NATHAN SEASON-3 (Episode-7) CINDERELLA'S TWIN SISTER Part-2 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-7) CINDERELLA'S TWIN SISTER Part-2 (by : Aaron Malsawmdawngzuala)

Unread post by Aaron Dustin » June 10th, 2020, 12:29 pm

NATHAN SEASON-3

Episode - 7

CINDERELLA'S TWIN SISTER

(Part-2)

Written by : Aaron Malsawmdawngzuala

*********

Tlaiah chuan Rinawma chu tihtur a awm loh em avang chuan nghakuai chiah in lui bulah chuan a thu a, chutih lai tak chuan Lily alo kal a. Lily chuan, "Officer, hetah ilo awm a nimaw?" a ti a. Rinawma chuan, "Ehe Lily, enge ilo tih dawn a?" tiin alo zawt a. Lily chuan, "Englo ania, ka zawng che a." a ti ringawt a. Rinawma chuan, "Enga tan nge min zawn a?" a lo ti a. Lily chuan, "Ihmaw Officer, ka Ni Puii khan a thil tawn vel a hrilh che tih ka lo hria a, chhui zui turin a ngen che tih ka lo hre bawk a." a ti a. Rinawma chuan, "Enteh Lily, Pi Puii khan a hlauh vangin amah that tumtu an awm angin a ngai ni berin ka hria, lung thalo a nei bawk nen, a hlauh thawng mai mai a ni ang." a lo ti a. Lily chuan, "A ni thei tho, mahse maw Officer..." a tih lai chuan Rinawma chuan, "Lily, Officer min ti lo la, a nuamlo emai. I thianpa angin min ngai la, Rinawm tiin min ko mai rawh." a ti a. Lily chuan, "Hehe, anih chuan Rinawm, ka Ni Puii chuan a hlauhthawn vang mai maiin a sawi pawh a ni thei tho. Mahse tukin zing khan ral khat atangin mi pakhat hian kan in hi a rawn en reng a, ramhnuai lam panin a kal leh daih a." a ti a. Rinawma chuan, "Mahse, chupa chu kha leihlawn rawn tlu tawp nen khan inzawmna an nei dawn em ni?" tiin alo zawt let a. Lily chuan, "Ka hre biklo, mahse khapa khan min hmu chiah a, a tlanchhe nghal daih a.Leilawn tla kha amaha tla pawh a ni maithei, mahse lo nilo tase..ka Ni Puii hi thah tum tu lo awm tak tak tase, min pui ang tiraw?" a han ti a. Rinawma chuan, "Pui tehreng e, Pi Puii bulah pawh ka intiam tawh alawm. Chutih lai chuan Rinawma ngha kuai chiah chu a rawn che det a, Lily chuan, "Ehe, saw i man aniang, a che dut mai." a ti a. Rinawma chuan intithei zet hian, "Aww...anih saw mawle. Ka man fo alawm." tih pah chuan a nghakuai chiah chu a rawn lek kang a, mahse nghate, te tak te mai hi alo ni a. Lily chu a nui nasa ngei mai, "Rinawm, hetiang te chu i kham khawp dawn em ni?" tiin a nui huah huah a. Rinawma chuan, "Darkar khat vel ka chiah ve ngar ngar a, ka va man te ve mawle." tiin a nui e bawk bawk a. Lily chuan, "Keiman ka lo try ve dawn mi...ka thiam lutuk asin." a lo ti a. Rinawma chuan nghakuai chu a pe a, Lily chuan ahan chiah ve a, relote ah a rawn che ta dat mai. Lily chuan nghakuai chu a han khai chhuak a, sanghla lian tha nelh nawlh tak mai hi alo ni a. Rinawma pawhin mak a ti hle mai, "Iva thiam ve." a ti ringawt mai a.

A room chhungah chuan Simona chuan phone hmangin mi alo be mek a, "Ka lawm e aw thianpa, Omday ah kan inhmu dawnnia." tiin phone chu a dah a. A nupui Olivia-i alo lut a, "Enge chanchin?" a rawn ti a. Simona chuan, "Kar khat chhung chawlh ka dil a, min mamawh awm si a. Olivia-i chu a pasal Simona bulah chuan a va thu a, "Khawvela pasal zawng zawng ah chuan i tha ber mai." tih pah chuan beisei nei tak hian a va fawp vel a. Simona chuan, "Ka car khu siamthat angai dawn a, workshop ah kal ka ngai ania. Min hrethiam teh, kar khat lai ka post-pone tawh." tih pah chuan a tho thut a, a kal ta daih mai. Olivia-i chuan lungawilo tak hian a pasal chu a melh a, glass no chu a vawm keh chhuai mai. A pawhdawh a hawng a, damdawi bawk chu a la chhuak leh ta a. Mum 5 vel chu a hmawm pawp pawp a, tui a in khawlh khawlh bawk a.

*******

Opa chu an chaw ei dawhkanah chuan thinrim hmel zet hian a lo thu a, chutih lai chuan Lily chu a rawn haw a. Lily chuan a sangha man chu rawn khai in, "Enteh, sangha lian deuh ka man ania." a rawn ti lut a. Opa chuan thinrim hmel zet hian, "Nuam i ti viau animaw...i duhtawk tawh em?" alo ti vin hlur a. Hrethiamlo tak chuan Lily chuan, "Enge awmzia?" alo ti hu a. Opa chuan Lily sangha ken lai chu chhuatah a ben tlak sak a, "Kha Police Officer Rinawma khan a melhdan che kha ka hrethiam vek, nangpawh khan i melh dan kha a diklo." a ti khur khur a. Lily chuan lungawilo tak hian, "Enge maw i sawi le?" a han ti dek dek chu Opa chu a ding thut a, "Min lo kawp ru reng a ni tih ka hriat vaih chuan i chak lovang, chuan Freddy-a pawh ka bulah a awm ang." tiin a vau leh ta pung pung mai a. Lily chuan, "Chutiang thil chu a thleng hauh lovang." alo ti ve ngat a. Opa chuan, "Kan hre khawp ang, a nu mi hur leh lerh zet bulah hi chuan awm suh se, ka bulah awm zawk rawh se.a han ti deuh kher a. Lily chuan, "Khatia mi koh kha i zak em? Freddy-a chu ka bulah a awm ang, court ah pawh ka kal mai ang." a ti a. Opa chu thinrim tak chuan a tho a, a room lamah a chho ta daih a.

RInawma erawh chu lui bulah chuan ala awm reng a, chutih lai chuan Pi Puii chu alo kal a. Pi Puii chuan, "Ehe Offcer, i dam maw?" a rawn ti a. Rinawma chuan, "Dam e, Rinawm tiin min ko mai rawh, Pi Pui." a lo ti a. Pi Puii chuan, "Ka lo tlai deuh alawm le, Lily-i'n hetah hian dar 4 ah min lo nghah tur thu min hrilh a. Ka huan ah hna ka lo thawk tui lutuk a, ka lo theihnghilh daih alawm." a ti a. Rinawma chuan, "Anih chu, khawnge Lily chu a awm a?" a ti a. Pi Puii chuan, "An pa nen an inhau lehpek alawm le, Opa sawn chhuah pawh a phallo a. Nimi pawh khan an inhau hrep a, a hahthlak ania. A thikthu a chhe lutuk a, a inla thu sia." a ti nuah nuah a. Rinawma chuan, "Pi Pui, inchhungkua te zawng zawng saw ka hriatchian a ngai dawn a nia. Opa chu chutiang mi a nih si chuan tinge i inah i awm tir ve a, i in ania, i thu ber ani lawm ni?" a ti a. Pi Puii chuan, "Saw in saw ka unaupa Mapuia min rochun ania, sumdawnna pawimawh tak mai a nei a. Mahse vanduai thlak takin a tlachhia a, min boral san zui bawk a." a ti a. Rinawma chuan, "Engkima rochun ta che animaw?" a ti a. Pi Puii chuan, "Niang chu mawle, mahse a tum lawk bik pawh anilo. Opa leh George-a leh Sentei te hi unau ang vekin an awm a, anihna takah chuan unau an nilo a. George-a leh Sentei te hi chu ka unaunu boral ta Tetei fate an ni a, pa an nei lo hrim hrim a, ka u Mapuia hian a fate ang chiah in a enkawl a. Pneumonia a nei a, a thi zui ta a." a ti a. Rinawma chuan, "Anih leh Opa chu?" a lo ti leh a. Pi Puii chuan, “Opa hi chu ka u Mapuia nupui hmasa ber Tluangpuii fapa ania, an inneih khan Opa hi apa bulah a awm nghal a. Hemi vang hian Tluangpuii chu a lungawilo em em a, a thih hnu khan ka u Mapuia hian Opa tan hian financial support a buaipui sak ta a, rochan pek pawh a tum a ni.” a ti a. Rinawma chuan, “Mahse Opa hian a va tlawh ngai chuanglo tiraw?” a ti a. Pi Puii chuan, “Ni ang chu mawle, a hahthlak ania. PAwisa zawng zawng chu a interest kan insem tlan theih nan tiin bank ah ka dah vek a ni.” a ti a. Rinawma chuan, “I fel hle mai, nang fa i nei ve em?” a ti a. Pi Puii chuan, “Nei e, Petera a ni a, Software engineer a nia. Doctorate degree pawh a nei a, ka chhuang khawp mai.” a ti a. Rianwma chuan, “Anih leh leihlawn a rawn tluk lai vel khan i chhungte khawnge an awm a?” a ti a. Pi Puii chuan, “Ka hre lo ea, an buai thei sia, an chhuak vek zel alawm.” a ti a.

***********

Nathana chu in lian ve deuh pakhat bulah chuan ava kal a, a bulah chuan naupang pahnih hi an lo infiam a. NAthana chuan naupangte bulah chuan, “Mama te u, khawnge Alex Zochhuanmawia te in hi a awm?” a ti a. Naupang pakhat zawk chuan, “Saw lai saw a nia, mahse va kal suh. Kan va kal hnai anih chuan a silaiin min lo kah tur thu a sawi thin.” a ti nghal zuah zuah a. Nathana chu a nui suk a, “Chutiang thil a thleng lai chu in hmu tawh em?” a han ti a. Naupangte chuan an lu anlo thing a, NAthana chuan, “Ka lawm e.” tiin chumi in lam chu ava pan a. Nathana chu inchhungah chuan a lut a, alo reh thiap mai. A han hawikual a, chu veleh hnung lam atang chuan tu emawni hian silaiin a rawn tin thut mai a, “Tunge i nih?” a rawn ti thum bul bul a. Nathana chuan ban pharin, “Detective Nathan Malsawmkima ka ni e, case chhui mek ka nei a. Resort employee pakhat, Rita-i thihna chungchang chhuitu ka nia, i puihna ka mamawh a ni.” a ti a. Chupa chuan, “Engtin nge ka awih theih ang che?” a lo ti leh a. NAthana chuan, “Ka hrelo le, min awih mai rawh. Anih loh chuan min that la, Vanramah ka kal a ni tawh mai aniang chu.” a ti ta ringawt a. Chupa chuan silai chu a dahthla a, “Thu ta che, anih chuan i titi ang hmiang.” a ti a, an thu dun ta a. Nathana chuan, “Enteh Pu Alex, Katty in min hrilh a. Kum 20 vel liam ta khan helai ramhnuai velah hian tuna ka case chhui mek ang chiah hi a thleng tawh a ti a, Police te biak ka tum a, mahse min ngaihsaklo em a, i bulah ka lo kal tawp mai a ni. Alex-a chuan, “Kum 2 kal ta khan rawk ka ni a, Police te chuan min pui biklo. Tih ngaihna ka hrelo a, keimahin ti hian ka in buaipui chho ta zel a nih hi. Chuan maw, thil pakhat ka hrilh ang che.Lallawmzuali case kha nia, Annie Lallawmzuali, kum 16 mi lek, mahse hmana mi tawh ania. Tun thleng hian chhuichhuah ala nilova, crime-scene ah pawh forensic lam pawhin engmah hnuhma an hmulo a. Police te uisathiam hruai chu Annie te inlam pan chuan a kal a, mahse engmah thil thar an hmu lemlo. Chumi thil thlen hnu chuan nu pahnih hi ka inah an lo kal a, anni pawh thla engmaw zah liam ta khan ramhnuaiah khan an lo muthlu ve a ni awm e. Khatih hunlai khan inspector ka ni a, Annie pawh kha zanlaiah a unaunu leh a bialpa nen ka zawnpui nghe nghe. Hmeichhe pahnih lo kal te zinga pakhat kha chu Aremi niin ka hria, pakhat kha chu ka hre tawhlo. Saw IG sawn file vel chu ala kawl vek ang, va dil mai rawh.” a ti a. Nathana chuan, “Pu Alex, enteh...Police te nen sawn kan inbe tha thei vaklo a, saw IG sawn min puih duh ka ringlo.” a ti a. Alex-a chu a tho a, “Ni e..” tih pah chuan pawhdawh a va hawng a, a lo let leh a, Nathan hma zawnah chuan chahbi hi a rawn dahthla a. Alex-a chuan, “Kan department saw kum 30 lai mai chu chei thar a ni tawh lova, an la khawih danglam eihlo. Safe vel pawh saw a chahbi an la thlak lo ang, chuan zanah watchmen an awm ngailo bawk.” a ti a. Nathana chuan, “Mahse Pu Alex, dan phalloh a nih hi.” a lo ti a. Alex-a chuan, “Dan phalloh chu anni sawn an ti nasa zawk, ka rilru ka thlak hma hian chahbi hi la vat la, chhuak mai teh.” a ti a, Nathana pawh chuan chahbi chu la in a chhuahsan ta a.

Opa chuan ama room ah chuan lem a lo ziak leh malh malh a, rawng te chu a hnawih vel bawk a. Lily chu lo lutin, “Ka zawng char char che a lawm.” a rawn ti a. Banga lo inhung, Opa lem ziah sa chu a la kang a, chuveleh Opa chuan vin zet hian, “Hey, tinge i lak ringawt a? Ka ziah zawh hlim hlawl anih kha, ala ro lo ania, i ti chhia ange.” tiin a laksak daih a. Lily chuan lemziak dang te chu a han en leh a, “Hengte hi tute ta tura i ziah nge?” tiin a zawt a. Lemziah chhunzawm malh malh pah chuan Opa chuan, “Enge maw thil engkim hi hriat ve zel i tum le? A bungrua te ka hmansak si a, chuvang chuan ka Ni Puii ka ziahsak ve a nih kha. Khu Pirat Phunchhiari khu..” a ti deuh kher a. Lily chuan, “Engemaw chutia i koh kher le? Thla tin kan hman turin pawisa min pe ziah a, athlawna lemziah sak te chu a phu ve alawm.” a lo ti a. Opa chuan, “Nia, vawikhat te chu a phu ve mahna.” ala ti hram a. Lily chuan, “Ka rin aiin ilo thiam zek mai, midang tamtak ai pawhin i thiam ve a nih hi.” a han ti vel a. Opa chuan, “Art lampang hi engmah i hre velo, chaw chhum bak thiam i neilo.” a ti a. Lily chuan, “Ka allergy damdawi a zo a, inah ka tawm reng theilo.” tih pah chuan Opa lemziah lai chu ava khawih chhin a. Chuveleh Opa chuan, “I mawl ami? Lo khawih suh...min tibuai reng mai, chhuak hrih teh.” alo ti leh hrep a, Lily pawh chu a chhuak ta daih a.

********

Zan dar 11 a ri tawh a, IG pawh chu Station chu chhuahsanin a nupui nen chuan an inhau bawrh bawrh a. Station an chhuasan veleh chuan abula car ding reng atang chuan Nathana chu a rawn chhuak thut mai a, Station lam chu pan vatin Alex-a’n a pek chahbi hmang chuan Station chhungah chuan a lut ru ta a. File te chu a han en kual vak vak a, atawpah chuan 1995-Annie Lallawmzuali tih hi alo awm a. File chu a han keu a, Annie thlalak chu alo awm a. Nathana chuan phone a phawrh a, “Rinawm, darkar 1 hnuah ka room ah inhmu ang aw.” a ti a, a dah lehnghal daih a. Nathana chu Lodge lam pan chuan a let leh a, tichuan Rinawma pawh a lo phei a. Rinawma chuan, “Tun ang hunah enge a?” a rawn ti lut nghal a. Nathana chuan a phone-a Annie thlalak chu hmuh pah chuan, “Han en teh.” a ti a. Rinawma chuan a han en vang vang a, “Ehe..hei te chu kan Director Olivia-i a nih hi.” a ti a. Nathana chuan, “Anilo, a phirpui Annie zawk a nih kha. Olivia-i emaw, a pasal Simona pawh khan Annie thih dan leh Rita-i thihdan te hi a in an thu min hrilh miah lo. File kaihhnawih te ka en kha chuan Annie hi thil hriam lutuk lemlo hmanga thah a ni a, a thisen ah khan damawi, nachhawkna lampang hmuh a ni bawk.” a ti a. Rinawma chuan, “Anih chuan kum 20 chuang temeuh tualtthattu hian Rita-i hi thah tumin a lo nghak reng tihna a nimaw? MAhse ava mak awm ve..” a ti nuah nuah a. Nathana chuan, “Nia mak e, tualthattu chuan kum 20 chuang nghak lovin a that ve nghal mai thei reng. Chuvang chuan tualthattu hi mi pakhat, Annie thattu tho kha ani tihna a ni. Plan tha tak a siam a, a fimkhur em em bawk. Mahse, tinge Annie leh Rita hi a thahna chhan ni ang?” a ti a. Rinawma chuan, “Midang pawh a lo that nual tawh maithei asin.” a ti a. Nathana chuan, “Ni e, a ni maithei.” a lo ti ve bawk a. Rinawma chuan, “Sir, enge kan tih dawn?” a ti a. Nathana chuan, “Hmeichhe engemaw zatin khami ni khan ramhnuaia an mutthluk rikngawt thu an sawi nual tih ka lo hria a, Katty ang deuh khan. Chuan a then hi chu an address pawh ka nei nual a, hemi khua a awm pawh hi an la awm nual a ni awm e. Rinawm, naktukah hemi te hi iva hmuh hlawm angai ang.” a ti a. Rinawma chuan, “Naktukah maw?” a lo ti hu a. Nathana chu a nui suk a,”Umm..va mu tawh mai teh.” a ti a. Rinawma lah chuan, “ENgtin maw i tih?” a lo ti leh hu mai. Nathana chuan, “Va mu rawh..i mut a chhuah hmel emai.” a ti a, Rinawma chu a tho a, a room lamah a let leh ta a.

Atuk zingah chuan Nathana chu hma takah thovin exer a la a, chutia a insawizawi lai chuan Olivia-i zing tlan ve mek chu a hmu a. Nathana chuan, “Good Morning.” a lo ti a. Olivia-i chu dingin, “Morning...” a lo ti ve a. Nathana chuan, “Titi lawk ang hmiang.” a ti a. Olivia-i leh Nathana chu an thudun a, Nathana chuan, “Tinge kum 20 vel liamta khan i phirpui Annie chu Rita-i thihdan ang chiah khan a lo thi ve tawh a ni tih min hrilh lohva?” tiin a zawt a. Olivia-i chuan, “Engvangin nge ka hrilh ang che? Hmanah khan Police te ka hrilh vek tawh alawm.” a lo ti a. Nathana chuan, “Rita-i case chungchang hi ka chhuichhuah i duh takzet anih chuan engkim min hrilh ve angai ang, kum 20 liamta khan enge thleng ka hre duh ani. Olivia-i chu a thaw hak a, “Annie nen hian kan inkawm ngeihin kan innel em em a, kum 13 lek kan nih lai khan ka nu hian min thihsan a ni. Nuhrawn kan nei a, min enkawl seilian ta a ni. Kan unau thawnthu hi naupang thawnthu, Cinderella thawnthu nen khan a in ang deuh a ni ber mai. Simon-a hi ka vawikhat hmuhna atang khan ka duhin ka hmangaih nghal em em a, amah ka tawn hma khan tu mipa mah hi ka la kiss ngailo. Chutih lai chuan Simon-a hi Annie bialpa ani a, mahse ka chhuhsak ta a ni. Tuna ka ngaihtuah let leh hian ka inthiamlo em em a, mahse a hunlai kha chuan engmah ka lo ngaihtuah chianloh vang te pawh a ni mahna. Simona chu hmeltha tak leh changkang tak a ni thin a, kei erawh hmeichhe tleirawl pangngai tak mai ka ni. Ani ang em em a hmeltha kha ka la hmu ngailo a, ka lalfapa ang maiin ka ngai thin. Tichuan a rukin Simon-a nen chuan kan inhmu thin a, mahse Annie hian a hre ngailo. Simon-a chuan Annie chu a then ta nge nge a, mahse keimah vang a nih thu erawh ka hrilh ngamlo a ni. A rilru a na em em a, rilru lak pen nan tiin thiante nen kan chhuak ho fo a. Nikhat chu Simon-a chuan lehkha min rawn thawn a, ramhnuaia kan inhmuh thinna ah inhmu turin min rawn sawm a. Hemi ni hian Annie nen birthday lawmnaa kal kan tum zan tak a ni lenghal a, Annie bulah chuan ka pum ana tiin chhuanlam ka siam a, ani erawh chu a kal ta tho a. Tichuan zan alo ni a, dar 9 velah chuan birthday lawmnaah chuan kava kal a, mahse Annie hmel reng ka hmu ta lo a. Mi zawng zawng ka zawt kual a, mahse a lo kalloh hrim hrim thu an sawi a. Ka mangang chuan Police ka hrilh a, Inspector Alex-a’n min zawnpui ta a. Annie chu ramhnuaiah chuan a lo ler reng mai a, kan chhan hman talo a ni. Chumi hnu chuan tu emawni hian engthil emawni hmangin hmeichhe thenkhat ramhnuai lama kal thin te chu a lo hrai thin a, an muthlu ta thin a ni." a ti a. Nathana chuan, "A lawmawm e." a ti a, a kalsan ta a.

***********

NAthana haw lam chu Simona nen an intawk ve ta hlauh mai a, Nathana chuan, "Ehe Simon, ka hmu hlauh che chu ka va lawm em." a ti a. Simon-a chuan, "Engthil emawni a thleng em ni?" a lo ti a. Nathana chuan, "Thleng tehreng e, ka client zinga pakhatin ka lakah engemaw a thup alawm mawle. Kum 20 vel liam ta khan Rita-i thihdan ang chiah hian hmeichhe pakhat chu hemi khuaah ngei hian a lo thi ve tawh ani tih min hrilh miahlo a, chu chu thil thleng chu a ni." a ti derh kher a. Simon-a chu a tum hmuk a, "Enteh Officer, Rita-i a thi ta mai khan min ti mangang em a ni. Kum 20 liamta a thilthleng nen khan a in ang tih pawh ka lo hre tawh hleinem, ka ti tak tak." a ti a. Nathana chuan, "Ka awihlo, Rita-i thih lai awm ang vel khan khawnge i awm?" a ti a. Simon-a chuan, "Office ka kal a, ka ban veleh party naah khan ka rawn tel ve nghal a ni. Enge ni a..min ringhlel em ni? Aruka pawisa chawi meuhva ka rawih, DCP hian min ringhlel tihna em ni?" a han ti pang pang a. Nathana chu a nui suk a, "Ka ringhlel che pawh ka tihloh kha, engpawh a thleng thei ani, Simon." tih pah chuan Nathana chuan Simon-a bana pangpar lem tattoo nalh tak mai chu a han en vang vang a, a nui suk a, a kalsan ta a.

Rinawma pawh Lily te in chu a thlithlai ru reng a, chuveleh fimkhur hmel em em hian George-a a rawn chhuak thut mai a. George-a chuan pangpar ala keng zui a, pangpar chu a thukru tut tut a. Rinawma chuan a ringhlel deuh a, a zuiru ta a. Ramhnuai lam pan chuan George-a chu a kal zel a, Rinawma chuan a zui zel a. Chutah in pakhat bulah chuan George-a chu ava kal a, inkawtah chuan nu pakhat hian George-a chu a lo vai lauh lauh a. Chu nu chu tudang nilovin, an khaw Police Officer, IG nupui alo ni. Geeorge-a nen chuan an inkuah a, an infawp vel a. George-a chuan, "Hei hi i ta tur anih hi, bawihte." a han ti vel a. IG nupui Rintei chuan, "Ka lawm e, lut vat ang, miin min hmu ange.." a ti a, inchhungah chuan an lut ta a. Rinawma chuan alo en reng a, a phone a rawn ri thut mai. Nathana alo ni a, "Hello Rinawm, ti tura ka hrilh che kha i ti ta em?" a ti a. Rinawma chuan, "La tilo deuh, Pi Puii case chungchang kha ka la buaipui a." a lo ti a. Nathana chuan, "Awww iva thawk tha ve...i chhuichhuah hunah chuan TV ah te i lang anga, a nuam awm bik." a rawn ti vel a. Rinawma chuan, "Kher kher ache, enge min rawn call nachhan?" a ti a. Nathana chuan, "Rinhlelh ka nei ania, inhmu lawk ang." a ti a. Rinawma chuan, "Awle, ka lo kal ang." tiin phone chu adah ta a.

***************

Lodge reception counter ah chuan Nathana chu a ding reng a, Lisa-i a lo kal a. Nathana bulah chuan, "Minlo nghak rei em? Ka lo ngaihtuah char char che a..ohh...Rita-i mawle, Rita-i chungchang ka lo ngaihtuah char char a." a han ti bah nuai mai a. Nathana chuan, "Anih chu." a lo ti ringawta. Lisa-i chu Nathana bulah chuan ava kalphei a, zawite hian, "Enteh maw Officer, Rita-i thah a ni ringawt hi mak ka ti a ni. Ka kohna chhan che chu maw..ihh..kan lodge ah hian client pawimawh tak tak te an awm teuh a, Rita-i hian kan client te zinga pahnih inbia chu lo ngaithla ruin an business partner te tihchhiat dan tur vel an sawi lai a lo hre fuh anga, chuvang chuan aniang a.." a han ti vel a. Nathana chuan a la thutak lo kher mai, a nuih aza hial zawk a. Mahse nui miahlo chuan, "Ee...a ngaihnawm hle mai. Anih chuan an kaphlum ta tawp mai tihna aniang maw.." a han ti vel a. Lisa-i chu a han lai leh vel a, "Nia, a dik ang. I thusawi hi chu a dik vek animai, eichak te i nei em?" a ti a. Nathana chuan, "Nei love, Simon-a nen kan lo inbe zo chiah a. Mi taima tak a nih ka ring, i ti ve em?" a han ti leh a. Lisa-i chuan nuam tih hmel tak hian, "Nia, a fel lutuk." tiin a lo nui vel huah huah a. Nathana chuan, "Min han hrilh teh, Simon-a hian enghna chiah nge a thawh a?" a ti a. Lisa-i chuan, "Aizawla firm pakhatah marketing director ania." a ti a. Nathana chuan, "E hehe, anih chu..eng firm nge?" a han ti leh hram a. Lisa-i chuan, "Ihh...tinge i hriat duh a?" a ti a. Nathana chu a han hawi vel zeuh zeuh a, "Tumah hnenah sawi suh aw.." a han ti phawt a. Lisa-i beng bulah chuan zawite hian, "Ka hna hi chawlhsan mai ka duh tawh a, Job Market lam buaipui ve ka tum a. PAwisa a hlawhhnem hmel si a, chuvang chuan min puih theih ka ring mawle." a han ti su su a. Chutia Nathana'n hnai taka a han hrilh ru vel chu Lisa-i chuan a nuam a ti ngang aniang, a za chhuak vek mai. Nathana chu a han en a, "Nia, ka han check ange." a ti a.

Rinawma chu Nathana'n hmeichhe thenkhatte zawng tura a tih ho te address chu a han enkual a, address pakhat a hmuhna lam chu a pan a. In pakhat, te ve tak mai hi alo awm a. KAwngka ahan kik a, hmeichhe pakhat, tawite mai, zu heh hmel zet, sam thur bum mai hian kawngka chu a lo hawng a. Chu hmeichhia chuan, "Enge i duh?" a lo ti hmuk a. Rinawma chuan, "Nutei i ni em? Lalnunsangi?" a ti a. Chunu chuan, "Ni e, Nutei chu ka nia." a lo ti a. Rinawma chuan, "ASP Rinawma ka nia." a ti a. Nutei chuan, "Police maw?" a lo ti leh hu a. Rinawma chuan, "Aw ni e." tiin alo chhang leh a. Nutei chuan, "Pawnah inbia ang, inchhungah chuan mikhual ka nei." a ti a. Pawnah chuan an thu dun a, Rinawma chuan, "Enteh Nute, kum 20 vel liamta khan Annie Lallawmzuali thihna chungchangah i hming hi a lang ve a. Record-a a lan dan chuan Annie thih hma kar 2 vel khan ramhnuaiah kalin iva muthlu e an tia, tak tak a ni em?" a ti a. Nutei chuan, "E...ni tak e..cafe atangin ka haw a, tichuan ramhnuai lam atang khan ka short-cut a, tichuan ka muthlu ta daih a ni." a ti a. Rinawma chuan, "Anih leh tu thil tih nge ni thei ang?" a ti leh a. Nutei chuan, "Ihh..Liansanga kha a nih ka ring, min endan kha adiklo tlat a ni." a ti a. Rinawma chuan, "Chupa chu a chenna i hria em, an in i hria em?" a ti a. Nutei chuan, "Hria e, ka hre lutuk alawm." a lo ti a. Rinawma chuan, "Tinge Liansanga chu a nih i rin nachhan?" a ti leh a. Nutei chuan, "Aa...ka hre chuanglo. 1998 kum vel khan kan inhre ve chauh a.." a ti leh ta daih mai a. Rinawma chuan Nutei chu a en a, "Annie kha 1995 kuma thi a nisia?" a ti a. Nutei lah chuan, "E..anih chuan Liansanga chu a nilo a nih chu. Ka memory hi a tlem ve lutuk a, soory." a ti a. Rinawma chu a thaw hak a, "Umm...nih phawt." tiin a kalsan daih a.

**********

Pi Puii te chhungkua chuan chhun thil an ei mek a, George-a chuan Pi Puii chu a han en vang vang a, "Ka Ni, tun chiah ka zawt leh ang che. Kha ASP Officer khan min zuiru tih ka hmu a ni..min zui ru tur hian em ni i rawih a?" a ti a, mahse Pi Puii chuan a chhang lo. Lily chuan, "Hemi khua ami hi a nilo a, Rinawma kha chu Police fel tak a ni. Ka Ni Puii hi miin thah an tum leh ang tih a hlau a, kan vai hian min veng zawk ani ngei ang." tiin alo tan vat a. Opa lah chuan, "Eheu, inva innel tawh bik awm ve...i ngaihsak bawk a, iva hrechiang ve." a lo ti deuhkher a. Sentei chuan, "Hmm..engvangin nge maw Lily chuan chupa chu a ngaihsak ngawt ang le?" a lo ti a. Opa chuan thinrim zet hian, "Lo ngawi rawh...lo tawng ve hman ziah mai." a ti khur khur a. Sentei chuan a aia vin hian, "KA thu thu, hmelchhepa." alo ti let hrep a. Hnunglam atang chuan Pi Puii fapa Petera chu lo kalin, "In pahnih khan ngawi rawh u, inhnial reng mai." a rawn ti a. Pi Puii chuan, “Awi Peter, min theihnghilh ta emaw ka tia lawm.” a ti a. Petera chuan dawhkan chu kil ve nghalin, “Engemaw i sawi le ka nu, hna vangin ka buai em a, ka lo haw tlai a ni.” a ti a. Pi Puii chuan, “Enteh Bawiha, kan buai zia chu maw...tu emawni in min thah a tum a, huana ka awm laiin leihlawn a rawn ti tlu a, min delh tep lehnghal.” a ti a, midang ho chu an lo in melh hrek hrek hlawm mai.

NAthana pawh chu address pakhat ah chuan kalin, nu pakhat, ramhnuaia lo mutthlu ve tho tawh, Alexa sawi hmechhe pahnih te zingah pakhat zawk, Aremi chu a lo kawm mek a. “Pi Arem, engemaw tal hriat han tum teh, a pawimawh ania.” a ti a. Aremi chuan, “Kum 20 chuang a liam tawh a, ka hre thei ngawt tawh hleinem. KA thiante inah ka leng a, Summer party kan nei a. Mipa hovin zu an in a, keini eitur kan siam a. Zu ka in ve ngailo a, mahse no khat chu ka in ve a Dar 10 velah ka haw a, tichuan ka muthlu ta a ni.” a ti a. Nathana chuan, “Anih leh engemaw hriat i nei em, chumi hnuchuan, mumang emaw?” tiin a zawt leh a. Aremi chuan, “Mumang mak deuh ka nei.” a ti a. Nathana chuan, “Enge i hmuh?” alo ti vat a. Aremi chuan, “Ka chiang tawhlo, a eng em em a, khatiang em ema thil eng kha ka la hmu ngailo.” a ti a. Nathana chuan, “Thildang hmuh ila nei em?” a han ti leh a. Aremi chuan, “Aw..pangpar tam deuh kha chu ka hmu ngei a, chuan mipakhat..adara tatto nei ka hmu bawk.” a ti a. Nathana chuan, “Eng tattoo nge aneih?” a lo ti a. Aremi chuan, “Ka hre tawhlo, ka hrechhuak zo tawhlo.” a lo ti leh a. Nathana chuan, “Atha e, i mumang a ni tih i chianga maw?” a han ti leh a. Aremi chuan, “PAngpar rim te kha chiang takin ka hria a, abak chu ka hrelo.” a ti leh a. Nathana chuan, “Anih leh Annie Lallawmzuali i hria em?” a ti a. Aremi chuan, “Hria e, school kan kal ho thin.” a lo ti a. Nathana chuan, “Eng ang mizia nge a neih?” tiin a han zawt leh a. Aremi chuan, “Zeplo chuan maw, mi nasa tak a ni. A rukin mi a rel reng a, misual tak a ni. A lerh sia, bialpa a thlak zung zung zel bawk. Mahse a unaunu Olivia-i saw chu, mifel leh zaidam tak a ni. Annie thih thu kan hriat khan pawi kan ti lutuk a, kan ui em em tho nangin Olivia-i zawk a nilo a, ka thaw huai thei hial asin. Mahse Annie pawh ka ui takzet, thihna hi chu a rapthlak em a ni.” a ti a. NAthana chuan, “Awle, ka lawm e.” a ti a, a kalsan ta a.

**********

Rinawma haw lam chu Lily tlailam bazar haw nen chuan an in tawk a, Rinawma chuan, “Ehe Lily, nang i ni maw? Lo chuang rawh...ka lo thlah ang che.” a ti a. Lily pawh chu a chuang ve mai a, an tlan pah chuan Rinawma chuan, “Enteh Lily, in nau George-a saw hmeichhe pakhat, upa lam deuh tawh nen ramhnuaiah an lo awmdun lai ka hmu a ni.” a ti a. Lily chuan, “George-a saw maw?” a ti hu mai a. Rinawma chuan, “Aw ni e, mahse Pi Puii case nen a inkaihhnawih kher lo ania. Chubakah Pi Puii leihlawn rawn tlak vel lai kha chuan George-a chu a bialnu nen chuan an inhmu ngei ang, ramhnuaia in tereuhte awmah sawn an lut daih lehnghal.” a ti a. Lily chuan, “George-a’n bialnu a nei amaw? Tinge case chungchang hi i chhui mek tih leh chunu nen chuan an inhmuh chhan te chu i zawh mai loh a?” a ti a. Rinawma chuan, “Ala hma alawm, mi zawng zawng hi ka la zawt vek dawn lawm. Rinhlelhawm deuh a a awm zel a nih chuan ka zawt chauh ang, tunah chuan ala hunlo.” a ti a. Lily chuan, “A tha e, awle..ka lo chhuk ange, hei kan thleng tep tawh tho.” ati a, tichuan Lily chu a chhuk ta a.

Simon-a pawh dawr atanga thil a lei chu IG nen an intawk thut mai a, IG chuan, “Ehe Simon..enteh ka hmuh takah che chuan..in nu kha lo hrilh la, progress engmah kan la siamlo ania. Fingerprnts engmah kan la hmulo a, mahse khawchhung mi thiltih a ni tih chu kan chiang a ni. Tualthattu hian hetiang case hi kum 20 vel liamta khan alo awm tawh a ni tih a hria anga, chuvang chuan a ti ve mai mai aniang.” a ti a. Simon-a chuan lungawiloh hmel zet hian, “Pi Puii vahpa Lalawmpuia saw va man mai ula ti nia, mental facility ah a in register a ni lawm ni?” a lo ti hmuk a. IG chuan, “Engtin nge i hriat a?” a lo ti a. Simon-a chuan, “Ka nupuiin min hrilh a ni, school khatah an kal ho thin alawm.” a ti a. IG chuan, “Anih tak chu, kum engemaw zah kal ta khan Lodge pakhat a awm thin a, local tourist pakhat sawi dan chuan hmeichhe pakhat lem a ziahsak lai chuan ava panhnai a, ava khawih vel ani awm e.” a ti a. Simon-a chuan, “A mak hran loh chu, lo enthla deuh teh u.” a ti a, Simon-a chu a kal ta a.

Nathana chuan a motor a thleng tep tawh a, mahse a va let leh a. Aremi bulah bawk chuan, “Enteh Pi Arem, he khua ah hian thlalai an awm manglo a, nutling patling deuh vek in ni bawk sia. Enge awmzia aww...Aizawl lamah thil zirin an awm vek em ni?” a ti a. Aremi chuan, “Nia, Aizawl lamah an kal zel. Chubakah sawlai hmun saw chu a neitu ber a thih atang khan tuman an luah duh tawh lova, ahming chu Mapuia ania, Lalnunpuia..Biology TEacher a ni thin.” a ti a. Nathana chuan, “Mapuia, afapa chu lemziak thiam a ni tiraw?” a ti a. Aremi chuan, “Ka hriat chhun chu afapa chu misual tak ani a, nupui a nei a, mahse a lerh em em bawk. Apa nen pawh an insual fo a, thawm pawh kan hre thin. Khatih hunlai khan kum 18 chauh ka la ni a, an rapthlak thei ania.” a ti a. Nathana chuan, “Enge an inhauh chhan?” a lo ti a, Aremi chuan, “Ka hrelo, mahse an inthah phah teuh khawp mai. Apa chuan afapa Opa chu a hnawtchhuak a, tichuan a thihni thlengin an va tlawh leh talo a ni.” a ti a. Nathana chuan, “Ka lawm e, ka kal ange.” a ti a, a kal ta a.

**********

Rinawma leh Nathana te chu park ah chuan an inhmu ta a, Nathana chuan, “Enteh Rinawm, Aremi ka va bia a. Ramhnuaia muthlu te zingah khan a tel ve a, a mumangah mipa pakhat, a dara tatto nei a hmuh thu a sawi a, mahse a chauh a nih ka ringlo. Rinhlelh ka nei a ni..kan client, Simon-a hi a nih ka ring.” a ti a. Rinawma chuan, “Sir, ngati nge Simona kher?” a ti a. Nathana chuan, “Ngaihtuah la, party naah khan tlai takah a rawn kal a, chuan Simona hian a darah tattoo a nei tak tak bawk. Chuan an office lama an pute ka bia a, an sawi dan chuan Rita-i thih ni khan Simona chu dar 1 vel khan a haw daih tawh an ti bawk. Chuan resort lamah dar 7 ah a thleng an tia, Simona hian dawt a sawi a ni. Rinawma chuan, “Police te va hrilh ila?” a ti a, Nathana chuan, “Angailo, keimah nin va be phawt ang.” a ti a, an kal ta a.

Barah chuan Simon-a chu amahin zu alo in a, alo kai hmel hlemai. Nathana leh Rinawma te chu an zu thu ve a, Simona chuan, “Inlo kal chu a tihzia e, kawmtur ka lo duh lai tak ania.” alo ti vel a. Nathana chuan, “Sawitur kan nei..” a ti a. Simona chuan, “Eng lam?” a lo ti a. Rinawma chuan, “Rita-i i thahdan chungchang mawle..” a ti khur khur a. Nathana pawh chuan, “Chumai nilovin..kum 20 kal taa Annie i thahdan nen...Annie kha Olivia-i nen in inkara buaina ber a ni thin tih pawh kan hria, mahse tinge Rita-i kher?” a ti a. Simon-a chuan, “Hmmh...in mawl ami, enge in sawi awmzia? Hetiang thil atthlak lutuk...ka sawipui peihlo che u.” tih pah chuan a tho a. Rinawma chuan lo dang vatin, “Enteh Simon, Police kan koh mai angai palh ange.” a ti a. Nathana chuan, “Aremi, kum 20 vel liamta a ramhnuaia muthlu ve tho pakhat khan min hrilh a, mipa pakhat, a dara a tattoo nei chungchang asawi a, i darah khan tattoo i nei tiraw?” a ti a. Simona chuan, “Nei e, mahse tunge Aremi chu ka hrelo.” a ti a. Nathana chuan, “Annie case ah khan a hming a tel ve a, nangpawh i tel a ni.” a ti a. Simona chu a han nui vel a, “Kum 20 chuan aliam tawh..ngawiteh..kum 25 vel lai zawk aliam tawh a...mahse ka tattoo hi chu nikum a ka chhuttir chauh a ni.” a ti ta mai a. Rinawma chuan, “Anih leh tinge dawt min hrilh? Office ah ka awm i ti sia, mahse in manager kan bia a, dar 1 vela ilo haw thu a sawi si a?” a ti a. Simona chuan, “Ni e,dawt ka sawi alawm. Ka haw hma nachhan chu Rita-i nen kan inhmuh dawn vang ani..Rita-i leh kei hi..” a tih lai chuan Nathana chuan, “In inngaizawng.” a lo ti a. Simona chuan, “Umm a dik..” a lo ti a. Nathana chuan, “Simon, engkim min hrilh rawh..ka tiam ache, ka sawichhuak lovang.” a ti a. Simon-a chuan no khat chu a han tlak leh pap a, “Awle, Rita-i nen khan khami tlaiah khan inhmuh kan tum a, inneih puia sawm ka tum a ni. Olivia-i pawh hi then nghal ka tum bawk a, tichuan Rita-i chu ramhnuaia aruka kan inhmuh ziahna thin ah chuan ka nghak ta a. VAwi engemaw zat ka call a, mahse switch off a inti zel bawk si. Ka ngaih a thalo em em a, achhan pawh Rita-i hi hun vawng dik tak, tlai ngailo a nih vang a ni. Tichuan Resort lamah ka let leh a, abak chu in hriat kha.” a ti a.

Nathana chuan, “Anih leh proof-na i nei em?” a ti a. Simon-a chuan, “Nupui nei lai ka nih hi..” alo ti vin hlur a. Rinawma chuan, “I thusawi hi kan awih i ring em?” a ti a. Simon-a chuan, “Thudik ka sawi a, in awih leh awihloh chu in thu a ni e.” a lo ti hmak a. Simona chu a tho a, Nathana te hmaah chuan zungbun bawm a thehthla a, “A receipt pawh ka nei thlap ania..” a ti a, a chhuak ta daih a. Rinawma chuan, “Eng receipt chungchang nge maw a sawi le?” a ti a. Nathana chuan zungbun chu la kangin, “Hemi receipt hi ani ngei ang.” tipah chuan zungbun chu a la chhuak a. Nathana chuan zungbuna thil inziak tereuhte chu a han en a, “FOR MY BELOVED RITA.” a ti sap a.

(TO BE CONTINUE...)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)