NATHAN SEASON-3 (Episode-12) WHO IS THE KIDNAPPER? (Pt-1) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-12) WHO IS THE KIDNAPPER? (Pt-1) by:Aaron Malsawmdawngzuala

Unread post by Aaron Dustin » June 18th, 2020, 10:54 pm

NATHAN SEASON-3

Episode - 12

WHO IS THE KIDNAPPER?

(Part-1)

(MONTAGE INSPIRED)

Written by : Aaron Malsawmdawngzuala

***********

(Kan thawnthu ziaktupa khan ka sawi ve hi a phal vak tawhlo a ni awm a, Nathana fans te khan lo hrilh rawh u, a thulo ve chiang emai! Awle tunah chuan kemiah Lalrinawma, ASP ngat hian ka han sawi veleh tawh ange aw. Ka banruh ka ti tliak khanglang a, mahse ka lo let leh ta e. Tun episode na na na hi chu ka sawi ve dawn hi a ni tawp mai. Ka damdawiin awmlai lah khan tumahin min rawn kan duh mang silo, in sual si..sawi tan ang aw!!!)

Nathana Office-a Nathana nen kan inkawm mawlh mawlh lai chuan nu pakhat hi a lo kal a, Nathana hmaah chuan a rawn thu a. Nathana bulah chuan chunu chuan, "Officer, minla hria em?" a rawn ti ringawt a. Nathana chuan a han en vang vang a, "Ehe..Pi Kim, nangmaw? a ti hu mai a. Kimi chuan, "Aw ni e, keimah kha..." a rawn ti a. Nathana chuan, "Enge ni ta a?" a ti a. Kimi chuan, "Officer, khawngaihin case kha min reopen sak rawh, pawisa engzat pawh chawi ka huam." a ti a. Nathana chuan, "Eng case maw? Pi Kim, khawngaihin kha accident vang kha chu a ni tawh lo tih min hrilh rawh." a ti ringawt a, ka hrethiamlo kher mai. Kimi chu a kun a, mittui tla zawih zawih hian, "Officer, min ngaidam rawh. Kha case tho kha a ni e.." a ti a. Nathana chuan, "Enteh, kha case kha chu ator atangin keiman ka khawih lo a, ka damloh vang a ni. Kum tamtak a liam tawh a, chhuichhuah a har tawh viau ang. Chubakah case close tawh te chu duh duh huna re-open leh theih ngawt a ni hleinem, min hrethiam rawh." a ti a. Kimi chuan a bag a phawrh a, evelope chhunga pawisa khat vek hi a rawn phawrh a, "Officer, khawngaihin min tihsak hram rawh." a ti leh a. Nathana chuan, "Pi Kim, anih chuan rinhlelh deuh te i nei thar ami?" a ti a. Kimi chuan, "Tumah ka nei chuanglo, mahse ngaihthat lohna chu ka nei a, chubakah thlamuangin min muttir thei ngang lo a ni." a ti a. Nathana chu a ngawi vang vang a, "Pi Kim, pawisa hi la let phawt la, kan hotute bulah 'statue of limitation' permission ka lo dil ange, kan ramah hian an hmang ve ange maw? Kan lo buaipui ange, va haw phawt rawh." a ti a. Kimi chu a tho a, a chhuah dawn tep ah chuan a rawn hawilet a, mittui tla zawih zawih chung chuan, "Officer, ka fanu a ni asin, ka fanu liau liau a ni asin. Khawngaihin min chhuichhuah sak hram rawh aw..khawngaihin.." a ti a, a chhuak ta a.

Nathana hmel chu ka han en a, a rilru a hah hmelh kher mai. Nathana bulah chuan, "Sir, enge awmzia ni a?" ka ti hu mai a. Nathana chu a han thaw huai mai a, "Aaa..case hlui a nia. A rei leh tawh...hman kum khan, Mizoram ka rawn awmtirh khan ka accident a, kawng reh lai tak a ni bawk nen. Ihh..ka tlan laiin ka motor hma tak maiah hmeichhe naupang pakhat hi a rawn tla ri dup a, keilah ka phone hmanlai tak a lo ni bawk nen. Ka balance a buai a, ka phu nasa lutuk bawk nen, tichuan ka buai ta a, atawpah chuan ka motor chu a vir lawp a. Chianglo ruai chuan kawngpuia Kimi lo tap chu ka hmu a, chu hmeichhe naupang pawh chu thihnuang hian a lo let reng a, Kimi chuan naupang chu kuah in a tap vak vak a. Mahse ka chau em a, ka thawtha hlei thei lo a, abak chu engmah ka hre tawh lo." a ti a. Ka la man chiah lo, "Nihleh Sir, naupang chu tunge ni reng reng?" ka ti leh a. Nathana chuan, "Kimi fanu, Rinrini.." a ti ta mai a. Mak ka ti em em a, mahse la hriat belh zel ka duh tlat. Ka aw ka han thian kharh a, "Anih chuan Rinrini chu a thu a nimaw?" tiin ka zawt leh a. Nathana chuan, "Aw thi e, van atanga rawn tla nimai khan ka hria, mahse kawngsir kham hniamte atanga rawn tla zawk a lo ni a. Kimi kha tu emawni in a kidnap a, a kidnap tu erawh an chhuichhuak ta lo a ni. A fanu kidnapper khan pawisa a phut a ni awm a, ahnua Kimi hnen atanga ka hriat leh dan chuan a fanu kidnap tu nen khan chumi zan chuan inhmuh an tum a, pawisa inpek pawh an tum a ni. Mahse an inhmuh tumna kawngah tak khan kei ka lo tlan si a, tichuan Rinrini chu ka motor hmaah a rawn tla ta thut mai si a, keipawh ka accident phah ta a ni." a ti a.

Kei lah chuan, "Sir, chumi kawng chu khawilai nge?" tiin ka han zawt leh hram a. Nathana chuan, "A rei tawh lutuk a, ACP ka nih lai daih tawh a ni a. Nangmah nen pawh hian kanla inhre lo. Ka hrechiang tawh lo, enge ka tih khalai hmunah khan..ka hrechhuak zo tawh lo. Mahse khami zana accident ka tawh kha chu ka la hrechiang khawp mai, ka mumangah pawh ka la hmu fo." a ti a. Kimi chu ka khawngaih hle mai, "Sir, nileh case chu tuin nge buaipui ta?" ka ti leh a. NAthana chuan, "Ka hrelo, Vengdang Police hovin an buaipui a, kei lah damdawiinah ka awm daih bawk si." a ti a. Nathana pawh a rilru a nawmloh hmel kher mai, "Sir, kum engzat vel nge liam tawh ang?" tiin ka zawt leh a. Nathana chuan, "Kum 10 vel chu a ral hial tawh ang...apawi takzet." a ti vawng vawng a. Keipawh chu ka han thaw hak a, "Anih chuan chhuizui ngeihna a awmlo anih chu." ka ti zawi sap a. Mahse Nathana chuan, "Awm tehreng e...case chhui tur kan neilo a, pending case engmah a awmlo bawk. Chuvang chuan he case hi re-open ka dil khawp ang." a ti leh ta daih mai a. HHrethiamlo tak chuan, "Mahse Sir, engtin?" ka lo ti hu mai a. Nathana chuan, "STATUE OF LIMITATIONS case hmangin." a ti leh ringawt a. Za lo deuh chuan ka nui a, "Kan ti thei ve ngawt dawn em ni? Chutiang system te chu Mizoramah pawh an la hmang lovang." ka lo ti a. Nathana chuan min rawn en a, "Rinawm, India ramin an hmang ve alawm, Mizoram pawh India ramah tho alawm a awm ve, ka dil khawp ang. Kimi hmel ka en khan a mitah khan lungaihna thuk tak ka hmu a ni, ka chhuisak leh ngei ang." a ti a, ka tel ve leh ngei chu a ngai dawn a nih hi.

***********

Atuk zingah chuan Nathana chu kei aiin a rawn thleng tlai ve teh mial a, ka office ah a rawn lut tlang nghal a. Hmanhmawh hmel deuh hian, "Hawh teh Rinawm, chhuak lawk teh ang." a rawn ti nghal ringawt a. Hrethiamlo tak chuan, "Khawnge kan kal dawn?" ka lo ti a. Nathana chuan, "Kan accident-na hmunah chuan ka hruai dawn che nia." a ti a. Keichuan, "Mahse Sir, duty lai kan ni sia." ka ti a. Nathana chuan, "A pawilo, midang an tam alawm. DGP bulah pawh ka sawi vek tawh a, statue of limitation chu ka dil a, mahse ni 5 chiah hun kan nei tawh anih chu.." a rawn ti a. Engmah sawi tawh lo chuan Nathana chu ka zui a, kum 10 kalta a, a accident-na hmunah chuan kan kal ta a. Nathana chanchin hi kan intawn hnu atang chauh a rawn sawi thin ka ni a, hetia accident alo tawh te hi engmah ka hre velo a, amah pawhin min hrilh ngai hek lo. Nathana accident tawh zan hian Nathana chu damdawiinah dah nghal a ni a, hemi chhung hian kidnapper leh tualthattu ni bawk chu zawn nghal a ni a, mahse an hlawhchham a, case an lo close tawh hi a lo ni a. Minister te leh politician dangte a hmelhriat hnem bawk a, statue of limitation case chu an phal hram a ni. Mahse an phal dan lah hi a han dap khawp a, ni 5 chiah hun awm tawh angin anlo direct pawp a, mahse a lawmawm tho e, kan chhuichhuak hman em ang chu maw? Ni 5 hnuah chuan he case hi a in close tawp tawh dawn a, chhui chhunzawm emaw, re-open emaw pawh a theih tawh dawnlo a ni.

Accident-na hmun chu kan thleng a, kawng reh tak mai a ni lehnghal. Nathana chuan a accident dan vel te, Kimi leh a fanu Rinrini a hmuna te nen chuan min han hrilh vek a. Mahse kawngsira pangpar lo intar a hmuh chuan a mit a la em em mai a, ava pan hnai a. Nathana chuan pangpar chu a la a, a en vang vang a. Nathana bulah chuan va kalin, "Tinge Sir? Enge i ngaihtuah a?" ka va ti a. Nathana chuan mak tih hmel zet hian, "Enteh Rinawm...hei pangpar..alo awm ringawt." a ti hu mai a. Keichuan, "Awww..mi zin vei vakin an lo dah mai mai te pawh a ni thei a.." ka ti mai a. Mahse Nathana erawh chu a thutak ngang mai, "Anilovang, tu emaw tak dah a ni ngei ang. Tinge ka accident-na hmunah kher a dah anga? Tinge pangpar kher a dah?" a ti vak vak a. Ngaihdan ka nei bik thak bawk silo, "Sir, Kimi'n a dah a nithei mai angem?" ka lo ti a. Nathana chuan a phone chu phawrhin Kimi chu a phone nghal a, "Hello, Pi Kim, accident-na hmunah khan tunhnaiah i kal leh em ni?" tiin a zawt a. Mahse Kimi chuan, "Ka kallohna a rei tawh lutuk, tinge a?" a rawn ti a. Nathana chuan, "Parpar a lo in tar a, kawngsir ah hmawlhte a lo inphun a, chutah chuan alo in tawnbet a." a ti a. Kimi chuan ring tak hian, "Enge awmzia? Chu chu tunge ni ang?" a rawn ti nghal chel chul mai a. Nathana chuan, "Ka hre biklo, Pi Kim, nakinah kan inbe leh dawnnia." tiin phone chu a dah a.

Nathana chu a han hawikual vel a, kawngsir thingkung tam em em mai chu a han thlek leh a. Chutah a mengphawk hru a, thingkung pakhat chu a han kawk a. Ring zet hian, "Ehe, enteh Rinawm.." a ti vak a. Thingkung lam chu ka va en a, thingkung ler ah chuan kan lam hawizawng hian camera hi a lo in tawnbet a. Nathana chuan, "Camera khi han la vat teh." a ti a. Thingkung ah chuan lawnin camera chu ka han la thla a, alo la in record reng zui. Video duration chu kan han en a, ni 2 vel lai a lo in record char char tawh hi a lo ni a. Nathana chuan, "Hawh teh, Station lamah let vat ila, control room ah video hi i han check chiang teh ang." a ti a. Station lamah chuan kan let leh a, control room ah chuan lut tlang nghalin duty te bulah chuan video chu kan pe nghal a. Video chu kan han en vang vang a, a tir atangin thingkung atanga lak a ni nghal a, mihring hmel reng reng hmuh tur a awm lo. Tichuan darkar engemzaw zah kan forward hnu chuan motor pakhat hi accident-na hmunah chuan a rawn ding ta a, pa pakhat hi a rawn chhuk a, pangpar kengin kawngsira hmawlte inphun ah chuan a tawnbet ta a, chu pangpar ngei chu a ni Nathana nena kan hmuh kha. Nathana chuan, "Pause teh." a ti a, kan pause ta a. Camera chu zoomin chupa hmel chu kan han enchiang a, mahse camera quality a chhiat em avang chuan tunge a nih kan hre thei hauh lo.

A incheina chu chiang takin a lang thung a, coat suit dum a ha a, over coat niin a ngal chen vel thleng ala ni zui. Chu mai nilovin lukhum parh dum a khum bawk a, a an ber chu hmanlai sap ho detective a ang ber in ka hria. A hmel chu zoom eng ang mah ila a hriat theih chuangloh, a pherh vek a ni ber mai. A motor number lah chu a hmuh theih bawk silo, a incheina leh a motor chu bolero dum a ni tih chiah kan hre thei a ni. Nathana chuan, "Hrep tak chuan le..engvanga camera hi dah kher nge maw a nih le?" a ti nuah nuah a. Zan alo thleng a, chaw eikham hnu velh chuan Nathana nen chuan Kimi te inah chuan kan kal a. Kimi hi mahnia khawsa a ni a, a fanu boral ta, Rinrni kum 2 a nih lai vel khan apa in a pasalin a boralsan tawh bawk a ni. A pasal hi pa hausa tak a ni a, Kimi pawh tun thleng hian sum lamah a harsat phah lo hle bawk. Kimi chuan, "Officer, tunge a nih ang?" a a ti a. Nathana chuan, "Keini pawhin chu chu kan chhui mek a ni Pi Kim, lungngai suh, ni 4 kan la nei a, vawiinah a hmasa ber atan thu lawmawm lam a ni nghal a, i fanu kidnap tu chu kan chhui chhuak em em ang." a ti a, kan haw san ta a. Kimi hi kum 40 vel bakah upa anilova, nu hmeltha tak a ni. A fanu Rinrini a thih khan Rinrini kha kum 7 mi vel a ni a, la dam zel se chu tunah chuan hmeichhe tleirawl tak a ni ve tawh dawn tihna a nih chu.

********

Atukah chuan Station ka thlen rual rual chuan Nathana chuan a office ah min ko lut nghal a, "Rinawm, nizanah khan video kha chiang takin ka en leh a, thil pakhat hmuh chhuah ka nei a ni." a ti ta mai a. Hre chak tak chuan, "Enge ni, Sir?" ka lo ti vat a. Nathana chuan, "Motor kha min hnungchhawn zawnga awm a ni a, motor hnungah khan Sava lem ni awm tak, logo tereuhte a inbel a ni. Camera kha a fiahlo em a, thingkung atang khan a hla deuh bawk nen. Mahse eng company emaw tak chu a ni ang, a nihloh pawhin khatiang logo nia kan rin deuh beloro dum apiang ah zawng ta ila, kan hmuh theih mai ka ring." a ti a. Keichuan, "Anih chuan Sir, tunah kan thawkchhuak nghal mai dawn em ni?" ka lo ti vat a. Nathana chuan, "Ni e, a pawi hleinem." a ti a, kan chhuak ta nghal a. NAthana nen chuan chawhma chhung zawng chu bolero dum, a hnunga sava lem logo inbel chu kan zawng ta a, police dang te pawh unit 2 vel thenhrangin hmun dangah kan zawn kual tir ve bawk. Kan zawn fe hnuah pawh chuan kan la hmu chuanglo a, bolero dum chu atam ngang mai, mahse chutiang logo reng reng chu hmuh tur a awm bawk silo. Chumi ni chuan nilengin kan zawn chhunzawm char char a, kan hlawhchham thak a ni ber e.

Case chu khawih zui zel a ni a, hun pawh a liam chak khawp mai. Kimi pawh a mangang em em a, accident thlenna a lo rei tawh bawk nen, chu kan video hmang pawh chuan engmah chu kan chhuichhuak thei chuanglo a ni. Statue of limitation case ni hnuhnung ber alo thleng ta a, Nathana pawh a beidawng tan lek lek tawh a ni. Chawhma chhung zawng chu kan zawng leh a, khaw dangah te hial pawh kan zawng kual a ni tihkha lo theihnghilh lo ula, SI Liantea te phei chu Shillong an zuk thleng hial a ni. Nathana nen chuan chhunah chuan Restaurant ah kan chawl a, thil kan ei a. Chutih lai chuan nasa em em mai hian ruah hi a rawn sur vak mai a, bike-a kal kan ni bawk nen, Station-a let leh tur pawhin kan huh vek dawn si a, kan tang chu a ni der mai. Chutia kan titi mawlh mawlh lai chuan Nathana chu a chhuak thurh a, ruahsur hnuaiah chuan a kawng lehlamah a tlan phei ta daih mai a. Rang tak chuan ka va um nghal a, huh hlauh mak nak alaia, kan hu ta vek tho chu a nih hi maw...Nathana chu Bolero dum, kawngsira lo ding bulah chuan a va kal hnai a, motor chhungte chu a han bih kual vel a. NAthana bu la ve then chuan, "Enge ni ta a?" ka va ti a. Nathana chuan, "Rinawm, dawra kan chawlh lai khan he motor hi ka hmu thut a, a hnuga inbel kha en teh.." a ti a. Motor hnung chu ka en a, video-a kan hmuh ang ngei khan sava lem logo chu a lo inbel a, chiang taka han en chuan a nalh phian lehnghal. NAthana chuan, "A chhungah hi chuan tumah an awmlo, ruah a sur bawk si a, khawiah emaw a tang ve a ni ngei ang." a ti a. Keichuan, "Engtin nge kan tih ang?" ka lo ti a, Nathana chuan, "A neitu lo chhuah hun kan nghak veleh phawt mai aniang chu." a ti a.

Chutia kan inbiak mawlh mawlh lai chuan kil khat atanga keimahni lam hawi zawnga lo ding reng chu ka va hmu a, nihliap a khum a, a hnihlian chuan a mit a khuh a, a khabe tlem chauh ka hmu thei. Ngaihthatlohna em em pawh neilovin kawngsirah chuan Nathana chu ka zui a, ruah han hun chu kan nghak ta a. Mahse khapa, kan lam hawia lo ding reng kha ka ngaihtuah chhuak leh thut a, min lo en ru reng a ang ka ti tlat mai. Chubakah a incheina mawlh kha, ka hmuh tawh hnu a ang tlat a ni. Ka va hawi phei leh a, alo la ding reng a. A incheina chu ka han enchiang leh a, ka rin ang ngeiin overcoat dum, a khup chen vel a lo ha a, kutkawr dum a bun bawk. Nathana chu ka nghawk zeuh a, "Sir, sawpa saw en ve teh." ka ti a. Nathana paw ava hawi phei ve a, a en vung vung a, "Ehe, amah a nih i ring em?" a ti nghal ringawt a. Keipawh chuan, "Ka hrelo, a motor bula kan din lai atang tawh khan min enreng tawh a, a incheina zawng zawng nen sawn, video ami kha a ang ka ti riau mai." ka lo ti a. Nathana chuan, "Muangchangin va pan ila, form kan ha tho a, a tlanchhe ngam lovang, pistol kan pai dawn tih a hrelawk ngei bawk ang." a ti a. Nathana nen chuan ruah sur hnuaiah chuan kan ve phei leh a, chupa lam chu kan va pan a. KAn va pan hnai telh telh telh a, a nihliap chu a dahhniam telh telh bawk. Chutah a tlan ta thut mai, NAthana pawh dawt a sawi chiang khawp mai, a tlanchhe ngam chiang a ni.

RAng takin kan um nghal a, bazar chhungah te chuan a tlan lut a, nuho chawhmeh zawrh lai te chu a pal baw nawk nawk a, mipui pawh an lo au tuar tuar mai. Hnunglam a hawi chiah khan lukhum parh a khum tih kan hre thei bawk a, video a mi ngei a ni tih chu a chiang ta e. Kan um hrep hnuah chuan a bo daih mai a, ruah sur nasa nen, mipui an tam bawk si nen, kan hlauh ta der mai. A tlanna awm angah chuan kan kal leh a, thingpui dawr pakhat chu Nathana chuan a melh vang vang a, "Hetah hian en chhin phawt teh ang." a ti a. Thingpui dawrah chuan kan han lut a, kan hawikual chiam a, mahse khapa awm ang kha kan hmulo tlat. A bul hnaia dawr hrang hrang ah chuan kan lut kual a, kan hmu der chuang lo. Mahse dawr 7-na ah chuan kan han lut leh chu kil khata mipakhat lo thu, overcoat dum fual tak ha, kutkawr dum bun, chanchinbu chhiar niawm taka chanchinbu hmanga a hmai lo khuh chu kan va hmu ta a. Va tlan nghal ka tum a, mahse Nathana chuan minlo dang vatin, "Nilo Rinawm, hriamhrei pawh a lo pai thei a, va chet nghal ngawt chu a himlo ang." a ti a. Nathana nen chuan restaurant chhungah chuan kan lut a, chupa hmazawn deuhah chuan kan va thu a. Waitress pakhat chu lo kalin, "Ka pu enge in ei duh ang?" a rawn ti a. Nathana chuan, "Thingpui no hnih lo dah phawt la, kan lo ngaihtuah ange." a ti a, chunu pawh chu akal ve leh mai a. Nathana nen chuan chu kan mi um mek chu kan en reng a, chanchinbu chuan a la inhliah reng a.

Nathana chuan zawi te hian, "Rinawm, muangchangin va kal la, i pistol pawh kha phawrh turin inring reng ang che. A hmel va hmuh tum la, mahse fimkhur takin aw...hetah hian ka lo awm anga, keipawh ka lo inring reng ang." a ti a. Tichuan ka va pan hnai ta a, zawimuang chuan ka va kal a, ka thleng tep tawh tih ah chuan kan bula waitor pakhat lo kal mek chu a pet pawp a, tray-a a thingpui sa tak ken mek chu ka banah a rawn baw ta mai a. A sa ka ti lutuk chu ka au vak a, chupa chu a tho thut a, a hmui a hup a, a hmel ka hmu leh hman ta lo. A tlan thut a, a tlan pah chuan a kut lehlamin a hmui a hup a, lehlam chuan dawhkana bottol chu a la lawk a, Nathana a va vawm ta mai a. Nathana chalah tak a fuh a, Nathana pawh a thal tawp mai. Ka ban dawm pah chuan ka va um nghal a, step-a a chhuk lai chu ka hmu hman hram a. Step ah chuan ka zuk chhuk ve ta a, tichuan kan in um leh ta char char mai a. Mahse kan intlan hlat hmam em avang chuan ka hlauh ta nge nge a, chutia beidanwg taka ruahsur hnuaia ka lo hawi kual lai chuan Nathana pawh a rawn thleng ve a. A thaw hluam hluam a, a chal dawm vawng vawng pah chuan, "I hmel i hmu hman em?" a rawn ti a. Phur lo tak chuan, "Hmu hman lo, a tlan hla hman lutuk a." ka lo ti a. Nathana chuan thinrim hmel takin, "Tu phiangsen nge maw a nih le?" a ti vak vak a. Keichuan, "Sir, Kimi fanu kidnap tu chu a ni mailo maw?" ka ti a. Nathana chuan, "Kum tamtak a liam tawh a, a ni nge nilo chu ka ring thiam chiah lo. Mahse tu emaw tak chu a ni ngei ang, min hlau a, a tlanchhiah a, a hmel a tilang duhlo bawk a. Chubakah kan accident-na hmunah khan pangpar a hnutchhiah bawk a, video-a mi ngei a ni tih kan hre bawk." a ti a. Keichuan, "Enge kan tih tak ang?" ka ti a. NAthana chuan, "Bolero kan hmuhna hmunah khan va kal leh phawt teh ang." a ti a. Kan va kal a, rin ang ngeiin Bolero pawh chu a lo awm tawh lo, a number chhinchhiah dawn lah ila number engmah a nei bawk silova, bei a va dawng thin veleh.

*********

Tlaiah chuan DGP chuan Nathana nen a office ah min ko lut a, DGP chuan, "Nathan, Rinawm, in case chhuilai chu zanin hian a tawp anga, zanlai dar 12 ah close a ni ang." a ti a. Nathana chuan inthlahrung tak chuan, "Sir, nikhat chiah min pek belh leh thei angem?" a ti a. Mahse DGP chuan, "KA thu a ni tawh lo, dan a ni a, sawitheih ka neilo." a ti a. Nathana chuan, "Awle Sir." a ti zawih sap a, kan chhuak ta a. Nathana Office ah chuan kan inzui lut a, "Sir, engtin nge kan tih tak ang?" ka ti a, Nathana chuan, "A tawp tawh Rinawm, zanin chiah hun kan nei tawh a, mahse engmah kan ang dawn chuanglo. Zanin hian tih tur pakhat chiah kan nei, chu chu Kimi bula va kal a, he case hi a tawp tawh tih va hrilh a nimai." a ti a, a mood a off hmel kher mai. Keichuan, "Mahse Sir, khapa kha chu chhuizui a ngai ngei ang...a chetdan kha a diklo hrim hrim. A rukin kan chhui anga, kan manchhuak anga, case close tawh pawh nise, kan manchhuah chuan Kimi tan pawh a lawmawm dawn asin." ka ti a. Nathana chuan min rawn en a, "Nilove, duty lai kan ni a, case kan siam chawp thei hleinem. Khapa kha tunge a nih pawh kan hrelo a, chutia lo chhui ve ngawt theihdan kan nei hleinem." a ti tlat mai a. Keichuan, "Mahse Sir, bottol-in a vawm che kha.." ka ti a. Nathana chuan, "Ni e, min vawm a, mahse chhui zui kher a tul tawh lo. Hemi case kaihhnawih a ni a, mahse kan hotuten kan case khawih lai hi a period a zo tawh a, close a ni tawh an ti anih chuan keini chuan an thuzawm mai kan ngai a ni." a ti a, keipawh ka ngawi ta a.

Zan alo ni a, Kimi te inah chuan Nathana nen chuan kan kal ta a, a va phurawm teh chiamlo tak em. Kimi chuan min hmuh veleh chuan, "Officer, inlo kal a nimaw...enteh u, vawiinah Station ah ka lo kal a, mahse inlo awm lova. Video kha ka en ve chak lutuk a, Inspector Amandai kha ka dil a, tichuan min entir ve ta a. A incheidan ka en khan rinhlelh deuh chu ka nei a, mahse ka chiang chiah ngamlo." a lo ti nghal zung zung a, a hmel ah chuan beidawnna leh lungngaihna hlir a awm a, a mit a bui vek bawk. Nathana chuan Kimi chu a en a, "Pi Kim, duhtawk rawh." a ti a. Kimi chuan, "Enga? Enge awmzia?" a lo ti vat a. Nathana chuan inthiamloh hmel tak hian, "A tawp tawh...engkim a tawp tawh." a ti a. Pi Kimi chuan alu a thing a, "Nilo, ala tawp lo. Kum kha leh chen kha Police te ngenin ka fanu robu tu leh thattu hi zawnchhuah ka dil a, mahse min hmuhsak thei lo. Officer, nang chauh hi ka innghahna i ni asin, khawngaihin chutin ti lul suh. Heibak chu chance ka nei tawh lo, khawngaihin?" tiin mittui nen kutsuih meuhvin Nathana chu a dil a. Mahse Nathana chuan, "Ka tihpalh a ni, Pi Kim. Zawng duh tawh suh, Pathian remruat angah ngai la, i fanu chu a thi tawh a, a kidnap tu pawh a thi tawh angah ngai tawp mai rawh. A pawi ka ti khawp mai, statue of limitation peroid azo tawh a, engmah tihtheih kan nei tawh lo." a ti zawi sap a. Kimi chu a mittui a luang zawih zawih a, hnuailam melh chung chuan, "Awle, ka hrethiam e." a ti tham tiak a. Nathana chuan, "Kan kal tawh ange." a ti a, kan chhuahsan ta a.

***********

Kar khat lai a lo liam leh ta a, Nathana off day a ni a, Station ah chuan hma takah ka thleng a. Nathana a awmloh hi chuan duty pawh hi a nuam tak tak theilo, mahse kan duty zel chu a ngai phawt mai si a. Chutia thlamuang taka ka duty lai chuan Constable Siama chu a lo lut a, "Sir, putar pakhatin a hmu duh che a." a rawn ti a, "Lo luh tir rawh." a ka ti a, putar chu a lo lut ta a. A hmel en mai chuan kum 60-65 vel lai a ni tawh ang, tar ve tawh tak a ni. Putar chu ka hmaah chuan a rawn thu a, a hlauhthawn hmel kher mai. Putar chuan, "Officer, min pui rawh. Ka hming chu Vanlaldika a ni a, Luangmuala cheng ka ni. Ka tunu a bo a, rukbo ngei niin ka hria." a rawn ti ta mai a. Keichuan, "Engtin chiah nge a bo? Khawi hmunah?" tiin ka lo zawt nghal a. Pu Dika chuan, "Pawnah ka infiam pui a, kan inkawtah hian infiamna tualzawl zau ve tak hi a awm a. A nu office a kal si a, apa in a boral san tawh bawk si a. Keimah hian ka awm tawp zel a, a hrisel lo si a, ka ngaihtuah takzet a ni. Pawna ka infiampui hlan chuan inchhung lama ka phone ri chu ka hria a, ka luh lawk hlanin a lo bo hman daih a ni." a ti hluam hluam a. Mak ak ti angreng hle mai, "Ka pu, i phone ri chu pawn atangin i hre thei amaw?" ka han ti deuh kher a. Pu Dika chuan, "Aw hre thei a, a infiam lai ka en a, kawngka bulah ka thu reng a, kan kawngka bul chiah hi kan choka a ni a, chaw ei dawhkanah ka phone chu ka dah a, a lo ri a, ka va luh lawk hlan khan mawle, a reilo." a ti a.

Keichuan, "Hahdam rawh ka pu...nihleh lo phone tu che chu tunge ni reng reng?" ka ti a. Pu Dika chuan, "Tunge a nih ka hrelo, number hriatloh a ni a, ka la a, mahse a indah leh daih a. Pawn ka chhuak leh tur chiah chu a rawn ri leh a, ka la leh a, mahse a indah leh daih a. Ka kal leh tur chu a ngaite bawkin a rawn ri leh a, mahse a hma ang thovin a indah lehnghal a. Tichuan ka phone chu ka ak ta a, pawn ka chhuah leh chuan ka tunu chu a lo awm tawh lo a ni." a ti a. Ka man thiam deuh tan ta, "Ka pu, lo call tu che number chu i call list ah a la awm ang tiraw?" ka ti a. Pu Dika chuan, "Aw awm e." a ti a. Keichuan, "Khawimaw ka lo en." ka ti a. Pu Dika phone chu ka han en a, number chu ka ziak thla a. Intercom hmang chuan Liantea ka ko lut a, "Liante, he number hi trace nghal ang che u, a rang lamin. Tichuan Amandai bulah kidnap case a awm tih hrilh la, vawiin atangin hna kan tan nghal ang." ka ti a, Liantea pawh chu a kal ta a. Pu Dika bulah chuan, "Ka pu, lo call tu che hi i tunu kidnap tu chu a ni. A tibuai che a, inchhungah a luh tir che a. I tunu chu a kidnap ta a, i tunu a kidnap lai pawh khan a la call char char che a ni, inchhungah i awm lai khan." ka ti a. Pu Dika chuan mangang tak hian, "Officer, khawngaihin ka tunu chu min chhanchhuah sak rawh u." ati lawm lawm a. Keichuan, "Lungngai suh, in lamah lo va haw la, constable 5 velin an zui haw ang che. Kan hman veleh kan lo kal anga, kidnapper chuan a la rawn be leh em em ang che u." ka ti a. Pu Dika chuan, "ENgvangin maw?" a lo ti hu a. Keichuan, "Pawisa dil tur che u in...chutah chuan kan lo trace anga, kan man vat mai ang. FIR ziak la, in lamah lo va haw rawh." ka ti a, FIR chu a ziak a, a haw ta a.

(TO BE CONTINUE)



Link:
BBcode:
HTML:
Hide post links
Show post links

Dee Gigi
Posts: 85
Joined: May 10th, 2020, 8:15 pm
Location: Lawngtlai bazar

Unread post by Dee Gigi » June 29th, 2020, 2:47 am

Ka duh pa...ka lo chhiar har deuh vngin sorry takzet

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)