THIHNA LEI

Hnuchhuina lampang chi ho
Lalhmangaiha(Ka ka)
Posts: 3
Joined: July 18th, 2019, 8:03 pm

THIHNA LEI

Unread post by Lalhmangaiha(Ka ka) » January 21st, 2023, 8:04 pm

Thawhlehni ni 25 a ni a, pindan thim ang reng takah hian mipahnih hi ngaihtuah muk tak nei hian ṭhuthleng pakhat ve ve ah hian an ṭhu dun a, an inkarah chuan dawhkan a awm a tah chuan chimni a inchhi bawk a. An hma zawn banga lehkha hlai tak intar chu ngawirengin an thlir a, a lan danah chuan an ngaihtuah zawng chu a in ang hle ni hian a hriat a, pakhat veilama mi zawk chuan ding chungin a han thlek vang vang a, “Hei lo kawngdang awmin a lang si lo, he tah bawk hian kan tawp leh tho tho a ni,” a han ti a, a ṭhu zawk pawh chuan, “An hniak bo danah hian khawmu chawite pawh an ang dawn dawn mai ka ti, mahse, lirthei chu an khalh ngei ni chuan a hmu ten an hre bawk si a,” a rawn ti ve leh a.

Chutiang thil an ngaihtuah lai chuan pindan pawn lam aṭang hian tuemaw hian kawngka a rawn hawnga thingpui a rawn chawi lut a, chu mi chu pi Thangi a ni a. A rawn ṭawng lut bawrh bawrh a arawn ri deuh hlut hi a ni mai a – a awki chu a fiak hle a aṭawng dan vel aṭang chuan ‘ralte’ chi lam kai pawh a ni mai thei a ni. Pi Thangi chu nu upa lam deuh thau angreng tak nu tawi lam, mahni inzo vah mai hi a ni a. Dawhkanah an chhun thingpui lam chu dah in, “Engnge inngaihtuh a in inzar phui tak mai?” a ti a. Pakhat chuan, “Nili kal ta maia tlangval rual bo te kha kan zawng a, chu thil buaipui chuan a chhin pawh kan chhing hman lo a nih hi,” tih pah chuan dawhkana thingpui leh chhang chu a bana a ei nghal sawk sawk leh nghal a. Pi Thangi bawk chuan, “Chutiang lam chu ka buaipui zawng a ni lo ve, inhnuai lamah hna ka zu thawk leh tawh zawk a nge, nangni pawh in hna chu thawk leh rawh u, min mamawhna in neih chuan koh phakah ka lo awm reng ang,” tiin a chhuak lehnghal mai a.

Ṭhuthlenga khabe dawma la ṭhu ta reng chu Thangliana, hnu chhui lama hmingthang em em mai a ni a, thingpui ina ding chu Rozika mifing tak tho bawk a ni a. Thangliana chu a ṭhutna aṭang chuan a rawn tho chhuak vut a, banga Lungmuang khaw map intar chu hnai teah hian a han bih a, “Hei a lan danah chuan lui luanna zel amawng lamah hian suar sang tak a awm a nih hi,” a han ti a, Rozika pawh chuan chu thil chu hmuh ve tumin a thingpui no nen chuan bang lam bawk chu a pan a, Thangliana kawhna zawn chu a en nghal thuai a, “A nih hi engtin nge a hma daih khan kan lo hmuh loh theih zawk,” a ti leh hnuhnawh a, Thangliana chuan, “Lirthei ke hniak khan min ti buai em a, lui luan dan hi kan lo hmuh hmaih mai mai rih a ni. Police ho khan luiah khan engmah an hmuh loh thu kha an sawi e’m ni kha?” tiin Rozika chu an zawt a, ani chuan, “An sawi dan chu a ni a, mahse an dap famkim lo pawh a ni mai thei kan hman ve leh suar hi zu en ngei tur a nih hi,” a han ti a, Thangliana chuan, “Nili kal anga bo a ngaih kha an ni a -- a ni tak e, tuma hriat lohva bo tum te pawh an ang dawn mai ka ti. Zika, hnuchhui lam hi kan lo khawih dun ve tawh viau a, hetiang ema danglam hi chu nang nen hian kan la khawih awm pawh tun hmain ka hre lo ka ti, engnge ingaih ve dan le?” a’n ti a, Rozika pawh chuan, “Nula pakhat khuangcher bo kan zawn ai khan amakin a dang daih a ni, an hnu lah chu Lei-ah a tawp hmak mai si a, an chuanna ber a han bo tel lehzel hian hnu chhui a ti harsa lehzual a ni. Lei hnuai tui lamah an tla phiar tingawt dawn ila a lirthei ber chu tuiah chuan lang zel awm lo tak hi a ni a. Ti pawh hian lo ngaihtuah kai ta zel ila an tlak lai chuan tui chu lo lian phut ni ta se..” a tih lai chuan Thangliana chuan, “An tlanliam i tih dawn chuan lei hungna sir lam kha an su chhe ngei ngei tur a ni a, mahse engmah chhiatna hnuhma leh an tlan liamna awm hnu a awm loh kha aw,” a lo tih sak a.

Chumi tuk chuan zing hma takah an tho va a hma ni a an map-a an hmuhchhuah suar awmna lam chu pan tumin an insiam a, thawmhnaw tui fawm lo lam an inbel a, tui han dai pui pawh a bun nuam tur pheikhawk an inthawlh a, rikrum thil a hman tur chempui leh hruizen an ak bawk a, Thangliana chuan, “Biakhlatna kha i ak theihnghilh a nge,” tiin Rozika chu a ti a, ani chuan, “Chaw fun em kan ngai lo ang chu maw,” a ti thung a, Thangliana chuan, “A hmun zuk thlithlai mai kha kan tih theih chu a ni dawn a, vanneih thilthuah kan mi bo te zuk nangfuh pawh ni ila tih theih kan nei tam dawn chuang lo; chuvangin kawng laka ṭamhnem tur chhang keng ila a tawk em em ang,” a ti a. An pindan aṭang chuan an pi tih harh hlau takin thawm dim takin an in-ak chhuak a, an hma em avangin kawlah ni zung tak ngial pawh a la inlar meuh lo va.

An awmna hmun aṭang chuan lei awmna chu mel sawmhnih vel hi a ni a, chulai thleng chu an lirthei hmangin an kal a, ta ṭang chuan lui luang lian tak mawng lamah chuan an inzui thla ta a. Reife an kal hnu chuan ni pawh chu a rawn tlangsang tawh a, lui hrul kam a kal zel an nih avangin kawng mumal a awm lova, hmun ṭhenkhatah te phei chuan an kalna tur an han samfai leh rih ṭhin a. Suar awmna zawn an zu thlen chuan tui luang chu a ri hum hum mai a, asan zawng chu fit sawmthum laia sang mah tur hi a ni a, azu inkhawh thlakna hmun chu kham ko aṭang chuan an zu en thla a, a paw deuh phut mai a. Tui inkhawhthla sî chuan chhimbal a siam a, banphak mai turah hian a zam kulh mai leh nghal a. Thangliana chuan, “He lam hi police ho khan an dap thleng lo e’m ni?” tiin Rozika chu a zawt a, ani chuan, “Inspector sawi dan kha chuan khawmi ṭhenkhat chu an kal thui viau niin a sawi a, he lam hi an thlengthla a nih chuan kan tawpna hmun hi an tawpna ve tho tur a ni ang,” a han ti lûng lûng a, a chhan pawh tui luangri chu a rin avangin ring deuh hleka inbiak a ngai a ni.

Uluk takin chulai hmun chu an dap a, mahse engmah bengvarna tur hnu hmuh tur reng an nei lo. Ni chu a rawn tlangsang zel a, chhun pachang hun kan tih awm velah chuan Thangliana chuan haw mai a rawt a, tichuan beiseihna tur engmah hmuh nei lovin an kir leh ta a. Chu ni chuan hah takin In an thlenga ṭhuthlengah chuan zawi hnap hian an tlu nghal a. Chutih lai chuan pi Thangi chuan thei-tui arawn chawi lut a, “In kalna hmunah chuan intluang meuh maw, inchhuak hma lutuk a -- ka pindan luhka bulah lehkha lo hnutchhiah lo ni ula chu nangni pawh inbo ve ta emaw ka ti hman dawn a nih kha,” tih mawlh mawlh pah chuan thei-tui chu a thli a, Thangliana chuan, “Nang nge nge i bengvar ṭhin e, kan zu kalna aṭang chuan hah chiah a ni kan rawn hawn ni. Rozika erawh chuan chabet a hawn tel mai thei e,” a ti a, chutih lai chuan an pi Thangi chuan a pawnfen ipte aṭang hian lehkha them hi a rawn phawrh a, Thangliana hnenah chuan, “In chhuah bo hlan khan mipakhat hian hmuh che u arawn tum a, mahse inawm loh avangin ni danga rawn kal leh zawk mai turin ka lo ti a, ani chuan, ‘Hmuh ngei ka duh hmanhmawh si a, hei ka awmna inziahna lehkha hi min lo pek sak la, anmahni chuan min rawn hmu thuai rawh se, mi bo chungchangah khan a ni e,’ a ti a, a hawi vual vuala a kal leh ta a ni,” a ti a. Thangliana chu a inperh tho thut a hah lo ang mai hian a han ding a, lehkha them chu a en nghal a, a chhiar zawh chuan, “Ka pi, khawnge i theitui chu kan han tlak zung zung ang a, Rozika nen hian kan han tei chhuak lehnghal mai ang e,” a ti vut a an chhuak chu a ni leh ta mai a.

Dar 4 bawrah hian kudam rohsan tawh hi an va thleng a, khua chu a dul ruih a, kawlah ni pawh chu a tla lek lek tawh a. Rozika chuan, “Ka lo awm ang tah hian a ti maw kha?” a han ti a, Thangliana chuan, “A lehkha hnut chhiah dan chu a ni a lawm,” a lo ti a. Nakinah chuan kudam phem aṭang hian mipakhat hi a lo chhuak hlawl a, amah lah chu sang ṭha veng vawng tak la tlangval tak mai, vengchhunga inkhelhna velah pawh a lailum chang pha zak zak tur khawpa sa ṭha nelh nawlh mai hi a ni a. Thanglianate bul arawn pan hnaih chuan a fimkhur hle tih chu a chet dan aṭang chuan a hriat thei a, Rozika chuan, “Engmah hlauh tur a awm lo, tlangval, keimahni pahnih chauh hi kan ni e,” a lo ti a, chu pa chuan, “Tunah hian mi bo chungchangah khan rinhlelh ka ni a, min zawng mek a ni,” a han tih chuan Thanglianate ṭhian dun chuan mak tih hmel tak hian amah chu an en a, Thangliana chuan, “Chu chu engtin nge a nih theih! Mi bo ho ṭhian hnai tak i ni e’m ni?” tiin a zawt a. Chu tlangvalpa chu a hawi ruk ruk a, a kut chu a khur hlek hlek bawk a, “Khang mi bo te zingah khan ka tel ve a ni, mahse vanneihthlak takin Pathian zarah ka dam chhuah hlauh a ni. Tunah pawh hian min enthlatu an awm tlatin ka hria!” a ti a, a hmelah chuan hlauhna chi tin rengin a rawn lang chhuak ni mai hian a hriat a. Rozika chuan, “Hahdam tak khan awm la, i ṭhiante chin chu i hre reng reng em?” tiin aw dam ang reng tak hian a zawt a. Chu pa chuan, “Ka hre lo!” tih chauhin a chhang a. Thangliana chuan a mit ko an san a, chu pa chu a mit-ah tak a en a, “I ṭhiante chian i hriat chuan tun hi min hrilh hun tur tak chu a nih ka ring. A nih loh chuan...” a tih lai chuan chu pa chuan, “In hrethiam lo a ni...” a ti a, Rozika chuan, “Vala, engemaw tak i ṭhiante chian i sawi loh chuan...,” a tih lai tak chuan an chhak hmin pik kar aṭang hian police ho an rawn lang thut a, hnim kar aṭang chuan mipali hi an rawn zuang chhuak chawpchilh nghal zat bawk a.

Tlangval hlau thlabar chuan tlanchhiat mai hi a han tum uk hman a, mahse police zinga pali chuan an hual a, an man ta a. Inspector chuan “Vala, chet thawh duh hlek suh...kan hual hneh viau che a ni!” a ti nghal bawrh bawrh a. Thanglianate ṭhian dun chuan bangbo fe hian inspector hnenah chuan, “Engnge thil awmzia! Hepa hi in lo veh ru reng e’m ni, engnge a chhan?” tiin an zawt a, inspector chuan, “Veh ru reng e, khang mibo te ṭhian zinga pakhat kha a ni a, a ṭhiante bo ni khan ani pawh hi a awm lo ve tho a ni, mahse arawn lang leh tih amah hmututen min rawn hrilh a, tichuan kan zawng ta chiam mai a ni. Hei nangni’n inhmu dawn tih thu kan lo hre leh zel a, kan zui ru che u a, ti hi kan thleng ta a nih hi,” a han ti a. Thangliana chuan, “Engvanga tihsual nei ang maia nangni hian veh nge maw in nih le, a ṭhiante bo ni a telve tho kha a ni si a, eng nge a tihsual a inhriat?” tiin inspector chu a zawt a, ani chuan, “A tihsual ber chu engmah hriat kan nei lo, amaherawhchu engvanga hetianga police hmuh hlauva kawmkara a bik ruk tih hi kan hriat chhuah tur chu a ni zawk a ni,” a ti a. Thangliana chuan, “Chutiang a nih chuan amah hi eng nge maw zawh lawk a rem ang chu maw?” a’n ti a, inspector chuan, “Thana lama kan kal pui hmain hun tlem chu kan pe ang che,” a ti a.

Thangliana chuan chu tlangvalpa hnenah chuan, “Hei police hoin an hruai dawn che a, tunah hian tihsual i neih loh chuan engkim sawi vek rawh; anihlohchuan misual manin an man che nga an dawp dawn che a ni. Khai le i ṭhiante ho chin chu han sawi teh?” a tih sak a, mahse chu pa chuan engtin mah a chhang lova a kum ngul a, zawi sap hian, “A rapthlak em a ni!” a ti a. A ngawih tlat avang chuan inspector chuan, “Thanga, i hun neih chhun chu a zo ve, tihian kan hruai ang a, kan thiam ve danin kan han hrual a nge, tunah sawi duh lo teh mah se, rei erawh a ka a chip hauh lo vang,” a ti a, an kal pui ta a.

In an thlenfel leh hnu chuan tlai chaw ei hun a ni leh hman tawh a, an pi Thangichuan tlai chaw atan vawksa rep tui tak a lo chhum hluah a, chhun lamah engmah mumala an ei loh avangin an ṭhian dun chuan an lim dun nghek a. Zan lamah chuan tha thar leh ngaihtuahna tharin chhun lama an thil tawn chu an khel dun leh ta a. Thangliana chuan, “Kha tlangvalpa khan engemaw chu hriat a nei ngei a, mahse a mit taka ka en khan a sawi chhuak ngam lo a ni,” a han ti a. Rozika pawh chuan, “A ṭhiante zingah khan a telve ngai a nih chuan hmuh leh hriat chu a nei ngei dawn a, rei tak nikhawhre lova a awm te a nih ngawt loh chuan..” a tih lai chu Thangliana chuan lo pawt chat in, “A thawmhnaw kha i lo chik em?” a ti a, Rozika chuan, “Chik e, a bal hle a, an bo ni aṭanga a thawmhnaw hak kha a la hlip lo niin a lang,” a ti a, Thangliana pawh chuan, “A kekawr khup kha a bal bik lehzual a, a lan danah kha chuan a tlanchhiatna lamah a tlu nasa hle a ni ang, amah lah khan engmah a sawi ṭha ngam bawk si lo,” a ti a.

Rozika chuan a meizial pak khu hlat hlat pah chuan, “Police ho pawh chuan a hnen aṭangin engmah an hre tawp lovang -- naktukah lei kha zu en chiang leh ila a ṭha ang. Hmuh hmaih kan nei a ni ngei ngei ang,” a han ti leh a, Thangliana pawh chuan, “Hmuhhmaih chu kan nei ngei a ni,” a ti ringawt a. An sawi angin a tuk zingah chuan thingpui inzawhin an chhuak a, Lei awmna lam bawkah chuan an inkhalh chhuak leh a. Lei an thlen chuan Thangliana chuan, “Hei han enchiang mah la, lirthei ke hniak hi a lang kulh hi – a lan danah chuan a khalhtu hian a ti ding thut tih chu a chiang a, mahse engvanga ding thut nge a nih tih lai hi a ni,” a han ti a, a ṭhianpa chuan, “Engemaw kawng lakah tawh thut an nei a ni mai thei, mihring emaw, ransa emaw, chu chuan a ti ding thut pawh a ni mai thei,” a lo ti a. Thangliana chuan, “Nili kal ta khan an bo tih thu hriat chhuah chauh a ni a, an bo hun tak ni leh darkar hriat theih a ni lo; chuvangin helai kawng hi lirthei engemaw zahin an zawh leh ngei tawh ang a, he lirthei ke hniak hi an pal bo zo tawh pawh a ni mai thei,” a’n ti a, Rozika pawh chuan, “He khaw chheh vel fan theih chin china ram ngaw hi police leh vantlang hoin an dap tawh a, lirthei chetsualna hnu reng an hmu lo,” a lo ti a.

Chumi zan chuan police inspector chu Thanglian leh Rozika hmu turin a kal a, kawngkhar kik thawm an hriat chuan Rozika chuan kawng ava hawn a, an rin loh tak maiin inspector a lo ni reng mai a, Thangliana chuan, “In mi hren pa chuan sawi a nei e’m ni?” a lo ti thui a, chu pa chuan, “Nei suh e a, kan han vuak deuh hlek pawn aka a ang duh reng reng lo mai, a thil sawi duh mai loh danah hian a inhmanhmawih ve ngei a ni tih min rin ngeh lehzual tir a ni,” a tih chuan Rozika chuan, “A ṭhiante bo chhanah hian a inhnamhnawih ta pawh lo ni se, engvangin nge kei ni kher min biak duh ang ni,” a lo tih sak a.

Inspactor chu sa ṭha nelh nawlh mai, palian tak mai a ni a. A ngaihna hre lo tih hriat tak mai hian a lukhumparh chu a phawk a, ṭhuthlengseiah chuan a ṭhu deuh hnawk a, “He buaina hi ka chingfel lo a nih chuan kan pute leh khawtlang chungah ka hming chhe hle dawn a, chuvang chuan in mi puihna hi ka ngai tak meuh a ni,” a ti chhuak phawng mai a. Thangliana chuan, “I dinhmun tur chu kan hriatthiam pui hle che a, mahse kei ni pawh hei kan buai ve viau chu a nih si hi maw....” a’n ti a, inspector chuan, “Chung lamin min nawr nasa tawh mai si a, hei inhriat angin karkhat chu a vei leh dawn ta reng mai. Mahse, beisei tur lah chu thehhmeh ang mai a bo hmak mai si a,” a han ti a, Rozika chuan, “In mi hren kha engtikah emaw rawn hmuh leh kan duh ang, kha pa khan engemaw tak chu han sawi zeuh se chuan kawng pawh a inhawng deuh mai tur hi a ni a- tunah chuan mahni ngaih dan dana kan chet a la ngai rih a nih hi,” a ti a.

Inspector chhuah dawn chuan Thangliana chuan, “An chhungte hnen aṭangin kha mi zana an chhuah hun kha inzawt chhuak tawh hlawm em?” tiin a han pawt ding leh a, ani chuan, “An sawi dan chuan zan dar-kua ah an ṭhianpa’n lirtheiin arawn lam khawm a ni awm e,” a ti a, Thangliana bawk chuan, “Lei an thlenphei hmain lo hmutu an awm e’m ni bawk kha?” a ti leh a, ani chuan, “Kawngkal zurui pakhat chuan lirthei tlan chak takin a tlan pel a ni awm e, lei thlen hma lawk ah...” a tih lai chuan Thangliana’n, “Chu pa chu khawiah nge kan hmuh theih ang?” a ti leh a. Inspector chuan, “In hmuh duh chuan ka hmuh pui ang che u,” a ti a, Thangliana chuan, “A nih chuan naktuk zingah chu pa hmu tur chuan kan chhuak ho dawn nia,” a ti sak a, Inspector kal hnu chuan Thangliana chuan, “Rozik, chu zurui chu kan hmuh a ngai a nih chu,” a han ti a, Rozika pawh chuan, “Zu ruiin chutianga a sawi thei a nih chuan a ruih lutuk loh ṭum tak pawh a ni mai thei a sin,” a lo ti ve a.

A tuk lamah chuan Thanglianate ṭhian dun leh inspector chuan pa pakhat hi an din hual a, ani lah chu zawi hneng hnuang mai, zu ei tih hriat reng mai hi a ni a, a zah vang pawh ni hranpa lovin a hnar chu a lian hle a, Thangliana chuan chu pa hnenah chuan kha mi zana a thil hmuh kha a han zawt a, “Kha mi zan khan ruih hnepna tur rakzu ka neih loh lai tak mai hi a ni a, chutia khamkhawp lo zet a khawlaia ka tei ka tei lai chuan zan dar sawm hi a ri vel ang. Kawngsirah chuan ka kal a, nakinah chuan lirthei pakhat chak lutuk hian mi rawn tlanpel thuak a, kei chuan thei leh thei lo hian ka thlek a -- ka dinna hmun aṭang chuan lei indawh kha a lang dê dê a, tah chuan lirthei chu a ding thut a, eng nge a tawh phei chu ka hre lo...” a tih lai chuan Rozika chuan, “Anmahni chu lirthei aṭang chuan an chhuk em?” a lo ti a, chu pa chuan, “Ka awmna aṭang chuan chiang taka a lan fiah loh avangin anmahni chu an chuanna aṭang chuan an chhuk em ka hre pha ta lo, tichuan zu inbelh tur zawngin hmeithei In lam ka pansan leh ta mai a ni,” a’n tih chuan inspector chuan rum zet hian chu pa chu a lo melh kawk mai a, “Engvanga chiang lo em em nge i nih le...anmahni lo chu midang i hmu lo reng reng a maw?” tiin a zawt nawn leh a, chu pa chuan bah deuh nawk nawk chung hian, “Tumah mi dang ka hmu lo, ka ruih deuh avangin ka lo hmu lo pawh a ni mai thei,” a ti leh hnuhnawh a. Thangliana chuan, “A ṭha e ka pu, zu intur chuan hmeithai in lam chu min lo pansan leh phawt mai ta che,” a ti a, chu pa chu phun nuah nuah chungin a kal kiang ta a.

Inspector chuan, “A ngaihna hriat ava har ta ngai em!” a han ti a, Rozika chuan, “Chu Lei an dinna chu kan chhui tawpna chiah kha a ni a, chumi hnu aṭang chuan chawibo ang maiin an hnu chu a reh hmak a ni. Inspector i hote nen khan in mi hren mek kha dimdawi takin lova zawh chhuah tum hram ula, keini ṭhian dun chuan kan tih ve dan ṭhinin kan han buaipui a nge,” a ti a, chulai hmun aṭang chuan Thangliana nen chuan an inzui hrang leh ta daih a. Kawnga an kal lai chuan Thangliana chuan, “Thiana, vawiin lam chanchinbu kha i lo bih ve hman em?” a ti a, Rozika chuan, “Hman nang,” a lo ti mai a, Thangliana chuan, “Lungmuang khaw heltu lui lian tak luang hi a hnar lamah ‘Hydro Power Station’ sak an kal pui mek a, tunah hian an sa mup mup a ni awm e,” a tih chuan, Rozika chuan, “Chu thil i sawi chhan chu eng nge a awmzia?” an ti a, Thangliana chuan, “Thla hmasa maia chanchinbu bawka an thu rawnziah kha i la hre reng em?” an han ti leh a, Rozika chuan, “Naupang rukbo ching chungchang kha e’m ni, i tih?” tiin a han zawt a, ani chuan, “Ni chiah e, chanchinbuah chuan ‘Nawngsawhnawh’ an tih nghe nghe kha. Ka rin dan mai mai hi a dik a nih chuan tunah chian current lakna tura an siamna hmunah chuan hawh teh i han kal teh ang, kan la hman bawka rei kan thang ka ring lo,” a ti a, lirthei chu Rozika’n a khalh a chak ang rek takin an tlan par par a.

Khaw chhung aṭang chuan current siam chhuahna an bunna hmun chu km 26 laia hla hi a ni a, kawng a ṭhat em avangin rei erawh tlan angai lo. Thanglianate ṭhin dun pawh chu darkar rei lo teah chulai hmun chu an thleng a. ’Hydro power station’ chu an lo sa mup mup mai a, lui lian tak an khuapna chu ral lehlamah a ni a, kawng aṭanga chulai va kai nan chuan Lei a in dawh a, lei a in dawh han ti ila, an sa ṭan mek a a ruhrel tlem a zawng chu a ding luah tawh a. Kan sawi tak current an lakna tui khuah kai nan chuan Lei te ang reng tak lirthei pawh a te lam zawh thei tawk ang lek hi a indawh a. Chu lei chu nakin lawka ṭhiahdarh leh mai tura an duan a ni nghe nghe a. Thanglianate ṭhian dun chuan Lei-te zawk chu an kan a, nakinah chuan hnathawk ho lo phe suau suau hi an va hmu a, mipakhat chu an han pawt ding ngawt a, chu pa hnenah chuan, “He hmun enkawltu hi kawihah nge kan hmuh theih ang?” Rozika chuan a han ti a, chu pa chu vai anih avangin Mizoṭawng a lo thiam awzawng lo va, kut zaizir chuan an chhak tlang deuha In-te pakhat chu a kawk a, “Kan hotupa chu tah khian a awm,” a ti ni ngeiin a lang a. Tlang bawka In-te chu thlam tiah lek maite hi a ni a, chulam pan chuan an pahnihin an chho va chutih lai chuan vaipa chuan a enzui vawng vawng mai a.

In-te an pan lai chuan kawng kam mai a lirthei dahsawnna khawl inhung chu an hmu a, In kawtah chuan an ding a, nakinah chuan chulai hmun satu an hotu ni ngei tur chu a rawn chhuak a, chu pa chu Mizo ni lovin vai ngalsang lam, dum muk tak mai a ni a, a nghawngah chuan eng chhinchhiahna emaw hi a awrh deuh tuar leh nghal a. An han biak chuan chu vaipa chuan Mizoṭawng a thiam lo va, a ṭawngletu Mizo a rawih chhawn leh chu a han ko va, chu ṭawnglettu chuan, “Pute u, kan pu hian engnge in duh a ti a nih chu,” a han ti a, Thangliana chuan, “He hmun hi engtik hun a zawh fel tur nge?” tiin a han zawt ṭan a, ṭawnglettu chuan, “Kan pu hian tun aṭanga kum ngaah a ti,” a ti a, Thangliana chuan chu vaipa chu chiang em em hian a lo thlek a, anmahni ṭawnga a ṭawng tlat avangin amah tak han biak chu anni hindi thiam lo tan chuan tih ngaihna avang hle a, Rozika chuan, “Saw laia lei indawh mek saw i kut a mi tho hi a ni em?” tiin a zawt a, ṭawnglettu chuan lo chhang leh in, “Ni e, he laia hna awm reng reng hi chu kan pu hna vawnlai vek a ni e, kan pu hian tute nge in nih a ti che u a nih hi?” a han ti a, Thangliana chuan lo chhang in, “Keini hi hnuchhui kan ni a, kar hmasa khan rawlthar mi pali an bo va he lamah hian an hnute a lo awm mial lo maw tih thuah kan rawn kal a ni,” a tih chuan, ṭawnglettu chuan a mit-ko a han san a, a pu hnenah chuan hindi-in a han let leh a, Thangliana sawi awmzia a hriat hnuah chuan a nui deuh seih reng chu a tawp hmak a, “In rin danin he lamah hian an bo inring tihna a ni ang maw...” tiin ṭawglettu ka aṭang chuan a ti a. Thangliana chuan, “Chulam chu kan chiang bik lo ve, thudang a lai chuan lei ban pahnih saw tunhnai kar hnih kalta vela in chhun chauh a ni ang maw?” a han ti daih a, ṭawnglettu chuan, “Ni e,” tiin a chhang a, vaipa chuan, “Hei tunah chuan hna kan ngah si a, puih theihna che u kan nei pawhin a lang bawk si lova ka hna kan tawk leh tawh a nge,” a ti a, a kal kiang ta daih a.

Thanglianate ṭhian dun pawh chuan chu pa khawsak dan chu an enzui vawng vawng a, kal pah chuan Rozika chuan, “Hei a landanah chuan hna tawk ho reng reng hi hnamdang vek an niin a lang, ṭawnglettu pa te lam tih lohah kha chuan,” a ti a. Thangliana pawh chuan, “An nih hi,” a ti a, zozial aṭana a pet khu vet vet a chulai hmun chu anchhuahsan leh ta a.

A tukah chuan Thanglianate pahnih chuan thanaa police in an hren tak mipakhat kha an va tlawh a, chu pa chu a lo ṭhu ngui bur a, a lan danah chuan an chaw pek pawh chu a eiṭha lo tih hi a lang reng mai a. A taksate pawh chu an hmuh hmasak ai khan a lo dangin a cher chhe deuh hlek tawh a. Thanglianate ṭhian dun va kal ni chuan a chhungte pawh an lo awm a, police ho hnenah chuan tlangvalpa chhungte chuan, “Kan fapa hian tihsual engmah a nei lo, chuvangin min chhuah sak mai teh u, ti ringawt chuan a thi mai ang,” tiin an lo ngen mek a, inspector chuan, “Chutiang maiin tunah rih chuan kan sezawl chhuah tawp thei rih lo a ni, tuna kan thil tawn mek hi a harsa hle a nangni pawn in fapa chungchang hi a fel hma chu lo dawh hram hram te u,” a lo tih sak a, chutih lai chuan Thanglianate ṭhian dun rawn lut a hmuh chuan, “Nimin lamah engthil nge i hmuh le?” a lo ti a, thu thar a lo beisei hle a. Rozika chuan, “Kan tlangvalpa chu aṭawng chhuak tawh em?” tiin a zawhna chhang ta lo chuan a ti a. Inspector chuan, “Engmah a sawi duh lo, hei a chhungte hian chhuah mai turin min ngen a. Mahse kan chhuah ngawt thei si lo a ni,” a lo ti a. Thangliana chuan, “Vawikhat han hmuh leh hram kan duh a, a rem chan chuan,” a ti a.

Inspector chuan, “A beidawnthlak tak zet tawh a ni, vawiin lamah hian chanchinbu-mi lam ten thu thar kan neih min beisei tawh a- engmah lah chu kan la eng der mai si lo. I duh te chuan i hmu thei ang, mahse rei erawh hun ka pe thei lovang che,” a tih chuan Thangliana chuan, “Hun ka mamawh tam lo vang,” a ti a. Thangliana chu tan In chhungah chuan amahin a lut a, tlangvalpa hnaih takah chuan a ṭhu a, minit sawm hnu velah chuan tha tho zet hian arawn chhuak a, a ṭhianpa Rozika hnenah chuan, “Ti teh, kalna tur kan nei. Inspector nang pawh tun aṭanga hun reilote hnuhah kan rawn be pawp ang che, i biakhlatna kha lo kal hlat suh,” a ti a, zawhna zawh leh hman loh hian an pahnih chuan thana chu an chhuahsan a.

Kal kawngah chuan Rozika chuan, “A ṭawng chhuak e’m ni?” a’n ti a, Thangliana chuan, “Thil pakhat chiah sawi a nei, ‘lirthei lak sawnna’ tih chiah a sawi,” a ti a. Rozika chuan thil hre chhuak ni awm tak hian a mit-ko a san a, “Um...chu chu hmuhna ka nei..” a ti hman chauh va Thangliana chuan, “Chu lamah chuan min han hruai nghal thuai teh!” a ti a.

Hydro power station sakna hmun chu an tlan chak bawk a rei lote chhungin an va thleng phei thuai a, chawhnu her a ni tawh a hna thawkho chhun thil ei chawlh lai mek hi a lo ni a, Thanglianate pahnih chuan fimkhur deuhin lirthei hnuhsawnna an dahna lam chu an pan phei a, an tum dan chuan tuma hmuh lohva chu lirthei inhung chu enfiah an duh a. Thangliana chuan a hnung lam chu a thlek uluk hle a, Rozika pawh chuan a khalhtu ṭhutna lam chu darthlalang phen aṭang chuan a bih ve bawk a. Nakinah chuan Thangliana chuan thil hmuh a nei ni ngei tur a ni, a ṭhianpa chu a han siknal zauh va, “Tun hnaiah lirthei hnuhsawn an nei ngei a nih hi,” a tih chuan Rozika pawh chuan chiang zawkin an thlek a, “A nih ngei hi, a hnuhna thil kawm pawh hei an hmanhmawh ni ngei tur a ni, a kawm kawih deuh hi -- an lirthei hnuh sawn emaw, an phurh sawn chu a rit tham deuh hlek pawh a nih hi,” a lo ti ve leh thei mai bawk a.

Rozika chuan In-te awmna chu a kawk a, “An hotupa kha kan hmuh leh angai dawn niin a lang, he thil chungchang hi a hre em em ang,” a ti a, Thangliana chuan, “Tunah mai chuan ni rih lo ve, a sarhu lai ni mah se kan ti ralṭi mai mai dawn a, he thilah hian kan tan kawng a ping hlauh zawk ang. Chu ai chuan heng hnathawk ho hi biak dan ngaihtuah zawk teh ang- ṭawngduha mual mual kan tawng fuh hlauh mahna,” a ti ta zawk a. Chulai hmun aṭang chuan an kal sawn a, hnathawkho pawh chu an chawl an ṭan leh chiah a. Mipakhat pate lam hang nel nul, ei ṭha hmu lo ni awm tak, inmet fai lo zet mai hi an tawk a. Rozika chuan a hindi thiam ang ang hmanga han biak a tum a, chu pa chuan nui deuh ha chung hian, “Keimah Mizoṭawng tlem tlem thiam lawm,” a’n ti a. Thangliana chuan nui deuh chung hian, “A khawilama mi nge kan tawn fuh hi, Rozik, i ṭawngthiam chhun chhun ai chuan i thiamsa hmangkhan be zawk teh kan var zawk ang,” a han ti a. Rozika chuan, “He hmunah hian engtia rei nge i thawh tawh?” chu vaipa hnenah chuan a ti a, chu pa chuan ṭawng pai zet hian, “Kum thumm, rei tak ka ṭhian pahnih nen thawk tawh lawm,” a ti a, Rozika chuan, “Chutiang a nih chuan Mizoramah i awmna a rei tawh a ni maw, i ṭawng thiam mai theih danah i awm un ve tawh viau a niang a- eng nge maw han zawh lawk che kan duh a, i hun kan pawt hek tam lovang,” a han ti sak chuan chu vaipa chuan, “Ka pu eng lam nge mi zawh tum?” a ti nghal mai a, Thangliana chuan Rozika bengbul setah hian ‘a awlsam ka ring tlat’ a han ti a. Rozika chuan vaipa bulah chuan peh hel teh duah lo hian, “In pu hi khawilam khawchhuak nge i hre reng reng em?” a ti a, chu pa chuan, “Hre lo, mahse, mi mak tak a ni,” a ti a. Thangliana chuan a rilru te te chuan ‘A dawi at theih ngei dawn e,’ a lo ti leh a.

Rozika chuan, “A sual viau e’m ni?” A han ti a, chu pa chuan, “Mi â maw le kan pu chu mi â, dawih lutuk zawhte dum pawh hlau mawle,” a ti a. Chutah Thangliana chuan, “Eng sakhua nge a biak in pu chuan, Hinduism nge Islam?” tiin a zawt a, chu pa bawk chuan, “Engmah keimah hre lo, biak ngah niang ṭhi pawh chi hrang hrang awrh ṭeuh lawm, a pindanah pawh Pathian chi tin rêng awm lawm,” a ti ta zel a. Thangliana chuan engemaw a duh khawp a hmu a ni ngei ang a khi sak a, Rozika hnenah chuan, “Kan vai ṭawngduh-a chu kal tir tawh teh, haw ila zanah kan contractor pa chu hmai chhanah i han be teh ang- police ho pawh hruai nghe nghe ila a ṭha ang,” a ti ta a.

Khawpawn hnaih taka khualbuk lian lo takah chuan Thangliana leh Rozika chu a kawngka bulah an ding a, nakinah chuan inspector leh a hote pawh chu an rawn thleng chawp ve leh mai a. Thangliana chuan, “In tel lo chuan engmah kan ti thei lo a ni e, hmanhmawh in kawngka hi an kik phawt mai teh,” a lo ti nghal a. Chu khualbuk kawngka inspector in a han kik chuan ṭawnglettu khan kawng arawn hawng a, a mi rin loh tak mai a hmu a ni nei ang, a ka hau va engtia lo chhawn tur nge tih chu a ngaihtuah chang tawh lova. Inspector chuan rum zet hian, “Kawiah nge contractor pa kha a awm?” tiin a zawt a, chu pa chuan, “Pindan chhungah hian a awm e, eng thil nge ni ta?” a ti a. Thangliana chuan, “Hmuh kan duh e, a rem chan chuan rawn luh pawh kan duh ang,” a tih sak a. Chu pa chuan In chhung lamah chuan a hruailut a, pindan kilah hian vaipa chuan dawkhanah lehkha engemaw hi a lo pharh a, a lo buai hle mai hi a ni a. Chutia mikhual beiseih loh mi a hmu thut chu a phawk hle ni tur a ni a ṭawnglettu bulah chuan, “Khawilama mite nge?” tiin a zawt a, ani chuan thil zawmzia a han hrilh chuan, “Aw..ka hre leh e, he mite pahnih phei hi chu ka hmu tawh ngei a lawm,” a ti a.

Chu khualbuk pindan chu an dah thim hle a, awn eng theih inkhai tam hle mahse pahnih khat bak chu an ti eng lova. Vaipa chuan a ṭawnglettu kal tlangin, “Eng nge in duh leh tak, puih theihna che u ka nei lo a ni law’m ni,” a han ti a, mahse Thangliana erawh chuan fiamthu lo zet hian, “Kan mi bo te kha i kutah hian an awm tlat a ni,” a ti chuan, chu vaipa chu a meng bial nasa hle mai a. A ṭawnglettu ka aṭang bawk chuan, “Chu min ring hlel tihna a ni maw! In duh duh sawi thei turin dikna in nei miah lo a ni,” a han ti a. Thangliana chuan, “A nih leh i kut a an awm theihna chhan chu kan sawi dawm e’m ni. In tlangval hmaih tak pakhat khan in chet vel dan zawng zawng chu kim chang takin roreltu hmaah a sawi thei ang chu, i duh phawt chuan a la dam ngei a ni tih finfiah nan kan be pawp reng thei a nia,” a tih sak chuan chu vaipa chu a ke a sai ngâr ngâr a, phung hmu ang mai hian a meng bial kawk kawk a. A dum ren run bawk si a, naupang ṭahbelh deuh han vo nan pawh a itawm hle a.

Thangliana ka aṭanga chutiang a han hre ta mai chu a chi aiin a buairu nghal hle tih chu amah hmutu tan chuan hai rual a ni lo, a kuta a lehka ken chu a tla darh nuai a, ṭhuthlengah chuan a ṭhu hnawk a an ṭawng chuan pathian hming chi hrang hrang hi a ko va. Thangliana chuan, “Tunah chuan engkim a chiang ta a, nangmah i inpuang dawn nge keimah nin kan puan zawk dawn che,” a tih chuan a meng tal nasa hle a, Thangliana bawk chuan, “Heng thil thleng zawng zawng hi engdang vang a ni lo va. I rinna kawng dik loh vang a ni, engvanga puithuna at thlak hi tualthah nana hmang mai nge i nih?” tiin a zawt ta fak mai a. Chu vaipa chuan sazu dan chep ang mai a ni ta tih a hria a ni chek ang chu han phat mar leh chuanna tur a nei ta ngang lo a ni ang, “Ka piantirh aṭanga ka sakhaw vawn ka chian loh vang a ni!” a ti chhuak a, inspector chuan hriat belh chak tak hian, “Chu chu eng eng a awm zia?” tiin a lo zawt nghal a. Chu vaipa chuan tihian a chhang a, “Goa thingtlang khawpakhat aṭanga seilian ka ni a, chulai kan chenna khuaah chuan puithuna hi an la thutak êm êm mai, chu chu ka ṭhan len pui ta a ni. Ka thil tih a ka hlawh tlin theih nan Pathian chitin reng ka bia a, puithiamte rawn ang leh an serh ang zawng zawng chu tih loh a hlei pawh ka nei lo, chuvanga tun hun pawh hi thleng thei ka ni,” a tih lai chuan Rozika chuan, “Zel thim erawh a hnuk lut ta che a nih hi,” a lo tih khum a, chu vaipa bawk chuan, “Engkim inhre tawh bawk a, khang ṭhalaite kha ka thah tir ngei an ni e,” a tih lai chuan inspector chuan, “Vuak hma hmaa i inpuan tak siah chuan i pang chu a dam deuh dawn a nih kha,” tih pah chuan a kut ava hnungkhirh nghal thuai a, pawn lama police pahnih lo awmte chuan lirthei lamah an hruai lut a.

Chumi hnu chuan inspector chuan la bangbo tih hriat tak hian, “Engtin nge khatiang dawt muhlum kha i phuh chhuah mai theih, kan tlangvala lah aka kan an tir zeng pawh ni hlei lo, kha i inpuan tir der mai a, engtin nge nangni ṭhian duh hian in chhui chhuah theih? Kan mibote pawh chu engtin nge ni zel dawn?” tiin sawifiah tur chuan a han ngen a, Thangliana chuan, “Keimahni pahnih zawk ngaihtuah tlem a leiah kan pengkawi vak mai zawk pawh a. Current lakna an siam chungchang leh Lei indawh khan kawng min hawn a ni. Ti pawh hian a sawi theih ang bawk ang chu, thlathum kal ta khan naupang ruk hmang chanchinbu lam chuan ‘Nawngsawhna’ an awm thu a ziak a. Chu chuan thil tam tak min ngaihtuah chhuah tir a, kha vaipa kan va hmuh khan kan ngaih dan chu kan nem nghet ta zel a, kan tlangvalpa in lirthei hnuhsawnna a sawi atang phei kha chuan engkim a chiang ta a ni.

“Puithuna hi thil hlauhawm deuh mai a ni a, a hmangsualtu tan phei chuan a hlauhawm lehzual. Kha vaipa nghawnga ṭhi mak pui pui khan puithuna lamah ser leh sang a ngah hle tih a lang nghal a, khang ho puithuna pathian tute chuan serh leh sang hi an ngaipawimawh hle a, nimin piah maia an lei dawh kan hmuh aṭang khan thil kal hmang chu kan man thiam ta nghal a- khatiang puithuna la vung tute chuan thil lian tham an tih dawn reng reng chuan mihring nunna lak hi van neihnaah an ngaih avangin an lei dawh turah chuan mihring thah a lo ngai ta a ni. Chuvang chuan lirthei zawh tur lei emaw, rel zawh tur lei emaw an dawh hian mihring ruangin a zui ngei ngei ngaiin an hria a, tu emaw ruaiin khang rawlthar rualte kha an ru bo ta a ni. Chu’ng mihring mantute chu tlangkama kan hriat danin ‘Misili’ kan tih te ‘Nawngsawhnawh’ kan tih ṭhin naupang tihṭhaih nana kan hman ṭhinte hi an ni,” a’n tih chuan inspector chu a ka hau ringawt mai a, “Tlangval ṭhalai rual an ni a, engtin nge an in man tir mai theih le?” tiin a han zawt leh hram a, Rozika chuan tihian a lo chhang a, “Rinnain thla han zar phawt mai teh ang, khatia In aṭanga an chhuah hnu khan misual ‘Misili’ kan ti dawn nge, ‘Nawngsawhnawh’ kan ti zawk dawn, Lei-ah khan ruahmana felsa diamin mi an lo chang ta a, chutia lirthei rawn tlan an hmuh chuan kawng lakah an lo inbarh thut a, anni tlangval ho pawh chuan a lirthei chu a ti ding thut a- mi chil taah an inngaia an hlauthawng hle a, an chiai hle bawk awm e. Chutih lai chuan misual pakhat chuan an lirthei chhungah chuan mut hilh nghal theihna khawpa chak tur chu a kap lut a, insaseng hman lovin an lirthei chhungah chuan naupang awihmut hlim ang maiin an awm nghal mai a ni. Mahse an zinga pakhat chu a hnuah a van neih a siamin a rawn harh chhuak leh a, aṭhiante ho an tih dan chu hmu vekin bak lengin a lan chhe ta chiam a, a hlauh em avangin a ka pawh a ang thei lo a ni. Tichuan, an lirthei pawh chu a hnuhsawnna hmangin khawiah emaw an hnuk sawn ta nghal bawk a ni,” a ti a, inspector chuan, “A nih chuan kha zurui pa kha an hmu fuh lo tihna a nih ngei dawn chu,” a’n ti a, Thangliana chuan, “Kan mi bote chu an ruangtal chu hai chhuah leh chi a ni ang, kan puithu-a pawh chuan roreltu hmaah chuan lirthei an dahna chu a la sawi ve mahna chu mi hma chu azawn chi loh vang,” a ti a.
Last edited by Lalhmangaiha(Ka ka) on March 21st, 2024, 6:29 pm, edited 1 time in total.



Link:
BBcode:
HTML:
Hide post links
Show post links

alicestevens
Posts: 1
Joined: November 1st, 2023, 4:21 pm
Location: https://bloxdio2.com

Unread post by alicestevens » November 1st, 2023, 4:24 pm

Lalhmangaiha(Ka ka) wrote:
> Thawhlehni ni 25 a ni a, pindan thim ang reng takah hian mipahnih hi
> ngaihtuah muk tak nei hian ṭhuthleng pakhat ve ve ah hian an ṭhu dun a, an
> inkarah chuan dawhkan a awm a tah chuan chimni a inchhi bawk a. An hma zawn
> banga lehkha hlai tak intar chu ngawirengin an thlir a, a lan danah chuan
> an ngaihtuah zawng chu a in ang hle ni hian a hriat a, pakhat veilama mi
> zawk chuan ding chungin a han thlek vang vang a, “Hei lo kawngdang awmin a
> lang si lo, he tah bawk hian kan tawp leh tho tho a ni,” a han ti a, a ṭhu
> zawk pawh chuan, “An hniak bo danah hian khawmu chawite pawh an ang dawn
> dawn mai ka ti, mahse, lirthei chu an khalh ngei ni chuan a hmu ten an hre
> bawk si a,” a rawn ti ve leh a.
>
> Chutiang thil an ngaihtuah lai chuan pindan pawn lam aṭang hian tuemaw hian
> kawngka a rawn hawnga thingpui a rawn chawi lut a, chu mi chu pi Thangi a
> ni a. A rawn ṭawng lut bawrh bawrh a arawn ri deuh hlut hi a ni mai a – a
> awki chu a fiak hle a aṭawng dan vel aṭang chuan ‘ralte’ chi lam kai pawh a
> ni mai thei a ni. Pi Thangi chu nu upa lam deuh thau angreng tak nu tawi
> lam, mahni inzo vah mai hi a ni a. Dawhkanah an chhun thingpui lam chu dah
> in, “Engnge inngaihtuh a in inzar phui tak mai?” a ti a. Pakhat chuan,
> “Nili kal ta maia tlangval rual bo te kha kan zawng a, chu thil buaipui
> chuan a chhin pawh kan chhing hman lo a nih hi,” tih pah chuan dawhkana
> thingpui leh chhang chu a bana a ei nghal sawk sawk leh nghal a. Pi Thangi
> bawk chuan, “Chutiang lam chu ka buaipui zawng a ni lo ve, inhnuai lamah
> hna ka zu thawk leh tawh zawk a nge, nangni pawh in hna chu thawk leh rawh
> u, min mamawhna in neih chuan koh phakah ka lo awm reng ang,” tiin a chhuak
> lehnghal mai a.
>
> Ṭhuthlenga khabe dawma la ṭhu ta reng chu Thangliana, hnu chhui lama
> hmingthang em em mai a ni a, thingpui ina ding chu Rozika mifing tak tho
> bawk a ni a. Thangliana chu a ṭhutna aṭang chuan a rawn tho chhuak vut a,
> banga Lungmuang khaw map intar chu hnai teah hian a han bih a, “Hei a lan
> danah chuan lui luanna zel amawng lamah hian suar sang tak a awm a nih hi,”
> a han ti a, Rozika pawh chuan chu thil chu hmuh ve tumin a thingpui no nen
> chuan bang lam bawk chu a pan a, Thangliana kawhna zawn chu a en nghal
> thuai a, “A nih hi engtin nge a hma daih khan kan lo hmuh loh theih zawk,”
> a ti leh hnuhnawh a, Thangliana chuan, “Lirthei ke hniak khan min ti buai
> em a, lui luan dan hi kan lo hmuh hmaih mai mai rih a ni. Police ho khan
> luiah khan engmah an hmuh loh thu kha an sawi e’m ni kha?” tiin Rozika chu
> an zawt a, ani chuan, “An sawi dan chu a ni a, mahse an dap famkim lo pawh
> a ni mai thei kan hman ve leh suar hi zu en ngei tur a nih hi,” a han ti a,
> Thangliana chuan, “Nili kal anga bo a ngaih kha an ni a -- a ni tak e, tuma
> hriat lohva bo tum te pawh an ang dawn mai ka ti. Zika, hnuchhui lam hi kan
> lo khawih dun ve tawh viau a, hetiang ema danglam hi chu nang nen hian kan
> la khawih awm pawh tun hmain ka hre lo ka ti, engnge ingaih ve dan le?” a’n
> ti a, Rozika pawh chuan, “Nula pakhat khuangcher bo kan zawn ai khan amakin
> a dang daih a ni, an hnu lah chu Lei-ah a tawp hmak mai si a, an chuanna
> ber a han bo tel lehzel hian hnu chhui a ti harsa lehzual a ni. Lei hnuai
> tui lamah an tla phiar tingawt dawn ila a lirthei ber chu tuiah chuan lang
> zel awm lo tak hi a ni a. Ti pawh hian lo ngaihtuah kai ta zel ila an tlak
> lai chuan tui chu lo lian phut ni ta se..” a tih lai chuan Thangliana
> chuan, “An tlanliam i tih dawn chuan lei hungna sir lam kha an su chhe ngei
> ngei tur a ni a, mahse engmah chhiatna hnuhma leh an tlan liamna awm hnu a
> awm loh kha aw,” a lo tih sak a.
>
> Chumi tuk chuan zing hma takah an tho va a hma ni a an map-a an hmuhchhuah
> suar awmna lam chu pan tumin an insiam a, thawmhnaw tui fawm lo lam an
> inbel a, tui han dai pui pawh a bun nuam tur pheikhawk an inthawlh a,
> rikrum thil a hman tur chempui leh hruizen an ak bawk a, Thangliana chuan,
> “Biakhlatna kha i ak theihnghilh a nge,” tiin Rozika chu a ti a, ani chuan,
> “Chaw fun em kan ngai lo ang chu maw,” a ti thung a, Thangliana chuan, “A
> hmun zuk thlithlai mai kha kan tih theih chu a ni dawn a, vanneih thilthuah
> kan mi bo te zuk nangfuh pawh ni ila tih theih kan nei tam dawn chuang lo;
> chuvangin kawng laka ṭamhnem tur chhang keng ila a tawk em em ang,” a ti a.
> An pindan aṭang chuan an pi tih harh hlau takin thawm dim takin an in-ak
> chhuak a, an hma em avangin kawlah ni zung tak ngial pawh a la inlar meuh
> lo va.
>
> An awmna hmun aṭang chuan lei awmna chu mel sawmhnih vel hi a ni a, chulai
> thleng chu an lirthei hmangin an kal a, ta ṭang chuan lui luang lian tak
> mawng lamah chuan an inzui thla ta a. Reife an kal hnu chuan ni pawh chu a
> rawn tlangsang tawh a, lui hrul kam a kal zel an nih avangin kawng mumal a
> awm lova, hmun ṭhenkhatah te phei chuan an kalna tur an han samfai leh rih
> ṭhin a. Suar awmna zawn an zu thlen chuan tui luang chu a ri hum hum mai a,
> asan zawng chu fit sawmthum laia sang mah tur hi a ni a, azu inkhawh
> thlakna hmun chu kham ko aṭang chuan an zu en thla a, a paw deuh phut mai
> a. Tui inkhawhthla sî chuan chhimbal a siam a, banphak mai turah hian a zam
> kulh mai leh nghal a. Thangliana chuan, “He lam hi police ho khan an dap
> thleng lo e’m ni?” tiin Rozika chu a zawt a, ani chuan, “Inspector sawi dan
> kha chuan khawmi ṭhenkhat chu an kal thui viau niin a sawi a, he lam hi an
> thlengthla a nih chuan kan tawpna hmun hi an tawpna ve tho tur a ni ang,” a
> han ti lûng lûng a, a chhan pawh tui luangri chu a rin avangin ring deuh
> hleka inbiak a ngai a ni.
>
> Uluk takin chulai hmun chu an dap a, mahse engmah bengvarna tur hnu hmuh
> tur reng an nei lo. Ni chu a rawn tlangsang zel a, chhun pachang hun kan
> tih awm velah chuan Thangliana chuan haw mai a rawt a, tichuan beiseihna
> tur engmah hmuh nei lovin an kir leh ta a. Chu ni chuan hah takin In an
> thlenga ṭhuthlengah chuan zawi hnap hian an tlu nghal a. Chutih lai chuan
> pi Thangi chuan thei-tui arawn chawi lut a, “In kalna hmunah chuan intluang
> meuh maw, inchhuak hma lutuk a -- ka pindan luhka bulah lehkha lo
> hnutchhiah lo ni ula chu nangni pawh inbo ve ta emaw ka ti hman dawn a nih
> kha,” tih mawlh mawlh pah chuan thei-tui chu a thli a, Thangliana chuan,
> “Nang nge nge i bengvar ṭhin e, kan zu kalna aṭang chuan hah chiah a ni kan
> rawn hawn ni. Rozika erawh chuan chabet a hawn tel mai thei e,” a ti a,
> chutih lai chuan an pi Thangi chuan a pawnfen ipte aṭang hian lehkha them
> hi a rawn phawrh a, Thangliana hnenah chuan, “In chhuah bo hlan khan
> mipakhat hian hmuh che u arawn tum a, mahse inawm loh avangin ni danga rawn
> kal leh zawk mai turin ka lo ti a, ani chuan, ‘Hmuh ngei ka duh hmanhmawh
> si a, hei ka awmna inziahna lehkha hi min lo pek sak la, anmahni chuan min
> rawn hmu thuai rawh se, mi bo chungchangah khan a ni e,’ a ti a, a hawi
> vual vuala a kal leh ta a ni,” a ti a. Thangliana chu a inperh tho thut a
> hah lo ang mai hian a han ding a, lehkha them chu a en nghal a, a chhiar
> zawh chuan, “Ka pi, khawnge i theitui chu kan han tlak zung zung ang a,
> Rozika nen hian kan han tei chhuak lehnghal mai ang e,” a ti vut a an
> chhuak chu a ni leh ta mai a.
>
> Dar 4 bawrah hian kudam rohsan tawh hi an va thleng a, khua chu a dul ruih
> a, kawlah ni pawh chu a tla lek lek tawh a. Rozika chuan, “Ka lo awm ang
> tah hian a ti maw kha?” a han ti a, Thangliana chuan, “A lehkha hnut chhiah
> dan chu a ni a lawm,” a lo ti a. Nakinah chuan kudam phem aṭang hian
> mipakhat hi a lo chhuak hlawl a, amah lah chu sang ṭha veng vawng tak la
> tlangval tak mai, vengchhunga inkhelhna velah pawh a lailum chang pha zak
> zak tur khawpa sa ṭha nelh nawlh mai hi a ni a. Thanglianate bul arawn pan
> hnaih chuan a fimkhur hle tih chu a chet dan aṭang chuan a hriat thei a,
> Rozika chuan, “Engmah hlauh tur a awm lo, tlangval, keimahni pahnih chauh
> hi kan ni e,” a lo ti a, chu pa chuan, “Tunah hian mi bo chungchangah khan
> rinhlelh ka ni a, min zawng mek a ni,” a han tih chuan Thanglianate ṭhian
> dun chuan mak tih hmel tak hian amah chu an en a, Thangliana chuan, “Chu
> chu engtin nge a nih theih! Mi bo ho ṭhian hnai tak i ni e’m ni?” tiin a
> zawt a. Chu tlangvalpa chu a hawi ruk ruk a, a kut chu a khur hlek hlek
> bawk a, “Khang mi bo te zingah khan ka tel ve a ni, mahse vanneihthlak
> takin Pathian zarah ka dam chhuah hlauh a ni. Tunah pawh hian min enthlatu
> an awm tlatin ka hria!” a ti a, a hmelah chuan hlauhna chi tin rengin a
> rawn lang chhuak ni mai hian a hriat a. Rozika chuan, “Hahdam tak khan awm
> la, i ṭhiante chin chu i hre reng reng em?” tiin aw dam ang reng tak hian a
> zawt a. Chu pa chuan, “Ka hre lo!” tih chauhin a chhang a. Thangliana chuan
> a mit ko an san a, chu pa chu a mit-ah tak a en a, “I ṭhiante chian i hriat
> chuan tun hi min hrilh hun tur tak chu a nih ka ring. A nih loh chuan...” a
> tih lai chuan chu pa chuan, “In hrethiam lo a ni...” a ti a, Rozika chuan,
> “Vala, engemaw tak i ṭhiante chian i sawi loh chuan...,” a tih lai tak
> chuan an chhak hmin pik kar aṭang hian police ho an rawn lang thut a, hnim
> kar aṭang chuan mipali hi an rawn zuang chhuak chawpchilh nghal zat bawk a.
>
> Tlangval hlau thlabar chuan tlanchhiat mai hi a han tum uk hman a, mahse
> police zinga pali chuan an hual a, an man ta a. Inspector chuan “Vala, chet
> thawh duh hlek suh...kan hual hneh viau che a ni!” a ti nghal bawrh bawrh
> a. Thanglianate ṭhian dun chuan bangbo fe hian inspector hnenah chuan,
> “Engnge thil awmzia! Hepa hi in lo veh ru reng e’m ni, engnge a chhan?”
> tiin an zawt a, inspector chuan, “Veh ru reng e, khang mibo te ṭhian zinga
> pakhat kha a ni a, a ṭhiante bo ni khan ani pawh hi a awm lo ve tho a ni,
> mahse arawn lang leh tih amah hmututen min rawn hrilh a, tichuan kan zawng
> ta chiam mai a ni. Hei nangni’n inhmu dawn tih thu kan lo hre leh zel a,
> kan zui ru che u a, ti hi kan thleng ta a nih hi,” a han ti a. Thangliana
> chuan, “Engvanga tihsual nei ang maia nangni hian veh nge maw in nih le, a
> ṭhiante bo ni a telve tho kha a ni si a, eng nge a tihsual a inhriat?” tiin
> inspector chu a zawt a, ani chuan, “A tihsual ber chu engmah hriat kan nei
> lo, amaherawhchu engvanga hetianga police hmuh hlauva kawmkara a bik ruk
> tih hi kan hriat chhuah tur chu a ni zawk a ni,” a ti a. Thangliana chuan,
> “Chutiang a nih chuan amah hi eng nge maw zawh lawk a rem ang chu maw?” a’n
> ti a, inspector chuan, “Thana lama kan kal pui hmain hun tlem chu kan pe
> ang che,” a ti a.
>
> Thangliana chuan chu tlangvalpa hnenah chuan, “Hei police hoin an hruai
> dawn che a, tunah hian tihsual i neih loh chuan engkim sawi vek rawh;
> anihlohchuan misual manin an man che nga an dawp dawn che a ni. Khai le i
> ṭhiante ho chin chu han sawi teh?” a tih sak a, mahse chu pa chuan engtin
> mah a chhang lova a kum ngul a, zawi sap hian, “A rapthlak em a ni!” a ti
> a. A ngawih tlat avang chuan inspector chuan, “Thanga, i hun neih chhun chu
> a zo ve, tihian kan hruai ang a, kan thiam ve danin kan han hrual a nge,
> tunah sawi duh lo teh mah se, rei erawh a ka a chip hauh lo vang,” a ti a,
> an kal pui ta a.
>
> In an thlenfel leh hnu chuan tlai chaw ei hun a ni leh hman tawh a, an pi
> Thangichuan tlai chaw atan vawksa rep tui tak a lo chhum hluah a, chhun
> lamah engmah mumala an ei loh avangin an ṭhian dun chuan an lim dun nghek
> a. Zan lamah chuan tha thar leh ngaihtuahna tharin chhun lama an thil tawn
> chu an khel dun leh ta a. Thangliana chuan, “Kha tlangvalpa khan engemaw
> chu hriat a nei ngei a, mahse a mit taka ka en khan a sawi chhuak ngam lo a
> ni,” a han ti a. Rozika pawh chuan, “A ṭhiante zingah khan a telve ngai a
> nih chuan hmuh leh hriat chu a nei ngei dawn a, rei tak nikhawhre lova a
> awm te a nih ngawt loh chuan..” a tih lai chu Thangliana chuan lo pawt chat
> in, “A thawmhnaw kha i lo chik em?” a ti a, Rozika chuan, “Chik e, a bal
> hle a, an bo ni aṭanga a thawmhnaw hak kha a la hlip lo niin a lang,” a ti
> a, Thangliana pawh chuan, “A kekawr khup kha a bal bik lehzual a, a lan
> danah kha chuan a tlanchhiatna lamah a tlu nasa hle a ni ang, amah lah khan
> engmah a sawi ṭha ngam bawk si lo,” a ti a.
>
> Rozika chuan a meizial pak khu hlat hlat pah chuan, “Police ho pawh chuan a
> hnen aṭangin engmah an hre tawp lovang -- naktukah lei kha zu en chiang leh
> ila a ṭha ang. Hmuh hmaih kan nei a ni ngei ngei ang,” a han ti leh a,
> Thangliana pawh chuan, “Hmuhhmaih chu kan nei ngei a ni,” a ti ringawt a.
> An sawi angin a tuk zingah chuan thingpui inzawhin an chhuak a, Lei awmna
> lam bawkah chuan an inkhalh chhuak leh a. Lei an thlen chuan Thangliana
> chuan, “Hei han enchiang mah la, lirthei ke hniak hi a lang kulh hi – a lan
> danah chuan a khalhtu hian a ti ding thut tih chu a chiang a, mahse
> engvanga ding thut nge a nih tih lai hi a ni,” a han ti a, a ṭhianpa chuan,
> “Engemaw kawng lakah tawh thut an nei a ni mai thei, mihring emaw, ransa
> emaw, chu chuan a ti ding thut pawh a ni mai thei,” a lo ti a. Thangliana
> chuan, “Nili kal ta khan an bo tih thu hriat chhuah chauh a ni a, an bo hun
> tak ni leh darkar hriat theih a ni lo; chuvangin helai kawng hi lirthei
> engemaw zahin an zawh leh ngei tawh ang a, he lirthei ke hniak hi an pal bo
> zo tawh pawh a ni mai thei,” a’n ti a, Rozika pawh chuan, “He khaw chheh
> vel fan theih chin china ram ngaw hi police leh vantlang hoin an dap tawh
> a, lirthei chetsualna hnu reng an hmu lo,” a lo ti a.
>
> Chumi zan chuan police inspector chu Thanglian leh Rozika hmu turin a kal
> a, kawngkhar kik thawm an hriat chuan Rozika chuan kawng ava hawn a, an rin
> loh tak maiin inspector a lo ni reng mai a, Thangliana chuan, “In mi hren
> pa chuan sawi a nei e’m ni?” a lo ti thui a, chu pa chuan, “Nei suh e a,
> kan han vuak deuh hlek pawn aka a ang duh reng reng lo mai, a thil sawi duh
> mai loh danah hian a inhmanhmawih ve ngei a ni tih min rin ngeh lehzual tir
> a ni,” a tih chuan Rozika chuan, “A ṭhiante bo chhanah hian a inhnamhnawih
> ta pawh lo ni se, engvangin nge kei ni kher min biak duh ang ni,” a lo tih
> sak a.
>
> Inspactor chu sa ṭha nelh nawlh mai, palian tak mai a ni a. A ngaihna hre
> lo tih hriat tak mai hian a lukhumparh chu a phawk a, ṭhuthlengseiah chuan
> a ṭhu deuh hnawk a, “He buaina hi ka chingfel lo a nih chuan kan pute leh
> khawtlang chungah ka hming chhe hle dawn a, chuvang chuan in mi puihna hi
> ka ngai tak meuh a ni,” a ti chhuak phawng mai a. Thangliana chuan, “I
> dinhmun tur chu kan hriatthiam pui hle che a, mahse kei ni pawh hei kan
> buai ve viau chu a nih si hi maw....” a’n ti a, inspector chuan, “Chung
> lamin min nawr nasa tawh mai si a, hei inhriat angin karkhat chu a vei leh
> dawn ta reng mai. Mahse, beisei tur lah chu thehhmeh ang mai a bo hmak mai
> si a,” a han ti a, Rozika chuan, “In mi hren kha engtikah emaw rawn hmuh
> leh kan duh ang, kha pa khan engemaw tak chu han sawi zeuh se chuan kawng
> pawh a inhawng deuh mai tur hi a ni a- tunah chuan mahni ngaih dan dana kan
> chet a la ngai rih a nih hi,” a ti a.
>
> Inspector chhuah dawn chuan Thangliana chuan, “An chhungte hnen aṭangin kha
> mi zana an chhuah hun kha inzawt chhuak tawh hlawm em?” tiin a han pawt
> ding leh a, ani chuan, “An sawi dan chuan zan dar-kua ah an ṭhianpa’n
> lirtheiin arawn lam khawm a ni awm e,” a ti a, Thangliana bawk chuan, “Lei
> an thlenphei hmain lo hmutu an awm e’m ni bawk kha?” a ti leh a, ani chuan,
> “Kawngkal zurui pakhat chuan lirthei tlan chak takin a tlan pel a ni awm e,
> lei thlen hma lawk ah...” a tih lai chuan Thangliana’n, “Chu pa chu khawiah
> nge kan hmuh theih ang?” a ti leh a. Inspector chuan, “In hmuh duh chuan ka
> hmuh pui ang che u,” a ti a, Thangliana chuan, “A nih chuan naktuk zingah
> chu pa hmu tur chuan kan chhuak ho dawn nia,” a ti sak a, ani pawh chu a
> chhuak ta nghal a. Inspector kal hnu chuan Thangliana chuan, “Rozik, chu
> zurui chu kan hmuh a ngai a nih chu,” a han ti a, Rozika pawh chuan, “Zu
> ruiin chutianga a sawi thei a nih chuan a ruih lutuk loh ṭum tak pawh a ni
> mai thei a sin,” a lo ti ve a.
>
> A tuk lamah chuan Thanglianate ṭhian dun leh inspector chuan pa pakhat hi
> an din hual a, ani lah chu zawi hneng hnuang mai, zu ei tih hriat reng mai
> hi a ni a, a zah vang pawh ni hranpa lovin a hnar chu a lian hle a,
> Thangliana chuan chu pa hnenah chuan kha mi zana a thil hmuh kha a han zawt
> a, “Kha mi zan khan ruih hnepna tur rakzu ka neih loh lai tak mai hi a ni
> a, chutia khamkhawp lo zet a khawlaia ka tei ka tei lai chuan zan dar sawm
> hi a ri vel ang. Kawngsirah chuan ka kal a, nakinah chuan lirthei pakhat
> chak lutuk hian mi rawn tlanpel thuak a, kei chuan thei leh thei lo hian ka
> thlek a -- ka dinna hmun aṭang chuan lei indawh kha a lang dê dê a, tah
> chuan lirthei chu a ding thut a, eng nge a tawh phei chu ka hre lo...” a
> tih lai chuan Rozika chuan, “Anmahni chu lirthei aṭang chuan an chhuk em?”
> a lo ti a, chu pa chuan, “Ka awmna aṭang chuan chiang taka a lan fiah loh
> avangin anmahni chu an chuanna aṭang chuan an chhuk em ka hre pha ta lo,
> tichuan zu inbelh tur zawngin hmeithei In lam ka pansan leh ta mai a ni,”
> a’n tih chuan inspector chuan rum zet hian chu pa chu a lo melh kawk mai a,
> “Engvanga chiang lo em em nge i nih le...anmahni lo chu midang i hmu lo
> reng reng a maw?” tiin a zawt nawn leh a, chu pa chuan bah deuh nawk nawk
> chung hian, “Tumah mi dang ka hmu lo, ka ruih deuh avangin ka lo hmu lo
> pawh a ni mai thei,” a ti leh hnuhnawh a. Thangliana chuan, “A ṭha e ka pu,
> zu intur chuan hmeithai in lam chu min lo pansan leh phawt mai ta che,” a
> ti a, chu pa chu phun nuah nuah chungin a kal kiang ta a.
>
> Inspector chuan, “A ngaihna hriat ava har ta ngai em!” a han ti a, Rozika
> chuan, “Chu Lei an dinna chu kan chhui tawpna chiah kha a ni a, chumi hnu
> aṭang chuan chawibo ang maiin an hnu chu a reh hmak a ni. Inspector i hote
> nen khan in mi hren mek kha dimdawi takin lova zawh chhuah tum hram ula,
> keini ṭhian dun chuan kan tih ve dan ṭhinin kan han buaipui a nge,” a ti a,
> chulai hmun aṭang chuan Thangliana nen chuan an inzui hrang leh ta daih a.
> Kawnga an kal lai chuan Thangliana chuan, “Thiana, vawiin lam chanchinbu
> kha i lo bih ve hman em?” a ti a, Rozika chuan, “Hman nang,” a lo ti mai a,
> Thangliana chuan, “Lungmuang khaw heltu lui lian tak luang hi a hnar lamah
> ‘Hydro Power Station’ sak an kal pui mek a, tunah hian an sa mup mup a ni
> awm e,” a tih chuan, Rozika chuan, “Chu thil i sawi chhan chu eng nge a
> awmzia?” an ti a, Thangliana chuan, “Thla hmasa maia chanchinbu bawka an
> thu rawnziah kha i la hre reng em?” an han ti leh a, Rozika chuan, “Naupang
> rukbo ching chungchang kha e’m ni, i tih?” tiin a han zawt a, ani chuan,
> “Ni chiah e, chanchinbuah chuan ‘Nawngsawhnawh’ an tih nghe nghe kha. Ka
> rin dan mai mai hi a dik a nih chuan tunah chian current lakna tura an
> siamna hmunah chuan hawh teh i han kal teh ang- kan la hman bawka rei kan
> thang ka ring lo,” a ti a, lirthei chu Rozika’n a khalh a chak ang rek
> takin an tlan par par a.
>
> Khaw chhung aṭang chuan current siam chhuahna an bunna hmun chu km 26 laia
> hla hi a ni a, kawng a ṭhat em avangin rei erawh tlan angai lo.
> Thanglianate ṭhin dun pawh chu darkar rei lo teah chulai hmun chu an thleng
> a. ’Hydro power station’ chu an lo sa mup mup mai a, lui lian tak an
> khuapna chu ral lehlamah a ni a, kawng aṭanga chulai va kai nan chuan Lei a
> in dawh a, lei a in dawh han ti ila, an sa ṭan mek a a ruhrel tlem a zawng
> chu a ding luah tawh a. Kan sawi tak current an lakna tui khuah kai nan
> chuan Lei te ang reng tak lirthei pawh a te lam zawh thei tawk ang lek hi a
> indawh a. Chu lei chu nakin lawka ṭhiahdarh leh mai tura an duan a ni nghe
> nghe a. Thanglianate ṭhian dun chuan Lei-te zawk chu an kan a, nakinah
> chuan hnathawk ho lo phe suau suau hi an va hmu a, mipakhat chu an han pawt
> ding ngawt a, chu pa hnenah chuan, “He hmun enkawltu hi kawihah nge kan
> hmuh theih ang?” Rozika chuan a han ti a, chu pa chu vai anih avangin
> Mizoṭawng a lo thiam awzawng lo va, kut zaizir chuan an chhak tlang deuha
> In-te pakhat chu a kawk a, “Kan hotupa chu tah khian a awm,” a ti ni ngeiin
> a lang a. Tlang bawka In-te chu thlam tiah lek maite hi a ni a, chulam pan
> chuan an pahnihin an chho va chutih lai chuan vaipa chuan a enzui vawng
> vawng mai a.
>
> In-te an pan lai chuan kawng kam mai a lirthei dahsawnna khawl inhung chu
> an hmu a, In kawtah chuan an ding a, nakinah chuan chulai hmun satu an
> hotu ni ngei tur chu a rawn chhuak a, chu pa chu Mizo ni lovin vai ngalsang
> lam, dum muk tak mai a ni a, a nghawngah chuan eng chhinchhiahna emaw hi a
> awrh deuh tuar leh nghal a. An han biak chuan chu vaipa chuan Mizoṭawng a
> thiam lo va, a ṭawngletu Mizo a rawih chhawn leh chu a han ko va, chu
> ṭawnglettu chuan, “Pute u, kan pu hian engnge in duh a ti a nih chu,” a han
> ti a, Thangliana chuan, “He hmun hi engtik hun a zawh fel tur nge?” tiin a
> han zawt ṭan a, ṭawnglettu chuan, “Kan pu hian tun aṭanga kum ngaah a ti,”
> a ti a, Thangliana chuan chu vaipa chu chiang em em hian a lo thlek a,
> anmahni ṭawnga a ṭawng tlat avangin amah tak han biak chu anni hindi thiam
> lo tan chuan tih ngaihna avang hle a, Rozika chuan, “Saw laia lei indawh
> mek saw i kut a mi tho hi a ni em?” tiin a zawt a, ṭawnglettu chuan lo
> chhang leh in, “Ni e, he laia hna awm reng reng hi chu kan pu hna vawnlai
> vek a ni e, kan pu hian tute nge in nih a ti che u a nih hi?” a han ti a,
> Thangliana chuan lo chhang in, “Keini hi hnuchhui kan ni a, kar hmasa khan
> rawlthar mi pali an bo va he lamah hian an hnute a lo awm mial lo maw tih
> thuah kan rawn kal a ni,” a tih chuan, ṭawnglettu chuan a mit-ko a han san
> a, a pu hnenah chuan hindi-in a han let leh a, Thangliana sawi awmzia a
> hriat hnuah chuan a nui deuh seih reng chu a tawp hmak a, “In rin danin he
> lamah hian an bo inring tihna a ni ang maw...” tiin ṭawglettu ka aṭang
> chuan a ti a. Thangliana chuan, “Chulam chu kan chiang bik lo ve, thudang a
> lai chuan lei ban pahnih saw tunhnai kar hnih kalta vela in chhun chauh a
> ni ang maw?” a han ti daih a, ṭawnglettu chuan, “Ni e,” tiin a chhang a,
> vaipa chuan, “Hei tunah chuan hna kan ngah si a, puih theihna che u kan nei
> pawhin a lang bawk si lova ka hna kan tawk leh tawh a nge,” a ti a, a kal
> kiang ta daih a.
>
> Thanglianate ṭhian dun pawh chuan chu pa khawsak dan chu an enzui vawng
> vawng a, kal pah chuan Rozika chuan, “Hei a landanah chuan hna tawk ho reng
> reng hi hnamdang vek an niin a lang, ṭawnglettu pa te lam tih lohah kha
> chuan,” a ti a. Thangliana pawh chuan, “An nih hi,” a ti a, zozial aṭana a
> pet khu vet vet a chulai hmun chu anchhuahsan leh ta a.
>
> A tukah chuan Thanglianate pahnih chuan thanaa police in an hren tak
> mipakhat kha an va tlawh a, chu pa chu a lo ṭhu ngui bur a, a lan danah
> chuan an chaw pek pawh chu a eiṭha lo tih hi a lang reng mai a. A taksate
> pawh chu an hmuh hmasak ai khan a lo dangin a cher chhe deuh hlek tawh a.
> Thanglianate ṭhian dun va kal ni chuan a chhungte pawh an lo awm a, police
> ho hnenah chuan tlangvalpa chhungte chuan, “Kan fapa hian tihsual engmah a
> nei lo, chuvangin min chhuah sak mai teh u, ti ringawt chuan a thi mai
> ang,” tiin an lo ngen mek a, inspector chuan, “Chutiang maiin tunah rih
> chuan kan sezawl chhuah tawp thei rih lo a ni, tuna kan thil tawn mek hi a
> harsa hle a nangni pawn in fapa chungchang hi a fel hma chu lo dawh hram
> hram te u,” a lo tih sak a, chutih lai chuan Thanglianate ṭhian dun rawn
> lut a hmuh chuan, “Nimin lamah engthil nge i hmuh le?” a lo ti a, thu thar
> a lo beisei hle a. Rozika chuan, “Kan tlangvalpa chu aṭawng chhuak tawh
> em?” tiin a zawhna chhang ta lo chuan a ti a. Inspector chuan, “Engmah a
> sawi duh lo, hei a chhungte hian chhuah mai turin min ngen a. Mahse kan
> chhuah ngawt thei si lo a ni,” a lo ti a. Thangliana chuan, “Vawikhat han
> hmuh leh hram kan duh a, a rem chan chuan,” a ti a.
>
> Inspector chuan, “A beidawnthlak tak zet tawh a ni, vawiin lamah hian
> chanchinbu-mi lam ten thu thar kan neih min beisei tawh a- engmah lah chu
> kan la eng der mai si lo. I duh te chuan i hmu thei ang, mahse rei erawh
> hun ka pe thei lovang che,” a tih chuan Thangliana chuan, “Hun ka mamawh
> tam lo vang,” a ti a. Thangliana chu tan In chhungah chuan amahin a lut a,
> tlangvalpa hnaih takah chuan a ṭhu a, minit sawm hnu velah chuan tha tho
> zet hian arawn chhuak a, a ṭhianpa Rozika hnenah chuan, “Ti teh, kalna tur
> kan nei. Inspector nang pawh tun aṭanga hun reilote hnuhah kan rawn be pawp
> ang che, i biakhlatna kha lo kal hlat suh,” a ti a, zawhna zawh leh hman
> loh hian an pahnih chuan thana chu an chhuahsan a.
>
> Kal kawngah chuan Rozika chuan, “A ṭawng chhuak e’m ni?” a’n ti a,
> Thangliana chuan, “Thil pakhat chiah sawi a nei, ‘lirthei lak sawnna’ tih
> chiah a sawi,” a ti a. Rozika chuan thil hre chhuak ni awm tak hian a
> mit-ko a san a, “Um...chu chu hmuhna ka nei..” a ti hman chauh va
> Thangliana chuan, “Chu lamah chuan min han hruai nghal thuai teh!” a ti a.
>
> Hydro power station sakna hmun chu an tlan chak bawk a rei lote chhungin an
> va thleng phei thuai a, chawhnu her a ni tawh a hna thawkho chhun thil ei
> chawlh lai mek hi a lo ni a, Thanglianate pahnih chuan fimkhur deuhin
> lirthei hnuhsawnna an dahna lam chu an pan phei a, an tum dan chuan tuma
> hmuh lohva chu lirthei inhung chu enfiah an duh a. Thangliana chuan a hnung
> lam chu a thlek uluk hle a, Rozika pawh chuan a khalhtu ṭhutna lam chu
> darthlalang phen aṭang chuan a bih ve bawk a. Nakinah chuan Thangliana
> chuan thil hmuh a nei ni ngei tur a ni, a ṭhianpa chu a han siknal zauh va,
> “Tun hnaiah lirthei hnuhsawn an nei ngei a nih hi,” a tih chuan Rozika pawh
> chuan chiang zawkin an thlek a, “A nih ngei hi, a hnuhna thil kawm pawh hei
> an hmanhmawh ni ngei tur a ni, a kawm kawih deuh hi -- an lirthei hnuh sawn
> emaw, an phurh sawn chu a rit tham deuh hlek pawh a nih hi,” a lo ti ve leh
> thei mai bawk a.
>
> Rozika chuan In-te awmna chu a kawk a, “An hotupa kha kan hmuh leh angai
> dawn niin a lang, he thil chungchang hi a hre em em ang,” a ti a,
> Thangliana chuan, “Tunah mai chuan ni rih lo ve, a sarhu lai ni mah se kan
> ti ralṭi mai mai dawn a, he thilah hian kan tan kawng a ping hlauh zawk
> ang. Chu ai chuan heng hnathawk ho hi biak dan ngaihtuah zawk teh ang-
> ṭawngduha mual mual kan tawng fuh hlauh mahna,” a ti ta zawk a. Chulai hmun
> aṭang chuan an kal sawn a, hnathawkho pawh chu an chawl an ṭan leh chiah a.
> Mipakhat pate lam hang nel nul, ei ṭha hmu lo ni awm tak, inmet fai lo zet
> mai hi an tawk a. Rozika chuan a hindi thiam ang ang hmanga han biak a tum
> a, chu pa chuan nui deuh ha chung hian, “Keimah Mizoṭawng tlem tlem thiam
> lawm,” a’n ti a. Thangliana chuan nui deuh chung hian, “A khawilama mi nge
> kan tawn fuh hi, Rozik, i ṭawngthiam chhun chhun ai chuan i thiamsa
> hmangkhan be zawk teh kan var zawk ang,” a han ti a. Rozika chuan, “He
> hmunah hian engtia rei nge i thawh tawh?” chu vaipa hnenah chuan a ti a,
> chu pa chuan ṭawng pai zet hian, “Kum thumm, rei tak ka ṭhian pahnih nen
> thawk tawh lawm,” a ti a, Rozika chuan, “Chutiang a nih chuan Mizoramah i
> awmna a rei tawh a ni maw, i ṭawng thiam mai theih danah i awm un ve tawh
> viau a niang a- eng nge maw han zawh lawk che kan duh a, i hun kan pawt hek
> tam lovang,” a han ti sak chuan chu vaipa chuan, “Ka pu eng lam nge mi zawh
> tum?” a ti nghal mai a, Thangliana chuan Rozika bengbul setah hian ‘a
> awlsam ka ring tlat’ a han ti a. Rozika chuan vaipa bulah chuan peh hel teh
> duah lo hian, “In pu hi khawilam khawchhuak nge i hre reng reng em?” a ti
> a, chu pa chuan, “Hre lo, mahse, mi mak tak a ni,” a ti a. Thangliana chuan
> a rilru te te chuan ‘A dawi at theih ngei dawn e,’ a lo ti leh a.
>
> Rozika chuan, “A sual viau e’m ni?” A han ti a, chu pa chuan, “Mi â maw le
> kan pu chu mi â, dawih lutuk zawhte dum pawh hlau mawle,” a ti a. Chutah
> Thangliana chuan, “Eng sakhua nge a biak in pu chuan, Hinduism nge Islam?”
> tiin a zawt a, chu pa bawk chuan, “Engmah keimah hre lo, biak ngah niang
> ṭhi pawh chi hrang hrang awrh ṭeuh lawm, a pindanah pawh Pathian chi tin
> rêng awm lawm,” a ti ta zel a. Thangliana chuan engemaw a duh khawp a hmu a
> ni ngei ang a khi sak a, Rozika hnenah chuan, “Kan vai ṭawngduh-a chu kal
> tir tawh teh, haw ila zanah kan contractor pa chu hmai chhanah i han be teh
> ang- police ho pawh hruai nghe nghe ila a ṭha ang,” a ti ta a.
>
> Khawpawn hnaih taka khualbuk lian lo takah chuan Thangliana leh Rozika chu
> a kawngka bulah an ding a, nakinah chuan inspector leh a hote pawh chu an
> rawn thleng chawp ve leh mai a. Thangliana chuan, “In tel lo chuan engmah
> kan ti thei lo a ni e, hmanhmawh in kawngka hi an kik phawt mai teh,” a lo
> ti nghal a. Chu khualbuk kawngka inspector in a han kik chuan ṭawnglettu
> khan kawng arawn hawng a, a mi rin loh tak mai a hmu a ni nei ang, a ka hau
> va engtia lo chhawn tur nge tih chu a ngaihtuah chang tawh lova. Inspector
> chuan rum zet hian, “Kawiah nge contractor pa kha a awm?” tiin a zawt a,
> chu pa chuan, “Pindan chhungah hian a awm e, eng thil nge ni ta?” a ti a.
> Thangliana chuan, “Hmuh kan duh e, a rem chan chuan rawn luh pawh kan duh
> ang,” a tih sak a. Chu pa chuan In chhung lamah chuan a hruailut a, pindan
> kilah hian vaipa chuan dawkhanah lehkha engemaw hi a lo pharh a, a lo buai
> hle mai hi a ni a. Chutia mikhual beiseih loh mi a hmu thut chu a phawk hle
> ni tur a ni a ṭawnglettu bulah chuan, “Khawilama mite nge?” tiin a zawt a,
> ani chuan thil zawmzia a han hrilh chuan, “Aw..ka hre leh e, he mite pahnih
> phei hi chu ka hmu tawh ngei a lawm,” a ti a.
>
> Chu khualbuk pindan chu an dah thim hle a, awn eng theih inkhai tam hle
> mahse pahnih khat bak chu an ti eng lova. Vaipa chuan a ṭawnglettu kal
> tlangin, “Eng nge in duh leh tak, puih theihna che u ka nei lo a ni law’m
> ni,” a han ti a, mahse Thangliana erawh chuan fiamthu lo zet hian, “Kan mi
> bo te kha i kutah hian an awm tlat a ni,” a ti chuan, chu vaipa chu a meng
> bial nasa hle mai a. A ṭawnglettu ka aṭang bawk chuan, “Chu min ring hlel
> tihna a ni maw! In duh duh sawi thei turin dikna in nei miah lo a ni,” a
> han ti a. Thangliana chuan, “A nih leh i kut a an awm theihna chhan chu kan
> sawi dawm e’m ni. In tlangval hmaih tak pakhat khan in chet vel dan zawng
> zawng chu kim chang takin roreltu hmaah a sawi thei ang chu, i duh phawt
> chuan a la dam ngei a ni tih finfiah nan kan be pawp reng thei a nia,” a
> tih sak chuan chu vaipa chu a ke a sai ngâr ngâr a, phung hmu ang mai hian
> a meng bial kawk kawk a. A dum ren run bawk si a, naupang ṭahbelh deuh han
> vo nan pawh a itawm hle a.
>
> Thangliana ka aṭanga chutiang a han hre ta mai chu a chi aiin a buairu
> nghal hle tih chu amah hmutu tan chuan hai rual a ni lo, a kuta a lehka ken
> chu a tla darh nuai a, ṭhuthlengah chuan a ṭhu hnawk a an ṭawng chuan
> pathian hming chi hrang hrang hi a ko va. Thangliana chuan, “Tunah chuan
> engkim a chiang ta a, nangmah i inpuang dawn nge keimah nin kan puan zawk
> dawn che,” a tih chuan a meng tal nasa hle a, Thangliana bawk chuan, “Heng
> thil thleng zawng zawng hi engdang vang a ni lo va. I rinna kawng dik loh
> vang a ni, engvanga puithuna at thlak hi tualthah nana hmang mai nge i
> nih?” tiin a zawt ta fak mai a. Chu vaipa chuan sazu dan chep ang mai a ni
> ta tih a hria a ni chek ang chu han phat mar leh chuanna tur a nei ta ngang
> lo a ni ang, “Ka piantirh aṭanga ka sakhaw vawn ka chian loh vang a ni!” a
> ti chhuak a, inspector chuan hriat belh chak tak hian, “Chu chu eng eng a
> awm zia?” tiin a lo zawt nghal a. Chu vaipa chuan tihian a chhang a, “Goa
> thingtlang khawpakhat aṭanga seilian ka ni a, chulai kan chenna khuaah
> chuan puithuna hi an la thutak êm êm mai, chu chu ka ṭhan len pui ta a ni.
> Ka thil tih a ka hlawh tlin theih nan Pathian chitin reng ka bia a,
> puithiamte rawn ang leh an serh ang zawng zawng chu tih loh a hlei pawh ka
> nei lo, chuvanga tun hun pawh hi thleng thei ka ni,” a tih lai chuan Rozika
> chuan, “Zel thim erawh a hnuk lut ta che a nih hi,” a lo tih khum a, chu
> vaipa bawk chuan, “Engkim inhre tawh bawk a, khang ṭhalaite kha ka thah tir
> ngei an ni e,” a tih lai chuan inspector chuan, “Vuak hma hmaa i inpuan tak
> siah chuan i pang chu a dam deuh dawn a nih kha,” tih pah chuan a kut ava
> hnungkhirh nghal thuai a, pawn lama police pahnih lo awmte chuan lirthei
> lamah an hruai lut a.
>
> Chumi hnu chuan inspector chuan la bangbo tih hriat tak hian, “Engtin nge
> khatiang dawt muhlum kha i phuh chhuah mai theih, kan tlangvala lah aka kan
> an tir zeng pawh ni hlei lo, kha i inpuan tir der mai a, engtin nge nangni
> ṭhian duh hian in chhui chhuah theih? Kan mibote pawh chu engtin nge ni zel
> dawn?” tiin sawifiah tur chuan a han ngen a, Thangliana chuan, “Keimahni
> pahnih zawk ngaihtuah tlem a leiah kan pengkawi vak mai zawk pawh a.
> Current lakna an siam chungchang leh Lei indawh khan kawng min hawn a ni.
> Ti pawh hian a sawi theih ang bawk ang chu, thlathum kal ta khan naupang
> ruk hmang chanchinbu lam chuan ‘Nawngsawhna’ an awm thu a ziak a. Chu chuan
> thil tam tak min ngaihtuah chhuah tir a, kha vaipa kan va hmuh khan kan
> ngaih dan chu kan nem nghet ta zel a, kan tlangvalpa in lirthei hnuhsawnna
> a sawi atang phei kha chuan engkim a chiang ta a ni.
>
> “Puithuna hi thil hlauhawm deuh mai a ni a, a hmangsualtu tan phei chuan a
> hlauhawm lehzual. Kha vaipa nghawnga ṭhi mak pui pui khan puithuna lamah
> ser leh sang a ngah hle tih a lang nghal a, khang ho puithuna pathian tute
> chuan serh leh sang hi an ngaipawimawh hle a, nimin piah maia an lei dawh
> kan hmuh aṭang khan thil kal hmang chu kan man thiam ta nghal a- khatiang
> puithuna la vung tute chuan thil lian tham an tih dawn reng reng chuan
> mihring nunna lak hi van neihnaah an ngaih avangin an lei dawh turah chuan
> mihring thah a lo ngai ta a ni. Chuvang chuan lirthei zawh tur lei emaw,
> rel zawh tur lei emaw an dawh hian mihring ruangin a zui ngei ngei ngaiin
> an hria a, tu emaw ruaiin khang rawlthar rualte kha an ru bo ta a ni.
> Chu’ng mihring mantute chu tlangkama kan hriat danin ‘Misili’ kan tih te
> ‘Nawngsawhnawh’ kan tih ṭhin naupang tihṭhaih nana kan hman ṭhinte hi an
> ni,” a’n tih chuan inspector chu a ka hau ringawt mai a, “Tlangval ṭhalai
> rual an ni a, engtin nge an in man tir mai theih le?” tiin a han zawt leh
> hram a, Rozika chuan tihian a lo chhang a, “Rinnain thla han zar phawt mai
> teh ang, khatia In aṭanga an chhuah hnu khan misual ‘Misili’ kan ti dawn
> nge, ‘Nawngsawhnawh’ kan ti zawk dawn, Lei-ah khan ruahmana felsa diamin mi
> an lo chang ta a, chutia lirthei rawn tlan an hmuh chuan kawng lakah an lo
> inbarh thut a, anni tlangval ho pawh chuan a lirthei chu a ti ding thut a-
> mi chil taah an inngaia an hlauthawng hle a, an chiai hle bawk awm e.
> Chutih lai chuan misual pakhat chuan an lirthei chhungah chuan mut hilh
> nghal theihna khawpa chak tur chu a kap lut a, insaseng hman lovin an
> lirthei chhungah chuan naupang awihmut hlim ang maiin an awm nghal mai a
> ni. Mahse an zinga pakhat chu a hnuah a van neih a siamin a rawn harh
> chhuak leh a, aṭhiante ho an tih dan chu hmu vekin bak lengin a lan chhe ta
> chiam a, a hlauh em avangin a ka pawh a ang thei lo a ni. Tichuan, an
> lirthei pawh chu a hnuhsawnna hmangin khawiah emaw an hnuk sawn ta nghal
> bawk a ni,” a ti a, inspector chuan, “A nih chuan kha zurui pa kha an hmu
> fuh lo tihna a nih ngei dawn chu,” a’n ti a, Thangliana chuan, “Kan mi bote
> chu an ruangtal chu hai chhuah leh chi a ni ang, kan puithu-a pawh chuan
> roreltu hmaah chuan lirthei an dahna chu a la sawi ve mahna chu mi hma chu
> azawn chi loh vang,” a ti a.


Good. Do you have any other stories? I'm interested in.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)