NATHAN SEASON-3 (Episode-22) MISSION TAMIL NADU (Part-3) by:Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-22) MISSION TAMIL NADU (Part-3) by:Aaron Malsawmdawngzuala

Unread post by Aaron Dustin » July 9th, 2020, 11:10 pm

NATHAN SEASON-3

(Episode - 22)

MISSION TAMIL NADU

(He joins the Tamil Nadu Police Department Once Again)

(Part-3)

(THE LAST EPISODE OF SEASON-3)

Written by : Aaron Malsawmdawngzuala

*******

Ice cream zuar zawng zawngte pawh chu an man vek a, school naupang hrang hrangte pawh chu an thisen lak zel an ni a. Doctor chuan Nathana a rawn phone a, hospital lamah chuan ava let leh ta a. Doctor chuan Nathana chu ward pakhatah a luh pui a, naupang tamtak an lo mu tlar thup mai. Doctor chuan, "Naupang thenkhatte phei hi chu damdawi hian kan chiu ngamlo zawk..a rapthlak khawp mai thil thleng hi. Engtin nge maw naupang pawisawilote hetia an tih theih zawk ni? An nu leh pate tan a na dawn emai. An icecream eiah khan a aia tam deuh hlek lo telh belh ta se chu thi an awm nual ang..Nathan, chhuah reng reng suh ang che..heng misualte hi man vek rawh." a ti a, Nathana chu a thinrim kher mai, a chhuak ta nghal a.

Nathana chu amahin Dilli-a ice-cream factory ah chuan a va kal ta a, Dill-a te leh a kidte chu 20 rual vel lai mai hi an lo awm a. Nathana chuan rum zet hian Dilli-a chu a melh a, "Sumdawnna dang a tam teh lul nen, engtin nge pawisawilo naupangte chungah hetia i tih a?" a ti a. Dilli-a chuan nui chung hian, "Nathan, thurawn min pek ve khanglang tumtute hi ka ngaina vak lo ania, kal bo vat rawh..ka thah hma che hian." a ti khur khur a. Nathana erawh a ding reng a, a che sawn hauh lo. An zinga pakhat chuan inla pa zet hian, "Boss berin kal rawh a tih chuan kal ve mai ta che.." tih pah chuan Nathana chu va ben a tum a, mahse Nathana chuan a lo rek a, hnar ruh tliak sawi bawi khawpin a khupin a lo do siah mai.

Midang ho chuan NAthana chu va khawih ve an tum a, mahse Nathana chuan a Police stick hmang chuan a lo hlap siah siah hlawm mai a. Minute 20 vel dawn lai an inbeih hnu chuan Nathana chuan a vai thlu ta vek hlawm a, Dilli-a chu a man ta a. A tuk zing chanchinbu ah chuan Dilli-a NAthana'n a man thu chu an chhuah a, chanchinbu chu Nathana chuan keng pheiin Pratap-a cell chhungah chuan ava vawm lut a. Pratap-a chuan hmuhsit hmel zet hian a lo melh a, Nathana chuan rum takin Pratap-a chu a melh a, a kalsan leh ta a. Chumi zing chuan court ah Dilli-a chu an kalpui a, court rorelna chu an nei leh ta a.

Mahse Home Minister nau kha a ni miau a, Nathana chuan hnehna a chang leh ta chuanglo. Court chuan thutawp a siam a, "He ice-cream damdawi pawlh hi a factory neitute chu Shekar, Prasal leh Giri-a te ta a ni a, Dilli-a erawh hi chu Money-lender chauh a ni. Loan va la tur mai chauha kal a ni a, chu chu finfiah ngei pawh a ni tawh a ni. Chuvang chuan Dilli-a hi chhuah zalen a ni e." a ti ta mai a. Court thurel pawh chu chanchinbu ah an chhuah leh a, chanchinbu chu Pratap-a pawh chuan a lo chhiar a, a nui nasa ngei mai.

***********

"Min hnek a, min pet a, min sawisa a ni, boss..hetiang em em a min sawisatu hi ka la tawng ngailo, ka theihnghilh ngai lovang. Ka theihnghilh theih nan chuan, saw DCP saw ka thah ngei angai ang." a ti pung pung a. Home Minister Kondal Rao chuan, "Insum rawh, bawiha. Keipawhin sawpa saw chu ka hua alawm, engemaw state danga mi daih, a hmingpum pawh lam dik theih mang loh, Arab tlangval hmel niawm tak saw helaiah Police hna thawk tura an rawn dah reng reng ni? Ka haw takzet, mahse tuna rik buan buan hi a fuh ber lo. Tin kha ex-policeman, Pratap pawh kha ka chhuah lo ang. Minister 3 te thah thubuaiah thiam chang mahse, ka awihlo hrim hrim. Ama thah ngei a ni, ka mite hi jail ah thawn ila, duh chuan ka va thah tir nghal thei reng. Mahse ka duhlo, a chhan i hre duh em? CM ka ni hnai tawh, ka nghah hram hram angai. Tin, he thilah hian ka inrawlh ve a ni tih hi CM beng a thleng tur a nilo. Minister thi tate hriat rengna ni pahfawmin By-election a lo thleng thuai dawn, he by-election hian CM ka ni vat dawn tih min hriattir a ni." a ti a

Nathana leh officer 5 te chu Station lam panin police motor chuan an kal mek a, Nathana chuan a khalh a. Officer pakhat chuan, "Rukru te, traffic dan bawhchhia te leh misual dangte pawh kan man ve fo tawh a, mahse khamite khan eng ang mi nge maw an nih le...naupangte ice cream eiturah damdawi an lo pawlh duh ania. A rapthlak khawp mai, engmah lah chu kan ti thei der mai silova. Hei hi eng dan nge ni ngai? Engtin nge dan a tangkai tawh ang?" a ti nuah nuah a. Hnunglama thu officer pakhat chu a lo nui huk a, Nathana chuan motor chu a tiding nghal a. Motor atang chuan an chhuk vek a, Nathana chuan Officer lo nui bulah chuan, "Engvangin nge i nuih a? Politician ten min nuihzat a, mipuite pawhin min nuihzat chang atam. Mahse nang..engtin nge min nuihzat ve theih zawk a? I retire tep tawh a, police hna i thawh chhung zawng khan zanah thin thi in thlamuang takin i mu ngai em? Nikhat tal hna tha taka thawk ni a inhriat chang i nei tawh em? Natna min thlen thin asin, i ni ve ngailo em ni?" tiin a zawt a.

Officer chuan, "Engvangin nge ka nat ve ngawt ang? Police ka join tirh kahn kum 28 ka ni a, nang ang chiah hian tlangval thatho tak ka ni ve thin asin. Mitthi ruang hal mai tur ang vel kan ni a, mi zawng zawngin min sawisel a..." a tih lai chuan Nathana chuan, "I va dawihzep ve a? Vawi engzat nge beihlet i tum ve reng reng a? Misualte chu zamna nei miahlova an mitah tak in melh a nih chuan a hlau ngei ngei ang che, tichuan va pan hnai la, ani chu pen hnihin a tawlh hnung ang. Mahse keini chuan kan ti ve dawn chuanglo, a chhan chu Home Minister kan hlau tlat a ni. A thiltihtheihnate, a dinhmunte avangin kan hlau ani. Ngaithla rawh, tlawm hi a zahthlak loh, mahse tawp mai lovin kan tlawm nachhante, kan chaklohna laite chu kan hrechiang tur a ni a, kan inzir chho zel tur a ni. Thiante u, engmah kan la chan em hleinem, kan beilet ngei tur a ni. Tunah chuan a mi leh sate mai chauhvin minla bei a, keini IPS Officer-te hian kan beilet ngam dawnlo em ni? Kan en ang, anni gunda-te mai mai nge chak zawk IPS Officer-te? Kan en ang." a ti fak fak mai a.

************
Zan alo ni a, Acharya chu a motor ah thuin meizial a lo zu a. Chutih lai chuan hmaituam pakhat hi motor chhungah chuan a rawn lut ve tawp a. Acharya chuan mak a ti ngei mai, "Tunge i nih a?" a ti a. Hmaituam chuan a hmai tuamna chu a phelh a, Nathana a lo ni a. Acharya chu a hnek pawp mai a, nikhawhrelovin a awm der mai. Nathana chuan Archarya chu a pu nawlh a, Police dangte an lo kal a, Station lamah an phur ta a.

A tuk zingah chuan DGP chu Home Minister inah chuan ava kal a, DGP chuan, "Sir, kan state chauh nilo, thenawm state-te pawh fimkhur turin kan alert tawh e. Kan man ngei ang, ka tiam ache. Information-a kan dawn dan chuan he thihna hi plan lawksa a ni." a ti a. Chutih lai chuan Dilli-a a lo kal a, Home Minister chuan, "DGP, pawnah minlo va chhuahsan lawk teh, minute 10 chhung.." a ti ringawt a. Dilli-a chuan, "Boss, DGP chuan police station zawng zawng pawh kan alert vek tawh pawh a ti mahna, kan man ngei ang tiin a sawi mahna. Engtin nge an man theih ang, an zawn mek hi polve tho lo ni ta si se. DCP Nathan Malsawmkima pawh hi ani maithei asin. Opposition lama i awm lai pawhin tu police mahin min khawih ngam ngailo, tunah ruling party ah i awm tawh a, engkim a hre vek a, mahse min thah a la tum ania. Nizanah Acharya an man a, vawiin chu keimah hi min man an tum leh ngei ang. Vawiin hian min man tase, naktukah tunge ni ang? Ahma khan thah ka duh a, mahse i phallo anih kha. Acharya ang mi hausa leh thil tithei lutuk te hi chu ani lo kha chuan tu police mahnin an man ve ngam lovang, mak i ti velo em ni? Ni e, i ti lovang, hahdam takin i awm reng alawm, nangte chu." lungawilo tak chuan a ti nuah nuah a.

Home Minister chuan, "Engtin nge ka hahdam theih ang? Politician-te hian press mite, public-te, Police te leh CM thleng pawhin tumah kan hlau tur a nilo. Mahse heng mite hi kan hlau leh si ang maw?Ni e, kan hlau tur a ni. Aiawhtute an nih hi..kum tam tak kalta atang tawh a diklo taka politician ten sum an lakluhna evidence-te hi an nei vek asin. A duh anih chuan khawlaiah saruakin min awm tir thei ang chu, mi hlauhawm a nih hi." a ti vak vak mai a.

*************

Station lamah chuan Acharya chu a lo pawr kher mai, "Engvangin nge min man a?" a ti khur khur a. Nathana chu a rawn pen chhuak a, Acharya chuan rum zet hian alo melh a, "Nathan, thil thleng tur hre lawksa in em ni min man a? I va mawl ve. Sakeibaknei hi chhaih kawlh min tum em ni? Mipuiin an hria a nih vaih chuan India ram pumpuiah hian buaina achhuak ang tih hre rawh." a ti pang pang a. Nathana chuan nuih suk pah hian, "Ngawi mai mai teh..Pilla Petha Pitchaya..chu chu i hming tak tak zawk a ni tiraw?" a ti ta mai a. Acharya chuan mak tih hmel tak hian, "Enga? Tunge chu chu..Acharya ka nih hi..zawnga.." a ti khur khur a. Nathan chuan, "Pilla Petha Pitchaya...i pa hming chu Pilla Pendaiya..i nu hming chu Papaiyamma ani a, Ambajipetta hnam in ni. I pian kum chu June ni 4, 1966 a ni bawk...kum 5 i nihin i pa ipte ami pawisa ruk i hrat tan a, kum 10 i ni a, i ru hnem telh telh a. Kum 20 i tlin meuh chuan real estate business lam i luhchilh der tawh, forged documents-te leh ram hrlah-te i ching a, nangmah chhuitu apiang i that zel thin bawk, i mi thah zawng zawngte chu mi 16 an ni. Home Minister nen in thawkdun a, i lakah tuman FIR an thehlut ngam talova, I AM ACHARYA tiin saptawng ka hmang e te i ti vel a tiraw? I thilsual tihna a puitu tur che in technology i hmang tangkai leh a, foreign company hrang hrangah i invest chur chur bawk a. Heng zawng zawng avang hian Home Minister aiawhtu i ni ta hial a nih hi..ka hre vek asin, mak i ti em? Nge ni adang ka la sawi zel dawn?" a ti ta phiar phiar mai.

Acharya chuan a chil a lem dawk dawk a, a thlan a tla zawih zawih mai. A tho thut a, Nathana chu ava rek thut mai. Nathana chuan a lo chawi lawp a, a theh thal thuai mai. A kawr siamthat mawlh mawlh pah chuan Nathana chuan, "Achang chuan nu leh pa tam takte hian anmahni fate ngei pawh an ngaihthah thin a, mahse police-te hi chuan kan ngaihthah ve ngailo, engkim kan hre reng thin. Pawisa tlem hmangin chanchinbuah i hming i thlak a, nilose chu Acharya nilovin Pilla Petha Pitchaya i ni reng ang chu. Tamil Nadu leh Andhra Pradesh Police Station-te chu an inthlunzawm vek i ti a, mahse an man thei chuanglo che. Minister-te leh Police-ten an zawng reng che a, mahse kei erawh chuan Pilla Petha Pitchaya chu ka man ta a nih hi. I hming diktak chu i tan chuan death warrant ang mai alawm, tiraw?" tih pah chuan a han nuih vel a.

Acharya chu a thinrim ngei mai, "Hmela leh.." a ti vak vak ringawt a. Chutih lai chuan Police pakhat chuan, "Sir, Home Minister-in a be duh che." a rawn ti a. Chuveleh Acharya chu a nui ta vak vak mai a, "Kal ta che...Minister chuan Acharya nge ka nih a, Pitchaya zawk tih chu a lo hrilh mai ang che. Min rawn chhanhim dawn..nang erawh tunge chhanhim ve ta ang che?" tiin a nui vak vak a. Nathana chuan phone a phawrh a, Acharya bulah chuan ava thehthla a, "Ilo ngaithla dawnnia." a ti a, a chhuahsan ta a.

*************

Nathana chu Minister Office ah chuan ava lut a, Kondal Rao chu a lo thu a. Nathana chuan zah takin salute a pe a, "Enge nita, Sir?" a ti nghal a, Kondal Rao chu a rawn tho a, a dawhkan hmalamah chuan a thu a, a mal a beng thak thak a, "Mi satliahte chu Minister hmaah phaln a lak hmasak loh chuan a thu mai thianglo tih chu i hre ve a nih hi, meeting neih hmaa minister-te salute ziah tur tih pawh police i nih angin i hre ve bawk. Mahse a awmzia i hrelo em ni? Salute min pe anih chuan ka hnuaia awm i ni tih hi hrethiamlo em ni? Engvangin nge kan thupek i zawm loh a? Enteh NAthan, DCP mai chauh i nih kha...i chungah hian Sr SP te, DIG te, DGP an la awm asin, heihi in dept kaldan tur chu a ni. Mahse in police dept zawng zawngte saw ka thuhnuai vekah an awm asin, keite chu ka chungah chuan Prime Minister, CM leh Governor-te chauh an awm tawh. Entiang chiah a thu nge ka nih i hria em? Ka thil tihthih zia i hria em? I dinhmun kha han ngaihtuah teh, engmah i nilo. Tunlai Police Officer te hi in inla hero hlawm ta khawp mai, khawnge Acharya i dah? Min fiam ve ngam em ni? A hrim hrimin Acharya i kidnap avang khan kei hi ka tlachhe vek dawn angah i ngai em ni? He Sawrkar hi a tluchhe mai anga maw? Ka hlauh i ring ami? A teuhlo mai. Ka property vaibelchhe chuang man hu te ho hi ka chan mai ang tih ka hlau deuh mai chauh a ni, mahse chupawh nikhat chhung chauh ani. Welfare scheme 5 vel hi chhuah ta ila, keichuan 100 chuang ka siam hman ang. MAhse kha Acharya khan sawichhuak ta se...ka chhuah hauh lovang. Tunah hian Acharya hi ka bulah awm ta pawh nise, ka that tho tho ang. Ngaithla rawh DCP, ka tan chuan nangni police-te hi khaki rawng kawr ha, ka thuihhruaite mai chauh in nih hi. Ding tura kan tih che u chuan in ding a, mi that tura kan tih che u chuan in that leh mai thin a, encounter angin kan sawimawi leh mai thin." tiin a nui a, NAthana bulah chuan ava kal hnai a.

Lehlam a hawi a, sawi fuh a inti ngang aniang, a nui vur vur mai. Lehlam a hawi leh chiah chu a nui hmel chu a tawp chiang kher mai, a meng phawk nghal hru mai a. Nathana chu ama dawhkanah ngei chuan a lo thu ve a, a bawp khawkherhin a mal a lo beng ve ta thak thak mai. Minister chuan a en hru mai a, Nathana chuan, "Tinge khatia min en vak a? I thuihhruai ka ni i tia nilawmni, engvangin nge zahna ka lantir vak ang che? I sawi dik alawm, DCP mai chauh ka ni. CM te, Governor-te leh Minister tam tak te an la awm teuh a, min hrilhfiah ngei anih kha. Mahse i sawi theihnghilh chu maw...kutdawh i ni. Vote dilin kum 5 dan zelah mipuite i va tlawn a, kut iva dawh thin ani lawm ni? Kan vote hlu takte, min dil thin kha..Acharya ka man angin i sawi a, thudik ni tase enge i tih theih vak a? Court ah ka kalpui anga, helaiah hian nuamsa takin i thu tawh lovang, jail bang i zut tawh zawk ang. Kan chungah hian thuneitu tam tak an awm a ni maithei, mahse keini tello chuan hetiang dinhmun hi in thelng thei biklo. He dept hi a hahthlak dawn tih leh a harsa dawn tih hre reng chungin kan zawm hram a, kan thil tih tur leh tihloh turte chu kan hre ve ang chu. Ngaithla rawh Pu Minister, ka tan chuan sual chu sual a ni a, dik chu dik a nimai. Rukru emaw, Politician eiru pawh nise, in anlohna pakhat chiah in nei. Rukru chuan pawisa a ruk theihnan hriamhrei a hmang thin a, mahse nang chuan aiawhtu i nei thung. I thuihhruaite chauhvin i thuruk an hria, mahse kei Sorkar thuihhruai rinawm hi chuan engtikah nge, enghunah nge, khawihmunah nge ka beih dawn che tih hi ka hre thlap thung. Kei ang Police Officer hi chu khawiah mah i hmu leh tawh ngai lovang.." tih pah chuan salute a pe a, "Chuzawng chu a ni e, Sir. IPS Officer Nathan Malsawmkima, INDIAN POLICE SERVICE." a ti a, a chhuahsan ta daih mai a.

**********

Home Minister Kondal Rao-a thusawi zawng zawng chu Station lama an man mek Acharya chuan Nathana phone pek atang chuan a lo ngaithla vek a, a thinrim ngei mai. Nathana chu alo let leh a, Acharya bulah chuan, "I lo hria em? I lo ngaithla ang chu tiraw? I sawi dan kha chuan Adhra Pradesh Central Govt te lo kalin an rawn chhanchhuak dawn che i ti a, hmmh..a teuhlo mai. Pitchaya anga thih kher angailo, nangmah vuina chu Ministerin a buaipuia ng, Acharya angin i thi zawk ang. Thuthlukna chu siam rawh...i inpe dawn nge ka that dawn che?" a ti ta khur khur mai a, Acharya chu hlauthawng takin a thu ngawi reng ringawt a.

Kondal Rao chuan Dilli-a chu a phone vat a, "Hello, kha DCP khan Acharya chu a kidnap ngei e." a ti a. Dilli-a chuan, "Ni e, ka hrilh reng che kha." a lo ti a. Minister Kondal Rao chuan, "Ngaithla rawh, Acharya hi a thi ngei tur a ni." a ti a. Dilli-a chuan, "A thi em em ang, lungngai suh. Kha DCP khan min lo dan a tum a nih chuan ka that ve nghal bawk ang, lungngai suh." a ti a, Dilli-a chu a kidte nen chuan an chhuak ta nghal a. Nathana pawh court lam panin Acharya nen chuan an inphur chhuak nghal a, an tlan pah chuan Acharya chuan Minister thuruk engkim chu a sawi char char bawk a.

Chuveleh an motor chu hnunglam atang chuan Dilli-a naute chuan an rawn kap ta siah siah mai a, motor 10 vel chuan an rawn tlan hual ta vak vak mai a. An su vak vak a, Nathana chuan theih tawp chhuahin misual ho motor chu lehpelh a tum a. A tawpah chuan misual zinga mi pakhat chuan Acharya hnute ah a kap fuh ta hlauh mai a, a au tuar mai. Nathana motor pawh chu a ke an kah thep sak a, loh theihlovin a din a ngai ta. Acharya chuan na tih hmel tak hian, "DCP, court ah min hruai ngei angai a nia." a ti a, Nathana chuan, lo tuar hram hram rawh...ka rei lovang." a ti a, motor atang chuan a chhuak a. Misualte pawh chu motor atang chuan an rawn chhuak a, chemte an hum far hlawm mai.

Nathana chuan pakhat chu a han thal nghal siah a, a chemte chu a laksak a. Midang ho pawh chu chemte hmang chuan a vit ta siah siah hlawm mai a, mahse an tam em avang chuan Nathana pawh chu a hliam nual mai. Chutia Nathana a buai em em lai chuan misual pakhat chuan motor atang chuan Acharya chu a hnuk chhuak a, Acharya chuan hlau takin, "Nilo..Nathan, min chhan rawh." ati chel chul mai a. Nathana chu ava tlan phei a, Acharya chu ava pawt hrang nghal a. Misualte lah chu an lo kal belh zel mai a, ruah ala rawn sur buan buan zui.

Nathana chuan a theih ang tawk chuan a bei let ve zel a, mahse a hneh vek thei talo. A keah te, a banah te chuan an vih sak a, a thi phung tawh mai. A theih tawp chhuahin Acharya chu a hum hram hram a, a tawpah chuan Police siren a rawn ri ta luah luah mai. Police jeep alo thleng a, NAthana chuan, "Acharya, police ho bulah sawn va kal vat rawh." ati a, Acharya pawh chu hmanhmawh tak chuan ava kal a. Chutih lai tak chuan Nathana hnungah chuan misual pakhat chuan a chemte chu a rawn vit tlum pawk mai a, Nathana chu a eu zawk mai. A theihtawp chuan chupa pawh chu a han beilet leh a, a hnungah chuan chemte chu a bur vu mai.

Misualte chu pathum vel an la dam a, Nathana bei tur chuan an rawn kal leh ta. Nathana chuan na ti tak chung chuan a hnunga chemte chu a phawi a, chung mi 3 te chu a vit hlum leh ta vek a. Chuveleh Acharya chu a rawn au vak a, "NAthan...niloo." a ti vak a. Nathana chu ava hawilet a, Police jeep chhung atang chuan mipakhat a lo chhuk a, Acharya chu a kap thal tawp mai. Chu police chuan a lukhum a phelh a, police tak tak alo ni awzawng lo mai. Dilli-a alo ni a, Nathana chu a mengphawk hru mai. Dilli-a chuan Nathana chu a rawn kap ve pawp mai a, Nathana hnute hnuai ah chuan a kap fuh a, a thal tawp mai. Nathana pawh chu a thi ve ngei anih ringin Dilli-a chu a tlan liam ve leh ta nghal a.

***********

Home Minister Kondal Rao leh Dilli-a te chu an hlim kher mai, an nui vak vak a. Home Minister Kondal Rao chuan, "Acharya chu i that ta ngei a, mahse Nathana erawh alo la dam hram a. Mahse a pawilo, khaa...jail ah a tan tak daih kha. I ti tha e, DCP Nathana chu tualthattu ah i chhuah der mai ania..enge i duh, bawiha? Ka pe ang che, sawi rawh." a ti a. Inthlahrung tak chuan Dilli-a chuan, "MLA seat ka duh ve ani, boss. Engtik niah emaw chuan encounter hmangin police tu emawni tal chuan minla that ngei awm si a, mahse Politics lamah ka zuanglut ve anih chuan MLA ka nih chuan...Boss, gunda chu ka ni reng tho ang, political goon ka ni mai dawn alawm. Tuman an tihnat ka phallo ang che anga, tuman an cho ngam bawk lovang che." a ti a. Kondal Rao chuan a lu chu a bu nghat nghat a, "CM ka ni anga, nang MLA i ni ang." a ti a, Dilli-a pawh chu a lawm ngei mai.

Nathana chu Acharya thihna thubuai ah man niin thuchiang a awm leh hma chu lock up ah a tang dawn ta a, Pratap-a tanna bul chiah ah chuan a tang ve ta a. Pratap-a chuan hmuhsit hmel zet hian, "DCP, ka lo lawm ache. Ka hre lawk vek alawm, hetah tho hian i tawp ve dawn ani tih ka hre vek alawm. Dan(law) i ring em em a, nangpawh i rinawm em em a, mahse thil thleng hi han en ta che. Misual ah a siam daih che hi...in dept lock-up ah ngei i awm ve tak hi. Mi zawng zawngin Police Officer huaisen leh zahawm tak i ni tih an hre vek, in DGP ngei pawhin a hria. LAwyer-te pawhin an hria a, Judge ngei pawhin a hria. Media pawhin an hria, i chanchin hria apiang chuan an ngaisang vek che." a ti a, Nathana erawh a ngawi reng thung.

Chutih lai chuan Dilli-a chua rawn lut a, a rawn nui var var mai. Nathana chu a rawn pan a, "Haha, DCP i dam maw? Minla hria em? Minla hria tiraw? Dilli Babu ka nih hi, ka hming thar a nih chu. Secunderabad-ah hian ka contest ve dawn a, Gymkhana Ground-ah, Public meeting naah Home Minister Kondal Rao chuan candidate ka nih thu a puang dawn asin. Ka tling anih chuan kei Dilli Babu hi MLA ka ni dawn, i hria em? Nangmah vang liau liau in gunda thawmhnaw nilovin politician thawmhnaw ka ha ve tawh dawn asin, chuvang ania lawmthu sawi tura ka lo kal ni." a ti vel a, a nui vak vak a. A kalsawn pah chuan, "Hey, constable te u, lock-up a tang ho zawng tan hian biriyani plate khat theuh ka lo khilai hlawm ange, politician ka ni ve tawh dawn, hlim rawh u." tiin a nui phei vak vak a.

Rum zet hian Pratap-a chuan Dilli-a chu a lo melh a, ring zet hian, "Hey thianpa, naktukah ka chhuak tawh dawn a, natuk zanah chuan nangmah support turin banner lian tak nen ka lo kal ve ngei ang. Vote khat chuan nilo, vote 100 chuang ka thlaksak ang che." a ti a. Dilli-a chu a nui huah huah a, "Tehreng mai, a lawmawm ngawt ang." a ti a, a chhuak ta a. A chhuak chiah chu zawi sap hian Pratap-a chuan, "Ka that khawp ang che, Hmela." a ti a. Nathana chu ava en leh a, "Ilo hria em, Nathan? Min han hrilh teh, Police-te hi kan thinrimin tharum kan thawh ve thianglo em ni? I naupan lai chuan min ngaisangin ka thusawi thinte chu dik ilo ti viau pawh ani maithei e, mahse tunah pawh i idol, i hero Pratap Rudra tho ka la nih hi..ka experience ka sawi a nih hi, tinge min ngaihthlak duh leh siloh a? Police nep tak ka nih thu min hrilh vak vak a, anih leh min han chhang teh, tunge nep zawk chu?" a ti a, Nathana chu a ngawi reng. Pratap-a bawk chuan, "Hlauhna, thih hlauhna hian misualte chu a siamtha tur a ni. An vaiin an hlau vek tur a ni, hlauhna chu ka pe ngei ang." a ti a.

**************

A tuk ah chuan Kondal Rao chuan phone call a dawng a, a rinloh tak maiin Nathana a tlachhuah thu a dawng ta tlat mai. Dilli-a chu a hrilh nghal a, Dilli-a chuan, "KA ring reng ani...jail ah kalin ka va vo vel a, ka van mawl tak. Enteh Boss, meeting neih naah buaina a rawn siam mai ang em?" a ti a, Kondal Rao chuan, "A ngam chuan siam rawh se." a ti khur khur a. Zan alo ni a, hunpui chu a lo thleng ta. Mipui pawh an pungkhawm tam tawh kher mai, "Home Minister Kondal RAo, dam reng rawh se." tiin an au raul thup thup mai a. Stage-a a kal hma chuan Kondal Rao chuan DGP a phone a, "Hello DGP, zanin hian candidate ah Dilli-a hi ka thlang dawn a, meeting hi pangngai takin a kal tluan tur a ni. Kha DCP Nathana khan min rawn tibuai tur a nilo, DCP Nathana hi jail atanga a tlanchhuah thu sawi darh la, news ah chhuah bawk ang che u." a ti khur khur a.

Stage ah chuan ava ding chhuak a, "Nu leh pate u, pitar leh putarte u, ka unaute u...chibai ule." a han ti deuh thlap thlap a, mipui lah chuan kutbengin an lo lawm kher mai. Kondal Rao chuan sawi zawm zelin, "Hman atanga tun thlengin, in fapa ang maiin min enkawl a, engtin nge ka hmangaih loh theih tehlul ang che u? Unaute u, hei..ka bula mi hi in fapa thar a nih hi.." tih pah chuan Dilli-a chu a kawk a. Kondal-a bawk chuan, "A hming chu Dilli-a a ni a, Dilli Babu tiin ko thin ang che u. A chanchin hi a tawi thei angber sawi chuan mi inngaitlawm, taima tak a ni. Hmeichhiate hi an zahawmna a ngaipawimawh a, a farnute angin a en vek a ni. In vannei ani mai lo, keini party pawh kan vannei a ni." a han ti vel ham ham a. Chutih lai chuan mipui ho hnung deuh a soundbox lian tak chungah chuan Pratap-a chu a silai nen alo ding vang tawh a, stage-a thusawi mek Home Minister chu a tin vang vang a.

Kondal-a chuan a sawi zawm zel a, "Nangmahni hmu tur hian a bei nasa asin, vaunna tamtak a tawk bawk. Mahse kan hlau em? Teuhlo, kan hlau chhete lo. DCP NAthana tih emawni...a hmel pawh ka hre chianglo, ani mai mai khan min vau vel a, ka hlauh in ring em ni?" a ti ta pung pung mai a. Mipuite chuan mak an ti a, an in en hrek hrek hlawm mai. Kondal-a lah chuan a tui tulh tulh mai bawk si, "Tupawh ni rawh se, tumah kan hlau lo. HEY NATHAN...i ngam anih chuan min rawn vau leh ta che. Lo chhuak rawh, i chingfel law law ang hmiang. Ka mi leh sate hi mei alh ang mai kan nih hi, kan hal hlum thak thei che asin. I ngam chuan lo penchhua rawh..lo kal ta che." a ti ta vak vak mai a. Chuveleh mipui awmna hnung, Pratap-a dinna sir deuh lama motor pakhat chu a rawn puak ta pup mai a, mipuite chu an au nghal chiam chiam hlawm a.

Pratap-a pawh chuan mak a ti ngei mai, a thil tih a ni der silo. Chuveleh Police motor dangte pawh chu a mal te te chuan a rawn puak phei ta pup pup mai a, mipuite chu an tlan darh hlawm a. Stage ah chuan Kondal RAo leh Dilli-a te chu an la awm reng a, an mangang kher mai. Chuveleh Nathana chu stage ah chuan a rawn lang thut mai a, pistol pahnih a phawrh a, Home Minister leh Dilli-a chu silai chuan a tin ta ve ve a. Nathana chu a au vak a, mipuite pawh chuan Nathana an hmu chu mak an ti a, an let leh sup sup hlawm lawi si a. Police hote chu an rawn tlan khawm a, Nathana chu silaiin an rawn tin thap hlawm mai a.

Nathana chuan vinzet hian, "In silai kha dahthla rawh u...hey Minister, silai khu dahthlak tir rawh, vatin.." a ti a vanlam hawi chuan silai chu a hmet puak vak vak a. Minister chuan hlau tak chuan, "Mimawl ho, dahthla ta che u." a ti a, police-te chuan an dahthla ta a. DGP chuan, "Nathan, i thil tih hi i hria em?" a ti a. Nathana chuan thinrim hmel tak hian, "Hria e, ka hrechiang khawp mai. Ka hna ka chan a, ka zahawmna leh ka nunna ka chan bawk. Fahrah ka nh angin fahrah takin min siam a, khaki uniform hian min phatsan a ni. Pawisa ka duh, pawisa ka duh a ni. Engmah dang ka duh lo, ka nun an tihchhiat man cheng nuai 10 ve ve an chawi tur a ni." a ti khur khur mai a. DIG chuan, "Nathan, i rui em ni a? Engthil nge i tih hi?" a lo ti a.

Chuveleh Nathana chuan silai chu vanlam hawi chuan a kap leh vak vak a, Home Minister hlau lutuk chuan DIG chu ava en a, "I mawl em ni? Thinrim takin silaiin min tin a, tinge i lo tih thinrim zual a?" a ti vak vak a. DGP chuan, "Nathan, Sorkar kan rawn phawt loh chuan eng pawisa mah kan pe theilo che." a lo ti leh a. Nathana chuan, "Chutiang ka nghak hmanlo, pawisate chu an nei ve em em ang, a ni lawm ni?" tih pah chuan silai chu a hmet puak leh vak vak a, Minister chua tap pur tawh mai. Tah aw tuau chuan, "In mawl ami? Thihna ka hmachhawn mek a ni a, enge sawi ho phawt angaihna? Pe velo mai rawh u, keiman ka pe mai ang. Naute u, nuai 20 rawn la rawh u..tunah..vatin." a ti hluam hluam a. Minister kidte chuan pawisa chu an rawn la a, stage hmaah chuan an rawn dah a. Stage chu pawisa hlirin a khat ta mai a, press mite lah chuan camera-in an lo la a, India ram pumin an en mek chu a ni si a.

Nathana chuan Minister chu ava melh a, "Hengte hi tute pawisa nge? Mawh?" ati vak vak a. Dilli-a lam chu ava hawi leh a, "Hengte hi tute pawisa nge?" a ti leh a, boruak chu a rej thiap mai. Nathana chuan, "Cheng 10,000 lek thawhchhuah pawh a har em em a, ,ahse heng pawisa tamtak te hi tute ta nge ni em em bik ang? Sorkarin cheng nuai 5 lek pawh pekchhuah harsa a tih em em laiin hengmite pahnih hi chuan minite 10 chhung lekin cheng nuai 20 an rawn chhawpchhuak thei nghal a, silai hi hmet puak leh deuh ila, a aia tam an rawn phawrh chhuak leh thei mai angem?" tih pah chuan a han hmet puak leh vak vak a. Minister leh Dilli-a te chuan an hlau kher mai, an thlan a tla zawih zawih a.

Nathana chuan Minister chu ava melh leh a, "I pian tirhin i hausa nghal bik em ni? Nge Pathian i ni zawk?" a ti a. Dilli-a lam chu ava en leh a, "Anih nang? I pa hi Donald Trump em ni? Nge Mukesh Ambani zawk? Engtin nge hetiang zozai pawisa in neih theih?" tih pah chuan silai chu a hmet puak leh a, mipui lah chu an ngawi thiap mai. Nathana chuan mipuite chu a en a, "Police-te chuan tupawh kan enquire ngam a, mahse hengmite pahnih ve thung hi tuten nge inquire ve ngam awm?" tih pah chuan Dilli-a chu a en a, "He Dilli Babu-a ve hi...a background in hria em? Misual tak a ni tih pawh inhre vek ani lawmni? Hmeichhiate zahawmna ka ngaipawimawh e te a ti vel a, i ngaithla ngam zawk te kha zak rawh u. Ice-cream ah drugs a pawlh a, naupangte hnenah a zuar kual a. Minister order nghak lovin lo hrem ta ila hetiang hian a ngampa tawhlo nimai tur...Police Officer zahawm tak tak anga ka ngaihten salute inlo pe vel chu ania, zahthlak lutuk." a ti ta siah siah mai a.

DGP pawh chu a zak kher mai, a kun reng a. Nathana bawk chuan, "Kan ti diklo ani...mi thenkhatte pawhin dan leh Pathian tih vel chu engatan mah an ngai tawhlo, chu chuan in thinlung a tina ve lo em ni? Dilli-a hi gunda a nih lai khan lo man law law ila chu thir degree hmangin hremna kan pe thei tur ania, mahse tunah chuan Minister emaw, MLA ni tase, special court ah hruai a, security nen, enquiry nen tihkual hrep angai tawh ang. Minister meuhvin local gunda ber kher chu ram hruaitu atan a thlang a, in hmu ani lawmni? In hria ani lawm ni?" tiin a au leh vak vak a. Dilli-a chu silaiin a tin a, "Sawi rawh...inpuang rawh." a ti a.

Dilli-a chuan hlau tak chung chuan, "Awle, ka sawi ang. Home Minister Kondal Rao hian Raysaleem khua ah zu a siam thin a, chumi hnuah politics ah a zuanglut ve chauh a ni." a ti a, Nathana chuan., "Sawi zel rawh, politics a luh hnuin pawisa engzat chiah nge a hui luh?" a ti a. Hlau chung chung chuan, "Ihh...Billion 300." ati ta mai a, Minister pawh chu a zak kher mai, a meng kual hrek hrek ringawt a. Nathana chuan, "Chu chauh chu anilo, sawi zel rawh." tih pah chuan a ke bulah chuan silai chu a kap leh thuai a, Dilli-a chuan tap pur chung hian, "Property zawng zawng kha Acharya hming vekin a awm, Acharya hi Minister aiawihtu ania." a ti a.

Nathana chuan, "Acharya chungah khan enge thleng? Sawi leh rawh.." a ti a, tap chungin Dilli-a chuan, "Ka hre lo." a ti a. Nathana chuan Dilli-a keah chuan a kap a, "Sawi rawh." a ti vin tuar a. Dilli-a chu a thingthi hnawk a, thaw hlawp hlawp chung chuan, "Acharya chu nangman i man a, Minister hian Archaya chuan thudik a sawi a hlau a, chuan..." a tih lai chuan NAthana chuan, "Sawi zel rawh..chuan chuan..enge?" alo ti vin vak vak reng a. Hreh hmel tak chuan Dilli-a chuan, "Minister hian that turin thu min pe ta a ni...tichuan, ka that ta a ni." a ti a. Chu live-telecast chu CM pawh chuan damdawiin atang chuan a lo thlir ve reng a, mak a ti kher mai. Nathana chuan, "Chu chauh chu a ni em ni? Sawi zel rawh.." a ti leh a. Dilli-a chuan, "SM nih a duh a, chuvang chuan CM post chuh ve mek Minister pathumte chu that turin min ti a ni. That turin mi ka chah a, mahse mi tu tih hriatlohvin minlo thah khalh a ni." tiin a tap hawm hawm a.

Nathana chuan mipui lam chu a hawi leh a, "Inlo hria em? Hemite nihna diktak pholang tur hian kei hi misual anga ka chhuah angai a, misual ka nilo, police ka ni. Ka zirna turin pawisa ka tuak a, ka tette atangin fahrah ka ni a, keimahin ka inchawm thin. Hna tenawm tak tak, pawisa tam tak hlawh theihna tur pawh ka hmu theuh a, mahse chungte chu thlang lovin cheng 12000 lek hlawhna Police dept hi ka zawm ta a. Ka police uniform te hi ka chhuang asin, police nih hi nuam ak ti takzet asin." a ti a, Pratap-a pawh chu a lo nui sak mai. Nathana chuan Minister chu a han melh leh a, "I thuihhruaite zinga mi ang thovin keipawh hi gunda ka ni ve i ti tiraw? Police-te hi i thuihhruaite kan ni ang maw? Uniform zahawm tak chu gunda mai mai hnenah i hlan chhawn g a, tualthattu chu Home Minister ber hi i ni amaw? Gunda ten kan ram hruaitu nihna an chang ang maw? Engtin nge remna a awm theih ang?" ati a, Dilli-a leh Minister-te pahnih chu an tap pur tawh mai.

Nathana chuan [police-te chu a zu en leh a, "Kum reilote hnuah in retire teuh dawn a, hemite pahnih hi misual an ni tih inla hre chuanglo em ni? Hre reng chung siin engtin nge in salute theih a, Sir? Keini Police Officer-te hi kan kut chu phuarbehin a awm a, heng misual pahnihte hi hremna kan pe thei silo. Police in ni lawm ni? Enge in hlauh a? Superior power diktak chu nangni hi in ni, court pawh nangni hi in ni a, in thusawi te chu rorelna dik a ni. Mipakhat chauh a nih chuan complaint mai chauh a ni a, mahse mi 1000 chuan gan nih chuan order a ni tawh zawk thin. Sorkar chu a thingthit angai thin a, a zahthlak asin. Hemite pahnih hi keichuan ka bei zel a, min that mai thei tih pawh ka hria. Ka nun an tichhia a, ka hmangaih em em Police hna atangin min ban tir bawk a. Mi a ah min chhuah ta anih hi..engtin nge ka tih chuan ang? Min hrilh rawh u....engtin nge ka tih ang?" a ti fak fak mai a.

Mipuite chuan, "That rawh, DCP..that rawh." tiin an lo au a. Nathana chu a nui suk a, "That ve ve ta ila engkim a tha vek kher dawn em ni? Min chhang ru..engkim a fel vek phah angem? Anni ang hi chu kumtinin khawi khawi emaw atangin an lo piang chhuak zel thovang, an vaiin kan that vek thei dawn em ni?" a han ti leh a, mipui chu an ngawi leh ta thiap mai. Nathana chuan, "He silai hi anmahni thah nana rawn lekchhuak ka nilo, hemite chanchin tenawm tak hi hria ula ka duh vang zawk a ni. Hei hi Police ka nih angin ka live investigation neih mek a ni...mipuite hian PAthian kan hlauh ang chiahin dan pawh hi kan ngaipawimawh ve tur a ni. Dikna an tan tur a ni a, sual an umbo tur a ni. An tanrual a, an vaia an thawk tlang a nih chuan tu misual mahin a bei ngam lovang. Hemite pahnih ka thah hi a chhanna ni ta se, kan ram chu thisenin a bual anga, chu chu ka duhlo a ni." tih pah chuan a silai ken chu apaih a, a ban a phar ta a.

Chuveleh mipui zing atang chuan Minister kidte zinga mi pakhat chuan Nathana chu a rawn kap a, vanneihthlak takin a banah a ni hlauh mai. Mipuite chuan, "DCP Nathana i kap ngam amaw? That ang u,,,tunge ni?" tih pah chuan silai kaptu ber chu an ben rawn ta luai luai mai a. Chu veleh Pratap-a chu a awmna atang chuan a rawn chhuk a, Stage lam chu ava pan a. NAthana chuan a lo hmu a, mittui tla teuh leh a hliam dawm vawng vawng pah chuan Pratap-a chu a lo melh a, "Nangchuan tualthah chiah i thei..thildang engmah i ti thei velo. Ka chhungte tan, ka nupui leh fanaute tan emaw ka thiante tan chuan ka lo chaklovin ka lo nep a ni maithei e. Mahse Police Officer nep tak chu ka nilo asin, Police chak tak ka nih hi. Ka chak reng bawk ang, engtik ah mah ka tlu hlen lovang." a ti a.

Minister chu a en leh a, "Evidence hlau vangin i tlanchhia a, mahse tunah chuan mi tam tak kan awm tawh. Evidence chu kan hmu a, heng mipuite hi witness an ni. Tunah chuan min han hmuh teh le..he case ah hian ka chak nge chak lo...min han entir ta che." tih pah chuan Pratap-a chu a en leh a, "Hei hi Police diktak hna thawh dan chu a ni. Pratap-a pawh chuan sawi tur reng a nei lo, a ding ngil a, khawng tak chuan Nathana chu salute pek pahin, "Sir." a ti a. Police dangte pawh chuan salute an pe ve a, DGP leh DIG te meuh pawh chuan salute chu an pe ve ta a. Nathana pawh chuan a hliam dawm pah chuan salute chu a lo pe let ve a, mipui chuan kut an beng dur dur mai.

***********

A tuk zing chanchintharah chuan reporter chuan, "Home Minister Kondal Rao leh MLA Dilli Babute chu nizan khan man an ni a, Kondal Rao-a lim siamin mipuiin an hal bawk a ni. Minister a nihna atangin Kondal Rao chu paihthlak a ni a, party membership atanga paihthlak a ni bawk." a ti a. CM chu an kawm bawk a, "Kondal Rao leh Dilli-a te chungah hian action na tak ka la ngei ang a, Kondal Rao-a chungchang sawi tur hian general meeting ka ko bawk ang." a ti a. Ex-Police Inspector Pratap Rudra pawh chu a inpe a, minister 3 te thattu chu amah ngei a ni tih a inpuang bawk.

DCP NAthan Malsawmkima chu a hna tawh that avang chuan CM chuan promotion pe in Sr SP nihna a pe a, Mizoram ah a haw hunah pawh DCP ang nilovin, Sr SP angin police hna chu a thawh chhunzawm tawh dawn a ni. A awmzia chu maw...DCP NAthan Malsawmkima kha, DCP ni tawh lovin..SP Nathan Malsawmkima ani tawh zawk dawn tihna anih chu. E..chuan kan sawi hmaih pakhat, ASP Rinawma kha...hna avangin a zin kan tih kha. Ani pawh kha hna alo thawk tha ve phian aniang, ASP atangin ACP ah a kaisang ve tawh bawk a nih chu. Tin, kan police nula hmeltha Inspector Amanda Lalrempuii pawh a kaisang a, ASP Amanda a ni ve tawh bawk. SI Liantea kan tih ziah thin pawh kha SI a ni tawh biklo, Inspector 3 star ngat a ni ve tawh dawn bawk a ni.

THE END

(END OF SEASON-3)

(Nathan Season 1-3 a kim thlapa lo chhiar kim vek tute kha abik takin lawmthu ka sawi duh a, ka story chhiar ve thin tute zawng zawng chungah ka lawm tak zet bawk.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)