Luiral Ngaw pui_Ziaktu, Laltanpuia Chapter _2

[April Hmar Liverpool]

Luiral Ngawpui_ziaktu, Laltanpuia

Chapter_2



Chawhnu lamah chuan luiral ngaw lam pan tur chuan police te chuan chet an thawh ta a, a hmunhma an va thlen chuan lirthei chu kawngpui kiangah dahin ngaw chhung lam pan tur chuan an han inbuatsaih a, mi bo an awm zana ramchhuak zinga mi, mi bo kianga chetla hnaivai ber a an sawi ruatdika chuan hma hruaiin police te chu an ramchhuah zan a thil thlen dan chu kimchang takin a hrilh pah zel a.



"inspector, hei hi ramvak thinte innghahkhawmna hmun chhek tlang kan tih thin a chu a ni a, helaiah hian kan innghakkhawm mai thin. Zial te kan zu a, kuhva te ei in titi pahin remruatna leh ruahmanna te kan sawi ho ber thin, kan pan tur mual bik chungchang te kan sawi ho a, luiral ngaw hi a malkhaiah hi chuan hmun zau leh a rambawh chin pawh pharh tha tak mai hi a ni a, ramvahna hmun atana duhthusam a ram ngaw chhah tha leh ramsa te pawh an tamna ni a kan ngaih hmun a ni.



"Hmanah deuh chuan lo ram neihna atan pawh a vc lamin an hmatheh ve fo thin a ni a, nimahsela a awmna hmun hi karkawng te a hlat tham deuh avang hian tun hnai chhoah erawh lo ram atan neih a ni ngai ta lova, ramvahna atan kan hmang ta ber a ni.



"A ram a tha a, a hmunhma a tha a, a pum hian mual sarih inkar dan te te hian a tla zep a, chu mi tak chu lo ram neihna atan pawha hmun hma rem leh duhthusam anihna chu a ni. A ram chhung zauzawng hi lo hmun zauzawng tehdanin lo tin sangkhat hmun tia vel ni a ngaih a ni a. Sa te hi an chhuak tha duh a chuan hei hi, khami zana kan chhuah chhoh tanna a nih hi, he lai chin atang hi chuan duhna hmunah kan insem darh tawh mai a ni. kan kalna tur hmun theuh kan sawi a, a thenin kangchhek tlang lam kan pan a, a thenin rih mual lam kan pan a, a then chuan mualper zâu lam kan pan ani.



"Tichuan, mual hran te teah chuan kan duhna laiah theuh thutna kan siam ta ani. Kei leh mi bo hmasa Duhsaka te kha hmun khatah kan kal dun a, helai atang a mual hla ber mual per zâu lam kan pan a ni" tiin an mi hruai ramvak mi ruatdika chuan inspector ruata leh a nau te chu khami zana thil thlen dan zawng zawng chu chipchiar takin a hrilh pah zel a.



Luiral ngaw chu a zau hle mai a, chutia thawklehkhata hnuchhuina atana a hmunhma han thlithlai vel tur ringawt pawh chuan hun a duh dawn bakah an tum ram tak hi ke a thui tak kal ngai ala ni a. Khua atanga Luiral ngaw huamchhung chinah chiah chuan motor kawngpui chu a tawp a, a ngaw chhung ah erawh kawng pangngai tak a lut tawh lova, ke a kal ngai a ni tawh.



Inspector ruata chuan ruatdika hnenah chuan, "heti anih hi chuan khua in min thim hnan mai dawn a ang riau mai, i sawi danin nang leh mi bo ta te sachan na hmun mualper zâu awmna chu helai atanga mual hla ber i ti si a, helai atangin darkar engzat kal nge la ni ang? A han ti a.



Ruatdika chu a viak a tha in a lu a zo vah tih a chetzia atang reng pawh chuan a hriat a, chutihrual chuan thawm awm hlek thinah erawh a phawkin a chi ai hmel viau thin thung.



"Inspector, helai atang hian darkar chanve dawn kal chu a ngai maithei" Ruatdika chuan bottle a tui chu han thawkkhat pawp leh a kut a a hmui han hruk chu a rual a.



"Imm, a tha e, i kal zel rih ang" tiin inspector chuan a sana chu a han bih thuak a, chawhnu dar 2 a ri dawn. "Awle dika, i sawi dan hmangin thil a kal pangngai viau niin a lang a, kha tia in thian te an bo ani tih in han hriat hma kha chu, enge an bo chhan ni ta ang? Engtia bo nge? An bo dan tak kha engtin tak nge ni ang? Ngaihdan te i nei em?



Ruatdika thung chuan chutia zawhna eng eng emaw inspector in a han zawt leh khauh khauh thin chu nuam lo a tiin a chhan chak loh hmel thin viau mai a. An thiante bo dan mak danglam tak chungchang chu sawi nuam a ti hauh lo tih a awmdan atang chuan a hriat ani, a thiante chunga thil thleng chuan amah ngei pawh chu a nghawngin a tuar takzet ani tih a lang. phur lo deuh hian,



"sir, i sawi awmzia chu ka man chiah lo" tiin inspector thusawi chu ngaihven awm lo deuh hian a awm tlat ang lawi a, ngaw chhung lamah chuan a mit leh beng chu a len ruai reng thung. Engemaw palh thut theih thilah an thian mi bo ta te sulhnu thlithlaiin a mit leh beng chu a len ruai reng pawh a ni mahna.



Inspector chuan chiang zawk a thil hriat belh zel chu a duh dawn chauh zawk a, Mipui lam leh lallen council chu he thil thleng chungchangah hian beidawng viau tawh mahse thil engemaw hmuhchhuah tur a awm ngei chu ala beisei ru fan a ni. Fiah zet hian, "ruatdik, dika" a han ti leh a, chuveleh, ruatdika chuan, "sir, ngawi lawk, chu, thawm ang deuh ka hria" tiin ruatdika chuan a hmui chu a kutah chuan alo dah vat a, ruatdika kut chu a khur hlak hlak mai bawk.



Chutah, ruatdika chuan, "sir, ramsa te thawm niin ka hria, i kal zel ang, kan thleng ve mai ang. Nia, hetia thian ramchhuah pui te chin hriat loha tum hnih zet an han bo pil hmak mai hi mi hi a thawngin min ti hrilhhai ve takzet a ni. Rilru ah hian bo ve mai hlauh rukna te ka nei thei hialin ka hria" tiin a khup chu a kal zawng chuan a khur deuh hlak hlak ani tih chu inspector chuan alo hmu ran mai. Ni e, a awmdan rengah pawh ruatdika chuan chu lai ram chu a nel viau lo tawp ani tih a lang reng si a.



Chutia mualper zau lam pan a chet an lak mek zel lai chuan an mahni ngaihtuahna theuh chu kawm in mi bo te bo dan mak tak mai chu an chhui dawn rauh rauh hlawm a, nakin deuhah chuan ruatdika bawk chuan, "i kal zel ang, kan thleng tep e" a han ti leh a, inspector chuan, "dika, mi bo ta te hi zu in hmang emaw buaina siam hmang emaw an ni ngai em? Alo ti leh thung a.



Ruatdika chu a han nui deuh hak a, chutah, "i ti duh sir, zu an in thu hi chu mi zawng zawng hriat ani alawm. Ruih buai lah an hrat in an ruih tawh kha chuan an buaithlak riau zel, Mahse rilru chhia pu chu an ni hauh lovang, engemaw changa zu han ruih sual leh zauh kha an ching ve a, a mak ka tih em em chu karkhat dana hetia mi pahnih, he lai rama an han bopil mai hi a ni, tun thleng hian ka awih thei lo. Ni e" ruatdika chuan an kalna chinah zel chuan hnuhma tharlam a awm leh awm loh chu a han thlithlai pah vat vat thin a.



Ruatdika chuan a chang chuan kawngthlang lam te chu a han thlek leh vang vang a, a changin kawng chhak lam te chu a han thlek leh vang vang thin bawk, engemaw ngaihtuah ngun tak nei ni awm tak chuan ding meuhin an kal tawhna lam chu a han thlir let leh vang vang thin bawk a. A awmdanah chuan khami zana an thianpa bo ta te nena an sulhnu leh hun kal tawh te kha a chhui let a ni ngei ang. Inspector chuan kawng zau deuh lai an thlen chuan thawk han lak hawk pah chuan, "imm, dika, ti teh u, he laiah hian i han tawi khawmuang rih teh ang u, chawlh te pawh a tha e, tui te i han in ila, hei ril te pawh a tam dawn dawn mai, kan ti nek nek ang a, kan tum ram chu kan la thleng em em ang" tiin chawlh chu a han rawt a.



Ruatdika pawh chuan ram vak thang lo police te chu hrethiam in, "ni e, sir in fit that hi a tul reng ani ram vak tur hi chuan" alo ti ve vat bawk a. An chawlhna ah chuan inspector ruata chuan a rilru a thil awm leh a ngaihtuahna tam tak kara zawhna awm te chu a han thet leh ta nge nge a, ruatdika hnenah bawk chuan, "anih leh dika, ka thusawi tur hi ngaihloh lamah emaw lunglohah te la lo la, tin, nuam lo tih phah nan a hman pawh a ngai chuang lo, in thiante hi nangmah bik pawh, i thian kawm te hi eng ang mi nge ni a, in khua thingtlang angah hi chuan hetia han ramvah te hi zan lam hun in tlingtlak dan thenkhat chu a ni mai ang a, heti hian in ramvah pui te nen, han in kawm khawm deuh ber in ni mai tihna nge? Nge ni a thian kawm dang te hi i nei em? a han ti leh a.



Chutah, ruatdika pawh chuan inspector zawhna chu hmel zangkhai tak pu chung chuan a han chhang ve ta a. "Aa, sir, keini lam hi chu ti hian ni e, i sawi ang deuhin zan lam hi chu ramvah nan hian kan hmang deuh ber mai, thingtlang ang ah hi chuan ramvah te hi kan la ûar a, ti hian ram kan vah hi chuan engemaw changin rual u deuh, kum upa lam te hian min ho a, a chang hi chuan pa valai rualin tlangval thenkhat nen kan vak thin a, chu chu thingtlang a kan ramvah dan chu a ni deuh ber mai. Ni e i ring sual lo, ka ramvah pui te bawk hi ka thian kawm te chu an ni deuh ber e, pa la nih ve hma hauh hian chhangchhe pa an chang te pawh ka ngah ve mai" nui var var chung chuan alo ti ve ta a.



Inspector chuan a mobile phone chu a han lek kang vat a.



"Aaa, hei signal pawh ka rin aiin a awm tha, hemi chinah hi chuan phone pawh a hman theihin ka ring lo asin" a han ti a. Chutah, inspector bawk chuan chhunzawm in, "dika, thingtlang nun hi kei chu a nawm hmel ka ti a, tunah pawh kan hre vek ang a, hei in thianpa han bo ta te pahnih chungchangah pawh khawtlangin awm ni khamin ti hian zawn hna te in han thawk a, in fakawm ka ti ngawt asin, thian kawm te hi a nuam bik, engkim hi a thlum a al ei za inla ti a" a han ti leh a.



Ruatdika chuan hmel zangkhai tak pu chung chuan, "ni e sir, i sawi chu a dik chiah. keini thian za pawh hian hei ramvah hi kan sim hleithei meuh lo zawng anih hi" alo ti ve vat bawk a.



inspector ruata chuan ruatdika inhiat deuh seuh seuh reng chu a en duh angreng viau mai. "ni e dika, nangni lam, thingtlang nunzia hi chu a nuam thin ang. Thian in inpawh tlangin engkimah thu khat hla khat vua in thil in ti khawm thei a nga, in nun hi a awhawm ngawt asin"



ruatdika chuan a biang leh a kut chu a hiat sauh sauh reng a, chutah, "pu te u, zial ka zu mai dawn, vai hmi te hi an ninawm thei lutuk a, hei hi thingtlang nawm lohna chu, a bak chu a nuam ve reng mai" tiin meizial han lakkai pah chuan a nui var var a. Tunah chuan ruatdika pawh a hmel hmuh a nuamin a hmel te chu a eng ve sar tawh mai.



"Ni e sir, keini thian za ka sawi tak te kha khami zan, duhsaka bo zan leh a hnu leh duhsanga bo leh tak zan a ramchhuak te kha kan ni a, nia, han sawi han sawi takah chuan a khawharthlak dawn khawp mai, an ni duhsaka leh Duhsanga te han awm ve ta lo tur chu" tiin ruatdika hmel chu a ngui leh nghal chu ani mai a. Chuveleh, constable hruaia chuan "ti ru, sir, chet ila leh tawh teh ang u. Hei, a tlai zel mai si a, muangchan lutuk pawh a tha ber em ni? alo ti ta thuai a.



Chutah, inspector pawh chuan, "ni e, i kal leh tawh ang u. He lai atang hian a la hla a ngem dika? A han tih chhunzawm ve a, ruatdika pawh chuan a hmai leh a kut chu la hiat hraih hraih pah chuan, "sir, hla tawh lo, saw, saw lai mai saw ani tawh e, kan thleng chu a ni mai, minute tam hun kan seng tawh lovang" tiin a tho vut a, bottle a tui bawk chu a han lem leh pawp pawp a, meizial chu pak khu luih luihin a lu chu thak tih hmel zet hian a han tuai leh nawk nawk thin bawk.



inspector chuan thawklehkhatah a kut chu a han phar ve thut mai a! Chutah zawi sap hian, "chu, ngawi lawk ru" tiin a beng chu kawng chhak a ngaw lamah chuan a chhi ngun dauh dauh kher mai. Chuveleh, constable hruaia pawh chuan a note bu chu a la chhuak vat a, "sir, thil pawimawh tak mai hriatchhuah ka nei, ka han chhinchhiah a nge" tiin note bu ah chuan engemaw chu a han ziak malh malh a. chutah, inspector chuan a rumol chu han la chhuakin, "imm, thawm satliah mai mai a ni a nge, ramsa thawm a ni ngei ang, kal ru, i kal zel ang, hei dar 5 a hnai mai dawn, ngaw a chhah tha si a, kan thlen tlai lutuk chuan khawhmuh a buai zo palh a nge" tiin hmalam pan chuan chet an thawh leh ta a.



Nakin deuhah chuan an hma a phul zawl, rai deuh duai awmna lam chu kawkin ruatdika chuan, "sir, kan thleng ta e, hei hi a ni tawh e, he lai kan thlen hian zan dar 10 a ni tawh. duhsaka khan a lu ah headband hrengin khimi chhak deuha fah leh thil ding kawp ah khian thutna a siam a, keiin thlang deuhah khuan thutna tur kha ka ngaihtuah ta a ni.



"A ni duhsaka kha ram chin hrelo a ni lo nachungin a ramvah lohna chin a rei ve deuh tawh a, kei khan khi lai khi ka kawhhmuh a, tichuan Keiin saw mi ruam awih lam saw panin thutna tur ka zawng ve thung a ni" tiin chipchiar tak chuan a han hrilhfiah leh zung zung a.



Ramvak thang tih takah ruatdika chu a thusawi ah a inringtawkin thil a hriatsual loh hmel viau a. "Tichuan sir, khami zan ang mai kha niin ka hria, ka la mitthla vek thei" tiin a hmel chu a zangkhai phian tak na a a chhungril a hlauhna leh manganna hmuh thelh theih hauh loh tur chu ruatdika hmelah chuan hmuh tur a awm tel bawk. "kei chuan a thutna tur chu ka kawhhmuh a, kei chuan ka thutna tur chu pan veleh in kan inthen hrang nghal a, han tawi khawmuang vak hman kan ni tawh lo tih kan hria a, hun pawh kan duhâm lem lo, kan hmun tur lam chu kan pan nghal ve ve a ni.



"Tichuan, kan duhtawka rei sa changa hun kan hman hnuah thawm ri va leh sa hnuhma engmah kan hriat tak silohah chuan zing lam dar 2 ah chuan haw zai rel a tha in ka hria a, duhsaka chu ka sawm chho a, ka kuk a, engmah min chhawn lo, ka kuk leh a, chhawnna ka la dawng chuang lo. E, tak a chuan ka sawi hmaih, khami zan khan duhsaka khan phone a keng lo a, phone keng kha kan awm lo. Kan vaiin mi panga kan ni a, tichuan ka kohna a chhan theih tak mai silohah chuan tiin a tlai tawh viau nen, he lai kan awmna hmunah hian ka lo nghak ta ani.



"dar engzat maw? inspector chuan alo ti a. "sir, dar hnih vel chu a ni ngei tawh ang, sana kha ka lo bun lo lehzel si a" chutah, mak tih hmel zet hian inspector chuan constable hruaia chu a han en a, hruaia chuan a pu mak ti hmel chu a hmu lo hlauh.



Constable hruaia chuan a note bu ah chuan alo chhinchhiah ve zel a. Inspector mak ti hmel alo hmuh chuan ruatdika chuan, "ka sawi sual loh chuan dar hnih bawr chu a ni ngei ang" Inspector ruata chuan ruatdika chu alo chik thin hle mai a. Ruatdika bawk chuan chhunzawm leh nghalin, "tichuan, hun engemaw ti chen chu ka lo nghak ta ngawt mai a, mahse duhsaka hmel reng reng hmuh tur a awm tak silohah chuan ka ngaih tha lo chuan ka han au ta nghek nghek ringawt mai a, ka ko chhuak zo ta lo a ni.



"Mangangin chhek tlang, kan innghahkhawmna hmun kha ka pan nghal thuai a, tichuan kan thian te nen chuan kan han au leh a, kan kuk bawk a, 'a ni hi alo haw tawh a ni ngei ang, phone a keng silo a' ti in haw chu kan tum ve ta a, mahse engmah inhrilh lo a chutia alo haw ngawt chu kan ring silo a"



"Anih leh dika, chutia in thianpa ngaiven a hun in han hman takah chuan, chumi hun chhung chu engtia rei nge ni ang?



"Sir, Sana ka keng lo a, phone ka keng hek lo, ka thian te lahin phone kha an keng em ka hrechiang ta lo. Tumah in khami zan khan phone kan keng lo a ni.



"Kan buai hman thelh nghe nghe a, mahse a lo haw tawh anih ringin kan haw ve ta a ni. Khatia hun kan hman chhung kha darkar khat lai chu a ni"



"Chu chu i chiang a maw? Sana i keng silo a, darkar khat lai chu hun in hmang a nga maw? Rilru fim takin ngaihtuah let leh teh dika. Darkar hnih vel lai pawh alo ni mai thei asin" inspector chuan alo ti a. Chutah ruatdika chuan bahlah miah lo hian, "sir, ka chiang, darkar khat vel chu a ni ngei ang. He lai, tuna kan awmna ah hian minute sawmhnih dawn chu hun ka hmang a, chumi hnuah kan thian dang te nen a kan hun hman zawng zawng nen darkar khat vel a ni ang"



"Awle a tha e, tichuan in hawsan ta mai tihna em ni? Amah ber alo haw in han rin takah chuan"



"aw sir, kan haw zui ve ta ani"
"Anih chuan dar engzatah nge In in thlen? Chuan ke in in kal nge ni a lirtheia kal in nih?



"Aaa, sir" ruatdika chuan a hmai chu a han huih pawk a, "nia sir, khami zan khan ke in kan kal ngei alawm, aa, sir, kei hi ka chau deuh a ni ngei ang. Ka rilru hi a chiang lo leh thin" tiin ruatdika chuan thawk a han la halh halh a. "Imm, a dik maithei, i chau anih kha, i hmelah pawh a hriat reng alawm" hruaia chuan alo ti ve thuai a.



"sir, In kan thlen kha chuan" ngun zet hian a han ngaihtuah let leh vang vang a, chutah "aw, In kan thlen kha chuan khua a var vek tawh, dar ruk ni ta in ka hria, nia sana kha ka en ve ngei tak kha" ruatdika chu a nui deuh tha nghe nghe a, chutah chhunzawm in, "aw, In kan han thlen meuh kha chuan dar ruk a ri fel tawh a ni"



"Anih leh dika, in haw kawng lakah chuan han pen kawina emaw han thutmuan emaw te in nei em? "Neilo sir" rang fe chuan ruatdika chuan alo ti leh thuai a. "Awle, a tha e, tichuan in thianpa chu in ngaihven zui zel nge in ngaihven zui lem lo"
"aa, sir, khatia In kan han thleng kha kan thian a chu In a thlen tawh leh tawh loh kha kan han ngaihven nghal mai lem lo a, nakin deuhah chuan an chhungte lam zawk atangin kei pawh chuan duhsaka In ala thlen ve loh thu te ka lo hre ve chauh zawk ani, tichuan keini ramvak ho chu kan han in hrilh darh leh a, tichuan kan Vcp-in alo hriat chuan a rang lamin ngaihven turin pa ho thenkhat leh tlawmngai tlangval ho nen chet kan thawh leh ta ani.



"a ni hi alo tamchhawl reng te hi ani lo maw' kan ti a ni. Mahse, thil awmdan chu kan han hrilhfiah zel a, mak kan ti tlang ta hle mai a, chutia chanchin engmah kan han hriat zui tak lohah chuan a tuk leh ah chuan khawtlanga zawn hna chu kan buatsaih ta a ni"



"Awle a tha e, hruaia, ilo chhinchhiah zel em? tiin hruaia hnenah chuan thil pawimawh, ruatdika'n dar zat a sawi te chu a chhinchhiah leh chhinchhiah loh a han zawt a.



Chutah, hruaia pawh chuan, "sir, ka chhinchhiah zel e" alo ti thuai a. "Awle tunah rih chuan hei khua a thim tan a ni mai a, in thianpa thutna hmunhma vel chu i han thlithlai vat teh ang u" tiin bo ta duhsaka sa channa lam pan chuan chet an la leh ta a.



Inspector ruata chuan uluk tak leh chik zeta duhsaka hnuhma ni awm leh a sulhnu te chu en kualin engmah hnuchhuina atana han puibawm thei tur thil hmuh erawh a nei hauh lo. Constable hruaia pawh chuan a note bu a thil chhinchhiah tur chu engmah hmuh leh hriat tur a awm hek lo.



Uluk leh ngunthlûk zawk chuan inspector chuan chulai hmunhma vel chu a han thlithlai kual zel tho a, chutah ruatdika hnenah bawk chuan, "dika, khu lai atang bawk khuan i tan tha leh teh ang. Lokal teh, i ti tha leh lawk ang" tiin an chawlhna lam pan chuan chet an la leh nghal thuai a.



"Awle dika, tikhan khami zana in awmdan zawng zawng te kha ngun takin han ngaihtuah let leh teh le, tichuan kei hi i thianpa duhsaka ang ah khan min ngai la aw, le tan rawh le" ruatdika chu inspector thil tihdan vel chuan a ti hrilhhaiin mak a tih hmel viau mai.



Chutah, ruatdika pawh chuan inspector thusawi ang chuan, "awle sir, nang tah khian, khimi lai thing ding lian deuh, fah leh thil ding thiang kungah khian thuthmun ilo siam ang a, keiin saw lam ruamah sawn thutna tur ka va en a nge" tiin khami zan a atih dan ang chuan a han hrilh a. Chutah, inspector chuan, "dika, tichuan i thianpa chu a chho nghal i ti a tiraw? tiin ruatdika chu a han zawt a, ruatdika pawh chuan, "aw sir, tikhan chho nghal rawh" ruatdika chu an thil han tih dan vel chuan a ngeng a chhun phak lem lo niin a lang.



"Sir, aw i chho ang a, tichuan kei pawh ka hmun tur lam panin ka kal nghal aw, a bak engmah ka hre zui tawh bik hauh lo" a han ti chang deuh ta charh nghe nghe a, chuveleh inspector chuan chhak lama duhsaka sa channa lam pan chuan chet a thawh nghal thuai a. Chutah, uluk tak leh ngunthluk fe a ngaihtuah vang vang chung chuan inspector chuan meizial hi a han tan a, Chuveleh thlang lama ruatdika chuan, "nilo e sir, meizial zu suh, meizial zuk chi ani lo sa chan naah, meizial zuk chi a nilo" a rawn ti a, Chuveleh inspector chuan, "nilove dika, in thianpa hian meizial a zu tlat si a ni" tiin hnahthel a haina hnuaia meizial bung lo let ngat chu lekkang in a han thlek vang vang a.



"Silk cut a ni, khami zan khan in thian pa hian silk cut a zu em? Ila hre thei a ngem? Ruatdika chuan "aa, ka lo hrechiang tawh tlat lo mai a" alo ti a.



"imm, a tha e, midang, he lai hmunah hian mi tam tak duhsaka zawnga vakvel te chu an awm tawh dawn a, midang zuk bung erawh a ni thei, mahse hei en teh hruaia, kuhva chinai awmna pawh a awm, hei kuhva kawr sarang pawh a awm" Chutah, hruaia chuan a pu phur hmel tak mai chu zah ru tak chung chuan, "ni e sir, midang ho pawh chu an ni thei tawh tlat mai, he laiah hian"



"immm, a dik" tiin inspector chuan meizial bung dang let ram chu hnahthel karah chuan a haichhuak leh ta tlat mai. "Hei chu mizo zial a ni. Aw, heta pawh hi a dang, e hei, kuhva kawr pawh a let ram mai" tiin piah deuhah chuan eng eng emaw eina kawr chu an va hmu ta zel mai a.



Thawk te chu han la in a han ding chhuak a, chutah, "imm, a tha e, dika, he laiah ringawt pawh hian mi tam tak an in sulpel nuk tawh dawn a, he thil, meizial zuk bung ringawt hi chu thil chhinchhiah tlak tak a ni hauh lo mai" tiin inspector meuh pawh chu a hrilhhai hmel ve ta hle mai a. "A pawi ngawt mai, a hlim chhawn khan keimahni ngei hi he laiah hnuhma thlithlai tura kal lo ni ila ka ti ngawt mai" a han ti hram a, a lu chu a dawm vang vang mai.



"Sir, keini lam pawhin kan chik ngun in kan chhui uluk ve viau asin" ruatdika chuan alo ti ve vat bawk a, "Awle dika, a hnu chhui hmasa tute in ni ngei ang a, nang phei chu engkim hretu ber i ni dawn a, in va chhui let leh in heng thil hi in hmu em? Entir nan, engemaw thil te tham te pawh, kuhva chhakna hnu emaw, thingkungah hian engemaw chem a sahna hnuhma ni awm a han ngaih theih tur emaw ang chi te" inspector chuan a han ti leh hram a,



Chutah, ruatdika chuan an thil chhui lai mek chu a ning ta deuh ani ngei ang, "sir, a tirin kan sawi vek tawh kha, engmah hnuhma emaw han ngaihbel tur emaw, han zeldin tur emaw engmah kan hmu in kan hrechhuak zo lo a ni. khawmu chawi bo anih kan ring ringawt" tiin khaw mite leh amah ngei pawhin a ngaihdan chu a han hrilhfiah leh a.



"Sir, a pawi ka ti, kei hi chuan engemaw tal hre tur hi ka ni asin mawle, ka thianpa ngawih ngawih kha engtin nge a chin ka lo hriat loh ni, ka thianpa tak tak a ni asin, a ni duhsaka phei kha chu kan inkawm nasa hle a, a pawi ka ti takzet a ni. A chin chu engemaw tal hre tur ka ni asin, a pawi e mai thianpa, mahse engmah ka hre bik silo"



"Nilo ve dika, lungngai mai lo la, engpawhnise tih theih hi engemaw tal chu ala awm ang maw le" a han ti bawk tak na a a hmel leh landanah erawh inspector ngei pawh chu a beidawn hmel ve tawh viau niin a lang.



"Ni e, in khawtlang meuh pawh in beidawng tawh a ni a, a pawi tak tak a ni. Awle, ka phone kan hmang lawk a nge" tiin In lam a a nau te zinga mi rinpuia chu a han be pawp thei ta hlauh mai a, signal erawh a chhe ngang mai.



"Hello sir, enge chanchin? Hei khua te a thim tawh si a, engtia hma han lak zel chi nge ni ang" rinpuia chuan alo ti nghal vat a. Inspector chuan, "rina, tihtur ka sawi kha ilo ti em? "Aw sir, ka ti mek e, hei mi hrang hrang te chu kan lo kawm kual vel mek zel e, chhinchhiah tur awm ang ang te pawh kan chhinchhiah zel e, hei thian za, khami zan a ramchhuak te pawh kha kan han kawm chiang hlawm a"



"awle rina, chik tak leh uluk takin i tih tur kha lo ti phawt mai la, kei ni lam chu min lo ngaihtuah lo ula, kan theih anga rangin kan rawn tleh haw thuai ang. Thil fello awma kan hriat ang ang te kan zir ho leh dawn nia"



"Awle sir" an inbiakna chu an titawp ta a. "Dika, in thian zingah hian zu in an awm em? Inspector chuan a han ti ta daih mai a. Ruatdika chuan mak ti hmel a pu lek lek. "Sir, chu chu engatinge nge? Alo ti ha mai. Chutah ruatdika vek chuan la duhtawk mai lovin, "sir, engkim kha ka sawi zawng zawng kha i ringhlel anih chuan khaw mipui te pawh i duh duh i zawt thei alawm, an ni pawhin ka sawi ang tho khan an sawi ang" tiin ruatdika lah pek chuan a ngaih chu alo ti thalo ve viau ringawt a.



Chutah inspector chuan, "Ni love dika, chu lam a nilo, ka sawi duh tak zawk chu thil mawi lo nilo se tumahin hre kher lo se, zan in chu kan thil chhui hi a beidawn thlakin a hrilhhai thlak em mai a han lem ve zauh mai mai ka duh a nia, chumi mi han ngaihtuahsak tur chu ka duh deuh alawm maw le, mut ti tuiah" tiin inspector ruata chuan hnuai lam chu a bih lek lek a. Ruatdika pawh chuan inspector ruata rilru tur chu lo hrethiam in, "aa, sir jery-a kalo ngaihtuah tir dawn em ni?" alo ti ve ta bawk a.



Chutah le, chutia an hnuchhuina atana tangkai thei tur engmah hmuh leh hriat belh tur an va hmuh zawh tak silohah chuan inspector ruata chuan a nau hruaia hnenah chuan a hmunhma te chu thla la tur chuan a han ti leh a, hruaia pawh chuan i he lovin inspector hrilh ang chuan chulai hmunhma te chu thla te a han la kual ta a, Chutah inspector pawh chuan In lam pan chu a rawt ta a.



Haw kawngah chuan kawng tluan deuh thaw tih theih tur ani. Ruatdika titi chu an ngaithla haw a ni deuh ber a. Ruatdika lah pek chuan an thian za chungchang te, an thian te zinga che maksak thei deuh, Jery-a chungchang te chu sawi tur berah a nei chho a, chutah midang chungchang te pawh chu a sawi kai zel a, an thian te mize maksak tak tak te chungchang chu sawi nuam a ti em lah tak a, a hmel chu a hlimin hmuh pawh a nuam tawh viau ani.



Chutihrual chuan inspector ruata leh hruaia te erawh an ngaihtuahna a kulmukin ruatdika titi pawh chu an bengkhawn lovin an ngaihtuah chhunzawm meuh lo niin a lang. Ruatdika erawh chhum lo chat lovin a ri char char thung a, a tawng duhin titi tur a hria a, heng police nelawm tak tak te bulah hian a khat liam ve takzet pawh a ni mahna le.