DETECTIVE RUBY PROJECT -1 EPISODE-2

Hnuchhuina lampang chi ho
Brenda Chhakchhuak
Posts: 77
Joined: January 26th, 2022, 3:07 pm

DETECTIVE RUBY PROJECT -1 EPISODE-2

Unread post by Brenda Chhakchhuak » June 20th, 2022, 10:16 pm

DETECTIVE RUBY
By Brenda Chhakchhuak


Episode-2


'Birthday lawmna lampang anih hmel a ka chhiar dawn tho em?' ka tih chuan "Aw chhiar tel mai rawh a thih hma nihnih liam ta a thil thleng tho ania kan tan a ṭangkai takin" Boss Siruki'n a tih tâkah chuan ka chhiar leh ta a.....

Date:17August2020
Vawiin chu kan ṭhiannu Msi birthday ani a, kei, Dave leh Baby-i te chu Dave-a Car-ah chuangin kan nui ho leh dar dar ṭhin a, ka chêt chhiatna hlir sawiin nuihza siam nan tak min hmang leh ta nghal a. Party na hmun tur kan thlen chuan an lo zi nak nak hlawm a, a hmun a fianrial in a hahdam thlâk ang reng hle bawk. Dave pawh a ze ngai te te chhuah in nula bulah a in sawi theih leh tâk daih kha. Baby-i i zawng a ka hawi kual ruai chuan mipa pakhat nen hian an lo in pawt deuh châwt châwt a, a mipa zawk lah chu a ruih hmel mai bawk si..... Ka sawi tawh em ka hrelo a ka unaunu Baby-i hi ṭawngtheilo ani a, a naupan lai aṭanga in ṭan anih tawh vangin Doctor te pawhin tih ngaihna an hre lo.


"Baby-i kha a ṭawng thei lo ati em ni?" Rubyi'n atih chuan ka chhiar nawn leh a, "Aw anih hi.... Mahse tinge Nu Zaii khan engmah a sawi loh le?" ti a ka ngaihtuah rauh rauh lai chuan "Lu sûn zo hlim an ni a, an thil sawi tur leh tur loh pawh hi hriat a har tawh ṭhin.... Chhiar zawm rawh le" a tih zawm nghal zat a....



Diary......
Va puih tum a ka kal tur chiah chu Dave chuan min ben deuh pawp pah hian min kai dâwr dâwr a, 'Ngawi teh Dave Baby-i' ti a an awmna lam ka va hawi leh chuan ka hmu ta hauhlo!


"Aaaa eng nge awmzia?..... A ziah zawm lo" tiin Diary chu ka keu vak vak a, Boss pawh chuan "Khawi maw" tih leh min laksak rual nghal in a en ve leh a, "A ziak zawmlo ani lo. En la hei pawh thler anih dawn hi" tiin min en tir a, phêk thum phêk li vel in pawh thlêr na hnu hma niawm tak chu lo awmin a beidawn thlâk ta viau mai....



"A buaithlak ang reng hle mai.... Haw phawt rih mai rawh, thil pawimawh a awm chuan ka lo be dawn che nia" tiin a ṭhutna aṭang chuan a tho nulh a, min ngaihven zui lemlo in min kalsan daih lehnghal.



In(House) lamah haw in ka Nu chu ka theih ang ang in ka pui ve a, zanriah te kan ei zawh hnu chuan awl inti zet in khum ah bawk in ka PATHLAWI HMELṬHA-A ngei nen mai chuan inbia in eng eng emaw te kan sawi a, mahse hlim chhûng hi alo van reilo tehlul em....... Kan inbiak mêk lai chuan Boss Siruk-i hnên aṭang call ka dawn vangin ka Pathlawi-a nen a kan inbiak pawh kan ti tâwp ta ringawt a, lungawi lo ru zetin call chu ka pick a, "Hyde Inn-ah ka awm min lo hruai teh" a tih chuan ka meng kâwk a, chulam daih daih ah engti turin nge maw a kal reng reng ni. "Eng nge i tih?" tih zawt pah chuan ka Jacket leh Bike chahbi chu la in hmanhmawh thei ang ber in ka tlan chhuak a, "Tlangval ka zui" tiin call a dah hmak a. Mak ka ti ang reng khawp mai.... hetiang hian a awm ngai si lo va, a rilru a hah viau emaw ka lo la hrechiang tâwk lo pawh ani mai thei....



Ka chhuah dawn chuan ka Nu leh Pa ṭhutkhawmna pindan a lo ṭhu te chu hna vanga ka chhuah tur thu leh kawngka kalh mai turin ka hrilh a, hna a kan laklawh deuh chang hian Ruby te In ah ka riah chhuah fo vangin mak an ti lemlo.



Chak ang reng taka in khalh chhuak in Boss awmna lam chu ka pan ding nghal a, ka tlan chak bâkah zan a rei tawh deuh bawk nen kawng a free zual avangin thlen nan hun ka duh rei hranlo. Hyde Inn ka thlen hma deuh chuan ka call a, lo phei mai tur a hrilh ka hawi kual hrek hrek a, zan anih mai piah lamah kan awmna lai hi a him zân lo tih ka hriat vang te pawh ani mahna ka tukhum te hi min en tu awm ang mai in a za mer mer rengin ka hria.....



"Sawmzual" ka hnung lam aṭanga mipa aw in alo tih thut chuan ka phone ken lai paih tawp in ka tlan nghal chiam a, ka hnung rîk zui khut khut danah min um zui ngei ni a ka hriatna chuan hlauhna namen lo a min tuam in thi tur ang hial ten ka lo in dah hman a, ka tlanchak ve viau emaw ka tih laiin ka kutah min rawn man thut in min kuai her lawp a, "Min kalsan rawh nang zurui" tih leh mit chhing chungin ka theih tâwp a ka kut lek kâng in a pawi lai tur ber ni a ka hriat a hnar zawnah chuan ka hnek pawp a, "Mimawlnu" tih leh min man beh rual nghal in ka kut chu a hnungkhirh a, ka mit ka men tâkah chuan kan piah lawk a Rubyi'n nin hmel zet a min lo en reng lai hi ka va hmu a, ṭap aw ṭuau in "Min pui rawh" ka tih chuan min man tu zawk chu a nui chhuak hawk a, ka en chhoh nâk chuan ka College kalpui ṭhin Malsawmzuala kha alo ni. Ka lo hnek na deuh nge ni a hnar a thi deuh phung a, ka inthiam chiahlo bawk nen ka en deuh tlawk tlawk ringawt mai ani.



"I lo la pa reng ani maw?" nuihza insum zet a atih chuan a ke ah ka kick pawp a, "Malsawmzual....min tih thlabar zia kha i hria em? Lungphu chawl in thi ta ila mawh i phur ngam dawn em ni?" ka tih tan tan chuan Ruby awmna lamah kal in a nui hawk hawk a, "I kawr hâk a pan ang reng sia ka Jacket hi ha mai rawh" a tih daih tâkah chuan an pahnih chuan ka melh deuh haw a, an inngaizawng ti dawn ila ka ring chiah bawk si lo..... Boss Siruk-i zet hi chuan ka thluak hi ala ti chawmawlh zo dawn anih hi.



Malsawmzuala nen kan haw na lam tur a in an miau loh avangin Ruby nen chuan kan in phur a, a In kan thlen meuh chuan dar 2 a ri deuh thuak tawh. Room lam pan nghal khumah chuan ka let thla tawp a, ka hlauhthawnna kha ala châm reng mai.



Ruby zawk erawh chu thutak hmel deuh a a en ngai en vung vung in tukverh ah a dâk chhuak a, a chungah eng chiah nge thleng hrelo mah ila saw tiang a a awm sawn nuam ka ti lo..... Boruak thlâk tum tak in "Kan pasal nei teuh-i chu a lung a leng ni maw?...." tiin a lam panin ka va phei a, "Chimawm suh aw Pathlawi lo chu i hmuh zawh ve loh kha. Bâkah a duh tak tak che em tih pawh i hria mi?" min tih tak zêk ah chuan tum bur in ka mu ta daih a, "Ka mu hmak dawn Mangṭha" tiin current te chu ka off nghal vek a, thim zingah in dap chawp ve tawh mai rawh se.....



"Naktukah Nu Zaii te In ah kan kal leh angaih kha mu hahdam rawh" a tih te chu ka mumang nge a tak ram tih pawh ka hre tawhlo. Mut chhuak in min hneh lutuk tlat tawh......



End of Episode -2

WhatsApp Group join duh tan 👇🏻💞
https://chat.whatsapp.com/KPlbGxbXWEgFCqIm9IRMtV



Note: A tawi deuh chuan min hrethiam mai ru aw😪😪Chhunah ka type hman si lo a, zanah chauh chuan ngaihtuah chawp nen duh angin ka ti thui thei thlawtlo ani e🤧



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)