NATHAN SEASON-3 (Episode-14) IS THAT SLENDER-MAN? (Part-1) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-14) IS THAT SLENDER-MAN? (Part-1) by:Aaron Malsawmdawngzuala

Unread post by Aaron Dustin » June 24th, 2020, 11:08 pm

NATHAN SEASON-3

Episode-14

IS THAT SLENDER-MAN?

(Part-1)

Written by : Aaron Malsawmdawngzuala

***********

Mibo case kan chhui zo chiah a, chupawh hmeichhe naupang lehnghal. Hei tunah pawh case dang a rawn awm lehnghal a, mibo tho a ni leh a, chupawh hmeichhe naupang bo tho a ni leh ta. A tha vek e, hnuchhui tura Police-a tang kan ni a, misual te lak atanga mipuite venghim tur kan ni miau a, kan thawk leh tauh tauh mai aniang chu. Kan chanchin lo ziak ve ringawttu anih vang nilovin, an veng Durtlang lamah bawk hnuchhuina hi kan bei leh dawn a ni. An veng Durtlang hi tihlar a tum ve deuh amawni, a hlat hlat nen hian, an inla changkang ve si a, a sawi tel ve chhen lehnghal.

Durtlang Mel-5 a nu pakhat, Pi Ruatsangi fanu kum 9 mi Mazuali chu a bo a, zing atanga a lengchhuak chu alo haw thei miahlo a ni awm e. Tukthuan eikham dar 10 vel atang khan a leng a, ama sawidan chuan an kawmthlang huan lamah athiannu nen an infiam dawn niin a sawi a. An infiam dun ngei a, anu Pi Ruatsangi pawhin a hmu nghe nghe a ni. Mahse chhun thil eitura koh a tum chu an lo awm tawh miah lova, athiannu, a infiampuinu Remremi, (kum 10) te in lamah an inzui phei anih ringin ngaihtha tak chuan a awm ve mai a. Mahse tlai dar 5 a rik tawh hnu pawhin ala rawn haw thei silova, Pi Ruatsangi mangang chu Remrei te inah chuan ava kal a, mahse Remremi chu a lo awm reng a, afanu Mazuali erawh a awm ve reng reng lo a ni.

Remremi an zawh lahin, "Kan infiam lai khan huan mawng lamah a kal a, tui ka chawi dawn atia, mahse a lo let leh ta miahlo a. Kan inkhualte lem char char a, huan mawnglama a kal hnu khan alo let tawh lo hrim hrim. Chuvang chuan keipawh ka haw daih alawm, a awmna ka hrelo." tiin a sawi a, Pi Ruatsangi pawh a mangang hle mai. Pi Ruatsangi hi hemi zan hian Stationah lo kalin a rawn report a, Nathana kher chu a hmuh duh thu a rawn sawi tlat lehnghal a. Hetia a fanu bo thu a rawn sawilai mek pawh hian an veng tlangval thenkhat te chuan huan mawnglamah an zawng mek a ni awm e, an huan kalkawng hian 'TUIPAWL' a pawh lehnghal ala ti zui. A zan azanin kan chhuak nghal a, kei erawh chuan nungdama a awm ka ring tawhlo bur. Kidnap a nih theihna chance a awm rual rualin kawng a bo pawh a ni thei tho. Durtlang pa ho thenkhat titi ah chuan Khawchawi anih te an ring ber a, naupang khawmuchawi te hi a awm ve amawni, rintur nge rinloh tur erawh ka hrethiam lo.

Pi Ruatsangi te huan mawnglam chu kan pan thla ve a, uisathiam te pawh kan hruai ve bawk. Mihring hnuhma vel chu a tam a, mahse nitina ram kal te an awm ve a, chumite hnuhma te pawh chu a ni thei tho mai. Kan lut thuk zel a, ramhnuai pilril tak tak te chu kan thleng ta hial a. Mahse zankhua deuhthaw-a kan zawn hnu pawh chuan chu hmeichhe naupang chu kan hmu ta miahlo mai a, a ruang tal hmuh chu ka inrin ve vei nen, ka hah ngei mai. Pi Ruatsangi te nula pawh chu an mangang em em a, Pi Ruatsangi phei chu a tap reng ringawt tawh mai a ni.

Nathana chuan tihian thuchhuah a siam ta a, "Keini police te pawhin theihtawp kan lo chhuah zel anga, nangni pawh inveng tleirawl te nen mibo zawnin zawng tawp mai rawh u." a ti a, kan hawsan ta a. Mizo danah ni 7 chhung zawn a nih angin ni 7 chhung zawng tur chuan ruahmanna an siam ta a,Police dangte pawhin an pui ve bawk a, kei leh Nathana erawhin kidnap case a nih thut takin tiin Durtlang ah chuan kal kualin evidence leh witness kan zawng char char thung a ni. Evidence leh witness han tih khan Mazuali hi a thi ta e tihna nilovin, a bo hnua mita lo hmutu an awm nge awmlo tih te lam ani ka sawi ni. Mazuali chu a khuangcher bo chu a ni ta der mai a, a ruang takngial pawh kan hmu zo lo a ni ber e. Ni 7 hnuah pawh chuan veng mipui te pawh chuan an zawng hmu zo chuang silova, Mazuali case chu tihtawp a ni ta a ni. Mitam zawk chuan Khawmuchawi a nih an ring a, mahse NAthana erawhin a ring ve hauhlo, kidnap a nih ala ring fan a ni.

A vawihnihna atan Nathana pawhin Pi Ruatsangi bulah chuan case a tawp thu chu inthlahrung tak chuan a sawi ta a, ahma lawkin Pi Kimi a lo hrilh tawh bawk nen, hrehawm a ti ve khawp mai. Pi Ruatsangi hi Pi Kimi ang deuh khan tu tunu emaw hi a lo kidnap ve mai ang tih chu a hlauhawm angreng, mahse a thleng lo turah i ngai phawt teh ang. Keipawhin chutia chin hriatlohva a bo ta mai chu mak ka ti ve em em a, ni 7 chhungzet chhun zan zawmin an zawng a, mahse an hmu miahlo kha amak a ni. An sawidan phei chuan arbei mawng thlengin nitin an helkual vek ziah a, an hmu chuanglo a, naupang mai chauh ala ni a, chutah pawh hmeichhia lehnghal. A kalhlat vak chu a rinawmloh, mahse sawi tak ang khan kidnap pawh a ni thei a, khawmuchawi pawh a ni thei tho.

*********

Kar khat aliam tawk chauh ang tihah naupang bo tho report arawn awm leh ta mai a, mak tak maiin chupawh chu Durtlang lam tho a ni. Pi Ruatsangi te inbul chiah ami, Pu Engmawia fapa, kum 9 mi Valtea a ni. Kan hriat tirh phei kha chuan Nathana nen kan in en tawp a, mak kan tidun bawk em a ni. Ka rindan chuan Durtlangah khian misual an awm anga, mi kidnap ching an awm anga, chuchuan a rubo thin niin ka ngai hial a. Mahse kidnapper te chuan a tlangpuiin pawisa an duh vang a ni thin a, an kidnap naupangte nu leh pate call-in pawisa an phut thin kha a ni a. Mahse Mazuali kha chu a ni ve hauh silo, tuna mi, Valtea pawh hi a chhungte tuman an rawn call bawk silo. Valtea pa Pu Engmawia hian tlailam khawthim hnu deuh, dar 6 velah a rawn report a, afapa Valtea chu alo haw har lutuk a, a lenna tur awm ang te a call hnu pawhin tuman a lo kal thu an sawi silova, Pi Ruatsangi te kawmthlang deuhah a fapa chapal khing chu a chhar a, a mangang lutuk alo kal tawp a nih thu a sawi a ni.

Nathana chuan, "Anih leh i fapa chuan thian kawm deuh bik anei em?" tiin a zawt a. Pu Engmawia chuan, "Aw nei ve nual e, mahse chungho te inah chuan ka kal vek tawh. Tuman an hmuhloh thu leh an kawm loh thu an sawi vek bawk si a, ka mangang a ni. Hmanni lawkah khan kan thenawm Pi Ruatsangi fanu Mazuali lah kha a khuangcher bo hmiah kha a ni si a, ka fapa hi a bo hlen ve mai ang tih ka hlau a ni." a ti a, a tap hluam hluam mai. Nathana chuan, "Lungngai suh ka pu, theihtawp kan chhuah dawnnia. Anihleh rubo tu tur awm ang han rinhlelh deuh te i nei em?" tiin a zawt leh a. Pu Engmawia chuan, "Aih, ka hrethiamlo. Chutianga misual..naupang rubo duh tur ang chi chu kan vengah an awm ka hrelo." a ti a. Nathana chuan, "In veng mipui hovin an hre tawh em?" a ti a.

Pu Engmawia chuan, "Aw..tunah pawh athen chuan arbai lamah an zawng mek." a ti a. Nathana chuan, "A that chu...lo va haw phawt la, kan lo che chhuak ve nghal ang." a ti a, Pu Engmawia pawh chu a haw ta a. NAthana nen chuan unit 2 vel hruaiin Durtlang lam chu kan pan chho leh ta a, beisei erawh a bo ngei mai. Ahma ang bawkin zan dar 10 velah pawh chuan hnuhma takngial pawh kan hmu leh talo a, bei a dawng takzet tawh. Dar 10 leh achanve velah chuan arbai mawng lamah Valtea an hmuh thu an rawn sawi tlat mai, arang arang chuan kan zu chhuk ve ta nghal a. KAn zu thlen meuh chuan dar 11 a ri tep tawh, ahla ve bawk em a ni. Valtea chu alo la dam hlauh mai a, mahse nikhawhrelovin a awm reng thung. Nathana chuan vin zet hian, "Amak e aww....aruang inhmu emaw tia, ala dam anih te chuan kan lo thlen kher nghak lovin lo pawm chho vat ta che u." tiin a vin hrep mai a, a awm ve thove, tleirawl tak tak vek an la nih vangin nachang engmah an lo hrelo a ni.

Zinglam dar 1 a pelh meuh chuan kawngpui lamah Valtea chu kan hruai thleng ve thei ta a, rin aiin hun kan hmang reilo zawk. Valtea chu tui te kan in luih tir a, kelawngin a awm a, a kawr pawh a bal hle mai. Khawvar dawn tepah chuan a rawn harh ve ta a, a rawn meng phawk vak a. Apa a hmu chiah chu a kuah nghal a, a tap nghal zawih zawih mai. Pu Engmawia chuan, "Bawiha, enge awmzia..khawnge i kal daih a?" tiin a zawt a. Valtea chuan, "Apa, ka hlau...kha pa sang deuh khan min um a, ka hlau lutuk." tiin a rak chel chul mai a. An thenawm lawka mi doctor chuan, "Khawngaihin engmah zawt hrih suh u, la hahdam tir rawh u." a lo ti a. Nathana pawh chuan, "Ni e, inti hlauthawng mai mai a ni. Haw then teh u, boruak a uap emai." tiin a hnawt haw hlawm a.

Naupang pawh chu doctor chuan a chiu muhil leh ta ringawt a, ,ahse a thil sawi mawlh mai kha. Pa sang deuh a tih chu tunge ni ta ang? Ramhuai a ni thei mai angem? Ka rilru chu a lo insual ve nasa hle mai. Thenkhat chuan, "Umm...khawmu chawi a nih ngei dawn chu." te anlo ti a, thenkhat chuan, "Mihring aniang, ruk bo a tum aniang." te an lo ti bawk a, an inhnial nak nak mai. Nathana beng bulah chuan, "Sir, nangin enge i rin?" ka va ti zauh a. Nathana chuan, "Mihring bak va ni suh..khawiah khawmu in a chawi lo ang." a lo ti hmuk mai. Keilah pek chuan, "Chawi ve maithei sin...an awm tak tak alawm." ka lo ti hram a. Nathana chuan, "Awm tak tak pawh nise, naupang mai ala ni si a, ahmaa Mazuali bo dan ka ngaihtuah pawh khan...engtin tak emaw kan tih angai a ni. Ka hriattheih chinah chuan naupang te te hi khawmu chawi ka la hrelo, puitling lam vek anla ni.

Naupang an bo hi chuan kidnap emaw, nawhchi zuar ni tura an hruaibo te an ni thin. Mahse Valtea erawh mipa ania, engemaw tak vang a ni ngei ang." a ti a. Keichuan, "Nihleh kut dawh tura naupang an kidnap thin kha, tiang tur te khan kidnapper hian a kidnap a ni lo maw? Vai film ah pawh a tam em hi, i nupui vainu pawh khan a chan ve tawh kha." ka han ti deuh kher a. Nathana chu zalo tak hian a nui suk a, "Khate chu vairamah chauh a thleng, mahse vai sawi takah chuan vai ho rukbo pawh a ni maithei Mazuali kha..Valtea pawh hi rukbo a tum ve anga, Valtea erawh a tlanchhe hman a ni maithei bawk." a ti a. "Eng atan maw?" tiin ka lo zawt a. Nathana chuan, "Awww...an kal (kidney) hrlah atan, hmankum pawh khan a lar vak kha.." a ti a. Ka lu chu ka han bu nghauh a, "Nia, adik ve tho maithei." ka ti a. Nathana chuan, "Hawh teh...iva haw ve phawt teh ang. Ka chauh si a, ka mut pawh achhuak tawh. Darkar 2-3 vel tal kan mut loh chuan kan chau lutuk ang." a ti a. Pu Engmawia bulah chuan, "Ka pu, Valtea hi a lo harhchhuah veleh Police te min rawn hriattir vat dawnnia. Keimah ka lo kalloh pawhin kan inspector hmeichhia alo kal ang, kan kal phawt ang." a ti a, kan hawsan ta a.

*********

Darkar reilote bak ka mulo, Nathana phone call vang chuan ka harh leh nghal a. Sana ka han en a, zing dar 9 a ni a, ka va mu reilo si em. Peihlo takin phone chu ka chhang a, "Hello.." ka ti dek dek chu Nathana chuan, "Lo phei rawh le, Valtea pawh a harh tawh an ti anih chu." a rawn ti leh nghal mai a. Ka tho tuah tuah a, ka insiam a, Station ah pawh phei lovin Pu Engmawia te inlam pan chuan ka inkhalh phei ta nghal a. Valtea chuan a melh ngai melh rengin mitkhap miahlo hian a kut chu a lo hum ruh a, a mittui a tla fek fek bawk. A hmel en chuan hlauh nei ala ang a, a thla a muang thlawt lo bawk. Nathana chuan ava thutchilh a, "Valte, i muttui maw?" a va ti te te a. Valtea chuan zawite hian, "Um." tih ringawt chuan a lo chhang a. Pu Engmawia chuan, "Valte, tha deuh khan chhang rawh aw." a lo ti a. Nathana chuan, "Apawilo.." tiin Pu Engmawia chu a lo mitmei vat a. Nathana chuan Valtea chu a kutah a vuan a, "Tuin nge rubo che?" tiin a zawt a. Valtea chu a inhnit feih feih a, "Pa Sang deuh mai, hmel pawh a nei pawhin ka hrelo." a ti ta mai a.

Nathana nen chuan kan in en hu ringawt, Valtea nu phei chuan a hmui alo hup a, a hlauh hmel kher mai. Valtea chu a tap leh tan dawn ta mai a, Nathana chuan a bulah a pawt hnai a, "Tap suh, hlau reng reng suh. I bulah kan awm vek a, i nu leh pate pawh an awm vek. Tuman an hruaibo thei tawh dawnlo che...min han hrilh zel teh." a ti a.

Valtea chuan hlauh hmel tak hian, "Ihh...ka leng kha ka haw a..ka haw kawng kha a thui avangin Nu Ruatsangi (Mazuali nu) te huan atangin ka haw a. Achhan chu short-cut ania, a hnai zawk a, nidangah pawh ka haw fo. Chuan an huan mawngah khan hmeichhe pakhat ka hmu a, naupang ania, keimah ang rual vel aniang. A hmeltha em em a, mahse a hmel ka hmuchiang theilo, mahse a hmeltha tih chu ka hria. A ngo em avang pawh a ni maithei, a var vek animai. Min lo hui a, tichuan ka zu kal a, hlauh pawh ka hlau lo hrim hrim. Tichuan ka zu chhuk thla a, mahse huan mawngah chuan a kal zel a. Ka zui zel a, min lo nghak tur pawhin ka au nasa. Mahse ahnuah a bo daih a, chuan ka awmna lai chu ka enkual a, ka awmna chu ka hre tawh lo. Tichuan aw thum em em mai hian MINLO ZUI RAWH.. a ti vak vak a. Achhan pawh ka hrelo, chumi aw rawn chhuahna lamah chuan ka kal vel zel a, mau hmunah ka awm ta in ka hria. Pa sang em em mai, coatsuit zuih deuh ha, hmai var vek hi ka hmu a, thingkung karah chuan a kalbo leh daih zel. Chu pa sang deuh chu hlauh viau mah ila ka zui zel a, mahse ka lam pan chuan a lo kal thut a. Rang takin ka tlanchhia, a, ka inchhui a, khawiah emawni ka lum a, abak engmah ka hre tawh lo." a ti a.

Ava mak ngai em, tu tak ni ang maw? Nathana chuan, "Ngati nge an hmel chu i hmuhchian theihloh..hmeichhe naupang hmel pawh chu?" tiin a zawt leh a. Valtea chuan, "Ka hrelo, kha hmeichhe naupang ka hmuh atang khan ka engkim ka mumang ang ruaiin ka hria." a ti a.

Nathana chuan min rawn en a, mak kan tidun bawk aniang, engmah kan sawilo. Nathana chuan Valtea bulah bawk chuan, "Anih leh nimin khan khawiah nge i len reng reng?" tiin a zawt leh a. Valtea chu a ang zuau a, "Ihh..ihh...ka..ka hre tawh lo." a ti ta daih mai a. NAthana chuan, "Valte..hlau suh, sawi tawp rawh..tuman an tina lovang che." a ti a. Valtea chuan tap chung chuan, "Aih ka hrelo...engmah ka hre tawhlo tak tak." a ti vak vak a. Nathana chuan inthiamloh hmel tak hian, "Awle awle, hahdam rawh...engmah kan zawt tawh lovang che. I him tawh a, hlau tawh reng reng suh." a ti a. Pu Engmawia chuan, "Officer, engthil nge ni ta ang?" a ti a, ani pawh a hlauh hmel kher mai. Nathana chuan, "Mihring bak ani lovang, a inchei hlauhawm mai aniang." a ti a.

Pu Engmawia chuan, "Mahse, engmah a hre tawhlo a, mumang ang ruaiin ka hria te ati sia." a ti leh a. Pu Engmawia nupui pawh chu lo tawngchhuakin, "Ramhuai ani anga, ramhuai chuan a dawi a vek ani mai lo maw?" a lo ti ve bawk a. Nathana chuan, "Khaih khaih, ka pi nangberin chutia i sawi mai le...kum 9 mi lek tawn atan chuan a rapthlak dawn em a, a hlau bawk si khan engkim a theihnghilh tir vek a ni ang. Chutiang ramhuai tih vel chu awih reng reng suh u." a ti a. VAltea lam chu ava hawi leh a, "Valte..thil pakhat chiah ka lo zawt leh che aw..chu i hmuh pa sang deuh chu...engtiang chiaha sang nge ni ang." a ti a. Valtea chuan zawite hian, "A sang lutuk, ft 9 vel aniang.." a ti a. Keilah chuan, "Ft 9 a? Ft tehdan pawh i thiam ve ami?" ka lo ti zauh pek a, Nathana chuan min nghawk pawp mai. Amak ve em alawm, naupang kum 9 mi lekin ft zat a lo teh ve thiam kha chu..akumzat hi kum 9 a ni a, a kumzat angin ft 9 a ti ve vel mai mai niin ka ngai. Nathana chuan Valtea pa bulah chuan, "Pu Engmawi, lo la nghak deuh ula, nangni pawhin thil lo zawt vak vak suh ang che u. Ala hlau em a, in zawh vak vak khan in ti hlauthawng mai mai ang. Nakinah kan lo kal leh anga, tunah chuan duhtawk phawt ang." a ti a. Pu Engmawia chuan, "Tehreng mai, in duh duh hunah inlo kal dawnnia. Man ngei ang che u, duhsakna ka hlan ache u." a ti a, kan kal ta a.

*********

Station chu kan thleng a, NAthana chuan a office ah min ko lut nghal a. Nathana chuan, "Vawiin tlaiah kan kal leh anga, kidnapper chu a lem ziah mai atha ang." a ti a. Keichuan, "Mahse Sir, naupang kum 9 mi lek ania, a sawi thiam dawn em ni? Chubakah a hmel pawh a hmuhchian theihloh kha...a chi dawn mi?" ka lo ti a. Nathana chuan, "Albert-a kan nei alawm....Valtea chuan a sawi thiam em em ang. Ahmel lo hmu chianglo mahse a hmuhdan ang ang talin a sawi tur a ni, kan tan pawh kawng awmchhun a ni." a ti a. Constable Siama a lo lut a, "Sir, Pi Ruatsangi bawk kha...alo kal leh a." a rawn ti a. Nathana chuan, "Lo luh tir rawh." a ti a.

Pi Ruatsangi chu a lo lut a, engmah kan sawi ve hma chuan, "Ka pu, chanchin ka lo hria a. Valtea rukbo tum tu chu ka fanu rubo tu kha a ni hrim hrim, tunge a nih ka pu?" a rawn ti lut nghal chiam chiam mai a. Nathana chuan, "Tunge a nih kan la hre biklo, kan la chhui mek zel e." a lo ti a. Pi Ruatsangi chuan, "A rapthlak emai, mi hlauhawm tak a ni. Kan huanah pawh ka kal ngam tawh lo, huai a awm a ni ngei ngei ang." ala ti zui. Nathana chuan, "Chutiang engmah a awmlo, ka pi. Misual, naupang rukbo ching bak a nilovang. Mahse, engtin nge i hriat ve reng reng a?" tiin a zawt a. Pi Ruatsangi chuan, "Valtea an hmu tawh tih kha tukin zing khan ka lo hria a, nichin deuh lawk khan ka va leng a. Valtea nu Pi Hmingin min lo hrilh a, ka fanu MAzuali rubo tu tho kha a nih ka ring nghal a, ka lo kal a ni." a ti a, nuho tak hi chu...lo sawichhuak leh hman ta.

Nathana chuan, "Ka pi, lungngai reng reng suh...kan man thuai ang, hahdam deuh khan inah lo va haw rawh." dam diai chuan a ti a, Pi Ruatsangi pawh chu a haw ve ta a. Tlai a lo ni a, Pu Engmawia chuan Nathana a rawn phone a, "Ka pu, hei Valtea pawh a ziaawm tawh khawp mai, a sawichian deuh theih tawh ka ring." a rawn ti a. Nathana chuan, "AWle, a that nasat chu...kan lo kal nghal ange." a ti a, phone chu a dah a. Nathana chuan, "Albert-a han phone teh le.." a ti a. Albert-a chu ka phone a, ani pawh reiloteah a lo thleng ve nghal mai a. Albert-a te nen chuan kan pathum chuan Pu Engmawia te in lam pan chuan kan kal leh ta a.

Apawi ta ber chu Valtea nu Pi Hmingin Mazuali nu Pi Ruatsangi bula a fapa thil tawn a lo hrilh kha ani, a darh chak dawn ropui si a. In vai chuan in ni kherlo, mahse nu ho hi inbuaithlak, tuma hnenah hrilh suh u tiin thuruk an hrilh che u a, inthian dang dangte bulah, "Nangmah chiah ka hrilh ang che." in ti leh a, in hrilha te khan midang an hrilh leh a, veng pumah a leak-out ta thin a nih kha. In mak lutuk emai, mahse minlo haw lo ula, hnuchhui nen, hah nen, ka han hau ve hlak che u a nih kha. Diktak chuan Nathana fans te zingah chuan in awm ve miahlo ang tih ka ring, chutiang hrat deuh in thiante zingah an lo awm a nih hlauh chuan kawm tawh reng reng suh u.

Pu Engmawia te in chu kan thleng ta a, Valtea pawh ahma ai chuan hmuh a nuam ta deuh. NAthana chu Valtea bulah chuan a han thu leh a, "Ahma ai chuan i hlau tawhlo deuh em?" tiin a han zawt phawt a. Valtea chuan a lu a lo bu nghat a, mahse ala zam em em tho tih chu a hmel atang chuan hai rual a nilo. NAthana chuan, "Anih chuan...nimin khan khawiah nge i len hrim hrim?" tiin a zawt a. VAltea chuan, "Cyber cafe-ah ka kal a, DOTA kan khel a. Ka haw a, tichuan hmeichhe naupang chu ka hmu ta a ni." a ti a.

Nathana chuan, "Hmundangah khawiah mah i kal lo maw?" a ti leh a. Valtea chuan, "Aw kallo.." tiin a lo chhang a. Nathana chu a han thaw hak a, "Ummm...anih leh i hmuh pa kha..chiang deuhin sawi la, hei..kan thianpa, Au Albert-a hian a lem lo ziah atum anga, i hriat dan leh i hmuh dan ang ang khan sawi tawp mai rawh aw.." a ti a. Tichuan Albert-a nen chuan an inthutchilh a, lem ziah chu an tan ta. A rei dawn tih ka hriat avang chuan Nathana bulah chuan, "Sir, Pi Ruatsangi te huan pawh chu zu en ve hrim hrim ila, an kawmthlang huan tak hi chu khaw en lai pawhin kan la hmuh loh kha." ka ti a.

Nathana chuan, "E, nia mawle...chu pa sang pa chuan min man ve em lovang chu maw?" a han ti deuh kher a, ava tullo thei tak. Huan lam pan chuan kan kal a, kan han enkual vel a. Nathana chu a chhuk hla tawlh tawlh tawlh a, "Sir, chhuk tawhlo teh. Chhoh leh lampang ka peih tawhlo, lemziak pawh an zo tep tawh ang." ka ti ta ringawt a.

Nathana chu a rawn chho a, "Tlangval Senior,inla changtupa ropui si, thatchhe lutuk." a la rawn ti nuah nuah zui, a chhan pawh la chhang peih vel lo. Pu Engmawia te inah chuan kan let leh a, lemziak pawh chu an lo zo ta. Valtea pawh anu te bulah chokaah an awm a, Albert-a erawh min hnungchhawn zawngin sitting room ah chuan a lo thu a. Nathana nen chuan kan va phei a, Albert-a chu muangchang chuan a rawn tho chhuak a. Min rawn en a, a ner nung mai. A nui huk a, "A tak takah a lo awm aniang...awmzia pawh ka hre nek love." tih pah chuan lemziak chu min rawn pe a. Lemziak chu kan han en a, keipawh chu ka nui huk mai. Nathana pawh chuan lemziak chu mak tih hmel tak chuan a en a, "Heite chu.." a ti ringawt. Lemziak ami chu maw...mihring pawh a ang lo, a cher em em a, a sei hian a sei zut mai. Ft 9-10 vel laia sang ni tur ang mai a ni a, a hmel chu a plai vek, hmel engmah a neilo.

Sam a nei hek lova, alu chu puanvarin a tuam bet tlat hi a ang ber. A kut te lah chu a sei zut mai bawk si, a ke lah chuti bawk. A zang a kul deuh a, coat suit ala ha zui. Nathana chuan, "Heite chu Slender-Man a ni lo mi?" tih pah chuan a nui ve ta huk a. Albert-a chuan, "Chu chu alawm ka sawi reng...atakah a awm aniang." a ti a, a nui leh vur vur thin a. Keichuan, "A film en nasat vang a nilo maw?" ka lo ti a. Nathana chuan, "MAhse Mazuali kha..." a lo ti a. Albert-a chuan, "Mazuali te kha chu kidnapper pangngai kidnap pawh a ni thei a." a lo ti a. Mahse Nathana chuan, "Ka hrethiam biklo...Slender-man...ava awihawmloh tak." a ti nuah nuah a.

(TO BE CONTINUE)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)