NEEDLE IM A HAYSTACKS FINAL EPISODE

Hnuchhuina lampang chi ho
Sangtea Renthlei
Posts: 13
Joined: July 25th, 2020, 12:02 pm

NEEDLE IM A HAYSTACKS FINAL EPISODE

Unread post by Sangtea Renthlei » August 17th, 2020, 5:44 pm

NEEDLE IN A HAYSTACKS 8

RAYMOND-A nen chuan police station lamah kan inzui chho ve leh ta rih a, inspector Ramtea hnenah kan hmalak tawhna te report kan han pe dawn ani deuh ber mai.

Hun rei hmang lo in Kulikawn police out post chu kan thleng thuai a, inspector Ramtea a dawhkan lam chu kan pan nghal thuai a, Ramtea chuan min lo chiau au thuaiin chowkider chu thingpui lam turin a tir zui nghal a.

Ramtea chuan " Vala, engnge hmasawnna tharte kan nei em?" Tiin min han zawt a.

Kei chuan " Aaa, ka ngaihdan leh ka hmuh danah chuan tunah hian hmasawnna reng reng a awmin ka hre lo" ka lo ti vat a.

Ramtea chuan " Hetiang misual, fing si lakah hi chuan hmalakna hi a chak mawh viau a nia, hman hmawh vut vut chi pawh a ni lo, muangchang leh uluk taka chet lak a ngai thin a nia" a han ti charh charha.

Amah bawk chuan Raymonda chu enin " Engnge kan hmuipuipu ber hian hma han lak zel dan tur ruahmanna te a nei em le?" Nui deuh sang chung hian a han tih zawm zat a.

Raymonda chuan " Tun tum kan hnathawh chu, thing lubul a zawng dan ang mai kan ni a, kan hawi lam apiangah kan tawp chat chat zel mai a, hma han lak zui leh dan tak ngial pawh awm lo hian , kan tawp leh mai zel" a han ti a, a thilsawi chu thudik tak ani tih kei ngei pawh hian ka hriat pui a ni.

Ramtea chuan " A dik khawp mai, kan tualthattu hi che raw va in, hnu hma rap thlak tak tak hnut chhiah mahse chhui zuina tur reng reng min hnut chhiah ngai hauh lo, Duhsaki leh Suii thihna hi a lan dan maiah chuan awlsam tak a chuk tuah zawm theih mai a ni na a, a hmun ngeiah kalin kei ngei pawhin ka zir chiang ve ve a, hnuhma han chhuizawm theih tur engmah ka hmu tlat lo a ni " a han tih zawm ve a.

Raymonda chuan " Ruahmanna thar kan neih angai, kan misual hi kan hual zim sa lutuk a, kan hual chhungah hian a awm lo palh ang tih a te pawh a hlauhawm ta riau maiin ka hria, Vala hian Aizawl lam hi a theih tawpin lo buaipui se la, Hlimpuia nu leh pa chanchin zawng zawng, an chhungkaw tan a hmelma ni thei an awm leh awm lohte lo zir chiang se la, kei lunglei lamah ka va kal teh ang, engemaw hriat belh tur te pawh a awm mahna " a han ti a.

Ramtea chuan " Ni e, valh zau tak siam a, thiam tak pawh zip chuan a awk duh bik nge nge a nia, in hna hi tha tak a in hlen hi ka duh ber a ni a, chumi ti puitling tur chuan dan hnuaiah tha in tih ang angin in che thei a nia " a lo ti ve leh thuai a.



Chumi ni nileng chuan kan hnathawhna leh hma kan lak thin danin a mamawh thin em avang a Ramtea'n a hran hlak min siam sak, Raymonda nen kan room bikah chuan kan thu dun a.


Hnuchhuina chungchang hi kam hnih khat leh kan thai kawi leh lawk teh ang. Thenkhat chuan hnuchhuina hi, va chet buan buan a, hmanlai pasaltha ten sa hnu, ramhnuai lei a lang kelh kulh an chhui a, a hnu zela an chhui a a tawp a an va hmu ta thin ang hi emaw an ti thin a, mahse mihring hnuchhui chu chutiang a ni miah lo, mihring hnuchhui chu a dang daih a ni, hmun khat a hnu hma awm zeuh, a zawm leh tu chu mel za tam tak kar dan ah te a nih daih chang a awm a, tihian sawi ta ila, meizial bung pakhat khawi emaw lai a lo tla chu a a zu tu hmui i chhui thlen a ngai, chu tak chu thil harsa lai ber chu a ni fo .


Chumi ni chuan Raymonda chu a tawng tlem khawp mai. Chair ah thu in a ngaihtuahna a hmang nasa hle a ni tih hriat takin a en ngai a en vang vang a, a mit a khap leh zeuh thin tih mai loh chu chet pawh a che chang meuh lo. Chutiang a a awm tum chuan tihbuai loh a tha tih hriain keipawh ka thu ngawi reng ringawt a.



Chawhnu dar hnih leh a chanve thleng pawh chuan kan la inbe mang lo hrim hrim , kei chuan ka phone ah game ho te te khelin hun ka hmang ral ve mai mai a, Raymonda erawh a ngaihtuahna a seng nasa tih hriat takin a thaw leh halh thin tih mai loh chu a thutna ngaiah thu in, a mawng kham deuh niawm tak a a insiam rem deuh bak chu chet pawh a la che sawn lo.




Chutia phone a game khel a ka lo buai ve em em lai chuan Raymonda chu rawn tawng chhuak in " Vala, lokal teh, rilru han tih zangkhai ve deuhte pawh kan mamawh anih hi lokal teh, saw lai inchung zawl a , nula pahnih ding saw , dinhmun in ang chiah a ding chung hian i han in zir chian siak teh ang " nui deuh var var chung hian a rawn ti a.


Raymonda chuan ngaihtuahna ahman nasat em avangin rilru han tih zangkhaina a mamawh ve hlek a ni tih hrethiamin rang takin ka tho vat a, " Ni ang hmiang, mawlmang lutuk a min ngai reng pawh hi ka ning ve ta e, thilte zawng ka hre ve em!" Nui hak hak chungin ka lo ti a.


Raymonda bul a ka va din ve hnu chuan, kan awmna room tukverh atang a lang thei, hla lo te inchungah chuan nula pahnih hi engemaw sawiin an ding dun a. Raymonda chuan " En rawh le, a te zawk saw han zirchiang teh le" a han ti a.


Kei chuan " A te zawk saw maw? Kum 18-20 inkar vel a nih dawn saw ?" Ka han ti nghal ngawt a

Raymonda chuan " A ni lo, 24-25 vel a ni tawh ang " a lo ti ve thung.


Boruak tih zangkhai hun a ni tih hriain " Kan awmna hmun a in ang reng a, i hre bik lo, i rin thu bak a ni lo" ka lo ti vut a.

" A thusawi zawng a, a kut zaizir han hman dan leh, a bul a dingin a thusawi a ngaih chan zawk danah ah sawn , a bul a mi a lian zawk ai sawn a upa zawk , tin a hmel saw en la, a ngo a, a fai vang bawk a, mahse a hmelah sawn 18-20 hmel a pu lo" Raymonda chuan a lo ti ve thung.


Raymonda bawk chuan " A T-Shirt size saw engnge a nih i rin le?" A han ti zui leh a.


" Medium size a ha ang" tiin ka lo chhang ve thuai a.


" Tuna a hak saw medium ani a, a kawng len zawng pawh a taksa en sawn 23-25 inches vel a han dawn a nih saw, tin a sam saw a khawih kual peih ve hle tih a hriat theih, a chhan chu a sam thli in a chhem len zawng sawn a hnuai lamah a vara streak a hmuh theih saw, a sam saw enkawl uluk viau in lang mahse , a ro deuhin a lang a, a chhan pawh a sam saw a khawih kual tir nasa lutuk a, a samin a zo meuh lo a nih saw. Tin, inchei peih tak leh hawi harh ve tak chu a ni " Raymonda chuan a han ti zui a.

" Ka awih em em bik lo, chutiang zawng zawng i va hre bik lo tawp ang " ka lo ti thung.


" Lockdown vah chhuah theih loh lai a, inchung zawl a chuang chhuak tur pawh a lipstick in hnawih a, mit hmul ti dum hiam peih chuan inchei chu a peih hrim hrim, nangte chu sunday in i inkhawm ngai bawk si lo, I bialnu i rim dawn pawn inbual mang lo leh bata silipar nen i kal nul nul zel a ni lawm ni, chutiang khawp chuan inchei i peih loh kha " nui hawk hawk chung hian a lo ti a.




" Chutia i intihhriat viau leh, a hnute saw eng size nge ?" Ka han ti zui khauh a, tlem a mi zing a sawi zuah zuah chi lem loh, mipat hmeichhiatna lam hnaih deuh tak ngial pawh hi kan hna kaihhnawih lam thil tih loh chu Raymonda ka atang hian ka la hre ngai miah lo. Chuvang tak chuan kan nula en mekte taksa khemrem deuh lai chu ka han zawt lui sak kha a ni a, ka nui zui nghal hawk hawk bawk a.



" I thil hriat duh zawng ber kher chu aw, i hriat duh miau si chuan , a te zawk saw chuan B size bra a ha thin ang, mahse in nu Rami ta, arngeng huaisual tiat lek ai chuan a man hla tho a nih saw, a lian zawk saw chuan D size a ha ve thung ang" tih pah chuan a nui hawk hawk a.


Kan boruak rit zualpui a zang khai ta bawk a, tlai lam a lo ni ta bawk nen, a tuk lam a, kan mawhphurhna hlen tur chuan kan haw ta a, keiin Aizawl lamah Hlimpuia te chhung kua chu ka lo chhui chiang ang , Duhsaki te chhungkua zir chiang turin lunglei lamah Raymonda chu a kal thung dawn a ni.

..............



Raymonda lunglei lam pan a a tlan liam hnu chuan keipawh ka hna thawk turin Mission vengthlang lam chu ka pan zui nghal a, anmahni chanchin anmahni va zawh teh tawp ai chuan , an thenawm khawveng te ka atanga hriat hmasa a tha a hriain , Hlimpuia te in bul vel a awm te ho chu ka han zawt kual a, a tawpah chuan, Hlimpuia pa, Lianruaia kawm tur chuan an inah chuan ka lut ta tho bawk a.



Chumi ni nileng chuan Ka theihtawp chhuah a ka han chhui ve fe hnu chuan ka chhuichhuah theih chin chu 'Hlimpuia p chu, Horticulture department ah officer niin , Officer hna thawk tha tak, an department atanga hnathawk tha chawimawi na hial pawh lo dawng tawh a ni a, a nu lah chu kohhran hmeichhe pawlah Executive committee ni in , Hlimpuia ber pawh Thlalai lamah in hmangin , hruaitu chanvo em chu chelh lo mahse in hmang pangngai ve tak mai a ni bawk , keima chan leh ka mawhphurhna chinah chuan rinhleh tur leh chhui zui tur nia han chhinchhiah tur engmah ka hmu lo phawt mai a,


Raymonda pawh naktuk maiah lunglei lam atangin a lo kir leh mai dawn a, hmasawnna engemaw zawng kan chhar chhuak mahna ti a ka ngaihtuah mek lai chuan Raymonda chuan min rawn call chiah a. Phone ka han pick rual chuan

" Vala, engnge vawiin lam hmasawnna i nei em?" Tiin pehhel kual lo in min rawn zawt nghal a.

" Hlimpuia te chhungkua atang hi chuan chutiang ang a han rinhleh tur leh enfiah zui tur chi engmah a awm lo , a pa hi Horticulture department-ah officer niin, mi huat tur lam leh hmelma siam tur lam a chet han la chi a ni lem lo a, hna tha duh mi leh an department atang pawh a chawimawina hial dawng tawh a ni a, a nu lah hi kohhran hmeichhe pawl lamah executive committee member ni lai a ni a, Hlimpuia ber pawh hi Kohhran Thalai lamah a a in hmang viau bawk a ni " tiin ka han chhang a.


" He lamah pawh i thil hriat ang tho bak kha hriat ka nei lem lo, Chhungkaw khawsak pangngai tak an ni a, sum leh pai lamah pawh khawsak harsa tak an ni lo, mahse chutiang a mi pawikhawih chi leh mi huat zawng a khawsa tur chi lam an ni lo. Duhsaki erawh ka sawi tawh ang khan , kohhran leh rawngbawlna lam ngaihsak lem lo, nula fel ve satliah deuh mai a ni a, ka sawi tawh ang tho bawk khan , Lunglei lam a a awm pawn, inkhawm leh thalai programme lamah chuan a tel ngai lem lo, an thenawm vel a ka lenkualna ah chuan engemaw thiltihpui leh huau huau hun ang chuan rui ve leh zeuh thei mai ang chi deuh kha niin an sawi a, chung bak chu beng verh viau tur thil lam ka va hre chhuak lem lo e" Raymonda chuan a rawn ti ve bawk a.


A tuk mai a lo haw phei nghal a tum thute a sawi luam hnu chuan kan inbiakna chu kan ti tawp zui a.




RAYMONDA nen kan inbe zo a, phone ka dah fel chauh tihah chuan ka phone chu a rawn ri zui nghal leh zat a.


Phone chu ka han en a, number ka hriat ngai loh a lo ni nghe nghe a, phone chu ka han la zui a.

" Hello" ka han ti a.

Hmeichhe puitling aw tih hriat tak hian " Hello, Vala a ni em aw?" A rawn tia .

" Aw ni e, engnge ni ta ?" Ka lo ti let thuai a.

"Aw, Hlimpuia nu ka ni a, i thianpa kha Raymonda em ni kha?" A rawn ti leh a. Vawiin lam a ka Number Hlimpuia ka pek atang khan min rawn be pawp hi a lo nia a .


" Aw ni e"


" Aaa.. englo a nia, hei ka fapa Hlimpuia hian a bialnu tualthih chungchangah, engemaw hrilh tur a nei niin a in sawi a, Zanin lamah in rawn leng thei angem?" a rawn ti leh a.

Kei chuan " Raymonda hi lunglei lamah a zin daih rih a, naktukah a lo haw ang, naktuk zanlamah kan lo leng mai dawn em ni ang " tiin ka han chhang a.

Vawiin lam a Hlimpuia nen kan in kawm lai khan Raymonda a zin thu kha ka sawi chiang hle si a, vawikhat chauh ni loin vawihnih vawithum lai, ka sawi nawn nghe nghe a Hlimpuia nu lah chu a fapa in a tirh avanga min rawn be pawp ta hi a ang viau bawk si. A bialnu thi a tawrh lutuk na lamah hian a rilru hi engemaw ti takin buai deuhna a nei a ni mai angem tih te chu phone ka beng bul a la dah reng chung chuan ka ngaihtuah a.


" Aw a nih tak chu, aw le, naktuk zan lamah kan lo beisei ang che u, hei mama hian min tir reng mai si a, ka rawn be pawp ta mai che anih hi, naktuk lamah chuan kan lo beisei ang che u " Hlimpuia nu chuan a rawn ti a, kan inbiakna chu kan ti tawp zui a.


Kan hnuchhui lai chingchivet ru zet leh misual hnu, thlawk thei ni awm tak chhui zui tur mumal awm lo a bo ta daih mai chuan ka rilru a luah ve ngang a ni ang, chumi zan pawh chu muhilh theih loh phah ve hial mai, Raymonda nen a kan inzuina chanchin hi vawitam tak in hma ah ka rawn chhawp chhuak tawh thin a, min lo chik anih ngai chuan , kei chu a sa seh taka a tla chawp a che ve mai chi leh Raymond-a sut kuak sa a, kuang kuah chung a kal ve zel mai chauh ka ni a, hna hautak leh harsa kan hmachhawn tum pawhin mut theihloh phahna atan a hmang khawp khawpin ka rilru an luah ngai meuh lo.


Zanin zet erawh chu ka khum sei fahran loah chuan ka mu zang thal ar mai a, kan hnuchhui lai chu ngaihtuah zuiin kiltin kiltang chu ka dap kual ve a. Eng em em phei zawng ka ngaihtuah chhuak em em hlei lo a.
Chutia ka men lak lawh tak reng avang chuan ka room tuk verh chu ka han hawng leh hnu hnawh a.

Ka rei maw! Thla a lo eng kher mai, Aizawl khawpui lamah chuan favang intan mek chu hria pawh kan awm mumal lo ang tih turin kan nihdan phung pangngai rengin mahni hma chhawp zawn zawnah kan kal miah miah hlawm a, Thingtlang lamah zawng Tai rai nghawr , khawpui lo ri leh dur dur thin te, favang in tantir fur ruahtui tlak hun nen a in thenna lai tur a, favang thla no lam , fur chhum in zam lurh mai chung a a han engkulh maite a mawi bik zia te chu ka ngaihtuah kai zui ta daih a, hetiang hunlai hi a ni ngei ang , kan mizo hlaphuahtu te pawhin " Fur Khawthiang chhawrhthla eng i iang e" an lo tih ni.


Chutiang ngaihtuah a, ka men kur lai chuan zan dar 12:30 am a lo ri der tawh a, ka whatsapp message tone chu a rawn ri rak a, tun ang hunah tunge message min lo thawn ta, tiin ka phone chu ka han la kang thuai a, Raymonda'n message min lo thawn hi a lo ni a.

Message ka han hawng chu ka meng zau kawk a, ka thil zuk hmuh chu ka awih lo hial zawk a ni.

Raymonda chuan " Tualthattu chu ka hre chhuak ta e, naktuk lama misual hnuk chhuak turin lo inring rawh " tih hi a lo inziak a.

Mak ka ti lutuk chuan phone chu ka en reng ringawt a, harh chhuak thutin " Tu nge misual chu " tiin ka han reply zui a, reiloteah Raymonda chuan min rawn reply leh vat a

" Aw nghak hram la, phunnawi mai lovin tih a nih kha " tih chauh hian min rawn reply a, Raymond Lalthazuala hi nawrh luih chiam avanga, a duhloh thil sawi tir theih chi a ni lo tih hre ve tur khawpin kan in zui tam ve tawh bawk a, tawk a tih chin leh sawi a tum chin loh chu zawt pawh ni ila min hrilh belh dawn chuang lo tih ka hriat chian em avangin " A phurawm hle mai" tiin ka han reply leh hram a, Raymonda chuan ka whatsapp message chu a en na a, min reply zui ta lem lo a.


Chuti teh thut leh ka beisei loh lutuk a, Raymonda'n misual awmna leh thiltisualtu hre diak awh ang maia min rawn be leh si chu mak ka ti rilru viau zawk a. Raymonda pawh ka ring hlel lek lekmai, mahse vawikhat mah la chesual ngai lo leh misual lo zawk min la manpui miah loh avanga Raymonda thusawi chu ring thar lehin naktuk mai a in hmu leh tur kan ni tho bawk , nakin a la zawhfiah atan tiin ka rilru a chu a phur hle mai a.

Chutia rilru hah dam a ka han awm tak hnu chuan tui takin ka muhil ta siai siai a.



Zing dar 7:30 am a ka phone ri thawmin min rawn kai harh leh chu ka thin a rim hlur hial mai, zan lam a mut that loh nen, men pawh meng mumal lo hian

"Eng nge?" Ka han bung nghut pek a.


Nui kuk kuk chung hian " Ekhai, kan val seniora chu mut kham loh hmel hmang i va pe na awm ve a?" Raymonda chuan a rawn ti a.


"Eng nge min lo kaih thawh chhan chu sawi thuai ta che " ka han ti leh hluk a.

" Aaa , eng dang ni lo e, pu ber, tukin chu kan inah chaw rawn ei thla la ka ti deuh " Raymonda'n a rawn tih chu ka hre thiam lo ang reng viau mai.

"Lungleiah i kal a ni lawm ni ? Nge nizanah i rawn zan haw em ni?" Tiin ka zawt let ha a.


" Lungleiah ka kal hleinem, chuvang chuan alawm chaw rawn ei rawh ka tih" Raymonda chuan a rawn ti awlsam leh et lawi a.Eng a? Lungleiah i kal lo maw?" Ka han ti hu a.

" Kal lo, chaw chu rawn ei thla rawh, hrilhfiah tur che tam tak a awm a nia, i rilru a chak vak si lo a, hrilh chhung i rei leh dawn si " Raymonda chuan a rawn ti leh a, ka chhan ve hma chuan phone a off daih a.


Raymonda rawn sawi chuan min ti harh chiang kawk kawk khawp mai . Ka khum tlangah chuan ka thu chhuak hlawl a.

Raymond Lalthazuala chu Lungleiah a kal daih emaw ka tih kha, lunglei ah aw zawng a lo kal si loh chuan nimin leh nizan te khan eng hna tak chu lo thawk ang maw?

Ka mut kham lohna zawng zawng chu theihnghilh zui nghal in , ka tho chhuak a ka inphih fai zui mawlh mawlh a, ka insiam zawh chuan pheikhai zang veh vawhin Raymonda te in lam chu ka pan zui nghal a.

Raymonda te in ka thlen chuan dar 8:15 am a lo ri tawh a, thil awm dan hriat fiah thuai thuai chakna chuan min nawr ut ut mahse Raymonda ber chuan ka rilru tur chu a hre ru kar a ni tih hriat tak hian nidang a dar 9:00 rik hma a chaw ei ngai lo khan, chaw ei a han rawt hmasa leh te te a, ka thil hriat fiah chak mitmeng te chu a hre thiam vek a ni tih hriat tak a min nuih leh thaw thinte chuan ka thin a tirim ru hlur tawh a.

Chaw ei chu an siam ta mai bawk nen, rilru hnam bei lo ru zet chuan chaw chu kan han ei leh ta phawt a, mahse a hmeh lam a lo tui kher bawk a, puar deuh chuan ka ei ta tho a.


Chaw eikham hnu pawh chuan Raymonda chu a la hmanhmawh chuang reng reng lo, muang em em a a ha a han nawt kual ve te chu maw, a nghawng a man chawt a, a room a hnuh luh hawn hawn tak hi ka nap a, mahse nghahhleh hmel tak a ka awm min runluih chu nuam a ti em em a tih a nuih khih sung reng danah chuan ka hrethiam ve vek bawk si. Chak lo leh phur lo ang tak a han awm der lah chu ka harsat em em mai bawk si.

A tawp atawp ah zawng, Room lamah chuan kan inzui lut ta nge nge a.



Room kan luh rual rual chuan " Lungleiah chuan i kal lo maw?" Ka han ti nghal tawng a

"Kal nang" tih bakin min chhang duh miah lo, a ngawi zui daih a.

"Ngatinge lunglei lam a kal ni awm tak a i awm vel si ?" Ka han ti zui leh a.

Raymonda ka zawhna chu min chhang tawh lem lo hian " Flakka drug an tih hi i hre tawh ngai em?" A han ti daih a.

" Hre ngai lo, chu chu engnge a nih a?" Tiin ka zawt leh a.

" Flakka drug chu Zombie drug an ti bawk. Mihring thisen kal val tibuai a, taksa thunun theih loh khawp a phurna leh tharum thawh chakna siam thei a ni, youtube lamah khan Flakka drug tiin han search la, hetiang drug ti tute chet phung leh an ruih dan chu i hmu mai ang " a han ti zui a.

Amah chuan a phone chu ka hma ah rawn kengin " Hei hi vedio pakhat chu a ni a, han en teh le" tih pahin phone a mi vedio chu a han play a, vedioa chuan mipa pakhat, ramhuai pai ni awm tak a, ing euh deuh deuh a awm kual leh a hmui leh hmai vel thi nuai mai chu a lo lang a, a han chet vel danah chuan a rilru chu thunun tu engemaw a awm tih hriat takin film a zombie ho chet vel dan ang tak hian a kal ing euhin a thle kual buk buk a, a au te ruai ruai bawk a.


Raymonda chuan " Khatiang kha Flakka drug hnathawh dan chu a ni, chu chu Duhsaki leh Suii thihna thlentu pawh kha a ni bawk " a han ti zui a


"Hei hi han en leh teh" tihpahin vedio dang a rawn ti lang leh a, chu vedio a mi chu hmeichhia a ni ve thung, khawi lai emaw hmun fianrial deuh a mi hi a ni nghe nghe a, chu hmeichhia chu rap awm ang reng zet hian a rum deuh ngul ngul a, a chet phungah chuan a harh fim lo tih a hriat hle a, a ma chemte ken chuan a in vit ta mawlh mawlh mai a.

Raymonda chuan " Flakka damdawi hian mahni i thunnun theihna la bo in, tharum thawk chakna a siam a, chu mai bakah tihrawl ti tangin thahrui an neih thin aia tam zawk fe an lo nei ta thin a, chuvang chuan tharum thawhna lam an uar phah ta a ni" a han ti zui leh a

"A nih chuan kan tualthattu hian hetiang drug hi khawih in , chu chuan tharum thawhna a thlen a, Duhsaki leh Suii khan an thih phah ta tihna a ni maw?" Ka han ti a.


" Aw ni e , ruang pahnih a ha hnu hma awm te khan chu chu a ti chiang viau " Raymonda chuan a


An Aw ni e , ruang pahnih a ha hnu hma awm te khan chu chu a ti chiang viau " Raymonda chuan a lo ti ve leh a.


" A nih chuan Siamthara bawk kha , rinhlehawm a va ni leh mai awm ve, a ni kha no.4 khawih sa , ruihhlo kaih hnawih sa a ni a" ka han ti zui ve leh zat a.


Raymonda chuan " Misual chu ka hre tawh, reiloteah kan kalpui tur police te pawh an lo thleng ang, chutah chuan engkim kan sawi fiah dawn nia, chumi hma chuan inbual lawk ka duh a, min lo hrethiam ta che ka pu " tiin kei thuchiang hriat chak a tui hal dangchar tawh chu, ka hriat chak tak mai min hrilh lo tawk chiah chuan inbual turin min luhsan ta a.



NEEDLE IN A HAYSTACKS LAST EPISODE


Rilru chhung a hman hmawh et et leh hriat chak zek zek neih lai a, hman awm tak a thutthleng a mut der der hreawm zia chu inhriat ve tho ka ring, nidanga mut ka duh thin tehlul nen, tun tum zet erawh chu ka awm hle hle thei meuh lo a ni e.

Tunge tualthattu chu tih ka hre chak tawh lutuk chu ka za et et hi ni ber mai .

Chutia hman em em a Raymonda te in a ka awm lai chuan Raymonda erawh bathroom lamah ala inbual phur phur thung a.

Dawr bell a rawn ri rang rang a, kan kal pui tur police lam an nih ringin phur takin ka lo chhawn thuai a, mahse ka rinloh lam daih a ni .


Lalhlimpuia, Duhsaki bialpa chu kawngkharah chuan a rawn pen lut tlat. A nih pawhin a beisei loh zawk min rawn hmu a ni mai thei, kawngka ah chuan a han ding chat a, a rawn lut zui ve leh mai bawk a.


"Eheu! Hlimpuia chu, engnge i rawn tih dawn a? " Tiin ka han bia a.


Hlimpuia chuan " Raymonda khan heta kal tur hian min rawn bia a, ka rawn kal a nih hi " tiin thutna awlah chuan a rawn thu ve nghal a.


" Ummm, anih tak chu, a inbual mek a, a lo chhuak tep ang " tiin Hlimpuia chu ka han chhang zui a.

Thil awm dan leh kal kual vel dan chu ka hrethiam lo tial tial mai.

Raymonda chu bathroom atangin kekawr bul leh tawnzau ha chungin a rawn chhuak a. Towel a a sam hru mawlh mawlh chung chuan, " E , Hlimpuia chu i rawn thleng der tawh a ni maw, lo thu lawk rawh aw " tiin a room lamah chuan min luhsan zawk a, reilote ah a chhuak zui leh nghal a. Misual man turin a rawn insiam fel diam tawh ang chu tihnakalaiin , kekawr bul leh Tawnzau nen, chapal bun thlup thlup chungin a la rawn chhuak cheu a.


Hlimpuia ep zawng chiah chuan a rawn thu a. Raymonda chuan " I bialnu thihna chung changah , a mawhphurtu leh tualthattu diktak chu i hre duh amaw ?" tiin Hlimpuia chu a en kal mai a.


Hlimpuia chuan " Duh e, a theih phei chuan keimah ngeiin hmachhawn ka duh ani " a lo ram hak a. A hmelah chuan thinrim hmel a lang thei a.

Raymonda chuan " Lemchan hi duh tawk la, i bialnu leh in awmpuinu i thah dan kha chiang takin min hrilh rawh " tiin a aw a nelawmna chhete mah awm tawh lo hian a han ti a.


Hlimpuia chu a meng zau kawk a, " Eng a?" a han ti thawt a.

Raymonda chuan " Kha tiangin i aw ki kha san reng reng suh, tlanchhuah te kha i tum ngawt ange, pawnah khian handcuff a hling tur che in police an awm vek tawh ania " aw ki sang hran miah si lo, mahse nelawm miah lo hian a han ti a.



Hlimpuia chu a mengbial kawl kawl a, keipawh thil lo thlen dan teh thut chuan min barakhaih chiang bawk a, Raymonda leh Hlimpuia chu ka en tawn sek ringawt mai a.


Hlimpuia chuan Raymonda chu thip kheih khawih hian a han melh ram a " Nangni police lak tlak loh lutuk hian dawt a min puhin min man lo ang " a han ti ve siah mai a.

Raymonda lah chuan " Dawt a kan puh leh puh loh che chu kan hre dawn khawp alawm" tiin Hlimpuia lamah chuan a kun hnai sawt a.

" Nimin message i dawn kha i la hria em?" Raymonda chuan a han ti zui a.


Hlimpuia chu meng zuau uau a, Raymonda bawk chuan " 'Tualthahna hmunah sulhnu hnut chhiah i neih chuan , zaninah va thian fai rawh, police lam hian hnuhma an rawn chhui zui mek ania ' tih i dawn kha, ka rawn thawn che a nih kha, nizan dar 12:30-1:00 in karah khan Duhsaki in luah ah i lo kal kha " Raymonda chuan a lo ti zui hmak a.


Hlimpuia chu a meng buai nak tawh mai , mahse " Chu hmunah chuan ka kal lo" a han ti leh hmak tho a.

Raymonda chuan " Mawlmang leh rinthil thu mai mai a che chhuak turah min ngai reng reng suh, nizan khanDuhsaki in luah ah khan i lo kal ngei a, mask rawn vuah mah la, i pian zia atang khan ka hai reng reng lo che " a han ti zui ve nghal zat a.


Hlimpuia chuan " Dawt hmanga tualthattu a min puh i tum anih chuan i hlawhtling lo ang " a lo ti ve leh hmiah mai bawk si.

Kan boruak chu a lum tha halh halh khawp mai.

Raymonda lah chu chhete pawn hlauhthawnna a nei miah lo tih a hmelah chuan a chiang reng mai si. Hlimpuia lah chuti bawk.


Raymonda chuan " Chuti maw? A nih leh a ruh lang rawtin i ha

Raymonda chuan " Chuti maw? A nih leh a ruh lang rawtin i han sawi ang hmiang.

Nang hi pawnlam a i lan dan chuan kohhranah pawh in hmang ve tak angin i lang a, mahse ruihhlo khawih ru reng i ni, i kut hnung a ser niawm tak awm pawh kha i inchiuna hnu hma a ni a, i bialnu Duhsaki pawh kha chutiang bawk chu a ni. Chuan Duhsaki thih zan pawh khan an inah khan i leng ngei bawk a, chuan hei hi damdawi chi thar, i thianpa , Richard Lallianzela , corona virus avanga Delhi atanga lo haw in a rawn hawn che in tihna hmanrua, Duhsaki kawmthlanga i paih tak pawh kha a nih hi. " Tihpahin Cigarette tuamna sahar emaw ka tih 'Tin foil' tia an koh thin chu a rawn phawrh a . Amah vek chu rawn tawng chhuak lehin " Tichhuan hei hi in damdawi hip kha a ni a, Flakka drug" a han ti zui leh a.


Hlimpuia chu a meng hnuai deuh raih tawhin ka hria, Raymonda chuan " Tichuan khami zan khan , Duhsaki khumah duhtawka in chet hnuin Damdawi chu in pahnihin in ti duh ta a, tichuan chu damdawi hnathawh avang chuan i ngaihtuahna zawng zawng a buai zo a, i bialnu ngei chu i that ta a nih kha. Chuan kawngkhar chu a chhunglamah kalhin veranda atangin i chhuk thla a, mahse i fimkhur lo hlek tlat, Converse pheikhawk ngaina tak i ni a, company dang siam pheikhawk i bun meuh lo, chu chu phat buai pawh tum la, i pha thei chuang lo, a chhan chu i room a kan lo luh khan i pheikhawk bawmah khan converse pheikhawk hlir i dah tlat alawm. Tichuan i bialnu nangmah ang a rui ve tho chu rawng taka i thah hnu in i tlanchhe haw ta anih kha. I harh fim hnu ah i han ngaihtuah a, hlauhthawnna in i khat ta a, tichuan keini i hnu rawn chhui tute rilru lak penna leh i fihlim theihna atan in awmpuinu Suii kha rui lo hai loin i that ta a, khami zan a i inbual zawh hnu a Suii ruang hmu ta ang a i in sawi kha dawt i sawi , Suii kha i tualthahna thup tur leh ang tak a lem i chan theihna atan i that phawt a, ruahmanna engkim siam lawk vekin i nu pawh tui i lum luih tir kher kha. Suii thisen i kai nasat em avangin i inbual zui ta nghal zawk a nih kha. Mahse i thawmhnaw Bathroom ventilation atanga i theh chhuah , kawmthlang kawr a paih thla daih a i in ngaih kha i thil tihsual chu a ni. Nimin chhun a, in varenda a thir chhe zawng ni awm tak a in kawmthlang a vak kual chhen kha keimah ka nih kha. A chhan pawh, Suii i thah hnu ah khan i thawmhnaw thisen kai hnuang kha i paih ngei ka rin tlat avang leh, in kawmthlang kha midang tumah awm lohna, hmun awih leh tawp hnawk tak anih avangin tumah an kal i ring lo a i paih ngei ka ring tlat a ni. Tichuan ka room ah sawn i kawr leh i kekawr thisen kai nuai kha ka dah mek.

Engvang ringhlel che nge ka nih i hre duh in ka ring, In awmpuinu Suii thih zan khan thiam takin lem i chang a, hlauthawng leh a ruai ni awm tak khan i lang a mahse i rilru ngaihtuahna chu a fim vek, lem i chang thiam khawp mai. Mahse a hnu lawkah hmu tur che in kan lokal leh a, khami khan lo muhil niawm takin i lo awm na a, i game khelh lai mek kha off na chang i hre lo tlat khan lem i chang a ni tih a rawn ti lang nghal a, pubg i khelh lai kha, muthilh san tak tak ni la chuan i khelhpuite zone lam pan a motor a an tlan mek lai khan i chuang ve lo tawp tur hi a ni a, mahse kha game ah khan motor ah chuangin i thle chhuak nghe nghe a nih kha. Chu chuan i muhil lo tawp a game kha active takin i khel mek a ni tih a tichiang ta a, kan han kai tho che a, lem i rawn chang chhunzawm leh zat a, mahse a hma lawk a rilru buai leh talbuai tak i ni tih kha i rawn theihnghilh nge, fel fai takin min biain min lo chhawn a nih kha. Kha khan lemchang mai mai i ni tih a tichiang bawk.


Nang hi ka ringhlel che a ni tih i hriat lohna atan lunglei lam a kal daih niawm takin lem ka chang zui ta a. Tichuan sim card thar leiin kha message kha ka rawn thawn ta che a, ka rin leh ka beisei ang ngeiin i sulhnu thup tum chuan Duhsaki te inah i lo kal ta ngei a nih kha. Kan man chhuah mai che i hlauh em avang leh i fimkhur em avangin ka zin leh zin loh hriatna atan Vala pawh chin chang i zawh hial kha.


Chuan nizan khan an inah chuan i rawn lut ru leh ta ngei a, inhnuaiah ban a i lawnna bulah khan ngawirengin ka awm a ni tih hre hauh lo in i hnu thupna atan a polythe2ne ke a bun tup chungin veranda bamah khan i lawn ta a nih kha. Raymonda chuan a han ti leh a.


Thil awm dan chu ka man thiam ve ta. Khatia lunglei lam a kal daih ang a a insawi lai khan , keimah kaltlangin keipawhin ka hriat hauh si lohin Hlimpuia chu a lo bum chhuak reng a nih chu.

Hlimpuia chu a kun ngaih tawh mai a, a hmelah chuan a tlawm deuh dui hian a lang tawh a.


Raymonda chuan a mitah tak en kal chung hian " Khai le, i thiltih sual kha i inpuang dawn nge, keimah ngei hian ka phawrh sak chhunzawm zel dawn che " a han ti zui zat a.


Hlimpuia chuan " I thil sawi zawng zawng kha a dik vek " tiin a mittui chu a far zawih zawih a, amah bawk chu lo tawng chhuak lehin " Duhsaki kha ka hmangaih a sin, mahse kha damdawi hlauhawm tak avang khan ka buai ta vek a, engtin chiah nge a chungah khan kut ka thlak a, engtiangin nge ka thah chiang kuang pawhin ka hre lo. I sawi ang khan no 4. Ka khawihna hi kum khat vel zet a ni ve tawh a, keimah vang liau liauin Duhsaki khan damdawi hi a khawih phah ve bawk a, khami zan khan kan pahnih chauhin kan awm a, i sawi ang chiah khan induh takin hun kan hmang dun a, chumi zawh ah chuan damdawi thar, a tha lutuk ti a ka thianpa in min pek kha kan ti dun a, a hip in kan hip nghe nghe, a tir lamah chuan a nuam viau a, mahse kha damdawi hnathawh kha a lo na in , a lo chak kher mai a, kan rui tial tial a, Duhsaki kha chhuatah a mu ta, tih chin zawng chu chiang kuang takin ka hre thei a, mahse a bak zawng chu mumang ang riaiin ka hria, ka taksa a za chuai chuai a, chak ta riau a in hriatna neiin in chhung bungrua ka suamsam dan te chu mumang ang ruai hian ka hria a, choka lamah chhuakin chawhmeh chan chemte chu la in , Duhsaki mu lai chu ka vit a ni tih ka hria, a hnu lam zel chu hriat mumal ka nei tawh lo. Zing lama ka han harh chuan kan inah ka room ah ka lo mu reng a, thisen te ka kai hne hnu leh nghal a, ka chhungte tumah an la tho lo ni a ka hriat avangin inbual turin bathroom lam chu ka pan zui ta a , mahse bathroom ka luh hma chiah chuan kan awmpui nu Suii zing tho kha a room atangin a lo chhuak ve chiah a, thisen kai hnuang chung chuan min rawn hmu ta a.

Duhsaki thihna leh keimah min chhui zawm theihna kawng pawimawh tak tur a nu dawn tih hriaiin Suii pawh kha ka that zui ta anih kha , nangni ho hian ka sulhnu in rawn chhui mek tih hriaiin a hruai kawina atan che u, Suii taksa hnu hma kha chu ka siam chawp a ni e. " A ti ta nge nge a.


Raymonda chu a ding hluaia , kawngkhar hawngin pawn lam a min lo nghak rengtu police te chu a ko lut a, Hlimpuia chu handcuff in an rawn hnung khirh zui mawlh mawlh a, an hruai chhuak zui ta nghal a.


Kan pahnih chauh kan awm leh hnu chuan " Misual chu kan man ta e, ka pu " Raymonda chuan nui sang chung hian a rawn ti a.


Chuti teh thuta thil han thleng chu ka la hrethiam meuh lo a ni ber mai " Engtinnge damdawi an ti ve ve thin tihte, Khang damdawi Flakka drug te kha khawi atanga an neih tih zawng zawng nen i hriat theih a?" Ka lo ti a.


" Thlalak a hmun in ang chiah a band aid an belna kha uluk deuhin ka han zir chiang a, a chhan ni thei awm a ka rin kha ka chhui zawm a, a dik a ni tih chu ka hre zui mai, bakah kha ni khat leh zankhat lungleia ka zin san lai che kha ka awm mai mai bik hleinem , mutmu pawh tuah lo in ka vak kual alawm " tiin Lunglei a a kal ni a kei ngei pawhin ka lo ring nghet bur mai kha min nuihsawh deuh nia ngaih theih tur hian a nui sawng a.


Amah bawk chuan " Buhpawl zing a hriau pakhat lek tla chu kan sik chhuak ta e, chutih rualin i mak ti hmel mitmeng phar uau mai leh chilthli tla lek lek a min thlir reng kha ka hne tawh, thingpui in san daih ang aw " a han ti zui a. Be



Hna hau tak leh khirhkhan zet chu thawh zawhin a awm leh ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)