NATHAN SEASON-3 (Episode-2) SCYTHIAN KNIFE Part-2 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-2) SCYTHIAN KNIFE Part-2 (by : Aaron Malsawmdawngzuala)

Unread post by Aaron Dustin » June 2nd, 2020, 10:33 pm

NATHAN SEASON-3 (Episode-2)

SCYTHIAN KNIFE (Pt-2)

Written by : Aaron Malsawmdawngzuala

**********

Nathana chu Amosa ruang an dahna (morgue) ah chuan ava kal ta a, darkar 1 vel hnuah chuan Rinawma chu a rawn phone a. Rinawma chuan, “Hello Sir, enge chanchin?” a ti a, Nathana chuan, “Min thlenkhalh a ni, Rinawm. Ka kal hma khan Amosa unaupa a lo kal e an tia, kuang a order a, tichuan a thil zawng zawng pawh a la fai vek a ni awm e.” a ti a. Rinawma chuan, “Mahse Sir, Amosa personal files ho ka en a, unaupa a neih awm alang miah lo. A chhungte neih chhun chu a nutei a ni a, mahse chupawh chu phai lamah a awm daih bawk sia. Sir, ruang dahna-a note vel te i check em?” a ti a. Nathana chuan, “Check e, mahse engmah a awmlo. Personal data hmuh tur a awm lova, mahse a mizo hming chu ka hria. Lalthlamuana a ni e, Amos Lalthlamuana. Chuan a unaupa nia an sawi kha a pianzia te ka zawt a, ft 5’7 vela sang, sam dum, mitmu dum kuk mai leh a kut dinglama tattoo nei a ni a, Rinawm kan zawnhmuh ngei a ngai ang.” a ti a. Mickey-a pawh chuan motor lam a pan a, a boss Pu Hmingmawia chu a phone a, “Boss, a thil te chu ka la vek tawh e, a unaupa angin ka insawi a. Chuan a kal tumna erawh ka la hrelo a, ka zawng chhuak thuai ang.” a ti a. Pu Zohminga chuan, “Hmanhmawh ang che, kha chemte kha tun kar tawpah chuan ka kutah a awm tawh ngei ngei tur a ni.” a ti a, Mickey-a chuan, “I hmu em em ang, boss.” a ti a, motor ah chuan a lut a, chak takin a tlan a.

Nathana leh Rinawma pawh pawnah an tei chhuak a, an titi a. Rinawma chuan, “Sir, ka zirchiang zel a, ka rin ang chiah a ni. Amos-a mizo hming kha Lalthlamuana a nilo, hminglem a hmang a ni. Mizo tak tak pawh a nilo, Burma mi a ni a, Lalmawizuala a ni. Jail vawi 2 a tang tawh a, kum 45 vela upa a ni tawh. Kum 1998 khan Myanmar central jail ah a tang a, gang deuhreuh te an lo nei ve vel a ni awm e. An gang member te nen chuan lemziak te an ru thin a, thil hlui hralh rukna thilah a inhnamhnawih thin bawk.” a ti a. Nathana chuan, “Criminal business a ni a, Police ten an man ngailo em ni?” a ti a. Rinawma chuan, “Ka hrelo Sir, police te chuan Amosa hi criminal ang chuan a personal file ah te pawh an ziak a, mahse jail vawi 2 chiah ala tang a ni.” a ti a. Nathana chuan, “A hrim hrimin, khawnge kan kal dawn a?” a ti hu mai a. Rinawma chuan, “Sawlai saw a nia kan kalna hmun tur chu, navigator tarlan dan chuan sawlai saw Amosa kalna thin a ni awm e, hemi khuaa a awm hnu hian.” tih pah chuan an hma zawn lawka building hlui leh chhe tawh tak, a bang pawh tla nuai tawh chu a kawk a. Achhunga an luh pah chuan Rinawma bawk chuan, “Khaw mipui te ka zawt kual a, helai hmun hi in ropui tak a ni thin a, 90 kum chho vel phei kha chuan hemi kha a in lian ber leh ropui ber a ni thin an ti. Chuan Aizawl-a mi pa pakhat lo zin chuan a lei a, restore a tum bawk a.” a ti a. Nathana chuan, “Tinge a tih hlawhtlin loh a?” a ti a. Rinawma chuan, “Hun a neilo, an that daih alawm. Ahnuah boarding house siamnan hman leh an tum a, mahse an ti hlawhtling ta chuanglo a. A in neitu ber lah chu a thi ve nghal mai si a, Sawrkar kutah an dah a, mahse tihian a riral ta mai mai a nih hi.” a ti a. Nathana chuan, “Umm..anih chu, ava uiawm tak..a hmun a rem sia, ka ui khawp mai.” a ti vawng vawng a. E chuan....hemi in neitu ber chu engtia thi nge?” a ti a. Rinawma chuan, “An sawi dan chuan a in awkhlum e an ti a, khaw mipui te pawhin fiamthu ti tak deuhin helai in hi chu ‘ANCHHEDAWNG IN’ an ti hial alawm.” a ti a. Nathana chuan, “Anih chu mawle, i hmantlak ve tawh khawp mai, kha..information te pawh i khawn khawm zung zung thei tawh a.” tih pah chuan a han nui a. Rinawma chuan, “Nia...Amosa chuan helai hmunah hian enge a duh ang le?” a ti nuah nuah a. Nathana chuan, “Ka hrelo, va zawh ka tum a, alo thi tawh sia.” ahan ti deuh kher a. Rinawma chuan, “I va han ngeiawm tak e aw....kal tawh teh ang.” a ti a.

*************

Mawitea room ah chuan Sarah-i chu a leng lut leh a, Mawitea chuan a novel buaipui mek chu a hrilhfiah a. Paper a alemziak te chu hmuh tirin, “Sarah, hengte hi Tirasporal Burial Mound a ni a, a lar teh ania.” a ti a. Sarah-i chuan, “A mawi khawp mai, i novela i ziah tel tur em ni?” a lo ti a. Mawitea chuan, “Aw ni e.” a ti a. Sarah-i chuan, “Athen te hi chu thlanmualah an hun an hmang hnem deuh niin a lang.” a ti a. Mawitea chuan, “Nia, mahse keini pawh kan hmangaih kalta te avangin thenkhat te hi chu thlanmualah kan hun tamtak kan hmang ve fo ang chu..” a ti a. Sarah-i chuan, “Min han hrilh zel teh.” a ti a. Paper dang chu hmuh lehin MAwitea chuan, “Ancient hunlai kha chuan Scythian Tribes ho te chu helai hmunah hian an awm thin a, milem be tute, ramsa Pathian anga betute chuan helai hmun hi hmin thianghlim angah an ngai a ni. 19th Century hunlai vel khan helai hmun ah hian ritual an nei a, mahni nunna hlan nan an hmang thin.” a ti a. Sarah-i chuan, “Awii, a rapthlak e.” a lo ti vawng vawng a. Mawitea chuan, “Mahse an last member pakhat chuan science chungchang hi a rawn hmelhriat ve ta hman a, a nunna a hlan ve hnu khan mipui te chuan a chenna inah puithuna hlauhawm tak mai (dark-rituals) chu a lo nei thin tih an hmuchhuak a ni.Criminal case pawh tamtak a awm a, hemi chanchin hre tur hian internet leh lehkhabu hlui te ka zawngkhawm nasa asin aw....thenkhat phei chu blood letter-case te nen a inkaihhnawih te an ti hial alawm.” a ti a. Sarah-i chuan Mawitea chu ngaihsan hmel tak hian a han en vang vang a, “I thusawi te chu a ngaihnawm hle mai, ka hlau lek lek zawk alawm le.” a ti a. Mawitea chuan, “I hlau amaw?” a ti a. Sarah-i chuan, “Umm, hlau e.” a lo ti a. Mawitea chuan, “A tha a nih chu.” a ti daih mai a. Sarah-i chuan, “Ngati maw?” a ti hu mai a. Mawitea chuan, “Ka novel ziah lai mek hi a genre chu Thriller ani dawn a, Thriller te chu a hlauhawm tur a lawm.” tih pah chuan Sarah-i bulah chuan a va thu a. Sarah-i chuan, “I lehkhabu ziah mek chu eng lampang nge?” alo ti a. Mawitea chuan, “Hmanlai sakhaw rinna danglam bik vel ang hi a nia, nula leh tlangval inngaizawng te tual thihna chungchang a ni a, an thihna chu chu,i sakhua vang chu ani dawn a. An sakhua ten an tihdan angin, Pathian hnena inthawina a tana an nun an hlan ang deuh hi a nia, hetah hian a inziak vek ang.” tih pahin lehkhabu chu a pe a. Sarah-i chu a han kuah zeuh a, “Puithiam ten an tih thin ang deuha ziah ka tum a, hmanlai puithiam ten.” a ti a. Sarah-i chuan hnai takah hian Mawitea chu a han en a, “I thuziah lai ah chuan Love Story a tel ve dawn em?” a han ti chuai raih mai a. Mawitea chuan Sarah-i chu a han kuai dak a, “Dawn e, novel ngaihnawm tak a nih dawn chuan Love-Story te chu a tel ngei ngei tur alawm.” tih pah chuan Sarah-i chu a fawp a. Sarah-i pawh chuan a lo chhanglet vat a, an inthlahlel kher mai.

Atuk zingah chuan Pi Muani thiannu Pi Hriati fanu, Sangtei chu a roomah lutin a thawmhnaw chu a la chhuak hlawm a, air-bag ah chuan a khung mawlh mawlh a. Chutih lai chuan a phone a rawn ri a, kum 10 kalta a abialpa ni thin, anu Pi Hriati vanga loh theihlohva a then tak, Eric-a a lo ni a. Erica hian tun thleng hian Sangtei hi ala hmangaih a, ala hel fo thin a ni. Erica chuan, “Hello, Sangte...khawngaihin dah suh aw? Keimah Erica ka nia, Office ka kal dawn chiah a, kal hmain inhmu lawk ila.” a ti a. Sangtei chuan, “Ka hmanlo.” alo ti hmuk a. Erica chuan, “A nih chuan Office ban veleh ka lo kal ang aw...zanriah eidun ila, ka treat ang che. Chuan ka thlah haw leh thap ang che, i duh em?” a rawn ti leh a. Insiam mawlh mawlh pah chuan Sangtei chuan, Eric, ka hmanlo ka tih chu.” a lo ti vin hlur mai a. Erica chuan, “Anih chuan tunkar Friday i hman ang tiraw?” a han ti leh a. Sangtei chuan, “Kan office thawhna ah hian ngaihzawngte nena chhuah dun an phal velo, chubakah ka ngaihzawng pawh i ni tawh lo, a tawk tawh.” a ti a. Erica chuan, “Sangte, ka duh vang reng a nih loh kha...nangmah zawkin min then a nih kha. Enteh, kum 10 lai a liam tawh a, engkim a danglam tawh. Chuvang chuan kan hnu kal tawh te theihnghilh ila, bul i tan tha leh teh ang.” a ti a. Sangtei chuan, “Eric, duhtawk tawh teh. Tleirawl kan nihlaia inngaizawng mai chauh kan nih kha, puitling kan ni tawh. Chuan i sawi dik e, kum 10 a liam tawh a, engkim a danglam tawh. Chuan keipawh ka danglam tawh a, engkim theihnghilh rawh, minlo be tawh suh.” tiin phone chu a dah hmak a. Chutih lai chuan anu Pi Hriati chu a lo lut a, Sangtei chu a han en vang vang a, "Erica bawk em ni?" a ti a. Sangtei chuan, "A ho emai." a lo ti hmuk a. Pi Hriati chuan, "Sangte, ala hmangaih che a ni." a ti a. Thinrim tak hian Sangtei chuan, "Kum 10 kal ta kha chuan min hmangaihlo a ni tih min hrilh kha, i duhloh em kha. Nang leh i thiannu Pi Muani nen khan min pawh then in tum a, kan inthen nachhan pawh nangmahni pahnih vang a nih kha." a ti hrep a. Pi Hriati chuan, "Bawihi, i hlim ka duh vang a ni, ka hmangaih vang zawk che a ni." a ti a. Sangtei chuan, "Ka hlimna i duh vangin tenawm takin i che anilawm ni?" a lo ti leh khur khur a, Pi Hriati chu a tap ta zawih zawih mai. Sangtei chu ava kal hnai a, "Nu, tap suh, khawngaihin. Enteh, nun thar nen bul ka tan i duh tiraw?" ati a, Pi Hriati chuan, "Aw duh e." a lo ti a. Sangtei chuan, "Ka tum mek a nih hi..." ati a. Pi Hriati chuan a awm a dawm vawng vawng a, "Bawihi, ka duhdan tak zawk chu e..." a tih lai chuan Sangtei chuan, "Ka hmanhmawh, ka kal dawn. Tax Office ah ka kal angai a, ka tlai dawn.." ati a, a tho vut a. Pi Hriati chuan, "Bag nen khan maw?" a ti a. Sangtei chuan, "Gym ka kal ve tan dawn a, ka thawmhnaw thlakna tur vel ka dah lawk dawn a nih hi. Nun thar nen bul ka tan dawn si a, pian mawi tak ka neih a ngai a lawm." tih pah chuan a chhuak ta daih a. Pi Hriati chuan a awm a dawm vawng vawng a, a awm a nawmloh hmel hle mai. A iptea damdawi chu la chhuakin a hmawm a, tui a in nghal khawlh khawlh bawk a.

Nathana leh Rinawma te pawh chu Amosa kalna thin buiding hlui awmna ah chuan an kal leh a,Nathana chuan, "Enge maw Amosa chuan helai hmunah hian a tih thin ang le?" a han ti nuah nuah a. Rinawma chuan, "A tawngtai thin te pawh a ni maithei asin." a lo ti a. Nathana chuan, "Amosa chauh nilo, midang pawh helai hmunah hian an kal ve thin ka ring tlat a ni." a ti a. Rinawma chuan, "Mi pakhat chu a kal thin an ti, Duhsaka." a lo ti a. Nathana chuan, "Tunge Duhsaka chu?" a ti nghal vat a. Rinawma chuan, "Tluangtei sawi dan chuan zu heh deuh mai ania, a nu hian kum engemaw zah kal ta khan hemi khua ah hian inhmun anei ve thin a, mahse Duhsaka chuan a hralh sak daih a ni awm e. Chuan a hralhna pawisa hmang chuan nuam a chen a, zu a in reng mai thin a ti a, mahse Tluangtei pawhin midang hnen atanga a hriat tho a ni a." a ti a. Nathana chuan, "Ngawiteh, ka hre leh si. Hmanni a wine shop bula kan hmuh kha ani tiraw, lukhum pawl(blue) khum, zuheh hmel deuh kha?" ati a. Rinawma chuan, "Aw...khapa kha, Tluangtei thenawm chiah, Margareth-i te inbul ami, Roberta te inhnuaia awm, Mawitea nen sawn an inkawm thin a. Mawitea hian achang changin a in luahna ah a riah tir thin a, abak chu khawlaiah te a rei kual mai mai zel a, helai hmunah pawh hian a riak fo an ti." a ti a. Nathana chuan, "Amosa khan Duhsaka nena inhmu tura helai hmun a pan thin hi ka ringlo ani." a ti a. Rinawma chuan, "Nia a nilo ang, Amosa kha Thursday-ah athi a, mahse Thrusday kha chuan Duhsaka leh Mawitea-a te chuan hna an thawk daih thung. Chuan Duhsaka pawh Mawitea room-ah a riak bawk, helai hmunah hian a kal lo." ati a. Nathana chuan, "Hawh teh Rinawm, Mawitea in luahna ah chuan iva kal teh ang." a ti a. Rinawma chuan, "Enge kan tih anga?" a lo ti a. Nathana chuan, "Engemaw sawipui duh ka nei." a ti a, an kal ta a.

******************

Sangtei chuan afapa Sammy-a an dahna, Fahrah Run lam bawk chu ava pan leh ta. Security te chuan Truck-a bungrua unload chu an lo pui mek a, chu chu remchangah la in gate inhawng ah chuan a lut ru ta zal zal a. Bang phenah a biru a, security te erawh an la buai khawp mai. Chutia a biru lai chu a hnung atang chuan hmeichhe naupang pakhat hian a kawrah a rawn pawt thut mai a, a phu chiang kher mai. Sangtei chuan hmeichhe naupang chu zaizirin bengchheng lo tur leh tawng lo turin a hrilh a, chuveleh Orphanage Director, Pi Mawii chu a lo chhuak a. Chu hmeichhe naupang chu a zawng kual a, "Rinrin, Rinrin..khawnge i awm?" tiin a au vak vak a. Sangtei chuan, "Va kal rawh." a ti a, Rinrini chu ava kal a. Pi Mawii chuan, "Vawikhat mah min hrilh lovin lo chhuak tawh reng reng suh." tiin a hau phei mawlh mawlh a. Chuveleh Sangtei chu a han dak leh dek dek a, kawngka lam chu panin Security te hmuhloh hlan chuan a lut ta zeuh a. Minute 10 vel hnuah chuan Sangtei chu a fapa Sammy-a, kum 9 mi, mi anglo, tawng nachang hrelo leh tawng fiah hleithei lo chu a rawn kai chhuak a. Gate pawn an thleng chiah chu Security pakhat chuan a rawn hmu hman ta hlauh mai, "Hey, nangnu kha...ding rawh." tiin a au vak a, Sangtei te nufa chu an tlanchhia a, security chuan a um nghal a.

Nichina Nathana leh Rinawma te sawi, Robert-a thianpa, khawlaia riak thin zu heh zet mai Duhsaka chu wine-shop bulah a lo ding a. Zu in chak bawk si, pawisa nei bawk silo chu alo hawi vual vual mai. Chutia a awm lai chuan a bulah chuan Pu Zohminga assistant, Mickey-a chu ava kal a. Mickey-a chuan Vodka um hi a keng bawk a, Duhsaka bulah chuan, "Kha, han in ve ta che." a ti a. Mak ti tak hian Duhsaka chuan a lo en hu mai a, mahse zu a chak tawh em avang chuan eng sawi sitset lo chuan a in ve ta mai a. Mickey-a chuan, "Khua te a vawt si a, i zia deuh em tikhan?" a han ti a. Duhsaka chuan, "Umm...ka zia tawh khawp mai." a ti a, a in leh khawlh khawlh a. Duhsaka chuan, "Biak lawk che ka duh a ni." a ti a. Duhsaka chuan, "Enge ni ta?" a lo ti vat a. Mickey-a chuan, "Helaia cheng te hi i hrechiang hlawm em?" a ti leh a. Duhsaka chuan, "Hrechiang e, helai velah hian ka awm deuh reng zel alawm." alo ti a. Mickey-a chuan, "Enteh, antiques lam vel ah hian ka tui em em a, ka ngaina hle bawk. Mi sawidan chuan heng khuaa cheng ho hian 'Manor' ami thil hlu tam tak te an kawl thin e an ti a, kha..hmanah hemi khua ami, an tihchhiat tak kha.." a ti a. Duhsaka chuan, "Antiques lampang maw...mi pakhat chu ka hmehriat alawm. Mahse hemi khua ami hi anilo a, thil hlui tam tak a kawl a ni. Lehkhabu te, hmanraw hrang hrang te,paintings te." a ti a. Mickey-a chuan, "Umm..anih chuan hmuh ka duh ani..min hmuh tir thei angem?" tih pah chuan cheng 2000 tlang pathum chu a han lek kang va mai a. Pawisa chu Duhsaka chuan a la vat a, "Tehreng mai." a ti a.

Nathana te pawh chu Mawitea hmu tur chuan Robert-a te inah anva kal ta a, Robert-a leh a nupui Sarah-i te chuan thingpui an lo in mek a. Kawngka chu a rawn in kik dat dat a, Sarah-i'n ava hawn chuan Nathana leh Rinawma te an lo ni a. Nathana chuan, "In awm maw? Mawitea biak kan duh a.." a ti a. Sarah-i chuan, "A chhuak daih a, lo leng ru." a ti a. Nathana te chu an lut a, Robert-a chuan, "Lo thu rawh u...tute nge in nih a?" alo ti a. Nathana leh Rinawma te chuan dawhkan chu an kil ve nghal a, Sarah-i chuan, "Thingpui ka'n siam ange, tikhan lo thu ru." a ti a. Nathana chuan, "Nathan Malsawmkima ka ni a, Aizawl Police Department atanga lo kal kan ni a, Deputy Commissioner of Police, Crime Branch kan nia. Chuan hei hi ka thianpa, Assistant Superintendent of Police, Lalrinawma a nih hi." a ti a. Robert-a chuan, "Anih chu, Robert-a ka nia, enge in duh a?" a ti a. Rinawma chuan, "In ina awm vkha...ihh, Mawitea kha kan hmu duh mawle." a ti a. Robert-a chuan, "Enga tan nge in tih a? Enge maw a tisual em ni?" a ti a. Rinawma chuan, "Aaa..tisual love, engemaw zawh kan duh mawle." a ti a. Sarah-i chuan thingpui chu a rawn chhawp a, dawhkan chu a rawn kil ve nghal a. Robert-a chuan, "Diktaka sawi chuan, kan in kan luah tir pawh hi kan inchhir tan ta khawp mai. Han hnawhchhuah mai pawh ka hreh tawh lo, ka ning tlat." a ti a. Sarah-i chuan, "Engtin nge i hnawhchhuah theih ngawt anga? Kar hmasa lawk pawh khan in luah man pawh thla 2 daih lai mai advance in min pe lawk a ni a, chumi pawisa pawh chuan Green-House kan sak theih phah ania." tiin a ruka a bialpa, Mawitea chu a lo t(r)an vat a. Robert-a chuan, "Kan pe let leh anga a nimai lawm, ka ning tlat khapa kha. Lehkhabu mak pui pui leh chanchin mak tak tak inziahna a kawl teuh a, binocular hmangin thenawmte a enthla ziah bawk a." a ti bul bul a. Sarah-i chuan Nathana te bulah chuan phur tak hian, "Mawitea hi author ania, lehkhabu a ziak mek a. Scythian puithiamte chanchin a ziak mek a, a mamawh ang zawng zawng te pawh amahin a inzawn chawp vek thin a. Chubakah mi fel tak a ni, tho tak ngial pawh a that duh lovang." tiin a han fak nghal zuah zuah a, Robert-a chuan a lo melh rum ngei mai. Rinawma chuan, "Pu Robert, enlenna (Binocular) hmangin mi a enthla kual thin i ti em ni khah?" tiin a han zawt a. Robert-a chuan, "Aw, enthal thin e. Thenawmte pawh a enthla a, chuan kan inbul vel te, museum hlui te a enthla thin, ka hmu vek zel." a ti a. Nathana chuan, "Bathroom ka lo hmang lawk aw.." tih pah chuan a tho a, a kal ta a. Sarah-i chuan Rinawma bulah chuan, "Enteh Officer, Mawitea hi chu mifel tak ani, in ring diklo ani ngei ang." a ti a. Robert-a chuan vin zet hian, "Sarah, jam kan nei tawh lo ania, va lei rawh." a ti vak a. Sarah-i pawh chuan hnial ngam heklo le, phur lo tak chuan a chhuak ta a. Rinawma chu tawng leh a tum chiah a, Robert-a chuan, "Zawhna dang i neih tawhloh chuan ka chhuak duh ania, in duh leh kan inah hian Mawitea chu inlo nghak dawnnia." tih pah chuan a chhuak ve ta daih mai a.

Nathana pawh chu a zung zo a, choka lam a pan leh tur chiah chu Mawitea room, inhnuai lama thawm ri ruk ruk chuan a ti ding chat mai. Mawitea room lam chu fimkhur tak chuan a pan thla a, pistol a phawrh a. Room a lut chiah chu Mickey-a a hmu thut mai. Mickey-a chuan lehkha bu vel chu a lo theh darh kual nasa mai a, Nathana a hmuh veleh chuan Nathana pistol chu a pet thlak sak a. Nathana'n hnek a tum chiah chu a lo bum a, Nathana hmaiah chuan na em em hian a hnek pawp mai a, a thal tawp mai. Room chu chhuahsan vatin inchungah a tlan chho a, Rinawma nen an intawk leh ta thut mai. Rinawma chuan, "Ehe..tunge i nih a?" a ti a, Mickey-a chuan Rinawma chu a rek thut a, Mawitea room panna step ah chuan a namthla a, Rinawma chu a lum thla tawp tawp mai a. Mickey-a chu rang takin pawnah a tlan chhuak a, Nathana leh Rinawma te pawh chu tho vatin an um nghal a. Pawn an va chhuak a, mahse Mickey-a chu car ah chuan a lut hman a. Chak takin a tlan a, Nathana te chuan an man hman talo. Nathana chuan, "Khai...ava hnek na em em ve.." tih nuah nuah pah chuan a khabe chu a dawm vawng vawng a. Rinawma chuan, "Huiham...he thingtlang khuaah hian engemaw tak chu a awm ani, hrep taka.." a ti bul bul bawk a. NAthana chuan, "Rinawm, motor number kha ilo chhinchhiah hman em?" a ti a. Rinawma chuan, "Aw. chhinchhiah e...kan man tho tho ang." a ti a. Nathana chuan, "Khapa kha ani ngei ang, Amosa unaupa anga insawi, ruang dahna a minlo kal khalh tu kha." a ti a. Rinawma chuan, "Mawitea room ah khan Scythian chemte kha a zawng a ni hrim hrim." a ti a. Nathana chuan, "Tlangval thazat lai ava ngaihawm ve, ka man hman ang mawle." ahan ti leh nuah nuah a, Rinawma chuan, "Hawh teh...i lut leh phawt teh ang." ati a.

************

Pi Mawii chuan Orphange Security Guard chu a hau mawlh mawlh a, "Engtin nge i hmuhloh theih? Tihian a duh apiang lo lutin, kan naupangte hi an rawn ru chhuak zel mai dawn em ni?" a ti vin vak vak mai a. Security chuan, "Driver kha bungraw unload naah ka lo pui a, ka duty puipa lah kha chhunthil ei turin min kalsan daih bawk si a. Engtik laiin nge Sangtei kha arawn luh ka hrelo, ka tihpalh a ni." a ti a. Pi MAwii chuan thinrim tak hian, "Chhun chawlh in nei tawh lovang." a ti hmuk a, phone a phawrh a, number pakhat a hmetchhuak a, "Hello, Children's Home Director ka ni a, emergeny a awm a, khawngaihin min pui thei angem?.....awle, kan lawm e." a ti a, phone chu a dah ta a. Zan alo ni a, Nathana leh Rinawma te chuan thingpui an in dun mek a. Rinawma chuan, "Sir, Mawitea lo haw hunah Robert-a te khan min rawn hrilh i ring em?" tiin a han zawt a. Nathana chuan, "Robert-a khan Mawitea hi a ngaina lo hle niin a lang a, chuvang chuan kan lakah hian a chhan hauh lovang. Chuan maw Rinawm, ka ngaihtuah ang hi i ngaituah ve em?" a han ti a. Rinawma chuan, "Enge ni?" a lo ti a. Nathana chuan, "Mawitea hi mi a tak a nihloh chuan alo kir leh ka ringlo, chemte kha akawl a nih phei chuan hmun hla takah a tlanbo pui daih tawh ang." a ti a. Rinawma chuan, "Engvangin nge chemte chu a kawl ngawt anga?" a lo ti a. Nathana chuan, "A kawl tih ka chiang a ni, a room chhungah khan Scythian tribe chungchang hlir inziahna lehkhabu tam tak a awm a, chuan hei hi ka hmuchhuak bawk." tih pah chuan paper pakhat chu a ipte atangin a phawrh chhuak a, Rinawma chu a entir a. Paper ah chuan Scythian-Knife lem hi alo inziak teuh mai a, Rinawma chuan, "Investigator kha i hrilh tawh em? a ti a. Nathana chuan, "Hrilh e, atirah chuan min ngaithla duhlo a. Mahse a hnuah min rawn zawt nawn leh a, tichuan a buaipui tur thu a sawi nghal a. Mawitea chu misual zawn mek ang pawhin a chhuah hial maithei a ni, a la serious khawp mai." a ti a. Rinawma chuan, "Anih chuan he case ah hian beiseina thar a awm tihna a nih chu...nihleh maw Sir, engatinge Mawitea hi i rinhleh nghal tawp chhan?" a ti a. Nathana chuan a ipte a sarang chu a phawrh leh a, sarang chhungah chuan ha kherna (tooth-pick) ther fur mai chu alo awm a. Nathana chuan, "Neirotic Obsessive Behaviour, Mawitea khan hetiang natna hi a vei a ni. Toothpick kha tikhan a seh ther nuai thin a, khatiang natna nei apiang chuan an ti thin." a ti a. Rinawma chuan, "Anih chuan mi chiang chiahlo ani tihna animaw...a thawnthu ziah nasat lutuk vang te ani mai angem?" ati a. Nathana chuan, "Ka hre biklo, ka rindan chuan literature lamah hian a tui mah mah a ni ngei ang. A lehkahbu chhiar hnem lutuk hian amah chu Mawitea nilovin Scythian Puithiam a maw a inti tawh a ni mahna." a ti a. Rinawma chuan, "A nunna te a lo hlan v evel ange.." tih pah chuan a han nui huk a. Nathana chuan, "A pawimawh hmasa ber chu, Mawitea awmna hriat a ni a, chuan Pi Muani nen enge inzawmna an neih tih hi hriat a ngai bawk." a ti a.

Pi Hriati pawh chu a mangang hle mai, zan a rei tawh si a, a fanu Sangtei lah alo la haw thei silo. A call pawhin switch off a inti zel bawk si a, a tei kual reng ringawt mai a. A phone a rawn ri a, "Hello, aw Vanlalhriati ka ni e. Aww...Sangtei, Zosangzeli chu ka fanu a nia mahse inaha awm lo a...ENGMAW??? Police Station ah maw? AWle...ka lo kal e." tiin phone chu adah a, Police Station lam chu a pan nghal ta vat a. Station lamah chuan Investigator ACP Henry-a leh Nathana pawh anlo inkawm mek a, ACP hian a ko ani. An bulah chuan SI Ruata pawh a awm ve a, Ruata chuan, "Hemi chemte hmang hian Pi Muani kha thah niin a lang a, a fapa Ropuia khan chemte chu hmuchhuakin, a man zat tur te a ngaihtuah anga, tichuan a chemte kawltu a nu chu that in, chemte chu Mawitea a kawltir te pawh a ni thei asin." a lo ti ve nuap nuap a. Nathana leh Henry-a chuan SI Ruata chu an en vung vung ringawt a, Henry-a chuan, "Ruata, Ropuia khan chemte awmna chu hria se aman a kawl ang chu mawle, anu thah kher angai lovang." a lo ti a. Ruata chuan, "Ropuia'n chemte a ru lai chu a nu chuan ava hmu fuh pawh ani thei asin." a han ti leh hram a. Henry-a chuan, "Kan la chhui mek dawn alawm, tuna kan buaipui ber chu kha chemte kha tualthahna hmanrua a ni thei angem tih zawk a ni. A landan chuan Mawitea hi tualthattu ber chu niin alang a, chemte kawltu ber niin a lang bawk. Kan zawn hmuh chuan chemte chu kan hmu anga, chanchin kimchang kan hre bawk anga, engkim a chiang kuar mai ang. Mawitea hi misual zawnmek ani tiin chanchinbu ah chhuah ang che, Lalnunmawia, a piankum chu 1983 a ni." tih pah chuan file chu Ruata hnenah chuan ape a, Ruata chu a kal ta a. Nathana chuan a thil hriat leh a hmuhchhuah tawh te a ziahna paper chu Henry-a bulah chuan a pe a, Henry-a chuan a han chhiar a. Nathana chu a en a, "DCP Sir, la haw suh aw...kan la mamawh dawn che a nia." a ti a. Nathana chuan, "Pending case a ni a, hawsan mai ka tum i ring em ni?" a ti ve deuh kher a. Henry-a chuan, "Ka ring pawh ka ti hleinem, la haw suh ka ti mai alawm. Kei aia Senior i ni a, mahse hei chu ka Station a ni a, ka khua a ni. Witness i ni a, chuvang chuan i haw ka rem ti hrih lo." inti thu tak chuan a ti vel a. Nathana chuan, "Atha e, kan haw lo mai aniang chu.." a ti a. Henry-a chuan, "Chawlh hmanga rawn zin i ni tiraw?" a ti a. Nathana chuan, "Ni e, chawlh ka hman tawh zawng zawngah chuan ala dangdai ber ang...ka kal thei tawh em?" ati a, Henry-a chuan, "Awle, i kal thei e." a ti a. A aia Senior Police Officer, a thuhnuaia han dah vel chu nuam a ti ngang mai. Nathana a kal tur chiah chu Henry-a chuan, "DCP Nathan, ka lawm khawp mai." a han ti leh hram a, Nathana chu a nui suk a, "Nia, lawm rawh." a ti hmuk a, a chhuak ta nghal a.

************

Robert-a leh Mawitea thianpa, zu heh zet Duhsaka te chuan zu an lo indun mek a. Duhsaka hi Mawitea vang hian Robert-a hian a hmelhriat ve a, a duhsak ve thin hle. Robert-a hian Duhsaka bulah hian Mawitea hi a sawichhe char char zel a, Mawitea lahin Duhsaka bulah tho chuan Robert-a chu a sawi chhe char char zel bawk. Robert-a chuan, "Kha mihring tenawm, Mawitea vang khan buaina ka tawk dawn anih hi. Kan in atanga chhuah tir mai hi ka duh tawh a, Sarah-i lah chuan a t(r)an tlat zel bawk si. Vawiinah pawh amah vangin Police pahnih anlo kal a, tlai thim dawnah an haw chauh alawm." a ti a. Duhsaka chuan, "Anih chung Police te chu Pi Muani thihna chungchanga lo kal an ni em?" a han ti a. Robert-a chuan, "Nilove, England Lalnu Quenn Elizabeth-i chungchang vanga lo kal annia....haha, MAWLLIAN...engdang vangin nge lo kal se i tih a? Ni e...Pi Muani chungchang bak va ni suh...an sawi lo mai pawh a, ka hrethiam vek." a ti a. Duhsaka chuan, "Anih chuan Investigator hnenah ka va kal angai a nih chu." a ti a. Robert-a chuan, "Va kal rawh...ni 15 chhung alo tan tir mai ang che. Thu atthlak pui pui hi sawi teh suh, ngawi mai mai rawh." a ti a. Duhsaka chuan, "Chutin mi ti ngawt suh, thil hi ka hre ve nel nual ania. Mi titi thawm te hi ka hre hnem a, khawlaiah ka vak tam bawk a, sawitur ka ngah mai." a ti a. Robert-a chuan, "Enge i va sawi anga? Pi Muani thattu chu i hria em ni?" a ti a. Duhsaka chuan, "Ekhai, lawmman ka dawng hial maithei ani." a ti a. Robert-a chuan, "Engvangin maw?" a ti a. Duhsaka chuan, "Aww....Ropuia, afapa saw ka chhuah zalen thei dawn alawm. Thudik engemaw chu ka hria asin, finfiahna pawh ka nei." a ti ta mai a. Robert-a chuan, "Eng finfiahna maw?" tiin a han zawt leh a, Duhsaka chu a nui ta ver ver mai.

Pi Hriati te inkawtah chuan Taxi chu a ding a, achhung atang chuan Pi Hriati leh Sangtei chu an lo chhuak a. Taxi chu a kal hnu chuan Pi Hriati chuan, "Engthil nge i tih kha i hria em? I mawl em ni? Director Pi Mawii kha a khawngaihna ka dil tawp a, a statement withdraw turin ka ngen a, case siam lo turin ka ngen lawm lawm hnuah min khawngaih hram a nih kha. Kidnapping case angin kal thei a ni asin, a nu i ni a, an ngaidam hram che a nih kha. Thil sual anih kha, engtin nge i tih theih?" tiin a hau bawrh bawrh a. Sangtei chu a ngawi reng a, chauh hmel em em hian inlam chu a pan a. Pi Hriati chuan, "Sangte, ka biak mawlh mawlh che chu...min chhang ta che." a ti a. Sangtei chuan a nu chu a en a, zawi sap hian, "Nu, ka chau emai, ka mu duh." a ti a, a luhsan ta daih a. Pi Hriati chu a thaw hawk a, a mangan hme kher mai.

********************

(TO BE CONTINUE)



Link:
BBcode:
HTML:
Hide post links
Show post links

MISS BUTTERFLY
Posts: 3
Joined: December 29th, 2019, 10:58 pm

Unread post by MISS BUTTERFLY » June 3rd, 2020, 9:24 am

A ngaihnawm over....a dang kan lo nghak reng ee...go on

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)