SCOTLAND YARD BY Atei-i

Hnuchhuina lampang chi ho
Ngaia
Site Admin
Posts: 25813
Joined: April 30th, 2016, 4:07 pm

SCOTLAND YARD BY Atei-i

Unread post by Ngaia » March 5th, 2017, 11:38 am

SCOTLAND YARD : The Kidnapping of Muriel Mckay. Aziaktu: L. N. Tluanga.
(Atei Ateuh)


A link chiah tih loh hi chu khawiahmah copy/paste phal a ni lo.
A link share dan
https://storyfb.com/viewtopic.php?f=2&t=917
A share dan tur nen lam kan inkawhhmuh chung pawh a, a story full a whatsapp lama la copy/paste lui in awm anih chuan Police-ah FIR kan thehlut anih pawhin nangmahni chochhuah liau liau a ni ang...
Copyright ©
All rights reserved
www.storyfb.com
.
Detective Sergeant Birch chu Panda Car in Arthur Road-ah chuan a rawn tlan zar zar a. Chumi zan dar 8 kohna hmanhmawh tak ngaihven tura kal a ni. St. Mary house awmna lai tak chu a hre lova, mahse number 20 a nih avangin tlang pawng sang lam a ni ang tih a hrethiam a. St. Mary house chu England Lawn Tennis Club hmingthang em em Wimbledon atangin mel chanve chauh a ni. Wimbledon chu London khawpui chhim lam dai fema awm a ni. Chulai venga in awm reng reng chu a lian in a ropui hle a. Mihausa Milian awmkhawm a ni renga, chuvangin mi rawk leh thil ruk pawh atamna veng a ni. Tun tumah pawh hian Alick Mckay nupui bo report ngaihven tura Sergeant hi kal a ni.
.
Kawng chu tlemin a kawi deuhva, chutah, In lian tak leirawhchan hmanga sak chu alo ding luah a. Chu ngei chu St. Mary house a ni ang tih a ringa, a hma thlathum lawk ah khan he in hi rawk a ni tawh a. Sergeant chuan a neitu te chu an hausa hle ang tih a ring a. In chu a fal bawk si a. Invelah chuan thing lian pui pui ading a, tha takin hung a ni bawka. Misual chet nan a rem viau reng a ni. Sergeant Birch chu Car atang chuan a chhuak a, kawngkhar pui chu a pan a, he thu buai hi a tawn hnuhnun ber a ni tawh ang tih a ringa, thla khat pawh tling tawh mang lovah a pension tawh dawn si a. He thil rapthlak tak hi thawntan ni 29 December 1969 a lo thleng a ni. Kawngka pui a thlen chuan Inspector Anderson chuan alo nghak a. Ani chu Uniform ha lo pawl a ni a, Sergeant Birch chuan.
.
"Zanin ang khawvawt hi chu ka ui vahchhuah nan pawh ka duh lo asin mawle" a ti a. Inspector Andrew-a chuan.
.
"Ni ngawt mai tiraw, a vawt lulai emai, Sergeant, he thil hi a awlai dawn lp tawp leh nghal" a han ti zui a. Sergeant chuan.
.
"Keipawh a hautak ngawtin ka ring" a ti ve maia. Inspector chuan.
.
"Tuten emaw tum lawk ranin In hi an luhchilh a ni mai thei a. Thil ruahhman fel tak neiin a neitu hi an kidnap a nih hmel a, a chhuichhuah a hautak phian ang le" a ti a. Sergeant Birch chuan.
.
"Ngawiteh, Mr. Mckay kan biak hmain a chanchin min hrilh ta che, eng hnathawk nge anih ve reng" a ti a. Inspector chuan.
.
"News of the World ah hian thawktu pawimawh tak a ni. News of the World hi Australia mi Rupert Murdoch te nen an buaipui a ni" a han ti a. Chutia an inbiak mek lai chuan Pa lian tawk tak inkhaithli tak hmeltha tawk leh zahawm tak incheifel tak chu a lo chhuak a, Sergeant chuan.
.
"Mr. Mckay i ni ang tiraw? Kei hi Sergeant Birch ka ni a" a ti vat a. Mckay chuan chibai buk pah in aw damthluam in "Ka nupui a bo tlat mai" a ti a. A tawngkam atang chuan Australia a ni tih a hriat theih hle. Sergeant chuan "ka hrethiam e, lungngai lutuk suh, kan hmuchhuak leh thuai ang" tiin a han hnem a. Mckay chuan pindan nuam deuh ah hruai lut in, detective pahnihte chuan chik takin an envel a, pheikhawk ke artui sang chu fel takin a lo inrem thlap a, inchhawng panna kailawn hnuai chu pheikhawk dahna hmun reng a ni. Chumi chung chiah ah chuan Savun Handbag dum a awm a, a lo inhawng sa a. A chhunga awm niawm tak thil panga lai chu step ah chuan alo tla phunga, tin telephone dawhkan chunga awm thin chu phihthlak a ni. Tin, Pi Mckay-i tarmit chu chhuatah bawk a awm bal a. Chair ah chuan la phiar inherh chuat a awm a, dawhkan chungah chuan chemkawm tuiek a awm bawk a. Kawngkhar bul dawhkan chungah chuan bandage phelh deuh nin nian alo awm bawk a.
.
Sergeant Birch chuan, nguntakin a chhinchhiah a, "Inspector Anderson-a nen in lo sawi dun tawh ang a, mahse nangmah ngeiin In in luh tirha in thil hmuh dan leh i nupui a bo a ni tih i hriat dan zawng zawng min hrilh la ka duh a ni" a ti a. Mckay chu a lunghnur deuhva, a rin aiin Police leh Detective chu an che muang a, a in bengdai hram a, mahse ti hian a sawi ta thova,
.
"Tlai dar 7:45 ah ka hawng a, driver in kawngkapui thlengin min thlah a, zinga mi rawn lam leh turin ka hrilh a, Rupert Murdoch chu Australia ah kar 6 lai a zin bo dawn avangin Company Car Rolls Royce ka hmang a. Tichuan Door bell chu ka han hmet a, September thla khan kan In hi mi in an lo rawk tawh avangin kam fimkhur a, thim hnua kawng hawn mai maite hi kan hreh avangin ka nupui Muriel nen chuan door bell pawh hmeh dan bik riau kan nei a, chu chu dot-dot-dot-dash a ni a, ritawi vawi thum hnuah ri sei vawi khat kan hmang thin. Min rawn chhan mai loh avangin kawngkhar chu hawn ka han tum a, a inkhalh lo chu mak ka ti hle mai a, khaidiat chu dul takin alo uai hniang a. Ka han lut vat a, heng thil darh nuai hi ka hmu a" tiin a kawk a, chemkawm lo awm bal a hmuh avang chuan heng misual, lutru te chu inchhunga an lo awm ringin inchhawng lamah ka tlan chho va, ka nupui chu ka kova. Mut pindan leh Bualin te ka en vek a, mahse ka hmu si lova, ka chhuk leh vat a, sitting room leh drawing room ka en leh a. Tin, kilkhata a tawmlumna thinah pawh chuan a lo awm si lova. Television kha a lo in on reng a. Tlailam chanchinbu pakhat chu Muriel thutna thin Chair banah a in pharh a. Kan ui Carl chu meilum bulah chhuatah a lo thu a, thingfak te chu a la nung tha viauva, mahse mei tuah lai chu chhawm that loh a ni tih a lang hle a, chutiang anga duhdah chuan ka nupui chuan a kalsan ngai reng reng lo.
.
"Mangang leh thinrim in chokaah ka tlan lut a, inhnuai pindan zawng zawng te ka bih vek a. Chairah chuan Muriel kawrchung a lo inbang a. Bawngsa hrang pahnih zanriah hmeh atana chhum tur niawm tak hi thuk bul thlengah chuan a lo awm ngat a. Pindan lian lam ka pan leh vat a, Muriel hand-bag atangin thil kim lo a awm em tih ka va fiah a. Pawisa leh a incheina tlereuh a ken ngei thinte chu a awm lova. Bandage ka hmuh phat atang khan kawngkhar chung zawk chu hawn luih a ni ang tih ka ring a" tiin a han sawi par par a. Sergeant Birch chuan, kawngkhar chu a han en a, a sir tawn chu a khem a, tu in emaw a hawng lui ngei ani tih a rin theih a.
.
Chutah Mckay chuan a han sawi zawm leh a, "Tichuan pawnah ka chhuak a kan Compound chhunga In zawng zawng chu ka bih vek a, huan ka fang thuak thuak a, a motor Ford Capri chu Garage-ah alo awm reng mai a. Chutah thenawmte ka tlawh a, engemaw dang dai deuh hriat an nei dah lawm maw tiin ka zawt hlawm a, an phone hmangin Police ka hrilh ta a ni" a ti a. 'A handbag atang chuan eng thil te nge kimlo i hriat tiin an zawt a. Mckay chuan a la enchiang hman biklova, 'I en leh tehreng ang u' a ti ta a. Inchhung chu an han en nawn leh vek a, Muriel Dressing table pawhdawh chu a lo in hawng a, a ip thuimawi tlereuh a dahkhawmna chu a awm lova, chu mai lo chu sulhnu dang an hmu lo. A thawmhnaw zawng zawng te pawh a kim tlat in an hria a. Sergeant Birch rilruah chuan Agatha Christie thawnthu phuah ang kha a lo lang a. Mckay erawh chuan a nupui chu misualin an kidnap ni ngeiin a ring a, mahse hetiang hi Britain ah ala awm ngai lo.
.
Tin, chulo rengah an ni ang milian nupuiin sawi lawk lova hetiang mai maiin an kalsan ngai bawk silova. Wimbledon bial V-Division huam chhungah ngawt pawh hetianga mi bo hi kartin panga angvela chawhrual theih a ni a, chung zingah chuan chhungte leh Police tihbuai duh hrim hrim te an lo awm ve zel bawk a. Chutiang deuh chuan Sergeant Birch chuan a rilru takin a ngainep ru deuh hlek a.
.
Dinning room ah whisky in pahin an chhungkua leh a nupui Murie chanchin chu chipchiar takin a zawt a, Muriel chu milian nupui mahnise, hmeltha leh itawmtak chu a ni bik lo. Feet 5 leh inches 9 laia sang inphut mawi tawk taj a ni a, lang naupang deuh, sam uk deuh, hnar ngul sang lam, mitmu hring hmai bial deuh, kum 55 a ni a, a bo ni tlai hian Jersey suit hring a ha a, ngun a bun a, inneih zungbun leh Diamond zungbun pahnih a bunin a hria a. Mckay nen hian kum 36 lai an innei tawh a. Fanu pahnih leh fapa pakhat an nei a. An fanute chuan pasal an nei tawh a. England-ah an cheng ve ve a. An fapa erawh Australia-ah a cheng a, a pa ang bawka chanchinbua eizawng a ni. An chhungkua hi Australia atanga England rawn pem lut an ni. Sergeant Birch chuan, "I fanu te hi i be hman tawh em? An ni hnenah hian eng emaw tal lo sawi te pawh a nei mahna" a ti a. Mckay erawh chuan anni tihbuai nghal chuk chuk a duh loh thu a sawi a. Amaherawh chu chinchang hria an awm hlauh beiseiin an chhungte leh thiante chu an phone kual a, mahse engmah bengtivartu a awm chuang lo. A fanu te chu an pasalte nen an lokal nghal vat a, Sergeant Birch chuan an hriat ang ang chu Scotland Yard V Division ah chuan a report a.
.
Detective Sergeant White chu zana duty tur a ni a, Three-ring Circus velah chuan a va kal a, Car a inhung hnem hle a, chung zinga tamtak chuan Pi Muriel Mckay bo thu chu an lo hre tawh a, an invel thlate an la a, compound leh huante pawh chu an lo tlawh nasa tawh a, Sergeant Birch leh White chu an in hmu a, Muriel chenna in chu an pan nghal vata, chhun lama Muriel chet tlat dan zawng zawng chu an awmpui Pi Nightingale zawh an tum a, Sergeant White chuan inchhunga thil awmdan chu a enfiah ve te te a. Sergeant Birch chuan a chhut dan in Pi Mckay-i bo dam hi mak a ti a, a duh loh chung kudnanisela a talna leh a tan velna sulhnu langsar deuh zawk hmuh a beisei tlat a. An chhungkaw inrem loh a engemaw avanga tlanbo niin a ring tlat a, chutah Sergeant White chuan.
.
"Anih leh a pasal nen hian engtinge an khawsak" tiin a zawta, chutah Sergeant Birch chuan.

"Mckay sawi dan chuan nupa in hmangaih tak niin an hlim dun hle a, an chhungkua reng reng an in ngaina tlang a. Vawiin chhun lama Pi Muriel chet tlat dan chu chhun lai takin Wimbledon ah a kal a, dawrah thil a lei vel a, chawhnu lamah chuan Central London-ah a ha entir in Dentist a pan a, tlai dar 5-ah alo hawng a. An awmpui Nightingale chu Car-in a va thlah a, kawng lakah chhan Evening News copy hnih a lei a; a haw leh nan minute 10 vel hmang ta sela, chumi chhung chuan alo bo hman der ai a. Kawrchung a hak ni awm tak chu choka Chair-ah a lo inkhai a" tiin a sawi a. A handbag atanha pawisa leh tlereuh bo ni a an hriat thu a sawi bawka, chung zawng zawng chu pouns 600 man vel a ni ang, chutah Sergeant White chuan dawhkan chu a pen karh karh a, "Thil ruk tum nita sela, engvanginge pawisa tlemte leh tlereuh chu an lak kher ang? Kawng dang I n han chhut leh ta ila, hmeichhe thenkhat tlanbo tumte hian pawisa tlem azawng an mamawh dawn tih hria in an keng chawk a" tiin Chutiang ang chu an lo hre fo tawh a, an pahnih chuan an sawi bial map map a. Sergeant White chuan.
.
Nightingale hian vawiin-ah a awmdan danglam deuh hriat a neilo maw?" Tiin a han zawt leh hram a, engmah danglam a awm silo.
.
Accident tawk anih palh takin tih thuah damdawiin zawng zawng an phone a, tuman an hmu silo. Zan laiah chuan a fanu Jennifer leh a pasal chu an lo thleng a, a fanu pawh chuan a nu chu a tlanbo mai mai niin a ring thei lova, an thenawmte zawng zawng lah chuan engmah hriat an neu silo. Police leh chanchinbumi pawh an lo pung nasa hle a, mahse engmah hriat thar an nei chuang lo. Telephone chu a ri reng mai bawk a.
.
Telephone lo ri leh chu David chuan a han chhang a, midang chuan an lo en thap a, a chal a chuar nawng nawng a, a meng phawk nasa mai a. A chhan hmain a puzawn, Mckay chu a han hui zauh a. Sergeant White chuan hrethiamin telephone extension chu a chuh vat a.
.
Telephone atang chuan, "Hei hi Mafia Group 3 a ni e, America atanga lokal kan ni. Mafia M 3.1 nupui chu kan kutah a awm e" a ti a. Mckay chuan, "ka nupui in kawl maw?" Tiin a han zawt a. A rawn betu chuan, "Nilainiah chuan pound maktaduai khat i nei tur a ni" a han ti leh tawng a. Mckay chuan, "Engnge i sawi awmzia chu? Ka hrethiam lo tawp mai" a han ti leh a. Aw chuan, "Mafia, hrethiam i tawh em?" A han ti leh a. Mckay chuan, "Aw Mafia tih hming chu ka hre tawh alawm," a han ti ve leh a. Aw vek chuan, "I nupui kan kutah a awm a, a tlanna man chu pound maktaduai khat a ni ang" a han ti leh a. Mckay chuan, "A anglo lutuk, pound maktaduai te em em chu a neih pawh ka nei lo reng reng," a han ti a. Aw bawk chuan, "I neih chiang ang. Thiante i nei alawm. An hnen atangin la mai rawh Rupert Murdoch nupui lak tum kan ni a, kan hmuh theih loh avangin a aiah i nupui kan la ta a ni" a han ti leh a. Mckay chuan hrilh hai takin "Rupert Murdoch a!" A han ti leh ha a. Aw bawk chuan, "Nilaini chuan pound maktaduai khat chu lo nei la, chuti lozawng i nupui kan that mai tur ania," a rawn ti leh a. Mckay chuan, "Engtinnge ka tih ang?" Tiin a han zawt leh a. Aw bawk chuan, "In biak leh hun lo ngaichang ringawt mai rawh. Chu chu pawisa chungchang thu a ni ang. Tihdan tur kan rawn hrilh ang che. Pawisa chu nei ngei la, chutilo zawng i nupui i chan ang. Kan rawn be pawp leh ang che" a ti a.
.
A reh deuh vang vang a, mipa aw dang chuan, "In inbe zo tawh em?" A rawn ti a. Chuveleh Sergeant White chuan "La ti tawp rih su, tunge i nih reng reng a?" Alo ti thuai a. "Telephone Operator ka ni a" tiin aw chuan arawn chhang a. White vek chuan, "khawi hmun nge?" A han ti leh vat a. "Eppingah, Bell common hmun phone box atangin ka rawn zawng che u a ni. A rawn betu che hian in number chu a man hlei thei lova. In inbiakna pawh ka hre ve nual e" tiin operator chuan a rawn chhang leh a. Chutah white bawk chuan, "Chuti chu i hming pawh kan hre duh nghal ania aw, ka la rawn be duh ngei ang che," ahan ti zui a. "Kan i ti elo"? Tutenge in nih?" A han ti a. "Police kan ni e" tiin a chhang zui a, chutah Operator chuan, "Aw, ani tak maw, ka hming chu Underwood, Terrence Underwood a ni" a rawn ti a. Sergeant White chuan lawmthu a hrilh a, telephone chu dah ta a. Hepa telephone rawn betu M3 inti hi a aw a mak viau mai a, a aw phawi ah chuan West Indian lam hnaih ber in a hria a. Arang arang in in chu chhuahsanin Detective Chief Lancashire Smith hnenah thil awmdan zawng zawng chu a hrilh vek a.
Show post links



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2017, 11:39 am

Chapter -2
.
Detective Chief Superintendent Bill Smith chu Lancashire biala seilian a ni tih a awphawi atang pawn a hriat theih hle a. Tawng tlem, thil chhinchhiah thei tak, taima zet a ni a, Detective ni awm reng a ni. Mafia M-3 inti in telephone a athusawi chu nguntakin a chhiar chhuak a, Sergeant white chu melh pahin.
.
"Kan mihring pa hi a chimawm dawn zet mai, a tawhkhirh phian mai thei" a han ti a. Sergeant chuan, "ka pu" tih pahin, a hmui hmai atangin thil a zawt deuh ha a. "Ele, Pound Maktaduai khat chu, a awm lo lulai em alawm, chutiang zozai chu Mckay hian khawi atangin nge a neih ang? Pound Maktaduai tam zia chu a hre ngut lo ani ang, truck phur khat lai a tling dawn asin" a ti a. Mafia M-3 in arawn biak lai kha zan 1:30 a ni a, tin, London atanga British Broadcasting Corporation hian zan darkhatah hian thu an puang thin a, chutah chuan News Of the World Deputy Chairman nupui bo chu an puang tel hman a. Chumi thuphuan hre ve niawmtakin telephone hian a rawn be zui ni hian a hriat theih a. Inspector Minors chuan, "Naktuk ah chuan chanchinbu tinrengin an rawn chhuah anga, mipiin an chhiar nasa dawn a, chuvangin telephone pawh a ri reng ang, mi tamtakin Police tanpui an duh anga, lehkha pawh a lo thleng nasa ang, thumawl tak leh nuihzat thlak tak pawh a awm ang a, a mawl ber le a ho ber pawh file that vek a tha ang. Pi Muriel bo thu nena inzawm lo pui pui pawh a tam ang" tiin Superintendent chu a rawn a. Ani chuan, "Chuti chu Mackay telephone zawm tur in extension siam tir vat la, amah betute thusawi zawng zawng tape record in lo la vek ang che.
.
Pi Muriel thlalak leh a pianhmang hrilhfiahna chu arang thei ang berin thawn darh nisela. Tin, zawhna leh chhanna lehkha siam la, Arthur Road huam chhung mi zawng zawng hnenah sem la, nimin tlai dar 5 leh Dar 7:30 inkara an awmdan leh an thiltih an ziak tur a ni. Inspector chuan, "Aw ka pu, i thu ang zelin" a ti vat a. Bill Smith chuan, "Awle, an In chu a kim thei ang bein va en leh ula, choka leh garage leh huan chhung ngun elkhenin va en nawn leh ang che u. Engmah hmaih suh u, chubakah a pasalin a kalsan hnua a chettlat vel dan zawng zawng leh a mi a hmuh zawng rawn hre vek bawk ang che u," tiin thu a pe a. Tichuan, Inspector Minors chuan thiltul zawng a tifel thlapa. Mckay chhungkua pawh chu telephone reng reng ning lova, lo dawng zel turin a chah bawk a. Mafia M-3 finger print hriat theih nan chemkawma kuthnu thla chu nguntakin a la a.
.
Superintendent chuan he thil chhui zel tur bik atan mifel bik leh taima tulin a hria a. Sergeant Parker a thlang chhuak a. Thil chhinchhiah theihna leh hriat reng theih hi a thil pek dawn ropui tak a ni. Wimbledon Police Station chuan tlawhtu a ngah phah em em mai a. Chuvangin special inquiry office an siam thar phah a, telephone pawh a thar an dah phah bawk a, Detective zawng zawng chu an hna pangngai bakah Muriel case hi ngaihven tura hrilh vek anni bawk.
.
Epping Telephone Exchange a thawk Terrence Underwood kha thil an zawt fiah ta a. Sawitur a ngah bik lo hle a. Mafia M-3 aw chu a thawp deuh sut a, a pawr deuh hlek bawk a, a awphawi atang chuan American emaw mihang rawn pem lut emaw anih a rin thu a sawi a.
.
Report hrang hrang an han chuktuah rem zel a, Pi Muriel chuan chawhma lamin bank-ah pound 25 ala chhuak a, chumi zawh chuan dawrah a kala, darkar chanve vel a awm a, kawrchung pakhat pound 60 man a lei a, akawr lei chu lam leh atan dawrah chuan a hnutchhiah nghal a. Inspector Minors sawi lawk ang ngei khan lehkha leh telephone a tam em em mai a, thil atchilhmi thenkhat chuan an hriatna atang chuan Muriel awmna awm tak tak te an han sawi a, thenkhat chuan mang lama an hmuh te chu an rawn sawi bawka, zawlnei inti te lah an bang bik lo, an sawi ang ang chu Detective chuan a ring vaklo chungin an fiah vek zel a.
Mckay pawh chuan telephone chhan tur a ngah hle a, tlai lam dar 5 a rik dawn tep chuan telephone alo ri leha, a makpa David chuan a han chhang a, chutah aw thawp deuh pawr deuh har chuan,
.
"I nupui chuan i lehkha tur arawn thlak chiah a. Van chhalin kan thu zawm hram ang che. Amah avangin Police pun reng reng suh. Kan zui reng che a nia, pawisa chu inei tawh em?" A rawn ti a. David tawng ve hma in telephone chu a dah daiha. Thawhlehni December Ni 30 ani tawh si a, M-3 kan Nilaini chu pound Maktaduai khat hlan tura a tiam ni ani tawh si a, darkar 24 chauh a awm tawh a, mahse a tlanna pawisa inpekna hun tur leh a hmun tur a rawn sawi silova, a buaithlak zet mai.
.
Hetih chhung hian Mckay chhungkua chuan an tuar nasa em em mai a, an taksaah pawh a lang hman hle tawh a, a fanu Diana chuan B. B. C hmang in a nu chu tha taka rawn dah let leh turin mi zawng zawng hriat turin a ngenna a siam a, chumi hnu lawk phei chuan an mahni lainattu leh tuarpuitu an lo pung khawm nasa em em a.
.
Mckay lehkha chu alp thleng ta ngei a, envelope pawn atang chuan December ni 30 tlai dar 6:45 Tottenham N. 17 a thlak ani tih a hriat theih a, lehkha puan chu a dumpawlin a in rin a. A ziaktu chuan kut khur chungin a ziak a ni ang tih pawh a rin theih a, a tlar pawh chu dinglam zawngin a kual thla raiha, sentence pakhat phei chu harsa ti taka ziak a ang bik hle a. Lehkha ah chuan tihian a in ziaka.
.
"Alick Darling, ka mit tuam tlat a ni a, ka awmna chu a vawt hle bawk. Ka lo haw leh theih nan engemaw chu khawngaih takin ti hram ang che, an thu lo zawm la, chuti lo zawng ka daihrei hauh lovang, ka rawn hre reng che a, lungmuang takin ka la awm hram hram chauh a ni e. Hetiang nek tawng tur hian engnge maw ka tih bik le?
..................................... Love
.................................... Muriel
.
Muriel lehkha chu Mckay leh Smith chuan an en dun a, a pasal chuan a kutziak chu a'n bih chian hnu chuan hlauthawng tak leh thlabar chunga a ziak a ni tih a hriat in, a rilru a na em em a. Smith chuan, " a ziak ngei niin ihria em?" A han ti a. Mckay chuan bu nghauh chung chuan, " a kut ziak ngei a ni tih ka chiang a ni" a ti a. A hmelah chuan hreawm tihna arawn lang thar nasa hle a. Smith chuan, "chu alo dik ngei ani tih na ni maw?" Tiin a han zawt leh ha a. Mckay chuan, "Eng chu maw?" A han ti ve thuai a, Smith vek chuan, "M-3 Telephone thusawi kha. I nupui chu an kut ah a awm a, tunah chuan bumna hmangin chu tiang thil chu thleng thei a la ni zel ani" a han tih chuan Mckay chuan, "Eng thil maw la theng thei cheu?" A han ti leh ha a, Smith chuan, "Tunah chuan i nupui kidnapped a ni tih hi mitin hriat ani tawh a, chumi denchhen chuan misual tute emawni chuan lemchangin i hnen atanga pawisa hmuh nan an lo hmang thei ani, chu chu thil tenawm tak ani bawk, a eng a pawh chu nise, he thil chingfel tur hian kan inruahman dawn alawm" a han ti a. Chutah Mckay chuan duhthawh deuh hlek hian, "Engtia tih tur nge tih hriat ka chak mange, thil lo thleng tur in nghah mai mai chungin khua a tlai zo dawn lawm," a han ti ngat a, Smith chuan, "kan theih ang ang chu kan ti ve alawm" a han ti tak na a, Mckay rilru chu a dam zan lo, mahse, ngawih a chuh ta zawk a. Stamp leh lehkha ip char tur hian tu emaw chusn a khawih ngei ang a, chupa kut zungtang thla chu kan la anga, lan tangkai pui ngei ang" tiin a han hnem a. Mckay ina chemkawm leh chanchinbu phek atangin kut zungtang thla chu an lo la tawh a, mahse misual ho chhinchhiahna kut hnu nen a lo inmil silova. Smith chuan, a kidnap tute chu pahnih tal an ni ang tih a ring bawk a, pakhat in lehkha thawn a, telephone a rawn hman lai hian pakhat chuan alo veng rengin a ringa. Britain-ah pawh hetiang kidnap thil hi ala thleng ngai silova, Chuvangin, Smith chuan theihtawp tak meuh chhuah a duh a. Mi thenkhat chuan T. V hmanga mipui zawng zawng hnenah ngenna siam leh an rawt a. B. B. C hmang lovin Independent Television hman nise tiin an rawt thlu ve bawk a. Diana chu chumi zana mipui hnena ngenna siam tur chuan an ruat ta a.
.
Telephone leh lehkha chu a tel telin a lo thleng ruih ruij mai a, Police chuan tle reuh leh zungbun pin mawi leh bengbeh te chu a pianhmang hrilh fiahna lehkha chu a sem chiam a, kidnap tute hian an rawn zawrh palh hlauhva lo tanpui turin mipui an sawm nghal a. Chemkawm thla pawh chu a sem chhuak chiam a. A siamtu company leh a zuartu te hming rawn sawi turin an ngen nghal bawk a. Tin, Muriel bo ni a car vakvel zawng zawng an rawng leh an number leh a mi chuang te thlengin theihtawpin an chhui fai vek a.
.
Chawlhkhar thum dawn lai alo ral hman ta der mai a, M-3 lah chu ala reh ta vang vang mai bawk si a. 20th January 1970 zan chuan Press Conference an ko ve ta ngawt mai a, chanchinbu tina chhuah turin Mckay chuan a nupui a hmuh leh theih dawn phawt chuan engpawh tih a huam thu asawi uar hle a.
.
Kidnap tute lo hriat atan an duh ber nghe nghe a, an beisei ang ngei chuan M-3 chu telephone hmangin a rawn inlar leh ta a. Mahse, pawisa inhlan dan tur lam reng sawi tawh lovin, "kan duh aiin in kal thui lutuk mah mah. Tunah chuan thil a khirh zo vek tawh," a rawn ti ta daih mai a. Diana chuan mak tih hmel tak hian, "Enge khirhkhan lutuk chu ni a? Thil engmah a la zuzi hleinem," ti a ahan sawi lai chuan telephone chu a han tawp leh riha, minute tlem hnuah chuan telephone chu alo ri leh a. M-3 chuan Diana chu arawn be leh a. "Pound maktaduai khat kha a nei tur ani, naktuk ah ka rawn be leh ang che, pawisa chu sawm note chin vek ani tur a ni," a rawn ti a. Diana chuan a chhan leh hma in M-3 chu a reh leh hmiah mai a.
.
Atuk alo thlenga, an reh vang vang si a, chutiang chuan ni engemaw zat chu a liam ta a, hetih lai hian Inspector Minors leh superintendent hlauthawn ang ngeiin mi chimawm dang an rawn in rawlh ta ngei a. Mi pakhat William Alexander Pete, kum 18 mi lek mi tladah tak chuan Muriel tlan nan pound 500 a lo phut ve khanglang a, mahse ani zawng rem hre lo ve tak ani bawk a, detective chuan an man rang kher mai. Edward Roper sipai atanga tlanbo, hnathawh mumal neilo chuan Mckay chu lehkha thawn in a nupui tlan nan pound 2000 alo phut ve leh bawka, pawisa chu Strafford station vantlang inthiarna bulah in hlan turin alo ti ve khang lang a, ani pawh an man rang kher mai.
.
Chutiang chuan ni chu a ral zel a, police leh detective rual chuan chulai vel mihring leh in chu an dap nasa hle a, ngaw kar pawh an dap nasa hle bawk a, sulhnu engmah an hmu si lova. St. Mary House ah chuan Press Conference an ko leh a. Chutah chuan Mckay chuan a nupui chu natna khirhkhan tak, tihdam mai theihloh a veilai a ni a, inven nan damdawi hlauhawm leh chak tak Drug chikhat Cortisone ei a inveng thin anih thu asawi ta a, chu damdawi chu a ei loh rei chuan a thi mai ang tih a hlauhthawn thu a sawi bawk a. Chumi thu bawk chu T. V ah an sawi tir bawkva. Muriel thukru tute hian chu chu hria in Drug leisak an tum ngei an ring a, a thih mai an hlauh dawn avangin tawktarh atan an duh ani. Mahse an beisei angin kidnap tute chu an lo lang chuang silo.
.
Amaherawhchu, lehkha thawn alo thleng thunga. News of the World lehkha ah chuan mimal thil hman hmawh thlak (personal & Urgent) tih a in chhu a. An lehkha puan chu rin chi a ni a, note bu atanga pawhthlak niawm tak ani. Lehkhathawnah chuan, Mckay chuan Police hnarbo vek sela, chutah a rawn thawntu hian arawn phone zui ang a, tlanna sum inpek chhawn dan tur chu hriattir ani ang. Tlanna sum chu hmun hnih a fun tur a ni a, a rawn thawn tu hian Mckay chu a mit ngeia hmuh a duh thu asawi a, phone a biak atum lahin a be thei si lova. Ni 9 chhungin lehkhathawn pakhat chauh alo lut a. Hetih chhung hian M-3 chu a reh vang vang a. Bumtu dang an lo inlar ve sek bawk nen. January Ni 14 chuan M-3 chuan a rawn phone leh a, tum ruk ngawt arawn biakna ani tawh a. Mckay chuan an hrilh ang zel a, a tih phawt chuan a nupui chu a hmu leh em em ang tih M-3 chuan a tiam a. A Damdawi Drug an hmuh sak thu a rawn sawi tel bawka. Rawn biak leh thuai pawh atiam nghal bawk a. Tun tuma a tiam ang ngeiin a rawn be thuai a, an inbiak lai chu Smith leh a hote chuan an lo ngaithla ve ran a. Mckay chuan tiang hian a chhang a.
.
"In thuzawm chu ka duh a. Mahse zawm ngaihna awm lo khawpa tam sum in phut alawm. A awmtawk deuh phut ta che u, keimah ka in that ngawt thei hleinem, ka neih loh pui chu engtinnge ka pek theih ang che u. Tumah in pound maktaduai khat an nei mai thei hleinem. Hetiang zat sum phut te zawng a tihchi loh lutuk" a tu a. An inbiak zawh hnu chuan Detective ho chuan ngaihdan an sawikhawm tal tal a. An bei a dawng rilru ang reng tawh hle a, kutphah leh kut zungtang thla atangin a milpui tumah an hmu thei silova. Mckay te chhung pawhin anmahni remruat ang ang an lo kal pui ve a, chu chuan thil a ti buaithlak deuh hlek leh nghal. Amaherawhchu, Mckay hmang hiam kidnap tute chu engemaw titaka biak pawh zel a, chhuichuah dan awmin an ring thar a. A fapa Ian Mckay chuan a pa a ang lo deuh hlek na in, apa lema chang turin an ruahman ta a. Ani hian apa aiawh sela, M-3 chu a tawmkuk atanga tawktarh buk tawk hmanga chah chhuah ngei an tum ta a. Mckay zawng a rilru hah leh nat em avangin M-3 a biak lai pawhin sawi tur leh zawh tur ruatsate pawh a hmaih nual zel a, a aiah a fapa hlir tawng tawh se a tha ang tiin ruahmanna an siam ta a. Amaherawhchu an chhungkua in rem an tihpui a ngai bawk a. Smith chuan an chhungkua chu hmin theih ngei a in ring a. Ian Mckay chhan apa aiawh pawh alo hreh vak bik lem lo bawka.
.
Detective ho hmaah chuan superintendent Smith chuan, "M-3 hi mi duham tak ani tih alang a, thil awm leh awmlo pawh a ngaihtuah lo. Chuvangin Mckay an pound maktaduai khat a neih theih loh thu ngawt a, a chhang pawh hi awmzia a nei bawk hek lo. Chuvangin, a duham na hi thangah hmangin awh ngei kan tum tur a ni. Tin, Ian Mckay hian a biak hunah Muriel chu an la kawl ngei em tih zawt bawk sela, chumi thleng nan chuan sum kan tawktarh dawn ani," tiin ahan sawi dap dap a, Ian chuan alo hrethiam hle a, anu erawh chu dam tawh lovin a ring thunga. Ian chuan tihian a han zawt a, "M-3 chu sum hmangin chah chhuah chu kan tum ngei chu a ni a, mahse ksn case hi hnuk kir turin min nawr ngei ang a, Police zawng zawng inthiarfihlim turin a phut bawk ang a, chung chu engtinnge ka chhan ang?" Tiin a zawt a. Smith chuan, "Chu chu thil theihloh ani. Engemaw ti kawng zawngin ka pa pawh hi an ringhlel tel tlat ani tih in chhang ang che" a ti a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2017, 11:40 am

Chapter -3
.
M-3 chuan police chu inthiar fihlim turin arawn phut ta ngei reng a, mahse Ian chuan a pa pawhin rinhlelh a kai avangin thil theih loh ani tiin a chhang a. Lehkha thawb dang pahnih lo thleng leh chu January ni 21, 1970 chawhnu dar 2 vela rawn thleng kha ani a, chutah chuan tlanna sum inhlan dan tur pawh alo chuang tel bawk a. Lehkha pakhat chu an han chhiar leh a.
.
Ka rilru leh ka hriselna a thlahniam ta ngei mai khawngaihtakin an thu lo zawm hram teh. Ka ziakchhia te pawh hi hrethiam rawh, ka mit tuam tlat ani a, a vawt em em mai bawk si. Khawngaihtakin Police ho chu inrawlh lo turin ti hram angche, he pawl Code No. M-3 inti te hian an rawn phone leh hunah che an thu lo zawm hram ang che. Pawisa i neih hma leh ka lo haw leh hma ani mai. Darling, i ti hma thei ang em? Khawngaihtakin Police chu hnar lo tum hram angche min hmuh leh iduh tak zet anih chuan.
................................... Muriel.
.
Lehkha dang chu a fanu Diana tana ziak a ni a. Television atangin a thawm alo hria a. Amah leh apa a ngaihsak avangin lawmthu a sawi a, a dang zawng chu a pasal hnen a asawi ang bawkin M-3 thuzawm tura ngenna bawk a ni a. Smith chuan lehkha pahnih chu a han bih vang vang a, a hma fe a ziah tawh sa, rawn thawn tlai mai niin a ring tlat a. Kidnap tute Code name atan M-3 an hmang tih chu a hma daihin hriat a ni tawh a, lehkha pahnih naah khan M-3 aiawhtu lo beisei turin a rawn chah a, Police inthiarfihlim turin angen chamchi avang hian lehkha chu rawn thawn tlai mai anih a ring tlat a. Tlanna sum inpek dan tur arawn sawi tel tak avang hian hma asawn hle in a in hria a. Amaherawhchu a hmun tak a la rawn sawi chiang leh tur a ni a. Chumi nghah chhungin thil tih dan tur an lo rel ve zel bawk a. Chanchinbu mi ten an ngaihven em em reng a. Foriegn Correspondents te pawh an tam sawt hle tawh a. Mckay chhungkua pawh kim takin an awmkhawm zel a, Ian Mckay chuan anu chu a thi tawh ngei ang tih a ring na in, a sawi chhuak lemlova. M-3 rawn sawi ang apiang chu zawm turin a in kau reng a. Inbiak lehna hun atan chuan chawlhni a rawn ruat a. Smith chuan, "Pound maktaduai khat chu kan ngaihtuah a tul ta e" tiin a hote a hrilh a. Pawisa tak tak engemaw zat kan telh a, abak zawng chu ka thian pakhat khawl chhumi ka ruai ang a, kan mamawh zat chu a siam chhuak mai ang" tiin hlim hmel pu takin a sawi a. Pakhat chuan, "Chutianga note siam chu Home Office leh Treasury in zawhte ruaiin min rawn seh vat lawng maw?" A rawn ti a. Smith chuan, " Chu zawng ngaituah buai duh suh u, a tih dan a awm mai ang," tiin a hnem hlawm a. A sawi chhunzawm leh a, "kan hmachhawn tur pawimawh ber chu M-3 hi a ni a. A thupek hi tihdanglam tir hret angai a ni" a han ti leh a. Pakhat chuan, "A englai kha nge a?" A lo ti vat a, Smith bawk chuan, "A lehkha ah khan Mckay chu Motor Ford Capri rawn hmang tur in a ti a. Mahse Mckay aiah midang kal tir a tha ang," a rawn ti a. Ian Mckay chuan, "Hei hi sawi Chiang deuh teh," a lo ti vat a. Smith chuan inti fing tak hian a han melh kual vel a, "Hei hi chu sawiho tehchiam chi pawh a ni lova, nang leh ipa hi a tu zawk mah mah in biakna tur hmun RV ah chuan in awm arem lo vang. Tawhsual tawh palh theih anih avangin in kal rem ka ti lo a ni. In aiah midang an kal ang. M-3 chuan nangmah ngei hi i pa aiah apawm che a tul phawt a, a dawt lehah chuan Ford Capri aiah Rolls-Royce hman hi a remtih a ngai ani. Ford Capri chhuatah mi pakhat mut ruk tir chu ahar vak lo nain, mahse, chu aiah chuan M-3 hmu tu tur belh chhah tu atan driver hruai chu a tih chi zawk ang. Tii. A ruahman dan chu ahan sawi a. "Tah chuan a thupek thlak tura hneh chu a har phian lawng maw?" Tiin zawhna a awm leha. Smith bawk chuan, "Inbiak tawp dawn lamah rawt thut nise la, a pawm ve mai ka ring," tiin a chhang a.
.
Chawhma dar 10:37 ah chuan telephone chu a lokal leh te ngei a. Ian Mckay chuan aw tham deuh, pawr ang reng si a hriat tawh ngei chu a han hre leh a, " Hei hi M-3 a ni. Lehkha i lo hmu em?" A han ti a. Ian Mckay chuan, "Hmu e, niminah khan kan hmu tawh. A la dam ngei tih fiahna a awm silova, lehkha hi chu a hma fe a aziah pawh ani mai thei a. Pawisa chu kan nei tawh a. Mahse ala dam ngei tih kan hriat si loh chuan hlan ngawt che hi ava phur awm ta loh ve," a han ti leh a. M-3 chuan khur deuh hlawk hlawk hian.
.
"A kawr a hak lai thlengin ka rawn hrilh che kha. Engti turin nge min duh a? A kawrhak lai hi hlipin ka rawn thawn dawn che em ni? Tunah hian kan in dawr tawn a ni a, kan indawr a tluan nan chuan, a ruang hi in khawngkhar bulah ka rawn dah mai ang. Tun hi ka rawn ngen na che hnuhnung ber a ni tawh ang. Aw nge aih, min chhang vat rawh," a rawn ti khar khar a. Ian Mckay chuan,
.
"In thuzawm chu ka tum chiang alawm. Mahse fiahna ka phut mai ani" a han ti ve kha a. "Anih tak chu mahse i hmu chuang lovang," tih chiah chu chhanna a dawn ani a. Ian Mckay chuan thinrim aw tak hian.
.
"A ruang chauh i kawl a ni lo ma?" Tiin a han zawt leh salh a. M-3 chuan aw nem deuh zawk in.
.
"A mah chu kan kawl alawm" a rawn ti leh a. Ian Mckay thung chuan.
.
"Mitthi i kawl chauh ani. A dan tawh lo tih chu i hre chiang hle alawm. Mi bum i la tum cheu a ni maw?" A han ti leh ngat a. M-3 chuan.
.
"Chutia i tih tlat chuan anih nih ni ang hmiang. Hna dang kan ngah nak alaiin" atih san ta a. Ian chuan, chaltlai ang reng takin.
.
"Mi engzatnge in kidnap tawh a?" A ti a. A han zawh leh chuan, a reh vang vang a, a beidawng hman thelh a, mahse a rawn chhang leh hram a.
.
"Tumah kan la that ngailova, mahse vawikhatna hi a awm chawk. Tunah pawh ila hre mai ang," a rawn ti leh a. Ian Mckay chuan thinrim zet in.
.
"Ok pawisa chu i dawng awzawng lovang, phone hi ka dah dawn e," a han ti leh ngat a, mahse a ngaichang ran thova. M-3 chuan phone han dah mai chu ala hreh in a ring deuh a. An rin ang ngei chuan M-3 chu arawn tawng chhuak leh a.
.
"Awle, kan thu in zawm dawn nge, kan tihtur chu kan chhunzawm mai dawn? Pawisa pawh chu kan mamawh bik lovang, nangpawhin i nu hi i hmu leh ngai tawh lovang" a rawn ti ta sak sak a. Iam chu a han thaw halh halh a. "Phone atang hian a aw chu ka hre duh a ni" a ti leh a. M-3 chuan.
.
"A theih loh tih chu chhanna a ni mai" a ti a. Ian vek chuan.
.
"Telephone tal hian ka be duh alawm" a han ti leh hram a.
.
"A theih loh ka tih chu" tiin a chhang leh a. Ian chuan thil dang ala phut leh a.
.
"Anih leh lehkha tal rawn ziah tir leh rawh" a la ti ta talh a. Chu pawh chu a theihloh thu bawk in arawn chhang leh a. M-3 chu a tal buai hle in a chiai tih an hrethiam a, Ian bawk chuan, "Zan ina chhuak ' Evening Standard ' kha lei la, a thupui leh ni chiang takin ziah tir rawh" a han ti leh hram a. Ian chu a thinrim a in sum zo ta mang lova. "Zan in chanchinbu thupui chu a rawn ziak chhuak ngei tur ani, Goodbye" tih pah in telephone chu a dah ta hmak a. Zanlai pelh chiahah chuan telephone chu a lo ri leh a. M- 3 chuan.
.
"I nu ka be zo hlawl a ni, amah hi inla duh anih chuan ka thupek te in zawm tur ani" a rawn ti leh a" M-3 chuan inbiak reng mai aduh tawh niin alang an inbiak lai hi S. T. D call atanga chhui theih loh in a ring bawka, tuiluang lai ang maiin atawng zat zat a.
.
26th January ah chuan lehkhathawn pahnih Envelope pakhat a inthun hi alo thlenga. Chutah chuan tham na sum chungchang arawn sawi leh a. Muriel suiet atanga hleh thlak them leh pheikhawk an rawn thawn leh a. Pheikhawk leh kawr them atang chuan a fanu Diana leh Jennifer chuan an nu kawr leh pheikhawk ngei a ni in an hria a, savun leh an chehthlak nan chuan Sakawrbakcheh lian kikawi naka chep thla chi hi an hmang a. Heng thil te hi thubuai chhuina(crime index) atan a tangkai tlat a ni.
.
Sum chungchang thu a sawinaah a kut ziak pawh a chhe hle a, kut khur chunga ziak a ni lo tih a hriat theih a, lehkha ziak thiam lo hrim hrim a nih hmel viau. Chu lehkha ah chuan M-3 chuan February ni hmasa ber chawlhchuan an in dawr tawnna chu tihfel vek a beisei thu asawi a. Ian Mckay a rawtna erawh chu a hnial deuh vek a. "Thu kan pe che u a, a zawmtu tur in tha tak in ti mai rawh u" tiin khauh takin a titawp a, lehkha pahnih chu ngun takin a han chhiar pawh chuan, Ian Mckay zawhna leh a ngenna te chu arawn chhang miah lo a. Everything Standard thupui ziah chhuah thu leh Muriel chu ala dam ngei tih hriat theihna tur lam reng reng a rawn sawi lova.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2017, 11:40 am

Chapter-4
.
Detective ho chuan lehkha chu an bih ngun hle hlawma, he thuah hian Police an la hnuk kir lo tih chu M-3 hian a hre ngei si a. Chuti chunga an sum hmuh a la tum chu hriat thiam har an ti hleva. Misual fing verther tak leh thil sual ti tam tawh te ni ngat se chuan bansanin a inthup bo duh tawh ngei an ring a. Thlakhat lai tlin tawh hnu pawh a la rawn ngaihven reng avang hian misual hlun anih loh an rin phah a. M-3 rawn sawi ang ngei khan an tum zawk tak man lovin a remchang zawk an man mai mai a ni a, chutiang bawk chuan an lehkha rawn thawn te pawh a in thlen khalh nual a, chu tak chu an sulhnu pawr lo lanna hmasa ani a, an chetsualna bul ani thei bawk a ni. Thilsual ti thin, zuam awm tak niin a rintheih, mahse dan chep laklawh chuan an hlauhawm thei viau bawk ang. An lehkha zawng zawng hi London hmar lam atanga lo kal vek a ni a. Chuvangin sum in hlanna tur hmun RV pawh London hmar lam a nih ngei a rinawm. M-3 hu fing vervek tak niin a rin theih thova, RV diktak a rawn sawi hma in, amah hnutu tur Ian Mckay hi police in an zui nge zui lo tiin a theih tawkin fiah a tum ngei ang. Rolls-Royce nge, Ford Capri zawk hman tur tih pawh M-3 chuan ala rawn sawi chuang lova. Eng kawng zawng pawhin Detective te chusn a tawp thlen an tum a, chuvangin Superintendent Smith chuan home office tanpuina a dil ta a.
.
Helicopter hman pawh an tum a, mahse M-3 chuan zan lama in hmuh tur a tih avangin helicopter chu a tul lova. Home office chuan scientist kut themthiam tak an rawn tir tel a, chupa chuan Suitcase ah Electronic khawl a vuah vek a, chu khawl hmang chuan hnu chhui a nuam dawn a, mel 50 danah pawh awmse an chhui theih phah dawn a, kidnap tute um a tul huna tangkai tak tur ani.
.
Scotland Yard chuan Superintendent Smith hman turin police ringawt pawh 180 an pe a, Car chhinchhiahna nei lo 56 an pe bawk a, Commander Quiver office chu duhtawk in an hman sak theu bawk a. Chutah chuan Telex machine Map lianpui, open and closed circuit telephone chu duhtawka hman turin an dah bawk a. Chu bakah a tul phawt chuan mihring leh bungrua dil belh theih zel a ni cheu. Detective leh police te chu pawl 3 ah an then a, pawl khat chu Wimbledon ah an dah a, pawl khat leh chu Ford Capri emaw Rolls-Royce chu zui thei reng tura tih an ni a, adang leh chu RV bul hnaia awm tura ruat an ni leh a, a bul vel kawnv zawng zawng mitmei reng tura tih an ni bawk.
.
Smith chuan Inspector Minors chu hna khirhkhan chang turin a ruata. Iam Mckay lem chang tur emaw, Driver emaw ani ang. M-3 chuan Rolls-Royce hman a phal hlauh chuan Sergeant street chuan a kal pui ang a, Ian Mckay lemah a chang ang a, an in rual tawk a, an san zawng leh hmel a inang deuh bawk a, Inspector Minors leh Sergeant Street chan tur chu a hautak zek ang. Chutiang chuan rem an ruat vek a. Mitinin an tihtur an hria a, note lem pound maktaduai khat pawh chu police office ah chuan an kawl reng tawh a. M-3 thu nghak in an awm reng a.
.
Zirtawp ni January ni 30 a lo thlen chuan M-3 chuan a rawn phone leh ta ngei a, Ian Mckay chu duhtawka lo kaihhruai lawk tawh a ni a, a phone chu a han chhang ta ngei a.
.
"A theih angin i thu zawm turin ka inpeih e," a han ti a. M-3 chuan, "Ok chu ti chu chawlhni khi a remchang ang," a rawn ti leh s. Chutah Ian Mckay chuan, "Pawisa chu ka rawh keng ang" a han ti a. Hun pawimawh laitak anih avangin tihsual a hlau hle a, Capri aiah Rolls-Royce hman kha an duh si a. A han chhunzawm leh a, "Lo ngaithla teh, Capri ka rawn khalh chhuah chu a rem lovang, chawlhkar 5 lai kan dintir mai mai tawh a, tuna ka rawn khalh chhuah chuan chamchinbumi hovin mak tiin a thla an la ang a, midang an ti phawklek ang" tiin dawt a sawi a. M-3 chuan thudang sawi lovin, "Ani tak maw" a rawn ti ringawta. Chutah Ian Mckay chuan, "Chuvangin, a aiah Rolls-Royce ka rawn khalh ang," a han ti zui leh a. M-3 chuan hnialna thu engmah a sawi zui tawh lo. Sum tam lutuk a sungtuah chuan a ti â zo tawh ani ber, thang hlauhawm tak pawh chu a ngaihtuah chang tawh lo.
.
Inspector Minors chuan Driver uniform a hawh chu a han ha chhin a, a zak hnuaiah silai a pai bawka, darthlalangah a in enchhiang a, a lungawi hle mai a, Driver aiah Roll chu a khalh dawna. Ian Mckay aiah Sergeant Street a chuang dawn thung a, ani pawh chuan Ian Mckay suit chu a hak sak a, alo tawk ve thlap tho a, zan thim deuh ah chuan hriat hran a har hle ang. M-3 leh a thiante hian chuti taka hnaiah an hmull mai thei a, Chuvangin a lemchan chu a ang duh viau ang.
.
Sana chu a han en a, an chhuah a hun tawh avangin, an car ah chuan an duh tinreng hmanrua an dah vek a. Kawng fianrial deuhva an kal lai chuan, twoway Rdio leh Wireless Rdio khawl te chu a han enchiang vek phawt a, a tha veka a hriat hnu chuan North Circular Road chu an va thlenga, khawlaiah chuan mi an vang hle a. Great Cambridge Road chu an va thleng ta a, chumi atang chuan New Park Avenue ah, chutah Church Street chu an va thleng ta ngei a. Telephone box chu a lo awm ngei bawk a, sergeant Street chu car atang chuan a chhuaka. Telephone bul teah chuan a va kala, Directory hlui zet alo awm a, meizuk vap a tla nual bawk a. Telephone ri beiseiin a ding ran a. Hun tiam a thlen tawh avangin minute khat pawh rei a ti hle a, mahse telephone chu a ri ta ngei a. Aw thawp deuh chuan,
.
"Tunge ni" a rawn ti a. Sergeant Street chuan, "Ian Mckay ka ni e" a han ti a. Aw vek chuan, "M-3 ka ni a, i tih tur chu Cambridge road lamah kal la, chuta tangin veilamah pengin Southbury Road pawh ang che. Chutah telephone box a lo awm ang a, a number chu DI-303-1553x a ni ang. Chutah chuan lo nghak la, thu ka rawn pe leh angche. Tihsual palh a pawi hle ang" a rawn ti a. M-3 chuan chhanna nghak lovin telephone chu a dah nghal daiha. Street pawh chuan car awmna lam chu a pan ve nghala. Minors chuan an inbiak dan chu alo zawt nghal vata. Ani chuan, "Cambridge Road lama kal tur in thu min pe a. Zuitu kan neih leh neih loh fiah a duh ani ngei ang" tiin a chhanga. Southbury road chu zawhin Street light pahnihna chu an melh phei zel a, ahlat dan pawh chhut lem lovin an kal zel a. Kal pah chuan Headquarters chu thil awmdan an hrilh bawk a. Harrow DriveBury Street Enfield thlengin an kal a, zan dar 10:45 ah chuan an inbe pawp leh ta ngei a. Sergeant Street chuan abiak lai chuan telephone pawh hre chang lo lek in a ke bul chu a melh ta reng mai a. Inspector Minors chuan mak alo t hle hman a. Street chu a han kun a, chhuatah chuan thil engemaw chu a han la a, engdang nilovin M-3 chuan a tihdan tur chu ziakin adah anih hmel hle. An inbiak pah chuan a ziak chu arawn sawifiah zela. An inbiak zawh veleh Car chu arawn pan nghala, Minors chuan thil awmdan chu hriat a nghakhlel zet mai.
.
Car-a chuan pah chuan, "A hma aiin a ziaawm deuh e" a han ti phawnga. Minors chuan, "Engtin maw?" A lo ti thuai a. "RV panna tur kawhhmuhna chu lehkha themah an lo ziak a, chu chu Piccadilly Cigarettes bawm chhungah an ko dah a, chu chuan zawnawlna min pek belhchhah i rinv ve mai ang" a han ti s.
.
M-3 thiltih dan chu mak an ti dun hle a, mi tuten emaw lo hmu hmasa sela chuan Cigarettes bawm ruak mai mai chu nuai hlawmin an paih bo daih ang a, hmuh leh chu a harsa phian dawn si a. M-3 hian engtik a adah nge ni ang aw tiin an in rinsiak a. Anih loh leh an bul awmin an lo enthla ve mek pawh ani mai thei tiin an sawi dun a.
.
Car chhungah chuan lehkha chu an han bih leh a, RV panna tur chu a lemin a ziak bawka. Khawte reuhte High Cross thlenga kal phawt tur a ni a, High Cross khaw pelh veleh Esso Petrol Station a lo awm ang a, Yard zahnih velah chuan kawng sir vei lamah signpost a awm leh ang a, chu kawng chuan Dane End a chhun ang. Chutah kawng dawlna pahnih a lo awm bam ang a, chulai hmun ngei chu pawisa awmna suitcase dahna hmun tur RV chu ani ang tiin a lo ziak thlap a, lem ziak in thalin akawh tir zel bawk a, Inspector Minors chuan, "Engtin zel nge?" Tiin a ham zawt leh a, "Church Street ah kan let leh ang a, Telephone box ah M-3 kan lo ngaichang ang a, Muriel an thuhrukna chu min hrilh dawn ani" tiin Sergeant Street chuan a chhang a.
.
Minors chuan map chu a han en leh a, High Cross chu mel 20 vel a hla a ni a. RV thlen nan chuan minutes 30 vel chauh an mamawh tih a hria a. Wireless hmangin Superintendent Smith chu a han berawn leh rih a, chulai vel hmuna an mahni thlawptu car leh mihring lo awm te chu lo inzar pharh hman turin an duh si a. Kawnglak ah an thang rei lutuk chuan M-3 ngaih ati tha lovang tih a hlauhawm bawk si a, hun hman thiam an tum hle a, zanlai vel chiaha thleng turin an kal a.
.
Smith chuan RV chu remchang a tilo hle mai a, Dane Road chu phul a ni a, a zawl viau mai bawk si a, bihrukna a remchang lo hle a lei khuar lai deuh chu s awmchhun a ni mai a, RV ep chiah chuan in pakhat hle deuh hlekah a awm a, eng a la de va va a, chulai vela tawm ruk chu remchang hle mahse, a luahtute chuan zanlaia mi han hmuh chu an phawklek ngei dawn in a hre bawk si a, an bengchhen vaih chuan M-3 alo lang ngam dawn si lo. Behchhan awmlo chuan a langsar nul nul dawn hle bawk si. Chuvangin M-3 hmun ruat RV chu police tan chuan a remchang lo na ngiang mai.
.
Smith chuan a hmun chu Commander Quiver chu wireless chuan a han rawt ta a. Hun bichilh takah engemaw tal chu an rawt thluk angai miau si a, radio hmangin a zuitu ho zawng zawng chu hrilh nghal vek a tul tawh si a.
.
Rdio thu thawnna pawg chu midang tan lo man ve a awl tlat mai lehnghal a, VHF lo vuahtu phei chuan a man ve nghal ngei bawk anh. Chulovah chulai hmun chu khawte dai a awm a ni a, motor veivak a tlem thin avangin zan reh tawh lama an tlan sul sup mai chuan an sa pel chu a bibo ngei ang tih an ring bawk si.
.
RV atanga hla tehchiam lovah chuan Smith chusn Radio hmangin thu ahan pe hlawma, hnungdawltu car zawng zawng chu a malte te in a be pawp vek a. Fimkhur thei ang berin Dane End chu an pan hlawm a, mahse RV chu an hnaih lutuk ngam si lova.
.
Sergeant Minors leh Inspector Street chuan RV chu an thleng teuh tawh hle a, a hmun laitak awm chu an melh zak zak tawh a. Street chu Car atangin s chhuak a, a han thlir kual vel a. Kawng dawltu lungrem chu a han hmu ngei a. Suitcase chu rih em avangin Minors chuan a zawnchhuah pui a.
.
A reh vang vang mai a, thli a thaw ri herh her a. Pound maktaduai awmna Suitcase chu RV ah an dah ta a. Chutih lai tak chuan thil ri an hria a, an piah lawkah chuan lei hrut zawng a ri deuh hrawih hrawih awmin an hria a. Bawkvaka lri hrut ri niin an ring a. Minors chuan a kawng a dawm vat a, rangtaka pistol lek turin a inring nghala, "Car ah zuanglut vat rawh" tiin Street chu thu a pe a. Street chu a zuang lut reng kher mai. Car chu dim tein s khar a, a reh leh ta vang vang a. Street Minors chu a awm ngaiin a ding renga, thimtham karag chuan a mit leh beng a chhi renga, engmah thawm hriat tur a awm lova, arehin a reh vawng vawng mai a. Thlifim tleh ri chauh bak engmah a hrelo. Beidawng lova a han hawivel hnu chuan mipakhat hmel a hmu ta a, chupa ngei chu M-3 a nih ringin a kalsan ta thuai a. Car lam a pan nghal a. Thimtham mah nise, a mi hmuh chu a chal akawlh deuh ani tih a hria a. Thawm dim tak in car lam chu apan a, car khawngkhar chu ahan pawt hawng dawn a, ahawng thei mai lo chu athin a phu dut hman a. Hlauthawng reng renga awm anih avangin rei pawh a ti hman viau zel a, mahse achhunga lo awmsa Street chusn a lo kalh tlat a. Alo hmu lawk bik silova, hawnsak nachang reng a hrelo. Minors chu s thaw huai a, Street chuan, "Tunge ni a i hriat?" A lo ti vat a.
.
Smith leh midang chuan hla tawk fang atangin RV chu an thlir thapa, zan dar 2:30 lai ani tawh a, suitcase lah chu a ngaiin ala in hung reng mai si a, rawn latu tur awm hmel an hmuhloh avangin an kawhar hman hel a, darkar hnih leh achanve chhung chuan Car 12 laiin suitcase chu an tlan pel a, tumahin suitcase chu an hmu pawhin a lang lova. Minors pakhat Volvo 144 a mit veilam tha lo deuh pawhchuan a rawn tlanpel ve az chu Volvo chu a pawrin a berh ang reng hle a. Khawvar tleng chuan an chang reng a, tuman suitcase chu an lam lo.
.
Smith chuan abeidawn thlak atih rual in Mckay te chhungkua chu a ngaihtuah hle bawk si a, engmah hmasawnna chhuanawm tham hrilh tur ala nei bawk si lo a. Muriel chu a dan tawh loin an ring leh nghal si a, anmahni hmuh leh pawh a huphurh hle mai. Andin hmun hreawm tak chu thawveng taka siam turin engmah ala thleng bawk si loa. Chutih naklaiin Ian Mckay pawh chuan Detective ho thu ang zela M-3 biak pawh chu a duh tawh lo lehnghala. Chumi zana M-3 tangkabawm suitcase chu alak leh tak siloah chuan telephone tak ngial pawh a arawn biak leh duh ang ring tawh lova mahse an rin ang ani hauh lo. Telephone atang chuan M-3 chu thinrim zet in arawn ang a, "Min bum a ni" arawn ti pawr hle maia. "Engtin a?" Tih a an han chhang chu, "Police kan hmu teuh alawm" arawn ti leh a. Ian Mckay chuan phone chu a chelh rana, "Police an awm anih pawhin ka hre ve hauh lo mai" tiin a pha thunga. M-3 chuan, "kan thu inzawm duh lo ani" ahan tih leh chuan, "Kan zawm alawm. Min zui tih reng reng kan hre hleinem. Kan hriat loh in Police chu an rawn kal ani ang" tih in a han chhang leh a, Ian Mckay chuan, "Kan sawi tawh ang kha a ni. Police chu anmahni thu a che an ni ngei ang. An remruat na ka hruatpuill. Kei chuab i thu ka zawm zel alawm. I thu ang zelin ka che tih chu i hria alawm," a han ti ve leh a. Chutah M-3 chuan, "Awle tunah chuan kan hotute nen kan Committee dawn a, i nu chungchang thu pawh sawi fel nghal anih tawh ka ring. Tih hlum hun tur an rel fel ngei ka ring. Kei erawh chuan la zuah rih ka rawt ang" a rawn ti leh a. Ian Mckay chuan, "In thu zawm zel ka duh tih hi lo hriattir rawh" tiin a han ngen leh hram a. M-3 chuan "ka hrilh ngei ang. I nu hi ka ngainat zawng taj ani asin. Ka nu min hriatchhuah tir lehnghal a" ti a asawi lai chuan a aw a nem hle a. A tira a aw nen chuan in ang lo tak ani. Ian chuan, "Min la rawn be leh angem?" Tiin a zawt a. "La rawn be leh mai thei, mahse nang chu ka be duh tawh lo che, ka ring tawh lo che. I oa chauh ka be duh. Tumah dang ka be tawh lovang" a rawn ti khauh a.
.
M-3 chuan nghakuai chu a hmu reng a, mahse acchawchah chu a it tlat si a.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2017, 11:41 am

M-3 thusawi chu tape in an han tawng zawm tir a, "ka naute ho radio in ka bia a, police in Rolls-Royce an zui tih min hrilh ani" tih a sawi lai tak chuan Smith chuan a titawp a, Minors melh pah chuan "Heihi ka ring lo, radio hmangin tumah a bepawp lovang" a ti hmuk a. Minors chuan, "kan hnungdawltu car veivak atama. An hmu chu a mak vak em ni? Min nuihzat ru khanglang ang a" a ti a. Smith chuan, "Engpawh nise inbiak ala duh zel a. Amaherawhchu Alick Mckay chauh abe duh a, Ian chu aring tawh der silova. Alick Mckay ngaihdan zawt kher lovin a ai i awh tawh ang. Vawikhat kan tihsual leh vaih chuan RV ah hian kan inhmu tawh ngut loang" tiin Minors chu a melh a, ani chuan a hmuihmul a kawk va a. Smith chuan, a awmzia hrethiam nghalin, "Khangte chu met la ani mai alawm" a ti thuai a. Smith vek chuan, "Dane End kha zawng a remchang lo lulai em ani, mi za leh sawmriat ngawt maiin kan veha. Kan thil hmuh chhun lah chu lehkha pangpar pahnih leh Cigarettes bawm leh Car number ziah tlarna chauh ani mai si a. A lehpek a awm vaih chuan mi tlemte, tha the thaw chauh kan ruat tawh ang" a ti a.
.
Parkar chuan, vei dang a neia, "kan car hmuh te khs engtin nge ni ang? A lo ti a. Smith chuan, "Engnge i ngaihdan? Tiin alo zawt let vata. Parkar chuan, "Crime index ka bih veka, Report pakhat ka hmuhah December ni 29 khan tlai dar 5 arik dawn in Wimbledon lama kal Volvo car bal deuh taka tlan pelh thu ani a. A chhungah mi pahnih an awm a, pakhat zawk chu Arab mi niawm takin a hria" tiin a han sawi a. Smith chuan engteh ualah angai lova, M-3 awphawi chuan West Indian leh Arab chu an inang thawkhat viau tih a hre bawk a. Ngaihsak loh teh thlawt chu a awm a ti lova, "Han sawi zel teh" a lo ti a. Parkar chuan ahan sawi zawm leh a, "Tichuan, minutes 10 hnu velah chu car chu Church Street lamah a kal zel a, chu chu Arthur road atang chuan vawm phak lek ani. Detective Sergeant Steven chuan Volvo 144 chu thawhtanni zingah Dane End ah khan alo hmu ve leh a, license number erawh chu a hmu tel lo hlauh" tiin a han report a. Smith chuan, "Chutah Volvo in hmuh leh Church Street ami chu angai tho 144 hi a ni angem? Tiin a han zawt a. Angai chiah anih thu an sawi thei bik lo. Smith chuan, "Anih leh Britain ah hian Volvo engzat nge awm ang le?" Ti a a zawh chuan Parkar chuan alo chhui vek tawh a, 33,00 lai a awm a. Smith chuan nui chungin, "Volvo neitu te chu lo chhui ula, an Volvo hmuh chu arawng leh a siam kum te lo chhui bawk sela, thla thum chhung chuan an chhui zo mai ang chu! ! Minors chuan, "Hertfordshire vel hi dap ngun bik ila, West Indian tamna a ni si a. M-3 te hi mi pathum an nih hmel a. Engzat pawh chu lo nise, kan zawn chu M-3 ani tho a. Aw kan hriat chu pahnih chauh pawh a ni maithei a; chuvangin pahnih chauh pawh anni mai thei" an ti bawk a. Flying Squard chuan Hertfordshire leh Storford huam chhung zawng zawng Volvo neitu chu an chhui chhuak rang hle a. An chhuina lamah chuan Pakistan loneimi Stockingpelham hmuna chengin Volvo a nei tih chu an hriat paha. Detective te chuan chumi neitu chhungkua chu an han chhui a, chu loneitu pa leh a nupui German thlah te chuan pawikhawih thilah hmingchhiatna engmah an lo la nei lova.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2017, 11:42 am

Chapter-5
.
Kutphah leh kutzungtang hnu an hmuh pawimawh tak tak pathum Picca-dilly Cigarettes bawm ami te, Muriel lehkha rawn thawn hmasak ber ami te leh chanchinbu pheka mite chu duh tawka an fiah hnu chuam mipakhat kuthnu sni ngei a ni tih an hrechiang a, a kut neitu ber an la hmu silo.
.
Minors chuan, Smith chu phone in a rawn bia a, "Tunlawk khan M-3 chuan a rawn phone leh asin" tih a rawn hrilh a. Pawisa chu a rawn phut tlem ta deuhva, maktaduai khat nilovin, a chanve a rawn ti a. Chumi inhlan dan tur chu rawn ruahman leh a duhthu a rawn sawi a. Chutah Smith chuan, ngaihven zetin, "Eng tikah nge ni a? Khawiah maw?" A ti vat a, Minors chuan, "Ka la hre rihlo. A rawn phone leh thuai ka ring. Pawisa hlantu atang chuan Alick Mckay leh a fanu Diana kher a phut a. Briefcase pahniha rawn keng turin a ti nghe nghe a" a ti a. Smith Chuan, "Awle, ka rawn pan nghal ang che. Alick Mckay pawh chu kan hmuh a thul ang. Briefcase pahnihah thun sen ziaang ani lova, suitcase panhih angai ang" a ti a. An beisei angngei in M-3 chuan a rawn phone leh thuai a, "Zirtawp, February Ni 6 ah Alick leh Diana chuan Rolls-Royce hmanga rawn inkhalh chhuak turin" a ti a. Church Street telephone box pan turin a ti a. Chuta tang chuan pan tur lam a rawn hrilh leh dawn a ni. RV tur chu arawn sawi hnu ah tlai dar 4 vela thleng turin a ti bawk a. Smith leh ahote chuan darkar 24 chhunglai hun an nei a, hman tangkai an tum hle. Dane End ang mai mai a tlawlh leh kha an hlauthawng hle a, tun tum atan chuan mifel ber ber tur Flying Squard leh Crime Squard atangin an thlang chhuak a. RV chu hla tawk tak atanga hual turin A-1, A-10,A-11 leh kawngpui pawimawh zawng zawng ah an in hung fel vek a. Chung zawng zawng thupetu atan chuan Scotland Yard hmunpui chu an hmang tawh thung dawn ani. Khaw en chhung chuan Helicopter hman a remchang bawk ang a, mahse thim hunah chuan engmah ani lovang.
.
M-3 hi bum ngei an duh avangin Alick Mckay aiah Inspector Minors nula zei fahran Joycec Armitage a tang thung a, an pahnih mai chu him tawk lova an hriat avangin arukin mipakhat kal tir an duh a, Motor hnung bungraw dahma chhungah tawm ruk tur ani a, achep em avangin te fel deuh a ngai a, Chuvangin Inspector Bland chu loh theih loh a ni mai.
.
Bland chu pate deuh feet 5 leh inches 8 a ni a, motor bootah chuan a han mu a, oxygen bawm nen chuan aleng thei hram a, a ke erawh a thluang thei lova, a ke leh kut chu a kham hman hle mai a. Two-way Radio an dahsak bawk a. Rikrum thilah Minors nen chuan an inbe thei renga, an motor chu ambush a anih hlauh pawhin amahin kawng a in hawn thei a, Minors chuan Rolls Car chu a khalh chhuak ta a, a sirah Diana lemchang Joyce Armitage chu a thu vang a, boot chhungah Inspector Bland chu a inkual ram mai bawk a.
.
North Circular Road chu panin an tlanzar zar a, an rin aiin an thleng hma a, tichuan M-3 chu an lo ngaichang ran a.
.
Telephone ri chu an ngaichang ran tawh a, minute 40 a ral ta hial a, thawmreng a awm rih lova, an nghakhlel tawh hle mai a. Khua athim tawh avangin Helicopter pawh atangkai ta lova. Beisei taka an nghahreng phone chu a rawn ri ta ngei mai a.
.
M-3: Tunge i nih?
Mckay: Keimah Mckay ka ni e.
M-3: Ibulah midang an awm em?
Mckay: Ka fanu Diana chauh a awm.
M-3: Awle, a tha e. Bethnal Green Road ah kal la, Call box a lo awm leh ang a, chutah chuan ka rawn be leh ang che. Tihtur ka rawn hrilh leh angche.
Mckay: Engtikah nge ka kal ang?
M-3: Tunah kal nghal la, i thlen hunah nghah rei angai lovang.
Tiin phone chu a dah nghala.
.
Minors chuan Yard Office chu a han hrilh nghat vata. A rawn chhangtu chuan muangchang deuha che tur leh a hmun pawh thleng har deuh turin a rawn hrilha. Anmahni hnungdawltu ho insingsak nen hun an mamawh tam deuhva. Minors pawh chuan an inpeih chhung awm chu a hrethiam ve mai bawk a.
.
Motor Boot chhunga tawm reng chu Bland chuan a ning hman hle a, boruak thar a lut silova, oxygen bawm chu a hnim ran maia, motor seat atang chuan a Two-way Radio chu am rawn signal zauhva, a ngaithla vat a, "Bethnal Green Radio pan dan tur i hria em?" Aw chuan arawn ti a. A ni chuan, "Cambridge lamah tlan la, dinglamah peng a awm ang, chutah chuan ngil takin tlan la, A-10 i thlen hunah High Street pan leh la, peng lo awm hmasa ber zawh leh ang che" tiin a chhang a, "Kawng i bo leh i zai mai ani ang chu," tiin a han fiam zui nghal a.
.
An han thlen chuan Minors chuan mak ati deuha, M-3 hmun thlan chu police station nen a inhnaih riau maia, a hriat chiah loh vang anih aring deuha, engpawhnise atih na hmun ah ngei chuan phone chu an lo chang leh ta a.
.
Tun tum chuan phone chu alo kal rang hle thunga, "Mr, Alick Mckay i ni maw?" Tia zawhna chu a chhang vata.
.
M-3 chuan a tihtur chu a rawn tuk ta zaih zaiha, "Roll-Royce kha Underground Station ah dah la. Central line atangin Epping rawn pan rawh. Tah chuan tah chuan phone box alo awm leh angnga, chutah chuan min lo ngaichang leh ang che. Engmah tihsual awih anilo. Tuntum chu police an lo lan leh vaih chuan Muriel chu kan that tawh ngei ang, tuman inhmu leh tawh lovang" tiin a rawn vau zui a. Minors chuan, "Chungte chu kan sawi vek tawh alawm. Police kan kalpui lo reng reng" a han ti ve kha a. "Diana" tiin a chhang vat a. Joyce chuan phone chu ahan dawm chat a. "Hello Diana nangmah i ni ang maw? Pawisa chu suitcase chuan in rawn keng ngei em?" A han ti leh kher a. Joyce chuan, "keng tehreng e" a ti ve mai bawk a. "Atha e. I pa nen chuan tube dahkhawm na hmun pang nghal ula, pawisa khai mai ula, telephone no 3077 in hmu ang a, chutah chuan ka rawn be leh ang che u. Tu. Hi in tan hun remchang awmchhun a ni tawh ang. Tihshal a awm vaih chuan i nu chu hmun tur a awm tawh lovang," tiin a han vau zui leh talh a.
.
An inbiak thu chu Yard office chuan an hre ve zel a, London khawpawn lamah an hruai leh ngei dawn in an ringa, pawi an ti hle a, motor tel lova an kal zel chuan an pafa chauh an ni dawna, motor boot chhung tawmru Bland kha a tangkai dawn si lova.
.
Minors chuan zawi muangin motor dahna tur lam chu a pan a, an pan lehna tur chu ahla tehchiam lova, mahse an mahni aruk tea thlawptute inpuahchah nan hun pawhsei a duh vang a ni ber . Aruk thei ang berin motor chhunga an tawm ruk tir Bland kha chhuahtir a duh a, M-3 hian puitu eng ang chiah nge aneih an hre silova. Mipui vei nuk nuk karah chuan a motor chu a ti ding a. A rang thei ang bera lo vak chhuak turin Bland chu a hrilh a, a rawn vak chhuak vat bawka. A thawmhnaw te kha a han zut mam zung zunga, a kut leh ke chu alo kham hman hle mai. A piahdeuhvah chuan Minors leh Armitage chuan an lo nghak a, mahse inthurualanga lan an duh loh avangin an inthup hle a. RV pan chuan an kal nghal a. Electric a eng lo hle a, phone number chu an han hmu thei hram a, a bulah chuan an nghak leh ta ran a. Zan dar 7:30 ah chuan phone chu a lo ri leh ta ngei a. "Alick in thleng tawh maw" a rawn ti a. Minors chuan a chhang vat a.
.
M-3 chuan, "Zui rutu in nei ani" a han ti tawng a. Minors chuan, "Mai mai a, i suangtuah na mai mai anih chu, ithu ang zel in alawm kan chet. Tumahin min zui lova, keimahni pafa mai kan ni" tiin a han chhang a. Chutah M-3 chuan, "Awle, tunah taxi la ula, Gates Garage pan rawh u. Bishop Street Mini Van UMH 587F in hmu ang a, car epchiahah hian lungrem zawl a awm a, chutah chuan pawisa bawm suitcase chu dah ang che u. In dah veleh Epping Station pan ula phone bawk in Muriel awmna chu kan lo hrilh ang che u. In chiang em?" A rawn ti a. "Hria e, khawngaihin Car number kha han sawi leh teh" an ti a. "UMH587F" tiin a rawn sawi nawn leh a. "Taxi a inchuan lai chu ka lo en dawn che u a, Suietcase chu a hnung thutna ah khan lang thei tur in dah angche u" tiin M-3 chuan thu a han pe leh a, a han vau zui leh nghal a. M-3 hi in hlauvin in pawisa tur a ni, Rifles tha chi leh Shotgun kan nei a, ralthuam kan nei tha hle a nia" tiin.
.
Minors chuan Yard Office ahan be zui ve leh a. Taxi hman mai tur te pawh an lo nei mai thei a, tiin a suangtuah a. Taxi driver naran hman mai chu a hreh deuha, inkah buai palh a awm hlauhin an buaipui angai nasa dawn si a.
.
Ford Zephyr Taxi chu arawn tleng lut zal zal a, a hnunglamah chuan Minors chuan Suietcase chu a dah lut a. Joyce chu a lut vat a, taxi khawngkhar chu inhawng chungin platform hnaih deuh chuan zawite in arawn kir phei a, Bland chu bawk vak in arawn lut ve a, lo enthla tuin an hmuh loh turin Minors chuan alo din hliah a, akawrchung chu hlip in inhliah nan a khai a, Car-ah chuan arawn vak luta, thu loin a bawk nghal zan a, taxi driver chuan mak a ti bak ah a duh lem lova, "Hey angtizi nge a?" A han ti deuh hra a, Minors chuan, adil chhut lutuk hlauin, "ka thianpa hian fiamthu a thawh mai mai ania, engdang sawi tawh loin Bishop Street min panpui mai rawh" a ti a.
.
Scotland Yard Office chuan RV hmun laitak chu an hrechiang thuai a, Car hlui dahkhawm na hmun a ni a, a ep chiah ah hian in ading thluah a, Garage atanga eng chuan achhun eng uar phak a. Chuvangin Detective tawm ruk na tur a remchang lo hle a, amaherawhchu ahmalam a office pakhat chu remchang thoin an hria a.
.
RV chiah an thlen hma in Bland chu chhuk tir an duh a, mahse M-3 ho chuan an hmu ang tih an hlau bawk si a, an thleng dawn tep si a. Minors chuan rem a han ruat leh zung zunga athim lai ber an thlen chuan Suietcase pahnih chu an khai chhuak a, kawng khar zawn chiah ah chuan kak deuhin an ding a, motor chhuat atanga Bland lo vak chhuak chu a bawp karah a vahchhuah tir a, asir tawnah Suietcase chuan a hliah bawka. Tichuan Bland chu arawn vak chhuaka, leiah chuan a phek thei ang ber in a bawk zui a, Minors chuan an kal kian hunah a bul lawka Inah chuan biru turin a hrilh nghal a, chuta tang chuan RV chu chiang takin a hmuh theih dawn a ni. RV takah chuan Minors chuan Suietcase pawisa tam tak awmna chu adah ta chat mai. Taxi driver chuan mak a ti em em mai a, "Governor Suietcase saw i hnutchhiah hlen em loang chu maw?" A han ti ngawta, Minors chuan, "Fiamthu vek anih hi" tih chauhin a chhanga. Driver mak ti chu a ka hau mai. Epping lam pan chuan an tlan liam ta a.
.
Inspector Bland chu an hnutchhiah a, a ni chu khuar deuh hlekah chuan a phek thei ang berin a bawka, rul tlengin phen tur awmchhun lam chu zawi te tein a pan a, RV bul hnaite ah chuan a tawm ta ran mai a. Thlasik lai ani bawk a, zan a lo rei tawh bawk nen, khua chu a vawt kher mai, vur a tla seng seng a, a ruhte chu a na thum tawha. Suietcase rawn latu hmel chu hmuh ngei duhin a melh ran mai a.
.
Zan dar 9 pelh hretah chuan Volvo Car, dum pawl duk deuh, amit veilam ang lo chu a lo kal a, Driver chuan zawi te tein arawn khala, RV a suitcase a hmu ngei tih hriat takin a melh vang vang a. A hmel lan dan chu hang tak mai, sam dum kir leh nghal, beng pharha hlai hlep hlawp a ni a, tleirawl vel awrh chauh niin a lang. Kum 20 bawr vel ni awm chauh ani. A vun rawngah chuan Arab leh India mi ang a ni. A melh vung vung dan atang chuan Suietcase la tur chuan motor ti ding a, chhuak mai hmel a pu a. Bland pawh chuan a en ngun hle a. Mahse a hnunglamah Car pakhat a lo kal a, horn a rawn hmet ri khanglang a, chuvanga chhuk ta lo mai chu niin a lang. He Volvo ang tak, mit veilam englo chiah bawk hi Dane End ah khan hmuh a ni tawh a, tuna mi Licence number chu x60 9946 ani tih Bland chuan a hrethei a. khua a thim vang leh zan rei lam anih tawh avangin motor chhuak atlem angreng hle a.
.
Minute 15 vel aral ta tihah chuan kawngkhar in hawng ri a hria a, a han melh vat a, RV bul lawka mi ani a, kawngkhar atang chuan eng alo chhuak a, Ui tereuhte lo chhuak chu ava hmu kher bawka, a lei chuan in bul vel chu a liak kual zat zat a, a hnim lawr dan dan a Bland chuan arim hria in a rawn chhui phei ngei dawn niin a ring hman a, tihngaihna hre loin a ip chawih chawiha, a vanneih asiamin a neitupa chuan a ko lut ta hlauhva. A thaw huai mai. A tawm ru reng chu Ui chusn a rawn bauh mualpho a hlau si. Rawn bauh nase zawng M-3 khan a hmu palh hlauh ang a, a sa chan chuan arawn tlan ngam dawn si lova. Car pakhat a lo tlan leh zar zar a, mahse Driver chuan, a hmalan chauh a en avangin Suietcase chu a hmu miahlo niin alang. Chutiang bawk in motor dang pahnih pathumin an tlan pel mai mai a, tuman suitcase an hmu lo. Chutah Volvo bawk kha a lo lang leh a. Bland chuan alo en ngun hle a, mahse Suietcase chu hmu lo niawm takin akalsan ve leh maia, a beidawn thlak angreng hle.
.
Mahse beidawn ala hun lo, a tum thumna a thleng ta. Volvo chu darkar khat hnu ah alo lang leh hlawl maia, a tlan zawi hle maia, tuntum chuan driver chuan thian a rawn nei tawh a, driver sirah chuan a thu ran a, Suietcase an rawn thlen dawn phei chuan an kal zawi hle a. A zawn an rawn thlen chuan chhukin suitcase chu an la mai dawn amaw a tihlai chuan an tlansan leh ta mai a, an lo lang leh ta reng reng silo.
.
Khua a var tan ta bawk a, motor veivak a tam tan a, kea kal pawh an awm nual tawh a. Nupa tuak khat chuan Suietcase chu an en a, an din lai chuan pa upa lam deuh tawh hian uikang chunga leng chhuak hian a rawn nang bawk a. An pathum chuan Suietcase chu an en a, an phul hlut a an ti chingpen mai ang tih hlauin Bland chuan Police ho thiltih a nih thu a han hrilh a, an tawng ring ngam lo na in an hnaih tho avangin an hre thova an kalsawn ta nghal a.
.
Mi an veitam sawt em avangin tute emaw chuan Suietcase chu an rawn hmu leh ngei dawn si a, engtia tih tur nge ni ang tiin Bland chu a buai ru hle a, mahsw Headquarters lam mawhphurh ah a dah ta a. Volvo a hmuh thu pawh chu Two-way Radio hmanga hrilh an han tum a, mahse a ngaituah nawn lehin a hrilh ngai kher lova, a hnungdawltuten an lo hrilh vek tawh a ring a, ngawih a chuh leh ta a. Ani zawng RV bul hnai tea tawmru anih avangin M-3 ten an hriat kha a hlauthawn awm bawk si a.
.
Bland rin ang ngei chuan Volvo veivah dan chu Yard office chuan an lo hre na meuh mai. Khawvar veleh chu Volvo Register number leh a neitu chu an chhui nghal a, Darkar khat lek chhungin an hre thei a, a neitu chu Mrs. Elsa Hosein Rooks farm neitu Stocking-Pelham mi a ni.
.
Superintendent Smith chuan Volvo neitu chu enzui tha berin a ring ta a. He thubuai hi kar ruk lai an lo buaipui tawh a ni a. Chumi zing kar a han tih nghal chuk chuk chu tul lemloin a hria a. Mahse, Pelham lama motor kal tur chu adan tir vek a, a Directive ruallah tlaivar in khawvawta tawm zankhua an ni bawk si a, chuvangin chhun en hun nghah a duh ta zawk a.
.
Rooksfarm pan tur chuan an insiam sang sang a, motor tamfe leh silai nen an thawk chhuak ta rup mai a. Rooksfarm chu Pelham khaw daifemah fal nelh nawlh in a awm a. A zau fe a, amaherawhchu a zauh ang hu in thlai lam chu a tha lem lo, a neitu ten an enkawl hneh lo deuh niin a rin theih. A panna kawng pawh a zimin amam lo hle a, Convoy in Detective rual chu an in zui dam dam a. Kawng sir tawn ah chuan thing an zuah uluk hle a. A mawi khawp mai. Farm zawl hlir a ni lo a, a hmarlam chu tlangpawng lian takin a hual a, a awihpangah chuan a neitute chenna In nawm hmel zet mai chu a awm a, huan zawl parh hlai fe chu a chhilh lap a, abul velah chuan indang tereuhte a ding thluah bawk a.
.
Kailawn anthlen chiah chuan Alsasian ui lian zet pahnih an lo chhuak a, smith leh Harvey chu an lo ngur chhur chhur a, mahse pawisa lovin Smith chuan kawngkhar chu a han kik a, nu thau hmiah hmuah duhawm fu si hian kawng arawn hawng a, Smith chuan, "Mrs. Elsa Hosein ini ang chu maw?" A han ti phawng a. "Ni e" tiin a chhang a. Smith chuan, "Police office kan ni a, he farm hi dap turin phalna kan nei a" a han ti a. Chutih lai chuan pa sa pan deuh, hang muk ren rawn, sam kir deuh alo lang a, Sweater V-Shape leh kekawrtlawn dumpawl a ha a, "Arthur Husein ka nia, enge ka tihsak theih angche u?" Hawihhawm takin a ti vat a. Smith chuan Husein chu chiang deuh mai in a han melha, ft 5 leh inches 6 vela sang ani a, hmuihmul a nei chhar a, a bek hmul pawh a fual der dawr hle a. Smith chuan.
.
"Keihi Chief Superintendent ka ni a, ani hi superintendent a ni, Pi Muriel Mckay in atanga tlereuh bo kan zawng a ni" a han tih khum a.
.
Arthur Husein chuan nui sang chungin, "A, engmah ka lo hre ve hlei nem. Kar khatah pound 150 lai ka hlawh a, rukruk bungrua engmah ka ngaihsak ve ngai lo, in duh phawt chuan indap vek thei amg" a ti har har a. Chutah Smith chuan, "A tha e, chuti chu ka mite koh luh arem ang chu maw?" Tiin a han dil zui a. "Rem teh reng e. Tikhan nangni chu nuamtakin lo thu chawl ta che u" tiin Sofa chu a kawhhmuh a, a thuzui a. Mahse Smith leh Harvey chu an thu duh tlat lo.
.
An sitting room chu abial deuh a ni a. Sofa nuam tak tak an hung thluah a. Almira pakhatah chuan zu um chi hrang an hung tuarh a. Chhuat chu Carpet hring mawi takin an khuh a, T. V lian tha tak an hung bawk a. Arthur Hosein chuan hawihhawm a duh hle a, "Zu in duh lawm ni? A eng chi pawh ka nei asin"a han ti ve ngat a. Detective te chuan mak to deuhvin "Chuti a ni maw?" An ti duh chauh a. Hosein chuan chapo tak bawkin, "ka in leh lo hi han en vel ula, hetiang neitu nih chu a chhuanawm viau lo ma" a ti a. Smith chuan, "He ramah hian engchen nge i awm tawh? Tiin a zawt a. "1955 atang ahan, Trinidad atanga lokal kan ni" a ti a. An chhungkua chu Pakistan thlah an ni a. West Indies rama cheng thin an ni. Arthur Hosein chu a zam loh hmel hle a, mahni inring tawk tak leh induh tawk tak ni in alang a. Detective rual chuan an inchhung chu duhtawk in an hai a. Chutih chhung zawng chuan Hosein chu lung muang awm fahran in atawng phar phar reng a.
.
Bland chuan Bedroom pakhat a luhchilh a, chutah chuan tlangval kekawrtlawn tawt teng tawng ha lai chu ava hmu a, chupa hmel a hmuh atang chuan amit ala sawn phalh lova, a bengparh hlai tak leh sam ngil seng sung tho deuh huang chu a hmuh hnu a ni tih a hrechiang nghal a. A kareh zau tak chu a hang deuh hlui a, hnar a thawk harsa tih hmel a pu a. Bland chuan, "ka hre tlat mai che, tunge i hming kha?" A han ti zui a. "Nizamodeen Hosein" tiin a chhang a. Bedroom atang chuan a kai chhuak a, an pu te hma ah chuan a din tir a.
.
An inchhungah chuan pangpar siamchawp, rawng pawl leh eng in kawp chu an hmu a, chu chuan Dane End hmun a, tlanna sum an rawn phut hmasak ber tuma an hmuh nen khan a in ang hle a. Smith chuan, "Heng pangpar hi khawi atanga in lei nge?" Tii a zawt a. Arthur Hosein chuan, "Henghi ka lo la hmu bik hleinem. Kam bedroom pakhatah pangpar kan khawi teuh tih ka lo hre hauhlo. Pawimawh na an nei em ni?" Tiin a han zawt let a. Nizamodeen Hosein chu a meng phawk deuh hru a. Smith chuan, " Heihi tunge ni? Bland" a han ti a. Bland chuan tha tho takin, "Hepa hi nizana Volvo khalh tungei kha ani tih ka hria a, a hmel hi ka hrechiang a, khawiah pawh hmu ila, ka hai lovang"a ti ngat a. "An unau chu an inang lo em em mange" tiin Smith chuan suangtuah a. Unau an ni chiahlo reng a. Nizamodeen chuan ahrawk bakah karkhat ah pound 8 lek hlawh a a chhawr mai ani. An din khawm lai chuan Quarry alo lut ve a, Arthur Hosein a han hmuh chuan ahmel a hrechiang ve hle a, hepa ngei hi Volvo khalhtu bula chuang kha ani tih ka hria a. Anmahni chu an mizawnte an nih hmel sawt hle a.
.
Nizam Hosein bedroom ah chuan lehkhabu pakhat dumpawl a rin an hmu a, chu lehkha Mckay hnena mi nen khan a inanv chiah a, a bu chu an han keuvaz phek thenkhat chu pawhthlak ani ngei tih pawh ahriat theih a. A kekawr ipteah chuan chu lehkha puan them bawk chu a lo awm a, telephone number leh an awmna hmun hming a chuang thliah a. Volvo Car chhungah chuan lehkha pangpar Dane End hmuna an hmuh ang bawka pawl leh a eng inpawlh kha a lo awm ngat bawk a. Sakawrbakcheh ki kiau taka chehna a awm bawk a. An lehkhathawn chhuah chehna ngei kha anih a rin awm bawk. An pindan pakhatah chuam Piccadilly Cigarettes bawm ruak alo awm a, Dane End hmuna an chhar ang chiah sum an phutna ang bawk khan chokaah chuan chemkawm an hmua, chu chuan Mckay ina an hmuh kha a ang hle bawk.
.
Chutianga anmahni chu an finfiah hnu leh chhui dawnna thil pawimawh tak tak an lakkhawm hnuah chuan Detective te chuan "kan zingah in lo kal ve a ni ang chu" an ti a. Arthur Hosein chuan lungmuang hmel takin "khawilamah maw?" Ala ti talh a. Smith chuan, "London ah kan hruai dawn che u, zawhna chhan tur in ngah hle ang" a tihsan a. Motorah chuan an hnuk lut a
Show post links

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)