NEEDLE IN A HAYSTACKS EPISODE 6

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IN A HAYSTACKS EPISODE 6

Unread post by Sangtea Renthlei » August 7th, 2020, 5:05 pm

NEEDLE IN HAYSTACKS EPISODE 6
LPS chanchin thar ngaithla in ka nu siam thingpui chu in , ka zing tho hmel chhuanawm fahran loh nen chuan Tv chu ka thlir voh voh a.
Corona virus chanchin thar duhawm lem loh tak avang a Aizawl khawpui leh Sakawrdai lam chanchin tharte a puang zat zat a, mizoram a corona virus vei pun zel thu leh kan fimkhur viau reng a ngaihthute a puang zel a.
Ka thingpui in lai chu ka lem ri khawlh a, ka tawng chu tuin nge ngaithla tih pawh ngaihtuah lem lo in " Ka inthlahdah a nih vaih zawngin Mizoram zawng kan nasa lo khawp ang, kan society leh kan chet phung avang hian thenawmpa in a kai chuan a thenawm a mi mi 10 chuangin kan kai zel ang a ni dawn si a, bai thleng chen a in zen tawm leh neih ang ang i pe liam liam a, thenawm khawveng in duhsak thiam tak kan ni sia a, reilote ah a ram pum veiin Zoram hian kan vei mai dawn ani " tiin ka phun sup a, chutihlai chuan chanchin thar puangtunu chuan college kal lai thenkhatten exam an hma chhawn tur thu a rawn puang zui zat a , chungte chuan ka hlauhthawnna a ti zual ta deuh deuh em maw ni " Aw, kan sawrkar pawh hian inkhawm leh inhmuh khawm pawh min phalsak lo a, heng exam lo buatsaihte hi vanduai palh theihna hun a siam mai mai a va ni chiang em! Fiamthu a an sawi ang maiin MZU result leh ZMC result te hi a chhuak rual mai te anih vaih zawngin " tiin ka phun zui mawlh mawlh a.
Ka nu chuan " A engnge maw i sawi mual mual ni aw," bai vil rak rak pah chuan a rawn ti a. Chhan ka tum lai takin ka phone a rawn ri a. Raymonda'n min rawn biak a lo tum hi a lo ni a. Ka han la zui thuai a.
" Good morning senior citizen" a rawn ti nghal pang phawt a. A tawngkam zangkhai leh chimawm zet chu zing thang thangah ka sawngsawng leh ta.
" Eng nge?" Ka lo ti bak hluk a.


" Eng nge?" Ka lo ti bak hluk a.
" E hiau ! Nimin lamah kan in zui tam lo em a , ka ngai tawh che mawle, i hmel ang hi aizawlah hian an lo vang a ni ang, lunglen hnem tur i hmel ang deuh pu tal hmuh ka tumna a, ka hmu hauh lo nia " a rawn ti zui leh hram a. Ka tawng ve hma chuan " Vawiin inspector Ramtea kha zuk chapchar leh teh ang, thilthar tha deuh ka hmu chhuak a nia " a rawn ti zui a.
Chutiang thuthar chuan mood a thlak danglam nghal dawrh thei hial a , " Eng thil thar nge ni hriat ava chak awm ve" ka ti zui nghal zat a.
" Whatsapp lamah ka rawn thawn ang che " tih leh phone off chu a rual nghal a.
Reilote ah whatsapp message chu a lo thleng thuai a.
Raymonda thlalak min lo thawn chu ka download thuai a. Thlalak ka han nak chuan Duhsaki kawmthlang a an chhar tak T-shirt ang chiah kha a ni a, mahse chu T-shirt chu a var a ni tih hriat mahse hmun tinah chuan a val kual thliah thluah a, ka sawithiam dan ber chuan T-shirt var sar mai hak lai a, motor in duhtawk a chirh min rawn dai per hnu suk fai leh tum ang deuh hi aniin ka hria, uluk takin su mahila, chirh fuhna lai a piang chu a val eng kulh zel ang hian.
'Hei hi engnge a tangkaina' tiin ka reply zui vat a.
Reilote ah Raymonda chuan min rawn reply zuiin ' Saimthara kawr a nih hi' a rawn ti a. A sawi awmzia chu ka man thiam nghal mai a.
"khawi atanga a i neih nge ni a?"
" Hman ni a kan zuk kalna ah khan uluk leh zual a zawng turin ka zuk kal leh a, mahse ka beidawng leh tho. Haw mai ka tum laiin kawngthlang lam a bawngpu chhungkua awm zing a mi an fapa tlangval ni awm tak kha bawng chaw phurin a lo haw a, he T-shirt hi a rawn ha haw a "
"I vau zam te te a, i hneh chhuh ngawt em ni? An kawr neih ve sa pawh a ni mai thei asin"
" Nang mah ang lek tur hian min dah thin teh suh pu-a, tha te in an inah ka zuk leng lut a, kawr a neih dan leh thil nih phung zawng zawng ka zuk sawi thlip thlep a, an bawng chaw zawngin an chhar anih thu leh thisen kai nual mahse hnathawh kawrah a that an rin avangin an lo su fai hi a lo ni a, Siamthara chu Tualthattu a ni lo tih ka finfiah thei ta " a rawn ti leh a.
Keipawh ka nui ve sak mai. Kan inbiakna chu duhtawkin chaw ei tur in ka in buatsaih zui nghal a.


Chaw eikham ah chuan ka insiam zui nghal sawk sawk a hmalam inchapcharna ropui awm leh tur chu nghakin ka tui hal huam huam a ni ber e.

Office kan thlen chuan Ramtea pawh a thutna hmun , a dawhkan bikah chuan a lo thu fel leh at tawh a, Ramtea ka ngaihsan riauna chu hun a hmang dik em em mai hi a ni. Kum engemaw zat kan inhmelhriat ve ta a, tan hun bi leh hun bi thliah awmna chi reng rengah a tlai ka hre ngai lo.

Raymonda nen chuan kan pan phei nghal thuai a.

Ramtea chuan " Engnge kan case kal lai mek dinhmun ni ta le ?" A lo ti vat a.

Raymonda chuan a polythene khai chu rawn dah chhuakin , Ramtea hma ah chuan a han chhawp a.

" Tualthattu tak tak zawk chu thlamuang takin Siamthara kan buaipui lai hian a lo awm der der rih ngeiin ka ring " a han ti zui sap a.

Inspector Ramtea chu a nui hak hak a " E hiau, nimin lamah kan khel fel tawh emaw tia, hei eng thil nge ni ta ?" A han ti a.

Raymonda pawh chu a nui sak a, " Nimin lam khan finfiahna show tur nei ve lo zawk kha kan ang riau mai si a. Hei vawiin lam chuan a finfiahna kan rawn nei ve ta alawm " a lo ti zui ve zat a, amah bawk chuan T-shirt a chhar chhuah dan leh a pawimawhna chu a sawi zui nghal zar zar a.

Raymonda'n thil nihdan a sawifiah zawh chuan Ramtea chuan a chal a han chuar nang nang a, ngaihtuah muk hmel fe hian " Tualthattu chu tunge ni ta ang le?" tih pahin Raymonda chu a han en a.

Raymonda chuan " Tunah chuan rinhleh tur takngial pawh an awm rih lo e" ti ringawtin a lo chhang a.

Kei chu lo inrawlh ve vatin " Buhpawl zinga hriau zawn tluk zet a hmuh har tur ani dawn anih hi " ka lo ti ve hluai a.

Raymonda chuan " Duhsaki in luah lam kha uluk leh zualin va bih nawn ta ila, engemaw hmuh chhuah te kan neih belh mahna " tiin beiseina pa chau ru ang reng zet si chu a rawn sawi chhuak a.

Thu dang han sawi zui zel tur a awm ta lo ani ang
Police lamin Duhsaki in an kalhna chabi chu Ramtea chuan min pek hnu chuan Raymonda nen chuan kan chhuak zui nghal a.

Duhsaki in lam chu kan pan ding nghal a, Duhsaki inluah in kalh bam chu hawngin a chhung chu kan han lut zui nghal a.

Thisen baw nuaihte kha chu an lo ti fai vek tawh a, YMA hruaitute lam kha an nih ka ring. Police lamin duhtawkin thla te kan la zo tawh bawk a, an han tifai ve luam pawh chu thil tih awm loh tak zawng a ni lo e.

Raymonda chuan room chhung kiltin mai chu hmuh hmaih nei hauh lo tur hian a han enkual ngial a, mahse engmah phei zawng a hmu bik lo a ni ang.

Duhsaki khum thleh fel loh a angai ngai a la awm chu a han en vang vang a.

" Khum hi uluk takin han en teh, tharum hnuhma ai mah chuan duhtawk a nula tlang val chetna hnu a ang zawkin ka hria. " Tiin khum bul atang chuan a han pen dawrh a.


Tawng zui tawh lo in Raymonda chuan khum hnuai chu a bih vung vung a, a phone flashlight chu on in khum hnuai chu a han en a, engemaw hmuh a nei ani tih hriat zetin khum hnuai chu a zen zui nghal a
on WedLikeReplyMore
Sangtea Renthlei
Engemaw thil te tham tak a rawn la chhuak a ni tih a kut zungtang hmawr a hmeh beh va va avang chuan a hriat theih a, a thil lak chuah chuan a kutphah ah chuan a han dah a, ka thil va hmuh chu ka sawi thiam dan chuan chini fang ni awm tak, mahse sawl sei deuh, ajinomoto fang lian chi ang deuh hi a ni berin k hria, mahse ajino fang ang lo takin a hlai zawk thung.


Raymonda chu angawi zui vang vang a, a kut a thil awm chu a en vung vung a. Engmah sawi lo chuan lehkha themin a tuam a,a ak zui ta nghal a.



Tlangval a pumpa chini fang khat tiat vel lek han ah that tak hmak mai chu, kan thil tih lai mek atan chuan a tangkaina awm reng reng ka hre lo bawk nen, zawh pawh ka zawt peih lo.


Raymonda chuan " Hman ni khan thenawmpa khan 'kawngka a in kalh ' a ti tiraw kha" a han ti a.


Kei chuan " Ti e, kawngkhar pawh an sawi hawng niin a sawi kha" ka lo ti ve vat a.

Raymonda chuan thlanglam tuk verh chu a zuk pan a, a han hawng a, veranda ah chuan chhuak in a sir lam chu a pan phei a, varenda sir ah chuan in ban lo ding chho in , rod an tan bun loh chu a lawr sung mai bawk a.


Raymonda chuan " Tukverh atang hian inhnuai lamah he lai ban rinchan hian a chhuk thla a nih dawn hi" a ti zui leh sap a.


Chiang leh zualin veranda hungna vawn ban cement hmanga siam chu a han en leh ngar ngar a.


"Pheikhawk brand ah hian engin nge kha star logo hmang thin kha ?" A han ti chhuak leh hluai a.

Kei chuan " Ka hre awzawng lo e a" ka lo ti bul hmuk a.


A han kiai suk a" I hriat ka ring reng reng hleinem " chimawmna a khat hian a han ti leh salh a.


Amah bawk chuan " Mizo in kan bun thin ho ah chuan Converse hi a lar ber ani ang a, he lai kehniak awm hi chuan converse a bun ngei a nih hi " a han ti zui leh a


Chumi ni nileng chuan Duhsaki in chu kan belchiang hi a ni ber a, a tawp lamah phei chuan ka ning lutuk tawh chu chairah thu in ka lo muhil daih chu ni in , engemaw vawt thlap mai hian ka hmai chu a rawn si a, harh chiang mang lo in ka han man chawt a, thil nem nak mai leh vawt thlar si hi ka han man fuh chat a, ka te nasa kher mai.


Raymonda chuan Duhsaki fridge ami , balhla kheh sain ka hmai chu a lo dep chu niin balhla hmin nem duak tawh chu ka hmet pherh hlawih a, tawngtum a ka an zuau lai chuan Raymonda chuan " He in hi ka ngaina hauh lo mai kei chu ka chhuak dawn e " tih leh kal a rual ta mai a, rang fahranin ka zui nghal thuai a, ka chhuah ve hma chuan kawngkhar chu a khar ta hmuk roh a, hlauhna in min man fuh laklawh tawh avangin kawngkhar chu ka bawh hawng rawk mai a, kawngkhar a inkalh emaw ka tih kha a lo inkalh leh si loh avangin pawn lamah chuan ka bawk chhuak rawp a, Raymonda lah chuan za em em kawk meuhin min lo nuih khiah khiah a



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)