NATHAN SEASON-3 (Episode-6) CINDERELLA'S TWIN SISTER Part-1 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-6) CINDERELLA'S TWIN SISTER Part-1 (by : Aaron Malsawmdawngzuala)

Unread post by Aaron Dustin » June 7th, 2020, 10:37 pm

NATHAN SEASON-3

Episode - 6

CINDERELLA'S TWIN SISTER

(Part-1)

Written by : Aaron Malsawmdawngzuala

***************

(Episode hmasa lamah khan an chhuichhuak vat lo tih kan hria a, mahse khatiang deuh hlir kha a ni dawn ania aw. Episode khata chhuichhuah nghal tawp zel ang kha ka ti tawh dawnlo a, chuan a thawnthu hi ka ti kual nasa deuh tawh bawk ang. Ka sawi lawk tawh angin tun Season hi chu a kaldan ka thlak dawn a, Rinawma sawi anga ziah pawh ka tum tawh lo a, achhan chu engkim, a kip akawiin sawi tel vek ka tun tawh dawn a, chuvang chuan Rinawma sawi anga ziah hi a har ve thin a. Ama sawi anga ziah dawn chuan amah a tel ve vek zel angai dawn a, misual te titi na te, thil thlndan zawng zawng ah te amah a awm ve vek angai dawn si a, chuvang chuan a kaldan ka thlak ta mai a ni e. Detective + Crime + Investigation thawnthu reng reng chu hetiang tur hi a ni a, chhuichhuah zung zung hi chuan thluak ah hian thawnthu hran hran han huikhawm zung zung hi a har ve lutuk a, minlo hrethiam dawnnia. Chuan he thawnthu bik pawh hi episode 3-4 lai a daih leh dawn a, an chhuichhuak nghal mai dawnlo tih kha minlo hriatsak leh bawk dawn ania. Comment-na lamah tualthattu emaw, thil ti sual tu ber kha tunge kan inrin siak leh theuh dawnnia.)

[1995]

Olivia-i leh a bialpa Simon-a te chuan Olivia-i unaunu, a phirpui Annie-i chu chin hriatloh a abo hmak avang chuan an ngaihtha lovin Police hnenah an report a. Zanrei tak tawh hnuah chuan Police Inspector pakhat leh constable pathum vel nen chuan ram hnuai lamah chuan an zawng ta a. Reife an zawn kual hnu pawh chuan an hmu bawk silo, Olivia-i leh Simon-a te pawh an mangang tawh hle mai. Chutia ramhnuai thin tak kara an zawn mek lai chuan kil khat a bati inchhi niawm tak lo eng vet vet chu an hmu ta a, chumi lam chu anva pan phei ta hlawm a. Chuta an thil hmuh chuan a barakhaih hlawm ngang mai, Annie chu zanthal zawngin nghil at hian a lo mu a, a hmel pawh a dang vek tawh. A sirah chuan bati tam deuh hi a lo inchhi tlar tuar mai bawk a, a awm zawnah tak chuan liliy pangpar tam tak alo indah bawk. Olivia-i chuan ring takin, "Nilo Annie.." tiin va pan a tum a, mahse poice te chuan an lo dang vat a. Inspector chuan Annie chu a han en chiang a, mahse nunna reng alo nei tawh lo. Olivia-i chu nasa takin a tap a, a unaunu ruang chu Hospital lamah Post-mortem turin an phur phei ta nghal a ni. Olivia-i leh Annie te hi phir an nih angin an hmel a in ang chiah chiah a, an hmel pawh a tha hle. Mahse Olivia-i zawk hi a sam a tawi a, a dum bik bawk. Annie erawh a buang a, a mawng thleng tep khawpa sei a ni. Hetih hunlai hian kum 16 an ni a, Olivia-i bialpa Simon-a erawh kum 18 a ni thung.

[Present-Year]

"Sanvi, ilo kal ve duhlo tak tak amaw? Anuam dawn asin, ahla em em hleinem..naute te chu ka nu ten an lo awm thei tho alawm." tiin Nathana chuan a nupui Sanvi chu a thianpa Birthday party lawmnaa kal ve tur chuan a sawm mawlh mawlh a. Sanvi chuan, "Awii, ka peih vel lo ea, chubakah ka awmloh chuan naute te hi ka ngaihtuah emai." a ti tlat a. Nathana chuan, "Kan hruai ve anga animai lawm." a lo ti awlsam leh et mai a. Sanvi chuan, "I mawl ami? Kum em pawh anla tling lova, nangpawh hi huau huau lawm leh lutuk. Naute te hi chu hruai lovang, i duh leh Mary kha hruai ve la, i zin ilo hawna pawh ala reilo em em a, mi hi ngailo leh lutuk mai." titau deuh tak chuan a han ti a. Nathana chuan nui suk chung chuan, "Ka ngaih em vang che alawm lo kal ve tura ka sawm che, chu bakah ka vacation period ala zo chuanglo a, hnuchhui reng hi ka ning ve tho alawm. Tluangtei hnathawhna khua lah kha, kan han buai hrep lehnghal." a ti nuah nuah a. Rinawma chu lo lut in, "Sir, i inpeih tawh em?" a rawn ti nghal thawr mai a. Nathana chuan, "Aw, ka inpack fel chu a ni deuh mai tihian.." a lo ti a. Rinawma chuan Sanvi chu a han en a, "Nang i in pack fel tawh em?" a han ti leh a. Sanvi chuan, "Ka peihlo, in pahnih khan va kal teh u...kei chu nu ka ni tawh tlat." a han ti vel a. Rinawma pawh chuan Sanvi chu lo kal ve turin a sawm nasa kher mai, mahse Sanvi erawh chuan a lo hnial fithla leh thak tho a. Nathana leh Rinawma te hi an thawhpui thin pakhat retire ta, Pu Zomuana birthday lawmnaa kal ve turin sawm an ni a, an awl lai alo la ni bawk nen, an hnial hreh bawk si chu kal ve an tum ta a ni.

Pu Zomuana te hi mi khawsa thei tak, sum lama harsa lemlo tak mai hi an ni a. A kum a upat ve tawh em avang leh cancer natna a vei mek avang chuan a damrei a rinawm tawh lova, chuvang chuan a kum 63-na chu ropui taka lawm a tum a ni. Aizawl pawn deuh hret, Resort pakhat ah chuan birthday party chu a siam a, a mi sawmte pawh mi challang leh hausa tak tak te chauh an ni. Resort bula Lodge pakhat, lian lemlo tak, mahse nuam em em si ah chuan Nathana leh Rinawma te pawh chu chumi Resot lam chu an pan ve ta a, party hun chhung hi ni 2 lai mai a nih dawn vang a ni. Sawi tak ang khan mi hausa party a ni dawn a, a sawm te pawh hi an tam lutuk lemlo. Chu Lodge-a zan 2 riah ngai hial khawp a party buatsaih tu chu a hausa khawp ang le, mahse a mi sawmte riahman erawh a tum dawn chuang biklo. Mi hausa chauh a sawm kan tih tawh kha, chuvang chuan a sum nei deuh tan lo chuan va kal ve ngawt na chi pawh a ni awmlo e. Nathana erawh kan hriat theuh angin a rethei lemlo a, a kal phak vang vang dawn tih kha chu chiang sa a ni a, mahse Rinawma erawh a pu Nathana zarah bawk a ni a kal theih veleh mai mai ni. Resot awmna hi Aizawl pawn lam a ni kan tih tawh kha, a hla em em lo a, mahse khawdang chu a ni ve tho kan ti thei ang. Aizawl district ah a awm phalo vel chiah chiah nangin a khawmi te erawh an changkang ve angreng hle a, a sawi awlsam dan ber chuan Aaron Malsawmdawngzuala ai thlawt chuan an hmeltha in an changkang vek, chu chu nimai.

**********

Lalawmpuia, kum 38 vel mi, hmel nelawm lemloh tak mai leh fel vak hmelloh tak mai chu a motor a tang chuan a chhuk a. A han hawi kual vel a, beauty parlour atanga hmeichhe hmeltha ve tak mai lo chhuak chu a hmu a. Rang takin ava pan a, "Thiannu, minlo hrethiam lawk mai. Ka hming chu Opa a ni a, artist ka nia, lem ka ziak thin a. Ihh..englo, kawm lawk che ka duh a, bus-stop thleng saw kaldun ila, inbe lawk ang hmiang." a ti a. Chunu chuan hriatthiamloh hmel tak hian, "E..awle." tiin a lo chhang ve mai bawk a. Opa chuan, "enteh, i lem ka lo ziah sak ang che chu, i duh em?" tiin a han zawt a. Chunu chuan polite tak hian, "Aaa..ngailo mai rawh se, ka hman lo a." tiin alo chhang a. Opa chuan, "Ka thiam lutuk asin, i inchhir lovang. Ti hian ti teh ang, pawisa thir hi ka vawr anga.." tih pah chuan pawisa thir chu a vawr a, "Tail or Head?" a han ti vel a. Chunu chuan, "Tail." a lo ti mai a. Opa chuan, "Ka chak tlat mai, nakinah hun i neih remchan hunah photo session ah kan inhmu dawnnia, number te kan inpe anga, tiraw?" tiin a han sawm leh a. Chunu chuan, "Nia, ka lo ngaihtuah dawnnia." a ti a. Chutih lai tak chuan an bul lawkah chuan bus a rawn ding a, bus atang chuan hmeichhe pakhat, kum 30-35 vel inkar, sam buang ngil siau mai, hmelchhe lemlo tak mai, Lily chu suitcase lian tak khai hian a rawn chhuk a. A chhuk fel veleh chuan bus pawh chu a tlan ve leh mai a, Lily chuan kawngsira a pasal Opa car lo ding chu a hmu a. Car lam chu panin a chhungte chu a han bih a, mahse tumah an lo awm silo. A phone a phawrh a, Opa chu a phone ta a. Opa chuan a phone ri chu a han en a, chuveleh a car awmna lam chu ava melh leh a. Lily a lo thleng tawh tih a hmuh chuan a biak mek nu bulah chuan, "Nakinah kan inhmu leh dawnnia." tiin a thlah liam ta a. Lily lam chu va panin, "Ilo thleng tawh animaw? Ka lo hre miah hleinem.." a han ti a. Lily chuan tum hmuk hian, "Engtin nge i hriat reng ang? I buai em anih kha.." alo ti hmuk a. Lily suitcase chu la in motor hnungah chuan a dah a, tichuan in lam pan chuan an tlan ta a.

Car chhunga chuan pah chuan Opa chuan, "I thinrim em ni? Ahma pawn min hriatthiam thu i sawi tawh kha, artist ka ni a, mi hrang hrang ka kawm angai alawm. Abikin hmeichhe hmeltha tak tak te pawh ka biak angai a, mahse nangmah hi ka hmangaih ber che alawm. I lo thleng tluang maw? Enge ka fapa Freddy-a chu a an a?" a han ti nghal zung zung a. Lily chuan, "Study camp ah an lut leh tawh dawn." a lo ti leh hmuk a. Opa chuan motor chu a tiding a, "Khawi, inthutthleng ila. Motor khalh zir i chak anilawm ni, khal ve chhin rawh." a ti a. Lily pawh chuan phur takin, "Ti ve chhin dawn ila.." a han te vel a. Tichuan Lily chuan a khalh ve ta a, muang chang chuan a khalh a, Opa chuan tidan tur a lo hrilh zel bawk a. Kawng kawiah tak chuan motor pakhat a lo lang thut a, Opa chuan ring zet hian, "Brake kha rap rawh." a ti tuar a. An insu teuh ngei mai, Lily chu a ding hman hram a, chu motor pawh chu a ding a. Motor atang chuan Rinawma lo chhuakin thinrim tak hian, "I mawl ami? Min lo kian tur zawk i ni asin, enge i rawn tlan luih vak a?" a ti hrep mai a. Opa chuan inthlahrung tak hian, "Ka tihpalh, ka nupui hian khalh a zir mek a, kan tihpalh lutuk." a lo ti a. Rinawma chuan, "Inzirtirna hun pawh a ni em ni?" a ti leh khur khur a. Opa chuan Lily chu a en a, vin zet hian, "Iva fimkhur lo ve, mi kan sut tep phah hi i hria em? Chhuak rawh, lehlamah hian va thu vat teh.." a ti vin vak vak mai a. Lily chu zah hmel tak hian a chhuak a, "Nangman khalh rawh i ti anih kha.." a ti khur dar dar a. Opa chuan aia vin hian, "Min chhang vak lo mai teh, engmah thiam neilo, lut vat rawh." a ti vin leh vak vak a. Lily chu tap deuh tuau hian a lut a, tichuan an kal ta a.

*********

Lodge reception, nutling lam deuh, kum 40 vel, hmeltha reuh tak, mahse mawl hmel angreng tak, ngo vur mai, Lisa-i pawh chuan Pu Zomuana birthday party an Lodge-a an neih dawn vanga party naa tel ve tur mi tamtak lo thleng te chu tha tak tak chuan alo welcom hlawm a. Party-naa host tur ber, Rita-i chu alo phei a, Lisa-i bulah chuan, "Enteh Lisa, darkar 2 hnuah ka lo let leh ang. Chhuah lawk ka ngai a, ka reilo ang." a ti a. Lisa-i chuan, "Dar 4 kha tan hun a ni a, ilo let hman ang maw?" a ti a. Rita-i chuan, "Dar thum velah ka lo thleng hman ang." a ti a. Rita-i chhuak tur chiah chu Nathana leh Rinawma te chu an rawn thleng ve chiah a,Rita-i pawh a kalna tur a enchiang hman silo chu Rinawma nen chuan an insu chawrh mai. Rita-i chuan inthiamloh hmel tak hian, "Awi, ka tihpalh aw.." ati a, Rinawma chuan, "Apawilo apawilo." alo ti vat a. Lisa-i chuan Nathana te a lo hmuh chuan, "Ehe, lo kal ru, in lo tluang maw?" a han ti a. Rinawma chuan, "Kan rawn kalna hi a dik chiah maw?" tih pah chuan card chu a han hmuh a. Lisa-i chuan, "Aw..a dik e. Tunge i hming le?" a han ti a. Rinawma chuan, "Lalrinawma ka nia." tiin a lo chhang a. Nathana chu ava en leh a, "Nang ve?" tiin a han zawt veleh a. Nathana chu a lo hawi a, "Nathan Malsawmkima." a ti a. Nathana hmel Lisa-i'n a han hmuh chiah mai chu tha a ti ngang aniang, a lai der mai. En reng pah chuan, "Anih tak chu, Lisa-i ka nia." a han ti vel a. Nathana chuan, "Anih chu, chahbi chu minlo pe la." a ti a. Lisa-i chuan, "E aw..khale...2nd floor aw.." a ti a, Nathana te chu an chho ta a. Lisa-i chuan Nathana chu a thlir zui vawng vawng mai a, chu chu hrethiamin Rinawma pawh a lo nui leh ta put put mai.

Opa leh Lily te pawh chuan in an thleng ta a, motor atang chuan an chhuak a. Opa chuan motor hnunga Lily suitcase chu lakchhuah pah chuan, "Lo han lut rawh, ka Ni Puii pawh a awm ang. Tlai lamah birthday party nei turin Resort ah an kal dawn a, i duh leh i kal ve dawnnia." a ti a. Lily chuan, "Anih leh nang ve?" a tih chuan Opa chuan, "Hna dang ka nei." tih pah chuan a kal daih mai a. Opa'n ka Ni Puii a tih hi a pa nau a ni a, Opa hi anu leh paten an thihsan tawh a ni. Opa te unau hi pathum an ni a, a upa ber niin a naute chu George-a leh Sentei te an ni. Pi Puii hian fapa a nei a, a hming chu Petera a ni. Pi Puii te inchhung chu ava lut a, Lily chuan, "Inlo dam tlang maw?" a han ti a. George-a nau Sentei chuan eiloh hmel zet hian Lily chu alo melh a, "I dam zawk maw?" a lo ti hmuk a. Lily chuan, "Um dam alawm, in ngaihawm hle mai." nui sang chuan a han ti a. Pi Puii chuan, "Lily, nuam deuh khan awm rawh aw, i inbualna tur tui pawh ka lo lum sa diam tawh ania." tih pah chuan George-a te unau chu a han en a, "George, Sente, huan ah kal ang ule, min puih tur thu in sawi tawh kha." a tihzawm nghal zat a. George chuan, "Ka hmanlo, thil tih tur ka nei." a lo ti hmak a. Sentei pawh chuan, "Keipawh ka hmanlo, ka hla phuah lai mek hi a pawimawh lutuk." a lo te ve nghal zuah zuah bawk a. Pi Puii chuan, "Ni thu kalta khan min tiam tawh kha.." a ti a. Sentei chuan, "Tinge awmpui ilak mai loh, kan buai ve tho." a ti hmuk a, a room lamah ka phei ta daih a. Pi Puii chuan George-a bulah chuan, "George, i nau hi a luhlul sawt ta khawp mai." a ti a. George-a lah chuan, "Kan chhungkaw mizia vek alawm, kan vai hian kan luhlul vek a, chuan tumah hian huan enkawl lam kan peihlo bawk. Ka chhuak dawn, ka kal phawt ange." tiin a chhuak ve ta nghal daih mai. Pi Puii chu zalo deuh chuan a nui huk a, Lily bulah chuan, "Huiham, keimaha hna ka thawh angai anih hmel, an luhlul hlawm sia." a ti a. Lily chuan, "Lungngai suh, ka inthlak anga, ka pui ang che." a ti a.

**********

Lisa-i pawh Nathana alo kal leh thut takin a ti deuh a ni ngei ang, reception dawhkan hma ah chuan a lo inchei hliau hliau mai a. Chuveleh Lodge Director, Olivia-i chu a lo lut thut mai a. Olivia-i'n Lisa-i lo inchei a hmuh veleh chuan thinrim zet hian, "Helai hmun hi i room anilo, dah vat rawh." tiin a hau hrep mai a. Lisa-i pawh chuan zak tak chung chuan, "Sorry Ma'm." tiin a indah fel nghal a. Chutih lai chuan Nathana alo chhuk a, Olivia-i chuan Nathana bulah chuan, "Hello, Olivia ka nia, hemi Lodge-a Director hi ka ni e. Puih theihna che ka nei em?" tih pah chuan alo chibai a. Nathana chuan, "Ka lawm e, in fel hlawm hle mai. Englo ania, ka room-a wifi khi a kal thei miah lo a." a ti a. Olivia-i chuan, "Nia, pawi kan tikhawp mai. Naktuk hian a siam tu tur a lo thleng dawn a, a tha vat mai ang." a ti a. Nathana chuan, "Anih chu...tihtur ava vang duh dawn ve...lehkhabu chhiar tur te a awm em?" a han ti leh a. Olivia-i chuan, "Aw awm e, ka chhuak lawk dawn a, Lisa-i hian a lo kawhhmuh ang che." tiin a chhuak ta a. Lisa-i chu a phur kher mai, "Helamah aw ka pu." a ti a, lehkhabu dahna lam chu apanpui ta a. Nathana chuan comics ber kher chu a han thur chhuak nalh a, "Hei hi aleiin ka lo lei teh ang, a theih chuan?" a ti a. Lisa-i chuan, "Theih mai zel e, engatan nge comic bu berkher i tih a, fa i nei tawh em ni? I fate i hawnsak dawn em ni?" a han ti a. Nathana chuan, "Nilove, keimah ber hian chhiar nuam ka ti em a, chuvang zawk mawle." tih pah chuan a room ah chuan a chhoh san leh ta a.

He khua hi khaw lian lutuk a nilova, Resort awmna lai vel hi fianrial leh ramhnuai deuh a ni. Rita-i chu ramhnuai lam pan chuan chak takin a kal a, a hnungah chuan tu emawni, dum veka inthuam, lukhum dum khum leh puan duma hmai tuam tlat hian a zui reng a. A ngaih a thalo hle mai a, a hlau em em bawk. Rita-i phone chu a rawn ri a, Lisa-i alo ni. Lisa-i chuan, "Hello, Rita..dar 4 a ri dawnnia, khawnge i la awm a?" a ti a. Rita-i chuan thaw hlawp hlawp hian, "Ka lo kal mek a mahse..." a tih lai chuan phone chu a tawp hmak mai. Lisa-i chuan, "Hello, hello, Rita?" tiin a be malwh mawlh a. Rita-i hnunglam atang chuan chu hmaituam chuan na em em hian a vaw pawp mai a, a thal tawp mai. Ramhnuai pilril deuh lamah chuan a hnuk phei ta a daih mai a, a phone pawh chu chu hmaituam chuan a la ta mai a.

*******

Dar 4 a lo ri a, function neih a hun ta. Rita-i a lo thlen theih miau siloh avang chuan hreh chung chung chuan an Director ber Olivia-i chuan a host ta a. Olivia-i chu a zam em avang chuan a tawng bah deuh nuai mai a, party naah chuan Lily leh Pi Muani te pawh an lo kal ve a, reilote hnuah George-a te pawh an lo thleng a. Olivia-i pasal Simon-a pawh a lo thleng ve ta a, a nupui Olivia-i'n a lo host daih mai chu mak a ti hle mai. Kil khata Nathana leh Rinawma lo ding chu va panin, "Thiante u, khawnge Rita-i?" ava ti ringawt a. Nathana te chuan an lo hrethiamlo hle mai, Rinawma chuan, "Tunge Rita-i chu?" a lo ti hu mai a. Simon-a chuan, "A host tu tur kha mawle." a ti a. Chuveleh mangan hmel tak hian Lisa-i chu alo kal a, "Simon, heta lo kal teh." tiin ava pawt hrang nghal a. Simon-a chuan, "Enge ni ta?" a lo ti vat a. Lisa-i chuan, "Rita-i a bo." a ti ta mai a. Simon-a chuan, "Ehe...lo kal teh, khulamah inbe teh ang." tih pah chuan inhnuai lamah chuan a chhuk pui a. Mahse Nathana chuan a lo hre phak a, "Rinawm, ka lo let leh vat ang." a ti a, Lisa-i te chu a umzui nghal a. Mangan hmel taka Lisa-i rawn chiai chiam mai chu Lily pawh chuan a lo hmu ve hman hlauh mai, a zui ve ta nghal bawk a. Inhnuai lamah chuan an chhuk a, Simon-a chuan, "Enge awmzia, Lisa?" a ti a. Lisa-i chuan tap tep hian, "Simon, Rita-i te chu i hriat kha, hun vawng diktak thin anih kha...dar 3 ah ka lo let ang a tia, mahse a lo let silo. Olivia Ma'm hi mipui hmaah a host ngai silo a, engtin nge ni dawn? Phone-in ka bia a, a hlauhthawn hmel em em lehnghal." a ti chel chul mai a. Nathana chu alo chhuk a, "Min lo hrethiam ula, in thilsawi kha ka lo hria a. Kei hi Deputy Commissioner of Police Nathan Malsawmkima ka ni a, puih theihna che u ka neih ngei ka ring. Lisa, Rita-i chu engtik khan nge helai hmun hi a chhuahsan, engti turin nge?" a ti a. Lisa-i chuan, "A sam siamtir turin beauty parlour ah ka kal dawn a ti a, mahse alo la let silo." a ti hluam hluam a. Nathana chuan, "Dar engzat khan nge?" a ti leh a. Lisa-i chuan, "Inlo check-in vel lai khan a chhuak chiah." a ti a. Nathana chuan, "Umm..anih chuan Dar 1:40 pm vel a nih chu. A kalna tur hmun chu a thleng ngei em tih kan finfiah hmasak ber a ngai a nih chu." a ti a. Lisa-i chuan, "Enteh ka pu, beauty parlour ka va phone a, mahse dar 3 minute 5 vela a rik hma khan a chhuah daih tawh thu min hrilh a ni." a ti a. Nathana chuan, "Umm...a nih chu, lungngai suh." a lo ti a. Lisa-i chuan, "Police i hrilh mai teh ang u." a ti a. Simon-a chuan, "Lisa, chiai suh, hahdam phawt teh." a lo ti a. Nathana pawh chuan, "Lungngai suh, kan hmu em em ang. Ti hian ti teh, heta tanga km 30 bial chhunga Hospital awm zawng zawng call vek ang che." a ti a.

Chutih lai chuan Lily pawh chu a lo chhuk ve a, "Enteh u, puih theihna che u ka nei em?" a rawn ti a. Simon-a chuan, "Lisa-i hi hmun dangah lo va hruai phei rawh." a ti a, Lily chuan reception counter lamah chuan a phei pui ta a. Nathana chuan, "Simon, hawh teh..hmun dangah inbe lawk teh ang." a ti a, an chhuak ta a. Rinawma pawhin chanchin a lo hre ve a, reception lam chu a zu pan ve nghal a. Reception ah chuan Lisa-i leh Lily te chu an lo awm a. Rinawma chuan, "Enge chanchin?" a va ti a. Lisa-i chuan, "Heta tanga km 30 mai novin km 50 bial thleng pawhin Hospital zawng zawng leh Morgue zawng zawng kan call vek a, mahse an hmu chuanglo a nih chu." a ti a. Rinawma chuan, "Awhaww...ava pawi ve aw." a ti a. Lisa-i chuan, "Thingpui in phawt ang u, ka rawn la ang." a ti a, a kal ta a. Rinawma chuan Lily chu a han en vang vang a, "Nang hi..ka hmu tawh che in ka hria. Vawiina min su tep tu kha i ni tiraw?" a ti a. Lily chuan zah hmel tak hian, "Aw ni e, ka tihpalh a ni. Ni 2 chiah motor hi ka la khalh a, pawi ka ti khawp mai." a ti a. Rinawma chuan, "Aww anih chu, apawi love." a ti a, a kalsan ve leh ta mai a.

*********

Motor chuan Rita-i zawng turin Nathana leh Simon-a te pawh chu an chhuak ta a, an tlan pah chuan Nathana chuan, "Simon, Rita-i chuan hmelma a neih awm ang i hria em?" a ti a. Simon-a chuan, "Aih hre miahlo." a ti a. Nathana chuan, "Amah hi hi hrechiang em?" tiin a zawt leh a. Simon-a chuan, "Hre chiang vak lo, Olivia-i hi ka nupui a ni a. Lodge-ah hian Director a ni a, Rita-i erawh kan employee pakhat ve mai a ni." a ti a. Nathana chuan, "Khawiah nge hna i thawh?" a ti a. Simon-a chuan, "Aizawl lamah..." tiin a chhang mai a. Nathana chuan, "Traffic jam velah i buai thei viau lo maw?" a han ti daih a. Simon-a chuan, "Ngaiah ka nei tawh...ka nupui Olivia-i hi hemi khua ah hian a piang a, Director ni tura appoint a ni a." a ti a. Nathana chuan, "Umm a nih chu." a ti hmuk ringawt a. Chumi khua Police Station chu an thleng ta a, Nathana leh Simon-a chu an va lut a. IG dulkiar zet mai hi alo thu a, Nathana chuan, "Ka pu, hmeichhe pakhat a bo a. Darkar engemaw zah vel liam ta khan Lodge atangin a chhuak a, alo let leh ta miahlo a." a ti a. IG chuan ngaihsak loh hmel zet hian, "Umm..dar engzatah? Tunge a hming? Engtia bo nge?" a lo ti bul bul a. Simon-a chuan, "Kum 25 mi a nia, ahming chu Rita-i ania." a ti a. Nathana chuan, "Vawiin khan Beauty Parlour ah a kal a, alo let leh miahlo a." a lo ti ve bawk a. IG chuan, "Vawiinah a?" a lo ti hu mai a. Nathana chuan, "Aw ni e." a ti a. IG chu a nui suk a, "Chutiang darkar reilo te chhung lek bo mai mai te chu mibo report ah kan pawm thei lo, min hrethiam ru." a lo ti tlat mai. Simon-a chuan, "Rita-i hi party naa host tur a ni a, tunah chuan lo let leh tawh tur a ni. A hun a pel duai tawh a, alo la let silo a, kan rawn report a nih hi." a ti leh a. IG chu a han thaw hak a, "Tun chiah ka hrilh leh ang che u, nikhat naah mibo case angin report kan siam thei lo. Chuzawng chu a ni e, chhuak rawh u." a lo ti leh hmuk mai a. Nathana chuan lungawilo tih hriat tak hian, "Enteh, kan report hi min buaipui saklo a nih chuan khawiah mah kan kalsawn dawn lo." a ti ve ta ngat a. IG chuan, "In kal lo anih chuan squad ka ko anga, ka man thei che u tih hi hria ang che u." a ti khur khur mai a. Simon-a chuan, "Kal teh ang, hetah hi chuan hun kan khawh ral mai mai a ni. Parlour ah chuan va kal ila, engemaw kan hre mial mahna." a ti a. Chhuah pah chuan Nathana chuan rum zet hian IG chu melhin, "I senior te bulah ka la report khawp ang che, chuan ila inchhir khawp ang." a han ti hram a. IG lah chuan, "Kal mai mai teh, i duh leh min report dawnnia." a lo ti lauh lauh a. Pawn an chhuah chuan Simon-a chuan, "Officer, tinge Aizawl Police i ni tih i sawi mai loh a." a ti a. Nathana chuan, "Sawi pawh ni ila, min pui mahse tangkaina an neilo. Keimah chauh pawh hian ka chhuichhuak em em ang, lungngai suh." a ti a, Parlour lam pan chuan kan kal ta a.

Party-naah chuan Rinawma pawh chuan kawm tur dang nei heklo, Lily nen chuan an inkawm ta ringawt a. Chutia an titi lai chuan hmeichhe pakhat, senior lam deuh tawh, ti tuai la nalh tak si hi a lo kal a. Lily bulah chuan, "Hello, nuam i ti em Party chu?" ava ti vel a. Lily chuan a lo en vung vung ringawt a, chunu bawk chuan, "Min hre tawhlo em ni? Katty ka nih hi, hemi khua ami tho, nikum pawh khan kan inkawm hrep tawh kha." a ti a. Lily chuan, "Awi animaw, mi hi ka hre rei theilo lutuk a, min hrethiam rawh." a lo ti a. Katty chuan, "Nia, nikuma program kha a nuam ka ti daih zawk." tih pah chuan Rinawma chu a han en a, "Ehe..thianpa, ka va hmu ngailo che ve, i vawikhat lo kalna em ni?" a ti a. Rinawma chuan, "Aw, hei Pu Zomuana hi ka hmelhriat a nia." a ti a. Katty chuan, "Anih chu, kan khua chu nuam i ti maw?" a han ti leh a. Rinawma chuan, "Nia, a nuam khawp mai." tih ringawt chuan a chhang leh a. Katty chuan, "Nia, Aizawl lam atanga lo kal i ni ngei ang maw..Aizawl atang chuan kan khua hi chu darkar khat vel bak tlan angai bawk silo a.." a han ti zuah zuah a. Chutih lai chuan Lily chuan, "Minlo hrethiam ula, ka kal phawt ange." tiin a kalsawn ta daih a. Katty lah chu a titi tui kher mai, Rinawma chu ala be mawlh mawlh a, "Enteh thianpa, thil mak deuh ka hrilh ang che aw. Ramhnuai lamah sawn vawikhat chu ka kal a, mahse mak tak maiin ka muthlu daih a. Mak i ti ve tho ang, mahse miin min hrilh dan chuan oxygen tlakchham vang te an tia." a ti leh zuah zuah mai a. Rinawma chuan a ning deuh aniang, "Anih chu...nih phawt aw.." a ti a, a kalsan daih mai a.

************

Nathana te pawh chuan Parlour chu an va thleng ta a, parlour hi Aizawla kan hmuh thin PArlour lian tak ang kha a ni velo a, tetakte leh a thawktu pawh pakhat chiah awm a ni. Parlour chu a lo inkalh daih mai a, minute 10 vel lai an nghah hnu chuan nu thau zet mai, dawt sawi hrat hmel deuh hi alo kal a. Nathana chuan, "Ka pi, he parlour hi i dawr a ni em?" tiin a han zawt a. Chunu chuan, "Aw ni e, enge?" alo ti hmuk a. Nathana chuan, "Englo ania, hmeichhe pakhat kan zawng mek a, Lodge atanga lo chhuak a nia. I dawrah hian a lo kal tur thu a sawi a, i hmu mial em?" tih pah chuan Rita-i thlalak chu a han entir a. Chunu chuan a tarmit te chu a han vuah tha te te a, thlalak chu a han en a, "Dar 3 vel khan ka dawr atang hian a chhuak a, ramhnuai lam saw a pan a. Pa tawite pakhat, kum 45 bawr vel niawm tak hian a zui bawk. Chupa chu ka hriatchian nachhan pawh zingah khan halpuah a rawn lei a, jail tang tlanchhuak niawm tak hmel a pu lehnghal." a ti ta mai a. Nathana chuan, "Tinge jail tang tlanchhuak niawm tak i tih kher a?" a han ti a. Chunu chuan, "Helaiah hian kum 10 chuang ka awm tawh a, khawmi te leh veng mite hi chu ka hre deuh vek alawm." a lo ti a. Simon-a chuan, "Anih leh engtin nge an awm zel?" a lo ti ve leh a. Chunu chuan, "Aw....an insual titih lehnghalin ka hria." a ti a. Simona chuan vin zet hian, "Engtinge iva puih loh?" a ti vin hlur mai a. A aia vin hian chunu chuan, "Police ka ni em ni? Hmeichhia ka nih hi..ka ngam teuhlo." tiin a lo vin let hrep mai. Nathana chuan, "Nihleh enge thleng zel?" a han ti leh a. Chunu chuan, "Abak chu ka hre tawhlo, ka buai lutuk...nih phawt u." tih pah chuan a dawr chhungah chuan a lut daih mai. Nathana chuan, "Ava han nasa piap piap veleh.." a ti nuah nuah a. Simon-a chuan, "Ramhnuaiah chuan va kal ila, va zawng ve mai ang." a ti chul tawh mai a. Nathana chuan, "Simon, chutiang ringawt a theih hleihnem. Search party te an awm phawt angai dawn a, mahni thu a lo tih ve chi ngawt anilo." a ti a. Simon-a chuan mangan hmel tak hian, "Mahse, hetia engmah tilo a lo awm tawp hi a rem hleinem." tih pah chuan a kal daih a. Nathana chuan, "Kawng te kan bo anga sin, naktuk zingah te pawh..Simon...Simon...huiham, engemaw a hriat ni?" a ti bul bul a.

Zan alo ni ta a, Nathana leh Simon-a chuan ramhnuai thim tak karah chuan Rita-i chu an zawng ta ngat ngat a. Torch-light enkual chunga an zawn pah chuan Simon-a chuan, "I sawi dik e, Officer. A thim emai, naktuk zing lamah kan buaipui chhunzawm mai dawn mawni." a ti ve ta nge nge a. Nathana chuan, "A chhungte pawh be ve hrim hrim ila, alo haw daih teh pawh a ni thei asin." a lo ti ve bawk a. Simon-a chuan, "Chhungte tumah a neilo, a neilo han tih ah, an bulah a awm ngailo. Chutih lai chuan Nathana chuan mobile phone pakhat an hma a lo let reng mai chu a hmu ta hlauh mai a, phone ah chuan thisen ala kai zui a. Nathana chuan, "Ehe, tu phone nge ni?" a ti a. Simon-a chuan, "Ehe, Rita-i phone anih hi.." tih pah chuan han chhar ngawt a tum a. Nathana chuan lo dang vatin, "Chhar ringawt suh, finger prints a awm maithei asin." tih pah chuan a rawmawl a phawrh a, fimkhur tak chuan rawmawlah chuan a fun a. Simon-a chuan, "Phone a kai kha thisen a ni em?" tiin a zawt a. Nathana chuan, "Aw ni e." tiin a lo chhang a. An piah leh deuh lawka bati eng ve ve chu an hmu leh ta a, anva pan hnai a. Rita-i ngei mai chu chu ramhnuai pilril tak maiah chuan a lo let reng mai a, a bulah chuan bati a inchhi tlar fur mai bawk a. A awm zawnah tak chuan lily pangpar 10 vel lai mai hi alo awm bawk a, a hmel pawh a dang vek tawh. Nathana chuan a zu en hnai a, a mar a han dek a, "A thi tawh." a ti ringawt a.

*********

Olivia-i te nupa chu an in bulah chuan lungngaih hmel tak hian an ding dun a, Lodge bul chiah hi an in a ni. Nathana chuan Police te chu a be mek a, mahse Police a ni ve tih erawh ala hrilh duh chuang lo a, chutiang bawkin Rinawma pawhin Police a ni tih a hrilh duh lo. Police te an kal hnu chuan Rinawma chuan, "Sir, tualthattu chu an chhuichhuah theih mai i ring em?" a han ti a. Nathana chuan, "Rinawm, tualthattu chhuichhuah chauh kha thil pawimawh ber a nilo. A khaw mite hian Rita-i zuiru tupa kha a hmel an hria a ni, an sawi thawm ka hria alawm." a ti a. Rinawma chuan, "An thurchhuak nalh thei kher lovang." a lo ti a. Nathana chuan, "Nia, a hriat loh...chubakah jail tang chhuak nitur chuan a thil tih dan kha a sentimental deuh mah mah a ni. Bati a dah tlar tuar a, pangpang a dah bawk a, Rita-i sam kha a tan bawk a. A sam kha tualthattu pa hian a kawl anga, a dahtha dawn a nih ka ring." a ti a. Rinawma chuan, "A fetish ve aniang." nui deuh suk hian a ti a. Nathana chuan, "Ani maithei...rilru buai a nih ka ring. Midang a thah belh zel pawh ka ring, alo that tawh maithei bawk a." a ti a. Simon-a te nupa lam chu an va hawi a, Olivia-i chuan Simona chu a lo be mawlh mawlh a. Simon-a chuan, "Duhtak, min hrethiam teh." tih pah chuan a kal daih a. Olivia-i pawh chu inchhungah chuan a lut ve nghal a. Rinawma chuan, "An inhmeh reuh khawp mai." tih pah chuan a han nui leh suk a. Nathana chuan, "An lo inngeihlo viau maithei asin, engemaw thup pawh an neidun maithei ani. Hawh teh, hetiang kan case pawh nilo, Lodge lamah i let leh teh ang." a ti a, an let leh ta a.

Olivia-i chu a room ah chuan alut a, chutia Rita-i a thi ta mai chu a hlauthawng takzet. Chumai anilo, kum 16 vel a nih laia a unaunu Annie thihdan ang chiah khan tualthattu khan Rita-i kha a that ve kha a ni si a. A pawhdawn a hawng a, damdawi chu la chhuakin a hmawm mawlh mawlh a, tui a in khawlh khawlh a. Khumah pawh mulo chuan dawhkan bawh chuan a mu a, reiloteah chuan a muhil ve ta a. Mumang mak deuh mai a nei ta, a mumangah chuan ramhnuai bawkah chuan Simon-a nen anlo lengdun a. Mahse mak deuh mai chu a mumangah hian tlerawl kum 16 mi chauh kha ala ni tlat mai, Simon-a pawh kum 18 lek ala ni a, an inngaihzawn lai kha a ni. Simona chuan Olivia-i chu a han fawp vawng vawng a, chuveleh Olivia-i chu a tlan thut mai. Nui har har chung chuan thingkung phenah a biru a, Simona chuan a rawn zawng a. Simona lo kal phei zel chu thingkung phen atang chuan a en reng a, mahse thawk leh khatah a bo thut mai. Simona zawng chuan Olivia-i chu a vak kual leh chiam mai a, chutah hnunglam atang chuan lukhum dum khum, dum veka inchei, puan dum a hmai tuam chu a rawn lang thut mai a, Olivia-i luah chuan baseball bat hian na takin a vua a, Olivia-i chu a thal tawp mai.

A mumang ram atang chuan Olivia-i chu a harh chhuak zawk mai a, dawhkan chu alo la bawh reng mai a. A han hawi kual a, khua alo var der tawh. A bul lawkah chuan a pasal Simon-a chu thutthlengah alo mu ve bawk a, abulah chuan zu bur hi alo awm bawk a. Simon-a chu a hma zan khan zu ruiin a chatthla a ni ngei ang, Olivia-i chuan a sawi vak vak a. Simon-a pawh chu alo harh a, Olivia-i en pah chuan, "Damdawi ilo ei leh tawh amaw?" tiin damdawi bawm chu a kawk a. Olivia-i chuan tui in khawlh khawlh pah chuan, "Umm..Rita-i vang mawle. Nimina thil thleng khan min thawng em ani duhtak, ka kut a khur a, engmah ka vuan tha theilo. Ka hlau ani, keipawh hi min that ve mai ang." a ti khur dar dar a. Simona chu a tho a, Olivia-i kut vawn pah chuan, "Lungngai suh, engtin mah i awm lo ang. Enteh Olivia, he tualthattu hi a chet leh hmain doctor hmu vat ang che." a ti a. Mahse Olivia-i chuan, "Aih, ka duhlo. Rita-i thattu hi zawnhmuh ka duh a ni." a ti tlat mai a. Simona chuan, "Naktukah bei che a tum nia i hriat chuan Doctor hmu ngei ngei ang che..appointment kalo siam sak ang che." a ti a.

***********

Nathana leh Rinawma zing exer la pawh Lodge lamah chuan an let leh a, inchhung an lut chiah chu Simon-a chuan Nathana bulah chuan, "Pu Nathan, ka be lawk thei che angem?" a ti a. NAthana chuan Rinawma bulah chuan, "Lo han chho rawh, ka lo kal vat ang." a ti a, Rinawma chu alo han chho ta a. Simona chuan, "Officer Nathan, murder investigation lam hi i ti ve thin em?" a han ti a. Nathana chuan, "Ti ve tho e, mahse mibo hi ka speciality a ni mah zawk." a ti a. Simona chuan paper ala chhuak a, engemaw a ziak a. Nathana hmuh pah chuan, "Hetiang zat hi pe che ila, he case hi a rukin min chhuisak duh angem?" a ti a. Nathana chuan paper chu a han en a, 'Rs. 100,000' tih hi alo inziak a. Nathana chu a nui suk a, "Pawisa angailo ang, ka chhuisak em em ang che. Mahse ngati nge kei kher i duh nachhan, in khua ah hian Police te pawh an awm ve tho a.?" a han ti a. Simon-a chuan, "Nangmah hi ka ring ber che a, chuan kan mikhual te hi an him lo a, chu chuan ka nupui pawh a ti thlabar in a ti mang ang a ni." a ti a. Nathana chuan, "A mikhual te chu a ngaipawimawh hle mai, pawisa tamtak pawh min pek a huam ania." a ti a. Simon-a chuan, "Ni e, a aia tam pawh kan huam e. Min pui thei ang tiraw?" a ti leh a. NAthana chuan, "Thei lutuk e, chuan zawhna pakhat chiah...khawnge tualchhung mite hi an kalkhawm ber thin?" tiin a zawt a, Simon-a chuan, "Evening party tenau deuh te hi a awm ve nual a, tah chuan aniang...bar a awm bawk a, tahchuan tlangval zu heh ho an kalkhawm thin..abak chu ka hrelo." a ti a, Nathana chuan, "Ka lawm e." tiin a room lamah a chhoh san ta a.

Pi Puii pawh zing chaw eikham veleh atangin a buai nghal khawp mai, a u fate lah chuan an pui duh der mai silo. Amah chuan an inbula huan tereuhte a siam lam chu pan leh in amah chauh chuan thei leh theilo hian a thawk leh ta tauh tauh mai a. Chutia a thawh mek lai chuan an inchung atanga leihlawn chu a rawn tla a, Pi Puii pawh chu leihlawh chuan a khak fu teuh kher mai. A hlau lutuk leh phu nasa lutuk chu a zuang tho lo chauh a ni ber mai. A ding zawt a, inchung lam chu a han melh chho nghal a, mahse tumah anlo awm lo. Inchungah chuan a han chho ta ngat a, leihlawn an dahna bul vela pangpawr pot te chu a lo tla keh a, a rilru a nuamlo kher mai. Mahse tumah dang a hmu bawk silo, inchhung chu a han enkual a, a vahte zawng zawng chu an chhuak vek bawk si a, Lily pawh a chhuak chiah kha a ni si a.

***********

Lodge bul lawka lui te reuhte ah chuan Rinawma chu a hawi thawveng vel mai mai a, chutia a awm lai chuan Lily alo kal a. Lily chuan a rawn en a, "Tui ka'n cheng lawk ange." a ti a, a inphelh mawlh mawlh a. Tichuan tuiah chuan a zuang thla a, Rinawma chuan a lo en reng a. Mahse second 20 vel lai hnuah pawh chuan Lily chu a lo la chhuak ta miah lo mai a, tuichhungah chuan ala awm reng a. Rinawma ngaih tha lo chu tuiah chuan a zuangthla ve ta ringawt mai. Lily chu a pawm chhuak a, Lily chuan, "Enge i tih a? Min dahthla vat rawh." a ti chel chul mai a. Rinawma lah chuan, "A tha vek e, lungngai suh...engkim a tha vek e." a lo ti vak vak a. Lily chu a dahthla a, Lily chuan, "I mawl em ni? Enge i tih a?" a ti vak a. Rinawma chuan, "Awww...ka chhanchhuak che.." a ti hu mai. Lily chuan, "Chhanchhuah ka ngailo, ka practise a nih kha." a ti ta daih mai. Rinawma pawh a zak angreng khawp mai, "E..tihpalh aw, ka lo hlauthawng hman a." a ti a, kal mai a tum a. Mahse Lily chu a tap ta vak vak mai a, Rinawma chuan a ngaihna a hrelo kher mai. Lily chuan tap chung hian, "Engtin nge a thah theih? Kum 25 lek a ni a, hmeichhe fel tak a ni asin. Ka rilru a ti buai vek a, khatia tui chhunga ka inchiah khan ka ziaawm theih ka rin vang in ka zuangthla ta mai anih kha. Rita-i kha mifel tak a ni asin, a hmahun pawh eng tak a ni." a ti a, a tap hawm hawm a. Rinawma chuan, "Lily, insum rawh. He khawvelah hi chuan thil fairlo tak tak a thleng fo alawm, kan thu ani miau lo ani." tiin a theih ang tawk chuan a hnem a. Lily pawh chu a tap bang a, "Ka lawm e, ka tihpalh aw...ka zak khawp mai, mahse tunah chuan ka tha tawh e." a ti a.

Bar ah chuan chumi khua a mi awmtha duhlo tlangval pahnih, zurui apianga buaina siam ziah mai te chu thawvengzet hian anva lut a. Bartender Irene-i bulah chuan pakhat zawk chuan, "Khawimaw Irene, whiskey chu khilai leh la.." ava ti vel ham ham a. Irene-i chuan tum hmuk hian, "A theih tawhloh, niminah pawh no in ti keh a, kan managerin ka hlawh a cut phah. Buaina insiam ziah a, a free a in intum ziah bawk." a lo ti a. Pakhat leh zawk chuan Irene-i sam chu a kek vak a, "Min rawn pe dawn em?" a ti a. Irene-i chuan vin zet hian, "Aw aw aw...min thlah rawh." a ti vak a. Chumite chu an thu a, "Minlo pe vat ang che...sehhmeh nen.." an la ti ham ham zui. Chutih lai chuan bar chhungah chuan Nathana a rawn lut a, chung tlangval pahnih te lam chu ava pan a. An bula va thut pah chuan, "Thiante u, titi lawk ang u hmiang." ava ti a. Pakhat zawk chuan, "Tunge i nih a?" a ti a. Nathana chuan, "Nathana ka nia, mi pakhat, zungbun tatto nei ka zawng a." a ti a. Tlangval pakhat leh zawk chuan, "Police ten ni,in ah enquiry an neihpui tawh, nangmahin inbuaipui ve mai rawh." a lo ti vin hlur a. Nathana chuan, "Insum teh, khapa kha chu tualthah thubuai siamsak a ni a...." a tih lai chuan chung tlangval pahnih te chu an ding thut a. Pakhat zawk chuan, "Kal bo rawh kan ti anilawm ni?" tih pah chuan hnek a han tum a, Nathana chuan a lo bum a. A kutah a man a, a hnek thal tawp mai. Pakhat zawk pawh chuan Nathana chu khawi a han tum a, mahse Nathana chuan a lo rek hrep a, dawhkan ri chawrh khawp chuan a lu a tauh tir a. Nathana chuan, "Huiham, tunlai tlangval te hi an thinrim hma leh lutuk a." a ti a. Irene-i bulah chuan ava phei a, "An khawihna che em?" a ti a. Irene-i chuan, "Na love, khamite kha jail tang thin annia, an hahthlak thei khawp mai." a ti a. Nathana chuan, "Police hnenah report mai ta che u." a ti a. Irene-i chuan, "Aih, Police hnena report hi kan manager hian a ngam hlawl lo a ni." a ti a. Nathana chuan, "Anih chu...chuan coffee min khilai avangin ka lawm e." tiin kal mai a han tum chu Irene-i chuan, "Thianpa, i mi zawn chu ka hria a ni." a ti ta mai a. NAthana chuan, "Tunge?" tiin a han zawt a. Irene-i chuan, "Ka hrilh che tih hi tuma hnenah sawi lo la, ahming chu Anthony Lalpekhlua ani a, eng engemaw thubuai vangin vawi 2-3 vel chu Police te pawhin an man tawh. An man hnuhnun ber kha chu pawngsual vang a ni a, mahse thuchiang a awmlo a, an chhuah lehnghal mai a ni awm e." a ti a. Nathana chuan, "Anih chu, khawi ah nge a chen?" a ti a. Irene-i chuan paper a la a, Anthony-a address chu ziakin Nathana chu a pe a.

Nathana chu Anthony-a chenna in lam pan chuan a kal a, a chenna niawm bera a hriatah chuan ahan lut ve thuai mai a. Mahse tukverh-ah Anthony-a chu a lo zuangthla hman chiah chiah a. Nathana chuan, "Hrep taka.." tih pah chuan tukverh lam chu a pan a, a zuang thla ve nghal a. Anthony-a chu a tlanchhe reilo hle mai, hnunglam atang chuan Nathana chuan a hnungzang ah tak chuan a beng pawp mai a, a bawk thlawp mai. Nathana chuan a rek a, "Engvangin nge i tlanchhiat a?" a ti a. Anthony-a chuan hlau tak hian, "Aman a ti hmasa a nih kha..ama tih hmasak kha alawm." a ti nghal vak vak ringawt a. NAthana chuan, "Tumaw...tuin maw ti hmasa?" tiin a vin khur khur a. Anthony-a chuan, "Rozuala mawle, Rozuala kha...a bialnu kut ka thlak a, chuvang chuan min rawn sawisak i tum a ni tiraw?" a ti leh ringawt a. Nathana chuan, "Tunge Rozuala chu?" a han ti leh a. Anthony-a chuan, "Ehe, ama rawn tirh che i ni nange?" a ti ta hu mai. Nathana chuan, "Huiham...lo kal phawt teh.." tiin a car lam pan chuan a hnuk phei dawr dawr a.

********

Rinawma chuan Lily chu an inlam pan chuan a haw pui a, achhan pawh Rinawma hian Lily chu inthah a lo tum leh mai ang tih a hlauh vang a ni. Chutia an titi phei bawrh bawrh lai chuan inkawtah chuan a pasal Opa chu a lo ding reng mai a, vin zet hian, "Khawnge i kal bo daih a, ka Ni Puii tu emaw in thah a lo tum asin. A lungphu a thatloh phah a, doctor koh hial a ngai asin." a ti khur khur a. Rinawma chuan, "Puih theihna che u ka nei ve angem?" a lo ti a. Opa chuan thamloh hmel zet hian Rinawma chu a melh a, "Doctor i ni em ni?" a han ti vel a. Lily chuan, "Rinawma ania, ka thianpa a nih hi. ASP ania, Aizawl Police Department ami a nih hi, min pui thei em em ang." a lo ti vat a. Opa chu a nui suk a, "Animaw...anih chuan Pu ASP, engte nge i chhui ve thin a?" a han ti vel a. Lily chuan, "Rinawma hian tuia ka inchiah lai chu ka buai emaw a ti a, tichuan a rawn zuangthla ve a, min rawn chhan a tum a.." a tih lai chuan Opa chuan, "A tha e, lo lut ru." a ti a. Inchhungah chuan an lut a, Sentei chuan Pi Puii bulah chuan, "Ka Ni, i lungphu pawh a ziaawm tawh a, engmah hlauhawm a awm tawh lo." tiin a lo hnem mawlh mawlh a. George-a pawh lo pheiin, "Ka Ni, i hriatsual vang a ni zawk lo maw? Tu chuan nge maw thah tum ang che le?" a lo ti ve bawk a. Pi Puii chuan, "Ka mit ngei hian ka hmu alawm, leihlawn kha amahin a rawn tla theilo hrim hrim." a ti tlat mai si. Lily te nupa leh Rinawma te pawh chu an lo luta, Lily chuan, "Ka Ni...i tha maw?" a ti a. Pi Puii chuan, "Ka tha e, bawihi." a lo ti a. Rinawma chu a han melh a, Lily chuan, "Ka Ni, hei hi Rinawma ania, Aizawl atanga lo kal ania. ASP a nia, i thil tawn te chu han hrilh la, a pui thei em em ang che." a ti a. Opa chuan Rinawma chu rum zet hian a lo melh a, "Hmm..roomah ka lo awm ange." tih pah chuan a room lamah chuan a chho daih a. Pi Puii chuan, "Lily, engmah anilo. Chutin Police inrawlh pawh angailo, ka hmusual mai mai ani ang. Ka lo hlauthawng hma deuh ani, engpawh nise, ASP Rinawm, kan lawm tho e." a ti a. Rinawma chuan, "Awle, keipawh ka kal tawh ange." a ti a. Lily chuan, "Ka lo thlah ang che.." a ti a, mahse Pi Puii chuan, "Lily, ka inbualna tur va lum teh a, i thianpa hi ka lo thlah zawk ang." a ti a. Pawnah chuan an chhuak a, Pi Puii cuan, "Enteh ASP, nichin kha tihpalh aw..mahse min tihbuai tum tu hi min zawnhmuh sak rawh, min thah a tum tak tak alawm." a ti a. Rinawma chu a nui suk a, "Tinge nichin khan i sawi mailoh a?" a ti a. Pi Puii chuan, "Ka chhungte khan hrelo se ka duh a, ka hmusual emaw, ka bengchhe ri a nih an ring leh vek dawn a. Mahse ka chiang a ni, inchung chhonaah khan pen ri ka hre bawk a, a vawikhatna chauh pawh a ni tawh lo. Zankhat phei chu kan in rawn rawk tum niawm tak pawh thawm ka hre tawh a, chuan vawikhat dang leh pawh motor dum vek hian min sut a tum tawh bawk." a ti a. Rinawma chuan, "Awle, ka lo hre reng ang." a ti a, a hawsan ta a.

Police Station ah chuan IG chuan Olivia-i chu thu a lo zawt fiah mek a, Olivia-i chuan, "Chuzawng chu a ni e, abak engmah ka hrelo." a ti a. IG chuan, "Paper ah hian sign la, i sign zawh veleh i haw thei ang." a ti a. Olivia-i chuan paper chu a sign a, tichuan a chhuak ta a. Olivia-i chhuah veleh chuan Nathana chuan Anthony-a chu IG room ah chuan a rawn luh pui a, Nathana chuan, "Kha le IG Sir, Anthony-a chu...in mi zawn mek kha anilawm ni?" a ti a. Anthony-a chuan IG chu enin, "Tumah ka that lo, khanu khan min enrum vela ka tihthaih mai mai anih kha. Ahnuah a tlanchhia a, ka um a, mahse ka um reilo, ka haw leh daih alawm." a ti a. Nathana chuan, "IG Sir, Police te ka bula an awm a ring a, a tlanchhia a ni." a ti a. Anthony-a chuan, "Rozuala rawn tirh amaw ka tia, ka hlau a, ka tlanchhe mai anih kha, Sir." a ti lawm lawm bawk a. IG chuan Nathana chu a han melh hraw a, "Enge Anthony-a inah hian i tih?" a ti ta daih mai. Nathana chuan hrethiamlo tak chuan, "Enga? Chungte chu kei nilovin amah hi zawt ta che.." a ti vin hlur mai a. IG chuan, "Enteh thiana, hun chu kan insiam anga, Police kan ni a, kan tihur chu kan ti ve mai ang. Warning hnuhnung ber ni rawh se, investigation tibuai zawnga i che leh anih chuan ka man ang che. Kal tawh rawh, lo inrawlh ve tawh suh." a ti khur khur mai a. Nathana pawh chu a thinrim ngei mai, Police Officer a nih thu chu hrilh a tum lek lek a, mahse Simon-a bulah a ruka chhui tura a intiam ve tawh laklawh si avang chuan lungawilo zet chuan a chhuak a, Anthony-a chuan a lo la nuihsawh zui.

************

Tlai alo ni a, waiting shed pakhat ah chuan Nathana leh Rinawma chu thudunin an titi a, Rinawma chuan Pi Puii chungchang vel chu Nathana a hrilh a, "Amah thah tum tu ka man chuan pawisa pawh tamtak min pek a tiam a, a hausa reuh khawp mai." a ti a. Nathana chu a nui suk a, "Umm anih chu, chuti chu nangmah a i chhui a ngai dawn nih chu." a han ti vel a. Rinawma chuan, "Anih nang ve? Anthony-a thenawm te chu i be kual em?" a ti a. Nathana chuan, "Ka zawt nual hlawm a, mi tenawm tak ani an ti vek a. An sawidan chuan khami ni khan inah a awmlo a, a chhuak bo nileng ani awm e. MAhse mak ka tih deuh chu maw, a thenawmnu pakhat khan an hlauh hmel lutuk a, engemaw min hrilh duh anei a, a ngam chiahlo a ang lutuk." a ti a. Rinawma chuan, "A hlauh vang a nih chiah chu, Anthony-a hi chuan criminal record a nei nual reng alawm. Tupawh a thah a pawisa lovang, misual tak ani ngei ang." a ti a. Nathana chuan, "Rinawm, Anthony-a mizia ka en khan maw, a thah te ruang chunga pangpar a dah kher ka ringlo ani." a ti a. Rinawma chuan, "Engvangin maw i rinloh?" a lo ti a. NAthana chuan, "Achhan chu maw, mi inla pa ve tak leh luhlul tak a ni. Mi that pawh nise, plan mumal tak a siam kher lovang, ngeng tak a ni." a ti a. Chutih lai chuan hmeichhe pakhat hi alo kal a. Nathana te bulah chuan, "In tha maw kha, administratorin hetah hian in awm tih min hrilh a. Rawn call mai che u ka tum a, mahse hmaichhana inbiak hi tha zawkin ka hria a." a rawn ti a. Nathana chuan Rinawma bulah chuan, "Henu hi ania Anthony-a thenawmnu chu..ahming chu Ngaihawmi a nia. Ngaihawm...engkim han sawi vek teh le." a ti a. Ngaihawmi chuan, "Khami ni khan ka hna bang ka haw kha Anthony-a chu ka hmu a, nula pakhat a lo chhaih a. Police phone pawh ka tum hman hial a, mahse nula chu a tlanchhe ta daih a. Tichuan Anthony-a chuan phone abia a, reilote a biak hnuah chuan a kal ve ta chauh a ni. Ka zui zel a, a apartment a thlen hma chu ka zui char char a ni." a ti a. NAthana chuan, "Anih leh vawiin chhuna ka zawh che khan tinge min hrilh nghal mai loh a?" a ti a. Ngaihawmi chuan, "Misual tak a ni a, ka hlau a ni. Pawngsual case vangin an man tawh bawk a, chubakah kum 10 kal ta khan keipawh hi min enthla thin a ni. Ka inbul lawkah a awm lehnghal a, thlamuang taka awm chu a har takzet a ni." a ti a. Nathana chuan, "Ngaihawm, min hrilh avangin kan lawm e, police te hnenah i saiw ang chiah hi i sawi leh thei angem?" a ti a, Ngaihawmi chuan, "Aw, thei e." tiin a chhang a.

Police Station ah chuan Nathana chuan Ngaihawmi chu ava hruai a, chutia Ngaihawmi'n a thuhriat te a sawi zawh hnu chuan a haw ve ta a. Nathana pawh haw a tum chiah chu SI pakhat hi alo kal a, inchhung alut tur chiah chu Nathana chuan, "Ka pu, kalo tibuai lawk che..." ati a. Chu SI hming chu Mamuana a ni. Mamuana chuan, "Station chhungah aw..." a ti a. Mahse Nathana chuan, "Mimal thil ania, ihh englo, Nathana Malsawmkima ka nia..Deputy...oh sorry, Private Detective ka nia." tiin dawt a sawi ringawt a, Police a nih thu a sawi duhlo kan tih tawh kha. SI Mamuana chuan, "E..nanghi maw Nathana chu...mi investigation neihlai lo inrawlh ve chhen tia IG sawi kha i ni ang maw...Detective ilo nih ve khanglang vang anih chu ilo tel ve reng ni." a lo ti hrep a. Nathana chuan a ipte a zen a, Mamuana chuan, "I card ka hmu peih lo, ka ring che alawm...Detective chu i ni e, mahse ka pui theilo ang che." a lo ti nghal zuah zuah a. NAthana chuan, "Aih, hei chu card ah pawh a sial chi ania, Amawii Bottle ai pawha sial a nih hi." tih pah chuan pawisa tamtak hi ala chhuak a. Mamuana chuan, "Min tham i tum em ni?" a ti a. Nathana chuan, "Tum love, lawmman pek che ka tum mawle. Enteh, in IG sawn Rita-i case hi a ngaihthah viau niin a lang a, min pui hram teh." a ti a. Mamuana chu a han hawi kual zeuh zeuh a, "Enge i duh a?" a ti ta nge nge a. Nathana chuan, "Forensic Examination Result ka hmu duh a ni." a ti a. Mamuana chuan a file ken lai chu a pe a, "Kha en rawh, minute 2 chiah hun i nei." a ti a. Nathana chuan file chu a han chhiar mual mual a, "A thih hun hi dar 5 vel niin tualthattu hmanraw hman hi a hriam lutuk lo a, a taksa peng hrang hrang ah hliam a awm bawk. A thisen ah hian nachhawkna damdawi chikhat hmuh tel a ni bawk a...Sir Mamuan, enge Trans-Aiz-Lab awmzia hi??" a han tih zawm zat a. Mamuana chuan, "Transfer to Aizawl Laboratory tihna a nih kha, kan technology te hi hetah chuan ala beitham ve deuh a, Aizawl lamah kan thawn leh phawt zel." a lo ti a. Nathana chuan file chhungah chuan pawisa chu a han zep zeuh a, "Case kaihhnawih hnuhnung ber hi enge a nih i rin?" tiin a han zawt a. Mahse Mamuana chuan, "Ka hre mai biklo, kal tawh rawh, IG in min hmu ange.." a ti a, NAthana chu a haw ta a.

*********

Dining hall ah chuan Nathana leh Rinawma chuan tlai chaw an ei mek a, Nathana chuan, "A thihhma hian damdawia hrai ruih phawt a nih hmel, chumi hnuah chauh chuan thah a ni a, sleeping pills pawh hmuhtel a ni." a ti a. Rinawma chuan, "Sleeping pills a? Hmeichhe pakhat kha, nimin tlai party naah khan ka hmu a, ahming kha Katty niin ka hria. Thawnthu mak deuh min hrilh a, asawi dan chuan ramhnuaiah a kal a, tichuan a inrinloh hlanin a muthlu ta thut ringawt a. A tuk zingah a tho a, engmah thilthleng a hre bawk silo a. Ka rindan chuan sleeping pilss chu a ei ve thin anga, a rui amawni aw ka tia." a ti nuah nuah a. Nathana chuan, "Katty chu khawiah nge a awm?" a ti a. Rinawma chuan, "Hemi khua ah hian a awm ve tih chiah ka hria." a ti a. Nathana chuan, "Tinge i zawh loh?" a ti a. Rinawma chuan, "Hmm...engemaw ka zawh ngawt ang le?" a lo ti bul bul a. Rinawma bawk chuan Lisa-i thil lo sem kual lai chu ava hmu a, "Lisa, hei Nathana hian lo kal teh a ti a." a han ti deuh kher a. Lisa-i chu phur tak hian a rawn kal a, Nathana chuan, "LALRINAWM VAL-SENIOR." tiin thinrim tak hian a phun sup a. Lisa-i chuan nui sang hian, "Enge ni ta?" a rawn ti a. Rinawma chuan, "Katty i hria em?" a ti a. Lisa-i chuan, "Kan Katty hi maw...hria e." a lo ti a. Rinawma chuan, "Hei...Nathana hian biak lakw a duh a, a address min hrilh theih chuan kan lawm khawp ang." a ti a, phur tak chuan Lisa-i chuan Katty address chu a hrilh ta a.

"Zan dar 10:30 vel kha Lodge ka chhuahsan chiah a, abak engmah ka hre tawh lo. Atuk zinga ka thawh chuan dar 7 vel alo ri tawh a, amak khawp mai." Katty chuan a ti a. Nathana chuan, "Khawiah tak nge i mutthluk?" tiin a zawt a. Platform ah, cottage-bulding bul chiah ah sawn ania. Ka thiannu a awm a, abula riah ka tum zan a nia." a ti a. NAthana chuan, "Nihleh i thiannu chu i kal ta silo a, a lo mangang viau lo maw?" a ti a. Katty chuan, "Mangang kher lovang, ka kal dawn nge dawnlo ka chiang lo a. Party kha a rei sia, engtikah nge an zawh dawn ka hre silo a." a ti a. Nathana chuan, "Eng party nge?" a han ti a. Katty chuan, "Ka thiannu tho birthday a nia, kan lawm a. Dar 10:30 ah ka haw a, mahse midang zawng chu zing thleng an awm thung." a ti a. Nathana chuan, "Anih leh i mutthluk chuan, engemaw thil mak deuh thleng te a awm em? " a ti a. Katty chuan, Mumang mak deuh ka nei a, khatiang em em a mumang mak kha kala nei ngailo. Ka bulhnai vel te chu rawn senno leh violet vek hi a ni a, ka awmna lai vel chu a lo puar pup pup bawk a." a ti a. Nathana chuan, "Umm...anih chu." a ti ringawt a. Katty chuan, "Ihh Rita-i ruang kha ramhnuaiah a awm tak tak em?" a ti thut mai a. Nathana chuan, "Tinge min zawh kher a?" a ti a. Katty chuan, "Kan khua ve hi chu thuthang diklo an thehdarh nasa lutuk a, ramhnuaia kal pawh saw tuvak mahin an ngam tawh lo. Mi zawng zawng hian kha mihring kha alo let leh tawh niin an ring a, an hlau ani." a ti a. Nathana chuan, "Tu chu maw?" a lo ti vat a. Katty chuan, "Mi rilru buai pakhat mawle. Ka pi min hrilh dan chuan kum 20 vel liam ta daih tawh khan saw ramhnuaiah sawn mi rilru buai pakhat hi a awm thin a, hmeichhia te hi a tihthaih thin a. Hmeichhe pakhat phei chu a that a, a ruang chungah chuan pangpang te a dah vel ani awm e." a ti ta mai a. Phawk hru hian Nathana chuan KAtty chu a en a, "Kum 20 chuang liamta daih tawh khan maw?" a ti hu mai. Katty chuan, "Aw, ka pi sawidan a nia." a ti a. Nathana chu a thaw hak a, "Ka lawm e, ka kal ange." ati a, akal ta a.

[Tunge tualthattu hi ni ang?]

TO BE CONTINUE...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)