Luiral Ngaw pui_ziaktu, Laltanpuia Chapter -4

[April Hmar Liverpool]

Luiral Ngawpui_ziaktu, Laltanpuia

Chapter_4


Chutia police inspector berin tin a han rawt takah chuan a thusawi chu a dik a ni ngei ang. Ruatdika leh Jery-a te thian dun pawh chu an chauh hmel in luiral ngaw chungchang han sawi leh thin chu nuam an ti vak lo tih an awm danah chuan a hriat si a.


"Aa sir, ala hma asin, Hei, hei hi ti leh la, ka tih ai hi ka kian ang che" tiin ruatdika chuan inspector chu a zu in tur chu a han pe a. Chuveleh inspector chuan, "aih nilo ve dika, a lawmawm mahse, kha, no hnih ngawt mai ka in tawh kha, ka ruih lutuk chuan a mawilo in a diklo a nge, a hmingchhiatthlak lutuk palh a nge" tiin haw tur chuan a han inbuatsaih a, a hmai te chu han phih harh in tui chu a han lem pawp pawp a.


Ruatdika chhung te pawh chuan inspector hnenah chuan, "e khai inspector, chu i tin mai dawn em ni? Enge thil hriat belh tur emaw in hmachhawp atana han tangkai thei tur emaw te in han hriat belh em?" tiin an lo zawt buai ve luam a, inspector pawh chuan hrilhhai hmel tak chuan mak tih mai loh chu hrilhhaithlak a tih thu leh a beidawnthlak viau thu chu a han hrilh ve bawk a.


Mi tam zawkin khawmu chawi anih chu an rindan a nih thu te, an mahni mi bo ta laina hnai te ngei pawhin chutia an fa te boruak a thamral ta ang mai a khawmu chawi bo an nih te chu an rindan anih tawh thu te chu inleng dang lo chuangkai ve te pawh chuan inspector ruata chu an lo hrilh ve luam bawk a.


Khaw pum leh hmun hrang hrang atang pawh a chu thil thleng chu mak anih thu bak engdangmah sawi zui ngaihna an hriat loh thu te, ramhuai hruai bo an nih rin thu chu khaw thenawm te hnen atang pawha an thu hriat dan anih tawh thu te chu an han hrilh zel a, inspector pawh chuan mipui lam rindan chu a dik ngei ani tih fiahna awm lo mahse, mipui ngaihdan lam awn tur a hma han lak leh hram erawh a duh rilru hle thung.


Inspector ruata chuan a mut hmunah chuan thil tam tak a ngaihtuah a, a case chhui lai chu mipui lam sukthlek zawnga kawih her chu a tum ta a ni.


Zing nichhuak chu a kang tha viau mai, zan lama a ruahmanna te bawhzui tura chumi ni atanga chet lak chu inspector chuan a tum a, a pistol chu uluk zet hian a han thlek vang vang a, Chutah duat deuh hian pistol chu a han fawp leh vang vang bawk, chutah zan lama a ruahmanna te chu a han chhui let leh dauh dauh a.


Midangin nu ber ho a tukthuan an kil lai ani a, pa ber erawh a thil bo buai chuan a phili buai hle mai a, "mami, hriati, ka thingrem hi in hai em? in khawih em?"


"Enge ni ta thara, chutia pa ber zing zing a i han buai tak chul ni"
"aa, mami nu hei, he lai a thingrem hi in hai mial lo maw? hei ka almirah chabi a bo daih mai" Chutah, a mikhual te chu a hrechhuak zawk a, "aa, keima tihbo hi a niang, ka dahna hi ka hre lo zawk nge ni, almirah ah file a awm a lakchhuah ka han duh deuh alawm mawle, hei almirah chabi hi ka dahna thinah hian a awm hauh lo mai a" a han ti a, a buai hmel khawp mai.


Chutah, inspector Remruata pawh chuan pa ber thusawi chu lo hriain alo bengkhawn ve thuai a, an mahni chu mikhual an ni si a, chutia an awm lai ngei a chhungkaw pa ber thil dahthat a han bo ta mai chu tha lo a ti ani. Chutah, a chaw ei lai chu tho thuai in, "e khai aw, pa ber chu eng chungchang nge ni ta? A va zialo ve maw le, enge keini lam hian tih theih te kan nei reng ange maw chu" a han ti a.


Chutah, pa ber nunthara chuan inthiam chiah lo hmel a pu deuh, "aa, inspector nuam lo te kha ilo ti mai mai a nge, ka dahna ka hai mai mai a nia nge, alo langchhuak ve leh mai ang. Thil tihbo hi chu dahna kan hai duh an tih thin kha maw" tiin a mikhual te inthlahrun chu a hlau hle mai a.


"Aa, pu nunthar, thil bo chu a pawimawh hmel si a, chutia file pawimawh dahna chabi ber a awm siloh chuan a buaithlak rei lutuk palh a nge, khawnge keini pawh hian tih theih kan lo nei mial mahna, chabi i dahna lai chu han sawi teh, i han zawng teh ang u, a zia lo e mai" tiin nuam a ti viau lo ni ngei tur ani.


Chutah, inspector awmdan chu hrethiam in, "aa, inspector i tih te chuan ni e mami, mami nu, ka ru, min han zawn pui lawk mai ta che u, file lakchhuah ka duh si a" tiin chabi a dahna tur awm ang chu an han zawng ta a, pindan lamah chuan nu ber chuan chabi chu a zawng a, pa ber hoin choka leh thutkhawmna pindan lam chu midangin an lo en kual ve bawk.


In bang kil tin te chu han en in engmah an hmu lo, thutthleng hnuai te, dawhkan hnuai te, In chhung bungrua hrang hrang an dahna hmun a chabi awm theihna lai tur awm ang a an rin te an han dap kual hnu ah pawh chuan chabi chu an hmu zo lo, Chutah inspector Remruata chuan inthlahrung duh lovin, "pu nunthar, chabi chu thingremah hian ka dah i ti em ni kha? a han ti a,


"aw ni e, he lai thutkhawmna pindana thutthleng sei bula thingrem chhungah hian ka dah mai thin a, mahse tukin zingkar almirah a ka file dah lakchhuah tuma ka han en leh chu ka hmu zo ta lo alawm mawle" Chutah inspector chuan sofa hnuai te chu han en in choka lam te chu a han thlek leh deuh ha ha thin bawk a, Chutah bathroom doormat hnuaiah chuan chabi chu inspector chuan a ava hmu chhuak ta nawlh mai, Chuveleh, "hei le, hei hi a ni em pu nunthar, hei chabi chu doormat bula hi ka hmu e aw" tiin chabi bawr keng chung chuan pa ber nunthara lam chu a pan thuai a.


Chuveleh pa ber chuan mak ti zet hian, "e khai a!, kha lai daih daihah engtin nge a awm theih a, a va mak ngai ve" alo ti a, chuveleh naupang zinga pakhat chuan, "pa, ramhuaiin an dah a niang" alo ti vat a, chu mi rual chiah chuan mi bo ta te pahnih duhsaka leh duhsanga te chu mi dang ho pawh chuan an hrechhuak nghal uai uai mai a.


Nu ber chuan mak ti a meng rang kaw kaw chung chuan, "mami, a awi awm loh lutuk, chutiangin ramhuai an awm lo" alo ti thuai a, chuveleh naupang chuan, "nu, u duhsaka te pawh mi in ramhuai lak bo an ni ang' an ti alawm, kan khuaah hian ramhuai ho an lo lut a niang" a han ti leh ta mai a, Chuveleh inspector chuan rang zet hian, "ngawi teh mami, chu i sawi danin ramhuai chu miin an hmu ngai em? alo ti thuai a. Chutah naupang chuan, "ka pu, hman zan a u duhsaka a bo hnu kar khat hnu a u duhsanga a bo leh hma pawh khan u duhsanga chuan thil a tibo an ti a, chu thil chu a zawng vak vak a, a hmu zo lo an ti.


"Tichuan a thil tih bo chu a hmuh zawh tak lohah chuan zanah khan ramvakin an chhuak zui ta a, amah chawp khan a bo ta daih a ni an ti alawm" alo ti ta mai a. Chuveleh inspector chuan rang zet hian a nau rinpuia hnenah chuan, "rina, chu thil chu ilo hre tawh em? an chhungte in kawm laiin chu thil chungchang chu sawi an nei em?" A han ti vat a, chutah rinpuia chuan, "sir, chu thil tak chu an sawi chiah lo, mahse a nu kha chuan a sawi tak kha maw le, ni e a sawi alawm, ka hre leh e, khami tum, luiral ngaw lam pana hnuhma in va en tum khan keini lam khan khaw chhunga mite thu kan lo zawt fiah nual hlawm a, a chhungte thu kan han zawh ve khan a nu khan a bo hma a a hun hman dan te kha min hrilh luam a, tichuan a sawi dan chuan,


'khami ni kha enge maw a hriat ni, a thil tih bo thu te kha min zawt a, kei lah chuan a engmah ka khawih loh thu in ka lo chhang ve mai a, tichuan ramvah an duh thu te kha a sawi a, a thil tihbo chu a zawng niin ka hria, kei khan buh ka thlei a, rilru tih thawven pahin tiin phone-ah sermon ka ngaithla a, tichuan ani chu a insiam pah mawlh mawlh reng a, tichuan a insiam zawh chuan kei lah Khan ka lo chik lem lo.


"Mama, fimkhur ang che u, i nau duha lah chin hriat a ni ta silo, nang ni pawh thil va ti mai mai lo ula' tiin fimkhur tur te khan ka chah mawlh mawlh a, kei ka lo buai ve nen, khatia chinchang ngaihven a luiral lam pana ramvah paha duha te hnuhma thlithlai tur kha an ni a, mahse kei kha chuan an thil tih tum chu tul ka tilo hle thung.


Mahse a pawimawh alawm' kha a ti ve tlat a, duha bo dan chungchanga hriat tur thil thar te pawh a awm a rin thu te kha a a sawi a' tiin thil a tihbo a zawn pah chungchang te chu min hrilh tak asin" a han ti a, chuveleh inspector chuan, "rina, joela nen hian kan pathumin chu nu, duhsanga nu i tih chu thil zawhfiah that leh ka duh ani, note bu kha a pawimawh ang aw" tiin a insiam ta nghal mawlh mawlh a.


An chhuah dawn chuan pa ber nunthara hnenah chuan, "pu nunthar, kan chhuak leh tang nge, thu zawhfiah tur kan nei tlat mai" tiin an tihtur te chu nunthara hnenah chuan a han hrilh a, Chutah duhsanga nu thu zawtfiah tur chuan chet an la ta thuai a.


Duhsanga nu chu kum 50 leh kum 60 inkar tur hi a ni a, nu valai han tih dawn a chu aia hmel uaithla lam tawh si, hmai bial lam leh pumrua lian lem lo tak niin a hmel a zangkhai in hmuh alo nuam phian mai.


Inspector Remruata chuan a kiu pahnih chu a khup a han nghah pah chuan, "chu pi mawi, in fapa duhsanga chuan thil a tihbo chungchang a hrilh che a maw?" a han ti a, chuveleh mawii chuan ngun tak a thil ngaihtuah chung chuan, "aw pu inspector, tun hnu a ngun taka thil ka ngaihtuah let leh hian kha a thil tih bo kha eng thil nge a nih ang aw' tiin ngaihtuahna ka seng hnem khawp mai, amah ka zawh lah khan 'thil' ti ringwtin min chhang si a, amah kha a hmanhmawh tawh a, ramvak tur an ni a, chawhnu niin a tlai tawh angreng viau, tlai dar 4 chu a pel tawh maithei, tichuan a hmanhmawh si nen a thil tihbo chungchang chu min zawt luam a, kei chuan ka hriat loh thu te chu ka hrilh bawk a, mahse ka han ngaihtuah let leh hian kha a thil tihbo kha enge ni ang?


"Ni e pu inspector, ti hian ka ngaihtuah a, mama leh a unaupa duhsaka te an han bo ngawt dan hi a mak em em mai a, mipui tam zawk leh kum upa thenkhat te pawh in a an ngaihdan ramhuai hruai bo emaw khawmu chawi ni a an ngaihdan hi kei chuan ka pawm lo in chutia ngaihdan an han siam mai pawh chu ka lawm lo viau thin.


"Khawiah emaw hian an awm hi ka ring tlat thin a, mahse ngun lehzual zawkin thil ka ngaihtuah a, an hnuhma emaw han chhuizui ngaihna reng reng awm lova an han khuangcher bo tawp mai hi na ka ti tawlh tawlh mai a, an bo dawn khan engtin nge an awm ang? Ramsa nen intawng ni ta se thawm an neih ngei a rinawm a, sulhnu pawh an nei ngei ang, tichuan thisen emaw an thuamhnaw emaw an chem ken emaw silai emaw tal chu khawi laiah emaw hmuh a ni ngei ang, mahse ngun taka ka ngaihtuah hnu chuan ka ngaihdan pakhatna chu ka sut leh a, tichuan thil dangin ka ngaihtuah leh a, a ni hi kawng a bo anga hmun dangah hian kalin a kalna chin a hre ta lo a ni ang' ka ti leh a"


"Chu chu thil theih a ni" inspector chuan alo ti a, chutah mawii bawk chuan chhunzawmin, "ni e inspector, an sa channa lai chu duhkhawp lovin hmun dangah an kal a nga an bo phah ta anih ka ring a, an tam te a chhawl a nga an chau tawh siin riltam avangin nikhua te an hre lo a ni ang ka ti a" chuveleh inspector chuan, "imm, a dik thei, i fapa leh duhsaka te kha mi sawi ka hriatdanah pawh ram chin hrelo an ni hauh lo nachungin ram an vak tam lo tih te, an ramchhuah pui midang te kaihhruai an ngai deuh ni ten ka lo hria a, chutia kawng bo ni a ngaihdan neih chu thil ni thei tak a ni" alo ti leh thuai a.


Chutah mawii pawh chuan a lu chu bu nghat nghat in, "ni e, mama leh bo hmasa ta a nau duhsaka te kha an thian midang bo ve lo te aia ram vak tam lo chu an ni ngei e, ram chin pawh an hre lutuk lo ang. Mahse, inspector heti hian ka ngaihtuah a, khawtlangin thahnem ngai takin luiral ngaw saw dap a ni a, an sa channa atang pawh chuan duhkhawp lovin hmun dang pan ta pawh ni se, an kalna hnuhma leh sa chang te an thutna tur hnuhma uluk taka thlithlai ani si a, mahse an mahni mai nilo, an hnuhma engmah hmuh tur leh han rinzawn tur awm ang tal pawh hriatchhuah leh hmuh a han nilo khan kei chu min ti hrilhhaiin min ti mangang tak zet a ni.


"bo dan pangngai chu nise khaw thenawm leh hmun hrang hrangah pawh miin an hre vek, an hmel leh an san zawng chenin, an thawmhnaw hak rawng chenin miin an hre vek, mahse tun thlengin hmuh an ni chuang silo, khaw thenawm tlawmngai te nen lam zawn hna chu ni sarih chhung ngawrh taka thawh ni mahse hmuh an ni lo mai nilovin an hnuhma tur awm ang engmah an hmuchhuak silo a,


"ramsa in a lambun ang a sakei te hian an pu bo a ni ang tih turin chhui zui tur a awm lova, an mahni in kawng an bo a ni ang tih turin an mahni hmuh zawh an ni silo, hnuhma hrim hrim, thisen emaw an ipte pui emaw, chem a thing han sahna hnuhma emaw tal pawh engmah hmuh tur a awm lo, an thawmhnaw them tak ngial pawh hmuh tur a awm silo, tichuan a ngaihna hriatthiam a har tak em ah chuan mizo danin mithi ang a ngaih an han ni ta a ni a, khawtlang a beidawng a, thenawm khua te an beidawng a, keini an chhungte hian beisei na tlem kan la nei a ni mai a.


"Tichuan mama pawh kha midang zawng zawng an beidawn tawh hnu a la beidawng ve duh lo leh engemaw hnuhma tharlam hmuh tur a awm hlauh beisei a khatia a nau bona lama ramvak chhuak leh ta kha a ni a, mahse amah ngei pawh chu a nau ang chiah chuan mak takin a han pilbo zui ve leh ta zel si a, tichuan ka ngaihdan hrang hrang atang pawh chuan kei ngei pawh chu ka beidawng ta a ni.


"Nangni police lam in rawn lan khan beiseina chhete ka la nei chang chang chauh a ni. Mahse hei, nangni lam pawh kalo hriat danin he laiah ni hnih khat hun in han hmang anga in hmun lamah let leh nghal mai turin ruahmanna in nei tih te ka lo hre ve a, diktak a sawi chuan a beidawn thlak takzet tawh a ni.


"Tichuan, hetia thang tlawm tak leh engmah a ngaihna reng reng hre lo a han awm tawp ngawt aiah tiin ka ngaihdan chu midang ngaihdan, mipui tam zawk rilru sukthlek lamah chuan ka han pakai tir ve ta ngawt mai a, in hre vek anga, mipui tam zawk ngaihdan chu, ramhuai lak bo emaw khawmu chawi bo an nih hi mi zawng zawng rindan chu a ni tawh mai a, chu pawh a ngaihna hriat loh tawp aiah ti a chauhthubarawh taka ngaihdan siamna mai a niin ka hria,


"tichuan kei chuan pawm harsa ti tak chung leh lawm lo ru tak chung chuan khaw mu in a chawi anih chu ka han ring ve ta poh mai a, tichuan a bul atang bawkin ka han zeldin tha leh hram a, a hma lam hun atangin thil chu ka han ngaihtuah kir leh ta ngat ngat mai a, mahse chutah pawh chuan thil thar hmuhchhuah tur a vang khawp mai.


"Khatia an han ram vak ta kha luiral ah sawn huai a awm ang a, chu huai pawi chu an lo sawi a ni ang a, tichuan ramhuai chuan a la bo ta anih chu ka puh ta ngawt chhin a, mahse keimah ngei pawh chu ka ngaihdan atthlak tak avang chuan ka nuih a za ngei mai.


"Hmanlai thil hre deuh te pawh chuan ka ngaihdan ka thlak danglam ta chu lo hria in an phul pui ta hlut mai a, zeldin mak tak tak te pawh chu a piang chhuak nawk reng a ni. Pu inspector, khatia luiral lama chin ngaichang tur leh hnuhma enfiah a hun in hman lai reng pawh khan puithuna atthlak tak tak hmanga zeldin thu hla hi titi a tam khawp asin. Mahse, engmah kha lai kha chuan ka la awih ve lo, nangni lakah khan ka rinna ka la nghat tlat asin.


"Tichuan kum upa zawk, ramvak thang te hnen atang te chuan thu ngaihnawm tak tak te, hmanlai thil a an thil tawn mak tak tak chungchang te, lasi tih te, khawmu chawi chungchang te chu titi hriattur a awm reng a, kei ngei pawh chuan Pathian hnenah uluk taka tawngtai thin in mama te bo dan chu puithuna nen chuan ka zeldin chho ve ta ani a, tichuan mak tih deuh ka nei ta a, chu chu khatia duhsaka a han bo tak hnu a mama'n chinchang ngaihven a duh ta tlat mai te, a phur hmel em em mai te, ni e, khami an chhuah dawn hma a a awmdan, a mizia te khan mak tihna keimahah min tuh ta a ni.


"Kha a thil tihbo chungchang te kha midang chu ka hrilh ve a, a mizia a mak ka tih thu te, a phur em em mai te chu titi hona ah chuan ka sawi chhuak ve hial mai a, ka thusawi chu alo darh pawh ani mahna, tichuan thenkhat chuan duhsaka kha huaiin a hruai bo anih chu an ring nghet lehzual ta a,


"mama ngei pawh chu chutia a han phur em em danah te chuan engemaw amah mawlh tu awm ni ngeiin an ngai ta hlawm a, tichuan an unau chuan huaiin a tibuai ang a, a ti â vek a nga, a hruai bo ta a ni ang te an lo ti thul"


Chutah, inspector Remruata chuan dam deuh hian, "ka pi, chu zawng, thil hrechiang lo te zeldin thu hla a ang tlat, awih chi a nilo tawp, a chhan chu nangni chauh nilo an thian, an ramvah pui te ngei pawhin chutiang ang a rilru lam buai leh atthlak taka han khawsa an nilo va, kha khami zan a an ramchhuah chungchangah khan thil danglam a awm lo an ti a, ramchhuah dan pangngai thlap anih thu an sawi tlat a ni.


"inspector, chu, ka sawi ang chuan, ka rindan chu ka han thlak danglam ve ta chhin ani mai a, mama awmdan leh a phur em em mai te, thil a tibo te kha eng tak ni ang maw? thil pawimawh tak alo ni thei a, ka zawh lah in a meizial emaw a kuhva emaw a nilova, 'thil' ti ringawtin min chhang si a, chu thil chu eng tak ni ang maw?" Mawii chuan a han ti a.


Chutah, inspector chuan, "imm, ni e ka pi, in fate bo dan chu a eng a pawh lo nise, nang a hring tu nu ber i ngaih a that tlat loh a, i thinlung a zawhna a awm tlat si anih chuan, tin chu thil chu thil pawimawh tak pawh alo ni ve thei tho a, In leh a vel te hi in han dapin in han enkual tawh reng em? nge ni a keini lam hian kan han dap chhin dawn em ni? rem i ti em? a han ti a, mawii chuan uluk fe hian, "inspector, mama awmdan mak ka tih tum atang khan uluk takin In leh a chheh vel te hi a en chhuak dap a ni, engmah thil han danglam leh thil tangkai han hmuhchhuah a mama thil tih bo ni awm a han ngaihbel theih tur thil ka hmu hauh lo, in duh anih phawt chuan in thlithlai thei ang, in dap kim dap thei ang, zawhna pawh min zawt thei ang" a han ti leh a.


Chutah, inspector chu uluk taka inngaihtuah in, "ka pi, chutiang thil chu nangmah in i lo ti tawh a, thil pawimawh i hmu zo lo anih chuan keini pawh hian hmuhchhuah tur Kan nei bik kher lo maithei? Chutah mawii chuan, "ni e inspector, puithuna lam thil pawh chu lo nise, chumi lam ni ngei a han finfiahna tur in kawng hi a kaw viau lo a ni, mahse kan fate bo dan hian min run hle si a, duhsaka te ramvak chu eng khaw sawi set set lovin khawmu chuan a chawi bo ringawt mai anih ngawt loh chuan a chhan dang enge ni ta ang?" a han ti a.


Chutah mawii vek chuan, "a hnu ah khawmu chuan a tih dan ngai bawkin mama chu a han chawi ve leh ta a, chu chu a ni thil awmdan ni a lang ber chu ni, mahse keini lam pawh hi kan beidawng hma lutuk em ni ang? Thla leh kum te hial han vei ve phawt se maw le tiin ka inngaihtuah a, mahse hun hi a liam zel a nga, a ngaihna kan hre lo tulh tulh dawn zawng a nih hi maw" a han ti leh a, mawii chu a beidawng ani tih a hmelah chuan a lang fiah em em mai si a.


Inspector Remruata chuan, "awle" a han ti a, thawk chu a han la halh a, hnuai lam chu a bih leh ngat a, "kapi In leh a vel chu kan han dap chiang ve phawt mai a nge, heti zawng hian i ti ang, mi in thil an zawh che pawhin, 'inspector chuan a ngaihdan thlakin mipui sukthlek lam chu a awn ve ta a, puithuna lam thilah ngaiin chet a la mek ani' tiin i hrilhfiah mai dawn nia" a han ti a, Chutah mawii pawh chuan inspector meuh pawhin an fate chu khawmu chawi an nih chu a ringhlel ta bik lo ani tih chu a hrethiam ta a.


"Awle inspector, tihngaihna a vang em bawk a ni. Ramhuai te chu chhui rual an ni mai awm silo a, ramhuai te tal chu chhui turin chet ila dawn tihna em ni?" Inspector ruata chuan, "ka pi, mipui sukthlek leh ngaihdan chu kan hre vek a, mi pawhin mak min lo ti deuh anih pawhin rei he laiah kan awm tawh dawn lova, ka theihtawp ka chhuahna ah min ngaihsak mai dawn nia" tiin In leh a vel thlithlai tur chuan an han inbuatsaih ta a.


Mi bo ta, duhsanga te chenna In chutia police ho in an lo dap a an In leh a chhehvel an lo thlithlai mek ani tih mipui te chuan an han hmuh a an han hriat chuan mak an ti hle mai a, a rawn hmu apiang chuan an en hrek hrek zel a, chuveleh mawii pawh chuan inspector in a hrilh dan ang tak chuan mak lo titu te, zawhna lo zawt tu te hnenah pawh chuan thil pawi anih loh thu te, an thil chhuina ah thil tangkai an hmuh tak hlauh an rin thu te leh amah mawii ngei chuan a fapa thil tihbo chu zawn pui tura police te chuan ama thu a thlithlai an nih zawk thu te chu alo hrilhfiah ve zel a.


Chutih mek lai chuan Vcp nunthara kha a chenna In ah chuan a lungni lo hle ani tih leh a thil bo avang chuan a mangang hle ani tih hai theih hauh loh tur hian an nu nen chuan thu inhmu lovin an lo in bakkaih hlak hlak reng a, inspector ruata pawh chuan mawii hnenah chuan an duhtawk an ngah thu leh chanchinthar dang a awm chuan la inhriat tir leh zel tur anih thu te chu hrilh in, Chutah an innghahna, Vcp nunthara te In lam pan chuan chet an la ve leh ta a.


Vcp nunthara chuan a ngaihna hriat loh hmel tak leh hrilhhai fe chung hian an nu hnenah chuan, "chuti anih chuan i thusawi chu ka awih ang, mahse kan inspector te khan thu han zawtfiah ve che sela, chu chu i cho chiah ang maw?" a han ti a.


Nunthara nupui zeli chuan thinrim rilru na tak chung chuan, "aw, ka cho khawp mai, ka lak a nilo hrim hrim" a han ti a, Chutah lungchhiat hmel zet chuan, "mami sawi, ramhuai thil tih kha a ni ngei ang" tiin a hawi tau deuh nghat nghat tawh mai a.


Nunthara chuan uluk fe hian thil a han ngaihtuah a, chutah chung lam chu han melh vang vang in, "mi bo ta te thlarau an ni thei mai a ngem? An ni thlarau chuan min rawn tlawh te hi a ni mai lo maw le" a han ti a, chuveleh inngaihtuah harh thuaiin, "nilo, ani thei lul lo, tu emaw tak thil tih a ni, khawi lam ramhuai mahin an la lovang" a han ti leh a.


Inspector hnenah chuan uluk fe hian an In chhung ngei a thil bo chungchang chu Vcp nunthara chuan a han hrilh a, a hmelah chuan a lungawi lo takzet ani tih a hriat. Mahsela Inspector hmuh ah chuan hmel zangkhai put luih hram erawh a tum a, "inspector, khatia chabi bo i rawn hmuhchhuah takah khan ka lawm hle mai a, mahse chabi hmanga almirah hawnga ka file te ka en fel hnu chuan safe chhunga ka thil dah that pakhat chu a bo ani tih ka hrechhuak leh ta a ni.


"Chuti anih tak si ah chuan chabi bo kha ka dahna ka theihnghilh emaw doormat kiangah khan ka thlauh palh emaw tihna ani thei lo, kan nu te hi ka rinhlelh phah rum rum a, kan fate pawh hi kan zawt uluk viau, mahse engmah mi chhan ngaihna an hre lo, 'ka lak a nilo' tih ringawtin min chhang a ni. Chuti anih si chuan tunge ni ta ang?" Tiin a hrilhhai takzet tih a lang reng mai a.


Chuveleh, naupang pakhat chuan, "nu, ramhuai bawk a ni ang, chabi bo pawh kha ramhuai lak bo a ni ang, chuan chabi chu la in almirah chu a hawng a nga, ka pa thil pawimawh chu a la ang a, tichuan a kalh leh a nga, doormat hnuaiah khan chabi chu a dah leh ta a ni ang. U duhsaka leh u duhsanga te la bo tu ramhuai kha a ni ang" alo ti thuai a, chu naupang thusawi avang chuan pa ber chu a nui deuh tha nghe nghe.


Chutah, inspector chuan inthlarun hmel deuh hian, "aa, kei a tan tak pawh hian a nuam lo hle mai, chabi bo kha ka hmuh te hi a ni roh si a, Chutah, pa ber thil te alo bo lehzel si nen, ka tan tak pawh hian a nuam lo hle mai" a han ti a.


Chutah, pa ber pawh chuan uluk tak hian thil thlen dan chu a han ngaihtuah leh dauh dauh a, an mikhual te nuam lo ti hmel chu a han hmuh in, "pu te u, inthlarung reng reng suh u, nuam lo ti duh reng reng su, amah in a rawn lang ve leh mai ang. A la tu hi mami sawi danin ramhuai pa pawh chu alo ni thei a, ka la manchhuak em em ang" tiin an thil bo ru tu chu manchhuah a tum ruh hle ani tih chu a hmelah chuan a langchhuak hial ang chu.


Vcp chuan Inspector chu a en uluk viau mai bawk. Mahse, a mikhual te chu han rinhlelh ngawt chu a duh lo niin a lang, police an ni a, chutia mi In chhunga an awm lai ngei a thil han ru tur em chuan rin an harsa ve bawk atin ni.