NATHAN SEASON-3 (Episode-1) SCYTHIAN KNIFE Part-1 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-1) SCYTHIAN KNIFE Part-1 (by : Aaron Malsawmdawngzuala)

Unread post by Aaron Dustin » June 1st, 2020, 9:14 pm

NATHAN SEASON-3 (Episode-1)

SCYTHIAN KNIFE (Pt-1)

Written by : Aaron Malsawmdawngzuala

**********

(Thuhmahruai : Nathan Malsawmkima leh Lalrinawma te thiandun pawh an lo let leh ta e, tuun Season ah hi chuan a kal hmang kan thlak deuh dawn a, episode khat ah an chhuichhuak zung zung tawh dawnlo a, thiamna a lo sang ve zel a, misual te pawh an fing tulh tulh a. Chuvang chuan Nathana te pawhin case pakhat lek pawh hi an beirei ve deuh thin tawh dawn a, case pakhat chhuichhuah nan pawh hian episode 4-5 vel lai a ngai tawh dawn tihna anih chu. Engpawh chu nise, Nathana hnuchhuina lo chhiar thin te leh lo ngaithla thin tute, inza vaiin WELCOME BACK. Tin thil pakhat leh...Episode tam zawkah hian Rinawma sawi anga ziah a ni tawh dawnlo a, thawnthu pangngai ang tawpa sawi a tam deuh tawh zawk ang.)

Zan dar 11 vel a ni a, Pu Zohminga chuan a phone chu a khawih mual mual a. Number pakhat hi ahmet chhuak a, "Hello, chemte kha tunah ka mamawh a ni. Ka assistant ka rawn tir dawn a, tunah alo kal nghal ang." a ti a. Phone ami chuan, "Awle, ka apartment ah ka lo nghak ange." a ti a. Pu Zohminga assistant Mickey-a chu chemte la tur chuan a chhuak a, apartment chu a thleng thuai a. A chhungah chuan a lut a, mahse tumah an lo awm lo. Dawhkanah chuan lehkhabu a lo inchhawp darh nuai mai a, lehkhabu karah chuan chemte nalh tak, rangkachak leh lunghlu niawm tak inbel a lo tle sep sep chu ahmu a. Pu Zohminga'n a pek, chemte thlalak chu a han en vang vang a, a in ang chiah chiah tih a hriat chuan chemte chu puanin a fun a, Pu Zohminga te in lam pan chuan a inkhalh phei leh ta nghal a. Pu Zohminga chuan chemte chu a han en vang vang a, enlenna nen meuha a han en hnu chuan chemte chu a paih thuai mai. Thinrim tak hian a tho a, Mickey-a bulah chuan, "Alem a nih hi, kha mihringpa khan min bum a ni. Khawnge a awm?" a ti ta khur khur mai a. Mickey-a chuan, "A awmlo, inchhungah khan a awmlo hrim hrim." tiin a lo chhang a. Pu Zohminga chuan, "A lem siamsak tu pawh hi kan man ngei a ngai ang, ngawiteh..he chemte hi siamthat tura ka pek khan restorer pakhat hmelhriat tha deuh a neih thu kha min hrilh tak e. Engpawh a ti thei a ni, mitenawm pa chu...cheng nuai chuang man a ni asin, min bum a ni." a ti vak vak a. Mickey-a chuan, "Lungngai suh ka pu, ka zawngchhuak em em ang." a ti a. Pu Zohminga chuan, "Tunah...tunah zawng chhuak rawh." a ti vak vak a. Mickey-a pawh chu a nam chhuak rawk rawk a, a mangang hle mai.

Zing a lo ni a, Ropuia, kum 28-a upa, nupui nei tawh leh fa pakhat nei tawh chu a room ah chuan rilru hah hmel tak hian a thu a. Wardrobe chunga lehkha them lo awm chu la in a chhiar a, a nupui Julie hawrawp ngei mai a ni. Lehkha them ah chuan, "Ka thei tawhlo, min ngaidam rawh Ropui. Ka chhuak mai ange, a hrehawm emai." tih hi a lo inziak a. Chutih lai chuan Ropuia u, Margareth-i chu a lo lut a. Margareth-i chuan, "I rilru ava hah hmel ve, Bawiha?" a va ti a. Ropuia chuan lehkhathem chu pek pahin, "Enge awmzia? Hei hi enge awmzia ka u?" a ti a. Margareth-i chuan lehkha chu a en a, "Engdang nilove, nizanah khan ka nu leh Julie an inhau leh a, chuvang chu mawle. A thawmhnaw a pack mawlh mawlh a, Sangsanga (Ropuia fapa) nen an chhuak ta a nih kha." a ti a. Ropuia chuan, "Khawnge an kal?" a lo ti vat a. Margareth-i chuan, "A sawi dan chuan a nu te ina kal a tum thu kha a sawi a, inngaihtuahna hun a mamawh thu min hrilh bawk." a lo ti a. Ropuia chuan, "Enge awmzia, engtia inngaihtuah maw?" a ti a. Margareth-i chu a thaw hak a, "Ropui, Julie hian inthen a duh niin ka hria." a ti a. Thinrim tak chuan Ropuia chu a tho a, "Ka nu vang bawk em ni inthen a duh chhan?" a ti a. Margareth-i chuan, "I hriat kha...ka nu te chu a thu a duh sia, sawi sawi pawhin awmzia a neilo." a ti a. Ropuia chuan, "Ka nu hi chu awww...engtikah tak tawpsan ang maw? Ka kham tawh tak zet a ni, engtin nge maw kan zawm zel dawn le?" a ti nuah nuah mai a. Margareth-i chuan, "A buaithlak a nih hi...thihna chauh lo chuan min then hrang dawnlo a nih hi.." ahan ti chuai raih a. Margareth-i hi kum 30-a upa a ni a, nula a la ni. Hmeltha lutuk tia sawi tur chu a nilo a, mahse hmel fiah tak, fresh em em mai leh hmel hmuh nuam tak a ni a. A pian pawh a nalhin a sam pawh a kir sei hnap mai a, a hmel en mai chuan kum 25 ka ni pawh tise, awihlo an awm lo ang tih tur hial khawpa nula chhelo a ni.

"Boruak chu a nuam khawp mai, mahse Aizawl ai chuan a vawt deuh a nih hi. Tluangte, i inluah ah hian thlakhatah engzat nge i chawi?" Nathana chuan a ti a, Tluangtei chuan nui chung hian, "Ka sawi duh kherlo e a, a tam lemlo. Innu i ngai nghal ringawt animaw?" a han ti a. Rinawma chuan, "Amah zawk khan 'zin ang zin ang' a ti a nih kha, ka rin ang chiahin a nupui fanau te a ngaihtuah leh si kha ka ring reng ani." a lo ti ve bawk a. Nathana chuan, "Nia, chawlh kan nei dun khat si a, chubakah engtik lai mai pawha hnuchhui reng zawng, rilru a ipik em alawm. Mahse ka fapa te pahnih kha ka ngaihtuah em alawm le, kum em pawh anla tling si lova." a ti a. Tlaungtei chuan, "Aww...Sanvi a awm a, i nu leh pate pawh an awm bawk a, ngaihtuah lutuk duh suh. Chubakah Amandai leh Liantea te pawh nangmahni chhawk turin an awm bawk a, tunah chuan hahchawlh ve in mamawh alawm. Kum tharah bak in haw tur a nilo, Krismas leh Kumthar chu hmang ngei ngei ang che u. Chuan Urlawk zana ar kan tur pawh ka vulh lian tawh teh mai ania, in lo zin ta rau rau." a ti a, a nui har har a. Rinawma chuan intithei deuh tak hian, "Englo ania Tluangte, Third-Wheel reng a peihlo aniang, Sanvi hruai ve dawn lahin naute te an ngaihtuah awm si a, in thenawmnu Margareth-i saw kan tihpui mai dawn em ni?" tih pah chuan a han khi sung a. Nathana chuan, "Ve mai mai ache, nang angin ka lerh lo aw..ka nupui Sanvi tluka hmeltha an awmlo." a han ti a, an nui dar dar a. Nathana, Rinawma leh Tluangtei te chuan an tukthuan eitur rawng chu titi pah chuan an bawl chhunzawm mawlh mawlh a. Purun chan mawlh mawlh pah chuan Tluangtei chuan, "E taka, U Nathan, nakinah tel va lei teh aw...ka han tir ve reng reng teh ang che." a han ti vel a, Nathana chuan nuih pah chuan, "Tehreng mai, i thu vek alawm." a lo ti a. Krismas a hnai tawh bawk a, khua a vawt angreng hle mai. Nathana leh Rinawma te hi an pahnihin chawlh an la a, Krismas leh kumthar vuakvet chhunga chawlh hmang turin Tluangtei hnahtawhna khua ah an zin a, Tluangtei inluah laiah Tluangtei chu Krismas leh kumthar hmanpui turin an zin a ni. Tluangtei hian hna a nei ve tawh a, a hna avang hian khaw danga inluah a ngai a, a hnathawh erawh ka hre ta hauh lo, nakinah Rinawma kan zawt leh mai dawnnia.

Pi Muani chu mood fuh hmel tak chuan a zai hlarh hlarh mai a, an sitting rooma a pangpar khawi te chu tui a pe a. Chutih lai chuan a fapa Ropuia chu a rawn kal a, "Nu, thil sawipui duh che ka nei a nia." a rawn ti a. Mahse Pi Muani chuan a chhanglo, pangpar chu tui ala pe mawlh mawlh a. Ropuia chuan a aia ring hian, "Nu, thil sawipui duh che ka nei ka tih chu." a han ti leh a. Mahse Pi Muani chuan a chhang chuanglo, Ropuia pawh a thinrim ta hle mai. Anu chu ava pan phei a, "I beng a ngawng em ni? Thil sawipui duh che ka nei ka tih chu...i hrelo em ni?" ava ti vin tuar a. Pi Muani chuan Ropuia chu rum zet hian a melh a, "Sawipui chi pawh ini em ni? A auvin i au vak vak alawm." a lo ti let hrep a. Thinrim tak hian Ropuia chuan, "Engtin nge Julie ilo tih a? Inthen a duh hial asin, engthil nge ilo tih leh tak a? Nangmah vang anih vaih chuan maw...enge ka tih ang tih hi ka sawi lawk thei biklo.." a ti khur khur a. Pi Muani chuan, "Lalropui, engmah i hrelo, ngawi hmak rawh." a ti a. Ropuia chuan, "Ka ngawilo ang, nang ang nu ka nei che hi chu ka zak ngawih ngawih." tiin a vin khur khur a. Pi Muani chuan, "Ropui, i zak nange..." a tih chuan Ropuia chuan dawhkan chum bur pah chuan, "Ka ngawi lovang, nang zawk kha ngawi hmak rawh." a ti vin tuar a. Pi Muani chuan ring tak hian, "Margareth...Police phone vat rawh, i nau hian min that duh mai ang." a tiin a au vak vak a. Nathana leh Rinawma te chuan pawnah meizial an lo zu mek a, Nathana chuan, "Tun lawk khan authawm ka hria.." a ti a. Rinawma chuan, "Eng authawm maw?" a lo ti hu mai a. Nathana chuan, "Min thah a tum...tih vel a niin ka hria." a ti a. Rinawma chuan nuih suk pah hian, "A awihawmloh e...Sir, Aizawl a nihloh hi..thingtlang a nih hi. Chubakah i rilru ah kan Station ringawt a awm aniang chu mawle...i bengchhe ri a nih kha." a lo ti sam et a. Tluangtei chu lo chhuakin, "Enge inlo sawi a?" a rawn ti a. Rinawma chuan nui chung hian, "Hei...i u Nathana hian mangang au thawm a hria a ni awm e." a ti a. Tluangtei chu a thaw hak a, "U Nathan, please...thlamuang deuhin awm rawh. Khaw zalen leh ralmuang tak anih hi...Aizawl khawpui anga insual buai, rui buai leh buaina siam te, tualthahna tih ve te a awm ve ngailo. Hmanni deuh khan accident a thleng a, chu chu a nimai." a ti a. Nathana pawh chuan, "Nia, ka bengchhe ri mai mai aniang." a ti ve mai a. Tluangtei chuan, "E chuan maw, sawlai lawkah sawn dawr chu a awm a, tel chu va lei teh...U Rina nen hian chance min han pe lawk teh." ahan ni vel a. Nathana pawh chuan, "Ni e..mahse chaw ei a hun tep ania, thil pawi te kha inlo ti ange, nula leh tlangval inla nih kha aw.." tih pah chuan a han fiam zeuh a, a kal ta a.

Margareth-i chu hmanhmawh tak hian a room atang chuan a rawn chhuak a, "Enge awmzia?" a ti a. Pi Muani chuan, "I nau hian min that duh mai ang, zak theilo lutuk. Tiang em em a rapthlak mai, mahni nu pawh thah hrehlo." a lo ti chiam chiam a. Ropuia chuan, "Engtik laiin nge thah che ka tum a? I che over ve hrim hrim a nih kha." a lo ti ve bawk a. Margareth-i chuan, "A tawk...thenawmte hriattir kher in tum em ni?" a ti a. Pi Muani chuan, "Hetiang tur hian ka enkawl lo che, i hria em?" tih pah chuan rum zet hian Ropuia chu a melh a. Ropuia chuan, "Ka nupui nen pawh nangmah vangin a nih hi kan inthen dawn tak ni...nu nasa tak i nih kha. Ka u nen hian kan nun i tichhe vek a, min ti khawlo vek tawh. Tunah ka chhungkaw neihchhun, ka nupui leh ka fapa te chu i lo hnawtchhuak leh a, min tichhiat vek hi i duh em ni?" a han ti vak vak a. Pi Muani chuan, "I nupui kha mi zaktheilo leh mi hur a nih kha, engmah i hrelo." a lo ti let hrep mai a. Ropuia chuan, "Nang zawk kha mi zaktheilo chu i nih kha, ka fapa Sangsanga pawh kum 5 chauh ala ni a, mahse a haw nghal em em che ania. Achhan chu i dikloh vang a ni, i khawih takngial pawh a hlau ania." tiin a ang bawrh bawrh a. Pi Muani lah ngawih mai ala tum biklo, "I fapa te kha chuan tupawh a haw vek alawm, kum 5 chauh ala ni a, mahse anu a chhun aniang, mi huat nachang a hre nghal ania. Hetia min ankhum vak vak lo khan i fapa kha mi a enkawlnaah dah rawh." a han ti hrep a. Ropuia chuan, "I va han tawnghnem tak.." tih pah chuan ben a tum uai uai hman a. Margareth-i chuan lo dang vatin, "A tawk, duhtawk ru." a lo ti a. Ropuia chuan, "Thi daih rawh, thi la kan inchhung hi a nuam zawk ang." a ti a. Pi Muani chu a tap a, "Ka kal dawn...awi ka puakkeh takngial dawn." tih pah chuan pawnah a chhuak ta daih a. Margareth-i chuan, "Bawiha, insum rawh...inbengdai rawh." a ti a. Ropuia chuan, "Tikhan min ti ziah suh, ka nu hi ilo tan ziah mai." tih pah chuan a roomah a chho ta daih a. Chutia Pi Muani te chhungkaw inhau buai nuai nuai mai chu an thenawm chiah a mi, lehkhabu ziak thin leh novelist nih tum ruh em em mai, a hna avang thoa hemi khua a awm, Pu Robert-a te inhnuaia awm mek, Mawitea chuan en lenna (binocular) hmang meuhvin an inkawt atang chuan alo en reng a. Nathana pawh chu tel lei tur chuan Bike-in dawr lam chu a pan mek a, gate atanga Margareth-i lo chhuak chiah chu, kawng a chhe bawk nen, a nal deuh bawk nen, Margareth-i chu asu teuh ngei mai. Nathana chuan inthlahrung tak chuan, "Ka tihpalh lutuk aw." a ti a. Margareth-i chuan, "A pawilove, mahse lehpek ah chuan i fimkhur tawh dawnnia." ahan ti deuh kher a. Nathana chu anui suk a, "Engtin maw?" a han ti a. Margareth-i lah chuan, "Angailo, ka duhlo." a han ti leh ringawt a. Nathana chuan hrethiamlo tak chuan, "Engchu maw?" a lo ti leh hu mai a. Margareth-i chuan inla confi zet hian, "Nangni ang hi chu ka hria che u alawm, coffee in puiah min sawm anga, ahnuah min bem anga. Enteh thianpa, he khua a awm hi ka nilo, Aizawl atanga lo pem kan ni. Thingtlang nula anga mawl ka nilo, chuan...min bem hlawhtling chuang lo ang." a han ti nghal zung zung a. Nathana chu a nuih aza ngei mai, "Awle awle...theih pa tawpin ka bem peihlo che, anih le.." tih pah chuan a tlan leh ta nghal a.

Fahrah Run (Orphanage) atang chuan hmeichhe pakhat, Zosangzeli, Sangtei tia an koh thin chu security guard pahnih te hian an pawt chhuak rawh rawh a. Gate bul thleng chu an hruai phei a, an Director Pi Mawii chuan thinrim tak hian, "Zosangzel, vawikhat mah lo kal tawh suh ang che." a ti vin khur khur a. Sangtei chuan, "Ka la rawn hruai tho tho ang, ka fapa a ni a, ka rila rah a ni. Min bumna te hi ka puangzar vek ang, Police hnenah ka report khawp ang che." a ti vak vak a. Pi Mawii chuan, "I duh phawt chuan va kal ta che, i chanchin an hrechiang anga, an ngaihthlak sak duh chuanglo ang che. Mi a dahna inah pawh i awm tawh tih te an hria anga, Mental Health Problem i nei tih an hre bawk anga, i chak chuang lo ang." a ti a. Sangtei chuan mak ti tak hian, "Engtin nge i hriat a?" a ti a. Pi Mawii chuan, "Eheu, thudik ka sawi a nimaw? Ka hre vek, i chanchin hi ka hre vek. Midang te tana mi hlauhawm tak i nih kha, tichuan hetah hian naupang te ka enkawl mek a, rawn kal tawh ngai suh ang che." a ti a. Sangtei chuan, "Pi MAwi, khawngaihin ngaithla teh, hun kal tawh a ni a, tunah chuan ka a tawh lo. Ka ngen ache, ka fapa kha min pe let hram rawh." a ti lawm lawm a. Pi Mawii chuan, "Lo kal tawh lola a nimai, anih loh chuan Police ka ko tawh ang. Security, hruaichhuak vat teh u." a ti a, Sangtei chu an chhuah luih tir ta a. Pi Muani pawh chu a thiannu Pi Hriati te inah chuan a leng a, a rilru a hah ngei mai. Pi Hriati chuan thingpui pek pah chuan, "Kha, thinpui sa ver vawr hi in la, i zia mai ang. Lungngai lutuk duh suh, engkim a tha leh vek dawn alawm." a ti a. Pi Muani chuan, "Engtin nge ka lungngaih loh theih tehlul ang. Ka fa, ka rila rah te ngei maiin min do em em a, an hmelma ka ni ringawt chu ania." a ti a. Pi Hriati chuan, "Duhtawk teh thiannu, engkim a tha leh vek mai ang. I fate an ni a, an haw tak tak lo ang che. Ropuia pawhmipa ani a, a thinrim a insum zoloa, a lo chena deuh a ni mai, reilote hnuah a reh leh thuai mai ang." a ti a. Pi Muani chuan, "I hmu velo anih kha, min thah a tum tak tak alawm. Ka fiamthu lo, min khawih a tum a, awiii..a sawi pawh ka sawi peihlo." a ti hluam hluam a. Pi Hriati chuan, "Aww...thah che a tum amaw? Atthlak lutuk, engvangin nge a thah ang che? Julie vang khan a rilru a na a, a thinrim mai chauh anih chu. Chubakah maw, inchhung khatah incheng ho vek a, Julie lah a lo zaktheilo si a, a lo nasa bawk si nen, in thu a inhmulo a, in inhau reng mai chu a nih kha. Ropuia pawh Julie khan a rilru a hneh sak vek tawh a, buaina bulpui ber chu i monu Julie kha ani." a ti a. Pi Muani chuan, "A hrim hrimin saw in saw ka hne lutuk, chubakah he khua a kanlo pem pawh hi ka inchhir. Aizawlah khan lo awm hle hle zawk ila, helai hmun t(r)awp lutuk leh thingtlang lutuk a awm reng hi chu ka luak te a chhuak zawk." a han ti vel a. Chutih lai chuan Pi Hriati fanu, Sangtei chu rilru hah hmel tak hian a rawn lut a, fridge a hawng a, tui chu la chhuakin a in khawlh khawlh a. Pi Muani chuan, "Sangte, i dam thin maw?" a lo ti a. Sangtei chuan rum zet hian Pi Muani chu a en a, thinrim hmel em em hian a chhuak lehnghal a. Pi Muani chuan hrethiamlo tak hian, "Tinge? Enge awmzia?" a ti hu mai a. Tap tep hian Pi Hriati chuan, "Tih ngaihna ka hre tawh biklo, ka rilru a ti hah takzet a ni." a ti a. Pi Muani chuan, "Lungngai suh thiannu, hun tlemte ala mamawh a nih kha. Han nghak deuh la, engkim a pangngai angin a awm leh vek mai ang." tiin alo hnem a. Pi Hriati chuan, "Ka beisei, mahse ka hrelo le. A chungah hian thil thalo tak a thleng ang tih ka hlau, a inthat mai ang tihte pawh ka hlau." a ti a. Pi Muani chuan, "Khaih khaih, chutiang sawi mahta che." a lo ti a.

An kawmthlanga huan ah chuan Margareth-i leh Ropuia te unau pawh chu an rilru ipik lutuk paih thawl nan tiin an vak harh dun a, Margareth-i chuan, "Bawiha, lungngai reng reng suh. Julie pawh chu alo let leh em em ang, a hmangaih takzet che a nih chuan a lo let leh em em ang. Tihdan dang kan ngaihtuah dawnnia, lungngai lo phawt teh." tiin a hnem hram hram a. Ropuia chuan beidawng tak hian, "Engtin nge kan tih ang, ka u? Ka nu hi chu ka chenpui thei tawhlo a ni, ka haw ngawih ngawih." ati a. Margareth-i chuan, "Bawiha, ka hria alawm. Lungngai suh, tihdan ka lo ngaihtuah ang." a ti a. Ropuia chuan, "Enge i tih vak bik anga? Ka nu hian a mizia hi a sim loh chuan Julie chu a lo let duh tawh chuang lo ang." a ti khur khur a. Margareth-i chuan, "Hun tlemte chiah nghah angai tawh...nghak hram hram rawh." a ti a. Thinrim tak hian Ropuia chuan, "A tawk...engmah ka sawi peih tawhlo. Keimahin ka chingfel ang, kum 5 mi lek ka ni tawh biklo, puitling ka ni ve tawh." a ti vak vak a, a u chu a kalsan ta daih a. Chutia Ropuia te unau inbe lai pawh chu an inbul atang chuan Mawitea chuan enlenna hmang chuan a lo en reng a, a lu alo bu ngat ngat mai. Pi Muani pawh chu tukthuan ei a hun dawn tawh avang chuan a haw a, inah chuan tumah an lo awm lo a. A hawi kual zek zek a, a roomah chuan a lut a. A Wardrobe chhunga safe chu a hawng a, enge mawni puana in fun hi ala chhuak a. Tichuan sitting room lamah a kal a, puang chu dawhkanah a dah a. Puan chu a hawn pawt phelh a, achhungah chuan chemte nlah tak mai, a fawng pawh rangkachak vek, lunghlu pure ngat a chei mawi, tle sep sep mai chu a la chhuak a. Chuveleh kawngka a rawn inhawng thut mai a, Pi Muani phu nasa lutuk chuan chemte chu a thlauh a. Kawngka lam chu a va en a, a thaw huai mai a, "Awii...nangmah ini maw? Min ti hlau hman lutuk alawm." a ti a.

**************

Nathana pawh chu a haw leh ta a, tichuan rawng an bawl zawh hnu chuan chaw ei tur chuan an pathum chuan dawhkan an kil ho a. Nathana chuan, "Tluangte, i thenawm te chiah ami, an nula saw tunge ni a?" a ti a. Rinawma chuan, "Ngati nge, i star deuh em ni?" a lo ti thawt thawt a. Tluangtei chuan, "Margareth-i a nih saw, kum 30 a tling ve tawh. Hmeichhe fel tak niin ka hria, ka awm tirh pawh khan min kawm nasa a, kan inkawmngeih khawp mai. Anu saw nu nasa tak mai hi ania, afate saw a thu thu a awmtir hi a tum a, an inhau nasa thei khawp mai." a ti a. Nathana chuan, "Umm...anih tak chu." a ti mai a. Tluangtei chuan, "Tinge min zawh a? I hmu tawh em ni Margareth-i chu?" tiin a han zawt a. Nathana chuan, "Aw...tel leitura ka kal lam khan ka hmu a, ka su tep alawm." a ti a. Rinawma lah chuan, "Sir, Sanvi awmlo bawk a....keu mai chiii.." alo ti su su a. Nathana chuan, "Lalrinawm, lo ngawi mai mai teh." a ti a. Tluangtei chuan, "Awwwiii, apawi lutuk. Chi kan lo nei reng reng hleinem, nichin khan ka hmang zo vek tak e, tunlai chu ka haihawt lutuk a. Margareth-i te chi ka va dil zuai ange, tikhan lo awm ru." a ti a. Nathana chuan, "Khawi, keiman ka va dil ange." a ti a, Rinawma chuan, "Lerh sia.." tiin alo chhaih leh hman hram a, Nathana chu ava kal ta a. Margareth-i te in chu a thleng a, a lut tur chiah chu hmanhmawh em em hian Ropuia chu a lo tlan chhuak a, Nathana a hmu chu a phu zawk mai. Ropuia chuan hlauhthawn hmel tak hian, "In...inchhungah sawn.." tiin a thaw hluam hluam a. Nathana chuan, "Inchhungah chuan enge awm a?" a han ti a. Ropuia chuan, "Ka..ka..ka nu.." ahan ti bah leh nuai mai a. Nathana chu a ngaih a tha ta hauhlo, "Tinge i nu chu?" a ti leh a. Ropuia hlauthawng lutuk chuan a chhang thei tawhlo, Nathana chu hman hmawh takin a lut vat a, Ropuia chuan a rawn zui ve bawk a. Inchhung a luh chuan Pi Muani chu chhuatah a lo let reng mai a, a thin zawnah tak chuan thisen a lo luang zawih zawih mai a, a awmzia chu Pi Muani chu vih a ni. Nathana chu zu kun hnaiin, "I tha maw? Ka pi...min chhang rawh." a ti vak vak a. Pi Muani chu a rawn meng siar siar a, Nathana chuan, "Ka pi..enge awmzia? Engthil nge thleng?" a ti a. Pi Muani chuan chauh hmel tak hian, "Fa...fa..fapa..a fapa vang ani." a ti ringawta, a chatthla zui ngal a. Pi Muani chu a thi ta der mai, Nathana chuan Police te a phone vat a, Ropuia te khaw police hote pawh chu an rawn thleng ve nghal vat a. Ropuia te inbul ami, Pu Robert-a te nupa leh Ropuia te chhungkua enthla thin tupa Mawitea te pawh chu mi pui zi mur mur karah chuan an lo awm ve bawk a. Robert-a nupui Sarah-i chuan, "An sawi dan chuan Ropuia thah a nih hmel ber an tia, ka bazar haw khan Ambulance lo awm hi ka hmu a. Chumi hnu lawkah Margareth-i a rawn haw veleh a, chanchin pawh a hre tlai bik khawp mai." a ti a. Mawitea chuan, "Margareth-i kha chu chumi hma deuh hret chuan ka hmu a ni, engemaw diklo chu a awm chiang alawm." a ti nuah nuah a. Robert-a chuan Sarah-i bulah chuan, "Duhtak, i haw teh ang, engmah tihtur kan nei ve love." a ti a, an haw ta a.

Mawitea chuan Police pakhat bulah chuan, "Enteh ka pu, investigator ka hmu duh a ni." ava ti a. Police chuan, "Engatan?" a lo ti hmuk a. Mawitea chuan, "Englo ania, engemaw ka thuhriat te sawi ve ka duh a." a ti a, Police chuan, "Atha e, lo kal rawh." a ti a, Mawitea chuan a zui ve ta nghal a. An khaw Police ACP, Henry-a pawh chu a lo thleng ve ta a. Investigator tur ber a ni a, Ropuia te inah chuan lutin thu an inzawt faih ta a. Nathana pawh DCP e tilo chuan, eye witness ber a nih avang chuan a statement a ziak thla mawlh mawlh mai a. Henry-a chuan Nathana bulah chuan, "Ka pu, DCP Nathan Malsawmkima i ni em?" a han ti a. Nathana chuan, "Aw ni e." a ti a.Henry chuan, "Anih chu mawle, Good Morning Sir." ahan ti a. Nathana chuan, "Good Morning, hei hi a ni e ka statement chu." tih pah chuan paper chu a pe a. Henry-a chuan Margareth-i bulah chuan, "Rukruk case a nilo tih i chiang amaw...pawisa te, tlereuh dangte, engkim a awm kim vek em?" a ti a. Margareth-i chuan, "Aw...engkim a kim vek, engmah a bo lo." a lo ti a. Henry-a chuan Nathana statement chu a en a, "Chaw kan ei dawn mek a, chi kanlo nei tawh silova, chi la turin Pi Muani te inah chuan ka kal a, kawngka bulah afapa Ropuia a lo awm a. Tichuan inchhung kan lut a, Pi Muani chu a lo let reng a. Thil awmzia ka zawh hnu chuan FAPA VANG A NI tih ringawtin min chhang a, a thi zui nghal a ni....ummm, a tha e." tih pah chuan Ropuia chu a han en a, "Pi Muani fapa i ni tiraw?" a ti a. Ropuia chuan, "Aw ni e, mahse ka tih a nilo. Ina ka haw kha ka nu chu a lo let reng a, ka chiai lutuk a." a ti a. ACP chuan Nathana bulah chuan, "Sir, i kal thei tawh ang nangchu.." a ti a, Nathana chu a kal ta daih a. ACP bawk chuan Ropuia bulah chuan, "A awmzia chu tlanchhiat i tum a, mahse Nathana kha i hmu leh si a. Chhuanlam i siam ta tihna em ni?" a ti a. Ropuia chuan, "Ka thah a nilo ka tih chu, ka hlauthawng a, tanpui tu tur koh ka tum a, ka tlanchhuak lehnghal alawm." a ti a. Henry-a chuan, "Tu te nge tanpui tu tura i beisei a?" a han ti a. Ropuia chuan, "Kan thenawmte, emaw midang lo awmhnai te.." a ti a. Henry-a chuan, "Engvangin nge in thenawmte kher puihna i dil anga? Police emaw, Ambulance emaw pawh call lova, thenawmte zawk tanpuina i dil kher anga?" ahan ti leh a. Margareth-i chuan, "Aww..a hlauthawng a, a chiai a, a rilru a buai a niang chu mawle.." a lo ti vat a. Henry-a chuan, "Margareth, nakinah nangchu kan la kawm em em ang che, engmah lo sawi ve suh." a ti vin vak mai a. Tichuan Ropuia chu a han melh leh a, "Sawi rawh le, tinge police te chu i call loh?" a ti leh a. Ropuia chuan, "Ka haluthawng a, ka chiai em a ni." tiin a lo chhang a. Henry-a chuan, "Umm..chupawh chu lo ni tehreng se. Nathana khan Ambulance call turin a hrilh che a, tinge i la call chuanloh a? I nu a ni a, hliam a tuar tih i hriat chuan inngaihtuah vak chuan angai lo, puitling i ni a, Ambulance call vat mai chu i tihtur a ni. Mahse i call chuanglo a, bathroom ah i kal ringawt a, enge awmzia?" a ti a. Ropuia chuan, "Ihh..ih, ka kua a thalo a." a ti ringawt a. Henry-a chuan, "Umm..anih chuan khatih lai hunchhung zawng khan bathroom ah chuan i inthiar tihna em ni?" a han ti leh a. Ropuia chuan, "Aw.." tih ringawt in a chhang a. Henry-a chuan a bula SI bulah chuan, "Bathroom ah chuan va lut ula, tualthahna hmanrua a thurukna tur awm ang va zawng rawh u." a ti a, SI pawh chu a kal ta a.

Henry-a chuan Ropuia te unau chu a han en leh a, "In huanah in kal thu in sawi a, mahse ahnu darkar 2 hnu khan tuman an hmulo che u. Khawnge in awm? Enge in tih?" a han ti leh a. Ropuia chuan, "Enteh ka pu, ka rilru a hah a, intih thawven nan tiin kan tei chhuak a ni. Ka nu nen hian buaina lian tak kan nei a, chu chu a chinfel dan tur ngaituah pahin ka vak harh a ni." a ti a. Henry-a chuan, "Anih chu...tichuan a chinfel dan tur chu i hre ta a, thah mai a tha berin i hre ta tihna aniang maw?" a han ti leh a. Margareth-i chuan, "Enge maw i sawi le? Ka nau hian a that lovang." a lo ti a. Henry-a chuan, "Atha e, Station lamah min rawn zui rawh le." a ti a. Margareth-i chuuan, "Enga? Enge Station ah chuan a rawn tih anga?" a ti a. Henry-a chuan, "Lalropuia hi Pi Vanlalmuani thah thubuaiah ka man dawn a, suspect awmchhun a nih ang leh eye-witness Pu Nathan Malsawkima statement-a a inziah angin he case a tawp hma hi chu Lock-up ah dah hrih a ni ang." a ti ta mai a. Margareth-i chu amangang hle mai, "Nilo, atheihloh.." a ti chel chul mai a. Henry-a chuan SI bulah chuan, "Handcuff bun tir ula, hruai ru le." a ti a, tichuan Ropuia chu handcuff an bun tir a, an phur liam ta daih mai a. Chutia an buai lai vel chu Mawitea chuan a room tukverh atang chuan a lo en reng a, a lu abu ngat ngat a, a thawnthu ziah lai mek chu a ziah chhunzawm lehnghal mawlh mawlh a. Thinrim tak hian Margareth-i chu Tluangtei te in lamah chuan a phei a, Tluangtei, Nathana leh Rinawma te pathum, pawna an lo titi mawlh mawlh lai chu ava hmu a. Nathana hma zawn takah chuan ava ding a, "Eng thil nge i tih hi i hria em? Ka unaupa chu tualthattu ah i puh a, i man tir der asin." a va ti bawrh bawrh mai a. Tluangtei chuan, "Margareth, chutiang lam a nilo." a lo ti a. Margareth-i chuan tap chungin Nathana bulah bawk chuan, "Khawi atanga lo kal nge i nih? Tunge i nih a? Engvanga ka nau kha puh ringawt nge i nih? A thah lai hmu em ni? Tunge i nih kan hrelo che a, tunge kan nih pawh i hre hek lo. Ka nau puh tur leh khatia man tir tur khan eng dikna mah i neilo, i thil tih pawizia hi i hria em?" tiin a vin hrep hrep mai a. Rinawma chu lo inrawlh vatin, "Margareth, duhtawk rawh..i nau tih a nilo anih chuan i nau chu him takin a lo chhuak leh em em ang." a lo ti a. Nathana pawh chuan inthiamloh hmel tak hian, "Ka tihpalh a ni, mahse ka puh reng reng hleinem. Statement ka ziak mai chauh a ni, ka theihtawp ka lo chhuah ange." a ti a. Margareth-i chuan a aia vin hian, "Engmah tih theih i neilo, i tih theih zawng chu i ti tawh, ka nau pawh jail ah i thawn liam tawh. Tihpalh tih leh vel pawh kha angailo, nangmah vang vek a ni." tiin a tap zawih zawih mai a. Tluangtei chuan Margareth-i chu ava kuah a, "Insum rawh Margareth.." a ti a. Margareth-i chuan, "Tluangte, he mihringpa hi tunge? Khawi atanga lo kal nge? Tinge ka nau kha tualthattu ah a puh rikngawt a?" a ti hawm hawm a. Tluangtei chuan, "A tawk e, Margareth. A hna ania, a tih tur a ti alawm. Enteh, ani hi Deputy Commissioner of Police, Nathan Malsawmkima anih hi, Aizawl atanga lo kal a ni." a han tih takah chuan Margareth-i pawh chu a insum ta deuh a. Tluangtei chuan inchhungah a luh pui a, Nathana leh Rinawma te pawh chuan an zui lut ve ta nghal a.

Margareth-i chu thutthlengah chuan an thuttir a, Nathana leh Rinawma te chuan an thut pui a. Tluangtei chuan Margareth-i chu tui a rawn pe a, a in khawlh khawlh mai a. Nathana chuan, "Margareth, tualthattu zawn nan hian parallel investigation kan neih pawh angai maithei a. Investigator khan sawi dikin, i nau lo tih a ni tak tak a nih pawhin thudik hmachhawn ngam turin i lo inrin lawk angai dawn ania." a ti a. Margareth-i chuan, "A nilovang, thiltheihloh a ni." a ti a. Nathana chuan, "Thiltheihloh te pawh hi a theih chang a atam ania, kan mi rin em em te pawh hi kan rin ang an lo ni kherlo thin." a ti a. Margareth-i chuan mittui tla teuh chung chuan, "Tualthattu chu zawng chhuak ngei ang che aw...Min tiam rawh." a ti a. Nathana chu a ngawi vang vang a, Margareth-i bawk chuan, "Khawngaihin min tiam rawh." a ti leh a. Nathana chuan zawi sap hian, "Awle, ka tiam ache." a ti a. Margareth-i chuan tap chung hian, "Ka lawm e, min lo hrethiam lawk teh u." a ti a, a chhuak ta daih a. Rinawma chuan ngaih that loh hmel tak hian, "Ka duh lo...thil awmdan hi ka duh hauh lo mai." a ti nuah nuah a. Tluangtei chuan, "Tu duhdan nge maw ni bik ang le, nu pakhat rawng taka thah a ni a, tunge duh bik ang?" a lo ti a. Rinawma chuan, "Chutiang lam ka sawilo, Sir Nathana hian a case a nih loh chuan tumah hmelhriatloh te thu a tiam ngailo." a ti a. NAthana chuan, "Rinawm, lo ngawi mai mai thin teh." ati zawi sap mai a. Station lamah chuan ACP Henry-a pawh a baui hle mai, SI Ruata chu lo kalin, "Sir, hei autopsy result." a rawn ti a. Henry-a chuan a han en vang vang a, "Chemte chu lehlam lehlama hriam, double-edge knife a ni a, a hliam kha 54-55 mm a zau ani. Microscope-a enin dust particles ah rangkachak them hmuh a ni bawk a.." tiin achhiar nuah nuah a. A nui huk a, "Ti zawng hi maw? Anih leh tualthah nana a hmanraw hman hriamhrei ve thung kha le?" a han ti a. SI Ruata chuan, "A bo tel a ni, Sir. Kan police force ten an zawng mek a, mahse engmah an la hmulo." a ti a. Henry-a chuan, "Zawng uluk lehzual rawh u, kha hmanrua kha ka hmu duh a ni. A tul chuan lei te kha lai ula, in laichhuak maithei asin. Ka duh...chu chu animai." a ti vin vak a. SI Ruata chuan, "Awle Sir." a ti a, a kalsan ta a.

Nathana leh Rinawma te pawh chu pawnah chhuakin meizial an zu dun a, Rinawma chuan, "Sir, police an awm ve tho a, anmahni tih tir rawh. Chubakah investigator pawh a awm kha, an chhuichhuak em em ang. Chawlh hmanga zin kan ni a, hetah leh zel chuan hnuchhui chu ti lo teh ang." a ti a. Nathana chuan, "Investigator kha tunge ni reng reng a?" a ti a. Rinawma chuan, "Henry Lalsawngzuala an ti in ka hria, Police Academy atanga a graduate na pawh ala reilo a ni awm e. Promotion a hmu chak phian lehnghal, ACP a nihna pawh hmanni deuh lawk kha ani an ti. Experince engmah ala nei lo a, mahse a fin lutuk an tih kha.." a ti a. Nathana chuan, "Experince a neih tlem viau chuan a pawi maithei a ni, chubakah ala naupan hmel si. Engpawh chu nise Ropuia sawi kha thudik angah lo ngai ta ila, a thah a nilo angah ngai phawt ila. Pi Muani thihna chhan kha chu a hun kal tawh thil vang te pawh ani maithei asin, Tluangtei sawidan takah nu nasa tak leh hmelma ngah tak anih hmel si a." a ti a. Rinawma chuan, "Margareth-i chu kan va zawt leh mai dawn em ni?" a ti a. Nathana chuan, "Margareth-i chu awm tir mai mai hrih teh...a nu a thi a, a nau an man bawk a. Tluangtei khan a thil in turah mutduhna damdawi a pawlh sak a, tunah chuan a mu hahdam hrih. Chawl hahdam sela, naktukah kan be mai dawnnia. Chuanmaw Rinawm, nangin Pi Muani chungchang a tam thei ang ber lo hriat tum la, keiin khawn mipui ho ka lo be kual bawk ang." a ti a. Nathana chu tlaiah chuan Pi Muani thiannu, Pi Hriati te inah chuan ava leng a.

Pi Hriati chuan thingpui leh chhang pek pah chuan, "Kha hengte hi han ei phawt teh. U Muani'n siamdan tur te min hrilh a, keima chhang siam ngat a nih kha. Kan ei dun thin ang chu kan tia, mahse heti hian a kal ta mai si a." a ti a. Nathana chuan chhang chu a han ei a, "A tui hle mai." a ti a. Pi Hriati chuan, "U Muani min hrilh dan ang chiah chiah a ka siam a nih kha." a lo ti a. Nathana chuan, "Pi Hriat, Pi Muani nen hian thian tha tak in ni ang chu tiraw?" tiin a han zawt a. Pi Hriati chuan, "Aw...kan inkawmngeih lutuk." a lo ti a. Nathana chuan, "In inhmu zing em?" a han ti leh a. Pi Hriati chuan, "Aw, nitin kan inhmu." a lo ti a. Nathana chuan, "Anih leh tunhnai vel khan amah ah danglamna a awm em? Hlauhthawnna nei hmel te a pu thin em?" tiin a han zawt leh a. Pi Hriati chuan, "A thil hlauh ber nia ka hriat chu damchhunga, a fate hmelma nih reng a, he khua a athih thlenga awm hi a thil hlauh ber chu niin ka hria. Ahma chuan Aizawlah an awm thin a, nuamsa takin a awm thin. Mahse kan khua ah hian an rawn pem a, kan khua hi chutin kan lo changkang ve lutuk silova." a ti a. Nathana chuan, "Nihleh inhauh pui te a nei em? Tun hnai velah?" a han ti leh a. Pi Hriati chuan, "Aww...afapa Ropuia, i hria ang chu. Nitin an inhau ziah alawm." a ti a. Nathana chuan, "An inah hmelhriatloh leng te an awm thin em? Entirnan, i la hmuh ngai miahloh lenglut te emaw?" a han ti a. Pi Hriati chuan, "I sawi takah chuan ni thum kalta khan car dum chu an inkawtah chuan a awm ngei alawm, tukverh pawh hmuhtlang theihloh ang chi kha..A tir chuan Margareth-i bialpa emaw vel a ni turah ka ngai a, ahnua U Muani bula ka sawi leh khan inleng an neihloh thu a sawi leh bawk si a. Mahsee..." a ti vang vang a. Nathana chuan, "Enge mahse?" a lo ti vat a. Pi Hriati chuan, "Khami ni khan a hlauhthawn hmel lutuk a, a chhan ka zawh lah chuan engmah a sawi bawk silo a." a ti a. Nathana chuan, "Nihleh motor atanga lo chhuk awmang te i hmu lo em ni?" tiin a han zawt leh a. Pi Hriati chuan, "Aih, hmulo hrim hrim." a ti a. Nathana chuan, "Anih leh number plate te ilo chhinchhiah em?" a han ti leh a. Pi Hriati chuan, "Aih chhinchhiah miahlo." a lo ti a. Nathana chuan, "Nihleh i fanu Sangtei hi.." a tih lai chuan rang fahran hian Pi Hriati chuan, "Aih nilo...Sangtei te chu office ah a awm daih, khami ni kha chuan.." a lo ti vat a. Nathana chuan, "Ka be lawk thei angem?" a ti a. Pi Hriati chuan, "Inah hian a awmlo a, a bazar lawk a. Enge sawi duh i neih chuan sawi la, ka lo hrilh mai ang." a ti a. Nathana chuan, "Aaa...angai love. Ka haw phawt ange, kan inhmu leh dawnnia." a ti a, a hawsan ta a. Nathana a chhuak chiah chu Sangtei chu a room atang chuan a lo chhuak a, inah a lo awm reng tihna anih chu. Anu chu a en a, "Enge a duh a, khapa khan?" a han ti hmuk a. Pi Hriati chuan, "Pi Muani chungchang ania." a lo ti a.

***********

"I nu hian in hmun lei tumin Aizawl-a Veng pakhtah ah enquiry tam tak a siam a ni." Nathana chuan Margareth-i bulah chuan a ti a. Margareth-i chuan a hrethiamlo kher mai, "Enga?" a lo ti hu mai a. Nathana chuan, "I hre miah nange?" alo ti a. Margareth-i chuan, "A awihawmloh emai, tuna kan in pawh saw kan luah a ni a. Ka nau nen hian inluah man ka khawl char char thin zawk asin, chutia inhmun lo lei a tum te chu khawia pawisa nge ni ang..a theihloh. A hrim hrimin engtin nge i hriat a?" a ti a. Nathana chuan, "Rinawma hian i nu phone a check a, real estate agent nen an inbia a. Chu agent chuan i nu sawmna chu ahnawl char char thu a rawn sawi a, inremsiamna a neih pui duhlo a ni." a ti a. Rinawma chuan, "I nu khan real estate agent bulah inhmun chu hauh lawk phawt a, kum thar veleh a aman pek a tum a ni." a ti a. Margareth-i chuan, "Khawia pawisa in maw?" a lo ti hu mai a. Nathana chuan, "Chu chu nangmah hian min hrilh theih kan ring a ni." a ti a. Margareth-i chuan, "Awii...ka nu chuan adventure a lo nei leh aniang chu mawle. Mi tlawn te hi a thiam em em a, tihdan pawh a thiam khawp ang." a lo ti hmuk a. Rinawma chuan, "Engtia adventure maw?" a lo ti a. Margareth-i chuan, "Private bank pakhatah a pawisa te a invest thin a, a pawisa chauh pawh a nilo. Tichuan pawisa te chu a bo ta vek a, chuta tang chuan creditor te nen an buai chho tan ta a. Nathana chuan, "Chung mite chu i hria em?" a ti a. Margareth-i chuan, "Aih, a mimal tak chuan ka hrelo." a ti a. Nathana chuan, "A tha e, nihleh thildang ala awm em?" ahan ti leh a. Margareth-i chuan, "Ka pi apartment kan hralhna pawisa kha a nawmchen nan a hmangzo vek bawk a, keinin kan rulh char char angai a. Ahamsa berin a pasal, ka pa tak tak nilo. Adawtah kei leh Ropuia. Mahse inhmun chungchang chu engmah ka hre ve lo a ni, chuan ahmaa in sawi, kan in bula motor dum lo kal te chu engmah ka hre velo a ni." a ti a. Nathana chuan, "Rinawm, database hmangin car chu lo chhui ang che, a brand hming leh a number tir pahnih kan hre tawh a. Jaguar Black Car, chuan a number tir pahnih te chu 31 a ni." a ti a.

Chu an car sawi mek nei tu chu a tir bera kan sawi, chemte kawltu ber, Pu Zohminga bum tu, chemte lo tlanbo pui tu kha a ni a, a hming chu Amosa a ni. Amosa chu a Jaguar dum chu khalhin dawr pakhatah a lut a, minute 5 vel hnuah chuan lo chhuak lehin phone a phawrh a, "Hello, keimah ka nia, kan tlanbo vat angai. Min zawngtu an tam lutuk, fimkhur ang che. Ka lo kal dawn chiah, police an tam ania, Aizawl Police Department ami DCP Nathan Malsawmkima leh ASP Lalrinawma te pawh an lo inrawlh ve hial tawh ania. In inah em chuan ka rawn lut ngam dawnlo ania, khawnge kan inhmuh ang. Kan inhmuh thinna ah khan aw, ka dah ania." a ti a. Chutia Amosa'n tu emawni a biak lai chu kil khat atang chuan Pu Zohminga assistant, Mickey-a chuan a lo en reng a. Amosa chuan phone a dah chiah chu sim card a phawrh a, dustbin-ah chuan a paih a. Tichuan carah lutin a tlan ta nghal a. Rang takin Mickey-a chuan a zui ve ta nghal a. A um pah chuan Mickey-a chuan a boss Pu Zohminga chu a phone a, "Hello, Boss...hei ka um mek e. Ramhnuai lamah a tlan daih a, mahse ka um zel e." a ti a. Pu Zohminga chuan, "Chhuah reng reng suh. Ka hnenah lo hruai la, a dung chung ngeiin. Fimkhur tak khan che la, engmah tisual suh ang che." a ti a. Tichuan chak tak chuan Mickey-a chu atlan a, Amosa car chu a va su thuai mai a, Amosa car pawh chu a vir nawk a, thingkung lian tak pakhat a su chawrh mai. Mickey-a chu car atang chuan a chhuk a, Amosa car chhung ava en chuan Amosa chu thi hnuang hian alo awm a.

**********

Nathana leh Rinawma te chu hmanhmawh takin an kalna hmun tur lam chu an pan mek a, an kal pah chuan Rinawma chuan, "Margareth-i te in bula Jaguar car dum neitu kha register atanga en chuan anei tu hming chu Amos Lalthlamuana a ni a, kum 1979 a piang a ni." a ti a. Nathana chuan, "Enghna nge a thawh a?" a ti a. Rinawma chuan, "Restoration Department ah a thawk ve a, phai lamah pawh Historical Museum-ah employee ni pha ngat a ni awm e." a ti a. Nathana chuan, "Anih chuan hetiang thingtlang khuaah enge a tih anga? He khuaah hian Restoration Department an awm ve tihna em ni?" a han ti a. Rinawma chuan, "Sir, khaw te tak te ni mahse, engkim a awm ve alawm. Tluangtei sawi dan phei chuan Aizawl aiin a te a, mipui an tlem a, abak chu an inchangkan hleh vak lo. Engkim a kim ve vek a ti a, an changkang ve khawp asin." a ti a. Nathana chuan, "Anih chuan a workshop ah chuan kan hmuh ngei beisei ang aw...taka, Henry-a te chanchin kha engtin nge ni zel? Tualthattu hriamhrei hman chu an hmu chhuak tawh em?" a ti a. Rinawma chuan, "Ka theihnghilh tep alawm le, kha...hei hi han chhiar teh." tih pah chuan paper a pe a. Nathana chuan a han chhiar a, "Chemte chu lehlam lehlama hriam, double-edge knife a ni a, a hliam kha 54-55 mm a zau ani. Microscope-a enin dust particles ah rangkachak them hmuh a ni bawk.....umm, a tha e." a ti a. Amosa workshop chu an thleng ta a, mahse tumah an awmlo. Nathana chuan, "Kawngka a inhawng a, mahse tumah an awm bawk silo. Enge maw awmzia ni ang le?" a ti nuah nuah a. Rinawma chuan dawhkana chhangthawp chu a en vung vung a, a han hnim a, "Ehe...eilohin a awm rei tawh a ni ngei ang. A awmzia chu Amosa hi a chhuahna a rei tawh aniang, mahse kawngka a inhawng bawk si a, engemaw awmzia le?" a ti a. Nathana chuan, "A lan dan hi chuan a thil pawimawh a la khawm zung zung anga, a chhuak nghal a ni ngei ang. Lehkhabu pawh a darh nuai a, a hnathawh lai in engemaw a tawng thut a ni maithei. Mahse a kal hmain he chemte hi a zirchiang anih hmel, han en teh." tih pah chuan paper-a chemte lem, nalh em em mai chu a han lek kang a. Dawhkan bula pheikhawng pakhat lo awm chu Nathana chuan a han en a, "Rinawm, kan kal hma hian tu emawni a lo kal tawh a ni." a ti a. Rinawma chuan, "Engtin nge i hriat?" a ti a. Nathana chuan, "Enla, trace tam tak helai hmunah hian a awm a ni. Chuan pheikhawk hnuai kehniak leh, room chhunga kehniak hi, a in ang lo." a ti a.

In lamah chuan an ahaw leh ta nghal a, darkar reilo te hnuah chuan Nathana chu a room atang chuan a lo chhuak a. Rinawma leh Tluangtei bulah chuan, "Enteh u, kha chemte lemziak kha ka chhui chiang a, Scythian chemte ani." a ti a. Rinawma chuan, "Enge chu chu?" alo ti hu mai a. Nathana chuan, "Chemte hlu tak mai ani a, 20th century a siam tan a ni. Moldavia territory hunlai khan a ni a, a original chemte kha indopui lai vel khan a bo daih a ani awm e. Chuan an sawidan leh bawk chu kha chemte nei tu apiang chu vanduaina in a umzui bawk thin an ti." a ti a. Rinawma chuan, "A man a to ngawt ang." a lo ti a. Nathana chuan, "Scythian chemte pakhat hi Dollar Million khat leh achanve man a ni." a ti a. Tluangtei chuan, "Keichu ka hrethiamlo, chutiang chemte, 20th Century-a mi, thil hlui lutuk lehnghal. Hetah, Mizoramah, chutah pawh thingtlangah, ka awih chiahlo." a lo ti a. Nathana chuan, "A chhan ka hre biklo, engtia lo awm thei ringawt nge pawh ka hre biklo." a ti a. Rinawma chuan, "Anih leh Pi Muani khan eng atan nge chu Scythian chmete chu a tih anga, chuan a hmuchhuak tu Scythian tribe, hmanlai mi te, chuan restorer Amosa te nen khan, enge inzawmna an neih ang? a ti a. Nathana chuan, "Kha chemte hmanga thah kha ani ngei ang, ngaihtuah teh Rinawm. Khang rangkachak them an hmuh te, a chem ina a zai thler dan te, a zau zawng te, tin expert hovin thutawp an siam dan te kha.A vai khan a inzawm vek thei a ni, chubakah Pi Hriati'n motor dum Margareth-i te in bula a hmuh thu a sawi zawng zawng te nen khan. Engmah tih tur neilova alo kal ka ringlo, enge i ngaihdan?" a han ti a. Rinawma chuan, "Ka hre biklo, ngaihdan ka neilo. Tluangtei sawi ang deuh khan engtin nge chu chemte chu hetah, India ramah pawh State chawmhlawm, Mizoram daih ah, chutah pawh thingtlangah lehnghal...alo thleng hla lutuk hi ka awih chiah biklo." alo ti a. Nathana chuan, "Thil ni thei ve tho ani, achhan chu helai hmun ah hian a him anga. Sapram ah te leh ramdang ah te ai chuan, hetah kan ram khawnvel mipui tam zawkina an hriatlohna hmun ah hian an thukru te pawh ani thei tho asin." a ti a. Rinawma chuan, "Chupawh chu lo ni tehreng se, tuna kan suspect hriat te hi kan mizopui vek an ni a, engtin nge Scythian chemte chu an hmelhriat theih reng reng ni?" a ti a. Nathana chuan, "Chu tak chu kan zawnchhuah angai a ni, hnamdang an inrawlh tel ve pawh a ni mahna." a ti a.

Nathana chu Margareth-i te inah chuan ava kal a, chemte chungchang chu ava sawi a. Margareth-i chuan, "Chutiang chemte chungchang chu ka hre hauh lo mai, mahse...khapa Amosa i tih kha..artifacts lama thawk thin a nih chuan ka nu nen an inhre maithei a ni. Ka nu khan pasal pali lai a nei alawm, a pasal te zinga pakhat phei chu vai ania, Mumbai mi hausa lutuk mai a ni lehnghal. Dan phallohvin tlereuh a zuar a, mahse a rei tawh, 90 kum vel daih khan a ni." a ti a. Nathana chuan, "Chupa chu engtin nge ka biak theih ang?" a ti a. Margareth-i chuan, "I be theilo ang, 1998 kum vel khan a thi tawh a, thah a ni. Ka khawngaih ania, ka nu pasalte zingah chuan a fel ber asin mawle. Ropuia nen khan min duat thei lutk, vawikhat pehi chu thil kan ru a, Police te lakah min chhanhim nghe nghe asin." a ti a. Nathana chuan nui chung hian, "Enge in ruk a?" a ti a. Margareth-i chuan, "Ka thiante nen dawrah kan lut ru a, chips kan ru chhuak a, pawisa kan nei silo a. Amah vang alawm restorer hna pawh hi ka thawh ve theih ni, min fuih nasa a. Icons vel hi ka restore ve thin a, ka thiam ve lutuk." a ti a. Nathana chuan, "Nichina chemte chungchang ka sawi kha, khami hmang khan i nu chu thah niin a lang." ati a. Chemte lemziak chu Nathana chuan a pe a, Margareth-i chuan a han en vang vang a, "Ka nu pasal, vaipa ka tih kha. A thih hnu khan tlereuh tlem azawng chu ka nu kha ahnutchhiah a, ka nu lah chuan nawmchen nan a hmang a, a hnufe ah chauh ka hrechhuak leh a ni. Chuan ka nu pasal hming chu Mohan-a a ni a, a unaunu chu hmanni lawk khan a boral nghe nghe a. Ka nu khan a thih hma khan ava hmu a, ka hrechhuak leh vek a ni. Ka rindan chuan Mohan-a leh ka nu te khan tlereuh leh thil hlu dangte chu Mohan-a unaunu kutah khan an dah pawh a ni maithei a, chutah chuan chemte pawh chu alo tel ve a ni mahna. Mahse chiang tak chuan ka sawi ngamlo, a diklo maithei bawk. Chuan tuin nge Mohan-a kha that tih te pawh chu ka hre ta chuang lo a...engpawh chu nise, he chemte lemziak hi engta i neih nge?" a han ti daih a. Nathana chuan, "Amosa workshop ah." a lo ti a. Margareth-i chuan, "In zawng hmu ang tiraw?" a ti a. Nathana chuan, "Kan tum mek chu a nih hi." a lo ti a.

***************

Margareth-i te thenawm chiah ami, Pu Ronert-a te inhnuaia awm, Mawitea chuan thawnthu chu a ziak leh ta malh malh a. Robert-a hi kum 43 mi, pate tak te mai hi a ni a, ft 5 vel chiah a sang a ni. A hmelchhia in a nelawmloh hle a, a sual hle bawk. A nupui Sarah-i erawh hi chu hmeichhe la naupang tak, kum 34 vel chiah, vun ngo tak mai leh sam buang kir chiai mai hi a ni a. A pasal Robert-a hian a ti duhdah thei em em a, Sarah-i pawh hian a hlau thin hle. An inhau thawm leh Robert-a'n Sarah-i kut a thlak thawm te hi Mawitea hian a hre pha vek zel a, Sarah-i chu a khawngaih thei hle a, chumai nilovin Sarah-i hi a ngaizawng bawk a ni. Mawitea room kawngka chu a rawn in kik dat dat a, Mawitea chuan, "Lo lut rawh." a ti a. Sarah-i chu a lo lut a, chhang hi a rawn keng lut a. Sarah-i chuan, "Kha...ka siam a nih hi, ei ve rawh." a ti a. Mawitea chuan, "Ka lawm e." alo ti a. Sarah-i hmel chu a han en a, "Tinge Sarah? I tap elaw a? Engthil nge thleng leh ta a?" a han ti a. Sarah-i chuan, "Engmah a nilo." alo ti a. Mawitea chuan Sarah-i banah chuan a vuan a, "Dawt sawi suh, i mit pawh a sen vek alawm. o thu ve phawt teh, enge thleng a?" a ti a. Sarah-i chu a thu a, "Engmah anilo Mawite, oven ah chhang ka tilum leh dawn a, ka kal vat angai ania." a ti a. Mawitea chuan Sarah-i chu a han thut hnaih sauh sauh a, "Angailo, lo leng ve hrih rawh." a ti tlat a. Sarah-i chuan Mawitea dawhkana lehkhabu te chu a han en kual a, "Enge i tih a? Lehkhabu te chu ava tam ve?" a han ti a. Mawitea chuan, "Lehkha bu ho hi maw...Scythes thawnthu te an nih hlawm hi. An custom chu bawn tak ani, khawngaihna an neilo reng reng. Entirnan Scythian emperor pakhat hi thi ta se, a ngunhnam chauh nilvin, a nupui pawh thlanah an phum tel ve thin." a ti a. Mak tih hmel tak hian Sarah-i chuan, "Ehe..anung chungin maw?" a lo ti a. Mawitea chuan, "Aih nilove." a lo ti a. Sarah-i chuan, "Nihleh an that phawt tihna emni?" a han ti leh a. Mawitea chuan, "An dan ania, Scythian emperor te chuan thi a nih chuan an nupui te hian thih ve nghal an huam tur a ni a, an in volunteer tawp mai zel mawle." a ti a. Sarah-i chuan, "Umm...anih chu." alo ti a. Mawitea chu a ding hluai a, hnunglam atang chuan Sarah-i ban vel chul heuh heuh pah chuan, "Sarah, a tawk tawh. Ka hmu thei tawh lo, i hrehawm tawk tawh. Heti hi chuan a that duh mai ang che, ka bulah hian lo kal mai rawh." tih pah chuan a biang ah te chuan a han fawp vel a. Sarah-i chu a tho thut a, "Ka chanchin engmah i hrelo, Mawite. Chu ai chuan i hnathawh te hi min han hrilh zawk teh...nilengin room ah i tawm a, i chhuak ngai bawk silo. Enge i thil tih tum ber chu ni a? Researcher i ni em ni?" a han ti a. Mawitea chuan, "Ka la ni dawn chauh." a ti a. Sarah-i chuan, "Tinge i hna chungchang hi i sawi that duh ngai miahloh a?" tiin a han zawt a. Mawitea chuan, "Enteh Sarah, ka hna hi ka tan a pawimawh em em a, engkim a kal fuh anih chuan ka nun hi a thlak hlawk thei dawn a ni. Ka hausa anga, ka chawm thei em em ang che." tih pah chuan Sarah-i kut chu a vuan a. Sarah-i chuan a kut chu rang takin a lo paihthlak sak a, Mawitea chu a chhuahsan ta daih a.

"A nu pasal te zinga mi, Mohan-a...tlereuh dawr nei chungchang chu ka hria a, mahse ka hre kimchang lutuk lo." Nathana chuan Scythiam chemte chungchang ziahna lehkhabu en pah chuan a han ti a. Rinawma pawh chuan Scythian chemte chungchang ziahna lehkhabu en ve mawlh mawlh pah chuan, "Thla hmasa lawk khan a chhungkaw neih chhun, aunaunu chu car accident vangin a thi bawk si a." a lo ti ve bawk a. Nathana chuan, "Khawi hmunah nge? Hospital ah nge inah zawk a tih? I hre miallo maw?" a han ti a. Rinawma chuan, "Nursing Hospital ah, aunaunu kha kum 80 vel laia upa ani awm a, duty te sawi dan chuan Pi Muani khan a tlawh ziah ani awm e." a ti a. Nathana chuan, "Anih chu." alo ti hmuk a. Rinawma chuan, "Ka hriat leh dan bawk chuan Pi Muani khan ava inhauh pui ziah a ni awm e, Mohan-a unaunu chuan Mohan-a chu amah Pi Muani vanga thi a nih thu te, phuba a lak ve ngei tur thu te a lo hrilh thin a, a lo vin hrep zel an tia." a ti a. Nathana chuan, "Engtia phuba lak maw?" a lo ti a. Rinawma chuan, "Ka hre chiah biklo, doctor kha chuan Mohan-a unaunu kha a rilru a kim chiah love a ti a. A insawi dan chuan Mohan-a khan tlereuh leh thil hlu tam tak a hmingin a dah thu a sawi a, a hausa hle angin a insawi bawk e an tia." a ti a. Nathana chuan, "Anih chuan a thih hma vel kha chuan Pi Muani khan a tlawh tawh ngai lemlo ani ngei ang maw?" a ti a. Rinawma chuan, "Tlawh e, an vui ni ah pawh a kal ve alawm." a ti a. Nathana chuan, "Anih chu, Margareth-i'n min hrilh miah lo tihna anih chu...a thuamhnaw vel te i zawng hmu tel em?" ahan ti leh a. Rinawma chuan, "Aw...nursing home ah a la awm a, mahse thawmhnaw bak engmah a awmlo, eng thil hlu leh tlereuh mah a awmlo." a ti a. Nathana chuan, "Chemte awm ang pawh engmah a awm lo a nimaw?" a ti leh a. Rinawma chuan, "Teuhlo, engmah a awmlo." a ti a. Nathana chuan, "Rinawm, lo awm tehreng pawh chu nise, tuman min hrilh duh teuhlo mai. Pi Muani chu a thi tawh a, a pasal Mohan-a, tlereuh dawr nei tu pawh a thi tawh a. An thlarau te chu hringnun piahlam ramah an inhau ve nasa khawp ang le, tuna kan clue neihchhun chu Amosa chauh a ni." a ti a. Rinawma chuan, "Nia, ani lah chu a bo daih mai si a. Ka hriatdan chuan kar 2 chhung hna akal tawhlo a, a thawhpui te chuan a rawn tlai fo thin an tia. Chuan tunhnai vel khan a hlauhthawn hmel thei lutuk an ti bawk a, tichuan hei tunah, tihian a bo ta daih a nih hi." a ti a. Chuveleh Rinawma phone chu a rawn ri a, phone chu la vatin, "Hello, aw...keimah ASP Rinawma...ENGMAW??? Khai aww...awle, kan lo kal ang." a ti a, phone chu a dah a. NAthana chuan, "Enge a?" a lo ti vat a. Rinawma chuan, "AMosa chu hmuh a ni tawh." a ti a. Nathana chu a lawm hle mai, "Khawiah?" a lo ti let vat a. Phurlo tak chuan Rinawma chuan, "Mitthi dahna (morgue)-ah." alo ti hmuk a, Amosa chu a thi tihna a ni.

****************

(TO BE CONTINUE)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)