HOWLING WOLF BY Sangtea Jüffötë Renthlei

Hnuchhuina lampang chi ho
Ngaia
Site Admin
Posts: 25813
Joined: April 30th, 2016, 4:07 pm

Re: HOWLING WOLF BY Sangtea Jüffötë Renthlei

Unread post by Ngaia » December 24th, 2016, 10:02 am

Raymonda bike chahbi chu la in kan inlam chu ka pan ta a...ka rilru chuan kan thil tihlai mek chu ka ngaihtuah zui a" Ar khawthim dai" an sawi ang mai ani..kan rin dai leh dawn chu ani si a....hnuchhui a kan inzui tawhna zawng zawngah risk kan lak nasat ber na tur ani..
Zing nichhuakin ka hmai a chhun en uarh avang chuan ka harh phah a..ka harh rual rual chuan nizan lam a ka mumang kha ka rilru ah a lo lang nghal uarh a..ka mumangah kha chuan beidawngin kan hnuchhui lai pawh kan lo tawp daih kha ani a..ka rilru ah a awm nghal rauh rauh a,mahse Raymonda han hrilh ila chuan ho ati kher pek ang chu..

Vawiin lam a kan tih tur chuan ka rilru a luah leh thuai a..kumkhat zet a hmel pawh kan hmuh tawh loh..kha nu huaisar zet kha kan bel hnai leh dawn chu ani a...ka chak hran lo khawp mai..tun tumah phei chuan rinchhan tur awm miah lo in kan va hnaih leh dawn ani a..kan rinhleh chhan lah chu kum khat liam ta a "Phuba ka la ang" ti a alo sawi tawh kha kan va umzui dawn ani a...eng tak va ang ang i maw?


Vawitam kan zawh tawh kawngah ngei chuan kan in phur liam leh ta...Robina te inkawng chu kan zawh leh ta a..kan tlan mek lai chuan he misual avang a kan buai thui tawhzia ka chhut let neuh neuh a...Burma ramah nunna hial thapin kan kal phah a,ka hmangaih Rami lah ka chan phah tep bawk a...kan man sa Robina a tlanchhuah phah a,kan buailohna tur ah kan buai phah chiam a..tun tumah hian a lo inrawlh leh anih ngai chuan hemite chhung hi chi mih thak tlak an ni in ka hre hial tawh a..

Robina te inlam chu kan pan zel a...hman a Lalhmahruaia nula lemchang thiam (SHE IS?? Kha en let ila) kan chan tum a kan dahna ngai bawkah chuan kan ding leh chat a....car atang chuan kan chhuk sang sang a....

Raymonda chuan "ruahmanna felfai tak chu neih a har khawp mai..,.mahse direct attack chu a tha ber lo ang.." a ti a..

"Direct attack chu enge ni phiangsen a?" ka tawng hriat loh lam hi chu ka ngaina hauh lo mai..

"Han luh rawih chu a tha ber lo ang..heng lai hmun velah hian chinchang han zawt fiah phawt ila.."

"Eng ber chu nge kan zawh ang a?" ka lo ti leh kher a...

"An chanchin chin hrim hrim kan hriat belh ve ang chu mawle..an chet vel dan hrim hrim pawh..chuan helai hmun hi kan belhchian ve a,kan tal hnum ve deuh angai ani.."

"He in pawn atang hian a chhung lam hi eng angin nge kan han hriat theih ang le.."chimawm deuh takin ka han ti deuh kher a...

"Val..hmanhmawh tak a tlanching te hi chu an in chhuih palh nge nge thin ania..muangchang a kal dem dem hi a that zawk chang a awm ania" a lo ti dam thlup a..

"A ni maw? Pu Hrekim..i duh ang thlapin le" ka han ti ve leh hram a...He in kan enthlak lai a cigarette ka lei tawhna dawrte lam chu kan han pan leh ta phawt a...


"Ka pi...i dawrah kan lo leng lawk ange aw..mi nghah kan duh a....cigarette leh kuhva te pawh kan lei duh pah a.."Raymonda chuan a han ti dam duam a..

Dawr nghaktu pitarte chuan " Aw le..lokal rawh u..lo leng rawh u khai..tute nge in nghah duh a"nelawm reuh takin a lo ti a...

Dawrah chuan kan inzui lut ta a..Raymonda chu a ti ti luam a....engengemaw pitar sawi duhzawng tak eng eng emaw a sawi pui kual a...detective hna hi zawng amaksak thin ania..a chang chuan huaisen leh rorum takin kan che a,a chang leh tlawm leh nem em em in mi kan kawm leh thung a...

Raymonda chuan " Ka pi..helai in chu ava nalh reuh ve..hei tu in nge ni a?" tih pahin min rawn melh kher a....kan tum tak lam hawi chuan titi chu a han her kual a.

Pitarte chuan "Tunhma kha chuan Pu Zidinga in ani thin a..mahse tunah chuan midangin an lei tawh ani ang...anih loh pawn an luah tawh ani ang..Pi Rini kha ka hmu tawh ngai hauh lo a." a han ti a...

"Pi Rini..chu Robina nu kha maw?"

"Aw..Robina nu kha mawle..Robina kha i hria ani maw?"

"Aw..kan inhre ve thuak a..chiangkuang phei chuan ka hre lo...an insawn tawh i ti ami?"

"Aw..ahh...e..tak a..vawikhat dawr a pi rini'n thil a rawn lei khan an pa kha an transfer dawn a...an insawn dawn thu a sawi tak e" pitarte chuan a ti ve leh a..


Beidawnna lamtluang bawk kan zawh leh ta...Kan mi rinhlelh ber chu Aizawlah alo awm ve reng reng lo anih chu...beisei beitham tak chu kan la beisei ve thei ang..zanah Aizawl khawpui fan kual a,kha nula kha kan hmuh palh hlauh anih chuan..chu lo ah kan manager a khan mi pa 2 te kha alo hmu hlauh anih chuan..mahse chungte chu beiseina beidawnthlak mai an ni..
Beidawnna inthla a zar hlim durh a...chumi hlim hnuaiah chuan keini pathum kan awm thung.. Car a kan inzui luh leh laite chuan sawi tur hria reng reng kan awm lo..Raymonda phone ri rawng rawng pawh chu a ring kher mai...Raymonda lah chuan lak pawh tum lo in a hmalam chu a en ngar thung a.. Janeti chuan Raymonda phone chu ala a....reilote a biak lawk hnu chuan "Kha..Ramtea " tih pahin Raymonda chu a pe leh thuai a.. "Hello.." "Aw Raymond..i tha maw?" "Aw tha ani mai e."Raymonda chuan a ti tawi tak a. "Tunah hian min puih ka ngai dawn ani...." "Puih maw? Ka chung a thil titu kha kan buaipui mek a" "Ka ring alawm..mahse min puih ngei angai ani....khami i buaina lak atang a la chhuak tur khan dan phal bak ka kal a..chuvang chuan kan hotute lak ah ka tla tlum lo khawp mai..chuan i tan pawh a pawi thei dawn a...chuvang chuan Mizoram Police te beidawnna case khirhkhan tak chhui turin ka duh che...he case hi i chingfel thei anih chuan ka tan leh i tan a tha ang..thian kan nih angin ka ngen che ani" Ramtea chuan a rawn ti a.. Raymonda chu a ngawi vang vang a..."Midang chu ni la eng ang dinhmunah pawh dingla,ka kawng zawh lai atang hian ka peng hauh lo ang..mahse thiantha kan nih vang chauhin..." a ti a a ngawi leh daih a.. Ramtea chuan "..Ka ring reng ani..thian tha chu i ni e..tunah i hman chuan lokal nghal rawh...Stationah ka awm a..ka lo beisei ang che" a rawn ti a..phone a dah zui nghal a...Raymonda chuan a lu a thing nar nar a.."Hrep tak hian" a ti sup a,car chu a herh kual pawp a..Kulikawn Police station lam chu kan pan thla leh ta zawk a.. Hun reilote kan tlan hnu chuan Police Station chu kan thleng thuai a...step ah chuan kan inzui chho a...Ramtea office lam chu kan pan phei a.. Ramtea chuan min lo hmu thuai a.."In pathum bawkin maw...lokal rawh u..." alo ti a,thutna min lo kawh hmuh a.. Minute 5 vel kan thut hnu chuan "In case khawih tur hi?" "'In' maw? I tel ve dawn lo em ni?" ka lo ti ve thuai a.. "Aw..tello lo ang..kan sawi tawh ang khan raymonda lock up atang a kan lak chhuah ngawt chungchangah khan kan hotute beng ka ti thlep deuh a..chuvang chuan ka inrawlh loh hi a finthlak dawn in ka hria..chuan nangni hian in chingfel thei anih chuan kan hotute lakah hming thatna ka chang let thei ang a....chuan in duh anih chuan Police Department siam thar Investigating Team ah in lut nghal thei bawk ang" Ramtea chuan a ti a.. Raymonda chuan "kan case tur chu.." alo ti ve thung a. Ramtea chuan thlalak 10 vel lai tur hi a rawn la chhuak a.."Thlalak kha en ula..Lunglei nula Miriam Lalhruaizeli anih kha...phaia School kal lai ani a...karhnih vel lek chawlin a rawn haw a,..ni 3 chiah lungleiah a awm hman tih in khatiang khan a roomah thi a chhar ani" a ti a.. Thlalak chu kan han en hlawm a...a rapawm hle hlawm a..kan nula i ruang chu khum bulah a mu a..a hrawk chu chemte hriam tawk tak a zai ani tih hriat takin inches 3 vel zet a zau hian a thler huai a...thisen in a bual nasa hle a..a thawhnaw pawh duhtawk a sawisak hrep hnu tih hriat tak hian a tet nual a...thlalak dang lehah chuan a dul leh a nak velah chuan vawi 7 vel lai a vit ani tih a hriat theih a.... Raymonda chuan "Thinur tawpkhawk in hrik thlakna emaw misual tawrawt tak sulhnu ani maw" a ti sup a. Ramtea chuan "Kha zawng aia la rapthlak zawk chu hei hi ani" tihpahin thlalak a rawn phawrh a...chu zet chu rapthlak tak ani..en a nuam lo kher mai..hurherhna lam vang anih ngei ka ring nghet nghal hmiah...kan nula-i hmeichhiatna lai tak chu hmuh tlak awmlo khawp a sawisak ani a...

Ramtea chuan "Mahse khatiang ang kha ni mahse he nula taksa ah hian mipat hmeichhiatna lam hawi chetna han chhinchhiah theih leh hmuh tur engmah a awm lo...." a rawnti leh a. Raymonda chuan "kawnghnih a kawk thei mai thei,phuba lakna lamhawi emaw suahsual hurherhna lam hawi ani ngei ang" a lo ti a.. "Ani mai thei....naktuk atangin in tan theih chuan..mahse he case hi a khirh hle ania..Lunglei lam Police te pawh an beidawng thak tawh ani a..Aizawl lam atang a Police team tha ber pawh tirh phei an ni tawh a,mahse eng ruai an va ang thei chuang lo..." "Naktukah Lungleiah chuan kan kal ang" Raymonda chuan a lo ti a.. Hna khirh tak pakhat kalsanin hnakhirh zawk ah..
Ka bag ah chuan ka thawmhnaw a khung mawlh mawlh e...Kan hna tul avang a kan buai em avangin a bulah pawh ka awm hman si lo a...vawiinah Lunglei lam kan pan dawn si a...a lokal tak tak pawh ring ngam chuang lo in ka sawm fiam a...mahse Rami chu a lo kal tak tak a,ka lawmna chuan ban chu a pel zak zak ani... Khumah chuan zawi hmel zetin ka mu reng a..."Khai le..ka siam zo e..tho rawh le..." "Ka kal peih lo e" ka ti nang nang a.. "Tho mai teh..in va hlawhtlin chuan Police ah in luh theih dawn kha..tha takin va chet tum ula ani mai" tih pahin Rami chuan min rawn pawt tho a.. Rami chu ka kuah a lungchim takin ka fawp vawng vawng a..chutihlai chuan kan kawtah chuan motor horn a ri thawt thawt a...Raymonda te an ni tih ka hre thei nghal a.. Rami nen chuan kan inzui chhuak a,kan in mangtha fel hnu chuan Aizawl chu chhuahsanin Lunglei lam chu kan pan phei ta a....Aibawk tlanpelin Sateek khaw hnuai kawngah chuan kan tlanphei zel a.... Pukpui kan tlanthlen meuh chuan kan hman hmawh lem lo bawk a...tlai dar 3 alo ri der tawh a.. "Serkawnah min lo hmuaktu an awm dawn a..khuallian thlenin kan thleng dawn anih chu.."Raymonda chuan nui hak pah hian a ti a. Boruak dang kan tem tan ta deuh bawk a,Raymonda pawh a tawngkam leh a hmel pawh a zangkhai deuhin a hriat a.. "In la puithu takin awm ila..nui thaw loh tur aw Janet" ka ti let ve thung a, "Ka tih than alawm....puithu taka awm hi a nuam alawm" nui var var chungin alo ti ve bawk a.. Baptist hospital Serkawn kawt kawng pengthuamah chuan Police motor a lo ding vang a...Raymonda chuan motor horn a chu a tiri zauh a...
Motor bulah chuan reilote kan ding lawk a...Police Station lamah kan in report ve phawt angai dawn anih hmel e..Police motor chu a tlan hmasa a kan inzui a,kikawn leh Bazar Veng kan tlanphei mek lai chuan sikul naupang te pawh an rawn bang ve tan thliai thliai hlawm a.. Venglai traffic point bul a,Police Station lampan chuan kan tlan zel a....kan hma a motor tlan chu a ding a....keini pawh kan ding ve nghal a...motor atang a lo chhuk Police pali te chu an lo chhuk a... "Lokal rawh u..kan thleng e."pakhat chuan a rawn ti a....kan inzui chhuak ta a....



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 24th, 2016, 10:02 am

Vawiin lam ka chauh deuh vang em maw ni..ka chaw eikham chu khumah chuan ka lo muhil hman ti tih a.."Ka pu..tho rawh le.."tihpahin Raymonda chuan min rawn beng lawlh a... Ka tho thuai a...kan thlenna hotel tukverhah chuan ka dak zuai a...ka hmai phih turin bathroom lam ka pan leh ta a.. Hna thar thawk tur chuan kan kal ta a.. Miriam Lalhruaizeli te inlam chu kan pan ta a....Lunglei Chandmari lam pan chuan kan tlan chhuak ta a...hospital tlan pelin kawng pengah chuan kan tlanchhuk a..reilote kan tlanhnu chuan Raymonda chuan car chu a ti ding chat a..."Khu inkhu anih khu.." tih pahin kawngkawi thlen hma lawk a in lian ve tawk tak ding luah chu a kawk a..chung zawng zawngte chu engtinnge a lo hriat hman bik pawh ka hre lo e a... Raymonda vek chuan "Kan police te khan an lo hrilh tawh em ang chu maw..khai le..kal ang aw." a ti a..Miriami-te in lam chu kan pan thla ta a.. Raymonda chuan kawngkhar chu a kik kauh kauh....door bell hmet lo a,han kik kher chu..mahse atha ati zawk ani ang. Vawi 2 vawi thum a kik hnu chuan kawngkhar chu a rawn in hawng a..nu la valai ang reng tak hian a rawn hawng a...tap zo hlim hmel a pu in ka hria...tawng lo in min en vang vang a.."Nangmahni hi em ni?"a ti nghal ngawt a..Raymonda chuan "Aw ni e..kan lo lut thei angem?" a ti a...inchhung ah chuan kan inzui lut ta a..

Raymonda chuan"Miriami nu i ni ang tiro? Khawiah nge in pa hi" ati nghal zung zung a..

"Aw ni e..kan pa chu hospitalah a duty a.."

"Anih tak chu..a pawimawh lutuk chuang lo e...Miriami room chu han en ve chhin kan va duh ve aw?"

"Aw le...lokal rawh u" tihpahin Miriami nu chu a kal nghal a..kan zui ve nghal bawk a...

An inchhung han en chuan an khawsak chu a hniam hauh lo tih a hriat theih a..Miriami room chu inchung zawl a inte a room hran an siam leh ang hi ani a...in te han ti ila pahmeipa-in duhtawk a luah tham erawh chu ani ngei ang...

"Engmah kan la dah fel lo,Police ho in lo khawihsawn lo turin min ti a" Miriami nu chuan a ti a..kawngkhar chu a hawng a..
Miriami nu chu a tap rawih rawih a...Raymonda chuan "Ka pi..i tan hmuh a hrehawm dawn e mai,lo zuk chhuk thla mai la" a ti dam thlup a...

Miriami nu chuan Raymonda thusawi chu a pawm ani tih hriat takin a bu nghat a,in hnuailamah min chhuk san ta a....

Raymonda chu roomah chuan a pen lut hmasa ber a...a ding chat a.."Khai aw.." a ti muang chat a....room chhung ka va lut ve chiah a,Raymonda thil hmuh chu ka va hmu ve nghal a...Miriami room chu thisen in a bual ti ila kan uar deuh ngei ang a..mahse chhuat leh khum a bedsheet leh blanket chu thisen khawro tawh in a khawn uaih a...bangah chuan thisen chik in a phuhna ni awm takin a sen tiar tuarh bawk a....miriami nu tan kha chuan han tah loh chi rual alo ni lo e..Raymonda chuan "Miriami pa kha doctor ni in thil engkim hrethiam a,fing tak a che in miriami roomah hian mi dang luh tir lo in amah in ruang kha a senghawi ngat a..chu chuan hnuchhuina a pui tu tur thil tam tak a hum him ngei ang..i han bel chiang ang u hmiang" a ti a...

Room chhungah chuan thawmhnaw leh bungrua engengemaw a tla darh niai nuai a,.chung bungrua leh thawmhnaw te pawh thisen chuan a char khawn iah uaih hlawm a.....khum khuhna(bedsheet) pawh chhuatah chuan tawm nuai in a tla bawk a...

Raymonda chuan "Val..han en ve chhin teh...." tih pahin mattress khum a in phah chu a kawk a.....mattress la thar that hmel ver vawr tak chu a lai vel takah chuan a thil engemaw bil deuh tak a tih teh niawm tak hian phuai deuh fup hian a inches 3 vel in hmun hnih fit khat vel a in hlat ah a thler thla raih a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 24th, 2016, 10:02 am

"Kan nula-i hi a mutthilh lai emaw a khawih chu ani lo tawp mai a...a chung a thil thleng hi a hre vek ani.,..chuan a thattu pawh hian tha hrui a ngah hle ani."

"Engtinnge i hriat a?"

"En teh..hei mattress hi en la...a thar anih hi...chuan kan nula-i hi a khai khupin a mu a...chuan tualthattu hian khum mawng atangin a ke ah a pawt a..nula chu a tang ve nasa hle a....bedsheet hi a pawt a,mahse a tawlh thla thuai si a,mattress ah hian nghet takin a pawt a..mahse a ke lam a pawt tu hian a hneh em avangin a pawt thla ta tho a,chuan thih tha meuh a a tan avangin mattress pawh hi a pawt thler a nih hi..."

Raymonda chuan " E khai..kan tualthattu hian a dim lo kher mai a..khum tlang hi han en teh...thisen a kai tuar mai a..khum atang a a pawh thlak zawng hian khum tlangah kan nula-i hi a insawh na thawkhat hle anih dawn hi" a ti leh a....

"Mahse kan nula-i hian thawm a chhuah miah lo em maw ni le..au ta se thenawm khawveng te pawh hian an hre ngei awm si a.."

"Vawihnih khat te chu a au hman mai thei..mahse khum tlangah hian a zuk insawh na hle anih chuan a au zui thei lo pawh ani mai thei bawk...." Raymonda chuan a lo ti leh a..

"Ka rindan chuan kan nula-i hian a room a lo lut thawm hi a hre kher lo ang" Janeti chuan a rawn ti a..Janeti dinna lam chu ka va en a...headphone senno chu alo keng kang va a..

"Raymonda sawi ang khan khumah hian a bawkkhup a,chuan mu chungin computer a khawih a,headphone ah hla angai thla bawk a..".a lo tih zawm ve zat a..

Raymonda chuan "Kan Police ho te hian an lo dai kual ve thluah si a...hetiang ang hunah hi chuan pheikhawk hniak pakhat lek pawh a pawimawh tawh thin asin mawle..." a ti nuah nuah a...

"Khawi atang hian nge a rawn luh ang aw..." ka lo ti ve thung a....



Raymonda chuan "Kawngka pangngai atang hian a lut ani ngei ang....a chhan chu tukverh ah hian bar a in vuah vek si a..khawi maw pawnlam hi i han enfiah chhin teh ang chhung lamah chuan eng ruai kan ang lo ang a.."tih pahin pawnlam pan in a chhuak a..

Keipawn ka zui chhuak ve nghal a...Raymonda chuan Miriami room chu muangchangin a kal hual a......Miriamite in hi a bula indang awmve te ai chuan chhawng khat vel in a sang zawk a...inhnuai atanga luh chhoh anih loh chuan han luh rukna tur ang chi chu a awm lo ang reng hle mai a....

Raymonda chuan "Val..lokal teh.....helai hi thil ka hmu e" a rawn ti a..

Min auhna lam Miriami room sir dinglam chu ka va pan phei a...Raymonda chuan hnuai lam chu uluk fe in a lo bih ngar ngar a..
Raymonda chu a thu hniam a..torch light te takte a ken chuan a han en a."En teh he lai hi...he pindan a,an lo luh dan hi min hrilh thei dawn in ka hria" tih pahin inchung kual pup a inhung kual hnuai lam chu a kawk a..fit khat vel a inhlat a cement bang rang deuh rak chu ka hmu thei a..

"Kha khan enge awmzia aneih" ka ti let he haw a..

"Hemi ringawt hi chuan awmzia a nei thui lutuk lo mai thei..mahse khulai inchung zawl a thir leihlawn sei deuh nen khawn i suihzawm erawh chuan awmze thui tak a nei ngei ang"

"Anih chuan leihlawn hmang khuan an lawn i tihna ani maw?"

"Ni chiang e....zanrei tawh takah ani ngei ang chu" a tih zawm leh zat a...

Janeti chuan room chhung atang chuan "Heta hi engemaw ni ka hmu e..lokal teh u" a rawn ti a...

Kan va luh chuan Janeti chuan miriami room tukverh a parda in zar phen bar an vuah a kut a nemna thla chu a lo en reng a...Raymonda chu tawng hmasa zawk a tangin "Kan misual nemna hnu ni in i hria ani maw?" a ti a.

Janeti chuan "Aw ni e..han en chiang la...tlem a hnuai deuh hlek a thisen kai leh hi..a lan dan chuan kan misual hian nula-i hi he tah hian a rek bet ani..chuan nula pawh hi a thi mai lo ni in alang"tih pahin tukverh sir tawn tawn a kut in a khawihna hnu tih hriat tak a thisen kai phai ruak chu a han kawk a.....



Kei chuan "Kan nula-i hi a au miah lo em maw ni le...vau bet pawh ni tehreng se hetiang khawp a a sawisak hnu chuan tanpuitu chu a auh ngei a rinawm tlat ani" ka lo ti ve leh a..

"Nichìn a ka sawi tawh ang khan khum atang a, a tlakna lamah a insawhna viau pawh ani thei a..tin au theilo tur in an siam pawh ani mai thei bawk.."

"'AN' I ti em ni?" ka lo ti vat a..

"Ka rindan mai ani e..chuan kan misual hi pa te takte chu ani hauh in ka ring lo..en teh a kut a anem na hi nang chuan i han ban pha tawk ang chu (a nui kher a)..khulai inchung zawl kha ka zuk belchiang dawn ania...." tihpahin inhnuai lam chu a pan thla a,..

Pawnah chhuakin bathlar atang chuan Raymonda chevel chu hmuh tumin ka dak a..reiloteah Raymonda chu inchung zawlah chuan a rawn chhuak chho thuai a....

Min rawn hmu ani tih hriat takin a rawn vai zauh a...chulai hmun chu uluk takin a en zui nghal a..engemaw a chhar zauh a,a ak lai chu ka zuk hmu thei a..Janeti'n min rawn koh avang chuan inchhung lamah chuan ka lut ve leh ta a...

Janeti chuan lehkhabu bawm a lehkha inrem tlar thut hnuai lam a,lehkhabu hlui indahkhawm ho chu a lo en mek a..."Heng lehkhabu te hi Miriami College kal hnu a a lehkhabu te an ni hlawm a...han belchiang chhin ang hmiang" a lo ti vat a


Lehkhabu awmah te chuan saptawng hlir in a inziak a..ka hmuh leh ka hriatthiam ve zawng chu Miriami kutziak chu a nalhin a felfai thlep thlawp hle tih mai loh chu engdang mah ka hrethiam ve lo..

Janeti chuan "Miriami pawh hi hmeichhe dang tamtak ang tho in hmangaihna lamah chuan a duai vak bik lo anih hi..khai aw a diary hi i han phawrh teh ang"hunger yes i am a hunger, hunger for your touch...touch me darling,no dont just touch me,kiss me darling just like a candy....ekhai.....kan nula-i hi rinai in a pui phian mai thei....lay with me dear..makes my world sweet and warm..hold me tight..i wanna feel your heart beat...."

"Chu chuan enge awmzia a neih a..?" ka lo ti ve thung a.

"Duhtak,ka bulah hian lo mu la..ka khawvel hi han siam nuam teh...tih ang vel ani"a tih lai chuan Raymonda chu a rawn lut ve leh chiah a....

Janeti bawk chuan "Hetiang ang tawngkam hmang tur hi chuan thuk tak a inzawmpui a neih ngei ka ring ani..."

"Bialpa tuemaw a nei i tihna ami"

"Aw ka ring ani"Janeti chuan a lo ti ve vat a..
Raymonda chuan "Kan nula-i nun chu a lo tha vak lo pawh ani mai thei e..mahse kan hna zawk chu amah thattu zawn hi a ni si a.."nui huk huk chungin a ti a.

Kei chuan "A chanchin kan hriat ìan kawng tam takin min pui thei alawm" ka lo ti ve khauh a..

"Ka sawi ni zawk awm tak ani" nui then thaw chungin Raymonda chuan a lo ti leh a..he mi chimawm lian a tak hi chu aw..




Janeti chuan a lehkhabu ken lai chu en chungin "Heta hi thil dang deuh a awm..lo ngaithla rawh u...'Mate..ka hmangaih che...khawvel awm leh tur thleng pawn ka hmangaih ang che"

Kei chuan "Luanliamna lam thu bawk maw? Kan nula-i hi a luangliam thin hle anih dawn hi" nui hak chungin ka lo ti a.

Raymonda chuan "Nangmah ang chiahin" a lo ti vei nulh a..ka chhan hma chuan Janeti chuan " Lo fiamthu chhen suh u...hemi thuziaktu hi chu midang daih ani mai thei..han en ve chhin teh"tih pahin Raymonda chu a pe a..

"A mipa hawrawp hre hraw hle mai a....ni 20.2.2013..a a ziah a ni a...chu chu nikum february thla tihna anih chu...kumkhat kal ta a ziah a nih chu" Raymonda chuan a ti a..amah vek chuan

"Miriami hian computer chu a nei tih a hriat theih a,mahse a roomah hian a awm si lo a...han en sak a chakawm hle mai a...engpawh nise kan chhuk thla phawt dawn em ni ang" a ti a.

Room chu kan chuah san a,inhnuai lamah chuan kan chhuk thla ta a..Miriami nu chuan thingpui in tur a min sawm tlat avang chuan thingpui in tur chuan kan thu leh ta rih a...

Raymonda chuan "Ka pi..Miriami ruang thlalak kha in nei em?" tiin a han zawt a.

"Aw..kawl ang..mahse pakhat mah ka la en lo..en pawh ka duh hek lo..a tangkai tur a an rin chu Police ho in an la then tawh a..a dang chu wardrope ah kan dah a..in enduh chuan kan la dawn em ni?"

"Aw,i phal chuan kan lo en ve ang chu...." tiin Raymonda chuan a lo chhang let thuai a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 24th, 2016, 10:03 am

Miriami nu (Pi Siami) chu a tho a..room lamah chuan a lut a..minute 2 hnu velah chuan a lo chhuak leh a,a kut dinglam chuan album a rawn keng chhuak a...

Raymonda chu pek pahin "A rapthlak em mai..mami thih dan hi..khawngaih takin thìlsual ti tute chu han man chhuak hram teh u." a ti tham chhelh a,a aw atang chuan a tap tep ani tih a hriat theih a..

Raymonda chuan "Ni e,ka pi theihtawp kan chhuah dawn alawm..."tih pahin album chu a han keu a..."Thlalak hi kan la chhuak ange aw..enchian deuh te pawh ka duh a..

Pi Siami chuan "In duh ang in ti rawh u....keini chuan tih ngaihna kan hre lo,nangni in tha intih ang khan ti ula" a ti bah niai a.

Raymonda chuan chhang tawh lemlo in thlalak chu a mal te te in a phawrh a,...a enzawh a piang chu min rawn pe phei zel a,kei in ka en zawh apiang Janeti ka lo pe chhawng ve zel a..

Rapthlak tih zawng zawng hi a awm kim ni berin ka hria....Miriami ruang chu an khawihsawn hma chuan a saisir zawng in a mu ani tih thlalak atang chuan a hriat theih a,thìsen tam tawk a hrawk chemte zaina hnu atang a lo luang chhuak dul mai leh...a kawng a chìn hnuai lam chuan thawmhnaw mumal a ha lo a..,chhungkhat laina leh amah hmangaihtute tan chuan han en ngam chì rual ani lo...kei mit ngei a hmutu pawh ìan ka hmuh ang zawng zawng chu ka ziak chhuak vek ngam lo ani ber zawk e...


Thlalak zawng zawng chu amal te te a kan en chhuah vek hnu chuan Raymonda chuan thlalak pahnih chu a dah hrang a..

Album a thlalak Raymonda lak hran tih loh kan thun kim leh hnu chuan Raymonda chuan " Anih leh ka pi..kan haw phei ange aw,.kan la rawn kal leh dawn a,in pa pawh kawm kan duh ve hrim hrim a..lo thlaphang lo ula...in fanu chung a kutthlak tu chu kan man chhuah ngei lo beisei ula.." tiin Pi Siami chu a thlah a..Miriami te in chu kan chhuahsan ta a,,

Car a kan luh hnu chuan kan thlenna hotel lam pan chuan kan tlanchhuak zui nghal a.

Raymonda chu enghleh nei awm lo fe hian a faifuk hlawrh hlawrh a,fiamthu fahrah te te ka nuih pawh tiza ve tham lo te te a chhak chhuak ve chhen a...chung a thusawite chu beng a rawng a khung lo in ka duh tak Rami ka ngaihtuah san daih a.

Rei pawh kan tlan lo..kan thlenna Hotel chu kan thleng thuai a....vawiin lam kan tlanna kawng a thui bawk nen thutthlengah chuan ka mu nghal hnawk a..

Raymonda chuan "Pu-a zanin kan hnathawh chu enge ang i tih?" fiamthu chimawm bawk a rawn chhak chhuak leh a..

"Beidawn thlak...." ka lo ti bul hmuk a..

"Ngatimaw?"

"Kan thil hmuh zawng zawngah khan engmah han chhui zui tur thil a awm lo..." ka ti leh a.

"A awm mai thei asin,he thlalak hi han en la" tih pahin ka hma ah chuan thlalak pahnih a lak hran te chu a rawn theh thla a.
Thlalak pahnih te chu ngunthluk fe in ka han bih a...hnai deuh zawk a, Miriami ruang a awm chin chunglam thlalak ve ve ani tih bak chu thisen tam tak ka hmu leh a..chu chu ani mai...

"Thlalak dang aia a danglamna bik ka hre lo e a" ka ti bul hmuk ringawt a,..Raymonda chuan " thil langsar tak a awm te ai chuan langsar tak phen a,engemaw inthup hian awmzia a nei zawk fo thin ani..." tih pahin thlalak pakhat chu a rawn la a..



Miriami khan thawm a chhuah loh chhanah khan i buai hle tiraw? Han en chiang deuh la.....miriami ka zawn phei a beng zawng phei zel hi han en phei la....thisen rawn luang thla hi en teh..a pan bik a..a lang sen deuh zawk bawk.,hmun dang ami kha chu thisen luang khoro tawh chungah thisen dang a luan leh avangin a duk deuh nghulh bik hi..." a tih lai chuan "chu chuan enge awmzia a neih a?" ka lo ti leh hmanhmawh a..

"Ka sawi dawn alawm...chuan a ka zawn phei kha han en leh a...a rawng kha chin bik nei in a dal deuh zawk a.,chuan thisen lo luang thla,thenkhatte kha chu engemaw lo dangtu an awm avangin an tawp tih hriat takin a tawp rual phei thap anih kha..chuan a awmzia chu miriami ka ah khan puan in tuam a ni tihna anih chu" Raymonda chuan a ti leh a...ka hriat belh duh zawt tur chuan tuman thurawn an pek hran ka ngai bik lo e..

"Anih leh thlalak pakhat ve thung hi.." ka lo ti leh vat a.

"Ni e..hei hi a pawimawh zawk chu ani reng ani......en rawh..he thlalak hi ka rindanin miriami ruang khawih sawn anih hma a a thlalak ani ang..a kut leh lam hi chung lamah a phar chho a,lehlam erawh a awm chungah a dah thung a,..a kut zung tang tawn tawn hi han enchhin teh.."tih pahin thlalak chu ka hma ah chuan a rawn pharh nawn leh a...

"En teh..Miriami kuttin hi a sei seng sawng hle ani...thisen a kai nual tih mai loh chu...mahse a kut dinglam chunglam a a pharh chhoh zawk hi han en teh." tih pahin a thlalak a Miriami kut dinglam zawk chu a kawk a...miriami kut dinglam zunglai leh zung chal tin te chu a thlep deuh a,a rual lo deuh hlekin a lang bawk a..thlalak chu hnai deuh atang a lak ani bawk a..mi pangngai tan chuan han hmuh hmaih chi rual ani lo..



Ka ngaihtuah lai mek chu hria ni awm takin "Ni e..a kut tin te kha engemaw thil avang a tliak an ni...hmeichhia te chuan an kut tin hi an hmang tangkai viau thin reng asin..naupanlai a hmeichhia nen in insual anih chuan i hmai vel chu a khem nasa viau ang..an ham na hnu hma a lang nasa viau ang...chuan Miriami pawh hian kan misual a hmai vel chu a ham ve nual anih hmel ani..."ka man thiam ta uar uar mai..

"Chuti chu.." ka ti hman chauh a,ka sawi tun chu hre lawk ni awm takin

"Ni e..tlangval lian thelh thawlh hmai khem deuh nuan i hmuh chuan kan mi zawn lai mek hi i hmu ani mai thei ani...chuan thianpa kebai a nei mai thei bawk" tiin ka la hriat hauh loh thil a han belh zauh a..

"Ke bai maw?"

"Aw..ni e,.inchung a ka zuk kal khan pheikhawk hniak kha..inchung a patek tih fai loh hnawng deuhah khan a lang chiang khawp mai...mi pahnih an ni tih pawh a hriat theih bawk,mahse hniak pakhat pheikhawk dinglam hniak zawk erawh chu a ke awm lam chauh a rahna hnu a ni deuh zel a..chuan a ke dinglam hniak bul a piangah tiang a hawlhna hnuhma a awm zel bawk..chumi awmzia chu a kebai zawk chuan tiang a hawl bawk anih ka ring" a ti leh a..

Ka thaw huai ringawt a..ka hriat phak bak in Raymonda chu a lo fing in a hnathawh lai mek hi a hma diktak tur ani ang tih ka rin ngheh phah zual a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 24th, 2016, 10:03 am

Ka thaw huai ringawt a..ka hriat phak bak in Raymonda chu a lo fing in a hnathawh lai mek hi a hma diktak tur ani ang tih ka rin ngheh phah zual a.

Raymonda chuan " Tunlai thalai zing kebai tam zawk hi chu...." a tihlai mek chuan ka lo inrawlh ve leh a.."Damdawi a inchiu thinte an ni....hetiang sualna lam a in hnamhnawih duhte phei hi chu...." ka lo ti ve thuai a.

"Ni chiah e...chuan kan target hmasa tur chu lunglei a hmun kil khawr leh chung mite chet velna hmun chu ani..khai le kan inhrilhfiah ta bawk a,mu ang aw pu-a..Janeti hi roomah mu se la,keini thutthlengah aw" a ti a zawm zat a..

A tuk a hna thawh tur inchhawp tun chung chuan kan mu ta a.
Ka hmai a engemaw vawt thlur mai in min rawn sik avang chuan ka harh chiang kher mai....ka hmai bul lawk a chaw thleng Raymonda rawn lek phei chu ka su baw lo chauh nghe nghe a...kan room a chaw min pe turin an lo zuk hrilh ani ang.

Raymonda chuan "Tho rawh vawk ang mai..mu char char a ei leh ringawt mai" nui duh hauh lo hian a rawn ti a...

Thawhphan awm lek lo a,min han tawng khum nghal dan chu ka ngei ru ang reng khawp a.."Vawk pu ang mai..chaw pek dawn a au chiam chiam kher a ngai lo" ka lo ti let ve sak a..

Janeti chuan "Nangni pahnih lah hi inhnial reng ringawt mai...Val..tlangval hmeltha tho rawh le..chaw ei a hun e" a ti nem diai a..raymonda aw thum,chang fuk ai chuan a ngaihthlak a nuam deuh e...

Muang marin ka tho a,ka inphihfai hnu chuan chaw puar teng tawngin ka han ei leh a..chaw eikham chuan ka zozial tui ngei mai chu rel lu ang mai in ka han pak khu leh luai luai a...

Raymonda chu a insiam mawlh mawlh a" Pu-a vawiinah hian enge kan tih dawn a,boss lulian" ka han ti ve leh sak a..




"Lunglei khawpui kan fang dawn mawle"

"Khawpui fan mai mai maw?..hnathawh tur tam teh reng nen a.." ka lo ti let ve thung a.

"Hna hahthlak thawh chang a awm a....hna awlsam thawh chang a awm bawk alawm..i kal ve duh loh leh i kal ve lo ang a,ani mai alawm" chimawm zeti a rawn ti let ve thung a.

Runluihna remchang ka hmuh chu bawhpelh duh hauh lo in "Ni lo e..boss duhtak..ka lokal ve ang e..kan insiam zung zung ange aw" ka theihtawp a chimawm chuan ka lo ti ve thung a..ka thawh khan sana ka lo en miah lo a..dar 10 a lo ri tep tawh a...ka insiam ve ta a.

Khawilam nge kan pan dawn tih pawh hre lem lo in Raymonda min tlanpuina lam chuan kan tlan zel ringawt a....Lunglei Bazar hmun ah kan kal ani tih chulai hmun kan thlen hnu chuan ka hre chauh a....dawr kawngthlang lam a intlar that te chu kal pelin building te chhe lem lo chhungah chuan kan lut a..inhnuai lam a thawmhnaw leh chawhmeh zuar ho chu an ri nuak nuak a..kan luhna erawh chu tlereuh dawr lampang ani teh daih a..

"Enge hetah hian kan tih dawn a?" tiin Raymonda lam chu ka han hawi a.

"Miriami thiannu kan kawm dawn" zawi sup in a ti bung hmuk a,kan hma lawk dawr a tlereuh inkhai tuar chu a ban nghal a.."Ka pi..hei hi engzah man nge ni aw?" a han ti a.



"250..lo lei rawh u..ka lo tlawm ang che u"dawr nghaktunu chuan a lo ti a..

"A va to reuh ve..analh hle mai..thildang daih heng lai velah hian Maruati i hria em" tiin Raymonda chuan a zawt a...kan sir leh lam a tlereuh dawr tho min kawh hmuh lam chu kan pan san ta a.

Raymonda bawk chuan "Thian nu..Miriami thiannu Maruati i ni ang maw?" a ti a.

Nula thil a zawrh khai tha mek chu a lo hawi chhuak a"Aw ni e..tute nge in nih a?"

"Tlang takin han sawi ila..Miriami thihna chungchang chhuitu team kan ni a..thu engemaw han zawh che kan duh a.."

"Aw..anih tak chu Pi Siami khan min hrilh tak asin..lokal rawh u..hrilh theih cheu ka neih chuan ka hrilh hreh miah lo che u ania..." a lo ti fel thlap a.

"Anih chuan Miriami chanchin chu han zawt tawp mai che ila...Mumbai ah a zuk awm ti raw?"

"Aw awm e..khalsa College ah Economic subject a zir mek a."

"Anih leh a mimal thil deuh...bialpa a nei em?"

Ka rilru chuan thu a ziak thlum thei e mai a nei em em ang..ka lo ti a.

Nula chuan Raymonda chu a en vang vang " A thihlai kha chuan a neih awm ka hre lo..mahse a thih hma lawk thla 2 velah kha chuan a nei"

"Bialpa satliah maw?"

"Aih..a tleirawl chhuahpui kan tih ang chi hi..kum 5 vel chu an inzui hman ang"

"A thih hma thlahnih velah an inthen ani maw?a chhan i hria em?"

"Aw..ani ang..an inthen chungchang hi engmah min hrilh chiang lo..an inthen tih chiah min rawn hrilh a.."

" A bialpa chu..Lunglei ami tho ani maw?khawi veng nge?"

"Electric veng ami..."

"A hming?"

"Andrew Lalthakima" "An inawmna lai min kawhhmuh thei angem?"

"Electric veng field thlangah"

"Kan lawm e,kan kal ang nge" Raymonda chuan a ti a,dawr chu kan chhuah san a..car awmna lamah chuan kan inzui phei leh ta a.

Car kan luh hnu chuan "Khawiah nge kan kal leh dawn a"ka ti nghal a.

"Electric vengah "tih pahin car chu a tlantir nghal puat a.
Electric veng kan thlen chuan chhun dar 12 vel chu ani ve reng tawh a...aizawl ang a traffic jam leh mipui zi nuai nuai an tam lo deuh bawk vei vah vel pawh a nuam phian a..

Mi zawt chawp zel chungin Eletric Veng field chu kan zuk thleng thla ve thuai mai bawk a...fieldah chuan chhun lai mah nise ball lo chhaih kual nak nak tawk chu an awm tho a..Andrew-a te in chu kan han zawt chawp leh te te a...Assam type building fel thlep thlawp min khawh hmuh lam chu kan pan thla ta a.

Raymonda chuan kawngkhar chu a kik kauh kauh a...inchhung atang a min lo chhawntu hmeichhe aw kan hriat rual chuan kawng khar lo hawn pawh nghak lem lo chuan kan lut nghal a..Raymonda chuan "Andrew-a te in a ni em?"a han ti a..

Nu chuan "Aw ni e..tute nge in nih a?"

"Aizawl lam a a thiante kan nia"

"E anih tak chu....mahse amah hi a awm lo a"

"A awm lo maw? Ava zia lo ve aw"

"A thianten an rawn sawm pek a..an chhuak leh anih kha..."

"Aw..nih tak chu...khawi lamah nge an kal ang le?"Raymöda chuan zawhna tul lo zet ni a,ka hriat chu a han zawt nawn leh a...

"Hre lo..Lalhruaizela'n a rawn sawm leh pek anih kha..zanah bak an lo haw pek lo ange a" a ti mawlh mawlh a..

Raymonda chuan "Anih tak chu..kan kal leh mai ang aw" atia Andrew-a te in chu kan chhuahsan leh ta a.

Raymonda chuan " Ka rindan hi a dik anih chuan Andrew-a hi kan kawng zawh mek tawpah hian a lo awm ka ring tlat ani" a ti a..

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 24th, 2016, 10:04 am

HOWLING WOLF EPISODE 3


Postby sangtea juff » Wed Dec 21, 2016 7:50 pm


Kan kawng zawh mek a tih chu kan kal mekna kawng chho tak chu ni lo in kan hnuchhui lai kawng zawk chu ani tih ka hre thìam mai...

"Andrew-a chu i ringhlel ani maw?" ka ti a.

"Ka hre chiah lo...mahse anu khan 'an rawn sawm chhuak leh pek" a ti a..vawikhat chauh an rawn sawm na ani lo tih a hriat theih a....chuan Lalhruaizela'n a rawn sawm a ti leh a..midang a sawi tel loh avang in an thian dun angah ngai ta ila..tun ang chhun a leng chhuak zanah chiah haw tur chuan mi pangngai khawsak phung chu ani lo ani...chuvang chuan thil awmzia han ngaihthlak in 'ruihhlo a tang mek an nih loh pawn chhan dang a awm ngei ang a. Chung a chhan ni thei te chuan ngaih a ti tha lo zual ani..." a tih lai mek chuan kawngpui chu kan chhuak chho ve leh chiah a...

Car rawn tlan phei mek chu kan han nghak leh rih a...car tlan khu chu hip peih lo in motor tlan lohna lam chu ka hawi daih a..car a tlanliam hnu chuan ka inher a..Raymonda chu che lo in car tlan liam tawh na lam chu a thlir vung vung a..

"Car khalhtu kha in lo hmu em? Khawiah emaw ka hmelhriat tawh hnu ani chiang mai.."

"A hnung a thu te kha hmuh ka tum a..a khalhtu lam reng reng ka lo en lova" Janeti chuan a ti a.

Raymonda chuan a kut zungchal ti pir meuh in "Ka hria..motor khalhtunu kha ka hria ani..Pi Rini...Robina nu kha" a ti a...Raymonda chu phawk fe in ka en a.
Raymonda vek chuan "Car ah lut vat rawh u" a ti a,hmanhmawh takin carah chuan kan lut rawk rawk a..kar tlan liam ta chu um in kan tlan let leh ta a...
Kan tlanchak deuh bawk a reiloteah kan hma a car tlan mek chu ka umpha thuai a..Raymonda chuan car chu a ti muang nghal bawk a...car silver rawng kan hma a tlan mek chu kan zui ta zel a,lunglei ka vawikhat kal na ani bawk a,khawilai chin nge kan kalna chin pawh ka hre thei lo..minute sawm vel kan tlan hnu chuan venglai kan tlan thleng leh chiah ani tih ka hre thei a,saikuti hall thlanglamah chuan kan tlan liam thla a....dawr a thil inziak ka hmuh ah chuan "TLABUNG PENG" tih a lo inziak kalh a..kan hma a car tlan chu a tlan zel a,khawilai nge kan tlan thlen tawh tih ka hriat duh avang in veng hming in ziahna ka melh phei zel a..Bazar veng tlanpelin Kikawnah kan tlanchho zel a....Serkawn..kan kal lam a min lo hmuahna lamah khan kan tlanzel ani tih ka hre ve ta chiah a.


Kan hma a car tlanzel chu din mai ala tum hauh lo...Serkawn kan tlan thleng a..BAPTIST HOSPITAL tih lo inziak kalh chu tlanpel in khawchhak lam hawi in kan tlan leh a...dinglam kawngpeng chu zawh in baptisma chan lui tih lo inziak chu tlanpelin kawng chho zetah chuan kan tlanchho zel a..Ramzotlang kan thleng ani tih ei chawp dawr a thil inziak atang chuan ka hre thei a...
Kan hnaìh chilh lutuk chuan pi rini chuan min lo hmu hlauh thei ang tih a hria ani ang Raymonda chuan kan hma car hmu pha tawk lek chuan car chu a khalh zel a.
Kawng chho chu tawpin kawng chu a lo phei leh deuh a..kan hma a car chu a ding ta a..keini pawh kawng sirah chuan kan ding ta a..mahse va din hnaih lutuk chu thil tih chi anih loh avangin hla deuh hlekah kan ding ta a..jan hma a,car ding kawng khar chu a in hawng a..kan hmuh theih lam kawngkhar atang chuan tlangval pakhat hi a rawn chhuak a,tlangval lian tha thelh thlawh tak ani..mahse midang chu kan hmu pha tlat lo a.

An mahni hmu chiang tur chuan kan va pan hnaih angai..mahse min lo hmuh ve tho chuan thil a khaw lo vek thei dawn ani tih chu tumah hrilh nawn kher kan ngai lo..Raymonda chu car atang chuan a chhuak nalh a..zui ve lo turin min duh ani tih a zaizir chuan min hrilh nghal a...
Raymonda chu pen nga vel in a va kal hnai a...a ding chat a...minute 3 vel ngawi reng a a dinhnu chuan min rawn hui zauh a..a dinna lam chu kan pan phei ta a....
"Tlangval 2 leh Pi Rini" tih chauh a lo sawi a..
"Kan mi duhte chu an ni thei angem?"
"Kan la hria ang chu..lungte pakhatin sava 2 kan perh thla mai thei bawk"
"Chu chu enge a awmzia?"
"Thil lo hriat lawk tam lutuk hi i tan a tha lo e...engkim pho chhuah in ala awm mai ang.." Raymonda chuan a lo ti leh a..
Janeti chuan "A nih leh enge kan tih lehzel tur le?" a lo ti ve thung a...
"Ruahmanna pakhat ka nei in ka hria...carah let phawt ang.."muk fe a in ngaihtuah chungin Raymonda chuan a lo ti let ve thung a..carah chuan kan let phei leh ta a..
"Enge ruahmanna chu?" thut pawh kan thut fel hma chuan ka ti zawm zat a..
"Kha mite pahnih kha..kan belhchian phawt angai ani.."
"Engtinnge kan belhchian ang..kan tan chuan an hriat loh a,kan umzui zawk hi a tha ber ani lawm ni?" ka lo ti let ve sak a..


"Kha mite pahnih kha chuan kan zing a tumah an la hmu lo a..Pi Rini chiah kha kan hmel hmu tawh awm chhun a ni"
"Anih leh Pi Rini tello a,kan hmuh angai tihna anih chu"
"Nia..thil harsa vak ani hleinem.,Pi Rini chu pasal nei lai ani a,tlangval te kha a zui reng lo ang tih ring tawp mai ila...ka rindan chuan tunah pawh hian pi rini chuan a rawn zui let tawh hauh lo ang" Raymonda chuan a ti leh a...a sawi zawh rual chuan kan hma kawngkawi atang chuan tlangval lian thelh thawlh leh a bul a bai saih saih chung a rawn kal tlangval chu an rawn lang nghal a..han en reng reng pawh chuan engemaw ruih an nei ani tih a hriat theih a...kawng zau tawk ve takah chuan an rawn insu phei nawk nawk a.
Tlangval lian zawk chu han en mai chuan tlangval fel hmel tak hi a ni a..a bul a kal zawk erawh chu a kut vung pum deuh al leh mawza a bun chhan a a ke chhah ul te chuan hun engemaw ti chhung chu ruihhlo khawvelah chuan a tang ve tawh ani tih a hriat theih a..Raymonda chuan min rawn en a "LEMCHAN" tih chiah a sawi a,amah chu car atang chuan a chhuak nghal a..enge a tih dawn a,enge lo thleng dawn tih pawh ka ngaihtuah hman lo Raymonda che vel chu ka en reng ringawt a..tlangval pahnih lo kalte chu a va pan hnai a..engemaw ava hrilh ru ani ngei ang...car lamah chuan an rawn inzui phei nghal a..
Car bul an rawn thlen chuan car kawngkhar chu hawng in mit min rawn siai suk a.."Lo lut rawh u..kan thianpa khan a chak tawh lutuk a,leina tur kan hre mai si lo a..min zawn pui ula hit khat ve ve kan treat ang che u" a tih zawm zat a...drug addict ah min lo va chhuah ringawt pek anih chu..tlangval pahnihte hmelah chuan phurna nasa tak ka hmu thei a..car chhungah chuan an rawn lut rawk rawk a..
Ke bai zawk chuan "Tlabung pengah..kan thianpa a awm a,a nei ang" phur zet in a ti a.
Raymonda chuan car chu a tinung a,kan tlan tawhna lamah chuan kan tlan let leh ta a..minute 20 vel kan tlan leh hnu chuan Tlabung peng chu kan tlan thleng leh ta a...kebai a bawk chuan " pawisa min pe ula..he tah hian min lo nghak rawh u" a ti a.
Raymonda chuan "I thianpa chu he tah lo awm rawh se..hei pawisa chu " tih pahin cheng 500 tlang pahnih a pe a...kebaia chu a kal sawn ta a...
Reiloteah a rawn let leh a...chhinsen pathum hi a rawn hum phei tat tat a..kei chuan ka chanpual ka hlen ve a hun ani tih hria in "Hmun fianrial tak ka mamawh ani..hmanhmawh takin" ka ti bul hmak a..
Raymonda chuan "Khawilai hmun nge fianrial ber ang le?" tiin kan thian derte 2 chu a han zawt a..
"Fianrial tak in duh kher chuan pukpui piah tlang a bung hnuai khi a nuam ber" kebaia chuan a lo ti leh a..
"Chu hmun chu pan ang aw..nangni pawh in lokal ve angai ang..chu hmun ah chuan min hruai loh chuan .." a ti a...
Hnialna awm miah lo in motorah chuan an lo lut a..kan tlan chhuak leh ta a..

Kan tlanna tawh ah bawk khan kan tlan let leh ani tih chu hrilh hran kher ka ngai tawh bik lo e..vawiinah pawh vawithum zet kan tlan nawn tawh a,kan kal ni nen phei kha chuan a vawi 4 na ani ve tawh a...Kikawn chho kan tlan lai te chuan Raymonda chuan darthlalang hnung lam enna tur a an siam atang chuan min rawn melh a...a nui suk a..thil ala kal tluang zel ani ang chu maw??
Serkawn pawh kan tlan thleng leh der tawh a..Pukpui lam kawngah Aizawl lam pan na lamah chuan kan tlan liam a...chutihlai chuan khua pawh a tlailam ve tan tawh ani tih hriat takin ni chuan car kawngkhar darthlalang atang chuan min rawn chhun khalh deuh ru tawh a..engtia rei nge kan tlan tawh pawh ka hre chiah lo..
"Khatah khan ding rawh " kebaia'n a tih avang chuan kawngkual lai tak a lungphun sang ang reng tak cement a zut mam thlap bulah chuan Raymonda chuan car chu a din tir a...tumah tawng lem lo in car atang chuan kan chhuak sap sap a..
Lemchan angai tih ka hriat avang in damdawi chak a meng vai riai ang in ka mitmengte chu ka han ti zim deuh a..ka kut te chu ka han ti khur deuh dar dar a..
Kebaia zawk bawk chuan "He tah hian chho ang u" a tih avang in lungphun sir veilam a kawng hlui niawm tak hnim deuh chap chu zawh in kan chho a...di leh luang hnim bum kharah chuan kawng te tak te mahse bel zet si hi a awm chho raih a..thui pawh kan kal hma chuan tlang chhip kan chuang chhuak hlawl a...
Bung kung lian lutuk lo, lo ding bulah chuan kan chhuak chho a..thli a tho ham ham a,Lunglei khawpui chu a lang pharh duai a...Bung kung pulah chuan syringe leh damdawi bur ruak, funte ruang leh a senchi umruak thleng in a let rum a..
"Damdawi chu min pe vat ru..." Ka thiam tawk a aw ti khur deuh hlak hlak chung hian ka han ti a..kebaia chuan chhinsen(chhinsen hi damdawi zuar ho in damdawi an zawrh chhawn leh na..vawikhat inchiuna daih vel an dah thin..no.4 ani deuh ber) pakhat chu a rawn phawrh a..min pe a..kei chuan "Tuman min rawn ti buai suh ang che u.."tih pah in inchiu tur ni awm takin kan thlang lam di buk phen lamah chuan ka chhuk san ta a..

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)