliana te chhungkua, an vaia finger prints te nen a inmil loh vek thu a sawi a. Tichuan Doctor chu card chu ka pe ta a, Lalrinfela finger prints chu la in a test ta a. Choka chemte leh tualthattu finger prints kan nei zawng zawng te nen a in mil ta vek a ni." a ti ta a, ka boss Nathana nge nge, ka va chhuang thin tak em. Nathana bawk chuan, "Le...inpuang rawh le." ati a, Lalrinfela chu a inpuang ta a, "Ka pa kha mi lerh tak leh hurherh tak a ni a, kum 6 ka nih laiin ka nu nen hian mn hnawtchhuak a, tichuan nupui dang neiin a nupui thar nen chuan fa pawh pa 2 lai an nei leh a. Khatih hunlai khan ka la te em em a, engmah ka la hrethiam lo. Mahse kum 15 ka nih khan ka nu hian ka pain min duhloh thu te, min hnawhchhuah dan te chu engkim min hrilh ta vek a, phuba lak ka tum ta a ni. Ka pa chu khawnge a awm tiin ka zawng kual reng a, atawpah chuan Kanan VEngah inthar sa in nuamsa takin an lo awm tih ka hre ta a. Tichuan a fapa Ramdinthara chuan damdawi a ti thin tih ka lo hre veleh zel bawk nen, a fapa chu thainah ka saim ta phawt a ni. Tichuan afapa Thara chu damdawi ka lakpui thin a, a chang chuan ka pawisa te pawh ka hmantir thin. Min kawmngeih tawlh tawlh a, an inah te pawh chuan ka leng ta fo mai a. Ka pa chuan tunge ka nih a hrelo hrim hrim, keipawhin ka sawi ngailo. Ka hming erawh ka phuahchawp lova, mahse ka nu hming ka phuah chawp a, akn veng hming ka phuahchawpa, pa ka la nei angin ka insawi bawk. Mitthi vuinaa ka pa a rawn len thin thu te kha chu dawt vek a nih kha, min zawn chhuah pawh a tum lo a, min theihnghilh hmin thak tawh a ni. Chungte chuan min ti thinrim zual a, phuba lak ngei ka tum a ni" a ti a.

A inhnit feih feih a, a sawi zawm leh a, "Tichuan, a fapa Thara hian a damdawi ruihnawi chang hian an in bang, sava thlalak frame hnunga a pain pawisa a eiruk ho a dahthat thin thu a sawi ta fo mai a. Sum kan lo mamawh ve bawk nen, ka pa bulah chuan tunge ka nih inpuana, ka ro chan ve tur dilchhuah ngei ka tum ta a. Nizan khan ka leng ta ngei a, ka lengrei khawp mai. Dar 11 vel thleng chu ka leng a, kan titi tui ngang mai. Chutah ka pa bulah chuan tunge ka nih tih ka sawi ta a, a fapa, a duhloh hnu ngei ka nih thu ka sawi ta a. Tichuan ka ro chan ve tur te chu ka dil a, mahse ka pa chuan min beng a, chhuak turin min ti a. Min hmangaih loh thu leh engatan man min tihloh thu a sawi a, nasa takin kut min thlak ta siah siah mai a. Ka thinrim lutuk chuan tum loh deuhin an choka a chemte chu lain ka that ta vek mai a ni. Ka inchhir ve tho asin, thah kha ka tum biklo. Mahse thilsual ka ti ta sa sa, fimkhur tak chuan ka che zel tho a, bang hnunga pawisa awm chu lakchhuah ka tum ta a. Tichuan chemte chuan fimkhur takin bang chu ka zai hawng a, pawisa bawm chu ka la chhuak ta a. Chahbi ka zawng kual leh a, ka pa room ah chuan an wardrobe ah ka hmu hlauh a, tihchuan pawisa chu la chhuak vekin bang chu ka char tha leh a, fimkhur takin ka chhuak ta a ni. DCP Nathan, vawiin tlaia min rawn hmuh kha, min man hi ka ring sa reng a ni. Achhan chu maw....ka hria che a, i fing a, hnuchhui thiam tak i ni tih ka hria. Ka hmuh rual che khan ka tawpna a hnai ta tih ka hria a, ka thil tih man ka hmudawn tih pawh ka hria. Min man rawh u...ka sual man chu hmuh ka inhuam e. Mahse ka ngen ache u...ka nu saw hlim takin awm se, engtin mah tive suh ang che u." a ti a. Nathana chuan, "I nu chu kan kutah dah rawh...mahse Rinfel, hei hi min hrih teh. I pa te chhungkua i that vek tawh a, an ruang te chu i dahtha chuanglova. Engatinge bang kha i char that leh kher a? Khatia i hnu i thup leh kher kha enge a tangkaina?" a ti a. Rinfela chuan, "Ka pa kha ka that a, ni e....ka that tehmeuh mai. Mahse ka pa a nihna ala bo chuanglova, tumloh taka ka thah a ni bawk. Eiruk hmang a ni a, mi rethei te chan ai eiru thin a ni. Mahse mipuiin ka pa kha eiru angin ngai lo se, mi ropui tak angin Kanan Veng te khan vui liam se ka tih vangin pawisa an dahthatna kha ka thupsak leh ta a ni." a ti a. Nathana chuan Rinfela mit takah chuan a en a, "Phuba lak i duh vang tih chu ka hria, mahse i phuba lak tum dan erawh a diklo a ni. Phuba chu nang nilovin, Pathian zawkin alaksak em em ang che. Mahse i nghak theilova, nangmaha lak i tum a, tual i thah phah a, i pa ngei pawh i that ta a nih hi. Chuvangin i nu hi engtikah mah i hmu leh tawh lovang, i hmu leh a nih pawhin jail ah a rawn kan zeuh zeuh che anga, abak chu inhmuhna hun emaw, awmndunna hun innei tawh lovang. I dam chhungin jail ah i hun i hmang tawh anga, jail ah bawk i thi dawn a ni." a ti a. Tichuan mahni hringtu pa ngei thattu, Lalrinfela chu kan phurliam ta a ni.

THE END