NEEDLE IN A HAYSTACKS EPISODE 7

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IN A HAYSTACKS EPISODE 7

Unread post by Sangtea Renthlei » August 9th, 2020, 5:18 pm

NEEDLE IN A HAYSTACKS EPISODE 6
Duhsaki in luah atang a kan haw hnu chuan khua a lo tlai lam ve tawh bawk nen, in lamah kan haw zui ve ta a .
Kan hnuchhui mek chu kan kalna lam apiang hi a tawp deuh hmuk zelin ka hria, tum dang leh hundangah chuan beisei tur leh zawh tur lam kawng kan nei ziah a, mahse tun tum hi chu corona virus avanga total lockdown kalpui mek lai, tumah chhuak vak an awm loh lai anih avangin hma lak thiam a har khawp mai, a diktak chuan rinhleh a kan man ber Siamthara a fihlim ni a a lan hnu phei hi chuan rinhleh tur dang pawh kan nei tawh lo ani ber zawk e.
Zanriahte kan eikham hnu chuan Raymonda'n leng tur a min sawm avangin ka scooter ka hralh hnu a ka kalh thiam leh zual tak em em ka ke pahnih ngei hmang chuan Raymonda te in lam chu ka pan ve leh ta hnu hnu a.
Kawng lakah LTF duty ten vawi thum zet min lo ti ding leh nghal a, mahse ID phawrh a, ka nihna leh ka tih turte ka sawi hnu chuan tha takin min chhuah ve leh zel mai bawk a. Kan sawi kai laklawh ta sa sa, kan peng kawi lawk. Mizote hi hnam rilru mak deuh mai kan ni a, thiltha ti nia kan inhriat hian midang ngaih pawimawh lohna leh kan thil tih that hma chhuan a sawrkar dan leh dun pawh pawi sak mang loh ching zet mai kan ni hian ka hre thin.
LTF duty te hah zia leh an thawhrimna te hi chu police a kan luh hnu atang hian ka hre thiam pha ve viau in ka hria, mahse tlawmngaia duty ni na na na, midang chung tlakna atan a hmang ta mai ang a kan lan lek lek chang awm ta te hian beng a tih thlep lek lek chang a awm ka ti a, ramri a duty nunna hial chan a zoram chhanna atana thawktute lah an chhuanawm na rawh e, mahse kawng thenkhat han chet buang barna deuh kan nei leh zeuh em maw ni tih tur a chanchin a thang mawi lo leh zeuh hian kan mizo tlawmngaihna leh pipute nunmawi kha a pen san lek lek ni te pawh hian ka hria.



Motor khalhtu tan chuan inkhawm bang tawh palh hi a hreawm ber e an tih teh chawk te pawh hi a dik fu hian a lang ve tlat, thiltha ti ni a kan inhriatna khan dan pal zam deuh tur hian min tihuai ta emaw tih mai turin inkhawm bang chu kawngpui ah motor tlanna nek deuh ranin kan kal deuh nguk nguk ta mai ni hian a lang deuh tlat.
Raymonda te in ka thlen hnu chuan Raymonda room ah chuan thu in Raymonda laptopah chuan game eng eng emaw ka khel kual a, Raymonda erawh ka thlen lai a, tawngkam hnih khat a min biak bak kha a la tawng mang lo. A ngaihtuahna a seng nasa viau niin a lang, chutiang a a awm chu ka vawikhat hmuhna a ni lem lo bawk a, ngaihsak hran pa lem lo in game chi hrang hrang chu ka lo khel kual vel mai mai a.
Darkar chanve hnu zet ah a ni hial ang a, Raymonda chuan " Vala, i game khelh lai kha han ti tawp teh, gallery ah khan lut la, Duhsaki tih folder ah khan han lut teh " a rawn ti a.
" Awww mi game khelh tui lai lai a" ka lo ti hmuk a.
" Khel tui tham pawn engmah i thiam loh kha, bakah pockets tank khel tur tak ngial pawh hian thluak a ngai ve alawm, nang zawng sai ang deuh hi i ni a, lulian pui , thluak te tak te " tiin a hlimna ber leh a nuih pui tam ber thin min diriamna leh min han chhaih kual vel chu a han tan leh nghal pang a.
A la duh tawk mai lo " Fanghmir chu ni la, i lal ngawt ang, i lu a lian tha sia, fanghmir pawh hi a lu lian lian an lal e an tia lawm " nuih hawk hawk pah hian a han ti a, chhan pawh ka chhang buang bar peih vel lo e a.

Gallery ah lutin Duhsaki tih folder chu ka han en a, Duhsaki thlalak hlir sawm vel lai hi a lo awm a.
Raymonda chuan chair chu rawn pawt hnaiin laptop chu a rawn thut hnaih a.
" Duhsaki hi engang mi nge ni a i hriat? " A rawn ti zui nghal a.
" Mi ze tha tak a nih kha, kan inhmuh hnuhnun ber kha chuan chhuatah thisen a inbual zuih in a mu ngawi reng a, kha kha kan inhmuh chhun a ni a, ka hmuh chinah chuan a fel viau, a ngawi chawi bawk a, a tawng lo ti raw kha ?" Tiin ngeiawm uluk thei ang ber turin ka lo chhang ve zat a, tha ba leh saihlum a nget ngai lo. Min tawngkhumna kha ka rul ve sak e.
Raymonda chu a nui hawk hawk a " Ni dawn tak e, in in hmuh hmasak ber ni atang a chhut kha chuan a nung chang pawh a tha viau tak ang a, mahse a thlalak atang hian a mizia awm ang i han chhut teh ang " a han ti zui zat a.
" Thlalak atangin a?!" Awih loh hmel zet hian ka lo ti a.
"Aw ,zir mi, mi thiam bik ten , mihring mizia leh pian, hmelhmang zirna chungchang an ziahte hi lo chhiar ve thin teh khai, tiang lam pang hi i tuipui loh em vang alawm, bialnu bawng hit het, chawn ping puar nilh nelh, hnar bawng leh meng zim set i neih " tiin a han nui zui leh hawk hawk a.
Hun remchang a rulh ve leh ngei tumin , ka insumtheihna rau zawk chu ka han hma chhuan ve a, ka ta rih a.
Raymonda chuan " Duhsaki hi nula hmelchhia a ni hauh lo, mahse nula tawng duh ve tak chu anih ngei ka ring, tin a luhlul ve fe bawk ang " a han ti chhuak leh phawng a.

" Engtinnge chu chu i hriat ?" Ka lo ti hu a.
" A harsa lo, a hmui khi en la, hmui pan lam a ni a, a tlangpui thu in hmui pan hleng hlawng leh ka reh zau lam hi chu an tawng thei tlangpui, a tha lam emaw a chhe lam emaw pawh nise, tawng duh tak an ni tlang pui thin, chuan a mit hmul leh a mit awm dan khi han en la, a mit ko khi a chhah a, a mit hmul khi pawt lo phei se chuan mit hmul ngah tak anih khi, mit ko chhah leh mit hmul ngah chi reng reng chu chawhrualin mi luhlul tak an ni chawk bawk" tiin Raymonda chuan min han chhang a.
Amah vek chuan " Engmah ka la zawt kilh kelh lem lo na a, kohhran lam bel chiam chi chu a ni lem lo in ka hria" a han tih zawm nghal a.
Kei chuan " I hre ngawt em ni ? Nula fel tak pawh a ni thei asin " ka lo ti satliah ve ngawt a.
" Hriat sual chu a awm thei ngei a, mahse a facebook profile ka check vek a, mizo nula tlangval , kohhran a in hmang leh a kul a tai tang ho facebook profile hi check vek la, an thlalak tam ber chu inkhawm tur leh chawlhni incheina nen a an thlalak ani ziah a, za a sawmriat chu a dik bawk ang. Anih loh vek pawn, kohhran hnatlang, KTP, TKP, SAY tih vel hnatlang leh activity dang a an thlalak a tam viau zel. Mahse Duhsaki hi chu hmanah kum 2016 vel a thlalak pakhat a dah tih loh chu, khawi lai emaw a thiante nen a an tei hawina leh an inkawm ho na thlalak a ni deuh vek mai." A han ti leh a , han sawi zui ve viau tur ka hriat loh avangin ka ngawi zui mai a.
Raymonda chuan thlalak chu a han hmet sawn kauh kauh a" I lo hmu em? He thlalakah hian Duhsaki hian sana a bun hi a chhuang viau emaw a ngai hlu viau anih ka ring, hei a han dah lan luih deuh kher dan ah hian , thlalak dangah pawh khan a sanna bun lai hi a bun lang ziah bawk, tuemaw mi special tak in a pek anih hmel......ngawi teh uluk deuhin han en teh, ka lo en chiang ngai miah lo a, Thlalak pathum ah hian Duhsaki hian a kut dinglam hnungah hian band aid a bel vek nia mawle. Thlalak hi hun dang dang a lak a nih hmel si a, mahse a kutah hiaj a hmun ngai chiah ah a bel reng anih hi" a han ti hluai a. A tangkaina tur ka hriat loh em avangin zawh pawh ka zawt chik peih lo .



Chutihlai chuan Raymonda phone chu a ri nghawr dar dar a, Raymonda chuan a han la thuai a. Kan inthut hnaih em avang chuan Raymonda rawn betu chu Inspector Ramtea a nu tih ka hre thei a.
Ramtea chuan" Raymonda, rang takin mission vengthlang kawnah rawn kal vat rawh u, tualthahna rapthlak tak a thleng leh e " a rawn ti zui nghal a.
Raymonda chuan " Eng a? Tualthahna a? Kan rawn kal e" a ti a phone chu a dah zui nghal a


Mission vengthlang kawn lam pan chuan Raymonda te in atang chuan hmanhmawh zetin kan tlan chhuk nghal a, mission vengthlang kawnah tak chuan mi an lo pungkhawm laih laih a, lock down lai mah nise vengchhung a chutiang chhiatna thleng chuan mi a ko khawm tam viau tho mai.

Kawn pengthuam lai ah chuan dinglamah peng pheiin thui lo te kan tlan hnu chuan in kawt a police lo din thapna zawnah chuan kan ding ta a.

Police te chuan mipuiin chim huk hrih lo se tih an duh avangin tlema piah deuhah chuan mipui rawn kal theih chin tur chhinchhiahna an siam rih nghe nghe a.

Keini pawh min lo dang ding zet a, mahse min hriat chian hnu chuan min kaltlang tirin in chhung lam chu kan pan zui nghal a.

Building lian tha hek hawk chhungah chuan kan han pen lut a, inchhungah chuan khawtlang hruaitu ni awm tak thenkhat , chu in a khawsa mi palite leh inspector Ramtea chu thuthlengah an lo thu a.

Ramtea chuan min hmuh ve leh lo tho chhuak vatin " Rinai takin in lo thlen hma chu le, he lai roomah hian a ni e " tiin kan hma a room kawngkhar inkhar chu min kawhhmuh a.

An in awm dan chu , kan luh tan tirhna ber ah sitting room zau tha tak mai awmin ,bungrua engkim mai chu a changkangin a fel fai thlap a.

Ramtea'n room min kawhhmuh tih loh chu room dang awm awm pawhin a lang lo.

Inchunglam chhohna step lian leh changkang tak a chei bawl chu a awm chho ruah bawk a, a vawn bam te chu teak thing hmang a uluk leh tliang hlarh a siam ani.

Ramtea room min kawhhmuh chu kan han lut a, A rapthlak tak zet ani.

Chhuatah chuan thisen a luang kawi nguai a,room lian vak lo chhung cbu thisenin a khat vek emaw tih mai turin thisen kailohna lai a hlei pawh a awm lo
on FriLikeReplyMore

Ramtea chuan " An awmpui nu a ni a, inhnuai lamah hian amah chiahin a riak a, dar 10 vel khan police station an rawn phone a" tiin min rawn hrilh a, Raymonda te inah khan hun reilote kan awm emaw ka tihlaiin zan dar 11 a lo hnai der tawh ani tih bang a sana intar ka en avangin ka hre chauh a, kan titi a kaltluang deuh a hun lam ka lo ngaihtuah changlo a ni ange.

Raymonda chuan " Vala en teh, hnu hma khu ,hman ni a Duhsaki hliam ang chiah kha a ni tiraw " a han ti a.

Ruang chu ka han belchiang ve ngial a, Raymonda sawi ang chiah khan ruangah chuan mihring ha a sehna hnu hma chu a lo lang kelh kulh hlawm a.

Ramtea chuan " Inchung lamah khian an chhungkua hi an mu vek a, an awmpui nu hi chu helai ah hian a mu thung. Tichuan an tlangval sawn a zuk hmu ta a ni awm e " a lo ti leh a.

Room chu a phui tha in Tukverh pakhat chiah a in hawng a, a inkhar bawk avangin room kawngkhar chu a inkhar anih chuan inchunglam a mu tan chuan thawm han hriat mai theih pawh a ni dawn lo tih chu alang reng a.


Raymonda chuan " Hman ni a, Duhsaki thattu hnuhma ang chiah kha ani " a han ti leh ngawt a. Room chhung bungrua tla darh nuai chuan chu room ah chuan tharum thawhna nasa tak athleng tih a hriat theih a.

Thisen kai nuai chung chhuat a lo awm chemte chu tualthattu in a hman ngei ani tih a rin theih a, kan hma a ruang let reng ah chuan chemte hnu hma hmun thum laiah a awm a, chemte hnu hma han belh chian chuan chung chemte vawikhat vih theuh pawh chu mihring tan a thihpui tham tur hlir ni hian alang a .

Raymonda chuan " Room hi a fel fai khawp mai, kan tualthattu hian hnu hma engmah a hnut chhiah hauh lo, hniak ni awm tak hi chu a lang ngei a, mahse ka rin dan chuan engemaw polythene lam pang chi hnu thup theihna vuah in a rap anih ka ring " a han ti a. Raymonda thusawi chu a dik viau in ka hria, hnu ni awm tak chu awm mahse mihring ke pian zia a lang lo hrim hrim a, engemaw a zuk nawr pherh deuh niai hi a ang ber zawkin ka hria.

" An tlangval phei chu hetiang thisen chhuak ngam lo chi tak hi a lo ni kher si a, inchung lamah khian room a a thu khur dar dar reng mai, YMA hruaituten an han awmpui niin ka hria " Ramtea chuan a rawn ti leh a.

Raymonda chuan duhtawkin room chu a han belchiang na a, engmah hmuh chhuah belh leh hriat belh em em a nei bik lo.


Chemte chu kengin room atang chuan a chhuak a, keini erawh room ah chuan kan la awm rih thung a. Reilote ah Raymonda chu room ah chuan a rawn let leh a " Chemte hi choka a mi saw a ni a, misual hi pawn lam atang a lo lut in chemte hi a rawn keng lut ta ni awm tak ani " a rawn ti a.

Ramtea chuan " Chu chu thil thlen dan chu anih hmel ber mai, tunlai thalai tam tak tih danin an fapa hi game khel a zan rei tak tak meng thin anih avang leh a mut dawn a kawngkhar vel a kalh fel mai thin avangin kawngkhar pawh hi kalh lo in an dah ta mai niin alang a, chumi chu remchangah hmangin misual hian room hi a rawn luhchilh ta mai niin a lang " a rawn ti ve a.

Raymonda chuan " Tlangval chu han hmu ve chhin teh ang" tiin a chhuak zui a, kei leh Ramtea pawhin kan zui ve nghal a.

In chung lam stepah chuan kan inzui chho a, inchunglam chu inhnuai ai mah khan a changkang zawk a, sitting room ang reng lo awm lehin thutthleng changkang leh mawi zet zet a in hung kual pap a , chu mi sir ah chuan room a awm phei thliah a, room lah chu a zau tha hle ani tih pawn lam atang chuan a hriat theih a, kan sir ding lam room kawngkhar in hawng atang chuan thawm lo chhuakin chu aw chu mipa aw, hlau leh thlaphang tih hriat tak hi a ni a, " kei hi min chhui bik a ni, a dawt leh ah chuan keimah hi min that dawn, hman ni lawkah ka bialnu khutiang chiah a rapthlak khuan min thah sak a, zaninah kan awmpuinu, keimah hi min chhui bik ani " tiin aw khur dar dar chuan a rawn ti a.



Raymonda nen chuan kan in en rual that a, Raymonda chu rang takin room ah chuan a lut a. Keipawh in ka zui lut ve nghal a, chu tlangval chuan a thil tawn chu a hlauh hmel kher mai. A kut a khur hlawk hlawk a, a hawi kual ruai a, a bula lo thute kutah chuan a chelh tlat bawk a. A hmel chu a khawngaihthlak tak zet ani, a hlauthawng lutuk leh in thunun tum, chuti em a tlangval han zam chhe mai chu inthunun a tum ve ani tih hriat takin tuite chu a han in pawp a, a kut chuan thutthleng vawn bante chu a hmer tlawk tlawk bawk a.

Tlangval hmel fang tha tak a ni a, a hmelah chuan hlauhna hlir a lang a, Ramtea sawi kha a dik hle a ni. Mithenkhat mihring thisen ngam lo riau, thisuk nei a lui hai a tlu mai chi te ngaihtuah chuan Thisen khatiang zat luang leh tualthahna rapthlak kha, thisen ngam lo mi tan zawng khur tlawk tlawkna tham a ni ve reng a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)