Luiral Ngaw pui_ziaktu, Laltanpuia Chapter-3

[April Hmar Liverpool]

LUIRAL NGAWPUI_zialtu, Laltanpuia

Chapter _3



Inspector Remruata chuan lallen khua ah chuan ni hnih chama boruak thlithlai reng a duh tak avangin an hotu te hnena phalna la in lallen khua chu a naute pathum nen an uap rih dawn ta a, chu thil chu inspector duhdan leh a ruahmanna pawh a ni.



Lallen khua chu a hmunah ngei awm chilh a thil thleng thar a awm leh awm loh chu han bengkhawn a duh rih a ni. An nau zinga thenkhat chu station lam pan in chumi zan chuan an tleh chhuak ve leh ta thung a.



Inspector chuan ruatdika hnenah chuan, "dika, in tur chu tlem te tal ka mamawh a nia aw, i thian Jery-a emaw tu emaw tal chu min ngaihtuah pui turin ka ring a nia" a han ti a. Ruatdika pawh chuan "awle sir, hei ka phone number hi la la, ka lo phone dawn che nia, a ruk deuha tih i duh si a" alo ti ve bawk a.



An va thangna chanchin leh hun an va hman dan te chu Vcp nunthara pawh chuan alo zawt ve luam a. Tin, Inspector leh a nau te hi he lai, lallen khua a hun an hman chhung hi chu Vcp te chhungkaw kiangah mikhual ang in an awm ve rih mai dawn a ni.



Inspector ruata pawh chuan an thangna chanchin te chu a han hrilh ve luam a, thil danglam an va tawn tehchiam loh thu te, mahsela beiseina erawh ala neih thu te leh a khat tawka chulai hmun chu tlawh a duh thu te chu a han hrilh ve bawk a, chutihrual chuan ni hnih an cham hnu a thil thleng thar hriat tur a awm lo zui zel anih erawh chuan an hmun lam pan a chet lak a an hmun lam atanga a tul dana he lam chu ngaihven tawh mai tur a ruahmanna a siam thu te chu a han hrilh bawk a.



inspector ruata hi thil chik mi leh ngaihtuahna seng mi a ni a, Vcp nunthara te chhungkua fin a an han cham lailawk ve takah pawh chuan mikhual lutuk ang a awm chu a duh hauh lo.



Vcp te chhungkaw inrêlbawlna dan leh an chhungkaw khawsak phung te chu hriat ve a mi chhungkaw khawsak phung hre lo lutuk a awm mawl tawp a tum bik hauh lo, chhungkaw member tin te chu a besawmin intihtlang nel chu a tum ve hle mai a.



Zanriah te chu kilin Vcp nunthara te chhungkua chuan an mikhual te tan liau liau chuan sa te chu lo hmeh puiin titi hona nen boruak pawh a fuh chho viau zel. Chutihrual a mi bo ta te chanchin han sawi a awm leh zauh changa boruak rit thar leh deuh thin tih mai loh chu inspector leh a nau te pawh chuan nuam an tiin Vcp nunthara te chhungkua chu ngainatawm an ti ve hle mai a, a changa fiamthu te han thawhin zanriah an killai pawh chu boruak tha tak nen an tlingtla ve a ni.



Thutkhawmna pindan lamah chuan thu in kuhva te chu an han ei ve a, thingtlang nun chu a danglamin a nuam an ti ani tih a lang reng. Chanchinthar thlir pah chuan inspector chuan a nau rinpuia hnenah chuan "rina, note bu a thil chhinchhiah tak te kha khaw maw, lo la teh, ka lo bih nawn leh lawk a nge" tiin a phone lo ri rat rat chu a han en pah bawk a, Chutah ruatdika a hrechhuak zawk mai. "E khai a, kei hi, zanin hian chhuah lawk ka tum tak asin" tiin a phone chu a han la a, a chhung te lam atanga phone call lo kal alo ni.



Vcp nunthara chu vc thilah chhuah lawk a ngaih avangin chumi zan chuan In lamah a mikhual te nen chuan hun pawh chu hmang thei lo a ni a, chutihrual chuan nu ber hoin naupang ho nen tv chu thlirin inspector erawh note bu a thil chhinchhiah tak te chhui letin a tul rih viau thung.



Inspector ruata chuan ngunthluk taka thil ngaihtuahin lehkha chu a han bih leh ngat ngat thin a, chutah a mit chhing vang vang in a ngaihtuahna a vak thui takzet a ni tih a hriat reng mai. Thutkhawmna lama a nau te leh chhungkaw member te tv thlir a hun hmang mek lam chu a khat tawk chuan a va thlek leh dauh dauh thin bawk, enge chu chuan awmzia a neih tih erawh amah inspector ruata chauh lo chuan tuman an hre hauh lovang le.



Note bu chu a duhtawk a ching let a a ngaihtuahna nen a han chhuidawn leh hnu chuan a lu chu a bu nghat nghat reng a, Chutah a mit chu kham tih hriat zet hian a han chhing leh vang vang a, muangchang a thutthleng seia thu awn riai riaiin a lu chu a hai leh chiai chiai thin. Chutah, harhchhuak thut ni awm fahran a han thu ngil deuh zawt chung chuan note bu bawk chu a han bih nawn leh a, Chutah a hmelah chuan lungngaihna leh pawi ti hmel hi a langchhuak thei hial mai.



Chutah, thutkhawmna lama nu ber ho a tv lo thlir thap tute lam bawk chu a han thlek leh a, naupang te chuan ngun zet hian tv chu an lo thlir a an ngawi thiap reng mai. A nau te ngei pawh chuan tv chu an thlir ve thap reng a, Chutah inspector chuan dam dap hian a aw chu a han thian ta kharh kharh a, chuveleh nu ber chuan a mikhual te tih tlangnel tum tih hriat tak hian titi tlanglawn te te chu a han thet tan ta a.



Inspector pawh chu a thil tih laiah bawk chuan rilru sawmkhawm lehin a ngaihtuahna chuan note bu bawk chu a luhkhung leh ta nget nget mai. Chutah, a duhtawka a ngaihtuahna leh note bu a thil chhinchhiahte a han lingleh kual leh hnu chuan ruatdika thianpa jery-a nena zu in tur chuan chhuah chu a tum ta a.



Thutkhawmna lama nu ber titi lai chu a thut hmun atanga thochhuak pah a titi lai han pawt chat in "pi zel,pa ber chu thil tulah a chhuak ta a ni maw?" A titi lai lo pawtchat tu inspector awmna lam chu hawi thuai in zeli chuan "aw, kha a chhuak leh ta anih kha, 'vc thil a ni e' kha a ti a, aa, hei tunlai boruak heti hi kan han ni chho ta rum rum nen hian a indaih lo thin khawp mai" tiin inspector, an mahni lam pan mek tu chu a thlek ha mai.



Chutah, a kuhva eina a kam han tuai thuak pah chuan "e, kha, nang a pawh chu chhuahvah na tur nei ni awm ziazang a" tiin mak tih hmel tak chuan a mit chu a tun deuh hra a, Chutah aw zangkhai lam hian inspector chuan "a, ni e pi zel, hei zanin chu kei pawh ka chhuak lawk tang e, rina leh joela te khan ti khan In lamah lo awmpui che u sela ka rei lovang, pa ber lah chu kawm tur a awm ta silo a, khawnge kei pawh ka han petek chhuak ve mai mai a nge, titi tlanglawn fahrah te te hriat pawh a hlu e" tiin kawngkhar awmna lam chu a pan ta thuai a.



Ruatdika chuan eng eng emaw sawi suam suam chung chuan kuhva chu a thial pah chak chak reng a, an awm mekna chu ruatdika te In, ruatdika room niin amah leh a thianpa Jerrya, inspector nen an pathum a inkawm tlang tur chu an ni a.



Jery-a chu hmel tung lam leh sam sei lek lek, khabe hmul buk lutuk lo a zuah, a mitkhur chu a puk kek kawk viau mai bawk. A pumrua en pawha pa te chhe lo leh ruatdika ang bawka lu zo veh vawh tak tur hi a ni a, ruatdika ang lo takin a tawng tam em em hran lo thung.



Chutihrual chuan tawng duh lo chu a ni hauh lova, a tawngkam a felfaiin a hriatna chu a that hmel kher mai, a thusawi tura mi fimkhur mi tak, nuih erawh duh ve pangngai tak hi a ni a, mi inchengvawng tak ani tih chu hmuh hmaih theih hauh loh tur Ani bawk.



Ruatdika chuan phone khawih malh malh pah chuan "zu ringawt hi chu a ho tlat, ganja zuk tur hi awm se a nia ka tih ni" Chumi rual chiah chuan "ka fiamthu mai mai aw sir, jery, hei sir hi a bul a awm a nuam in kawm a nuam teh mai a nia, police ka hriat tawhah chuan mi hriatthiamna a ngahin mi cool ber ala ni hial ang.



"Hetiang ang mi hi chu an bula awm hi a hahdamthlak ngawih ngawih bik mai a nia" a han ti a, a awmdanah chuan engemaw ruih alo nei tawh tih chu a hriat reng mai. Chutah, meizial chu han tan in "sir, kha aw, local hi chu a hrisel bik a nia, nu vuli ta ani a, a ni ta hi chu a ngaihthat thlak bik teh mai a nia, ram riak a hna kan thawh hah deuh chang hi chuan nu vuli ta ngat lo hi chu kan tih thin anih hi"



Zu chu an han lem khalh khalh hlawm a, zu chuan hna pawh a thawk tha tan viau niin a lang. Inspector erawh chuan "dika, Jerry, kei zawng ka duh tam lo ve, no hnih khat kha ka duhtawk mai a nia, taksa sil han tihreh nan mai mai, a bak ka duh lo aw,



"he laiah ni hnih khat vel han tumtawi leh a abak chu kan hmun lamah in suan chhuah leh zui mai hisap a hetia cham rih tum hi ka nia"



Inspector chuan zawhna eng eng emaw chu zawtin a khat tawk chuan titi dang nen ruatdika te thian dun chu a chhawnchhaih pah zel a, a khat tawk a ruatdika te thian dun in an kut leh hmai an hiat leh seuh seuh thin erawh inspector chuan hahthlak alo tihpui ru thin kher mai.



An thian ho chanchin an sawi tui lai tak chuan inspector chuan,



"Chu, an ni pahnih chu inkawm hrang deuh bik an ni tihna nge?" zuai zet hian ruatdika chuan "sir, kawm kha an har ve thin khawp a, mahse rilru tluang tak leh rilru tha kan tih chi hi an ni ve ang chu" tiin mi bo ta pahnih duhsaka leh duhsanga te chungchang sawi chu nuam tilo tih hriat tak chuan ruatdika hmel chu a ngui deuh lap mai.



"Nia sir, mi fel tak an ni, a pawi ngawt mai. An han awm ve ta lo tur hi ka ngaihtuah chhuah leh apiang hian he thil thleng mak tak hian min la nghawng dawn chauh niin ka hria" a han tihzawm zat a, chumi lai chuan Jery-a erawh an thian bo ta te chungchang sawi chu a nuam a ti chiah lo tih hriat tak chuan ear phone vuahin hla chu a ngaithla ta daih mai a, a hmel chu hmuh a nuam fahran bik lo.



Ruatdika leh jery-a awm dan rengah pawh chuan an thian kal ta te chu an ngaiin an thil tawn avang chuan pawi an ti tih a hriat reng mai a, an chanchin sawi zawng ringawt pawh chuan an nunzia chu a danglam nghal rawih rawih thei hial a ni.



Mahse, chutia an awmdan han inthlak deuh thut chu an duh bik lo, a hmai chu han hriat nawk nawk pah chuan ruatdika chuan "sir, ni e han sawi leh thin ila, an ngaihawm dawn a ni ti tawp mai ang, kan ngai dawn takzet a ni. He thil hi chuan nakin hun zelah pawh min la nghawng dawn chauh niin a lang si a" a han ti zuai leh raih a, chutihrual chuan a hmel chu han tih zangkhai luih hram hram erawh a tum hle.



Chutah inspector pawh chuan ruatdika thusawi chu pawm pui zet hian "a dik, i sawi dik ngei mai. Nakin hun lehzelah pawh hreawm inla ti tawlh tawlh dawn, a lang reng. Thian te zinga tu te emaw an han awm loh hi chuan rilru hian a hre ran tawh mai a, a mi nghawng te hi a na duh khawp mai a, mahse ka rin aiin in fel ka tia, in kum te ala tlem a, tlangval pawnthuah khai rual inla ni a, nakinah nupui fanau te in han awt chho ang a a mak khawp mai, nupui fanau te nei a Pathian rem tihna a duhthusam ang a hun han hman theih hi chuan thil reng reng mai hi kan theihnghilh zo a, lunglen hman pawh hi ani tawh thin lo, lungngaih mai mai lah a chi tawh hek lo va" tiin inspector chuan a no hnuhnung tur chu a han thawkkhat leh pap a, meizial chu a han tan kai zui zat bawk a.



Jery-a pawh chu a kut leh taksa, a hmai te chu thak tih avanga lo hiat hraih hraih rengin a mut hmunah chuan a inlet sek reng mai a, Chutah ruatdika chuan inspector in Jery-a inhiat hraih hraih reng chu mak tiin a en duh hle a ni tih a hriat chuan alo zak deuh nge ni.



Chutah, han nui deuh var var pah chuan "Jery-a chu a va han thak tâk tâk awm ve maw le, sir thingtlang mi hi chu thak sep sep te hi kan nei a, a buaithlak anih hi, zah te pawh a zahthlak" a han ti khawmawi ve a, Chutah hriatthiam hmel tak chuan inspector chuan "e khai a, keini te pawh thingtlang chhuak vek alawm kan nih. Khawpuia pem lut mai mai alawm kan nih. Thingtlangah chuan ram te in riak fo va, enge maw pem leh hliam neih neuh te chu thil awm sa tur alawm" tiin a mei zuk lai chu a pak hlat hlat reng a.



Chutia thian te chanchin leh titi tlanglawn te te vawrh paha hun nuam tak an hman mek zel lai chuan thupui fun aw deuh leh thutak zawk deuh chuan inspector ruata chuan heti hian a han ti ta a, "dika, jery, han sawi leh thin ila, in thian bo ta te chungchangah hian a tir te a han ngaihtuah vang vang a tun hnu thleng hian enge maw ngaihdan pakhat emaw sawi duh pakhat lek chauh pawh kan nei em le? a han ti a.



Chutah, Chutiang thu inspector in a han zawh leh takah chuan ruatdika chuan a kut khur deuh dar dar chung a a meizial zuk lai meivap bawma han nawr hlum a a hmai thak han hiah nak nak pah chuan "sir, ngun takin thil ka ngaihtuah a, khatia kan han ramvak kha, tum dangah pawh kan tih thin dan ang thovin thil a kal a, thil han danglam deuh emaw thil pangngai lo ti mai ila, hei amah bo hmasa zawk duhsaka bik kha, a bo hmasa te a ni a, duhsaka kha khami hmalam, a bo hmain a rilru lamah hian harsatna emaw, hei ramhuai zawl kan tih ang deuh te hian alo awm tawh thin pawh a ni thei a",



Chutah inspector chuan mak ti a a mit han san deuh ak in "ngawi lawk ruata, duhsaka leh duhsanga te kha in thian te an ni a, tun hnai chhoah in inkawm ngai meuh lo tihna a niang maw? chutia a chanchin leh hun hman dan pawh i hriat vak bik siloh chuan" alo ti thuai a.



"Aaa, nia sir, kan thian pa a ni a, ram vak thang kan ni. An ni pahnih erawh hei in chhungkhat hnaivai deuh hi an ni a, unau kan tih in cousin hi an ni a" chumi lai chuan Jery-a chuan a phone khawih lai chu han dahthla in inspector chu a han melh zauh a, Chutah ruatdika lam chu han en in



"dika, khaw maw i zial kha pakhat kalo zuk sak lawk mai che" chumi rual chuan "ni e sir, an ni pahnih kha kan kiangah hun hmangin an tla khat angreng viau mai, keini erawh ram vak reng reng thin kan ni thung, kan thian li in sena leh danmawia te nen an ni kha chu kan thian te an ni tho nachungin kan inkawm khat deuh alawm le,



"mahse In lamah erawh kan inkawm reng tho va, rilru han buai emaw in an awm ka ring lo kei chuan, chutiang a han buai thut tur chuan Chutiang lam hawi a an chungchang sawi engmah kan hre ngai lo bawk, mi te hian an hria a nga, dika lah hi thil han zeldin a mahni ngaihdan dana thil han sukthlek mai te hi i hrat a" tiin ruatdika'n mi bo ta te pahnih chungchang a sawi duh dan chu mawilo a ti a ni tih hriat tak chuan a han ti a.



Chutah, ruatdika pawh chuan aw han thian a inthiam loh hmel han pu deuh chung chuan "ni e sir, mi bo te an lainatawm a, an chhungte pawh an khawngaihthlak awm, amaherawhchu ka ngaihdan mai mai a ni a, a ni thei mai lo maw? ti a han zeldin hi a pawimawhna chin hi a awm ve bawk ngai e"



"imm, han sawi zel teh, i rindan tak pawh a pawimawh thei a nia, thudik pawh alo ni ve reng thei" tiin inspector chuan ruatdika chu alo thlawp vat a, tin amah inspector in a zawhna kha a ni reng bawk a.



Jery-a erawh phone bawk khawihin alo tui leh tawh viau thung. "Ni e sir" a aw ki chu a hniam angreng viau mai. "keini lam in kan lo hriatpui ve hauh loh hian enge maw rilru hahna leh rilru tawngkhawngna te pawh alo nei ani thei a, kha tia kan han ramvak tlang ta kha amah pawh kha 'a rui ani ang' ti a ngaihdan te pawh kan han nei ren rawn a, rilru lam natna emaw, enge maw lungawi lohna te hi alo nei ang a ama chhungte nen inhmuhthiak lohna te a nei a ni ang"



chuveleh Jery-a bawk chuan rang zet hian "tih loh loh a nih chu dika, engmah i hre lo, chutiang thil a awm lo, a chhungte nen pawh engkim inhrilh vek an ni, a chhung te ngei pawhin an sawi alawm maw le, In lamah enge maw han lung nih loh emaw han inhauh thinrim emaw engmah an neilo hrim hrim, kan sir te lam hian chutiang lam chu engkim an zawt fiah vek tawh bawk, khami tlai, lui ral ngaw lam a hnuhma enfiah tura in thangchhuah tum khan he lamah chumi lam chu engkim inzawhfiah vek a ni alawm, chutiang engmah a awm lo, kei pawh hian chutiang thil engmah a awm ka ring lo.



"Khami zan kan ramchhuak kha thil tam tak, 'a ni thei awm mange' tihtur zawng zawng nen lam kan han zeldin pawhin chutiang a awm lo hrim hrim, pangngai taka ramchhuak kan ni a, kan tih thin dan pangngai a ni a, mak tih mai loh chu han tih vak ngaihna kei chuan ka hre lo" tiin mi pawi sawi hlau tak chung chuan a tawngkam chu a cheh fimkhur viau mai.



Ruatdika pawh chuan a thianpa Jery-a rilru tur awm ang chu hriatthiam puiin "ni e i sawi dik, thil pawi te hi sawi palh mai a hlauhawm, mahse ka han sawi duh tak zawk a chu amah hi rilru lam chian lohna te hi alo nei a nga, hei ramhuaiin mihring a tihbuai ang hi, khawmu chawi te pawh kan han rin kha, Khatiang deuh khan" a han ti a.



Chutah, Jery-a chuan "imm, ka hria alawm, ama chhungte emaw nen lam, a buaina emaw, khatiang ang thinrim emaw, lungawi loh lam nen engmah inzawmna a nei tawh lo hrim hrim. A bo tawp ringawt a, a bak chu thil mak hlir ani tawp mai. Khawmu in a chawi bo thut anih ngawt loh chuan thil dang han puh tur a vang em a ni" Beidawn hmel pu lek lek chung chuan a lo ti a.



"Ni e, thingtlang te in la ni a, hetiang ang thil, ramhuai tihbuai emaw hruai bo emaw chungchang te hi ala awm lovang tih pawh hi sawi theih a ni bik tlat lo. A bo tawp ringawt a, a reh zui hmiah bawk a, thil mak a ni" inspector chuan alo ti ve thuai a.



Chutah Jery-a chuan "ni e sir, boruak a thamral ta ang mai hi a ni. A bo ringawt a, boruakah chuan a thamral tawp a, khawmu in a la bo anih hi kei chu ka ring ta ber a ni, hetiang ang ramhuai lak bo tih te, khawmu chawi tih te hi awih harsa in hmanlai thil ni a ngaih tawh ni mahse, an chhungte tan pawh pawm a harsa ang, tin, ka han sawi duh bawk chu, saw mi ram, luiral ram saw a hrisel lo a ni ang.



"U pa zawk te reng in hmanlai atang tawh a ramsa pawh an tam em em dan an han sawi te leh lasi te pawh an lo awm ve tawh thin ni ngei tur a ni. Tin, kha mi dika'n thu tura a tih fah leh thil ding thiang thing te pawh kha kei chu kih hial a nia ka duh ni, a hrisel lo tawp a ni ngei ang. Mahse, han kit ngawt ila khawsik leh khum beta na in ka dam lo zui nek ang tih te pawh hlauhawm hian, a hnaih hian ka hnaih tha duh tawh lo ani tawp mai, a huho pawh ni se, zan lamah phei chuan kal kal chi pawh a ni tawh lo hrim hrim"



Inspector chuan "jery, i han sawi hmangin upa, tun hma in ramvak thin upa zawk te pawh hian thawm emaw thil han hmuh emaw te an neiin chanchin sawi tur a nei ngai hrim hrim em? He thu, luiral ngaw in chanchin sawi tur a neih leh neih loh chungchang hi ka hriat duh chu a ni a"



"aa sir, chanchin sawi tur chu nei ve thin e, ramsa te hi an tam thin a, hmun dang zawng aiin tun hma deuh chuan hetiang ang lasi leh ramhuai thawm tih te pawh hi an lo hre ve zauh zauh tawh thin a ni. Mahse, tun hnu hian lo ram a theh te niin lo ram neih nan te kan hmang fo tawh a, amaherawhchu a hmun a zau a, a ram bawh chin a zau tha a, chuvang chuan ngaw erawh engtik lai pawhin a tha reng mai.



"Tun hma thil an ni tawh a, tun hnaiah kan vak fo a tin, chutiang ang pawh chu lo ni pawh ni se hetiang a mi bo emaw han sawi tur hi tumah an la awm ngailo hrim hrim. Upa zawk te chuan thawm mak tak tak te pawh chu lo hre thin pawh ni se engmah mihring te lakah thil pawi emaw han thleng ala awm ngailo hrim hrim, chutia tun mai a hetia thil mak em em mai a han thleng ta thut mai hi chu a mak han tih leh thin mai loh hi chu sawi tur a vang em asin"



"Sir, nichin khan dika rindan kha ka han tuipui duh lo viau na in han sawi leh si ila, kei ngei pawh hian a ruk tak chuan ka ring hlel ru tawh a ni. Ka rinhlelh chu tudang nilovin bo ta te, an mahni ngei hi an rilru emaw hi a buai ru niin ka ringhlel tlat tawh.



"Tichuan, keini lam hriatpui siloh hian engemaw rilru buaina, rilru damlohna te hi an lo nei ang a, tichuan an ni rilru buai deuh chu ramhuai te lah hian an zuam duh si a, lasi lam an ni emaw ramhuai lam pawh ni se, eng inzawmna e maw tak hi an lo nei ru reng pawh a ni thei"



"Imm, ni e i sawi chu a dikna lai pawh a awm ve thei tho va, chutihrual chuan ram an vak tam lo i ti em kha? tiin inspector chuan Jery-a thusawi lai chu alo pawtchat a. "Aw sir, an ni pahnih kha chu ram chu vak tam an nilo. Ram chin pawh keini midang ai kha chuan an hre lo zawk. Mahse, chu chu han buaina tham a ni chuang lo. Anmahni tawkah chuan ram chin chu an hre ve tho ang.



"Chutia an hriat loh avanga han buaipui ngai em em chu an nilo ka tihna anih chu, hei dika nen a inzui hrang a mualper zâu lam pan ta kha an ni a" Jery-a chuan bottle a tui chu in tumin bottle chhin chu a han herh hawng a, a kut chu a khur dar dar a ni tih inspector chuan alo hmu a, chuveleh "imm, hei dar engzat nge ni ve tawh le, kan chau tlang lutuk palh a nge, khaw nge haw zai te pawh hi i rel dawn teh ang. Kan Vcp te pawh an comittee an zo tawh a nga, a ni pawh rei vak lo chu han kawm leh pawh ka duh khawp mai" a han ti ta a.