NATHAN SEASON-3 (Episode-11) SCRATCH MARK Pt-2 by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-11) SCRATCH MARK Pt-2 by:Aaron Malsawmdawngzuala

Unread post by Aaron Dustin » June 17th, 2020, 12:03 am

NATHAN SEASON-3

(Episode-11)

SCRATCH MARK (Part-2)

Written by : Aaron Malsawmdawngzuala

**********

Pari te inah chuan Nathana leh Sangtea leh Harry-a te chu an va kal ta a, inah chuan Pari nu leh pate an lo awm a. Pari pa chuan, "Officer, engti tura lo kal nge in nih?" tiin a zawt a. NAthana chuan, "Pari hi in fanu a ni em?" a ti a. Pari pa chuan, "Ni e.." tiin a lo chhang a. Nathana chuan, "Thil tlem azawng kan zawt duh che u a, tha taka min chhan ngei ka beisei." a ti a. Sangtea chuan, "Ka pu, Pari hi khawnge?" a ti a. Pari pa chuan, "A pasal tlaktlai lo zet bulah khan a niang chu." a lo ti a. Nathana chuan, "Tunge chu chu?" alo ti hu mai a. Pari pa chuan, "Drug addict kha mawle, a pasal tih ah, a tlanbo pui daih alawm." a ti a. Nathana chuan, "An innei lo tihna em ni?" a lo ti leh a. Pari pa chuan, "Kan vannei dawn chauh a, Pari mawl luatah ti hian kan rethei tlawk tlawk ta a nih hi." a ti a. Sangtea chuan, "Pari lo hi fa in nei em?" a ti a. Pari pa chuan, "Nei e, a u te pahnih...Hruaia leh Zautea te an la awm." a ti a. Nathana chuan, "Khawiah nge an awm?" tiin a zawt a, Pari pa chuan, "Hna an thawk a." alo ti a. Nathana chuan, "Pari chu a awmna chin inhrelo tihna em ni?" a ti a. Pari pa chuan, "Hrelo, a zawn pawh kan zawng peihlo. Lo let leh pawh nise, ka pawm thei tawh lovang. A pasal a tlanbo san a, kha drugs addict zawk kha a thlang a, a duh duh danin awm teh se." a ti a. Nathana chuan, "Pasal tlansan a? Tunge a pasal chu?" a lo ti leh hu mai a.

Pari pa chuan, "Pu B. Laltlanmawia a nia, mi hausa lutuk..business man lian tak a ni a. A huanah ka thawk thin a, kan nu hian an in a tifai bawk. Tichuan ka fanu Pari hi kum 16 a rawn tlin khan a ngaizawng ta a, kan inneih tir ta a ni." a ti a. Sangtea chu lo inrawlh vatin, "Kum 16 chauh ala ni si a, engtin nge pasal a neih theih?" a lo ti a. Pari pa chuan, "A kum a thlaksak a lawm, tichuan a nei ta a ni. Keini pawh kan retheihna te a bo a, kan vannei dawn chauh a..mahse Pari chuan drugs addict Ruatkima zawk a thlang leh ta daih si a, kan zak khawp mai. Abik takin Pu Tlanmawia lakah pawh kan inthlahrung a, kan zak takzet a ni." a ti a. Nathana chuan, "Pari chu in hau ngailo em ni?" a lo ti a. PAri pa chuan, "Hau e, a u te pawhin han ben fawk fawk chang an nei fo mai. Mahse kut han thlak vak hi kan duhlo a, achhan pawh a bialpa Ruatkima chuan kut a thlak nasa thei ropui si a, kan khawngaih veleh thin bawk si a ni." a ti a. Pari nu chu a lo tawng ve ta a, "Officer, ka fanu chu a awmna in hria em ni? A chungah enge thleng a?" a lo ti a. Nathana chuan zawi sap hian, "Ka pi, i fanu hi a thi niin kan hria a, thah a ni ngeiin kan hre bawk." a ti a.

Pari pa chuan, "Hmmh...a phutawk a hmu a nih chu, keizawng ka tuarna hran love." a lo ti hmuk mai a, Nathana leh Sangtea pawh an in en ringawt mai. Nathana chuan, "Pari hian room hran a nei em?" a ti a. Pari nu chuan tap chung hian, "Aw nei e, a bo atang khan a room saw ka la khawih danglam lo hrim hrim." a ti a. Nathana chuan, "Sangtea leh Harry-a te hian in thenawm te saw an lo va be ve hrim hrim anga, kei erawh Pari room ah chuan ka lo lut lawk ang chu?" a ti a. Pari nu chuan alo remti a, Nathana chu a lut ta a. PAri room chu a te in engkim mai chu a inrem fel ve thlap mai a. Nathana chuan a han enkual ngial a, teddy-bear te, pangpar lem te leh banga Korean tlangval thlalak lo intar teuh bak chu engmah han en vak tur a awm si lo a, a chhuak leh ta a. Nathana chuan Pari pa chu a ko a, "Ka pu, i ban ka lo en lawk." a ti a. Pari pa ban chu a han en a, mahse scratch mark engmah a lo awm bik chuanglo.

**********
Sangtea tlai duty haw chu a nupui Zualtei tawng ri niawm tak hi a hria a, inchhung ava luh chuan anu leh Zualtei chu choka lamah chuan an lo titi reng hi a lo ni a. Sangtea chuan Choka ban phen atang chuan a ngaithla ru a, Zualtei chu a thinrim hmel kher mai. Sangtea nu chuan, "I ti tak tak em ni?" ati a. Zualtei chuan, "Aw ni e ka nu, Sangtea hi mi hlauhawm tak ah a chhuak mai ang, hetia min tihbuai zel chuan keichu court ah ka kal mai ang." a ti tun tun a. Sangtea nu chuan, "Engchiah maw thleng a?" a ti a. Zualtei chuan, "Kan dawrah a lo kal a niawm a, kan manager nen kan inbe lai minlo hmu a. Kan manager chu a lo vau a, a police badge te hmuhin garage-ah a lo sawisa vak alawm. Ka hna atanga min ban a tum a, mahse khawngaihna ka dil a, min banlo mai mai zawk." tiin a lo inhrithla nasa mai a. Sangtea pawh a insum zolo leh ta, ava kal phei a. Zualtei chu a va nam sawk a, "Enga? Khawngaihna ka dil e a? Engtin nge i dil? I taksa hmangin em ni?" ava ti siah siah mai a. Zualtei chuan, "I zak em? Mihring pawh inilo, ramhuai i nih kha.." a lo ti let hrep a. Sangtea nu chuan, "Lalrinsang, i room ah chho rawh...tunah, vatin.." tiin a fapa chu a lo hau a. Sangtea lah chuan, "Ka nu, i monu hian min then duhna chhan chu an manager a lo ngaihzawn vang mai mai alawm." a ti vak vak a. Zualtei chuan, "Ngawi rawh Lalrinsang, khawnge ka fate an awm, kan hruai haw dawn." a ti a. Sangtea chuan, "I hruai haw lovang, nangmah zawk kha chhuak rawh." tih pah chuan Zualtei chu a nam chhuak rawk rawk a.

Zan alo thleng leh ta der mai, Sangtea pawh a rui leh ta. A haw paha a nupui hlui Zualtei te inzawna Zualtei leh tlangval pakhat inthlah chu a hmu ta thut mai, a ding a. Motor atang chuan a chhuk a, a enthla a. Tlangval nen chuan an inthlah liam ta a, Zualtei pawh inchhungah a lut a. Chuveleh Sangtea thinrim insum zolo chu Zualtei in lam pan chuan ava phei ta mai a. Kawngka chu a han kik a, Zualtei chuan phur zet hian a lo hawng a, a nui sang mai a. Mahse Sangtea a hmu thut chu a phu zawk mai a, a tum nghal hmuk mai. Sangtea chuan, "Tinge, mak iva ti awm ve a? I beisei loh zawk ka lo kal em ni?" a ti vel a. Zualtei chuan, "Enge i duh a?" a lo ti hlur a. Sangtea chuan, "Khawimaw awmsawn teh." tih pah chuan Zualtei chu a nam vak a, inchhungah chuan a lut a. Sangtea chu a thu a, dawhkanah chuan a pistol chu a dah a. Zualtei chu va kal hnaiin, "I mawl em ni? Pistol te kha engatan nge i phawrh a?" tiin ava vin vak vak a. Chutih lai tak chuan current a rawn thim thut mai a. Zualtei chuan, "AWiii...Sangte, current a thim ania, pawhdawh ah sawn bati ka dah, va la vat teh, chhi eng vat teh." a ti nghal chel chul mai a. Sangtea chuan, "Vak vak ache, dawih lutuk." tih pah chuan a phone light chu a on a, bati chu ava la ve mai a. Zualtei chuan, "Thim hi ka hlau tihte chu i hriat ve reng kha?" a ti a.

Bati chu an chhi eng ta a, Zualtei leh Sangtea chu an thu dun a. Zualtei chuan, "Ka hlau ania lo thuhnai teh.." a ti a. Sangtea chuan, "Hlauh i ngah ropui si." a lo ti vin hlur a. Zualtei chuan, "ENge ka hlauh dang i hria em ni?" a han ti a. Sangtea chuan, "Khawpui ri, t(r)ek leh thlithaw nasa te pawh i hlau." a ti a. Zualtei chuan, "Khate chu ka naupan lai alawm..ka thinphu ran zia hi i hria em?" tih pah chuan SAngtea kut chu ala a, a awm zawnah chuan a dah a. Sangtea chuan chiang tak hian a en a, "Zualte, tinge min kalsan daih a?" a ti a. Zualtei chuan, "Ka na duh tawh lo a ni...a hrehawm em ani." a ti a. Sangtea chuan, "KA ngai che asin...tinge min ten em em a?" tiin a zawt leh a. Zualtei chuan zawi sap hian, "KA ten lo che, engtik lai mahin ka pasal hi ka ten ngai lovang." a lo ti a. SAngtea chu a mittui a tla a, "That tur che a lo kal ka ni." a ti a, a tap ta zawih zawih mai a. Zualtei chuan Sangtea chu a biangah a vuan a, "Min that ta che.." tih pah chuan a fawp vawng vawng a, chumi zan chuan hun reitak chhung an lo hman tawh loh, nupa nun chu an hmang dun leh ta a ni.

**********

A tuk zingah chuan Pari u Hruaia leh Zautea te chu Police Station ah chuan an rawn kal ta a, Nathana te chuan zawhna an zawt a. Reife an inkawm hnu chuan Nathana chuan, "In pahnih hian kan la mamawh dawn che u a, chuvang chuan lo zinbo reng reng suh ang che u." a ti a. Sangtea chuan, "Station ah lo kal tura kan hrilh che u chuan engtik hun pawh nise inlo kal nghal zel tur a ni...luhlul zawnga in awm a nih chuan in chaklo viau ang." a han ti vel a. Nathana chuan, "Khawimaw in ban min lo hmuh teh u." a ti a, an ban chu an hmuh a. Scratch mark engmah a awmloh avang chuan Nathana chuan, "Awle, in kal thei e." a ti a, an kal ta a. Nathana chuan, "Sangte, Zautea zawk khan Pari kha kut a thlak nasa e an tia, Zautea thah zawk pawh hi a ni thei tho a, a vaw hlum te pawh a ni maithei." a ti a. Sangtea chuan, "Nia, scratch mark hi kan zawng reng nang a, Pari khan amah thattu kha a thih hma khan a lo ham miahlo pawh a ni thei a. A tal vel naah thildang a ham vel te pawh a ni thei tho a, mahse doctor ten an sawi miau si a." a ti a. Nathana chuan, "Pu B. Laltlanmawia an tih kha...Zarkawta mi saw ani thei mai angem? Company lian deuh neitu saw...hausa zet saw?" a ti a. Sangtea chuan, "A ni mahna, a hausa bawk a, nupui duh duh a nei thei aniang...a duh naupang emai." tih pah chuan a han nui vur vur a, ahma zana Zualtei nen an lo chet hit deuh vang nge, a khi sung reng mai. Nathana chuan tum huk hian, "Chupawh nise tinge i nuih kher a?" a lo ti a. Sangtea chuan, "Aaaa engmah nilove." a lo ti mai a. Harry-a chuan computer chu a lo khawih malh malh a, "Sir, ka hmu e. Pu B. Laltlanmawia, Zarkawta mi ngei chu a ni e. Car, bike, truck, farm house, flat, inhmun, ram leh company te, factory te...a hausa ngei mai." a ti nuah nuah a. Nathana chuan, "I va kal ang hmaing." a ti a, Sangtea nen chuan an chhuak ta a.

Pu Tlanmawia chu inah chuan a lo awm lova, an company kum 20 tlin lawmna ah, Chanmari YMA Hall ah daih a lo awm a. NAthana leh Sangtea chu an va kal ve ta a, ban dawn tep ah chuan Pu Tlanmawia chuan thu a sawi ta a. Stage ah chuan a rawn ding chhuak a, "In zavaiin chibai ule, ka lawm takzet a ni. Ka chanchin tlem ka han sawi ve ange, in hriat angin factory tamtak ka nei a, he company chauh lo pawh hi company dang tamtak ka nei bawk. Mahse engkim nei mah ila, ka naupan lai atanga ka nih ka tum ber zawk chu sa kap thei nih kha a ni. Kum 53 mi ka ni tawh a, putar chu ka ni ve dawn ta der mai. Ka naupan lai khan ka pa hian a a ram kalnaah min hruai thin a, sa kah dan te min zirtir thin. Vawikhat chu ka pa hian silai chu min hum tir ve a, a vawikhatna atan sakhi tuai tha zet mai hi ka kap fuh ve hlauh mai a. Kan va kalhnai a, ka pa chuan chem min pe a, sat turin min ti a. Mahse chu sakhi chu ka han en a, a mitmeng kha ka hmu a. Thih kha aduh biklo tih ka hria a, ka khawngaih a, ka tap hial a ni. Chuveleh ka pa chuan min beng a, I TAP DAWN ANIH CHUAN SAPEL TURIN LO KAL VE TAWH SUH tiin min hau a, kha kha ka pain min ben hmasak ber leh hnuhun ber na a ni. SA KAN PEL A NIH CHUAN THIHNA A THLENG TUR A NI, CHUTIANG CHIAH CHUAN KAN NUN AH HIAN THIHNA A BET TEL A, SA KAN PEL RENG A NI. SAPELTU I NIH LOH CHUAN SAPELTU SA CHAN MEK I NI ANG....tiin min hrilh a, khatia ka pa'n min beng kha ka tan chuan zirna tha tak a ni." a ti a, mipui chuan kut an beng dur dur a.

Program a zo chu NAthan leh Sangtea te chuan pawnah chuan Pu Tlanmawia chu an lo chang a, alo chhuah veleh chuan NAthana chuan ava pan a. Pu Tlanmawia chuan, "Ehe...nang hi DCP Nathan Malsawmkima i ni em awww?" a lo ti a. Nathana chuan, "Ni e, ka pu." a ti a. Pu Tlanmawia chuan, "Enge ni ta?" a ti a. Nathana chuan, "Zawhna zawh duh che kan nei a, i nupui hlui Pari chungchangah a ni a." a ti a. Pu Tlanmawia chuan Nathana chu a han en vang vang a, "Hetah nge hmundangah?" a ti a. Nathana chuan, "I sawina apiangah le.." a lo ti a. Pu Tlanmawia chuan, "Awle, kan inah aw...minlo zui ru." a ti a, an zui ta a. Pu Tlanmawia te in chu an thleng a, inchhungah chuan an lut a. Pu Tlanmawia chuan, "Ka han inthlak lawk anga, lo thu ru." a ti a. A inthlak chhung chuan Nathana leh Sangtea te chuan inchhung vel chu an han enkual a, salu hrang hrang a lo in tar fur hlawm mai a. Bangah thlalak ah te chuan amah Pu Tlanmawia leh a sakah tawh ho niawm tak te, an ruang bula a awm lai te, a tlangval lai thlalak te leh silai nena thla a lakna te alo ni fur hlawm mai a. Sangtea chu a han nui vur vur a, "A va han ho ve mai mai tak, Forest Department te ka hrilh dawn mawni.." ala ti bul bul zui a.

Pu Tlanmawia chu a lo chhuak a, "Ka hman e." a rawn ti a. Nathana te hmaah chuan a thu a, "Ka pu, i nupui Pari chungchang kan sawipui lawk duh che a." a ti a. Pu Tlanmawia chuan, "Tinge? Enge a chungah thleng a? Buaina a tawk em ni?" ati a. Nathana chuan, "Buaina a tawh i ring em ni?" tiin a zawt let a. Pu Tlanmawia chuan, "Chu chu alawm ka zawh che u.." a ti a. Nathana chuan, "Buaina a tawk a nih i ring a ang em alawm...min lo zawt nghal tawp sia..." a han ti leh te te a. Pu Tlanmawia chuan, "Police in ni a, ka inah inlo kal a, buaina a tawk aniang chu ka ti mai..." alo ti leh a. Nathana chuan, "Buaina a tawk a nih i rin te chuan tinge Police te hnenah ilo kal vat zawk mai loh? Tinge kan lo kal kher a ngaih?" a han ti leh a. Lungawiloh hmel zet hian Pu Tlanmawia chuan, "Engvangin nge ama duhthu ngeia ka in atanga tlanbo chu ka ngaihsak tehlul ang ni?" a ti khur khur a. Sangtea chuan, "Tlanbo chhan te a nei ani lo maw?" a lo ti zauh a. Pu Tlanmawia chuan, "Enge awmzia?" a lo ti a. Sangtea chuan, "Entirnan, i sawisa thin emaw, i vaw thin emaw, i hmusit emaw?" a ti leh a. Pu Tlanmawia chuan vin lek lek hian, "In hriat duh chuan kha a tlanbo pui drugs addict kha va zawt ula ti nia." a ti a. Nathana chuan, "Engvanga tlanbo pui nge a nih ang?" a lo ti ve leh a. Pu Tlanmawia chuan, "Engkim ka pe a, chhenna nuam tak in ka pe a, ka hmangaihna ka pe bawk a, mahse kei aiin kha drug-dealer kha a duh zawk miau alawm." a lo ti vin hlur mai a.

Nathana chuan, "Enteh, Pari hi a thi niin kan hira a, thah a ni ngeiin kan hre bawk." a ti a. Pu Tlanmawia chuan, "Engtin maw? A ruang in hmu em ni?" a ti a. Nathana chuan, "Hmulo..a kut chiah kan hmu..finger print kan la a, Pari hi niin kan hria a ni." a ti a. Pu Tlanmawia chuan, "Ka buaina tur a awmlo, ka nupui hmasa zawk Hmangaihi pawh ka then phah a, amah vangin..a pa pawh ka hnuaia hnathawk a ni a, ka duhsak hle bawk. Mahse min tlanbo san a, sum leh pai tamtak aiin drugs addict, mi tlaktlai lo a thlang zawk a, tihtheih ka neilo a ni." a ti a. Nathana chuan, "I nupui hmasa zawk chu khawnge a awm?" a ti a. Pu Tlanmawia chuan, "Kan inhnuaiah lawk khuan a pate nen an khawsa a, ka nupui hmasa pawhin thinrimna a neilo, an inkawmngeih lutuk zawk. A fanu ang chiahin a en a, mahse Pari hian kha mitenawm bak kha a ngaihtuah lo a ni." a ti a. Sangtea chuan, "Engtin nge PAri, kum 16 mi lek chu i duh reng reng a?" a lo ti ve leh a. Pu Tlanmawia chuan, "Ka hre biklo, ka duh ve tawp." a lo ti hmuk a. Sangtea chuan, "Chuti khawpa i nupui hlui pawhina a duat a, fanu ang chiaha a enthei a nih chuan in a dopt mai loh?" a lo ti leh a. Pu Tlanmawia chuan, "Ni e, a dik alawm. Ka fanu naupang ber ai pawhin ala naupang zawk a, naupang mai a la ni. Mahse keini ang tar tawh hi chuan mahni nupui ringawt te hi chu kan lo hne ve a, hmeichhe naupang zawk te pawh kan duh ve alawm..." a la ti ham ham zui. Nathana chuan, "Pari bungrua vel kan en duh a ni." a ti a, Pu Tlanmawia chuan, "Store-room ah kan dah char char a, chumi hnuah mi rethei te kan semkual vek tawh." a ti a. Nathana chuan, "Alo let tawh dawnlo tih i hriat chian em vang te a nilo maw?" a han ti leh kher a. Pu Tlanmawia chu a ding hluai a, "Lo let leh pawh nise, he inchhunga a chen ve hi ka phal tawh lovang." a ti a. Nathana chuan, "Anih leh i hnathawk ho te kan be duh a ni.." a ti leh hram a. Pu Tlanmawia chuan vin zet hian, "In be em em ang, mahse kha drugs addict pa kha Pari thattu chu a ni ngei ang, va man ang che u. Tihtur ka nei a, nidangah lo kal leh mai rawh u." tih pah chuan a room ah a lut ta daih a. Nathana chuan, "Sangte, haw teh ang." a ti a, Sangtea chuan, "Awle, bathroom ka hmang lawk dawn." a ti a.

Sangtea zung zo pawn a chhuak tur chiah chu room pakhat lo inhawng chu a hmu a, a va dak dek dek a. Khumah chuan nula pakhat hi a lo mu a, abulah te chuan Oxgen bur te chu a lo inhung fur mai a. A bul lawkah chuan hmeichhe pakhat a lo thu ve bawk a, chu nula chuan Sangtea chu a rawn en a, a chauh hmel em em a, a hmai pawh a dang vek bawk. Doctor pakhat alo lut a, "Ka pu, chhuak vat rawh. Hetah awm ve kan phallo, tunge i nih a?" tih pah chuan a nam chhuak rawk rawk a. Sangtea chuan, "Doctor, inbeng dai teh, police ka nih hi.." a ti a. Doctor chuan, "Police pawh nila, hetah awm kan phallo. Fimkhur a ngai ania, a natna saw a inkaichhawn theih a, chumai nilovin natna dang pawh tamtak a nei bawk." a ti a. Sangtea chuan, "Sawnu saw Pu Tlanmawia fanu a ni em?" a ti a. Doctor chuan, "Ni e, REspiratory Failure a nei a." a ti a. Sangtea chuan, "Azialo hle mai, Pathian hnenah tawngtai mawlh mawlh rawh u." tih pah chuan a chhuahsan ta a. An haw lam chuan Sangtea chuan, "Sir, sum leh pai hi hlimna tluangtling a nilo tih chu a chiang e. Ka khawngaih khawp mai, ala naupan hmel si. A hmel a tha si a, a damrei tawhloh hmel si." a ti a. Nathana chuan, "Enge a natna?" a lo ti a. Sangtea chuan, "Doctor sawidan chuan Respiratory Failure a tia, ka hre chiah biklo. Chubakah Pu Tlanmawia inchhungah khan CCTV a tam em em lehnghal, batroom ah a dahlo hlauh a, thlamuang takin ka zun theih phah tawk a ni." tiin a nui leh huah huah a. Nathana chuan mak tih hmel deuh hian, "Engemaw vawiin hi i nuih reng le?" a ti hu mai a. Sangtea chuan, "Aaa...nui vel mai mai." tih ringawt chuan a lo chhang leh a.

*******

Station ah chuan an let leh a, NAthana leh Sangtea te chu interrogation room ah chuan lutin Ruatkima bawk chu an dawp leh ta a. Nathana chuan, "Enteh Ruatkim, i thil hriat zawng zawng leh i thil zep zawng zawng te hi min hrilh vek angai dawn ania." a ti a. Ruatkima chuan, "Engthil maw?" a lo ti hu mai a. Nathana chuan, "I dinhmun a hlauhawm a ni." a ti a. Phawk hru hian Ruatkima chuan, "Enga? Enge awmzia?" a ti vak mai a. Sangtea chuan, "A awmzia chu i dinhmun a derthawng tihna a nimai..." a lo ti vin hlur a. Ruatkima chuan, "Enge awmzia?" a ti leh a. Sangtea chuan, "Nang hian dawt min hrilh a ni...Pari kha kut ka thlak ngailo i ti a, mahse kut i thlak thin reng tih kan hria. A pasal hlui Pu Ruatkima kan bia a, nangmah a ringhlel che a. A nu leh pate kan bia a, nangmah an ringhlel bawk che." a ti a. Nathana chuan, "Thudik tak i sawilo a nih chuan hre rawh...jail i tang anga, i rin aiin jail chhung chu a nuamlo ang aw.." a ti a. Ruatkima chu a ngawi vang vang a, "Sir..enteh u, engemaw hriat chu ka nei alawm. Mahse case hi drop rawh u, min man lo ula, ka tlanbo vat angai a ni. Jail tang pawh ni ila, jail chhungah chuan midang a ruai anga, min that tho tho dawn. Chuvang chuan ka tlanbo mai angai a, ka biru ta reng mai a ni. Sawpa lak atang sawn min chhanhim angai, min thah a tum char char a ni." a ti ta vak vak mai a. Nathana chuan, "Tu chu maw?" tiin alo zawt a. Ruatkima chuan, "Pu Tlanmawia...Pu Tlanmawia sawn...in hrethiam lo ang. Mi hlauhawm tak a ni, in rin ang ngawt leh inhmuh ang ngawt saw a nilo." a ti a. Nathana chuan, "Awle, ka lo ngaihtuah ang. Naktuk zingah kan sawi chhunzawm dawnnia, zanin chiah chu Lock-up ah lo riak leh mai rawh." tiin an chhuahsan ta a.

Atuk zingah chuan Sangtea leh Nathana te chuan Station atang chuan Ruatkima chu an hruai chhuak a, Nathana chuan, "Thingpui te kan in anga, tichuan i thusawi chu kan ngaithla pah dawnnia." a ti a. Ruatkima chuan, "Anih chuan min chhuah ang tiraw?" a lo ti nghal chung mai a. Sangtea chuan, "I thil min hrilh chu kan ngaithla phawt anga, a ngaihnawm leh ngaihnawm loh animai." a lo ti vel a. Station pawn an thleng chiah chu Pari U Zautea chu a rawn tlan phei a, pistol hi a lo la keng zui. Nathana te hmazawn takah chuan a rawn ding a, chutah Ruatkima chu a kap ta siah siah mai a. Police dangte chu anlo tlanchhuak a, Zautea chu an rawn tin thap mai a. Zautea pawh chuan pistol chu a dahthla a, aban a phar nghal a. Nathana chuan police dangte bulah chuan, "Nilo, kap suh u." a ti vak a. Ruatkima chu a let tawp mai a, a thi nghal der mai. Nathana thinrim lutuk chuan Zautea chu a rek vak a, Station lamah chuan a luhpui nghal a. Interrogation room ah chuan a rek lut nawk nawk a, chhuatah chuan a theh thal thuai mai a. A tham tho leh lawp a, bangah chuan nam bet a, "Mawla, engvanga ti nge i nih? Tu tih tir che nge?" tiin a vin vak vak a. Zautea chuan, "Keima thu a ti ka ni.." a ti pang pang a. Nathana chuan thutthlengah chuan a thut tir a, "I unaunu pawh khatiang chiah khan i that ani tiraw?" a ti leh a. Zautea chuan, "Ka thah a nilo, mahse hmu ila chu a ni pawh kha ka that em em ang. Kha mihring Ruatkima, drugs addict mai mai khan kan chhungkaw zahawmna a tichhia a, a phutawk hremna ka pe a nih kha.." ala ti ta deuh deuh a. Nathana chuan, "Engtin nge silai kha i neih?" tiin a zawt leh a. Zautea chuan, "Hmana ka neih tawh a ni...a rei tawh mai." a ti a. Nathana chuan, "I pa tih tir che a ni tiraw? Sawi rawh...tunge that tura ti che? Pu Tlanmawia zawk em ni?" a ti leh a. Mahse Zautea chuan a chhang tawh lo, a thu ngawi reng a. Nathana chuan, "I tang dawn...kumkhuaiin jail ah i tang dawn." tih pah chuan a tham tho leh ta lawp mai a. Constable ho bulah chuan, "Hepa hi khung nghal rawh u." tih pah chuan a han theh thlu leh tawp mai a.

Nathana chuan Sangtea bulah chuan, "Enteh Sangte, Station ah hian lo awm la, Pu Tlanmawia te in lamah ka va kal thung ange." a ti a, akal ta a. Pu Tlanmawia te in a thlen chuan lut mai lovin, an inhnuaia Pu Tlanmawia nupui hlui Pi Hmangaihin te inlam zawk chu a pan phawt a. Pi Hmangaihi pawh chu a lo awm a, "Tunge aw?" a lo ti a. Nathana chuan, "Ka pi, DCP Nathan Malsawmkima, Crime Branch atanga lo kal ka ni a, zawhna zawh duh che ka nei a ni." a ti a. Pi Hmangaihi chuan, "Aw, lo lut rawh." a ti a. Nathana nen chuan an thudun a, Nathana chuan, "Ka pi, Pari chungchang ania." a ti a. Pi Hmangaihi chuan, "Pari maw...ni e, mi khawngaihthlak tak a ni." a lo ti a. Nathana chuan, "A thi niin kan hria a, a ruang erawh kanla hmulo...enteh, i pasal nen in inthen phah a, i thinrim ngawt lo maw...Pari chungah hian i lungawilo viau lo maw?" a ti a. Pi Hmangaihi chuan, "Naupang mai ala ni a, ka khawngaih daih zawk asin. Ka duat em em a, ka fanu ang chiahin ka en thin. Ka nu leh pate hi an tar tawh si a, Tlanmawia nen kan inneih pawh khan kan retheih em avangin an inhnuaiah hian ka nu leh pate hi a awmtir a. Kan inthen hnuah pawh awm zel ala phal tho a, keini lah pan tur dang nei heklo, tihian kan awmzel mai a ni." a ti a. Nathana chuan, "Pari chu i haw miahlo amaw?" tiin a zawt leh a. Pi Hmangaihi chuan, "Haw love, mahse Tlanmawia khan a duh tlat si a, naupang duhna rilru a nei kha ka haw em em a, inthen pawh pawi ka ti talo a nih kha. Pari nena an inneih kha Tlanmawia fanu Rintei ngei pawhin a duhlo a, in atanga chhuah mai te pawh a duh hial thin. Mahse a damlo ta a, chuvang chuan tih theih a nei silo a ni." a ti a. Nathana chu a ngawi vang vang a, "Awle, ka lawm e." tiin a chhuahsan leh nghal daih a.

Nathana chu Pu Tlanmawia te in lamah chuan a lut a, Pu TLanmawia'n a lo hmuh chuan, "Ilo kal leh animaw, Officer? Hawh teh, verandah lamah inbe te ang." a lo ti vel ham ham a. Verandah ah chuan an inzui chhuak a, Nathana chuan, "Pu Tlanmawi, kha drugs addict, i nupui tlanbo puitu nia i sawi, Ruatkima chu tukin zing khan i nupui unaupa Zautea'n a kap hlum a ni." a ti a. Pu Tlanmawia chu a nui suk a, "Chuan enge?" a lo ti hmuk a. Nathana chuan, "Ruatkima khan a thihhma khan engemaw min hrilh duh a neih thu a sawi a, a thil hriat ang ang te pawh sawichhuah vek a tum bawk. Court ah kalpui kan tum lai takin Zautea chuan a rawn that a, engmah kan hre ta lo a ni. Ruatkima khan a hlauh thu che a sawi a, i hlauhawm tak i ni a ti bawk." a han ti leh a. Hlauh loh hmel zet hian Pu Tlanmawia chuan Nathana chu a han en a, "Chuvang chu emni ilo kal? Enteh, ka hrilh ang che. Kha drugs addict khan ka nupui a tlanbo pui a, chu chu PAri chhungte chuan an hua animai. An chhungkaw hming a tichhia a, chuvang chuan Zautea chu a thin a rim a, a kaphlum a nimai. Chhungkaw hmingchhiat hi a pawi asin Officer, ila tawng velo a ni ngei ang. Enge ti tura min duh? Ka tawngtai sak dawn em ni? Ni e, ka lo tawngtai em em ang..zawhna dang ala awm em?" a han ti nghal zuah zuah a. NAthana chu a nui suk a, "Zawhna dang chu awm tawhlo e, mahse i zawhna zawk kha ka lo chhang ange. Ka tawng ve tawh alawm, kan chhungkaw ti hmingchhe tu pawh keimah ngei ka ni. Corrupt Police Sub-Inspector ka ni thin a, tuna ka hausakna chhan pawh ahmaa ka eiruk vang te a ni. Mahse khang black-money te kha white money ah ka chantir a, ka insiamtha a, vawikhat mah thamna hi ka la leh tawh ngailo. Kan chhungkaw tihmingchhetu leh tihmingthatu chu keimah hi ka ni e." tiin a kalsan ta a.

**********

Zan a lo thleng leh ta a, SAngtea chu ahlim ngei mai. A nupui hlui Zualtei chu a phone a, "Zualte, restaurant ah ka nghak che aw...khawngaihin inhmu lawk teh ang. Thil pawimawh tak sawipui tur che ka nei ania, please in hman hram teh. Kan intawn hmasak berna hmun kha, kha restaurant ngei mai ah khan ka awm.." a han ti vel a. Darkar chanve vel hnuah chuan Zualtei chu a lo thleng a, Sangtea bulah chuan a rawn thu a. Zualtei chuan, "Sangte, engthil nge ni a? Ka hman reilo ania, sawi vat teh." arawn ti nghal a. Sangtea chuan, "Englo ania Zualte, ihh...ka nundan te ka sim vek tawh ang. Kan fate hian an ngai che a, lo let leh hram rawh. Innei tha leh ila, lo haw rawh...ka hmangaih che a, ka ngai che a ni." a ti a. Zualtei chu a ngawi vang vang a, "Min hrethiam rawh...ka theilo a ni." a ti a. Sangtea chu a hrilhhai ngei mai, "Eng..engmaw..tinge?" a ti a. Zualtei chuan inthiamloh hmel tak hian, "A tawp tawh..nangnen hian kan innei dawn tawh lo hrim hrim." a lo ti leh a. Mittui tla zawih zawih hian Sangtea chuan, "Ngati maw? Nizanah lawk pawh.." a tih lai chuan Zualtei chuan, "Nizan kha chu thil thleng palh mai chauh a ni...ka inhrethiam biklo." a ti ta mai a. Sangtea thinrim lutuk chu a insum zo lo leh ta, dawhkan chu a chum vak a, "Mihurnu...sex vang chauh khan em ni khatia min hmangaih awm ang deuh a i awm vel? I lo tenawm kher mai, i pasal hi min khamkhawp lo em ni?" a ti ta vak vak mai a. Midang chawl ve ho pawh chu an lo hawi thup a, Zualtei chu a ding a, "Insum rawh Sangte..." a ti dek dek chu SAngtea chuan dawhkan chu a thlawh tlu thuai a, "Ka insum lovang, mi zaktheilonu.." a ti leh vak mai a. Zualtei chu a tap a, zak tak chung chuan a chhuak ta a. SAngtea pawh a chhuak ve nghal a, zu a lei a, inah a haw a, zu chu in in a tap tlaivar ta thak mai a ni.

A tuk zingah chuan Station ah chuan Nathana leh DGP te chu an lo inbe mawlh mawlh a, Harry-a pawh a thleng tlai kher mai. Inthlahrung tak chuan kil khatah chuan a va thu ve a, chutih lai chuan a phone a lo ri a. Phone chu la in pawnah a chhuak a, a bialnu a lo ni a. Zawite hian, "Hello, duat enge ni ta?" a ti a. A bialnu chuan, "Duat, ka pa chuan a restaurant ah hna a pe dawn che a nih chu." a ti a. Harry-a chu a ngawi vang vang a, "Ihh...ka lo inngaihtuah ang." a ti a. A bialnu lah chuan, "Inngaihtuah suh...i duhthlanna tunah ahre duh tawh alawn." ala rawn ti sek zui. Chutih lai chuan Sangtea chu mit bui vek hian a rawn lut a, a dawhkan ah chuan abawk nghal thlawp mai. DIG leh DGP te chu an chhuak a, Nathana pawh a office lam a pan tur chiah chu a phone a rawn ri a, Zualtei a lo ni. Nathana chuan phone chu pick up in, "Hello, enge ni ta?" a ti a. Zualtei chuan tap chung hian, "Nathan, nizanah Sangtea khan mizingah min tizak khawp mai. Min ankhum vak vak a, ahma pawhin kan manager alo sawisa tawh bawk. A hrehawm emai, engemaw tal lo ti teh." a rawn ti lawm lawm a. Nathana chuan, "Awle, ka lo hau ange." a ti a. Nathana chu ava let leh a, Harry-a lah phone alo la hmang reng bawk a. Nathana chuan vin zet hian, "Sangte, Harry..in pahnih khan ka office ah lo kal teh u." a ti vak a. Sangtea chu phurlo zet chuan a tho tual tual a, Harry-a pawh chuan, "Nakinah ka lo be leh ang che." tiin phone chu a dah a, Nathana Office lam chu an va pan ta a.

Office chhung an luh rual rual chuan Nathana chuan, "Nangni pahnih vang hian ka buai zia hi inhria em? Harry, Police Officer nih tumin i exam anilawmni? Ka rin ber leh fing ber anga ka ngaih i nih avangin ka bulah training turin he case-ah hian ka telh ve che a, mahse phone bak i ngaihtuah lo. Vawitam ka hmu tawh che, last warning ni rawh se. Phone ringawt i buaipui dawn chuan Police ni tlak i nilo...Chuan Sangte nangpawh, Zualtei saw kaltir mai mai rawh, i nupui a ni tawh lo. Engtia rei nge amah vang sawn i mualpho dawn? I duh a, i hmangaih takzet a nih chuan then malek ta che...heibak chu ka hrilh tawh dawnlo che u...chhuak ru." tiin a vin vak vak a. Sangtea leh Harry-a te chu an chhuak a, Sangtea chuan Harry-a chu a han melh vang vang a, "ZU in ila...zanin chu.." a han ti ringawt a. Harry-a pawh chuan, "Awle, ka lo kal ang." a ti a. Nileng chuan hnuchhui hna chu an thawk leh ta ngar ngar mai a, mahse engmah erawh an chhuichhuak leh ta chuanglo.

**********

Zanah chuan Station bula restaurant ah chuan Sangtea leh Harry-a te chuan zu chu an in ta a. Harry-a chuan, "Keichu bansan mai ka duh, ka tihchi a ni velo aniang." a ti a. Sangtea chuan, "Aaa..i nep emai. Khatiang lek lek, aho lutuk. Keiphei chu kut min thlak fo asin ka senior te hian, i tlawm hma emai." a ti a. Harry-a chuan, "I hrethiamlo ani...bialnu ka nei a, mahse ka bialnu pawh ka khawih ngam lo chu ania. Ka kut pawh ala rimchhe reng a, ala reh theilo. Chubakah chawlh a awm ngai bawk silo nen, a hrehawm emai." a ti a. Sangtea chuan, "Anih leh hna dang i thawk thei dawn em ni?" a lo ti a. Harry-a chuan, "Ka bialnu pa hian a restaurant ah hnathawk turin min chhawr dawn alawm, amah pawhin a sawi vek tawh." a ti a. Sangtea chuan, "Haha...bialnu tih vel mai mai. Hmeichhia hi an lan ang ngawt an nilo, i bialnu pawh chuan midang a neihsan ve daih mai ang che. Kei tluka hrechiang an awmlo ang, keipawh hei, hetia ka awm tak mai mai hi." a ti a. Harry-a chuan, "Hmeichhia zawng zawng an in ang vek kher lo." a lo ti a. Sangtea chuan, "Naua, min hnial reng reng suh. Hmeichhia te hi tumah rintlak an awm lo, ila hrechho ve mai ang. Ka thu zawm la, Police hna hi bansan lo la animai." a ti khur khur a. Harry-a pawh a lungawilo kher mai, a wallet a phawrh a, dawhkanah chuan pawisa chu dahin, "Mi mak tak i ni, Sir....ka hrethiam lo che.." tih pah chuan a chhuahsan ta daih mai a.

Pu Tlanmawia chu an ina ama office bikah chuan alo la buai kher mai, zu in pahin paper te chu a sign mawlh mawlh hlawm a. Chuveleh tukverh atang chuan Sangtea a rawn lut thut mai a, Pu Tlanmawia pawh a phu chiang kher mai. Sangtea chu rum zet hian a melh a, "Engvangin nge i rawn luhruk kher a, police zawk si?" a ti khur khur a. Sangtea chu a hmazawn takah chuan ava thu a, "Thil sawipui duh che ka nei a." a ti a. Pu Tlanmawia chuan, "Sawi ta che." a ti a. Sangtea chuan, "Enteh, ka nupuiin min bum a, engtikah mah min neih leh tawhloh tur thu min hrilh a ni." a han ti ringawt a. Pu Tlanmawia chuan, "A nih chu, a va pawi ve." a lo ti ve mai a. Sangtea chuan, "Ka rilru ana khawp mai, chuvang chuan hei...zu pawh ka rui leh ta anih hi. Ka boss Officer Nathana lah chuan min hau hrep bawk si a, i nupui Pari thattu hi kan chhuichhuak thei bawk silo." a ti leh a. Pu Tlanmawia chuan, "Anih enge ti tura min duh a?" alo ti leh a. Sangtea chuan a pistol a phawrh a, Pu Tlanmawia chu a tin ta mai a. Pu Tlanmawia hlau lutuk chu a ban a phar nghal a, "Hey, enge maw i tih le?" a ti vak vak a. Sangtea chuan, "Sawi rawh, i thah a ni tiraw? Inpuang vat rawh...sawi rawh, inpuang la, case a tawp a nimai." tiin a vin vak vak mai a. Pu Tlanmawia chuan, "I silai kha dahthla rawh...tumah ka that lo." a ti chel chul mai a. Pawn lama security guard chuan thawm a lo hria a, a va tlan lut vat a. Sangtea'n Pu Tlanmawia slaia a lo tin reng chu a hmu a, a pistol phawrhin Sangtea chu a kap thal tawp mai a. Sangtea chu a thaw vak vak a, CCTV lam chu a han melh a, "Nilo...nilo.." tiin a thaw hlawp hlawp a, a thaw muang tial tial a, a thi ta der mai.

*************

Atuk zingah chuan Pu Tlanmawia te inah chuan police te leh forensic department ho te chu an vei suau suau mai a, Sangtea ruang erawh morgue lamah an thawn phei ta nghal a. Security pawhin thiamthu alo sawi nasa ngang mai, "Ka pu kha alo tin reng tawh si a, athat dawn maw ka ti a, ka kap ta mai a ni." tiin a lo insawi thiam zung zung a. Pu Tlanmawia pawh DIG te bulah chuan a thiamthu sawiin, "Pistol hi Sorkar phalna thlapa ka security te hian nei an ni, min venhim a tum vangin a kap a ni. Ka inah a rawn lut ru a, tichuan min vau ta a nih kha. CCTV footage ah pawh a lang vek, induh leh en ru." tiin a lo tang ve nasa mai a. Nathana leh Harry-a erawh morgue lamah an awm a, Nathana chuan mitkhap miahlo hian Sangtea ruang chu a en reng a. Harry-a pawh la naupang tih takah kawngkhar bulah dingin a lo tap zawih zawih mai a, Nathana erawh tap ni silo, mahse mittui tla zawih zawih hian Sangtea ruang chu a en reng ringawt mai a. Zualtei leh Sangtea nu an lo lut a, Sangtea nu chuan a fapa ruang chu kuahin a tap nghal zawih zawih mai a. Zualtei pawh a insum zolo, Nathana chu kuahin a tap ve nghal hawm hawm bawk a. Nathana chu Harry-a bulah chuan ava kal a, "Hawh teh..i chhuak ang hmiang." a ti a, Harry-a chuan a mittui hruk mawlh mawlh pah chuan a zui ve mai bawk a.

Motor ah chuan an lut a, an tlan ta a. An tlan lai chuan Harry-a chuan, "Sir, khawnge kan kal dawn a?" a ti a. Nathana chuan mood-off hmel zet hian, "Ka hrelo, kan kalna tur pawh ka hre biklo." a ti ringawt a. Harry-a chuan, "Enge kan tih ang?" a ti leh a. Nathana chuan, "Pari te inah kal leh phawt mai ang." a ti leh ringawt a. Pari te inah chuan an lut a, Pari nu leh pate pawhin mak anlo ti ngei mai. Pari pa chuan, "Officer, enge in rawn tih leh dawn a?" a ti a. Zalo tak hian Nathana chu a nui suk a, "Ka hrelo, kan lo kal ve tawp. In duh duh min hrilh rawh u, Pari chungchang pawh..." a ti zawi sap a. Pari nu chuan, "Ka fanu Pari kha misual a nilo, mifel tak a ni. A nunnemin a ngawichawi em em a, mi pawi a sawi ngailo. Vawikhat pawh Pu Tlanmawia te inah thisen pe turin an kal a, khata a hlauh zia kha.." a tih lai chuan Nathana chuan, "Engmaw? Thisen pek a?" a lo ti vat a. Pari nu chuan, "Aw...Pari hi Pu Tlanmawia nena an inneih hma deuh lawk khan thisen a pe ve alawm, staff zawng zawngin an pe alawm." a ti a. Nathana chuan, "Tuin nge thisen chu la a?" a lo ti leh a. Pari pa chuan, "Pu Tlanmawia personal doctorin.." a lo ti leh a. Nathana chuan, "Kan lawm e, Harry..kal ang." a ti nghal a, an chhuak ta daih mai.

Pu Tlanmawia te in lam pan chuan an kal leh ta nghal a, Harry-a chuan, "Sir, enge awmzia?" a lo ti hu mai a. Nathana chuan, "Pu Tlanmawia fanu kha Respiratory failure a ni a, thisen a tlachham a, chumi vang chuan a ni thisen kha an lakkhawm ni." a ti a. Harry-a chuan, "Ka hrethiam neinuai lo...ka buai vek." a ti a. Nathana chu a nui suk a, "Hemi case hi min zawhpui law law la, abak chu i thu thu animai. Chubakah, ban i tum hrim hrim a nilawmni?" a ti a. Mak tih hmel tak hian Harry-a chuan, "Ehe..engtin nge i hriat a?" ati leh hu mai a. Nathana chuan, "DCP Nathan Malsawmkima hian hriatloh engmah a nei hleinem." a ti a, a nui sak a. Pu Tlanmawia te in chu an thleng a, mahse alo awmlo a, Sangtea thihna avang khan a rilru a hah in a la hlauthawng em em a, chuvang chuan intihharh nan tiin sava veh turin ramhnuai lamah akal tiin security te chuan an lo hrilh a, a farmhouse awmna an lo hrilh bawk a.

Pu Tlanmawia personal doctor chu anva bia a, Nathana chuan, "Ka pu, kanlo be lawk che. Hman kum deuh khan hetah hian Blood Donation a awm a, enga tan nge ni?" a ti a. Doctor chuan, "KA hre lo, keimah hmaa a doctor chhawr aniang, chupa chuan a hria ang." a lo ti a. Nathana chuan, "Chu doctor chu i hre ngai em?" a ti leh a. Doctor chuan, "Hria e, a address in duh em ni?" a lo ti a, Nathana chuan, "Kan lawm ngawt ang, min hrilh theih chuan.." a ti a. Doctor chuan address chu a pe a, chumi lam pan chuan an kal ta nghal a. Inchhung an han lut chu a lo hnawk kher mai, sitting room ah chuan mipakhat hi a lo thu a, a melh ngai melh rengin a lo thu tum bur mai a. Nathana chuan, "Doctor Saia i ni em?" ati a. Chupa chu a lu a lo bu nghat a. Nathana chuan, "Police kan ni a, biak che kan duh a ni." a ti a. Saia chuan a melh ngai melh reng chung chuan, "Hmeichhe fel tak a ni, hmeichhe duhawm tak a ni. Enge a chungah khan kan tih tak mai le...a mangang au ri mawlh kha.." a ti vawng vawng mai a.

Nathana leh Harry-a chuan an hrethiamlo hle mai, Saia chuan, "Sawtah sawn in duh engkim a awm vek ang." tih pah chuan a sira computer chu a kawk a. Chuveleh pistol a phawrh thut a, a ka chhungah chuktuahin amah leh amah chu a inkap ta mai a, thisen a perh chhuai mai. Harry-a chu a au thawt a, a uak nghal tuar mai. Nathana chuan Doctor ban chu a en a, Scratch mark chu a lo awm ta ngei mai. Computer lam chu an va pan a, computer ah chuan Pari thlalak chu a lo awm a, Nathana chuan a han en vang vang a, "Engkim a chiang ta." a ti sap a.

******

Pu Tlanmawia farmhouse ah chuan Nathana leh Harry-a te chu an va kal a, farm-house kawtah chuan Pu Tlanmawia chuan a rifle chu alo hru hliau hliau a. Nathana chuan, "Tihian lo awm la, ka va bia ange..." a ti a. Harry-a chuan, "Lo kal ve angai em?" a ti a. Nathana chuan, "Ngailove, engmah tihtur a awmlo, ka va titi pui lawk ange." a ti a. Tichuan Nathana chu ava kal a, Pu Tlanmawia chuan, "Nang bawk maw?" a lo ti vin hlur mai a. Nathana chuan, "Pu Tlanmawi, sapel thiam tak chu ilo ni e. Mahse keipawh hi sapel thin ka ni a, mahse ramsa nilovin, misual te ka pel thin. Misual fing deuh pawh hian thil tihsual hi an nei ve ziah a, abikin Mizorama tualthattute phei hi chu an fing var tak tak lo." a han ti vel a. Pu Tlanmawia chuan, "Enge i sawi tum ber chu?" a lo ti a. Nathana chuan, "I fanu saw...respiratory falure a ni a, a kal (kidney) thlak a ngai a ni. A kal thlakna turin i hnuaia hnathawk te zawng zawng thisen i test tir vek a, i nupui Pari ngei pawh a tel. Tichuan i fanu thisen milpui awmchhun chu par chauh a ni. Pari kha khati hunlai khan i nupui ala nilo, in huan enkawltu fanu mai chauh ala ni. A kum in thlak danglam chhan kha i hmangaih vang leh neih i duh vang nilovin, operation a tih theihnan kum a tlin loh avangin i thlak danglam a, tichuan i hmangaih der a, i nei ta a ni. Mahse Pari chuan a duhlo a, chuvang chuan i that ta a, mahse vanduai thlak takin i fanu pawh chu a tha chhuak ta chuanglo a ni...a dik em?" a ti ta phiar phiar mai a.

Pu Tlanmawia chu a thaw hak a, "DCP Nathan, ramhnuai lamah sawn i inkawm zawk teh ang." a ti a. Tichuan a rifle chu akin Nathana nen chuan an inzui phei ta a. Pu Tlanmawia chuan, "Ni e, ka fanu hi ka engkim a ni a, ka khawvel a ni. Pari chiah kha a thisen milpui awmchhun a ni si a, tichuan nupuiah ka nei ta a, a chhungte ka bum a ni. Ruatkima khan engkim a hre ve vek tih ka lo hriat khan Pari unaupa Zautea chu ka fuihpawrh a, tichuan a rawn kaphlum ta a nih kha. Chhungkaw hmingthatna tiin ka sawi a, ani lah chuan min zah em avangin a lo awih zel mai bawk si. Pari kha operation ti tur khan mi 10 rual velin kan manbet a, a duhlo lutuk leh a hlau lutuk kha atal nasa asin. Kan doctor pakhat phei chu a ban a ham rang ve alawm, mahse kan chiu muhil thei ta hram a ni. Tichuan a kal chu a kan la a, mahse ka fanu chu a ziaawm thei chuang silo a nih hi." tiin a tap zawih zawih a. Nathana chuan, "I fanu vanga ti i ni a, mahse pawisawi lo nunna i la a ni. Pu Tlanmawi, kum 53 i ni tawh a, jail-a thih chu i duh ka ringlo. Ramhnuaia intan a ni a, ramhnuaiah bawk hian tawp rawh se...i thu a ni e." tiin a kalsan ta a.

Motor bul ava thleng a, Harry-a chuan, "Sir, enge thleng a?" a lo ti vat a. Nathana chuan, "Engmah a thlenglo, hawh teh i haw teh ang..case a tawp tawh." a ti mai a. Chuveleh ramhnuai atang chuan silai puak dur ri hi an hria a, HArry-a chuan, "Enge chu chu?" a lo ti leh chul mai a. Nathana chu a nui sak a, "JUSTICE anih chu...haw vat ang." ati a, an haw ta a. Pu Tlanmawia fanu pawh chu hemi ni la la hian a natna tuar lovin a boral ve nghal a, Harry-a pawh a bialnu pa restaurant ah chuan a thawk ve ta nghal bawk a, police hna chu a bansan ta nghal a ni.


THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)