NATHAN SEASON-3 (Episode-17) BLACK POLITICS (Pt-1) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-17) BLACK POLITICS (Pt-1) by:Aaron Malsawmdawngzuala

Unread post by Aaron Dustin » July 2nd, 2020, 11:12 pm

NATHAN SEASON-3

Episode-17

BLACK POLITICS

(Part-1)

Written by : Aaron Malsawmdawngzuala

***********


(Tun tum chu thawnthu angin ka rawn ziak ve leh thung dawn ani. Chief Minister hmingte, Politician hming te, Education Minister hmingte leh Politician hmingte hi phuahchawp vek an ni a, kan ram Politician te sawichhiatna lam a nilova, an mahni behchhana ziak ka ni hek lo.)

Case pakhat buaipui chhunzawm turin ASP Rinawma chu DGP Zonunsanga chuan khaw dangah a tir leh ta a, Nathana pawh a khua ava har leh dawn em. Rinawma kal hma hret chuan Nathana chuan, "I vanduai hle mai, Sr.SP thar kan nei dawn a, hmeichhia lehnghal. A chhelo lutuk anla tizui, i hmu ve hman dawnlo anih hmel." a han ti vel a. Rinawma chuan, "A ho emai, ka lo haw hunah ka rawn hmu ve dawn tho." a lo ti a.

Rinawma pawh chu case buaipui tur chuan khawdangah chuan a zin ta a, Nathana pawh a lung a leng lawk kher mai. Sr. SP thar chu a rawn thleng ta ngei a, Nathana te department chuan an lo welcome tha hle a. Kum 40 pawh a la tling lo maithei, chhelo zet leh pian fuh em em mai. Hmeltha zet, ngo lutuk lo, hang ni bawk silo, mitmeng fiah kak mai leh nuimawi em em mai hi a ni a. A hming chu Lalrindiki, RD-i a ni. Nathana senior chiah a ni a, a awmzia chu Nathana hi SP (Superintendent of Police) a ni a, SP hi Deputy Commissioner of Police (DCP) tih nen a in ang reng a ni. RDi hi Senior Superintendent of Police niin Sr.DCP tihna a ni.

Nathana nen pawh chuan an innel nghal hle a, an inkawmngeih nghal em em a. Rdi pawh mifel tak niin a nelawm em em a, a nikhatna atang chuan an kawmngeih nghal em em vek mai a ni. Rdi hi hmeltha tak leh pianthiam tak ni mahse, kan nula chhuanvawr Inspector Amandai erawh a tluk chuang hauh lo ania.

A tukah chuan Aizawl Women's Hostel ah ruang pali lai mai chu chhar a ni a, student pathum leh Warden pakhat te an ni. Rdi ruala lo join thar pakhat SI Ramnghaka te nen chuan Rdi te leh constable thenkhat te chu Hostel ah chuan an va kal a, ruang awmna room chu an han lut a. Rdi chuan a han enkual a, chhuatah te chuan thisen a kawi nuai mai a.

Hmeichhe pahnihte ruang chu khumah awm a, pakhat erawh chu inchung fan ah inawkhlum ang takin a inkhai thung. Khuma mu hmeichhe pahnihte chu an banah zaina hnuhma a awm a, alan dan chuan an thisen zam an zai chat a, mahnia inthat an ang hle. Thisenin bangah chuan engemaw hi a inziak a, mahse eng thu nge inziak erawh hriat a har hle thung. Rdi chuan police te bulah chuan, "Room zawng zawng hi dapchhuak vek ula, engmah hmaih suh ang che u." a ti a.

SI Ramnghaka bulah chuan, "Security gurad saw lo be bawk ang che." a ti a. SI Ramnghaka chuan Security chu thu a han zawt fiah a, Security chuan, "Nizan khan tlaichaw eiturin choka lamah ka kal a, chumi hlan chuan a ni hethil hi a thlen ni. Warden pawh khan chaw ei turin min ti a, chuzawng chu a ni mai, abak engmah ka hrelo." a ti a. Rdi chu Warden room ah chuan a lut a, Warden chu a khumah chuan nunna nei tawhlo tih hriat tak hian a lo let reng a. Rdi chuan constable te bulah chuan, "A ruang hi Post Mortem turin phur phei rawh u." a ti a, an phur phei ta a.

Nathana erawh a case a nilova, a tel ve lo hrim hrim. Rdi chuan Hostel Warden Puitei nu leh pate chu thu a zawtfiah ve leh nghal a. Rdi chuan Puitei nu bulah chuan, "Engtik nge Puitei hi inbiak hnuhnun ber?" tiin a zawt a. Puitei nu chuan tap aw tuau hian, "Nimin tlaiah khan kan inbia a, engmah diklohna a neih awm kan hrelo. Kan fanu hian mahni inthahduhna a neih kan ringlo ani...a theihloh hrim hrim." a ti a.

Rdi chuan, "Mahse Police ten evidence kan hmuh ho ah hi chuan mahni inthat ngei a ni si a, kan zawhna awmchhun chu engvang nge tih hi a ni." a ti a. Puitei pa chuan, "Ka pi, kan fanu hian hetiang thil hi a ti hauh lovang, kan awih theilo a ni." a lo ti ve bawk a. Rdi chu a han thaw huai a, "Umm...tunah chuan kal phawt ula, mahse khawiah mah lo chhuakbo suh ang che u. Investigation ti turin kan rawn kal zeuh zeuh dawn ania." a ti a. Constable Siama bulah chuan, "Siama, an statement lo la ang che aw." a ti a, Puitei nu leh pate chuan Statement chu an pe a, an haw ta a.

Press mite beng a thleng a, an rawn kal leh ta sup sup mai. Education Minister Pu Lalhmingliana chu media ho chuan zawhna an zawt a, "Education Minister i ni a, he thihna chungchangah hian enge sawi duh i neih?" tiin an zawt a.

Pu Lalhmingliana chuan, "Cheif Minister hnenah thutawp chu ka sawi tawh, ani chuan he case chhui mektu SP Rindiki kutah engkim a dah a, hnuchhuinaah a pui dawn tih a sawi bawk a ni. Nangni media ho pawh hian hetiang inhnialna leh sorkarte demna hi chawkchhuak reng lo turin ka ngen bawk che u a ni." tiin a chhang a.

Chutih lai chuan Opposition Party lama an Leader Pu Sanghluna chuan media ho hmaah chuan, "Kan sorkar hian hmeichhiate hi a venghim zolo a ni, Sorkar College ah ngei thihna a thleng a, Sorkar thiamloh a ni. Hmeichhia te zahawmna hi kan ram zahawmna a ni a, chuvang chuan a venghim zolotu kan CM hi bang mai rawh se. Hei hi ka sawi duh, kan CM Pu Lalfamkima hian he case hi engah mah a ngai lova, engatan mah a tilo a ni." a lo ti ve bawk a. College zirlaite chuan kawng an zawh a, Sawrkar an dem thu te an auchhuah pui nasa kher mai.

Constable Siama chu Rdi Office ah chuan a rawn lut a, file pek pah chuan, "Ma'm, ruang kan hmuhna room ah khan blood samples pali chauh nilovin panga lai a awm a ni. Tin blood sample pangana chu midang thisen daih a ni bawk, Warden thisen kha a nilo." a ti ta mai a. Rdi chuan mak tih hmel tak hian, "Enga? Tak tak maw?" a ti a. Siama chuan, "Ni e, mahse chu blood sample pangana chu tu thisen nge tih hriat ala nilo." a ti a. Tlai a lo ni a, CM Pu Lalfamkima pawh chu Press Meeting nei tur chuan Assembly House lam a pan ta a, Meeting chu an nei ta a. Press mite zinga mi pakhat chuan, "Sir, Aizawl Women's Hostel-a thil thleng ah khan enge sawi duh i neih le?" a ti a.

CM chu ahan nui vel suk a, "Aizawl Women's Hostel hi a zahawm a, keipawhin ka ngaihtuah hle. He thihna hi kan chhuichhuak ngei anga, khang student te kha engvanga inthat nge an nih tih hi kan hrechhuak ngei ang. Hetia kan rama hmeichhiate ka ngaihtuah a, an himna tur ka ngaihtuah thin avang hian mipui fak pawh ka hlawh hle thin a ni. Dan zawm ila, atha animai." a han ti vel a. Press mite zinga hmeichhe pakhat chuan, "Anih leh Mizoram chhunga thildang thleng te hi....tualthahna te, rukruk te leh eirukna te, pawngsual leh kidnap te pawh a awm hnem ve ta malh malh khawp asin. Heng thil thlengte lak ata hi mipui an him thei dawn em ni?" tiin a lo zawt ve a.

CM chuan rum zet hian chunu chu a melh a, "Bawihi, media ho hmaah hian mipuite kan ngaihsaklo anga lantir i tum em ni? Ni lul love...kei hi mi zawng zawng tan CM ka ni a, CM lo ni tawh ho zawng zawngte aia tha in hna ka thawk bawk ang. Mi retheite tan, mi hausate tan pawh...tutan pawh CM ka ni. Enge in duh chu sawi ula...tunah hian sawi ta che u. In tan, in himna tur anih chuan ka tihsak ang che u." a han ti leh vel a.

Press mite zinga mi pakhat leh chuan, "Sir, DCP Nathan Malsawmkima hi mipuite hian State Crime Branch Headquarter-a let leh turin an duh a, he case ah hian tel ve se tiin an sawi sup sup a ni." a ti a. CM chu a han ngawi vang vang a, "A tha e, Police Officer huaisente hi ka ngaisang a ni. Mahse Officer thenkhatte, an hmingthat duh vanga pawisawilo tawr tir thinte an awm a, lawmman an duh vangte, medal an duh vangte leh mipui fak an duh vangte in misualte an hum a, pawisawilo te lakah case te an file daih zel a, heng hi ka duhlo. Hetiang Police Officer te hi chu kan ramah hian an awm ve tur a nilo, chu chu a ni ka sawiduh chu." a ti a.

Abula PA lo ding bulah chuan, "DGP Pu Zonunsanga kha lo hrilh la, DCP NAthan Malsawmkima hi Crime Branch Headquarter ah ko let leh rawh se." a ti a. Press mite chu an lawm kher mai, kut an beng dar dar a.

*********

Zan a lo ni a, dar 8 pelh hnu velah chuan Nathana te in kawngka chu a rawn in kik dat dat a. Sanvi chuan ava hawng a, SP Rdi a lo ni a. Sanvi chuan, "Ehe Officer, lo leng rawh." a ti a. Rdi chu rawn luh pah chuan, "In pa a awm em?" a ti a. Sanvi chuan, "Awm e, ka va ko ang. Lo thu rawh, thingpuite kan in dawnnia." a ti a. Sanvi chuan Nathana chu ava ko a, Nathana chu a lo chhuak a. Rdi chuan, "Ka tibuai che em?" a ti a. Nathana chuan, "Tibuai love, Ma'm...enge i duh ve teh mial a?" a ti a. Rdi chuan, "Inbe lawk ang hmiang." a ti a. Nathana chuan, "Awle,verandah-ah sawn a pawi em?" a ti a.

Rdi chuan, "Pawi love." a lo ti a. Verandah-ah chuan Nathana leh Rdi te chu an inbia a, thingpui an indun bawk a. RDi chuan, "Enteh Nathan, suicide case ka chhui mek hi, suicide a niin ka hrelo." a ti a. Nathana chuan, "Ngati maw?" tiin a lo zawt a. Rdi chuan, "Ruang kha pali kan hmu a, mahse blood sample chu panga ani thung." a ti a. Nathana chuan, "Anih chuan tualthahna zawk a ni i tihna em ni?" a ti a.

Rdi chuan, "Umm..a ang ka ti." a ti a. Nathana chuan, "Ma'm, enge ti tura min duh a?" a ti a. Rdi chuan, "Crime Branch Headquarter ah DGP in a sawn leh tawh che a, Nathan..min pui rawh. He case ah hian incharge ni la, i kutah engkim ka dah ang." a ti a. Nathana chu a lawm kher mai, "Tehreng mai, Ma'm." a ti a, Rdi pawh chu a haw ta a.

Atuk zingah chuan Nathana pawh chu Hostel lamah chuan a va kal ve ta a, banga thisena thu inziak te chu a han en a. Tichuan chung mitthite note book ho chu a han enkual leh bawk a, "An handwriting a nilo, midang ziah a ni. He room-a an bungrua in hmuh ho zawng zawng kha ka en leh vek duh a ni, avaiin." a ti a.

SI Ramnghaka chuan a rawn la a, Nathana chuan a mal te te chuan a en a. Thi (necklace) te, sana te, bengbeh te, banbun te leh samkhuih te a awm teuh mai a. A tawpah chuan sim card a hmu tel ta a, paper them tereuhte a hmu tel bawk. NAthana chuan Rdi bulah chuan, "Ma'm, he sim hi check tir ila, call log te, contact list te leh sms zawng zawng nen ka hre vek duh a ni. Chuan he paper thema inziak hi....cheng nuai 5 payslip hi...tu hmingin nge an lakchhuah tih ka hre bawk duh a ni. Bank zawng zawng check vek angai ang, engemaw tak kan hmuchhuak ngei ang. Tin, college zirlaite zawng zawng pawh an chanchin detail in ka hre vek duh bawk ang." a ti a.

*********

Chhun a lo ni a, Rdi chuan phone call a dawng a. CM a lo ni a, "Hello ka pu, SP Lalrindiki speaking.." tiin zah takin a bia a. CM chuan, "Officer, kha case i chhui mek kha, suicide case kha, in chhuichhuah vat ka beisei." a rawn ti a. Rdi chuan, "Sir, kan theihtawp kan chhuah mek e." a ti a. CM chuan, "Nangni ang Police Officer huaisen leh rinawm tak te hi chuan in chhuichhuak vat dawn tih ka hria a ni..mahse Opposition lam ho hian engmah issue an siam ve lo tih hre reng la, tin hei hi hre bawk ang che. In Department-a in Superman kha...DCP Nathan Malsawmkima kha..chintawk neiin che rawh se." a ti khur khur a. Rdi chuan, "Awle Sir." a ti a, phone chu a dah ta a.

Phone dawr ah chuan Rdi leh Amandai te chu an va kal a, Manager bulah chuan Rdi chuan, "Ka pu, SP Lalrindiki, Crime Branch atanga lo kal kan ni a. He simcard hi a detail in ka hre duh a ni.." a ti a. Manager chuan, "Awle, tehreng mai." tiin simcard chu ala a, a check ta a. Manager chuan, "Ka pi, he sim card neitu hming chu Katty Lalchhandami a ni." a ti a.

Rdi chuan, "A address i hre thei em?" a lo ti a. Manager chuan, "Aizawl Women's College a inti ringawt a, flat number 12 a inti bawk." a ti a. Rdi chuan, "Ka lawm e, call details kan hre duh bawk a." a ti a. Manager chuan a han check leh a, "Ka pi, 971937772 tih number ah hian a call zing khawp mai, he number nei tu hming chu Lalrammawia a ni." a ti a. Rdi chuan, "Anih leh last call?" a lo ti leh a. Manager chuan, "Last call chu 8123021115 a ni." a ti a. Rdi chuan, "Kan lawm e." tiin dawr chu an chhuahsan ta a.

Rdi chuan Nathana a call nghal a, "Hello Nathan, number pahnih ka hmuchhuak a...lo ziak thla ang che." tiin number pahnih te chu a hrilh a. Chumi hnu deuh chuan SI Ramnghaka chuan Nathana chu a rawn call leh a, "Sir, engkim kha fake a ni. Fake identity, fake address..fake vek a ni.

Bank ah chuan ka kal a, pawisa kha Lalrammawia tih hminga draw a ni a, a address pawh an sawi nghal a. Ka va kal a, mahse Lalrammawia tih hming an awm lo, tumah an awmlo hrim hrim." a ti a. Nathana chuan, "A tha e, bank ah chuan va let leh ula, ka lo kal ve nghal ang." a ti a. Bank ah chuan SI Ramnghaka leh Siama te chu an let leh a, Bank manager chu an lo be mek a.

Nathana a rawn thleng a, Manager hma takah chuan ava thu a. Nathana chuan, "Transaction hnuhnung ber engtik nge?" ati a. Manager chuan, "Wednesday 6pm khan a ni a, Apex ATM booth atanga lakchhuah a ni, Bawngkawnah.." a ti a. Nathana chuan SI Ramnghaka chu ava melh a, "Wednesday chu tualthahna thlen zan kha ani tiraw?" a ti a, Ramnghaka chuan, "Ni e, Sir." alo ti a. Nathana chuan Manager bulah chuan, "CCTV footage ka en duh a ni." a ti a. Manager chuan, "Aaa..englo ania ka pu." a tih lai chuan nelawmloh zet hian Nathana chuan, "CCTV footage ka en duh..tunah." a ti khur khur a, Manager pawh chuan hlauh hmel tak hian, "Awle." a ti a.

Apex ATM CCTV camera chu an check ta a, mi hrang hrangin pawisa chu an rawn la chhuak a, Rdi pawh a rawn thleng ve nghal a. Footage chu an check zel a, dar 6 bawr vela ATM booth-a rawn lut, pa pakhat hmuihmu nei chu Nathana chuan a en reng a, "Dar 6 chiah chiah a ni a, last transaction kha dar 6 a ni bawk. Hepa ngei hi a ni ang, a thlalak hi print ang che." tiin Control room duty chu a hrilh a.

Constable Siama chuan, "Hepa hi..Lalrammawia chu a ni anga. Mahse amah hi ka hria a ni, contractor Pekhlua ngei kha a nih hi." a ti a. Rdi chuan, "I hria em ni?" a lo ti a. Siama chuan, "Hria e, Minister te nen pawhin an thawkho alawm." a lo ti a. Nathana chuan, "A tha e, kal phawt ang u." a ti a, an chhuak ta hlawm a. Zan a lo ni a, CM chu an inkawta pipu ah chuan thuin a nau Sena chu phone in a lo be mek a, "Bawiha, i dam amaw? Khawnge i awm a?" a ti a. Sena chuan, "Enge ni a?" a rawn ti a. CM chuan, "Kan thawhpuipa Pekhula kha police ten an man a, enge a chhan va hrechiang teh." a ti a, phone chu a dah ta a.

********

Zanah chuan Station lamah chuan Rdi pawh chu ala awm reng a, SI Ramnghaka leh Siama te pawh anla awm bawk a. Rdi chuan, "Rawn hruai chhuak teh u." ati a. Pekhlua chu cell atang chuan an rawn hruai chhuak a, Rdi chuan, "Lalrammawia debot card hmangin pawisa i la chhuak a, enge awmzia?" a ti a. Pekhlua chuan, "Lalrammawia a? Tunge chu chu?" a lo ti hu mai a. Rdi chuan, Chu chu alawm kan zawh che..Lalrammawia nen hian enge inzawmna inneih a? A debit card atangin pawisa i la chhuak si a, enge awmzia?" tiin a zawt leh a.

Pekhlua chuan, "Card te chu pahnih chiah ka nei, Voter card leh License a nimai. In awihloh chuan ka hmuh ang che u, thla hmasa khan Government Scheme hnuaiah Adhaar Card ka apply bawk." a han ti nghal zung zung a. Chutih lai tak chuan CM Pu Famkima nau Sena leh mi panga vel chu an lo lut a, Sena chuan ring zet hian, "SP Madam, i dam maw?" tiin a rawn nui lut huah huah a.

Pekhlua chuan, "Ehe, Sena...nangni in ni maw?" a lo ti a. Sena chuan paper pakhat hi rawn keng lutin Rdi chu a rawn pe a, "Enchiang rawh..signature pawh a awm kim vek e." a ti a. Sena bawk chuan Pekhlua bulah chuan, "Lo kal rawh le, kal ang le. Ka u in a bail chhuak che a, haw vat ang." a ti vel a. Rdi chuan paper te chu a han en a, a lo dik vek bawk si. Sena te chuan Pekhlua te chu an hruai chhuak ta a, Rdi pawh a thinrum hle mai.

Zingkar a ni a, khua pawh a la var tha fumfe meuh lo. Sena te chuan ramhnuai lamah Pekhlua chu an tlan pui daih mai a, Sena chuan Pekhlua chu a vithlum ta ringawt mai. Zing dar 9 a lo ri a, DGP chuan Rdi chu a office ah a ko lut a.

DGP chuan, "Enge awmzia RD? Eng investigation nge i khawih mek hi?" a ti a. Rdi chuan, "Sir, Girl's Hostel suicide case tho kha ania." a tih lai chuan DGP chuan, "Enteh, kan Department ti hminchhe zawng chuan che hauh suh ang che, tichuan kha case kha titawp bawk rawh." a ti ta mai a.

Rdi chuan, "Mahse, Sir.." a tih lai chuan DGP chuan, "Ngaithla teh, Lady SP i nih angin Home Minister chuan thil a tihsak dawn che a, buaina thlen reng reng suh ang che. Open and Shut Suicide case angin ziak la, ka dawhkanah lo dah ang che. Pending case tamtak ala awm a, chu chu buaipui zawk rawh." a ti khur khur mai a. Rdi chuan, "Yes Sir." tiin a chhuahsan ta a.

Zanah chuan Rdi chu Nathana te inah chuan ava leng leh ta a, Nathana nen chuan verandah ah bawk chuan an titi leh a. Rdi chuan lungawilo tak hian, "Eng department nge maw ka rawn join tak hi le? Murder case tih chiang em em mai case a ni a, mahse keini lah chuan suspect pakhat lek pawh kan man thei silo, court in a bail chhuak nghal daih bawk si. Hetiang anih te chuan kan training lai khan Police te hi Pu Gandhi-a zawngte pathum ang mai kha kan ni e tiin min hrilh law law se...See no evil, Hear no Evil and Say no Evil to the Criminals...chutiang chiah chu kan ni." a ti bul bul a.

Nathana chu a nui suk a, "Ma'm, kan department cultur leh system chu hei hi ania lawm. He systemah hian kan awm a, kan sual chhuah angai a ni. Special training tuman an mamawh biklo, kan department hian engkim min zirtir vek a ni." a ti a. Rdi chuan, "Eng chu maw kan sual chhuah ang? DGP khan open and shut suicide case tiin thutawp ziak turin min ti asin." a ti a. Nathana chuan, "Ti hian ti teh, suicide report file chu DGP hnenah thawn rawh.." a ti a. Rdi chuan, "Ka thawn dawn alawm...engkim a tawp ta vek a nih hi." a ti a. Nathana chuan, "Nilove, a la tawp lo. Ala intan dawn chauh a ni..." a ti ta mai a.

Rdi chuan, "Enge awmzia?" a lo ti a. Nathana chuan, "Number min pek kha, ka chhui zel a. Tichuan hmeichhe tleirawl pakhat number a lo ni a, TRM Hospital-a patient pakhat a ni. A enkawltu nurse chuan a luah hliam a tawrh thute, nikhawhrelova a awm thute chu min hrilh a. A pocket ah phone a lo awm a, mahse tu vak mahin an la hrelo tiin min hrilh a ni. Mam'm, hei hi kan chance neihchhun a ni tawh, nang leh kei leh kha nurse nu chauh khan kan hria. Kan pahnih thuruk ni rawh se." a ti a.

(TO BE CONTINUE)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)