LUIRAL NGAW PUI_ CHAPTER -1 Ziaktu, Laltanpuia

[April Hmar Liverpool]

#Thingtlang khaw pakhatah ramvahna ah chin hriat loh in mi pahnih an bo pil hmak ringawt mai a, an hnu chhui zui ngaihna awm lovin boruak a thamral ang mai an ni. Engtia bo ngawt thei nge an nih? Ngaw huai lak bo em ni an nih? Khawiah nge an awm tak ang? Chumi chhui tur chuan Inspector Remruata chu a rawn pen chhuak ta ani#

PSYCHIC:LUIRAL NGAWPUI_ziaktu, Laltanpuia



Chapter_1



Chanchin tharah chuan lallen khua a mak tak mai a mibo pahnih an awm chungchang chu chanchinthar chhiartu vanlalchhuangi chuan a puang mek a,lallen khua ah chuan ramvak mi mi thenkhat chu luiral ngaw ah ramvak turin an chhuak a,an zinga pakhat chu chin hriat lohin a bo a, khawtlang chuan mizo dan a ni sarih chhung zet luiral ngaw chu an dap ta a, nimahsela nisarih chhung zet mi bo chu an zawn hnuah pawh an mi zawn chu hmu zolovin a thi tawhah ngaih ani ta ani.



Nimahsela, mi bo chhungte lam chuan beiseina la neiin khaw thenawm leh hmun hrang hrangah mi bo chungchang chu social media kaltlangin thu an thehdarh leh ta a,a san zawng, a hmel awmdan, a thuamhnaw hak rawng, amah han hmuh a hriat nghal mai awlsam tur chuan mi bo anih thu chu an tlangzarh zui leh ta tho a. Chumi hnu chawlh karkhat a vei leh hnuah mi bo chhung te zinga mi chuan enge maw chanchin tharlam te a awm leh beiseiin mi thenkhat nen luiral ngaw ah bawk chuan ramvak turin an thangchhuak ve leh ta a, nimahsela chumi tumah pawh chuan a kar hmasa a thil thleng ang chiah chu thil thleng a ni leh ta tlat mai.



A tumhnihna atan ramvak zinga pakhat chu chin hriat lohvin a khuangcher bo ve leh ta a. An sawi danin heng mibo te pahnih hi unau an ni nghe nghe ani awm e, an nu leh pa te unau an ni a, chhul khat chhuak erawh an nilo thung niin an sawi.



dan ngai bawkin khawtlang chuan luiral ngaw lam panin mi bo zawng tur chuan an tleh chhuak leh ta a. Nimahsela, mi bo te chu an hmu zo lo. A tumhnih na atan a an han beidawn leh tak hnuah chuan thuchhuah dang an siam leh ta a, a hma a mi ang tho in mi bo anga chhuahin khaw thenawmah chuan mi bo chungchang chu an thehdarh leh ta ngawt mai a ni.



Nimahsela, an thu thehdarhna atang pawh a a hma a mi ang bawka ni sarih chhung zet an chinchang thuthar hriat zui tur a awm leh tak silohah chuan mi bo te pahnih chu an thi tawhah ngaih an ni leh ta a. Chutihrual chuan mi bo chhungte erawhin police lamah chuan beiseina an la nei ta fan a.



Inspector remruata chuan chu thil thleng mak tak chungchang chu ngun zet hian a thutna chair a thu a a lu dawm meuha ngaihtuahna seng chung chuan alo ngaihruat dauh dauh reng a,chutia chin hriat loh a a kar dana mi pahnih an han khuangcher bo ngawt danah chuan thil engemaw tak inthup chu a awm ve ni ngei tur a ni. Luiral ngaw chu amah ngei chuan va luhchhuah ve a va thlithlai chu a duh ta hle mai.



Chutia amah chauha ramchhuak pawh nilova thianza a ramchhuak, an zing a pakhat a han khuangcher bo ngawt mai chu a makna belhchhahtu ani a, tawn loh tur tur te hi an tawng a nih loh vekah khawmu chawi bo an sawi thin te chu awm ang dawn dawnin a lang. Chutah, a ngaihtuahna atang chuan inthing harhin rinpuia chu phone call hmang chuan a han bia a.



Inspector remruata office ah chuan inspector ruata leh a nau te chuan lallen khua a mibo chungchang sawiin hun an hmang mek a,an zinga mi joela chuan chu thil thleng chu mak ti tak chung leh an hnuchhui tur chu a phur ani tih hriat deuh mai hian inspector hnenah chuan,



"sir, heng mibo te hi an bo dan a mak danglam khawp mai. Mahni a ramchhuak an nilova, thian za a ramchhuak an ni a, mahni chauha ramchhuak, chin hriat loh a bo zui ta chu ni se thuhran, ram vak mi te hi sachan na ah a hrang theuhin sa changin an thu thin a, chutia an han thu hrang ta chu an duhthal a rei tawk fang sa an chan hnuah haw hun alo nih chuan innghakkhawm lehin a huho bawka in lam pan tlang ta thin an ni a, thenkhat hnufual duh an awm chuan phone hmangin an thian te an hrilh mai thin.



"kei ngei pawh hi ramvak a ramchhuak fo tawh thin ka ni a,thingtlang angah chuan ka sawi chu an tihdan tlanglawn a ni. Mahse sir, mak ka tih deuh lai chu rilru lam buaina nei pawh nilo, tlangval a pumpa ramvak tura chhuak ve meuh chutia thian zinga mi chin hriat loh leh han chhui zui ngaihna awm malek lova an han khuangcher bo ngawt mai chu thil mak tak a niin ka hria.



Inspector chuan, "an hnuhma chhui zui tur a awm silo a? Alo ti a, joela chuan "aw sir, an bo tawp ringawt mai ani awm e, Hetiang thil, mi bo chungchang hi chu tun hma pawhin thleng a awm zauh zauh tawh thin ang a. Mahse, rilru lama buaina nei te an ni duh hle a, mi san tha pangngai tan chuan bo ngawt thu awm suh.



"Heng mi bo kan tih te hi an hnuhma engemaw tak emaw a hnu lama an zawn hmuh leh tak te an ni hlawm a, nimahsela tum tum a mi hi chu ni sarih chhung zet an ram chhuahna hmunhma an daidar hnuah pawh social media nen lam, khaw thenawm thlengin thu thehdarh a ni nachungin a chin hriatzui tur pakhat chauh pawh awm lova thil a han thleng mai hi thil mak ti mak lehzual tu a ni ngat mai" A han ti a. A hmelah chuan chu thil thleng avanga mak tihna leh an case buaipui tur avanga phur hmel a hmuh theih. chutihrual chuan thil thlen dan, a makna phena chhuizui tur thil awm hauh lova thu a thang chuan beiseina erawh a ti sang viau lo niin a lang.



Chutah, rinpuia chuan ngun zeta thil thlen dan ngaihtuah chung chuan heti hian a han ti ve thung a, "ni e, he thil thleng hi a mak khawp mai. Ramvak zinga hetiang thil chinchang hre deuh thenkhatin an sawi dan phei chuan khawmu chawi bo an ti mai a, a hnu lam kum fe a liam hnuah chauh te hian an rawn lang ve leh hlawl mai ni te in an sawi ve bawk a ni awm e,



"mahse tun tum a mi te erawh mitthi ang a ngaih an ni tawh a, mi tam tak an beidawn tawh chuan keini lam tak tan pawh hian thuthar han hriatbelh tur emaw han chhuizuina tur atana thil tangkai pharhchhuah tur thilah beisei hi a sang viau lo tlat ani. Khawtlang meuh an beidawng tawh ani si a, keini lam tan tak pawh hian a kaw tawp a tang an sawi ang deuh hi niin ka hria"



Chutah, inspector Remruata chuan rinpuia thu chu lo pawtchatin, "imm, ni e, in han sawi tliar tliar a, khawtlang meuh pawh an beidawng tawh a, an chhung te meuh pawh in mitthi vuiin an thlahliam ta chu ani a, mahsela hetia han pamtul san mai atan hi chuan a uiawm ka ti a ni.



"Chumi lovah keini lamah hian case thehluh lam hi an tlai hret em aw tih theih a ni. A hlimchhawn a thil thleng chu la ni se, hei ai pawh hian tlemin chan a chau lo deuh tur hi a ni a, nimahsela in han sawi tak angin hetiang mi bo case hi a hnu lam hun engemaw chen a liam hnu daihah hian a chingchivet leh a hnawk lutuk lai te, hriatthiam harsa lai te hi an felfaiin hnuchhui a awlsam duh zawk daih a, beidawn san tawh lamah hian a hma a hnuchhuina atana thil tangkai a tha tha hmuh loh leh hriat hmaih te hi hriatchhuah a hmuhchhuah thar hi thil awl tak a ni duh nek zawk a nia.



"Amaherawhchu, khaw mipuite, an ramvah pui te ngeiin a an han sawi danah pawh thil thleng mak tak erawh a ni ngei mai. Sa chang an nih chuan zan lam hun a ni ngei dawn a, kha mi zan, an bo zan a an ram vah pui te pawh chu han kawm chian leh pawh a tul ngei ang"



inspector ruata chuan a mit chu a chhing deuh siar siar reng a, a thil ngaihtuah mek chu a ngaihtuah ngun takzet tih a hriat, "chumi lovah ramsa nena han in nang fuh a han inchai buai viau tur anga han chhut lahin thawm ri va engmah an hre lo a ni phawt a nga, engpawhnise a hmunhma te han thlithlai ve phawt ila, lallen khawtlang mi te, tlangkam leh ramvaka chhuak te thu hla ngei pawh chu han bengkhawn hmasa ve phawt mai teh ang u.



"An ni kamchhuak thu hla te han hriain han inbengvar ve phawt mai ila, tunah zawng helaiah mahni rindan leh zeldin thu hla baka thil han kuai thlek vak dan tur pawh thil chipchiarin kan hre si lova, a hmunhma ngeiah a tawngtu te tawng kam ngeiin thu pawh an fun kim zawk a nge. Ti ru, hei chhun ni a tlangsang chho mai dawn, chet ila vat zawk teh ang u khai, kan rinloh lamah chanchin ngaihnawm tak hriat thar tur te pawh a awm zawk a nge" tiin lallen khua pan tur chuan inspector Remruata leh a nau te chu an han inbuatsaih ta a.



Lallen khua an lut a, lallen council chuan uluk tak leh ngaihven takin police lam chu an lo dawngsawng a, police lam tan thingpui in tur te lo buatsaihin titi ho nan hun te chu an han insiam a.



Vcp nunthara te In ah chuan thutkhawmna hun te han neiin lallen council nen tang ho a ruahmanna leh chet lak dan tur te chu an han rel ho a, tin, chawhnu lamah luiral ngaw chu belchiang turin police lam pawh chuan chet an la dawn a ni.



Inspector ruata chuan ngunthluk zeta thil ngaihtuahin a suangtuahna chu alo vak thui leh tawh viau mai. Ralkhat atang a thuthang an lo hriat ve dan te, zeldin leh ngaihruatna an lo neih ve te chu chhui in a mit a chhing diar diar reng a, chutah Chiang zet zet hian a han meng zau leh kawk kawk thin bawk. Chutah, uluk deuh chuan In chung ceiling lam chu vanvadak meuh in a han melh leh ta ngat ngat mai a, a ngaihtuahna a kal bing em avang chuan a kut chu a lehlam a lehlam chuan a hum ngat ngat thei hial bawk, Chutah amah ngaichanga a hmatawn zawnga thuthmun lo rem ve mek lallen Vcp nunthara lam chu han en in muangchang chuan a thuthmun chu a han siam rem ta a, Chutah a ngaihtuahna a thil awm chu a hmaia a lanchhuah mai loh nan thup tum tak chung chuan Vcp hnenah chuan,



"chu, thawm engmah hriat a nilo tihna a ni maw? zan hun te a ni a, chutia thawm ri va engmah hriat a nih siloh chuan midang tan pawh an thian zing a mi a bo ang tih rinlawk ngaihna reng hriat a har ve bawk dawn anih tak chu a" an thlen hlima Vcp nunthara thu hrilh te chu a pawmpui ani tih hriat deuh mai chuan a han ti a.



Chuveleh Vcp chu alo bu nghat nghat mai. Chutah, Vcp chuan aw tham deuh tuak chung chuan, "ni e inspector, i sawi chu a dik alawm, thawm ri va chu hriat tur a awm hauh lo a ni. Mahni chanah han dah chhin ta ila, ngaw hnuaiah, zan thim hnuaiah, sa chang a kan thutna tur hmun theuh panin kan kal a, duhtawka rem a kan han innghah fel hnu chuan rannung te hram thawm chauh lo chu thawm dang hriat tur a vang khawp ang.



"Thian dang ten thawm an nei lova, ramsa thawm engmah hriattur a awm bawk silo, thian zinga mi tu emaw berin tawhsual tawkin a chin hriat a ni lo zui ang tih rinlawk ngaihna reng hriatlawk a har ve bawk dawn em asin. Mahse, hun a liam zel a, thawm dang hriattur a awm chuang lo. Chutah, duhtawk a zan hun kan han tlingtlak hnu chuan sa an chhuak dawn lo tih hriain In lam pan a haw turin innghahkhawmna lam chu kan han pan khawm ta a, mahse nghahchhuah zawh loh thian pakhat a awm ta tlat mai, kan han ngaichang deuh ren rawn thin a, mahse nghahchhuah tih reng a awm thei ta silo.



"Chutah, phone hmanga biak pawh kan han tum a, biak pawh theih lah a ni der silo. Tin, Chumi bakah khami zan, mibo te an bo zan a ramchhuak te khan electronic thil reng reng ken an nei lo a ni. Chutia kan thian hmel reng hmuh tur a awm ve tak silohah chuan hrilh te pawh a hai duh dawn hian ka hria.



"Tichuan, kan thian zing a pakhat chu a khuangcher bo ta hmiah mai a, chumi bak chanchin thar hriat zui tur a awm ta silo, a hrilhhaithlak tih mai loh chu tihngaihna dang a vang em lah tak a ni. Khawtlang in khami zana ramchhuak te, mi bo ta in a a ramchhuah pui te thusawi dan zul zuiin mi bo zawn hna chu tan a ni a, mahse ramhnuaiah chuan mi bo ta nena inzawmna nei han sawi tur leh han hriat zui tur kan hmu zolo mai ni lovin thil pakhat chauh pawh,mi bo han chhuizuina tura thil pawimawh hmuh leh hriat tur a a awm lo a ni ber mai e. Ka rindan chuan khawmu chawi bo an tih ang hi a ang ka ti ber"



Uluk tak chuan inspector chuan Vcp thusawi chu alo ngaithla a, inspector awmdan ah leh a khawsa zia ah chuan a ngaihtuahna chu a hmang ngun viau tih a lang reng, a mit chhing meuh a chutia ngaihruatna nen Vcp thusawi a han bawhzui tak veng veng hnu chuan harhchhuak hlawl ni mai hian a lang, Chutah a hmel a mak tihna leh a awmdan danglam tak mai chu thup tum tak chuan a aw chu a han thian kharh kharh a, chutah inspector chuan muang fan raih mai hian, "immm, chuti ani maw? Pu nunthar, chulai ram ngaw chuan chanchin sawi tur eng emaw te a nei tawh ngai em?" Thuthar hriat tur a awm beisei deuh chung chuan a han ti leh a.



Vcp chuan zan mut that loh avanga a mit sen deuh ram leh thutak fe a inspector en ran chung chuan, "nei hran lo ve. Inspector, i hria ang a, heng khawmu chawi tih te, lasi chungchang te, ramhuai chungchang te leh hmanlai thil chungchang thawnthu te a awm a, heng kan thawnthu neih ang deuh te pawh hian thil hi a kal anih kan han ring hlel rum rum a, khawmu chawi ni a han puh palh mai pawh hi thil awl tak a ni"



Vcp nunthara chuan dawhkan a bottle a tui chu in tumin bottle chhin chu a han herh ngawt ngawt a a chhin chu a thlauh ta nghe nghe a, tui bottle chhin chhuat a tla chu kut khur dar dar a han ban in hmel zangkhai tak put luih hram erawh a tum hle mai a, a awmdan rengah pawh chuan Vcp chu a chau in a hah ve viau ang tih a hriat reng mai.



Vcp nunthara vek chuan sehchilh deuh lek lek hian, "a sachanna ah a chesual palh a nga chu chu ka pawh chhawn lovin a boral zui ta a ni ang' han ti dawn ila theihtawp chhuah chuan a zawn hna chu kan tlingtla ve si a, a ramvahpui te nen ngei uluk taka kan dap chhuah hnu leh a ram chinchang hre deuh te ngei pawhin theihtawp an chhuah a ni a. Mahse, a tawpah chuan 'a mak' tih mai loh chu han tihvak ngaihna a awm tlat lo a ni.



"Inspector, mipui lam pawh kan chau tlang a, zan kan meng rim a, chawlhkar khat tawp chu kan awllo a ni. chutah, chawlh karkhat dang leh tawp chu a hma a mi ang chiahin hun kan han hmang leh a, mipui lam tlawmngaihna pawh hi a fakawmin a lawmawm teh asin" tiin a aw chu a chhang deuh tuak mai a, a khat tawk chuan a kut veilam chu thak ni awm tak hian a hiat leh seuh seuh thin bawk.



Chutia Inspector leh vcp an in kawm mek lai chuan inspector nau te pawh chuan ramvak a chhuak te ho chu thu an lo zawtfiah ve mek zel bawk a, nimahsela sawi tak angin mibo te han chhui zui theihna tur emaw, mibo te chin han hriat zui theihna atan a thil tangkai han pharchhhuah tur erawh hmuh a hriat belh tur a awm lem lo. Ramvak a chhuak te pawh chuan chutia sa chang a an thut lai a boruak a thamral ta daih ang mai a an thian te an han bopil ta mai chu a mak tih bak a han chhui zui vak ngaihna an lo hre tawh bik lo ani.



Inspector chuan Vcp nunthara, mit meng sen deuh ram reng leh thutak em em reng mai chu a en vang vang a, Chutah thawk chu han la halh in Vcp hnenah chuan, "imm, i han sawi hmang chuan thil thlen danah thil inthukru emaw inphum ru emaw a awm ngei ni a han ngaih theih tur a vang viau mai a, mahse he case hi chinfel anih hma leh mi bo ta te chin hriat anih hma chu rilru leh beng kan chhit tlan reng erawh a tul hle dawn niin alang. Chumi ram, luiral ngaw intih awmna hmun leh a zau zawng awm ang tur te, a boruak awmdan leh tun hma a chanchin sawi tur a neih ang ang te hriat ka duh dawn a ni" a han ti leh a.



Vcp nunthara chuan kuhva chu èi turin a han buatsaih pah mawlh mawlh a, chutah ngaihsam hmel deuh hian, "ni e inspector, he thil hi thil mak han tih mai loh chu tihvak tur a awm tawh lo niin a lang. Khawtlang kan beidawng tawh a, mizo dana ni sarih chhung ngawrh tak leh uluk taka zawn hna kan thawk chungin mi bo te chu hmuh an ni Chuang lo va, 'a rilru a buai thut ani ang' ti zawng a ngaihtuahna thlengin kan seng ve a ni" tiin a kuhva chu a han hmawm a, a seh nghal chak chak mai.



Chutah, Vcp bawk chuan mize thutak fe a choka lama a fate chu han au leh in an thutkhawmna pindan lam a tui han chhawp sak tur chuan a han ti a. Chumi lai chuan inspector chuan, "imm, Ni e pu nunthar, i han sawi dan kalhmang atanga han thlir chuan thil mak han tih loh rual chi chu a ni tawh lo, mahse case file a ni a, keini police lam chuan tih tur kan nei a ni, kan tih tur chu a awlsam zawk nan in chau tlang tawh viau na in khawtlang mite tawiawmna leh tanpuina thlengin kan mamawh ngei ang, kan tihdan kalphung pangngaiin thu pawh inzawhfiah a tul fo maithei a,



"tin, a hmunhma han thlithlai te pawh chu a pawimawh dawn a, keini lam kan beidawn hma chu case hi a kal ngaiin a kal reng a ni tih min hriatpui ula, he laia kan hna kan thawhna kawngah pawh nangni lam nen atul hunah chuan thawhhona tha kan neih ngei ka beisei tlat a nia" Chutah, Vcp chuan a aw chhang deuh tuak reng chu nin hmel fe a han thian deuh hrâwk in,



"Pu inspector, beiseina chauh hi a ni mai a niang chu tun atan chuan, Nimahsela patling a pum pa meuh tan chuan hei chen hi hma kan han la ve ta a ni a, ka tawng huatthu suhah keini khawtlang meuh pawh kan beidawng tawh ani a, chutia nangni nen a hma te han lak ho anih dawn takah pawh chuan" tiin a kuhva ei chu dawhkana meizial vap bawmah chuan a han chhak pharh pharh a, chutah chhunzawm lehin,



"ni e, beiseina hi a ni deuh mai e, beisei neih hi a pawimawh a mihring tan hi chuan, hetia kan beisei loh lam atanga thil kan han tawn takah hi chuan" dawhkana bottle a tui bawk chu a han lem leh puat puat a chutah, "beiseina neih ran hi a pawimawh ani" a jacket ip a a sahdah ah chu lachhuakin a han hmuam leh rih a. chutah, "beiseina chauh hi a ni mai e" tiin beidawng hmel fe chuan a en ngai chu a en ta reng mai a.



Chutah, hmel zangkhai put luih hram tum chuan, "aa, ni e, intawiawm tawn te pawh chu a tul a ni mai a" a ke veilam chu a ke ding lama han hlang leh in, "inspector, ka ngaihdan chuan, tlang deuhin, he tiang thil hi keini ngei pawhin a kan la tawn ngailoh thil a ni a, a mak hi kei chuan ka ti rih viau a ni tun atan chuan" tiin a tukkhum lam bawk chu a han hriat leh malh malh a.



Vcp chu a aw te a lawi rut thei a, a kut chu a khur leh dar dar thin bawk. Thahrui a nei lovin a chau tih a hriat a. Chumi rual chuan a ngaihtuahna erawh a kal thui hle thin ani tih a hmelah leh a awm dan rengah pawh chuan a hriat tel theih bawk awm e.



Kuhva chu a han hmawm leh a, "inspector mi bo ta duhsaka leh duhsanga te hi zu in te hi an hrat thin a, keini khawtlang hruaitu te nen ngei pawh a han in nghirngho chang hi kan nei thin a, a zialo tak Tak ani, an bo zan khan zu an rui em ni ang tih te thleng in kan chhui zui ve asin"



Inspector chuan, "zu rui pawh chu lo nise, an bo ngawt danah engemaw hnuhma chhui zui tur chu a awm tur ani. In han sawi hmang a chutia hnuhma chhe te tak tak pawh hmuh tur awm malek lova an han bo pil hmak ringawt mai chu thil theih a nilo" alo ti thung a.



Inspector bawk chuan, "awle, tunah rih chuan hei chawhnu her a ni chho mai dawn a, chulai hmun, luiral ngaw awmna lam pan a chet kan thawh chu a tul rih a ni. Chulai hmun a min hruai tur chuan khami zan, thil thlen zana mi tu emaw ber, mi bo ta nena inhnim hnai ber te zinga mi kha ka mamawh a ni.



"Mi bo ta kianga chetla hnaivai ber a kha ni thei se ka duh khawp mai, tin midang pawh ramchhuak lovin In lamah hun hmang tam rih se ka duh khawp mai" chumi pah chuan inspector chuan uluk takin In chhung leh in bang vel te chu a han thlek kual pah dauh dauh reng bawk a, a ngaihtuahna chu a vak thui ve takzet si a.