NATHAN SEASON-3 (Episode-18) BLACK POLITICS (Pt-2) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-18) BLACK POLITICS (Pt-2) by:Aaron Malsawmdawngzuala

Unread post by Aaron Dustin » July 3rd, 2020, 10:57 pm

NATHAN SEASON-3

Episode-18

BLACK POLITICS

(Part-2)

Written by : Aaron Malsawmdawngzuala

**********

A tuk zingah chuan Press meeting chu an nei leh ta a, CM chuan media ho hmaah chuan, "Ka sawi tawh ang khan thu neitute chuan he case ah hian 'unbiased investigation' an order a, chu chu kan ti ngei bawk a ni. Investigation fimkhur taka an zawh hnu chuan report chu Home Minister hnenah Department te chuan an submit a, a result chu mahni intihlum - suicide ngei a ni." a ti ta mai a.

Press mite pawh chu an han phun nak nak hlawm a, CM bawk chuan, "Opposition Party ten min lo tih hmingchhiat an tuma, buaina an siam zel a ni. Hei vang hian ka lungawi lova, an chungah action ka la ngei ang. Tin kei hi CM ka nih angin he kan state zimte enkawl hi ka mawhphurhna a ni a, ka mawhphurna chu tha takin ka hlen bawk ang. Tin, Police Officer huaisen, DCP Nathan Malsawmkima pawh ka chhuang takzet e." a han ti vel a.

Press mite chuan kut anlo beng dar dar hlawm a, CM chuan, "Mahse inlak hmingthat ka tumna a nilova, hlawkna tel ka tum hek lo. DCP NAthana hian chawimawina sang tak a phu a, a fakawm tak zet zet a ni." a han ti leh a, meeting chu an bang ta a.

CM chu a office ah chuan a let leh a, a thawhpuite nen chuan an inbe mek a. CM chuan, "Tun tum chu Law & Order te hi ka maintain tha em em a, nangni pawh in thawk tha e. Vote pawh tam tak kan hmu ang, nangni pawh tang hle rawh u. Fodder machine promote ah khan tang nasa deuh bik ang che u, in thawh that viau chuan in ipte pawh a ruak miah lovang." a han ti vel a.

Chumite chu an haw ta a, CM Assistant chu a lo kal a, "Sir, hetah hian sign a ngai." a rawn ti a. CM chuan file chu ahan keu vel a, a Assistant bawk chuan, "Sir, chhiar hmasa rawh aw." a rawn ti zauh chu CM chuan a haw ta em em mai a. Rum zet hian a melh a, "Eng? Engvangin maw? Tinge nangman i chhiar mai loh a? IAS Degree i nei ani lawm ni? Ve lutuk ache, i degree hi fake a ni hial lo maw?" a ti hrep mai a. Assistant chu a ngawi reng a, CM bawk chuan, "Chhuak rawh." a ti vak a, a chhuak ta a.

*********

SI Ramnghaka chuan a phone a phawrh a, a meng kual zeuh zeuh a, tu emawni hi a phone ta a. Ramnghaka chuan khur dar dar chung hian, "Hello, Sena...College case tho kha ka rawn sawi dawn ania. Kha hmeichhia kha..DCP Nathana'n ala dam tih a hrechhuak ania. Opposition party ten Nathana hi an support vek bawk a, TRM Hospital ah khanu kha a awm mek." a ti a. Sena chuan, "Atha e, ka lawm e." tiin phone chu a dah ta a. Nathana phone chu a rawn ri a, hmeichhe damchhuak awmchhun enkawl mektu TRM Hospital nurse kha alo ani a, "Hello, enge ni ta?" a han ti a.

Nurse chuan, "Ka pu, blood sample min pek leh kan damlonu thisen hi a inmil chiah e." a ti a, Nathana chuan, "Ka lawm e, ka lo kal e." a ti a, Hospital lam pan chuan a kal ve ta nghal a. Hospital kawtah chuan constable pahnih an lo awm a, Nathana chuan ava pan a, "Engkim a tha maw?" a va ti a. Constable pakhat zawk chuan, "Engkim a tha e, mahse sawlai thingkung bula lukawlh pa saw ka ringhlel riau, min rawn en zuk zuk a, zingkar atang tawh khan damdawiin hi a hel reng a ni." a ti a. Nathana chuan, "A tha e." tiin a kalsan ta a.

Chu lukawlh pa chuan Police Constable te lam chu a va melh leh a, Nathana a awm talo chu a thaw hawk mai a. Lehlam a hawi leh chiah chu a hma lawkah chuan Nathana a lo ding reng mai a, a phu zawk mai. Nathana chuan a rek a, "Tuin nge rawn tir che?" ati a. Lukawlh pa chuan, "Sena." a ti hluam hluam a.

Nathana chuan, "Sena chu khawnge a awm?" tiin a zawt leh a, lukawlh pa chuan Sena chenna in chu a hrilh a, Nathana chu ava kal ta nghal a. Sena te in a thleng chu kawngka chu a han hawng tlang nghal rawk a, ahma zawn takah chuan palian pui pui pathum an lo ding khur mai. Nathana chu an tham lut a, an hnek ta siah siah mai. Mahse Nathana chuan a pistol phawrhin an ke ah leh banah te chuan a kahsak a, pakhat phei chu a kap hlum palh lehgnghal a.

*********

Sena chu damdawiin lam pan chuan a kal a, a thleng chiah chu damlo an enkawl mek, a damchhuak awmchhun ber Pricilla-i ward awmna ah chuan a lut nghal a. Pricilla-i lo mu reng chu silai chuan a tin a, mahse hnunglam atang chuan Nathana chuan silai chu a rawn chuh vat a, ward pawnah chuan an in nawr chhuak a.

Silai chu a thlauh a, chuveleh Nathana chuan Sena chu a hnek ta siah siah mai a. Hospital chhungah chuan an inum kual a, mahse vanduaithlak takin Sena chu a tlanbo thei hlauh mai a. Nathana ngaih chu a tha ta hauh lo mai, Doctor te bulah chuan Pricilla-i chu an in lama kawl mai a dil ta a, hlawh neiin nurse a chhawr tel nghal bawk a. Zanah chuan Rdi bawk chu a rawn leng leh a, pawnah chuan thingpui in pah bawk chuan an titi leh ta a. Nathana chuan, "A hming chu Sena a ni a, CM nau a ni.

He case ah hian a inrawlh ve tih hi ka chiang a ni, Ma'm." a ti a. Rdi chuan, "Pekhlua rawn bawil chhuaktu pawh kha amah Sena chu a ni ngei ang, mak deuh mai chu Pekhlua kha khami ni atang khan a bo vang vang bawk. Mahse, evidence tha tak nen lo chuan engmah kan ti thei silo." a ti a. Nathana chuan, "Ma'm, crime hi chu inbuhruksiak ang deuh hi ania, nuam i tih poh leh i khel nasa tulh tulh ang. MAhse he game ah hi chuan tlawm zawk an awm angai a, chak zawk an awm angai a ni." a ti a.

Atukah chuan DGP chu CM te inlam pan chuan a kal a, Cm chuan an inkawtah a lo nghak a. DGP bulah chuan Inspector dangte leh Constable te an awm ve bawk a, CM te in kawtah chuan minister te leh politician dangte an awm ve bawk. CM chuan, "Ehe..lo kal ta che DGP, lo kal rawh." a ti a. DGP chu CM hma ah chuan dingin salute a pe a, CM chuan, "Enge kan Law & Order dinhmun chu ni ta a?" tiin a zawt a. DGP chuan, "Engkim atha e." a ti a. CM chuan a pheikhawk chu a han en a, a hrui chu a lo inphelh a.

CM chuan, "DGP en teh khu...a inphelh a nih khu.." a ti a. DGP chuan a zu en a, tihngaihna a hrelo kher mai. CM bawk chuan, "Min han suih sak lawk mai ta che..ka dul a kiar si a, ka kun theilo a ni." ahan ti vel a. DGP chuan a hreh hle mai, a ngawi reng a. CM bawk chuan, "Amak e aw DGP, i hreh em ni? Keimaha ka suih dawn chuan ka tlu anga, chutiang chiah chuan Sorkar pawh hi a tluchhe ve nghal animai. Media ten anlo hria anga, breaking news a ni mai dawn asin." a han ti leh vel a. DGP tlawm lutuk chu a thinrim kher mai, a hmei a sen vek thei hial a.

CM bawk chuan, "I suih anih chuan i hna hi ila chelh reng thei anga, anihloh chuan.." a ti khur khur mai a. DGP chu a thingthi a, CM chuan nuih pah hian, "Zak reng reng suh, min pui ani ve mai alawm. In SP chhelote-i pawh a lo kal mek ania, suih vat teh." a ti ham ham a. DGP chuan hreh chung chung chuan a suih ta a, CM lah chuan, "A bal a nih kha..DGP ka kun ve thei silova, i rawmawl phawrh la, han hru fai law law teh." ala ti ta deuh deuh a. DGP pawh chuan a rawmawl a phawrh a, a hrufai leh ta a. CM chuan, "DGP fel tak ini." tih pah chuan a luhsan ta daih a.

******

Rdi chu alo thleng a, CM chuan a office ah a ko lut a. CM chuan, "Vawiina breaking news kha i en tawh em?" a ti vel a. Rdi chuan, "Aih enlo, enge ni a?" a lo ti a. CM chuan TV chu a on a, TV ah chuan news an lo puang mek a.

Reporter chuan, "Vawiin zinglam khan Mizoram Chief Minister Pu Lalfamkima te chenna in bulah thil mak leh sawi hlawh tak mai a thleng a, mipuite pawhin CM an dem hle. DGP rank Officer pakhatin kan CM chu a pheikhawk hrui a suih sak a, a hrukfai sak bawk." a rawn ti ta mai a, a video nen lam chuan a rawn lang vek mai a. CM chu a nui a, "SP Madam, DGP chuan ka pheikhawk hrui lo suih pawh nise enge pawi vak a? Pheikhawk hrui satliah ani hleinem.

Chuan maw SP Madam, hetiang thil hi i chungah a thleng ve ang tih ka hlau a ni." a ti vel a. Rdi chu a rilru ana kher mai, "Sir, investigation ti tur chauh ka ni e." a ti tham tiak a. CM chuan, "Pu Gandhi-a thuvawn pathum te kha, kha kha i kalpui zel anih chuan i him ang. Mahse in department tana i inla changtunu viau a nih chuan i tan a thalo ang." a ti khur khur mai. Rdi chu a mittui a tla hial a, "Ka kal ange." tiin a chhuahsan nghal a.

Zan alo ni a, Rdi chu Nathana te inah chuan ava leng leh ta a. Rdi chu a tum hmuk mai a, engmah sawilovin a ding ngawi reng a. Nathana chuan, "Enge ni a, Ma'm? I rilru a hah em ni?" a ti a. Rdi chuan, "Hah love." tih ringawt hian a lo chhang a. Chutih lai chuan door bell a rawn ri a, SI Ramnghaka a lo ni a.

Nathana chuan, "Enge ni ta?" alo ti a. Ramnghaka chuan file pek pah chuan, "SP Rdi te inah ka va kal a, alo awm silova. In in lamah a leng tih ka lo hria a, hemi file hi ka rawn pe dawn a. Kan hotuten pe turin min ti a, Sir." a rawn ti a. Nathana chuan, "A lawmawm e." tiin file chu a lo la a, Ramnghaka pawh chu a haw ve leh ta a. Rdi chu a lo lut a, Nathana chuan, "SI Ramnghaka a lo kal a, hemi file hi a pe duh che a ni awm e." a ti a. Rdi chuan, "Tikhan lo dah rawh." ati leh hmuk a. Nathana chuan, "Enge ni ta Ma'm? Engemaw tal i sawi dawnlo em ni?" tiin a han zawt leh a. Rdi chuan, "CM in min ko a, vawiin khan.." a ti a.

Nathana chuan, "Enge a lo sawi a?" a ti leh a. Thinrim hmel tak hian Rdi chuan, "Engvak nge maw a sawi ang le? Saw mi tenawmpa saw, vawiin khan min vau vak a ni." a ti a. Nathana chu a han meng kawk a, a han nui suk bawk a, "A vau che maw? Engtin?" tiin a zawt leh a. Rdi chuan, "NAthan, he case hi investigation kan la kal pui mek tih a hria a ni. Min vau a, thah ah te hial min vau asin." a ti leh a.

Chuveleh silai a puak dur dur a, Nathana te tukverh darthlalang pawh a keh ta chuai chuai hlawm mai. Sanvi chuan a fate pathum chu room lamah a luh pui nghal a, Nathana leh Rdi chuan Pistol an phawrh nghal a. Pawnah chuan an tlanchhuak a, an rin ang ngeiin Sena te leh midang 10 rual vel hi an lo ni a. Nathana leh Rdi chu motor lam an pan nghal a, Sena te nen chuan an inkap ta bur bur mai.

Professional ve ve ta na na na chu Nathana leh Rdi te chuan an kaphlum malh malh hlawm mai a. Chutia an inkah lai chuan Sena silaimu chu a zo a, ban phen atang chuan SI Ramnghaka chuan Sena chu silai va pe in, "Kha le Sir." a va ti a. Chu chu Nathana chuan a lo hmu hman a, mak a ti ngei mai. Ramnghaka pawh chuan Nathana rawn hawi chu a lo hmu ve bawk a, a hlauthawng kher mai.

An inkah chhunzawm char char a, motor phen atang chuan Rdi chuan a phone phawrhin Station lam a phone a, unit 2 vel lo hruai tur leh an mahni backup tu turin a ko nghal a. Police Force pahnih te chu motor pahnihin an rawn kal ve ta nghal a, mahse kawng laka an tlan lai chuan truck lian em em mai pahnihte chuan chung Police te chu kawng reng lai deuh, kawnghnuai lamah chuan lo changin lehlam khamah an su thla ta daih hlawm mai.

Sena leh midang pali vel te chu an la dam a, hmanhmawh takin an motor lam panin an tlanchhia a, Nathana te chuan an um nghal a. Motor ah chuan an lawn a, SI Ramnghaka chu lawn ve a tum a, mahse an lo namthla tawp mai. Sena te chuan an tlansan ta a, Ramnghaka chuan, "Minlo nghak ru...in mawl em ni?" tiin a au zui vak vak a. Ramnghaka chu a tho a, ahma zawnah chuan Nathana a lo ding reng mai. Nathana chuan silaiin a tin a, tap chung hian Ramnghaka chuan, "Nilo Sir, min ngaidam rawh." tiin a ngen mawlh mawlh a. Nathan chuan rum zet hian a melh a, "Kan department ah ni reilote ilo awm ve chauh a, tunah min phatsan nghal mai amaw? Dam tlak i nilo, tenawm lutuk." a ti hrep a.

Ramnghaka chuan hlau tak chung si hian, "Hey, DCP min that theilo ania, phalna i neilo, dikna i neilo." a ti hluam hluam a. Nathana chuan, "Sazu that turin tu phalna mah lak angai lo." tih pah chuan a kap hlum nghal a. Rdi chu lo kalin, "Nathan, tinge i kah a?" a rawn ti a. Nathana chuan, "Thi se atha zawk...phatsantute hi tumah chance ka pe ngailo." a ti a, ama in lam pan chuan a kal leh ta a.

Chumi zan chuan Nathana pawh chu Sena chenna hmun a hre tawh bawk a, ava pan leh ta ngat a. Sena hi amaha inluah a ni a, a in pawh a nuam hle. Mut a tum chiah chu a room kawngka a rawn inchhuih hawng bur a, Nathana alo ni a. Khumah chuan a rap bet a, "Hmela, ui ang maiin i bauh vak vak a, i bauh tam ta lua e. Mahse chu chuan Sakeibaknei a nih tir theilo che, i hria em?" tiin a silai dawt chu Sena kaah chuan a rawlh lut a. Sena chu a hlau kher mai, a thlan a tla zawih zawih mai a.

Nathana chuan silai chu a load a, a hmet ta mai a. Mahse a mu a lo awm lova, Nathana chu a nui suk a, "Ka inah lo kalin min rawn thah i tum amaw? I thihun chu keiman ka thlang ang." a ti a, a kalsan ta a.

***********

Zing alo ni a,media ho chuan Opposition party Leader Pu Lalhmingliana chu an be mek a. Pu Lalhminglianga chuan, "Kan CM berin kan police DGP a pheikhawk hrui a suih tir kha thil awm ang lo lutuk a ni a, a zahthlak bawk. Tin kan chenna ram hi engti zia nge ni ta, Police Officer pakhat chu a chenna inah va beih a ni bawk a. Police Unit pahnih lai mai te chu accident in an thi a, zan khat thil thu lekah kan police huaisen mi 40 chuang lai mai chu an thi asin. Chuvang chuan kan CM Pu Lalfamkima hi CM ni tlak a ni lo, chu chu ka sawi duh a ni." a ti hmak hmak mai.

Chhun a lo ni a, Station atang chuan Rdi chu a rawn chhuak a, Nathana chuan, "Ma'm khawnge i kal dawn?" tiin a zawt a. Rdi chuan, "Headquarter lamah...CM rally kha vawiin hi ania." a ti a. Nathana chuan, "A tha e, va kal rawh." a ti a, Rdi chu ava kal ta a. Nathana chu nurse chuan a rawn phone leh a, "Hello Sir, kan damlo nula hi a harh tawh ania." a rawn ti a. Nathana chuan, "A that nasat chu..ka lo kal nghal e." a ti a.

Nathana chuan an in lam chu panin Pricilla-i chu ava thut chilh nghal a, Pricilla-i chuan a lo hlauh hmel kher mai. Nathana chuan, "Bawihi, hlau suh aw...hei hi ka in a ni a, Police ka ni a, i him tawh ania. Min han hrilh teh..khami ni khan engthil chiah nge thleng?" tiin a zawt a. Mahse Pricillai chuan a chhang hlei theilo, a tap vak vak mai a. Nathana pawh chu a chhuak leh ta ringawt a, pawnah chuan meizial a zu a.

Minute 10 vel hnuah chuan Pricilla-i chu pawnah a rawn chhuak a, Nathana bulah chuan ava ding a, "Ka hming chu Pricilla Lalmuanawmi a ni a, Aizawl Women's Hostel Warden Puitei fanu kha ka ni. Ka nu hmingpum chu Katty Lalchhandami a ni a, mahse Puite tiin an ko thin." a rawn ti a.

Nathana chuan, "A awmzia chu Katty Lalchhandami tih hmingpu Simcard neitu kha, i nu hi maw lo ni a?" a ti nuah nuah a. Pricillai chuan, "Aw ni e." a lo ti a. Nathana chuan, "Khami ni khan enge thleng?" tiin a zawt a. Pricilla-i chuan, "Kan College Annual Function atanga in tan a ni." tiin a thil tawn te chu a sawi ta a.

******

To be continue...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)