"TOP SECRET" BY Dwm Pachuau

Hnuchhuina lampang chi ho
Ngaia
Site Admin
Posts: 25813
Joined: April 30th, 2016, 4:07 pm

Re: "TOP SECRET" BY Dwm Pachuau

Unread post by Ngaia » November 20th, 2016, 5:26 pm

Episode-7

Aizawl chhuah lam veng pakhatah hian James-a te chu an ding a. James-a chuan a thianpa hnenah chuan zawi sap hian "Kan chhaka in ropui deuh maiah khian kan leng dawn nia." a han ti a. Davida chuan a lu a lo bu nghauh nghauh a. "An nei lian hle mai a." a lo ti ve sup a.

Muangchangin meizial an han tan leh te te a. "Ka biak laiin ngun takin i lo en ang a, a hmelah leh cheziaah ngaihdan i lo siam dawn nia."James-a chuan a ti a. Davida chuan "A harsat lem loh chu." a lo ti a. Tichuan an tum lam pan chuan stepah chuan an inzui chho ta nghal a.

Hmeichhe pakhat hian a lo chhawn a, "Tumah an awm lo." tih leh kawngkhar chu khar leh mai a han tum a. James-a chuan "Ngawi teh thiannu, Ramdina biak lawk kan duh mai a nia. Kan rei lovang." tiin kawngkhar chu a lo chelh vat a. A lo chhawntu chuan "Tumah an awm lo ka tih chu." a lo ti leh hram a.

James-a chuan a mobile phawrh pah hian "Inchawi i ngam chiah maw? I thiante an lo thleng ti la a hrethiam nghal mai ang." a han ti a. Chunu hmelah chuan mak tihna leh rinhlelhna a rawn lang nghal a. Mahse, a hmaa mite pahnih lah chu an confi hmel angreng si. Hmundang melh deuh zak zak pah chuan a kalsawn ta a.

Chunu kalsawn hnu chuan an lut ve nghal a, zawi sap hian "Kan kal tur thu i hrilh lawk em ni?" davida chuan a han ti a. James-a chuan a lu a lo thing na na a. In chhung hawi kual vel pah chuan "Amah pawh ka la hmu ngai lo." a lo ti leh mai si a.

"Dawt i sawi a maw?" Davida chuan a lo ti ha a. Ngaihsam zet hian "A sawi hmasa vei a nihkha." a lo ti sam et a. "Anih engtin nge dawt a sawi tih chu i hriat theih?" a han ti leh hram a. James-a chuan "A hmel atang khan." a ti a. Tawng zui a tum leh lai tak chuan room kawngkhar a rawn inhawng a, tlangval hmelchhe lo tak mai leh sang zuah mai hi a lo chhuak a.

"Chibai, rei lo te biak lawh che kan duh a. Kan rei lovang." james-a chuan a lo ti vat a. Chu tlangval chuan "Eng thilah nge ni ta? Ka va hre ngai lo che u ve..." a lo ti a. A hmelah chuan a nuamsam vak lo a ang khawp mai.

"Private Detective, James-a ka nia hei hi ka thawhpui David-a. Jane-i thih thuah thu tlem zawh che kan duh deuh a ni." a han ti zung zung a. Ramdina chuan "Eng a? Tunge Jane-i chu, in thusawi ka va hrethiam lo ve..." a lo ti he haw a.

"Jane-i, i thiannu. Nula hmeltha tak mai kha maw le." tih pahin whatsApp a Jane-i leh Ramdina inbiakna a print chhuah chu a han phawrh a. Ramdina chuan lehkha chu lo lain a han en vang vang a. "E henu hi maw? Engtikin nge a thih a?" a ti leh ta daih mai.

James-a chuan "A thi tawh tih la hre lo iva ang ve?" a han ti a. Ramdina chuan "Hre nang, ka la hre miah lo. Vawin tlai lam khan ka zin ka lo thleng chiah a ni. Engtia thi nge ni a?" a ngaihna hriat loh hmel tak chuan a lo ti leh a. James-a chuan "Rawng taka thah a ni. Tun hnaia i hun hman dan tlangpui zawr zawr chauh min hrilh thei ang em?" a lo tih zawm leh zat a.

Ramdina chuan "Chuan kei hi min ringhlel tihna em ni, thei e kar khat chhung Mumbai ah hna thil a vangin ka zin a, hei ka lo thleng chiah a ni vawinah." a ti a. James-a chuan "Ringhlel tihna ni chuang love, anih Jane-i nen hian in inhriatna a rei tawh em? Enge in inlaichinna? Engtia inhria nge innih?" tiin zawhna dang a zawh zawm nghal zat a.

"Eng inlaichinna mah kan nei hran lo. Hmelhriat satliah a ni deuh mai. Tlangval ka nia, a ni nula nibawk chu vawi hnihkhat chu in hmuh ang khan WhatsApp lamah kan inbe ve tawh. Kan inhriat tan na tak chu club ah a ni. Thla thum vel liam ta khan." tiin a chhang a.

"Anih tak chu, tidaih ila inhna hi a hahthlak viau lo maw zin nawl nawl te a ngai zing awm si a. Mahse ram hmuh zauhna tha tak chu a nia. Keini ang duang han thawh ve ngawt chi chu a ni lo hle mai." a lo ti daih a.

"Hahthlak love, ka tuina tak a nia nuam ka ti khawp mai. Jane-i lo boral ringawt chu mak ka ti hle mai a. Tunge chutianga taka nunrawnga lo that duh ang le aw!!" a ti vang vang a. Davida chuan "Nia, a hmelthat tehlul nen a uiawm khawp mai." a lo ti ve a.

"Ka ui hle mai a, a hmelthat chu thuhran nise a fel em mai a, awih har ka ti kher mai. Thingpui in ru aw." tih leh an awmpui koh chu a rual nghal a. An awmpui chu a lo lang nghal vat a. James-a chuan "Ngawi rawh thingpui chu kan lo len leh hunah kan in dawn nia, kalna tur kan la nei nual sia kan kal phawt ang e. I lo awm remchang hlauh chu a lawmawm hle mai." tih pahin an awmpuinu chu ava melh zawk a.

An awmpuinu chu a lo meng rang hle mai tih a hmuh chuan James-a chu a nuih a za ru hle a. Mahse, a nui chhuak duh lem lo. "A tul anih phawt chuan min rawn call ula in duh hun hunah in lo kal dawn nia, tualthattu zawn chhuahna kawnga tangkaina ka neih phawt chuan inthlahrung reng reng suh u." a ti a, tichuan James-a te thian dun chu an chhuak ta a.

An chhuah hnu chuan Davida chuan "Ngaihdan siam thiam ava har hmel ve thianpa. Dawt a sawi i ring em?" a han ti a. James-a chuan "Kan la hre vat mai ang. A zin tih kha chu ka hre sa vek a lawm. Mahse, a thusawiah khan inkalh a awm kha i lo hria em?" a lo ti a......

@Dwm Pachuau



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 20th, 2016, 5:27 pm

episode-8

Davida chu a inngaihtuah muk hle a. Chutah rawn thawk chhuah hawk pah hian "A thusawi inkalh lai awm ang ka va hre mai lo ve. Mahse, nang berina i hriat chuan a tawk mai a lawm." a rawn ti chhuak a. James-a chu a lo nui sak a. "Kalna tur dang kan la nei, kal phawt ang." tiin an tlan leh ta a.

James-a chuan hma a hruai a, a tlanna apiangah Davida chuan a zui ve zel a. Zemabawk an tlan pelh meuh chuan Davida chuan khawiah chuan kal leh dawn chu nimaw aw! Tiin a ngaihtuah leh nasa tawh mai a. Mahse, zawhna hun a awm miau loh avangin a zui mawp mawp ringawt mai a ni.

James-a chu hnaih chilh lutuk lovin a tlan zel a, Tuirial an thleng thla tep tih chuan james-a chu kawngsirah hian a lo ding a. A hmui tuamna ah chu phawrhin pakhat zawk chu Davida a pe a.

Davida chuan "A ngai pawh ka ti lem lo." tih pahin a la ta tho a. James-a chuan a bike chu tinungin Dumping Area (Bawlhhlawh paihna hmun) kawng peng lam chu a pan thla ta a. Davida chuan ama hriat tham lek hian khai aw! Khawbung a la ti ta deuh deuh tih ang vel a ni maw?" a lo ti sup a.

A hmun an thlen thlak chuan men hleih theih loh khawp hian a lo khu mup mup mai a. Chumi khu hre lo ang miah miah chuan thirchhe hai an lo phu sup sup mai bawk a hmuh chuan Davida chuan mak a ti ngei mai. Aizawl veng hrang hrang bawlhhlawh phur motor lah chu a rawn paih tur leh haw lam an insulpel reng bawk a.

James-a te chu tlema a khuk lohna lai deuhah chuan an ding a. Davida chuan a hmui leh hnar hup pah chuan "Hei thirchhia kan hai ve dawn chu a ni em lo maw?" a han ti a. James-a chuan "Dawn chiang e, nuam i ti viau ang." a lo ti mai a. Rei ngial an din hnu chuan bawlhhlawh phur pakhat hi a rawn tlan thla leh bauh bauh a.

Chu motor a hmuh rual chuan James-a chu an awmna atang chuan a kalsawn nghal a. Chu moror driver nen chuan enge an va sawi dun Davida chuan a hre lo a. Ngawi rengin a lo nghak tawp mai a ni. Rei lo teah chu motor chuan Davida awmna lam chu a rawn pan phei ta a.

Davida dinna zawl fai laiah chuan motor chuan a bawlhhlawh phurh chu a han bun ta rum rum a. Chu veleh thirchhe haiho chu an rawn tlan khawm sup sup a. James-a chuan banphar meuh hian "Ngawi ru ngawu thiante u, min lo hrethiam lawk ula. Hetah hian kan bungraw duhlai kan lo paih tel hlauh mai a. Chu chu zawn hmuh leh kan tum a ni. Khawngaihin chu chu kan han zawng lawk ang a, a bak thirchhia leh bur chhia induh ang ang chu inla vek dawn nia." a lo ti chul a.

Midangho chuan James-a leh Davida chu an en hau mai a. Mahse, chutia James-an a tih avang chuan tuman an lo haipui ngam ta lova, muangchangin an kal darh ta sap sap a. A buntu motor pawh chu a tlan haw leh ta vang vang a.

Davida chuan a ngaihna hre lo zet hian a thianpa chu a han en a. "Thianpa, i fiamthu chu a ni em lo maw? He bawlhhlawh awmkhawm karah hian enge zawn ngai ta? Thil hi ka hrethiam ve teh nuai lo a ni." a han ti a. A hmelah chuan an hna tur chu a peih lo tawpkhawk a ni tih a lang chiang hle a.

James-a chuan a lo nuih sak a. "Bawlhhlawh zingah hian bawlhhlawh lo deuh a awm em kan zawng ang chu. A awm ngei ang tih erawh ka sawi thei mai lo. Rinthu a nia, tirawh le hna chu i han thawk tan ang hmiang." tih leh bawlhhlawh hai chu a rual nghal a. Davida chuan "Kan zawn tur chu min hrilh ve phawt la maw le," a lo ti leh a. James-a chuan "Sana." tiin a lo chhang a.

Tichuan bawlhhlawh chu an hai dun ta ngian ngian mai a. Ni chu a sa vawl vawl a, bawlhhlawh hal khu muah muah leh rimchhia nen, darkar thum vel an beih hnu chuan mittui nen thlantui nen, hnaptui nen an ni ta pur mai. A lum mai a ni lova, a sa huam huam mai bawk si. An hmai leh taksa, an thawmhnaw zawng zawng chu a balin a dum nen nuan tawh a.

Davida chau leh ning lutuk hmel chu a pe chhe ve kher mai. Tui a hal duhin an chau dun kher mai. James-a chuan a thianpa chu va en pahin "Detective hna diktak i thawk mek a ni. A nuam i ti viau lo maw?" ava ti a. Davida chuan chhan chiah pawh a ruat lo, a luak chhuak lutuk chu a uak bawrh bawrh a. James-a chuan a lo nuih kiah kiah a.

Nilenga an hai hnu chuan lehkha chhe fun niawm tak hi James-a chuan a han hai chhuak a. Chu lehkha hlawmkhawm nimai awm tak chu a han lakang a, a tum aia a lo rih tak nelh avang chuan a pawt phelh mawlh mawlh a. Davida lam chu hawi pheiin "Ka hmu ta..." a han ti a. David-an James-a lam ava hawi phei chuan sana tha zet mai, gold rawng hi a thianpa chuan a kutzungchalin a lo khai va va a.

Davida chu a thusawp nghal nuai a. Engmah sawi lovin a thaw hle hle a. Chutih lai chuan a thil chhar chu James-a chuan hlawhtling inti takin a lo lek vat vat thung a. Tichuan sarangah khungin a bo hlau tak chuan a ak tha nghal hmak a. "Thianpa, kan hlawhtling ta e. Kan hna tur hi ka sawi lawk chuan i peih dawn lo lutuk a ka hrilh hmasa duh lo che nihkha. Mahse, hei tunah chuan kan kan tlingtla ta a lawm." tiin Davida darah chuan a beng thak thak a. Davida chu a ngawi reng a, a chauh em avangin engmah a zawt peih rih lo a ni. Tichuan muangchangin an inkhalh haw ta a....

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 20th, 2016, 5:27 pm

episode-9

A office tereuh teah chuan James-a chu kulmuk zet hian a thu a. Chhun lama a sana chhar leh computer a Jane-i saruak thlalak chu a en tawn chhen a. Zan dar 7:30 a rik tawh avangin Davida chu lo thleng har a ti tan hle mai. Vawi tamtak ti tawh mahse Jane-i thlalak sexy tak mai chu a han zoom leh vak a. Ngun em em a ahan en tawn vel pawhin rinhlelh rual niin a hre lo.

Chauh hmel tak hian Davida a rawn lut chiah a. James-a chuan "Iva rei ve, thu teh hetah hian. Tualthattu chu kan hnaih ve hret hret zel chuan ka hria, khi thlalak sexy bawk khi ka lo belbul nawn leh a. Han enchiang ve teh enge i hmuh?" a lo ti nghal a. Davida chuan thlalak chu a han en chiang ve leh a. A rawn nui chhuak sak mai. Dawhkana sana chu la kangin "Ka man tan." a rawn ti chhuak a. James-a chuan "I fing hle mai. Zanin kan hna tur chu tlemin a nem deuh tawhin ka ring." a ti a.

Davida chuan "Man tih lemah hriat thiam loh ka la ngah khawp mai." a tih lai chuan James-a chuan "Ka hria lawm, nakinah ka la hrilh fiah vek ang che. Zanin kan hna tur lamah rilru i han seng zawk rih teh ang." a lo tih khalh zung zung a. Davida chu a lo kiai suk a.

"Vawin i hah bawka zanin chu party naah i kal teh ang. Mahse, hnathawk kan ni tih kha theihnghilh awih a ni lovang. Kha singkhat hi ak la, a tul tul i lei dawn nia." a ti a. Pawisa lak pah chuan "Eng hna nge?" tiin a lo zawt let a. James-a chuan "Awl lutuk, nula hrai ruih leh a malno zut a ni mai." a lo ti sam et a.

A man lo a ni tih a hriat rual chuan "Zanina i nula hnim hnaih tur chu kan hmuh hunah ka hrilh ang che. Mahse, a awlsam viau lo maithei a. Chuvang chuan a nia nang a hmaitlang tha zawkah i koa a tlak phah ni. Kal phawt ila, kal pahin kan sawi zawm dawn nia. Car chu i rawn keng maw?" a ti leh ringawt a. Davida chu a lo bu nghauh a.

Davidan car a khalh a, a sirah James-a athu thung a. "Rui lo la, hriat si lohin i vil chawt ang a. Chance i hmuh ve leh pan hnai la, a rilru neih tum ang che. Kei chu ka awm rei vak dawn lova, hotel ngaiah khan hruai i tum dawn nia, i hlawtlin dawn chuan sms blank i rawn thawn dawn nia. Confi takin awm la, polite viau a chi ang." James-a chuan a han ti a. Davida chuan "Han tum phawt ila." a lo ti bauh a.

Zanin chu an nalh dun bawk a, chhun lama an bawlhhlawh hai lai lo hmutute pawh khan lo hmuse a hriat a rinawm loh tlat. James-a chuan a san chu a han bih zauh a, dar 9 a lo hnai awk tawh a. Tichuan muangchanga tlan zelin party na hmun tur chu an thleng ta a. Davida hmelah chuan zamna a lang tlat, James-a chuan "I zamna kha dahtha la hawi vah rawh." a lo ti a. Davida chuan "Mai mai thin a, zam lah love a." tih pahin a lo nui var var a.

Party na hmunah chuan mi an tamin an thawm pawh a na hap hap kher mai. Kei tak emaw tiin an su nghawl nghawl hlawm a. Kil khata lo inkuah fet deuh leh lo inkiss ta ngawng ngawng pawh hmuh tur an awm nual. Music lah chu a tang thain a rin lamah lah duhthusam bak hret niin a lang.

James-a chu a han su ve nghal ngawt a. A zei fahran loh em avangin Davida chuan a nuih rah rah a. Whisky no dawm pahin a lu a lo bu ve nghauh nghauh a. Nakinah chuan lam pah zel hian a bulah James-a chu a rawn kal hnai a. No khat chu a rawn thawk khat ve pap a. Davida chu a ruk hian a han kheuh zauh a, a kil lamah chuan an inzui phei nghal a.

Midang tana hriat theih ni si lo hian James-a chuan an piah kil khata nula samsei, hmai bial lam deuh inha tight zet mai chu a kawk ru zauh a. "Saw saw a nih saw i chanpual tur chu. Hmanhmawh miah loin veh la, sum a mamawh tih hre rengin i thiam thil kha hman a hun tih i hre dawn nia. Keiin thil dang ka lo buaipui ang e." a ti sar sar a.

Davida chu a lo bu nghauh nghauh a. Chu hmeichhia chu a va melh leh zauh thin a. Hmel tha reuh hlein a hria a, a bula mipa awmho pawh chuan lampui an chak hmel viau in a lang. En mai chuan a zahawm vei reuh phian a, engtia hma han laka bul han tan tur nge ni ang tih a ngaihtuah nghal vat vat a.

James-a chu rei awm lovin a tek chhuak ta nalh a. Davida chuan khawi lamah nge a tuan dawn a hre hauh lo, ngaihtuah pawh tulin a hre lo. Hna pawimawh ve ve an nei a, a ko a lum chu a ngaipawimawh ber lo thei lo.

James-a chhuak chuan Taxi a phar a, a tum ram lam pan chuan a liam ve ta vang vang a. A duhna hmuan Taxi chu ti dingin thim thamah chuan a ding ta vang vang a. Minute 10 vel ngawi renga a din hnu chuan mi tutih hriat loh hi hmanhmawh hmel fe hian a lam pan chuan a rawn kal ta a. A rawn hmu ang tih hlau takin a biru thei ang ber chuan a thu hniam nghal a.

Chupa chu a rawn hnai zel a, James-a awmna zawn a rawn thlen chuan a hawi let zuk a, tichuan a kal tlang ta zel a. James-a chu a nui sak a, tichuan muangchangin a rawn pen chhuak a. Fimkhur takin chupa kal liamna lam pan chuan a kal ve leh ta zan zan a.

Davida leh a nula tawn thar chu an inkuah nghet fu tawh a, music ri ruai ruai leh midang lam ve te kiangah chuan tumah dang ngai bik lovin an in en hnai khawp mai. Chu nula chu a meng tha pheih vak tawh lo ni hian a hriat a......

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 20th, 2016, 5:27 pm

episode-10

James-a chuan hmuh hlau tak si chuan a zui ru zel a, a mizuipa chu a ngaih a tha nge a fimkhur lo ve hrim hrim. Rinai takin zui ruk a nuam phian a, ni lo se chuan an inman chhuak tawh ngei in a rinawm.

Mahse, James-a rin leh beiseina lam reng rengah chuan a kal ta lo tawp mai. "E khai aw! Kan mihringa chu khawia kal nge maw a tum le? A ti nuah nuah a. A ngaihna hre lo zetin a zui ta zel tho a. A zui thui tulh tulh a mak a ti tulh tulh bawk a.

Zan dar 11 a hnai ta, Davida chuan inthiar chhuanlamin bath room ah a lut that a, James-a chu sms blank a thawn a, tichuan a chhuak leh ta nghal a. A thiannu chu a lo thu bu lak lak a, Davida chuan kaithoin muangchangin pawnah a kuah chhuak ta a.

A car seat hmaah chuan a thut tir a, James-an pan tura a tih hotel lam pan chuan an inphur chhuak ta a. Rui viau e ti lo chuan a tawng duh hle mai, a thilsawi erawh a inzawm lo thei hle a. Davida chu hmeltha a tih thu leh pa a tih thu chu a sawi lang deuh reng bawk a.

Hotel manager chu James-an a lo biak lawk vek tawh a vangin Davida te hmel a hmuh chuan an awmna tur room chabi a lo pe nghal vat a. Davida te pahnih chu an room tur lamah chuan an inkuah chho hniang hniang a.

Room an hawn rual chuan nula chu khumah a bawk nghal thlawp a. Davida erawh chu bath room ah ava inphih harh a, a hna tha taka a hlen chhuak thei chu a lawm hle a. A bak zawng hi chu a thianpa nena an thawh dun ngai chi a ni tawh tlat.

James-a chu khawiah nge a awm ang? A sms thawn chu a hmu ngei em tih a han en nawn leh a, a lo hmu ngei tih a hriat chuan a han thaw hak a. "I rawn thlen har loh hram ka beisei a nia." ti nghat chungin bath room atang chuan a chhuak ta a.

Bath room atanga Davida a rawn chhuah leh chuan a thiannu chu a lo zangthal tawh a, a kekawr hak tight zet mai chu a khup thleng deuh thaw hian a lo hlip thla vek bawk a. Davida lo chhuak chu hur zet hian a lo nuih san san a.

Davidan a han hmu thut chu a ding deuh dat a. Chu nula chu a thlek ta veng veng mai a. Panty senno a ha a, a malpui lian leh no var hai mai chu a lo kak hiang mai si a. A t-shirt dum hak chu tlemin a inhlim deuh bawk avangin a kawng bawr leh a dul vel chu a lang chiang hle bawk a. A panty chhan rawn vum pawng thar mai chu mitdel tan pawha han hmuh hmaih phal chi niin a lang lo.

Nula chuan "Kha tah khan i ding zankhua dawn nge ka kekawr hi min rawn phelhsak dawn?" a rawn tih chuan Davida chu a harh deuh zawk a, a lu thak miah lo chu a hiat nuah nauh a. A sawi tur hre lo chuan "Room chu a nuam hle mai." a han ti ngawt a. Khum bul velah chuan a tawi a tawi ta mai a.

"Thiana, iva phur hmel serh sawrh lo ve, i duhzawng ka ni vak lo em ni? Pawisa kha chu a ngai reng tho a nia aw." a rawn ti nawi niai a. A men pawh a meng tha peih vak tawh lo niin a lang. Davida chu a lo nui var var a. A rilru lam erawh a buai viau lawi thung.

A rilru chu a buai khawp mai. A bul lawkah bel chhungsa tih chiangsa nula nalh leh itawm mangkheng a mu var hai mai a. Mahse, chu chu a tana pawimawh ber a ni lo tlat si. Hna pawimawh tak thawk tura pen chhuak a ni a. Eng anga nalh leh itawm pawh nise a hna chin bak pelh chu a tum hauh lo.

Mahse, a lehlamah chuan chutiang khawpa a mipatna kaitho awlsam thei nula chu han kalpah zuai pawh nise tunge dem phal tehlul ang? A duh phawt chuan a thianpa lo thlen hma pawhin duhtawk chu a ngah hman ngei in a rinawm a. Mahse, hriatchian loh, vawikhat hmuhna lehnghala han inmawngzawm pui ngawt chu a pangngai loh thlak lutuk deuhin a hre bawk si.

Mahse, chu a thian thar chu a han en thin a. Mit a kham har ngiang mai si. Mipa a ni a, mipangngai ve lem tan chuan en loh ngawt theih ni bik hek lo. Puithiam thianghlim a ni bik lova, chu chu a kap lam rawn che talh tlah thin chuan a ti chiang thawkhat viau.

"Bawiha, min va dah riang rei ve." a rawn tih leh takah chuan Davida chu khum tlangah a han thu hnai ve a. A thiannu chuan pangchang zet hian a lo ban hiang hiang a. Davida chu a lo khi suk a, "I hmanhmawh a nihkha bawihte, ka pum a nuam lo deuh a. Zankhua a awm a lawm tikhan han muhahdam vang vang phawt teh." a ti a. A rilru chuan sawi tha a inti ngang mai.

Mahse, "Khawi ka bulah hian lo mu la ka lo chul dam ang che." a rawn tih ve leh tak khauh a vang chuan a dang chu a ni leh deuh ti tih ta mai. "Damdawi hi ka'n ei ang a a ziaawm mai ang." tiin thawh a han tum a. Mahse, a banah a lo man hman tlat mai. "I kal hmain ka thawmhnaw hi min phelh sak lawk rawh bawiha." a la rawn ti hram a.

Chuti nana na chu maw le ti rilru chung chuan "Aw le, i nalh hle mai bawihte." tih pahin a kekawr chu a han phelh tluantling sak a. A thiannu chuan "A vai hian aw." a lo ti ngher ngher chuan Davida thluak chu a tibuai mam mam kher mai. Engtinmah a chhang lova, muangchangin a sawi a piang chu a a phelhsak zel a. A tawpah chuan pakhat te mah thawmhnaw inbel a nei ta lo. "I damdawi chu va ei vat rawh." a rawn tih leh chuan Davida chu a phu deuh zawk a. "A, aw, nia aw le. Ka va ei ang e." a ti bah leh ta niai mai....

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 20th, 2016, 5:28 pm

episode-11

Davida chu bath room ah chuan a va lut leh ta ringawt mai a. "Hmeli mai mai chuh, engtia han tih tur chi nge maw i nih le aw!" a ti vang vang a. A mobile chu phawrhin hreh zet chuan a thianpa James-a chu a han call ta a. Mahse, a ring ral thak mai si.

Awm reng ringawt chu a thiannuin a ringhlel ang tih a hlau si, tih tur nei si lo chuan bath room ah chuan a tawi a tawi a. A tawpah chuan a chhuak leh ta nge nge a. A thiannu lah chuan "Bawiha min va han veh rei tawh deuh ve a, i pum chu enge an?" a lo ti chha chha a. Davida chuan "A ziaawm dawnin ka hria. A reh mai ang damdawi ka ei kha." a ti a.

"Lo mu la damdawi tha chi ka lo hlui ang che" tih pah chuan a lo ban leh ta hiang hiang mai a. Davida chu a rilru a buai leh ta. Chutih nak alaiin "I thawmhnaw kha i phelh dawn ngei ka phelhsak dawn che?" a la rawn ti zui. Davida tih ngaihna hre lo chuan "Ngawi rawh keiman ka'n phelh ang e. I tamchhawl tawh a ni maw?" a lo ti let ve chhap a.

Muangchangin a kawrkilh chu a phelh niap niap a. Chutih chhung zawng chuan a thianpa chu rawn thleng thut se hi a'n ti em em khawp a. Mahse, a thawm eih pawh a hre si lo. Ka bialnu chu ni la i rak i rak tawh dawn loh nen ti rilru nuah nuahin a bula hmeichhe saruak ngalngat a mu chu a han melh zawk a.

"Khawi, i muang lutuk ka lo pui ang che." a rawn ti a. "Aih ka zo tep e, muangchanga tih hi a romantic ka tia chuvang a lawm." a tih chuan hmeltha-i chuan a lo nuih sak a, a nui hur thiam kher mai lehnghal. A ni chuan muang lui fahran maia tlangval piantha tak mai han inphelh chu dawhthei leh nghakhlel takin a lo nghak fan fan a. A phur tawh takzet a ni.

Han muang lui viau thin mahse kawrkilh paruk vel lek phelh chhung chu minute tam ni thei hek lo, a rilru in chhuanlam tur a ngaihtuah vat vat a. A hre chhuak mai thei der si lo, sualna leh nawmna kotlangah chuan a dak reng tawh mai si a, minute tin chu khur chu a hnaih zel ni hian a hre si. A mangang takzet tawh a ni.

Chutah pakhat zawk inpeih tawh lutuk dawhtheihna chuan a tlin leh ta lo, "Bawiha i pa thei lo chu a ni em lo maw?" a rawn tih chuan Davida chu a nui hawk a. "Aw" tih mai a rilruk lai tak chuan "Khawi maw ka lo en chhin" tih leh rawn kuah thluk chu a rual ta mai. A pa zawng a lo pa thei nangiang mai, nulain a han dap fuh chuan "Wow!..bawih ka chanpual chu leh, a ei pawn ei dawn ila ka puar viau ang a." a rawn ri ta sar sar mai. A tawngkamah chuan a lungawiin a phur tawh tih a hriat nasa mai lehnghal a.

Davida chu a lo nui sak a. "Ngawi rawh light ka'n off ang e aw." a tih chuan "Thimah ka awm thiam lo. Bakah engah hian nuam ka ti zawk." a ti leh ta tlat mai. A hnuailam a mi zawk chuan Davida kekawr chu phelh tumin a zen thelh nawk nawk a. Chutah zet chuan pastor pawh ni bik lo tlangval hrisel Davida insum theihna chu a kiam duak duak mai

A kawnghren phelh chu an inchuh hi a ni ta ringawt mai, pakhati chuan Davida chu a kuai mu leh tawp a, chintawk awm lek lo hian a fawp ta ngawng ngawng a. Pakhat lahin a kekawr phelh pah tumin a lo leng awrh awrh bawk a. Chu hun meuh chuan khawvel nawmna a tichiang hle mai.

Chutih laiin James-a ve thung erawh chu zawhtein sazu a veh ang maia thawm dimin thimthama thiandun titi chu ngun takin a ngaithla kar thung a. Chutianga darkar chanve zet rem leh rem lova a thut din uut hnu chuan ami enthlakte chu an inthen ta. An kal liam ve leh James-a chu a rawn ding chhuak a, a kawng nat zia mai chu Davida kawng ni zawk se a ti kher mai.

A thianpa a ngaihtuah chhuah rual chuan a mobile a phawrh nghal a. Sms blank leh misscaled a lo awm tawh avang chuan hmanhmawh takin kawngpui lam pan chuan a let ta vang vang a. Kawngpui a chuan chhuah chuan motor vei vak leh Taxi takngial pawh a lo vang tawh kher mai.

A sana a han bih zauh a, darkhat a lo hnai ruak tawh mai tih a hriat chuan Taxi hmuh a inbeisei tawh lo. Hmanhmawh takin a thianpa lo nghahna hotel lam chu kein a pan ta vang vang a. Mahse, a vanneih a siamin thui a kal hmain Taxi rawn tlan a hmu ta hlauh mai a. An din duh pawh beisei em em lovin a lo phar a. Mahse, a ding ve mial mai.

A kal duhna a sawi chuan driver chuan "Ngawi rawh thianpa chu lamah chuan ka kal dawn lova, hei a tlai tawh sia haw ka lo tum tawh mek a ni." a ti a. James-a chuan Taxi a thut luh pah chuan "Khawngaihin thianpa, a pawimawh lutuk tlat. Pawisa chu i tih zat zat ka pe ang che." a tih chuan engmah sawi lovin an kal chu a ni ve leh ta mai a.

"Iva tlai ve thianpa, i duhkhawp te i hmu em?" Taxi driver in a tih chuan James-a chu a nui suk a. "zanin chu duhaiin ka hlawhtling in ka hria, nang zawk i hlawh hnem em?" tiin a han zawt let a. "Zanin chu KS pahnihin min bum khanglang a..." lungawi lo tih hriat tak hian a ti nuah nuah a.

A duhna zawnah chuan chhukin pawisa a pe fel a, hmanhmawh takin a thianpa lo nghahna room lam chu a pan ding nghal nal nal a. Room kawngkhar chu a lo inkhar phui lem loh a vangin kik pawh kik buai lem lo chuan kawngkhar chu a han hawng ta a. A thil hmuh a vang chuan James-a chu a ding chawt a.....

@Dwm Pachuau

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 20th, 2016, 5:28 pm

episode-12

"Khai a, zanin kan hna chu a va inang lo deuh ve. Hmmmm, tha tho e." ti nuah nuah chungin James-a chu a tawlh let zal zal a. Pawn bang ngheng chuan a ding nui var var a. Hetiang a nih rau rau chuan inhnuai lamah zial zuk zu leh law law lawk mai teh ang, manilo maha zuk chak tawh naklai a. Ti rilru niah niah chungin a kalsawn ta nghal a.

Hotel kawtah chuan zial a zuk fawp ta vang vang a. Tlawn khat a zuk zawh dawnah a mobile chu phawrhin a thianpa no chu a han dailled a, rei ngial a ring hnu chuan a thianpa aw ngei mai chuan tham chhal hian "Hallo" a rawn ti a.

James-a chu a khi suk a, "Hotel kawt ka rawn thleng chiah e, a rawn luh nghal mai theih em?" tiin a han zawt a. Davida chuan bah nak hian "Aw ih, theih englo theih e a, lo chho rawh." a rawn tih chuan James-a nuih chu a za ru hle mai a. Mahse, a insum hram hram a. Tichuan muangchangin room lam chu a pan chho tha leh ta a.

Room kawngkhar a thlen chuan a aw a han thian kharh a, tichuan muangchangin kawng chu a hawng ta a. A luh chuan Davida chu a lo inha fel hman chiah chiah a, a thiannu erawh chu blanket hian a lo inkhuh hlun mai a. A muhil nge a chatthla tih pawh hriat a ni lo, a ngawi hle hle mai. James-a chuan chinchang hre lo deuh hian "I hlawhtlin kha ka ring reng a ni. Hei ava in hnem awm ve kaihthawh a huphurhawm em?" a han ti a. Davida chuan a thianpa mitmeng leh che vel a hmuh chuan engkim a hrethiam a ni tih a hre nghal vek.

"A la muhil nghet lovang ka'n kaitho ang e." tih pahin khuma nula mu ngawireng chu a sawi nawk nawk a. James-a chuan "Tikhan lo kaitho la ka'n inthiar lawk ang e." tiin bath room lam a pansan nghal a. A rei mawi tawk bath room a a awm hnu chuan a rawn chhuak leh a. A rawn chhuah leh chuan hmelthai pawh chu a lo inha fel ve hman hram a.

Chu hmeichhiain James-a hmel a hmuh chuan a meng thip ram ram kher mai. "Helaiah hian engti tura lo kal nge i nih?" a han ti ram hmak a. James-a chuan nula pawh en lem lo chuan "Party turin." a lo ti mai a. Room kawngkhar chu ngawi rengin a va khar a, chhung lamah a kalh nghal hmiah a.

James-a awmdan chu mak a tiin a hrethiam lo kher mai. Davida nen chuan a en tawn zak zak a. "hey, bawiha hepa hi i hriat zawng em ni? Engvanga helaia rawn tel ve ringawt nge a nih a?" a han ti khang khang a. Davida chuan "Aw, ka thianpa a nih hi." a lo ti mai a.

"Eng a? Hei hi i thianpa maw? Engtinnge hetah hian a lo awm ve ngawt theih? Engnge awmzia?" tiin Davida chu a zawt sek sek a. Davida chuan "Ka ko a, heta lo kal tur hian." a lo ti sam leh et mai. "Engvangin maw? Ka chungah hian enge tih in tum a? A rawn ang zawng hi chu ka duh miah lo a nia aw. A nih loh chuan pawisa a let min pek belh a ngai ang." a ti chhum hmak hmak a.

James-a chu a nui hak a, "En teh thiannu, pawisa pek belh lam a ni lo ka rawn kal chhan chu, tualthah thil a ni zawk. Thu tlem zawh che kan duh a, thudik taka min chhan chuan a pek pawh kan la pekbelh mahna che le." a tih chuan nula chu a hawi a hau mai.

"Tualthah thu a? I thusawi awmzia chu pakhat mah ka hre lo. Nangni pahnih hian min bumin thanga min awhtir in tum a ni maw? Police ka ko dawn." tih leh thawh a tum nghal uaih a. A thawh tum zawng chuan chhuatah a kekawrte a rawn tla ta mai. A ha emaw a tih kha a lo ha tel reng reng lo chu niin.

Amah pawh chu a ding chat a, rang taka chhar pahin "Min pawngsual in tum a nih hi." a han ti tawng mai a. James-a chuan "Underpant ha lo pawh nila ngun taka i lo ngaihthlak theih tho ka ring e. A nih loha huaikawm bawl i tum anih chuan inchhir tur pawh i awm miah lovang." tiin a han vaukhan a.

James-a thusawi chuan a rap kher mai. A sawitu hmel chu a han en thin a, a ti mai mai lo tih a chiang nasa mai si. "Ka hnen atang hian enge in beisei?" a sawi zawm leh hma chuan James-a chuan "Thudik." a lo tihkhalh a.

"Vaivakawn nula Jane-i thih zan khan khawiahnge i awm?" a han ti tawl mai a. Chu nula chu a mengphawk nasa kher mai. "Eng a? Eng thu nge maw i sawi le?" a lo ti let haw a. James-a chuan "Zawhna ngai zawh nawn tlut tlut hi ka tihdan a ni ve lem lo." a lo chi chang fak a.

Hmelthai chuan "I sawi nu chu ka hre ngai lo hrim hrim, tutenge in nih reng reng?" tiin a lo zawt let a. James-a chuan zawi leh fiah tak si hian "Zawhna chu keiman ka zawt ang, nangin a chhanna i pe thung ang." a lo tih leh chuan "I duh duh chu min zawt rawh, engmah sawi tur ka nei lo hul hual." a lo ti leh hmak a.

James-a chu a nui suk a. "Chutiang zawng chuan maw kan indawr ang? A nih chuan heti hian ti teh ang. Haw la keini pawh kan hawng ang. Naktuk khawvar rualin he ka video neih hi ka release ang a, chuan nang chu celeb i ni nghal mai." a han ti a.

Nula thinrim chuan "Chutin min black mail tum ve khanglang lo mai rawh, eng video mah Pathian hmingin ka nei lo tih ka hrilh ang che." a ti sak sak a. James-a chuan a mobile chu muangchang hian a han phawrh a. A phone chu a han thai zauh zauh a, "He nula, PWD Minister huan thlama tal hiar ve tak hi i nih loh chuan a lawmawm a ni mai a lawm." a tih meuh chuan.....

@Dwm Pachuau

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)