WHO (COMPLETE) By : Aaron Malsawmdawngzuala

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

WHO (COMPLETE) By : Aaron Malsawmdawngzuala

Unread post by Aaron Dustin » June 21st, 2021, 6:21 pm

WHO?

(MIZO THRILLER FICTION STORY)

Written by : Aaron Malsawmdawngzuala

Chapter - 1

***********************

Zan dar 9 vel a ri tawh a, Hospital kawtah chuan taxi pakhat hi a rawn ding a. A chhung atang chuan nula kum 21 vel a upa, sam ngil sei nalh tak. Mitemeng dum kak mai leh hmelchhe lemlo tak, vun ngo tak mai hi a rawn chhuak a. Chu nula hming chu Lalmuanpuii, Puipuii a ni. Hmanhmawh takin Hospital chhungah chuan a tlan lut a, Operation Theatre lam chu a pan nghal a.

Theatre kawtah chuan mi 7 vel an lo awm a, police an lo awm nual bawk. Puipuii chuan an zinga nu pakhat, mittui tla phunga lo awm chu ava pan a. A kutah va vuanin, "Enge a an? A tha tiraw?" a ti nghal chel chul a. Police zing ami Rsa chuan, "An la zai mek, a lu a hliam kha a na deuh mah mah a ni an tia." tiin a lo chhang a.

Puipuii chu a tap ringawt mai, "Avan pawi tak...khawngaihin Lalpa, khawngaihin damchhuah tir hram rawh.." tiin a thu kun tlawk tlawk mai. Nu pakhat lo awm ve chuan a kutah vuanin, "Puipuii...a tha chhuak leh em em ang." tiin a hnem a, chu nu chu tuna damlo an zai mek, Inspector Lalnunchama nu, Pi Duhpuii a ni.

Inspector Lalnunchama, Manuna hi tlangval kum 30 mi lek a ni a, police huaisen leh palian ve tak mai a ni. A huaisen em em a, a case-a an dah tawh chu chhuichhuah loh ala nei ngai lo. Tin, Lalmuanpuii hi a bialnu, a chhungte pawh ina an duh pui em em mai a ni bawk. Mizoram chhunga drug tawlh ruk chungchang chu hriat chhuah a ni a, chu case chu Manuna hian a buaipui a ni.

Heng drugs dealer te hi Manuna chuan reiloteah a chhui chhuak hlawm a, man an tumna lamah Manuna hian a lu ah hliam a tawrh phah ta a ni. Na taka vuak a ni a, mahse misual chuan Manuna chu thah a tum hmain police dangte'n an rawn man hman hlauh a ni. Darkar 2 lai chu an zai ta, a tawp a tawpah chuan doctor chu a rawn chhuak a.

Pi Duhpuii chuan, "Doctor, kan fapa chu enge a an?" tiin a lo zawt vat a. "A tha tawh e, mahse ala harh chhuak lo. Darkar engemaw zah chu inla nghah a ngai ang, naktuk zingah a harh chhuah kan beisei." tiin a lo chhang hlauh mai. An zavai mai chuan an thaw huai hlawm a, "AWi ka va han lawm tak em." tiin Puipuii chu a thu hnawk mai.

************************

Zing dar 7 vel a ri a, Manuna chu a rawn harh ta. A mit a rawn meng a, a bulah chuan a mutna khum bawhin Puipuii chu a lo hnar suk suk mai. Manuna chuan a bialnu sam chu a chul sak a, a nui deuh sak mai. Puipuii pawh chu a rawn harh ve a, "Duat..ilo harh tawh a nimaw? I tha em?" tiin a kuah nghal a.

"Umm ka tha alawm, ka lu hi ala na deuh a.." tih pah chuan a lu chu a han dawm vang vang a, chutih lai chuan nurse a lo lut a. "Good Morning, Inspector Manun..enge i an a?" a rawn ti lut a, "Ka tha alawm..enge ka chungah thleng a?" a han ti deuh hu mai a. Puipuii chuan, "Drug Dealer pakhat khan i lu ah a vua a.." a lo ti reuh pek a.

Mahse Manuna chuan, "Ka hria alawm...a hnuah khan enge thleng? An man ta em? A bak engmah ka hre tawh lo." a han ti leh a. "Aw man e..an man tawh alawm." tiin a chhang a. Manuna chu a thaw huai mai, "Ka lawm e, Lalpa." ti zawi deuh sapin chunglam chu a han hawi chho va.

Eiloh hmel zet hian Puipuii chuan, "AWiii..em em a che. Tikhawp hian nangmah vangin kan hlauthawng a, i nunna i chan tep a nia. Nang lah i rawn harh chhuak a, misual an man vang zawkin i la lawm zawk a. I nunna Pathianin a zuah kha lawm zawk ta che, mawla." a ti deuh hrep mai.

Nui var var chung chuan MAnuna chuan, "Ka lawm tho alawm, mahse misual kha man loh phah ta ila. Ka hliam tawrh hian awmzia a nei dawn lo sin, hei tunah chuan ka tuar thlawn bik ta em love." tiin a chhang let leh a. Doctor a lo lut leh a, "Thiannu, khawngaihin min lo chhuahsan lawk ta che." a rawn ti a.

Puipuii chu a chhuak a, Manuna chu doctor chuan a han check vel a. "Kar 2 vel chu la awm a ngaih hmel, i lu kak kan thuina hi a hmuamhma vel hi dim ala ngai dawn tlat." a han ti a, MAnuna chu a lo ner sak mai. A thaw deuh hak a, "Kar 2 a? Ava la rei dawn ve?" a ti deuh nang nang mai.

**********************

(AFTER TWO WEEKS)

Manuna te thawhpui tho, SI Ramliana chu Manuna te in lam pan chuan a kal mek a. Rei lo teah chuan ava thleng ta, kawngka chu a han kik karh karh a. Manuna nu chuan, "Lo lut rawh." tiin a lo chhawn a, ava lut ta a. "Ehe Ramlian, lo leng rawh." Manuna nu, Pi Duhpuii bawk chuan a lo ti leh a.

"Khawnge Boss chu a awm a, vawiin lamah a chhuak tih te ka lo hria a." Ramliana chuan a han ti a. "Room ah sawn a awm, lawk aw...ka va ko ange." tiin room lam chu a pan a. Reiloteah chuan Manuna chu a rawn chhuak a, "Ehe Ramlian, ilo leng animaw?" a rawn ti ve bawk a. "Nia, ka rawn kan che a nih hi..kha, engtham mah nilo mahse.." tiin a eitur ken te chu a han pe a.

"Aww a ngai lo asin mawle...i ti awm ang lo thei emai." Manuna chuan a lo ti a. "Kha..la mai mai teh." tiin Ramliana chuan a lo chhang a. Manuna chuan eitur te chu lak pah in, "Police Inspector ve meuh kan ni tawh a, naupang chhia ang maia eitur han inpek chuh.." tiin a nui huah huah a.

"A hrim hrim in enge i an tawh a?"

"Ka tha animai, lu han nat deuh chang hi chu ala awm a."

"Nia ala ni ve deuh bur ang, i thluak vel a khawih lova i vannei ngawt mai."

"Nia tiraw...hei a thuina hi thlakhat hnuah chauh phelh tur an tia."

"Anih chuan i la chawlh deuh vang vang a ngai dawn tihna a nimaw?"

"Anih hmel..mahse thlakhat hma pawhin a dam mai ka ring."

"Indim phawt rawh, SP (Superintendent of Police) pawhin thla hnih lai alawm leave a pek che."

Darkar 1 vel dawn an titi hnu chuan Ramliana chu a tho va, "Kan haw tawh ange..keipawh, khi dar 10 a pel tawh." a han ti a. "Aww...ala hma alawm, la thu rawh." Manuna chuan a lo ti a. "Ngawiteh, naktuk duty ala ngai dawn si a..ka kal phawt ange." tiiin a chhang leh a. "Anih chuan le...tluang takin i haw dawn nia." tii kawngka thleng chu ava thlah a.

Manuna hi a nu nen chauh va khawsa an ni a, a pa hian kum 20 a nih laiin cancer natna avangin a thihsan tawh a ni. An unau hi pahnih chauh an ni a, a upa zawk a ni. A unaunu Hannah-i erawh lehkha zirin phai ah a awm mek thung a, chhungkaw khawsa thei ve tak chu an ni. A bialnu Puipuii erawh kum 21 chiah ala ni thung a, college zirlai ala ni.

*********************

Ramliana hi hemi zan hian ke in a kal a, Manuna te nen an inhlat lemloh avangin motor a keng lo a ni. Chutia kawng reh em em maia a kal lai chuan amah zui tu awm tlat hian a hria a, a ngaih a tha chiah lo kher mai. Hnung lam te chu a han hawi leh thin, mahse tumah a hmu bawk silo.

Minute 5 vel dawn chu thlamuang lo tak chuan a kal zel a, an in erawh ala hla angreng thung. DAr 10 a pel tawh a, khawlaiah chuan amah tih loh chu tumah an awm tawh lo. A kal zel a, a hnung lam atang chuan thawm a hre leh ta. Rang takin a hawi let a, mahse tumah a la hmu chuang lo.

"Tunge awm? Tunge?" a han ti ngawt a, mahse boruak chu a reh hian a reh tlawk tlawk mai. A nui suk a, "Ava han atthlak tak." tiin kal leh mai a han tum a. Chutih lai tak chuan kawng sira in pakhat phena mihring niawm tak phe zeuh chu a hmu fuh ta, a ding chat mai. "Tunge...tunge ni?" tih pah chuan ava pan phei nghal a.

Muang chang chuan a phei zel a, in hnung lam chu ava en a. MAhse tumah an lo awm lo, a mit vai a nih ringin kal leh mai a tum a. Mahse ahma zawn takah chuan mi pakhat hi a lo ding run mai, Ramliana chu a phu zawk mai a. Chupa lah chuan ala melh rum em em zui, "Nang maw? Enge hetah.." Ramliana chuan a sawi zo hman lo.

A dulah chuan chupa chuan a vit siah mai a, mak tih hmel tak hian chu misual chu Ramliana chuan a en reng a. Misual lah chuan ala duh tawk mai lo, vawi 5 vel chu a han vit nawn leh a. Thisen a baw hawk hawk a, Ramliana chu a thingthi hnawk mai. A ka atang te chuan thisen a rawn chhuak a, a thal der mai. Tichuan misual chuan Ramliana chu in hnung lamah chuan a hnuk phei a, a dimlo kher mai.

Chu misual chuan kutkawr a bun a, a dum vekin a inthuam a. Ramliana chu a han en vang vang a, alo la thi mai lo. A nemngheh nan ti ni awm fahran chuan a han rek leh a, a thih thak thleng chuan a rek a. Ramliana chu a thi ta, a ipte atang chuan paper a phawrh chhuak a. Chemte a thisen kai te chu paper chuan a han hru vel a, tichuan Ramliana ka(mouth) chhungah chuan paper chu hnawhin a kalsan ta a ni.

Manuna chuan pawnah chuan meizial a zu hlat hlat a, an in atanga hla lo teah chuan a thianpa, a thawh pui Ramliana chu misualin a that tih a hre der si lo. A nu chuan kawngka a rawn hawng a, "Awww...enge pawnah ila tih a?" a rawn ti a. "Meizial ka zu mai mai." tiin a lo chhang a, a lut ve ta nghal a.

**********************

A tuk zingah chuan ruang chu mipui ho chuan an en thup mai a, reiloteah Manuna pawh chu a lo kal ve a. SI pakhat, Zorema chuan Manuna chu ava pan hnai a. "Sir, ila dam chiang silova...tinge ilo kal ve duh a?" tiin ava zawt a. Manuna chuan Ramliana ruang chu a en vang vang a, "Nizan lawk pawh khan kan inah a lo kal a, a hmu hnuhnung ber tu chu keimah hi ka ni." a han ti a.

SP pawh reiloteah a lo thleng ve a, mipui te chu a han hnawt kiang te te phawt a. Manuna a hmuh chuan, "Manun..i la damchian loh kha...tinge ilo kal ve duh a?" a lo ti ve bawk a. Manuna chuan salute a pe a, "Sir..Ramliana hi nizan khan kan inah a lo leng a ni." a han ti leh a. SP chuan, "Anih chuan ke in a lo kal em ni?" tiin a zawt a.

"Aw...motor a rawn ken loh thu kha chu a sawi a."

"Rinhlelh tur awm ang i hria em?"

"Ka hrelo...nizan khan dar 10 leh a chanve rik hma hret khan a haw a. Kawngka bul thleng ka thlah a, chuzawng chu animai ka hriat chu.." tiin Manuna chuan a chhang leh a. SP chuan mipui te chu a han enkual a, "Tuin nge police rawn phone kha?" a han ti lauh lauh a. Hmeichhe tleirawl pakhat hi a rawn kal a, "Keimah ka ni e." a rawn ti a.

"Engtin nge i hmuh dan han sawi teh le."

"Zingah hian ka walk ziah a, chuan hemi in zawn ka thlen hian kawngsira thisen hi ka hmu a, a tir chuan mi kuhva chil chhahna sen mai mai turah ka ngai a. Mahse a tam si a, ka ngaih a tha chiah lova. Ka va kal phei deuh a, in hnung lamah hian ruang hi ka hmu ta a ni."

"Dar engzat velah nge?"

"Dar 5:30 vel aniang."

Chutih lai chuan Manuna chuan chiang em em hian ruang chu a han en chik leh deuh a, "Khawimaw...glove min lo pe teh u." a ti a. Constable pakhat chuan glove chu a pe a, "Engthil nge ni a, Manun?" tiin SP chuan a lo zawt ve bawk a. Manuna chuan Ramliana ka(mouth) chu a han keu kau va, paper lo inhnawh chu a hmu ta.

"Engthil nge ni ngai?" tiin SP chu a chek tlawk tlawk mai. Paper chu Ramliana chil nen a lo inchiah piah deuh tawh avang chuan a lo zawp angreng tawh hle a, Manuna chuan fimkhur tak chuan a han keu a. Thisen a lo kai nuai mai a, engemaw hi a inziak bawk. Thuziak chu a lo pherh deuh nual tawh a, mahse Manuna chuan chiang takin a chhiar thei thung.

Chutah thu inziak chu, "Inspector Lalnuncham, i thei anih chuan min man ang che. Nangmah kha ka duh, nangmah kher kha...ka cho che." tih hi a ni. SP pawh chuan paper chu a rawn en ve a, "Manun, enge awmzia?" tiin a zawt nghal a. Manuna chuan a melh ngai melh reng chung hian, "Min hrechiang hle aniang..min rawn cho ngat alawm." a han ti a.

SP chuan, "Ka be lawk thei che angem?" a han ti a, Manuna chuan a lu alo bu nghat a. "Zorem, lo buaipui rawh aw...forensic ho an lo thleng tep." Sp bawk chuan a han ti leh a, Manuna nen chuan an kal hrang ta a. Manuna chuan, "Enge ni, Sir?" tiin a zawt a. "Manun, i hliam pawh a la dam tha silo. He misual hian i la dam chiang lo tih a hriat vang in chu chu remchangah a la pawh a ni thei, SI Zorema'n buaipui mai rawh se." a han ti a.

"Nilove Sir, hei hi keimah ngeiin ka buapui duh a ni."

"Ka rem ti thei lovang, i lu kak an thuina pawh a la dam chian loh kha, phelh pawh an la phelh lo ania."

"He ka hliam te avang hian he misual, min cho tu hi ka awmtir mai mai dawn lo. Keimah ngei min duh alawm, ka man ngei ang..Sir.."

"Doctor pawhin a la phal lovang...ala hunlo."

"Sir min ring rawh..case chhui chhuah loh ka neih i hre tawh em? Misual ka man tawh ho tlanchhuak an awm i hre tawh em? Min chhang teh Sir?"

SP chu a ngawi vang vang a, "A tha e..mahse nangmah chauh chuan ka remti lo. Zorema nen hian in thawk dun ang, chuan indim bawk ang che. Chumi hma chuan doctor rawn hmasa bawk rawh, i hahdam deuh chu ala ngai a ni." a han ti a. "Sir, lungngai suh..ka tha alawm." tiin Manuna chuan a chhang a.

"Tunah rih chuan i chet thut thut chu a chi lovang, case hi i kutah ka hlan tawp thei lo bawk. Vawiin lamah doctor lo va bia la, Zorema'n lo buaipui rawh se." Sp chuan a han ti leh a, Manuna chu a lungawi lo kher mai. "Mahse Sir...vawiin atang hian thawk tan mah ila ka pawi ti hleinem." a han ti leh hram a.

Mahse SP chuan, "I chungah engemaw thleng leh ta se, kan dept mai nilovin keipawh hian ka tuar thei asin. Kei chauh nilovin DGP pawn min hrem hial thei asin, i hmanhmawh lutuk a nih kha." a lo ti leh a. "Engmah a thleng lovang, Sir. Min ring rawh, ka dam tawh alawm." tiin Manuna chuan a han ngen leh a.

"Min hrethiam rawh, Manun...vawiinah doctor rawn phawt la, chuta tanga zir chuan case hi i buapui chauh dawnnia."

"Mahse Sir.."

"Manun...it's an order..khawngaihin hriatthiam tum rawh."

Manuna chu a ngawi vang vang a, "Awle Sir." tiin a chhang ta nge nge a. REiloteah forensic lam ho pawh an lo kal a, ruang chu an han endik vel a. Manuna chuan SI Zorema chu ava pan a, "Zorem, post mortem report a chhuah hunah kan inah lo kalpui ange che." a han ti a. Zorema pawh chuan, "Awle Sir." tiin a lo chhang a.

*******************

Manuna chuan chumi ni chuan a personal doctor chu ava hmu a, thil thlen dan chungchang vel chu a han hrilh a. Mahse doctor chuan a lo phal hauh lo mai, "Tunah chuan ka remti thei lo, Inspector. Min ngaidam rawh, ila dam chiang lo a ni." a lo ti tlat mai. "Doctor, ka fit tha a, ka chawi ei pawh a tui. Ka lu pawh a na ngai tawh lo, ka hliam lai ka khawih fuh palh hian ala thip ve deuh a, chuzawng chu a nimai." a han ti a.

"I hliam a dam thlap hunah, khawi fuh pawh a anat tawh loh hunah i hna chu i zawm leh thei chauh ang."

"Enteh doctor, i hrethiam lo a ni. He case hi a serious ania, tualthah case a nih hi. Chumai nilovin he mitthi hi kan thianpa, kan thawhpui a ni. Kan in atanga a haw kha a lo that a, a awmzia chu min enthla reng tihna a ni. Chuan he misual hian keimah kher min duh a, min rawn challenge a ni."

"I natna pawh kha thil serious tak a ni asin, Inspector. Hriatthiam tum rawh, he misual hian i damlohna lai tak kha a hmang tangkai a ni thei asin."

Manuna chu a ngawi vang vang a, "A tha e, engtik thleng nge ni ang?" tiin a han zawt a. "Thla khat dang chu i la chawlh angai ang." tiin doctor chuan a lo chhang a. Manuna chu a han thaw huai a, "Awle a tha e, ka lawm e." tiin a chhuah san ta a. A lungawi lo kher mai, "Ka man tho tho ang." tiin a phun chhuak nung nung mai.

*********************

Tlai a lo ni a, Manuna chuan Zorema chu chanchin zawtin darkar tin mai chuan a call deuh sek mai. Mahse thu thar em em a awm thei lo, "Kan la chhui mek e." tih vel bak chu engmah thu thar a awm lo. Dar 5 rik hma hret chuan Zorema chu a rawn thleng ta a, post mortem result pawh peih fel a ni hman hlauh mai.

"Finger prints engmah a awm lo, tualthattu hian glove a bun a ni ngei ang." Zorema chuan a han ti a. File chu Manuna chuan uluk em em hian a en a, "He tualthattu hian min hrechiang hle tihna chu a ni phawt a, nizan pawh khan kan in bul hnaih ah hian a lo awm reng tihna a ni. Ramliana haw hun kha anghak ngat ngat tihna ania, engemaw tak chu a awm chiang a ni." a han ti a.

"Sir, enge i sawi awmzia?"

"A awmzia chu maw, he tualthattu nen hian engemaw inzawmna kan nei a ni maithei."

"Engtia inzawmna maw?"

"Ka hmelhriat emaw, ka thian hlui emaw..ka hmelma pawh a ni thei."

"Mahse hmelma i nei em ni?"

Manuna chu anui suk a, "Hmelma te chu tam tak ka nei alawm, misual tam tak ka man tawh hi." a han ti a. Zorema chuan a lu chu a hiat nauh nauh va, "Anih chuan i man tawh ho te zinga mi an ni tihna aniang maw?" a han ti leh a. Manuna chuan a lu a thing a, "Ka ringlo, ka man tawh ho te jail atanga tlanchhuak an awm ngai lo." a lo ti leh a.

"Anih chuan tunge ni thei ang? Serial Killer satliah nge...phuba lak duh vang?" Zorema chuan a han ti leh a. Manuna chuan a lu ahan bu nghauh nghauh a, "Phuba...phuba lakna ni ta se...ka mi man tawh ho zinga mi, an chhungte emaw, an pawlte zinga mi pawh an ni thei tho mai." a han ti leh a.

"Sir, nangmah kher a cho danah che hian thikna vang a ni lo maw?"

"Engtia thik maw?"

"AWwww..ngaihtuah la, Mizoramah chuan i lar thawkhat viau alawm le. Misual man a awmin a mantu nangmah i ni a, case chin fel loh la neilo tiin...promotion pawh i hmu chak bawk a, tunah pawh ASP ah i kaisang tep tawh ania."

"Chuvang chuan maw min thik anga?"

"Ka hre chiah biklo, mahse he misual hian heti khawpa Mizoram mipui ten an fak che leh i hnuchhui thiamna te hi a thik anga, a challenge che a ni ngei ang."

"I sawi awmzia chu he misual hi ka hmelhriat pawh a ni lem lova, news leh media atangin min lo hria a. Tichuan min thik a, min cho ta i tihna em ni?"

"Aw ni chiah e, mahse ka rin dan mai mai a nih chu."

Manuna chu a khi suk ringawt, "A dik thei tho mai, mahse a diklo thei bawk. Hun kal tawh ka chhut let pawhin tunge ni thei ang tih ka ngaihtuah thiam lo, inla fing ve tak chu a nih ngei ka ring." a han ti leh a. Zorema chuan, "Taka, Ramliana chhungte chu ka hmu tawh a...zawhna pawh ka zawt nual tawh." a lo ti ve leh a.

"Chanchin thar deuh te a awm em?"

"Awm chuang lo, han rinhlelh tur awm ang pawh an hrelo."

"Um a nih chu, anu leh pate ka khawngaih ngawt mai. An tar ve tawh si a, an khawsa thei teh chiam lo bawk nen..." Manuna chuan a ti nuah nuah a. "Anih Sir, enge vawiin chuan doctor chuan a lo sawi a?" tiin Zorema chuan a han zawt ve leh a. "SAwi peih lo..a phal lo..chuzawng chu." a lo ti hmuk mai.

"Anih chuan SP i hrilh tawh em?"

"HRilh lo, nakinah ka hrilh ang."

"Sir, lungngai suh...min ring la, ka chhuichhuak em em ang." Zorema chuan a han ti a, Manuna chu a nui huk mai. "Zorem, amak nghal ngawt ngawt thin. Nangmahin chhui suh, hei hi ka buaina a ni a, he tualthattu hian keimah alawm min duh." a han ti a. Zorema chu a ngawi reng, "Drug Dealer kha tunge a hming khah? Min vaw tu ber kha?" Manuna bawk chuan a han ti leh a.

"Mickey-a, a hmingpum kha ka hre tawh lo." tiin Zorema chuan a chhang a. "Khapa pawh kha ka ringhlel tho mai, a sumdawnna zawng zawng ka tih chhiat sak a, tuna misual pawh hi a mi leh sate zinga mi a ni thei tho." a han ti leh nuah nuah a. "Crime Scene-ah engmah thil danglam hmuh in nei lo em ni?" Manuna bawk chuan a han ti leh a.

"Aw neilo, Sir." tiin a chhang a. "Um a tha e, zaninah ka mamawh hunah che ka lo be dawn che nia." a ti a, Zorema pawh chu a haw ta a. Chutih lai chuan Manuna phone chu a rawn ri a, SP a lo ni. "Hello Sir, enge ni ta?" tiin phone chu a chhang a. "I doctor in min rawn phone a, a hlauthawng khawp mai." a rawn ti a.

Manuna chu nin hmel tak hian a ner nung mai, "Aw..nia, ka rawn hrilh dawn chiah che a, Sir." a han ti kual vel a. "Manun, tikha chuan i chawlh rih mai angai a nih hmel. In lam atang khan theih tawp chhuahin i pui dawn tho va, chhuak tam lo turin kan ngen mai chauh che a ni." SP chuan a rawn ti leh a.

"Ka hria alawm, Sir. KA hrethiam e..."

"In enkawl tha la, chanchin chu kan rawn hrilh zel ang che."

Phone chu an dah a, Manuna chu a thinrim hmel kher mai. A tho a, room lam panin a kal a. Mi thinchhia tih takah bang chu a han hnek ri bur a, roomah chuan a lut a. Kawngka chu ring tak hian a khar a, a lu a rawn na zawk mai. A dawm vang vang a, "I la dam chiang lo..i la inpeih lo.." tia doctor-i'n a hrilh lai te chu a bengah chuan a rawn ri nawn mawlh mawlh mai.

************************

Nula leh tlangval inngaizawng pakhat chu mi huan kalkawng, reh lai deuh ah chuan chance neih tumin an inzui thla a. Mi hmuh lohna lai tur ber spot an hmuh takah chuan eng sawi set set lovin an inkiss nghal bawrh bawrh mai, an phur tan dawn chauh tih ah chuan a hmeichhia zawk chu a au ta vak mai.

"Tinge? Enge a?" tiin mipa chuan a zawt nghal vat a. Khur zawih zawih hian an sir hnimbuk lam chu hmeichhia chuan ava kawk a, mipa chuan ava en a, a phu nasa kher mai. Ruang pakhat, lu bung tep khawpa sawi sak hi a lo let reng mai a nih chu. An inha sawk sawk a, an tlanchhe ta a. Kawngpui an thleng a, "Police phone nghal rawh..." hmeichhia chuan a ti chel chul mai.

Mipa pawh chuan police chu a phone a, tlai dar 6 a pel tawh. Reiloteah chuan police te chu an lo thleng a, Manuna pawh a rawn tel lui ve leh hram a. Zorema chuan chung nula leh tlangval te chu thu a han zawt fiah a, Manuna erawh SP nen an inbe mek thung. Ruang chu kawngpui lamah zawn chhoh ani a, a hmunhma vel chu forensic lam chuan torch light nen an endik mek bawk a.

Ruang a hmuh rual rual chuan Manuna chuan ava pan a, "Khai..ava rapthlak ve leh.." tiin ner nung ringawt. SP chuan, "Tu tak ni ang maw?" tiin mipui ho chu a han enkual a. "Amah hi hria kan awm em?" tiin a han zawt kual a. Manuna chuan ruang chu a dap kual a, a ipte vel chu a check a.

Mahse engmah a hmu lo, mahse a han en uluk leh zual a. Ruang chu a taksa a chhe hneh hle a, zaina hnuhma tam tak a awm a, a vun a thler nasa hle bawk. Manuna chuan uluk em em hian a han thlek a, chutah a ban dinglam vun thler laia engemaw, a vun hnawh puar deuh bik chu a hmu fuh leh ta.

"Sir, enteh.." tiin a kawk a, SP pawh chu a rawn kun hniam a. Manuna chuan love chu a han bun leh a, chupa ban vun thler chu a han pawt kau deuh a, a kutzung tang chu a zu rawlh lut a. Darthlalang kehthem, lian tha nelh nawlh tak mai hi a lo inzep a. Manuna chuan a phawrh chhuak a, tuiin a han silfai a.

Chu darthlalang keh ah chuan marker hian engemaw a lo inziak leh ta, "Inspector Manun, i muangchang mah mah a ni. Midang ka duhlo, nangmah kher kha ka duh che. Anih loh chuan ruang in chhar zel ang, ka cho che." tih a ni. Manuna chu a sa kher mai, SP chu a en a. Thinrim tak hian, "Sir..en ta che..min fiamkual vel mai mai dawn." a ti hlur mai.

************************

TO BE CONTINUE

WHO?

(MIZO THRILLER FICTION STORY)

Written by : Aaron Malsawmdawngzuala

Chapter - 2

**********************

Manuna chuan ruang chu a han en chiang leh deuh va, a hriat hnu ni tlat hian a hria a. A hmai vel a chhiat nasat angreng avang chuan a hmel chu a hmuh tlak lutuk loh, mahse amah hrechiang em em tu tan chuan hriat theihloh khawpa chhe nasa chu a ni chuang lo. A han en leh vang vang a, "Hmuh tawh na ka nei a ni." a han ti zawi sap a.

Chutih lai chuan ruang endiktu forensic doctor zinga pakhat chuan, "Sir, heta hi tattoo a nei..a chawn veilamah." a rawn ti hlauh mai. Rang takin Manuna chuan a han en a, cross sign tattoo a ni. "Khai aww..." tiin Manuna chu a ding hluai a, "Tinge? I hria em ni?" SP chuan a lo ti vat a. Manuna chuan a lu a dawm vawng vawng mai, "Aw hria e, kan bawnghnute rawn sem thin kha a ni hi." a ti ta daih mai.

"Bawnghnute semtu a?" SP chuan a ti hu mai. Manuna chuan a lu buk nghauh nghauh pah hian, "Aw ni e, Sir...kan th(r)eka ania, ka nu nen pawh min nel lutuk. Tunlai chu ka damlo bawk nen kan inhmu khat deuh va, amah ngei hi a ni." tiin a chhang a. "Um..anih khawi veng nge i hria em?" a han ti leh a.

"Aw..kan veng tho, mahse an in tak chu ka hrelo."

SP chuan doctor te bulah chuan, "Ruang hi post mortem turin la phei nghal rawh u." tih pah chuan SI Zorema chu a en leh a, "Zorem...nangin a hmunhma vel hi lo enfiah ang che." a han ti leh a. Manuna chuan mak tih hmel zet hian, "Anih leh Sir, kei ve hi?" a lo ti hu mai. "Nang chu va haw rawh...i dinhmun hi a hlauhawm a ni." a ti ta daih mai.

"Sir, enge maw i sawi le? En ta che, he misual hian keimah hi a nih hi min beih."

"Nilo, i damlohna a hmang tangkai mai mai a ni."

"Nilove Sir, he case hi tunah, vawiin ni ngei ah hian ka kutah a awm tawh tur a ni. Anih loh chuan he misual sawi ang hian ruang chhar belh a ni zel ang, chu chu a thleng tawh tur a nilo."

"He misual vauna mai mai avang hian i hriselna in a tuar tur a nilo, midang kan awm alawm. Chubakah i doctor-i'n a phal lo, i nu ngaihtuah rawh." tiin SP chuan a hrilhfiah a, Manuna chu a lung nilo kher mai. "Ka dam chian hun ka nghah chhungin mitthi engzat nge awm leh ang? Chu chu ka ngaihtuah zawk asin, Sir." a han ti leh hram a.

"I chungah thil tha lo a thlen ka duh lo a ni, Manun."

"Hei hi ka buaina a ni a, keimah ngeiin ka ching fel duh a ni. Sir, kei aia rin i nei ta em ni? Kei hi min ring zo tawh lo tihna em ni?"

"Nilove Manun, ka rin em che avang leh i chungah thil tha lo a thlen ka hlauh vang zawkin i dam hma chu chawl rih la ka ti a ni."

Lungawi lo tak hian Manuna chuan, "Awle Sir." a ti a, an in lam pan chuan a haw ta a. In a thleng chu kawngka a lo inhawng tlat mai, a chhuah hma khan a kalh reng si a. Khua lah a thim tawh bawk nen, anu lah a thiante inah chaw eiin a chhuak daih si a. Anih chuan tunge lo lut ta ang, rang takin a pistol chu a phawrh a.

Inchhungah chuan a lut a, pistol chu a hum ran a. Inchhung lah chu a lo thim ruih mai. Muang chang chuan ngawi rengin in chu a en kual a, thawm pawh a dim khawp mai. Chutah anu room a tan ngei chuan thawm a hre ta, zawi muang chuan a va pan phei leh a. Room light chu a lo in on eng ut mai a, room chhungah chuan thawm a awm reng bawk.

Chutah kawngka chu a tlawh hawng thuai a, silai chuan a tin nghal a. Mahse room chhunga lo awm mek chu tu dang nilovin anu Pi Duhpuii a lo ni hlauh mai, "Awiii Bawiha, enge awmzia?" a ti nghal chul mai. Manuna chu a thaw huai a, pistol chu a dah tha leh a. Anu bawk chuan, "Tinge khatia i rawn tih vak kher a?" tiin a vin lek lek mai.

"Misual amaw ka ti che alawm."

"Thawm te rawn nei ve ta che, ngawi rengin tinge i rawn luh. Silaiin min tin lehnghal a, ka thinphu ran hman zia hi."

"I va rawn haw hma reng reng ve a?"

"Nia..chaw kan ei hma alawm. Nangpawh khawnge i chhuah daih a, ruang chu i va en ve leh tralh elaw?"

Manuna chuan a lu a lo bu nghauh ringawt a, "Amak e aw...damlo chung khan chhuak tawh suh. I taksa pawh ala chak loh em kha...luhlul lutuk." tiin anu chuan a hau hrep mai. "Ka hlauthawng a ni, ka nu." a ti chuai raih mai. Khumah chuan Manuna chu a thu deuh hnawk a, anu chuan ava thut hnaih a.

A kuta vawn sak pah chuan, "Engthil nge a?" tiin a han zawt a. "Ruang ah khan tualthattuin ka tan thu a hnutchhiah leh a ni." tiin a lo chhang a. Anu chuan, "Engthil maw?" a lo ti vat a. Manuna chuan a phone phawrhin misual ina a thu hnutchhiah, darthlalangah a ziah thlalak chu a en tir a.

Manuna bawk chuan, "Ka ngaihtuah che a ni, he misual hi misual naran a ni lo tawp mai." a han ti leh a. Anu chuan inring tawk tak hian, "Ka hlau lo, BAwiha. Ka ring che a, i awm alawm. Ka bula i awm chhung chu engmah ka hlau lo, mahse ka duh zawng chu tunah rih chuan hahdam la ka duh a ni." tiin a lo chhang a.

************************

A tukah chuan Zorema chuan hnuchhui hna chu a han tan leh ta a, media ho lah chuan police an dem nasa tawh kher mai. Mahse Inspector Manuna ber a tel loh vang nge ni, hmasawnna chhe te mah a awm lo. Manuna erawh in lamah a theih tawpin chu misual chu tunge a nih ang tiin a lo inngaihtuah ve bawk a, anu chu a veng deuh chawt a ni ber.

A bialnu Puipuii pawh a hmu ngai meuh lo, chumai nilovin khaw thim hnua chhuah a phal lo a ni. Achhan pawh eng dang a nilo, he tualthattu hian a hmelhriat hnai te hlir a target dawn tih chu Ramliana thih atang leh a thu hnutchhiah te atang khan a hre lawk vek. Chutiang a nih chuan he misual hian a target ho zingah Puipuii leh Pi Duhpuii chu a tel ve dawn tih a chiang a, Manuna pawh a fimkhur hle mai.

Manuna nu Pi Duhpuii hi house-wife pangngai a ni a, hnathawh a nei lem lo. A bialnu Puipuii erawh sawi tawh ang khan college zirlai ala ni a, chutiang bawkin a nau Hannah-i pawh phai ah lehkha zirin a awm mek bawk. Reilote chhung dawr kal a ngaih hlek pawhin anu chu a enzui vawng vawng zel a, a thla a muang hlawl lo a ni.

Chhun a lo ni a, Manuna chuan a room chu a hai a hai a. Anu chu lo lutin, "Enge i zawn vak vak a?" tiin a rawn zawt a. A pawhdawh vel enkual pah chuan, "Ka marker mawle, permanent kha...a sen duk lam deuh kha a nia." tih pah chuan a zawng zel a. Anu chuan, "Enga tan nge i tih a?" a lo ti leh a.

"Khawnge ka dah ka hre mai lo, ka ui angreng sia. USA atanga ka thianpa min rawn hawn ve ngat ania, ka ui alawm." tiin a lo chhang mai a. Anu chuan, "Ka inbual dawn ania, saw ka paratha ka kang a, i ril a tam hunah i lo ei mai dawnnia." tiin a kalsan a, Manuna chuan a chhang ta lem lo.

Chutah engemaw hre chhuak zawk ni awm tak hian a thil zawn lai chu a tawp thut a, "Marker...marker." a ti zawi sap a. A phone a phawrh vat a, tulathattu thu hnutchhiah, darthlalang keh thema marker a inziak ngei mai thlalak chu a en leh a. Chiang takin a han zoom a, marker rawh chu a sen duk a ni tlat.

"Hetiang marker hi chu a sial bik ania, waterproof a nia, spirit leh alcohol hlang pawhin a ti reh thei lo. A sen duk dan hi a tak bik a, double line angin a awm bawk." tia a thianpa in USA atanga marker a rawn hawn tuma an inpek lai te chu a ngaihtuah chhuak zawk mai. Phawk zet hian Manuna chu a meng kawk mai, "Kan inah...kan inah a lo lut.." tiin a phun sap mai.

Room atang chuan a chhuak a, "Nu..nu i inbual zo tawh em?" a ti nghal chel chul mai. Bathroom atang chuan anu chuan, "Enge ni vak vak? Ka la zo lo.." a lo ti ve tuar tuar bawk a. "Ka chhuah angai...inbual zo vat rawh." a han ti leh chul a. Anu lah chuan, "Chhuak la nimai lawm..enge min rawn koh vak vak?" a lo ti sam et mai.

Manuna mangang chuan chahbi a la a, a tlan chhuak nghal a. Chutih lai chuan an thenawm pa Pu Robert-a te nupa chu ava hmu a, ava pan phei nghal a. "Pu Robert, ka chhuah angai dawn a..ka nu saw lo awmpui lawk teh u..khawngaihin.." a han ti tawp a. Pu RObert-a lah chuan hrethiam hek lo, "Engtin nge i nu chu a awm a?" a lo ti heu mai.

Manuna'n a chhan hma chuan a nupui chuan, "Case chungchang em ni?" a lo ti hlauh mai. Manuna chuan a lu a bu nghat a, "Lungngai suh...kan lo leng rih ange..i chhuah chhungin." Pu Robert-a nupui bawk chuan a lo ti leh a, "Ka lawm e." tiin Manuna chuan a car lam chu a pan nghal a.

************************

Police Station ah chuan ava lut a, an lo en thup mai. SP Office lam a pan nghal a, a han kik karh karh a. "Lo lut rawh." tiin SP chuan a lo chhawn a, rang takin Manuna chu a lut nghal a. SP chuan mak tih hmel tak hian, "Ehe..Manun, enge ni a?" tiin a lo zawt a. "Sir, tualthattu kha kan inah a lo lut a ni." a han ti ringawt a.

SP pawh a ding zawk mai, "Eng a? A lo lut amaw?" a han ti vak a. "Aw...ka marker a la a ni." a han ti leh a. SP chuan, "Lo thu phawt teh." a han ti a, Manuna pawh chu a thu ve ta a. "Enge awmzia? Tinge i marker chu a lak kher ang?" tiin a han zawt leh a. "Sir, engtin nge a lo luh a, engtik laiin nge tih erawh ka hrelo." a han ti leh a.

"Engtin nge a lo lut tih i hriat?"

"Sir..ka marker kha ka thianpain USA atanga min lo hawn a ni a. A rawng a tak bik a, a reh mai mai thei lo bawk. Chubakah khami markar a thil kan ziah reng reng chuan double line angin a kal a, chu chiah chu tualthattu in thu hmin hnut chhiah a ziah pawh khan double line a ni."

"Chutiang marker chu he misual hian a lo nei ve reng pawh a ni thei asin."

"Nilo Sir..ka marker ang kha Mizoramah leitur a awm ve lo, USA a siam a ni."

"Anih chuan engtin nge misual chu in inah chuan a luh theih?"

"Ka hre biklo...chu chu keipawn ka ngaihtuah mek."

SP chuan phone phawrhin SI Zorema chu a phone a, "Hello Zorem..enge chanchin, khawnge i awm?" a han ti a. "Sir, mitthi chhungte inah kan awm. Thu kan zawtfiah mek a, enge ni ta?" Zorema chuan a rawn ti a. "Thuthar hriat belh te a awm loh chuan Station ah lo kal rawh." a han ti leh a, phone chu a dah a.

Manuna chu a han en leh a, "Manun, in lamah lo va haw rawh. I nu va awmpui rawh, chanchin kan lo hrilh leh ang che." a ti a. Manuna pawh chuan anu chu a ngaihtuah deuh vang nge ni, a hnial ta bik lo. A tho va, "Sir, chanchin ka lo ngaichang reng ang." a ti a. Pawnah chuan a chhuak a, a carah lutin in lam panin a haw leh ta a.

*************************

Zorema pawh chuan mitthi chhungte in chu a chhuahsan a, a kalpui constable Zuala bulah chuan, "Lo buaipui chhunzawm ang che, Station ah SP in min ko tlat." a ti a. Zuala chuan, "Awle Sir." tiin a lo chhang a. Motor ah chuan lutin chak takin a tlan a, Station lam pan chuan a tlan zel a.

Kawng reh deuh lai a thlen chuan kawng sira tu emaw, lo let reng mai hi a hmu ta. Car chu a tiding a, motor atang chuan a chhuak a. Chu kawnglaia lo let reng chu puanin a inkhuh a, a pheikhawk erawh a lang thei thung. Zorema chuan a zu pan hnai a, "Hey, tunge i nih...tho rawh." a han ti vin thak a.

Mahse chupa chu mitthi ang mai hian a mu khawng reng a, a che eih lo. A puan khuhna chu Zorema chuan a han hlip kiang a, chupa hmel a en chuan a mak a tih hmel hle mai. "Ehe...nang.." a sawi zo hman lo. Chupa chu a rawn meng thut a, chemte a lo hum reng chu niin. A rawn tho thut a, Zorema chu a dulah tak a vit ta mai.

Zorema chu a thingthi hnawk a, rum em em hian chupa chu a en a. Chupa chuan na tak hian a han vit leh siah a, Zorema chu a ding thei tawh lo. Leiah chuan a tlu zawi hnawk a, chu misual chuan a ipte atang chuan paper hi a phawrh chhuak leh a, tun tum chu paper them mai mai a ni tawh lo.

Paper phek khat tawp a ni a, a chhungah chuan thu a inziak khat vek bawk. Misual chuan paper chu a han lek kang vang vang a, mahse dahna mai tur a hre lo. Zorema pheikhawk bun lai chu a han thlek leh vang vang a, a pheikhawk hnuai chu a chemte chuan a zai kau sak a. Chumi chhungah chuan paper chu a zep lut a, a kalsan leh ta a ni.

***************************

Manuna chuan in ala thleng lo, anu ngaihtuah reng chunga a tlan lai chuan kawng sira mipui lo awm khawm luai luai chu ava hmu a. Motor chu ti dingin rang takin a chhuk a, mipui lo awm khawmna lam chu ava pan ve a. Thenkhat chuan, "Police chu in call em?" te an lo ti a, thenkhatin, "A rapthlak e.." te an lo ti a, an lo phun nuai nuai mai.

Manuna chu mipui karah chuan ava inrawlh phei a, a thil hmuh chuan a barakhaih hle mai. "Nilo...Zorem...ZOrem..." tiin Zorema bulah chuan a va thingthi nghal a. A sawi vak vak a, "Zorem harh rawh...khawngaihin harh rawh." a ti a, mahse Zorema chu chet pawh a che eih tawh lo.

A dula hliam chu a rawmawl hmang chuan a hmet a, "AMUBLANCE KO RU.." tiin mipui ho chu a vin hrep hrep mai. Zorema kutah chuan a vuan a, a mar a lo la awm hlauh mai. "Zorem..i la dam ania. Khawngaihin min kalsan suh, khawngaihin.." tiin a be mawlh mawlh a, reiloteah chuan police dang leh ambulance pawh a lo thleng ta.

Police dang ho chuan Zorema hmu hmasa ber tute chu a hmunah chuan thu an zawtfiah nghal a, Zorema pawh rang takin Damdawiin pan pui nghal a ni. Vanneihthlak takin Zorema chu a damchhuak hlauh mai a, mahse engtik ah nge a harh chhuah dawn tih doctor te chuan an la sawi thei lo thung.

*****************************

Manuna te inah chuan SP chu a leng a, an titi dun a. Verandah lamah chuan thingpui an in a, "Tunah chuan kawng a awlsam deuh tawh dawn e." Manuna chuan a han ti ringawt a. "Engvang ngawt chuan maw?" tiin SP chuan a lo zawt a. "Zorema'n hliam a tuar hi chu a pawi ka ti takzet, mahse kan hnuchhuinaah hian kawng min siam sak zawk a ni." a han ti leh a.

"Enge i sawi awmzia?"

"Sir, he tualthattu hian Zorema hi a that ngei angah a ngai dawn a. Mahse Zorema hi a dam chhuak a, a harh hun chiah kan nghak tawh. A harh chhuah hunah chuan he misualpa hmel hi a hre ngei dawn a, kan hmelhriat a lo nih phei chuan a sawi thei ngei ang."

""A tha khawp mai, mahse a damchhuak lovang tih ka hlau a ni."

"A dam chhuak em em ang, doctor te pawn a ngaihtuah awmloh an tih kha."

"He tualthattu hian a tual thah apiangin a finger print a thup vek thei a, glove a bun ziah bawk. A awmzia chu misual naran chu a nilo tawp tihna ani phawt a, mi fing tak a ni."

"Ni chiah e, Sir...chuvang alawm case hi ka kutah dah mai rawh ka tih."

SP chu a thaw deuh huai a, "Manun..i lu a hliam an thuina pawh an la phelh lova, i la dam lo a ni. Chubakah i nu hi i ven angai, a hlatah awm suh. Keini aia hria i doctor ber pawhin la hahchawl turin a ti che a, keia thu a he case hi pe ngawt thei che ka ni hleinem." a han ti a. "Sir, Zorema ber heti hian a awm tawh a. Ka kutah dah tawh mai rawh, ka dam tawh alawm." tiin Manuna chuan a chhang a.

Chutih lai chuan Constable Zuala a lo kal a, "Sir, hei hi SI Zorema pheikhawk hnuaiah a lo inzep a ni." tiin paper chu SP a rawn pe a. Manuna zawk chuan a lo la vat a, "Keima tana a ziah bak a ni lovang." tiin paper chu a han pawt pharh a. Manuna chuan a han en a, "Tun tum chu a ziak thui deuh." tiin a nui suk a.

"Inspector Manun, ka rin ai daihin ilo nep ka ti. Police fing leh huaisen, tuma hmaa la tlawm ngailo an ti che a. Tunah chuan kei hi ka chungnung zawk tlat chu a nih hi, engmah tih theih i nei lo. Ngaihtuah rawh, ka mi thah tawh ho hi nangmah hmehriat tute vek an ni. I laina hnai te leh i hmelhriatte chauh ka that dawn. Hun i khawh ral hnem tawh, i damlohna kha chhuanlamah i la hmang reng dawn em ni? Ka tualthahna apiangah thu ka hnutchhiah che a, chet i lak ve vat ka ring asin. Mahse midang kutah i la dah cheu va, heng police satliah ho nena game khelh hi ka peih ve lo. Nangmah a ni ka duh, nangmah ngei kha. Nang nena inbeih hi alawm ka duh, midang nilovin. Hei hi hre rawh, tun chiah chance ka pe tawh ang che. Midang kuta ila dah a nih chuan ka thah tur te chu i hmelhriat satliah te an ni tawh lovang, i tana mi pawimawh tak tak te leh i hmangaih tak te an ni tawh ang."

Manuna chuan thinrim tak hian paper chu a hlum a, "Sir...khawngaihin, ka kutah dah rawh." a han ti leh a. SP chuan, "I doctor kan biak phawt angai ang." a lo la ti hram a. "Ka doctor chuan a phal dawn chuang lo, ka la damloh vang pawh anilo, min hriat chianloh vang mai mai a ni. he thuziak hi en teh, a lehpekah chuan ka chhungte a target tawh dawn asin." a han ti leh a.

SP chu a ngawi vang vang a, "A tha e...zaninah chuan i nu hi lo awmpui leh phawt rawh. Naktuk atangin case hi i kutah a awm ang, vawiin ah chuan a rem ka la ti lo." tiin a chhang ta nge nge a. Manuna pawh a thaw huai mai, "Ka lawm e, Sir..theih tawp ka chhuah ang." a han ti a. SP chuan Zuala chu a en a, "ZAnin ah duty ang che..SI Zorema i veng ang." a han ti leh a.

Manuna chuan, "Zuala, fimkhur ang che. Uluk takin veng ang che, kan fimkhur angai ania. He misual hian news a en ve vek anga, Zorema hi ala dam tih pawh a hre dawn. Chuvang chuan a thil tum chu Zorema tih hlum law law a ni, tunah chuan a hlauh ber chu Zorema rawn harh chhuah hi a ni." a tlo ti ve bawk a.

**************************

Zan dar 10 a pel tawh a, Pi Duhpuii chu a hnar suk suk tawh. Manuna erawh a muhil thei ngang lo, a vei kual sek mai. A hlauh ber chu tualthattu khan Zorema chu Hospitalah va kal chilhin a lo ti hlum mai ang tih mawlh mai chu a ni. Engdang mah a ngaihtuah thei lo, Puipuii nen chuan han inbe ve thin mahse a tui hlawl hrih lo a ni.

Hospital lamah pawh Zorema chu tha taka ven a ni a, Zuala pawh a meng kar mai. Zorema chu OT ah dah ala ni a, oxygen hip tir a ni bawk. Constabel Zuala duty na hi Zorema awmna ward chhung a ni lova, mahse Zorema mu lai chu a hmu thei vek tho. A awmzia chu Zuala duty na hi room pakhat tho a ni a, glass atang chuan Zorema mu lai chu ava hmu ve thei vek tho tihna a ni.

Dar 10:30 a ri a, number hriat loh atang chuan Zuala chuan message a dawng ta. "Hello Zuala." tih hi a dawng ta tlat mai. "Tunge aw?" tiin a reply vat a. "Min hre lovang...tuman tunge ka nih an hre hleinem." tiin a rawn thawn leh a. Zuala ngaih chu a tha lo tan, "Tunge i nih? Enge i duh?" tiin a thawn let ve leh a.

"Tunge ka nih maw? KA sawi tawh kha....tuman tunge ka nih an hrelo. Mahse i hriat theih dan tur chuan tualthattu ka ni, chuan ka duh chu Zorema kha a ni." a rawn ti ta mai a, Zuala chu a ding nghal zawt mai. Rang takin Zorema chu ava en a, mahse a mutna ngaiah a lo la mu reng.

Number chu a call nghal a, mahse a pick up duh miah lo. Vawi 10 chuang a call hnu pawh chuan a ring quit thak thak zel, message chu ava thawn ve leh a. "Inpe mai rawh...tunge i nih hi hailan a ni vat dawn." tiin a han thawn leh a. "KAn hria ang chu." tih chauh chuan a rawn reply a.

Zuala chuan message tam tak a thawn a, mahse reply na a dawng tawh lo. A han call leh a, out of service a inti zel tawh bawk. SP hrilh tumin SP number chu a han hmet chhuak a, mahse a mi rin em em leh a ngaihsan em em, a senior leh a boss ni bawk, Inspector Manuna chu a call ta zawk a.

Chanchin zawng zawng Manuna a hrilh hnu chuan Manuna pawh a rang a rangin Hospital lam chu a rawn pan ve nghal a, duty-na room ah chuan a rawn lut a. "I lo thleng maw, Sir?" Zuala chuan a lo ti a. Manuna chuan Zorema chu ava en a, "Zorema hi a thi tur a nilo, kan innghahna awmchhun a ni." a han ti a.

"Sir, engtin mah a awm lovang. Ka awm alawm, ka hna ania, ka duty dawn alawm."

"Khawimaw a number ka lo en." Manuna chuan a han ti a, Zuala chuan a entir a. Manuna chuan paper ah a ziak thla a, "I call pawhin out of service a inti zel a, a sim card chu a tichhe nghal tihna a ni. Number hi trace hrim hrim a tha ang, ka lo buaipui ang." a han ti a. Zuala chuan, "Sir...police dang kan pun mai dawn em ni?" a han ti a.

"Nangmah in i veng hreh em ni?"

Zuala chu a tlawmngai hle mai, "NGai love Sir...nangmah i hlauhthawn takin ka ti mai mai mawle. Keimah chauh pawh hian ka veng hneh lutuk, engtin mah a awm lovang." tiin a inseh ruh tun mai. "Hospital chhungah hian a awm reng pawh a ni thei, fimkhur taka i duty angai dawn ania. Security guard lam ho pawh fimkhur turin ka hrilh vek tawh a, a tul a nih chuan police force ang pawhin duty mai tur." Manuna chuan a han ti leh a.

"Sir...helam chu ka kutah dah tawh rawh. Lo va haw rawh, ka awm alawm. Chubakah i nu i rawn kalsan tawp a, in inlamah pawh a lo che leh thei asin." Zuala chuan a han ti a. Manuna chu a nui suk a, "Lungngai suh, ka nu chu pawnah a awm...ka rawn hruai ve alawm." tiin a chhang a.

"Aw a nih chuan lo luh tir ve ta che, pawnah i awm tir tawp ami?"

"Casualty kawtah ka innghah tir, inah keimahin ka kalsan tawp ngam hleinem."

"Anih phei chuan va haw tawh raw, Sir..ka awm hi..lungngai suh."

Manuna chu a han ngawi vang vang a, "REilote chu ka la awm duh a ni, ka nu kan phone lawk ange." tiin a nu chu pawnlamah ava be zuai a, reiloteah a lo lut leh a. "Thingpui chah lawk ila, indun leh phawt ang hmiang." a han ti leh a, thingpui chu in dunin an han titi dun leh a. Dar 11 velah chuan Manuna pawh chuan haw zai a rel ve ta a, inlam pan chuan anu nen chuan an inkhalh phei leh ta a ni.

****************************

Manuna te haw hnu reilo teah chuan Zuala chu a mut a chhuak tan ta tlat mai, men luih hram hram chu a tum a. Mahse a hriatloh hlan chuan a muhil ta nge nge a, a thu kun lap mai. Chutih lai chuan OT room kawngka chu zawi muang hian a rawn inhawng a, Zuala lah chu a muthlu mai pawh nilovin glass hnung chhawn zawnga a thut avang chuan engmah a hrelo.

OT chhungah chuan mipakhat, dum veka inthuam, kutkawr dum bun hi a rawn lut ta a. Zawimuang hian Zorema mutna zawna parda chu a zar phei a, tichuan Zorema drip khai chu a en vang vang a. A ipte atang chuan syringe a phawrh chhuak a, chu syringe ah chuan eng damdawi emawni hi a awm bawk.

Drip ah chuan syringe chu a han vit lut a, a kap lut ta hrawk mai. Ngawi reng chuan a chhuak leh mai a, Zorema pawh a mut ngaiin ala mu reng. Second 10 vel hnuah chuan Zorema chu a rawn meng hrawk mai a, a lungphu chu a rang tha kher mai. A thaw hrawk hrawk a, a khur ngat ngat bawk.

Khum che lawih lawih khawp chuan a tal ta vak vak mai a, rang takin doctor leh nurse an rawn lut a. Zorema chu an man bet a, an buapui nghal vat a. Thawm ri nuai nuai chu hria in Zuala pawh a lo harh ve ta, hmanhmawh takin OT chhungah chuan ava lut ve a. "Enge thleng? Engthil nge thleng?" a va ti chiam chiam mai a.

Nurse pakhat chuan, "I duty ani lawm ni? I va rawn harh tlai ve.." tiin a lo hau hrep mai. Doctor chuan, "Ka pu, pawnah min lo va nghak rawh." tiin a nam chhuak titih a, Zuala chu a mangang hle mai. Zorema chu a awmah te chuan an nem vak vak a, mahse a lungphu chu a rang tulh tulh mai.

Theih tawp an chhuah a, mahse awmzia a awm lo. Zawi zawiin a lungphu chu a muang telh telh a, a chau telh telh bawk. Nurse pakhat chuan, "Sir...kan chhan hman dawnlo...engmah awmzia a neilo." tiin doctor chu a hrilh a. Reiloteah chuan a lungphu chu a tawp ta nge nge a, Zorema chu a thi ta.

****************************

TO BE CONTINUE

WHO?

(MIZO THRILLER FICTION STORY)

Written by : Aaron Malsawmdawngzuala

Chapter - 3

***********************

Zing dar 4 vel a ri tawh a, Hospitalh ah chuan an buai nuai nuai hle mai. Zuala duty-na room ah chuan police thenkhat leh Zuala leh Manuna te chu an awm a, Manuna chuan Zuala chu a hau nasa kher mai. "Hna pakhat lek pawh i hlen thei lo chu ania, engtin nge misual kha a lo luh lai i hriat loh theih zawk?" tiin a vin hrep mai a.

"Ka tihpalh a ni, Sir."

"Tihpalh tih rikngawt vang khan Zorema hi a lo nung leh thei em ni?"

"Ka lo muthlu a, a pawi ka ti takzet."

"Ni e..pawi i ti khawp ang. Tikha chuan kan innghahna ber pawh engmah lo mai a ni leh ta, nangmah vang vek."

Chutih lai chuan constable pakhat hi a lo lut a, "Sir Manun, doctor in a hmu duh che." a rawn ti a. Manuna chuan rum zet hian Zuala chu a melh a, "Hrep tak che hian.." tih pah chuan a chhuak ta a. Doctor chu ava hmu a, "A taksa chhungah hian damdawi hmuh ani a, lethal injection a ni." tiin a lo hrilh a.

Manuna chuan mak a ti kher mai, "Lethal injection a? Eng damdawi ber nge?" tiin a lo zawt nghal a. "Barbiturate medicine, a chak ber chi a ni lehnghal. A lungphu a khawih hmasa ber a, tichuan ahnuah a thluak. Second rei nghah angai lo, damdawi hian hna a thawk chak lutuk." tiin a lo chhang leh a.

"Anih chuan a vein ah a chiu lut em ni?"

"Nilo...drip ah hian a kap lut zawk. Drip kan khai lai mek hi thisen chaw pangngai a ni a, barbiturate hi a pawlh tihna a ni. Hemi damdawi hlang hi chiu lut phei se chuan second 10 hnu velah a thi nghal ang, mahse thisen chaw hian a pawlh dal deuh avangin a thi har mai mai zawk a ni."

"Anih leh lethal injection hi Mizoram ah leitur a awm em ni? Chutiang damdawi te pawh chu?"

"Aih awmlo...tiang damdawi ang chi phei hi chu internet atang pawhin Dark Web atang chauhvin mi pangngai tan chuan a lei theih ang, illegal a ni a...kei tak ngial pawhin ka lei thei lo."

"Ka lawm e, Doctor."

Doctor chu a kalsan a, OT chhungah chuan ava lut a. Ruang erawh lak a lo ni tawh a, a hmunhma vel chu forensic lam chuan an lo en mek a. SP pawh a lo awm ve a, Manuna chu ava pan a. "Manun..ka sawi tawh ang khan vawiin atangin he case hi i kutah a awm tawh ang." a lo ti a.

"Ka lawm e, Sir...hun rei tak ka mamawh lovang. Ka chhuichhuak ngei ang, ka kut ngei hian ka man ang." inringtawk tak hian Manuna chuan a lo chhang a. SP chuan, "Doctor khan min lo hrilh a...lethal injection te chu Mizoramah phei chuan neih theih a ni lo tawp ang tluk ania, he misual hi mi namai lo tak chu a ni." a han ti leh a.

"Sir..ramdang atanga black market hmanga a chah a ni tih a chiang reng a, dark web a hmang a ni ngei ang. Dealer a nei dawn chiang sa bawk, anih loh pawhin tiang lam hi amah hian sumdawn nan a hmang pawh a ni thei tho mai." Manuna chuan a han ti a. SP chuan a chhang lo, "Sir..Mickey-a?" Manuna bawk chuan a han ti deuh thut a.

"Tu Mickey-a maw?"

"Drug Dealer..kan man tak kha..ka lu a vawtu ber kha.."

"Chu chu ngati nge?"

"Drug Dealer a ni a, black market hmang a ni ve bawk a. Ama pawl te zinga mi pawh a ni maithei asin, kan va hmuh angai a ni." a han ti a, SP pawh chuan a lo pawm thlap. "A tha e, CCTV kha kan check tawh tho nangin, i duh chuan nangmah ngeiin va check tha ve leh la, Central Jail lamah chuan kan pahnihin kan kal dun dawnnia." a ti a, Manuna chu Control Room lam pan chuan a kal ta a.

*************************

CCTV footage chu a han check leh ta a, mahse han rinhlelh tur em em a hmu lo. CCTV hi OT bul, Zorema ward awmna thlen hma chiah ah a awm a, Zuala duty-na bul lawk ah a ni. Nurse leh doctor te chu an inkal pel leh deuh zauh zel a, abak engmah ringhlelh awm a awm lo. Tichuan pawnlam CCTV footage te chu a han en kawp leh a, a uluk hle mai.

A hnu deuh lawk ah chuan Damdawiin Garage panna step atanga palian ve tak, mask vuah tlat mai, thawmhnaw dum vek a inthuam rawn chho hi a hmu ta. Chumi hunlai a dar zat chu a han en a, zanlai dar 12:15 chiah chiah a ni. Chupa chu a en zel a, lukhum lum a khum tlat avang leh a thawmhnaw hak a phui that em avang chuan tunge a nih a hre thei lo.

A ringhlel ta tlat mai, a en bik ta deuh va. CCTV in a cover phak loh chinah chuan a kal a, a bo ta daih mai. Footage dang ho chu a en zel a, chupa chu a zawng char char a. A hnuah chuan reception lam a pan lai chu a hmu leh a, mahse tumah a be lo. CCTV cover phak loh china a kal apiang chuan CCTV hnai ber footage chu a en kawp leh zel a, OT lam a pan ta ngei e.

"Ekhai aw.." tiin OT lam CCTV chu a check kual leh a, mahse a lo lang tawh tlat lo. A han nghak deuh vang vang a, tlem tlem chuan a forward zeuh zeuh bawk a. Chutah a lo lang leh ta, ward bula thutthleng ah chuan a thu a. A phone a phawrh a, a khawih mual mual mai. Chutah kutkawr a la chhuak a, a bun a.

CCTV cover phak loh chinah chuan a bo leh ta daih mai, a han nghah leh vang vang hnu pawh chuan a lo lang tawh lo. A forward leh deuh hret a, a lo lang leh hlawl mai. Mahse kukawr erawh a lo bun tawh miah lo, "Umm...hepa ngei hi a ni e." tiin video chu a capture a, thlalak chu phone ah a inthawn nghal bawk a.

*********************

Security duty te bulah chuan a zu chhuk a, "Hepa awm ang hi nizanah a lo kal lai in hria em?" tiin a zawt a. Security chuan a han en vang vang a, "Aih...ka hmuh awm pawh ka hrelo." tiin a lo chhang a. "CCTV ah pawh a lang vek, engtin nge in hriat loh theih?" tiin a vin vak vak a. Mahse security ho chuan an hre tlat lo, tihngaihna hre lo chuan Station lam a pan leh ta ringawt a.

SP Office ah chuan ava lut a, Zuala chu SP chuan a lo la zilh mek a. "Manun, lo lut rawh." a lo ti a, Manuna chu ava lut a. "Sir, CCTV ka check nawn leh a, rinhlelh ka nei a ni." tih pah chuan engkim chu a han sawifiah ta a. SP chuan, "Zuala, damdawiinah let leh la..lo va buaipui ang che." a ti a, Zuala chu a chhuak ta a.

"Anih chuan tunah chuan em ni jail ah chuan kan kal ang?" tiin a han zawt a. Manuna chuan, "Aw Sir...a rang lama kan chet a ngai." tiin a lo chhang a. "Anih chuan chaw ei phawt ang, ti daih ila..engtin nge i nu hi?" tiin SP chuan a han zawt leh a. "Thenawm Pu Robert-a te ka pun leh ta tawp mai, a ngaihtuah awm lovang." tiin a lo chhang a.

Station bul canteen ah chuan chaw chu an ei dun a, an titi nasa dun kher mai. "Sir..he tualthattu hian min huat vang leh min cho hrim hrim vang a hetiang thil ti a ni pawhin ka hre tawh lo." Manuna chuan a han ti a. Rawtuai bai tui hawp rik hrawk pah hian, "Anih enge i ngaihdan?" tiin SP chuan a lo zawt a.

"Plan a nei a ni.."

"Plan te chu nei e, plan mumal tak nen alawm a chet zel."

"Ni e, plan mumal taka a chet chhan chu enge maw duh a nei a ni."

"Enge a duh chu ni a i rin?"

"Chu tak chu keipawn ka hriat duh chu a ni."

"Engpawh chu nise, Mickey-a hi a inrawlh i ring takzet amaw?" SP chuan a han ti leh a. "Zorema thah dan tur a ruahmanna atang hian damdawi lam hre tak chu a ni chiang alawm, lukham hmang pawh a that mai thei a. Oxygen pipe cheh chah emaw, reh hlum mai pawh a thei reng. Mahse chutiang chuan a tilo, misual hremnana an hman thin, lethal injection ngat a hmang ania." tiin Manuna chuan a chhang a.

SP pawh chuan a lu a han bu nghauh nghauh a, "Ni e....Mickey-a pawh drug dealer a ni a, mizo a ni chiah lo lehnghal ani lawm ni?" a han ti a. "Aw ni love...mizo pure a nilo, Manipuri lam deuh a ni." tiin a chhang a. SP chuan a sana a han en a, "Dar 9:30 chu a ri der mai, Zuala chu enge a han an ang aw?" a ti vawng vawng a.

"Ka thin a ti rim ania, nizanah pawh min ring rawh chuti khati a tia, duty tir chi pawh a ni tawh loh kha." Manuna chuan a ti deuh nang nang mai. "Umm...keini pawh i kal teh ang, chet vat vat angai." tiin SP chu a tho va, pawn lamah a zui chhuak a. Manuna pawh chuan an ei man vel chu a pe a, a zui chhuak ve ta nghal a.

**************************

Mickey-a chu a cell chhungah chuan a cell mate nen chuan card an lo deng a, an lo titi nasa dun kher mai. A tan puipa hi pawngsual vanga tang a ni thung, "Ka chak leh ta...i va han thiamlo tak, khelh pui i nuam lo si." a han ti vel a. A cellmate chuan, "Mickey..drug dealer nih hi a hlawk em?" tiin a zawt deuh tawp mai.

"Hlawk e...sum hlir animai, sum hlir."

"Han tih ve mai ka duh a ni."

"Haha..mi nazawng tih chi a nilo..fimkhur angai lutuk."

"I fimkhur loh vang animaw..hei ka bulah i tan?"

"Mai mai a che...ka tang rei dawn hleinem."

"Enga? Kum 10 chhung tang tur i nih kha..trail pawh in neih vek tawh kha."

"Kha trail phiangsen khan ka nunah engmah a nghawng lo, ka tlanchhuahna tur a dal lo bawk."

"Enge i sawi awmzia?"

"Ka tlan chhuak dawn, kum 10 chhung heta awm te chu...ka theih i ring em ni? Ka tar hman vek tawh anga sin."

"Engtin nge i tlanchhuah theih anga, keipawh ka tel ve duh ania."

"I la naupan em kha...pawngsual te chu kum 18 chiah alawm an tan dawn." tiin Mickey-a chuan a lo nuih sawh vela, "Mickey, ka ti tak tak ania. Ka tel ve a nih chuan in pawlah ka tang ang, i thu ang zelin ka awm ang." tiin a cellmate chu a phur khawp mai. "Chung te chu hunin a hril ang chu." tiin a lo chhang leh mai a.

"MAhse engtia tlanchhuah nge i tum a?"

Mickey-a chu a han thaw hak a, "Tunah hian jail ah ka awm a, ka mi leh sate tumah ka be tlang thei lo. Mahse ka hnuaia thawk ho hi mi huaisen tak tak an ni a, a tul chuan tual thah pawh an hreh lo. Kan himna tur a nih phawt chuan hmeichhia leh naupang pawh kan that mai thin, mahse tual thah erawh ka la ti chiah lo thung." a han ti te te a.

"Han sawi vat mai teh."

Mickey-a chu a han hawi kual deuh zuk zuk phawt a, "NGaithla rawh, Inspector Lalnunchama hi i hria em?" a han ti leh phawt a. "Aw hre tehreng e, ka hmelma alawm. Amah hian alawm min chhuichhuak, kha hmeichhe naupang kha chuan engmah a sawi ngam lo. MAhse kha police khan min chhuichhuak thei hram a, aman alawm min man." tiin a lo chhang a.

Mickey-a chu a nui sak a, "Warden te titi thawmah leh chanchinbu vel atanga ka lo hriat danin Inspector Manuna hian hmelma thar a nei a, tunah hian a chhui mek a ni. Keipawh Manuna hi ka hmelma a ni a, ka lo vaw hlum law law lo kha tun thleng hian ka la inchhir. He misual hian tunah hian a chhaih buai mek a, Manuna hian a ngam lo takzet a ni." a han ti leh a.

"Chu misual chu i hria tihna em ni?"

"A chet dan leh Manuna a vau dan te, an police pui mi pahnih ngawt a thah danah te hian ka mite zing ami a ni tih ka chiang. Anih loh pawhin mi pakhat chauh thil tih a nilo, ka naute thil tih a ni ngei ang. Jail atang hian loh theih lohvin amah Inspector Lanunchama ngei hian min la chhuak dawn, min la chhuak dawn alawm." confi tak chuan a han ti leh a.

"Anih i chhuah hunah chuan....kei ve hi?"

"Ka chhuah rualin hruai ve ta che ila, enge min tihsak ang?"

"I naute zingah ka tel ve ang, engkim a theih apiang ka ti ang."

Chutia an titi dun lai chuan prison guard pakhat hi a lo kal a, "Mickey, kan tu i nei e." a rawn ti a. "Tu in nge kei hi min rawn kan ve duh anga?" tiin Mickey-a chuan a lo zawt a. Guard chu a nui sak a, "Inspector Manuna leh SP an lo kal..an hmu duh che a nih chu.." a ti ta mai a. Mickey-a chuan nui sak pah hian a cell mate chu a han en a, "Mi chhe sawi chu koh aiin a hnai an tih kha mawle." a han ti deuh kher a.

**************************

Mickey-a kawmna tur bik hian room pakhat an dah awl a, in kanna hall (prison visting hall) hman a nilo. Mickey-a hma takah chuan SP leh Manuna te chu an thu a, Mickey-a chuan a hlauh loh dun hmel kher mai. A han faifuk deuh hlarh hlarh a, "Ka rin aiin min rawn kan har ka ti reng a ni." a la ti ta deuh deuh a.

Manuna chu a nui sak a, "Anih chuan kan lo kal chhan chu i lo hre daih tawh animaw?" a han ti a. "Engdang vak nge ni chuang anga? Tualthattu zawnchhuah in duh tiraw? Kei chu ka nilo ania." nui chung hian a lo ti a. Rum zet hian Manuna chuan a melh a, "Mickey, tunge a nih sawi rawh." a han ti chang fak mai a.

"Hrilh ta che ila..enge min tih sak ang?"

"Ka lu a i vuak avang hian ka ngaidam ang che."

"Hmmph...anih chuan tunge a nih ka hre bik lo."

"Vuak ve i duh em ni? i lu ah khan ka vaw ve dawn em ni? I vuak aia na khan ka vaw thiam ania."

"Prisoner te i duh duh huna kut rawn thlak theihna i nei lo, dan hi ka hre ve asin..Inspector."

"Tualthattu chu i nilo tih kan hre vek, mahse i inrawlh ve tih hi ka chiang. Rinhlelh te zingah i tel, chuvang chuan kan duh chuan kan dawp thei che."

"Jail ah min khung tawh hi...trail pawh kan nei tawh. Kum 10 chhung jail tang turin min ti a, pawisa tam tak ka chawi bawk. Engtin nge jail atang hian tual ka rawn thah daih daih theih ang?"

Manuna chu a insum zo lo, "Nangmah i nilo, kan hria. I mi leh sate zing ami an ni, tunge min hrilh vat rawh." tih pah chuan dawhkan chu a chum bur mai. SP chuan lo dang vatin, "Khaih khaih...Manun, insum rawh...keiman kan bia ange." a lo ti vat a. Manuna chu a tho va, bang kil lamah chuan ava phei a.

SP chuan Mickey-a chu a han melh ran a, "Enteh Mickey, he tualthattu hi man chhuah anih hunah chuan a thil tih dan zawng zawng a puang anga, i hming pawh a lam tel ngei dawn ania. Chutih hunah chuan nang hian i tawrh belh ang, kum 10 mai nilo, kum 10 dang pawh i tan hun chhung hi an extend leh thei asin." a han ti a.

Mickey-a chu a thaw hak a, "Ka mi leh sate pawh lo ni se, tunge ka hrelo. Officer, engmah ka hrelo." a han ti a. Manuna thinrim chu rawn pheiin, "Zep suh..sawi rawh." tiin Mickey-a chu a rawn hnek siah mai. SP chuan a lo dang vat a, Mickey-a chu thutthleng atang chuan a thal thla tawp mai.

"Manun, insum rawh...hawh..i chhuak phawt teh ang." tiin pawn lamah chuan a chhuah pui a. Mickey-a thinrim chuan, "Inspector Lalnuncham, i hre khawp ang." a rawn ti zui lawm lawm mai. Guard dangte pawh an lo kal a, Manuna chu an hruai chhuak ta a. SP chuan, "Manun....khatia i chet kha ka ring reng a ni. Pawnah hian lo awm rawh, keiman ka'n bia ange." tiin a luhsan leh ta a.

**********************

Darkar 1 vel hnuah chuan SP chu a rawn chhuak leh a, "Sir...a inpuang em?" tiin a lo zawt nghal a. SP chuan a lu a thing a, "A hrelo tak tak a nih hmel." a ti zawi sap a. "Nilove, a zep mai mai a ni. Kutthlak deuh ila, a sawi mai ang mawle." a ti nuah nuah a. "Ka ringlo, a hre lo tak tak niin ka hria." tiin SP chuan a chhang leh a.

Chutih lai chuan SP phone chu a rawn ri a, "Hello....awle, kan lo kal nghal e." tiin phone chu a dah lehnghal a. "Tunge ni a?" tiin Manuna chuan a lo zawt vat a. "Forensic lam ania..Zorema post mortem an zo a." tiin a chhang a. "Thu hnutchhiah a awm leh aniang maw?" a lo ti leh a. SP chuan a lua bu nghat ringawt, rang tak chuan Lab lamah an let leh ta nghal a.

*************************

Lab chu an thleng a, Doctor Samuel-a a lo awm a. "Doctor, enge result?" tiin Manuna chuan a zawt nghal a. "A ruang hi post mortem lo phei ila chu engmah tualthattu hian thu hnutchhiah a nei lo emaw kan ti vek hial ang, hemi paper them hi hmuh a ni." tiin paper chu doctor chuan a lo pe a.

Manuna chuan lak pah hian, "Khawiah nge in hmuh?" tiin a han zawt leh a. Doctor chu a ner sak a, "A beng chhungah." a ti ta daih mai. "Abeng chhungah a?" tiin SP pawh chuan mak a lo ti kher mai. "Aw ni e, a hnawh a hnawh luh a ni. hmawlh emaw, engemaw thil tlawn...beng chhunga leng nisi..chumi hmang chuan hnawh luh a nih hmel." tiin doctor chuan a lo chhang a.

Manuna chuan paper chu a han en a, thuziak a lo awm leh ngei e. "Case chu i kutah a awm ta....game chu tan a ni dawn chauh e. A hmasa ber a tan tihtur i nei, in veng field pavilion hnungah i thil tur ka dah a, va la ang che." tih hi a lo inziak a. Manuna leh SP chu an in en a, "A tawp chu kan la hnaih loh hmel kher mai." tiin Manuna chu a phun sap ringawt.

****************************

Field lam pan chuan an kal leh ta a, pavilion hnung lam chu an va en ngei a. Chutah chuan present bawm hi a lo awm a, Manuna chuan ava la a. A chhungah chuan tape recorder hi a lo awm a, "Engthil tak ni ang maw?" tiin tape chu a la chhuak a. SP chuan, "Plawy rawh." a lo ti vat a.

Mahse Manuna chuan a play ngam mai lo, "Sir, bomb te pawh a lo ni thei asin." a han ti a. SP pawh chuan, "Ni e, a ni thei tho mai. A chhunglam kha han hawng chhin teh, a hriat mai ang chu." a lo ti ve bawk a. Hreh ru deuh chung chuan Manuna chuan a han hawng a, batery pahnih hi a lo invuah a.

Bomb chu a nih hmel loh hle, "Umm..bomb a nihna chhan tur ka hmu lo." tih pah chuan a vuah leh a. Tape chu a play ta, aw thum leh puam zel hi a rawn tawng ta mai. "Hello Inspector, kan game khelh lai hi nuam i tih ve ngei ka beisei. Mi fing tak leh hnuchhui thiam tak i ni a, ka chhuang takzet che. I theih tawp chhuah ang che, ka rin aiin khelh pui i nuam lo tlat." a rawn ti ta mai a.

A reh leh deuh vang vang a, enge maw a ri nuai nuai a. Chutah a rawn tawng leh a, "Ngun takin ngaithla rawh, zanin dar 9 ah hian ruang pakhat in chhar leh dawn. Mahse chu chu i rinloh deuh a ni thung ang, chuvang chuan tuber nge ni dawn tih i rin dik chat angai. I ring dik anih chuan zanin hian min man dawn, anih loh chuan....I WILL TAKE YOUR HEAD." a rawn ti leh a, a tawp daih mai.

Manuna chu a han thaw deuh huai a, "Sap tawng in ka tawng e te chu ala ti ta deuh deuh, voice effect ala hmang zui." a han ti nuah nuah a. SP chuan, "Ehe Manun, voice effect sawi tak ah chuan....computer lam thiam zet mai, thianpa ka nei asin." a rawn ti deuh thut mai. "Chuan...tinge chu chu?" Manuna chuan a lo ti hu mai.

"Khami voice effect kha..kha kha a effect zawng a paih thiam ang. Tichuan a aw pangngai a ngaihthlak theih anga, tunge a nih hriat a awlsam sawt dawn asin." a han ti leh a, Manuna chu a phur hle mai. "Chupa chu tunge? An in awmna a hla em? Khawi veng nge?" a han ti nghal chul a.

"Kan veng tho ania, a hla lo. Mahse an in a fal ang reng a, step ah chhuk deuh vang vang a ngai." tiin SP chuan a chhang a. "A that chu...mahse Station lamah kal phawt ang. He audio hi ka phone ah ka thun duh a ni, ka mamawh tlat." a han ti a, Station lam pan chuan an inkhalh phei leh a.

******************************

Tichuan audio chu Manuna chuan a phone ah chuan a thun a, tichuan SP thianpa te in lam pan chuan an kal ta a. SP sawi ang ngeiin an in chu a lo fal deuh nalh a, step ah chuan thui fe an chhuk hnuah in pakhat a lo awm a. Kawngka chu an han kik karh karh a, nu pakhat hian a lo hawng a.

"Ehe...Pu Zir, nangmah maw?" a lo ti hu mai. Manuna te SP hi a hming chu Lalzirliana a ni a, Pu Zir tiin an ko mai thin. SP chuan, "In pa a awm em?" tiin a han zawt a. "Aih awm lo, enge ni ta a?" tiin a lo zawt let a. "Thil min siam sak turin ka duh a, a lo haw har angem?" tiin a han zawt leh a.

"Lo haw har deuh ang, chaw an eikhawm a. Ka han phone dawn em ni?"

"Aw..kan lawm ngawt ang."

Chu nu chuan a pasal chu a han phone a, reilo teah chuan a lo let leh a. "DAr 6 velah ka lo haw ang a ti a nih chu...engthil nge ni a?" a rawn ti leh a. "Dar 6 velah chuan ka lo kal dawnnia...kan lawm tho tho e." tiin SP chuan a chhang a, an kalsan ta a. Step a chhoh pah chuan an titi a, "Sir, dar 6 chu a tlai mah mah lo maw?" Manuna chuan a han ti a.

"Voice effect siam ber hi kan hna anilo, hei chu a hmanhmawh thlak loh zawk. A pawimawh ber chu a target dawt leh hi tunge a nih ang tih hi a ni ber zawk, fimkhur taka kan chet angai a ni." tiin SP chuan a chhang a. Manuna chuan, "Sir...ka hmelhriatte leh ka chhungte zinga mi an ni dawn chiang sa." a han ti leh a.

SP pawh chuan, "Ni e...i nu leh Puipuii te hi ka ngaihtuah ber. Police Force kan siam anga, zanin chu in inah leh Puipuii te in lamah duty mai rawh se." a han ti a. Manuna pawh chuan a lo pawm thlap, "Chuan maw Manun, i nu bulah awm rawh aw..zanin chu, kei erawh ka thianpa te inah ka lo zu kal anga, voice effect hi kan lo buaipui ange." a ti a.

***************************

Zan dar 6 a ri a, SP thianpa Tommy-a pawh chu a lo haw ta. A haw hnu deuh lawk chuan SP chu ava thleng ve nghal a, thil awmzia te chu a han hrilh a. "I siam thei ange?" tiin SP chuan a han zawt a. "Ka software hman hi ahlui tawh a, export chhung a rei deuh ang." tiin a lo chhang a. "Darkar engzat chhung nge ni ang?" tiin a zawt leh a.

"Darkar 2-3 vel chu a ni ve ang." tiin TOmmy-a chuan a chhang leh a. "Umm a pawi lo, a rang thei ang berin min han tihsak vat teh, pawisa pawh ka pe mai ang che." a ti leh a, Tommy-a chuan a han a thawk tan ta. Chutih lai chuan Manuna pawh in lamah a nu chu a veng reng a, police 5 vel in an ven pui bawk.

Sana chu a en sek tawh a, dar 6:30 a ri mek. A bialnu Puipuii te in lamah pawh police 10 rual vel an awm bawk a, chuti chung pawh chuan Manuna thla chu a muang hlawl lo. A nu bulah chuan, "Nu, lo chhuak miah suh aw...Puipuii te in lam ka va check ve leh lawk ange." a ti a. Anu chuan, "Nangmah zawk hi fimkhur rawh...a lo bei mai ang che tih ka hlau." tiin a nu chuan a lo chhang a.

"Lungngai suh...keichu min thah a tum hleinem...lo chhuak suh ang che." tiin chahbi a la a, "LO veng ngun ang che u." tiin duty ho chu a chah a, Puipuii te in lam pan chuan a inkhalh chhuak leh ta a. Dar 7 velah chuan ava thleng a, Puipuii leh a nu leh pate pawh an lo la awm kim thap mai.

REi fe Puipuii bula a awm leh hnu chuan dar 8:30 a ri ta, Manuna chu a phi sek tawh mai. "Anih ka haw phawt ange aw.." tiin Puipuii nen chuan an inthlah leh ta a, an in lam pan chuan a haw leh ta. "Tu phiangsen nge maw i nih le?" tia phun bul bul chung chuan chak takin a tlan a, kawnga kal te chu a enkual sek bawk a.

SP chu a han call leh a, "Ala zo lo deuh." a lo ti zel mai bawk si. A mangang tawh takzet, dar 9 lah chu a ri hnai telh telh mai bawk si. A han inngaihtuah let a, Constable Zuala te chu a ringhlel rum rum hial tawh zawk. "Ka man khawp ang che, ka man tho tho ang che." tiin a phun sap sap reng bawk a.

***********************

Dar 8:45 a rik meuh chuan Tommy-a chuan a zo ta, "U Zir..ka zo e." tiin a hrilh a. SP chuan ava thut chilh nghal, "He lai flow hi han en teh, hetah hian hmeichhe tawng ri a awm. Chuan a voice effect hman hi PRO EDITION a ni a, a voice diktak a hi hriat ala har deuh maithei." tiin a play a.

SP chuan a han ngaithla vang vang a, chutah a meng kawk mai. "EHE...a aw hi...nilo, ani thei lo." a ti chel chul mai. "U Zir, tu aw nge ni a?" tiin Tommy-a chuan a lo zawt ve chhen bawk a. Thinrim hmel tak hian SP chu a ding a, "Khawimaw kan inthawn teh ang." tiin a phone chu a vit lut a.

Mahse copy lovin a cut daih mai, "Copy mai la.." a lo ti a. SP chuan, "Police thil a ni a, i neih ve a tul lo." a lo ti hmak. A phone ah chuan a thun lut a, "Engzat tur nge?" tiin a wallet chu a phawrh a. "Cheng 1000 a nimai." tiin Tommy-a chuan a lo chhang a. Cheng 1000 chu phawrhin a pe a, a chhuak ta nghal a.

****************************

Manuna chuan in chu a thleng a, motor atanga a chhuah pah chuan a phone chu car ah chuan a thlauh daih mai, mahse a hre hauh lo. An inah chuan a lut tlang a, anu pawh chu himdamin a lo la awm a, a thaw huai mai. Dar zat a en a, dar 9 a pel tawh, "Tunge a thah ang le?" tiin a inzawt sek tawh mai.

Computer hmaah chuan a thu a, misualpa voice audio chu a han play leh a. A play nawn sek mai, chutah engemaw hriat chhuah nei zawk ang mai hian a meng kawk a. "Nilo.." tiin audio chu a tawp lam chu a han play nawn leh a, "I WILL TAKE YOR HEAD." tih lai chuan a beng a verh thar zawk mai.

A awmzia a hre tlat, "HEAD...HEAD...kan department..ka Head of Department chu...SP Sir...SP Sir a ni..nilo..hrep tak chuan.." tiin a tho vat a, room atang chuan a chhuak a. Duty te ho bulah chuan, "SP Sir call rawh u...call vat rawh u.." a ti chel chul mai a. An han call a, "Switch off a inti." tiin Conastable pakhat chuan a lo chhang a.

Manuna chuan, "Min lo zui rawh u...SP Sir hi a target dawt leh chu a ni." a ti vak vak a, a vin vak vak mai. Tichuan Constable Zuala chuan a zui a, midang zawng chuan Pi Duhpuii chu an lo awmpui chhunzawm leh bawk a. Chak tak chuan a tlan a, a phone thlauh pawh chu a hmu leh a. A han en a, SP miss call 10 chuang a lo awm.

***************************

(30 MINUTES EARLIER)

Step a chhoh pah chuan SP chuan a phone phawrhin Manuna chu a call nghal a, mahse a ring quit thak thak zel mai. "Hrep taka...phone la rawh Manun...phone la rawh..Lalnuncham.." tiin a mangan hmel kher mai. Chutih lai chuan a hma zawn takah chuan mipa pakhat hi a rawn lang thut mai, SP pawh a ding chat mai.

Chutah SP chu a rek thut a, chemte phawrhin a dulah chuan a vit ta siah mai. SP chuan chupa chu chiang takin a en a, "Nang...nangmah vek hi maw? Engvang nge?" a ti tawk tawk a, mahse chu misual chuan a chhang lo. SP chu a vit nawn leh siah siah a, tichuan step sira kawrah chuan a theh thla a, a kalsan leh ta a ni.

******************************

(PRESENT TIME)

Tommy-a te in step chhukna ah chuan hmanhmawh tak hian Manuna chu a chhuk a, ahnungah chuan police dangte chuan an rawn zui thla ve bawk a. Chutah step sira SP lo let reng mai chu a zu hmu ta, Manuna chu kawrah chuan a zuang thla ve nghal a. "Nilo...nilo Sir...nilo.." tiin a tap nghal zawih zawih mai.

Awm ngaihna a hrelo, a khur thei hial. "Nilo Sir..min kalsan suh, harh rawh..nilo, nangchu nilo..ka mamawh che Sir.." tiin a sawi vak vak a, mahse police dang ho chuan an hotupa ber, SP Lalzirliana chu a thi tawh tih an hrethiam nghal a, an lukhum chu an la thla sap sap mai. Manuna chu a awrawl tawp tawp chuan a au vak vak a, "TUNGE....TU PHIANGSEN NGE I NI?" tiin a a mah leh a mah chu a inchum vak vak mai.

******************************

TO BE CONTINUE

WHO?

(MIZO THRILLER FICTION STORY)

Written by : Aaron Malsawmdawngzuala

Chapter - 4

(LAST)

***********************

Zing dar 5 leh a chanve vel a ni a, Manuna chu Station ah chuan a thu ngui bar mai. Tommy-a chu police te chuan thu an zawt fiah mek a, Tommy-a pawh chuan a hriat ang ang te chu a han sawi a. "Voice kha ka edit zawh hnu khan Pu Zira kha mak tih hmel deuhvin a awm a, tu aw nge ka zawh pawhin a sawi duh bawk silova." a tih lai chuan Manuna chu a ding zawk mai.

Va kal pheiin, "Tommy...i voice edit tawh chu computer ah ila nei em?" tiin ava zawt nghal a. Mahse Tommy-a chuan, "Neilo..ka edit zo kha a cut daih a, a phone ah a dah a." tiin a lo chhang a. Manuna chu a beidawn hmel kher mai, "A phone ber lah a ruk sak tel kher bawk si." tiin a phun nuah nuah a.

Manuna te department ami tho, Assistant Sub Inspector pakhat, Richard-a chuan Manuna chu a pui tawh dawn a ni. Manuna erawh a mood a off em avang chuan a kalsawn leh mai a, thutthleng ah chuan a thu a. ASI Richard-a chuan Tommy-a chu thu a zawt fiah mawlh mawlh a, Manuna chu a va melh leh zauh zauh thin a.

Chutia TOmmy-a'n a rawn melh leh zeuh zeuh thin chu Manuna chuan a lo hmuh hmaih bik hauh lo, mahse chuti teh lua chuan a ngaihsak lem lo. Richard-a chu lo pheiin, "Sir, engmah rinhlelh tur a awm lova, thuthar a awm lo bawk." a rawn ti a. Manuna pawh chuan zawi te hian, "Umm..haw tir mai rawh." a lo ti a.

Tommy-a chu a chhuak a, kawngka a thlen dawn chiah chuan Manuna chu a va melh leh zauh mai. Tichuan hmanhmawh hmel em em hian a chhuak a, Manuna ngaih chu a tha ta chiah lo. Richard-a'n thu a zawh fiah lai vel pawh khan a rawn melh zau zauh tawh a, chutia a chhuah pah a hlauhthawn hmel taka a rawn melh leh zauh chuan a thut tir tha hle hle thei tlat lo mai.

"Thil diklo a awm." tih pah a phun sap chung chuan a zui chhuak ta nge nge a, mahse Tommy-a chu a lo awm tawh miah lo. Motor dahna lam chu a va en a, motor a tam em avang leh motor in ang a tam em avang chuan khawi ber nge Tommy-a car chu a hre mai silo. A va pan phei a, a zawng kual ta a.

Chutah motor sen pakhat phen a phun ri sep sep ri hi a hre ta, rang takin thawm dim tak si hian ava pan phei a. Chu phun ri sep sep pa chu a tawng zawih em avang chuan a ri chu hre tho mahse enge a sawi erawh a hre chiang thei lo, tichuan thawm chu a hre ring telh telh a. Chutah car pakhat phena Tommy-a phone lo hmang chu ava hmu ta, hnung lam hawiin a lo fimkhur hmel kher mai.

Tommy-a chuan thawm dim thei ang ber hian, "Min ringhlel ania...min melh dan atang khan ka hre vek." tiin lehlam a rawn hawi a. Manuna ahmu chiah chu a ngawi chat mai, phone chu a dah nghal a. Manuna chuan rum tak hian a melh a, "Tunge i biak kha? Thil hriat i nei tiraw? Sawi rawh..sawi nghal rawh." a ti ta hrep mai.

Tommy-a chuan a hlauh hmel em em a, a thlan a tla zawih zawih mai. Chhang lo chuan a ngawi reng a, "Tommy, enge i hriat sawi rawh.." a han ti leh a, chutah Tommy-a chu a tlan thut mai. Gate pawnah chuan a tlan chhuak a, Manuna chuan a umzui nghal a. Mahse hetih lao hian media ho leh reporter te leh mipui an awm nuai nuai avang chuan Manuna te lo in um chu an hre lem lo, an buai buai chuan an la buai mup mup mai.

*****************************

Tommy-a chu Station kawt lawka school hlui pakhat, reh ve tak mai thlangah chuan a zuang thla daih mai. Manuna pawh chu a zuang thla ve nghal a, mau hmun ah chuan an in um ta chiam mai a. Manuna chuan a pistol a phawrh a, "Ding rawh.." tiin a au zui vak vak a. An in um zel a, tlan pah chuan Tommy-a chuan a phone a phawrh a.

Number a chhu mawlh mawlh a, a tlan muan deuh phah nghe nghe. Chu chu remchangah la in Manuna chuan a va zuan thut a, a bawh thlu tawp mai. Tommy-a chu a thlauh va, lehlam khawm awih vak lovah chuan a vawrh thla palh ta daih mai. Manuna chuan a rek a, mahse Tommy-a chuan a mitah a lo hnek sak a.

Manuna na ti lutuk chuan Tommy-a chu a thlah a, a mit a dawm vawng vawng mai. Rang takin Tommy-a chu a rawn tho leh a, a dulah chuan a va tlawh sak leh a. An insual ta buan buan mai le, mahse Manuna chu police inspector zawk a ni bawk a, a chan a tha zawk. Manuna'n a bawh beh lai chuan hmawlh zum a ban fuh hlauh mai, Manuna ban puam lai takah chuan a han vit pawp mai a.

Manuna chu a au vak a, Tommy-a chu a thlah rang kher mai. Chutah Tommy-a chu a tho va, tlanchhiat leh a tum a. Mahse lung rap pianin a piah lawk kawng awi lamah chuan a lum thla ta mai a, Manuna chuan a zu um zui a. Mahse Tommy-a chu a lum chak lutuk tlat, Manuna pawh a tlan thla zel ngam tawh bik lo.

Tommy-a'na tawp a zu thlen chuan thisen a per chhawk mai, thing zar thliah hnu, zum tak mai ah chuan Tommy-a mit chu a zu in vit lut a, a thukhum ah a rawn tlang hial. A khur ngat ngat a, a thi der mai. Manuna chu a zu thleng thla ve a, a thil hmuh chuan a rap kher mai. "Nilo..Tommy..a ni thei lo." tiin a lu a dawm vawg vawng mai.

Ani lah a lu an thuina lo la dam chiang lo bawk nen, thisen a rawn chhuak hial a. A lu chu ana ut ut mai, abulah lah Tommy-a ruang a let reng mai bawk si. Enge han tih hmasak ber tur pawh a hre lo, ngawi reng chuan a ding reng ringawt. Chutah a phone a rawn ri thut a, a phu nasa kher mai.

Number hriat loh hi a lo ni a, rang takin a la nghal a. Mahse a tawng hma hma chuan phone a mi chuan, "Tual i that der ania." a rawn ti ta mai a. Rang lutukin Manuna chu a hawi kual nghal a, "Hey Hmela, khawnge i awm? Rawn inlan rawh..khawnge i awm?" a ti vak vak a. Phone ami chu a rawn nui huah huah a, "Engtik lai pawhin i bulah ka awm reng alawm, i chetdan zawng zawng hi ka hmu vek zel." a rawn ti leh a.

Manuna thinrim lutuk chu a khur zawih zawih thei hial, "Zawnga, engthil nge i duh? Engthil phiangsen nge i duh?" tiin a vin vak vak tawh mai. "GAme ka khelh pui che mawle, ka rin ai daihin ilo nep a nih hi.." a rawn ti leh a. Thinrim tak hian, "Ka nep nge neplo chu lo chhuak la, kan en dawn alawm." a ti vin leh hlur mai.

"Insum rawh...i hliam pawh ala dam loh kha. Mi tlemte bak ka that tawh dawn lo, ka that zo tep tawh. Mi pahnih bak an ni tawh lo, anni ka thah zawh hunah chuan kei hi ka chak tihna a ni ang. Mahse i chhanhim hman a nih erawh chuan ka chak lo, i chak tihna." phone a mi chuan a rawn ti leh a.

Manua chu a han maimitchhing vang vang a, "Tunge i nih? Enge i pawi ka sawi? He game hi ka khel duh ka ti em ni? Engvangin nge kei kher min rawn cho?" a han ti leh a. "A chhan chu i chapo vang a ni, Manun. Police Inspector chapo leh mi khawngaihna neilo tak i ni a, i hnauia mi te tan ramhuai tluka hlauhawm i ni." a rawn ti leh a.

"Engmaw i sawi a?"

"Ka sawi dik alawm, kei tluka hre chiang tu che an awm lo. Counselling class te kalin i theihtawp i chhuah dawn emaw ka ti a, mahse i kal tha peih lova. I thinrim avangin i mi man tawh te pawh ramtui leilovah i chhuah nual tawh, i kut a ram em em bawk. Mizoram Police lar ber pawl i ni a, chu chu i inchhuang hle a ni lawm ni? Fing ber angah i inngai a, tuman an hneh theilo che angah i ngai tiraw?"

Manuna chuan a ngaihna a hre lo hle mai, "Enge ti tura min duh? Sawi rawh..." a han ti leh ringawt a. Phone ami chuan, "He game hi min khelh zawh pui rawh, i la chak thei ania." a rawn ti leh a. Manuna chu a han ngawi vang vang a, "Enge ka tih dawn?" a han ti leh a. "Vawiin ni hian he game hi kan khel zo tawh ang, ruang pakhat in chhar leh ang." a ti leh ta mai a.

"Duhtawk tawh rawh...khawngaihin duhtawk tawh rawh." tiin Manuna chu a tap lek lek tawh mai. "Ka thah hmasak tur zawk hi i tan enge a nih ka han hrilh ang che, i tana mi pawimawh tak..nangpawh ina i mamawh em em a ni. Chuzawng chu ni rawh se, abak chu ka sawi lovang." a rawn ti leh a, Manuna chuan chhang ngaihna pawh a hre tawh lo.

Phone ami bawk chuan, "Chuan ruang lehlam khamah khan paih thla rawh...tuman an hre tur a ni lo. Ka thu anga i awm lo a nih chuan he game hi ka pawt sei zel anga, nangmah hnaih tute an thih belh zel ang." tiin a rawn vau leh a. Hreh tak chung chuan Tommy-a ruang chu a hnuk sawn a, lehlam khamah chuan a theh liam ta a.

"Ka ti tawh e...enge ka tih leh dawn?" a han ti leh a. "Vawiin ni..khawthim hma thleng hun i nei, i tlai a nih chuan heng mite pahnih pawh hi an thi ve nghal ang." a ti a, a tawng chu a zawi telh telh mai. "Hello...hello.." Manuna chuan a ti vak vak a. Mahse a phone chu a ri deuh nuai nuai a, a tawpah chuan a thi hmak mai.

A han en a, a hmai chu a lo keh deuh nual a. Tommy-a nena an insual naah khan a sawh khawlo ani ngei ang, phone chu a ak leh mai a. A thaw vak vak, "AWle..awle..hahdam rawh Manun...engkim a tha leh vek dawn...hahdam rawh." tiin amah leh amah chu a inbia a, a inhnem mawlh mawlh mai.

***************************

Chu mau hmun atang chuan a chhuak cho va, a ban a hliam avang chuan thisen a kai nual a, midang hmuh loh tur dan ber chuan Station kawta a motor ah chuan ava chuang a. Chutah anu a hre chhuak zawk mai, "I tana mi pawimawh em em, nangpawh ina i mamawh em em.." tia tualthattu in a rawn hrilh chu a hrechhuak zawk a, rang takin in lamah a tlan haw nghal a.

An inkawtah chuan a ding a, chhuah mai chu a han tum a. MAhse an inah chuan police dang te an awm ve si a, anu a awm dawn bawk nen. A bana hliam te chu an hmu an tih a hlau va, tichuan tuiin a hmaia thisen kai te chu a han phih fai leh a. A jacket, seat hnung lama a dah chu a ha a.

Tichuan lukhum khumin in lam pan chuan a kal ta a, police te pawh chuan an in chu an lo la veng reng a. Constable Zuala chuan, "Ehe Sir, chhunah chauh ka lo haw dawn i ti amaw ka tia." a lo ti a. "Ka nu khawnge a awm?" tiin a zawt nghal a. "A him e, inchhungah a awm." tiin Zuala chuan a lo chhang a.

Inchhungah chuan a lut a, anu chu a lo la awm ngei e. "Nu..khawimaw i phone ka lo hmang." a han ti a. "Aww..tinge i phone?" a lo ti hu mai. "A chhe daih..khawimaw ka lo hmang." a han ti leh a, "Ava chhe hun lo tak." tiin Pi Duhpuii chuan a lo pe ve mai a. RAng takin DGP a call nghal a, "Hello Sir.." a han ti dek dek chu DGP chuan, "Manun, khawnge i kal daih a?" a rawn ti nghal a.

"Sir...ka phone ka thlauh va, hei inlamah ka phei leh a..hei hi ka nu phone a nih hi."

"Ka call nasa lutuk che, Station lamah lo phei leh vat rawh..enge i lo tih daih a?"

"Ka insawifiah thei...Sir..ka nu a him em tih ka check leh lawk a ni."

"AWLE...lo phei phawt teh, kan buai lutuk."

"Ka lo kal nghal e, Sir."

Manuna chuan phone chu a dah a, "Nu..i phone hi ka hmang duh dawn ania aw.." tih pah chuan a room ah a lut a. A thawmhnaw te chu a thlak a, a ban hliam chu a lo la thi ser ser mai. A ban hliam chu damdawi a hnawih a, tichuan a tuam bawk a. Kawr fai dang a ha a, jacket chu a ha leh a.

Chutih lai chuan a nu a lo lut thut mai, "Bawiha...enge i chungah thleng?" tiin a zawt a. "Engmah a thleng lo?" tih ringawt chuan a lo chhang a. Anu chuan a en vang vang a, "I lu kha a thi ania...doctor va hmu vat rawh." a lo ti leh a. "Ka hman lo nu...buapui tur dang ka ngah lutuk." tiin a chhang leh a.

"I chungah engthil thalo mah a thlen ka phal lo, chaw ei la ...doctor va hmu ang che."

"Nu..i hrethiam lo a ni. Doctor hmu hman ka nilo, ka tha alawm."

"Bawiha, i nu thu hi i awih dawn lovem ni?"

"DGP in min ko, ka boss a ni, ka nu."

"In DGP te chu ka thianpa a lawm, phone kha minlo pe rawh. In check-up i ngai, i mit te kha a sen rum mai. I awmdan atang khan i chau tih a hriat lutuk, doctor chu va hmu rawh aw."

Manuna chu a ngawi vang vang a, "Case hi ka kutah a awm a, he misual hian midang a thah belh zel hmain ka chet vat angai." tiin a chhang leh a. "Va hmu phawt la, tichuan i hna chu i thawh chhunzawm leh mai dawnnia." anu chuan a la ti fan a. Manuna pawh chuan, "Station ah ka va kal anga, DGP ka va hrilhfiah ange. Chumi zawhah doctor chu ka hmu ang, min ring rawh." tih pah chuan a chhuak a, a nu phone chu ala hum reng a.

Constable Zuala bulah chuan, "Lo veng ngun ang che u...Station ah ka kal leh dawnnia." a ti a, a kalsan ta a. Station chu ava thleng a, "Manun, case serious tak a nih hi...khawnge maw i lo kal daih le? I phone lah i tichhe bawk, nangmahin engmah sawi lo hian i buai em em a. Team kan nia, kan thawk ho tur anilawm ni?" tiin DGP chuan a lo hau nghal chiam chiam a.

"Ka tihpalh Sir...ka phone atang hian number hriat lohvin min lo call a...tualthattu ngei kha a ni."

DGP chu a ding zawk mai, "Enga? A number chu i chhinchhiah em? tiin a zawt nghal a. "Aih...kan inbiak laiin miin min rawn su a, ka phone hi ka thlauh chhe daih alawm." tiin dawt a sawi ta ringawt a. "Enge a rawh sawi?" tiin DGP chuan a lo zawt leh a. "Sir, mitthi pahnih an awm belh leh dawn a ti." a han ti leh a.

"Mitthi pahnih a? Tute nge ni dawn? Hint tal a pe che em?"

"Aw..mahse a thah hmasak tur zawk chauh a sawi. Chupawh a hming a sawi lo, i tana mi pawimawh tak a ti ringawt a."

"NGaihtuah rawh Manun, a hma pawhin I WILL TAKE YOUR HEAD a ti a, SP Zira a sawina daih anih kha. Engemaw tak inthup chu a awm leh ang, ngaihtuah chiang rawh."

"Ka nu...ka nu tihna a ni. Ka pa in min thihsan tawh a, ka neihchhun, ka tana mi pawimawh ber chu ka nu a ni."

DGP chuan Manuna chu a han en vang vang a, "Manun, i lu kha...thisen a luang ania." a rawn ti a. Manuna chuan a lu chu a khawih a, "Ana lutuk." tiin a maimitchhing vawng vawng mai. DGP chu a ding a, "Doctor va hmu vat rawh...tunah.." a ti a. Mahse Manuna chuan, "Ka theilo, case hi ka kutah a awm a ni, Sir." tiin a lo chhang a.

"Manun...i hriselna a pawimawh zawk. Doctor va hmu la, hei hi chu ASI Richard-a'n a lo buaipui hrih mai ang." DGP chuan a han ti leh a. "Mahse Sir, ani saw chu ala naupang lutuk. A kuta hlan tawp chi a ni lovang, SI Zorema chunga thil thleng pawh i hriat kha." tiin Manuna chuan a han chhang leh a.

"Kemah ka awm a, SI SAngtea te pawh an awm a, kan buaipui mai ang. Doctor hmu phawt rawh...khatiang chung kha chuan ka chet chhuah tir ngam lo che." tiin DGP chuan a hrilh leh a. Hreh tak chung chuan, "Awle, ka nu kha lo veng fimkhur ang che u aw.." a han ti leh a. "Lungngai suh, engtin mah a awm lovang." tiin DGP chuan a lo chhang a.

"Anih Sir..number kha...constable Zuala text tu number kha..engtin nge ni zel?" tiin a han zawt leh a. Chutih lai chuan Richard-a a lo kal a, "Sir ka lo lut thei angem?" a rawn ti a. "Lo lut rawh." tiin DGP chuan a lo chhang a. "Sir, kha number kha a thi tawh a, mahse kha sim card kha khawi dawra lei nge tih chu kan hrechhuak tawh e." a rawn ti a.

"A that chu, lo buaipui la..Manun, nang chu doctor lo va hmu rawh." DGP chuan a han tu leh a, Manuna chu a kal ta a. Motor ah chuan a chuang a, "Tommy-a ruang kha...engtin nge ka tih ang? Enge ka tih ang?" tiin a rilru chu a insual buai nasa kher mai. Chutah anu phone chu a phawrh a, a personal doctor, Dr Peka chu a han call a.

Mahse a la thei hauh lo mai, a han call leh ngat ngat a. Mahse a ring quit thak thak mai, a tawpah phei chuan SWITCH OFF a inti hmak tawh. A ngaih tha lo chuan Dr Peka thawhna Hospital chu a han phone leh a, "Vawiin hi a thut ni chu ania, mahse hei a thut hun a pel tawh a, alo la thleng lo." tiin an lo chhang ta mai.

"DAr engzat nge a thut hun?"

"Dar 11 ania..."

Manuna chuan a sana a en a, dar 11 leh a chanve a pel tawh. Manuna hian a doctor hi a hre chiang em em a, mi invawng tak leh a hun taka thleng chat chat thin, timing vawng tha em em a ni tih pawh a hria. Chutah a han ngaihtuah chiang a, "Nangma tana mi pawimawh tak, nangpawh ina i mamawh em em a ni." tia tualtthattu in a hrilh lai chu a hrechhuak zawk mai.

"I la dam chiang lo...doctor hmuh i mamawh." tia anu leh DGP ten an hrilh lai te chu a ngaihtuah let leh a, a hrethiam ta. A tana mi pawimawh tak, amah pawh ina a mamawh em em mai chu tudang nilovin a personal doctor...Dr. Peka ngei a ni. "Khai awww.." tiin a motor chu a tiding a, a rilru a hah kher mai.

Chutah a phone, anu phone a ken mek chu a rawn ri a. Number hriatloh bawk a ni, "Hello.." a han ti chiah chu hmeichhe pakhat hi a rawn tap hawm hawm mai. "Hello, tunge i nih?" a han ti a. Phone ami chuan, "Inspector Manuna a ni em?" a rawn ti a. "Aw ni e." tiin a lo chhang vat a. "Debbie ka nia, Dr. Peka nupui..." a rawn ti leh a.

"Engthil nge ni? Inpa a awm hnai em?"

"Awmlo...Ka pu, kan pa min kidnap sak a ni...tu emawin kan pa min kidnap sak a ni."

Manuna thinphu chu a rang ngei mai, "Khawi laiah nge in in a awm? Ka lo kal nghal ang.." a han ti a. Debbie chuan an in awmna chu a hrilh a, reiloteah chuan ava thleng ta a. "Enge awmzia ka pi?" tiin Manuna chuan a han zawt nghal a, "Kan in hi a rawn inkik a, tichuan ka va hawng a, bawm a lo awm a. MAhse mihring tumah ka hmu lo, bawm chu ka hawng a, tichuan he thlalak leh he lehkha hi a lo awm a ni." tiin lehkha leh thlalak chu a pe a.

Thlalak chu a han en hmasa a, a phu nasa kher mai. Kudam ni awm takah hian Dr. Peka chu phuar hlawmin a lo awm a, a hmui tuamsak a ni bawk. Thisen a kai nuai bawk a, a chauh hmel hle bawk. "Nilo..engtin nge a nih theih?" a ti vawng vawng mai. Debbie chu a han en leh a, "Engtin nge ka nu number hi i neih theih? Ka phone a chhia a, engtin nge ka nu phone ka kawl tih i hriat?" tiin a han zawt leh a.

"Lehkha ah khan a inziak a ni."

Manuna chuan lehkha chu a han en a, "Hello ka pi, i pasal hi tunah hian ka bulah a awm mek ania. A nunna hi ka kutah a awm, dama ila hmu duh anih chuan ka thu hi zawm ang che. He lehkha hnunglamah hian number ka ziak a, Inspector Manuna phone theihna number a ni. I pasal ka kidnap thu hi hrilh la, midang tumah hrilh suh ang che. Manuna tih loh police dang hnenah i report tih ka hriat vaih chuan in pa hi a thi ang, khawthim hmain che vat ang che." tih hi a lo inziak a.

Manuna chuan mak a ti kher mai, "Tu phiangsen nge maw anih le?" tih pah chuan lehkha phek hnung lam chu a han en a, anu number chu a lo inziak ngei bawk. "Ka nu number a nei...engtin nge a neih?" a ti nuah nuah mai. A hnuai lehah chuan sinte mai hian thil a lo inziak leh bawk a, ngun tak chuan a han en a.

"Min hmu duh a nih chuan....4516...tumah rawn hruai suh ang che." tih ringawt hi a lo inziak bawk. A han ngaihtuah vang vang a, "4516......4516..ka hre tawh a ni." a han ti vang vang a. A han maimitchhing a, chutah a hrechhuak ta. An huan mawng a kudam pakhat, apa damlai daih tawh a mi. Apa nen ngeia an siam, mahse a thih hnua an kal khet em em na si ngei kha a ni.

Kha kudam ah khan a kuma kum chu an kal tawh lo, assam type niin a bangah pawh thil tam tak a inziak rang nuai bawk. Chutah inziak chiang em em pakhat chu kawngka lu chunga a nau Hannah-i ngeiin 4516 a ziah lai chu a mitthla zawk mai, "Nilo..kha kudam kha.." a ti zawi sap ringawt.

"Ka pu, ka pasal chu khawngaihin min chhanhim sak rawh." tiin Debbie lah chuan a lo ngen chhen mai a. Manuna chu a tho vut a, "Ka kal angai." tiin a tlanchhuak nghal a. Motor ah chuan lutin rang em em hian an kudam lam chu a pan nghal a, an huan awmna hi an in atanga kal kher ngai lovin, kawnghnuai lam atang pawhin a kal theih a ni.

A tlan pah chuan a han inngaihtuah a, "Hannah-i ziah kha ai a, Hannah-i hian thil hriat a nei ve tihna em ni?" a han ti nuah nuah bawk a. Anu phone chu phawrh leh in Hannah-i chu a call a, "Hello Nu.." zawi te hian a rawn ti a. "Keimah i u Manuna...ngaithla teh Hannah.." a han ti dek dek chu Hannah-i chuan, "Ka hman lo, class kan la laklawh lutuk." a tia a dah daih mai.

"Mawli leh.." tih pah chuan a han call nawn leh a, mahse a lo switch off hmak. "Ava han buaithlak tak." tih pah chuan a aia chak chuan a han tlan leh a, an in lam pan chuan a tlan ta lo. Midangin an hriat ve emaw, midang hnuhluh ve a, nunna chan dang an awm a duh tawh biklo. Tumah hrilh lo chuan a hmelma lian ber hmachhawn tur chuan a rukin, amahin kawnghnuai lamah tlanin kudam lam chu a pan ta a ni.

Kudam chu a thleng a, a lo reh em em mai leh nghal. A lu a hliam thuina atang chuan thisen chu a chhuak tam tawh khawp mai, a lu pawh ana bur tawh. A taksa te chu a chau va, a thlan a tla buah buah tawh bawk. Chutah kudam chu a hawng a, mahse tumah an lo awm lo. Kudam rim chu a lo thang deuh hur mai a, a rim chuan a lunat chu a ti zual kher mai. A beng a kiu vawng vawng a, thisen chu a hmaiah a rawn luang hial tawh. A zawi thut a, nikhaw hrelovin a awm der mai.

****************************

Tlai lam dar 4 a ri tawh a, Pi Duhpuii chuan a fapa Manuna chu angaihtuah takzet tawh. Ani lah chu a reh vung vung mai si a, a phone lah a keng daih bawk si. Chutih lai chuan an thenawm Pu Robert-a te chu an lo haw a, an ui kaih lai mek chuan Manuna te in chu a en ta vang vang mai a.

Chutah a tlan thut a, MAnuna te in kawt a lei chu a hai deuh vak vak . Police duty te chuan mak an ti kher mai, mahse a hai zel avang chuan an ngaih a tha ta chiah lo. Lei chua chan ve angreng em avang chuan ui pawh chuan a hai hleithei bik lova, "Pi Duhpui...bawngtuthlawh leh suah dur in nei em?" tiin Zuala chuan a han zawt a.

"Neih ve kha...khutah huan kudam ah khan a awm..hmanni khan Manuna khan a hmang a..helai kan thil phun vel siam nan hian..ka zu la ange." tiin kal mai a han tum a. Mahse Zuala chuan, "Nangmah chuan kal suh..ka lo kal pui ang che." tiin a lo chhang a. Police dang ho bulah chuan, "Kan zu kal lawk ange.." tiin Pi Duhpuii nen chuan an inzui thla ta a.

A hlat ve tham em avang chuan an kal chhung pawh a rei angreng hle, a fal deuh nalh mai bawk si. An thlen dawn tepah chuan silai a puak dur a, Zuala chu a dak awrh mai. Leiah chuana thal tawp a, a chal dar tak mai chu a lo kaw phut mai. Pi Duhpuii hlau lutuk chu au a um a, mahse hnunglam atang chuan ban tha chak tak mai hian a hmui a rawn hup thut mai.

****************************

Manuna chu a harh a, khua alo thim tep tawh. Tualthattu in, "Khaw thim hma thleng hun i nei.." a tih lai chu a hrechhuak zawk mai. "Khai aww." tiin a tho vat a, a awmna chu a han enkual a. An huan thovah chuan alo la awm, kudam chhungah a lo awm tawh miah lo. Chutah ama nu ngei t(r)e ri chu a hre ta, rang takin thawm lo chhuahna lam chu a pan vat a.

A pan hnai zel a, an kudam bawk chu ava hmu leh ta. Kudam atang ngei chuan anu au ri chu a lo chhuak bawk, "Ka nu.." tiin ava tlan phei a. MAhse engemaw hi a chhuih a, a thal tawp mai. A han hawi phei chu Zuala ruang lo let reng chu a hmu ta, "Nilo..Zuala.." tiin a sawi vak vak a, mahse a lo vawt vek tawh.

Anu mangang au ri chu a hre leh a, tichuan Kudam lam chu ava pan ta. Kawngka chu a tlawh hawng thuai a, kudam kila anu, hlauh hmel taka a lo khur zawih zawih chu a hmu a. A bulah chuan mipakhat, mask vuah, dum veka inthuam hi a lo ding run bawk. Chupa chuan chemte a keng a, a nu chu a lo tin ran mai.

"Hey tunge i nih?"...a sawi zo hman lo, chupa chuan a nu chu a bawhbet a, a vit ta siah siah mai. "Nilo..ka nu.." tiin Manuna chu ava tlan phei a, mahse chupa chu lehlam tukverh ah chuan a zuang chhuak daih mai. Mahse a umzui hman lo, "Nilo nu...nu.." tiin anu awm chu a dawm a.

Anu chuan thei leh thei lo hian, "Bawih...bawiha..eng..engvang nge?" tih chiah a sawi thei, a chatthla zui nghal a. Chu veleh kudam kawngka chu a rawn hawng leh a, Police Force rual an lo lut a, DGP pawh a lo tel ve. Manuna leh anu ruang, thisen kawi nuai nena lo awmdun an hmuh chuan silaiin Manuna chu an tin thap a, Manuna pawh ava hawi phei a.

Chutah Manuna chu a ding a, a ihnit hlawp hlawp a. Tap chung hian, "Sir...ka nu a that. SAwtah saw...saw tukverhah sawn a chhuak daih. SAwlai tukverh.." tia tukverh awmna zawn lam kawk a, ava hawi phei chu a ngawi hmak mai. A kawhna zawnah chuan eng tukverh mah a awmlo, darthlalang hlai tak leh sei tak, bal zet mai, ft 7 vela sei hi a lo intung ut ringawt.

Chutah chuan ama thla chu ava hmu a, amah chuan chemte a lo keng a. Chemte ah chuan thisen a kai nuai a, amah pawh chu thisen a kai teuh bawk. Mak a ti em em a, police ho lam chu ava melh leh a. Zawi sap hian DGP chuan, "Manun..i chemte kha dahthla rawh. Engkim a tawp tawh, man i ni e." a ti a.

**************************

(A HMAA THIL THLENG KHA ENGE AWMZIA NI TA ANG?)

ASI Richard-a chumi ni chuan a chhui zel a, Constable Zuala message lo thawn tu sim card leina dawrah chuan ava lut a. Tichuan ahan sawi fiah hnu chuan dawr nghaktu chuan register chu an han enkual a, "Lalnunchama tih hian a lo lei." tiin an lo hrilh ta mai a. Richard-a chuan mak a ti kher mai, a awihlo lutuk chuan CCTV te chu a han en leh a.

Mahse CCTV ah pawh chuan MAnuna lei lai ngei mai chu a hmu leh bawk si a, a darzat nen a in ang thlap bawk si. Mak ti tak chuan Station lamah chuan a let leh a, DGP chua hrilh ta vek a. DGP pawh chuan, "Manuna chu ka han call chhin ange." tia a number a type lai tak chuan hmeichhe pakhat hi a rawn tap lut a.

Chu hmeichhia chu tudang nilovin Tommy-a nupui a lo ni a, Tommy-a a biak tlang theihloh thu leh a pasal Tommy-a chuan a nupui hnenah kha voice effect edit hnu a, a aw neitu diktak leh Manuna aw a in an zia a pasalin a hrilh thute chu a rawn sawi ta vek a. Tichuan rang takin Tommy-a chu an zawng nghal a, Manuna erawh biak tlang theih a nilova, khawnge a awm pawh hriat a ni hek lo.

CAnteen-a waiter pakhat, vai naupang chuan zing dar 6 vela Manuna leh mipa pakhat, school thlanga an zuang thla dun lai a hmuh thu chu a lo sawi ve leh hlauh mai, an chhui zel a, Tommy-a ruang chu an hmu ta a ni. Tichuan Richard-a leh DGP te chuan engkim chu Manuna thil tih vek a ni tih an ringhlel ta a ni.

An chhui zel a, Dr. Peka te in lamah a kal tih an hre leh ta zel a. Peka nupui Debbie te chu an be leh a, ani chuan lehkha leh thlalak nen zawng zawng chuan a lo hmuh a, engkim a lo hrilh ve leh vek bawk. DGP hi Manuna pa nena inkawm ngeih em em mai an ni a, Peka thlalak a kudam pawh chu Manuna te kudam a ni tih a hrethiam ta nghal a ni.

Manuna te in lam an pan a, chutih hunai vel tak chu Pi Duhpuii leh Zuala te kudam lama an chhuk lai vel chiah a ni. Manuna te inkawt an thleng a, a car chu a lo ding ngei a. Mahse inchhung an luh hma chuan a car hnunglam rawn ri dut dut chu an hre thei a, tichuan an han hawng chu Doctor Peka a lo awmreng mai.

A hmui tuam a ni a, phuar beh a lo ni bawk. "Manuna hi nitin ka hnenah a rawn in check-up ziah a, a ni telin a mizia a dang telh telh bawk. Nimin a rawn in chechk up khan a thisen te ka la leh a, amah chu ka zirchiang a. A damlo nasa hle a, a chhan pawh a lu a hliam vang kha a ni. A hliam khan a thluak a khawih a, Traumatic BRain Injury a nei a ni. He a natna neih hian amah chu a chawk buai hneh hle a, Multiple Personality Disorder a neih phah a ni. Chu chu nizanah chauh ka hmu chhuak a, tukin zing ka duty tur kha min lo pharh ding a, min kidnap ta a ni." tiin Peka chuan a hnu ah a sawi leh a ni.

Pi Duhpuii leh Zuala chu an rei em avang chuan Pu Robert-a chuan an suah dur chu a va la a, Pu Robert-a hian nidangah pawh chulai chu an ui chuan a hai a hai thin thu a sawi bawk. An han lai ta reng a, bawm an lai chhuak a. Chumi chhungah chuan SP Zira phone te, Ramliana phone te, chemte te leh darthlalang keh nawi te, sim card tam tak leh Manuna marker, USA ami ngei kha a lo awm a.

SP phone atang chuan tualthattu audio hnutchhiah, Tommy-a'n a edit tawh hnu chu an hmu ta ngei a. An play chhin a, Manuna aw ngei a ni. Tin Tommy-a'n, "A kar lakah hian hmeichhe aw a lang." a tih pawh kha Pi Duhpuii aw ngei a ni. A awmzia chu Manuna'n a record lai hian Pi Duhpuii hian, "Bawiha, chaw ei ka siam ania." a tih ri a lo lang a ni.

*****************************

(RAMLIANA, BAWNGHNUTE SEM, SI ZOREMA, SP ZIRA, ZUALA LEH PI DUHPUII THIHDAN DIKTAK)

Ramliana kha a haw hnu khan Manuna chuan a zui ru a. A car chhunga ah a thawmhnaw te chu thlakin chemte nen a umzui a, a awmzia chu Ramliana a haw hnu chiah hian Manuna thluak buai chu a rawn chhuak thut a, a mizia pakhat zawk a rawn chhuak tihna a ni. Tichuan Ramliana a thah khan Ramliana pawh khan Manuna hmel chu a hmu a, mak a ti reng bawk a nih kha.

Bawnghnute sem pawh kha Manuna hian an bawnghnute a rawn pek zawh veleh a zui ru leh a, a thaht ve leh ta a ni. Ramliana ka chhunga paper leh Bawnghnute sem vun chhunga darthlalang te pawh kha Manuna dah chawp vek a ni a, mahse sawi tak ang khan hetia tual a thah lai te hian Manuna rilru hi a fim lova, amah diktak a nilo.

SP Zira khan Manuna aw ngei a ni tih a hriat khan Manuna chu a call vak vak a, mahse Manuna hian a la duhlo lui a ni. In a thlen hnua a phone motor a a thlauh kha chu a thlauh satliah mai chauh a ni, khatah kha chuan SP kha a that daih tawh a ni. Manuna mize pakhat zawk hian chhuah hun bik a nei a, darkar reilote bak a ni ngai lo thung. SP thih zan khan Manuna kha a bialnu Puipuii te inah a kal kan tih kha, a haw lam khan SP hi a that nghal a ni.

Damdawiina Zuala'n Zorema a ven lai pawh khan, Manuna hian Zuala thingpui in turah khan mutthilhna damdawi a telh a ni. He a mize pakhat zawk hi khatih lai khan Manuna a pangngai lai pawhin minute 2-3 vel lek lek a rawn lang chhuak leh thin a ni. Tichuan CCTV-a a hmuh, a rinhleh em em te kha tudang nilovin amah vek tho a ni.

OT ward chhunga a luh theihna chhan pawh kha Police a ni tih an hria a, nurse leh doctor te khan engmah rinhlelh nachang an lo hre lo. Tichuan kha lethal injection pawh kha Manuna hian dark web atanga a lei ngei a ni a, a hnua a computer an check leh pawhin dar web chu an hmuchhuak ngei bawk a ni.

Tommy-a nen an inbeih tum khan Manuna hian a lu chu na takin a sawh leh a, khatak khan a thluak a ti buai zual a. A vai ruai a, khata rawn phone tu pawh kha tumah an nilo, tumah abe tak tak lo. A suangtuahna mai mai a ni a, a phone kah chu Tommy-a nena an insual lai khan a sawh chhe daih tawh a ni.

Tommy-a khan Manuna a va melh zeuh zeuh na chhan chu Manuna aw leh audio-a voice kha a in an em vang a ni a, Manua a hlauh em avang chuahva tlanchhia a ni. A tlan laia call a tum pawh kha police tho a ni a, Manuna'n ava hmuh laia a biak kha a nupui a ni. Manuna chu misual angah a ngai a, Manuna chuan a ringhlelh a nih arin thu a nupui a hrilh mai chauh a lo ni.

Zuala kha a revolveri'n a kap hlum a, anu Pi Duhpuii erawh kah chu hnimhlum hmangin nikhawhrelovin a siam phawt a. Tichuan a phuar bet a, a chhuahsan leh a ni. Tichuan nikhaw hrelovin an huanah chuan ava tlu leh a, anu chu a lo harh a. A au thawm a hria a, tichuan va lut lehin a mize pakhat zawk a chhuak leh a, khatih lai khan a natna kha last stage ni tawhin a buai hle.

*********************************

Manuna kha Mickey-a'n a vuak khan a thluak a khawih pawi nasa hle a, mahse mak tak maia amah a rawn harh that leh hma avang khan doctor te chuan an lo hrelo mai mai zawk a ni. Manuna hi amah hrim hrim hi a mizia hi a induh lo hle a, a chhan pawh a thinchhe lutuk leh a kut ram lutuk, a insum thei bawk silo hi a inhaw ber.

Tichuan hliam a nei ta a, he a hliam hian BRrain damage thlenin Traumatic Brain Disorder a neih tir phah a. Kar hnih chhung ngawt chu pangngai mahse kha kar hnih chhung khan he disorder hian natna dang a pe leh a, amah lah a lo in uluk lo bawk nen, Multiple Personality Disorder a neih tih phah a ni.

Chu a mize pakhat zawk chuan Manuna chu a haw hle a, a hnuchhui thiam a intihna te, a chapo na te, a ruka thamna a lak ve thin te chu a hre kar a, beih a tum ta a ni. He a mize pakhat zawk pawh hi a fing hle a, a awmzia chu Manuna hian dosorder nei mahse a finna kha a la bo chuang lo tihna a ni.

Tichuan Manuna chu man a ni ta a, trail an nei a, court chuan rilru lam chian loh vangah pawm thlapin jail lamah tan tir a ni ta lo. Mahse phai lamah hruai thlak a ni thung a, Mental Hospital lamah dah a ni ta a ni. Tualthattu chu hriat a ni tawh a, chu chu tudang nilovin a case chhuitu ngei Inspector Lalnunchama ngei a lo ni.

*****************************************

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)