NATHAN SEASON-3 (Episode-20) MISSION TAMIL NADU (Pt-1) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-20) MISSION TAMIL NADU (Pt-1) by:Aaron Malsawmdawngzuala

Unread post by Aaron Dustin » July 7th, 2020, 6:04 pm

NATHAN SEASON-3

(Episode - 20)

MISSION TAMIL NADU

(He joins the Tamil Nadu Police Department Once Again)

(Part-1)

Written by : Aaron Malsawmdawngzuala

**************

(Chhiar tan tak tak hmain thil tlem ka lo sawi ve lawk ange, Pathian zarah kan dam zel a, Season-3 pawh a lo tawp hnai leh ta reng mai. Ka duh angin ka regular theilo lutuk a, damlohna leh lehkha zir tur ten min lo bawh buai ve chhen bawk si a. Ka story tlawm tak inlo ngaihlu em em a, ka lawm rual rualin ka inthlahrung takzet a ni. Tun tum chu ramdangah bawk hna kan thawh tir leh dawn a, a chhan chu thenkhat hian, "Tun Season chu ramdang ava kal lo ve.." te in rawn ti a, chuvang chuan ramdangah ka han kal tir ve leh dawn a nih hi. Season-3 a tawp hunah hian Nathan bik hi chu tawp tawh hrih se, a tawp hlen dawn em tih erawh ka la sawi thei mai biklo. Chhiar tute leh ngaithla tute zawng zawng chungah DCP Nathana leh ASP Rinawma ten lawmthu an sawi tak meuh meuh a ni.)

Kan hriat theuh tawh angin Nathana hi South India, Hyderabad ah a seilian a. Police Department hrang hrang a join a, chung zingah chuan Tamil Nadu Police Department pawh a join tel bawk a ni. Tamil Police te nen hian an in kawmngeih bik hlawm hle a, Rinawma bulah pawh a sawi fo thin reng a ni. Tualthah hmang, gunda hlauhawm tak pakhat chu zawn mek a ni a, an hmuh mai theihloh avang leh pawisawilo tam tak a thah avang te, sumdawnna tenawm tak a khawih chhunzawm zel avangte chuan Police ho pawh an beidawng kher mai. Tamil Nadu Police Department-a an DGP chuan Nathan Malsawmkima, a hnauia thawkte zinga a chhuanvawr ber, ACP a nih lai atang tawh a Tamil Nadu khawpui ti ralmuangtu ber, a fapa ang maia a en thin, Nathana chu a rilru ah a awm zawk mai. Nathana chu pawisa tam tak sen huamin an Department rawn join leh tur in, thla reilote chhung tal an case lo chinfel sak turin a ko ta a, Nathana boss, DGP Pu Zonunsanga chuan Home Minister te a bia a, tichuan an phalsak ta a ni.

Nathana thlen zan tur a ni a, Chu gunda pawh chu man ala ni ta chuanglo. Police Officer 5 rualte chu DGP chuan a ko khawm a. DGP chuan a han chibai hlawm te te phawt a, chumi hnuah chuan misual thlalak chu a dawhkanah chuan a theh thla a, "Encounter." a ti ringawt a. Police Officer te chuan salute pe in, "Yes Sir." a ti rual thap mai a. A tuk zingah chuan chu misual awmna lai awm velah chuan Officer-te chu civil dress-a inthuamin an inthen hrang ta hlawm a. Chutah an misual zawnlai ber chu in pakhat atang chuan a rawn chhuak ta a, midangte nen chuan an inbia a. Officer zinga pakhat chuan a bluetooth earphone chu a han hmet zeuh a, "Ka awmna zawnah hian kah a rem lutuk, ka kap mai dawn?" a ti a. Midangte pawh chuan an lo remti tlang a. A kap chiah chu misualpa chu a kun hlauh mai a, a hnunga motor darthlalang chu a kap keh ta chuai mai. Mipui an tlan chhe nuai nuai a, chu misual pawh chu a tlanchhe ta a.

Officer-te chuan an um nghal a, chu misual gunda pawh chu a tlanchhe chak ngei mai. A tawpah chuan bridge lamah chuan a tlan phei a, mahse Officer te chuan an umpha hlauh mai a, an hual ta thup mai. Chu gunda chu a mangang em em a, a hawi kual vak vak ringawt a. Chutih lai tak chuan Officer-te hnung atang chuan tu emawni hi a rawn tlan phei fua mai a, misualpa chu a rawn chawi lawp a, tuiah a zuan thlak pui ta daih mai. Officer dangte pawh chu an zuangthla ve nghal a, mahse an misual um mek leh a rawn chhantupa pawh chu an bo ta daih mai. Officer pakhat chuan a phone a phawrh a, DGP chu thil awmzia a hrilh nghal a. Ral lehlamah chuan thaw hlawp hlawp hian chu gunda chu rawn inhai chhuak buan buan a, a ding a. A hnungah chuan amah chhantupa chu a rawn lang thut mai a, silaiin a rawn tin nghal a. Chupa chuan, "I inpe dawn nge ka that dawn che?" a ti khur khur a, misualpa chuan a ban a phar nghal vat a.

************

Home Minister inah chuan DGP leh DIG te chu an va kal a, Home Minister chu a lungawilo kher mai. Thinrim tak hian, "Tunge ni a? Eng ang police nge a nih a? Encounter ti turin thu inchhuah a, mahse in police chah thar berin a chhan leh si a? In hnuaia thawk a ni velo em ni? Tunge a nih a?" a ti vin khur khur a. DGP chuan, "Sir, Mizoram State atanga lo kal a ni..Deputy Commisioner of Police, Nathan Malsawmkima a ni e." a ti a. Minister chuan mak a ti hle mai, "Eng ang hming nge chutiang? Ava mak ve.." a ti nuah nuah a. DGP chuan, "Sir, kan dept ah hian a lo thawk ve hrep tawh alawm." a ti a. Station lamah chuan Officer zinga pakhat chuan lungawilo tak hian, "Kan that thei reng a, mahse court ah, investigation tih vel nen kan buai angaih phah a..ninawm lutuk." a ti khur khur a. Officer Junior zawk chuan, "Sir, keini ai chuan i senior zawk tih kan hria a, mahse nang aiin experience kan ngah zawk ania. DGP leh Home Minister te pawh an lungawilo ania, i lakah action lak an tum ania." a lo ti a. Officer pakhat leh zawk chuan, "Veerapana criminal record hi han chhui chiang la chu i khawngaih hauh lovang." a lo ti ve bawk a. Sr. Officer chuan an zinga lo tel thar chu ava melh a, "Officer Nathan, tu ber nge tlawn i tum a, tinge khatia i chet mai a?" a ti a.

Nathana chu a rawn hawi a, Sr Officer bulah chuan a zu thu a. Chiang tak hian a en a, "Tinge Aravind, silai kah chu i chak viau em ni? Misual nge thah i duh dan (law) zawk hi?" tiin a zawt a, Officer Aravind-a chu a ngawi reng a. Nathana chua ding a, Officer-te chu a en kual a, "Police nge kan ni lawm ni? Nge Politician-te kid kan ni zawk? Ka tan chuan pawngpaw encounter leh rikngawt hi chu kan dawihzepna hliah khuhtu mai chauh angah ka ngai, mithat tura training kan ni em ni? Eng dan mah hian encounter hi a support ber lo, he ka thil sawi hi misualte chhanhim nana sawi ka nilo bawk. Misualte, buaina siam chingte hi tumah chhuahlo turin ka duh zawk vang che u a sawi ka ni. Tunlaiah chuan encounter hmang hian kan Politician tenawm tak takte hi an him zel tawh zawk a asin." a ti a, midang ho chuan an en thup ringawt a.

Nathana chuan Officer-te zinga pakhat, Officer Swamy-a chu a en a, "Officer Swamy, kum 22 lai ilo service ve tawh a, mahse kha misual Veerapana erawh kha chuan criminal record kum 25 lai a nei asin. Encounter ta la, operation chu engtik ah nge i zawh chuan ang? Kum 15 kal ta khan lo encounter daih tawh la chu nunna tam tak i chhan ni mai tur a nia. Minister in a chhan chuan a security a ni a, aniloh chuan encounter a order mai dawn lovem ni? Ka zawt nawn leh ang che u, Police nge kan nih a, Politician ho chhiahhlawh?" tiin a au vak vak a. Officer te chuan ngaihsan hmel em em hian Nathana chu an en char char ringawt a, NAthana bawk chuan, "Tumah impress ka tum lo, ka chetdan te hi in lo ngaitheilo anih pawhin pawi ka tilo. Gunda ka nilo, Police Officer ka ni. Dan chauhin misual te chu a hrem thei a, abak zawng chu Pathian thu thu a ni." a ti a, a chhuak ta daih a.

*******

Hospital bulah chuan mipui an tam kher mai, press mite pawh an awm teuh mai a. Reporter pakhat chuan, "Vawiin tlai khan kan CM chu a damlo thut mai a, tunah hian Hospital ah kan awm mek a, kan CM chu Hospital lam rawn panpui mek ala ni e." a ti a. Chu veleh motor lian tak hi a lo kal a, Hospital zawnah chuan a rawn ding a. A chhung atang chuan Home Minister a rawn chhuak a, press mite chuan an va pan a, "Ka pu, eng CM chu a an?" tiin an bawh buai nghal chung chung hlawm a. Home Minister chuan, "An rawn kal mek a, a condition hi ka la sawi thei mai lo." a ti a. Chutih lai chuan motor dang lo thleng leh in a chhung atang chuan Minister Punnyakoti chu a rawn chhuak a, press mite chuan an va pan lehnghal a. Press mite chuan, "Sir, enge CM chu a an a? I hria em?" tiin an zawt leh sup sup a. Punnyakoti chuan, "Hlauhthawng suh u, CM chu engtin mah a awm love." a ti a. Home Minister chuan ngei hmel zet hian a lo en a, chutih lai chuan a bulah chuan Minister dang pakhat a lo kal leh a, "Ka pu, CM chungchang kha keiman ka hre hmasa ber a, chuvang chuan hetiang thilte hi ka lo buaipui lawk vek a nih hi." a rawn ti vel zuah zuah mai a.

Ambulance chu a lo thleng ta a, CM chu an rawn zawn chhuak nghal bawk a. Damdawiinah chuan an luhpui a, pawnah chuan mipui chu an la phusa nasa ngang mai. Home Minister chuan a ban a phar a, "Lungngai suh u..CM chu a tha e." a tih lai chuan Minister pakhat chu rawn pheiin, "Doctor-in a sawi a, hahchawlh a mamawh a ti nih chu." a rawn tih ham ham a. Press mite chuan, "Enge thil thlen dan?" tiin an zawt leh a. Home Minister tawng hma hma chuan Minister hmeichhe pakhat hi alo kal leh a, "Keini pawhin mak kan ti khawp mai, CM hian a fanu ang maiin min en a, nizanah pawh kan inkawm reng alawm." a lo ti vel a. Home Minister chu a thinrim ngei mai, chuveleh Minister Punyakoti chu lo pheiin, "Engmah hlauhthawn tur a awm love, a tha vat mai ang. Ni 2 kalta khan min rawn bia a, state welfare chungchangte kan sawi a. Election lo awm leh tu chungchangte sawiin ka position turte pawh kan sawidun a, a dam hunah in bulah a rawn sawi mai turah ngai ang." a ti a. Press mite zinga mi chuan, "Anih leh tuber hi nge Acting CM ni dawn?" a rawn ti thut mai a. Home Minister chuan ring zet hian, "Nilo..Leader chu pakhat chauh an ni tur a ni, chutiang ngaihdan kan nei velo." a ti a, a kal ta daih mai a.

Home Minister chuan a kidte zinga a rin ber, tualthahhmang Dilli-a chu a call a, an inhmu ta a. Home Minister chuan, "Dilli, thil thlengte kha ilo hre ve em? Kum 30 chhung tehmeuh chu CM nen hian kan lo inzui tawh a, thil engkim hi keima bulah chiah a sawi dawn a ni. Personal decision pawh nise, keimah min rawn hmasa phawt thin bawk ang. Party dang zawng zawngte pawh hian CM ka nih thuai an ring vek a, keipawhin chu chu thleng se ka duh a ni. Mahse tunah chuan thil a danglam zo ta, Minister Mahadevya, Chandramati leh Minister Punyakoti-te hian min tibuai ta a ni. An group-te nen tangrualin CM post an inchuh a, support tam tak an hmu bawk. CM thih hnua CM post chang thei tura an pathuma thah ai chuan, CM dam lai law law hian.." a tih lai chuan Dilli-a chuan, "Sir, ka kutah dah rawh. Hetiang ho hi chu ka that hnem tawh lutuk, thil harsa a nilo. Ka kutah dah rawh..kan CM thar chu nang ngei hi i ni ang." a lo ti a. Home Minister chuan, "Dilli, i thah tumte hi MLA satliah an nilo ania, ruling party minister-te an nih hi. Nangmah chauh chuan ti suh, ramdang ami professional chahchhuak zawk rawh." a ti a.

**********

Kum 40 bawr vel niawm tak, samkir buk chhup mai, khabe hmul ngah tak, Professional Sniper pakhat chuan bulidng pakhat chu a pan mek a, zanlai dar 12 leh a chanve vel a ni. Building chhawng chung berah chuan a chho a, tichuan a suitcase khai chu a hawng a, Rocket launcher (Kan hriatthiam dan tur chuan - Bomb Silai) a phawrh chhuak a. Minister Mahadevya motor rawn tlan mek chu a tin vang vang a, a kap ta thut mai. Motor chu a puak pup mai a, Mahadevya pawh a thi chiang ngang mai. Home Minister mu lai chu PA chuan a rawn phone a, "Sir, Minister Mahadevya a thi a, a motor chawpin a puak vek a ni awm e." a rawn ti a. Home Minister chuan phone chu a dah a, intithei tak chuan a nui huah huah mai. Sniper chu building atang chuan a chhuk a, waiting shed ah chuan a thu a, a bag a phawrh a, tuibur la chhuakin tui chu a in khawlh khawlh a. Tui a dah let leh pah chuan a bag chhunga syringe pakhat chu a ti tla palh a, mahse a hre lo, a kal leh ta nghal daih a.

A tukah chuan Police te chuan accident-na hmun chu an va pan nghal a, an enfiah a. Press mite leh mipui tam tak te pawh an phu nuai nuai mai a, chutih lai chuan Nathana pawh a rawn thleng ve ta a. Nathana chuan constable pakhat bulah chuan, "Forensic ho an lo kal tawh em?" a ti a. Constable chuan, "Aw kal tawh e, Sir." a lo ti a. Nathana chu ava kal hnai a, motor kang bang chu a han en a, "Doctor, ruang in thawn tawh em ni?" a ti a. Doctor chuan, "Aw..post mortem tura phurhliam a ni tawh a, finger prints kan hmuhte hi Minister Mahadevya finger print vek a ni." a ti a. Nathana chuan motor hmalam chu a en leh a, motor hma lo kaw huau mai chu a en a, "Doctor, ka rindan chuan tualthattu hian Rocket launcher a hmang a ni ngei ang." a ti a. Doctor chua, "Ni chiah e, khawi emaw building ber atang khian a rawn kap a ni ngei ang." a ti a.

Nathana chu a han hawikual a, Sniper kahna building chu a han en vang vang a, motor position chu a en leh a. Building ah chuan a lut a, chhawng chung berah chuan a kal a. Sniper dinna ah chiah chuan a ding a, motor chu a zu enthla leh a. Chhuatah chuan paper them hi alo awm a, Nathana chuan a chhar zeuh a, a ak nghal daih a. A chhuk leh a, ahma zana Sniper thutna waiting shed ah chuan a thu ve leh a, a ke bula syringe lo let reng chu a hmu ta a. A chhar a, a en vang vang a. Nathana chuan, "Syringe maw?" a ti nuah nuah a, a ipte ah bawk chuan a ak leh nghal a, Station lamah a let leh ta nghal a. DGP chuan thinrim zet hian, "Mitthi hi tunge a nih in hria em? Mi satliah a ni lo asin. Enge in tih a? Minister thah a ni asin." tiin police te chu a hau a, an ngawi thap mai. DIG chu rawn tawng chhuak vein, "Kan dept tan hian mualphona nasa tak a ni, engtin nge media hmaah kan insawifiah tak ang?" a ti ve khur khur bawk a,

A thuthmun atang chuan Nathana chuan, "Sir, engtik lai pawhin police ten an veng reng a, engvangin nge ani pawh kha amaha, police tellova alo chhuah reng reng ni?" a rawn ti a. DGP chuan, "DCP, amaha khalai hmuna a kal chhan te kha chu tupawn kan hre vek. Kha chu thudang nise, tualthattu hi tunge a nih kan zawnhmuh angai a ni." a ti a. NAthana chuan, "He tualthahna hi enge a chhan ni ang? PAwisa vang nge, mimal inhuatna vang zawk? Angle tin atanga investigation kan neih angai asin, group thiltih anilo, he tualthahna hi mipakhat thil tih a ni." a ti a. DGP chuan, "Engtin nge i hriat?" a lo ti a. Nathana chuan, "Sir, tualthattu kehniakte en atang chuan tualthattu khan zu a rui a, Under Construction railway bridge bula building chung ber atanga Minister motor kha kah a ni. Minister kha amahin vengtu neilovin a rawn kal tih a hre bawk a, ahma atang daih tawh khan a lo enthla tawh tihna a ni. Tin, mini rocket launcher a hmang bawk a, heng launcher te hi neih mai mai theih anilo. A awmzia chu tualthattu hi mi namai lo tak a ni, tunah chuan tualthattu hi mipui ho social environment a ni thuai bawk ang." a ti a.

***********

Chhun a lo ni a, Nathana chu Minister Chandramati-i rally neihna hmuna duty tur a ni a. Mipui pawh an pungkhawm hnem tawh hle mai a, Nathana pawh ava thleng a. Duty dangte bulah chuan, "Minister a lo thleng tep a, security kha a tight thei ang berin aw.." a ti a. Minister Chadramati chu a lo thleng ta a, mipuite chuan, "Minister Chadramati, Zindabad." tiin an au vak vak a. Chandramati chu Nathana chuan a kalpui reng a, securoty pawh a tight tha khawp mai. Pangpar thi te chu an lo awrh tir a, chutih lai chuan constable pakhat hi lo kalin, "Sir, kha IG in a be duh che." a rawn ti a. Nathana chuan IG chu biaiin a kal sawn a, chutih lai chuan silai a puak dur mai. Mipuite chu hlauvin an tlanchhia a, an buai nghal nuai nuai mai. Nathana pawh rang takin a rawn tlan phei a, police dangte chuan Chandramati chu an veng a, an hual thup mai. Chuveleh silai a puak leh dur a, Chadramati chu a thal tawp mai. A chal chu a kaw huau mai a, thisen a per chhawk bawk. Nathana chu a hawi kual a, mahse sniper awm ang tumah a hmu silo. Mipui ho chu rawn tlankhawmin Chandramati let reng chu an en luih luih hlawm a, Chandramati pawh chu a thi chiang hle.

Zan alo ni a, Home Minister chu a hlim ngei mai. Zu no dawm pah chuan a kidte pahnih, Dilli-a leh Archarya-te nen chuan an titi a. Home Minister chuan nui chung hian, "I ti tha e, Dilli...ka hlim takzet." a ti vak vak a. Dilli-a erawh chuan hlauhthawn hmel tak hian, "Kei chu ka hlim ve lo." a ti hmuk a. Mak ti tak hian Home Minister chuan, "Engati maw?" a lo ti hu mai a. Dilli-a chuan, "Kha minister pahnihte kha ka thah annilo, professional sniper chu i sawi ang ngeiin ka chah mek a, mahse midang thah anni zawk." a ti ta mai a. Archarya pawh chuan, "CM post chang tur hian midang an awm ve ani ngei ang, chumite chuan an that aniang. Competitor ho zawng zawng hi thah vek duh ni tase, nangmah ang bawk hian professional a ruai ve a ni maithei asin. I sawi dan kha chuan CM post inchuh tute, i hmelmate chu Mahadevya, Chandramati leh Punyakotti-te an ni a, mahse Chandramati leh Mahadevya te chu an thi tawh. A landan chuan Punyakotti thiltih a ni maithei asin, a dik a nih chuan a target dawt leh chu nangmah i ni." a ti a. Thinrim tak hian Home Minister chuan, "Mai mai a, Punyakotti-a'n min that anga maw? A tha e, Punnyakotti chu that nghal ila nimai lawm." a ti khur khur a. Acharya chuan, "Chumi hma chuan tualthattu hi kan zawn hmuh hmasak a ngai a ni, a nih loh chuan Punnyakotti i thah hmain nangmah zawk a that mai ang che." a ti a. Home Minister chuan Dilli-a chu a en a, "Dilli, Acharya thusawi hi a dik a ni. Tualthattu hi kan zawn chhuah a, a chenna kan hriat vat angai. Khawi atanga lo kal nge a nih a, engzat nge a hlawh tihte engkim ka hre duh a ni." a ti a. Acharya chuan, "Home Minister i ni a, police te hi i thuhnuaiah vek an awm tih hre reng ang che." a ti a.

**********

A tukah chuan Home Minister chuan Police Department-te nena meeting neih chu a huaihawt ta a, meeting chu an nei a. Home Minister chuan DGP bulah chuan, "Minister-te dinhmun a derthawn zia hi i hria em? Eng hna nge in thawh a?" ati vin vak mai a. DGP chuan, "Kan theihtawp kan chhuah mek ania, Sir." a lo ti a. Home Minister chuan Police-te chu a han en hlawm a, vin zet hian, "Ka BP hi in ti sang hnem tawh khawp mai, CM lah chuan action la vat turin min hrilh reng bawk si." a ti vak vak a. Officer pakhat chuan, "Sir, kan zawng hmu thuai ang." a lo ti a. Chutah Home Minister chuan ring tak hian, "Ve mai mai che chuan, Minister i biak mek hi aw...reporter nilovin. Naktukah ka thi palh hlauh a nih chuan party flag-in min tuam anga, in lukhum in pehlh leh ringawt anga. Zahna tam tak lantirin min phum anga, van lam hawiin silai in kap puak dur dur anga, chuzawng chu animai. Abak engmah tih theih in neilo, in duty leh mawp mawp hlawm ringawt anga. Issue kan order anih chuan in DCP thar, Mizoram daih ami lehnghal kha lo kalin rawn prostest leh atum ngei anga, abak engmah tih theih a nei lo." a ti ta vak vak mai a.

Nathana pawh chu a lo nui suk a, a rawn tawngchhuak a, "He tualthahna hi thuneihna leh thiltihtheihna inchuh vang anih i ring velo em ni?" a ti ve ta sak mai a. Home Minister chuan rum zet hian Nathana chu a melh a, "Engvangin nge chu chu i sawi kher a?" a ti hlur mai a. Nathana chuan zam hauh lo hian, "Sir, minister pahnih thi ta te kha contender pawimawh tak an ni a, top post an ni tih pawh i hria. Anmahni hawtu deuh an awm anga, chu chuan paihthlak a tum a ni maithei asin. Chuvang chuan hemi angle atanga thlir hi chuan tualthattu hian mi satliah ho chauh a target lova, Minister te chauh a target a ni. Hemi angle atanga kan chhui zel a nih chuan tualthattu hi kan man em em ang, Sir. Mahse i phalna tello chuan Minister-te meuh chu keimahni thu chuan kan investigate ngam dawn der silova, i thuthlukna kan nghak e." a ti a. Chuveleh Minister Punyakotti chu a rawn tawng chhuak ve a, "Investigation chu nei rawh u. Rinhleh in neih chuan, man siah siah rawh u. In man a nih chuan, kumkhuain jail ah dah bawk ang che u." tih pah chuan Home Minister chu a han en deuh kher a, Home Minister chuan a lo melh rum kher mai. A thlan chu hruk pah chuan ama hriattham lek hian, "He DCP hian min ti a lo chauh dawn a nih hi." a ti bul bul a. DGP bulah chuan, "Awle, he case hi DCP Nathana kutah dah ang che u." a ti ve ta nge nge a.

*********

Dilli-a chuan a boss, Home Minister bulah chuan, "Boss, kan hmu zolo. A hmel pawh tuman an hre bawk silo, a buaithlak khawp mai. Kan state ami pawh a nilo a, kan area ami pawh a ni heklo. Police Department zawng zawngte hi a chetkhalh zel a, an vai mai hian a bum kual mai mai a ni. Tunah chuan i inngahna awmchhun chu Police te chauh hi an ni tawh, i himna tur awmchhun chu anmahni hi ani mai." a ti a, Home Minister pawh a lu a hai kher mai. Nathana pawh chuan Minister te ho chu a mal te te chuan thu a zawt fiah a, investigation chu a tan chho ta. Nathana Minister te in atanga a chhuak chu Minister zinga pakhat chuan hmusit takin a lo tawng khum pek a, "Kan rebel Minister te pressure nasa tak in pe a, fake investigation inti reng bawk a. Nangni police te ho ve hi...engvangin nge keimahni ah inquiry in rawn tih daih a?" a ti khur khur a. Nathana chuan rum zet hian a lo melh a, chu Minister bawk chuan, "Min melh ve ngam ami? Ruling party kan nih hi aw...engmah in ti theilo. Kei hi ka thi anih chuan Andhra Pradesh hi a kang fai vek ang, chu chu i hmu duh em ni?" tiin Nathana chu a vin vak vak a. Nathana chuan na em em hian a beng hawi sawk mai a, "Man nghal rawh u." a ti a, chu minister chu an man ta daih mai. Media hmaah chuan Home Minister pawh chuan hlauhthawng tak chung si hian, "Police ten an theihtawp an chhuah mek a, tualthattu chu man a ni thuai ang." tiin a sawi a. Nathana pawh chuan a aia ngawrh lehzualin investigation chu a buaipui chho zel a, zanah pawh a mu mang ngai meuh lo.

Tuk khat chu Nathana chuan Police Force a ko thut mai a, Officer te chu an ding tlar thap mai a. Nathana chuan, "Ka koh khawm nachhan che u hi ka han sawi tawh ange..Crime-Scene ah reng reng hi chuan a tlapuiin misualte hian evidence an hnutchhiah ziah a." a tih lai chuan police pakhat chuan, "Mahse Sir, hemi case ah hi chuan evidence engmah a awm lo." a lo ti a. Nathana chuan, "Kan thil hmuh awmchhunte kha evidence angah ngai ta che u. Sniper khan Minister Mahadevya a thahna hmunah khan he ticket hi a thlauh ni ngei tur a ni..khalai hmunah khan ka chhar a ni." tih pah chuan a ticket chhar chu a phawrh a. Nathana bawk chuan, "Malakpet Railway Station ami ticket a nih hmel a, chuvang chuan chumi area ah chuan he tualthattu hi a cheng a nih a rinawm bawk." a ti a. Officer pakhat chuan, "Railway Station-a ticket lo chhar chu ava common lo ve." a lo ti a. Nathana chuan, "A dik alawm, mahse Railway Construction an neih mek saw zawh fel ala ni lo alawm." tih pah chuan syringe a chhar chu a phawrh leh a, "Tin, he syringe hi tualthattu hman a ni ngeiin a rinawm bawk. Heng te hi common evidence a ni a, crime-scene pahnih ah te khan chhar a ni." a ti a. Officer pakhat chu lo tawngchhuak ve leh in, "Syringe khan engtin nge min puih theih ang?" a lo ti a. Nathana chuan, "Hetiang hi insulin a ni a, zunthlum neite chauhin an hmang thin. Chuvang chuan tualthattu pawh hi zunthlum nei a ni mahna, tichuan damdawi dawrah a kal thin bawk ngei ang. Malakpet ah hian a cheng ngei e chu ka ti miah lo a, mahse lo cheng ta hlauh se..chuvang chuan officer thenkhatte hi Malakpet damdawi dawr zawng zawngah civil dress nen kal se, insulin lei thintute zawng zawng, an hming nen lam in zawt vek tur a ni. A bikin kum 40-45 bawr vel ni tur awmang ho ah khan concentrate leh zual ang che u. Cable TV Operator te, gas cylinder delivery boy te, chanchinbu semte leh bawnghnute sem zawng zawngte..an vaiin enquiry nei vek ang che u. Hotel, Motel leh Lodge zawng zawngte check vek ula, rinhleh awm deuhte chu man hmiah hmiah rawh u. Real estate dealer te, thla 2 vel kal taa Malakpet-a insawn te zawngchhuak bawk ula, tha takin hna thawk ang che u." a ti a, an kal darh ta hlawm a.

********

(TO BE CONTINUE)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)