NEEDLE IN A HAYSTACKS EPISODE 2

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IN A HAYSTACKS EPISODE 2

Unread post by Sangtea Renthlei » July 30th, 2020, 6:39 pm

Sana ka en vat a, zan dar 7:50 chiah ala ni a, LPS chanchin thar rawn puan chu a thar tha vat vat hle a ni.
Ka phone a rawn ri tlar tlar a, Total lockdown tihtur awm lo lutuk avang leh Raymonda Lalthazuala, pakhirha ti tih elsenna atana ringtone a atan liau liau a, ka aw tial ve tak leh lai rut mai a ka siam chawp ve ngat " ka Pu Val, ka be duh che, Ka Pu Val ka be duh che " a rawn tih tial ruan ruan lai chuan kei chu ka lo nui vur vur a. Phone ka pick rual rual chuan " Rang takin lo insiam la, ka rawn lam ang che " tih zawng a rawn sawi a, ka chhan ve hma hma chuan phone chu a off zui leh nghal daih a .
Huihamm!! He mihring zet hi zawng a mizia , a chet zia leh a tawngkamte hian min chal delh thin viau mahse a hun a hmunah chuan ka hma ah a ding zat zat ngam thung si, hengte avang hian maktak maiin a thuhnuaiah ka kun reng mai a nih hi.
Police departmenta kan lut ta kha inchhirna pakhat ka nei, a chhan chu he Raymonda Lalthazuala'n nui then thu chung a min lo en kur lai a, a hma a han inkhenkhawng ngai thin hi ani . Tunah chuan thiamna sang zawk a neih vang leh a hnathawhin a phu em avangin S.I ah kaisan tir ani tawh a, kei erawh Constable lumum ka ni reng thung si a, han salute duhlo ila rum em em in min melh run a, han salute ila, a nui leh vur vur lawi a, mahse hun remchang ka neih phawt chuan a chimawm thei ang ber a chet ve hram ka la tum fan thin.
Kan kawtah chuan bike horn a rawn ri tuar tuar a, keilah chu ka lo la insiam zo der lo leh nghal a, mahse engnge maw pawi vak chuang le tiin jocker pant chhing leng lung leh ka bata silipar hlui lam tawh a chhuat pan hlung tawh lang pawl ruih bun chuan ka chhuak ve ta ngawt a.

Raymonda chuan CBR dum tle zuk a kuang kuah meuh a thu chungin min lo en vung vung a, a awmna bul ka va thlen chuan " Mihringte hian kan nalhpui leh kan mawipui hi kan va hre lo thin tak em! " a lo ti hluk a.
" Keini ang tlangval pian thiam tan mawi pui loh tak tak a awm thei lo e " ka lo ti ve hmak a. Bike hnunga ka lawn hnu chuan kan tlanchhuak zui nghal a.
"Chanchin thar kha i lo ngai thla ve em ?" Raymonda chuan lehhawi deuh ha chung hian a rawn ti a.
" Ngaithla e" ka lo ti tawi tuk a, kan kalna tur awm ang chu rin hriat tho avangin zawh pawh ka zawt buai peih lo law law a .
Raymonda chuan bike chu hneh sawh zet a gear thlak in a lim chhuah tir zui puat a, motor tlanchhuak an tam lo in , kawng a thawl tha bawk a, bike tlan chhak lutuk avang a thli lo thaw chuan ha hni a chhem dai duk thei hial a.
Kar loah Vailui motor silna chu kan thleng ta thuai a

Raymonda chuan bike chu kawngsir remchang laiah chuan a han din tir a, keipawh ka chhuk ve nghal thuai a, kal nghal mai ka tum lai chuan Raymonda chuan " Tunlai chhanah in hmel ang hi an vang tawh si a, mi ngaih i ti tha lo ang, hei mask hi vuah rawh " nui hauh lo a rawn tih pahin a kut chu ka lamah rawn ban pheiin mask a khai va va bawk a.

Corona virus avang a mask vuah lo a khawlai chhuah phal loh a nih thute chu ka hre hne hlei hlui tawh a, zan in erawh ka hmanhmawh deuh avangin ka lo theih nghilh hlauh a ni.

Mask ka ban lai chuan chimawm zetin a lo nui vut vur a. Mask chu ka han pawt thla vut a, la nui sung chung chuan Raymonda chuan Vailui kam lawk a in lian tha ang reng tak dingluah chu a pan a, keipawhin ka zui ve nghal zat a.

Kawmkar zau lutuk loah chuan lut thla in step ah kan chhuk thla a, in hnuai ber zawnah chuan mi pali panga vel mask vuah theuh chungin an lo ding tham hlawm a.

An zinga palian ber leh dul hma chhuan deuh luah chuan min lo chhawn vat a, Raymonda chuan police kan nih thu leh he thihna chungchang avang a helai hmuna kal kan nih thu a han hrilh hnu chuan inchhunglamah chuan kan inzui lut ta a.

Inchhung chu alo ruak huai a, hripui corona virus avangin kan mizo tihdan phung, khawtlang a chhiat tawk an awm apianga nula tlangval tlankhawm dawr dawr thinte pawh tlawmngai hlei thei lo in he hripui hian min dang bet rih miau si a le, lehlam zawng tak erawh chuan kan chet velna chu a ti awlsam phian zawk ang chu.

Min lo chhawntute leh chulai hmun lo nghaktute chu YMA lam hruaitute an ni tih an tawngkam atangin a hriat theih a, hetiang hripui lengkarah hrikai hlau a kan tawmim thup lai a, YMA hruaitu nih tlin tak mai a, an lo che chhuak chu an fak awm khawp mai.



Inchhung chu rinaiin a zau tha phian mai a, nula mahni a khawsakna atan chuan a nuam helh hawlh viau in a rinawm ani. Inchhung bungrua chu anih dan tur dik takin a awm thlap a, thil fel lo thlenna hmun ni awm pawh hian a lang lo a.


Nichina min lo chhawntu khan " An chhungte lunglei lam atangin an rawn kal dawn a, Aizawl lam a laina hnaite pawh lo kal khawm mahse la, police lam kan ngaihchan avangin luh tir kan phal rih lo a, kawngpui dungah khan motor ah kan thu leh hla ngaichangin an awm mek hlawm a, ruang chu room chhung lamah khan a awm " a rawn ti zui zat a.


Room chhung kan lut chiah chu ka uak tuarh lo chauh ani, room chhung chu thisen hlirin a khat ani ber mai, kil tinah thisen atling hnek hnuk a , a thang huam huam mai bawk a, bungraw chitin mai chu chhuatah chuan a in chap darh niai nuai hlawm a.


Raymonda chuan Duhsaki ruang chu uluk fe hian a han bel chiang a, a phone chuan thla a la pa zauh zauh bawk a.

Hetiang tualthahna rapthlak hi vawi tam tak lo hmu tawh in , thisen luang zeih zuihte hi vawitam tak lo hmu tawh mahila, ngaiah ka nei thei meuh lo chu a ni e.

Raymonda a che vel chu ka lo en reng ringawt a. Darkar chanve vel lai, ruang a belh chian hnu chuan Raymonda chuan min lo chiau au tu YMA hruaitute hnenah chuan " E hei, i hma lakna azarah ruang leh hnu hma tangkai tur tih bo awm lo in in lo veng him a a lawmawm khawp mai tun atan chuan kan duh tawk rih mai e, ruang zuk hmu hmasa tute kha, thenawm te in ti em ni kha ?" Tiin a han zawt a.

Duhsaki thenawmte ruang zuk hmu hmasatute in min kawh hmuh hnu chuan chu in nelawm fahran lo, ruang leh thisen inpawlh nuai chu kan chhuah san ta a.

Thenawm lawk a awm , Duhsaki ruang zuk hmutute in kan pan lai chuan step atang chuan lungchhe van kai a tap hawm hawm thawm a lo chhuak a, Duhsaki in luah lam pan chuan hmeichhe pahnih leh mipa pahnih hi an rawm chhuk a, Duhsaki chhungte emaw a thian hnaite pawh an ni mai thei , a hma a rawn kal hmeichhiate chu an tap hawm hawm a, a hnung lam a rawn kal mipa, tlangval la ni awm tak pawh chuan scarf a hmai hupin a mittui anuai mawlh mawlh a. Keini pawh kan len luhna tur inah chuan kan lut zui ve nghal a.



Raymonda chuan " In awm maw? Police lam kan ni e, in thenawm nula thihna chungchang ah hian thu kam hnih khat lek han zawh belh che u kan duh deuh a, kan rawn leng lut anih hi " tiin tawngkam nelawm takin inchhung a mite chu a han bia a.

Sitting room lian vak lo a , nu leh pa mai bakah an fate pahnih lo thu te chuan keini pahnih chu min lo en thap a.

An pa ber chuan " E a ni maw? Lo thu lut rawh u " tiin min lo chhawn vat a, Raymonda nen chuan thut hmunte kan han rem zui ve nghal thuai a.

Raymonda chuan " Han in zawt zui ta mai ila, in thenawm nu ruang in va hmuh kha dar engzat vel nge ni kha ?" Tiin a han zawt a.

Pa ber chuan " A dar zat chiah kha ka lo chhin chhiah lo na a , dar 6:30 - dar 7 in kar vel a ni ang " tiin Raymonda chu a lo chhang thuai a.

" In va hmuh laiin a thihna a rei hmel viau tawh em ?"

" A landan ah chuan a rei thawkhat tawh viau niin alang , a taksa kha a lo khawng vek tawh a, a thisen te pawh kha a lo khang vek tawh a "

" A nih chuan , nizan lam daih tawh a thi tawh te pawh a ang viau a ni maw "

" Ni e,. A ruang awm dan leh thisen khang tawh dan atang kha chuan nimin lam a thil thleng daih tawh niin a lang"


Raymonda chuan chhinchhiah ngaite chu a lo ziak zung zung a.

Zawhna zawh chhunzawm lehin " Anih, nizan lamah chuan thawm danglam deuh han hriat in nei em ?" A han ti leh a.

Pa ber bawk chuan " Chutiang hriat kan nei miah lo, hei inhriat ang hian tun ang ruah tui tam lai chuan tuihawk luang ri hi a bengchheng em mai a, muthilh ti har khawp a a bengchhen chang pawh a tam mai, tun ang tui hawk tam lai hi chuan thil pawimawh a pawn lam atang min rawn koh pawh hi kan hre mumal lo fo zawk a ni a " tiin a lo chhang leh thuai a.

A chhanna chu a dik ang tih rin theih turin Raymonda nen an in kawm laite chuan kawm thlang lawk kawrah chuan tui hawk a luang ri hum hum reng a.

Raymonda chuan " A nih tak chu mawle , anih leh ruang inzuk hmuh lai khan kawngkhar kha a lo in hawng sa nge a inkalh zawk ?" Tiin a han zawt leh a.

" Kawngkhar kha chhung lamah a inkalh a, mahse ka han sawi nawk nawk hnu kha chuan kawngkhar chu a rawn in hawng ta mai a, kawmgkhar chunglamah socket hmang a nawr kalh anih avangin ka han sawi zawng khan a lo inhawng ta mai niin alamg " pa ber bawk chuan a lo ti a.


Raymonda chuan a duhtawk angah ta ani ang, lawmthu te a sawi nual hnu chuan in chu kan chhuahsan zui leh ta nghal a, bike dahna lam pan tur a step kan kal chho tep tihah chuan hnunglam atang chuan min rawn au ding a.

Min rawn hui lauh lauh avang chuan kan kir leh ta rih a, kawmthlang tui hawk luang ri hum hum lam atang chuan mi pakhat hi a lo chhuak chho mek a, a kutah chuan T shirt var hi a rawn kenga .

Kawngkhar bul a kan zuk thlen leh hnu chuan min rawn au tu chu nichin a YMA hruaitu min lo nghaktute zing a mi pakhat kha alo ni a, T-Shirt var thisen kai hnuang mai chu Raymonda chuan a han la a, T-Shirt hma ah chuan JOKER tih hi a chuang a, BAT MAN movie a , misual chimawm zet Joker-a lem chu chu T-Shirt ah chuan a in chhu kai bawk a.

Raymonda chuan " A lawmawm hle mai, in chhung lamah sawn lut an awm tawh ani maw ?" A han ti zui a.

An zing a pakhat kan kal tirh pawh a min lo chhawn tu ber khan "Aw, awm tawh e, Saw Duhsaki bialpa leh Duhsaki cousin te an nih saw, ruang saw hmu lo sela a tha zawk a kan hriat laiin anmahni sawn en ve an duh tlat si a. An lo chhuak tep ang, police lamin in duh angin in belchiang tawh tho bawk a, singsa turin tlangval 10 vel kan han hrilh a, khi an lo kal tawh khi , lunglei lam a Duhsaki nu leh pate pawh an rawn thleng dawn hnai tawh ang, nichin lawk khan Aibawk an rawn thlen tawh thu an rawn sawi a" tiin step lam chu a han hawi chho a.



Tlangval tlawmngai mi sawm vel chu stepah chuan an rawn lang tak tak a, inchhung lam a tap hawm hawm te pawh chu YMA hruaitute chuan an han ko chhuak a. Tlangval ho chu inah lutin in leh ruang chu an sing sa zui a, keini pawh Duhsaki cousin leh a bialpate an tih te hnungah chuan T-shirt ngainatawm loh zet thisen kai hnuang chu polythene a khaiin stepah chuan kan chho ve ta a.

Raymonda bike dahna kan thlen hnu chuan tawi khaw muang tawh lo in Raymonda te in lam pan chuan kan tlan chho zui nghal a.

Kawng a thawl tha han han bawk a reilote ah Raymonda te in chu kan thleng chho thuai a.

Raymonda te inah chuan lutin kan tih fo thin danin Raymonda room ah chuan kan lut tlang nghal a. kan thut fel hnu chuan tawng hmasa zawk ah tangin phur fe hian " Tun tum kan hnuchhui tur chu a awlsam dawn riau in ka hria " kan han ti ngawt a.

Raymonda chu a nui suk a " Chuti maw ?" Ti chauhin min chhang a.

Kei chuan inla confi tak hian " Dawn lawm ni? Hei misual kawr kan nei a, tualthattu kawr, tiang kawr nei, Duhsaki in a leng lut thin hi kan zawng chhuak mai dawn alawm " ka lo ti vat a.


Raymonda chuan " E hiau! A ni mai awm teh tak e a" a han ti hluai a, a aw ki han chhuak vel chu ka ngaina lo leh pek hle mai.

Raymonda bawk chuan " Khatiang kawr nei kha chu an tam khawp ang, tin a kawr kha han en la, a la thar tha hle a ni tih a hriat theih a, ka rindan tak phei chuan vawikhat mah la suk loh , a thar hlak a nih ka ring hial asin " a han ti zui a.

Chimawm thei ang berin ka han nui ve hak a " La suk loh a ni tih nen lam han hriat bik chu, i kawr a ni hial lo maw " ka han ti ve sak a.

Raymonda chuan " Thil harsa ani hleinem, kan thawmhnawk kan suk Sahbawn leh detergent ho zawng zawng hi thil al a ni a, kawr thar i lei hi ngun takin en la, a siamtuten i mit la thei tur ang berin mawi hnai tak leh a rawng pawh nung sar turin an siam thin tih i hmu ang, chu chu Sahbawn emaw surf emaw a eng chi pawh nise ,a i han suk khan chung a rawng nung sar te chu thil al tak khan a zuk ti dal ta thin a, i suk tam viau phei chuan tuna i kawr hak lai ang hian a rawng a da bui a, a nghawng te pawh hi a lo var ta thin alawm " tiin min chhang zui a.

Karei!! He mihring zet hi zawng chimawm tur khua nu duan liau liau a ni e



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)