DETECTIVE RUBY PROJECT-1 EPISODE-1

Hnuchhuina lampang chi ho
Brenda Chhakchhuak
Posts: 77
Joined: January 26th, 2022, 3:07 pm

DETECTIVE RUBY PROJECT-1 EPISODE-1

Unread post by Brenda Chhakchhuak » June 19th, 2022, 10:12 pm

DETECTIVE RUBY
BY BRENDA CHHAKCHHUAK


PROJECT-1 EPISODE-1


Motor ka chuâng tur chu tluang taka ka thlen theih nan min mangṭha hlawm liam liam a, hnuk te pawh an ti ulh dâwn dâwn mai ka ti! Chu zawng aia ka mittui ti hnai tu chu Building chhâwng aṭang a bân min lo vai lauh lauh tute khi an ni. Ngaihzawng lam ka hriat ṭan tirh aṭang tawh a ka lo vei rûk ve em em leh khawkhat Pathlawi hmelṭha ni a an sawi ngat kha ani ve hrim hrim rêng bawk a.... Fa pahnih nei in an khaw High School lian ber enkawl tu ani bawk. Vanduai thlâk takin a Nupui hian Cancer vangin naupang te in a boral san a, tihian nupui neih leh pawh tum chuanglo in a fate pahnih hi a awmpui deuh chawt mai ani. Min nei duh se chu a fate pawh ka hmangaih nghal vek thei ang....



Ka phone ri vang chuan ka ngaihtuahna aṭang ka harh chhuak hlawl a! 'Detective Ruby' tih alo in ziak kuau mai!! 'He nu hi chawlh ala ni khan ka hre si a', ti a phun nang nang chung chuan a message chu ka hawng a, "New Project" tih zawng te hi ani.



Kan tlan rei deuh hnu chuan ka muhil ta daih a, nizan kan inthlah vel kan meng rei bawk nen ka meng hlei thei thlawtlo...



Kawng chhe lai a kan chhuanna motor a in sawh deuh dawt vang chuan ka harh a, ka bula ṭhu te ho chu an lo ti ti nasa khawp mai.... Ngaihven lemlo a pawnlam ka thlir san daih lai chuan nu pakhat hian "Detective Ruby te kha chu hnu chhui lamah na na na chuan a ṭha a sin" a tih chuan ka Boss chanchin anih bakah amah Detective Ruby hi ka ngaisang ve hrim hrim bawk nen an thusawi ngaithla ve tur chuan ka in siam rem ta a.



Ka bul chiah a ṭhu nu hausak hmel tak mai chuan "Mahni pasal hual jail bang zût tir tu mihring hi ka ngaisang nek lo ve" alo tih chuan a bula ṭhu putar lam deuh hian "Bawihi.... ngaihtuah chiang ve deuh la, a man tir khan chhan ṭha tak a nei tih kan hriat vek kha" a tih chuan chunu bawk chuan "A man chhan kha mahni pasal ni mai tawh tur tan chuan a ho deuh mah mah lo maw? Bâkah hmangaihna neilo mihring em ni anih a? A pasal tur hi a hmangaih miahlo tihna em ni?" a tih chuan insum thei lo in "Ka Pi, min lo hrethiam la Detective Ruby hian hmangaihna a ngah êm vang zawk a a pasal hual hi man ania sin..... A hmangaih lo bik hauhlo. Mahse ama mihring pui te ngei chunga a pasal hual thil tih rapthlak zia chu kan hre ṭeuh in ka ring." ka ti lêt ve ta zêk a.....




Min en deuh vang vang hnuah "A chhûngte em ni i nih?" tiin min zawt a, ka nih loh thu leh a hnuai a thawk ka nih thu te chu ka hrilh ve luam bawk a, chu mai bâkah; Ruby dik zia leh a pasal hual thil tih rapthlak tak te chu hrilhfiah in kan inbe ta char char a....




Aizawl kan thlen hnu chuan ka rin loh leh beisei loh ber kan Detective ngei mai chuan min lo hmuak a, amah rel hrep tunu ka va en chuan a lo mit sir ralh ralh a, ka nuih avan ti za reuh tak.... "Kawngah te khan ilo luak bârh bârh lo maw?" nuihza insum zet a atih chuan ka melh râwm râwm a, ani aia upa min naupang chei lutuk hi ka ngei reuh tlat. "Motor rui rual ka nih tawh loh hi Mawli" ka tih chuan a nui hawk hawk a, a hmel hi chu a ṭha mawle....mahse a ma hriatah chuan sawi chi miahloh. Kan sawi anih chuan hahîp in a infak leh awm sia🤫🤣🤣




"Taka eng nge 'New Project' chu?" ti a ka zawh chuan "Case thar chhui tur ania.... Tlangval mahni intihlum anih hmel" a tih chuan ka lo bu nghauh nghauh a, "Mahni intihlum ti na na na eng nge chhui kher ngai?" ka la ti hrâm a, "A chhûngte lam ngenna anih bakah mahni intihlum anih ka ring ve vaklo. Tlêm a zawng chu ka lo chhui tawh a, rin ai takin a awlsam phian mai thei ani" tiin kan in lam pan chuan kan in khalh haw ta a.



In kan thlen chuan ka bungrua te rem fel in thingpui in in kan ṭhu khawm a, ka zinna vel te chu min zawt ve luam bawk a, a haw dawn chuan "Naktuk zîng lama hna ṭan nghal thei tur khan Inspector Aaron kha ilo hrilh lâwk dawn nia" tiin a chhuak zui nghal daih a..... Ka biak hreh zia a hre ve reng sia be tur hian minti ve ziah lehnghal a. Inspector Aaron hi Pathlawi ve tho niin fa pakhat nula ve tawh ang reng tak a nei a, Rubyi'n Pathlawi ka star tih a hriat tirh a min chhaih lai lo hre fuhin amah emaw a inti tlat a, zanah te min lo call nulh châng lah a tam... Khata ṭang khan ṭul fe ah lo chuan ka be ngai ta lo a, min chhaih nan tak lah an la hmang zui......




Inspector Aaron chu text a bia in zîng kara hna thawh ṭan kan tum thu vel hrilh in phone ka off nghal daih a, min lo chhân lêt ka hlau nge pawh ka hrelo... Kan motor chuanna ka chau deuh bawk nen rei vaklo ah chuan ka muhil zui ve mai bawk a.



Zîngah chuan ka Nu in min sâwi dawt dawt pah hian "Sawmzual.....Rubyi'n a nghak reng che ania tho ve tawh em em rawh. Nula Senior ve si hi zîng thawh hrelo mai" alo ti zêk a, kei nge Ruby-i hi a fanu tih pawh hriat a har tawh. A reng reng in Sawmzual hi min ti ve ziah a, common lo ropui si. Ms tih emaw Sawmte tih emaw pawhin min ko ve mai se..... Ka hmingpum a ṭhing lai ber Sawmzuali tih lai kher hmang hian min ko ve ziah......




"Sawmzual minti ziah suh a ṭhing si" tiin tum bur in ka tho a, "I inhmeh ber alawm..... I hming a common lo ang bawk in nangmah pawh hi i common lo a" ti pahin a chhuak zui daih a, ka ṭha tâwk lo atih na nge mawni?




Ka mutna te thlep felin ka in tifai a, ka in tihfai zawh hnu chuan Sitting room lamah kalin Ruby lo ṭhu vang mai bulah chuan ka ṭhu thla ve a, "Kan Nula Senior chu i tho thei maw kha?" a tih chuan rum fe a melhin "Senior mah ila ka lian tal alawm..... Nang ve chu. Te si, tawi si, sual si, thinchhe si, luhlul si, bawn tho bawk si eheeee! Boss Siruk-i ti che ila a ṭha ang!! Awiiii i inhmeh dawn eee...... I nihna vek ani tho bawk sia Boss Siruk-i ni rawh aw" ka tih chuan a thinrim ka rin tehreng nen "Woww....a nalh lutuk tlat, i van phuah thiam em em. Ka duh lutuk ringawt " a ti ta reuh a, a thinrim nan ka sawi ve em em a, a hlim pui leh daih sia.




Thingpui te kan in zawh hnu chuan mitthi In(House) lamah kan in khalh chhuak ta a. Nikhat chiah ala liam bawk nen kal an ṭhahnem ang reng si a, lusun nat zual lai ani dawn bawk nen va tihbuai chu inthlahrung viau mah ila, kan tlai chuan Case a hlui zel anga kan tan a buaithlak ve dawn bawk si. Ruby ohhh Boss Siruk-i hian engtin nge maw tiang ang karah te hian rilru fim a put theih zawk ni. Mi lusun ṭap urhsun lai ka hmuh tawh phei hi chuan keimah zawk hi ka lo buai ve vak zel.....



Nu Zaii te In(Mithhi In) kan thlen chuan khawhar in kal pawh an lo la awm nual a, midang chim buai kan duh loh vangin Nu Zaii fapa Dika room ah chuan thu zawt fiah tur in kan chho a, Dika hi tlangval sa ṭha nelh nawlh tak, mahni indah sâng mi leh ṭhiante lakah pawh a filawr ve tak mai ani. Mual a liam ta mai pawh hi amah hmangaih leh a mizia hrechiang te tan chuan awih a har ve dawn bawk em a tin ni....



Nu Zaii chu Dika khum ah ṭhu in a ṭap hliam hliam a, en har ka tiin hreawm ka lo tih pui em em ringawt mai ani... "Bawiha" tiin khum bul dawhkan a thlalak chu la in a kuah vawng vawng a, hetiang tak hian thihna hi a damlai te tan a na thei ang tih ka lo ring ngailo. Mahse Nu Zaii aṭang hian thihna hi mi pakhat mai in a tuar lo a, amah hmangaih tu te tan chuan damlai hremhmun mai alo ni.



Ruby chuan a bula ṭhu pahin "Nu Zai, kan tawrh pui che in hreawm kan tih pui khawp mai che. Hun lo taka kan lo tihbuai vang che hian min hrethiam la, Detective ka nihna angin a rang lama chhui hi ka tih tur ani miau sia.... I fapa chanchin leh tun hnaia a awmdan hi min hrilh thei angem?" a ti a, Nu Zaii chuan ṭap aw ṭiau hian "Ka fapa anih vanga ka fak angah min lo ngaih sak lo ula, amah hi a fel in a rilru a ṭha a, lehkha thiam thei tak leh taima tak ani bawk. Ṭhian ti a sawi tur hi a nei em em lo a, a unaunu Baby-i leh a ṭhianpa deuh ber David nen hian an inkawm deuh chawt ani ber. Tun hnaia a awmdan sawi tur vak pawh ka hrelo, a nitin hun hman dan hi a Diary ah a ziak vek zel a, Drawer ah khan a dah ṭhin. Chhiar mai ula a ṭhat zawk ka ring" a tih chuan Ruby chuan mit meiin la turin min ti a, "Anih chuan Nu Zai kan kal phawt ange. A ṭhianpa leh a unaunu be turin naktuk lamah kan lo kal leh dawn nia...." tiin kan chhuahsan ta a.




Ruby Office ah chuan ṭhu in kan ti ti ho a, Inspector Aaron chu tih tur a neih thu sawi in a chhuak lehnghal daih a, Ruby nen chuan Diary chu kan en deuh vang vang a, a sawi tur ka hriat lâwk sa vangin "Khawi i melh ringawt chuan a chhûng a thu awm kan hre thei nang" tiin ka la a, Ruby hian lehkha emaw thil vel hrim hrim chhiar hi a peihlo in a ai chuan mi sawi ngaihthlak mai a duh zawk ṭhin.



Diary chu keu in ka chhiar ta a......

My name is Dika, they call me Dika, just call me Dika
tiin bul alo in ṭan a, nui chhuak deuh hawk in ka keu zel a.....

Date:25thApril2020
Vawiin zet zawng ka nui bâng theilo ani ber e. Ka ṭhianpa kawm ngaih em em, ka thuruk zawng zawng hre tu leh ka mawlpui ber ṭhin David, a sakhming pawh a ka koh phal loh ka Dave leh Pa Ringa(Dave-a Pa) te nen Bazaar ah kan chhuak ho a, kan naupan laia kan ei ṭhin Pani Puri ngei mai chu a siamtu ngai a hmun ngai ah an lo zuar a, Dave nen chuan 'Panlai nun minti hrechhuak rum rum alawm le' tiin lei ngei tumin kan va pan ta a.... Davea'n 'Ka treat ziah tho che kha nangman lei mai rawh' atih vang chuan chu pitar bulah chuan 50 man kan duh thu chu ka hrilh a, 'Valdik, heyyyy Dika, Pawnga' tiin Dave chuan min pawt vak vak a, ka beng bulah ring ang reng tak hian 'En teh saw lai nula saw! A mawng in sîk sâwi dan te saw! I duh chi' a tih chuan ben deuh pawp tum a ka phar chhuak chiah chu a tukhum a ri thlawrh a, Pa Ringa alo ni! "David Malsawmhlu, i lerh ngawih ngawih lutuk. 12 pawh la pass lo in hmeichhia ka melh e te iti elaw, zak hle rawh.... Iti leh tih ka hriat chuan i phone i hmu tawhlo ang" tiin min kalsan ta daih a, Dave lah chuan "Nangmah vang vek" tiin min la tihtauh khum zui.... Lerh lutuk hi chu alo pawi anih hi...


"An la naupang chhia hle mai maw.... A tir lam kha chu kan hnu chhuina nena in kaihhnawih a awm hmel loh riau.... Ni 17August hnu lam aṭang khan han chhiar leh teh" Rubyi'n a tih takah chuan ka keu zel a....

Date:17August2020
Vawiin chu........




Note:Zanin chu ti thleng hi ni phawt se a naktuk zanah ka lo chhunzawm leh dawn nia.... Vawikhat a zawh vek chu duh viau mah ila readers fel tak tak ten min nawr nasa ve sia in mi hriatthiamna ka ngen e. Hun rei tak hnuah ka ziak leh chauh ani a, mistake ka lo nei anih chuan comments lamah min lo hrilh zel dawn ula, Ads min lp click sak ṭeuh bawk turin ka ngen a che u.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)