NEEDLE IN A HAYSTACKS EPISODE 3

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IN A HAYSTACKS EPISODE 3

Unread post by Sangtea Renthlei » August 1st, 2020, 7:16 pm

Raymonda bawk chuan a phone chu phawrhin nichina Duhsaki ruang thla a lak chu uluk em em hian a en kual a en kual ," Zombie hi an awm tak tak i ring em?" A rawn ti chhuak phawng a.

Mak tih hmel zet a en chung hian " Chutiang chu naupang hnen a zawh chi anih chu " ka lo ti ve hmak a.

Raymonda chuan " Mahse he thlalak hi naupang entir atan chuan a hmuh a nuam lo deuh ka ti mai mai mawle, uluk takin han en la, hei hi Duhsaki nghawng a mihring ha hnu hma a nih hi " tih pahin a phone chu a rawn lek hnai a.


Ka han en chiang a, Duhsaki nghawng, leh a dar inzawmna tihrawl chu mihring ha hnu a duhtawk a sehna tih hriat tak hian ha hnu hma lang hmarh khawpin a tihrawl chu a chhum phei that a, a pawrh surh mai bawk a.


" Hei hi a ban a mi ve thung " tiin thlalak chu a han hmet tawlh zauh a, thlalak lo lang leh ah chuan Duhsaki ban puam, ti hrawl chu mihring ha in a duhtawk a a peh thler tih hriat tak hian a thler phei hlawk a, ha in a seh chin tihrawl chu a tla khuar kulh mai bawk a.


Raymonda chuan " Hei hi chemte hnu hma ve thung " tih pahin thlalak dang a han hmet lang leh a.

Duhsaki awm bawr, a hnute chung chiah a chemte hnu hma inchi khat leh a chanve vel zet a zau, kaw var hak mai chu a lo lang leh a.

Raymonda chuan " Tualthattu hian mihring thisen hi angam barh barh hle ani tih a hriat a, a chhan chu chemte hnuhma kha han en ta la, a awm a avih hnu khan duhtawkin chemte kha a kar kual vel ani tih a hnuhma atang khan a hriat theih a, chu mai chu duhtawk lo in Duhsaki thi tawh hnu chu a duhtawkin a seh zui ni berin alang " a han ti zui leh a.

Kei chuan " Tualthattu hian a seh zet hnu ah , chemte hian a vit pawh ani thei tho " ka lo ti ve khauh a.

Raymonda chuan " Ni lo e, chemte hian avit hmasa zawk ngei tur a ni, a chhan chu misual ni ta la, mi inah lut ru ta la , mihring i hmuh chu che thei lo turin siam duh ta la, i seh hmasa chut chut lo ang, chemte i hmang hmasa ngei ang " a han ti leh a.

Kei chuan " A nih leh chemte a ka vih hnu ah engvangin nge ka seh kher ang " ka ti ve leh ngat a

" Chu tak chu alawm, kan misual hi Zombie a nih vaih zawngin nang pawh kha a la seh lo ang che tih kan sawi thei miah lo ania " tiin Raymonda chu a nui zui hak hak a.


Raymonda zawhna min zawh leh thlalakte chu ka rilru in ka han chuktuah khawm ve ngial a, film lamahte hi chuan zombie lam chi te chu tam tak en tur leh hmuh tur an awm teh meuh a, mahse hengte chu film siamtu, a script ziaktuten an phuah chawp mai mai niin a lang si. Mahse khang film a zombie ho chet phung leh tun a kan misual, tualthattu chet dan phung erawh chu a in zul viau lawi si.


Raymonda chuan " Zanin atan chuan tih theih vak a awm rih lem tawh lo bawk a, va haw tawh mai rawh, i duh leh ka bike kha hawn mai la, naktuk lamah fai varin i rawn dah leh mai aniang chu " a han ti a.

Keipawhin i he lo in Raymonda thusawi chu zawm nghal in " Naktuk ah fai varin i rawn dah leh aniang chu " tih chin zawng tel lo chuan ka pawm zawng tak ani bawk a, inlamah chuan Raymonda bike hmang chuan ka inkhalh haw zui nghal thuai a.


Chumi zan chuan mahni phak tawkin kan hnuchhui lai mek chu mut hmunah ka han ngaihtuah ve ngial na a , pahnih hmun riat hi sawm paruk ani tih chhut chhuak tur pawh a kut zung tang thliak meuh a chhiar nghauh nghauh ngai keini ang tan zawng, khumlai zawl atang a ngaihtuahna mai mai chuan ram ropui min thlen lo leh pek dawn khawp e. Ngaihtuah pawh ngaihtuah zui peih lo chuan ka muhil zui ta thuai a.


Zing dar 8:30 a chanve a ka phone rawn ti chuan min ti harh zawk a, la harh chiang lo , meng phan chual chung chuan phone chu ka han la a,


Raymonda chuan " I la tho pek nange?Delh hlum sa ei tur zawng nise intodelh pawl tak i nih dawn hi maw le" a rawn ti nghal a.

" Engnge ni a?" Ka ti bul hmuk ringawt a.

" Dar kua a ka bike kha rawn dah rawh, kan tualthattu kha an man fel der tawh a ni awm e " Raymonda'n a rawn tih chuan ka thu nghal awt a.

" An man tawh maw ?" Ka ti let hu a.

An man tawh maw ?" Ka ti let hu a.
" Inspector Ramtea'n min rawn be zo chiah a, tun mai ah khan Police te chuan Duhsaki in luahna neitute fapa chu tualthattu ni ngei a hria in an man ani awm e, kawr pawh kha a kawr ngei a ni in an sawi a, lokal vat la, police station lamah kan han hmuh ve vat angai e " a rawn ti a
Phone chu dah zui nghal a, keipawh khum atang a tho nghal atin, muangchang lo in ka insiam ve zung zung a, Raymonda te in lam pan chuan ka inkhalh chhuak ve ta a. Raymonda chuan kawt kai a ding meuhin min lo nghak reng tawh a , ka thlen rual rual chuan bike hnungah chuan a rawn lawn nghal in " Kal rawh le " a ti a, bike chuan ka han kual tir pawp a, ka tlan thlakna lamah bawk chuan let lehin Kulikawn police station lam chu kan pan zui nghal a.
Kawng a free tha helh hawlh bawk a, theih tawk a chakin bike chu ka khalh ve pur pur ni hian ka hria a, mahse police station kawt kan han thlen a, Raymonda a chhuk rual chiah chuan " Satel chungah kan chuang a ni ber a lawm maw le " a han ti hram pek a.
In chhan khaw tlaina hun a awm lo bawk a, ngawi rengin stepah chuan ka zui chho ta zawk a.
Out post chhung kan luh hnu chuan Inspector Ramtea chu kan han hmu leh phawt a, a niin chanchin tawi fel deuh a min lo hrilh hnu chuan tualthattu hmachhawn tur chuan lock up chhung ah chuan kan lut ta a.
Tlangval pawr fep fawp, cher lam deuh, a vun ngo lam leh engemaw natna tuar ni awm tak a da deuh bui chu a lo thu ngawi reng a. A hmui hmai vel chu a khem nian nuan bawk a.
Raymonda chuan en vang vang a , inspector Ramtea'n a hming a lo hrilh tawh hmang chuan " LALSIAMTHAR" tiin a han ko chang deuh rat a.
Chu pa chu phawk deuh hru hian a rawn hawi chhuak vat a.
Raymonda chuan " Damdawi i ti thin a ni maw?" A han ti leh tawng a.


Siamthara chuan a lu a bu nghut ringawt a.
" Kum engzahnge damdawi i khawih tawh?" Tiin a han zawh chhun zawm leh a.
" Kum thum emaw kum li emaw a ni ang " Tiin Siamthara chuan a lo chhang a.
" A nih, Nizan hmasa khan engtinge In inluahtu nula, Duhsaki kha i thah? " Aw nel awm loh fahran hian a han ti zui leh a.
" Tumah ka that lo"
" A nih he T shirt hi i T shirt a ni tiraw ?" tiin Raymonda chuan polythene a T shirt a rawn khai chu a han phawrh a.
" Ka T Shirt ngei chu a ang alawm, mahse ka T shirt chu kan kawm thlangah engtinge a lo awm daih ka hre lo " Siamthara chuan a ti chuai raih a.
" In kawmthlanga i paih chhan chu In inhnuai nula , i thah hnu kha Thisen a kai nasa em a, i paih ta mai anih kha " Siamthara mit tak a enkal chung chuan Raymonda chuan a han ti leh a.
" Kha mi zan khan LTF duty te bum in, mi kawm kar zelah kalin Ka thianpa damdawi ka tih pui thin nen Reiek road ah kan chhuak thla a, kan thian dangte nen in hmu khawmin nidangah pawh kan inhmuhkhawm fo na thin ah kan inchiu a, chuta tang chuan zing lamah ka haw a, in ka thlen chuan khua a var tawh a, chhungkaw then khat chu an tho tawh "
"Kha i hmai belkang niau nuau kha engngatinge? In inhnuai nu nen chuan in in bei rei fu tih pawh a hriat viau mai a?" Tiin Siamthara chu tualthahna nen chuan a han hmeh bel lui leh ngat a.
Siamthara chuan " Ka thiante nen kan insualna a nih hi " tiin Raymonda chu a lo chhang leh vat a.
"Engvanginnge in insual a?"
" Lock down hian keini ang damdawi khawih thinte ho te hi hremhmun pate ah min thlak hi ani ringawt mai, chhuah theih si loh, damdawi vang bawk si. Khati kan chhuak ta a, kan damdawi rawn keng tupa ber tur kha kawng lakah LTF duty ho a hel kualna lamah a rawn thang rei deuh hlek a ,keini damdawi chak a sa hal huam huam tawh chuan kan nghak thei meuh lo a ni ber mai, chak leh chak kha kan in la fuh lo chho a, kan insual ta ngawt a, mahse kan duh ber damdawi a lo thlen tak hnu ah chuan tha takin kan ti ho ve leh mai a, kan insualna ah chuan hei ka mit ko leh ka hmui hi thi a, a thi duh em avangin ka kawrah pawh thisen a kai nasa hle a, chu kawr chu tuna i ken ang chiah kha a ni, mahse hei hi erawh ka chiang ani, damdawi a kan inchiu hma zawng kha chu fiah takin engkim ka hre vek , ka kawr kha kan kawmthlangah ka paih lo a, kan damdawi tihna hmun hnim zingah khan ka paih, miin an la bo anih loh chuan ala awm ngei pawh ka ring" Siamthara chuan a ti ta a.


Raymonda chu a ngawi zui vang vang a.
" Han then teh" tiin Siamthara chu a han then tir a, a ha chu uluk em em hian a han en a, engmah phei zawng a sawi lem lo.
"Raymonda bawk chuan " I thianpa, i chhuah pui chu khawi a mi nge anih ?tunge a hming" A han ti leh a.
" Danny-a, kan thenawm lawk a mi"
Beisei leh rinai takin zawhna engkim mai chu a chhang fel fai fuk fuk riau zel mai. Raymonda hmelah chuan engnge a ngaihtuah ang tih hriat tumin ka han en vang vang a, vawi tam inzui tawh leh in hrawn tawh kan ni bawk a ,a hmelah chuan Lalsiamthara chu tualthattu niin a hre lo deuh tih ka hre thei a.
Raymonda chu tawng chhuak tawh lem lo in , Lalsiamthara hliam , bel kang niau nuau tawh chu uluk fe hian a han en leh a. A duh tawk ta rih a ni ang, lock up chu kan chhuah san ta a.
Min lo nghak rengtu inspector Ramtea awmna lam chu kan pan nghal a, min lo hmuh rual chuan Ramtea chuan " Tualthattu ni theiin in hria em?" A lo ti nghal var a.
Raymonda chuan " A ang khawp mai " tiin a lo chhang a.
" Court lamin Dar kar 24 chiah kawl min phal sak a, vawiin tlai lamah chuan jail lamah kan thawn ang" Ramtea chuan a tih chhunzawm zat a. Engengemaw kan sawi kual hnu chuan Raymonda chuan Duhsaki in lam kha han bih chian leh deuh a duh thu sawiin police station chu kan chhuahsan zui ta a.
Raymonda chuan " Kan inlamah Thingpuite in in chawl phawt teh ang aw " a tih avangin Raymonda te inlamah chuan kan inphur liam leh ta a rih a.
Raymonda te in kan thlen chuan thingpuite chu in in sitting roomah chuan kan han thu hah dam ta rih a.
Raymonda chuan " Lalsiamthara kha tualthattu anih ka ring miah lo , nang i ring em?" Tiin min han zawt a.
Kei chuan " Tualthattu ani lo tih rinna tur engmah ka hre chuang lo" ka lo ti ve khauh thung a.
" Khami zan a awmna leh a kalna a sawi kha a dik vek ang tih ka ring tlat"
"Rin dan mai mai te chu, in inhnuai luahtu vai mistiri te pawh khuan an nei vek alawm " chimawm zetin ka lo ti ve vat a.

" A taksa leh a thahrui neih dan tur ka chhutin Duhsaki taksa a hliam hnuhma kha chu anasa mah mah ani " Raymonda chuan a lo ti leh a.
"Mihring hi kan hun tawn a zir hian thahrui te chu kan nei mai alawm. Vawikhat thingtlanga kan awm lai pawn kan khua ami in a kang a, an nula , nu te lam deuh khan, an thingrem, hman lai chhuak Thir-thingrem an tih ang chi lian pui mai , a chhung a thil dah khah vek kha an tukverhah a theh chhuak nawlh mai a, inkang te a han rem hnu in chawi nawn tir leh an han tum a a chawi zo tawh reng reng hleinem, a hun tawn leh a manganna khan thahrui a siam sak a ni " tan hmun tha zawk a tang inti tak hian Raymonda thusawi chu ka lo hnial thla ve zat zat a.
Raymonda chuan min chhan zel dan tur a hre lo nge, tul a ti lo zawk , a ngawi zui ta daih a.
Kei erawh ka hlim em em thung, a vawikhatna atan Raymond Lalthazuala mi chimawm, ka tawngkam apiang min hnial thla zat zat thin chu ka dah 'NIL' ve ta tlat niin ka inhria, a va han nuam tak em!!!
Mahse chutihrual erawh chuan Raymonda awm dan atang chuan Lalsiamthara chu tualthattu anih a ring thei tlat lo tih a tawngkam leh a awmdan atang chuan ka hre thei tlat, chu tak chuan kan hnu chhui lai hi a awlsam dawn lo tih a ti chiang hle in ka hria.
'Buhpawl zing a hriau zawn tluk zetin, police lamin tualthattu nia an hriat ber kan rin theih tlat si loh chuan Aizawl mipui heti zat zing a rinhleh leh hmeh bel tur tak ngial pawh hre lo a tualthattu zawn chu a harsa dawn tih a chiang ani'.



Link:
BBcode:
HTML:
Hide post links
Show post links

Sangtea Renthlei
Posts: 13
Joined: July 25th, 2020, 12:02 pm

Unread post by Sangtea Renthlei » August 3rd, 2020, 7:55 pm

NEEDLE IN HAYSTACKS EPISODE 4




NEEDLE IN A HAYSTACKS EPISODE 4




Rei fe a ngawih vang vang hnu chuan a phone message tone ri rang a vang chuan Raymonda chuan a phone chu a han phawrh thuai a.

" Post mortem result pawh lunglei lam atangin a lo thleng tawh a nih hi, Ramtea'n min rawn thawn chiah" tih pahin uluk fe in a phone chu a han en vang vang a.

" Kan nula i kha a thattu khan sex a hman pui ngei anih hi" a han ti leh a, kei chu engmah sawi lo in ka lo ngawi reng ringawt a.

Raymonda bawk chuan " Chutihrualin pawngsual hnuhma awm ang leh, a serh bawr ah hliam engmah a nei lo lawi si a " a han ti leh boh a.

" Pawngsual avanga inthahna ani thei mai angem ?" Ka lo ti satliah ve ngawt a.

Raymonda chuan " Chu chu thil awm thei leh thil thleng fo chu a ni alawm, mahse he post mortem result hian chu rinna chu min rawn thai chhiat sak leh thung si ani. Mi pawngsual khawp a hur herhna lam kawng zawh reng reng chu sex ah an sangin an zauthau nasa thei hle a, chutiang a an chhungril a turtu leh thisen so sang lutuk chuan chet buan buan tirin an hnuhma pawh a hriat viau zel ani. Entirna atan hmeichhe serh bawrah emaw, an hnute ah emaw, an hmeichhe nihna lai taksa bung hrang, mipa in an lawm zual lai apiangah hnu hma, tharum thawhna hnu hma an hnut chhiah ziah thin, a chhan chu kha chakna sosang lutuk leh thisen lum lutuk khan nasa tak a anawr thin vang a ni a mahse Duhsaki chungchangah erawh chuan mipa chi a serhah hmu mahse khang ka sawi tak ang tharum thawhna, hmeichhia ti hmeichhiatu lai taksa bung hrangah te khan a awm hauh lo. " a han ti a, a ngawi zui vang vang a.

" Mahse nula puitling ani tawh a, chutiang hnu hma chu awm lo in pawngsual hi a tawk thei tho in ka hria. Entirna atan tui pipe chhung ah hmawlh te tak te i thun chuan eng harsatna mah a siam lo ang hian " tiin zahmawh lam hawi dawn dawn a kan thusawi a inher takah chuan thu khuh deuh fe hian ka han sawi a.

Raymonda chuan " Ka sawi awmzia zawk tak chu, kha lai a sex an hman na hmun ngawt kha ni lo in , underpant, bra , kawr thlengin tharum thawhna leh in tihluihna hnuhma engmah a awm hauh lo kha ani mak zawk chu. " A han tih chhunzawm ve zat a. Raymonda thusawi awmzia chu ka man thiam ve ta chiah, pawngsual duh khawp a hur herh chu mirilru piangsual leh mi kawhmawh bawk, chakna lam a tlan huam huam chi ani dawn tih chu a chiang mai a, chutiang mi in a duh tak ahmuh chuan tui hal vanglai tak a tui kan in bawrh bawrh ang hian a che buan buan ngei dawn tih chu a rin hriat theih mai a, chu chuan hmeichhe taksa leh hmeichhia ti hmeichhia tu taksa bung hrang leh a khuh mawitu thawmhnaw te chu a dim zui dawn hauh lo tih a chiang ani .

Raymonda chuan " A nih leh Siamthara hmai vel a hliam kha hmeichhe kut thlakna hnu emaw a ang i ti em?" Tiin min han zawt let a.

Kei chuan " Dik tak sawi chuan a mit ko duk ruih kha chu kuttum a hnek na hnu a ang khawp mai a, hmeichhe ho hman thiam leh a hriamhrei pai reng tin a hamna hnu hma erawh ka hmu hauh lo " ka lo ti ve thung a.

Raymonda chu a nui suk a" Khai a, nang meuh pawhin thil nih dan i lo hmu ve khiau anih chu, keipawhin chu chiah chu ka hmuh dan a ni, mahse Siamthara kha tualthattu ani lo huai tak tih ngam chhan tur erawh kei chuan ka hmu chhuak zo hauh lo thung, khami zan tak khan a in atangin a chhuak ru a, a t shirt lah an kawmthlangah chhar a ni bawk a" a tihlai chuan lo inrawlh ve in" Mahse nangmah ngeiin i sawi ang khan khatiang T shirt kha chu a tam lutuk , tunah bazar khi hawng ta se, a in ang thlap sawm va lei rawh ti ta se thil harsa ani dawn hauh lo ania " ka lo ti ve leh lawi thung a.


"Eng pawh nise, helai hmun atang hi chuan engmah kan ching fel dawn si lo a, Siamthara'n a thiante nen a an in hmuhkhawmna atih ah khan i zuk kal teh ang, Siamthara khan dawt a sawi nge sawi lo kan hre thei mai thei asin, a kawr paih te pawh chu kan zuk hmu chhuak mial mahna " tiin Raymonda chu a ding nghal uaih a.

Kei chuan " An kalna hmun kha kan hre ngawt dawn ami ? Reiek kawngte chu thui deuh asin, a khawi lai tak nge tih kan hriat loh chuan kan tlan nileng mai ang " ka lo ti ve leh khauh a.

Raymonda chuan " Kal pahin inspector Ramtea kan be dawn nia, a ni kha Siamthara lo kawm hmasa tu ani a, engkim min hrilh theih mai ka ring " tiin pawn lam a pan zui nghal a, keipawh tawi khaw muang tawh loin ka zui chhuak ve nghal a.

Bike a inphur chungin mission vengthlang lamah tlan thla in Reiek road lam chu kan pan ding nghal a, ka hma lawk a Raymonda phone hmang mek tawng ri pawh chu bike tlan chhak avanga thli thaw nasa lutuk avang chuan Raymonda tawng ri pawh chu mumalin ka hre thei lo a, thli thaw chuan ka sam chhem tho sungin men tak ngial pawh a harin thli thaw lutuk avang chuan mit a thip thawt thawt thei hial ani.

Raymonda chuan kawngsirah bike chu tiding in , a han hun rem te te hnu chuan kawng ko a mihring chhohna bel hun mai ah chuan kan chho zui ta nghal a.

A hmun zawl nuam chin kan thlen hnu chuan chulai hmun chu mi kal fona leh thut khawmna thin tih hriat tak hian a lo fai hun mai a, phul then khatte chu thutna atan a hman thin an ni tih hriat takin a bek sel sul bawk a.

" He lai hmun hi a ni e, uluk takin han hawi kual la, kan zawn ber chu T shirt anih kha aw" Raymonda chuan a han ti a.

A diktak chuan no 4 addict kawr paih han zawn ngawt mai chu ka tha na ang reng khawp mai .

"Engvanginnge Siamthara hi kan buaipui em em a? Tualthattu ani lo tih finfiah tum tlat nge maw kan nih le ?" Ka ti chhuak hial a.

Raymonda chuan a mitmeng fim kar a min en chung hian " Thiltisualtu chu tupawh nise kan um zuiin kan man ang , thiltisual lotu chu tupawh nise diklo tak a atawrhna tur lak atangin kan chhan him ang" an ti deuh hmak a.

Kei chuan " Aaa chu pawh chu nise Siamthara hi i tan reng reng" kan ti leh hram a.

Raymonda chuan " Dikna a ni ka tan zawk chu, nang tlangval upa lam tawh, pate si muang bawk si, i dulte hi a la kiar deuh reuh leh nghal bawk nen, i dangte hi a engemaw nal phian a, chimawmna tinreng in a bawm khah pawh hian thil diklo avangin tuar dawn ta la, i dikna hai lang turin i hma ah ka ding ang " tih pahin a nui kur kur a.

Ka bul lawk a, litchi bawm ruak chu chharin ka han vawm vak a, mahse a lo thlek hman avang chuan ka vawm fuh hman leh ta chuang lo.

"Khaih khaih khaih, khatin hmeichhia ang maiin hman raw thawh in min vawm urh urh mah ta che, kan hna chu i thawk tan ang le" tih pahin ka vawm thelhna bur chu ka lam hawiin a rawn pet phei thut a, rin ai tak a a rawn kang sangin ka chal zawnah chuan a rawn kal phei a, kei mit dawih ta chu lo meng ngam hek lo, ka chalah chuan a rawn fuh ri kak a, Raymonda chuan fam ta Roluaha tih dan in " Pakak" a han ti zui leh nghal a.

Va vawm let leh tum a ka insiam rem lai chuan kan kal chhan ber thawk tur chuan hnim zingah chuan a kal liam zui hman der a.



Di leh kelte rairuang hmun a kawr pakhat kan zawn buai fe hnu chuan engmah hmu lo in Raymonda nen chuan beidawngin bike awmna lamah chuan kan let leh ta ngawt a.

Thla tla dup leh di hnah in min hawlh vel avang a thip sup sup chungin bike chuan kan tlan haw leh ta ngawt a, mahse Raymonda te in lam pan lo chuan Duhsaki in luah lam chu kan pan leh ta zawk a.

Duhsaki inluah chu an lo kalh thiap tawh a, a neitute pawh in an hawn theih loh turin chahbi pawh police department lamin an kawl daih hi a lo ni a.

Raymonda chuan " Ti teh, kawm thlang lam khu i zuk bel chiang ve hrim hrim teh ang " a tih avang chuan kawmthlang lamah chuan kan chhuk thla zui nghal a.

Kawmthlang hnawm hnawk leh ruah sur avang a diak huh pur maiah chuan ka kal chak lo kher mai.

Stepah chuan ka ding reng a, Raymonda erawh tim hauh lo in kawmthlangah chuan a lut phei a, engemaw hman tangkai theih leh min pui thei tu tur zawngin uluk takin a mit chu alen kual a, engmah chu a hmu bik chuang lo a ni ang, a hawi kual a hawi kual ringawt mai a, ring leng lawngin " Lo phei mai teh, engmah hmuh tur a awm lo a nih kha ". Tiin ka va au a, ka auhna chu hre awm pawh hian a lang lem lo a.

Rei ve a thlek kual a thlek kual hnu chuan a rawn beidawng ve deuh ta ani ang, ka awmna lam pan chuan a rawn let phei a, pen hnih pen thum vel a rawn pen hnu in a han ding let chat a, kawr ko hnim karah chuan thil engemaw a zuk chhar a, a rawn keng chhuak chu ka lo en ve reng a, cigarette bawm chhung a cigarette tuam tu sahar pante tle vir ver chu a rawn keng chhuak a, chu thil chu a ak tha ta a, a eng atan tak chuan ti ni maw?

Ka bul a rawn thlen chuan " i thil chhar kha engnga tan nge i tih a, tangkaina a nei em ni ?" Ka lo ti nghal tawng a.

"A la nei mai thei " Raymonda chuan a ti ringawt a.

A thusawi chu ka awih lo hle ani tih lantirna atan ka mitko chu ka han san lui ak a.

"Cigarette tuamtu sahar kha engngatan nge a tangkai teh lul ang le?" Ka ti hmuk a.

"Ka hre mai bik nang " ti chauhin min chhang a.

Raymonda chu stepah a chhoh zui tak avang chuan engmah sawi buai tawh lo in keipawn ka zui chho ve ta a.

Police station lam pan chuan kan tlanchhuak ve leh ta phawt a, reilote ah kulikawn police station chu kan thleng leh thuai a.

Inspector Ramtea hmu tur chuan office lam chu kan pan chho zui nghal a. Inspector Ramtea dawhkan kil a kan thut ve hnu chuan Inspector Ramtea chuan " Mizoram forensic science laboratory atanga a sample khai khinna result kan dawng fel deuh chiah a, Duhsaki atanga mipa chi sample leh Siamthara sample hi a in mil miah lo " tiin bul a han tan a.

Raymonda chuan mak pawh a tih hmel ve lem loh, thil a hriatsa miin an hrilh nawn leh ang mai hmel hi apu a.

Kei chuan " Chu Siamthara chu tualthattu ani lo tihna ani mai lawm ni?" Ka lo ti vat a.

Ramtea bawk chuan min chhangin " Ni mai lo e, thurualpui a nei tihna pawh a ni thei tho" tiin min chhang a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)