NATHAN SEASON-3 (Episode-13) WHO IS THE KIDNAPPER (Pt-2) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-13) WHO IS THE KIDNAPPER (Pt-2) by:Aaron Malsawmdawngzuala

Unread post by Aaron Dustin » June 22nd, 2020, 11:43 pm

NATHAN SEASON-3

Episode - 13

WHO IS THE KIDNAPPER?

(Part-2)

(MONTAGE INSPIRED)

Written by : Aaron Malsawmdawngzuala


***********

Pu Dika tunu hi Zamtei a ni a, kum 6 mi chauh ala ni. Pu Dika min hrilh dan chuan Zamtei pa hi a boral tawh a, a monu, a fapa nupui, Zamtei nu hi Mawitei niin a fanu a bo thu hi ala hre ve hauh lo a ni. Mahse a office bang a lo haw chu chanchin pawh a rawn hre chhunzawm ve nghal a, kan buaipui rei khawp mai. A hriat tirh kha chuan nikhaw hrelovin a awm nghal a, a hnu lawkah a lo harh leh mai a. A mangang em em a, a tap nasa em em bawk. Kei leh Liantea leh Amandai te chu Pu Dika te inah chuan kan va kal ta a, chutia ro ka rel lai chuan Mawitei phone chu a rawn ri ta a. Chhan nghal mai a tum chu ka lo dang vat a, "Lawk aw ka pi, i kidnap tu a ni maithei a. Phone number kha kan lo ziak thla hmasa anga, tichuan kan trace nghal anga, i chhang chauh dawnnia." ka ti a. Tichuan phone number te chu kan ziak thla a, mahse a ring tawp hman hlauh mai. Liantea bulah chuan, "Phone trace tu tur te, expert ho ko vat rawh. An hmanrua engkim nen hetah lo kal rawh se, Pi MAwitei hian phone call dang pawh a dawng leh ngei ang." ka ti a. Liantea pawh chuan expert ho chu a ko ta a, reiloteah an hmanraw chikim nen chuan an lo thleng ve ta nghal a. Minute 10 vel a ral leh meuh chuan Mawtei chuan phone call chu a rawn dawng leh ta, "Tumah tawng suh u, bengchheng engmah lo siam suh ang che u. Mawitei chiah a tawng ang, midang chu lo ngawi thap ang che u." ka ti a. Tichuan Mawitei chuan phone chu a chhang a, "Hello.." a ti nghal vat a. Phone ami chu a rawn tawng chhuak ve ta a, a aw thum zia mai chuh, a hlauhawm lek lek zawk. Chiang fek fawk hian, "Cheng nuai 50 ka mamawh, a nih loh chuan i fanu hi a thi animai." a rawn ti ta chher chher mai a. Mawitei chuan tap chungin, "Pawisa engmah ka neilo ka pu, khawngaihin ka fanu kha chhuah hram rawh, tihsual engmah a nei lo." a ti lawm lawm a. Phone ami chuan, "Pawisa chu min pe la, ifanu hi nungdamin i hmu chauh ang." tiin a rawn vau leh a. Zaizirin pawisa chu a neih thu sawi turin ka lo hrilh a, Mawitei chuan, "Awle, pawisa chu ka lo ngaihtuah ange..mahse ka fanu kha tina suh ang che." a ti a. Kidnapper chuan, "A tha e, mahse tunah khan i bulah police an awm tiraw? Police te khan sawi tur an hrilh zel che tiraw?" a rawn ti leh ta mai a. Mawitei pawh min rawn en a, a mangang hle mai. Ka lu ka lo thing vat a, Mawitei chuan, "Nilo ka pu...keimahin ka awm, police tumah an awmlo." a ti lawm lawm a.

Chutih lai chuan kan expert te pawhin phone number chu an lo trace ve mek bawk a, mahse address chu hmun dang dangah a insawn zel mai bawk si. A tawpah chuan location chu kan hmu ta a, Durtlang Leitan lam daih a ni. Kidnapper chuan, "Dawt min hrilh vaih chuan i fanu hi ka that nghal ang, ka that hreh miahlo ania." a rawn ti khur khur mai a, phone chu a dah ta daih a. Mawitei chu a mangang em em a, a tap zawih zawih reng mai. Expert zinga pakhat chuan, "Sir, location hi ala ngai reng ania, tuna kan kal chuan kan man hman em em ang." a lo ti a. Unit 2 vel hruaiin kei leh Liantea hovin Durtlang lam chu kan pan ta a, Amandai leh midang te erawhin Mawitei leh Pu Dika an lo awmpui thung. Location chu kan thleng ta a, vainu dawr tetak te mai hi alo ni a. Dawr nghaktu bulah chuan, "Ka pi, hei hi i phone number a ni em?" tiin phone number chu ka sawi a. Vainu chuan, "Aw ni e...enge ni ta?" a lo ti mai a. A ngaih a that hmel em em a, kidnapper chu a nih ka ringlo nghal bur. Vainu bulah bawk chuan, "Anih leh he phone atang hian darkar 1 vel liam ta khan hemi number hi i call em?" tiin Mawitei number chu ka hmuh leh a. Vainu chuan, "Aih, call lo...lawk aw, ka call log kan en ange." a ti a. A han en deuh vang vang a, "E..nichina naupangte khan a call a nih dawn hi." a ti ta mai a. Rang zet hian, "Tu naupangte maw?" ka lo ti vat a. Vainu chuan, "Ka dawr nghah laiin hmeichhe naupang pakhat a lo kal a, phone hman min rawn dil a." a ti leh a. Liantea nen chuan kan in en hu mai a, "Kum engzat vel nge?" tiin ka han zawt leh a, vainu chuan, "Kum 6-8 vel lek aniang, ka hman tir a, minute 5 vel bak ahmang lo, min rawn pe lehnghal a." a ti a. Thil awmzia a lang chho tan ta, "Anih leh ka pi, a bulah chuan tu emaw an awm ve em?" tiin ka han zawt leh a. Vainu chuan, "AWm pawh ka hrelo, an in ahnai a niang ka tia, keipawh chuan ka lo hmantir ve mai a.." a ti nuah nuah a. "Anih a phone be lai chu i hmu em?" ka han ti leh a. Vainu chuan, "Hmu lo, dawr hnunglam deuh ah sawn a phei a, tichuan a va bia a nih ka ring." a ti a. Liantea chuan, "Ka pi, naupang chu hei hi a ni em?" tih pah chuan Zamtei thlalak chu a hmuh a. Vainu chuan a han en vang vang a, "Aw..henu hi a nih chiah hi..enge awmzia ka pu?" a ti a, mak a tih ve hmel kher mai. Liantea chuan, "Khawilam ah nge a kal?" tiin a zawt a, vainu chuan, "Ka lo en miah lova, ka buai angreng si a." a ti a. Ava buaithlak thin tak em, "Kan lawm e." tih pah chuan Pu Dika te in lamah kan let leh ta tawp a.

***********

In kan thlen chuan Mawitei chuan tap chungin, "Officer, khawnge ka fanu chu..mawhh..khawnge?" a lo ti nghal chiam chiam a, chhan dan tur a vang kher mai. Amandai chuan a lo buaipui vat a, "Ka pi, lungngai suh...i fanu chu i hmulet leh em em ang." ka ti a. Special force thenkhat te chuan an zawng char char tho a, kei erawh case chhuitu ber ka nih avang chuan Mawitei phone call dawn hun chu ka lo chan ve reng angai bawk si a ni. Tlai lam a lo ni leh ta der mai, Mawitei phone chu a rawn ri leh ta. MAwitei chuan rang takin a la a, "Hello, hello...bawihi, ka fanu.." a ti nghal chiam chiam a. Keini pawh chuan headphone vuah nghalin kan lo ngaithla leh nghal thap mai a. Kidnapper chuan, "DAwt min hrilh a, min bum ve ngam amaw?" a rawn ti ta khur khur mai a, a aw te chu mihring aw pawh a ang lo, ramhuai aw niawm tak a ni. Mawitei chuan, "Nilo nilo, ka pu...keimahin ka awm, police ka awmpuilo." tiin a tap lehnghal vak vak a. Kidnapper chuan ring zet hian, "A tawk e, pawisa pawh chu theihnghilh hmak rawh. Min bum a, min mantir te i tum vel amaw? Ka tih ngamloh i ring animaw? Lo ngai reng rawh..tun atanga minute 2 velah bawlhhlawh phur motor a lo kal anga, i fanu ruang chu an lo phur tel nghal ang." a ti ta mai a. Mawitei chuan, "Nilo..nilo, khawngaihin ti suh.." tiin a au vak vak a, mahse kidnapper chuan phone chu a dah ta daih mai. MAwitei tap nasa lutuk chu kan buaipui luih luih a, chutih lai chuan khua a thim tan tawh. Tukverh bula ding kan constable pakhat chuan, "Eheee..Sir, khu bawlhhlawh phur motor chu a lo kal tak tak ania." a rawn ti thut mai a. Chuveleh rang em em hian MAwitei chu a tlanchhuak nghal a, tuman kan dang hmanlo. Rangtakin keini pawh chuan kan umchhuak nghal a, pawn kan va chhuah meuh chuan kawngpui a lo thleng der tawh. Bawlhhlawh phur truck hma takah chuan a lo ding a, a ban a lo phar a. Karei, truck chuan a su teuh kher mai, ka lo maimitchhing tawp. Truck chu a ding a, drver chuan, "I mawl em ni a?" tiin a lo vin tuar a. Mawitei chuan a chhang lo, truck hnungah chuan a lawn a, bawhhlawh chu a hai ta nghek nghek mai a. Truck driver chu a rawn chhuk a, thinrim hmel tak hian, "Hey..lo chhuk teh, i a em ni?" a ti vak vak a. Driver chu Liantea chuan a lo dang vat a, thil awmzia te leh police kan nih thute chu a hrilh a. Kei rawh truck hnungah chuan ka lawn ve nghal a. MAwitei chu min hnungchhawn zawng chuan a lo thingthi a, a tap zawih zawih mai. Muangchang chuan a rawn hawilet a, a fanu thlalak, a bo nia a kawr hak ngei mai lo ha a, bang bula a dinna thlalak chu alo pawm a. Thlalak chu ka lasak a, truck atang chuan kan chhuk a.

Mawitei chu inchhungah chuan kan luhpui leh ta a, a mangang tawh kher mai. Pu Dika pawh awm ngaihna a hre tawh lo, a veikual sek mai a. Pu Dika phone chu a rawn ri ve thung a, rang takin a la a. Kidnapper aw tho kha a ni, "I tunu hi i hmangaih tak tak anih chuan ka thusawi hi awih ula, police te kha inrawlh tir tawh suh ang che u. Tun ami kha chu entirna chauh ala nih kha, engpawh ka ti thei. A lehpekah chuan a thlalak chauh nilovin a taksa bung hrang hrang ka rawn thawn tel tawh ang, chu chu hre rawh u." a rawn ti leh ta chher chher mai. Pu Dika chuan thinrim tak hian, "Ka fanu chu i kawl ngei em ni? Nge min vau kual mai mai zawk? Tunge i nih a?" a ti hrep mai a. Phone atang chuan hmeichhe naupang aw tih hriat tak mai hian, "APU.." a rawn ti ta mai a. Pu Dika chu a mengphawk kher mai, "Bawihi bawihi, Zamte.." a ti nghal chel chul mai a. Mawitei'n a fanu aw a hriat meuh chuan Pu Dika phone chu ava laksak nghal a, "Bawihi...ka fanu..i tha em?" a ti chiam chiam mai a. Kidnapper zawk chu lo tawng lehin, "I fanu chu a him e, mahse a him rei hauh lovang. Min bum avangin cheng nuai 10 nilovin nuai 15 zawk ni rawh se. Ni 5 chiah hun innei e, in tlai palh hlauh ange." a ti a, a dah ta a. MAwitei chuan, "Nilo..ka fanu.." tiin a au vak vak a, a tap nasa kher mai. Tihngaihna a vang ta hle mai, bawlhhlawh phur motor driver te pawh chu kan han be viau tak na a engmah thuthar hriatbelh tur a awm chuang lo. Expert te ho pawhin location chu an hmu ngei a, mahse kidnapper hian phone a dah apiangin signal a bo nghal daih zel a. Number hrang hrangin hemi zanah pawh hian vawitam a rawn vau a, mahse Zamtei aw erawh hriattur a awm tawh lo thung. Tihngaihna ka hre thlawt bik si lova, theih ang tawk chuan kan chhui zui ve zel chu ania. Naktuk khua lo var se, Nathana pawh a lo tel ve tawh anga, kan zia deuh tawh turah ka ngai ta tawp mai a ni. A tello hi chuan kei hi chu ka tuilo mai nilovin ka buai der zel mai a, Nathana kutah dah leh tawp mai teh ang.

**********

A tuk khua alo var a, Nathana pawh a lo kal ta ngei a. Kan case neihlai mek te chu ka han hrilh a, DGP pawh chuan min pui turin Nathana chu a hrilh nghal bawk a. Nathana chu engkim kan hrilh ta vek a, a ngawi vang vang a. A office ah min ko lut nghal a, "Rinawm, a inang...same case, Pi Kimi fanu Rinrini thattu leh kidnap tu tho kha a ni." a ti ta mai a. Keichuan, "Mahse..engtin nge i hriat?" ka lo ti a. Nathana chuan, "A method pawh a in ang vek, Kimi pawh kha pawisa a dil thin a, police te inrawlh lo turin a vau lawk fo thin bawk. Ka rindan chuan he case hi kan chhuichhuak anih hlauh chuan Pu Dika tunu kidnaptu kan man mai nilovin, Kimi fanu kidnap a, rawng taka thattu pawh kan man tel nghal dawn tihna a ni." a ti a. A phurawm dawn riau hian ka hre tlat pek nia, achhan chu kha scorpio neitu, kut min thlak ve khanglangtu leh ka ban ti kangtu kha ka khawih chak em a ni. Nathana bulah chuan, "Sir, engtin nge hma kan lak tan ang?" ka ti a, Nathana chu a ngawi vang vang a, "Umm..kidnapper phone call chu kan chang leh phawt ang. Pawisa kan lo dahna hmun tur te, a lo lakdan tur te nen kan hriat vek phawt angai. Hmun tinah kan duty anga, tuman form kan ha lo anga, civil dress vek kan ha ang." a ti a. "Anih chuan a phone call kan nghah dawn chuan Pu Dika te in lam bawk kan pan leh angai dawn nimaw? Nge ni a, Station ah hian kan ko zawk dawn?" ka lo ti a. Nathana chuan, "Nizan khan bawlhhlawh phur truck alo tlan tur thu a sawi a, minute 2 hnu velah a ti bawk a. A awmzia chu kidnapper hi khatih lai khan in bul hnaiah a awm reng a ni...in chezia te, Mawitei'n bawlhhlawh a hai lai te kha a hmu vek a ni. A chhan chu engkim kha arawn hre chat chat thei tlat a, in awmdan zawng zawng kha a hmu thei vek a ni." a ti a. Keilah chuan, "Ka lo zawng kual lova awwww.." ka han ti vawng vawng a. Nathana chuan, "Apawilo daih zawk Rinawm, plan engkim a neisa anga, a biru leh hman vek tho dawn." a ti a. "Anih chuan tun atangin tan nghal ila, Pu Dika te chu ka ko nghal dawn em ni?" ka lo ti a. Nathana chuan, "Awle, an pafa in lo kal nghal rawh se." a ti a. Pu Dika nupui hi a thi tawh a, sawi tak ang khan a fapa, Mawitei pasal pawh hi a thi tawh kan tih kha. An chhungkua hi pathum chiah an ni a, Pu Dika leh a monu Mawitei leh Mawitei fanu Zamtei te chauh hi an ni ta a nih chu. Tunah erawh Zamtei chu rukbo mek a ni si a, pahnih chauh an ni ta a ni.
Mawitei chu Station lamah chuan kan ko phei ta a, Pu Dika erawh chhungkaw chawmtu ber a ni bawk si a, peihlo chung chung leh phurlo tak chunga Office a kal miau angai si a, alo tel ve thei talo a ni. Station ah chuan kan expert te nen chuan kan thu khawm a, Mawitei phone call chu kan chang leh ta thap mai. Chawhma chhung zawng chu a reh vang vang a, a tawp atawpah chuan a rawn call ta hlauh mai. Kan reh leh ta thiap mai a, keini pawh chuan headphone vuahin kan lo chang leh ta thap mai. Kidnapper chu a rawn tawng chhuak ta, "PAwisa chu i lo inring tawh em?" a raw ti a, Mawitei chuan Nathana a en a, Nathana chuan a lu a lo bu nghauh mai a. Mawitei chuan, "Aw, ka nei tawh e." alo ti a. Kidnapper chuan, "A tha e, vawiin tlai dar 4 hian ***** Bus Station ah ramdanga zin ho an rawn haw dawn a, chutah chuan pawisa chu bus stand panga na bula bang hring(green) bulah khan suitcase-in lo dah ula, ka rawn lam mai ang." a ti ta a, a va fuh dawn cher cher tak em. Tlai dar 4 a rik dawn meuh chuan duty turin civil dress ha in kan inring thap tawh mai a, kan awmna hmun tur theuh ah kan awm vek tawh. Bluetooth earphone vuahin inbiak reng ringin kan phone te chu kan connect ve bawk a, kidnapper chu tlanchhuah tir kan tum tawh lo bur hi a ni tawp. Dar 4 a ri a, bus pawh chu a lo thleng ta diah diah hlawm a. Hmun tinah a ruk thei ang berin camera kan vuah ru bawk a, Station lamah cyber crime expert hovin control room ah an lo check vek bawk. Secret Operation anih angin chuti lai hmunah chuan mission pawimawh tak kan nei mek ani tih pawh chu mipui lo awm ve te chuan an hre hauh lova, hriattir pawh kan tum hek lo. Pawisa awmna chu kan enreng a, a thukru thei ang berin bustand bula bang phenah kan dah a ni. Chuta zin haw ho te chu a tam zawk chu BSF vai sipai ho an ni a, anmahni pawh an hriathran hlawm kher mai, truck kekawr pawl, avara stripe leh jacket dum an ha vek a ni.Mahse rin loh tak maiin BSF vai ho lo haw te chu an tam ta phian mai a, 100 an chuang fe ta mai. An inkal pel suau hlawm mai a, a buaithlak ber pakhat chu mask an vuah fur hlawm mai kha a ni. An in ang hlawm si a, BSF sipai anga inchei ve pakhatin pawisa kan dah chu lo la tase, midang vei sup sup ho hian lo hliah si ta se, kan man hmanlo ang tih leh kan hmu hman lovang tih chu kan thil hlauh ber a ni.

Pawisa erawh ala him reng thu chu Station lama Control room duty te hnen atangin kan hria a, duty thenkhat te pawhin an la hmu thei reng bawk a. Mahse vawi lehkhatah kan pawisa dahthatna lam pan chuan BSF sipai te chu an kal khawm sup sup a, kan hlauh ang ngei ngeiin camera pawh an hliah ta. An han kalsawn leh deuh hnu chuan Control room zinga mi pakhat chuan, "Sir, pawisa a bo....la tu an awm." a rawn ti ta mai a, thnekhat an lah chu tawng hriat hleihtheihloh khawpin an rak teng tung mai a. Control room duty zinga mi pakhat chuan, "BSF sipai te zinga mi kha an ni chiang lutuk." a rawn ti ve chel chul bawk. Kan hmu hmanlo ta nge nge a, "Hrep taka.." ka ti vak a. Chuveleh Nathana chuan min rawn tlan pel fua a, "Rinawma lo tlan rawh, ka hmu hman." a ti vak a, ka zui ve ta nghal a. Kawngpui lam pan chuan Nathana chu a tlan a, BSF sipai te thmawhnaw hak ang ha, mipakhat stepa hmanhmawh taka a chhuk mek chu ka hmu hman. Nathana chuan a um nghal a, ka tlan ve ta nghal vat a. Kawnga mipui lo awm thenkhat te phei chu an rak nghal chel chul hlawm mai a, police dangte pawh chuan min rawn zui nghal a. Mi inthlang, huan lam pan te chuan kan mi umpa chu a tlan chhe zel a, kan pawisa dahna suitcase pawh chu a khai reng a. VEng pakhat ah kan um lut leh a, an veng field niawmtak lam pan chuan a tlan phei leh a. Field chhungah chuan kan in um leh ta, bang sang tak, ft 15 vel dawn laia bang inhung hi a awm a, chumi lam pan chuan a tlan zel a. A suitcase ken lai chu chumi bang sangtak khum chuan a vawm liam a, amah pawh a ding tawp. Nathana chuan ava bawhthlu nghal a, pistol phawrhin a tin nghal a. Keipawh chu ka va thleng ve vat a, Nathana chuan a lo bawh ran tawh mai. A mask kan han phelh chiah chu rinloh lam daih a ni. Zamtei pu, amah Pu Dika ngei chu a lo ni a, ava mak ngai em. Mak ka tih ber erawh chu kan mi um mek kha Pu Dika a nih mai bakah, kum 70 dawn kai ve tawh si, khati em em a ala tlan thei kha a ni, ka awih theilo hial zawk. Pu Dika chu Nathana chuan a tham tho a, "Pu Dik, nangmah maw?" a ti a. Pu Dika chuan a ban a phar a, "Ka insawifiah thei.." a ti nghal chiam chiam a. Nathana chuan, "Nilove, hetah nilo, Station lamah aw.." a ti a, Station lamah chuan kan hruai phei ta a.

**********

Interrogation room ah chuan Nathana nen chuan Pu Dika chu kan thutchilh a, rilru nat hmel tak hian a thu kun reng mai. Nathana chuan, "Pu Dik, enge awmzia han sawi teh le?" a ti a. Pu Dika chu muangchang chuan a rawn hawi chhuak a, "Ni e, pawisa la tu kha keimah ka ni. Mahse hetia ka tih hian chhan a nei a ni, Officer. Ka duh vang renga ti ka nilo, min vau nasa em a, ka tunu thah ah min vau a, ka tilo theilo a ni." a ti a. Nathana chuan, "Tuin? Tuin nge tih tih che?" tiin a zawt a. Pu Dika chuan, "Tudang vak nge ni anga? Ka tunu kidnap tupa kha mawle." a ti a. Nathana chuan, "Engtin nge a vau che...engkim han sawi teh." a ti a. Pu Dika chuan a sawi ta a, "Nizan khan min rawn phone a, naktuk zing dar 9 ah inhmu turin min sawm a. Police ka hruai emaw, midang ka hrilh anih vaih chuan ka tunu Zamtei chu thah ah min vau bawk a. Tichuan ka tunu tan tiin tumah ka hrilh lo che u a, a hmun min hrilh ah chuan ka va kal ta a ni. Dar 9 velah chuan ka va thleng a, MAwitein min rinhleh loh nan tiin Office kal tur angin ka insawi a. Ramhnuai tak mai niin hmun reh tak a ni a, kudam lian tak mai erawh a awm thung. Tichuan msg min rawn thawn a, kudam ah khan lut rawh tih hi min rawn thawn a. Kudam ah chuan ka lut a, a thim em em mai lehnghal. Ka phone lah motora dah turin min ti si a, light eng engmah kan neilo. Thim zing atang chuan ka tunu Zamtei aw ngei maiin, APU.. a rawn ti ri chu ka hre thei a. Ka lighter chu ka hmet alh a, tichuan thim zingah chuan ka va kal ta a. Mahse ka thil hmuh chu ka beiseiloh tak a ni a, phone pakhat hi alo awm a, chu phone ah chuan ka tunu aw(voice) in record sa chu a lo in play mai mai hi a lo ni a. Ka thinrim lutuk chuan phone chu ka peih chhe vek a, chu veleh eng lo luhna awmchhun, kudam kawngka chu a rawn in khar ta thut mai. Chet ka la hman silova, ka awmna kudam chhung chu a thim vek mai. Kawngka lam pan tur pawhin engmah ka hmu thei silova, tichuan tihngaihna dang a awm tak silovah chuan chu kudam chhuat ah chuan ka mu ta ringawt mai a ni. Minute !0 dawn velah chuan kudam chu a rawn inhawng leh a, rang takin ka chhuak nghal a. Mahse tumah ka hmu hman ta chuanglo, motor lamah chuan ka phei leh ta ringawt a. Motor ah chuan ka lut a, seat ah chuan paper hi alo awm a. Paper chu ka chhiar a, Bus station a kal tura min tih thu leh, pawisa la tur te, ***Veng Field-a kal tur te, bang sang tak khuma suitcase chu vawm phei tur te in min hrilh vek a. Tichuan seat hnung lamah chuan BSF form hak chu alo awm bawk a. PAwisa lak hun te, chet hun tur te pawh min hrilh vek a ni." tiin a sawi ta a.

Nathana chu a ngawi vang vang a, "Nihleh paper chu khawnge? Dwat i sawi nge sawilo tihte pawh kan hre ve duh alawm.." a ti a. Pu Dika chuan, "Ka paih deih alawm." ati a. Nathana chuan, "I thusawi te hi dawt a ni nge nilo, thudik a ni nge nilo kan chiang ngam hleinem, evidence a awm hleinem." a ti a. Pu Dika chuan rilru hah hmel tak hian, "Nilo, Officer...thudik alawm ka sawi. Ka tunu chu keiman ka kidnap in ring reng reng em ni?" a ti vak vak mai a. Nathana chu a ngawi vang vang a, "Anih leh pawisa kha.." a tih lai chuan constable pakhat hi a lo lut a, "Sir, Field-a bang lehlam kha kan en a, suitcase kha a awm tawhlo. Tuemawni in a la a ni ngei ang, mi pakhat thil tih a nilo tih chu a chiang mai." a rawn ti a. Nathana chuan, "Pu Dik...tunge? Tunge tih tirtu che hi?" tiin chiang fek fawk chuan a han zawt leh a. Pu Dika chuan, "Ka hrelo...tunge a nih tih ka hrelo. In duh chuan ka phone pawh check ula, msg te pawh ala awm vek ang." a ti a. Nathana chuan Pu Dika phone chu a han check a, inbox chu a chek a. Phone chu min rawn pek pahin, "Hemi number hi ziak thla la, trace tir nghal ang che." a ti a, keipawh chuan ziakthla in cyber crime department lamah chuan ka thawn nghal a. Pu Dika chu kan chhuahsan ta phawt a, DGP chu lo thlengin a office ah min ko lut dn nghal a. DGP chuan, "NAthan...Rinawm..enge thil awmzia hi? Kidnapper in chhui mek amaw tia, tinge interrogation room ah sawn victim pu ber a awm si?" a ti vak vak a. Nathana chuan, "Sir, englo ania...bus stand atang khan pawisa kha ala a, ka hmu hmana.." a tih lai chuan DGP chuan, "Ka hria, mahse hei hi min hrilh teh. Kidnapper changin in duty a, unit 2 lai i hruai bawk a. Mahse tinge kidnapper nilova Pu Dika zawk saw hetah kan kawl? Pu Dika chu kidnapper pawh chu lo nise, pawisa cheng nuai 15 kha tinge a bo tel?" tiin a ang bawrh bawrh mai a. Nathana chuan, "Sir, min hrethiam rawh...engkim ka chingfel vek ang." a ti a. DGP chuan, "Kidnapper diktak hi in chhuichhuak thei dawnlo a nih chuan Pu Dika sawn jail bang chu a zut dawn hrim hrim, in hnuchhui lai hi in chhunzawm chhung pawhin jail ah kan dah angai...criminal puitu a ni tlat." a ti a. Nathana chuan, "Awle, Sir." a ti a, tichuan kan chhuak ta a.

*********

Zan alo ni leh ta a, muttui ava har thin tak em. Rilruah kha kidnapper kha tunge a nih ang tih ringawt chu a awm a, thildangin ka rilru a la peng thei hlawl lo. Dar 10 a rik dawn tepah chuan phone call ka dawng a, NAthana a lo ni...

"Rinawm, i mu tawh em?"

"Mu tep, enge ni ta, Sir?"

"Kalna tur kan nei.."

"Ehe..khawiah maw? Thil hriatchhuah thar i nei em ni?"

"Phone-ah chuan ka sawi thei mai lo, inhmu phawt ang."

"Awle kan insiam nghal ange."

"E chuan maw Rinawm, kidnapper khan Zamtei a rawn tawngtirna, Pu Dika a rawn biakna kha, khami record kha i kawl tha tiraw?"

"Aw..ka phone ah audio in avaiin kidnapper leh Mawitei inbiakna zawng zawng nen ka la kawl vek."

"A tha e, ka mamawh dawn ania..kan inkawtah ka lo nghak ang che."

"Awle."

Ka tho a, ka insiam nghal vat a. Ka bike chu la chhuakin Nathana te inlam chu ka pan ta nghal a, ka tlanchak bawk aniang, reilote ah ka thleng nghal mai a. Nathana chuan min rawn pan nghal a, "Enteh Rinawm, ka ngaihtuah a....vawiin lama kidnapper te leh Pu DIka te pafa te an inbiakna zawng zawng ka ngaihthlak khan thil diklo a awm tlat." a lo ti a. Keichuan mak ti tak hian, "Enge diklo awm a?" ka lo ti a. Nathana chuan, "Kidnapper aw kha...aw pangngai a nilo." a ti a. Keichuan, "Enge awmzia? Ni e, a aw kha chu a thum chu ka ti...mahse aw thum chi hrim hrim pawh a lo ni thei a.." ka han ti hram a. Nathana chuan, "Aih anilo...ka rindan chuan voice changer a hmang a ni ngei ang. Kimi khan min hrilh thin a, kidnapperin a rawn phone khan kidnapper aw kha a thum lutuk, mipa pangngai aw pawh a nilo a ti thin a. Ahmaa ka lo sawi tak ang hian Zamtei kidnap tu hi angai tho, Rinrini kidnap-tu tho kha a ni ka tih tawh kha. Voice changer a hmang ani ngei ang, a aw kan hriat chian theihloh nan.." a ti a. Keipawh chuan ka pawmpui thlap, "Anih chuan tunah khawnge kan kal dawn?" ka ti leh a. Nathana chuan, "Tetea, ka thianpa, cyber crime expert kha...voice audio kha apangngaiin a dah thei ang ka ring." a ti a. Tichuan ka bike chuan Tetea te in lam pan chuan kan kal a, Nathana pawhin a lo phone lawk vek tawh hi alo ni a. Tetea hnathawhna roomah chuan kan lut a, Nathana chuan chanchin te chu a han hrilh a. Tetea computer ah chuan Kidnapper voice chu kan han dah lut a, Tetea chuan a thiamna hmang chuan a han thai kual vel a. Reife kan beih hnuah chuan Tetea chuan, "A pitch hi ka tisang a, mahse a aw hi a per tulh tulh ringawt a, awmzia a awmlo. Mahse a aw hi voice changer chu a ang ka ti, mahse kan try leh ange." tih pah chuan a play zel a. Zamtei'n, "APU.." a rawn ti chuai raih lai chu a play a, NAthana chu a rawn meng hrawk a, "Lawk...play tha leh teh." a ti a. Tetea chuan a play tha leh a, Nathana chuan a ngaithla uluk hle mai. A han maimitchhing vang vang a, "Tiring deuh lawk.." a han ti leh . VAwi 20 chuang zet Zamteiin, "APU.." a tih ringawt chu a ngaihthla char char a. Atawpah chuan a han pause ve ta a, "Tete...naupangin a pu a koh hma hian tawng ri sep a awm." a ti a. Tetea chuan Zamtei voice rawn rik hma chiaha sound chu a han check a, phawk hru hian computer chu hnai setsawtah a en a, "Eheee...Nathan, i sawi dik a. Naupang aw a rik hma chiah ah hian hei...wavelength tereuhte ka hmu." tih pah chuan computer screen chu a kawk a. Nathana chuan, "Khami wavelength kha i ti ring bik thei angem?" a ti a. Tetea chuan, "Tehreng e.." tih pah chuan ahan tiring a, voice changer a tel ta hauh lo mai.

Chu aw chu achianglo mai pawh nilovin tawng ri pawh a ang lo, phun sap ri hi a ang ber zawk. Mahse chiang tak chuan a hriat thei a, recorder pangngai ah chuan a zawih em avangin kan lo hre phalo zawk a ni. Kan han ngaihthlak chian chuan a aw chu a thum hauh lo, aw nem tak leh aw chhang lek lek aw zawk a ni. Nathana chuan, "Tete...hemi voice hi chiang deuhin i siam thei angem?" a ti a. Tetea chuan, "Thei maithei, ka lo try ang. Mahse darkar fee angai dawn a, hun a duh rei ang. Processing chhung hi a rei dawn a, in nghah peih ka ringlo." a ti a. Nathana chuan, "Peih tehreng e...ti vat rawh." a lo ti nghal vat a. Tetea chuan tlaivar thakin a khawi ta a, kei leh Nathana erawh sofa ah chuan kan lo muhil zuai aniang chu. Ka harh leh chuan khua a lo var tawh a, Tetea chuan min rawn kaitho dun a. Tetea chuan, "Ka zo e, a awm pawh a chiang tawh khawp mai." a ti a. Nathana chuan, "Han play nghal vat teh." a lo ti a. Tetea chuan a play a, Zamtei tawnghma a rawn tawngchhuak chu a aw pawh a chiang ta ngang mai. A thil sawi chu hei hi ani, "APU tirawh.." tih a ni. Kidnapperin, "APU tirawh.." tia a phun sap zawh veleh chuan Zamtei chuan, "APU.." tiin a rawn zawm nghal zat mai. Kan hriat chian em em bawk chu kidnapper chu mipa nilovin hmeichhia a ni a, voice changer chu a lo hmang ngei e. Tetea chuan, "A voice changer hman hi a duplicate ve deuh chi a ni ngei ang, microphone tereuhte a awm a. Tichuan hmeh tur a awm a, hmehtur a hmeh pah khan microphone hnaih a a tawng a nih chuan a aw chu a lo danglam dawn tihna a ni. Tin sound-box tereuhte a chhawm bawk a, soundbox hnaiah chuan phone chu adah anga, tichuan a aw chu mipa ang maiin alo danglam dawn tihna a ni." a ti a. Chu kidnapper chu hmeichhia daih alo ni mai si a, tutak ni ang maw tiin ka inzawt nauh nauh a. NAthana chuan vawi 10 dawn lai chu kidnapper aw chu a ngaithla a, "Ani theilo." a ti vak a. A phone a phawr a, number a hmet mual mual a, "Hello, keimah DCP NAthan...enge i tih thin? Ka lo be mai mai che...awle." tiin phone chu a dah lehnghal mai a. Tetea bulah chuan, "Kan lawm e aw...kan kal ange." a ti a, Tetea chu kan chhuahsan lehnghal a. Nathana chuan, "Kan inah kal ang, motor lakchhuah vat ka ngai." a ti a. Ka hrethiamlo hlemai, "Enge awmzia Sir?" ka lo ti a. Nathana chuan, "Kal phawt ang." a ti a.

An in chu kan thleng a, zing dar 6 a pel tawh a. Motor chu a la chhuak a, an in bulah chuan ka bike pawh chu ka dah ta ringawt a. Motora kan chuan pah chuan Nathana chuan, "Rinawm, thil mak tak a ni." a ti ringawt a. Keichuan, "Engchu maw?" ka lo ti hu mai a. Nathana chuan, "Kan thleng tep, i hrethiam mai ang." a ti leh ringawt a, engmah ka zawt buai peih tawh lo. NAthana sawi ang ngeiin mak ka ti ngei mai, kan kalna in chu ka beiseiloh tak a ni. Kimi, kum 10 chuang kal ta a a fanu Rinrini'n a kalsan tak, Kimi in ngei mai a a ni. Nathana chuan kawngka a kik a, Kimi chuan a rawn hawng a. Kimi chuan min hmuh chuan mak a tih hmel kher mai, "Ehe...Officer, nangni maw?" a ti a. Nathana chuan, "Kan lo lut thei angem?" a ti a, Kimi pawh chuan a remti a, kan lut ta a. Nathana chuan Kimi chu rum zet hian a han melh a, "ENgvanga ti nge i nih?" a ti ringawt a. Kimi chuan, "Eng..engmaw?" alo ti a. NAthana chuan, "Hrelo der suh...engkim ka hre vek." a ti a. Kimi pawh chu a inzep buai peih ta vello aniang, "Umm..atha e. Enge i hriat chu han sawi ve reng reng ta che." a ti ve deuh ngat a. Nathana chuan, "Voice changer i hmang char char a, mahse i tisual a ni. I hmanloh laia i lo phun sap kha keichuan ka hre thei a, i voice pangngai zawk chu kan hrechiang theih hlauh a. I aw hi ka hrechiang ani, Kimi...i aw analh a, a tham tiak a, aw ngaihnobei tak a ni bawk. Kidnapper aw kha i aw a ni tih ka hriat khan awih har ka ti a, mahse i aw ang nei hi ka la hrelo. Ka rawn call ngat che a, i aw ka hre leh a, zep rual anilo. Pu Dika tunu, Zamtei...i kidnap a ni. Chubakah thlalak, Zamtei thlalak, bawlhhlawh phur motora ilo dah kha..khata Zamtei awmna pawh kha, i inchhung hi a ang ka lo ti reng a ni." a ti ta siah siah mai a. Kimi chu a nui sak a, "Ka ring reng ani, nang hian min rawnchhuichhuah hi ka ring reng a ni. Mi fing tak i ni a, ka ring che a, accident-na hmun, ka fanu thihna hmun ngeiah pawh khan mit ngeiin nang hian i hmuh ve nghe nghe kha. Mahse ka mi rin em em, Police Officer, detective tamtak ai pawha fing zawk anga an sawi DCP Nathan Malsawkima hian a beidawn thu min hrilh a, kum 10 aliam tawh hnu pawhin min chhuichhuah sak turin ka ngen lawm lawm a. MAhse duhtawk turin min hrilh a, case chu a tawp tawh tiin min hrilh si anih kha. Engtin nge ka tih chuan ang? MAwhhh...min hrilh rawh." a ti vak vak mai a.

Nathana chuan, "Enge i sawi awmzia?" a lo ti a, keipawhin a sawitum ber ka la man lo. Kimi chuan, "Ngaithla rawh, ka fanu Rinrini kidnap tu leh thattu kha tudang nilovin Pu Dika ngei saw a ni." a ti ta mai a. Nathana chuan, "Engmaw? Engmaw i sawi?" a ti vak vak a, keipawh ka hrilhhai kher mai. Kimi chuan, "Ni e, kha restaurant...chanchinbua a hmai a khuh tlatna kha.. khami restaurant ah khan ka kal leh a. Tichuan kha overcoat ha pa khan a nihliap alo theinghilh a, tichuan nihliap chu ka va lam ta ani. Nihliap company ka en a, an phone number an lo ziak hlauh a. Tichuan a lei ni te, a dawr awmna te nen a receipt pawh alo la inzep teh vek a ni. Tichuan dawrah chuan ka va kal a, an reception kha pawisa lo duh ve tak mai hi alo ni a, ka thlem a, tichuan pawisa hlawh in an customre register ka en ta nghal a. Nihliap a leini khan an dawrah hian mi pakhat chiahin he nihliap hi a lei a, chu chu tudang nilovin Pu Dika ngei hi a ni. Tichuan a hnuah pawh Pu Dika hi scorpio dum a rawn khalh thin a, a hnungah chuan sava lem logo pawh kha a awm ngei bawk. Amah hi ka fanu thattu leh kidnaptu kha ani tih ka chiang a, phuba ka la ve ta a ni. MAhse tualthah ve em chu ka ngam ngang silova, chuvang chuan a tunu Zamtei hi ka kidnap ve ta mai a ni e. Pu Dika khan kum 10 kal taa ka fanu kher a kidnap nachhan kha ka hrelo, mahse min kidnap sak mai nilovin min thahsak bawk a, ka pawisa cheng nuai 15 lai mai min laksak tel bawk. Enge ka tih vaka i rin a, mawhhh? Ka ngawi reng dawn em ni?" a ti ta vak vak mai a. Nathana pawh chuan Kimi chu a en ngawih ngawih reng ringawt mai a. Minute 1 vel kan ngawih thap hnuah chuan Nathana chuan, "Khawnge a awm? Khawnge Zamtei chu a awm?" a ti a. Kimi chuan, "Room ah, a muhil." a lo ti hmuk a. Nathana chuan, "Ka rawn hruai dawn..min dan tum hlek suh." a ti a. Room kawngkhar bulah chuan Kimi chu ava ding nghal a, thinrim hmel tak hian, "Aih, ka phallo, a teuhlo. Ka fanu a ni tawh...amah pawhin min nel lutuk, nufa kan ni tawh." a ti tlat mai a. Nathana chuan, "I inzep rei thei dawn chuanglo, Kimi...jail-a tan i duh em ni? Naupang kha min pe la, abak chu engkim ka buaipui ang. I kawl a ni tih an hre dawn tho tho, he Mizoram zimteah hian an hriatchhuah loh che i ring em ni?" a ti a. Kimi chuan, "Pawisa ka nei alawm, a cash-in, nuai 15...ka chawm anga, ka enkawl seilian ang. A tul anih chuan ramdangah pawh ka pem pui daih mai ang, kha pawisa pawh kha...field chhunga bang lehlama a rawn vawm phei pawh khan, bang lehlamah khan ka lo awmsa reng alawm." a ti a. Nathana chuan min rawn en a, "Rinawm, khawngaih takin pawnah minlo va nghak ta che." a ti a, keipawh chuan pawnah chuan ka nghak ve ta mai a.

Minute 10 dawn vel hnuah chuan Nathana chu a rawn chhuak a, Zamtei chu a rawn paw chhuak a. Motorah chuan kan lut a, Zamtei chu a seat hnungah chuan kan muttir a, mahse Station ah kal lovin Central Jail lam kan pan ta daih mai. Nathana chu ka han en vung vung a, "Sir, enge kan tih dawn?" ka ti a. Nathana chuan, "Kum 10 kalta a Kimi fanu Rinrini kidnpa a, thattu Pu Dika ka hmu dawn." a ti a. Keichuan, "Anih chuan Kimi khan dawt a sawilo tihna em ni?" ka lo ti a. Nathana chuan, "Aw..Kimi khan thudik a sawi a ni." a ti a. Prison Dining Hall ah chuan Pu Dika chu kan thutchilh a, hall chhung chu a ruak huai mai a, keimahni pathum tih loh chu tumah an awm lo. Nathana chuan rum zet hian Pu Dika chu a melh a, "Kidnapper diktak chu i ni." a ti a. Pu Dika chuan, "Amak e awww..in rawn chhuichhuak tawh ang chu tia...ka tunu chu a thi tawh ngei ngei ang. Rawn zawnchhuah ahnekin keimah bawk min rawn puh leh a, eng ang police nge in nih a?" a lo ti hrep a. Nathana chuan, "Thudik takin min chhang rawh..Rinrini kha engvanga kidnap nge i nih?" a ti leh a. Pu Dika chuan, "Tunge Rinrini chu ni leh ta?" a lo ti leh hu mai a. Nathana chuan vin zet hian, "Kimi fanu...cheng nuai 15 i phut a, a fanu Rinrini i kidnap a. Pu Dik, kum 10 chuang chu a liam tawh a, mahse ka la hrechiang a ni. Kawngsir kham kotlang hniam te atangin ka zan leng haw chu kawng reh lai takah, ka motor zawn takah i rawn namthal a, ka motorah a rawn tla a. Ka balance pawh a buai a, keipawh ka thi tep a nih kha. Rinrini erawh a thi a, pawisa chu i la tho. Rinrini nu Kimi bulah khan khalai hmunah khan nghak turin i ti a, motor chhungah chuan kutin a mit tuam turin i ti bawk. Tichuan i tlan pel a, kawngsir ramhnuai lamah i pawm chho a, tichuan Rinrini chu ka motor taka rawn tla turin minlo chang a, i namthla a nilawm ni?" a ti ta siah siah mai a. Pu Dika pawh chu a meng zeuh zeuh a, "Thu awmze neilo a nih chu!" a lo ti hmuk a. Nathana chuan, "I la zep dawn amaw? Kha scorpio dum pawh kha i ta a ni a, in garage ah pawh khan ka hmu. Kimi hian Police te hnenah he afanu thihna case hi re-open leh a rawn dildawn tih pawh i hriam chuvang chuan i hmel lanchian theihlohna turin camera quality chhe tak chu accident-na hmun bula thingkung ah i fit a, i hmel lan theihna turin khalai hmunah pawh khan i kal leh a. Ngaihdam dil nan tiin pangpar pawh i dah a, a dik em?" a ti leh ta phiar phiar mai a.

Pu Dika chuan, "Kimi chu tunge anih? Engmah awmzia ka hrelo." a la ti talh mai a. Nathana chu a nui suk a, "Animaw...a tha e. I tunu chu ka kawl e, Zamtei chu ka bulah a awm. Mahse ka duh angzawng min hrilhlo a nih chuan he jail ah hian naupang rukbo case in kum tamtak i tang dawn, i lo chhuah hmain i thi maithei lenghal. SAwi rawh le, engkim sawi rawh." a ti a. Pu Dika chuan mak tih hmel tak hian, "Enga? Ka tunu chu i bulah a awm amaw? Officer, ka hmu duh...khawngaihin.." a ti nghal chel chul mai a. Nathana chuan dawhkan chu a chum bur a, "Ka zawhna che chu min chhang phawt rawh...engvanga kidnap nge i nih?" tiin a vin vak a. Pu Dika chu a kun lap a, muangchang chuan a rawn hawi chhuak a. Nathana chu chiang tak hian a melh a, "Officer...fa i nei ve tawh em? I fate chu an puitling ve tawh em? Tu te i nei ve em? Engmah i hre ve thiamlo ang...ka monu Mawitei hi heart surgery tih angai a, kum 17 lek ala ni. Pawisa ka nei silo a, ka hlawh lah a tlem si. Ka fapa, MAwitei pasal lah chuan min thihsan leh ta mai si a, MAwitei lah a rai tih kan hre leh bawk si. Ni e, ka fapa hian MAwitei hi kum 16 lek anih laiin a lo chetsual pui a, mualpho ai chuan tiin ka inneih tir ta a ni. Mawitei hi ka fanu ang maia ka en a ni a, heart surgery tih a ngai bawk si leh a dam thei ta ngang lo chu pawisa ka ngaihtuah angai ta a. Theih tawp ka chhuah hnuin cheng nuai 5 chu ka hmu ve thei a, mahse sugery tih man erawh nuai 20 daih a ni bawk si. Tichuan he nuthlawi Kimi hi ka hmu ta a, sum ngah tak a ni tih ka hre bawk. Chuvang chuan a fanu chu ka kidnap ta a, pawisa chu ka dil thin ta a ni. Khami zan khan Rinrini kha thah ka tumlo, accident liau liau a ni. Kimi kha pawisa chu lo keng turin ka ti a, a mit tuam tur leh a motor bulah pawisa lo dah tur chuan ka ti a. A ti ta ngei a, mahse ka tlan pel phawt a. Rinrini kha pawisa ka hmuh zawhah kaltir nghal mai chu ka tum reng a, mahse motor atanga ka pawmthla chiah khan ka biangah min sek vak a. A tlanchhia a, tichuan kawngsira mau hmun lamah khan a tlan chho ta ani. Ka umna lamah kawngpui hnaih lam kham ko ah khan a tla palh a, i motor ah tak a rawn tla ta a nih kha....khatia Kimin a fanu kawnlaia tap zawih zawih a, a ruang a kuah ngawih ngawih lai pawh khan ka inchhir lutuk, mahse ka fanu ang maia ka en, ka neihchhun, ka monu Mawitei chu ka ngaihtuah si a, tichuan khatian in awm lai khan pawisa chu ka la a, ka tlanbo ta a ni." a ti a.

Nathana chuan mittui tla phung hian huatna mitmeng nen chuan Pu Dika chu a en a, "I tunu Zamtei leh i monu i duat em em Mawitei te chu hlim taka an awm i duh a nih chuan thil pakhat tihtur i nei." ati a. Pu Dika chuan, "Enge..engpawh ka ti ang." a lo ti hluam hluam a. Nathana chuan zawi tak si, fiah em em si hian, "Media hmaah i inpuang ang, mahse thudik nilovin dawt i sawi ang. I tunu Zamtei hi nangma kidnap ngei a ni tiin sawi la, i tih nachhan pawh pawisa i duh vang angin sawi ang che. Jail chu i tang ngei anga, i tunu leh Mawitei te pawh hi i hmu tawh kher lovang. Mahse an nufain hlim takin an awm anga, nang erawh chu an haw maithei che a ni." tih pah chuan kan chhuahsan ta a. NAthana sawi ang ngei chuan a tuk ah chuan Pu Dika chuan ama tunu Zamtei chu amah ngeiin a kidnap thu a sawi ta a, jail a tan chhunzawm ta zel a ni. Mawitei erawh a fanu Zamtei nen hlim takin an awmdun leh ta a, mahse Pu Dika erawh MAwitei chuan a haw em em thung. Mak ve deuh mai chu Zamtei hian anu bulah engmah a sawi ngailova, Kimi chungchang pawh a sawi ngai heklo. Kimi pawhin a pawisa ruk chu Nathana a pe let leh vek a, lawmman atan Nathana chuan ama sum atangin cheng engemaw zah a pe bawk. PAwisa cheng nuai 15 chu Nathana chuan Pu Dika thuhrukna atanga a zawnchhuah angin a sawi a, engkim a fel leh ta vek mai...ti tawh mai ang aw...Hehe.

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)