NATHAN SEASON-3 (Episode-15) IS THAT SLENDER-MAN (Pt-2) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-15) IS THAT SLENDER-MAN (Pt-2) by:Aaron Malsawmdawngzuala

Unread post by Aaron Dustin » June 28th, 2020, 11:48 pm

Pi Ruatsangi te inbul vel chu vengpum chuan an hlau a ni ber mai, an tih em em a, tumah an kalhnai ngamlo. Nu leh pate pawhin an fate chu Pi Ruatsangi te inbul hnaih velah chuan kallo turin an hrilh thin a, abul hnai velah awm te pawhin an fate chu chhuah an phallo a ni tawp mai. 'A hrang' tiin a lar vak a, thenkhatin social media lamah fiamthu thawh nan te an lo hmang bawk a, kan indaih hlawm thin khawp mai.

Nathana pawh tih ngaihna a hrelo kher mai, a hmutu ber Valtea lah chuan Slender-Man a ti tlat mai bawk si a, Slender-Man lah sap ramhuai thawnthu phuahchawp ami daih a niin ka hre bawk si a. Pi Ruatsangi te huan mawnga zu kal a, Slender-Man zu zawn ngawt thu awm suh. Engpawh chu nise Valtea pawh kan zawng hmu ta bawk a, Nathana chuan case chu tih tawp mai a tum ta a. A ngaihna a awmlo ve bawk em a ni, sawi tak ang khan Slender-Man han zawn tawp mai chu a atthlak dawn em asin.

Mahse Valtea lah chuan a hmuh thu a sawi ve tlat mai bawk si a, awihloh chi ngawt a ni bik silo. Pi Ruatsangi lah chu a khat tawk chuan Station lamah a lo kal chhen mai bawk si a, a sawi ngai bak a rawn sawi ngai chuanglo. Slender-Man lemziak kha kan DGP kan hmuh ve a, "Uan hun a nih loh hi.." tiin min hau hrep mai mawle, a awihawmloh ve bawk em a ni. Case hi ala tawp tihna a nilova, tih tawp mai kan tum chauh a ni.

Mahse rilru ala nuam zan lova, tu tih nge tihte pawh zawnchhuah ve hrim hrim chu a chakawm khawp mai. Durtlang thalai te pawh tlaivar thak thakin chu misual chu zantin an chang ziah a, mahse engmah hmuhtut a awm chuang bawk silo. Pu Engmawia te inah pawh kan kal fo a, Valtea erawhin a sawi ngai bak thildang a sawi lo, Slender-Man ngei a ni e ati tlat mai si. Slender-Man hi tunge a nih a? Enge anih reng reng tih hrelo in awm takin a chanchin tlem ka han sawi lawk ange.

Slenderman hi fictional character a ni a, phahchawp mai mai a ni tihna a nih chu. Kum 2009 khan Internet forum Something Awful tih website-a user pakhat, Eric Knudsen chuan creepy-pasta internet meme atana a siamchawp mai mai a ni a. Slenderman a siam ni pawh hi ka hre ve ngei alawm, June ni 10, 2009 a ni.

A bikin naupang te rubo tu a ni a, a zuiru a, a tihthaih thin a, a vau thin bawk. Sang em em mai hi ani a, thenkhat chuan ft 10 vel te an ti a, thenkhat erawh chuan ft 15 lai a ni te an ti bawk a, thenkhat leh erawh chuan ft 6 vel bak a nilo te an ti bawk. A thawnthu hrang hranga zirin a size pawh hi an ti danglam ve thin a, mahse inrhiat tur chu, abikin naupang ho kha, Slenderman hi a awm tak tak emaw inlo ti ange, a awm tak tak miahlo a nia. Canadian Serial pakhat Lost Girl tih kha en in awm ve tawh emaw..Season-3 ah khan Slenderman chu misualpa a nih nghe nghe kha. Games lar em em mai Minecraft ah pawh Slenderman copy deuhreuhin character pakhat ENDERMAN tih te chu siam a ni bawk.

TV Serial lar tak pakhat Supernatural tih ah pawh khan Season-9 ah Slenderman hi alang ve bawk a ni. Kum 2016 pawh khan pun rock band pakhat Haunted Garage chuan an hla pakhat 'Slenderman and Other Strange Tales' tih ah chuan a music video ah pawh Slenderman hi an lo ti lang tawh bawk a ni. He hla an phuah chhan te pawh hi han sawi leh ta zel ila, in knowledge zau nan hrim hrim te pawh a tha.

Kum 2014, May 31 khan Waukesha, Wisconsin-a cheng naupang pahnih (kum 12 ve ve) te chuan an classmate pakhat, an mahni ang rual ve tho chu vawi 19 lai mah an vit a nih kha. Police ten a chhan an zawh chuan Slenderman tana ti an nih thu leh Slenderman in ti tura a tih vang a ni tiin an sawi a, hetia Slenderman a awm tak tak a ni tih an rinna chhan chu Slenderman chanchin online-a an chhiar nasat lutuk vang a ni. Kum 2018 pawh khan Slenderman tih film chu release a ni a, Sylvain White-a'n a direct a ni. Khai, ka va sawitui miah miah veleh, hnuchhuina lamah lut leh tawh ang aw.

************

Valtea duhzawng te, TV-a a en duhzawng te chu kan zawh lahin Slenderman reng reng a rel ve bawk silova, Valtea phei chuan a vawikhat hmuhna a ti nghe nghe a ni. Theih ang ang chuan kan han chhui ve zel a, mahse engmah a sawt chuanglo. Naupang ruk bo tih a awm tawh chuanglo bawk a, nu leh pate pawhin an fate an venghim tha bawk nen, pending case dang te chu kan khawih zawm leh a, Slenderman case erawh kan ti tawp ta hrih a ni. Kar khat lai a liam leh ta a, hun pawh hriatloh hlanin a lo kal chak kher mai. Ka day-off a ni a, nileng mai chuan inah ka mu a. Zan dar 7:30 velah chuan Nathana a rawn lut hlawl mai a, eng tak ni leh ang maw? Ka bulah chuan a rawn thu a, "Mibo...mibo bawk.." a rawn ti ringawt a.

Ava ninawm zozai tawh tak em, "Sir, naupang chu an ni tawhlo ang tiraw?" ka ti a. Nathana chuan a lu a thing a, "Naupang bawk an ni e...mi pahnih lai an ni." ala ti zui. Ka chal ka dawm tawp, "Durtlangah bawk ami?" tiin ka zawt leh a, Nathana chuan, "Durtlang chu ania, mahse Durtlang North lam a ni thung." a ti a. Keichuan, "Engtik khan nge?" ka ti a, Nathana chuan, "Liantea'n min rawn phone a, keipawh ka duty ka haw daih tawh a. Zan dar 6:45 vel khan a ni awm e." a ti a.

Peihlo tak chuan ka tho a, "I insiam ang hmiang." ka ti a, ka room lam chu ka pan ta a. Durtlang lam pan chuan kan tlanchho leh ta a, Durtlang North daih daih ani chu amak ka ti angreng khawp mai. Mipui pawh an thlabar a, naupang rubo thintu hi chu mi fing tak chu a ni ngei ang. Naupang bote hi unau anla ni zui a, kum 10 mi leh kum 12 mi niin hmeichhia ve ve an ni a, Seni leh Mami te an ni. Seni hi a upa zawk a, Mami hi a naupang zawk a ni. Anni pawh hi case dang ang tho kha a ni a, chhunlama an leng an lo haw theilo a ni. Seni leh Mami te nu leh pate hi Pi Zoremi leh Pu Sawma te an ni a, an fate bo thu rawn report tu chu Pu Sawma hi a ni.

Pu Sawma te in chu kan thleng ta a, Liantea te chu an lo awm tawh a. Nathana chuan, "Liante, zawhna te ilo zawt tawh em?" a ti a. Liantea chuan, "Aw zawt nual e, an leng an rawn hawlo tih bak engmah thildang an sawi lo. An lenna tur an sawi silova, chuzawng chu a nimai." a ti a.

Nathana chuan, "Hawh teh Rinawm, i han zawt ve hrim hrim teh ang." a ti a. Nathana nen chuan Pu Sawma te nupa chu kan thutchilh a, Nathana chuan, "Ka pu, i fate hian Durtlang Mel-5 lamah sawn thiante an nei em?" a ti a. Pu Sawma chuan, "Ka hrelo, kan veng naupang ho bak hi chu an kawm meuh lo. School velah te chuan an classmate te chu an awm mahna, mahse sawn lai thleng thleng chu an leng ngailo." a lo ti a.

Nathana chuan, "Anih leh hmanni a Mel-5 a naupang rukbo case kha i hre ve em?" tiin a zawt a. Pu Sawma chuan, "Hria e, kan manganna tizual tu ber a nia lawm. Kha naupang rukbo ching kha ala awm reng a ni, a khat tawkin a che zeuh zeuh tihna ania." a ti a. Nathana chuan, "Dar engzatah nge in in atangin an chhuah?" a ti a. Pu SAwma chuan, "Chawma lam dar 11 vel khan ania, an exam chawlh lai alo ni bawk nen, ka phal ta mai a. An sawidan chuan an thiante inah leng tur angin an insawi mai a, tute in ber nge pawh ka zawt lemlo. Mahse dar 5 velah pawh anlo la haw silova, ka mangang chuan kan venga a thiante in zawng zawng ka lutchhuak vek a, mahse tuman an hmu silova. Ka mangang em em a, Police ka rawn hrilh ta tawp che u a ni." a ti a.

Nathana chuan, "Seni leh Mami lo hi fa dang inla nei em?" tiin a zawt leh a. Pu Sawma chuan, "Aih,neilo. An pahnih chiah hi an ni e.." a ti a. Nathana chuan, "Chanchin kan inhrilh leh dawnnia, theihtawp kan lo chhuah anga, zanin atangin kan lo zawng nghal dawnnia." a ti a. Durtlang chu kan hel chhuak leh pap a ni ber mai, mahse ahma ang thovin tuman an hmu lo hrim hrim. Loh theihlohvin Pi Ruatsangi te huan lam bawk chu kan pan leh a, Pi Ruatsangi tan pawh a nuam tawh lemlo khawp ang le. Zankhuaa kan zawn hnu pawh chuan kan hmu leh ta chuanglo a, beidawng tak chuan Station lamah kan let leh ta a.

************

Nathana nen chuan kan mu lo leh ta thak mai, ava khamawm tawh tak em. Nathana Office ah chuan kan awmdun a, Nathana chu a vei kual sek mai a. Kei erawh ka mut achhuak bawk a, ka lo muthlu leh tep zel. Nathana chu a rawn tawngchhuak a, "Rinawm, thil hriatchhuak zawk ka nei." a rawn ti thut mai a. Phawk hru hian ka lo melh a, "Engchu maw?" ka ti a. Nathana chuan, "Hetiang lam deuh hi case kan khawih tawh kha...ila hria em?" a ti leh a. Ka han ngaihtuah vang vang a, "Eng case maw?" ka ti hu mai a, case hi kan khawih tam ve tawh em a, ka hreseng vek biklo ani.

Nathana chuan, "Hman kumah khan Spring-Heeled Jack anga insiam, vengchhung ti thlabar em em mai kha...ila hria em?" a tih takah chuan keipawh chuan ka hrechhuak nghal uar uar mai. Ka lu ka han bu deuh ngat ngat a, "E ni tak e, i sawi takah chuan a in ang hle mai a." ka lo ti ve vat a. Nathana chuan, "Kha kan Jack-Zuanzanga (Spring Heeled Jack tihna, mizo ten a hming kan phuah dan..) kha chuan tum bik a nei a, chu chu mi hnawksak, ruihtheih thil ti thinte leh mi awmtha duhlo ho te kha a bitum ber a. Mahse tuna kan Slenderman erawh hi chuan naupang chiah a tum a, a in ang riauin ka hria." a ti a.

Keichuan, "Anih chuan Slenderman pawh hi mihring tho tihna aniang maw?" ka lo ti a. NAthana chuan, "Mihring bak va ni suh...rinhleh thuhla ah mi thenkhat hi chu kan dawp deuhreuh chu a ngai a ni. Enthlak bik te kan neih angai ang, Slenderman ngawr ngawr kan zawng a nih chuan a ngaihna a awmlo. Chuvang chuan Jack-Zuanzanga case kan chhuidan tactic kha kan hman leh angaih hmel, tuna mi pawh hi mithiam tak leh fing tak a ni ngei ang." a ti a. "Mahse Sir, rinhlelh tur an la vang emai, Pi Ruatsangi khan rinhlelh tumah a nei lova, chutiang bawkin Pu Engmawia pawhin...chuan tunah Pu Sawma te nupa pawhin rinhleh tumah an nei chuanglova, engtin nge niang?" ka lo ti ve deuh luam a.

Nathana chuan, "Chutak chu keimahni hna a ni dawn reng alawm, rinhlelh tur pawh kan zawng tawp mai dawnnia." tih pah chuan a han nui suk a. Keichuan, "Slenderman angin Valtea khan a hmu a, mahse kan hriat angin Slenderman te chu ft 15 vel dawna sang a ni si a. Chubakah cher em em mai, hmai plai vek, coatsuit deuhreuh ha ve tho ani bawk si a. Mihring thiltih pawh chu lo nise chutianga insiam danglam thei chu an awm dawn em ni? Pa ho sawi ang deuh khan khawmu chawi pawh chu a lo ni tak tak thei asin." ka ti a.

Nathana chuan, "Khawmu chawi ti ve ziah suh, ani lo. Ngaihtuah ta che, Mazuali a bo a, ahnuah Valtea...khawmu chawi pawh lo nise a la awm deuh. Mahse Durtlang North naupangte pawh hi he khawmu hian a rawn chawi em em dawn em ni? Ramhnuaiah chauh alawm an awm thin, chubakah rilru hahna nei te leh mi ang pha zanlo te, mahni intihhlum duhna neite ang hi khawmu chawi an ni ber zawk." a ti tun tun a.

Chutia kan titi mawlh mawlh lai chuan Liantea alo lut a, "Sir..naupangte chu hmuh anla nilo a. Mahse an siliper hmuh a ni. Siliper chu an hawn a, Pu Sawma'n a fanu upa zawk Sentei siliper ngei a niih thu a sawi a." a ti a. Nathana chuan, "A khing hnihin em ni? Nge lehlam chauh?" a ti a. Liantea chuan, "A khing hnihin, mahse Mami sliliper erawh hmuh a ni velo." a ti a. Nathana chuan, "Atha e.." tih pah chuan sana a han melh zeuh a, "Liante, hei zing dar 3 a ri tep tawh a. Pending case ho kha ilo buaipui angai ang aw...hemi case hi chu keimahni kutah dah rawh. Va chawl hahdam la, zing dar 9 rik hmain lo thlen leh hman tum ang che aw.." a ti a. Liantea chuan, "Yes Sir." a ti a, a haw ta a.

Nathana chuan a phone a phawrh a, "Hello Amanda...report kimchang takin rawn khawnkhawm ang che aw...force ho kha inthlak kual reng turin hrilh bawk la. Vawiin hi i day-off a ni tho a, report i rawn thawn zawh veleh i duh chuan i haw nghal dawnnia." a ti a, phone chu a dah a. Min rawn en a, beidawn hmel zet hian, "Huiham...silliper chauh kan chang chu ania." a ti nuah nuah a. Kan chauh lutuk vang nge ni, dawhkan bawhin kan lo chhing sek a ni awm e. Ka harh meuh chuan khua alo var tawh a, NAthana chu ka kai tho a. Nathana chuan, "Ehe..ka lo muhil animaw.." tih pah chuan a han zi mar vel a.

Amandai chu a lo thleng ve nghal mai bawk a, ani pawh a chau tih hriat tak hian a mit a bui luk mai, mahse a hmelthatna a bo chuang lo. Report te chu Nathana a rawn pe a, Nathana pawh chuan a han chhiar nauh nauh a. Nathana chuan, "Amanda, va haw tawh rawh..kha i chau anih kha.." a ti a, Amandai pawh chu a haw ta a. Nathana ang em em a mahni thawhpuite care thiam leh an hriselna ngaipawimawh hi chu an tam kher lovang.

Nathana chuan, "Haw ve phawt ila, kan inbual fai anga, chaw eikhamah kan sawitha leh zawk dawn em ni?" a ti a. Keipawh chuan, "Ni e, ka thlan nasa bawk a, ka ban chuap mai." ka lo ti ve bawk a. Nathana chuan, "VAwiinah kan che chhuak leh dawnnia, Rinawm...he case hi kan palzam mai mai tur a nilo ania, kan serious viau angai ang. Kan chawlhsan leh mai anih chuan remchangah lain naupangte hi a rubo zeuh zeuh zel mai ang." a ti a. Keichuan, "Ni e, adik alawm Sir..theihtawp kan chhuah dawnnia." ka ti a, kan haw ta a.

********

Mut la khamlo viau mah ila, hnathawh angai tlat bawk si. Ina ka haw chu ka inbual fai a, chaw te ka ei a, tichuan Station lam ka pan leh ta nghal a. Nathana pawh alo thleng deuh chiah a, a office ah chuan kan inzui lut nghal a. Nathana chuan, "Rinawm, Durtlang vengtin te ah hian task-force kan koh mai atha in ka hria. Chuan a tul viau anih loh chuan ram kal te emaw, feh te, huan kal emaw lui kal te hi khap bur mai se. Ramhnuai lamah duty awm se, information ah te puan tir ta mai ila a tha ang." a ti a.

Keipawh chuan ka lo pawmpui thlap mai, "Ni e, Sir..he kidnapper hi mipakhat chauh pawh alo nilo thei a, pawl pakhat emaw, gang te pawh an lo ni ve thei.." ka lo ti a. Nathana chuan, "Umm..i sawi takah chuan keipawh chu chu ka ngaihdan deuh ania. Mi pakhat chauh hi chu a ni thei chiahin ka hre biklo, thawhpui emaw, tanpuitu chu a nei a ni ngei ang." a ti a. Keichuan, "Nihleh Sir, enge kan tih hmasak ber ang?" ka ti a.

Nathana chuan, "Bul han tan dan tur mai pawh ka hrelo, ramhnuai vela zawn kha chu midang an awm tho a, nichina ka thilsawi kha, ti phawt ang. Task-Force te leh YMA te pawh...tin Sentei leh Mami te zawn hna pawh chu an bei leh mek tiin Amandai khan a sawi bawk a. Durtlang North lam pan chuan i kal phawt teh ang, abak chu kan rel chhunzawm zel mai dawnnia." a ti a, kan chhuak ta a. YMA hruaitute bulah chuan kan thurel vel chu kan han sawi a, tichuan Task-Force te pawh chu an insiam nghal a.

Pu Sawma te inlamah chuan kan kal leh a, NAthana chuan a han be leh luam a. Nathana pawhin a fanu Mary a ngaihtuah ve deuh aniang, akhat tawk chuan Sanvi callin, "Mary kha chhuah tir reng reng suh aw..pawnah chhuah tir loh tur..a hlauhawm ania." a ti deuh sek mai.

Kan buai buai a kan buai nak nak lai chuan Nathana phone a rawn ri a, Valtea pa, Pu Engmawia a ni. Pu Engmawia chuan mangan hmel tak hian, "Pu Nathan, khawngaihin inlo kal thei angem?" a rawn ti a. Nathana chuan, "Enge ni ta? Iva mangan hmel ve...thil thleng a awm leh em ni?" a ti a. Pu Engmawia chuan, "Phone-ah chuan a sawi theih loh, khawngaihin in buai loh chuan lo kal teh u." a ti a.

Nathana chuan, "Awle, lo lungngai suh..kan lo kal ange." a ti a. Ngaihthatloh hmel tak chuan Nathana chuan min en a, "Va kal ang hmiang...engemaw tak a awm a ni ngei ang." a ti a, tichuan Pu Engmawia te in lam pan chuan kan chhuak leh ta a.

Pu Engmawia te in chu kan thleng a, an thenawm ami, Doctor Ricky-a chuan a lo chiu muhil mek a. Nathana chuan, "Enge ni ta a?" a ti a. Pu Engmawia chuan, "Tukin zing khan a khua asik vak a, chuvang chuan Doctor Ricky-a hi ka ko ta tawp a, ani a chawlh hman lai a lo ni hlauh bawk nen. Tichuan damdawi te a pe a, a haw leh hnu deuh lawk khan a rawn au vak vak a. Rooma kan va tlan luh chuan bang kilah a lo tawm a, a khur zawih zawih a. Thil awmzia ka zawh chuan SLENDERMAN SLENDERMAN tiin tukverh lam a kawk ringawt a. Keipawh chuan va pan hnaih ka tum a, min lo hlau ve hial a. Mahse ahnu deuhah kha chuan ka pawmbet thei hram a, chutih hlan chuan kan nu hi ka tir a, Doctor Ricky-a hi ava ko leh ta tawp mai a ni." a ti a.

Nathana chuan min rawn en a, inbe miahlo mak ila amak kan ti dun ani tih chu kan hmel atang chuan a chiang khawp mai. Nathana chuan Doctor Ricky-a bulah chuan, "Enge awmzia ni ta ang?" a ti a. Doctor chuan, "A thil tawnte khan ala ti hlau a, hallucination ala neih tir reng a ni. A mumangah a hmu reng bawk anga, chuvang chuan a ni." a ti a. Nathana chuan, "Amak hle mai, engemaw awmzia ni?" a ti bul bul a. Pu Engmawia chuan, "Officer, engtia tih chi nge ni ang?" hlauhthawn hmel tak chuan a ti a.

Nathana chuan, "Lungngai suh, in inbul velah hian duty kan rawn dah dawn ania. Case dang khawih lai mek kan nei si a, kan kal leh phawt mai ange." a ti a. Doctor chuan, "Officer, reilote kan inah lo lenglut lawk teh u..in hman chuan.." a ti a. Nathana chuan, "Enge ni a?" a lo ti a. Doctor chuan, "Thil engemaw hrilh duh che u ka nei a.." a ti ta mai a. Nathana chuan min rawn en a, ka lu ka lo bu nghat a, "Awle, kal ang hmiang." a ti a, tichuan Doctor Ricky-a te inlam pan chuan kan kal leh ta a.

************

Doctor Ricky-a te in chu kan thleng a, inzau nuam tak a ni. Hmeichhe hmeltha tak leh ngo tak mai hian pawnah chuan puan alo zar mawlh mawlh a, Ricky-a chuan, "Ka nupui Wendy anih hi.." a ti a. Nathana chuan, "Umm a nih chu.." a ti mai a. Ricky-a te sitting room ah chuan kan thu a, Nathana chuan Ricky-a chu a han en a, "Enge nita Doctor?" a ti a.

Ricky-a chuan, "Englo ania, Pi Ruatsangi te hi kan inbul lawk an ni a, chutiang chiah chuan Pu Engmawia te pawh hi kan inbul lawk an ni. Keini nupa hi Durtlangah hian kan awmna a la rei lova, mikhual mai chauh kan ni a. Ka sawi tum ber zawk chu kan colony phei ah hian kawnghnuai atanga kalin Pi Ruatsangi te kawmthlang huan hi a kaltheih vek a, keipawh zingah exer ka la thin a, kawnghnuai lamah ka kal thin. Mazuali a bo tih ka lo hria a, ahnuah Valtea a ni leh a. Valtea thil hmuh vel ka hriat phei kha chuan mak ka ti em em a, ka ngaih pawh a thalo hle. Tichuan tukin zing exer ka lak khan Pi Ruatsangi te kawmthlang huan atang khuan ka kal lui leh hram a, chutah chuan thawm ka hria a ni." a ti a.

Chutih lai chuan Ricky-a nupui Wendy chu a lo kal a, "Kha thingpui in ru.." tih pah chuan thingpui min rawn pe a." Thingpui in pah chuan Nathana chuan, "Engthawm maw?" a han ti a. Ricky-a chuan, "Ka hrechiang chiah lo, tawng ri chu a ang ka ti. Min rawn ko ni tlat hian ka hria a, mangang au thawm te pawh a telin ka hria." a ti a. Nathana chuan, "Ava mak awm ve...han sawi zel teh." a ti a. Ricky-a chuan, "Huan mawnglam atanga rawn chhuak kha a ni a, ka zu pan hnai ngam vak biklo. Achhan chu naupang bo chanchin vel vang pawh kha a ni pakhat a, thil pawimawh tak chu a ni angem chu ka hrelo nang a, mahse envelop ka chhar a. Mahse ka la hawng miahlo, ka la kawl reng." a ti a.

Nathana chuan, "Khawimaw lo la chhin teh." a ti a. A roomah chuan a lut a, envelope chu a rawn la a. Nathana chuan a hawng a, thlalak hi a lo ni a. Thlalak chu a han en vang vang a, a ho angreng khawp mai. Rin bial (circle) hi a ni a, a chhungah chuan dot tereuh te te a awm bawk a, ho tak a ni. Dot chu a tam em avang chuan keilah chuan ka lo chhiar pek a, mahse ka lu a tihai vek thei, a tam lutuk kha chhiar zawh sen a nilo.

Nathana pawh chuan, "Umm...kan lo kawl ve hrim hrim ange." tiin thlalak chu a ak a. Chutih lai chuan Ricky-a nupui chuan bag akin, "Ricky, ka cazar dawnnia.." tih pah chuan a chhuak daih a.

Minute 20 vel kan inkawm leh hnu chuan kan chhuahsan ve ta a, huiham...enge maw kan an zel dawn ni? Nathana chuan, "VAltea te inah khan kal leh teh ang, Valtea bulah thlalak hi hmuh ve hrim hrim ila atha ang." a ti a.

Ricky-a te in atanga Pu Engmawia te in kal dawn chuan Pi Ruatsangi te kawmthlang atang hian a hnai zawk a, kawnpuia han chhuah chhoh chu a hahthlak mai mai avang chuan Pi Ruatsangi te kawmthlang atang chuan kan kal ta a. Mahse hetah hian thil mak tak mai a thleng a ni...Pi Ruatsangi te kawmthlang huan bul kan thleng chiah chu huan mawng atang chuan hmeichhe aw tham nalh em em mai hian, "HETAH...HETAH KA AWM E.." a rawn ti a, a aw lah chu a khawk rum rum mai.

Chuveleh khua te chu a rawn dur deuh khup khup hian ka hria a, mumang ang ruaiin ka awm thei hial. Nathana ka en a, ani pawh chuan a hre ve ngei aniang, "Rinawm, i hre ve em?" a ti vat a. Keichuan, "Hria e...Sir, Valtea sawi ang deuh khan.." ka tih lai chuan Nathana chuan huan mawnglam chu a kawk a, "Khu..khu..enteh." a ti a. Huan mawnglam ka zu en chu hmeichhe naupang niawm tak, kawr var vek ha, hmai var vek, mahse hmethat hmel tak si hi ka hmu a.

A hmel erawh a hmuhchian theihloh, keimah hrim hrim chu ka diklo, ka mang ruai mai. Chunu chuan min rawn hui a, Nathana chuan a pistol a phawrh a, "Zui ang." a ti a. Keipawh chuan ka pistol chu ka phawrh ve a, kan zui ta a. Kan pan hla zel a, mahse mak tak maiin kan hmeichhe zui mek chu a bo daih mai. Kan awmna kan han en a, thingkung atam em em ringawt mai a ni.

Nilo...kawng kan bo der mai, mahse kan kal hla em em lo asin. Chutah thingkung kar velah chuan tu emaw vei leh zuk ang deuh deuh te chu kan hmu a, awm a nuamlo ngei mai. He Slenderman kan tih hi eng huai emawni a ni chiang mai, nge nia khawmu in min chawi ve dawn zawk..kan in ka va ngai em! Nathana chuan, "Rinawm, engkim hi a thim ruih mai, khawiah nge kan awm?" ati a.

Keichuan, "Ka hre biklo...khawnge khanu kha?" tiin ka rak chel chul mai a, kan mangang dun kher mai. Chutah leh kan hmazawn, ft 30 vela hla ah chuan alem amaw kan tih, sap thawnthu ami, alemziah pawh kan lo nuihzat, pa sang tak leh cher em em mai, hmai neilo....rapthlak em em mai chu a rawn ding ta zuah mai le.

Ka dingngil zawt a, Nathana pawh a meng kawk kawk mai. "Saw...saw saw..Slenderman a ni em?" ka ti tawk tawk a. Nathana chuan thaw hluam hluam hian, "AW...Saw ngei saw Slender man chu a ni e." a ti tham tiak a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)