NEEDLE IN A HAYSTACKS EPISODE 5

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IN A HAYSTACKS EPISODE 5

Unread post by Sangtea Renthlei » August 5th, 2020, 5:53 pm

NEEDLE IN HAYSTACKS BONUS
Raymonda chuan " Fiamthu a kekawr thui thiam an sawi ang mai kha kan ni ta em ni aw, kawr thui tir an tum pawn a zai , a zai a, a han thui pum chuan kekawr ah bawk a chhuah leh thin an tih ang mai kha kan ni ta in ka hria " a han ti a.
Ramtea leh kei chuan Raymonda chu kan en dun ran a, Raymonda lah chu a ngawi zui daih ang lawi a.
Ramtea chuan " Raymonda hian philosophy lam a tui thar deuh em ni Vala ?" Tiin a nui hak hak a.
Raymonda chuan a nui sak a " Siamthara hi misual nih tir tumin kan kut zungchalin kan tin zawn nghal ringawt a, kan sulhnu leh finfiahna kan neih ten khaw dang a kawh fe hnu ah pawh Siamthara lam bawk hi kan kawh tir leh zel niin ka hria " a rawn ti leh a.
Ramtea chuan " E heu! Siamthara hi tualthattu anih theihna chance tam tak a awm laiin chu mi phet thla tur thil hmuh chhuah thar chu kan nei ta em ni le?" A lo ti vat a.
Raymonda chuan " Neih belh lam ni lo in , kan neih sa hian chu chu a ti chiang zawkin ka hria" a han ti leh a.
Ramtea chuan " Vala, hei i pu hian kawng dik min zawhpui leh dawn zawng ani ngei ang a, a to bul nen lam hriat ve a va chakawm ta em?" A lo ti hluai a.
Raymonda chuan " Siamthara hi ruihhlo ngawl vei, taksa pawh awng rawp tawh tak mai a ni a, nangni pawn in hmuh ve vek tawh kha, chuvang chuan pawngsual duh tur khawp a sex lam a harh vang a ni tawh lo ang tih rin theihna chance a sang hle " a han ti a.
Ramtea chuan " Ruihhlo hian ngaihtuahna tibuaiin taksa ah phur thutna neih tirin ngaihtuahna pawh a hruai kawi thei bawk " a lo ti ve khauh a.
Fing leh fing, hria leh hria , an han in sakhi thingchung lawn kual vel leh chu thing chung atang a an han in sakhi thing chung chhuk kual vel tur hriat chak lutuk avang chuan ka chil ka lem khawlh hial a.



" Siamthara hi no.4 addict a ni a, tin amah en hian damdawi a khawihna pawh hi a rei tawh hle a ni tih a taksa awng rawp tawh dan atang hian a hriat theih bawk , tin no.4 mizoram a kan khawih leh kan ruihpui tam ber hi a thawh dan ah chuan va chet chhuah emaw tharum thawh lam ai mahin mahni a nuam tih veng vengna lam a ni zawk " Raymonda chuan a han ti ve leh a.
"Lock down avanga No.4 nghei , suffer awm ngaihna hre tawh lo leh chak tawngkhawng, a turtu a nasat tawh em avanga mahni inthunun zo tawh lo ah lo puh ta ila " Ramtea chuan a ti zui ve zat a.
Chess game a end game hnaih tawh lam a, queen pakhat leh pawn pakhat leh rook pahnih in um kual hi an ang berin ka hria, a rook pahnih nei tu chuan um kual um kual mahse a tawp a chakna chu pawn pakhat dinhmunin a hril fo thin ang hi a ni berin ka hria.
" Chu chakna in a tur nasat em avang chuan alawm lock down leh LTF duty pawh hlau zo tawh lo a, an chhuah chhan chu" Raymonda chuan a lo ti ve leh thung, a mitmengaj chuan a tan hmunah chuan a chiang a ni tih a hriat theih a, mahse a tan hmun tinghet tu tur tan chhan tur erawh a la dawh rem bik hauh lo tih chu ka hriat pui ve tho si .
" In atang a a chhuah chiah khan khawi hmun lam nge a a pan tak tih lai tak kha kan hriat loh ve ve lai ani si a " Ramtea chuan a lo ti ve leh khauh mai. An tawngkam leh an thlirna lai point han in phet thla kual vel chu a tak ngeiin han tawng ve ula ka ti hle mai.
" Ruihhlo bawih a tang anih avang a dawt hlir sawi tur a kan ngai anih chuan chu chu a dik alawm, mahse kei chuan Siamthara'n chumi hmunah chuan kan kal e, a tihna hmun kha ka mit ngeiin ka zuk hmu a, a sawi dik ngei pawh ka rin avangin in atang a a chhuah hnu a a kalna chu chiangah ka in ngai " Raymonda chuan a lo ti ve leh a.



Inspector Ramtea Peki tualthihna ( Hnuchhuina tihbaiawm lamah) lo chhui chhuak a, misual lo luh chhuah ve vek tawhtu pawh mi mawl leh ngaihtuahna seng thiam lo ni bik mawlh hek lo " T Shirt chungchang khan Siamthara awmna hmun kha chu a tichiang ah ka lo ngai ve thung a, finfiahna awmna hmun lam chuan ka lung a len zawk tlat " a ti zawm ve nghal zat mai si.
King chu rook pakhatin a kil lam sir ber ah a dang bet tawh chet khat a chet leh vaih chuan rook pakhatin a rawn check zui leh dawn, chutah zet chuan queen sacrifice a ngai tawh ngei ang, rook pahnih nei tu Ramtea chu a chak zawk tawh ang.
Raymonda chuan " Kan tunlai hripui avang hian bazar lam tihtawp rih ni lo se chuan a tak ngeiin ka han en tir tur che a ni a, bazar ah va chhuak ta ila, kawr in ang zawng va man khawm rawh u min ti tase , lock up khat dawn hi man tur an awm ngeiin ka ring ani " tiin Ramtea chhanna chu a han phet thla zui ve zat a. King hmaah queen a rawn chhawp phei zui ve tlat.
Ramtea chuan " Chu kha kawr ang chiah ha kha tualthattu zawk chu a ni e, i tihna ani maw?" Tiin a han zawt let ve nghal zat a.
" Ni chiah e, tin ka tan hmun ti nghet zualtu atan post mortem result khan Siamthara lam a hawi lo tih chu kan hria a, engvanga Siamthara lam hi hawi luih tir lui ngar ngar nge kan nih chu ka hre lo na a, tun atang a reilote ah kan hai chhuak thuaiin ka ring." Raymonda chuan a ti a. Ramtea pawh nui var var chungin a bu nghat nghat a.
Police station atanga kan chhuah hnu chuan Raymonda chuan thingpui dawr lama chawlh a rawt avangin thingpui dawrah chuan kan chawl lut ve lawk a, ei tur order nghak a kan thut lai chuan Raymonda " Duhsaki kawmthlanga ka thil chhar kha engnge anih i hria em?" A han ti a.


" Kei chuan nichin lawkah ka sawi tawh kha, sikret tuamna kawr " ka ti bul hmuk a.
" Chutiang a ni hleinem, hei hi ruihhlo nen a inkaihhnawih hmanrua anih hi, film velah chuan i hmu fo tawh ang, a chungah hian ruihhlo kha an dah a a hnuai lam atangin an han hliau sa a, an hip vang vang thin ang kha " Raymonda chuan a han ti a.
Chutiang chu ka lo hre ve teh meuh mai " Hria e mahse kha khan Siamthara lam bawk a kawk leh dawn a i hriat vang em ni Ramtea bulah khan i sawi lan loh?" Ngeiawm ang reng tak hian ka lo ti ve thung a.
Raymonda chuan " Ni lo e, he thil neitu leh Duhsaki thattu hian inzawmna an nei ngei dawn tih ka hriat vang in mawle, mahse chuti mai a thawk leh khata hai chuah zung zung chi zawng a nih ka beisei lo" tih pahin thingpui chu a han in zui a, thingpui hi zawng a duh ve kuah kuah viau a ni, Thingtlangpa zawng ni ngat se tapchhak a ketli ung khek khawk a mi, thingpui sen tuk pum a dut reng tur chi ani hialin ka hria.
Thingpui dawr atang a kan chuah hnu chuan " Vawiin atan chuan lo chawl hahdam phawt la, chawhnu lam chu keimahin kan tei kual teh ang " a tih avang chuan ka hmel hlim sang chu thup tum viau mah ila ka lo nui deuh tho a ni ang.
" Chawlh han sawi ila, i then thaw a, hna thawh tul han ti ila, min hnial leh zut zut lawi a" tih pahin ka inrin hma hma in bike chu a han ti kal ut a, a ding leh chut lawi a, ka eu ual a, ka tlak hlau chuan a kawr chu ka han pawt hrawk a, bike a din leh thut si avanh chuan ka insawi let leh thut a, a helmet hnung lamah chuan ka intauh ri bup zui a.
Nui hawk hawk chung chuan atlan chhuak zui nghal puat a.



Chumi chawhnu pum chuan Raymonda chu khawi lamah nge a tei hawi tak tih hre lo mahila, kei chu ka thinlung lalnu Rami te inah ka leng tih ka inhrechiang hle thung.
Anihna takah chuan hnuchhuina lam kan hrut nasa a, ka duhlai-i hmelthat zia han sep rawtui na hun awl pawh hi ka nei ngai lo reng reng a , Raymonda chetna leh a hnathawh ka hriat pui loh a zarah tihian han sawi ila.
' A hmeltha tih tawngkam hi ka sawi in la hre ngai lo ang a chhan chu maw , thumal pakhat lek 'hmeltha' tih ngawt hian a that zia a hrilh fiah zo hlawl lo alawm.
'heh sen vam ham mai tih te hi hmui nalh sawi nan an hmang teh chawk a, kei zawng hmui sen ter tur hi nalh ka tih zawng ani ve lo, utawk sahbawn sen hmuam ang mai a sen tai tuk mai zawng ka lung a dum ve niau lo e, ka duhtak Rami hmui erawh zawng, amah nen a inchawih tawk lekin a no chek zawk asin.
' Malpui nalh sawina atan hian khamkhawk saisu ang te hi an ti leh thin a, saisu te chu a bul vawng lam a lian em em a, a zuih thut ringawt a, nalh sawina chi pawh em ni ngai, saisu ang a zuih thut mal hi chu a nei ve lo tawp mai a, a mawi tawkte a in la lawn zaiin a malte chu a in vuah thlap a ani.
Mawina famkima thuam ka duhtak-i hi zawng ka mitah hian a mawi em ani, ka thinlungah a lian a, ka ngaihtuahna ram luahtu ani. Raymonda lalthazuala duatlai jeneti hi zawng ka duhlai-i hian a pet ve chiang ani e
LikeShow More Reactions



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)