Luiral Ngaw pui_ziaktu, Laltanpuia Chapter -6

[April Hmar Liverpool]

Luiral Ngawpui_ziaktu, Laltanpuia

Chapter_6

Zamliana leh rinmawii te pawh chu inspector ruata ngaihven tura rawn petek phei hi an lo ni a, tin Vcp nunthara chu a awmdan rengah pawh a lungawi lovin a mang a ang ru tak zet tih a hriat, "imm, pu zam, amah chu kan han bia a, a rawn let mek thu chu min hrilh alawm, eng em a tilo turah ngai ang u, alo thleng ve mai ang" tiin a inleng te chu thlamuan a tum ve viau a, mawii chuan uluk tak a ngaihtuah chung chuan, "ka rindan alo ni hauh lo. Kan pu chu hetiang hi anih ka lo ring hauh lo a, a buai ve leh tan ni ngei tur a ni, mama te kha an bo hma Khan hetiang ang hian an lo awm tawh thin a ni ngei ang, keini lam khan kan lo chik ngai lo a ni.

"Mama pawh kha ramvaka an chhuah dawn khan a phurin a helhhawlh viau mai a, thil te kha a tibo a, kha kha a bo tur enge maw in a mawlh anih hi tun hnu hian ka ring ta a ni. Kan pu pawh kha a chhuah dawn khan a phur in a helhhawlh hmel riau mai a, kei zawng han phone leh teh u, ka ngaih hi a tha mawlh love, a bo veleh mai ang tih ka hlau em mai" tiin pi mawii chu a mangang hle mai a, Vcp nunthara chuan, "rinpui, ka han be leh dawn chhin a nge aw" tiin phone chu a han chuh leh thuai a, chumi rual chiah chuan inspector chu thaw hlawi hlawi chung hian in chhung ah chuan a rawn bawk lut rawp rawp mai a, a chauh em avang leh a hah em avang chuan a mit te chu a meng pual rawm rawm thei hial a.

Chutah, aw chhang tuau chung chuan tui chu a han lam a, hmanhmawh zet hian nu ber chuan inspector ruata chu han tung tho thuaiin, "thara hei, min rawn pui teh u, inspector hi a chau lutuk a nia" tiin thutkhawmna pindan lam a awm te chu a han au a, Chuveleh choka lam chu an pan nghal thuai a, chutia inspector ruata chau leh hah thi kul a in chhung a a rawn invawm luh tak rawihah chuan thil rapthlak leh mak tak a tawng a ni ngei ang.

Thutkhawmna pindan lamah chuan thukhawm in inspector chuan thil pawimawh tak sawi tur a neih thu chu a han hrilh hlawm a, a chauh zual za pui te a han reh deuh hnu chuan tui bawk chu han lem leh a, la thaw hlap hlap chung chuan heti hian a han ti a, Vcp nunthar hnenah chuan,

"Pu nunthar, ka thusawi tur hi thu pawimawh tak a ni" a han ti a, a hmel chu a thutak in hmuh a hreawm lek lek thei hial. Chuveleh Vcp chuan, "ngawi teh pu inspector, i thil tih kha i Chiang a maw? eng thil chiah nge i zuk tawn a? eng thil chiah nge i va tih?" a han ti a, chuveleh nin hmel zet hian inspector chuan, "pu nunthar, ka sawi dawn alawm, min lo tur suh" a han ti a.

Nakin deuhah chuan inspector chuan a hah zual za pui te a reh tak hnu chuan mi bo ta duhsaka leh duhsanga te nu leh pa zamliana leh rinmawii te hma ah chuan he thu hi a sawi ta a.

"Pi leh pu te u, tunah chuan hnuchhuina hmawr chu ka bawk thei tep e, thil tam tak ka hrechhuak in ka hmuchhuak tawh a, amaherawhchu he thil ka sawi tur erawh a lungchhiatthlak in a pawi takzet a ni tih hi kan hriat hmasak a ngai. Vanduaithlak taka Khawmu in a chawi bo tak duhsaka leh duhsanga te chu tunah chuan mihring an tling tawh lo tih hi ka sawi duh ani" thawm chu a reh diak a, zamliana leh rinmawii te chu an hmel a nguiin hmuh an nuam lo hle. Vcp chuan, "imm, chu thu chu mi zawng zawng in kan rindan ani alawm pu inspector" alo ti thuai a.

Chutah, inspector remruata vek chuan, "tichuan, hei hi ka sawi leh duh a ni. Duhsaka leh duhsanga te chu luiral ngaw huai nilovin huai dangin a tihlum a ni" mak ti zet hian zamliana chuan, "pu inspector, chu lam chu dahtha ila, eng thil nge ti tura chhuak i nih reng reng? Kan lo ngaihtuah in kan lo mangang hman asin, chin hriat loh te hian i bo ve mai hi kan lo hlau lutuk alawm" alo ti ha a, chutah rinmawii pawh chuan hmel zangkhai put tum tak chuan, "pu inspector, hahdam i mamawh niin ka hria, in hmun lamah in enkawl tha la, he lam chu i ngaihtuah rih loh a tul ani" tiin inspector chu a ngaihtuah hmel hle mai a.

Chu lai a awm te chuan inspector ruata rilru chu a buai zo ta ni ngeiin an ngai a ni. "Nilo, nilo, thil engkim ka hria, thlarau te chuan thil awmdan engkim min hrilh asin" a han ti leh a, Chu thu a han sawi leh zet phei chu chu laia awm te chu an tui tawh lo viau ani tih an awmdan ah a lang. Chutah, inspector chuan, "nilo, nilo, in fapa te chu an rûang tal in hmu duh lo em ni?" A han ti leh zet chu chu lai hmuna awm te chu mak tiin an meng rang kawk kaw hlawm a,

inspector vek chuan, "imm, ti kha chuan a zia ta deuh e" zamliana leh rinmawii te chu uluk fe a thlek vang vang chung chuan, "pu zam, pi mawi, in fapa te rûang chu in hmu duh em?" a han ti leh a, Chutah zet zawng inspector thluak chu a buai zo ta ni a ngaiin zamliana chu a thin a rim ta thut mai a, a thutna atanga tho thutin,

"Pu a, i tawng i thlahdah rei mah mah a ni, thu lawi lo leh ho mai mai i sawi rei ta mah mah, kan fa te chu chutia infiamnan leh uanpui nan mai mai a hman hi kan duh hauh lo a nia, i uang rei mah mah lo maw? i ti mah mah i ti ve lo em ni?" Chuveleh, Vcp nunthar chu alo inrawlh thuai a, "a khaih khaih, pu zam, inbengdai teh ang khai, a mawi lo ngai e, kan pu ber hi hei tunah chuan a harh tawh turah ngai ila, ruahmanna dang te pawh ala nei leh ngei ang a, ama thu hi i han ngaichang phawt rih zel mai teh ang, naktuk zan lam hian luiral hmunhma te chu zan ah ngei i va fan harh pui ila a zia ve mai ang, keimah ngei hian ka va ho teh ang" alo ti ta a.

Chuveleh, ngun zeta a ngaihtuahna lo hmang mek inspector chu a thutna atang chuan a tho deuh hluai mai, Vcp thusawi pawm pui zet chung chuan, "chu chiah pu nunthar, chu chu alawm ka duhdan chu, ka rilru hria ni awm ziazang a, i fing takzet a ni. Kan station lama kan let a hun tawh mai dawn si a, keimah leh kan Vcp ho hian luiral ngaw chu zanah ngei va thlithlai leh ila chu chu a hmawr bawkna atan ni bawk rawh se" tih leh in atang a chhuah a rual nghal vut a, mi dang chu a ngaihna hriat loh hmel taka ka ho chung chuan an lo ngawi thiap reng ringawt a.

Chutah, zamliana pawh chu inspector a tawngkhum dan avanga rilru inthiam lo tak chung chuan, "imm, ni teh se, ni e, tawngkam mawilo tak tak ka han chhakchhuak ta mai pawh a, mawi lo takin kan pu ka han tawngkhum ta mai a, min hrethiam ru, ka insum hman pek lo alawm mawle, ni e, kan Vcp pu nunthara ho hian a tawp nan kan inspector ruahmanna hnuhnung ber chu hlen pui leh hram ni teh se, kan Vcp pu nuna'n a kaihruai anih chuan thla te pawh a muang nge nge e,

"thil thalo a thleng tawh em lovang chu maw, amah inspector ber in rilru lam buai te awmna lamah min liamsan tawh mai hmel si a, a tawp nan a a remruat dan han zahsak pawh a phu ve alawm le, chutihrual chuan kan fa te bo dan chungchangah kan chhungkaw aiawhin thusawi duh tam tak ka nei a, kan vc zahawm tak tak te an hah tlang a, keimahni avanga khawtlang kan tihbuai na zawng zawngah inpe zo takin kan vc kaihhruaina hnuaiah mama te zawn hna thawh a ni a, kan chhungkaw tan chuan theihnghilh mai theih ani tawh lovang,

"kan fa te chu rawn kir leh tawh dawn lo mahse keini tan pawh hmalam pan a ke pen zel a tul ani mai a, theihtawp chhuahin kan khawharna te hi lakkian a la ni ve mah na" tiin zamliana chu a insum zo lo thelh thelh mai a, a mittui chu a hru a chutah han thawk huai pah chuan, "khaw nge, keipawh hi hei zan a rei tawh si a, ka va haw tang nge" tiin haw tur chuan a intintuah nghal a.

Rinmawii pawh chuan, "ni e, pu Zama sawi tak ang khan, kan chhungkaw hnih harsatna tawh avangin khawtlangin kan buai a, kan vc te pawh an hah hle a, chuvang chuan engkimah kan kan chung a mite thatna hi kan theihnghilh thei tawh dawn lo anih hi, keipawh ka haw phei ve nghal mai a nge"

Vcp nunthara chuan dam thlap hian, "ni e pu zam, pi mawi, hahdam takin awm ru, thil thleng chu thil thleng a ni a. Khuarel vanduaina hi keini mihring te mai tan hi zawng dan rual an ni silo a, kan lungngaihna te, kan lusunna te pawh kan inhnem tawn zel ang, khawhâr in tumah kan awm bik lovang" tiin an haw tur chu pawn thleng chuan an han thlah a, mi dang te pawh chuan zamliana te haw tur chu tawngkam tha nen thlamuang taka awm tawh tur te chuan an han tawng thlamuan ve mawlh mawlh reng bawk a.

Rinpuia chuan a mutna a lo let ngat a pu inspector ruata hnenah chuan, "sir, thil tul lo tak a ni. Kan chungah mi te an thinur mai ang maw le, an thlarau biak tih te chu a tih a han tih chi a ni miah lo asin"

Chuveleh a tih tawhah inchhir a tum lo tih hriat tak chuan inspector chuan a mutna atanga han intung tho in, "rina, ka thil tih hi a atthlak na ka hre bik reng reng lo. Ka thil tih hi tih loh tawp tur emaw thil atthlak anih si chuan heng an ngaihdan atthlak tak tak te pawh hi engatinge an thlak theih bik miah loh ni"

"Sir, enge i sawi awmzia?"

inspector chuan lungawi loh hmel fe hian, "rina, khawtlang rilru sukthlek i ti ani lawm ni nang ngei pawh in, khawmu in a chawi bo hi i ring tak tak em?"

"Sir, kawng tinrenga han chhuidawn pawhin khawmu chawi bo tih mai loh chu han puh tur a vang em asin, engmah hnuhma a awm silo, khawtlang mai nilo khaw thenawm te nen lam luiral ngaw an dap chhuak a, chutah hmun hrang hrangah a thlalak nen lam thehdarh a ni a, thehhmeh ang maiin an reh vang vang mai si a, rilru chuan khawmu chawi bo anih chu a ringhlel lo thei ta lo a ni"

"Chutak chu alawm ka sawi chu, engvanga thlarau biak tuma chet ka thawh chu mak ti nge an nih? engvanga ka ruahmanna te hi min zah saka min ngaihpawimawh sak lo nge an nih? a han ti leh a, "ni e sir, khawmu in a chawi bo chu an rindan a ni tawh a, an beidawng tawh a, tin mi bo te chu nung dama an awm an ring tawh hek lo, chuti anih chuan an thlarau biak pawh tum a ruahmanna i han siam leh chet ila ta chu engtia han ngaithei lo viau nge maw an nih leh si le? ni e sir, ka lo hrethiam vek alawm, khatia an rûang chungchang i han sawi khan pu Zama kha a lungawi lo ta viau niin a lang.

"Chuan sir, an rûang awmna chu i hre tak tak em ni a?" A pu chhanna nghakhlel tak chuan a han ti a, inspector ruata chuan, "ngawi teh rina, joela kha han ko teh, naktuk bak hi he laiah hun kan nei thei tawh dawn silo a, naktuk hian kan zahawmna he lai a mi ten an hriatchhuah leh ngei na turin kan nau te midang he laiah rawn thang vat teh se khai"

"Sir, chu thil chu tih kher a tul em ni?" inspector remruata chuan mi in a chunga an rilru puthmang tur awm ang chu a hrethiam vek a, mi â leh rilru buai ta ang ruakah an chhhuah tan tih chu a hrethiam a ni. Chutah lungawi lo fe hian, "a tha alawm, he thu hi ka la sawi chhuak ngei ang, ka laka an rilru puthmang dik lo hi, kei chuan thudik an hmaah ka pharh ngei ang a, thil mak a an ngaih hi a hrilhhfiahna ka la hmuh tir ngei ang".

"rina, joela nen pawh khan mu tawh ru, hei a tlai tawh si a, nak zanah ramchhuah te chu ka duh dawn si a, kei pawh mutthilh vat ka han tum a nge" tiin mutthilh tum chuan a han intintuah ta a.

A tuk khua a var a, inspector remruata chu a hmel hmuh a nuam in hmel zangkhai tak a pu a, zan lama thil thleng pawh chu hre tawh lo ang mai hian a awm, khaw chhungah chuan inspector thil tih chungchang chu a darh nghal thuai a, eng eng emaw sawi sep sep a tam hle. A tawpna atana luiral ngaw han thlithlai leh tur chuan Vcp nunthara pawh chu a in ring tawh hle a, inspector duh ang tak alo ni nen, an haw hma ngeia inspector kiangah ngei tumkhat na na na chu han chettlat ve a duh a ni.

Chutah, thingpui in pah a a ruahmanna midang hrilh mawlh mawlh reng chung chuan inspector chuan, "pu nunthar, hetiang a thil kalpui ka duh nachhan chu nang berin i rilru puthmang alo ni ve chiah bawk a, tin he luiral ngaw huai hi han runluih sak ka duh tel khawp mai, kan rual a ramchhuak ve tur hian kan nau min kalsan ta duhsaka te ramchhuah tuma ramchhuak te ngei kha ni ila ka duh a ni, nang leh keiin kan belh ang a, enge thil thleng leh chu kan hria ang" a han ti a, vcp pawh chuan inspector thusawi chu pawm pui zet hian a lu chu alo bu ve nghauh nghauh bawk a.

Thil thlen tawh dan te uluk taka ngaihtuah a chhut in fimkhur pawh a tul viau ngei ang le, tum danga an tihdan lo ang deuh a kal hrang lova a hu ho deuh zawng a chet an lak pawh a tul ang.

Zan chu a ni tawh mai a, khaw mipui te pawh chuan chutia hmunhma thlithlai leh tura Vcp leh inspector ho a luiral pana an han thangchhhuak leh ta pawh chu an ngaihven ru in an bengkhawn ru hle hlawm a, khaw chhung lamah chuan zan hmasa a inspector ruata thil tih chungchang te, duhsaka leh duhsanga te chu khawmu in alo chawi bo ngei thu te, mi bo te chu thi tawh a an ngaih chu a dik ngei ani tih tichiang tura mi bo ta te thlarau a biak chungchang te titi a tam hle mai a. Inspector ruata chet dan chu thenkhat chuan atthlak tiin awih lo viau mahse, thenkhat erawh chuan a inpekna leh a thahnem ngaihna chu zahawm an ti in, a mawi lo thleng thleng pawha inhuam taka a inpek ral raihna te chu fakawm an ti ve daih thung.

Mitin mai chuan inspector ruata leh Vcp ho a ramvak mi ten luiral ngaw an han pan leh ta chu an ngaichang ru thap reng mai ani. Khua ah chuan thawm ri va hriat tur pawh a tam viau lo. Inspector leh Vcp ho a thangchhuak leh ta te chuan eng thu thar emaw tak an rawn hawn ngei beiseina ai mah chuan chumi zan chuan bo an awm leh mai angem tih hlauhthawn rukna chuan boruak chu a tuam mek pawh a ni ta ve ang.

Chanchinthar ah chuan lallen khua a thil thleng chungchang te, a chhui chiang tu te ngei pawh an beidawn tawh thu te, police lam chauh nilo, thu neitu lian lam thleng pawh a chu case chu tihtawp tawh mai duhna a awm chungchang te, mipui tam zawk rilru sukthlekah pawh mi bo ta te chu khawmu lak bo an nih rinna te chu chu case a a hmawr bawkna anih tak chauh thu te, luiral ngaw chuan huai nei ang a sawi chungchang te chu chanchinthar puangtu vanlalchhuangi chuan a puang malh malh reng a. Chumi anih rual chuan chutia mi pahnih ngawt mai an khuang cher bo chungchang a a hmawr bawkna fum fe awm lo leh thil awmzia chhui chhuak lova a han zuih ral ta mai tur erawh mizo te tan chona thar anih ngei a beisei awm ma nge.

Zan hun chu a liam ve zel a, khaw mipui te chuan an rilru a hlauhthawn rukna cham ru reng chu hreawm an ti tlang kher mai. Thenkhat rilruah chuan Case chu tihtawp anih chuan luiral ram lamah reng reng mi tumah a huho pawha ramchhuak tawh ngailo tur a duhna thinlung chu a intuh nghet viau mai a. Chu ram tihbaiawm tak leh ngainatawm lo zet mai chu kumkhua a tlawhpawh tawh lo a en liam mai mai chu mi tam tak rilru puthmang a ni chho mek si a ni.

Zan dar sawm leh pakhat a hnai thuak tawh a, thenkhat chuan mutmu tuahin thawm a reh thiap mai. Vcp nunthara te in ah chuan inleng thenkhat leh nu ber zeli ho chuan titi thu khawchang sawi ho in hun chu an la hmang tlang hlawm a, ramchhuak ta te chinchang ngaihven pah in zan tum tawi nan tiin an hun tawn meka an ngaihdan hrang hrang sawi ho nan chuan hun an lo hmang ve mek a ni.

Hun chu a liam ve bek bek zel a, bang a sana chek ri pawh a fiah tial tial, dar sawm leh pahnih, ramchhuak ta te kha dar riat hnu lama chhuak an ni a, ramvah kalphung pangngai ah chuan zing lam dar 2 atang a dar 3 bawr a rawn haw tura ngaih an ni. Mahse, ramvak pangngai ang a kal an ni lova, a hmunhma thlithlai tur ringawt a kal an nih dawn avangin in lam pan a chet an thawh chu a hun tawh viau a ni.

Nakin deuhah chuan Vcp nupui fakzeli chuan phone call a dawng ta a, chumi rual chiah chuan midang ho pawh chuan chu lam chu an lo ngaihven nghal thuai a, inspector ruata phone call alo ni a, "hei, in kan rawn thleng chu a ni mai, vc secretary ramnghaka in ah khan kan thu leh hla ngaichang turin vc member te leh NGO hruaitu zawng zawng, mi bo ta duhsaka nu leh pa te leh duhsanga nu leh pa te nen, an vaiin lo awm rawh se, kan rawn thleng dawn e" tiin inspector chuan phone chu a titawp zui nghal a.

Chuveleh, zeli chuan ngaih tha lo deuh chung chuan inspector thu hrilh chu midang ho hnenah chuan a han sawi chhawng thuai a, chuveleh zeli chuan vc member dang te leh NGO hruaitu te chu a han be pawp leh nghal zung zung bawk a, vc secretary ramnghaka in ah chuan NGO hruaitu te leh vc member zawng zawng te chu hmanhmawh takin an tleh khawm ta nghal a.

Minute sawm dawn chu ramchhuak te chu an lo ngaichang leh ren rawn a, chutah pawn lamah chuan thawm an hre ta, inspector remruata chuan kawngkhar chu a han pawt hawng rawk a, in chhunga lo awm te chu an lo phawk tlang hle, an rilru tur chu hrethiam in inspector chu in chhung lamah chuan a han pen lut nghal thuai a.

inspector chu a chauh hmel takzet, a ban veilam chu na tih hmel tak chuan a kut lehlamin a dawm ran mai a, a kawr hak dan pawh chu a dik hauh lo, Vcp nunthara chu rawn lang ve leh in in chhunga lo awm te chuan ngawi rengin an lo thlir thap mai. Vcp nunthara chu thian li te pawh chuan an rawn zui lut ve nghal bawk a, an hmel chu a pawr in hmuh an hreawm tlang kher mai, inspector hliam alo hmuh chuan Vcp nupui zeli chuan, "pu inspector, i ban kha engatinge? in chesual em ni?" tiin alo ngaihven nghal thuai a, chutah inspector chuan, "pi zel, a ngai lo ve, tunah rih chuan ka tui in a hal takzet a ni" tiin tui chu a han lam nghal thuai a, chuveleh nula ho chuan ramchhuak te thingpui in tur chu an lo buaipui ve nghal thuai a.

khawtlang hruaitu te hmelah chuan chanchin thar hriattur a awm ngei beisei in an lo nghakhlel tawh ani tih chu a lang chhhuak hial a, kawngkhar chu chhung lam a han kalh pah chuan rinpuia chuan, "sir, engkim a tha zel e" a han ti a, chutah rinpuia leh joela te chu pasaltha te kiangah chuan dingin an hmel chu a thutak tlang kher mai.

Chutah le, inspector chu a awmdan rengah pawh chuan a thinrimin a lungawi lo takzet a ni tih a hriat reng mai si a. in neitu vc secretary ramnghaka pawh chuan a aw chu han then kharh pah chuan, "awle pu inspector, in va ramchhuak chu hnuhma thar emaw han hmuh leh hriat thar te in nei em? Keini lam chuan kan lo nghakhlel in kan lo ngaihtuah tlang takzet che u a ni, thin thiin mut mu kan tuah thei meuh lo, in chanchin hi kan lo ngaichang reng a ni" tiin Vcp nunthara chu enge maw a sawi beisei tak chuan a han melh pah zauh bawk a. Vcp erawh a ngawi reng a, hnuai lam bih ngat in a hmel a dur hle.

inspector remruata chu a han thaw leh halh thin a, a awmdan rengah chuan a thinrim takzet tih a hriat a, chuveleh zamliana chuan inthiam lo tih hriat tak mai hian inspector chu han en in, "pu inspector, hman zan a i chunga tawngkam thalo tak ka chhahchhuah avang khan ka inthiam lo khawp mai" a han ti a, chuveleh inspector chuan zamliana leh rinmawii te chu han melh tawn vat vat in, "pu zamlian, pi rinmawi, he laiah, in khawtlang thlawpna tha tak chang a in hriatthiam tawnna te, intawiawm tawnna te, tha takin min lo dawngsawng a kan lawm, tunah meuh chuan thil mak pawh enge anih hriatchhuah a ni ta si" Chu lai a awm te chu inspector thusawi avang chuan mak tiin an thum nghal hak mai a.

Chutah, inspector vek chuan, "khawngaihin, a pawimawh tak tak chin chauh lo ah chuan ngawih chuhin ka thusawi tur te dawhthei takin in lo ngaithla hram hram dawn nia" Vcp nunthara lam chu han hawi in zamliana leh rinmawii te lam chu a han pan hnai leh a, chutah inspector chuan a thinrimna chu insum tih hriat tak hian aw ka dam zawk hian,

"Pi mawi, pu zam, khawmu chu hmuhchhuah an ni tawh asin" Chutah a aw ki chu muangchanga han san chho hret hret in, "imm, in fate chin hriat loh a dah bo tu leh a ngaihna reng reng hre lova awm tir tu che u, khawmu in tih ngei chu he laiah hian tunah an awm reng si a" a han ti leh a, chu lai hmuna awm te chu an phu nghal suau mai, mak tiin an meng rang kaw kaw hlawm a, chuveleh inspector chuan a ban chu han dawm vang vangin,

"in fate khawmu chawi bo ang a lan tira mipuite hrilhhai taka siam tu chu, chu ngei chu a ni tualthattu chu, amah chu in khaw tlang awp mek tu in Vcp pu nunthara ngei hi a ni. Amah leh kan pasaltha te hi in fate thattu chu an ni e" Chuveleh mak tiin an thum nghal hak hak mai a, rinmawii chuan hrilhhai zet chung chuan, "ngawi teh pu inspector, nang hi i rilru hi a la chiang chiah lo a ni a nge, thil atthlak tak tak i sawi tak mai le" a han ti bah deuh nak a, chuveleh thawm ri nghal hak chu ngaithei lo fe hian inspector chuan,

"khawngaihin i ngawi ang u, ka sawi lawk vek kha, thudik in hmu duh a ni tiraw? hei le, ka han hmuh tir ang che u chu" tiin thinrim engphiar hian, "khai le pu nunthar, ruatdik, jery, sena, danmawi, in puang ta che u le, thudik chu han puang ta che u" dawhkan chu a chum ri nghal bur a, inspector aw chu a ring tha leng lawng viau.

"Khami zan khan saw lai, luiral ngaw ah sawn in kal reng reng lo. Khati tak a hnuhma chhui zui tur a awm loh nachhan kha chu engdang vang a nilo, luiral ngaw ah reng reng in kal tlat silo a, in kal loh na na na chuan hnu hma chhui zui tur chu engvang in nge a awm theih reng ang ni? Tichuan tlanvawng mual lamah in kal a, duhsaka kha in bum ani. Tichuan duhsaka chu in that a, dawt tinreng in phuah ta ani. Khaw mu chawi ang in in lantir ta ani. Tichuan duhsanga a ni leh a, duhsaka in bum ang bawkin in han bum chhuak ve leh a, luiral ngaw sawn pawimawhna reng reng a neilo. Thil engkim, thil awmzia engkim chu thlanvawng mual lamah zawk ani"

inspector chu thinrim avang chuan a aw a khur hlawk hlawk thei hial a, Chutah aw nelawm loh leh vawt raih mai hian, "pu vcp, an rûang chhe tawh tak hi he lai a thudik tak hriat duh a nghak mek tu te hian an hmuh ve vat hi a tul a ni?" A han ti vawt leh raih mai a. Chutah, inspector vek chuan, "itsikna leh huatna avanga unau pahnih phiarru a ruahmanna felfai tak siam a luiral ngaw a ramchhuak tur ang a insawi a bum a duhsaka leh duhsanga te in thah zui tak avangin man in ni e, chuan pu vcp, hei i almirah safe chhunga i heroin dahthat pawh hi tan in chhung atang chuan dan phal loh thil ani tih hi ilo hrethiam ve tawh mahna" tiin dawhkan ah chuan heroin hawng khat hi a han theh thla zui zat bawk a.

"Rinpui, joel, kâwl kha han hren tir vat teh u, heng tualthattu te hi" inspector bawk chuan a han ti leh a, chutah meuh zawng lungchhe taka mittui tla nghal zung zung chungin ruatdika chuan, "pu zamte, pi rinmawi, inspector thusawi zawng zawng kha thudik tak an ni e, a va han pawi tak em, lalpa Pathian min ngaidam rawh, eng thil sual nge ka tih tak mai le, khawngaihtakin. Duhsang, lalduhsak, in thlarau tal chuan min ngaidam ru aw" tiin chhuatah chuan a han thingthi a, pawi ti tak leh a lungchhe tak chuan a tap zui nghal ngawih ngawih mai.

Chuveleh, a thian midang pawh chuan inspector thusawi chu a dik thu leh duhsaka leh duhsanga te chu an mahni thah ngei anih thu te chu sawiin lungchhe tak mai chuan an mittui chu a tla nghal zung zung hlawm a, chutah le mak tih avanga meng zau kawk kawk chung chuan rinmawii chu luhaiin a tlu dawn ta mai, Chuveleh midang chuan an lo dawm khalh thuai a.

Chulai hmun a awm te chuan mak tih avang leh hrilhhai avanga che lo chang lek lo chung chuan an khawtlang hruaitu Vcp nunthar a leh an khaw pasaltha anga an lo ngaih thian li te chu an en vawng vawng ringawt mai a ni. Tualthattu te chu lungchhe tak a inhnit hlawp hlawp chung leh ngaihdam dil mawlh mawlh reng chung chuan thing thiin an Kun tlawk tlawk reng mai a. Vcp nunthara pawh chuan vanvadak meuh chung chuan, "eng thil nge ka tih tak mai le" a tichhuak sap ve hial a.

Inspector chuan duhsaka leh duhsanga te rûang hmuh hreawm zet mai thlalak chu chu lai hmuna awm te hnenah chuan a han entir a, chutah meuh zawng chulai hmun a awm te chu pawi tih avang leh lungchhiatna a khatin an thinlung chu a rum nghal vawng vawng mai.

Zeli chuan awih har ti tak chung chuan a pasal chu a han din hnaih a, "mami pa, eng thil nge thleng ta mai hi. Enge thil awmzia hi?" a mittui tla ah chuan hriatthiam lohna mittui a tel ngei ang, zamliana pawh chu a rilru a na hle a, "sente, dika, inthian hi maw mama te lo thukru char char tu chu, khawiah nge an awm ang tiin mangang in kan awm asin, engatinge lalpa, eng em em hi nge keini chhung hian i lakah pawi kan khawih le aww, a va han na tak" a hnuk a ulh a, a tap hleithei lo, na ti tak chung chuan a indâwm kun ve ngawih nghawih mai ani.

Tap thawm te a rik tak deuh laih laih rengah chuan thenawm khawveng te pawh chu an rawn pungkhawm tak tak hlawm a, chumi rual chiah chuan police siren ri chu a rawn ri zui nghal bawk a.