NATHAN SEASON-3 (Episode-8) CINDERELLA'S TWIN SISTER Part-3 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-8) CINDERELLA'S TWIN SISTER Part-3 (by : Aaron Malsawmdawngzuala)

Unread post by Aaron Dustin » June 11th, 2020, 9:43 pm

NATHAN SEASON-3

Episode - 8

CINDERELLA'S TWIN SISTER

(Part-3)

Written by : Aaron Malsawmdawngzuala

***********

Rita-i ruang pawh chu post mortem zawh a nih tawh avang chuan a vui theih ta a, chumi khua ami te chuan thlanmual lam an pan sup sup a, Nathana leh Rinawma te pawh an tel ve a. An kal pah chuan Simona chuan Nathana te lam chu ava pan a, "Pu Nathan, ka be lawk thei che angem?" a va ti a. Nathana leh Simona chu an kal hrang ta a, Simona chuan, "Min rinhlelh tawhloh ngei ka beisei." a ti a. Nathana chuan, "Tunge ka rinhlelh a, tunge ka rinhlelh loh tih hi ka la sawi thei mai lo. Thil tisualtu i nih chu ka ring tawh lo a, mahse pawisawi lo i ni e tih ka la sawi thei chuanglo bawk. Mahse, rinhlelh dang ka nei leh tawh a." a ti a. Simona chuan, "Ummm..ka hrethiam e." a ti a. Nathana chuan, "I nupui hi i uire san fo em?" a ti a. Simona chuan, "Aih, Rita-i chiah kha a la ni. Olivia-i hi ka hmuh tirh kha chuan mifel tak a ni a, mahse Annie thih hnu khan a mizia a dangin a inthlak hlawk a ni ber mai." a ti a. Nathana chuan, "Tinge i then mai loh a?" tiin a zawt leh a. Simona chuan, "A rai alawm, ani chu ka kalsan thei a, mahse naute kha ka kalsan theilo a ni. Kum 20 chuang zet chu hei tihian kan awmdun ta zel a, mahse Rita-i ka tawng ta a. Mak i ti maithei a, mahse Rita-i kha ka duh ta tlat a ni. Ka atchilh em em a, a hmel hmuloa awm ka thei ta thlawt lo a ni." a ti a. Nathana chuan, "Anih leh Olivia-i unaunu Annie hi i hre chiang em?" a ti a. Simona chuan, "Hrechiang ve thawkhat e, Olivia-i nena kan inngaihzawn hma khan Annie nen hian kan inngaizawng a. Mahse ka hmangaih lo, ka nihpui vel mai mai a ni. Ka la hrereng, hemi khua ah hian ka thianpa rawn tlawh tura lo kal ka ni a, Aizawl a awm reng kha ka ning a, zin kual ve ka chak ta a ni.Tichuan Annie chu ka tawng ta a, kan inhmuh hmasak ber ni khan kan CK dun nghal nghe nghe a. A nelawm ka ti a, a hmel pawh a tha. Mahse a kawlh em em a, mipa ang mai a ni. Phir an ni a, an hmel pawh a in ang chiah chiah a. Mahse an mizia a dang hlak thung, Olivia-i himi fel tak leh zaidam tak a ni a, kan rilru pawh a inmil chiah. Tichuan ka ngaina ta em em a, ka hmangaih ta hial a ni. Mahse Olivia-i chu han bem nghal mai chu ka duhlo a, achhan chu Annie zawk ka lo ngaihzawn hman tawh vang a ni. Aizawl lama haw vat a, an pahnih a theihnghilh hmak mai chu tha in ka hre ta a. Mahse nikhat chu tumloh deuhin Olivia-i nen chuan kan inhmu a, tichuan kan inkiss a, Annie chu ka kalsan ta hmak a, Olivia-i zawk chu ka thlang ta a ni." a ti a.

Rita-i an vui zo chu Pi Puii leh Lily te chuan inlam an pan mek a, an inkawtah chuan Police motor a lo awm tlat mai. Inchhung lamah chuan IG chuan Opa lemziak chu a han en vang vang a, "Umm..Ramhuai film vela mi a ang khawp mai." a han ti vel a. Opa chuan lungawilo tih hriat tak hian, "Officer, enge min rinhlelhna chhan hi..eng thil ah nge..enge ka tihsual?" a ti chiam chiam a. Lily chu lo lutin, "Enge awmzia?" a rawn ti a. Opa chuan, "Keipawn chu chu ka lo zawt mek a nih hi." a ti a. Chuveleh SI pakhat chu lo kalin, "Hei hi an bedroom atangin ka hmu a, khum bulah a lo awm a." tih pah chuan sarang chhunga damdawi bur niawm tak hi a rawn lek kang a. IG chuan a han la a, a hnim chhin a. Lily bulah chuan, "A nupui i ni em?" a ti a. Lily chuan, "AW ni e." alo ti a. Damdawi bur chu lek kangin, "Hei hi enge a nih i hria em?" a ti a. Lily chuan, "Aih hrelo." tiin a lo chhang leh a. Damdawi bur chu SI hnenah chuan IG chuan a pe a, "Scientific Expertise te hnenah thawn ang che u." a ti a. Opa chuan Lily bulah chuan, "Ka ta a nilo, ka la hmu ngailo. Dawt ka sawilo, ka Ni Puii damdawi a niang." a ti a. IG chuan, "Damdawi chu a ni lo deuh ang." a lo ti a. Opa chuan vin zet hian, "Enge a nih ka hre hleinem, ka ta a nilo." a ti khur khur a. IG chuan, "I ta a nihloh te chuan tinge i mangan viau a?" a ti a. Opa chuan, "Tinge ka mangan loh teh lul ang, police in nia, kan inah inlo kal a. Enge ka tihsual ka hre silo a, mahse tihian min rawn thawng thut a nih kha." a ti bul bul a. IG chuan, "Aww..kanlo leng lut ve animai lawm, man che kan tum lo hrim hrim. Engpawh chu nise lo chhuak bo lo la, lo zin bo bawk suh ang che." a ti a, an chhuahsan ta daih a."

**********

Peter-a chu a nu Pi Puii te inah chuan ava kal leh ta a, Pi Puii chuan an inbula thlai te chu tui alo pe mek a. Petera a hmuh chuan a tho a, "Ehe Peter, ilo kal dawn tih tinge i sawi loh a? Eitur tui deuh ka lo siamsak tur che a nia." a ti a. Kawt ah chuan an thu dun a, Pi Puii chuan, "Enge in hna lam te a an?" a han ti a. Petera chuan, "Anuam angreng phian mai, kan boss in department thar a hawng a, leader ah min ruat bawk a. Social Media lam kan buaipui ber dawn a.." a tih lai chuan Pi Puii chuan, "Eng tihna nge?" a lo ti hu a. Petera chuan, "Rating tih punna a nih ber chu." a ti a. Pi Puii chuan, "Awi a nih chu..ka chhuang khawp mai che. Anih leh i thesis buaipui te kha?" a han ti leh a. Petera chuan, "Engkim a tha e, ka zo tep tawh a, PHD ka zo tep tawh tihna anih chu." a ti vel a. Anu chuan, "Ka chhuang khawp mai che." tiin a nui sen sen a. Petera chuan, "Ihmaw nu, thesis buaipui hi a har lutuk a. Ka opponent te, ka researcher advisor te hi pawisa ka pek vek angai dawn a. Kan company tlakchhiat lai ania, kan boss lah hian ka hlawh a cut reng bawk a. Khawngaihin pawisa minlo pe thei angem..a puk ang zawng te pawhin?" a han ti a. Pi Puii chuan, "Pe thei e, a tulnaah te chuan pawisa te chu ui reng reng loh tur." a lo ti ve mai a.

Opa chu hmanhmawh zet hian an bedroomah chuan a lut a, zawn nei tih hriat tak hian pawhdawh te, khumhnuai te leh dawhkan hnuai te chu a en kual a. Khum te chu a chinglet vak vak a, chutih lai chuan Lily pawh alo lut a. Lily chuan Opa chetdan chu mak a ti hle mai, "Op, enge i tih a?" a ti a. Opa chuan, "Khawnge...khawnge a awm?" a ti vak vak a. Lily chuan hrethiamlo tak hian, "Engchu maw?" alo ti hu mai. Opa chuan, "I damdawi mawle, i allergy damdawi..a receipt pawh khawnge?" tiin a vin vak vak a. Lily chuan, "Ka bag ah a awm ang chu.." a lo ti mai a. Opa chuan, "I bag ah engmah a awmlo." tih pah chuan Lily chu banga a namber a, a rek vak a, "Hmeli, kha Police te kha i koh anni tiraw?" a ti ta khur khur mai. Lily chuan, "Ka koh an nilo, ana ania min chhuah rawh." tiin alo ngen a. Opa chuan, "I pasal hi jail tang turin min duh em ni? Hnawhnchhuah i duh em ni? Ka hnawtchhuak che anga, ka fapa Freddy-a pawh ka bulah a awm ang, i hria em?" tiin a vau a. Lily chuan Opa kut chu a paih thlak sak a, a tlan chhuak ta daih a.

Petera leh anu chuan thingpui pawn lamah thingpui an lo in mek a, Petera chuan, "Ka kal ange ka Nu." a ti a. Nu Puii chuan, "Ala hma alawm, la leng ve la." a lo ti a. Petera chuan, "Meeting kan nei dawn a, ka awmrei hmanlo lawm. Chuan maw Nu, heng i vah te ho lakah hian fimkhur viau ang che. Thah tum tu che pawh kha an mahni hi an ni maithei ania, i pawisa an duh vangin.." a ti a. Chutih lai chuan tap chungin Lily chu a rawn tlanchhuak a, a hnungah chuan Opa chuan rawn umzuiin, "Ka fapa anih saw aw..i fapa chauh anilo..i hria em?" tih pah chuan Lily chu a manbet a, a kek vak a. Pi Puii chuan vin zet hian, "Lalawmpui, i zak nange..thlah rawh." tiin a lo hau a. Opa lah chuan, "Lo inrawlh suh." tiin alo vin let hrep mai. Lily chuan Opa kut chu a vai thla a, a tlan ta daih mai a. Opa chu inchhungah chuan a lut leh a, kawngka a khar ri bur mai.

*******

Lily chu lui lam pan chuan a kal leh ta a, a rilru nat em avang chuan in paih thawlna tur a duh em em a. Phone a phawrh a, Rinawma bawk chu a call ta a. Reiloteah chuan Rinawma pawh chu ava thleng a, Lily nen chuan an thudun a. Lily chuan, "Ka ning tawh khawp mai, inhauh reng ringawt hi ka hne lutuk." a ti a. Rinawma chuan Lily kut duk thleh thluah chu a hmu a, Opa'n na taka a hmerna avanga duk a ni. Rinawma chuan, "Lily, domestic violence hi thilsual a ni a, dan phalloh a ni. Min ngaithla rawh, hetiang ringawt chuan a that duh mai ang che, ka fuihpawrh che a nilo ania, then hmak mai rawh. Khawngaih duh reng reng suh, nangmah kha inngaihtuah zawk rawh. LAwyer hmelhriat ka nei ania, ka pui thei ang che." a ti a. Lily chuan, "Ka lo inngaihtuah ang." a ti ringawt a. Rinawma chuan, "Tinge a thinrim nachhan?" tiin a zawt a. Lily chuan, "Police te anlo kal a, kan room ah tur (poison) an hmu a, expert te hnena exam tura an thawn thu min hrilh bawk a. Opa hian keima dah chawp a nih a ring a, Police te kha keima koh anih a ring bawk a." a ti a. Rinawma chuan, "Tur a? Mi thah a tum tihna em ni?" a ti a. Lily chuan, "Aih nilo, chutiang em em a sual chu a ni biklo. Opa hian psychiatrist te pawh a pan ve thin a, a tleirawl lai pawhin mental facility ah a in register ve bawk alawm. Mi thah duhna rilru chu a nei kher lovang, ka ringlo." a ti a. Rinawma chuan, "Nia, lungngai suh...engkim a tha leh vek mai ang." a ti a.

Rinawma chu a haw a, Nathana room ah chuan a lut a. Thinrim hmel tak hian, "Opa an tih saw, mi a anih saw. Lily sawn a tuar thei zawk ngawt mai, mi rapthlak a nih saw.." a ti vak vak a. Nathana chuan, "Rinawm, saw mi te chhungkua ringawt saw ngaihtuah suh, kan hna hi ngaihtuah zawk rawh." a lo ti a. Rinawma chuan, "Sir, chutiang ngawt anilo. Pi Puii saw thah tum tu an awm a, ka bulah pawh a sawi a. Chhui zui turin min ngen a, pawisa pawh min pek a tiam asin. Tunah chuan saw Opa an tih saw ka ringhlel ber, Pi Puii pawisa a duh avang sawn thah a tum ani ngei ang." a ti khur khur a. Nathana chuan ngaihsam zet hian, "Theihnghilh rawh, kan case chhuilai hi a pawimawh fe zawk." a lo ti leh mai a. Rinawma chuan, "Enteh Sir, Opa sawn tur(poison) a lo kawl a, amah ber saw ka ringhlel a ni." a han ti leh hram a. Nathana chuan, "Amak e awww...chutiang a pawimawh lo." a lo ti leh hmuk a. Rinawma chu a ngaih a tha thei ngang lo aniang e, a phone a phawrh a, "Hello, keimah ASP Rinawma. Lalawmpuia saw, Pi Puii vahpa saw...tuna ka awmna veng ami, aw lo thlithlai deuh teh u." a ti a, phone chu a dah ta a.

*********

Lodge bula kawtlai zau nuam takah chuan Olivia-i leh Simona te nupa chu an kaldun a, an titi dun mawlh mawlh a. Olivia-i chuan, "Simon, naktuk chu damdawiinah kan kal angai ania." a ti a. Simona chuan, "Engvangin maw?" a lo ti hu mai a. Olivia-i chuan, "Naute dang neih leh ka duh a ni." a ti a. Simona chuan, "Enga? I a em ni? Kum 10 liam ta khan fa dang neih leh ka duh thu ka sawi a, mahse nangmah zawkin i duhlo a nih kha." a ti a. Olivia-i chuan, "Khatih lai hun te kha chuan ka la inpeih lo alawm, chubakah kan fapa hian kawm tur a mamawh ve tawh a ni. Tun hun hi hun tha ber a ni, duhtak." a ti a. Simona chuan vin zet hian, "Ka ngaihdan te hi i ngai pawimawh ve miahlo em ni?" a ti hrep a. Oliva-i chuan, "Ngaithla teh Simon, ahma khan naute dang neih leh i duh thin tih chu ka hria alawm." a tih lai chuan Simona chuan, "I duhlo a nih kha...plan tamtak ka nei ve thin asin, min ngaithla ve duh ngai hleinem." tiin a kalsan ta daih a. Olivia-i chu rilru na takin waiting shed ah chuan a thu a, Nathana alo kal a. Olivia-i bulah chuan ava thu a, "Thil thleng a awm em ni?" ava ti a. Olivia-i chuan, "Awm love..engmah a nilo." a lo ti a. NAthana chuan, "I rilru a hah hmel em a, senior position i chelh tawh si a, a awm ve tho e." a ti a. Olivia-i chuan, "I hnuchhui lai chu enge a an?" a ti a. Nathana chuan, "A kal tluang e, witness te thu kan zawt a, information te kan la khawm zel bawk a. Enpawh chu nise hei hi min han hrilh teh, Rita-i thih ni khan dar 3-5 khan khawnge i awm?" a ti a. Olivia-i chuan, "Dawrah ka kal a, halpuah vel ka lei mawle. Tichuan ka lo let leh a, ngatinge min zawh a, min ringhleh ta em ni?" a ti a. Nathana chuan, "DCP ka ni a, hnu ka chhui a nih chuan tupawh ka ringhlel vek thin, tumah ka ring ngailo." a ti a. Olivia-i chuan, "Simona khan engkim a hrilh vek che tih ka hria, ka thik avangin Rita-i chu ka that ta mai angah i ngai ani tiraw?" a ti a. Nathana chuan, "Engtik laiin nge ka sawi a?" a ti a. Olivia-i chuan, "Ka hre vek alawm, tupawh mai hian an sawi sep sep reng a, vengpum titi alawm." a ti a. Nathana chuan, "Tinge i tawng chhuah ve mai loh?" tiin a han zawt leh a. Olivia-i chuan, "Kum 16 mi lek ka ni tawh lo. Ka hmangaih a, ka ngaidam leh mai dawn tho tih ka hriat vang a ni. Inthen pawh ni ila, alo kir leh tho ang. Chuzawng chu a ni e, zawhna dang ila nei em?" a ti khur khur a. Nathana chuan, "A tawk e, ka lawm e." a ti a, a kal ta a. Rinawma chu lo kalin, "Sir, ka lo zawng char cahr che a lawm." a ti a. Nathana chuan, "News a awm em ni?" a lo ti vat a. RInawma chuan, "IG sawi dan chuan Opa hi mi phakhar tak a ni a ti a, hmeichha te hi bia in an lem a ziahsak thin a. MAhse chung hmeichhia te chu khawih a tum kher zel a, chung zinga pakhat kan hriat chu Ellie-i a ni a, police hnenah a lo report a ni awm e. MAhse thlakhat hnuah Ellie chuan case chu a hnukdawk a, Opa pawh an chhuah leh ta a ni." a ti a. NAthana chuan, "Anih chu...a che bawn viau animaw?" a ti a. Rinawma chuan, "An sawi dan chuan lem a ziah dawn khan Ellie bulah chuan mitthi anga awm tur leh mu zangthal turin a ti a, mahse Ellie chuan a duhlo a." a ti a. Nathana chuan, "Anih chu mawle, ka rindan chuan Opa chuan Ellie chu pawisa pek a tiam anga, chuvang chuan Ellie chuan case chu ahnuk dawk leh aniang." a ti a.

George-a chu Pi Puii chuan inchhung mamawh lei turin a tir a, George-a in atanga a chhuak chiah chu Pi Puii chuan rawn umzuiin, "George, list i theihnghilh daih alawm." a ti a. Chutih lai chuan silai a puak ta dur mai a, George-a chu a t(r)e vak a. A ban a dawm nghal vawng vawng a, mahse engmah thisen a awm lo. Pi Puii chu a mangang hle mai, "Bawiha, Bawiha, enge awmzia." a ti a. George-a chuan, "Ka ban, a na lutuk." a ti vak vak a. Darkar chanve vel hnuah chuan NAthana leh Rinawma te chu Pi Puii te inah chuan an va kal a, inkawtah chuan Ambulance motor a lo awm a. George-a chu anlo zawn lut mek a, Nathana chuan Pi Puii bulah chuan, "Enge thleng a?" a ti a. Pi Puii chuan tap chung hian, "George-a hi bazar turin ka tir a, pawna kan inbiak laiin tu emaw hian a rawn kap a ni. Doctor te chuan a ngaihtuah awmlo an ti a, rubber bullets mai mai a ni an ti bawk. Mahse ka ngaih atha hlawl lo a ni...tu emawni hian min thah a tum ngei a ni." a ti chel chul mai a. Nathana chuan, "Hmelma i nei em ni?" tiin a zawt a. Pi Puii chuan, "Ka hrelo..ka nei ani ngei ang." a ti ringawt a. Rinawma chuan, "Tunge inah awm?" a han ti leh a. Pi Puii chuan, "Opa a awm a, lem a ziak a. Kei ka nia, George-a a ni leh mai." a ti a. Opa chu kawngka bulah chuan inla ngeng zet hian alo ding a, Nathana chuan ava pan a. Rum zet hian Opa chuan alo melh a, Nathana chuan, "A hulo viau tih chu ka hria, mahse biak lawk che ka duh a ni. Opa chuan, "Engthilah?" a lo ti hmuk a. Nathana chuan, "A tam mai, mitthi chungchang, tualthahna chungchang leh i model zinga pakhat Ellie chungchang. Ellie kha...i la hria em?" a ti a. Opa chu a lo nui suk a, "Hmmh, hria e, enge ni vak?" alo ti leh hlur a. Nathana chuan, "Engvak chu nilove, i lemziah te pawh ka hmu ve chak alawm." a ti a. Opa chuan, "E..lo lut rawh." a ti a, an inzui lut ta a.

A lemziah te chu kawh kual vel pah chuan Opa chuan, "HEng ho hi ka kutchhuak te an nih ve hlawm hi." a han ti ham ham a. NAthana chuan a en kual a, "A dangdai hle mai." a ti a. Opa chuan, "Engtia dangdai maw?" a lo ti hu a. Nathana chuan a chhang lo, Opa bawk chuan, "Heng lemziak te hi chu horror painting an ti thin a, i man pha ve chuanglo ang." a han tih zawm zat a. Nathana chuan ramhuai lemziah pakhat chu a han en a, "A lem en mai hi chuan a ziaktu rilru puthmang a hriat mai alawm, eng rilru nge aput tih nen." a ti a. Opa chuan, "Ni e, ka ngainat zawng alawm. Mahse lemziak thiam te dang anglo takin kei chuan ka hlau ve ngailo a, ka pholang zawk thin." a han ti leh vel a. Nathana chuan lily pangpar lem inziak chu a kawk a, "Tinge lily pangpar kher hi i ziah a?" a ti a. Opa chuan, "A mawi em alawm, ka ngainat ber a ni bawk a. Ka nupui hming pawh Lily a ni nghe nghe asin, mak ve khawp mai. Mahse ka sawi tum ber chu a nilo, keichuan idea dangdai deuh deuh hi ka duh a. Entirnan, lehlamah chuan thlamuanna, inremna leh hmangaihna a awm a, mahse lehlamah erawh chuan tualthahna, ramhuai leh hlauhawm lam hlir a ni thung ang. Hetiang idea hian mipui a hip a, an ngaina ber thin." inla fing zet chuan a han ti vel zuah zuah a. Nathana chuan, "Ni e, mi zawng zawng ngaihdan a in anglo a, mahse keichuan engatan mah ka ngailo. Ka ngaihpawimawh ber zawk chu i model te i khawih kher thin kha a ni, sexual harrasment..ka hre vek. Chuan hnialtu apiang che chu damdawiin i hrai rui a, a dik em?" a ti a. Opa chu a nui huah huah a, "Enge maw i sawi le...sexual harrasment a? Ka model te nen hian thian vek kan ni a, an vai chuan an ni kherlo, mahse a tam zawk chu ka thiante vek an ni. Ellie kha chu mi phakar tak a ni a, pawisa lamah a duham lutuka min ti thinrim a nih kha. Min blackmail alawm, keimah chauh pawh a nilo. Ka khawihlo hrim hrim, engmah ka tisual lo bawk." a ti zuah zuah a. Nathana chu a ding a, "I khawih hmanlo te a ni zawk lo maw?" a han ti a. Thinrim tak hian Opa chu a rawn ding ve a, Nathana chuan a nam thu leh nghal a, "Rawn ding ve khanglang suh." tih pah chuan a rek bet nghal a. Opa chuan, "Hey, engmah ka tisual lo, min man thei chuanglo ang." a ti pang pang a. NAthana chuan, "Kan hria ang chu." tih ringawt hian a chhang a.

Tlai lampang ah chuan Rinawma chu Pi Puii te in bul deuh lawk, putar pakhat, amaha khawsa te inah chuan ava kal a. Kawngka a lo inhwan sa avang chuan ava lut tlang tawp a, putar chu dawhkan hmaah lo thuin dawhkanah chuan thlalak tam em em mai hi a lo inchhawp hnawk nuai mai a. Rinawma chuan, "I kawngka hi alo inhawng sa a, kik lovin ka lo lut tawp mai." a ti a, mahse putar chuan a chhang lo. Thlalak thenkhat te chu a la a, bakcheh in a chep sawm vel a, Rinawma bawk chuan, "Police Officer ka ni a, ka hming chu Lalrinawma ania. Ihh..i thenawmnu Pi Puii nen sawn kan inhmelhriat a, zawhna ka zawt thei che angem?" a ti a. Chu putar chu lo hawichhuakin, "Animaw...Liana ka nia, Lianmawia..lo thu rawh." a ti a, Rinawma chu a thu a. Rinawma chuan thlalak lo darh nuai mai chu a han en a, "Hei hi i hnathawh em ni?" a ti a. Pu Liana chuan, "A nih hi...ka hna ve ber alawm." a ti a. Rinawma chuan, "I thenawm te nen sawn in in lenpawh ngai em?" a ti a. Pu Liana chuan, "Kan inbe ngailo, mahse Pi Puii saw chu mifel tak a ni tih ka hria." a ti a. Rinawma chuan, "Darkar khat kalta khan khawnge i awm?" a ti a. Pu Liana chuan, "Hetah hian, ka hna hi ka thawk a..kha han en chhin ve hlawm teh." a han ti vel a. Rinawma chuan dawhkana chart paper-a thlalak inbel vel chu a han khawih vel a, "Ala ban deuh a nih hi." a ti a. Pu Liana chuan, "Ni e, ala ban deuh ang. Darkar khat liam ta khan varnish in ka hnawih zo chiah a, chuvang alawm." a ti a. Rinawma chuan, "Anih leh tu emawni talin an hmu che em?" a ti a. Pu Liana chuan, "Engtik laiin maw?" a ti hu mai a. Rinawma chuan, "Darkar khat liam ta chun tu emawni in a hmu che em?" a han ti leh a. Pu Liana chuan, "Aw..ka zawhte vulh lai hian min hmu a, chuzawng chu nimai." a ti a. Rinawma chuan, "Anih chu, ka lawm e." a ti a, a chhuahsan ta a.

********

Zan a lo ni a, Olivia-i pawh chu tui takin a muhil a. A mumangah chuan a unaunu Annie a hmu a, ramhnuaiah chuan a lo vak kual a. Chutah a lam a lo hawi thut mai a, a sam a pawt vak vak a, a sawm chu a tla ta nuai nuai mai. Rum em em hian a rawn melh a, "Engvang nge? Engvang nge?" a rawn ti ta chiam chiam mai a. Olivia-i chu a harh zawk a, a thuchhuak hlawl mai. Atuk zingah chuan Rinawma chu Pi Puii te inah chuan ava kal a, pawnah chuan Sentei chuan Apple a lo vel a. Rinawma chuan ava pan a, "Good Morning." a va ti a. Sentei chuan, "Good Morning Officer, zing zingah enge ni ta?" a ti a. Rinawma chuan, "In thenawma putar saw eng ang mizia nge ka hrechiang duh a, i hre mial em?" a ti a. Sentei chu a nui suk a, "Mi zingah chuan a fel ve hmel thei lutuk, mahse mi nelawmloh leh sual tak a nih saw. Ka patea damlai khan saw putar nen sawn an inhal lutuk a, kan ram thenkhat hi lei min dil thin a, mahse ka Ni Puii hian a phallo a. Chuta tang chuan kan inbe tha thei talo a, hmelma ang kan ni mai, chuan zanah hian silai a kap vak vak zel bawk." a ti a. Rinawma chuan, "A lawmawm e, nihleh i u George-a kah hliam a nih lai khan khawnge i awm?" a ti leh a. Sentei chu a ngaihdan a nih vakloh hmel kher mai, rum zet hian Rinawma chu a melh a, "Khawnge ka awm maw? Inah ka awm lo. Zawhna dang a awm tawh loh chuan kal tawh rawh.." a ti hmak mai a. Rinawma chu a han nui var var a, "Umm anih tak chu...ka lawm e, Sente.." a ti a, a kalsan ta a.

Rinawma chu Pu Liana te inlam pan chuan a kal leh a, Pu Liana bulah chuan, "Silai i kap thin em ni?" a ti a. Pu Liana chuan a chemte tah hriam malh malh pah chuan, "Ka zir ve mek zawk." a ti a. Rinawma chuan, "Pu Lian, tinge dawt min hrilh a?" a ti a. Pu Liana chuan, "George-a chunga thil thleng kha ka hre ve vek a, an chhungkaw chungchang i rawn sawi leh bawk si a, kan innngeih vak lemlo a ni tih kha ka hrilh duh ta lo che a ni. Ka sawi a nih chuan George-a kap tu kha tudang nilovin, keimah bak i ringhlel dawn lo tih ka hria a ni." a ti a. Rinawma chuan, "Silai i kap thin bawk si a.." a tih lai chuan Pu Liana chuan, "Khai mai mai a...sipai bang ka nih hi aw..silai kah kan practice lai te khan ka lung a ti leng thin em a, chuvang chuan ka han ti ve leh vel mai mai a ni e." a ti a. Rinawma chuan, "I silai chu ka lo en thei angem?" a ti a. Pu Liana chuan a rifle chu a rawn la chhuak a, Rinawma chuan a han en vel a, "License i nei em?" a ti a. Pu Liana chuan, "Nei e, i en duh em?" a ti a. Rinawma chuan, "Aih, angailo. George-a an kahna silai chu a nilove, a dang i la nei te a nih ngawt loh chuan.." a han ti hram a. Silai dahthat leh pah chuan Pu Liana chuan, "Ani lo zawk min ringhlel a ni, Officer. Pi Puii fapa saw i hria em? Ani saw va belchiang ve ta che." a ti ta mai a. Rinawma chuan, "Tinge Pi Puii fapa chu?" a ti a. Pu Liana chuan, "Nitin deuhthaw hian ramhnuai lamah sawn a kal a, anmahni in ngei saw a thlir vung vung zel alawm. Ka hmu ziah alawm, amak i ti ngawt lo maw?" a ti a. Rinawma chuan a chhang lo, Pu Liana chu a chhuahsan ta a.

Rinawma chhuak chiah chuan Sentei, an in atanga a lo chhuak ve chiah mai chu ava hmu fuh hlauh mai a, Sentei lah chu a hlawuhthawn hmel em em lenghal a. A hawi kual zek zek a, tichuan a tlan thut mai a. Rinawma chuan a zui ru ta a, mahse mak tak maiin Sentei chuan ramhnuai lam a pan ta daih mai. Ramhnuai ah chuan a kal zel a, Rinawma pawh chuan a zui zel a. Sentei chu thingkung bung, khup chen vel leka tawi bulah chuan ava ding a, a hawi kual zeuh zeuh a, thingkung bung phena hmeichhe purse var (white) chu a la zeuh a. A ding a, a kal leh ta daih mai a. Rinawma chu ava phei ve a, chu thingkung bungah chuan tereuhte hian thai bial a lo awm a, rawng sen hmanga thaibial niawm tak a ni. Rinawma chuan Lily a call ta nghal a, a thil hmuh te chu a hrilh a.

Darkar chanve vel hnuah chuan Lily chu ramhnuai ah chuan a rawn kal a, Rinawma chuan a lo nghak reng a. Alo thleng chiah chu Lily chuan, "Rinawm, Sentei purse chu ka check nghal a. Envelope pakhat a lo awm a, a chhungah chuan pawisa a awm bawk a ni. Cheng 20,000 lai a awm a, khawia a neih nge ka hrelo." a ti a. Rinawma chuan, "Sentei hian hnathawh a nei em?" a ti a. Lily chuan, "Aih neilo. Hla aphuah ve thin a, vawikhat chu a vannei hlauh a, a hla phuah chu business-man hausa deuh pakhatin a zuruih laiin cheng 10,000 laiin a cash lehnghalin a lo leisak a, mahse chupa pawh chuan a hre leh talo aniang, engmah a rawn sawi leh tawh lo." a ti a. Rinawma chuan, "A hla phuah te chu a hralh ngai em?" a ti a. Lily chuan, "Aih, a free in mi a pe kual vel mai mai zel." a lo ti a. Rinawma chuan, "Anih chuan eng atan nge pawisa chu a tih tak angle?" a ti nuah nuah a. Lily chuan, "Vawikhat chu car dealer nen an inbe lai ka hre fuh tawh a, pawisa a lo transfer tur thu te a hrilh a, car a order dawn niang." a ti a. Rinawma chuan, "Cheng 20,000 man car a awmlo hrim hrim a, anilo maithei bawk. PAwisa chu a khawl mek pawh a ni thei tho, chuan Pi Puii fapa Petera hi enge a chanchin i hria em?" a ti a. Lily chuan, "Petera hi chu a lo kal vak ngailo a, Aizawla company pakhatah programmer a ni a. Promotion a dawng tep tawh a, ka Ni Puii bulah pawh pawisa a dil tih ka hre bawk." a ti a. Rinawma chuan, "A chenna ka hre duh a ni, min hrilh thei angem?" a ti a. Lily chuan, "Awle, ka lo message ang che." a ti a. Rinawma chuan, "Lily, Opa nen chuan enge in chanchin ni ta? Enge i thuthlukna chu ni ta?" a ti a. Lily chu a thaw hak a, "Ka hrelo, enge tih tur ber pawh ka hrelo." a ti a. Rinawma chuan, "I hlau em ni?" a ti a. Lily chuan, "Aw...kut min thlak leh ka hlau a ni. Fapa kan nei tawh bawk si a, ka fapa hi ka chan ang tih ka hlau a ni." a ti a. Rinawma chuan, "Enteh Lily, then mai tura ka tihchhan che hi ka ngaihzawn vang che a ni hauh lo ania, keipawhin bialnu chu ka nei alawm. Mahse ka thian i ni a, Opa'n i chunga a thil tih hi a diklo a, domestic violence a ni. Chuvang chuan i tana tha tur zawk a nih chu, ka pui em em ang che." a ti a.

Lily chu inah chuan a haw ta a, IG leh Opa chu an lo inbe mek a. IG chuan, "Kan thu a inhmu thei ngang dawn lo tlat mai, pu Awmpui.a ti a. Lily chu ava lut a, IG chuan, "Pi Lily, hetah lo kal teh. I pasal hnenah hian ka lo sawi mek a, Rita-i thisen ah khan herbal substance kan hmu a, chung zinga then khat te chu Pulsatila vulgaris leh windflower te an ni. Chutiang thil chu i hre ngai em?" a ti a. Lily chuan, "Aih.." a lo ti a. IG chuan, "Ka rindan chiah a ni, i pasal pawh hian khatiang chiah khan min chhang a ni. Mahse in bedroom-a tur kan hmuh kha, kha tur kha tuna herbal substance ka sawi te hmanga siam a ni tlat si a ni." a ti a. Opa chuan, "Enteh Officer, kan khua ami te hian herbal damdawi te chu an la fo alawm, kan ching thleh thluah alawm. Chutiang thlai chu va zawng la, in tinin an nei vek ang." a ti a. IG chuan, "Nia ani khawp mai. Mahse midang chuan an khum bula sid-table hnuaiah kher an thukru ve miau hleinem." a ti tlat mai si. Lily chuan, "Kan thukru anih loh kha.." a lo ti a. IG chuan, "Min bum tum suh, ka hrethiam vek." a ti vin hlur mai a.

**********

Nathana leh Simon-a te chu Lodge bulah chuan Table-Tennis an lo khel dun a, an khelh pah chuan an titi reng bawk a. Simona chuan, "Tualthattu kha mi mawl tak chu nise, atuk lawkah khan kan man nghal ang mawle." a ti nuah nuah a. Nathana chuan, "Nia...Olivia-i enge a an?" ahan ti a. Simona chuan, "Kan nu ve hi chu a mak khawp mai, kum 13 a nih khan apa in a thihsan a. Tichuan, chuta tang chuan Opa saw a haw hlur mai a ni." a ti a. Nathana chuan, "Tinge Opa chu a huat nachhan?" a ti a. Simona chuan, "Apa accident nachhan chu Opa pa hi ania." a ti a. Nathana chuan, "Ehe, tak tak maw?" a lo ti a. Simona chuan, "Ni e, Opa lah chuan puh tur a zawng char char a, a mawl tak tak." a ti nuah nuah a. Nathana chuan, "Opa tih awm tawk vel anih chu, a mak vak hleinem." a ti a. An khel zo a, Simona chuan, "Kan khel leh duh angem?" a ti a. Nathana chuan, "Ka peih tawhlo, ka chak ve thei bawk silo." tiin a nui huah huah a. Simona chuan, "Officer Nathan, homicide investigation lam hi i tih chi tak a nih ka ring." a ti a. Nathana chu a nui sak a, "KA chaklo bawk sia, ka lo intiam tawh ang ngeiin whiskey umkhat chu ka show ngei ngei ang che." a ti a, a room lamah a chho ta a.

In lamah chuan Pi Puii fapa Petera pawh chuan pawisa a lo chhiar malh malh a, "29...engtin nge 90 dang hi ka neih leh theih ang awww?" a tih nuah nuah lai chuan a doorbell a rawn ri a. PAwisa chu lekhabu karah chuan a thukru nghal a, kawngka chu ava hawng a. Rinawma alo ni a, rawn luh pah chuan, "Peter, Police Officer ka ni a, Lalrinawma ka ni. I nu hi dinhmun derthawng ah a awm tih hi i hria em?" a rawn ti lut nghal bawrh bawrh a. Petera chuan, "Hria e, rinhleh pawh ka nei." a ti a. Rinawma chuan, "I nei animai lawm...police te chuan nangmah hi kan ringhlel ber che." a ti ta daih mai a. Petera chuan, "Eng...enge i sawi awmzia?" a ti nghal chel chul mai a. Rinawma chuan lehkha bu chu a la kang a, pawisa chu a lo tla chhuak ta a. Rinawma chuan, "Eheu, va money bik deuh veee...i ta em ni?" a ti a. Petera chuan hlauh hmel tak hian, "Aw ni e." a lo ti a. Abula paper chu la kangin Rinawma chuan a chhiar a, "Umm...i ba rulh dan tur ilo ngaihtuah ani maw?" a ti a. Petera chuan, "Hlau deuh tak chung si hian, "I lo buaina tur a awm lo." a ti khur dar dar a. Rinawma chuan, "Tak tak maw? A awmlo tak tak maw?" a ti khur khur a. Petera chu bookshelf bulah chuan a ding reng a, Rinawma chuan a ringhlel a, "Tinge, tinge khatah khan i din tlat a, thuruk i nei em ni?" a ti a. Petera chuan, "Enge ka bungrua te hi i rawn khawih chiam chiam ringawt a?" a ti khur leh ta dar dar mai. Rinawma chuan Petera chu a pawt sawn lawp mai a, book-shelf ah chuan bawm pakhat hi a lo awm a. Chumi bawm chu a han hawng a, pistol a lo awm a. Rinawma chuan a han en vang vang a, "Eheu, hei chuh...self-defence atana siam, non-lethal pistol a nih hi." a ti a. Petera chuan, "Ihh...ihh...ka haw tlai thei em a, chuvang chuan ka..ka..ka lo him zawk nan tiin ka nei ta mai anih kha...silaimu tak tak pawh a hmang lo, rubber bullets chiah a hmang." a ti bah nuai mai a.

Rinawma chu a nui suk a, "Animaw?" tih pah chuan sofa ah chuan Petera chu a tlawh thal tawp mai a. A rek nghal a, "Rubber bullet hian mihring a that thei tih i hria em? Case tam tak pawh ka buaipui tawh tih i hria em?" a ti ta khur khur mai a. Petera chuan tap tuau hian, "Tumah ka that lo, ka that lo tak tak." a lo ti pur mai a. Rinawma chuan, "Chiang takin min hrilh rawh, leihlawn tlu leh George-a bana kahna te kha...sawi rawh le." a ti a. Petera chuan, "Ka nu chu a tar tawh a, a thusawi te kha a rintlak loh ang." ala ti hram a." Rinawma chuan a han beng leh thuai a, "SAwi rawh...hun ka nei tlem ania." a ti leh khur khur a. Petera chuan tap chung chuan, "Awle awle...ka nu hian saw avah te ho vang sawn pawisa a hmang hnem em em a, chuvang chuan saw mite sawn ka nu thah an tum angin lantir ka tum a, chuvanga ti chu ka ni. Pawisa ka mamawh em alawm, leihlawn kha ka titla lui a, mahse tihfuh ka tumlo, tihthaih ringawt ka tum ani."a ti hluam hluam a. Rinawma chuan, "Sawi zel rawh.." tih pah chuan a beng leh fawk zel a. Petera chuan, "Tichuan ka nu chuan a ringhlel hlawm silo a, chuvang chuan George-a kha ka kap leh ta a ni. Tuma awmloh lai ka thlang a, ka nu kha kah ka tumlo. " a ti a. Rinawma chuan, "Kah ka tumlo e a? A pawi thui theih zia i ngaihtuah em?" a ti a. Petera chu a tham tho a, "Lo kal rawh le." a ti a. Petera chuan, "Khawiah?" a lo ti leh hluam hluam a. Rinawma chuan, "Police Station ah." a ti a. Petera chuan, "Engvangin?" hlauhthawn hmel tak chuan a ti a. Rinawma chuan, "Ka bula i sawi ang te hi iva sawi leh ang." a ti a, Station lam pan chuan a kal pui ta a.

*********

Tlai a lo ni a, party vawi hnihna a lo thleng leh dawn ta. Pu Zomuanpuia birthday tak tak a ni ta a, mipui pawh an kal khawm leh tan ta. Lily leh Pi Puii te pawh an kal ve a, Rinawma a hmuh veleh chuan Lily chuan, "Ka Ni, tikhan lo awm la, mi ka va hmu lawk ange." a ti a. Rinawma lam chu ava pan a, Rinawma chuan, "In va lo kal hma ve a, Pi Puii chu enge a an?" a ti a. Lily chuan, "Petera'n ngaihdam a dil a, ka Ni Puii pawhin case a hnukdawk leh ta a ni. Hetah hian ka lo kal pui ta daih a nih hi..Petera ba te pawh rulh sak vek a tiam a, mahse pawisa a pek tawh ngailoh tur thu a hrilh bawk kha." a ti a. Rinawma chuan, "Eee..alawmawm nasa a nih chu." a ti a. Chutih lai chuan Olivia-i alo kal a, "Kha intha maw?" a rawn ti a. Lily chuan, "Kan tha e, kan tha e." a lo ti a. Olivia-i chu a kal leh mai a, party na a mikhual lo kal te chu a han enkual vel a. Chutia a hawikual lai tak chuan kil khata hmeichhe pakhat, sam thur vek, kawr fual var ha, vun dang vek mai hi a hmu thut mai a. Olivia-i chu a phu zawk a, lehlam a hawi nghal a. A thaw nghal vak vak a, a awm a dawm vawng vawng mai. Simona alo kal vat a, "Duhtak, enge..enge ni ta?" a rawn ti a. Thaw hlawp hlawp hian Olivia-i chuan, "Saw...sawnu saw tunge?" a ti a. Simon-a chuan, "Kan mukual te zinga mi a nih saw...hmanni deuh lawk khan alo thleng a, tinge?" a ti a. Olivia-i chuan, "Ka hlau lutuk, a inchei dan saw.." a ti a. Simona chuan, "A ho lutuk, hahdam rawh..lo kal rawh, lut tawh ang." a ti a. Function chu an tan ta a, Lisa-i lah chu a fanu nen NAthana bulah kher chuan an la thu zui. Lisa-i hi pasal sun tawh a ni a, mahse a la naupan vang leh a puitlinloh em avang hian a tuar reilo hle a, Nathana pawh hi a star em em mai bawk a ni. Khua ala eng bawk a, party tak tak nan chuan a la hma deuh bawk nen. Naupang lo kal an tam ve bawk nen, opening na atan drama te chu an han en vel phawt a. Drama chang te pawh naupang vek an ni a, Cinderella thawnthu an chang mek a ni. Lisa-i fanu lah chuan, "Anu, tinge lalfapa sawn Cinderella-i saw a hriatloh a? A hma pawhin an lamdun reng sia." a ti a. NAthana chuan, "A chhan chu lalfapa sawn ahma khan Cinderella-i kha thawmhnaw dang nen a hmu a, chuvang chu alawm." a lo ti vel zuah zuah a. Drama chu an chang zel a, lalfapa lem chuan, "He lalram ah hian hmeichhe dang an awm tawhlo em ni?" a han ti vel a. Chhiahhlawh lem pakhat chuan, "Cinderella-i ala awm e." a lo ti a. Lalfapa lem chuan pheikhawk khing chu keng rengin, "Cinderella-i chu lo ko rawh u." a han ti leh a. Cinderella-i lem chu alo chhuak ta a.

Chutia drama an en mek lai chuan hlauhthawn hmel taka Olivia-i'n a phone a lo khawih mual mual lai chu Nathana chuan ava hmu fuh hlauh mai. Olivia-i chu a tho thut a, pawn lamah a chhuak ta daih a. Nathana chuan a ringhlel a, "Tui ka va in lawk ange." a ti a, a chhuak ve ta a. Lalfapa lem leh Cinderella-i lem te chu an inkuah a, lalfapa lem chuan, "Ka hmu ta che, ka va lawm em." ahan ti vel a. Cinderella-i lem chuan, "Kha leh chen kha ka hmel i hmuh fo tawh hnu pawhin tunge ka nih i hrelo a, mahse tunah chuan min hre ta...ka hmangaih che." a han ti vel a. Simona chuan Cinderella-i lemchang tawngkam hman chu a ngaithla uluk kher mai, a ngaih a ti thalo takzet a ni. Olivia-i chu motorah a lut a, a tlan ta daih mai a. Nathana chuan a lo en reng a, a car ah chuan lut vein Olivia-i chu ava umzui ta a. Chutih lai chuan khua athim tep tawh a, Sentei chuan ramhnuai lam chu ava pan leh ta a. Mahse hlauhthawn hmel em em hian a hawi hrek hrek a, chutah hnunglam atang chuan tu emawni hiana lu ah tak mai chuan base-ball bat hmangin a vaw ta pawp mai a, Sentei chu a thal nghal der mai. In te tak te ah hian Sentei chu a hnuk lut a, thisen a kawi nuai mai bawk a.

**********

Station ah chuan IG chuan a phone-a games chu a lo khel mual mual a, chuveleh a phone chu a rawn ri a. Phone chu la in, "Hello, aw keimah....ENGA? KHAWIAH? Ka lo kal....awle." tiin hmanhmawh takin a tlanchhuak nghal a. Pi Puii te ware-house ah chuan IG leh SI pakhat leh constable pathum vel ta chu an va kal a, kawngka an va hawng a. Sentei chu chhuatah a lo mu a, a awm zawnah chuan lily pangpar a lo indah teuh mai a. A bul velah chuan amah hualin bati a lo inchhi tlar thup bawk a. A bul lawkah chuan Opa alo awm bawk a, thisen lah a luang kawi zui mai. IG chuan a pistol chuan Opa chu a tin a, "Che tawh suh...i ban phar rawh!" a ti avak a. Opa chu a phu zuk a, a ban a phar nghal vat a."

(TO BE CONTINUE)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)